៦. សេនាសនក្ខន្ធក

បុច្ឆា – បញ្ច អាវុសោ លេណានិ ភគវតា កត្ថ អនុញ្ញាតានិ, កំ អារព្ភ កិស្មិំ វត្ថុស្មិំ អនុញ្ញាតានិ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតានិ, សម្ពហុលា ភន្តេ ភិក្ខូ ភគវន្តំ ឧបសង្កមិត្វា ឯតទវោចុំ ‘‘រាជគហកោ ភន្តេ សេដ្ឋី វិហារេ ការាបេតុកាមោ, កថំ នុ ខោ ភន្តេ បដិបជ្ជិតព្ព’’ន្តិ, តស្មិំ ភន្តេ វត្ថុស្មិំ អនុញ្ញាតានិ.

បុច្ឆា – កថំ អាវុសោ វិហារា បឋមំ ឧប្បន្នា, កថញ្ច តេ បតិដ្ឋាបិ តា.

វិស្សជ្ជនា – ឯកាហេនេវ ភន្តេ រាជគហកេន សេដ្ឋិនា ឆដ្ឋិវិហារា បតិដ្ឋាបិតា, តេ ឥធ ភន្តេ សដ្ឋិវិហារា ពុទ្ធប្បមុខស្ស អាគតានាគតស្ស ចាតុទ្ទិសស្ស សង្ឃស្ស បតិដ្ឋាបិតា.

បុច្ឆា – វិហារេ អាវុសោ បដិភានកម្មំ បដិក្ខិបិត្វា មាលាកម្មាទីនិ ភគវតា កត្ថ អនុញ្ញាតានិ, កំ អារព្ភ កិស្មិំ វត្ថុស្មិំ អនុញ្ញាតានិ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ អនុញ្ញាតានិ. ឆព្ពគ្គិយា ភន្តេ ភិក្ខូ វិហារេ បដិភានចិត្តំ ការាបេសុំ ឥត្ថិរូបកំ បុរិសរូបកំ, តស្មិំ ភន្តេ វត្ថុស្មិំ អនុញ្ញាតានិ.

