១០. បុព្ពណ្ហសុត្តំ

១៥៦. ‘‘យេ, ភិក្ខវេ, សត្តា បុព្ពណ្ហសមយំ កាយេន សុចរិតំ ចរន្តិ, វាចាយ សុចរិតំ ចរន្តិ, មនសា សុចរិតំ ចរន្តិ, សុបុព្ពណ្ហោ, ភិក្ខវេ, តេសំ សត្តានំ.

‘‘យេ, ភិក្ខវេ, សត្តា មជ្ឈន្ហិកសមយំ កាយេន សុចរិតំ ចរន្តិ, វាចាយ សុចរិតំ ចរន្តិ, មនសា សុចរិតំ ចរន្តិ, សុមជ្ឈន្ហិកោ, ភិក្ខវេ, តេសំ សត្តានំ.

‘‘យេ, ភិក្ខវេ, សត្តា សាយន្ហសមយំ កាយេន សុចរិតំ ចរន្តិ, វាចាយ សុចរិតំ ចរន្តិ, មនសា សុចរិតំ ចរន្តិ, សុសាយន្ហោ, ភិក្ខវេ, តេសំ សត្តាន’’ន្តិ.

‘‘សុនក្ខត្តំ សុមង្គលំ, សុប្បភាតំ សុហុដ្ឋិតំ [សុវុដ្ឋិតំ (សី. បី.)];

សុខណោ សុមុហុត្តោ ច, សុយិដ្ឋំ ព្រហ្មចារិសុ.

‘‘បទក្ខិណំ កាយកម្មំ, វាចាកម្មំ បទក្ខិណំ;

បទក្ខិណំ មនោកម្មំ, បណីធិ តេ បទក្ខិណេ [បណិធិយោ បទក្ខិណា (សី. បី.), បណិធិ តេ បទក្ខិណា (ស្យា. កំ.)];

បទក្ខិណានិ កត្វាន, លភន្តត្ថេ [លភតត្ថេ (សី. បី.)] បទក្ខិណេ.

‘‘តេ អត្ថលទ្ធា សុខិតា, វិរុឡ្ហា ពុទ្ធសាសនេ;

អរោគា សុខិតា ហោថ, សហ សព្ពេហិ ញាតិភី’’តិ. ទសមំ;

មង្គលវគ្គោ បញ្ចមោ.