੧੩. ਕੁਲਦੂਸਕਸਿਕ੍ਖਾਪਦਵਣ੍ਣਨਾ

੪੩੧. ਤੇਰਸਮੇ ਕੀਟਾਗਿਰੀਤਿ ਤਸ੍ਸ ਨਿਗਮਸ੍ਸ ਨਾਮਂ. ਤਞ੍ਹਿ ਸਨ੍ਧਾਯ ਪਰਤੋ ‘‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’’ਨ੍ਤਿ ਵੁਤ੍ਤਂ, ਗਾਮਨਿਗਮਤੋ ਚ ਪਬ੍ਬਾਜਨਂ, ਨ ਜਨਪਦਤੋ. ਤੇਨ ਪਨ ਯੋਗਤੋ ਜਨਪਦੋਪਿ ‘‘ਕੀਟਾਗਿਰਿ’’ਇਚ੍ਚੇਵ ਸਙ੍ਖ੍ਯਂ ਗਤੋਤਿ ਆਹ ‘‘ਏਵਂਨਾਮਕੇ ਜਨਪਦੇ’’ਤਿ.

ਤਤ੍ਰਾਤਿ ਸਾਵਤ੍ਥਿਯਂ. ਧੁਰਟ੍ਠਾਨੇਤਿ ਅਭਿਮੁਖਟ੍ਠਾਨੇ, ਜੇਤਵਨਦ੍ਵਾਰਸਮੀਪੇਤਿ ਅਤ੍ਥੋ. ਦ੍ਵੀਹਿ ਮੇਘੇਹੀਤਿ ਵਸ੍ਸਿਕੇਨ, ਹੇਮਨ੍ਤਿਕੇਨ ਚਾਤਿ ਦ੍ਵੀਹਿ ਮੇਘੇਹਿ. ਗਣਾਚਰਿਯੇਹਿ ਛਹਿ ਅਧਿਕਤਾਯ ‘‘ਸਮਧਿਕ’’ਨ੍ਤਿ ਵੁਤ੍ਤਂ.

ਉਦਕਸ੍ਸਾਤਿ ਅਕਪ੍ਪਿਯਉਦਕਸ੍ਸ ‘‘ਕਪ੍ਪਿਯਉਦਕਸਿਞ੍ਚਨ’’ਨ੍ਤਿ ਵਿਸੁਂ ਵਕ੍ਖਮਾਨਤ੍ਤਾ, ਤਞ੍ਚ ‘‘ਆਰਾਮਾਦਿਅਤ੍ਥਾਯ ਰੁਕ੍ਖਰੋਪਨੇ ਅਕਪ੍ਪਿਯਵੋਹਾਰੇਸੁਪਿ ਕਪ੍ਪਿਯਉਦਕਸਿਞ੍ਚਨਾਦਿ ਵਟ੍ਟਤੀ’’ਤਿ ਵਕ੍ਖਮਾਨਤ੍ਤਾ ਇਧਾਪਿ ਵਿਭਾਗਂ ਕਤ੍ਵਾ ਕਪ੍ਪਿਯਉਦਕਸਿਞ੍ਚਨਾਦਿ ਵਿਸੁਂ ਦਸ੍ਸਿਤਂ. ਯਥਾ ਕੋਟ੍ਟਨਖਣਨਾਦਿਕਾਯਿਕਕਿਰਿਯਾਪਿ ਅਕਪ੍ਪਿਯਵੋਹਾਰੇ ਸਙ੍ਗਹਿਤਾ, ਏਵਂ ਮਾਤਿਕਾਉਜੁਕਰਣਾਦਿਕਪ੍ਪਿਯਵੋਹਾਰੇਪੀਤਿ ਆਹ ‘‘ਸੁਕ੍ਖਮਾਤਿਕਾਯ ਉਜੁਕਰਣ’’ਨ੍ਤਿ. ਏਤ੍ਥ ਪੁਰਾਣਪਣ੍ਣਾਦਿਹਰਣਮ੍ਪਿ ਸਙ੍ਗਯ੍ਹਤਿ. ਮਹਾਪਚ੍ਚਰਿਯਵਾਦੋਵ ਪਮਾਣਤ੍ਤਾ ਪਚ੍ਛਾ ਵੁਤ੍ਤੋ. ਅਕਪ੍ਪਿਯਵੋਹਾਰੇਪਿ ਏਕਚ੍ਚਂ ਵਟ੍ਟਤੀਤਿ ਦਸ੍ਸੇਤੁਂ ‘‘ਨ ਕੇਵਲਞ੍ਚ ਸੇਸ’’ਨ੍ਤਿਆਦਿਮਾਹ. ਯਂਕਿਞ੍ਚਿ ਮਾਤਿਕਨ੍ਤਿ ਸੁਕ੍ਖਂ ਵਾ ਅਸੁਕ੍ਖਂ ਵਾ. ਤਤ੍ਥਾਤਿ ਆਰਾਮਾਦਿਅਤ੍ਥਾਯ ਰੁਕ੍ਖਰੋਪਨੇ. ਤਥਾਤਿ ਕਪ੍ਪਿਯਵੋਹਾਰਪਰਿਯਾਯਾਦੀਹਿ ਗਨ੍ਥਾਪਨਂ ਸਨ੍ਧਾਯ ਵੁਤ੍ਤਂ. ਇਮਿਨਾ ਚ ਕੁਲਸਙ੍ਗਹਤ੍ਥਾਯ ਗਨ੍ਥਾਪਨਾਦਿਪਿ ਨ ਵਟ੍ਟਤੀਤਿ ਦਸ੍ਸੇਤਿ.

