੧੦. ਵੇਵਚਨਹਾਰਵਿਭਙ੍ਗਵਿਭਾਵਨਾ

੩੭. ਯੇਨ ਯੇਨ ਸਂਵਣ੍ਣਨਾਵਿਸੇਸਭੂਤੇਨ ਪਵਤ੍ਤਨਹਾਰਵਿਭਙ੍ਗੇਨ ਪਰਿਵਤ੍ਤੇਤਬ੍ਬਾ ਸੁਤ੍ਤਤ੍ਥਾ ਵਿਭਤ੍ਤਾ, ਸੋ ਸਂਵਣ੍ਣਨਾਵਿਸੇਸਭੂਤੋ ਪਰਿਵਤ੍ਤਨਹਾਰਵਿਭਙ੍ਗੋ ਪਰਿਪੁਣ੍ਣੋ, ‘‘ਕਤਮੋ ਵੇਵਚਨਹਾਰਵਿਭਙ੍ਗੋ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਕਤਮੋ ਵੇਵਚਨੋ ਹਾਰੋ’’ਤਿਆਦਿ ਵੁਤ੍ਤਂ. ਤਤ੍ਥ ਤਤ੍ਥਾਤਿ ਤੇਸੁ ਨਿਦ੍ਦਿਟ੍ਠੇਸੁ ਸੋਲ਼ਸਸੁ ਦੇਸਨਾਹਾਰਾਦੀਸੁ ਕਤਮੋ ਸਂਵਣ੍ਣਨਾਵਿਸੇਸੋ ਵੇਵਚਨੋ ਹਾਰੋ ਵੇਵਚਨਹਾਰਵਿਭਙ੍ਗੋ ਨਾਮਾਤਿ ਪੁਚ੍ਛਤਿ. ‘‘ਵੇਵਚਨਾਨਿ ਬਹੂਨੀ’’ਤਿਆਦਿਨਿਦ੍ਦੇਸਸ੍ਸ ਇਦਾਨਿ ਮਯਾ ਵੁਚ੍ਚਮਾਨੋ ‘‘ਏਕਂ ਭਗਵਾ ਧਮ੍ਮ’’ਨ੍ਤਿਆਦਿਕੋ ਵਿਤ੍ਥਾਰਸਂਵਣ੍ਣਨਾਵਿਸੇਸੋ ਵੇਵਚਨੋ ਹਾਰੋ ਵੇਵਚਨਹਾਰਵਿਭਙ੍ਗੋ ਨਾਮਾਤਿ ਅਤ੍ਥੋ ਗਹੇਤਬ੍ਬੋ. ‘‘ਯਾਨਿ ਵੇਵਚਨਾਨਿ ਨਿਦ੍ਧਾਰਿਤਾਨਿ, ਕਤਮਾਨਿ ਤਾਨਿ ਵੇਵਚਨਾਨੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਯਥਾ ਏਕ’’ਨ੍ਤਿਆਦਿ ਵੁਤ੍ਤਂ. ਏਕਂ ਵਿਞ੍ਞਾਤਬ੍ਬਂ ਧਮ੍ਮਂ ਸਭਾਵਧਮ੍ਮਂ ਪਞ੍ਞਾਪੇਤਬ੍ਬਂ ਵਾ ਧਮ੍ਮਂ ਅਞ੍ਞਮਞ੍ਞੇਹਿ ਯਥਾ ਯੇਹਿ ਪਕਾਰੇਹਿ ਚੇਵ ਵੇਵਚਨੇਹਿ ਚ ਭਗਵਾ ਨਿਦ੍ਦਿਸਤਿ, ਤਥਾਪਕਾਰਾਨਿ ਵੇਵਚਨਾਨਿ ਵਿਞ੍ਞਾਤਬ੍ਬਾਨੀਤਿ ਅਤ੍ਥੋ. ‘‘ਤਾਨਿ ਵੇਵਚਨਾਨਿ ਕਿਨ੍ਤਿ ਭਗਵਾ ਆਹਾ’’ਤਿ ਵਤ੍ਤਬ੍ਬਤ੍ਤਾ ‘‘ਯਥਾਹ ਭਗਵਾ’’ਤਿਆਦਿ ਵੁਤ੍ਤਂ. ਯਥਾ ਯਂਯਂਪਕਾਰਾਨਿ ਵੇਵਚਨਾਨਿ –

