៦. មិត្តសុត្តំ

១៤៦. ‘‘បញ្ចហិ, ភិក្ខវេ, ធម្មេហិ សមន្នាគតោ ភិក្ខុ មិត្តោ ន សេវិតព្ពោ. កតមេហិ បញ្ចហិ? កម្មន្តំ ការេតិ, អធិករណំ អាទិយតិ, បាមោក្ខេសុ ភិក្ខូសុ បដិវិរុទ្ធោ ហោតិ, ទីឃចារិកំ អនវត្ថចារិកំ [អវត្ថានចារិកំ (ស្យា.)] អនុយុត្តោ វិហរតិ, នប្បដិពលោ ហោតិ កាលេន កាលំ ធម្មិយា កថាយ សន្ទស្សេតុំ សមាទបេតុំ សមុត្តេជេតុំ សម្បហំសេតុំ. ឥមេហិ ខោ, ភិក្ខវេ, បញ្ចហិ ធម្មេហិ សមន្នាគតោ ភិក្ខុ មិត្តោ ន សេវិតព្ពោ.

‘‘បញ្ចហិ, ភិក្ខវេ, ធម្មេហិ សមន្នាគតោ ភិក្ខុ មិត្តោ សេវិតព្ពោ. កតមេហិ បញ្ចហិ? ន កម្មន្តំ ការេតិ, ន អធិករណំ អាទិយតិ, ន បាមោក្ខេសុ ភិក្ខូសុ បដិវិរុទ្ធោ ហោតិ, ន ទីឃចារិកំ អនវត្ថចារិកំ អនុយុត្តោ វិហរតិ, បដិពលោ ហោតិ កាលេន កាលំ ធម្មិយា កថាយ សន្ទស្សេតុំ សមាទបេតុំ សមុត្តេជេតុំ សម្បហំសេតុំ. ឥមេហិ ខោ, ភិក្ខវេ, បញ្ចហិ ធម្មេហិ សមន្នាគតោ ភិក្ខុ មិត្តោ សេវិតព្ពោ’’តិ. ឆដ្ឋំ.