ਵਤ੍ਥੁਪੂਜਨਤ੍ਥਾਯ ਸਯਂ ਗਨ੍ਥਨਂ ਕਸ੍ਮਾ ਨ ਵਟ੍ਟਤੀਤਿ ਚੋਦੇਨ੍ਤੋ ‘‘ਨਨੁ ਚਾ’’ਤਿਆਦਿਮਾਹ. ਯਥਾ ਆਰਾਮਾਦਿਅਤ੍ਥਂ ਕਪ੍ਪਿਯਪਥਵਿਯਂ ਸਯਂ ਰੋਪੇਤੁਮ੍ਪਿ ਵਟ੍ਟਤਿ, ਤਥਾ ਵਤ੍ਥੁਪੂਜਨਤ੍ਥਾਯ ਸਯਂ ਗਨ੍ਥਨਮ੍ਪਿ ਕਸ੍ਮਾ ਨ ਵਟ੍ਟਤੀਤਿ ਚੋਦਕਸ੍ਸ ਅਧਿਪ੍ਪਾਯੋ. ਵੁਤ੍ਤਨ੍ਤਿਆਦਿ ਪਰਿਹਾਰੋ. ਅਥ ‘‘ਨ ਪਨ ਮਹਾਅਟ੍ਠਕਥਾਯ’’ਨ੍ਤਿ ਕਸ੍ਮਾ ਵਦਤਿ? ਮਹਾਪਚ੍ਚਰਿਆਦੀਸੁ ਵੁਤ੍ਤਮ੍ਪਿ ਹਿ ਪਮਾਣਮੇਵਾਤਿ ਨਾਯਂ ਵਿਰੋਧੋ, ਮਹਾਅਟ੍ਠਕਥਾਯਂ ਅਵੁਤ੍ਤਸ੍ਸ ਸਯਂ ਰੋਪਨਸ੍ਸ ਤਤ੍ਥੇਵ ਵੁਤ੍ਤੇਨ ਉਦਕਸਿਞ੍ਚਨੇਨ ਸਹ ਸਂਸਨ੍ਦਨਨਯਦਸ੍ਸਨਮੁਖੇਨ ਪਮਾਣਮੇਵਾਤਿ ਪਤਿਟ੍ਠਾਪੇਤੁਂ ਵੁਤ੍ਤਤ੍ਤਾ. ‘‘ਮਞ੍ਞੇਯ੍ਯਾਸੀ’’ਤਿ ਪਦਂ ‘‘ਤਂ ਕਥ’’ਨ੍ਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ. ਤਤ੍ਥਾਯਂ ਅਧਿਪ੍ਪਾਯੋ – ਕਿਞ੍ਚਾਪਿ ਮਹਾਅਟ੍ਠਕਥਾਯਂ ਸਯਂ ਰੋਪਨਂ ਨ ਵੁਤ੍ਤਂ, ਕਪ੍ਪਿਯਉਦਕਸ੍ਸ ਸਯਂ ਆਸਿਞ੍ਚਨਂ ਵੁਤ੍ਤਮੇਵ, ਤਸ੍ਮਾ ਯਥਾ ਆਰਾਮਾਦਿਅਤ੍ਥਾਯ ਕਪ੍ਪਿਯਉਦਕਂ ਸਯਂ ਸਿਞ੍ਚਿਤੁਮ੍ਪਿ ਵਟ੍ਟਤਿ, ਤਥਾ ਵਤ੍ਥੁਪੂਜਨਤ੍ਥਾਯ ਗਨ੍ਥਨਮ੍ਪਿ ਕਸ੍ਮਾ ਨ ਵਟ੍ਟਤੀਤਿ. ਤਮ੍ਪਿ ਨ ਵਿਰੁਜ੍ਝਤੀਤਿ ਯਦੇਤਂ ਵਤ੍ਥੁਪੂਜਨਤ੍ਥਾਯਪਿ ਗਨ੍ਥਨਾਦਿਂ ਪਟਿਕ੍ਖਿਪਿਤ੍ਵਾ ਆਰਾਮਾਦਿਅਤ੍ਥਾਯ ਸਯਂ ਰੋਪਨਸਿਞ੍ਚਨਂ ਵੁਤ੍ਤਂ, ਤਮ੍ਪਿ ਪਾਲ਼ਿਯਾ ਸਂਸਨ੍ਦਨਤੋ ਪੁਬ੍ਬਾਪਰਂ ਨ ਵਿਰੁਜ੍ਝਤਿ.

ਤਂ ਕਥਂ ਨ ਵਿਰੁਜ੍ਝਤੀਤਿ ਆਹ ‘‘ਤਤ੍ਰ ਹੀ’’ਤਿਆਦਿ. ਤਤ੍ਰਾਤਿ ਰੋਪਨਸਿਞ੍ਚਨਵਿਸਯੇ. ਪੁਪ੍ਫਾਦੀਹਿ ਕੁਲਸਙ੍ਗਹਪ੍ਪਸਙ੍ਗੇ ‘‘ਮਾਲਾਵਚ੍ਛ’’ਨ੍ਤਿ ਵਿਸੇਸਿਤਤ੍ਤਾ ਕੁਲਸਙ੍ਗਹਤ੍ਥਮੇਵ ਰੋਪਨਂ ਅਧਿਪ੍ਪੇਤਨ੍ਤਿ ਵਿਞ੍ਞਾਯਤੀਤਿ ਆਹ ‘‘ਮਾਲਾਵਚ੍ਛਨ੍ਤਿ ਵਦਨ੍ਤੋ’’ਤਿਆਦਿ. ਏਤਂ ਵੁਤ੍ਤਨ੍ਤਿ ‘‘ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪੀ’’ਤਿ ਏਤਂ ਵੁਤ੍ਤਂ. ਅਞ੍ਞਤ੍ਰ ਪਨਾਤਿ ਆਰਾਮਾਦਿਅਤ੍ਥਾਯ ਮਾਲਾਵਚ੍ਛਾਦੀਨਂ ਰੋਪਨੇ ਪਨ. ਪਰਿਯਾਯੋਤਿ ਸਯਂਕਰਣਕਾਰਾਪਨਸਙ੍ਖਾਤੋ ਪਰਿਯਾਯੋ ਵੋਹਾਰੋ ਅਤ੍ਥਵਿਸੇਸੋਤਿ ਅਤ੍ਥੋ ਅਤ੍ਥਿ ਉਪਲਬ੍ਭਤਿ, ਕੁਲਸਙ੍ਗਹਤ੍ਥਤ੍ਤਾਭਾਵਾਤਿ ਅਧਿਪ੍ਪਾਯੋ. ਏਵਮੇਤ੍ਥ ਪਰਿਯਾਯਸਦ੍ਦਸ੍ਸ ਕਰਣਕਾਰਾਪਨਵਸੇਨ ਅਤ੍ਥੇ ਗਯ੍ਹਮਾਨੇ ‘‘ਗਨ੍ਥੇਨ੍ਤਿਪਿ ਗਨ੍ਥਾਪੇਨ੍ਤਿਪੀ’’ਤਿ ਪਾਲ਼ਿਯਂ ਪਟਿਕ੍ਖਿਤ੍ਤਗਨ੍ਥਨਗਨ੍ਥਾਪਨਂ ਠਪੇਤ੍ਵਾ ਯਂ ਪਰਤੋ ‘‘ਏਵਂ ਜਾਨ, ਏਵਂ ਕਤੇ ਸੋਭੇਯ੍ਯਾ’’ਤਿਆਦਿਕਪ੍ਪਿਯਵਚਨੇਹਿ ਗਨ੍ਥਾਪਨਂ ਵੁਤ੍ਤਂ, ਤਤ੍ਥ ਦੋਸਾਭਾਵੋ ਸਮਤ੍ਥਿਤੋ ਹੋਤਿ, ‘‘ਗਨ੍ਥੇਹੀ’’ਤਿ ਆਣਤ੍ਤਿਯਾ ਕਾਰਾਪਨਸ੍ਸੇਵ ਗਨ੍ਥਾਪਨਨ੍ਤਿ ਅਧਿਪ੍ਪੇਤਤ੍ਤਾ. ਤਤ੍ਥ ਪਰਿਯਾਯਂ ਇਧ ਚ ਪਰਿਯਾਯਾਭਾਵਂ ਞਤ੍ਵਾਤਿ ਤਤ੍ਥ ‘‘ਮਾਲਾਵਚ੍ਛਂ ਰੋਪੇਨ੍ਤੀ’’ਤਿਆਦੀਸੁ ‘‘ਮਾਲਾਵਚ੍ਛ’’ਨ੍ਤਿ ਕੁਲਸਙ੍ਗਹਤ੍ਥਤਾਸੂਚਨਕਸ੍ਸ ਵਿਸੇਸਨਸ੍ਸ ਸਬ੍ਭਾਵਤੋ ਕਰਣਕਾਰਾਪਨਸਙ੍ਖਾਤਪਰਿਯਾਯਸਬ੍ਭਾਵਂ. ਇਧ ‘‘ਗਨ੍ਥੇਨ੍ਤੀ’’ਤਿਆਦੀਸੁ ਤਥਾਵਿਧਵਿਸੇਸਵਚਨਾਭਾਵਤੋ ਤਸ੍ਸ ਪਰਿਯਾਯਸ੍ਸ ਅਭਾਵਞ੍ਚ ਞਤ੍ਵਾ. ਤਂ ਸੁਵੁਤ੍ਤਮੇਵਾਤਿ ਵੇਦਿਤਬ੍ਬਨ੍ਤਿ ਯੋਜਨਾ.

