੧. ਪਠਮਸਿਕ੍ਖਾਪਦਂ

੧੦੨੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਗਾਮਕਾਵਾਸੇ ਏਕਚੀਵਰਾ ਚੀਵਰਕਮ੍ਮਂ ਕਰੋਨ੍ਤਿ. ਭਿਕ੍ਖੁਨਿਯੋ ਅਨਾਪੁਚ੍ਛਾ ਆਰਾਮਂ ਪਵਿਸਿਤ੍ਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿਂਸੁ. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਅਨਾਪੁਚ੍ਛਾ ਆਰਾਮਂ ਪਵਿਸਿਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨਿਯੋ ਅਨਾਪੁਚ੍ਛਾ ਆਰਾਮਂ ਪਵਿਸਨ੍ਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨਿਯੋ ਅਨਾਪੁਚ੍ਛਾ ਆਰਾਮਂ ਪਵਿਸਿਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

‘‘ਯਾ ਪਨ ਭਿਕ੍ਖੁਨੀ ਅਨਾਪੁਚ੍ਛਾ ਆਰਾਮਂ ਪਵਿਸੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੁਨੀਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੧੦੨੨. ਤੇਨ ਖੋ ਪਨ ਸਮਯੇਨ ਤੇ ਭਿਕ੍ਖੂ ਤਮ੍ਹਾ ਆਵਾਸਾ ਪਕ੍ਕਮਿਂਸੁ. ਭਿਕ੍ਖੁਨਿਯੋ – ‘‘ਅਯ੍ਯਾ ਪਕ੍ਕਨ੍ਤਾ’’ਤਿ, ਆਰਾਮਂ ਨਾਗਮਂਸੁ. ਅਥ ਖੋ ਤੇ ਭਿਕ੍ਖੂ ਪੁਨਦੇਵ ਤਂ ਆਵਾਸਂ ਪਚ੍ਚਾਗਚ੍ਛਿਂਸੁ. ਭਿਕ੍ਖੁਨਿਯੋ – ‘‘ਅਯ੍ਯਾ ਆਗਤਾ’’ਤਿ, ਆਪੁਚ੍ਛਾ ਆਰਾਮਂ ਪਵਿਸਿਤ੍ਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ ਤਾ ਭਿਕ੍ਖੁਨਿਯੋ ਤੇ ਭਿਕ੍ਖੂ ਏਤਦਵੋਚੁਂ – ‘‘ਕਿਸ੍ਸ ਤੁਮ੍ਹੇ, ਭਗਿਨਿਯੋ, ਆਰਾਮਂ ਨੇਵ ਸਮ੍ਮਜ੍ਜਿਤ੍ਥ ਨ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪਿਤ੍ਥਾਤਿ? ਭਗਵਤਾ, ਅਯ੍ਯਾ, ਸਿਕ੍ਖਾਪਦਂ ਪਞ੍ਞਤ੍ਤਂ [ਪਞ੍ਞਤ੍ਤਂ ਹੋਤਿ (ਕ.)] ਹੋਤਿ – ‘‘ਨ ਅਨਾਪੁਚ੍ਛਾ ਆਰਾਮੋ ਪਵਿਸਿਤਬ੍ਬੋ’’ਤਿ. ਤੇਨ ਮਯਂ ਨ ਆਗਮਿਮ੍ਹਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਸਨ੍ਤਂ ਭਿਕ੍ਖੁਂ ਆਪੁਚ੍ਛਾ ਆਰਾਮਂ ਪਵਿਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