‘‘ਆਸਾ ਚ ਪਿਹਾ ਚ ਅਭਿਨਨ੍ਦਨਾ ਚ, ਅਨੇਕਧਾਤੂਸੁ ਸਰਾ ਪਤਿਟ੍ਠਿਤਾ;

ਅਞ੍ਞਾਣਮੂਲਪ੍ਪਭਵਾ ਪਜਪ੍ਪਿਤਾ, ਸਬ੍ਬਾ ਮਯਾ ਬ੍ਯਨ੍ਤਿਕਤਾ ਸਮੂਲਿਕਾ’’ਤਿ. –

ਭਗਵਾ ਆਹ, ਤਂਤਂਪਕਾਰਾਨਿ ਵੇਵਚਨਾਨਿ ਵਿਞ੍ਞਾਤਬ੍ਬਾਨੀਤਿ ਅਤ੍ਥੋ.

ਏਕਸ੍ਸੇਵ ਧਮ੍ਮਸ੍ਸ ਅਨੇਕੇਹਿ ਪਰਿਯਾਯਭੂਤੇਹਿ ਵੇਵਚਨੇਹਿ ਨਿਦ੍ਦਿਸਨੇ ਫਲਂ ਅਟ੍ਠਕਥਾਯਂ (ਨੇਤ੍ਤਿ. ਅਟ੍ਠ. ੩੭) ਬਹੁਧਾ ਵੁਤ੍ਤਂ, ਤਸ੍ਮਾ ਅਮ੍ਹੇਹਿ ਨ ਦਸ੍ਸਿਤਂ. ‘‘ਕਤਮਾ ਆਸਾ, ਕਤਮਾ ਪਿਹਾਦੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਆਸਾ ਨਾਮ ਵੁਚ੍ਚਤੀ’’ਤਿਆਦਿ ਵੁਤ੍ਤਂ. ਯਾ ਭਵਿਸ੍ਸਸ੍ਸ ਅਤ੍ਥਸ੍ਸ ਆਸੀਸਨਾ ਅਵਸ੍ਸਂ ਆਗਮਿਸ੍ਸਤੀਤਿ ਯਾ ਆਸਾ ਅਸ੍ਸ ਆਸੀਸਨ੍ਤਸ੍ਸ ਪੁਗ੍ਗਲਸ੍ਸ ਉਪ੍ਪਜ੍ਜਤਿ, ਤਸ੍ਸ ਆਸੀਸਨਾ ‘‘ਆਸਾ ਨਾਮਾ’’ਤਿ ਵੁਚ੍ਚਤਿ. ਵਤ੍ਤਮਾਨਸ੍ਸ ਯਾ ਪਤ੍ਥਨਾ ਅਸ੍ਸ ਪਤ੍ਥਯਨ੍ਤਸ੍ਸ ਉਪ੍ਪਜ੍ਜਤਿ, ਸੇਯ੍ਯਤਰਂ ਵਾ ਅਞ੍ਞਂ ਦਿਸ੍ਵਾ ‘‘ਏਦਿਸੋ ਅਹਂ ਭਵੇਯ੍ਯ’’ਨ੍ਤਿ ਯਾ ਪਿਹਾ ਅਸ੍ਸ ਪਿਹਯਨ੍ਤਸ੍ਸ ਉਪ੍ਪਜ੍ਜਤਿ, ਸਾ ਪਤ੍ਥਨਾ ‘‘ਪਿਹਾ ਨਾਮਾ’’ਤਿ ਵੁਚ੍ਚਤਿ. ਅਨਾਗਤਤ੍ਥਂ ਆਰਬ੍ਭ ਪਵਤ੍ਤਾ ਤਣ੍ਹਾ ‘‘ਆਸਾ’’ਤਿ ਵੁਚ੍ਚਤਿ, ਅਨਾਗਤਪਚ੍ਚੁਪ੍ਪਨ੍ਨਤ੍ਥਂ ਆਰਬ੍ਭ ਪਵਤ੍ਤਾ ਤਣ੍ਹਾ ‘‘ਪਿਹਾ’’ਤਿ ਵੁਚ੍ਚਤਿ, ਤਥਾਪਿ ਤਣ੍ਹਾਭਾਵੇਨ ਏਕਤ੍ਤਾ ਏਕੋ ਧਮ੍ਮੋਵ ਅਤ੍ਥਸ੍ਸ ਇਚ੍ਛਿਤਸ੍ਸ ਨਿਪ੍ਫਤ੍ਤਿ ਅਤ੍ਥਨਿਪ੍ਫਤ੍ਤਿ, ਪਟਿਪਾਲੇਤਿ ਏਤਾਯ ਤਣ੍ਹਾਯਾਤਿ ਪਟਿਪਾਲਨਾ, ਅਤ੍ਥਨਿਪ੍ਫਤ੍ਤਿਯਾ ਪਟਿਪਾਲਨਾਤਿ ਅਤ੍ਥਨਿਪ੍ਫਤ੍ਤਿਪਟਿਪਾਲਨਾ. ਯਾ ਤਣ੍ਹਾ ਅਸ੍ਸ ਪਾਲਯਨ੍ਤਸ੍ਸ ਪੁਗ੍ਗਲਸ੍ਸ ਉਪ੍ਪਜ੍ਜਤਿ, ਸਾ ਤਣ੍ਹਾ ‘‘ਅਭਿਨਨ੍ਦਨਾ’’ਤਿ ਵੁਚ੍ਚਤਿ.