ਸਬ੍ਬਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ ਅਟ੍ਠਕਥਾਸੁ ਆਗਤਨਯੇਨੇਵ ਰੋਪਨਾਦਿ, ਗਨ੍ਥਾਪਨਾਦਿ ਚ ਸਬ੍ਬਂ ਵੇਦਿਤਬ੍ਬਂ. ਨ ਹੇਤ੍ਥ ਸਨ੍ਦੇਹੋ ਕਾਤਬ੍ਬੋਤਿ ਨਿਗਮੇਤਿ.

ਹਰਣਾਦੀਸੂਤਿ ਵਤ੍ਥੁਪੂਜਨਤ੍ਥਾਯ ਹਰਣਾਦੀਸੁ. ਕੁਲਿਤ੍ਥਿਆਦੀਨਂ ਅਤ੍ਥਾਯ ਹਰਣਤੋਤਿ ਕੁਲਿਤ੍ਥਿਆਦੀਨਂ ਹਰਣਸ੍ਸੇਵ ਵਿਸੇਸੇਤ੍ਵਾ ਪਟਿਕ੍ਖਿਤ੍ਤਤ੍ਤਾਤਿ ਅਧਿਪ੍ਪਾਯੋ. ਤੇਨਾਹ ‘‘ਹਰਣਾਧਿਕਾਰੇ ਹੀ’’ਤਿਆਦਿ. ਮਞ੍ਜਰੀਤਿ ਪੁਪ੍ਫਗੋਚ੍ਛਂ. ਵਟਂਸਕੋਤਿ ਕਣ੍ਣਸ੍ਸ ਉਪਰਿ ਪਿਲ਼ਨ੍ਧਨਤ੍ਥਂ ਕਤਪੁਪ੍ਫਵਿਕਤਿ, ਸੋ ਚ ‘‘ਵਟਂਸੋ’’ਤਿ ਵੁਚ੍ਚਤਿ. ਕਣ੍ਣਿਕਾਤਿ ਬਹੂਨਂ ਪੁਪ੍ਫਾਨਂ ਵਾ ਮਾਲਾਨਂ ਵਾ ਏਕਤੋ ਬਨ੍ਧਿਤਸ੍ਸ ਨਾਮਂ, ‘‘ਕਣ੍ਣਾਭਰਣ’’ਨ੍ਤਿਪਿ ਵਦਨ੍ਤਿ. ਹਾਰਸਦਿਸਨ੍ਤਿ ਮੁਤ੍ਤਾਹਾਰਸਦਿਸਂ.

ਕਪ੍ਪਿਯੇਨਾਤਿ ਕਪ੍ਪਿਯਉਦਕੇਨ. ਤੇਸਂਯੇਵ ਦ੍ਵਿਨ੍ਨਨ੍ਤਿ ਕੁਲਦੂਸਨਪਰਿਭੋਗਾਨਂ ਦ੍ਵਿਨ੍ਨਂ. ਦੁਕ੍ਕਟਨ੍ਤਿ ਕੁਲਸਙ੍ਗਹਤ੍ਥਾਯ ਸਯਂ ਸਿਞ੍ਚਨੇ, ਕਪ੍ਪਿਯਵੋਹਾਰੇਨ ਵਾ ਅਕਪ੍ਪਿਯਵੋਹਾਰੇਨ ਵਾ ਸਿਞ੍ਚਾਪਨੇ ਚ ਦੁਕ੍ਕਟਂ, ਪਰਿਭੋਗਤ੍ਥਾਯ ਪਨ ਸਯਂ ਸਿਞ੍ਚਨੇ, ਅਕਪ੍ਪਿਯਵੋਹਾਰੇਨ ਸਿਞ੍ਚਾਪਨੇ ਚ ਦੁਕ੍ਕਟਂ. ਪਯੋਗਬਹੁਲਤਾਯਾਤਿ ਸਯਂ ਕਰਣੇ, ਕਾਯਪਯੋਗਸ੍ਸ ਕਾਰਾਪਨੇ ਚ ਵਚੀਪਯੋਗਸ੍ਸ ਚ ਬਹੁਤ੍ਤੇਨ.

