៥១. តស្ស

ននុ ច សង្ខ្យាសទ្ទោ សង្ខ្យានេ សង្ខ្យេយ្យេ ច វត្តតេ, កថមេត្ថ សង្ខ្យានេវសិតា វុត្តិ យេនេវំ វិវរណំ កតមិច្ចាហ- ‘យទិបិ’ច្ចាទិ, បច្ចាសន្នំ សង្ខ្យាសទ្ទស្សាតិ អធិប្បាយោ. ឥមិនា ច ករណសាធនោ-យំ បូរណសទ្ទោតិ វិញ្ញាបេតិ. យតោតិ វុត្តយំ សទ្ទសម្ពន្ធិនា តំសទ្ទេន សេតិ ឧល្លិង្គិតស្ស សង្ខ្យាតិអត្ថមុបទស្សិយ សាយេវ បូរីយតេតីមស្ស កម្មភាវេន តិដ្ឋតីតិ ទស្សេតុំ តេន បូរណេន បូរីយតេ’តិ អាហ.

សម្បជ្ជតេតិ បូរីយតេត្យស្សត្ថមាចិក្ខតិ. អនេនេតំ ទស្សេតិ ‘‘(ន) ឃដិកាទីនមិវ ទព្ពានំ ទព្ពន្តរេ នាតិរិត្តីករណំ សង្ខ្យាយ បូរណំ កិញ្ចរហិ តស្ស សមប្បត្តិយេវា’’តិ. អថ កាយំ វចោយុត្តិ ‘សាសង្ខ្យា បូរីយតេ យេនេ’តិ, យាវតា សាតិ យស្មា បច្ចយោ វិហិតោ តស្ស សង្ខ្យាសទ្ទស្ស បរាមាសោ តស្ស ច បូរណេន អភេទោច្ចាសង្កិយាហ- ‘អភេទេនោច្ចតេ សង្ខ្យា បូរីយតេ យេនេតី’តិ អភិធានាភិធេយ្យានមភេទោបចារេន វុច្ចតីត្យត្ថោ, សង្ខ្យេយ្យបូរណេ ឌោ ន ហោតីតិ វត្វា តទត្ថំ វិភាវេតុមាហ- ‘ទ្វាទសន្ន’មិច្ចាទិ. សោ ឃដោ តាសំ ឃដិកានំ បូរណោ ទព្ពានំ ទព្ពន្តរេ នាតិ រិត្តីករណវសេន. វីសតិយា បូរណោតិអាទិនា វិគ្គហោ.