មហាវគ្គបាឡិ
សំគាយនស្ស បុច្ឆា វិស្សជ្ជនា
បុច្ឆា – ឧភតោ វិភង្គានន្តរំ អាវុសោ បោរាណកេហិ សំគីតិការមហាថេរេហិ កំ នាម បាវចនំ សំគីតំ.
វិស្សជ្ជនា – ឧភតោ វិភង្គានន្តរំ ភន្តេ បោរាណកេហិ សំគីតិការមហាថេរេហិ ខន្ធកា សំគីតា.
បុច្ឆា – តេ បន អាវុសោ ខន្ធកា វគ្គភេទេន កតិវិធា.
វិស្សជ្ជនា – តេ បន ភន្តេ ខន្ធកា ទុវិធា វគ្គភេទេន មហាវគ្គោ ចូឡវគ្គោតិ.
បុច្ឆា – មហាវគ្គេ អាវុសោ កតិ ខន្ធកា បរិយាបន្នា.
វិស្សជ្ជនា – មហាវគ្គេ ភន្តេ ទសខន្ធកា បរិយាបន្នា, សេយ្យថិទំ, មហាខន្ធកោ ឧបោសថក្ខន្ធកោ វស្សូបនាយិកក្ខន្ធកោ បវារណាក្ខន្ធកោ ចម្មក្ខន្ធកោ ភេសជ្ជក្ខន្ធកោ កថិនក្ខន្ធកោ ចីវរក្ខន្ធកោ ចម្បេយ្យក្ខន្ធកោ កោសម្ពកក្ខន្ធកោតិ.
បុច្ឆា – មហាខន្ធកេ អាវុសោ ពហូ កថាយោ, កតមា តាសំ អាទិកថា.
វិស្សជ្ជនា – មហាខន្ធកេ ភន្តេ ពោធិកថា អាទិ.
មហាខន្ធក
មហាពោធិបុច្ឆា
បុច្ឆា – តស្មាតិហ អាវុសោ តតោ បដ្ឋាយ តំ បុច្ឆិស្សាមិ, ភគវា អាវុសោ បឋមាភិសម្ពុទ្ធកាលេ កត្ថ កីវចីរំ កេនាការេន វិហាសិ.
វិស្សជ្ជនា – ភគវា ភន្តេ បឋមាភិសម្ពុទ្ធោ ពោធិរុក្ខមូលេ សត្តាហំ ឯកបល្លង្កេន វិហាសិ វិមុត្តិសុខំ បដិសំវេទី.
បុច្ឆា – តទា អាវុសោ ភគវា កីទិសំ ធម្មំ មនសិកត្វា កីទិសំ ឧទានំ ឧទានេសិ.
វិស្សជ្ជនា – តទា ភន្តេ ភគវា រត្តិយា បឋមំ យាមំ រត្តិយា មជ្ឈិមំ យាមំ រត្តិយា បច្ឆិមំ យាមំ បដិច្ចសមុប្បាទំ អនុលោមំ បដិលោមំ មនសិកត្វា តីណិ ឧទានានិ ឧទានេសិ.
អជបាល
បុច្ឆា – តស្ស អាវុសោ សត្តាហស្ស អច្ចយេន ភគវា កត្ថ វិហាសិ.
វិស្សជ្ជនា – តស្ស ភន្តេ សត្តាហស្ស អច្ចយេន ភគវា អជបាល និគ្រោធមូលេ វិហាសិ, សត្តាហំ ឯកបល្លង្កេន វិហាសិ វិមុត្តិសុខំ បដិសំវេទី.
មុចលិន្ទា
បុច្ឆា – តស្សបិ អាវុសោ សត្តាហស្ស អច្ចយេន ភគវា កត្ថ វិហាសិ.
វិស្សជ្ជនា – តស្ស ភន្តេ សត្តាហស្ស អច្ចយេន ភគវា មុចលិន្ទមូលេ សត្តាហំ ឯកបល្លង្កេន និសីទិ.
