ਭਿਕ੍ਖੁਨੀਵਿਭਙ੍ਗੋ

੧. ਪਾਰਾਜਿਕਕਣ੍ਡਂ (ਭਿਕ੍ਖੁਨੀਵਿਭਙ੍ਗੋ)

੧. ਪਠਮਪਾਰਾਜਿਕਂ

੬੫੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਸਙ੍ਘਸ੍ਸ ਵਿਹਾਰਂ ਕਤ੍ਤੁਕਾਮੋ ਹੋਤਿ. ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਇਚ੍ਛਾਮਹਂ, ਅਯ੍ਯੇ, ਭਿਕ੍ਖੁਨਿਸਙ੍ਘਸ੍ਸ ਵਿਹਾਰਂ ਕਾਤੁਂ. ਦੇਥ ਮੇ ਨਵਕਮ੍ਮਿਕਂ ਭਿਕ੍ਖੁਨਿ’’ਨ੍ਤਿ. ਤੇਨ ਖੋ ਪਨ ਸਮਯੇਨ ਚਤਸ੍ਸੋ ਭਗਿਨਿਯੋ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਨ੍ਤਿ – ਨਨ੍ਦਾ, ਨਨ੍ਦਵਤੀ, ਸੁਨ੍ਦਰੀਨਨ੍ਦਾ, ਥੁਲ੍ਲਨਨ੍ਦਾਤਿ. ਤਾਸੁ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਤਰੁਣਪਬ੍ਬਜਿਤਾ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੀ ਦਕ੍ਖਾ ਅਨਲਸਾ, ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤਾ, ਅਲਂ ਕਾਤੁਂ ਅਲਂ ਸਂਵਿਧਾਤੁਂ. ਅਥ ਖੋ ਭਿਕ੍ਖੁਨਿਸਙ੍ਘੋ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਸਮ੍ਮਨ੍ਨਿਤ੍ਵਾ ਸਾਲ਼੍ਹਸ੍ਸ ਮਿਗਾਰਨਤ੍ਤੁਨੋ ਨਵਕਮ੍ਮਿਕਂ ਅਦਾਸਿ. ਤੇਨ ਖੋ ਪਨ ਸਮਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਾਲ਼੍ਹਸ੍ਸ ਮਿਗਾਰਨਤ੍ਤੁਨੋ ਨਿਵੇਸਨਂ ਅਭਿਕ੍ਖਣਂ ਗਚ੍ਛਤਿ – ‘‘ਵਾਸਿਂ ਦੇਥ, ਪਰਸੁਂ [ਫਰਸੁਂ (ਸ੍ਯਾ. ਕ.)] ਦੇਥ, ਕੁਠਾਰਿਂ [ਕੁਧਾਰਿਂ (ਕ.)] ਦੇਥ, ਕੁਦ੍ਦਾਲਂ ਦੇਥ, ਨਿਖਾਦਨਂ ਦੇਥਾ’’ਤਿ. ਸਾਲ਼੍ਹੋਪਿ ਮਿਗਾਰਨਤ੍ਤਾ ਭਿਕ੍ਖੁਨੁਪਸ੍ਸਯਂ ਅਭਿਕ੍ਖਣਂ ਗਚ੍ਛਤਿ ਕਤਾਕਤਂ ਜਾਨਿਤੁਂ. ਤੇ ਅਭਿਣ੍ਹਦਸ੍ਸਨੇਨ ਪਟਿਬਦ੍ਧਚਿਤ੍ਤਾ ਅਹੇਸੁਂ.

ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਦੂਸੇਤੁਂ ਓਕਾਸਂ ਅਲਭਮਾਨੋ ਏਤਦੇਵਤ੍ਥਾਯ ਭਿਕ੍ਖੁਨਿਸਙ੍ਘਸ੍ਸ ਭਤ੍ਤਂ ਅਕਾਸਿ. ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਭਤ੍ਤਗ੍ਗੇ ਆਸਨਂ ਪਞ੍ਞਪੇਨ੍ਤੋ – ‘‘ਏਤ੍ਤਕਾ ਭਿਕ੍ਖੁਨਿਯੋ ਅਯ੍ਯਾਯ ਸੁਨ੍ਦਰੀਨਨ੍ਦਾਯ ਵੁਡ੍ਢਤਰਾ’’ਤਿ ਏਕਮਨ੍ਤਂ ਆਸਨਂ ਪਞ੍ਞਪੇਸਿ ‘‘ਏਤ੍ਤਕਾ ਨਵਕਤਰਾ’’ਤਿ – ਏਕਮਨ੍ਤਂ ਆਸਨਂ ਪਞ੍ਞਪੇਸਿ. ਪਟਿਚ੍ਛਨ੍ਨੇ ਓਕਾਸੇ ਨਿਕੂਟੇ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਆਸਨਂ ਪਞ੍ਞਪੇਸਿ, ਯਥਾ ਥੇਰਾ ਭਿਕ੍ਖੁਨਿਯੋ ਜਾਨੇਯ੍ਯੁਂ – ‘‘ਨਵਕਾਨਂ ਭਿਕ੍ਖੁਨੀਨਂ ਸਨ੍ਤਿਕੇ ਨਿਸਿਨ੍ਨਾ’’ਤਿ; ਨਵਕਾਪਿ ਭਿਕ੍ਖੁਨਿਯੋ ਜਾਨੇਯ੍ਯੁਂ – ‘‘ਥੇਰਾਨਂ ਭਿਕ੍ਖੁਨੀਨਂ ਸਨ੍ਤਿਕੇ ਨਿਸਿਨ੍ਨਾ’’ਤਿ. ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਸਙ੍ਘਸ੍ਸ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਅਯ੍ਯੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਲ੍ਲਕ੍ਖੇਤ੍ਵਾ – ‘‘ਨ ਬਹੁਕਤੋ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਸਙ੍ਘਸ੍ਸ ਭਤ੍ਤਂ ਅਕਾਸਿ; ਮਂ ਸੋ ਦੂਸੇਤੁਕਾਮੋ. ਸਚਾਹਂ ਗਮਿਸ੍ਸਾਮਿ ਵਿਸ੍ਸਰੋ ਮੇ ਭਵਿਸ੍ਸਤੀ’’ਤਿ, ਅਨ੍ਤੇਵਾਸਿਨਿਂ ਭਿਕ੍ਖੁਨਿਂ ਆਣਾਪੇਸਿ – ‘‘ਗਚ੍ਛ ਮੇ ਪਿਣ੍ਡਪਾਤਂ ਨੀਹਰ. ਯੋ ਚੇ ਮਂ ਪੁਚ੍ਛਤਿ, ‘ਗਿਲਾਨਾ’ਤਿ ਪਟਿਵੇਦੇਹੀ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸਾ ਭਿਕ੍ਖੁਨੀ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਪਚ੍ਚਸ੍ਸੋਸਿ.

ਤੇਨ ਖੋ ਪਨ ਸਮਯੇਨ ਸਾਲ਼੍ਹੋ ਮਿਗਾਰਨਤ੍ਤਾ ਬਹਿਦ੍ਵਾਰਕੋਟ੍ਠਕੇ ਠਿਤੋ ਹੋਤਿ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਪਟਿਪੁਚ੍ਛਨ੍ਤੋ – ‘‘ਕਹਂ, ਅਯ੍ਯੇ, ਅਯ੍ਯਾ ਸੁਨ੍ਦਰੀਨਨ੍ਦਾ? ਕਹਂ, ਅਯ੍ਯੇ, ਅਯ੍ਯਾ ਸੁਨ੍ਦਰੀਨਨ੍ਦਾ’’ਤਿ? ਏਵਂ ਵੁਤ੍ਤੇ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਅਨ੍ਤੇਵਾਸਿਨੀ ਭਿਕ੍ਖੁਨੀ ਸਾਲ਼੍ਹਂ ਮਿਗਾਰਨਤ੍ਤਾਰਂ ਏਤਦਵੋਚ – ‘‘ਗਿਲਾਨਾਵੁਸੋ; ਪਿਣ੍ਡਪਾਤਂ ਨੀਹਰਿਸ੍ਸਾਮੀ’’ਤਿ. ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ – ‘‘ਯਮ੍ਪਾਹਂ ਅਤ੍ਥਾਯ [ਯਂਪਾਹਂ (ਸ੍ਯਾ.)] ਭਿਕ੍ਖੁਨਿਸਙ੍ਘਸ੍ਸ ਭਤ੍ਤਂ ਅਕਾਸਿਂ ਅਯ੍ਯਾਯ ਸੁਨ੍ਦਰੀਨਨ੍ਦਾਯ ਕਾਰਣਾ’’ਤਿ ਮਨੁਸ੍ਸੇ ਆਣਾਪੇਤ੍ਵਾ – ‘‘ਭਿਕ੍ਖੁਨਿਸਙ੍ਘਂ ਭਤ੍ਤੇਨ ਪਰਿਵਿਸਥਾ’’ਤਿ ਵਤ੍ਵਾ ਯੇਨ ਭਿਕ੍ਖੁਨੁਪਸ੍ਸਯੋ ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਬਹਾਰਾਮਕੋਟ੍ਠਕੇ ਠਿਤਾ ਹੋਤਿ ਸਾਲ਼੍ਹਂ ਮਿਗਾਰਨਤ੍ਤਾਰਂ ਪਤਿਮਾਨੇਨ੍ਤੀ. ਅਦ੍ਦਸਾ ਖੋ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਾਲ਼੍ਹਂ ਮਿਗਾਰਨਤ੍ਤਾਰਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਉਪਸ੍ਸਯਂ ਪਵਿਸਿਤ੍ਵਾ ਸਸੀਸਂ ਪਾਰੁਪਿਤ੍ਵਾ ਮਞ੍ਚਕੇ ਨਿਪਜ੍ਜਿ. ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਏਤਦਵੋਚ – ‘‘ਕਿਂ ਤੇ, ਅਯ੍ਯੇ, ਅਫਾਸੁ, ਕਿਸ੍ਸ ਨਿਪਨ੍ਨਾਸੀ’’ਤਿ? ‘‘ਏਵਞ੍ਹੇਤਂ, ਆਵੁਸੋ, ਹੋਤਿ ਯਾ ਅਨਿਚ੍ਛਨ੍ਤਂ ਇਚ੍ਛਤੀ’’ਤਿ. ‘‘ਕ੍ਯਾਹਂ ਤਂ, ਅਯ੍ਯੇ, ਨ ਇਚ੍ਛਿਸ੍ਸਾਮਿ? ਅਪਿ ਚਾਹਂ ਓਕਾਸਂ ਨ ਲਭਾਮਿ ਤਂ ਦੂਸੇਤੁ’’ਨ੍ਤਿ. ਅਵਸ੍ਸੁਤੋ ਅਵਸ੍ਸੁਤਾਯ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਕਾਯਸਂਸਗ੍ਗਂ ਸਮਾਪਜ੍ਜਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਜਰਾਦੁਬ੍ਬਲਾ ਚਰਣਗਿਲਾਨਾ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਅਵਿਦੂਰੇ ਨਿਪਨ੍ਨਾ ਹੋਤਿ. ਅਦ੍ਦਸਾ ਖੋ ਸਾ ਭਿਕ੍ਖੁਨੀ ਸਾਲ਼੍ਹਂ ਮਿਗਾਰਨਤ੍ਤਾਰਂ ਅਵਸ੍ਸੁਤਂ ਅਵਸ੍ਸੁਤਾਯ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤਂ. ਦਿਸ੍ਵਾਨ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਸੁਨ੍ਦਰੀਨਨ੍ਦਾ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤੀ’’ਤਿ! ਅਥ ਖੋ ਸਾ ਭਿਕ੍ਖੁਨੀ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨਿਯੋ ਕੁਕ੍ਕੁਚ੍ਚਿਕਾ ਸਿਕ੍ਖਾਕਾਮਾ ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਸੁਨ੍ਦਰੀਨਨ੍ਦਾ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤੀ’’ਤਿ!

