(੨) ਸਙ੍ਖ੍ਯਾਵਾਰਵਣ੍ਣਨਾ

੭੩. ਯਥਾ ਅਞ੍ਞਮਞ੍ਞਪਚ੍ਚਯੇ ਵਿਸੇਸੋ ਵਿਭਙ੍ਗੇ ਅਤ੍ਥੀਤਿ ਇਦਂ ਹੇਤੁਪਚ੍ਚਯਾਦਿਵਿਭਙ੍ਗਤੋ ਵਿਸੇਸਭਾਵਸਾਮਞ੍ਞੇਨ ਵੁਤ੍ਤਂ. ਨ ਹਿ ਯਾਦਿਸੋ ਅਞ੍ਞਮਞ੍ਞਪਚ੍ਚਯਵਿਭਙ੍ਗੇ ਵਿਸੇਸੋ, ਤਾਦਿਸੋ ਪੁਰੇਜਾਤਪਚ੍ਚਯਵਿਭਙ੍ਗੇ. ਤਥਾ ਹਿ ਅਞ੍ਞਮਞ੍ਞਪਚ੍ਚਯੇ ਪਟਿਸਨ੍ਧਿ ਲਬ੍ਭਤਿ, ਨ ਪੁਰੇਜਾਤਪਚ੍ਚਯੇ. ‘‘ਵਿਪਾਕਾਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚਾ’’ਤਿਆਦਿਕੇ ਵਿਭਙ੍ਗੇਤਿ ਇਮਿਨਾ ਯਸ੍ਮਿਂ ਪਚ੍ਚਯੇ ਵਿਪਾਕਾਬ੍ਯਾਕਤਂ ਉਦ੍ਧਟਂ, ਤਂ ਨਿਦਸ੍ਸਨਵਸੇਨ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ – ਯਥਾ ਹੇਤੁਪਚ੍ਚਯਾਦੀਸੁ ‘‘ਵਿਪਾਕਾਬ੍ਯਾਕਤਂ ਏਕਂ ਖਨ੍ਧਂ ਪਟਿਚ੍ਚਾ’’ਤਿਆਦਿਨਾ ਵਿਭਙ੍ਗੇ ਵਿਪਾਕਾਬ੍ਯਾਕਤਂ ਉਦ੍ਧਟਂ ਅਤ੍ਥਿ, ਏਵਂ ਵਿਪਾਕਾਬ੍ਯਾਕਤਾਭਾਵਂ ਆਸੇਵਨਪਚ੍ਚਯੇ ਵਿਸੇਸਂ ਦਸ੍ਸੇਤੀਤਿ.

੭੪. ਏਤਸ੍ਮਿਂ ਅਨੁਲੋਮੇਤਿ ਇਮਸ੍ਮਿਂ ਪਟਿਚ੍ਚਵਾਰੇ ਪਚ੍ਚਯਾਨੁਲੋਮੇ. ਸੁਦ੍ਧਿਕਨਯੇਤਿ ਪਠਮੇ ਨਯੇ. ਦਸ੍ਸਿਤਗਣਨਤੋਤਿ ‘‘ਨਵ, ਤੀਣਿ, ਏਕ’’ਨ੍ਤਿ ਏਵਂ ਸਙ੍ਖੇਪਤੋ ਦਸ੍ਸਿਤਗਣਨਤੋ. ਤਤੋ ਪਰੇਸੁ ਨਯੇਸੂਤਿ ਤਤੋ ਪਠਮਨਯਤੋ ਪਰੇਸੁ ਦੁਤਿਯਾਦਿਨਯੇਸੁ. ਅਞ੍ਞਿਸ੍ਸਾਤਿ ਨਵਾਦਿਭੇਦਤੋ ਅਞ੍ਞਿਸ੍ਸਾ ਗਣਨਾਯ. ਅਬਹੁਗਣਨੇਨ ਯੁਤ੍ਤਸ੍ਸ ਬਹੁਗਣਨਸ੍ਸ ਪਚ੍ਚਯਸ੍ਸ, ਤੇਨ ਅਬਹੁਗਣਨੇਨ. ਸਮਾਨਗਣਨਤਾ ਚਾਤਿ ਚ-ਸਦ੍ਦੋ ਬ੍ਯਤਿਰੇਕੋ. ਤੇਨ ਪਚ੍ਚਨੀਯਤੋ ਅਨੁਲੋਮੇ ਯੋ ਵਿਸੇਸੋ ਵੁਚ੍ਚਤਿ, ਤਂ ਜੋਤੇਤਿ. ਤੇਨਾਹ ‘‘ਅਨੁਲੋਮੇਯੇਵ ਦਟ੍ਠਬ੍ਬਾ’’ਤਿ. ਅਨੁਲੋਮੇਯੇਵਾਤਿ ਅਵਧਾਰਣੇਨ ਨਿਵਤ੍ਤਿਤਂ ਦਸ੍ਸੇਤੁਂ ‘‘ਪਚ੍ਚਨੀਯੇ…ਪੇ… ਵਕ੍ਖਤੀ’’ਤਿ ਵੁਤ੍ਤਂ.

