ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਵਿਨਯਪਿਟਕੇ

ਵਿਮਤਿਵਿਨੋਦਨੀ-ਟੀਕਾ (ਪਠਮੋ ਭਾਗੋ)

ਗਨ੍ਥਾਰਮ੍ਭਕਥਾ

ਕਰੁਣਾਪੁਣ੍ਣਹਦਯਂ, ਸੁਗਤਂ ਹਿਤਦਾਯਕਂ;

ਨਤ੍ਵਾ ਧਮ੍ਮਞ੍ਚ ਵਿਮਲਂ, ਸਙ੍ਘਞ੍ਚ ਗੁਣਸਮ੍ਪਦਂ.

ਵਣ੍ਣਨਾ ਨਿਪੁਣਾਹੇਸੁਂ, ਵਿਨਯਟ੍ਠਕਥਾਯ ਯਾ;

ਪੁਬ੍ਬਕੇਹਿ ਕਤਾ ਨੇਕਾ, ਨਾਨਾਨਯਸਮਾਕੁਲਾ.

ਤਤ੍ਥ ਕਾਚਿ ਸੁਵਿਤ੍ਥਿਣ੍ਣਾ, ਦੁਕ੍ਖੋਗਾਹਾ ਚ ਗਨ੍ਥਤੋ;

ਵਿਰਦ੍ਧਾ ਅਤ੍ਥਤੋ ਚਾਪਿ, ਸਦ੍ਦਤੋ ਚਾਪਿ ਕਤ੍ਥਚਿ.

ਕਾਚਿ ਕਤ੍ਥਚਿ ਅਪੁਣ੍ਣਾ, ਕਾਚਿ ਸਮ੍ਮੋਹਕਾਰਿਨੀ;

ਤਸ੍ਮਾ ਤਾਹਿ ਸਮਾਦਾਯ, ਸਾਰਂ ਸਙ੍ਖੇਪਰੂਪਤੋ.

ਲੀਨਤ੍ਥਞ੍ਚ ਪਕਾਸੇਨ੍ਤੋ, ਵਿਰਦ੍ਧਞ੍ਚ ਵਿਸੋਧਯਂ;

ਉਪਟ੍ਠਿਤਨਯਞ੍ਚਾਪਿ, ਤਤ੍ਥ ਤਤ੍ਥ ਪਕਾਸਯਂ.

ਵਿਨਯੇ ਵਿਮਤਿਂ ਛੇਤੁਂ, ਭਿਕ੍ਖੂਨਂ ਲਹੁਵੁਤ੍ਤਿਨਂ;

ਸਙ੍ਖੇਪੇਨ ਲਿਖਿਸ੍ਸਾਮਿ, ਤਸ੍ਸਾ ਲੀਨਤ੍ਥਵਣ੍ਣਨਂ.

ਗਨ੍ਥਾਰਮ੍ਭਕਥਾਵਣ੍ਣਨਾ

ਵਿਨਯਸਂਵਣ੍ਣਨਾਰਮ੍ਭੇ ਰਤਨਤ੍ਤਯਂ ਨਮਸ੍ਸਿਤੁਕਾਮੋ ਤਸ੍ਸ ਵਿਸਿਟ੍ਠਗੁਣਯੋਗਸਨ੍ਦਸ੍ਸਨਤ੍ਥਂ ਯੋ ਕਪ੍ਪਕੋਟੀਹਿਪੀਤਿਆਦਿਮਾਹ. ਵਿਸਿਟ੍ਠਗੁਣਯੋਗੇਨ ਹਿ ਵਨ੍ਦਨਾਰਹਭਾਵੋ, ਵਨ੍ਦਨਾਰਹੇ ਚ ਕਤਾ ਵਨ੍ਦਨਾ ਯਥਾਧਿਪ੍ਪੇਤਮਤ੍ਥਂ ਸਾਧੇਤਿ. ਏਤ੍ਥ ਚ ਸਂਵਣ੍ਣਨਾਰਮ੍ਭੇ ਰਤਨਤ੍ਤਯਪਣਾਮਕਰਣਪ੍ਪਯੋਜਨਂ ਤਤ੍ਥ ਤਤ੍ਥ ਬਹੁਧਾ ਪਪਞ੍ਚੇਨ੍ਤਿ ਆਚਰਿਯਾ, ਮਯਂ ਪਨ ਇਧਾਧਿਪ੍ਪੇਤਮੇਵ ਪਯੋਜਨਂ ਦਸ੍ਸਯਿਸ੍ਸਾਮ. ਤਸ੍ਮਾ ਸਂਵਣ੍ਣਨਾਰਮ੍ਭੇ ਰਤਨਤ੍ਤਯਪਣਾਮਕਰਣਂ ਯਥਾਪਟਿਞ੍ਞਾਤਸਂਵਣ੍ਣਨਾਯ ਅਨਨ੍ਤਰਾਯੇਨ ਪਰਿਸਮਾਪਨਤ੍ਥਨ੍ਤਿ ਵੇਦਿਤਬ੍ਬਂ. ਤਥਾ ਹਿ ਵੁਤ੍ਤਂ ‘‘ਤਸ੍ਸਾਨੁਭਾਵੇਨ ਹਤਨ੍ਤਰਾਯੋ’’ਤਿ. ਰਤਨਤ੍ਤਯਪਣਾਮਕਰਣੇਨ ਹਿ ਰਾਗਾਦਿਦੋਸਵਿਗਮਤੋ ਪਞ੍ਞਾਦਿਗੁਣਪਾਟਵਤੋ ਆਯੁਆਦਿਵਡ੍ਢਨਤੋ ਪੁਞ੍ਞਾਤਿਸਯਭਾਵਾਦਿਤੋ ਚ ਹੋਤੇਵ ਯਥਾਪਟਿਞ੍ਞਾਤਸਂਵਣ੍ਣਨਾਯ ਅਨਨ੍ਤਰਾਯੇਨ ਪਰਿਸਮਾਪਨਂ.