‘‘ਯਾ ਪਨ ਭਿਕ੍ਖੁਨੀ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਆਰਾਮਂ ਪਵਿਸੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੁਨੀਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੧੦੨੩. ਤੇਨ ਖੋ ਪਨ ਸਮਯੇਨ ਤੇ ਭਿਕ੍ਖੂ ਤਮ੍ਹਾ ਆਵਾਸਾ ਪਕ੍ਕਮਿਤ੍ਵਾ ਪੁਨਦੇਵ ਤਂ ਆਵਾਸਂ ਪਚ੍ਚਾਗਚ੍ਛਿਂਸੁ. ਭਿਕ੍ਖੁਨਿਯੋ – ‘‘ਅਯ੍ਯਾ ਪਕ੍ਕਨ੍ਤਾ’’ਤਿ ਅਨਾਪੁਚ੍ਛਾ ਆਰਾਮਂ ਪਵਿਸਿਂਸੁ. ਤਾਸਂ ਕੁਕ੍ਕੁਚ੍ਚਂ ਅਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ – ‘ਨ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਆਰਾਮੋ ਪਵਿਸਿਤਬ੍ਬੋ’ਤਿ. ਮਯਞ੍ਚਮ੍ਹਾ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਆਰਾਮਂ ਪਵਿਸਿਮ੍ਹਾ. ਕਚ੍ਚਿ ਨੁ ਖੋ ਮਯਂ ਪਾਚਿਤ੍ਤਿਯਂ ਆਪਤ੍ਤਿਂ ਆਪਨ੍ਨਾ’’ਤਿ…ਪੇ… ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੧੦੨੪. ‘‘ਯਾ ਪਨ ਭਿਕ੍ਖੁਨੀ ਜਾਨਂ ਸਭਿਕ੍ਖੁਕਂ ਆਰਾਮਂ ਅਨਾਪੁਚ੍ਛਾ ਪਵਿਸੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੧੦੨੫. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਜਾਨਾਤਿ ਨਾਮ ਸਾਮਂ ਵਾ ਜਾਨਾਤਿ, ਅਞ੍ਞੇ ਵਾ ਤਸ੍ਸਾ ਆਰੋਚੇਨ੍ਤਿ, ਤੇ ਵਾ ਆਰੋਚੇਨ੍ਤਿ.

ਸਭਿਕ੍ਖੁਕੋ ਨਾਮ ਆਰਾਮੋ ਯਤ੍ਥ ਭਿਕ੍ਖੂ ਰੁਕ੍ਖਮੂਲੇਪਿ ਵਸਨ੍ਤਿ.

ਅਨਾਪੁਚ੍ਛਾ ਆਰਾਮਂ ਪਵਿਸੇਯ੍ਯਾਤਿ ਭਿਕ੍ਖੁਂ ਵਾ ਸਾਮਣੇਰਂ ਵਾ ਆਰਾਮਿਕਂ ਵਾ ਅਨਾਪੁਚ੍ਛਾ ਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾ ਆਪਤ੍ਤਿ ਪਾਚਿਤ੍ਤਿਯਸ੍ਸ.

੧੦੨੬. ਸਭਿਕ੍ਖੁਕੇ ਸਭਿਕ੍ਖੁਕਸਞ੍ਞਾ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਆਰਾਮਂ ਪਵਿਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਸਭਿਕ੍ਖੁਕੇ ਵੇਮਤਿਕਾ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਆਰਾਮਂ ਪਵਿਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਭਿਕ੍ਖੁਕੇ ਅਭਿਕ੍ਖੁਕਸਞ੍ਞਾ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਆਰਾਮਂ ਪਵਿਸਤਿ, ਅਨਾਪਤ੍ਤਿ.

ਅਭਿਕ੍ਖੁਕੇ ਸਭਿਕ੍ਖੁਕਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਭਿਕ੍ਖੁਕੇ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਅਭਿਕ੍ਖੁਕੇ ਅਭਿਕ੍ਖੁਕਸਞ੍ਞਾ, ਅਨਾਪਤ੍ਤਿ.

੧੦੨੭. ਅਨਾਪਤ੍ਤਿ ਸਨ੍ਤਂ ਭਿਕ੍ਖੁਂ ਆਪੁਚ੍ਛਾ ਪਵਿਸਤਿ, ਅਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪਵਿਸਤਿ, ਸੀਸਾਨੁਲੋਕਿਕਾ ਗਚ੍ਛਤਿ, ਯਤ੍ਥ ਭਿਕ੍ਖੁਨਿਯੋ ਸਨ੍ਨਿਪਤਿਤਾ ਹੋਨ੍ਤਿ ਤਤ੍ਥ ਗਚ੍ਛਤਿ, ਆਰਾਮੇਨ ਮਗ੍ਗੋ ਹੋਤਿ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਪਠਮਸਿਕ੍ਖਾਪਦਂ ਨਿਟ੍ਠਿਤਂ.