២. ឧបោសថក្ខន្ធក

បុច្ឆា – ចាតុទ្ទសេ ច អាវុសោ បន្នរសេ ច បក្ខស្ស ច អដ្ឋមិយា សន្និបតិត្វា ធម្មំ ភាសិតុំ ភគវតា កត្ថ អនុញ្ញាតំ, កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតា, សម្ពហុលា ភន្តេ ភិក្ខូ ចាតុទ្ទេស បន្នរសេ អដ្ឋមិយា ច បក្ខស្ស សន្និបតិត្វា តុណ្ហី និសីទិំសុ, តស្មិំ ភន្តេ វត្ថុស្មិំ អនុញ្ញាតា.

អនុជានាមិ ភិក្ខវេ ចាតុទ្ទសេ បន្នរសេ អដ្ឋមិយា ច បក្ខស្ស សន្និបតិតុំ.

ននុ នាម សន្និបតិតេហិ ធម្មោ ភាសិតព្ពោ.

បុច្ឆា – កទា អាវុសោ ភិក្ខូនំ បាតិមោក្ខុទ្ទេសោ ភគវតា អនុញ្ញាតោ.

វិស្សជ្ជនា – យទា ភន្តេ ភគវតោ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ ‘‘យំនូនាហំ យានិ មយា ភិក្ខូនំ បញ្ញត្តានិ សិក្ខាបទានិ, តានិ នេសំ បាតិមោក្ខុទ្ទេសំ អនុជានេយ្យំ, សោ នេសំ ភវិស្សតិ ឧបោសថកម្ម’’ន្តិ តទា ភន្តេ ភគវតា ភិក្ខូនំ បាតិមោក្ខុទ្ទេសោ អនុញ្ញាតោ.

បុច្ឆា – សីមំ អាវុសោ សម្មនិតុំ ភគវតា កត្ថ អនុញ្ញាតំ, កិស្មិញ្ច វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ អនុញ្ញាតំ, រាជគហេ ភន្តេ ភគវតិ វិហរតិ ភិក្ខូនំ ឯតទហោសិ ‘‘ភគវតា បញ្ញត្តំ ឯត្តាវតា សាមគ្គី, យាវតា ឯកាវាសោតិ កិត្តាវតានុខោ ឯកាវាសោ ហោតី’’តិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កតិ អាវុសោ ឧបោសថា ទិវសវសេន ច ការកបុគ្គលវសេន ច កាតព្ពាការវសេន ច.

វិស្សជ្ជនា – ទិវសវសេន ភន្តេ តយោ ឧបោសថា, បុគ្គលវសេន ច ភន្តេ តយោ ឧបោសថា, កាតព្ពាការវសេន ច ភន្តេ តយោ ឧបោសថា.

បុច្ឆា – កតិ អាវុសោ ឧបោសថកម្មានិ តេសុ ច កីទិសំ ឧបោសថកម្មំ ភគវតា អនុញ្ញាតំ, កីទិសំ អននុញ្ញាតំ.

វិស្សជ្ជនា – ចត្តារិមានិ ភន្តេ ឧបោសថកម្មានិ, អធម្មេន វគ្គំ ឧបោសថកម្មំ, អធម្មេន សមគ្គំ ឧបោសថកម្មំ, ធម្មេន វគ្គំ ឧបោសថកម្មំ, ធម្មេន សមគ្គំ ឧបោសថកម្មំ. តត្រ ភន្តេ យទិទំ អធម្មេន វគ្គំ ឧបោសថកម្មំ, អធម្មេន សមគ្គំ ឧបោសថកម្មំ ធម្មេន វគ្គំ ឧបោសថកម្មំ, ឯវរូបំ ភន្តេ ឧបោសថកម្មំ អននុញ្ញាតំ, តត្រ ភន្តេ យទិទំ ធម្មេន សមគ្គំ ឧបោសថកម្មំ, ឯវរូបំ ភន្តេ ឧបោសថកម្មំ អនុញ្ញាតំ.

បុច្ឆា – ឧបោសថំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – ឧបោសថំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.