ਗਨ੍ਥੇਨ ਨਿਬ੍ਬਤ੍ਤਂ ਦਾਮਂ ਗਨ੍ਥਿਮਂ. ਏਸੇਵ ਨਯੋ ਸੇਸੇਸੁਪਿ. ਨ ਵਟ੍ਟਤੀਤਿ ਵਤ੍ਥੁਪੂਜਨਤ੍ਥਾਯਪਿ ਨ ਵਟ੍ਟਤਿ, ਦੁਕ੍ਕਟਨ੍ਤਿ ਅਤ੍ਥੋ. ਵਟ੍ਟਤੀਤਿ ਵਤ੍ਥੁਪੂਜਨਤ੍ਥਾਯ ਵਟ੍ਟਤਿ, ਕੁਲਸਙ੍ਗਹਤ੍ਥਾਯ ਪਨ ਕਪ੍ਪਿਯਵੋਹਾਰੇਨ ਕਾਰਾਪੇਨ੍ਤਸ੍ਸਾਪਿ ਦੁਕ੍ਕਟਮੇਵ.

ਨੀਪਪੁਪ੍ਫਂ ਨਾਮ ਕਦਮ੍ਬਪੁਪ੍ਫਂ. ਪੁਰਿਮਨਯੇਨੇਵਾਤਿ ‘‘ਭਿਕ੍ਖੁਸ੍ਸ ਵਾ’’ਤਿਆਦਿਨਾ ਵੁਤ੍ਤਨਯੇਨ.

ਕਦਲਿਕ੍ਖਨ੍ਧਮ੍ਹੀਤਿਆਦਿਨਾ ਵੁਤ੍ਤਂ ਸਬ੍ਬਮੇਵ ਸਨ੍ਧਾਯ ‘‘ਤਂ ਅਤਿਓਲ਼ਾਰਿਕਮੇਵਾ’’ਤਿ ਵੁਤ੍ਤਂ, ਸਬ੍ਬਤ੍ਥ ਕਰਣੇ, ਅਕਪ੍ਪਿਯਵਚਨੇਨ ਕਾਰਾਪਨੇ ਚ ਦੁਕ੍ਕਟਮੇਵਾਤਿ ਅਤ੍ਥੋ. ‘‘ਪੁਪ੍ਫਵਿਜ੍ਝਨਤ੍ਥਂ ਕਣ੍ਟਕਂ ਬਨ੍ਧਿਤੁਮ੍ਪਿ ਨ ਵਟ੍ਟਤੀ’’ਤਿ ਇਮਸ੍ਸ ਉਪਲਕ੍ਖਣਤ੍ਤਾ ਪੁਪ੍ਫਦਾਮੋਲਮ੍ਬਨਾਦਿਅਤ੍ਥਾਯ ਰਜ੍ਜੁਬਨ੍ਧਨਾਦਿਪਿ ਨ ਵਟ੍ਟਤੀਤਿ ਕੇਚਿ ਵਦਨ੍ਤਿ, ਅਞ੍ਞੇ ਪਨ ‘‘ਪੁਪ੍ਫਵਿਜ੍ਝਨਤ੍ਥਂ ਕਣ੍ਟਕਨ੍ਤਿ ਵਿਸੇਸਿਤਤ੍ਤਾ ਤਦਤ੍ਥਂ ਕਣ੍ਟਕਮੇਵ ਬਨ੍ਧਿਤੁਂ ਨ ਵਟ੍ਟਤਿ, ਤਞ੍ਚ ਅਟ੍ਠਕਥਾਪਮਾਣੇਨਾ’’ਤਿ ਵਦਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਪੁਪ੍ਫਪਟਿਚ੍ਛਕਂ ਨਾਮ ਦਣ੍ਡਾਦੀਹਿ ਕਤਂ ਪੁਪ੍ਫਾਧਾਨਂ, ਏਤਮ੍ਪਿ ਨਾਗਦਨ੍ਤਕਮ੍ਪਿ ਸਛਿਦ੍ਦਕਮੇਵ ਗਹੇਤਬ੍ਬਂ. ਅਸੋਕਪਿਣ੍ਡਿਯਾਤਿ ਅਸੋਕਸਾਖਾਨਂ, ਪੁਪ੍ਫਾਨਂ ਵਾ ਸਮੂਹੇ. ਧਮ੍ਮਰਜ੍ਜੁ ਨਾਮ ਚੇਤਿਯਾਦੀਨਿ ਪਰਿਕ੍ਖਿਪਿਤ੍ਵਾ ਤੇਸਞ੍ਚ ਰਜ੍ਜੁਯਾ ਚ ਅਨ੍ਤਰਾ ਪੁਪ੍ਫਪ੍ਪਵੇਸਨਤ੍ਥਾਯ ਬਨ੍ਧਰਜ੍ਜੁ. ‘‘ਸਿਥਿਲਵਟ੍ਟਿਤਾ ਵਾ ਰਜ੍ਜੁਵਟ੍ਟਿਅਨ੍ਤਰੇ ਪੁਪ੍ਫਪ੍ਪਵੇਸਨਤ੍ਥਾਯ ਏਵਂ ਬਨ੍ਧਾ’’ਤਿਪਿ ਵਦਨ੍ਤਿ.