ਅਥ ਖੋ ਤੇ ਭਿਕ੍ਖੂ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਤੀ’’ਤਿ [ਸਾਦਿਯੀਤਿ (ਕ.)]? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ, ਭਿਕ੍ਖਵੇ, ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ. ਅਥ ਖ੍ਵੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ. ਅਥ ਖੋ ਭਗਵਾ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਦੁਬ੍ਭਰਤਾਯ ਦੁਪ੍ਪੋਸਤਾਯ ਮਹਿਚ੍ਛਤਾਯ ਅਸਨ੍ਤੁਟ੍ਠਿਤਾਯ [ਅਸਨ੍ਤੁਟ੍ਠਤਾਯ (ਸ੍ਯਾ.), ਅਸਨ੍ਤੁਟ੍ਠਿਯਾ (ਕ.)] ਸਙ੍ਗਣਿਕਾਯ ਕੋਸਜ੍ਜਸ੍ਸ ਅਵਣ੍ਣਂ ਭਾਸਿਤ੍ਵਾ, ਅਨੇਕਪਰਿਯਾਯੇਨ ਸੁਭਰਤਾਯ ਸੁਪੋਸਤਾਯ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ [ਸਨ੍ਤੁਟ੍ਠਿਯਾ (ਕ.)] ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ ਵਣ੍ਣਂ ਭਾਸਿਤ੍ਵਾ, ਭਿਕ੍ਖੂਨਂ ਤਦਨੁਚ੍ਛਵਿਕਂ ਤਦਨੁਲੋਮਿਕਂ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੁਨੀਨਂ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਿ ਦਸ ਅਤ੍ਥਵਸੇ ਪਟਿਚ੍ਚ – ਸਙ੍ਘਸੁਟ੍ਠੁਤਾਯ, ਸਙ੍ਘਫਾਸੁਤਾਯ, ਦੁਮ੍ਮਙ੍ਕੂਨਂ ਭਿਕ੍ਖੁਨੀਨਂ ਨਿਗ੍ਗਹਾਯ, ਪੇਸਲਾਨਂ ਭਿਕ੍ਖੁਨੀਨਂ ਫਾਸੁਵਿਹਾਰਾਯ, ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯ, ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯ, ਅਪ੍ਪਸਨ੍ਨਾਨਂ ਪਸਾਦਾਯ, ਪਸਨ੍ਨਾਨਂ ਭਿਯ੍ਯੋਭਾਵਾਯ, ਸਦ੍ਧਮ੍ਮਟ੍ਠਿਤਿਯਾ ਵਿਨਯਾਨੁਗ੍ਗਹਾਯ. ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੬੫੭. ‘‘ਯਾ ਪਨ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਮਸਨਂ ਵਾ ਪਰਾਮਸਨਂ ਵਾ ਗਹਣਂ ਵਾ ਛੁਪਨਂ ਵਾ ਪਟਿਪੀਲ਼ਨਂ ਵਾ ਸਾਦਿਯੇਯ੍ਯ, ਅਯਮ੍ਪਿ ਪਾਰਾਜਿਕਾ ਹੋਤਿ ਅਸਂਵਾਸਾ ਉਬ੍ਭਜਾਣੁਮਣ੍ਡਲਿਕਾ’’ਤਿ.

੬੫੮. ਯਾ ਪਨਾਤਿ ਯਾ ਯਾਦਿਸਾ ਯਥਾਯੁਤ੍ਤਾ ਯਥਾਜਚ੍ਚਾ ਯਥਾਨਾਮਾ ਯਥਾਗੋਤ੍ਤਾ ਯਥਾਸੀਲਾ ਯਥਾਵਿਹਾਰਿਨੀ ਯਥਾਗੋਚਰਾ ਥੇਰਾ ਵਾ ਨਵਾ ਵਾ ਮਜ੍ਝਿਮਾ ਵਾ, ਏਸਾ ਵੁਚ੍ਚਤਿ ਯਾ ਪਨਾਤਿ.

ਭਿਕ੍ਖੁਨੀਤਿ ਭਿਕ੍ਖਿਕਾਤਿ ਭਿਕ੍ਖੁਨੀ; ਭਿਕ੍ਖਾਚਰਿਯਂ ਅਜ੍ਝੁਪਗਤਾਤਿ ਭਿਕ੍ਖੁਨੀ; ਭਿਨ੍ਨਪਟਧਰਾਤਿ ਭਿਕ੍ਖੁਨੀ; ਸਮਞ੍ਞਾਯ ਭਿਕ੍ਖੁਨੀ; ਪਟਿਞ੍ਞਾਯ ਭਿਕ੍ਖੁਨੀ; ਏਹਿ ਭਿਕ੍ਖੁਨੀਤਿ ਭਿਕ੍ਖੁਨੀ; ਤੀਹਿ ਸਰਣਗਮਨੇਹਿ ਉਪਸਮ੍ਪਨ੍ਨਾਤਿ ਭਿਕ੍ਖੁਨੀ; ਭਦ੍ਰਾ ਭਿਕ੍ਖੁਨੀ; ਸਾਰਾ ਭਿਕ੍ਖੁਨੀ; ਸੇਖਾ ਭਿਕ੍ਖੁਨੀ; ਅਸੇਖਾ ਭਿਕ੍ਖੁਨੀ; ਸਮਗ੍ਗੇਨ ਉਭਤੋਸਙ੍ਘੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ ਉਪਸਮ੍ਪਨ੍ਨਾਤਿ ਭਿਕ੍ਖੁਨੀ. ਤਤ੍ਰ ਯਾਯਂ ਭਿਕ੍ਖੁਨੀ ਸਮਗ੍ਗੇਨ ਉਭਤੋਸਙ੍ਘੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ ਉਪਸਮ੍ਪਨ੍ਨਾ, ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਅਵਸ੍ਸੁਤਾ ਨਾਮ ਸਾਰਤ੍ਤਾ ਅਪੇਕ੍ਖਵਤੀ ਪਟਿਬਦ੍ਧਚਿਤ੍ਤਾ.

ਅਵਸ੍ਸੁਤੋ ਨਾਮ ਸਾਰਤ੍ਤੋ ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋ.

ਪੁਰਿਸਪੁਗ੍ਗਲੋ ਨਾਮ ਮਨੁਸ੍ਸਪੁਰਿਸੋ ਨ ਯਕ੍ਖੋ ਨ ਪੇਤੋ ਨ ਤਿਰਚ੍ਛਾਨਗਤੋ ਵਿਞ੍ਞੂ ਪਟਿਬਲੋ ਕਾਯਸਂਸਗ੍ਗਂ ਸਮਾਪਜ੍ਜਿਤੁਂ.

ਅਧਕ੍ਖਕਨ੍ਤਿ ਹੇਟ੍ਠਕ੍ਖਕਂ.

ਉਬ੍ਭਜਾਣੁਮਣ੍ਡਲਨ੍ਤਿ ਉਪਰਿਜਾਣੁਮਣ੍ਡਲਂ.

ਆਮਸਨਂ ਨਾਮ ਆਮਟ੍ਠਮਤ੍ਤਂ.

ਪਰਾਮਸਨਂ ਨਾਮ ਇਤੋਚਿਤੋ ਚ ਸਞ੍ਚੋਪਨਂ.

ਗਹਣਂ ਨਾਮ ਗਹਿਤਮਤ੍ਤਂ.

ਛੁਪਨਂ ਨਾਮ ਫੁਟ੍ਠਮਤ੍ਤਂ.

ਪਟਿਪੀਲ਼ਨਂ ਵਾ ਸਾਦਿਯੇਯ੍ਯਾਤਿ ਅਙ੍ਗਂ ਗਹੇਤ੍ਵਾ ਨਿਪ੍ਪੀਲ਼ਨਂ ਸਾਦਿਯਤਿ.

ਅਯਮ੍ਪੀਤਿ ਪੁਰਿਮਾਯੋ ਉਪਾਦਾਯ ਵੁਚ੍ਚਤਿ.

ਪਾਰਾਜਿਕਾ ਹੋਤੀਤਿ ਸੇਯ੍ਯਥਾਪਿ ਨਾਮ ਪੁਰਿਸੋ ਸੀਸਚ੍ਛਿਨ੍ਨੋ ਅਭਬ੍ਬੋ ਤੇਨ ਸਰੀਰਬਨ੍ਧਨੇਨ ਜੀਵਿਤੁਂ, ਏਵਮੇਵ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਮਸਨਂ ਵਾ ਪਰਾਮਸਨਂ ਵਾ ਗਹਣਂ ਵਾ ਛੁਪਨਂ ਵਾ ਪਟਿਪੀਲ਼ਨਂ ਵਾ ਸਾਦਿਯਨ੍ਤੀ ਅਸ੍ਸਮਣੀ ਹੋਤਿ ਅਸਕ੍ਯਧੀਤਾ. ਤੇਨ ਵੁਚ੍ਚਤਿ ਪਾਰਾਜਿਕਾ ਹੋਤੀਤਿ.

ਅਸਂਵਾਸਾਤਿ ਸਂਵਾਸੋ ਨਾਮ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾ, ਏਸੋ ਸਂਵਾਸੋ ਨਾਮ. ਸੋ ਤਾਯ ਸਦ੍ਧਿਂ ਨਤ੍ਥਿ, ਤੇਨ ਵੁਚ੍ਚਤਿ ਅਸਂਵਾਸਾਤਿ.

