៤. ណ្យទិ

យស្ស ច ចវគ្គោតិ សម្ពន្ធោ, កេវលំ គគ្គ្យោតិ ឯត្តកមេវា ទស្សេត្វា បរសត្ថាគតគគ្គាទិគណេកទេសភូតកុណ្ឌនីសទ្ទតោបិ កោណ្ឌញ្ញោតិ មុទាហរន្តោ សោ គគ្គាទិគណោប្យត្រាភ្យុបគតោតិ វិញ្ញាបេតិ. តស្មា តស្មិំ គគ្គាទិកេបិ បរសត្ថបឋិតេ យោយោ បយោគោ អាគមេ ទិស្សតិ វច្ឆោ អគ្គិវេស្សោច្ចាទិ. សោបីហ វេទិតព្ពោតិ ទស្សេតុមាហ-‘គគ្គាទិ’ច្ចាទិ. គគ្គាទីតិ គគ្គាទិ អយំ. គោត្តស្ស គគ្គវំសស្ស អាទិភូតេន គគ្គេន ឧបលក្ខិតោ គណោ គោត្តាទិគណោ, តេន គគ្គោ នាម កោចិ, តស្សត្វបច្ចំ គគ្គីតិ ភវតិ. បបុត្តាទោវាតិ អវធារណំ គគ្គស្សាបច្ចំ គគ្គិច្ចេវ យថាសិយាតិ.