ਮਤ੍ਥਕਦਾਮਨ੍ਤਿ ਧਮ੍ਮਾਸਨਾਦਿਮਤ੍ਥਕਲਮ੍ਬਕਦਾਮਂ. ਤੇਸਂਯੇਵਾਤਿ ਉਪ੍ਪਲਾਦੀਨਂ ਏਵ. ਵਾਕੇਨ ਵਾ ਦਣ੍ਡਕੇਨ ਵਾਤਿ ਪੁਪ੍ਫਨਾਲ਼ਂ ਫਾਲੇਤ੍ਵਾ ਪੁਪ੍ਫੇਨ ਏਕਾਬਦ੍ਧਂ ਠਿਤਵਾਕੇਨ, ਦਣ੍ਡਕੇਨ ਚ ਏਕਬਨ੍ਧਨੇਨੇਵ, ਏਤੇਨ ਪੁਪ੍ਫਂ ਬੀਜਗਾਮੇ ਸਙ੍ਗਹਂ ਨ ਗਚ੍ਛਤਿ ਪਞ੍ਚਸੁ ਬੀਜੇਸੁ ਅਪ੍ਪਵਿਟ੍ਠਤ੍ਤਾ ਪਣ੍ਣਂ ਵਿਯ, ਤਸ੍ਮਾ ਕਪ੍ਪਿਯਂ ਅਕਾਰਾਪੇਤ੍ਵਾਪਿ ਕੋਪਨੇ ਦੋਸੋ ਨਤ੍ਥਿ. ਯਞ੍ਚ ਛਿਨ੍ਨਸ੍ਸਾਪਿ ਮਕੁਲ਼ਸ੍ਸ ਵਿਕਸਨਂ, ਤਮ੍ਪਿ ਅਤਿਤਰੁਣਸ੍ਸ ਅਭਾਵਾ ਵੁਡ੍ਢਿਲਕ੍ਖਣਂ ਨ ਹੋਤਿ, ਪਰਿਣਤਸ੍ਸ ਪਨ ਮਕੁਲ਼ਸ੍ਸ ਪਤ੍ਤਾਨਂ ਸਿਨੇਹੇ ਪਰਿਯਾਦਾਨਂ ਗਤੇ ਵਿਸੁਂਭਾਵੋ ਏਵ ਵਿਕਾਸੋ, ਤੇਨੇਵ ਛਿਨ੍ਨਮਕੁਲ਼ਵਿਕਾਸੋ ਅਚ੍ਛਿਨ੍ਨਮਕੁਲ਼ਵਿਕਾਸਤੋ ਪਰਿਹੀਨੋ, ਮਿਲਾਤਯੁਤ੍ਤੋ ਵਾ ਦਿਸ੍ਸਤਿ. ਯਞ੍ਚ ਮਿਲਾਤਸ੍ਸ ਉਦਕਸਞ੍ਞੋਗੇ ਅਮਿਲਾਨਤਾਪਜ੍ਜਨਂ, ਤਮ੍ਪਿ ਤਮ੍ਬੁਲਪਣ੍ਣਾਦੀਸੁ ਸਮਾਨਨ੍ਤਿ ਵੁਡ੍ਢਿਲਕ੍ਖਣਂ ਨ ਹੋਤਿ, ਪਾਲ਼ਿਅਟ੍ਠਕਥਾਦੀਸੁ ਚ ਨ ਕਤ੍ਥਚਿ ਪੁਪ੍ਫਾਨਂ ਕਪ੍ਪਿਯਕਰਣਂ ਆਗਤਂ, ਤਸ੍ਮਾ ਪੁਪ੍ਫਂ ਸਬ੍ਬਥਾ ਅਬੀਜਮੇਵਾਤਿ ਵਿਞ੍ਞਾਯਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ‘‘ਪਸਿਬ੍ਬਕੇ ਵਿਯਾ’’ਤਿ ਵੁਤ੍ਤਤ੍ਤਾ ਪੁਪ੍ਫਪਸਿਬ੍ਬਕੇ ਵਾ ਪਸਿਬ੍ਬਕਸਦਿਸਬਨ੍ਧੇ ਵਾ ਯਤ੍ਥ ਕਤ੍ਥਚਿ ਚੀਵਰੇ ਵਾ ਪਕ੍ਖਿਪਿਤੁਂ ਵਟ੍ਟਤੀਤਿ ਸਿਦ੍ਧਂ. ਬਨ੍ਧਿਤੁਂ ਨ ਵਟ੍ਟਤੀਤਿ ਰਜ੍ਜੁਆਦੀਹਿ ਬਨ੍ਧਨਂ ਸਨ੍ਧਾਯ ਵੁਤ੍ਤਂ, ਪੁਪ੍ਫਸ੍ਸੇਵ ਪਨ ਅਚ੍ਛਿਨ੍ਨਦਣ੍ਡਵਾਕੇਹਿ ਬਨ੍ਧਿਤੁਂ ਵਟ੍ਟਤਿ ਏਵ.

ਪੁਪ੍ਫਪਟੇ ਚ ਦਟ੍ਠਬ੍ਬਨ੍ਤਿ ਪੁਪ੍ਫਪਟਂ ਕਰੋਨ੍ਤਸ੍ਸ ਦੀਘਤੋ ਪੁਪ੍ਫਦਾਮਸ੍ਸ ਹਰਣਪਚ੍ਚਾਹਰਣਵਸੇਨ ਪੂਰਣਂ ਸਨ੍ਧਾਯ ਵੁਤ੍ਤਂ, ਤਿਰਿਯਤੋ ਹਰਣਂ ਪਨ ਵਾਯਿਮਂ ਨਾਮ ਹੋਤਿ, ਨ ਪੂਰਿਮਂ. ‘‘ਪੁਰਿਮਟ੍ਠਾਨਂ ਅਤਿਕ੍ਕਾਮੇਤੀ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਪੁਰਿਮਂ ਪੁਪ੍ਫਕੋਟਿਂ ਫੁਸਾਪੇਤ੍ਵਾ ਵਾ ਅਫੁਸਾਪੇਤ੍ਵਾ ਵਾ ਪਰਿਕ੍ਖਿਪਨਵਸੇਨ ਪਨ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿਯੇਵ. ਬਨ੍ਧਿਤੁਂ ਵਟ੍ਟਤੀਤਿ ਪੁਪ੍ਫਰਹਿਤਾਯ ਸੁਤ੍ਤਵਾਕਕੋਟਿਯਾ ਬਨ੍ਧਿਤੁਂ ਵਟ੍ਟਤਿ. ‘‘ਏਕਵਾਰਂ ਹਰਿਤ੍ਵਾ ਵਾ ਪਰਿਕ੍ਖਿਪਿਤ੍ਵਾ ਵਾ’’ਤਿ ਇਦਂ ਪੁਬ੍ਬੇ ਵੁਤ੍ਤਚੇਤਿਯਾਦਿਪਰਿਕ੍ਖੇਪਂ, ਪੁਪ੍ਫਪਟਕਰਣਞ੍ਚ ਸਨ੍ਧਾਯ ਵੁਤ੍ਤਂ.

ਪਰੇਹਿ ਪੂਰਿਤਨ੍ਤਿ ਦੀਘਤੋ ਪਸਾਰਿਤਂ. ਵਾਯਿਤੁਨ੍ਤਿ ਤਿਰਿਯਤੋ ਹਰਿਤੁਂ, ਤਂ ਪਨ ਏਕਵਾਰਮ੍ਪਿ ਨ ਲਬ੍ਭਤਿ. ਪੁਪ੍ਫਾਨਿ ਠਪੇਨ੍ਤੇਨਾਤਿ ਅਗਨ੍ਥਿਤਪੁਪ੍ਫਾਨਿ ਅਞ੍ਞਮਞ੍ਞਂ ਫੁਸਾਪੇਤ੍ਵਾਪਿ ਠਪੇਨ੍ਤੇਨ. ਘਟਿਕਦਾਮਓਲਮ੍ਬਕੋਤਿ ਹੇਟ੍ਠਾਭਾਗੇ ਘਟਿਕਾਕਾਰਯੁਤ੍ਤੋ, ਦਾਰੁਘਟਿਕਾਕਾਰੋ ਵਾ ਓਲਮ੍ਬਕੋ. ਸੁਤ੍ਤਮਯਂ ਗੇਣ੍ਡੁਕਂ ਨਾਮ. ਸਬ੍ਬਤ੍ਥਾਤਿ ਗਨ੍ਥਿਮਾਦੀਸੁ ਸਬ੍ਬਤ੍ਥ.