੬੫੯. ਉਭਤੋਅਵਸ੍ਸੁਤੇ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਪਾਰਾਜਿਕਸ੍ਸ. ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

੬੬੦. ਏਕਤੋਅਵਸ੍ਸੁਤੇ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

੬੬੧. ਉਭਤੋਅਵਸ੍ਸੁਤੇ ਯਕ੍ਖਸ੍ਸ ਵਾ ਪੇਤਸ੍ਸ ਵਾ ਪਣ੍ਡਕਸ੍ਸ ਵਾ ਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹਸ੍ਸ ਵਾ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

੬੬੨. ਏਕਤੋਅਵਸ੍ਸੁਤੇ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

੬੬੩. ਅਨਾਪਤ੍ਤਿ ਅਸਞ੍ਚਿਚ੍ਚ, ਅਸ੍ਸਤਿਯਾ, ਅਜਾਨਨ੍ਤਿਯਾ, ਅਸਾਦਿਯਨ੍ਤਿਯਾ, ਉਮ੍ਮਤ੍ਤਿਕਾਯ, ਖਿਤ੍ਤਚਿਤ੍ਤਾਯ, ਵੇਦਨਾਟ੍ਟਾਯ, ਆਦਿਕਮ੍ਮਿਕਾਯਾਤਿ.

ਪਠਮਪਾਰਾਜਿਕਂ ਸਮਤ੍ਤਂ [ਭਿਕ੍ਖੁਨਿਵਿਭਙ੍ਗੇ ਸਿਕ੍ਖਾਪਦਗਣਨਾ ਭਿਕ੍ਖੂਹਿ§ਅਸਾਧਾਰਣਵਸੇਨ ਪਕਾਸਿਤਾਤਿ ਵੇਦਿਤਬ੍ਬਾ].

੨. ਦੁਤਿਯਪਾਰਾਜਿਕਂ

੬੬੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਾਲ਼੍ਹੇਨ ਮਿਗਾਰਨਤ੍ਤੁਨਾ ਗਬ੍ਭਿਨੀ ਹੋਤਿ. ਯਾਵ ਗਬ੍ਭੋ ਤਰੁਣੋ ਅਹੋਸਿ ਤਾਵ ਛਾਦੇਸਿ. ਪਰਿਪਕ੍ਕੇ ਗਬ੍ਭੇ ਵਿਬ੍ਭਮਿਤ੍ਵਾ ਵਿਜਾਯਿ. ਭਿਕ੍ਖੁਨਿਯੋ ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਏਤਦਵੋਚੁਂ – ‘‘ਸੁਨ੍ਦਰੀਨਨ੍ਦਾ ਖੋ, ਅਯ੍ਯੇ, ਅਚਿਰਵਿਬ੍ਭਨ੍ਤਾ ਵਿਜਾਤਾ. ਕਚ੍ਚਿ ਨੋ ਸਾ ਭਿਕ੍ਖੁਨੀਯੇਵ ਸਮਾਨਾ ਗਬ੍ਭਿਨੀ’’ਤਿ? ‘‘ਏਵਂ, ਅਯ੍ਯੇ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਅਯ੍ਯੇ, ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵਤ੍ਤਨਾ ਪਟਿਚੋਦੇਸਿ ਨ ਗਣਸ੍ਸ ਆਰੋਚੇਸੀ’’ਤਿ? ‘‘ਯੋ ਏਤਿਸ੍ਸਾ ਅਵਣ੍ਣੋ ਮਯ੍ਹੇਸੋ ਅਵਣ੍ਣੋ, ਯਾ ਏਤਿਸ੍ਸਾ ਅਕਿਤ੍ਤਿ ਮਯ੍ਹੇਸਾ ਅਕਿਤ੍ਤਿ, ਯੋ ਏਤਿਸ੍ਸਾ ਅਯਸੋ ਮਯ੍ਹੇਸੋ ਅਯਸੋ, ਯੋ ਏਤਿਸ੍ਸਾ ਅਲਾਭੋ ਮਯ੍ਹੇਸੋ ਅਲਾਭੋ. ਕ੍ਯਾਹਂ, ਅਯ੍ਯੇ, ਅਤ੍ਤਨੋ ਅਵਣ੍ਣਂ ਅਤ੍ਤਨੋ ਅਕਿਤ੍ਤਿਂ ਅਤ੍ਤਨੋ ਅਯਸਂ ਅਤ੍ਤਨੋ ਅਲਾਭਂ ਪਰੇਸਂ ਆਰੋਚੇਸ੍ਸਾਮੀ’’ਤਿ? ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਥੁਲ੍ਲਨਨ੍ਦਾ ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵਤ੍ਤਨਾ ਪਟਿਚੋਦੇਸ੍ਸਤਿ ਨ ਗਣਸ੍ਸ ਆਰੋਚੇਸ੍ਸਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ [ਯੇ ਤੇ ਭਿਕ੍ਖੂ…ਪੇ… (?)] ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵਤ੍ਤਨਾ ਪਟਿਚੋਦੇਤਿ [ਪਟਿਚੋਦੇਸਿ… ਆਰੋਚੇਸੀਤਿ (ਕ.)] ਨ ਗਣਸ੍ਸ ਆਰੋਚੇਤੀ’’ਤਿ [ਪਟਿਚੋਦੇਸਿ… ਆਰੋਚੇਸੀਤਿ (ਕ.)]? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵਤ੍ਤਨਾ ਪਟਿਚੋਦੇਸ੍ਸਤਿ ਨ ਗਣਸ੍ਸ ਆਰੋਚੇਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੬੬੫. ‘‘ਯਾ ਪਨ ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵਤ੍ਤਨਾ ਪਟਿਚੋਦੇਯ੍ਯ ਨ ਗਣਸ੍ਸ ਆਰੋਚੇਯ੍ਯ, ਯਦਾ ਚ ਸਾ ਠਿਤਾ ਵਾ ਅਸ੍ਸ ਚੁਤਾ ਵਾ ਨਾਸਿਤਾ ਵਾ ਅਵਸ੍ਸਟਾ ਵਾ, ਸਾ ਪਚ੍ਛਾ ਏਵਂ ਵਦੇਯ੍ਯ – ‘ਪੁਬ੍ਬੇਵਾਹਂ, ਅਯ੍ਯੇ, ਅਞ੍ਞਾਸਿਂ ਏਤਂ ਭਿਕ੍ਖੁਨਿਂ ਏਵਰੂਪਾ ਚ ਏਵਰੂਪਾ ਚ ਸਾ ਭਗਿਨੀਤਿ, ਨੋ ਚ ਖੋ ਅਤ੍ਤਨਾ ਪਟਿਚੋਦੇਸ੍ਸਂ ਨ ਗਣਸ੍ਸ ਆਰੋਚੇਸ੍ਸ’ਨ੍ਤਿ, ਅਯਮ੍ਪਿ ਪਾਰਾਜਿਕਾ ਹੋਤਿ ਅਸਂਵਾਸਾ ਵਜ੍ਜਪ੍ਪਟਿਚ੍ਛਾਦਿਕਾ’’ਤਿ.

੬੬੬. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਜਾਨਾਤਿ ਨਾਮ ਸਾਮਂ ਵਾ ਜਾਨਾਤਿ, ਅਞ੍ਞੇ ਵਾ ਤਸ੍ਸਾ ਆਰੋਚੇਨ੍ਤਿ, ਸਾ ਵਾ ਆਰੋਚੇਤਿ.

ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਨ੍ਤਿ ਅਟ੍ਠਨ੍ਨਂ ਪਾਰਾਜਿਕਾਨਂ ਅਞ੍ਞਤਰਂ ਪਾਰਾਜਿਕਂ ਅਜ੍ਝਾਪਨ੍ਨਂ.

ਨੇਵਤ੍ਤਨਾ ਪਟਿਚੋਦੇਯ੍ਯਾਤਿ ਨ ਸਯਂ ਚੋਦੇਯ੍ਯ.

ਨ ਗਣਸ੍ਸ ਆਰੋਚੇਯ੍ਯਾਤਿ ਨ ਅਞ੍ਞਾਸਂ ਭਿਕ੍ਖੁਨੀਨਂ ਆਰੋਚੇਯ੍ਯ.

ਯਦਾ ਚ ਸਾ ਠਿਤਾ ਵਾ ਅਸ੍ਸ ਚੁਤਾ ਵਾਤਿ ਠਿਤਾ ਨਾਮ ਸਲਿਙ੍ਗੇ ਠਿਤਾ ਵੁਚ੍ਚਤਿ. ਚੁਤਾ ਨਾਮ ਕਾਲਙ੍ਕਤਾ ਵੁਚ੍ਚਤਿ. ਨਾਸਿਤਾ ਨਾਮ ਸਯਂ ਵਾ ਵਿਬ੍ਭਨ੍ਤਾ ਹੋਤਿ ਅਞ੍ਞੇਹਿ ਵਾ ਨਾਸਿਤਾ. ਅਵਸ੍ਸਟਾ ਨਾਮ ਤਿਤ੍ਥਾਯਤਨਂ ਸਙ੍ਕਨ੍ਤਾ ਵੁਚ੍ਚਤਿ. ਸਾ ਪਚ੍ਛਾ ਏਵਂ ਵਦੇਯ੍ਯ – ‘‘ਪੁਬ੍ਬੇਵਾਹਂ, ਅਯ੍ਯੇ, ਅਞ੍ਞਾਸਿਂ ਏਤਂ ਭਿਕ੍ਖੁਨਿਂ ਏਵਰੂਪਾ ਚ ਏਵਰੂਪਾ ਚ ਸਾ ਭਗਿਨੀ’’ਤਿ.

ਨੋ ਚ ਖੋ ਅਤ੍ਤਨਾ ਪਟਿਚੋਦੇਸ੍ਸਨ੍ਤਿ ਸਯਂ ਵਾ ਨ ਚੋਦੇਸ੍ਸਂ.

ਨ ਗਣਸ੍ਸ ਆਰੋਚੇਸ੍ਸਨ੍ਤਿ ਨ ਅਞ੍ਞਾਸਂ ਭਿਕ੍ਖੁਨੀਨਂ ਆਰੋਚੇਸ੍ਸਂ.

ਅਯਮ੍ਪੀਤਿ ਪੁਰਿਮਾਯੋ ਉਪਾਦਾਯ ਵੁਚ੍ਚਤਿ.

ਪਾਰਾਜਿਕਾ ਹੋਤੀਤਿ ਸੇਯ੍ਯਥਾਪਿ ਨਾਮ ਪਣ੍ਡੁਪਲਾਸੋ ਬਨ੍ਧਨਾ ਪਮੁਤ੍ਤੋ ਅਭਬ੍ਬੋ ਹਰਿਤਤ੍ਥਾਯ, ਏਵਮੇਵ ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵਤ੍ਤਨਾ ਪਟਿਚੋਦੇਸ੍ਸਾਮਿ ਨ ਗਣਸ੍ਸ ਆਰੋਚੇਸ੍ਸਾਮੀਤਿ ਧੁਰਂ ਨਿਕ੍ਖਿਤ੍ਤਮਤ੍ਤੇ ਅਸ੍ਸਮਣੀ ਹੋਤਿ ਅਸਕ੍ਯਧੀਤਾ. ਤੇਨ ਵੁਚ੍ਚਤਿ ਪਾਰਾਜਿਕਾ ਹੋਤੀਤਿ.