បុច្ឆា – តស្សបិ អាវុសោ សត្តាហស្ស អច្ចយេន ភគវា កត្ថ វិហាសិ.
វិស្សជ្ជនា – តស្សបិ ភន្តេ សត្តាហស្ស អច្ចយេន ភគវា រាជាយតនមូលេ សត្តាហំ ឯកបល្លង្កេន និសីទិ វិមុត្តិសុខំ បដិសំវេទី.
បុច្ឆា – តស្សបិ អាវុសោ សត្តាហស្ស អច្ចយេន ភគវា កត្ថ វិហាសិ.
វិស្សជ្ជនា – តស្ស ភន្តេ សត្តាហស្ស អច្ចយេន ភគវា បុនទេវ អជបាលនិគ្រោធមូលេ វិហាសិ.
បុច្ឆា – តស្មិំ បន អាវុសោ អជបាលនិគ្រោធេ វិហរន្តស្ស ភគវតោ កថំ ចេតសោ បរិវិតក្កោ ឧទបាទិ.
វិស្សជ្ជនា – តស្មិំ បន ភន្តេ អជបាលនិគ្រោធេ វិហរន្តស្ស ភគវតោ រហោគតស្ស បដិសល្លីនស្ស ធម្មគម្ភីរតាបដិសំយុត្តោ ចេតសោ បរិវិតក្កោ ឧទបាទិ.
អធិគតោ ខោ ម្យាយំ ធម្មោ គម្ភីរោ ទុទ្ទសោ អរនុពោធោ សន្តោ បណីតោ អតក្កាវចរា និបុណោ បណ្ឌិតវេទនីយោ.
អាលយរាមាខោ បនាយំ បជា អាលយរតា អាលយសម្មុទិតា,
សហម្បតិ ព្រហ្មា
បុច្ឆា – កថំ អាវុសោ តទា ធម្មទេសនាយ ព្រហ្មយាចនា ច ភគវតោ បដិញ្ញាច អហោសិ.
វិស្សជ្ជនា – ទេសេតុ ភន្តេ ភគវា ធម្មំ, ទេសេតុ សុគតោ ធម្មំ, សន្តិ សត្តា អប្បរជក្ខជាតិកា អស្សវនតា ធម្មស្ស បរិហាយន្តិ, ភវិស្សន្តិ ធម្មស្ស អញ្ញាតារោតិ ឥតិ ភន្តេ ព្រហ្មុនោ ធម្មទេសនាយ យាចនា អហោសិ,
‘‘អបារុតា តេសំ អមតស្ស ទ្វារា,
យេ សោតវន្តោ បមុញ្ចន្តុ សទ្ធំ;
វិហិំសសញ្ញី បគុណំ នភាសិំ,
ធម្មំ បណីតំ មនុជេសុ ព្រហ្មេ’’តិ.
ឯវំ ខោ ភន្តេ ភគវតោ ធម្មទេសនាយ បដិញ្ញា ច អហោសិ.
នស្សតិ វត លោកោ…
ទេសេតុ ភន្តេ ភគវា ធម្មំ…
អបារុតា តេសំ អមតស្ស ទ្វារា,
យេ សោតវន្តោ បមុញ្ចន្តុ សទ្ធំ.
បុច្ឆា – ឯវំ ខោ អាវុសោ ភគវា ធម្មទេសនាយ បដិញ្ញំ កត្វា បឋមំ ធម្មំ ទេសេន្តោ កត្ថ កីទិសំ ធម្មំ កស្ស ទេសេសិ.
វិស្សជ្ជនា – ពារាណសិយំ ភន្តេ ឥសិបតនេ មិគទាយេ បញ្ចវគ្គិយ ភិក្ខុបមុខានំ ព្រហ្មគណានំ ធម្មចក្កបវត្តនសុត្តំ ទេសេសិ.
បុច្ឆា – តស្មិំ ខោ បន អាវុសោ ធម្មចក្កបវត្តនសុត្តេ ទេសិយមានេ មនុស្សលោកេ កស្ស ធម្មាភិសមយោ អហោសិ.