੭੬-੭੯. ਤੇ ਪਨ ਤੇਰਸਮੂਲਕਾਦਿਕੇ ਨਯੇ ਸਾਸੇਵਨਸਵਿਪਾਕੇਸੁ ਦ੍ਵੀਸੁ ਦ੍ਵਾਵੀਸਤਿਮੂਲਕੇਸੁ ਸਾਸੇਵਨਮੇਵ ਗਹੇਤ੍ਵਾ ਇਤਰਂ ਪਜਹਨ੍ਤੋ ਆਹ ‘‘ਪਚ੍ਛਾਜਾਤਵਿਪਾਕਾਨਂ ਪਰਿਹੀਨਤ੍ਤਾ’’ਤਿ. ਵਿਰੋਧਾਭਾਵੇ ਸਤੀਤਿ ਇਦਂ ‘‘ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯਾ’’ਤਿਆਦੀਸੁ ਵਿਯ ਪਰਿਕਪ੍ਪਵਚਨਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਪੁਚ੍ਛਾਯ ਦਸ੍ਸਿਤਨਯੇਨਾ’’ਤਿ. ਤਸ੍ਸ ਚ ਤੇਵੀਸਤਿਮੂਲਕਸ੍ਸ. ਨਾਮਨ੍ਤਿ ਤੇਵੀਸਤਿਮੂਲਕਨ੍ਤਿ ਨਾਮਂ. ਦ੍ਵਾਵੀਸਤਿ…ਪੇ… ਵੁਤ੍ਤਨ੍ਤਿ ਏਤੇਨ ਦ੍ਵਾਵੀਸਤਿਮੂਲਕੋਵ ਪਰਮਤ੍ਥਤੋ ਲਬ੍ਭਤਿ, ਨ ਤੇਵੀਸਤਿਮੂਲਕੋਤਿ ਦਸ੍ਸੇਤਿ.

