១៧. ឆដ្ឋី

កោត្ថោន្ត សទ្ទស្សេច្ចាហ-‘អន្តោវសាន’មិច្ចាទិ, ‘‘វណ្ណស្សន្តស្ស’’តិ (១-១-៥២) សុត្តេ វណ្ណគ្គហណមន្តវិសេសនាយោបទិដ្ឋំ បាណិនិនា-អន្តស្ស បទស្ស វាក្យស្ស វា មាភវី’តិ, ឥហ ត្វនត្ថកំ វណ្ណគ្គហណំ ព្យវច្ឆេជ្ជាភាវាតិ ទស្សេតុមាហ-‘សោ ចេ’ ត្យាទិ, ននុ ព្រហ្មស្សាតិ វិសេសនត្ថេន វត្តុមិច្ឆិតោ មហាព្រហ្មសទ្ទោ ឆដ្ឋីនិទ្ទិដ្ឋោ នាមាតិ ‘‘ព្រហ្មស្សុ វា’’តិ (២-១៩៤) ឧអាទេសោ ‘‘ឆដ្ឋិយន្តស្សា’’តិ អន្តព្រហ្មសទ្ទស្ស បប្បោតិ, តថា សតិ ‘ន ហិ ឆដ្ឋី និទ្ទិដ្ឋស្ស អន្តំ បទំ វាក្យំ វា សម្ភវតី’តិ កស្មា វុត្តន្តិ, វុច្ចតេ- ន វិសេសនត្ថេនាក្ខេបមត្តេន មហាព្រហ្មសទ្ទោ ឆដ្ឋី និទ្ទិដ្ឋោ នាម ភវតីតិ ន ព្រហ្មសទ្ទស្ស សព្ពស្សាទេសប្បសង្គោ, មហាព្រហ្មសទ្ទេ វា ព្រហ្មសទ្ទោ អត្ថីតិ តស្សាន្តស្ស ឧត្តំ វិធីយតេ.