ਤਤ੍ਥ ਪਠਮਂ ਤਾਵ ਭਗਵਤੋ ਵਨ੍ਦਨਂ ਕਤ੍ਤੁਕਾਮੋ ‘‘ਯੋ ਕਪ੍ਪਕੋਟੀਹਿਪਿ…ਪੇ… ਤਸ੍ਸਾ’’ਤਿ ਆਹ. ਇਮਿਸ੍ਸਾ ਪਨ ਵਿਨਯਦੇਸਨਾਯ ਕਰੁਣਾਪ੍ਪਧਾਨਞਾਣਸਮੁਟ੍ਠਿਤਤਾਯ ਕਰੁਣਾਪ੍ਪਧਾਨਮੇਵ ਥੋਮਨਂ ਆਰਦ੍ਧਂ. ਏਸਾ ਹਿ ਆਚਰਿਯਸ੍ਸ ਪਕਤਿ, ਯਦਿਦਂ ਆਰਮ੍ਭਾਨੁਰੂਪਥੋਮਨਾ. ਕਰੁਣਾਗ੍ਗਹਣੇਨ ਚੇਤ੍ਥ ਅਪਰਿਮੇਯ੍ਯਪ੍ਪਭਾਵਾ ਸਬ੍ਬੇਪਿ ਬੁਦ੍ਧਗੁਣਾ ਨਯਤੋ ਸਙ੍ਗਹਿਤਾਤਿ ਦਟ੍ਠਬ੍ਬਾ ਤਂਮੂਲਕਤ੍ਤਾ ਸੇਸਬੁਦ੍ਧਗੁਣਾਨਂ. ਤਤ੍ਥ ਯੋਤਿ ਇਮਸ੍ਸ ਅਨਿਯਮਵਚਨਸ੍ਸ ਨਾਥੋਤਿ ਇਮਿਨਾ ਸਮ੍ਬਨ੍ਧੋ. ਕਪ੍ਪਕੋਟੀਹਿਪਿ ਅਪ੍ਪਮੇਯ੍ਯਂ ਕਾਲਨ੍ਤਿ ਕਪ੍ਪਕੋਟਿਗਣਨਾਵਸੇਨਪਿ ‘‘ਏਤ੍ਤਕਾ ਕਪ੍ਪਕੋਟਿਯੋ’’ਤਿ ਪਮੇਤੁਂ ਅਸਕ੍ਕੁਣੇਯ੍ਯਂ ਕਾਲਂ. ਅਪਿ-ਸਦ੍ਦੇਨ ਪਗੇਵ ਵਸ੍ਸਗਣਨਾਯਾਤਿ ਦਸ੍ਸੇਤਿ. ਅਪ੍ਪਮੇਯ੍ਯਂ ਕਾਲਨ੍ਤਿ ਚ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਤੇਨ ਕਪ੍ਪਕੋਟਿਗਣਨਾਵਸੇਨ ਪਰਿਚ੍ਛਿਨ੍ਦਿਤੁਮਸਕ੍ਕੁਣੇਯ੍ਯਮਪਿ, ਅਸਙ੍ਖ੍ਯੇਯ੍ਯਵਸੇਨ ਪਨ ਪਰਿਚ੍ਛਿਨ੍ਦਿਤਬ੍ਬਤੋ ਸਲਕ੍ਖਂ ਚਤੁਰਸਙ੍ਖ੍ਯੇਯ੍ਯਕਪ੍ਪਕਾਲਂ ਅਚ੍ਚਨ੍ਤਮੇਵ ਨਿਰਨ੍ਤਰਂ ਪਞ੍ਚਮਹਾਪਅਚ੍ਚਾਗਾਦਿਅਤਿਦੁਕ੍ਕਰਾਨਿ ਕਰੋਨ੍ਤੋ ਖੇਦਂ ਕਾਯਿਕਂ ਪਰਿਸ੍ਸਮਂ ਪਤ੍ਤੋਤਿ ਦਸ੍ਸੇਤਿ.

ਲੋਕਹਿਤਾਯਾਤਿ ਸਤ੍ਤਲੋਕਸ੍ਸ ਹਿਤਾਯ. ਨਾਥਤੀਤਿ ਨਾਥੋ, ਵੇਨੇਯ੍ਯਾਨਂ ਹਿਤਸੁਖਂ ਆਸੀਸਤੀਤਿ ਅਤ੍ਥੋ. ਅਥ ਵਾ ਨਾਥਤਿ ਵੇਨੇਯ੍ਯਗਤੇ ਕਿਲੇਸੇ ਉਪਤਾਪੇਤਿ, ਨਾਥਤਿ ਵਾ ਯਾਚਤਿ ਵੇਨੇਯ੍ਯੇ ਅਤ੍ਤਨੋ ਹਿਤਕਰਣੇ ਯਾਚਿਤ੍ਵਾਪਿ ਨਿਯੋਜੇਤੀਤਿ ਨਾਥੋ, ਲੋਕਪਟਿਸਰਣੋ ਲੋਕਸਾਮੀ ਲੋਕਨਾਯਕੋਤਿ ਵੁਤ੍ਤਂ ਹੋਤਿ. ਮਹਾਕਾਰੁਣਿਕਸ੍ਸਾਤਿ ਯੋ ਕਰੁਣਾਯ ਕਮ੍ਪਿਤਹਦਯਤ੍ਤਾ ਲੋਕਹਿਤਤ੍ਥਂ ਅਤਿਦੁਕ੍ਕਰਕਿਰਿਯਾਯ ਅਨੇਕਪ੍ਪਕਾਰਂ ਤਾਦਿਸਂ ਦੁਕ੍ਖਂ ਅਨੁਭਵਿਤ੍ਵਾ ਆਗਤੋ, ਤਸ੍ਸ ਮਹਾਕਾਰੁਣਿਕਸ੍ਸਾਤਿ ਅਤ੍ਥੋ. ਤਤ੍ਥ ਕਿਰਤੀਤਿ ਕਰੁਣਾ, ਪਰਦੁਕ੍ਖਂ ਵਿਕ੍ਖਿਪਤਿ ਅਪਨੇਤੀਤਿ ਅਤ੍ਥੋ. ਦੁਕ੍ਖਿਤੇਸੁ ਵਾ ਕਿਰਿਯਤਿ ਪਸਾਰਿਯਤੀਤਿ ਕਰੁਣਾ. ਅਥ ਵਾ ਕਿਣਾਤੀਤਿ ਕਰੁਣਾ, ਪਰਦੁਕ੍ਖੇ ਸਤਿ ਕਾਰੁਣਿਕਂ ਹਿਂਸਤਿ ਵਿਬਾਧੇਤਿ, ਵਿਨਾਸੇਤਿ ਵਾ ਪਰਸ੍ਸ ਦੁਕ੍ਖਨ੍ਤਿ ਅਤ੍ਥੋ. ਪਰਦੁਕ੍ਖੇ ਸਤਿ ਸਾਧੂਨਂ ਕਮ੍ਪਨਂ ਹਦਯਖੇਦਂ ਕਰੋਤੀਤਿ ਵਾ ਕਰੁਣਾ. ਅਥ ਵਾ ਕਮਿਤਿ ਸੁਖਂ, ਤਂ ਰੁਨ੍ਧਤੀਤਿ ਕਰੁਣਾ. ਏਸਾ ਹਿ ਪਰਦੁਕ੍ਖਾਪਨਯਨਕਾਮਤਾਲਕ੍ਖਣਾ ਅਤ੍ਤਸੁਖਨਿਰਪੇਕ੍ਖਤਾਯ ਕਾਰੁਣਿਕਾਨਂ ਸੁਖਂ ਰੁਨ੍ਧਤਿ ਵਿਬਾਧੇਤਿ. ਕਰੁਣਾਯ ਨਿਯੁਤ੍ਤੋ ਕਾਰੁਣਿਕੋ, ਮਹਨ੍ਤੋ ਕਾਰੁਣਿਕੋ ਮਹਾਕਾਰੁਣਿਕੋ, ਤਸ੍ਸ ਨਮੋ ਅਤ੍ਥੂਤਿ ਪਾਠਸੇਸੋ.