‘‘ਯਾ ਅਤ੍ਥਨਿਪ੍ਫਤ੍ਤਿ ਤਣ੍ਹਾਯ ਪਟਿਪਾਲੇਤਬ੍ਬਾ, ਕਤਮਾ ਸਾ ਅਤ੍ਥਨਿਪ੍ਫਤ੍ਤੀ’’ਤਿ ਪੁਚ੍ਛਿਤਬ੍ਬਤ੍ਤਾ ਤਂ ਅਤ੍ਥਨਿਪ੍ਫਤ੍ਤਿਂ ਸਤ੍ਤਤੋ ਵਾ ਸਙ੍ਖਾਰਤੋ ਵਾ ਵਿਭਜਿਤ੍ਵਾ ਦਸ੍ਸੇਨ੍ਤੋ ‘‘ਪਿਯਂ ਵਾ ਞਾਤਿਂ, ਪਿਯਂ ਵਾ ਧਮ੍ਮ’’ਨ੍ਤਿਆਦਿਮਾਹ. ਤਤ੍ਥ ‘‘ਞਾਤਿ’’ਨ੍ਤਿ ਇਮਿਨਾ ਮਿਤ੍ਤਬਨ੍ਧਵਾਦਯੋਪਿ ਗਹਿਤਾ. ਧਮ੍ਮਂ ਪਨ ਪਿਯਰੂਪਾਰਮ੍ਮਣਾਦਿਕਂ ਛਬ੍ਬਿਧਮ੍ਪਿ ਯਾਯ ਤਣ੍ਹਾਯ ਤਣ੍ਹਿਕੋ ਅਭਿਨਨ੍ਦਤਿ, ਸਾ ਤਣ੍ਹਾ ‘‘ਅਭਿਨਨ੍ਦਨਾ ਨਾਮਾ’’ਤਿ ਵੁਚ੍ਚਤਿ. ਪਟਿਕ੍ਕੂਲਂ ਞਾਤਿਂ ਵਾ ਧਮ੍ਮਂ ਵਾ ਵਿਪਲ੍ਲਾਸਵਸੇਨ ਅਪ੍ਪਟਿਕ੍ਕੂਲਂ ਞਾਤਿਂ ਵਾ ਧਮ੍ਮਂ ਵਾ ਸਭਾਵਵਸੇਨ ਅਪ੍ਪਟਿਕ੍ਕੂਲਤੋ ਯਾਯ ਤਣ੍ਹਾਯ ਤਣ੍ਹਿਕੋ ਅਭਿਨਨ੍ਦਤਿ, ਸਾ ਤਣ੍ਹਾ ਵਾ ‘‘ਅਭਿਨਨ੍ਦਨਾ ਨਾਮਾ’’ਤਿ ਵੁਚ੍ਚਤੀਤਿ ਯੋਜੇਤ੍ਵਾ ਅਤ੍ਥੋ ਗਹੇਤਬ੍ਬੋ.

