੭. ਸਂਵਿਦਹਨਸਿਕ੍ਖਾਪਦਵਣ੍ਣਨਾ

੧੮੧. ਸਤ੍ਤਮੇ ‘‘ਪਚ੍ਛਾ ਗਚ੍ਛਨ੍ਤੀਨਂ ਚੋਰਾ ਅਚ੍ਛਿਨ੍ਦਿਂਸੂ’’ਤਿ ਏਤ੍ਥ ‘‘ਪਤ੍ਤਚੀਵਰ’’ਨ੍ਤਿ ਪਾਠਸੇਸੋਤਿ ਆਹ ‘‘ਪਚ੍ਛਾ ਗਚ੍ਛਨ੍ਤੀਨਂ ਪਤ੍ਤਚੀਵਰ’’ਨ੍ਤਿ. ਤਾ ਭਿਕ੍ਖੁਨਿਯੋਤਿ ਪਚ੍ਛਾ ਗਚ੍ਛਨ੍ਤਿਯੋ ਭਿਕ੍ਖੁਨਿਯੋ. ‘‘ਪਚ੍ਛਾ ਗਚ੍ਛਨ੍ਤੀਨ’’ਨ੍ਤਿ ਚ ਵਿਭਤ੍ਤਿਵਿਪਰਿਣਾਮੇਨੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ. ਪਾਲ਼ਿਯਂ ‘‘ਗਚ੍ਛਾਮ ਭਗਿਨਿ, ਗਚ੍ਛਾਮ ਅਯ੍ਯਾ’’ਤਿ ਭਿਕ੍ਖੁਪੁਬ੍ਬਕਂ ਸਂਵਿਧਾਨਂ ਵੁਤ੍ਤਂ, ‘‘ਗਚ੍ਛਾਮ ਅਯ੍ਯ, ਗਚ੍ਛਾਮ ਭਗਿਨੀ’’ਤਿ ਭਿਕ੍ਖੁਨੀਪੁਬ੍ਬਕਂ. ਏਕਦ੍ਧਾਨਮਗ੍ਗਨ੍ਤਿ ਏਕਂ ਅਦ੍ਧਾਨਸਙ੍ਖਾਤਂ ਮਗ੍ਗਂ, ਏਕਤੋ ਵਾ ਅਦ੍ਧਾਨਮਗ੍ਗਂ. ਹਿਯ੍ਯੋਤਿ ਸੁਵੇ. ਪਰੇਤਿ ਤਤਿਯਦਿਵਸੇ.

੧੮੨-੧੮੩. ਦ੍ਵਿਧਾ ਵੁਤ੍ਤਪ੍ਪਕਾਰੋਤਿ ਪਾਦਗਮਨਵਸੇਨ ਪਕ੍ਖਗਮਨਵਸੇਨ ਵਾਤਿ ਦ੍ਵਿਧਾ ਵੁਤ੍ਤਪ੍ਪਭੇਦੋ. ਚਤੁਨ੍ਨਂ ਮਗ੍ਗਾਨਂ ਸਮ੍ਬਨ੍ਧਟ੍ਠਾਨਂ ਚਤੁਕ੍ਕਂ, ਤਿਣ੍ਣਂ ਮਗ੍ਗਾਨਂ ਸਮ੍ਬਨ੍ਧਟ੍ਠਾਨਂ ਸਿਙ੍ਘਾਟਕਂ. ‘‘ਗਾਮਨ੍ਤਰੇ ਗਾਮਨ੍ਤਰੇ’’ਤਿ ਏਤ੍ਥ ਅਞ੍ਞੋ ਗਾਮੋ ਗਾਮਨ੍ਤਰਨ੍ਤਿ ਆਹ ‘‘ਨਿਕ੍ਖਮਨੇ ਅਨਾਪਤ੍ਤਿ…ਪੇ… ਭਿਕ੍ਖੁਨੋ ਪਾਚਿਤ੍ਤਿਯ’’ਨ੍ਤਿ. ‘‘ਸਂਵਿਧਾਯਾ’’ਤਿ ਪਾਲ਼ਿਯਂ ਅਵਿਸੇਸੇਨ ਵੁਤ੍ਤਤ੍ਤਾ ‘‘ਨੇਵ ਪਾਲ਼ਿਯਾ ਸਮੇਤੀ’’ਤਿ ਵੁਤ੍ਤਂ, ‘‘ਏਤ੍ਥਨ੍ਤਰੇ ਸਂਵਿਦਹਿਤੇਪਿ ਭਿਕ੍ਖੁਨੋ ਦੁਕ੍ਕਟ’’ਨ੍ਤਿ ਵੁਤ੍ਤਤ੍ਤਾ ‘‘ਨ ਸੇਸਅਟ੍ਠਕਥਾਯ ਸਮੇਤੀ’’ਤਿ ਵੁਤ੍ਤਂ. ਅਦ੍ਧਯੋਜਨਂ ਅਤਿਕ੍ਕਮਨ੍ਤਸ੍ਸਾਤਿ ਅਸਤਿ ਗਾਮੇ ਅਦ੍ਧਯੋਜਨਂ ਅਤਿਕ੍ਕਮਨ੍ਤਸ੍ਸ. ਯਤ੍ਥ ਹਿ ਅਦ੍ਧਯੋਜਨਬ੍ਭਨ੍ਤਰੇ ਅਞ੍ਞੋ ਗਾਮੋ ਨ ਹੋਤਿ, ਤਂ ਇਧ ਅਗਾਮਕਂ ਅਰਞ੍ਞਨ੍ਤਿ ਅਧਿਪ੍ਪੇਤਂ, ਅਦ੍ਧਯੋਜਨਬ੍ਭਨ੍ਤਰੇ ਪਨ ਗਾਮੇ ਸਤਿ ਗਾਮਨ੍ਤਰਗਣਨਾਯ ਏਵ ਆਪਤ੍ਤਿ.

੧੮੫. ਰਟ੍ਠਭੇਦੇਤਿ ਰਟ੍ਠਵਿਲੋਪੇ. ਚਕ੍ਕਸਮਾਰੁਲ਼੍ਹਾਤਿ ਇਰਿਯਾਪਥਚਕ੍ਕਂ ਸਕਟਚਕ੍ਕਂ ਵਾ ਸਮਾਰੁਲ਼੍ਹਾ. ਸੇਸਂ ਉਤ੍ਤਾਨਮੇਵ. ਦ੍ਵਿਨ੍ਨਮ੍ਪਿ ਸਂਵਿਦਹਿਤ੍ਵਾ ਮਗ੍ਗਪ੍ਪਟਿਪਤ੍ਤਿ, ਅਵਿਸਙ੍ਕੇਤਂ, ਸਮਯਾਭਾਵੋ, ਅਨਾਪਦਾ, ਗਾਮਨ੍ਤਰੋਕ੍ਕਮਨਂ ਵਾ ਅਦ੍ਧਯੋਜਨਾਤਿਕ੍ਕਮੋ ਵਾਤਿ ਇਮਾਨਿ ਪਨੇਤ੍ਥ ਪਞ੍ਚ ਅਙ੍ਗਾਨਿ. ਏਕਤੋਉਪਸਮ੍ਪਨ੍ਨਾਦੀਹਿ ਸਦ੍ਧਿਂ ਗਚ੍ਛਨ੍ਤਸ੍ਸ ਪਨ ਮਾਤੁਗਾਮਸਿਕ੍ਖਾਪਦੇਨ ਆਪਤ੍ਤਿ.

ਸਂਵਿਦਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.