ਅਸਂਵਾਸਾਤਿ ਸਂਵਾਸੋ ਨਾਮ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾ. ਏਸੋ ਸਂਵਾਸੋ ਨਾਮ. ਸੋ ਤਾਯ ਸਦ੍ਧਿਂ ਨਤ੍ਥਿ. ਤੇਨ ਵੁਚ੍ਚਤਿ ਅਸਂਵਾਸਾਤਿ.

੬੬੭. ਅਨਾਪਤ੍ਤਿ ‘‘ਸਙ੍ਘਸ੍ਸ ਭਣ੍ਡਨਂ ਵਾ ਕਲਹੋ ਵਾ ਵਿਗ੍ਗਹੋ ਵਾ ਵਿਵਾਦੋ ਵਾ ਭਵਿਸ੍ਸਤੀ’’ਤਿ ਨਾਰੋਚੇਤਿ, ‘‘ਸਙ੍ਘਭੇਦੋ ਵਾ ਸਙ੍ਘਰਾਜਿ ਵਾ ਭਵਿਸ੍ਸਤੀ’’ਤਿ ਨਾਰੋਚੇਤਿ, ‘‘ਅਯਂ ਕਕ੍ਖਲ਼ਾ ਫਰੁਸਾ ਜੀਵਿਤਨ੍ਤਰਾਯਂ ਵਾ ਬ੍ਰਹ੍ਮਚਰਿਯਨ੍ਤਰਾਯਂ ਵਾ ਕਰਿਸ੍ਸਤੀ’’ਤਿ ਨਾਰੋਚੇਤਿ, ਅਞ੍ਞਾ ਪਤਿਰੂਪਾ ਭਿਕ੍ਖੁਨਿਯੋ ਅਪਸ੍ਸਨ੍ਤੀ ਨਾਰੋਚੇਤਿ, ਨਚ੍ਛਾਦੇਤੁਕਾਮਾ ਨਾਰੋਚੇਤਿ, ਪਞ੍ਞਾਯਿਸ੍ਸਤਿ ਸਕੇਨ ਕਮ੍ਮੇਨਾਤਿ ਨਾਰੋਚੇਤਿ, ਉਮ੍ਮਤ੍ਤਿਕਾਯ…ਪੇ… ਆਦਿਕਮ੍ਮਿਕਾਯਾਤਿ.

ਦੁਤਿਯਪਾਰਾਜਿਕਂ ਸਮਤ੍ਤਂ.

੩. ਤਤਿਯਪਾਰਾਜਿਕਂ

੬੬੮. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਅਰਿਟ੍ਠਂ ਭਿਕ੍ਖੁਂ ਗਦ੍ਧਬਾਧਿਪੁਬ੍ਬਂ ਅਨੁਵਤ੍ਤਤਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਅਰਿਟ੍ਠਂ ਭਿਕ੍ਖੁਂ ਗਦ੍ਧਬਾਧਿਪੁਬ੍ਬਂ ਅਨੁਵਤ੍ਤਿਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਅਰਿਟ੍ਠਂ ਭਿਕ੍ਖੁਂ ਗਦ੍ਧਬਾਧਿਪੁਬ੍ਬਂ ਅਨੁਵਤ੍ਤਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਅਰਿਟ੍ਠਂ ਭਿਕ੍ਖੁਂ ਗਦ੍ਧਬਾਧਿਪੁਬ੍ਬਂ ਅਨੁਵਤ੍ਤਿਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੬੬੯. ‘‘ਯਾ ਪਨ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਭਿਕ੍ਖੁਂ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਾਦਰਂ ਅਪ੍ਪਟਿਕਾਰਂ ਅਕਤਸਹਾਯਂ ਤਮਨੁਵਤ੍ਤੇਯ੍ਯ, ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਏਵਮਸ੍ਸ ਵਚਨੀਯਾ – ‘ਏਸੋ ਖੋ, ਅਯ੍ਯੇ, ਭਿਕ੍ਖੁ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤੋ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਾਦਰੋ ਅਪ੍ਪਟਿਕਾਰੋ ਅਕਤਸਹਾਯੋ, ਮਾਯ੍ਯੇ, ਏਤਂ ਭਿਕ੍ਖੁਂ ਅਨੁਵਤ੍ਤੀ’ਤਿ. ਏਵਞ੍ਚ ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਵੁਚ੍ਚਮਾਨਾ ਤਥੇਵ ਪਗ੍ਗਣ੍ਹੇਯ੍ਯ, ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਯਾਵਤਤਿਯਂ ਸਮਨੁਭਾਸਿਤਬ੍ਬਾ ਤਸ੍ਸ ਪਟਿਨਿਸ੍ਸਗ੍ਗਾਯ. ਯਾਵਤਤਿਯਂ ਚੇ ਸਮਨੁਭਾਸਿਯਮਾਨਾ ਤਂ ਪਟਿਨਿਸ੍ਸਜ੍ਜੇਯ੍ਯ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਨਿਸ੍ਸਜ੍ਜੇਯ੍ਯ, ਅਯਮ੍ਪਿ ਪਾਰਾਜਿਕਾ ਹੋਤਿ ਅਸਂਵਾਸਾ ਉਕ੍ਖਿਤ੍ਤਾਨੁਵਤ੍ਤਿਕਾ’’ਤਿ.

੬੭੦. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਸਮਗ੍ਗੋ ਨਾਮ ਸਙ੍ਘੋ ਸਮਾਨਸਂਵਾਸਕੋ ਸਮਾਨਸੀਮਾਯਂ ਠਿਤੋ.

ਉਕ੍ਖਿਤ੍ਤੋ ਨਾਮ ਆਪਤ੍ਤਿਯਾ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ [ਅਦਸ੍ਸਨੇਨ ਵਾ ਅਪ੍ਪਟਿਕਮ੍ਮੇਨ ਵਾ ਅਪ੍ਪਟਿਨਿਸ੍ਸਗ੍ਗੇਨ ਵਾ (ਕ.), ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਵਾ (?)] ਉਕ੍ਖਿਤ੍ਤੋ.

ਧਮ੍ਮੇਨ ਵਿਨਯੇਨਾਤਿ ਯੇਨ ਧਮ੍ਮੇਨ ਯੇਨ ਵਿਨਯੇਨ.

ਸਤ੍ਥੁਸਾਸਨੇਨਾਤਿ ਜਿਨਸਾਸਨੇਨ ਬੁਦ੍ਧਸਾਸਨੇਨ.

ਅਨਾਦਰੋ ਨਾਮ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਕਮ੍ਮਂ ਵਾ ਨਾਦਿਯਤਿ.

ਅਪ੍ਪਟਿਕਾਰੋ ਨਾਮ ਉਕ੍ਖਿਤ੍ਤੋ ਅਨੋਸਾਰਿਤੋ.

ਅਕਤਸਹਾਯੋ ਨਾਮ ਸਮਾਨਸਂਵਾਸਕਾ ਭਿਕ੍ਖੂ ਵੁਚ੍ਚਨ੍ਤਿ ਸਹਾਯਾ. ਸੋ ਤੇਹਿ ਸਦ੍ਧਿਂ ਨਤ੍ਥਿ, ਤੇਨ ਵੁਚ੍ਚਤਿ ਅਕਤਸਹਾਯੋਤਿ.

ਤਮਨੁਵਤ੍ਤੇਯ੍ਯਾਤਿ ਯਂਦਿਟ੍ਠਿਕੋ ਸੋ ਹੋਤਿ ਯਂਖਨ੍ਤਿਕੋ ਯਂਰੁਚਿਕੋ, ਸਾਪਿ ਤਂਦਿਟ੍ਠਿਕਾ ਹੋਤਿ ਤਂਖਨ੍ਤਿਕਾ ਤਂਰੁਚਿਕਾ.

ਸਾ ਭਿਕ੍ਖੁਨੀਤਿ ਯਾ ਸਾ ਉਕ੍ਖਿਤ੍ਤਾਨੁਵਤ੍ਤਿਕਾ ਭਿਕ੍ਖੁਨੀ.

ਭਿਕ੍ਖੁਨੀਹੀਤਿ ਅਞ੍ਞਾਹਿ ਭਿਕ੍ਖੁਨੀਹਿ. ਯਾ ਪਸ੍ਸਨ੍ਤਿ ਯਾ ਸੁਣਨ੍ਤਿ ਤਾਹਿ ਵਤ੍ਤਬ੍ਬਾ – ‘‘ਏਸੋ ਖੋ, ਅਯ੍ਯੇ, ਭਿਕ੍ਖੁ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤੋ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਾਦਰੋ ਅਪ੍ਪਟਿਕਾਰੋ ਅਕਤਸਹਾਯੋ. ਮਾਯ੍ਯੇ, ਏਤਂ ਭਿਕ੍ਖੁਂ ਅਨੁਵਤ੍ਤੀ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬਾ. ਤਤਿਯਮ੍ਪਿ ਵਤ੍ਤਬ੍ਬਾ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੁਤ੍ਵਾ ਨ ਵਦਨ੍ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾ ਭਿਕ੍ਖੁਨੀ ਸਙ੍ਘਮਜ੍ਝਮ੍ਪਿ ਆਕਡ੍ਢਿਤ੍ਵਾ ਵਤ੍ਤਬ੍ਬਾ – ‘‘ਏਸੋ ਖੋ, ਅਯ੍ਯੇ, ਭਿਕ੍ਖੁ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤੋ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਾਦਰੋ ਅਪ੍ਪਟਿਕਾਰੋ ਅਕਤਸਹਾਯੋ. ਮਾਯ੍ਯੇ, ਏਤਂ ਭਿਕ੍ਖੁਂ ਅਨੁਵਤ੍ਤੀ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬਾ. ਤਤਿਯਮ੍ਪਿ ਵਤ੍ਤਬ੍ਬਾ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾ ਭਿਕ੍ਖੁਨੀ ਸਮਨੁਭਾਸਿਤਬ੍ਬਾ. ਏਵਞ੍ਚ ਪਨ, ਭਿਕ੍ਖਵੇ, ਸਮਨੁਭਾਸਿਤਬ੍ਬਾ. ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

੬੭੧. ‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਭਿਕ੍ਖੁਂ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਾਦਰਂ ਅਪ੍ਪਟਿਕਾਰਂ ਅਕਤਸਹਾਯਂ ਤਮਨੁਵਤ੍ਤਤਿ, ਸਾ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮਨੁਭਾਸੇਯ੍ਯ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਭਿਕ੍ਖੁਂ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਾਦਰਂ ਅਪ੍ਪਟਿਕਾਰਂ ਅਕਤਸਹਾਯਂ ਤਮਨੁਵਤ੍ਤਤਿ. ਸਾ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮਨੁਭਾਸਤਿ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਸਮਨੁਭਾਸਨਾ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ….