‘‘ਯਾਸੁ ਅਨੇਕਾਸੁ ਧਾਤੂਸੁ ਵੁਤ੍ਤਪ੍ਪਕਾਰਾ ਤਣ੍ਹਾ ‘ਸਰਾ’ਤਿ ਭਗਵਤਾ ਵੁਤ੍ਤਾ, ਕਤਮਾ ਤਾ ਧਾਤੁਯੋ’’ਤਿ ਪੁਚ੍ਛਿਤਬ੍ਬਤ੍ਤਾ ਤਾ ਧਾਤੁਯੋ ਸਰੂਪਤੋ ਦਸ੍ਸੇਤੁਂ ‘‘ਚਕ੍ਖੁਧਾਤੂ’’ਤਿਆਦਿ ਵੁਤ੍ਤਂ.

‘‘ਤਾਸੁ ਧਾਤੂਸੁ ਕਤਮਾਯ ਧਾਤੁਯਾ ਕਤਮਾ ਸਰਾ ਪਤਿਟ੍ਠਿਤਾ ਪਵਤ੍ਤਾ’’ਤਿ ਪੁਚ੍ਛਿਤਬ੍ਬਤ੍ਤਾ ਇਮਾਯ ਧਾਤੁਯਾ ਅਯਂ ਸਰਾ ਪਤਿਟ੍ਠਿਤਾ ਪਵਤ੍ਤਾਤਿ ਨਿਯਮੇਤ੍ਵਾ ਦਸ੍ਸੇਤੁਂ ‘‘ਸਰਾਤਿ ਕੇਚਿ ਰੂਪਾਧਿਮੁਤ੍ਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਕੇਚੀਤਿ ਸਰਾਸਙ੍ਖਾਤਾਯ ਰੂਪਤਣ੍ਹਾਯ ਤਣ੍ਹਿਕਾ ਪੁਗ੍ਗਲਾ. ਰੂਪਾਧਿਮੁਤ੍ਤਾਤਿ ਰੂਪਧਾਤੁਸਙ੍ਖਾਤੇ ਆਰਮ੍ਮਣੇ ਅਧਿਮੁਤ੍ਤਾ ਅਜ੍ਝੋਸਿਤਾ. ਇਮਿਨਾ ਪਦੇਨ ਰੂਪਤਣ੍ਹਾਸਙ੍ਖਾਤਾ ਸਰਾ ਰੂਪਧਾਤੁਯਾ ਪਤਿਟ੍ਠਿਤਾ ਪਵਤ੍ਤਾਤਿ ਗਹਿਤਾ, ‘‘ਕੇਚਿ ਸਦ੍ਦਾਧਿਮੁਤ੍ਤਾ’’ਤਿਆਦੀਹਿਪਿ ਸਦ੍ਦਤਣ੍ਹਾਸਙ੍ਖਾਤਾਦਯੋ ਸਰਾ ਸਦ੍ਦਧਾਤੁਯਾਦੀਸੁ ਪਤਿਟ੍ਠਿਤਾ ਪਵਤ੍ਤਾ ਸਰਾਵ ਗਹਿਤਾ. ਕੇਚਿ ਧਮ੍ਮਾਧਿਮੁਤ੍ਤਾਤਿ ਏਤ੍ਥ ਧਮ੍ਮਗ੍ਗਹਣੇਨ ਚਕ੍ਖੁਧਾਤੁਸੋਤਧਾਤੁਘਾਨਧਾਤੁਜਿਵ੍ਹਾਧਾਤੁਕਾਯਧਾਤੁਸਤ੍ਤਵਿਞ੍ਞਾਣਧਾਤੁਧਮ੍ਮਧਾਤੁਯੋ ਗਹਿਤਾ, ਤਸ੍ਮਾ ਅਟ੍ਠਾਰਸ ਧਾਤੁਯੋ ਪਤਿਟ੍ਠਾਨਭਾਵੇਨ ਗਹਿਤਾਪਿ ਛਬ੍ਬਿਧਾਵ ਗਹਿਤਾਤਿ ਦਟ੍ਠਬ੍ਬਾ. ‘‘ਰੂਪਾਧਿਮੁਤ੍ਤਾਦੀਸੁ ਕਿਤ੍ਤਕਾਨਿ ਪਦਾਨਿ ਤਣ੍ਹਾਪਕ੍ਖੇ ਤਣ੍ਹਾਯ ਵੇਵਚਨਾ’’ਤਿ ਪੁਚ੍ਛਿਤਬ੍ਬਤ੍ਤਾ ਏਤਾਦਿਸਾਨਿ ਏਤ੍ਤਕਾਨਿ ਪਦਾਨਿ ਤਣ੍ਹਾਪਕ੍ਖੇ ਤਣ੍ਹਾਵੇਵਚਨਾਨੀਤਿ ਨਿਯਮੇਤ੍ਵਾ ਦਸ੍ਸੇਤੁਂ ‘‘ਤਤ੍ਥ ਯਾਨਿ ਛ ਗੇਹਸਿਤਾਨੀ’’ਤਿਆਦਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਛਸੁ ਰੂਪਾਦੀਸੁ. ਛ ਗੇਹਸਿਤਾਨਿ ਦੋਮਨਸ੍ਸਾਨੀਤਿ ਛਸੁ ਰੂਪਾਦੀਸੁ ਪਵਤ੍ਤਂ ਤਣ੍ਹਾਪੇਮਂ ਨਿਸ੍ਸਾਯ ਪਵਤ੍ਤਾਨਿ ਛ ਦੋਮਨਸ੍ਸਾਨਿ. ਏਸ ਨਯੋ ਸੇਸੇਸੁਪਿ. ‘‘ਛ ਉਪੇਕ੍ਖਾ ਗੇਹਸਿਤਾਪਿ ਭਗਵਤਾ ਵੁਤ੍ਤਾ, ਕਸ੍ਮਾ ਨ ਗਹਿਤਾ’’ਤਿ ਵਤ੍ਤਬ੍ਬਤ੍ਤਾ ‘‘ਯਾ ਛ ਉਪੇਕ੍ਖਾ ਗੇਹਸਿਤਾ, ਅਯਂ ਦਿਟ੍ਠਿਪਕ੍ਖੋ’’ਤਿ ਵੁਤ੍ਤਂ, ਦਿਟ੍ਠਿਪਕ੍ਖਤ੍ਤਾ ਨ ਗਹਿਤਾਤਿ ਅਤ੍ਥੋ.

