੧੬. ਸਮਾਰੋਪਨਹਾਰਸਮ੍ਪਾਤਵਿਭਾਵਨਾ

੭੮. ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾ’’ਤਿ ਪਦੇਨ ਯਂ ਰਕ੍ਖਿਤਚਿਤ੍ਤਂ ਵੁਤ੍ਤਂ, ਤਂ ਰਕ੍ਖਿਤਚਿਤ੍ਤਂ ਤਿਣ੍ਣਂ ਸੁਚਰਿਤਾਨਂ ਕਮ੍ਮਾਨਂ ਪਦਟ੍ਠਾਨਂ. ਸਮ੍ਮਾਦਿਟ੍ਠਿਯਾ ਭਾਵਿਤਾਯ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਿਤੋ ਭਵਤਿ ਏਕਤੋ ਭਾਵਿਤਬ੍ਬਤ੍ਤਾ, ਪਦਟ੍ਠਾਨਕਾਰਣਤ੍ਤਾ ਚ. ਤੇਨ ਵੁਤ੍ਤਂ – ‘‘ਸਮ੍ਮਾਦਿਟ੍ਠਿਤੋ ਹੀ’’ਤਿਆਦਿ. ਯਸ੍ਸ ਅਰਹਤੋ ਸਮਾਧਿਵਿਮੁਤ੍ਤਿ ਭਵਤਿ, ਅਯਂ ਅਰਹਾ ਅਨੁਪਾਦਿਸੇਸੋ ਪੁਗ੍ਗਲੋ, ਅਯਂ ਸਮਾਧਿਵਿਮੁਤ੍ਤਿ ਅਨੁਪਾਦਿਸੇਸਾ ਨਿਬ੍ਬਾਨਧਾਤੁ.

‘‘ਦੇਸਨਾਹਾਰਸਮ੍ਪਾਤਾਦਿਕੋ ਹਾਰਸਮ੍ਪਾਤੋ ਯੇਨ ਸੋਲ਼ਸਪ੍ਪਭੇਦਭਾਵੇਨ ਸੁਤ੍ਤਪ੍ਪਦੇਸਤ੍ਥੇ ਨਿਦ੍ਧਾਰੇਤ੍ਵਾ ਯੁਜ੍ਜਿਤੋ, ਸੋਲ਼ਸਪ੍ਪਭੇਦਭਾਵੋ ਕੇਨ ਅਮ੍ਹੇਹਿ ਸਦ੍ਦਹਿਤਬ੍ਬੋ’’ਤਿ ਵਤ੍ਤਬ੍ਬਤ੍ਤਾ ‘‘ਤੇਨਾਹਾ’’ਤਿਆਦਿ ਵੁਤ੍ਤਂ. ਤੇਨ ਸੋਲ਼ਸਪ੍ਪਭੇਦਭਾਵੇਨ ਆਯਸ੍ਮਾ ਮਹਾਕਚ੍ਚਾਨੋ ‘‘ਸੋਲ਼ਸ…ਪੇ… ਸੁਤ੍ਤ’’ਨ੍ਤਿ ਯਂ ਵਚਨਂ ਆਹ, ਤੇਨ ਵਚਨੇਨ ਸੋਲ਼ਸਪ੍ਪਭੇਦਭਾਵੋ ਤੁਮ੍ਹੇਹਿ ਸਦ੍ਦਹਿਤਬ੍ਬੋ.

‘‘ਏਤ੍ਤਕੋਵ ਹਾਰਸਮ੍ਪਾਤੋ ਪਰਿਪੁਣ੍ਣੋ’’ਤਿ ਵਤ੍ਤਬ੍ਬਤ੍ਤਾ ‘‘ਨਿਯੁਤ੍ਤੋ ਹਾਰਸਮ੍ਪਾਤੋ’’ਤਿ ਵੁਤ੍ਤਂ. ਯੇਨ ਯੇਨ ਸਂਵਣ੍ਣਨਾਵਿਸੇਸਭੂਤੇਨ ਦੇਸਨਾਹਾਰਸਮ੍ਪਾਤੇਨ ਸੁਤ੍ਤਪ੍ਪਦੇਸਤ੍ਥਾ ਨਿਦ੍ਧਾਰਿਤਾ, ਸੋ ਸੋ ਸਂਵਣ੍ਣਨਾਵਿਸੇਸਭੂਤੋ ਦੇਸਨਾਹਾਰਸਮ੍ਪਾਤਾਦਿਹਾਰਸਮ੍ਪਾਤੋ ਨਿਯੁਤ੍ਤੋ ਯਥਾਰਹਂ ਨਿਦ੍ਧਾਰੇਤ੍ਵਾ ਯੁਜ੍ਜਿਤਬ੍ਬੋਤਿ ਅਤ੍ਥੋ ਗਹੇਤਬ੍ਬੋ, ਅਟ੍ਠਕਥਾਯਞ੍ਚ (ਨੇਤ੍ਤਿ. ਅਟ੍ਠ. ੭੩, ੭੬) ਤਥਾ ਨਿਦ੍ਧਾਰੇਤ੍ਵਾ ਯੁਜ੍ਜਿਤੋਤਿ.

ਇਤਿ ਦੇਸਨਾਹਾਰਸਮ੍ਪਾਤਾਦਿਹਾਰਸਮ੍ਪਾਤੇ ਸਤ੍ਤਿਬਲਾਨੁਰੂਪਾ

ਰਚਿਤਾ ਵਿਭਾਵਨਾ ਨਿਟ੍ਠਿਤਾ.

ਪਣ੍ਡਿਤੇਹਿ ਪਨ ਅਟ੍ਠਕਥਾਟੀਕਾਨੁਸਾਰੇਨ ਗਮ੍ਭੀਰਤ੍ਥੋ ਵਿਤ੍ਥਾਰਤੋ ਵਿਭਜਿਤ੍ਵਾ ਗਹੇਤਬ੍ਬੋਤਿ.