៥. ចម្មក្ខន្ធក

សោណមថេរ វត្ថុ

បុច្ឆា – ឧបាហនំ អាវុសោ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ អាយស្មន្តំ សោណំ អារព្ភ អនុញ្ញាតំ, អាយស្មតោ ភន្តេ សោណស្ស អច្ចារទ្ធវីរិយស្ស ចង្កមតោ បាទា ភិជ្ជិំសុ, ចង្កមោ លោហិតេន ផុដោ អហោសិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – សព្ពនីលិកា វា អាវុសោ សព្ពបីតិកា វា សព្ពលោហិតិកា វា សព្ពមញ្ជិដ្ឋិកា វា សព្ពកណ្ហា វា សព្ពមហារង្គរត្តា វា សព្ពមហានាមរត្តា វា ឧបាហនាយោ ធារេន្តស្ស ទុក្កដំ ភគវតា កត្ថ កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ សព្ពនីលិកាយោ ឧបាហនាយោ ធារេសុំ, សព្ពបីតិកាយោ សព្ពលោហិតិកាយោ សព្ពមញ្ជិដ្ឋិកាយោ សព្ពកណ្ហាយោ សព្ពមហារង្គរត្តា សព្ពមហានាមរត្តាយោបិ ឧបាហនាយោ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ខល្លកពន្ធា វា អាវុសោ បុដពន្ធា វា បាលិគុណ្ឋិមា វា តូលបុណ្ណិកា វា តិត្តិរបត្តិកា វា មេណ្ឌវិសាណវទ្ធិកា វា អជវិសាណវទ្ធិកា វា វិច្ឆិកាឡិកា វា មោរបិញ្ឆ បរិសិព្ពិកា វា ចិត្រា វា ឧបាហនាយោ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ខល្លកពន្ធា ឧបាហនាយោបិ ធារេសុំ, បុដពន្ធា ឧបាហនាយោបិ ធារេសុំ, បាលិគុណ្ឋិមា ឧបាហនាយោបិ ធារេសុំ, តូលបុណ្ណិកា ឧបាហនាយោបិ ធារេសុំ, តិត្តិរបត្តិកា ឧបាហនាយោបិ ធារេសុំ, មេណ្ឌវិសាណវទ្ធិកា ឧបាហនាយោបិ ធារេសុំ, អជវិសាណវទ្ធិកា ឧបាហនាយោបិ ធារេសុំ, វិច្ឆិកាឡិកា ឧបាហនាយោបិ ធារេសុំ, មោរបិញ្ឆ បរិសិព្ពិតា ឧបាហនាយោ ធារេសុំ, ចិត្រា ឧបាហនាយោបិ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កដ្ឋបាទុកាយោ អាវុសោ ធារេន្តស្ស ទុក្កដំ ភគវតា កត្ថ កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គីយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ រត្តិយា បច្ចូសសមយំ បច្ចុដ្ឋាយ កដ្ឋបាទុកាយោ អភិរុហិត្វា អជ្ឈោកាសេ ចង្កមន្តិ ឧច្ចាសទ្ទា មហាសទ្ទា ខដខដសទ្ទា អនេកវិហិតំ តិរច្ឆានកថំ កថេន្តា, តស្មិំ ភន្តេ វត្ថុស្មិំ បញ្ញត្តំ.

បុច្ឆា – យានេន អាវុសោ យាយន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ យានេន យាយិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – គិលានស្ស អាវុសោ យានំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អញ្ញតរំ គិលានំ ភិក្ខុំ អារព្ភ អនុញ្ញាតំ, អញ្ញតរោ ភន្តេ ភិក្ខុ កោសលេសុ ជនបទេ សាវត្ថិំ គច្ឆន្តោ ភគវន្តំ ទស្សនាយ អន្តរាមគ្គេ គិលានោ កុក្កុច្ចាយន្តោ យានំ នាភិរុហិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ឧច្ចាសយនមហាសយនានិ អាវុសោ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ឧច្ចាសយនមហាសយនានិ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – គោចម្មានិ អាវុសោ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ បាបភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ បាណាតិបាតេ សមាទបេសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បច្ចន្តិមេសុ អាវុសោ ជនបទេសុ វិនយធរបញ្ចមេន គណេន ឧបសម្បទា ច គុណង្គុណូបហនញ្ច ធុវនហានញ្ច ចម្មានិ អត្ថរណានិ ច និស្សីមគតានំ ចីវរទានញ្ចាតិ ឥមានិ បញ្ច ភគវតា កត្ថ អនុញ្ញាតានិ, កំ អារព្ភ កិស្មិំ វត្ថុស្មិំ អនុញ្ញាតានិ.

វិស្សជ្ជនា – សាវត្ថិយំ ភន្តេ អាយស្មន្តំ សោណំ កុដិកណ្ណំ អារព្ភ អនុញ្ញាតា, អាយស្មា ភន្តេ សោណោ កុដិកណ្ណោ ឯតានិ បញ្ចវត្ថូនិ អាយស្មតោ មហាកច្ចានស្ស វចនេន ភគវន្តំ យាចិ, តស្មិំ ភន្តេ វត្ថុស្មិំ អនុញ្ញាតា.

បុច្ឆា – ចម្មសញ្ញុត្តំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – ចម្មសញ្ញុត្តំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.