៤៤. កិម្ហា

ននុ សុត្តេ សង្ខ្យាយន្តិ ន វុត្តំ កត្យាទយោ ច បយោគា សង្ខ្យា បរិមាណេយេវ ទិស្សន្តិ កថំ នាមេត្ថាយំ វិធីតិ អាហ- ‘ពហុលេ’ច្ចាទិ. សង្ខ្យាបរិមាណេយេវាយំ វិធីតិ កិំ សទ្ទេ សង្ខ្យាបរិមាណ វិសយេយេវ វត្តមានេ អយំ រត្យាទិកោ វិធីតិ អត្ថោ, ននុ ចេត្ថ កិំ សទ្ទោ បញ្ហេ វត្តមានោ កថំ សង្ខ្យាបរិមាណេ វត្តតេតិ វុច្ចតេ, យជ្ជបិ សង្ខ្យាបរិមាណេ ន វត្តតេ, តថាបិ សង្ខ្យាបរិមាណស្ស បុច្ឆិយមានត្តា សង្ខ្យាបរិមាណវិសយេ វត្តតេ វាតិ. ពហុលាធិការ បយោគសាមត្ថិយហេតុនិទស្សនេ ផលមាហ- ‘យត្រត្វិ’ច្ចាទិ, បរិច្ឆេទកត្តេន បរិមាណកត្តេន. អយមេត្ថាធិប្បាយោ ‘‘យទាកិមិទំ សង្ខ្យា បរិមាណមេសំ ទសន្នំ ន កិញ្ចិ អប្បកមេវេតន្តិ សង្ខ្យាបរិមាណមេវ កិំ សទ្ទេន និន្ទីយតេ, តទាបិ សង្ខ្យា បរិមាណស្ស និន្ទីយមានត្តា សង្ខ្យាបរិមាណវិសយត្តមេវេតិ ខេបេ វត្តមានាបិ កិំ សទ្ទា រតិច្ចាទិ សិយា, ពហុលាធិការាទិតោវ បនេត្ថ ន សិយា’’តិ. រការានុពន្ធា ឥសទ្ទលោបត្ថាតិ យោជនា.