ਏਵਂ ਕਰੁਣਾਮੁਖੇਨ ਸਙ੍ਖੇਪਤੋ ਸਕਲਸਬ੍ਬਞ੍ਞੁਗੁਣੇਹਿ ਭਗਵਨ੍ਤਂ ਥੋਮੇਤ੍ਵਾ ਇਦਾਨਿ ਸਦ੍ਧਮ੍ਮਂ ਥੋਮੇਤੁਂ ਅਸਮ੍ਬੁਧਨ੍ਤਿਆਦਿਮਾਹ. ਤਤ੍ਥ ਬੁਦ੍ਧਨਿਸੇਵਿਤਂ ਯਂ ਅਸਮ੍ਬੁਧਂ ਜੀਵਲੋਕੋ ਭਵਾ ਭਵਂ ਗਚ੍ਛਤਿ, ਤਸ੍ਸ ਧਮ੍ਮਵਰਸ੍ਸ ਨਮੋਤਿ ਸਮ੍ਬਨ੍ਧੋ. ਤਤ੍ਥ ਅਸਮ੍ਬੁਧਨ੍ਤਿ ਅਸਮ੍ਬੁਜ੍ਝਨ੍ਤੋ, ਯਥਾਸਭਾਵਂ ਅਪ੍ਪਟਿਵਿਜ੍ਝਨਤੋਤਿ ਵੁਤ੍ਤਂ ਹੋਤਿ. ਹੇਤੁਅਤ੍ਥੋ ਹੇਤ੍ਥ ਅਨ੍ਤਪਚ੍ਚਯੋ. ਯਨ੍ਤਿ ਅਨਿਯਮਤੋ ਸਪਰਿਯਤ੍ਤਿਕੋ ਨਵਲੋਕੁਤ੍ਤਰਧਮ੍ਮੋ ਕਮ੍ਮਭਾਵੇਨ ਨਿਦ੍ਦਿਟ੍ਠੋ. ਬੁਦ੍ਧਨਿਸੇਵਿਤਨ੍ਤਿ ਤਸ੍ਸੇਵ ਵਿਸੇਸਨਂ, ਸਮ੍ਮਾਸਮ੍ਬੁਦ੍ਧੇਨ, ਪਚ੍ਚੇਕਬੁਦ੍ਧਸਾਵਕਬੁਦ੍ਧੇਹਿਪਿ ਵਾ ਗੋਚਰਾਸੇਵਨਭਾਵਨਾਸੇਵਨਾਹਿ ਯਥਾਰਹਂ ਨਿਸੇਵਿਤਂ, ਅਜਹਿਤਨ੍ਤਿ ਅਤ੍ਥੋ. ਤਤ੍ਥ ਪਰਿਯਤ੍ਤਿਫਲਨਿਬ੍ਬਾਨਾਨਿ ਗੋਚਰਾਸੇਵਨਵਸੇਨੇਵ ਨਿਸੇਵਿਤਾਨਿ, ਮਗ੍ਗੋ ਪਨ ਭਾਵਨਾਸੇਵਨਵਸੇਨਾਪਿ ਪਚ੍ਚਵੇਕ੍ਖਣਞਾਣਾਦਿਵਸੇਨ ਗੋਚਰਾਸੇਵਨਵਸੇਨਾਪਿ ਨਿਸੇਵਿਤੋ. ਭਵਾਭਵਨ੍ਤਿ ਭਵਤੋ ਭਵਂ. ਅਥ ਵਾ ਹੀਨਪਣੀਤਾਦਿਵਸੇਨ ਖੁਦ੍ਦਕਂ ਮਹਨ੍ਤਞ੍ਚ ਭਵਨ੍ਤਿ ਅਤ੍ਥੋ. ਵੁਡ੍ਢਤ੍ਥੋਪਿ ਹਿ ਅ-ਕਾਰੋ ਦਿਸ੍ਸਤਿ ਅਸੇਕ੍ਖਾ ਧਮ੍ਮਾਤਿਆਦੀਸੁ (ਧ. ਸ. ਤਿਕਮਾਤਿਕਾ ੧੧) ਵਿਯ. ਅਥ ਵਾ ਭਵੋਤਿ ਵੁਡ੍ਢਿ, ਅਭਵੋਤਿ ਹਾਨਿ. ਭਵੋਤਿ ਵਾ ਸਸ੍ਸਤਦਿਟ੍ਠਿ, ਅਭਵੋਤਿ ਉਚ੍ਛੇਦਦਿਟ੍ਠਿ. ਵੁਤ੍ਤਪ੍ਪਕਾਰੋ ਭਵੋ ਚ ਅਭਵੋ ਚ ਭਵਾਭਵੋ, ਤਂ ਭਵਾਭਵਂ. ਗਚ੍ਛਤੀਤਿ ਉਪਗਚ੍ਛਤਿ. ਜੀਵਲੋਕੋਤਿ ਸਤ੍ਤਲੋਕੋ. ਅਵਿਜ੍ਜਾਦਿਕਿਲੇਸਜਾਲਵਿਦ੍ਧਂਸਿਨੋਤਿ ਧਮ੍ਮਵਿਸੇਸਨਂ. ਤਤ੍ਥ ਨ ਵਿਦਤਿ ਧਮ੍ਮਾਨਂ ਯਥਾਸਭਾਵਂ ਨ ਵਿਜਾਨਾਤੀਤਿ ਅਵਿਜ੍ਜਾ, ਅਞ੍ਞਾਣਂ. ਸਾ ਆਦਿ ਯੇਸਂ ਤਣ੍ਹਾਦੀਨਂ, ਤੇਯੇਵ ਕਿਲਿਸ੍ਸਨ੍ਤਿ ਏਤੇਹਿ ਸਤ੍ਤਾਤਿ ਕਿਲੇਸਾ, ਤੇਯੇਵ ਚ ਸਤ੍ਤਾਨਂ ਵਿਬਾਧਨਟ੍ਠੇਨ ਜਾਲਸਦਿਸਾਤਿ ਜਾਲਂ, ਤਂ ਵਿਦ੍ਧਂਸੇਤਿ ਸਬ੍ਬਸੋ ਵਿਨਾਸੇਤਿ ਸੀਲੇਨਾਤਿ ਅਵਿਜ੍ਜਾਦਿਕਿਲੇਸਜਾਲਵਿਦ੍ਧਂਸੀ, ਤਸ੍ਸ.

ਨਨੁ ਚੇਤ੍ਥ ਸਪਰਿਯਤ੍ਤਿਕੋ ਨਵਲੋਕੁਤ੍ਤਰਧਮ੍ਮੋ ਅਧਿਪ੍ਪੇਤੋ, ਤਤ੍ਥ ਚ ਮਗ੍ਗੋਯੇਵ ਕਿਲੇਸੇ ਵਿਦ੍ਧਂਸੇਤਿ, ਨੇਤਰੇਤਿ ਚੇ? ਵੁਚ੍ਚਤੇ – ਮਗ੍ਗਸ੍ਸਾਪਿ ਨਿਬ੍ਬਾਨਮਾਗਮ੍ਮ ਕਿਲੇਸਵਿਦ੍ਧਂਸਨਤੋ ਨਿਬ੍ਬਾਨਮ੍ਪਿ ਕਿਲੇਸੇ ਵਿਦ੍ਧਂਸੇਤਿ ਨਾਮ, ਮਗ੍ਗਸ੍ਸ ਕਿਲੇਸਵਿਦ੍ਧਂਸਨਕਿਚ੍ਚਂ ਫਲੇਨ ਨਿਟ੍ਠਿਤਨ੍ਤਿ ਫਲਮ੍ਪਿ ‘‘ਕਿਲੇਸਵਿਦ੍ਧਂਸੀ’’ਤਿ ਵੁਚ੍ਚਤਿ, ਪਰਿਯਤ੍ਤਿਧਮ੍ਮੋਪਿ ਕਿਲੇਸਵਿਦ੍ਧਂਸਨਸ੍ਸ ਉਪਨਿਸ੍ਸਯਪਚ੍ਚਯਤ੍ਤਾ ‘‘ਕਿਲੇਸਵਿਦ੍ਧਂਸੀ’’ਤਿ ਵਤ੍ਤੁਂ ਅਰਹਤੀਤਿ ਨ ਕੋਚਿ ਦੋਸੋ. ਧਮ੍ਮਵਰਸ੍ਸ ਤਸ੍ਸਾਤਿ ਪੁਬ੍ਬੇ ਅਨਿਯਮਿਤਸ੍ਸ ਨਿਯਾਮਕਵਚਨਂ. ਤਤ੍ਥ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਚਤੂਸੁ ਅਪਾਯੇਸੁ ਸਂਸਾਰਦੁਕ੍ਖੇ ਚ ਅਪਤਮਾਨੇ ਧਾਰੇਤੀਤਿ ਧਮ੍ਮੋ. ਵੁਤ੍ਤਪ੍ਪਕਾਰੋ ਧਮ੍ਮੋ ਏਵ ਅਤ੍ਤਨੋ ਉਤ੍ਤਰਿਤਰਾਭਾਵੇਨ ਵਰੋ ਪਵਰੋ ਅਨੁਤ੍ਤਰੋਤਿ ਧਮ੍ਮਵਰੋ, ਤਸ੍ਸ ਧਮ੍ਮਵਰਸ੍ਸ ਨਮੋ ਅਤ੍ਥੂਤਿ ਅਤ੍ਥੋ.

