੧੨. ਦੁਬ੍ਬਚਸਿਕ੍ਖਾਪਦਵਣ੍ਣਨਾ

੪੨੪. ਦ੍ਵਾਦਸਮੇ ਵਮ੍ਭਨਵਚਨਨ੍ਤਿ ਗਰਹਵਚਨਂ. ਸਟ-ਸਦ੍ਦੋ ਪਤਿਤਸਦ੍ਦੇਨ ਸਮਾਨਤ੍ਥੋ, ਤਸ੍ਸ ਚ ਵਿਸੇਸਨਸ੍ਸ ਪਰਨਿਪਾਤੋਤਿ ਆਹ ‘‘ਤਤ੍ਥ ਤਤ੍ਥ ਪਤਿਤਂ ਤਿਣਕਟ੍ਠਪਣ੍ਣ’’ਨ੍ਤਿ. ਕੇਨਾਪੀਤਿ ਵਾਤਾਦਿਸਦਿਸੇਨ ਉਪਜ੍ਝਾਯਾਦਿਨਾ.

੪੨੬. ਚਿਤ੍ਤਪਰਿਯੋਨਾਹੋ ਦਲ਼੍ਹਕੋਧੋਵ ਉਪਨਾਹੋ. ਤਤੋਪਿ ਬਲਵਤਰੋ ਦੁਮ੍ਮੋਚਨੀਯੋ ਕੋਧਾਭਿਸਙ੍ਗੋ. ਚੋਦਕਂ ਪਟਿਪ੍ਫਰਣਤਾਤਿ ਚੋਦਕਸ੍ਸ ਪਟਿਵਿਰੁਦ੍ਧੋ ਹੁਤ੍ਵਾ ਅਵਟ੍ਠਾਨਂ. ਚੋਦਕਂ ਅਪਸਾਦਨਾਤਿ ਵਾਚਾਯ ਘਟ੍ਟਨਾ. ਪਚ੍ਚਾਰੋਪਨਾਤਿ ‘‘ਤ੍ਵਮ੍ਪਿ ਸਾਪਤ੍ਤਿਕੋ’’ਤਿ ਚੋਦਕਸ੍ਸ ਆਪਤ੍ਤਿਆਰੋਪਨਾ. ਪਟਿਚਰਣਤਾਤਿ ਪਟਿਚ੍ਛਾਦਨਤਾ. ਅਪਦਾਨੇਨਾਤਿ ਅਤ੍ਤਨੋ ਚਰਿਯਾਯ. ਨ ਸਮ੍ਪਾਯਨਤਾਤਿ ‘‘ਯਂ ਤ੍ਵਂ ਚੋਦਕੋ ਵਦੇਸਿ ‘ਮਯਾ ਏਸ ਆਪਤ੍ਤਿਂ ਆਪਨ੍ਨੋ ਦਿਟ੍ਠੋ’ਤਿ, ਤ੍ਵਂ ਤਸ੍ਮਿਂ ਸਮਯੇ ਕਿਂ ਕਰੋਸਿ, ਅਯਂ ਕਿਂ ਕਰੋਤਿ, ਕਤ੍ਥ ਚ ਤ੍ਵਂ ਅਹੋਸਿ, ਕਤ੍ਥ ਅਯ’’ਨ੍ਤਿਆਦਿਨਾ ਨਯੇਨ ਚਰਿਯਂ ਪੁਟ੍ਠੇਨ ਸਮ੍ਪਾਦੇਤ੍ਵਾ ਅਕਥਨਂ.

‘‘ਯਸ੍ਸ ਸਿਯਾ ਆਪਤ੍ਤੀ’’ਤਿ (ਮਹਾਵ. ੧੩੪) ਇਮਿਨਾ ਨਿਦਾਨਵਚਨੇਨ ਸਬ੍ਬਾਪਿ ਆਪਤ੍ਤਿਯੋ ਸਙ੍ਗਹਿਤਾਤਿ ਆਹ ‘‘ਯਸ੍ਸ ਸਿਯਾ’’ਤਿਆਦਿ. ਅਙ੍ਗਾਨਿ ਚੇਤ੍ਥ ਪਠਮਸਙ੍ਘਭੇਦਸਦਿਸਾਨਿ, ਅਯਂ ਪਨ ਵਿਸੇਸੋ ਯਥਾ ਤਤ੍ਥ ਭੇਦਾਯ ਪਰਕ੍ਕਮਨਂ, ਇਧ ਅਵਚਨੀਯਕਰਣਤਾ ਦਟ੍ਠਬ੍ਬਾ.

ਦੁਬ੍ਬਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.