੩੮. ‘‘ਕਥਂ ਵੁਤ੍ਤਪ੍ਪਕਾਰਾ ਤਣ੍ਹਾ ਏਵ ਗਹਿਤਾ’’ਤਿ ਵਤ੍ਤਬ੍ਬਤ੍ਤਾ ‘‘ਸਾਯੇਵ ਪਤ੍ਥਨਾਕਾਰੇਨਾ’’ਤਿਆਦਿ ਵੁਤ੍ਤਂ. ਸਾ ਵੁਤ੍ਤਪ੍ਪਕਾਰਾ ਏਵ ਤਣ੍ਹਾ ਪਤ੍ਥਨਾਕਾਰੇਨ ਪਵਤ੍ਤਨਤੋ ਆਸਾਦਿਪਰਿਯਾਯੇਨ ਵੁਤ੍ਤਾ, ਰੂਪਾਦਿਆਰਮ੍ਮਣਧਮ੍ਮੇਸੁ ਨਨ੍ਦਨਤੋ ‘‘ਧਮ੍ਮਨਨ੍ਦੀ’’ਤਿ ਪਰਿਯਾਯੇਨ ਵੁਤ੍ਤਾ, ਰੂਪਾਦਿਆਰਮ੍ਮਣਧਮ੍ਮੇਸੁ ਗਿਲਿਤ੍ਵਾ ਪਰਿਨਿਟ੍ਠਪੇਤਿ ਵਿਯ ਅਜ੍ਝੋਸਾਯ ਤਿਟ੍ਠਨਤੋ ‘‘ਧਮ੍ਮਜ੍ਝੋਸਾਨ’’ਨ੍ਤਿ ਪਰਿਯਾਯੇਨ ਵੁਤ੍ਤਾ, ਤਸ੍ਮਾ ਤਣ੍ਹਾਯ ਵੇਵਚਨਾਨਿ ਹੋਨ੍ਤਿ.