ਏਵਂ ਸਙ੍ਖੇਪਨਯੇਨੇਵ ਸਬ੍ਬਧਮ੍ਮਗੁਣੇਹਿ ਸਦ੍ਧਮ੍ਮਂ ਥੋਮੇਤ੍ਵਾ ਇਦਾਨਿ ਅਰਿਯਸਙ੍ਘਂ ਥੋਮੇਤੁਂ ਗੁਣੇਹੀਤਿਆਦਿਮਾਹ. ਤਤ੍ਥ ਗੁਣੇਹਿ ਯੋ ਯੁਤ੍ਤੋ, ਤਮਰਿਯਸਙ੍ਘਂ ਨਮਾਮੀਤਿ ਸਮ੍ਬਨ੍ਧੋ. ਸੀਲਾਦਯੋ ਗੁਣਾ ਚੇਤ੍ਥ ਲੋਕਿਯਲੋਕੁਤ੍ਤਰਾ ਅਧਿਪ੍ਪੇਤਾ. ‘‘ਵਿਮੁਤ੍ਤਿਵਿਮੁਤ੍ਤਿਞਾਣ’’ਨ੍ਤਿ ਵਤ੍ਤਬ੍ਬੇ ਏਕਦੇਸਸਰੂਪੇਕਸੇਸਨਯੇਨ ‘‘ਵਿਮੁਤ੍ਤਿਞਾਣ’’ਨ੍ਤਿ ਵੁਤ੍ਤਂ, ਆਦਿਸਦ੍ਦਪਰਿਯਾਯੇਨ ਪਭੁਤਿਸਦ੍ਦੇਨ ਵਾ ਵਿਮੁਤ੍ਤਿਗ੍ਗਹਣਂ ਵੇਦਿਤਬ੍ਬਂ. ਤਤ੍ਥ ਵਿਮੁਤ੍ਤੀਤਿ ਫਲਂ. ਵਿਮੁਤ੍ਤਿਞਾਣਨ੍ਤਿ ਪਚ੍ਚਵੇਕ੍ਖਣਞਾਣਂ. ਪਭੁਤਿ-ਸਦ੍ਦੇਨ ਛਲ਼ਭਿਞ੍ਞਾਚਤੁਪਟਿਸਮ੍ਭਿਦਾਦਯੋ ਗੁਣਾ ਸਙ੍ਗਹਿਤਾਤਿ ਦਟ੍ਠਬ੍ਬਾ. ਕੁਸਲਤ੍ਥਿਕਾਨਂ ਜਨਾਨਂ ਪੁਞ੍ਞਾਤਿਸਯਵੁਡ੍ਢਿਯਾ ਖੇਤ੍ਤਸਦਿਸਤ੍ਤਾ ਖੇਤ੍ਤਨ੍ਤਿ ਆਹ ‘‘ਖੇਤ੍ਤਂ ਜਨਾਨਂ ਕੁਸਲਤ੍ਥਿਕਾਨ’’ਨ੍ਤਿ. ਖਿਤ੍ਤਂ ਬੀਜਂ ਮਹਪ੍ਫਲਭਾਵਕਰਣੇਨ ਤਾਯਤੀਤਿ ਹਿ ਖੇਤ੍ਤਂ. ਅਰਿਯਸਙ੍ਘਨ੍ਤਿ ਏਤ੍ਥ ਆਰਕਤ੍ਤਾ ਕਿਲੇਸੇਹਿ, ਅਨਯੇ ਨ ਇਰਿਯਨਤੋ, ਅਯੇ ਚ ਇਰਿਯਨਤੋ, ਸਦੇਵਕੇਨ ਲੋਕੇਨ ‘‘ਸਰਣ’’ਨ੍ਤਿ ਅਰਣੀਯਤੋ ਉਪਗਨ੍ਤਬ੍ਬਤੋ, ਉਪਗਤਾਨਞ੍ਚ ਤਦਤ੍ਥਸਿਦ੍ਧਿਤੋ ਅਰਿਯਾ, ਅਟ੍ਠ ਅਰਿਯਪੁਗ੍ਗਲਾ, ਅਰਿਯਾਨਂ ਸਙ੍ਘੋ ਸਮੂਹੋਤਿ ਅਰਿਯਸਙ੍ਘੋ, ਤਂ ਅਰਿਯਸਙ੍ਘਂ.

ਇਦਾਨਿ ਰਤਨਤ੍ਤਯਪਣਾਮਜਨਿਤਂ ਕੁਸਲਾਭਿਸਨ੍ਦਂ ਯਥਾਧਿਪ੍ਪੇਤੇ ਪਯੋਜਨੇ ਨਿਯੋਜੇਤ੍ਵਾ ਅਤ੍ਤਨਾ ਸਂਵਣ੍ਣਿਯਮਾਨਸ੍ਸ ਵਿਨਯਸ੍ਸ ਸਕਲਸਾਸਨਮੂਲਭਾਵਦਸ੍ਸਨਮੁਖੇਨ ਸਂਵਣ੍ਣਨਾਕਰਣਸ੍ਸਾਪਿ ਸਾਸਨਮੂਲਤਂ ਦਸ੍ਸੇਤੁਂ ਇਚ੍ਚੇਵਮਿਚ੍ਚਾਦਿਗਾਥਾਦ੍ਵਯਮਾਹ. ਪੁਞ੍ਞਾਭਿਸਨ੍ਦਨ੍ਤਿ ਪੁਞ੍ਞੋਘਂ, ਪੁਞ੍ਞਪ੍ਪਵਾਹਂ ਪੁਞ੍ਞਰਾਸਿਨ੍ਤਿ ਅਤ੍ਥੋ. ਤਸ੍ਸਾਨੁਭਾਵੇਨਾਤਿ ਤਸ੍ਸ ਯਥਾਵੁਤ੍ਤਸ੍ਸ ਪੁਞ੍ਞਪ੍ਪਵਾਹਸ੍ਸ ਆਨੁਭਾਵੇਨ ਬਲੇਨ ਹਤਨ੍ਤਰਾਯੋ ਵਿਨਯਂ ਵਣ੍ਣਯਿਸ੍ਸਨ੍ਤਿ ਸਮ੍ਬਨ੍ਧੋ.

