៣. វស្សុបនាយិកក្ខន្ធក

បុច្ឆា – វស្សូបនាយិកំ អាវុសោ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ សម្ពហុលា ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ហេមន្តម្បិ គិម្ហម្បិ វស្សម្បិ ចារិកំ ចរិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កតិបនាវុសោ វស្សូបនាយិកា ភគវតា អនុញ្ញាតា.

វិស្សជ្ជនា – ទ្វេមា ភន្តេ វស្សូបនាយិកា ភគវតា អនុញ្ញាតា បុរិមិកា បច្ឆិមិកា, អបរជ្ជុគតាយ ភន្តេ អាសឡ្ហិយា បុរិមិកា ឧបគន្តព្ពា, មាសគតាយ ភន្តេ អាសឡ្ហិយា បច្ឆិមិកា ឧបគន្តព្ពា, ឥមា ខោ ភន្តេ ទ្វេ វស្សូបនាយិកា ភគវតា អនុញ្ញាតា.

បុច្ឆា – វស្សំ អាវុសោ ឧបគន្ត្វា បុរិមំ វា តេមាសំ បច្ឆិមំ វា តេមាសំ អវសិត្វា ចារិកំ បក្កមន្តស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ វស្សំ ឧបគន្ត្វា អន្តរា វស្សំ ចារិកំ បក្កមិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សត្តាហ ករណីយេន អាវុសោ បហិតេ គន្តុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ ឧទេនេន ឧបាសកេន បហិតេ ន គច្ឆិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – សត្តាហករណីយេន អាវុសោ សត្តន្នំ អបហិតេបិ គន្តុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អញ្ញតរស្ស ភិក្ខុនោ មាតុគិលាន វត្ថុស្មិំ អនុញ្ញាតំ.

អនុជានាមិ ភិក្ខវេ សត្តន្នំ សត្តាហករណីយេន អបហិតេបិ គន្តុំ, បគេវ បហិតេ.

បុច្ឆា – កិស្មិំចិ អាវុសោ អន្តរាយេ សតិ អន្តោវស្សំ បក្កមិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ កោសលេសុ ជនបទេសុ វស្សំ ឧបគច្ឆិំសុ, តេ វស្សូបគតា វាឡេហិ ឧព្ពាឡ្ហា អហេសុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – រុក្ខ សុសិរេ វា អាវុសោ រុក្ខវិដភិយា វា អជ្ឈោកាសេ វា វស្សំ ឧបគច្ឆន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ រុក្ខសុសិរេបិ រុក្ខវិដភិយាបិ អជ្ឈោកាសេបិ វស្សំ ឧបគច្ឆិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អសេនាសនិកេន អាវុសោ វស្សំ ឧបគច្ឆន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – តស្មិំយេវ ភន្តេ សាវត្ថិយំ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អសេនាសនិកា វស្សំ ឧបគច្ឆិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឆវកុដិកាយ វា អាវុសោ ឆត្តេ វា ចាដិយា វា វស្សំ ឧបគច្ឆន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំយេវ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ឆវកុដិកាយបិ ឆត្តេបិ ចាដិយាបិ វស្សំ ឧបគច្ឆិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បដិស្សវំ អាវុសោ វិសំ វាទេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អាយស្មន្តំ ឧបនន្ទំ សក្យបុត្តំ អារព្ភ បញ្ញត្តំ, អាយស្មា ភន្តេ ឧបនន្ទោ សក្យបុត្តោ រញ្ញោ បសេនទិស្ស កោសលស្ស វស្សំ វាសំ បដិស្សុណិត្វា វិសំវាទេសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – វស្សូបនាយិកំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – វស្សូបនាយិកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.