‘‘ਸਮਨੁਭਟ੍ਠਾ ਸਙ੍ਘੇਨ ਇਤ੍ਥਨ੍ਨਾਮਾ ਭਿਕ੍ਖੁਨੀ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ, ਕਮ੍ਮਵਾਚਾ ਪਰਿਯੋਸਾਨੇ ਆਪਤ੍ਤਿ ਪਾਰਾਜਿਕਸ੍ਸ.

ਅਯਮ੍ਪੀਤਿ ਪੁਰਿਮਾਯੋ ਉਪਾਦਾਯ ਵੁਚ੍ਚਤਿ.

ਪਾਰਾਜਿਕਾ ਹੋਤੀਤਿ ਸੇਯ੍ਯਥਾਪਿ ਨਾਮ ਪੁਥੁਸਿਲਾ ਦ੍ਵੇਧਾ ਭਿਨ੍ਨਾ ਅਪ੍ਪਟਿਸਨ੍ਧਿਕਾ ਹੋਤਿ, ਏਵਮੇਵ ਭਿਕ੍ਖੁਨੀ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤੀ ਅਸ੍ਸਮਣੀ ਹੋਤਿ ਅਸਕ੍ਯਧੀਤਾ. ਤੇਨ ਵੁਚ੍ਚਤਿ ਪਾਰਾਜਿਕਾ ਹੋਤੀਤਿ.

੬੭੨. ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਕਮ੍ਮੇ ਵੇਮਤਿਕਾ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਪਾਰਾਜਿਕਸ੍ਸ.

ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ.

੬੭੩. ਅਨਾਪਤ੍ਤਿ ਅਸਮਨੁਭਾਸਨ੍ਤਿਯਾ, ਪਟਿਨਿਸ੍ਸਜ੍ਜਨ੍ਤਿਯਾ, ਉਮ੍ਮਤ੍ਤਿਕਾਯ…ਪੇ… ਆਦਿਕਮ੍ਮਿਕਾਯਾਤਿ.

ਤਤਿਯਪਾਰਾਜਿਕਂ ਸਮਤ੍ਤਂ.

੪. ਚਤੁਤ੍ਥਪਾਰਾਜਿਕਂ

੬੭੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣਮ੍ਪਿ ਸਾਦਿਯਨ੍ਤਿ, ਸਙ੍ਘਾਟਿਕਣ੍ਣਗ੍ਗਹਣਮ੍ਪਿ ਸਾਦਿਯਨ੍ਤਿ, ਸਨ੍ਤਿਟ੍ਠਨ੍ਤਿਪਿ, ਸਲ੍ਲਪਨ੍ਤਿਪਿ, ਸਙ੍ਕੇਤਮ੍ਪਿ ਗਚ੍ਛਨ੍ਤਿ, ਪੁਰਿਸਸ੍ਸਪਿ ਅਬ੍ਭਾਗਮਨਂ ਸਾਦਿਯਨ੍ਤਿ, ਛਨ੍ਨਮ੍ਪਿ ਅਨੁਪਵਿਸਨ੍ਤਿ, ਕਾਯਮ੍ਪਿ ਤਦਤ੍ਥਾਯ ਉਪਸਂਹਰਨ੍ਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣਮ੍ਪਿ ਸਾਦਿਯਿਸ੍ਸਨ੍ਤਿ, ਸਙ੍ਘਾਟਿਕਣ੍ਣਗ੍ਗਹਣਮ੍ਪਿ ਸਾਦਿਯਿਸ੍ਸਨ੍ਤਿ, ਸਨ੍ਤਿਟ੍ਠਿਸ੍ਸਨ੍ਤਿਪਿ, ਸਲ੍ਲਪਿਸ੍ਸਨ੍ਤਿਪਿ, ਸਙ੍ਕੇਤਮ੍ਪਿ ਗਚ੍ਛਿਸ੍ਸਨ੍ਤਿ, ਪੁਰਿਸਸ੍ਸਪਿ ਅਬ੍ਭਾਗਮਨਂ ਸਾਦਿਯਿਸ੍ਸਨ੍ਤਿ, ਛਨ੍ਨਮ੍ਪਿ ਅਨੁਪਵਿਸਿਸ੍ਸਨ੍ਤਿ, ਕਾਯਮ੍ਪਿ ਤਦਤ੍ਥਾਯ ਉਪਸਂਹਰਿਸ੍ਸਨ੍ਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯਾ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣਮ੍ਪਿ ਸਾਦਿਯਨ੍ਤਿ, ਸਙ੍ਘਾਟਿਕਣ੍ਣਗ੍ਗਹਣਮ੍ਪਿ ਸਾਦਿਯਨ੍ਤਿ, ਸਨ੍ਤਿਟ੍ਠਨ੍ਤਿਪਿ, ਸਲ੍ਲਪਨ੍ਤਿਪਿ, ਸਙ੍ਕੇਤਮ੍ਪਿ ਗਚ੍ਛਨ੍ਤਿ, ਪੁਰਿਸਸ੍ਸਪਿ ਅਬ੍ਭਾਗਮਨਂ ਸਾਦਿਯਨ੍ਤਿ, ਛਨ੍ਨਮ੍ਪਿ ਅਨੁਪਵਿਸਨ੍ਤਿ, ਕਾਯਮ੍ਪਿ ਤਦਤ੍ਥਾਯ ਉਪਸਂਹਰਨ੍ਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣਮ੍ਪਿ ਸਾਦਿਯਿਸ੍ਸਨ੍ਤਿ, ਸਙ੍ਘਾਟਿਕਣ੍ਣਗ੍ਗਹਣਮ੍ਪਿ ਸਾਦਿਯਿਸ੍ਸਨ੍ਤਿ, ਸਨ੍ਤਿਟ੍ਠਿਸ੍ਸਨ੍ਤਿਪਿ, ਸਲ੍ਲਪਿਸ੍ਸਨ੍ਤਿਪਿ, ਸਙ੍ਕੇਤਮ੍ਪਿ ਗਚ੍ਛਿਸ੍ਸਨ੍ਤਿ, ਪੁਰਿਸਸ੍ਸਪਿ ਅਬ੍ਭਾਗਮਨਂ ਸਾਦਿਯਿਸ੍ਸਨ੍ਤਿ, ਛਨ੍ਨਮ੍ਪਿ ਅਨੁਪਵਿਸਿਸ੍ਸਨ੍ਤਿ, ਕਾਯਮ੍ਪਿ ਤਦਤ੍ਥਾਯ ਉਪਸਂਹਰਿਸ੍ਸਨ੍ਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੬੭੫. ‘‘ਯਾ ਪਨ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਗ੍ਗਹਣਂ ਵਾ ਸਾਦਿਯੇਯ੍ਯ, ਸਙ੍ਘਾਟਿਕਣ੍ਣਗ੍ਗਹਣਂ ਵਾ ਸਾਦਿਯੇਯ੍ਯ, ਸਨ੍ਤਿਟ੍ਠੇਯ੍ਯ ਵਾ, ਸਲ੍ਲਪੇਯ੍ਯ ਵਾ, ਸਙ੍ਕੇਤਂ ਵਾ ਗਚ੍ਛੇਯ੍ਯ, ਪੁਰਿਸਸ੍ਸ ਵਾ ਅਬ੍ਭਾਗਮਨਂ ਸਾਦਿਯੇਯ੍ਯ, ਛਨ੍ਨਂ ਵਾ ਅਨੁਪਵਿਸੇਯ੍ਯ, ਕਾਯਂ ਵਾ ਤਦਤ੍ਥਾਯ ਉਪਸਂਹਰੇਯ੍ਯ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ, ਅਯਮ੍ਪਿ ਪਾਰਾਜਿਕਾ ਹੋਤਿ ਅਸਂਵਾਸਾ ਅਟ੍ਠਵਤ੍ਥੁਕਾ’’ਤਿ.

੬੭੬. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਅਵਸ੍ਸੁਤਾ ਨਾਮ ਸਾਰਤ੍ਤਾ ਅਪੇਕ੍ਖਵਤੀ ਪਟਿਬਦ੍ਧਚਿਤ੍ਤਾ.

ਅਵਸ੍ਸੁਤੋ ਨਾਮ ਸਾਰਤ੍ਤੋ ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋ.

ਪੁਰਿਸਪੁਗ੍ਗਲੋ ਨਾਮ ਮਨੁਸ੍ਸਪੁਰਿਸੋ, ਨ ਯਕ੍ਖੋ ਨ ਪੇਤੋ ਨ ਤਿਰਚ੍ਛਾਨਗਤੋ ਵਿਞ੍ਞੂ ਪਟਿਬਲੋ ਕਾਯਸਂਸਗ੍ਗਂ ਸਮਾਪਜ੍ਜਿਤੁਂ.

ਹਤ੍ਥਗ੍ਗਹਣਂ ਵਾ ਸਾਦਿਯੇਯ੍ਯਾਤਿ ਹਤ੍ਥੋ ਨਾਮ ਕਪ੍ਪਰਂ ਉਪਾਦਾਯ ਯਾਵ ਅਗ੍ਗਨਖਾ. ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਗਹਣਂ ਸਾਦਿਯਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਸਙ੍ਘਾਟਿਕਣ੍ਣਗ੍ਗਹਣਂ ਵਾ ਸਾਦਿਯੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਨਿਵਤ੍ਥਂ ਵਾ ਪਾਰੁਤਂ ਵਾ ਗਹਣਂ ਸਾਦਿਯਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਸਨ੍ਤਿਟ੍ਠੇਯ੍ਯ ਵਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸਸ੍ਸ ਹਤ੍ਥਪਾਸੇ ਤਿਟ੍ਠਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਸਲ੍ਲਪੇਯ੍ਯ ਵਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸਸ੍ਸ ਹਤ੍ਥਪਾਸੇ ਠਿਤਾ ਸਲ੍ਲਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਸਙ੍ਕੇਤਂ ਵਾ ਗਚ੍ਛੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸੇਨ – ‘‘ਇਤ੍ਥਨ੍ਨਾਮਂ ਓਕਾਸਂ [ਇਦਂ ਪਦਂ ਅਟ੍ਠਕਥਾਯਂ ਨ ਦਿਸ੍ਸਤਿ] ਆਗਚ੍ਛਾ’’ਤਿ – ਵੁਤ੍ਤਾ ਗਚ੍ਛਤਿ. ਪਦੇ ਪਦੇ ਆਪਤ੍ਤਿ ਦੁਕ੍ਕਟਸ੍ਸ. ਪੁਰਿਸਸ੍ਸ ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਪੁਰਿਸਸ੍ਸ ਵਾ ਅਬ੍ਭਾਗਮਨਂ ਸਾਦਿਯੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸਸ੍ਸ ਅਬ੍ਭਾਗਮਨਂ ਸਾਦਿਯਤਿ, ਆਪਤ੍ਤਿ ਦੁਕ੍ਕਟਸ੍ਸ. ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਛਨ੍ਨਂ ਵਾ ਅਨੁਪਵਿਸੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਯੇਨ ਕੇਨਚਿ ਪਟਿਚ੍ਛਨ੍ਨਂ ਓਕਾਸਂ ਪਵਿਟ੍ਠਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਕਾਯਂ ਵਾ ਤਦਤ੍ਥਾਯ ਉਪਸਂਹਰੇਯ੍ਯਾਤਿ ਏਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸਸ੍ਸ ਹਤ੍ਥਪਾਸੇ ਠਿਤਾ ਕਾਯਂ ਉਪਸਂਹਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਅਯਮ੍ਪੀਤਿ ਪੁਰਿਮਾਯੋ ਉਪਾਦਾਯ ਵੁਚ੍ਚਤਿ.