ਰੇਚਕਨ੍ਤਿ ਅਭਿਨਯਂ, ‘‘ਏਵਂ ਨਚ੍ਚਾਹੀ’’ਤਿ ਨਟਨਾਕਾਰਦਸ੍ਸਨਨ੍ਤਿ ਅਤ੍ਥੋ, ‘‘ਚਕ੍ਕਂ ਵਿਯ ਅਤ੍ਤਾਨਂ ਭਮਾਪਨ’’ਨ੍ਤਿਪਿ ਕੇਚਿ. ਆਕਾਸੇਯੇਵ ਕੀਲ਼ਨ੍ਤੀਤਿ ‘‘ਅਯਂ ਸਾਰੀ ਅਸੁਕਪਦਂ ਮਯਾ ਨੀਤਾ’’ਤਿ ਏਵਂ ਮੁਖੇਨੇਵ ਉਭੋਪਿ ਵਦਨ੍ਤਾ ਕੀਲ਼ਨ੍ਤਿ. ਜੂਤਫਲਕੇਤਿ ਜੂਤਮਣ੍ਡਲੇ. ਪਾਸਕਕੀਲ਼ਾਯਾਤਿ ਦ੍ਵਿਨ੍ਨਂ ਤਿਵਙ੍ਗੁਲਪ੍ਪਮਾਣਾਨਂ ਦਾਰੁਦਨ੍ਤਾਦਿਮਯਾਨਂ ਪਾਸਕਾਨਂ ਚਤੂਸੁ ਪਸ੍ਸੇਸੁ ਏਕਕਾਦਿਵਸੇਨ ਬਿਨ੍ਦੂਨਿ ਕਤ੍ਵਾ ਫਲਕੇ ਖਿਪਿਤ੍ਵਾ ਉਪਰਿਭਾਗੇ ਦਿਟ੍ਠਬਿਨ੍ਦੂਨਂ ਵਸੇਨ ਸਾਰਿਯੋ ਅਪਨੇਤ੍ਵਾ ਕੀਲ਼ਨਕਜੂਤਕੀਲ਼ਾਯ.

ਮਞ੍ਜਟ੍ਠਿ ਨਾਮ ਮਞ੍ਜਟ੍ਠਰੁਕ੍ਖਸਾਰਕਸਾਵਂ. ਸਲਾਕਹਤ੍ਥਨ੍ਤਿ ਨਾਲ਼ਿਕੇਰਹੀਰਾਦੀਨਂ ਕਲਾਪਸ੍ਸੇਤਂ ਨਾਮਂ. ਪਾਲ਼ਿਯਂ ਥਰੁਸ੍ਮਿਨ੍ਤਿ ਖਗ੍ਗੇ. ਉਸ੍ਸੇਲ਼ੇਨ੍ਤੀਤਿ ਮੁਖੇਨ ਉਸ੍ਸੇਲ਼ਨਸਦ੍ਦਂ ਪਮੁਞ੍ਚਨ੍ਤਿ, ਮਹਨ੍ਤਂ ਅਬ੍ਯਤ੍ਤਸਦ੍ਦਂ ਪਵਤ੍ਤੇਨ੍ਤੀਤਿ ਅਤ੍ਥੋ. ਅਪ੍ਫੋਟੇਨ੍ਤੀਤਿ ਦ੍ਵਿਗੁਣਿਤਵਾਮਹਤ੍ਥੇ ਦਕ੍ਖਿਣਹਤ੍ਥੇਨ ਤਾਲ਼ੇਤ੍ਵਾ ਸਦ੍ਦਂ ਕਰੋਨ੍ਤਿ. ਮੁਖਡਿਣ੍ਡਿਮਨ੍ਤਿ ਮੁਖਭੇਰੀ.

੪੩੨. ਤੇਸਨ੍ਤਿ ਸਮਾਸੇ ਗੁਣੀਭੂਤਾਨਿ ਪਬ੍ਬਾਨਿਪਿ ਪਰਾਮਸਤਿ. ਬੋਨ੍ਦੋਤਿ ਲੋਲੋ, ਮਨ੍ਦਧਾਤੁਕੋਤਿ ਅਤ੍ਥੋ. ਭਕੁਟਿਂ ਕਤ੍ਵਾਤਿ ਭਮੁਕਭੇਦਂ ਕਤ੍ਵਾ. ਨੇਲਾਤਿ ਨਿਦ੍ਦੋਸਾ.

੪੩੩. ਪਾਲ਼ਿਯਂ ‘‘ਸਾਰਿਪੁਤ੍ਤਾ’’ਤਿ ਇਦਂ ਏਕਸੇਸਨਯੇਨ ਸਾਰਿਪੁਤ੍ਤਮੋਗ੍ਗਲ੍ਲਾਨਾਨਂ ਉਭਿਨ੍ਨਂ ਆਲਪਨਂ, ਤੇਨੇਵ ਬਹੁਵਚਨਨਿਦ੍ਦੇਸੋ ਕਤੋ.

੪੩੫. ਅਟ੍ਠਾਰਸ ਵਤ੍ਤਾਨੀਤਿ ‘‘ਨ ਉਪਸਮ੍ਪਾਦੇਤਬ੍ਬ’’ਨ੍ਤਿਆਦੀਨਿ ‘‘ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ ਪਰਿਯੋਸਾਨਾਨਿ ਕਮ੍ਮਕ੍ਖਨ੍ਧਕੇ (ਚੂਲ਼ਵ. ੭) ਆਗਤਾਨਿ ਅਟ੍ਠਾਰਸ ਵਤ੍ਤਾਨਿ. ਨ ਪਨ੍ਨਲੋਮਾਤਿ ਨ ਪਤਿਤਮਾਨਲੋਮਾ, ਅਨਨੁਕੂਲਵਤ੍ਤਿਨੋਤਿ ਅਤ੍ਥੋ.