វិស្សជ្ជនា – អាយស្មតោ ភន្តេ កោណ្ឌញ្ញស្ស ធម្មាភិសមយោ អហោសិ.
បុច្ឆា – កថំ នុ ខោ អាវុសោ ឥមស្មិំ ពុទ្ធសាសនេ បឋមំ បព្ពជ្ជា ច ឧបសម្បទា ច អហោសិ.
វិស្សជ្ជនា – ឥមស្មិំ ភន្តេ ពុទ្ធសាសនេ បឋមំ ឯហិភិក្ខុបសម្បទា អហោសិ.
លភេយ្យាហំ ភន្តេ ភគវតោ សន្តិកេ បព្ពជំ, លភេយ្យំ ឧបសម្បទំ.
ឯហិ ភិក្ខុ ស្វាខាតោ ធម្មោ, ចរ ព្រហ្មចរិយំ សម្មា ទុក្ខស្ស អន្តកិរិយាយ.
បុច្ឆា – ឥតរេសំ បន អាវុសោ ចតុន្នំ បញ្ចវគ្គិយានំ កទា ធម្មាភិសមយោ អហោសិ.
វិស្សជ្ជនា – បាដិបទេ ភន្តេ ទិវសេ អាយស្មតោ វប្បស្ស, ទុតិយេ ភន្តេ ទិវសេ អាយស្មតោ ភទ្ទិយស្ស, តតិយេ ភន្តេ ទិវសេ អាយស្មតោ មហានាមស្ស, ចតុត្ថេ ភន្តេ ទិវសេ អាយស្មតោ អស្សជិស្ស ធម្មាភិសមយោ អហោសិ.
បុច្ឆា – សព្ពេសម្បិ អាវុសោ តេសំ បញ្ចវគ្គិយានំ ភិក្ខូនំ កទា អរហត្តបត្តិ ហោតិ.
វិស្សជ្ជនា – សព្ពេសម្បិ ភន្តេ តេសំ បញ្ចវគ្គិយានំ ភិក្ខូនំ បក្ខស្ស បញ្ចមិយំ អនត្តលក្ខណសុត្តេ ទេសិយមានេ អរហត្តបត្តិ ហោតិ.
បុច្ឆា – កទា អាវុសោ ភគវតា ភិក្ខូ តត្ថ តត្ថ ចារិកំ ចរិត្វា ធម្មទេសនត្ថាយ បេសិតា.
វិស្សជ្ជនា – យសប្បមុខានំ ភន្តេ ចតុបញ្ញាស សហាយកានំ បព្ពជិតកាលេ ភគវតា ភិក្ខូ តត្ថ តត្ថ ចារិកំ ចរិត្វា ធម្មទេសនត្ថាយ បេសិតា.
សរណគមន
បុច្ឆា – កទា អាវុសោ ភគវតា តីហិ សរណគមនេហិ បព្ពជ្ជូប សម្បទា អនុញ្ញាតោ អហោសិ.
វិស្សជ្ជនា – យសប្បមុខានំ ភន្តេ ចតុបញ្ញាសាយ គិហិ សហាយកានំ បព្ពជិត្វា តត្ថ តត្ថ ចារិកំ ចរិត្វា ធម្មទេសនត្ថាយ បេសិតកាលេ ភគវតា តីហិ សរណគមនេហិ បព្ពជ្ជា ច ឧបសម្បទា ច អនុញ្ញាតា.
អនុជានាមិ ភិក្ខវេ តុម្ហេវ ទានិ តាសុ តាសុ ទិសាសុ តេសុ តេសុ ជនបទេសុ បព្ពាជេថ ឧបសម្បាទេថ.
បុច្ឆា – ភគវតា អាវុសោ ភិក្ខូនំ អារាមោ បដិគ្គណ្ហិតុំ កត្ថ កិស្មិំ វត្ថុស្មិំ អនុញ្ញាតោ.