ਪਾਰਾਜਿਕਾ ਹੋਤੀਤਿ ਸੇਯ੍ਯਥਾਪਿ ਨਾਮ ਤਾਲੋ ਮਤ੍ਥਕਚ੍ਛਿਨ੍ਨੋ ਅਭਬ੍ਬੋ ਪੁਨ ਵਿਰੁਲ਼੍ਹਿਯਾ ਏਵਮੇਵ ਭਿਕ੍ਖੁਨੀ ਅਟ੍ਠਮਂ ਵਤ੍ਥੁਂ ਪਰਿਪੂਰੇਨ੍ਤੀ ਅਸ੍ਸਮਣੀ ਹੋਤਿ ਅਸਕ੍ਯਧੀਤਾ. ਤੇਨ ਵੁਚ੍ਚਤਿ ਪਾਰਾਜਿਕਾ ਹੋਤੀਤਿ.

੬੭੭. ਅਨਾਪਤ੍ਤਿ ਅਸਞ੍ਚਿਚ੍ਚ, ਅਸ੍ਸਤਿਯਾ, ਅਜਾਨਨ੍ਤਿਯਾ, ਅਸਾਦਿਯਨ੍ਤਿਯਾ, ਉਮ੍ਮਤ੍ਤਿਕਾਯ, ਖਿਤ੍ਤਚਿਤ੍ਤਾਯ, ਵੇਦਨਾਟ੍ਟਾਯ, ਆਦਿਕਮ੍ਮਿਕਾਯਾਤਿ.

ਚਤੁਤ੍ਥਪਾਰਾਜਿਕਂ ਸਮਤ੍ਤਂ.

ਉਦ੍ਦਿਟ੍ਠਾ ਖੋ, ਅਯ੍ਯਾਯੋ, ਅਟ੍ਠ ਪਾਰਾਜਿਕਾ ਧਮ੍ਮਾ. ਯੇਸਂ ਭਿਕ੍ਖੁਨੀ ਅਞ੍ਞਤਰਂ ਵਾ ਅਞ੍ਞਤਰਂ ਵਾ ਆਪਜ੍ਜਿਤ੍ਵਾ ਨ ਲਭਤਿ ਭਿਕ੍ਖੁਨੀਹਿ ਸਦ੍ਧਿਂ ਸਂਵਾਸਂ, ਯਥਾ ਪੁਰੇ ਤਥਾ ਪਚ੍ਛਾ, ਪਾਰਾਜਿਕਾ ਹੋਤਿ ਅਸਂਵਾਸਾ. ਤਤ੍ਥਾਯ੍ਯਾਯੋ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਦੁਤਿਯਮ੍ਪਿ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਤਤਿਯਮ੍ਪਿ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਪਰਿਸੁਦ੍ਧੇਤ੍ਥਾਯ੍ਯਾਯੋ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

ਭਿਕ੍ਖੁਨਿਵਿਭਙ੍ਗੇ ਪਾਰਾਜਿਕਕਣ੍ਡਂ ਨਿਟ੍ਠਿਤਂ.

੨. ਸਙ੍ਘਾਦਿਸੇਸਕਣ੍ਡਂ (ਭਿਕ੍ਖੁਨੀਵਿਭਙ੍ਗੋ)

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦਂ

ਇਮੇ ਖੋ ਪਨਾਯ੍ਯਾਯੋ ਸਤ੍ਤਰਸ ਸਙ੍ਘਾਦਿਸੇਸਾ

ਧਮ੍ਮਾ ਉਦ੍ਦੇਸਂ ਆਗਚ੍ਛਨ੍ਤਿ.

੬੭੮. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਉਪਾਸਕੋ ਭਿਕ੍ਖੁਨਿਸਙ੍ਘਸ੍ਸ ਉਦੋਸਿਤਂ [ਉਦ੍ਦੋਸਿਤਂ (ਸੀ. ਸ੍ਯਾ.)] ਦਤ੍ਵਾ ਕਾਲਙ੍ਕਤੋ ਹੋਤਿ. ਤਸ੍ਸ ਦ੍ਵੇ ਪੁਤ੍ਤਾ ਹੋਨ੍ਤਿ – ਏਕੋ ਅਸ੍ਸਦ੍ਧੋ ਅਪ੍ਪਸਨ੍ਨੋ, ਏਕੋ ਸਦ੍ਧੋ ਪਸਨ੍ਨੋ. ਤੇ ਪੇਤ੍ਤਿਕਂ ਸਾਪਤੇਯ੍ਯਂ ਵਿਭਜਿਂਸੁ. ਅਥ ਖੋ ਸੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਤਂ ਸਦ੍ਧਂ ਪਸਨ੍ਨਂ ਏਤਦਵੋਚ – ‘‘ਅਮ੍ਹਾਕਂ ਉਦੋਸਿਤੋ, ਤਂ ਭਾਜੇਮਾ’’ਤਿ. ਏਵਂ ਵੁਤ੍ਤੇ ਸੋ ਸਦ੍ਧੋ ਪਸਨ੍ਨੋ ਤਂ ਅਸ੍ਸਦ੍ਧਂ ਅਪ੍ਪਸਨ੍ਨਂ ਏਤਦਵੋਚ – ‘‘ਮਾਯ੍ਯੋ, ਏਵਂ ਅਵਚ. ਅਮ੍ਹਾਕਂ ਪਿਤੁਨਾ ਭਿਕ੍ਖੁਨਿਸਙ੍ਘਸ੍ਸ ਦਿਨ੍ਨੋ’’ਤਿ. ਦੁਤਿਯਮ੍ਪਿ ਖੋ ਸੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਤਂ ਸਦ੍ਧਂ ਪਸਨ੍ਨਂ ਏਤਦਵੋਚ – ‘‘ਅਮ੍ਹਾਕਂ ਉਦੋਸਿਤੋ, ਤਂ ਭਾਜੇਮਾ’’ਤਿ. ਅਥ ਖੋ ਸੋ ਸਦ੍ਧੋ ਪਸਨ੍ਨੋ ਤਂ ਅਸ੍ਸਦ੍ਧਂ ਅਪ੍ਪਸਨ੍ਨਂ ਏਤਦਵੋਚ – ‘‘ਮਾਯ੍ਯੋ, ਏਵਂ ਅਵਚ. ਅਮ੍ਹਾਕਂ ਪਿਤੁਨਾ ਭਿਕ੍ਖੁਨਿਸਙ੍ਘਸ੍ਸ ਦਿਨ੍ਨੋ’’ਤਿ. ਤਤਿਯਮ੍ਪਿ ਖੋ ਸੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਤਂ ਸਦ੍ਧਂ ਪਸਨ੍ਨਂ ਏਤਦਵੋਚ – ‘‘ਅਮ੍ਹਾਕਂ ਉਦੋਸਿਤੋ, ਤਂ ਭਾਜੇਮਾ’’ਤਿ. ਅਥ ਖੋ ਸੋ ਸਦ੍ਧੋ ਪਸਨ੍ਨੋ – ‘‘ਸਚੇ ਮਯ੍ਹਂ ਭਵਿਸ੍ਸਤਿ, ਅਹਮ੍ਪਿ ਭਿਕ੍ਖੁਨਿਸਙ੍ਘਸ੍ਸ ਦਸ੍ਸਾਮੀ’’ਤਿ – ਤਂ ਅਸ੍ਸਦ੍ਧਂ ਅਪ੍ਪਸਨ੍ਨਂ ਏਤਦਵੋਚ – ‘‘ਭਾਜੇਮਾ’’ਤਿ. ਅਥ ਖੋ ਸੋ ਉਦੋਸਿਤੋ ਤੇਹਿ ਭਾਜੀਯਮਾਨੋ ਤਸ੍ਸ ਅਸ੍ਸਦ੍ਧਸ੍ਸ ਅਪ੍ਪਸਨ੍ਨਸ੍ਸ ਪਾਪੁਣਾਤਿ [ਪਾਪੁਣਿ (ਸ੍ਯਾ.)]. ਅਥ ਖੋ ਸੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਨਿਕ੍ਖਮਥਾਯ੍ਯੇ, ਅਮ੍ਹਾਕਂ ਉਦੋਸਿਤੋ’’ਤਿ.