ਅਞ੍ਞਪਦਾਨੀਤਿ ਹੇਤੁਅਧਿਪਤਿਪਦਾਦੀਨਿ. ਸੁਦ੍ਧਿਕਨਯੋਤਿ ਪਠਮਨਯੋ, ਯਂ ਅਟ੍ਠਕਥਾਯਂ ‘‘ਏਕਮੂਲ’’ਨ੍ਤਿ ਵੁਤ੍ਤਂ. ਆਰਮ੍ਮਣਮੂਲਕਾਦੀਸੁ ਨ ਲਬ੍ਭਤੀਤਿ ਦੁਮੂਲਕਾਦੀਸੁ ਤਂ ਨ ਯੋਜੀਯਤਿ. ਹੇਟ੍ਠਿਮਂ ਹੇਟ੍ਠਿਮਂ ਸੋਧੇਤ੍ਵਾ ਏਵ ਹਿ ਅਭਿਧਮ੍ਮਪਾਲ਼ਿ ਪਵਤ੍ਤਾ, ਤਸ੍ਮਾ ‘‘ਆਰਮ੍ਮਣੇ…ਪੇ… ਪਞ੍ਹਾ’’ਤਿ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਤੀਣਿਯੇਵ ਪਞ੍ਹਾ’’ਤਿ ਪਾਠੇ. ‘‘ਵਤ੍ਤੁ ਅਧਿਪ੍ਪਾਯਾਨੁਵਿਧਾਯੀ ਸਦ੍ਦਪ੍ਪਯੋਗੋ’’ਤਿ ਕਤ੍ਵਾ ਅਧਿਪ੍ਪਾਯਂ ਵਿਭਾਵੇਨ੍ਤੋ ਆਹ ‘‘ਤਤੋ ਉਦ੍ਧਂ ਗਣਨਂ ਨਿਵਾਰੇਤਿ, ਨ ਅਧੋ ਪਟਿਕ੍ਖਿਪਤੀ’’ਤਿ. ਗਣਨਾਯ ਉਪਨਿਕ੍ਖਿਤ੍ਤਪਞ੍ਞਤ੍ਤਿਭਾਵਤੋ ਹੇਟ੍ਠਾਗਣਨਂ ਅਮੁਞ੍ਚਿਤ੍ਵਾਵ ਉਪਰਿਗਣਨਾ ਸਮ੍ਭਵਤੀਤਿ ਆਹ ‘‘ਤੀਸੁ ਏਕਸ੍ਸ ਅਨ੍ਤੋਗਧਤਾਯ ਚ ‘ਤੀਣਿਯੇਵਾ’ਤਿ ਵੁਤ੍ਤ’’ਨ੍ਤਿ. ਅਤ੍ਤਨੋ ਵਚਨਨ੍ਤਿ ‘‘ਤਤ੍ਰਿਦਂ ਲਕ੍ਖਣ’’ਨ੍ਤਿਆਦਿਨਾ ਵੁਤ੍ਤਂ ਅਤ੍ਤਨੋ ਵਚਨਂ.

੮੦-੮੫. ਅਵਿਗਤਾ…ਪੇ… ਵੁਤ੍ਤੇਪਿ ਵਿਪਲ੍ਲਾਸਯੋਜਨਂ ਅਕਤ੍ਵਾਤਿ ਅਧਿਪ੍ਪਾਯੋ. ਸਾ ਦਸ੍ਸਿਤਾ ਹੋਤੀਤਿ ਸਾ ਵਿਪਲ੍ਲਾਸਯੋਜਨਂ ਅਕਤ੍ਵਾ ਦਸ੍ਸਿਯਮਾਨਾ ਯਦਿਪਿ ਦਸ੍ਸਿਤਾ ਹੋਤਿ, ਨ ਏਵਂ ਆਵਿਕਰਣਵਸੇਨ ਦਸ੍ਸਿਤਾ ਹੋਤਿ ਤਾਦਿਸਸ੍ਸ ਲਿਙ੍ਗਨਸ੍ਸ ਅਭਾਵਤੋ ਯਥਾ ਵਿਪਲ੍ਲਾਸਯੋਜਨਾਯਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਵਿਪਲ੍ਲਾਸ…ਪੇ… ਹੋਤੀ’’ਤਿ. ਏਵਮੇਵ ਅਧਿਪ੍ਪਾਯੋ ਯੋਜੇਤਬ੍ਬੋਤਿ ‘‘ਯੇ…ਪੇ… ਤਂ ਦਸ੍ਸੇਤੁ’’ਨ੍ਤਿ ਏਤ੍ਥ ‘‘ਯਦਿਪਿ ਅਵਿਗਤਾਨਨ੍ਤਰ’’ਨ੍ਤਿਆਦਿਨਾ ਯਥਾ ਅਧਿਪ੍ਪਾਯੋ ਯੋਜਿਤੋ, ਏਵਮੇਵ ‘‘ਤੇਨੇਤਂ ਆਵਿਕਰੋਤੀ’’ਤਿ ਏਤ੍ਥਾਪਿ ਅਧਿਪ੍ਪਾਯੋ ਯੋਜੇਤਬ੍ਬੋ. ਕਿਂ ਵੁਤ੍ਤਂ ਹੋਤਿ? ਯਥਾ ਤਤ੍ਥ ‘‘ਊਨਤਰਗਣਨੇਹਿ ਸਮਾਨਗਣਨੇਹਿ ਚ ਸਦ੍ਧਿਂ ਸਂਸਨ੍ਦਨੇ ਊਨਤਰਾ ਸਮਾਨਾ ਚ ਗਣਨਾ ਹੋਤੀ’’ਤਿ ਅਯਮਤ੍ਥੋ ਞਾਪਨਵਸੇਨ ਦਸ੍ਸਿਤੋ, ਏਵਮਿਧਾਪੀਤਿ. ਤੇਨ ਵੁਤ੍ਤਂ ਅਟ੍ਠਕਥਾਯਂ ‘‘ਆਰਮ੍ਮਣਪਚ੍ਚਯੋ ਯੇਨ ਯੇਨ ਬਹੁਤਰਗਣਨੇਨ ਵਾ ਸਮਾਨਗਣਨੇਨ ਵਾ ਪਚ੍ਚਯੇਨ ਸਦ੍ਧਿਂ ਤਿਕਦੁਕਾਦਿਭੇਦਂ ਗਚ੍ਛਤਿ, ਸਬ੍ਬਤ੍ਥ ਤੀਣੇਵ ਪਞ੍ਹਵਿਸ੍ਸਜ੍ਜਨਾਨਿ ਵੇਦਿਤਬ੍ਬਾਨੀ’’ਤਿ. ਨ ਕੇਵਲਮਤ੍ਥਵਿਸੇਸਾਵਿਕਰਣਤ੍ਥਮੇਵੇਤ੍ਥ ਤਥਾ ਯੋਜਨਾ ਕਤਾ, ਅਥ ਖੋ ਦੇਸਨਾਕ੍ਕਮੋਯੇਵ ਸੋਤਿ ਦਸ੍ਸੇਤੁਂ ‘‘ਪਚ੍ਚਨੀਯਾਦੀਸੁਪਿ ਪਨਾ’’ਤਿਆਦਿਮਾਹ. ਤਤ੍ਥ ਮੂਲਪਦਨ੍ਤਿ ਆਰਮ੍ਮਣਪਚ੍ਚਯਾਦਿਕਂ ਤਸ੍ਮਿਂ ਤਸ੍ਮਿਂ ਨਯੇ ਮੂਲਭੂਤਂ ਪਦਂ. ਤਤ੍ਥਾਤਿ ਪਚ੍ਚਨੀਯਾਦੀਸੁ. ਏਤਂ ਲਕ੍ਖਣਨ੍ਤਿ ‘‘ਤਤ੍ਰਿਦਂ ਲਕ੍ਖਣ’’ਨ੍ਤਿਆਦਿਨਾ ਵੁਤ੍ਤਲਕ੍ਖਣਂ. ਤਸ੍ਮਾਤਿ ਯਸ੍ਮਾ ਪੁਬ੍ਬੇਨਾਪਰਂ ਪਾਲ਼ਿ ਏਵਮੇਵ ਪਵਤ੍ਤਾ, ਤਸ੍ਮਾ ਏਵ. ਤੇਨ ਮੂਲਪਦਂ ਆਦਿਮ੍ਹਿਯੇਵ ਠਪੇਤ੍ਵਾ ਦੇਸਨਾ ਞਾਯਾਗਤਾਤਿ ਦਸ੍ਸੇਤਿ. ਯਦਿ ਏਵਂ ਲਿਙ੍ਗਨੇਨ ਅਤ੍ਥਵਿਸੇਸਾਵਿਕਰਣਂ ਕਥਨ੍ਤਿ ਆਹ ‘‘ਨ ਚ ਵਿਞ੍ਞਾਤੇ ਅਤ੍ਥੇ ਵਚਨੇਨ ਲਿਙ੍ਗੇਨ ਚ ਪਯੋਜਨਂ ਅਤ੍ਥੀ’’ਤਿ.

ਪਚ੍ਚਯਾਨੁਲੋਮਵਣ੍ਣਨਾ ਨਿਟ੍ਠਿਤਾ.