១០. កោសម្ពកក្ខន្ធក

បុច្ឆា – ភេទគរុកេហិ ភិក្ខវេ ភិក្ខូហិ ន សោ ភិក្ខុ អាបត្តិយា អទស្សនេ ឧក្ខិបិតព្ពោតិ ច, ភេទគរុកេន ភិក្ខវេ ភិក្ខុនា បរេសម្បិ សទ្ធាយ អាបត្តិទេសេតព្ពាតិ ច អាវុសោ អយំ សាមគ្គិរសឱវាទោ ភគវតា កត្ថ ទិន្នោ, កំ អារព្ភ កិស្មិំ វត្ថុស្មិំ ទិន្នោ.

វិស្សជ្ជនា – កោសម្ពិយំ ភន្តេ សម្ពហុលេ ភិក្ខូ អារព្ភ ទិន្នោ, ភគវតិ ភន្តេ កោសម្ពិយំ វិហរតិ អញ្ញតរោ ភិក្ខុ អាបត្តិំ អាបន្នោ អហោសិ, សោ តស្សា អាបត្តិយា អាបត្តិ ទិដ្ឋិ អហោសិ, អញ្ញេ ភិក្ខូ តស្សា អាបត្តិយា អនាបត្តិ ទិដ្ឋិនោ អហេសុំ. សោ អបរេន សមយេន តស្សា អាបត្តិយា អនាបត្តិទិដ្ឋិ អហោសិ, អញ្ញេ ភិក្ខូ តស្សា អាបត្តិយា អាបត្តិទិដ្ឋិនោ អហេសុំ. អថ ខោ តេ ភន្តេ ភិក្ខូ សាមគ្គិំ លភិត្វា តំ ភិក្ខុំ អាបត្តិយា អទស្សនេ ឧក្ខិបិំសុ, តស្មិំ ភន្តេ វត្ថុស្មិំ ទិន្នោ.

បុច្ឆា – សង្ឃភេទស្ស អាវុសោ មូលភូតេ ភិក្ខុម្ហិ ឧក្ខិត្តកេ ឱសារិតេ តស្ស វត្ថុស្ស វូបសមាយ សង្ឃសាមគ្គិញ្ច កាតុំ សាមគ្គី ឧបោសថញ្ច កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ តេយេវ ឧក្ខិត្តកានុវត្តកេ ភិក្ខូ អារព្ភ អនុញ្ញាតំ, តេ ភន្តេ ឧក្ខិត្តកានុវត្តកា ភិក្ខូ តំ ឧក្ខិត្តកំ ភិក្ខុំ ឱសារេត្វា យេន ឧក្ខេបកា ភិក្ខូ តេនុបសង្កមិំសុ ឧបសង្កមិត្វា តេ ឧក្ខេបកេ ភិក្ខូ ឯកទវោចុំ ‘‘យស្មិំ អាវុសោ វត្ថុស្មិំ អហោសិ សង្ឃស្ស ភណ្ឌនំ កលហោ វិគ្គហោ វិវាទោ សង្ឃភេទោ សង្ឃរាជិ សង្ឃវវត្ថានំ សង្ឃនានាករណំ, សោ ឯសោ ភិក្ខុំ អាបន្នោ ច ឧក្ខិត្តោ ច បស្សិ ច ឱសារិតោ ច, ហន្ទ មយំ អាវុសោ តស្ស វត្ថុស្ស វូបសមាយ សង្ឃសាមគ្គិំ ករោមា’’តិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កោសម្ពកំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – កោសម្ពកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.