੪੩੭. ਪਰਸਨ੍ਤਕਂ ਦੇਤਿ ਦੁਕ੍ਕਟਮੇਵਾਤਿ ਵਿਸ੍ਸਾਸਗਾਹੇਨ ਦਾਨਂ ਸਨ੍ਧਾਯ ਵੁਤ੍ਤਂ. ਥੁਲ੍ਲਚ੍ਚਯਨ੍ਤਿ ਏਤ੍ਥ ਭਣ੍ਡਦੇਯ੍ਯਮ੍ਪਿ ਹੋਤਿ ਏਵ.

ਤਞ੍ਚ ਖੋ ਵਤ੍ਥੁਪੂਜਨਤ੍ਥਾਯਾਤਿ ਮਾਤਾਪਿਤੂਨਮ੍ਪਿ ਪੁਪ੍ਫਂ ਦੇਨ੍ਤੇਨ ਵਤ੍ਥੁਪੂਜਨਤ੍ਥਾਯੇਵ ਦਾਤਬ੍ਬਨ੍ਤਿ ਦਸ੍ਸੇਤਿ. ਮਣ੍ਡਨਤ੍ਥਾਯ ਪਨ ਸਿਵਲਿਙ੍ਗਾਦਿਪੂਜਨਤ੍ਥਾਯਾਤਿ ਏਤ੍ਤਕਮੇਵ ਵੁਤ੍ਤਤ੍ਤਾ ‘‘ਇਮਂ ਵਿਕ੍ਕਿਣਿਤ੍ਵਾ ਜੀਵਿਸ੍ਸਨ੍ਤੀ’’ਤਿ ਮਾਤਾਪਿਤੂਨਂ ਦਾਤੁਂ ਵਟ੍ਟਤਿ, ਸੇਸਞਾਤੀਨਂ ਪਨ ਤਾਵਕਾਲਿਕਮੇਵ ਦਾਤੁਂ ਵਟ੍ਟਤਿ. ਞਾਤਿਸਾਮਣੇਰੇਹੇਵਾਤਿ ਤੇਸਂ ਗਿਹਿਕਮ੍ਮਪਰਿਮੋਚਨਤ੍ਥਂ ਵੁਤ੍ਤਂ. ਇਤਰੇਤਿ ਅਞ੍ਞਾਤਕਾ, ਤੇਹਿਪਿ ਸਾਮਣੇਰੇਹਿ ਆਚਰਿਯੁਪਜ੍ਝਾਯਾਨਂ ਵਤ੍ਤਸੀਸੇਨ ਹਰਿਤਬ੍ਬਂ. ਚੂਲ਼ਕਨ੍ਤਿ ਉਪਡ੍ਢਭਾਗਤੋਪਿ ਉਪਡ੍ਢਂ.

ਸਾਮਣੇਰਾ…ਪੇ… ਠਪੇਨ੍ਤੀਤਿ ਅਰਕ੍ਖਿਤਾਗੋਪਿਤਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਤਤ੍ਥਾਤਿ ਮਗ੍ਗੇ ਵਾ ਚੇਤਿਯਙ੍ਗਣੇ ਵਾ. ‘‘ਸਾਮਣੇਰੇਹਿ ਦਾਪੇਤੁਂ ਨ ਲਭਨ੍ਤੀ’’ਤਿ ਇਦਂ ਸਾਮਣੇਰੇਹਿ ਗਿਹੀਨਂ ਕਮ੍ਮਂ ਕਾਰਿਤਂ ਵਿਯ ਹੋਤੀਤਿ ਵੁਤ੍ਤਂ, ਨ ਪਨ ਪੁਪ੍ਫਦਾਨਂ ਹੋਤੀਤਿ ਸਾਮਣੇਰਾਨਮ੍ਪਿ ਨ ਵਟ੍ਟਨਤੋ. ਵੁਤ੍ਤਞ੍ਚ ‘‘ਸਯਮੇਵਾ’’ਤਿਆਦਿ. ‘‘ਅਵਿਸੇਸੇਨ ਵੁਤ੍ਤ’’ਨ੍ਤਿ ਇਮਿਨਾ ਸਬ੍ਬੇਸਮ੍ਪਿ ਨ ਵਟ੍ਟਤੀਤਿ ਦਸ੍ਸੇਤਿ.

ਖੀਣਪਰਿਬ੍ਬਯਾਨਨ੍ਤਿ ਆਗਨ੍ਤੁਕੇ ਸਨ੍ਧਾਯ ਵੁਤ੍ਤਂ. ਪਰਿਚ੍ਛਿਨ੍ਨੇਸੁਪਿ ਰੁਕ੍ਖੇਸੁ ‘‘ਇਧ ਫਲਾਨਿ ਸੁਨ੍ਦਰਾਨੀ’’ਤਿਆਦਿਂ ਵਦਨ੍ਤੇਨ ਕੁਲਸਙ੍ਗਹੋ ਕਤੋ ਨਾਮ ਹੋਤੀਤਿ ਆਹ ‘‘ਏਵਂ ਪਨ ਨ ਵਤ੍ਤਬ੍ਬ’’ਨ੍ਤਿ.

ਰੁਕ੍ਖਚ੍ਛਲ੍ਲੀਤਿ ਰੁਕ੍ਖਤ੍ਤਚੋ. ਅਭਾਜਨੀਯਤ੍ਤਾ ਗਰੁਭਣ੍ਡਂ ਵੁਤ੍ਤਂ. ਵੁਤ੍ਤਨਯੇਨਾਤਿ ਪਣ੍ਣਦਾਨਮ੍ਪਿ ਪੁਪ੍ਫਫਲਾਦੀਸੁ ਵੁਤ੍ਤਨਯੇਨ ਕੁਲਸਙ੍ਗਹੋ ਹੋਤੀਤਿ ਦਸ੍ਸੇਤਿ.

