੧੦. ਦਸਮਸਿਕ੍ਖਾਪਦਂ

੧੦੬੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਪਸਾਖੇ ਜਾਤਂ ਗਣ੍ਡਂ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਭੇਦਾਪੇਸਿ. ਅਥ ਖੋ ਸੋ ਪੁਰਿਸੋ ਤਂ ਭਿਕ੍ਖੁਨਿਂ ਦੂਸੇਤੁਂ ਉਪਕ੍ਕਮਿ. ਸਾ ਵਿਸ੍ਸਰਮਕਾਸਿ. ਭਿਕ੍ਖੁਨਿਯੋ ਉਪਧਾਵਿਤ੍ਵਾ ਤਂ ਭਿਕ੍ਖੁਨਿਂ ਏਤਦਵੋਚੁਂ – ‘‘ਕਿਸ੍ਸ ਤ੍ਵਂ, ਅਯ੍ਯੇ, ਵਿਸ੍ਸਰਮਕਾਸੀ’’ਤਿ? ਅਥ ਖੋ ਸਾ ਭਿਕ੍ਖੁਨੀ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਪਸਾਖੇ ਜਾਤਂ ਗਣ੍ਡਂ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਭੇਦਾਪੇਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨੀ ਪਸਾਖੇ ਜਾਤਂ ਗਣ੍ਡਂ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਭੇਦਾਪੇਤੀਤਿ [ਭੇਦਾਪੇਸੀਤਿ (ਕ.)]? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨੀ ਪਸਾਖੇ ਜਾਤਂ ਗਣ੍ਡਂ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਭੇਦਾਪੇਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੧੦੬੩. ‘‘ਯਾ ਪਨ ਭਿਕ੍ਖੁਨੀ ਪਸਾਖੇ ਜਾਤਂ ਗਣ੍ਡਂ ਵਾ ਰੁਧਿਤਂ ਵਾ ਅਨਪਲੋਕੇਤ੍ਵਾ ਸਙ੍ਘਂ ਵਾ ਗਣਂ ਵਾ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਭੇਦਾਪੇਯ੍ਯ ਵਾ ਫਾਲਾਪੇਯ੍ਯ ਵਾ ਧੋਵਾਪੇਯ੍ਯ ਵਾ ਆਲਿਮ੍ਪਾਪੇਯ੍ਯ ਵਾ ਬਨ੍ਧਾਪੇਯ੍ਯ ਵਾ ਮੋਚਾਪੇਯ੍ਯ ਵਾ, ਪਾਚਿਤ੍ਤਿਯ’’ਨ੍ਤਿ.

੧੦੬੪. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਪਸਾਖਂ ਨਾਮ ਅਧੋਨਾਭਿ ਉਬ੍ਭਜਾਣੁਮਣ੍ਡਲਂ. ਜਾਤਨ੍ਤਿ ਤਤ੍ਥ ਜਾਤਂ. ਗਣ੍ਡੋ ਨਾਮ ਯੋ ਕੋਚਿ ਗਣ੍ਡੋ. ਰੁਧਿਤਂ ਨਾਮ ਯਂ ਕਿਞ੍ਚਿ ਵਣਂ. ਅਨਪਲੋਕੇਤ੍ਵਾਤਿ ਅਨਾਪੁਚ੍ਛਾ. ਸਙ੍ਘੋ ਨਾਮ ਭਿਕ੍ਖੁਨਿਸਙ੍ਘੋ ਵੁਚ੍ਚਤਿ. ਗਣੋ ਨਾਮ ਸਮ੍ਬਹੁਲਾ ਭਿਕ੍ਖੁਨਿਯੋ ਵੁਚ੍ਚਨ੍ਤਿ. ਪੁਰਿਸੋ ਨਾਮ ਮਨੁਸ੍ਸਪੁਰਿਸੋ, ਨ ਯਕ੍ਖੋ, ਨ ਪੇਤੋ, ਨ ਤਿਰਚ੍ਛਾਨਗਤੋ, ਵਿਞ੍ਞੂ ਪਟਿਬਲੋ ਦੂਸੇਤੁਂ. ਸਦ੍ਧਿਨ੍ਤਿ ਏਕਤੋ. ਏਕੇਨੇਕਾਤਿ ਪੁਰਿਸੋ ਚੇਵ ਹੋਤਿ ਭਿਕ੍ਖੁਨੀ ਚ.

੧੦੬੫. ‘‘ਭਿਨ੍ਦਾ’’ਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਭਿਨ੍ਨੇ ਆਪਤ੍ਤਿ ਪਾਚਿਤ੍ਤਿਯਸ੍ਸ. ‘‘ਫਾਲੇਹੀ’’ਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਾਲਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ. ‘‘ਧੋਵਾ’’ਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਧੋਵਿਤੇ [ਧੋਤੇ (ਸ੍ਯਾ.)] ਆਪਤ੍ਤਿ ਪਾਚਿਤ੍ਤਿਯਸ੍ਸ. ‘‘ਆਲਿਮ੍ਪਾ’’ਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਲਿਤ੍ਤੇ [ਆਲਿਤ੍ਤੇ (ਸ੍ਯਾ.)] ਆਪਤ੍ਤਿ ਪਾਚਿਤ੍ਤਿਯਸ੍ਸ. ‘‘ਬਨ੍ਧਾਹੀ’’ਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਬਦ੍ਧੇ ਆਪਤ੍ਤਿ ਪਾਚਿਤ੍ਤਿਯਸ੍ਸ. ‘‘ਮੋਚੇਹੀ’’ਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਮੁਤ੍ਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

੧੦੬੬. ਅਨਾਪਤ੍ਤਿ ਅਪਲੋਕੇਤ੍ਵਾ ਭੇਦਾਪੇਤਿ ਵਾ ਫਾਲਾਪੇਤਿ ਵਾ ਧੋਵਾਪੇਤਿ ਵਾ ਆਲਿਮ੍ਪਾਪੇਤਿ ਵਾ ਬਨ੍ਧਾਪੇਤਿ ਵਾ ਮੋਚਾਪੇਤਿ ਵਾ, ਯਾ ਕਾਚਿ ਵਿਞ੍ਞੂ ਦੁਤਿਯਿਕਾ [ਯਾ ਕਾਚਿ ਵਿਞ੍ਞੂ ਦੁਤਿਯਾ (ਸ੍ਯਾ.), ਯੋ ਕੋਚਿ ਵਿਞ੍ਞੂ ਦੁਤਿਯੋ (ਕ.)] ਹੋਤਿ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਦਸਮਸਿਕ੍ਖਾਪਦਂ ਨਿਟ੍ਠਿਤਂ.

ਆਰਾਮਵਗ੍ਗੋ ਛਟ੍ਠੋ.