បុច្ឆា – យថាវុឌ្ឍំ អាវុសោ អភិវាទនាទីនិ ច អគ្គាសនាទីនិ ច អនុជានិត្វា សង្ឃិកំ យថាវុឌ្ឍំ បដិពាហន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អន្តរា ច ភន្តេ វេសាលិំ អន្តរា ច សាវត្ថិំ ឆព្ពគ្គិយានំ ភិក្ខូនំ អន្តេវាសិកេ ភិក្ខូ អារព្ភ បញ្ញត្តំ, ឆព្ពគ្គិយានំ ភន្តេ ភិក្ខូនំ អន្តេវាសិកា ភិក្ខូ ពុទ្ធប្បមុខស្ស សង្ឃស្ស បុរតោ បុរតោ គន្ត្វា វិហារេ បដិគ្គហេសុំ, សេយ្យាយោ បដិគ្គហេសុំ ‘‘ឥទំ អម្ហាកំ ឧបជ្ឈាយានំ ភវិស្សតិ, ឥទំ អម្ហាកំ អាចរិយានំ ភវិស្សតិ, ឥទំ អម្ហាកំ ភវិស្សតី’’តិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឯកេន អាវុសោ ទ្វេ បដិពាហន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អាយស្មន្តំ ឧបនន្ទំ សក្យបុត្តំ អារព្ភ បញ្ញត្តំ, អាយស្មា ភន្តេ ឧបនន្ទោ សក្យបុត្តោ ឯកោ ទ្វេ បដិពាហិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – នវកេន អាវុសោ ឧទ្ទិសន្តេន សមកេ វា អាសនេ និសីទិតុំ ឧច្ចតរេ វា ធម្មគារវេន, ថេរេន បន ភិក្ខុនា ឧទ្ទិសាបេន្តេន សមកេ វា អាសនេ និសីទិតុំ នីចតរេ វា ធម្មគារវេន ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ អាយស្មតោ ឧបាលិស្ស សន្តិកេ វិនយំ បរិយាបុណិំសុ, អាយស្មា ភន្តេ ឧបាលិ ឋិតកោវ ឧទ្ទិសតិ ថេរានំ ភិក្ខូនំ គារវេន, តត្ថ ភន្តេ ថេរា ចេវ ភិក្ខូ កិលមិំសុ អាយស្មា ច ឧបាលិ កិលមិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – តិវស្សន្តរេន អាវុសោ សហ និសីទិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលានំ ភន្តេ ភិក្ខូនំ ឯតទហោសិ ‘‘កិត្តាវតានុ ខោ សមានាសនិកោ ហោតី’’តិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – មញ្ចេ ច អាវុសោ បីឋេ ច ទ្វិន្នំយេវ និសីទិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ សមានាសនិកេ អារព្ភ បញ្ញត្តំ, សម្ពហុលា ភន្តេ ភិក្ខូ សមានាសនិកា មញ្ចេ និសីទិត្វា មញ្ចំ ភិន្ទិំសុ, បីឋេ និសីទិត្វា បីឋំ ភិន្ទិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ទីឃាសនេ បនាវុសោ អសមានាសនិកេហិបិ និសីទិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ ទីឃាសនេ អសមានាសនិកេហិ សហ និសីទិតុំ កុក្កុច្ចាយិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បញ្ច អាវុសោ អវិស្សជ្ជិយានិ ភគវតា កត្ថ បញ្ញត្តានិ, កំ អារព្ភ កិស្មិំ វត្ថុស្មិំ បញ្ញត្តានិ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តានិ, សម្ពហុលា ភន្តេ ភិក្ខូ សង្ឃិកំ សេនាសនំ វិស្សជ្ជេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បញ្ច អាវុសោ អវេភង្គិយានិ ភគវតា កត្ថ បញ្ញត្តានិ, កំ អារព្ភ កិស្មិំ វត្ថុស្មិំ បញ្ញត្តានិ.

វិស្សជ្ជនា – កីដាគិរិស្មិំ ភន្តេ អស្សជិបុនព្ពសុកេ ភិក្ខូ អារព្ភ បញ្ញត្តានិ, អស្សជិបុនព្ពសុកា ភន្តេ ភិក្ខូ សង្ឃិកំ សេនាសនំ វិភជិំសុ, តស្មិំ ភន្តេ វត្ថុស្មិំ បញ្ញត្តានិ.

បុច្ឆា – អញ្ញត្រ បរិភោគំ អាវុសោ អញ្ញត្រ បរិភុញ្ជន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាឡវិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អញ្ញតរស្ស ឧបាសកស្ស វិហារបរិភោគំ សេនាសនំ អញ្ញត្រ បរិភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អធោតេហិ ច អាវុសោ អល្លេហិ ច បាទេហិ សេនាសនំ អក្កមន្តស្ស ច សឧបាហនេន សេនាសនំ អក្កមន្តស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាឡវិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អធោតេហិ បាទេហិ សេនាសនំ អក្កមិំសុ, អល្លេហិ ច បាទេហិ សេនាសនំ អក្កមិំសុ, សឧបាហនាបិ សេនាសនំ អក្កមិំសុ, សេនាសនំ ទុស្សិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បរិកម្មកតាយ អាវុសោ ភូមិយា និដ្ឋុភន្តស្ស ច បរិកម្មកតំ ភិត្តិំ អបស្សយន្តស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាឡវិយំ ភន្តេ សម្ពហុលេវ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ បរិកម្មកតាយ ភូមិយា និដ្ឋុភិំសុ, បរិកម្មកតំ ភិត្តិំ អបស្សយិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សេនាសនក្ខន្ធកំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – សេនាសនក្ខន្ធកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.