(១៥) ៥. មង្គលវគ្គោ

១. អកុសលសុត្តំ

១៤៧. ‘‘តីហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ និរយេ. កតមេហិ តីហិ? អកុសលេន កាយកម្មេន, អកុសលេន វចីកម្មេន, អកុសលេន មនោកម្មេន – ឥមេហិ ខោ, ភិក្ខវេ, តីហិ ធម្មេហិ សមន្នាគតោ យថាភតំ និក្ខិត្តោ ឯវំ និរយេ.

‘‘តីហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ. កតមេហិ តីហិ? កុសលេន កាយកម្មេន, កុសលេន វចីកម្មេន, កុសលេន មនោកម្មេន – ឥមេហិ ខោ, ភិក្ខវេ, តីហិ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ’’តិ. បឋមំ.

២. សាវជ្ជសុត្តំ

១៤៨. ‘‘តីហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ និរយេ. កតមេហិ តីហិ? សាវជ្ជេន កាយកម្មេន, សាវជ្ជេន វចីកម្មេន, សាវជ្ជេន មនោកម្មេន – ឥមេហិ ខោ, ភិក្ខវេ, តីហិ ធម្មេហិ សមន្នាគតោ យថាភតំ និក្ខិត្តោ ឯវំ និរយេ.

‘‘តីហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ. កតមេហិ តីហិ? អនវជ្ជេន កាយកម្មេន, អនវជ្ជេន វចីកម្មេន, អនវជ្ជេន មនោកម្មេន – ឥមេហិ ខោ…បេ… ឯវំ សគ្គេ’’តិ. ទុតិយំ.

៣. វិសមសុត្តំ

១៤៩. ‘‘តីហិ, ភិក្ខវេ…បេ… វិសមេន កាយកម្មេន, វិសមេន វចីកម្មេន, វិសមេន មនោកម្មេន – ឥមេហិ ខោ…បេ… ឯវំ និរយេ.

‘‘តីហិ, ភិក្ខវេ, ធម្មេហិ…បេ… សមេន កាយកម្មេន, សមេន វចីកម្មេន, សមេន មនោកម្មេន – ឥមេហិ ខោ…បេ… ឯវំ សគ្គេ’’តិ. តតិយំ.

៤. អសុចិសុត្តំ

១៥០. ‘‘តីហិ, ភិក្ខវេ…បេ… អសុចិនា កាយកម្មេន, អសុចិនា វចីកម្មេន, អសុចិនា មនោកម្មេន – ឥមេហិ ខោ…បេ… ឯវំ និរយេ.

‘‘តីហិ, ភិក្ខវេ…បេ… សុចិនា កាយកម្មេន, សុចិនា វចីកម្មេន, សុចិនា មនោកម្មេន – ឥមេហិ ខោ, ភិក្ខវេ, តីហិ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ’’តិ. ចតុត្ថំ.

៥. បឋមខតសុត្តំ

១៥១. ‘‘តីហិ, ភិក្ខវេ, ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតិ. កតមេហិ តីហិ? អកុសលេន កាយកម្មេន, អកុសលេន វចីកម្មេន, អកុសលេន មនោកម្មេន – ឥមេហិ ខោ, ភិក្ខវេ, តីហិ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតិ.

‘‘តីហិ, ភិក្ខវេ, ធម្មេហិ សមន្នាគតោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតិ. កតមេហិ តីហិ? កុសលេន កាយកម្មេន, កុសលេន វចីកម្មេន, កុសលេន មនោកម្មេន…បេ…. បញ្ចមំ.

៦. ទុតិយខតសុត្តំ

១៥២. ‘‘តីហិ, ភិក្ខវេ…បេ… សាវជ្ជេន កាយកម្មេន, សាវជ្ជេន វចីកម្មេន, សាវជ្ជេន មនោកម្មេន…បេ….

‘‘តីហិ, ភិក្ខវេ…បេ… អនវជ្ជេន កាយកម្មេន, អនវជ្ជេន វចីកម្មេន, អនវជ្ជេន មនោកម្មេន…បេ…. ឆដ្ឋំ.

៧. តតិយខតសុត្តំ

១៥៣. ‘‘តីហិ, ភិក្ខវេ…បេ… វិសមេន កាយកម្មេន, វិសមេន វចីកម្មេន, វិសមេន មនោកម្មេន…បេ….

‘‘តីហិ, ភិក្ខវេ…បេ… សមេន កាយកម្មេន, សមេន វចីកម្មេន, សមេន មនោកម្មេន…បេ…. សត្តមំ.

៨. ចតុត្ថខតសុត្តំ

១៥៤. ‘‘តីហិ, ភិក្ខវេ…បេ… អសុចិនា កាយកម្មេន, អសុចិនា វចីកម្មេន, អសុចិនា មនោកម្មេន…បេ….

‘‘តីហិ, ភិក្ខវេ…បេ… សុចិនា កាយកម្មេន, សុចិនា វចីកម្មេន, សុចិនា មនោកម្មេន – ឥមេហិ ខោ, ភិក្ខវេ, តីហិ ធម្មេហិ សមន្នាគតោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតី’’តិ. អដ្ឋមំ.

៩. វន្ទនាសុត្តំ

១៥៥. ‘‘តិស្សោ ឥមា, ភិក្ខវេ, វន្ទនា. កតមា តិស្សោ? កាយេន, វាចាយ, មនសា – ឥមា ខោ, ភិក្ខវេ, តិស្សោ វន្ទនា’’តិ. នវមំ.

១០. បុព្ពណ្ហសុត្តំ

១៥៦. ‘‘យេ, ភិក្ខវេ, សត្តា បុព្ពណ្ហសមយំ កាយេន សុចរិតំ ចរន្តិ, វាចាយ សុចរិតំ ចរន្តិ, មនសា សុចរិតំ ចរន្តិ, សុបុព្ពណ្ហោ, ភិក្ខវេ, តេសំ សត្តានំ.

‘‘យេ, ភិក្ខវេ, សត្តា មជ្ឈន្ហិកសមយំ កាយេន សុចរិតំ ចរន្តិ, វាចាយ សុចរិតំ ចរន្តិ, មនសា សុចរិតំ ចរន្តិ, សុមជ្ឈន្ហិកោ, ភិក្ខវេ, តេសំ សត្តានំ.

‘‘យេ, ភិក្ខវេ, សត្តា សាយន្ហសមយំ កាយេន សុចរិតំ ចរន្តិ, វាចាយ សុចរិតំ ចរន្តិ, មនសា សុចរិតំ ចរន្តិ, សុសាយន្ហោ, ភិក្ខវេ, តេសំ សត្តាន’’ន្តិ.

‘‘សុនក្ខត្តំ សុមង្គលំ, សុប្បភាតំ សុហុដ្ឋិតំ [សុវុដ្ឋិតំ (សី. បី.)];

សុខណោ សុមុហុត្តោ ច, សុយិដ្ឋំ ព្រហ្មចារិសុ.

‘‘បទក្ខិណំ កាយកម្មំ, វាចាកម្មំ បទក្ខិណំ;

បទក្ខិណំ មនោកម្មំ, បណីធិ តេ បទក្ខិណេ [បណិធិយោ បទក្ខិណា (សី. បី.), បណិធិ តេ បទក្ខិណា (ស្យា. កំ.)];

បទក្ខិណានិ កត្វាន, លភន្តត្ថេ [លភតត្ថេ (សី. បី.)] បទក្ខិណេ.

‘‘តេ អត្ថលទ្ធា សុខិតា, វិរុឡ្ហា ពុទ្ធសាសនេ;

អរោគា សុខិតា ហោថ, សហ សព្ពេហិ ញាតិភី’’តិ. ទសមំ;

មង្គលវគ្គោ បញ្ចមោ.