ਪੁਬ੍ਬੇ ਵੁਤ੍ਤਪ੍ਪਕਾਰਨ੍ਤਿ ਮਮ ਵਚਨੇਨ ਭਗਵਤੋ ਪਾਦੇ ਵਨ੍ਦਥਾਤਿਆਦਿਨਾ ਵੁਤ੍ਤਪ੍ਪਕਾਰਸਿਕ੍ਖਾਪਦੇ ਪਠਮਂ ਵੁਤ੍ਤਂ. ‘‘ਪਕ੍ਕਮਤਾਯਸ੍ਮਾ’’ਤਿ ਇਦਂ ਪਬ੍ਬਾਜਨੀਯਕਮ੍ਮਵਸੇਨ ਵੁਤ੍ਤਂ. ਪੁਨ ‘‘ਪਕ੍ਕਮਤਾਯਸ੍ਮਾ’’ਤਿ ਇਦਮ੍ਪਿ ਪਬ੍ਬਾਜਨੀਯਕਮ੍ਮਕਤਸ੍ਸ ਵਤ੍ਤਵਸੇਨ ਵੁਤ੍ਤਂ. ਏਤ੍ਥ ਚ ਅਸ੍ਸਜਿਪੁਨਬ੍ਬਸੁਕੇਹਿ ਆਚਰਿਯੇਸੁ ਅਨੇਕਵਿਧੇਸੁ ਅਨਾਚਾਰੇਸੁ ਪਞ੍ਞਪੇਤਬ੍ਬਾ ਆਪਤ੍ਤਿਯੋ ਸਿਕ੍ਖਾਪਦਨ੍ਤਰੇਸੁ ਪਞ੍ਞਤ੍ਤਾ ਏਵਾਤਿ ਤਾ ਇਧ ਅਪਞ੍ਞਪੇਤ੍ਵਾ ਕੁਲਦੂਸਕਾਨਂ ਪਬ੍ਬਾਜਨੀਯਕਮ੍ਮਵਸੇਨ ਨਿਗ੍ਗਹਂ ਕਾਤੁਂ ਤਤ੍ਥੇਵ ਸਮ੍ਮਾ ਅਵਤ੍ਤਿਤ੍ਵਾ ਕਾਰਕਸਙ੍ਘਂ ਛਨ੍ਦਗਾਮਿਤਾਦੀਹਿ ਪਾਪੇਨ੍ਤਾਨਂ ਸਮਨੁਭਾਸਨਾਯ ਸਙ੍ਘਾਦਿਸੇਸਂ ਆਰੋਪਿਤਞ੍ਚ ਇਦਂ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਵੇਦਿਤਬ੍ਬਂ. ਪਠਮਸਙ੍ਘਭੇਦਸਦਿਸਾਨੇਵਾਤਿ ਏਤ੍ਥ ਅਙ੍ਗੇਸੁਪਿ ਯਥਾ ਤਤ੍ਥ ਪਰਕ੍ਕਮਨਂ, ਏਵਮਿਧ ਛਨ੍ਦਾਦੀਹਿ ਪਾਪਨਂ ਦਟ੍ਠਬ੍ਬਂ. ਸੇਸਂ ਤਾਦਿਸਮੇਵਾਤਿ.

ਕੁਲਦੂਸਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਗਮਨਵਣ੍ਣਨਾ

੪੪੨. ਇਤਰੇ ਪਨ ਯਾਵਤਤਿਯਕਾਤਿ ਵੇਦਿਤਬ੍ਬਾਤਿ ਸਮ੍ਬਨ੍ਧੋ. ਯੋ ਹਿ ਜਰੋ ਏਕਸ੍ਮਿਂ ਦਿਵਸੇ ਆਗਨ੍ਤ੍ਵਾਪਿ ਗਤੋ ਅਨਨ੍ਤਰੇਸੁ ਦ੍ਵੀਸੁ ਦਿਵਸੇਸੁ ਅਨੁਪ੍ਪਜ੍ਜਿਤ੍ਵਾ ਤਤਿਯੇ ਦਿਵਸੇ ਉਪ੍ਪਜ੍ਜਤਿ, ਸੋ ਤਤਿਯਕੋ. ਯੋ ਪਨ ਤਤਿਯੇਪਿ ਅਨੁਪ੍ਪਜ੍ਜਿਤ੍ਵਾ ਚਤੁਤ੍ਥੇ ਏਵ ਦਿਵਸੇ ਉਪ੍ਪਜ੍ਜਤਿ, ਸੋ ਚਤੁਤ੍ਥਕੋ ਚਾਤਿ ਵੁਚ੍ਚਤਿ. ਤਂ ਸਨ੍ਧਾਯਾਹ ‘‘ਯਥਾ ਤਤਿਯੇ’’ਤਿਆਦਿ. ‘‘ਅਕਾਮੇਨ ਅਵਸੇਨਾ’’ਤਿ ਇਮਿਨਾ ਅਪ੍ਪਟਿਕਮ੍ਮਕਰਣਂ ਨਾਮ ਯਸ੍ਮਾ ਅਲਜ੍ਜਿਲਕ੍ਖਣਂ, ਸਗ੍ਗਮੋਕ੍ਖਾਵਰਣਞ੍ਚ, ਤਸ੍ਮਾ ਆਪਨ੍ਨੋ ਪੁਗ੍ਗਲੋ ‘‘ਪਚ੍ਛਾ ਪਰਿਵਸਿਸ੍ਸਾਮੀ’’ਤਿ ਵਿਕ੍ਖਿਪਿਤੁਂ ਨ ਲਭਤਿ, ਸਙ੍ਘੇਨ ਚ ਅਨਿਚ੍ਛਨ੍ਤਸ੍ਸੇਵ ਪਰਿਵਾਸੋ ਦਾਤਬ੍ਬੋਤਿ ਦਸ੍ਸੇਤਿ. ਪਾਲ਼ਿਯਂ ਚਿਣ੍ਣਮਾਨਤ੍ਤੋ ਭਿਕ੍ਖੁ…ਪੇ… ਅਬ੍ਭੇਤਬ੍ਬੋਤਿ ਏਤ੍ਥ ਯੋ ਭਿਕ੍ਖੁ ਚਿਣ੍ਣਮਾਨਤ੍ਤੋ, ਸੋ ਭਿਕ੍ਖੁ ਅਬ੍ਭੇਤਬ੍ਬੋਤਿ ਏਵਂ ਭਿਕ੍ਖੁਸਦ੍ਦਦ੍ਵਯਸ੍ਸ ਯੋਜਨਾ ਵੇਦਿਤਬ੍ਬਾ. ਤੇ ਚ ਭਿਕ੍ਖੂ ਗਾਰਯ੍ਹਾਤਿ ਊਨਭਾਵਂ ਞਤ੍ਵਾ ਅਬ੍ਭੇਨ੍ਤਿ, ਦੁਕ੍ਕਟਾਪਜ੍ਜਨੇਨ ਗਰਹਿਤਬ੍ਬਾ. ਸਾਮੀਚੀਤਿ ਵਤ੍ਤਂ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਤੇਰਸਕਵਣ੍ਣਨਾਨਯੋ ਨਿਟ੍ਠਿਤੋ.