វិស្សជ្ជនា – ភគវតា ភន្តេ ភិក្ខូនំ អារាមំ បដិគ្គណ្ហិតុំ រាជគហេ អនុញ្ញាតោ, រាជា ភន្តេ មាគធោ សេនិយោ ពិម្ពិសារោ ពុទ្ធប្បមុខស្ស ភិក្ខុសង្ឃស្ស វេឡុវនំ ឧយ្យានំ អទាសិ, តស្មិំ ភន្តេ វត្ថុស្មិំ អនុញ្ញាតោ.
ឯតាហំ ភន្តេ វេឡុវនំ ឧយ្យានំ ពុទ្ធប្បមុខស្ស ភិក្ខុសង្ឃស្ស ទម្មិ –
អនុជានាមិ ភិក្ខវេ អារាមំ.
បុច្ឆា – កថញ្ច អាវុសោ ទ្វិន្នំ អគ្គសាវកានំ បព្ពជ្ជូបសម្បទា អហោសិ.
វិស្សជ្ជនា – ទ្វិន្នំ ភន្តេ អគ្គសាវកានំ ឯហិ ភិក្ខុបសម្បទា អហោសិ.
វិប្បសន្នានិ ខោ តេ អាវុសោ ឥន្ទ្រិយានិ.
កំសិ ត្វំ អាវុសោ ឧទ្ទិស្ស បព្ពជិតោ.
កោ វា តេ សត្ថា.
កស្ស វា ត្វំ ធម្មំ រោចេសិ.
អត្ថាវុសោ មហាសមណោ សក្យបុត្តោ សក្យកុលា បព្ពជិតោ.
កិំ វាទី បនាយស្មតោ សត្ថា កិមក្ខាយី.
យេ ធម្មា ហេតុប្បភវា, តេសំ ហេតុំ តថាគតោ;
អាហ តេសញ្ច យោ និរោធោ, ឯវំ វាទី មហាសមណោ.
អលំ អាវុសោ មា អគមិត្ថ.
ឯតេ ភិក្ខវេ ទ្វេ សហាយកា អាគច្ឆន្តិ កោលិតោ ឧបតិស្សោ ច ឯតំ មេ សាវកយុគំ ភវិស្សតិ អគ្គំ ភទ្ទយុគំ.
លភេយ្យាម មយំ ភន្តេ ភគវតោ សន្តិកេ បព្ពជ្ជំ លភេយ្យាម ឧបសម្បទំ.
ឯថ ភិក្ខវោ ស្វាខាតោ ធម្មោ, ចរថ ព្រហ្មចរិយំ សម្មា ទុក្ខស្ស អន្តកិរិយាយ.
បុច្ឆា – ឧបជ្ឈាយោ អាវុសោ គណ្ហិតុំ ភគវតា កត្ថ អនុញ្ញាតោ, កំ អារព្ភ កិស្មិំ វត្ថុស្មិំ អនុញ្ញាតោ.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតោ, សម្ពហុលា ភន្តេ ភិក្ខូ អនុបជ្ឈាយកា អនាចរិយកា អនោវទិយមានា អននុសាសិយមានា ទុន្និវត្ថា ទុប្បារុតា អនោកប្បសម្បន្នា បិណ្ឌាយ ចរិំសុ, តស្មិំ ភន្តេ វត្ថុស្មិំ អនុញ្ញាតោ.
បុច្ឆា – ឧបជ្ឈាយម្ហិ អាវុសោ ន សម្មាវត្តន្តស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេ ភន្តេ សម្ពហុលេ សទ្ធិវិហារិកេ អារព្ភ បញ្ញត្តំ, សម្ពហុលា ភន្តេ សទ្ធិវិហារិកា ឧបជ្ឈាយម្ហិ ន សម្មាវត្តិំសុ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – កទា អាវុសោ ភគវតា តីហិ សរណគមនេហិ ឧបសម្បទំ បដិក្ខិបិត្វា ញាតិចតុត្ថេន កម្មេន ឧបសម្បទា អនុញ្ញាតា.
