៦. ភេសជ្ជក្ខន្ធក

បុច្ឆា – បញ្ច អាវុសោ ភេសជ្ជានិ បដិគ្គហេត្វា កាលេបិ វិកាលេបិ បរិភុញ្ជិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលានំ ភន្តេ ភិក្ខូនំ សារទិកេន អាពាធេន បុដ្ឋានំ យាគុបិ ន សម្មា បរិណាមំ គច្ឆិ, ភត្តម្បិ ភុត្តំ ន សម្មា បរិណាមំ គច្ឆិ, តេ តេន កិសា អហេសុំ លូខា ទុព្ពណ្ណា ឧប្បណ្ឌុប្បណ្ឌុកជាតា ធមនិសន្ថតគត្តា, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – មូលាទិភេសជ្ជានិ អាវុសោ ភគវតា កត្ថ អនុញ្ញាតានិ, កំ អារព្ភ កិស្មិំ វត្ថុស្មិំ អនុញ្ញាតានិ.

វិស្សជ្ជនា – សាវត្ថិយំ ភន្តេ សម្ពហុលេ គិលានេ ភិក្ខូ អារព្ភ អនុញ្ញាតានិ, សម្ពហុលានំ គិលានានំ ភិក្ខូនំ មូលេហិ ភេសជ្ជេហិ អត្ថោ អហោសិ, តស្មិំ ភន្តេ វត្ថុស្មិំ អនុញ្ញាតានិ.

បុច្ឆា – អន្តោវុដ្ឋំវា អាវុសោ អន្តោបក្កំ វា សាមំបក្កំ វា បរិភុញ្ជន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ អាយស្មន្តំ អានន្ទំ អារព្ភ បញ្ញត្តំ, អាយស្មា ភន្តេ អានន្ទោ សាមំ តិលម្បិ តណ្ឌុលម្បិ មុគ្គម្បិ វិញ្ញាបេត្វា អន្តោ វាសេត្វា អន្តោ សាមំ បចិ, តស្មិំ ភន្តេ វត្ថុស្មិំ បញ្ញត្តំ.

សុប្បិយា វត្ថុ

បុច្ឆា – មនុស្សមំសំ អាវុសោ បរិភុញ្ជន្តស្ស ថុល្លច្ចយញ្ច អប្បដិវេក្ខិត្វា មំសំ បរិភុញ្ជន្តស្ស ទុក្កដញ្ច ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ពារាណសិយំ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ អប្បដិវេក្ខិត្វា មនុស្សមំសំ ភុញ្ជិ, តស្មិំ ភន្តេ វត្ថុស្មិំ បញ្ញត្តំ.

ន ភិក្ខវេ មនុស្សមំសំ បរិភុញ្ជិតព្ពំ, យោ បរិភុញ្ជេយ្យ, អាបត្តិ ថុល្លច្ចយស្ស, ន ច ភិក្ខវេ អប្បដិវេក្ខិត្វា មំសំ បរិភុញ្ជិតព្ពំ, យោ បរិភុញ្ជេយ្យ អាបត្តិ ទុក្កដស្ស.

បុច្ឆា – ហត្ថិមំសំ វា អាវុសោ អស្សមំសំ វា បរិភុញ្ជន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ពារាណសិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ហត្ថិមំសម្បិ អស្សមំសម្បិ បរិភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សុនក្ខមំសំ វា អាវុសោ អហិមំសំ វា ភុញ្ជន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ពារាណសិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ សុនក្ខមំសម្បិ អហិមំសម្បិ បរិភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សីហមំសំ វា អាវុសោ ព្យគ្ឃមំសំ វា ទីបិមំសំ វា អច្ឆមំសំ វា តរច្ឆមំសំ វា ភុញ្ជន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ពារាណសិយំយេវ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ សីហមំសម្បិ ព្យគ្ឃមំសម្បិ ទីបិមំសម្បិ អច្ឆមំសម្បិ តរច្ឆមំសម្បិ បរិភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – គិលានស្ស អាវុសោ គុឡំ វា អគិលានស្ស គុឡោទកំ វា ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ គិលានស្សេវ ភគវតា គុឡោ អនុញ្ញាតោ នោ អគិលានស្សាតិ កុក្កុច្ចាយន្តា គុឡំ ន ភុញ្ជិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ជានំ អាវុសោ ឧទ្ទិស្ស កតំ មំសំ បរិភុញ្ជន្តស្ស ទុក្កដំ បញ្ញបេត្វា តិកោដិបរិសុទ្ធំ មំសំ ភគវតា កត្ថ អនុញ្ញាតំ.

វិស្សជ្ជនា – វេសាលិយំ ភន្តេ សីហស្ស សេដាបតិនោ វត្ថុស្មិំ អនុញ្ញាតំ.