ਅਟ੍ਠਿਤਸ੍ਸ ਸੁਸਣ੍ਠਿਤਸ੍ਸ ਭਗਵਤੋ ਸਾਸਨਂ ਯਸ੍ਮਿਂ ਠਿਤੇ ਪਤਿਟ੍ਠਿਤਂ ਹੋਤੀਤਿ ਯੋਜੇਤਬ੍ਬਂ. ਤਤ੍ਥ ਯਸ੍ਮਿਨ੍ਤਿ ਯਸ੍ਮਿਂ ਵਿਨਯਪਿਟਕੇ. ਠਿਤੇਤਿ ਪਾਲ਼ਿਤੋ ਚ ਅਤ੍ਥਤੋ ਚ ਅਨੂਨਂ ਹੁਤ੍ਵਾ ਲਜ੍ਜੀਪੁਗ੍ਗਲੇਸੁ ਪਵਤ੍ਤਨਟ੍ਠੇਨ ਠਿਤੇ. ਸਾਸਨਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਂ ਸਾਸਨਂ. ਅਟ੍ਠਿਤਸ੍ਸਾਤਿ ਕਾਮਸੁਖਲ੍ਲਿਕਤ੍ਤਕਿਲਮਥਾਨੁਯੋਗਸਙ੍ਖਾਤੇ ਅਨ੍ਤਦ੍ਵਯੇ ਅਟ੍ਠਿਤਸ੍ਸ, ‘‘ਪਰਿਨਿਬ੍ਬੁਤਸ੍ਸਪਿ ਭਗਵਤੋ’’ਤਿਪਿ ਵਦਨ੍ਤਿ. ਸੁਸਣ੍ਠਿਤਸ੍ਸਾਤਿ ਅਨ੍ਤਦ੍ਵਯਵਿਰਹਿਤਾਯ ਮਜ੍ਝਿਮਾਯ ਪਟਿਪਦਾਯ ਸੁਟ੍ਠੁ ਠਿਤਸ੍ਸ. ਅਮਿਸ੍ਸਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਨਿਕਾਯਨ੍ਤਰਲਦ੍ਧੀਹਿ ਅਸਮ੍ਮਿਸ੍ਸਂ ਕਤ੍ਵਾ ਅਨਾਕੁਲਂ ਕਤ੍ਵਾ ਵਣ੍ਣਯਿਸ੍ਸਨ੍ਤਿ ਵੁਤ੍ਤਂ ਹੋਤਿ. ਨਿਸ੍ਸਾਯ ਪੁਬ੍ਬਾਚਰਿਯਾਨੁਭਾਵਨ੍ਤਿ ਪੁਬ੍ਬਾਚਰਿਯੇਹਿ ਸਂਵਣ੍ਣਿਤਂ ਅਟ੍ਠਕਥਂ ਨਿਸ੍ਸਾਯ, ਨ ਅਤ੍ਤਨੋ ਬਲੇਨਾਤਿ ਅਧਿਪ੍ਪਾਯੋ.

ਅਥ ਪੋਰਾਣਟ੍ਠਕਥਾਸੁ ਵਿਜ੍ਜਮਾਨਾਸੁ ਪੁਨ ਵਿਨਯਸਂਵਣ੍ਣਨਾ ਕਿਂਪਯੋਜਨਾਤਿ? ਆਹ ਕਾਮਞ੍ਚਾਤਿਆਦਿ. ਤਤ੍ਥ ਕਾਮਨ੍ਤਿ ਏਕਨ੍ਤੇਨ, ਯਥਿਚ੍ਛਕਂ ਵਾ, ਸਬ੍ਬਸੋਤਿ ਵੁਤ੍ਤਂ ਹੋਤਿ, ਤਸ੍ਸ ਸਂਵਣ੍ਣਿਤੋਯਂ ਵਿਨਯੋਤਿ ਇਮਿਨਾ ਸਮ੍ਬਨ੍ਧੋ. ਪੁਬ੍ਬਾਚਰਿਯਾਸਭੇਹੀਤਿ ਮਹਾਕਸ੍ਸਪਤ੍ਥੇਰਾਦਯੋ ਪੁਬ੍ਬਾਚਰਿਯਾ ਏਵ ਅਕਮ੍ਪਿਯਟ੍ਠੇਨ ਉਤ੍ਤਮਟ੍ਠੇਨ ਚ ਆਸਭਾ, ਤੇਹਿ ਪੁਬ੍ਬਾਚਰਿਯਵਰੇਹੀਤਿ ਵੁਤ੍ਤਂ ਹੋਤਿ. ਕੀਦਿਸਾ ਪਨ ਤੇ ਪੁਬ੍ਬਾਚਰਿਯਾਤਿ? ਆਹ ਞਾਣਮ੍ਬੂਤਿਆਦਿ. ਅਗ੍ਗਮਗ੍ਗਞਾਣਸਙ੍ਖਾਤੇਨ ਅਮ੍ਬੁਨਾ ਸਲਿਲੇਨ ਨਿਦ੍ਧੋਤਾਨਿ ਨਿਸ੍ਸੇਸਤੋ ਆਯਤਿਂ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ ਧੋਤਾਨਿ ਵਿਸੋਧਿਤਾਨਿ ਰਾਗਾਦੀਨਿ ਤੀਣਿ ਮਲਾਨਿ ਕਾਮਾਸਵਾਦਯੋ ਚ ਚਤ੍ਤਾਰੋ ਆਸਵਾ ਯੇਹਿ ਤੇ ਞਾਣਮ੍ਬੁਨਿਦ੍ਧੋਤਮਲਾਸਵਾ, ਤੇਹਿ ਖੀਣਾਸਵੇਹੀਤਿ ਅਤ੍ਥੋ. ਖੀਣਾਸਵਭਾਵੇਪਿ ਨ ਏਤੇ ਸੁਕ੍ਖਵਿਪਸ੍ਸਕਾਤਿ ਆਹ ‘‘ਵਿਸੁਦ੍ਧਵਿਜ੍ਜਾਪਟਿਸਮ੍ਭਿਦੇਹੀ’’ਤਿ. ਤਤ੍ਥ ਵਿਜ੍ਜਾਤਿ ਤਿਸ੍ਸੋ ਵਿਜ੍ਜਾ, ਅਟ੍ਠ ਵਿਜ੍ਜਾ ਵਾ. ਪਟਿਸਮ੍ਭਿਦਾਪ੍ਪਤ੍ਤੇਸੁਪਿ ਮਹਾਕਸ੍ਸਪਤ੍ਥੇਰਾਦੀਨਂ ਉਚ੍ਚਿਨਿਤ੍ਵਾ ਗਹਿਤਤਾਯ ਤੇਸਂ ਸਦ੍ਧਮ੍ਮਸਂਵਣ੍ਣਨੇ ਸਾਮਤ੍ਥਿਯਂ ਸਾਤਿਸਯਨ੍ਤਿ ਦਸ੍ਸੇਨ੍ਤੋ ਆਹ ‘‘ਸਦ੍ਧਮ੍ਮਸਂਵਣ੍ਣਨਕੋਵਿਦੇਹੀ’’ਤਿ.