ਏਵਂ ਵੁਤ੍ਤੇ ਥੁਲ੍ਲਨਨ੍ਦਾ ਭਿਕ੍ਖੁਨੀ ਤਂ ਪੁਰਿਸਂ ਏਤਦਵੋਚ – ‘‘ਮਾਯ੍ਯੋ, ਏਵਂ ਅਵਚ, ਤੁਮ੍ਹਾਕਂ ਪਿਤੁਨਾ ਭਿਕ੍ਖੁਨਿਸਙ੍ਘਸ੍ਸ ਦਿਨ੍ਨੋ’’ਤਿ. ‘‘ਦਿਨ੍ਨੋ ਨ ਦਿਨ੍ਨੋ’’ਤਿ ਵੋਹਾਰਿਕੇ ਮਹਾਮਤ੍ਤੇ ਪੁਚ੍ਛਿਂਸੁ. ਮਹਾਮਤ੍ਤਾ ਏਵਮਾਹਂਸੁ – ‘‘ਕੋ, ਅਯ੍ਯੇ, ਜਾਨਾਤਿ ਭਿਕ੍ਖੁਨਿਸਙ੍ਘਸ੍ਸ ਦਿਨ੍ਨੋ’’ਤਿ? ਏਵਂ ਵੁਤ੍ਤੇ ਥੁਲ੍ਲਨਨ੍ਦਾ ਭਿਕ੍ਖੁਨੀ ਤੇ ਮਹਾਮਤ੍ਤੇ ਏਤਦਵੋਚ – ‘‘ਅਪਿ ਨਾਯ੍ਯੋ [ਅਪਿ ਨ੍ਵਯ੍ਯਾ (ਸ੍ਯਾ.), ਅਪਿ ਨਾਯ੍ਯੋ (ਕ.)] ਤੁਮ੍ਹੇਹਿ ਦਿਟ੍ਠਂ ਵਾ ਸੁਤਂ ਵਾ ਸਕ੍ਖਿਂ ਠਪਯਿਤ੍ਵਾ ਦਾਨਂ ਦਿਯ੍ਯਮਾਨ’’ਨ੍ਤਿ? ਅਥ ਖੋ ਤੇ ਮਹਾਮਤ੍ਤਾ – ‘‘ਸਚ੍ਚਂ ਖੋ ਅਯ੍ਯਾ ਆਹਾ’’ਤਿ ਤਂ ਉਦੋਸਿਤਂ ਭਿਕ੍ਖੁਨਿਸਙ੍ਘਸ੍ਸ ਅਕਂਸੁ. ਅਥ ਖੋ ਸੋ ਪੁਰਿਸੋ ਪਰਾਜਿਤੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਅਸ੍ਸਮਣਿਯੋ ਇਮਾ ਮੁਣ੍ਡਾ ਬਨ੍ਧਕਿਨਿਯੋ. ਕਥਞ੍ਹਿ ਨਾਮ ਅਮ੍ਹਾਕਂ ਉਦੋਸਿਤਂ ਅਚ੍ਛਿਨ੍ਦਾਪੇਸ੍ਸਨ੍ਤੀ’’ਤਿ! ਥੁਲ੍ਲਨਨ੍ਦਾ ਭਿਕ੍ਖੁਨੀ ਮਹਾਮਤ੍ਤਾਨਂ ਏਤਮਤ੍ਥਂ ਆਰੋਚੇਸਿ. ਮਹਾਮਤ੍ਤਾ ਤਂ ਪੁਰਿਸਂ ਦਣ੍ਡਾਪੇਸੁਂ. ਅਥ ਖੋ ਸੋ ਪੁਰਿਸੋ ਦਣ੍ਡਿਤੋ ਭਿਕ੍ਖੁਨੂਪਸ੍ਸਯਸ੍ਸ ਅਵਿਦੂਰੇ ਆਜੀਵਕਸੇਯ੍ਯਂ ਕਾਰਾਪੇਤ੍ਵਾ ਆਜੀਵਕੇ ਉਯ੍ਯੋਜੇਸਿ – ‘‘ਏਤਾ ਭਿਕ੍ਖੁਨਿਯੋ ਅਚ੍ਚਾਵਦਥਾ’’ਤਿ.

ਥੁਲ੍ਲਨਨ੍ਦਾ ਭਿਕ੍ਖੁਨੀ ਮਹਾਮਤ੍ਤਾਨਂ ਏਤਮਤ੍ਥਂ ਆਰੋਚੇਸਿ. ਮਹਾਮਤ੍ਤਾ ਤਂ ਪੁਰਿਸਂ ਬਨ੍ਧਾਪੇਸੁਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਪਠਮਂ ਭਿਕ੍ਖੁਨਿਯੋ ਉਦੋਸਿਤਂ ਅਚ੍ਛਿਨ੍ਦਾਪੇਸੁਂ, ਦੁਤਿਯਂ ਦਣ੍ਡਾਪੇਸੁਂ, ਤਤਿਯਂ ਬਨ੍ਧਾਪੇਸੁਂ. ਇਦਾਨਿ ਘਾਤਾਪੇਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੁਨਿਯੋ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਥੁਲ੍ਲਨਨ੍ਦਾ ਉਸ੍ਸਯਵਾਦਿਕਾ ਵਿਹਰਿਸ੍ਸਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਉਸ੍ਸਯਵਾਦਿਕਾ ਵਿਹਰਤੀਤਿ. ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਉਸ੍ਸਯਵਾਦਿਕਾ ਵਿਹਰਿਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੬੭੯. ‘‘ਯਾ ਪਨ ਭਿਕ੍ਖੁਨੀ ਉਸ੍ਸਯਵਾਦਿਕਾ ਵਿਹਰੇਯ੍ਯ ਗਹਪਤਿਨਾ ਵਾ ਗਹਪਤਿਪੁਤ੍ਤੇਨ ਵਾ ਦਾਸੇਨ ਵਾ ਕਮ੍ਮਕਾਰੇਨ [ਕਮ੍ਮਕਰੇਨ (ਸੀ. ਸ੍ਯਾ.)] ਵਾ ਅਨ੍ਤਮਸੋ ਸਮਣਪਰਿਬ੍ਬਾਜਕੇਨਾਪਿ, ਅਯਂ ਭਿਕ੍ਖੁਨੀ ਪਠਮਾਪਤ੍ਤਿਕਂ ਧਮ੍ਮਂ ਆਪਨ੍ਨਾ ਨਿਸ੍ਸਾਰਣੀਯਂ ਸਙ੍ਘਾਦਿਸੇਸ’’ਨ੍ਤਿ.

੬੮੦. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਉਸ੍ਸਯਵਾਦਿਕਾ ਨਾਮ ਅਡ੍ਡਕਾਰਿਕਾ ਵੁਚ੍ਚਤਿ.

ਗਹਪਤਿ ਨਾਮ ਯੋ ਕੋਚਿ ਅਗਾਰਂ ਅਜ੍ਝਾਵਸਤਿ.

ਗਹਪਤਿਪੁਤ੍ਤੋ ਨਾਮ ਯੇ ਕੇਚਿ ਪੁਤ੍ਤਭਾਤਰੋ.

ਦਾਸੋ ਨਾਮ ਅਨ੍ਤੋਜਾਤੋ ਧਨਕ੍ਕੀਤੋ ਕਰਮਰਾਨੀਤੋ.

ਕਮ੍ਮਕਾਰੋ ਨਾਮ ਭਟਕੋ ਆਹਤਕੋ.

ਸਮਣਪਰਿਬ੍ਬਾਜਕੋ ਨਾਮ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਸਿਕ੍ਖਮਾਨਞ੍ਚ ਸਾਮਣੇਰਞ੍ਚ ਸਾਮਣੇਰਿਞ੍ਚ ਠਪੇਤ੍ਵਾ ਯੋ ਕੋਚਿ ਪਰਿਬ੍ਬਾਜਕਸਮਾਪਨ੍ਨੋ.

ਅਡ੍ਡਂ ਕਰਿਸ੍ਸਾਮੀਤਿ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਏਕਸ੍ਸ ਆਰੋਚੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦੁਤਿਯਸ੍ਸ ਆਰੋਚੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਅਡ੍ਡਪਰਿਯੋਸਾਨੇ ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਪਠਮਾਪਤ੍ਤਿਕਨ੍ਤਿ ਸਹ ਵਤ੍ਥੁਜ੍ਝਾਚਾਰਾ ਆਪਜ੍ਜਤਿ ਅਸਮਨੁਭਾਸਨਾਯ.

ਨਿਸ੍ਸਾਰਣੀਯਨ੍ਤਿ ਸਙ੍ਘਮ੍ਹਾ ਨਿਸ੍ਸਾਰੀਯਤਿ.

ਸਙ੍ਘਾਦਿਸੇਸਨ੍ਤਿ ਸਙ੍ਘੋਵ ਤਸ੍ਸਾ ਆਪਤ੍ਤਿਯਾ ਮਾਨਤ੍ਤਂ ਦੇਤਿ ਮੂਲਾਯ ਪਟਿਕਸ੍ਸਤਿ ਅਬ੍ਭੇਤਿ, ਨ ਸਮ੍ਬਹੁਲਾ ਨ ਏਕਾ ਭਿਕ੍ਖੁਨੀ. ਤੇਨ ਵੁਚ੍ਚਤਿ ‘‘ਸਙ੍ਘਾਦਿਸੇਸੋ’’ਤਿ. ਤਸ੍ਸੇਵ ਆਪਤ੍ਤਿਨਿਕਾਯਸ੍ਸ ਨਾਮਕਮ੍ਮਂ ਅਧਿਵਚਨਂ. ਤੇਨਪਿ ਵੁਚ੍ਚਤਿ ‘‘ਸਙ੍ਘਾਦਿਸੇਸੋ’’ਤਿ.

੬੮੧. ਅਨਾਪਤ੍ਤਿ ਮਨੁਸ੍ਸੇਹਿ ਆਕਡ੍ਢੀਯਮਾਨਾ ਗਚ੍ਛਤਿ, ਆਰਕ੍ਖਂ ਯਾਚਤਿ, ਅਨੋਦਿਸ੍ਸ ਆਚਿਕ੍ਖਤਿ, ਉਮ੍ਮਤ੍ਤਿਕਾਯ…ਪੇ… ਆਦਿਕਮ੍ਮਿਕਾਯਾਤਿ.

ਪਠਮਸਙ੍ਘਾਦਿਸੇਸਸਿਕ੍ਖਾਪਦਂ ਨਿਟ੍ਠਿਤਂ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਂ

੬੮੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਵੇਸਾਲਿਯਂ ਅਞ੍ਞਤਰਸ੍ਸ ਲਿਚ੍ਛਵਿਸ੍ਸ ਪਜਾਪਤਿ ਅਤਿਚਾਰਿਨੀ ਹੋਤਿ. ਅਥ ਖੋ ਸੋ ਲਿਚ੍ਛਵਿ ਤਂ ਇਤ੍ਥਿਂ ਏਤਦਵੋਚ – ‘‘ਸਾਧੁ ਵਿਰਮਾਹਿ, ਅਨਤ੍ਥਂ ਖੋ ਤੇ ਕਰਿਸ੍ਸਾਮੀ’’ਤਿ. ਏਵਮ੍ਪਿ ਸਾ ਵੁਚ੍ਚਮਾਨਾ ਨਾਦਿਯਿ. ਤੇਨ ਖੋ ਪਨ ਸਮਯੇਨ ਵੇਸਾਲਿਯਂ ਲਿਚ੍ਛਵਿਗਣੋ ਸਨ੍ਨਿਪਤਿਤੋ ਹੋਤਿ ਕੇਨਚਿਦੇਵ ਕਰਣੀਯੇਨ. ਅਥ ਖੋ ਸੋ ਲਿਚ੍ਛਵਿ ਤੇ ਲਿਚ੍ਛਵਯੋ ਏਤਦਵੋਚ – ‘‘ਏਕਂ ਮੇ, ਅਯ੍ਯੋ, ਇਤ੍ਥਿਂ ਅਨੁਜਾਨਾਥਾ’’ਤਿ. ‘‘ਕਾ ਨਾਮ ਸਾ’’ਤਿ? ‘‘ਮਯ੍ਹਂ ਪਜਾਪਤਿ ਅਤਿਚਰਤਿ, ਤਂ ਘਾਤੇਸ੍ਸਾਮੀ’’ਤਿ. ‘‘ਜਾਨਾਹੀ’’ਤਿ. ਅਸ੍ਸੋਸਿ ਖੋ ਸਾ ਇਤ੍ਥੀ – ‘‘ਸਾਮਿਕੋ ਕਿਰ ਮਂ ਘਾਤੇਤੁਕਾਮੋ’’ਤਿ. ਵਰਭਣ੍ਡਂ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਤਿਤ੍ਥਿਯੇ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਿਤ੍ਥਿਯਾ ਨ ਇਚ੍ਛਿਂਸੁ ਪਬ੍ਬਾਜੇਤੁਂ. ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਭਿਕ੍ਖੁਨਿਯੋਪਿ ਨ ਇਚ੍ਛਿਂਸੁ ਪਬ੍ਬਾਜੇਤੁਂ. ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਉਪਸਙ੍ਕਮਿਤ੍ਵਾ ਭਣ੍ਡਕਂ ਦਸ੍ਸੇਤ੍ਵਾ ਪਬ੍ਬਜ੍ਜਂ ਯਾਚਿ. ਥੁਲ੍ਲਨਨ੍ਦਾ ਭਿਕ੍ਖੁਨੀ ਭਣ੍ਡਕਂ ਗਹੇਤ੍ਵਾ ਪਬ੍ਬਾਜੇਸਿ.