ਤਣ੍ਹਾਯ ਵੇਵਚਨਾਨਿ ਆਚਰਿਯੇਨ ਨਿਦ੍ਦਿਟ੍ਠਾਨਿ, ਅਮ੍ਹੇਹਿ ਚ ਞਾਤਾਨਿ, ‘‘ਕਤਮਾਨਿ ਚਿਤ੍ਤਸ੍ਸ ਵੇਵਚਨਾਨੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਚਿਤ੍ਤਂ ਮਨੋ’’ਤਿਆਦਿ ਵੁਤ੍ਤਂ. ‘‘ਆਰਮ੍ਮਣਂ ਚਿਨ੍ਤੇਤੀਤਿ ਚਿਤ੍ਤਂ. ਮਨਤਿ ਜਾਨਾਤੀਤਿ ਮਨੋ. ਵਿਜਾਨਾਤੀਤਿ ਵਿਞ੍ਞਾਣ’’ਨ੍ਤਿਆਦਿਨਾ ਅਤ੍ਥੋ ਪਕਰਣੇਸੁ (ਧ. ਸ. ਅਟ੍ਠ. ੫) ਵੁਤ੍ਤੋਵ, ਤਸ੍ਮਾ ਅਮ੍ਹੇਹਿ ਨ ਵਿਤ੍ਥਾਰਿਤੋ. ਵੇਵਚਨਾਨਿਯੇਵ ਇਮਾਨਿ ਇਮਸ੍ਸ ਵੇਵਚਨਾਨੀਤਿ ਏਤ੍ਤਕਾਨਿਯੇਵ ਕਥਯਿਸ੍ਸਾਮ. ‘‘ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲ’’ਨ੍ਤਿਆਦੀਨਿ ਪਞ੍ਞਾਵੇਵਚਨਾਨਿ.

‘‘ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦੀਨਿ ਬੁਦ੍ਧਸ੍ਸ ਵੇਵਚਨਾਨਿ. ‘‘ਤਾਨਿ ਕਤ੍ਥ ਦੇਸਿਤਾਨੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਯਥਾ ਚ ਬੁਦ੍ਧਾਨੁਸ੍ਸਤਿਯਂ ਵੁਤ੍ਤ’’ਨ੍ਤਿਆਦਿ ਵੁਤ੍ਤਂ. ਬੁਦ੍ਧਾਨੁਸ੍ਸਤਿਦੇਸਨਾਯਂ ਯਥਾ ਚ ਯਂਯਂਪਕਾਰਂ ਵੇਵਚਨਂ ਭਗਵਤਾ ‘‘ਇਤਿਪਿ ਸੋ ਭਗਵਾ ਅਰਹਂ…ਪੇ… ਭਗਵਤੋ’’ਤਿ ਵੁਤ੍ਤਂ, ਏਤਂਪਕਾਰਂ ਵੇਵਚਨਂ ਬੁਦ੍ਧਾਨੁਸ੍ਸਤਿਯਾ ਵੇਵਚਨਂ ਬੁਦ੍ਧਸ੍ਸ ਵੇਵਚਨਨ੍ਤਿ ਦਟ੍ਠਬ੍ਬਂ. ‘‘ਯਥਾ ਚ ਧਮ੍ਮਾਨੁਸ੍ਸਤਿਯਂ ਵੁਤ੍ਤ’’ਨ੍ਤਿਆਦੀਸੁਪਿ ਏਵਮੇਵ ਯੋਜਨਾ ਕਾਤਬ੍ਬਾ.

‘‘ਤੇਨਾਹਾ’’ਤਿਆਦ੍ਯਾਨੁਸਨ੍ਧ੍ਯਾਦਿਅਤ੍ਥੋ ਚੇਵ ‘‘ਨਿਯੁਤ੍ਤੋ ਵੇਵਚਨੋ ਹਾਰੋ’’ਤਿਆਨੁਸਨ੍ਧ੍ਯਾਦਿਅਤ੍ਥੋ ਚ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬੋ.

ਇਤਿ ਵੇਵਚਨਹਾਰਵਿਭਙ੍ਗੇ ਸਤ੍ਤਿਬਲਾਨੁਰੂਪਾ ਰਚਿਤਾ

ਵਿਭਾਵਨਾ ਨਿਟ੍ਠਿਤਾ.

ਪਣ੍ਡਿਤੇਹਿ ਪਨ ਅਟ੍ਠਕਥਾਟੀਕਾਨੁਸਾਰੇਨ ਗਮ੍ਭੀਰਤ੍ਥੋ ਵਿਤ੍ਥਾਰਤੋ ਵਿਭਜਿਤ੍ਵਾ ਗਹੇਤਬ੍ਬੋਤਿ.