ਕਿਲੇਸਜਾਤਂ, ਪਰਿਕ੍ਖਾਰਬਾਹੁਲ੍ਲਂ ਵਾ ਸਲ੍ਲਿਖਤਿ ਤਨੁਂ ਕਰੋਤੀਤਿ ਸਲ੍ਲੇਖੋ, ਅਪ੍ਪਿਚ੍ਛਤਾਦਿਗੁਣਸਮੂਹੋ, ਇਧ ਪਨ ਖੀਣਾਸਵਾਧਿਕਾਰਤ੍ਤਾ ਪਰਿਕ੍ਖਾਰਬਾਹੁਲ੍ਲਸ੍ਸ ਸਲ੍ਲਿਖਨਵਸੇਨੇਵ ਅਤ੍ਥੋ ਗਹੇਤਬ੍ਬੋ. ਸਲ੍ਲੇਖੇਨ ਨਿਬ੍ਬਤ੍ਤਂ ਸਲ੍ਲੇਖਿਯਂ, ਤਸ੍ਮਿਂ ਸਲ੍ਲੇਖਿਯੇ, ਧੁਤਙ੍ਗਪਰਿਹਰਣਾਦਿਸਲ੍ਲੇਖਪਅਪਤ੍ਤਿਯਨ੍ਤਿ ਵੁਤ੍ਤਂ ਹੋਤਿ. ਨੋਸੁਲਭੂਪਮੇਹੀਤਿ ਸਲ੍ਲੇਖਪਟਿਪਤ੍ਤਿਯਾ ‘‘ਅਸੁਕਸਦਿਸਾ’’ਤਿ ਨਤ੍ਥਿ ਸੁਲਭਾ ਉਪਮਾ ਏਤੇਸਨ੍ਤਿ ਨੋਸੁਲਭੂਪਮਾ, ਤੇਹਿ. ਮਹਾਵਿਹਾਰਸ੍ਸਾਤਿ ਇਮਿਨਾ ਨਿਕਾਯਨ੍ਤਰਂ ਪਟਿਕ੍ਖਿਪਤਿ. ਵਿਹਾਰਸੀਸੇਨ ਹੇਤ੍ਥ ਤਤ੍ਥ ਨਿਵਾਸੀਨਞ੍ਚੇਵ ਤੇਹਿ ਸਮਲਦ੍ਧਿਕਾਨਞ੍ਚ ਸਬ੍ਬੇਸਂ ਭਿਕ੍ਖੂਨਂ ਗਹਣਂ ਦਟ੍ਠਬ੍ਬਂ. ਤਸ੍ਮਾ ਤੇਸਂ ਮਹਾਵਿਹਾਰਵਾਸੀਨਂ ਦਿਟ੍ਠਿਸੀਲਵਿਸੁਦ੍ਧਿਯਾ ਪਭਵਤ੍ਤੇਨ ਸਞ੍ਞਾਣਭੂਤਤ੍ਤਾ ਧਮ੍ਮਸਙ੍ਗਾਹਕਾ ਮਹਾਕਸ੍ਸਪਤ੍ਥੇਰਾਦਯੋ ‘‘ਮਹਾਵਿਹਾਰਸ੍ਸ ਧਜੂਪਮਾ’’ਤਿ ਵੁਤ੍ਤਾ, ਤੇਹਿ ਅਯਂ ਵਿਨਯੋ ਸਂਵਣ੍ਣਿਤੋ ਸਮ੍ਮਾ ਅਨੂਨਂ ਕਤ੍ਵਾ ਵਣ੍ਣਿਤੋ. ਕਥਨ੍ਤਿ ਆਹ ‘‘ਚਿਤ੍ਤੇਹਿ ਨਯੇਹੀ’’ਤਿ. ਵਿਚਿਤ੍ਤੇਹਿ ਨਯੇਹਿ ਸਮ੍ਬੁਦ੍ਧਵਰਨ੍ਵਯੇਹਿ ਸਬ੍ਬਞ੍ਞੁਬੁਦ੍ਧਵਰਂ ਅਨੁਗਤੇਹਿ, ਭਗਵਤੋ ਅਧਿਪ੍ਪਾਯਾਨੁਗਤੇਹਿ ਨਯੇਹੀਤਿ ਵੁਤ੍ਤਂ ਹੋਤਿ.

ਏਵਂ ਪੋਰਾਣਟ੍ਠਕਥਾਯ ਅਨੂਨਭਾਵਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨੋ ਸਂਵਣ੍ਣਨਾਯ ਪਯੋਜਨਵਿਸੇਸਂ ਅਜ੍ਝੇਸਕਞ੍ਚ ਦਸ੍ਸੇਤੁਂ ਸਂਵਣ੍ਣਨਾਤਿਆਦਿਮਾਹ. ਤਤ੍ਥ ਸਙ੍ਖਤਤ੍ਤਾਤਿ ਰਚਿਤਤ੍ਤਾ. ਨ ਕਞ੍ਚਿ ਅਤ੍ਥਂ ਅਭਿਸਮ੍ਭੁਣਾਤੀਤਿ ਨ ਕਞ੍ਚਿ ਅਤ੍ਥਂ ਸਾਧੇਤਿ.

ਸਂਵਣ੍ਣਨਂ ਤਞ੍ਚਾਤਿਆਦਿਨਾ ਅਤ੍ਤਨੋ ਸਂਵਣ੍ਣਨਾਯ ਕਰਣਪ੍ਪਕਾਰਂ ਦਸ੍ਸੇਤਿ. ਤਤ੍ਥ ਤਞ੍ਚ ਇਦਾਨਿ ਵੁਚ੍ਚਮਾਨਂ ਸਂਵਣ੍ਣਨਂ ਸਮਾਰਭਨ੍ਤੋ ਸਕਲਾਯਪਿ ਮਹਾਅਟ੍ਠਕਥਾਯ ਇਧ ਗਹੇਤਬ੍ਬਤੋ ਮਹਾਅਟ੍ਠਕਥਂ ਤਸ੍ਸਾ ਇਦਾਨਿ ਵੁਚ੍ਚਮਾਨਾਯ ਸਂਵਣ੍ਣਨਾਯ ਸਰੀਰਂ ਕਤ੍ਵਾ ਮਹਾਪਚ੍ਚਰਿਯਂ ਯੋ ਵਿਨਿਚ੍ਛਯੋ ਵੁਤ੍ਤੋ, ਤਥੇਵ ਕੁਰੁਨ੍ਦੀਨਾਮਾਦੀਸੁ ਵਿਸ੍ਸੁਤਾਸੁ ਅਟ੍ਠਕਥਾਸੁ ਯੋ ਵਿਨਿਚ੍ਛਯੋ ਵੁਤ੍ਤੋ, ਤਤੋਪਿ ਵਿਨਿਚ੍ਛਯਤੋ ਯੁਤ੍ਤਮਤ੍ਥਂ ਅਪਰਿਚ੍ਚਜਨ੍ਤੋ ਅਨ੍ਤੋਗਧਤ੍ਥੇਰਵਾਦਂ ਕਤ੍ਵਾ ਸਂਵਣ੍ਣਨਂ ਸਮ੍ਮਾ ਸਮਾਰਭਿਸ੍ਸਨ੍ਤਿ ਪਦਤ੍ਥਸਮ੍ਬਨ੍ਧੋ ਵੇਦਿਤਬ੍ਬੋ. ਏਤ੍ਥ ਚ ਅਤ੍ਥੋ ਕਥੀਯਤਿ ਏਤਾਯਾਤਿ ਅਟ੍ਠਕਥਾ ਤ੍ਥ-ਕਾਰਸ੍ਸ ਟ੍ਠ-ਕਾਰਂ ਕਤ੍ਵਾ. ਮਹਾਪਚ੍ਚਰਿਯਨ੍ਤਿ ਮਹਾਪਚ੍ਚਰੀਨਾਮਿਕਂ. ਏਤ੍ਥ ਚ ਪਚ੍ਚਰੀਤਿ ਉਲ਼ੁਮ੍ਪਂ ਵੁਚ੍ਚਤਿ, ਤਸ੍ਮਿਂ ਨਿਸੀਦਿਤ੍ਵਾ ਕਤਤ੍ਤਾ ਤਮੇਵ ਨਾਮਂ ਜਾਤਂ. ‘‘ਕੁਰੁਨ੍ਦੀਵਲ੍ਲਿਵਿਹਾਰੋ ਨਾਮ ਅਤ੍ਥਿ, ਤਤ੍ਥ ਕਤਤ੍ਤਾ ‘ਕੁਰੁਨ੍ਦੀ’ਤਿ ਨਾਮਂ ਜਾਤ’’ਨ੍ਤਿ ਵਦਨ੍ਤਿ. ਆਦਿਸਦ੍ਦੇਨ ਅਨ੍ਧਕਟ੍ਠਕਥਂ ਸਙ੍ਖੇਪਟ੍ਠਕਥਞ੍ਚ ਸਙ੍ਗਣ੍ਹਾਤਿ.