វិស្សជ្ជនា – រាធព្រាហ្មណស្ស ភន្តេ បព្ពជិតកាលេ ភគវតា តីហិ សរណគមនេហិ ឧបសម្បទំ បដិក្ខិបិត្វា ញាត្តិចតុត្ថេន កម្មេន ឧបសម្បទា អនុញ្ញាតា.
កោនុ ខោ ភិក្ខវេ តស្ស ព្រាហ្មណស្ស អធិការំ សរតិ.
អហំ ខោ ភន្តេ តស្ស ព្រាហ្មណស្ស អធិការំ សរាមិ.
សាធុ សាធុ សារិបុត្ត, កតញ្ញុនោ ហិ សារិបុត្ត សប្បុរិសា កតវេទិនោ.
កថាហំ ភន្តេ តំ ព្រាហ្មណំ ឧបសម្បាទេមិ.
យាសា ភិក្ខវេ មយា តីហិ សរណគមនេហិ ឧបសម្បទាអនុញ្ញាតា, តំ អជ្ជតគ្គេ បដិក្ខិបាមិ.
អនុជានាមិ ភិក្ខវេ ញាត្តិចតុត្ថេន កម្មេន ឧបសម្បាទេតុំ.
បុច្ឆា – អយាចិតកំ អាវុសោ ឧបសម្បទាបេក្ខំ ឧបសម្បាទេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ ឧបសម្បន្នសមនន្តរំ អនាចារំ អចរិ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ចតុន្នំ អាវុសោ និស្សយានំ អាចិក្ខណា ភគវតា កត្ថ អនុញ្ញាតា, កំ អារព្ភ កិស្មិំ វត្ថុស្មិំ អនុញ្ញាតា.
វិស្សជ្ជនា – រាជគហេ ភន្តេ អញ្ញតរំ ភិក្ខុំ អារព្ភ អនុញ្ញាតា, អញ្ញតរោ ភន្តេ ភិក្ខុ ឧទរស្ស ការណា បព្ពជិ, តស្មិំ ភន្តេ វត្ថុស្មិំ អនុញ្ញាតា.
ឯហិ ទានិ អាវុសោ បិណ្ឌាយ ចរិស្សាម.
កថញ្ហិ នាម ភិក្ខុ ឯវំ ស្វាក្ខាតេ ធម្មវិនយេ ឧទរស្ស ការណា បព្ពជិស្សតិ.
បុច្ឆា – ឩនទសវស្សេន អាវុសោ ឧបសម្បាទេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេ ភន្តេ អាយស្មន្តំ ឧបសេនំ វង្គន្តបុត្តំ អារព្ភ បញ្ញត្តំ, អាយស្មា ភន្តេ ឧបសេនោ វង្គន្តបុត្តោ ឯកវស្សោ សទ្ធិវិហារិកំ ឧបសម្បាទេសិ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ពាលេន អាវុសោ អព្យត្តេន ឧបសម្បាទេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ‘‘ទសវស្សម្ហា ទសវស្សម្ហា’’តិ ពាលា អព្យត្តា ឧបសម្បាទេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – អាចរិយោ អាវុសោ គណ្ហិតុំ ភគវតា កត្ថ អនុញ្ញាតោ, កំ អារព្ភ កិស្មិំ វត្ថុស្មិំ អនុញ្ញាតោ.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតោ, សម្ពហុលា ភន្តេ ភិក្ខូ ឧបជ្ឈាយេសុ បក្កន្តេសុបិ វិព្ភន្តេសុបិ កាលង្កតេសុបិ បក្ខសង្កន្តេសុបិ អនាចរិយកា អនោវទិយមានា អននុសាសិយមានា ទុន្និវត្ថា ទុប្បារុតា អនាកប្បសម្បន្នា បិណ្ឌាយ ចរិំសុ, តស្មិំ ភន្តេ វត្ថុស្មិំ អនុញ្ញាតោ.
