៤. បវារណាក្ខន្ធក

បុច្ឆា – វស្សំ វុដ្ឋានំ អាវុសោ ភិក្ខូនំ តីហិ ឋានេហិ បវារិតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ សន្ទិដ្ឋា សម្ភត្តា អន្តោវស្សំ នេវ អាលបិំសុ ន សល្លបិំសុ, តស្មិំ ភន្តេ វត្ថុស្មិំ អនុញ្ញាតំ.

អនុជានាមិ ភិក្ខវេ វស្សំ វុដ្ឋានំ ភិក្ខូនំ តីហិ ឋានេហិ បវារេតុំ, ទិដ្ឋេវ វា សុតេន វា បរិសង្កាយ វា.

បុច្ឆា – កតិ អាវុសោ បវារណា ទិវសវសេន ច បុគ្គលវសេន ច កាតព្ពាការវសេន ច.

វិស្សជ្ជនា – ទិវសវសេន ភន្តេ តិស្សោ បវារណា, តថា បុគ្គលវសេន កាតព្ពាការវសេនច.

បុច្ឆា – កតីនំ អាវុសោ សង្ឃេ បវារេតុំ ភគវតា អនុញ្ញាតំ, កតីនំ បនាវុសោ អញ្ញមញ្ញំ បវារេតុំ ភគវតា អនុញ្ញាតំ.

វិស្សជ្ជនា – បញ្ចន្នំ ភន្តេ ភិក្ខូនំ សង្ឃេ បវារេតុំ ភគវតា អនុញ្ញាតំ, ចតុន្នំ វា ភន្តេ តិណ្ណំ វា ទ្វិន្នំ វា អញ្ញមញ្ញំ បវារេតុំ អនុញ្ញាតំ.

បុច្ឆា – ឯកេន បនាវុសោ វស្សំវុដ្ឋេន ភិក្ខុនា កថំ បដិបជ្ជិតព្ពន្តិ ភគវតា អនុញ្ញាតំ.

វិស្សជ្ជនា – ឯកេន បន ភន្តេ ភិក្ខុនា ‘‘អជ្ជ មេ បវារណា’’តិ អធិដ្ឋាតព្ពន្តិ ភគវតា អនុញ្ញាតំ.

បុច្ឆា – បវារណំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – បវារណំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.