ਯੁਤ੍ਤਮਤ੍ਥਨ੍ਤਿ ਮਹਾਅਟ੍ਠਕਥਾਨਯੇਨ, ਚਤੁਬ੍ਬਿਧਵਿਨਯਯੁਤ੍ਤਿਯਾ ਵਾ ਯੁਤ੍ਤਮਤ੍ਥਂ. ‘‘ਅਟ੍ਠਕਥਂਯੇਵ ਗਹੇਤ੍ਵਾ ਸਂਵਣ੍ਣਨਂ ਕਰਿਸ੍ਸਾਮੀ’’ਤਿ ਵੁਤ੍ਤੇ ਅਟ੍ਠਕਥਾਸੁ ਵੁਤ੍ਤਤ੍ਥੇਰਵਾਦਾਨਂ ਬਾਹਿਰਭਾਵੋ ਸਿਯਾਤਿ ਤੇਪਿ ਅਨ੍ਤੋਕਤ੍ਤੁਕਾਮੋ ‘‘ਅਨ੍ਤੋਗਧਥੇਰਵਾਦ’’ਨ੍ਤਿ ਆਹ, ਥੇਰਵਾਦੇਪਿ ਅਨ੍ਤੋਕਤ੍ਵਾਤਿ ਵੁਤ੍ਤਂ ਹੋਤਿ.

ਤਂ ਮੇਤਿ ਗਾਥਾਯ ਸੋਤੂਹਿ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤਿ. ਤਤ੍ਥ ਧਮ੍ਮਪ੍ਪਦੀਪਸ੍ਸਾਤਿ ਧਮ੍ਮੋ ਏਵ ਮੋਹਨ੍ਧਕਾਰਵਿਦ੍ਧਂਸਨਤੋ ਪਦੀਪਸਦਿਸਤ੍ਤਾ ਪਦੀਪੋ ਅਸ੍ਸਾਤਿ ਧਮ੍ਮਪ੍ਪਦੀਪੋ, ਭਗਵਾ, ਤਸ੍ਸ. ਪਤਿਮਾਨਯਨ੍ਤਾਤਿ ਪੂਜੇਨ੍ਤਾ ਮਨਸਾ ਗਰੁਂ ਕਰੋਨ੍ਤਾ ਨਿਸਾਮੇਨ੍ਤੁ ਸੁਣਨ੍ਤੁ.

ਬੁਦ੍ਧੇਨਾਤਿਆਦਿਨਾ ਅਤ੍ਤਨੋ ਸਂਵਣ੍ਣਨਾਯ ਆਗਮਨਸੁਦ੍ਧਿਦਸ੍ਸਨਮੁਖੇਨ ਪਮਾਣਭਾਵਂ ਦਸ੍ਸੇਤ੍ਵਾ ਅਨੁਸਿਕ੍ਖਿਤਬ੍ਬਤਂ ਦਸ੍ਸੇਤਿ. ਤਤ੍ਥ ਯਥੇਵ ਬੁਦ੍ਧੇਨ ਯੋ ਧਮ੍ਮੋ ਵਿਨਯੋ ਚ ਵੁਤ੍ਤੋ, ਸੋ ਤਸ੍ਸ ਬੁਦ੍ਧਸ੍ਸ ਯੇਹਿ ਪੁਤ੍ਤੇਹਿ ਮਹਾਕਸ੍ਸਪਤ੍ਥੇਰਾਦੀਹਿ ਤਥੇਵ ਞਾਤੋ, ਤੇਸਂ ਬੁਦ੍ਧਪੁਤ੍ਤਾਨਂ ਮਤਿਮਚ੍ਚਜਨ੍ਤਾ ਸੀਹਲ਼ਟ੍ਠਕਥਾਚਰਿਯਾ ਯਸ੍ਮਾ ਪੁਰੇ ਅਟ੍ਠਕਥਾ ਅਕਂਸੂਤਿ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਧਮ੍ਮੋਤਿ ਸੁਤ੍ਤਾਭਿਧਮ੍ਮੇ ਸਙ੍ਗਣ੍ਹਾਤਿ. ਵਿਨਯੋਤਿ ਸਕਲਂ ਵਿਨਯਪਿਟਕਂ. ਵੁਤ੍ਤੋਤਿ ਪਾਲ਼ਿਤੋ ਚ ਅਤ੍ਥਤੋ ਚ ਬੁਦ੍ਧੇਨ ਭਗਵਤਾ ਵੁਤ੍ਤੋ. ਨ ਹਿ ਭਗਵਤਾ ਅਬ੍ਯਾਕਤਂ ਨਾਮ ਤਨ੍ਤਿਪਦਂ ਅਤ੍ਥਿ, ਤਤ੍ਥ ਤਤ੍ਥ ਭਗਵਤਾ ਪਵਤ੍ਤਿਤਪਕਿਣ੍ਣਕਦੇਸਨਾਯੇਵ ਹਿ ਅਟ੍ਠਕਥਾ. ਤਥੇਵ ਞਾਤੋਤਿ ਯਥੇਵ ਬੁਦ੍ਧੇਨ ਵੁਤ੍ਤੋ, ਤਥੇਵ ਏਕਪਦਮ੍ਪਿ ਏਕਕ੍ਖਰਮ੍ਪਿ ਅਵਿਨਾਸੇਤ੍ਵਾ ਅਧਿਪ੍ਪਾਯਞ੍ਚ ਅਵਿਕੋਪੇਤ੍ਵਾ ਞਾਤੋ ਵਿਦਿਤੋਤਿ ਅਤ੍ਥੋ. ਤੇਸਂ ਮਤਿਮਚ੍ਚਜਨ੍ਤਾਤਿ ਤੇਸਂ ਬੁਦ੍ਧਪੁਤ੍ਤਾਨਂ ਮਤਿਸਙ੍ਖਾਤਂ ਥੇਰਪਰਮ੍ਪਰਾਯ ਉਗ੍ਗਹੇਤ੍ਵਾ ਆਭਤਂ ਅਬ੍ਬੋਚ੍ਛਿਨ੍ਨਂ ਪਾਲ਼ਿਵਣ੍ਣਨਾਵਸੇਨ ਚੇਵ ਪਾਲ਼ਿਮੁਤ੍ਤਕਵਸੇਨ ਚ ਪਵਤ੍ਤਂ ਸਬ੍ਬਂ ਅਟ੍ਠਕਥਾਵਿਨਿਚ੍ਛਯਂ ਅਪਰਿਚ੍ਚਜਨ੍ਤਾ. ਅਟ੍ਠਕਥਾ ਅਕਂਸੂਤਿ ਮਹਾਅਟ੍ਠਕਥਾਮਹਾਪਚ੍ਚਰਿਆਦਿਕਾ ਸੀਹਲ਼ਟ੍ਠਕਥਾਯੋ ਅਕਂਸੁ. ‘‘ਅਟ੍ਠਕਥਾਮਕਂਸੂ’’ਤਿਪਿ ਪਾਠੋ, ਤਤ੍ਥਾਪਿ ਸੋਯੇਵਤ੍ਥੋ.