បុច្ឆា – បញ្ចហិ អាវុសោ អាពាធេហិ ផុដ្ឋំ បព្ពាជេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ បញ្ចហិ អាពាធេហិ ផុដ្ឋំ បព្ពាជេសុំ, តស្មិំ ភន្តេ វត្ថុស្មិំ បញ្ញត្តំ.
សាធុ ភន្តេ អយ្យា បញ្ចហិ អាពាធេហិ ផុដ្ឋំ ន បព្ពាជេយ្យុំ…
បុច្ឆា – រាជភដំ អាវុសោ បព្ពាជេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ រាជភដេ បព្ពាជេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ធជពន្ធំ អាវុសោ ចោរំ បព្ពាជេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេយេវ ភន្តេ អង្គុលិមាលំ ចោរំ អារព្ភ បញ្ញត្តំ, អង្គុលិមាលោ ភន្តេ ចោរោ ភិក្ខូសុ បព្ពជិតោ ហោតិ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ការភេទកំ អាវុសោ ចោរំ បព្ពាជេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេយេវ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ការភេទកចោរំ បព្ពាជេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ឥណាយិកំ អាវុសោ បព្ពាជេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេយេវ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ឥណាយិកំ បព្ពាជេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ទាសំ អាវុសោ បព្ពជេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – រាជគហេយេវ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ទាសំ បព្ពាជេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ភណ្ឌុកម្មាយ អាវុសោ អបលោកនំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.
វិស្សជ្ជនា – រាជគហេយេវ ភន្តេ អញ្ញតរំ កម្មារភណ្ឌុបុត្តំ អារព្ភ អនុញ្ញាតំ អញ្ញតរោ ភន្តេ កម្មារភណ្ឌុបុត្តោ មាតាបិតូហិ សទ្ធិំ ភណ្ឌិត្វា ភិក្ខូសុ បព្ពជិតោ ហោតិ, តស្មិំ ភន្តេ វត្ថុស្មិំ អនុញ្ញាតំ.
បុច្ឆា – ឩនវីសតិវស្សស្ស អាវុសោ បុគ្គលស្ស ឧបសម្បទា ភគវតា កត្ថ បដិក្ខិត្តា, កំ អារព្ភ កិស្មិំ វត្ថុស្មិំ បដិក្ខិត្តា.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បដិក្ខិត្តា, សម្ពហុលា ភន្តេ ភិក្ខូ ឩនវីសតិវស្សំ បុគ្គលំ ឧបសម្បាទេសុំ, តស្មិំ ភន្តេ វត្ថុស្មិំ បដិក្ខិត្តា.
ន ភិក្ខវេ ជានំ ឩនវីសតិវស្សោ បុគ្គលោ ឧបសម្បាទេតព្ពោ, យោឧបសម្បាទេយ្យ, យថាធម្មោ ការេតព្ពោ.
បុច្ឆា – មាតាបិតូហិ អាវុសោ អននុញ្ញាតំ បុត្តំ បព្ពាជេន្តស្ស ទុក្កដំ ភគវតា កត្ថ បញ្ញត្តំ, កិស្មិំ វត្ថុស្មិំ បញ្ញត្តំ.
វិស្សជ្ជនា – សក្កេសុ ភន្តេ បញ្ញត្តំ, រាជា ភន្តេ សុទ្ធោទនោ ភគវន្តំ ឧបសង្កមិត្វា វរំ យាចិ, សាធុ ភន្តេ អយ្យាអននុញ្ញាតំ មាតាបិតូហិ បុត្តំ បព្ពាជេយ្យុន្តិ, តស្មិំ ភន្តេ វត្ថុស្មិំ បញ្ញត្តំ.
ន ភិក្ខវេ អននុញ្ញាតោ មាតាបិតូហិ បុត្តោ បព្ពាជេតព្ពោ, យោ បព្ពាជេយ្យ, អាបត្តិទុក្កដស្ស.
