੬. ਚੀਵਰਸਿਬ੍ਬਾਪਨਸਿਕ੍ਖਾਪਦਵਣ੍ਣਨਾ

੧੭੫. ਛਟ੍ਠੇ ਸਚੇ ਸਾ ਭਿਕ੍ਖੁਨੀ ਤਂ ਚੀਵਰਂ ਆਦਿਤੋਵ ਪਾਰੁਪੇਯ੍ਯ, ਅਞ੍ਞਾ ਭਿਕ੍ਖੁਨਿਯੋ ਦਿਸ੍ਵਾ ਉਜ੍ਝਾਪੇਯ੍ਯੁਂ, ਤਤੋ ਮਹਾਜਨੋ ਪਸ੍ਸਿਤੁਂ ਨ ਲਭਤੀਤਿ ਮਞ੍ਞਮਾਨੋ ‘‘ਯਥਾਸਂਹਟਂ ਹਰਿਤ੍ਵਾ ਨਿਕ੍ਖਿਪਿਤ੍ਵਾ’’ਤਿਆਦਿਮਾਹ.

੧੭੬. ਨੀਹਰਤੀਤਿ ਸਕਿਂ ਨੀਹਰਤਿ. ਯੇਪਿ ਤੇਸਂ ਨਿਸ੍ਸਿਤਕਾਤਿ ਸਮ੍ਬਨ੍ਧੋ. ਕਥਿਨਵਤ੍ਤਨ੍ਤਿ ‘‘ਸਬ੍ਰਹ੍ਮਚਾਰੀਨਂ ਕਾਤੁਂ ਵਟ੍ਟਤੀ’’ਤਿ ਇਤਿਕਤ੍ਤਬ੍ਬਤਾਵਸੇਨ ਸੂਚਿਕਮ੍ਮਕਰਣਂ. ਆਚਰਿਯੁਪਜ੍ਝਾਯਾਨਂ ਦੁਕ੍ਕਟਨ੍ਤਿ ਅਕਪ੍ਪਿਯਸਮਾਦਾਨਵਸੇਨ ਦੁਕ੍ਕਟਂ. ਵਞ੍ਚੇਤ੍ਵਾਤਿ ‘‘ਤਵ ਞਾਤਿਕਾਯਾ’’ਤਿ ਅਵਤ੍ਵਾ ‘‘ਏਕਿਸ੍ਸਾ ਭਿਕ੍ਖੁਨਿਯਾ’’ਤਿ ਏਤ੍ਤਕਮੇਵ ਵਤ੍ਵਾ. ‘‘ਏਕਿਸ੍ਸਾ ਭਿਕ੍ਖੁਨਿਯਾ’’ਤਿ ਸੁਤ੍ਵਾ ਤੇ ਅਞ੍ਞਾਤਿਕਸਞ੍ਞਿਨੋ ਭਵੇਯ੍ਯੁਨ੍ਤਿ ਆਹ ‘‘ਅਕਪ੍ਪਿਯੇ ਨਿਯੋਜਿਤਤ੍ਤਾ’’ਤਿ. ‘‘ਇਦਂ ਤੇ ਮਾਤੁ ਚੀਵਰ’’ਨ੍ਤਿਆਦੀਨਿ ਅਵਤ੍ਵਾਪਿ ‘‘ਇਦਂ ਚੀਵਰਂ ਸਿਬ੍ਬੇਹੀ’’ਤਿ ਸੁਦ੍ਧਚਿਤ੍ਤੇਨ ਸਿਬ੍ਬਾਪੇਨ੍ਤਸ੍ਸਪਿ ਅਨਾਪਤ੍ਤਿ.

੧੭੯. ਉਪਾਹਨਤ੍ਥਵਿਕਾਦਿਨ੍ਤਿ ਆਦਿ-ਸਦ੍ਦੇਨ ਯਂ ਚੀਵਰਂ ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ ਨ ਸਕ੍ਕਾ ਹੋਤਿ, ਤਮ੍ਪਿ ਸਙ੍ਗਣ੍ਹਾਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਸਨ੍ਤਕਤਾ, ਨਿਵਾਸਨਪਾਰੁਪਨੂਪਗਤਾ, ਵੁਤ੍ਤਨਯੇਨ ਸਿਬ੍ਬਨਂ ਵਾ ਸਿਬ੍ਬਾਪਨਂ ਵਾਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

ਚੀਵਰਸਿਬ੍ਬਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.