មេណ្ឌក វត្ថុ

បុច្ឆា – បាថេយ្យំ អាវុសោ បរិយេសិតុញ្ច កប្បិយការកានំ ហត្ថេ ឧបនិក្ខិត្តហិរញ្ញតោ និព្ពត្តំ កប្បិយបច្ចយំ សាទិតុញ្ច ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – អន្តរា ច ភន្តេ ភទ្ទិយំ អន្តរា ច អង្គុត្តរាបំ មេណ្ឌកំ គហបតិំ អារព្ភ អនុញ្ញាតំ, មេណ្ឌកោ ភន្តេ គហបតិ ភគវន្តំ យាចិ ‘‘សន្តិ ភន្តេ មគ្គា កន្តារា អប្បោទកា អប្បភក្ខា ន សុករា អបាថេយ្យេន គន្តុំ, សាធុ ភន្តេ ភគវា ភិក្ខូនំ បាថេយ្យំ អនុជានាតូ’’តិ, តស្មិំ ភន្តេ វត្ថុស្មិំ អនុញ្ញាតំ.

កេណិយ វត្ថុ

បុច្ឆា – អដ្ឋ អាវុសោ បានានិ ភគវតា កត្ថ អនុញ្ញាតានិ, កំ អារព្ភ កិស្មិំ វត្ថុស្មិំ អនុញ្ញាតានិ.

វិស្សជ្ជនា – អាបណេ ភន្តេ សម្ពហុលេ ភិក្ខូ អារព្ភ អនុញ្ញាតានិ, សម្ពហុលា ភន្តេ ភិក្ខូ កុក្កុច្ចាយន្តា បានានិ ន បដិគ្គណ្ហិំសុ, តស្មិំ ភន្តេ វត្ថុស្មិំ អនុញ្ញាតានិ.

រោជមល្លា វត្ថុ

បុច្ឆា – សព្ពញ្ច អាវុសោ ឌាកំ សព្ពញ្ច បិដ្ឋខាទនីយំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – កុសិនារាយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ កុក្កុច្ចាយន្តា ឌាកញ្ច បិដ្ឋខាទនីយញ្ច ន បដិគ្គហេសុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – អកប្បិយំ អាវុសោ សមាទបេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាតុមាយំ ភន្តេ អញ្ញតរំ វុឌ្ឍបព្ពជិតំ អារព្ភ បញ្ញត្តំ, អញ្ញតរោ ភន្តេ វុឌ្ឍបព្ពជិតោ អកប្បិយេ សមាទបេតិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សង្ឃិកានិ វា អាវុសោ បុគ្គលិកានិ វា ពីជានិ បុគ្គលិកាយ វា សង្ឃិកាយ វា ភូមិយា រោបិតានិ ភាគំ ទត្វា បរិភុញ្ជិតុំ ភគវតា កត្ថ អនុញ្ញាតំ, កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អនុញ្ញាតំ, សាវត្ថិយំ ភន្តេ ភគវតិ វិហរតិ សង្ឃិកានិបិ ពីជានិ បុគ្គលិកាយ ភូមិយា រោបិយិំសុ, បុគ្គលិកានិបិ ពីជានិ សង្ឃិកាយ ភូមិយា រោបិយិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – វិនយមហាបទេសសង្ខាតានិ អាវុសោ ចត្តារិ កប្បិយាកប្បិយអនុលោមានិ ភគវតា កត្ថ បញ្ញត្តានិ, កំ អារព្ភ កិស្មិំ វត្ថុស្មិំ បញ្ញត្តានិ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តានិ, សម្ពហុលានំ ភន្តេ ភិក្ខូនំ កិស្មិញ្ចិ កិស្មិញ្ចិឋានេ កុក្កុច្ចំ ឧប្បជ្ជិ, តស្មិំ ភន្តេ វត្ថុស្មិំ បញ្ញត្តានិ.

បុច្ឆា – យាវកាលិកាទីហិ សំសដ្ឋានំ អាវុសោ យាមកាលិកាទីនំ បរិភោគកាលមរិយាទំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលានំ ភន្តេ ភិក្ខូនំ ឯតទហោសិ ‘‘កប្បតិ នុខោ យាវកាលិកេន យាមកាលិកំ សត្តាហកាលិកំ យាវជីវិកំ, ន នុខោ កប្បតិ. កប្បតិនុខោ យាមកាលិកេន សត្តាហកាលិកំ យាវជីវិកំ, ន នុខោ កប្បតិ. កប្បតិ នុខោ សត្តាហកាលិកេន យាវជីវិកំ, ន នុខោ កប្បតី’’តិ. តស្មិំ ភន្តេ វត្ថុស្មិំ បញ្ញត្តំ.

បុច្ឆា – ភេសជ្ជកំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – ភេសជ្ជកំ វិស្សជ្ជិស្សំ សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.