១១. ឃា

ឥត្ថិយំ នាមស្សន្តេតិ ច វត្តតេ. ហេដ្ឋា សព្ពត្ថ សញ្ញិនោ និទ្ទិសិយ សញ្ញាយ និទ្ទិដ្ឋត្តា តត្ថ វិយ វិសុំ សញ្ញិនោ បឋមមនិទ្ទេសេ អសន្តោ វិយាតិ ទោសលេសមាលម្ពិយ ចោទយតិ នន្ហចេ’ត្យាទិនា. តត្ថ សេតោតិ វិជ្ជមានស្ស សញ្ញិនោ. ការិយេនាតិ សញ្ញាការិយេន. បរិហរតិ ‘នាយំ ទោសោ’តិអាទិនា. បច្ឆាវុត្តមត្តេនាតិ ‘‘ឃា’’តិ សុត្តេ ការិយិនោ អាការស្ស បច្ឆា វុត្តមត្តេន. នចាតិ ឯត្ថ ចសទ្ទោ វត្តព្ពន្តរសមុច្ចយេ, អបរម្បិ កិញ្ចិ វត្តព្ពមនិយមរូបមត្ថីតិ អត្ថោ. អនិយមរូបមាចរិយប្បវត្តិតោ សាធេតុមាហ ‘ឧភយថាបិ’ច្ចាទិ.