៧. អសប្បុរិសទានសុត្តំ

១៤៧. ‘‘បញ្ចិមានិ, ភិក្ខវេ, អសប្បុរិសទានានិ. កតមានិ បញ្ច? អសក្កច្ចំ ទេតិ, អចិត្តីកត្វា [អចិត្តិកត្វា (បី.), អចិតិំ កត្វា (ស្យា.), អចិត្តិំ កត្វា (ក.)] ទេតិ, អសហត្ថា ទេតិ, អបវិទ្ធំ [អបវិដ្ដំ (ស្យា. កំ.)] ទេតិ, អនាគមនទិដ្ឋិកោ ទេតិ. ឥមានិ ខោ, ភិក្ខវេ, បញ្ច អសប្បុរិសទានានិ.

‘‘បញ្ចិមានិ, ភិក្ខវេ, សប្បុរិសទានានិ. កតមានិ បញ្ច? សក្កច្ចំ ទេតិ, ចិត្តីកត្វា ទេតិ, សហត្ថា ទេតិ, អនបវិទ្ធំ ទេតិ, អាគមនទិដ្ឋិកោ ទេតិ. ឥមានិ ខោ, ភិក្ខវេ, បញ្ច សប្បុរិសទានានី’’តិ. សត្តមំ.