បុច្ឆា – ថេយ្យសំវាសកស្ស អាវុសោ ឧបសម្បទា ភគវតា កត្ថ បដិក្ខិត្តា, កំ អារព្ភ កិស្មិំ វត្ថុស្មិំ បដិក្ខិត្តា.
វិស្សជ្ជនា – សាវត្ថិយំ ភន្តេ អញ្ញតរំ បុរាណកុលបុត្តំ អារព្ភ បដិក្ខិត្តា, អញ្ញតរោ ភន្តេ បុរាណកុលបុត្តោ ខីណ កោលញ្ញោ សាមំ បត្តចីវរំ បដិយាទេត្វា កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អារាមំ គន្ត្វា ភិក្ខូហិ សទ្ធិំ សំវសិ, ភន្តេ វត្ថុស្មិំ បដិក្ខិត្តា.
បុច្ឆា – តិរច្ឆានគតស្ស អាវុសោ ឧបសម្បទា ភគវតា កត្ថ បដិក្ខិត្តា, កំ អារព្ភ កិស្មិំ វត្ថុស្មិំ បដិក្ខិត្តា.
វិស្សជ្ជនា – សាវត្ថិយំ ភន្តេ អញ្ញតរំ នាគំ អារព្ភ បដិក្ខិត្តា, អញ្ញតរោ ភន្តេ នាគោ មាណវកវណ្ណេន ភិក្ខូ ឧបសង្កមិត្វា បព្ពជ្ជំ យាចិ, តំ ភិក្ខូ បព្ពាជេសុំ ឧបសម្បាទេសុំ, តស្មិំ ភន្តេ វត្ថុស្មិំ បដិក្ខិត្តា.
បុច្ឆា – មាតុឃាតកស្ស ច អាវុសោ បិតុឃាតកស្ស ច ឧបសម្បទា ភគវតា កត្ថ បដិក្ខិត្តា, កំ អារព្ភ កិស្មិំ វត្ថុស្មិំ បដិក្ខិត្តា.
វិស្សជ្ជនា – សាវត្ថិយំយេវ ភន្តេ អញ្ញតរំ មាណវកំ អារព្ភ បដិក្ខិត្តា, អញ្ញតរោ ច ភន្តេ មាណវកោ អញ្ញតរោ ច មាណវកោ មាតរំ ជីវិតា វោរោបេសិ បិតរំ ជីវិតា វោរោបេសិ, តស្មិំ ភន្តេ វត្ថុស្មិំ បដិក្ខិត្តា.
មាតុឃាតកោ ភិក្ខវេ អនុបសម្បន្នោ នឧបសម្បាទេតព្ពោ, ឧបសម្បន្នោ នាសេតព្ពោ, បិតុឃាតកោ ភិក្ខវេ អនុបសម្បន្នោ នឧបសម្បាទេតព្ពោ, ឧបសម្បន្នោ នាសេតព្ពោ.
បុច្ឆា – អបត្តចីវរកំ វា អាវុសោ យាចិតបត្តចីវរកំ វា ឧបសម្បាទេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.
វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អបត្តចីវរកំ ឧបសម្បាទេសុំ, យាចិតកេន បត្តចីវរេន ឧបសម្បាទេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – ឧបសម្បទំ បុច្ឆិស្សំ, សនិទានំ សឧទ្ទេសំ. សមុក្កដ្ឋបទានំ អាវុសោ កតិ អាបត្តិយោ.
វិស្សជ្ជនា – ឧបសម្បទំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ទ្វេ អាបត្តិយោ.
២. ឧបោសថក្ខន្ធក
បុច្ឆា – ចាតុទ្ទសេ ច អាវុសោ បន្នរសេ ច បក្ខស្ស ច អដ្ឋមិយា សន្និបតិត្វា ធម្មំ ភាសិតុំ ភគវតា កត្ថ អនុញ្ញាតំ, កិស្មិំ វត្ថុស្មិំ អនុញ្ញាតំ.
វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតា, សម្ពហុលា ភន្តេ ភិក្ខូ ចាតុទ្ទេស បន្នរសេ អដ្ឋមិយា ច បក្ខស្ស សន្និបតិត្វា តុណ្ហី និសីទិំសុ, តស្មិំ ភន្តេ វត្ថុស្មិំ អនុញ្ញាតា.
អនុជានាមិ ភិក្ខវេ ចាតុទ្ទសេ បន្នរសេ អដ្ឋមិយា ច បក្ខស្ស សន្និបតិតុំ.
ននុ នាម សន្និបតិតេហិ ធម្មោ ភាសិតព្ពោ.
បុច្ឆា – កទា អាវុសោ ភិក្ខូនំ បាតិមោក្ខុទ្ទេសោ ភគវតា អនុញ្ញាតោ.
វិស្សជ្ជនា – យទា ភន្តេ ភគវតោ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ ‘‘យំនូនាហំ យានិ មយា ភិក្ខូនំ បញ្ញត្តានិ សិក្ខាបទានិ, តានិ នេសំ បាតិមោក្ខុទ្ទេសំ អនុជានេយ្យំ, សោ នេសំ ភវិស្សតិ ឧបោសថកម្ម’’ន្តិ តទា ភន្តេ ភគវតា ភិក្ខូនំ បាតិមោក្ខុទ្ទេសោ អនុញ្ញាតោ.
បុច្ឆា – សីមំ អាវុសោ សម្មនិតុំ ភគវតា កត្ថ អនុញ្ញាតំ, កិស្មិញ្ច វត្ថុស្មិំ អនុញ្ញាតំ.
វិស្សជ្ជនា – រាជគហេ ភន្តេ អនុញ្ញាតំ, រាជគហេ ភន្តេ ភគវតិ វិហរតិ ភិក្ខូនំ ឯតទហោសិ ‘‘ភគវតា បញ្ញត្តំ ឯត្តាវតា សាមគ្គី, យាវតា ឯកាវាសោតិ កិត្តាវតានុខោ ឯកាវាសោ ហោតី’’តិ, តស្មិំ ភន្តេ វត្ថុស្មិំ អនុញ្ញាតំ.
បុច្ឆា – កតិ អាវុសោ ឧបោសថា ទិវសវសេន ច ការកបុគ្គលវសេន ច កាតព្ពាការវសេន ច.
វិស្សជ្ជនា – ទិវសវសេន ភន្តេ តយោ ឧបោសថា, បុគ្គលវសេន ច ភន្តេ តយោ ឧបោសថា, កាតព្ពាការវសេន ច ភន្តេ តយោ ឧបោសថា.
បុច្ឆា – កតិ អាវុសោ ឧបោសថកម្មានិ តេសុ ច កីទិសំ ឧបោសថកម្មំ ភគវតា អនុញ្ញាតំ, កីទិសំ អននុញ្ញាតំ.
វិស្សជ្ជនា – ចត្តារិមានិ ភន្តេ ឧបោសថកម្មានិ, អធម្មេន វគ្គំ ឧបោសថកម្មំ, អធម្មេន សមគ្គំ ឧបោសថកម្មំ, ធម្មេន វគ្គំ ឧបោសថកម្មំ, ធម្មេន សមគ្គំ ឧបោសថកម្មំ. តត្រ ភន្តេ យទិទំ អធម្មេន វគ្គំ ឧបោសថកម្មំ, អធម្មេន សមគ្គំ ឧបោសថកម្មំ ធម្មេន វគ្គំ ឧបោសថកម្មំ, ឯវរូបំ ភន្តេ ឧបោសថកម្មំ អននុញ្ញាតំ, តត្រ ភន្តេ យទិទំ ធម្មេន សមគ្គំ ឧបោសថកម្មំ, ឯវរូបំ ភន្តេ ឧបោសថកម្មំ អនុញ្ញាតំ.
បុច្ឆា – ឧបោសថំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.
វិស្សជ្ជនា – ឧបោសថំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.