ਅਥ ਖੋ ਸੋ ਲਿਚ੍ਛਵਿ ਤਂ ਇਤ੍ਥਿਂ ਗਵੇਸਨ੍ਤੋ ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੁਨੀਸੁ ਪਬ੍ਬਜਿਤਂ ਦਿਸ੍ਵਾਨ ਯੇਨ ਰਾਜਾ ਪਸੇਨਦਿ ਕੋਸਲੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਾਜਾਨਂ ਪਸੇਨਦਿਂ ਕੋਸਲਂ ਏਤਦਵੋਚ – ‘‘ਪਜਾਪਤਿ ਮੇ, ਦੇਵ, ਵਰਭਣ੍ਡਂ ਆਦਾਯ ਸਾਵਤ੍ਥਿਂ ਅਨੁਪ੍ਪਤ੍ਤਾ. ਤਂ ਦੇਵੋ ਅਨੁਜਾਨਾਤੂ’’ਤਿ. ‘‘ਤੇਨ ਹਿ, ਭਣੇ, ਵਿਚਿਨਿਤ੍ਵਾ ਆਚਿਕ੍ਖਾ’’ਤਿ. ‘‘ਦਿਟ੍ਠਾ, ਦੇਵ, ਭਿਕ੍ਖੁਨੀਸੁ ਪਬ੍ਬਜਿਤਾ’’ਤਿ. ‘‘ਸਚੇ, ਭਣੇ, ਭਿਕ੍ਖੁਨੀਸੁ ਪਬ੍ਬਜਿਤਾ, ਨ ਸਾ ਲਬ੍ਭਾ ਕਿਞ੍ਚਿ ਕਾਤੁਂ. ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਚਰਤੁ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਅਥ ਖੋ ਸੋ ਲਿਚ੍ਛਵਿ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਚੋਰਿਂ ਪਬ੍ਬਾਜੇਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੁਨਿਯੋ ਤਸ੍ਸ ਲਿਚ੍ਛਵਿਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਥੁਲ੍ਲਨਨ੍ਦਾ ਚੋਰਿਂ ਪਬ੍ਬਾਜੇਸ੍ਸਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਚੋਰਿਂ ਪਬ੍ਬਾਜੇਤੀਤਿ [ਪਬ੍ਬਾਜੇਸੀਤਿ (ਕ.)]? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਚੋਰਿਂ ਪਬ੍ਬਾਜੇਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੬੮੩. ‘‘ਯਾ ਪਨ ਭਿਕ੍ਖੁਨੀ ਜਾਨਂ ਚੋਰਿਂ ਵਜ੍ਝਂ ਵਿਦਿਤਂ ਅਨਪਲੋਕੇਤ੍ਵਾ ਰਾਜਾਨਂ ਵਾ ਸਙ੍ਘਂ ਵਾ ਗਣਂ ਵਾ ਪੂਗਂ ਵਾ ਸੇਣਿਂ ਵਾ ਅਞ੍ਞਤ੍ਰ ਕਪ੍ਪਾ ਵੁਟ੍ਠਾਪੇਯ੍ਯ, ਅਯਮ੍ਪਿ ਭਿਕ੍ਖੁਨੀ ਪਠਮਾਪਤ੍ਤਿਕਂ ਧਮ੍ਮਂ ਆਪਨ੍ਨਾ ਨਿਸ੍ਸਾਰਣੀਯਂ ਸਙ੍ਘਾਦਿਸੇਸ’’ਨ੍ਤਿ.

੬੮੪. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਜਾਨਾਤਿ ਨਾਮ ਸਾਮਂ ਵਾ ਜਾਨਾਤਿ ਅਞ੍ਞੇ ਵਾ ਤਸ੍ਸਾ ਆਰੋਚੇਨ੍ਤਿ, ਸਾ ਵਾ ਆਰੋਚੇਤਿ.

ਚੋਰੀ ਨਾਮ ਯਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਤਿ, ਏਸਾ ਚੋਰੀ ਨਾਮ.

ਵਜ੍ਝਾ ਨਾਮ ਯਂ ਕਤ੍ਵਾ ਵਜ੍ਝਪ੍ਪਤ੍ਤਾ ਹੋਤਿ.

ਵਿਦਿਤਾ ਨਾਮ ਅਞ੍ਞੇਹਿ ਮਨੁਸ੍ਸੇਹਿ ਞਾਤਾ ਹੋਤਿ ‘‘ਵਜ੍ਝਾ ਏਸਾ’’ਤਿ.

ਅਨਪਲੋਕੇਤ੍ਵਾਤਿ ਅਨਾਪੁਚ੍ਛਾ.

ਰਾਜਾ ਨਾਮ ਯਤ੍ਥ ਰਾਜਾ ਅਨੁਸਾਸਤਿ, ਰਾਜਾ ਅਪਲੋਕੇਤਬ੍ਬੋ.

ਸਙ੍ਘੋ ਨਾਮ ਭਿਕ੍ਖੁਨਿਸਙ੍ਘੋ ਵੁਚ੍ਚਤਿ, ਭਿਕ੍ਖੁਨਿਸਙ੍ਘੋ ਅਪਲੋਕੇਤਬ੍ਬੋ.

ਗਣੋ ਨਾਮ ਯਤ੍ਥ ਗਣੋ ਅਨੁਸਾਸਤਿ, ਗਣੋ ਅਪਲੋਕੇਤਬ੍ਬੋ.

ਪੂਗੋ ਨਾਮ ਯਤ੍ਥ ਪੂਗੋ ਅਨੁਸਾਸਤਿ, ਪੂਗੋ ਅਪਲੋਕੇਤਬ੍ਬੋ.

ਸੇਣਿ ਨਾਮ ਯਤ੍ਥ ਸੇਣਿ ਅਨੁਸਾਸਤਿ, ਸੇਣਿ ਅਪਲੋਕੇਤਬ੍ਬੋ.

ਅਞ੍ਞਤ੍ਰ ਕਪ੍ਪਾਤਿ ਠਪੇਤ੍ਵਾ ਕਪ੍ਪਂ. ਕਪ੍ਪਂ ਨਾਮ ਦ੍ਵੇ ਕਪ੍ਪਾਨਿ – ਤਿਤ੍ਥਿਯੇਸੁ ਵਾ ਪਬ੍ਬਜਿਤਾ ਹੋਤਿ ਅਞ੍ਞਾਸੁ ਵਾ ਭਿਕ੍ਖੁਨੀਸੁ ਪਬ੍ਬਜਿਤਾ. ਅਞ੍ਞਤ੍ਰ ਕਪ੍ਪਾ ‘‘ਵੁਟ੍ਠਾਪੇਸ੍ਸਾਮੀ’’ਤਿ ਗਣਂ ਵਾ ਆਚਰਿਨਿਂ ਵਾ ਪਤ੍ਤਂ ਵਾ ਚੀਵਰਂ ਵਾ ਪਰਿਯੇਸਤਿ, ਸੀਮਂ ਵਾ ਸਮ੍ਮਨ੍ਨਤਿ, ਆਪਤ੍ਤਿ ਦੁਕ੍ਕਟਸ੍ਸ. ਞਤ੍ਤਿਯਾ ਦੁਕ੍ਕਟਂ. ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ. ਕਮ੍ਮਵਾਚਾਪਰਿਯੋਸਾਨੇ ਉਪਜ੍ਝਾਯਾਯ ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਗਣਸ੍ਸ ਚ ਆਚਰਿਨਿਯਾ ਚ ਆਪਤ੍ਤਿ ਦੁਕ੍ਕਟਸ੍ਸ.

ਅਯਮ੍ਪੀਤਿ ਪੁਰਿਮਂ ਉਪਾਦਾਯ ਵੁਚ੍ਚਤਿ.

ਪਠਮਾਪਤ੍ਤਿਕਨ੍ਤਿ ਸਹ ਵਤ੍ਥੁਜ੍ਝਾਚਾਰਾ ਆਪਜ੍ਜਤਿ ਅਸਮਨੁਭਾਸਨਾਯ.

ਨਿਸ੍ਸਾਰਣੀਯਨ੍ਤਿ ਸਙ੍ਘਮ੍ਹਾ ਨਿਸ੍ਸਾਰੀਯਤਿ.

ਸਙ੍ਘਾਦਿਸੇਸਨ੍ਤਿ…ਪੇ… ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.

੬੮੫. ਚੋਰਿਯਾ ਚੋਰਿਸਞ੍ਞਾ ਅਞ੍ਞਤ੍ਰ ਕਪ੍ਪਾ ਵੁਟ੍ਠਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਚੋਰਿਯਾ ਵੇਮਤਿਕਾ ਅਞ੍ਞਤ੍ਰ ਕਪ੍ਪਾ ਵੁਟ੍ਠਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਚੋਰਿਯਾ ਅਚੋਰਿਸਞ੍ਞਾ ਅਞ੍ਞਤ੍ਰ ਕਪ੍ਪਾ ਵੁਟ੍ਠਾਪੇਤਿ, ਅਨਾਪਤ੍ਤਿ. ਅਚੋਰਿਯਾ ਚੋਰਿਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਚੋਰਿਯਾ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਅਚੋਰਿਯਾ ਅਚੋਰਿਸਞ੍ਞਾ, ਅਨਾਪਤ੍ਤਿ.

੬੮੬. ਅਨਾਪਤ੍ਤਿ ਅਜਾਨਨ੍ਤੀ ਵੁਟ੍ਠਾਪੇਤਿ, ਅਪਲੋਕੇਤ੍ਵਾ ਵੁਟ੍ਠਾਪੇਤਿ, ਕਪ੍ਪਕਤਂ ਵੁਟ੍ਠਾਪੇਤਿ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਂ ਨਿਟ੍ਠਿਤਂ.