ਤਸ੍ਮਾਤਿ ਯਸ੍ਮਾ ਤੇਸਂ ਬੁਦ੍ਧਪੁਤ੍ਤਾਨਂ ਅਧਿਪ੍ਪਾਯਂ ਅਵਿਕੋਪੇਤ੍ਵਾ ਪੁਰੇ ਅਟ੍ਠਕਥਾ ਅਕਂਸੁ, ਤਸ੍ਮਾ. ਯਂ ਅਟ੍ਠਕਥਾਸੁ ਵੁਤ੍ਤਂ, ਤਂ ਸਬ੍ਬਮ੍ਪਿ ਪਮਾਣਨ੍ਤਿ ਯੋਜਨਾ. ਹੀਤਿ ਨਿਪਾਤਮਤ੍ਤਂ ਹੇਤੁਅਤ੍ਥਸ੍ਸ ਤਸ੍ਮਾਤਿ ਇਮਿਨਾਯੇਵ ਪਕਾਸਿਤਤ੍ਤਾ, ਅਵਧਾਰਣਤ੍ਥੋ ਵਾ, ਪਮਾਣਮੇਵਾਤਿ. ਯਦਿ ਅਟ੍ਠਕਥਾਸੁ ਵੁਤ੍ਤਂ ਸਬ੍ਬਮ੍ਪਿ ਪਮਾਣਂ, ਏਵਂ ਸਤਿ ਤਤ੍ਥ ਪਮਾਦਲੇਖਾਪਿ ਪਮਾਣਂ ਸਿਯਾਤਿ ਆਹ ‘‘ਵਜ੍ਜਯਿਤ੍ਵਾਨ ਪਮਾਦਲੇਖ’’ਨ੍ਤਿ, ਅਪਰਾਪਰਂ ਲਿਖਨ੍ਤੇਹਿ ਪਮਾਦੇਨ ਸਤਿਂ ਅਪਚ੍ਚੁਪਟ੍ਠਪੇਤ੍ਵਾ ਅਞ੍ਞਤ੍ਥ ਲਿਖਿਤਬ੍ਬਂ ਅਞ੍ਞਤ੍ਥ ਲਿਖਨਾਦਿਵਸੇਨ ਪਵਤ੍ਤਿਤਾ ਪਮਾਦਲੇਖਾ ਨਾਮ, ਸਾ ਚ ਸਮਨ੍ਤਪਾਸਾਦਿਕਾਯਂ ਤਤ੍ਥ ਤਤ੍ਥ ਸਯਮੇਵ ਆਵਿਭਵਿਸ੍ਸਤਿ. ਪੁਨ ਯਸ੍ਮਾਤਿ ਪਦਸ੍ਸ ਸਮ੍ਬਨ੍ਧਦਸ੍ਸਨਵਸੇਨ ਅਯਂ ਅਤ੍ਥਯੋਜਨਾ – ਯਸ੍ਮਾ ਅਟ੍ਠਕਥਾਸੁ ਵੁਤ੍ਤਂ ਇਧ ਇਮਸ੍ਮਿਂ ਸਾਸਨੇ ਸਿਕ੍ਖਾਸੁ ਸਗਾਰਵਾਨਂ ਪਣ੍ਡਿਤਾਨਂ ਪਮਾਣਮੇਵ, ਯਸ੍ਮਾ ਚ ਅਯਂ ਵਣ੍ਣਨਾਪਿ ਭਾਸਨ੍ਤਰਪਰਿਚ੍ਚਾਗਾਦਿਮਤ੍ਤਵਿਸਿਟ੍ਠਤਾਯ ਅਤ੍ਥਤੋ ਅਭਿਨ੍ਨਾ, ਤਤੋ ਏਵ ਪਮਾਣਭੂਤਾਵ ਹੇਸ੍ਸਤਿ, ਤਸ੍ਮਾ ਅਨੁਸਿਕ੍ਖਿਤਬ੍ਬਾਤਿ.

ਤਤੋਤਿ ਤਾਹਿ ਅਟ੍ਠਕਥਾਹਿ. ਭਾਸਨ੍ਤਰਮੇਵ ਹਿਤ੍ਵਾਤਿ ਸੀਹਲ਼ਭਾਸਂਯੇਵ ਅਪਨੇਤ੍ਵਾ. ਵਿਤ੍ਥਾਰਮਗ੍ਗਞ੍ਚ ਸਮਾਸਯਿਤ੍ਵਾਤਿ ਪੋਰਾਣਟ੍ਠਕਥਾਸੁ ਯਥਾਠਾਨੇ ਵਤ੍ਤਬ੍ਬਮ੍ਪਿ ਪਦਤ੍ਥਵਿਨਿਚ੍ਛਯਾਦਿਕਂ ਅਤਿਵਿਤ੍ਥਿਣ੍ਣੇਨ ਵਚਨਕ੍ਕਮੇਨ ਚੇਵ ਵੁਤ੍ਤਮੇਵ ਅਤ੍ਥਨਯਂ ਅਪ੍ਪਮਤ੍ਤਕਵਿਸੇਸੇਨ ਪੁਨਪ੍ਪੁਨਂ ਕਥਨੇਨ ਚ ਤਤ੍ਥ ਤਤ੍ਥ ਪਪਞ੍ਚਿਤਂ ਤਾਦਿਸਂ ਵਿਤ੍ਥਾਰਮਗ੍ਗਂ ਪਹਾਯ ਸਲ੍ਲਹੁਕੇਨ ਅਤ੍ਥਵਿਞ੍ਞਾਪਕੇਨ ਪਦਕ੍ਕਮੇਨ ਚੇਵ ਵੁਤ੍ਤਨਯਸਦਿਸਂ ਵਤ੍ਤਬ੍ਬਂ ਅਤਿਦਿਸਿਤ੍ਵਾ ਚ ਸਙ੍ਖੇਪਨਯੇਨੇਵ ਵਣ੍ਣਯਿਸ੍ਸਾਮਾਤਿ ਅਧਿਪ੍ਪਾਯੋ. ਸਾਰਤ੍ਥਦੀਪਨਿਯਂ ਪਨ ਵਿਨਯਟੀਕਾਯਂ ‘‘ਪੋਰਾਣਟ੍ਠਕਥਾਸੁ ਉਪਰਿ ਵੁਚ੍ਚਮਾਨਮ੍ਪਿ ਆਨੇਤ੍ਵਾ ਤਤ੍ਥ ਤਤ੍ਥ ਪਪਞ੍ਚਿਤਂ ਞਤ੍ਤਿਚਤੁਤ੍ਥੇਨ ਕਮ੍ਮੇਨ…ਪੇ… ਉਪਸਮ੍ਪਨ੍ਨੋਤਿ ਭਿਕ੍ਖੂਤਿ ਏਤ੍ਥ ਅਪਲੋਕਨਾਦੀਨਂ ਚਤੁਨ੍ਨਮ੍ਪਿ ਕਮ੍ਮਾਨਂ ਵਿਤ੍ਥਾਰਕਥਾ ਵਿਯ ਤਾਦਿਸਂ ਵਿਤ੍ਥਾਰਮਗ੍ਗਂ ਸਙ੍ਖਿਪਿਤ੍ਵਾ’’ਤਿ ਵੁਤ੍ਤਂ, ਤਂ ਤਨ੍ਤਿਕ੍ਕਮਂ ਕਞ੍ਚਿ ਅਵੋਕ੍ਕਮਿਤ੍ਵਾਤਿ ਏਤ੍ਥੇਵ ਵਤ੍ਤੁਂ ਯੁਤ੍ਤਂ. ਅਞ੍ਞਤ੍ਥ ਪਾਲ਼ਿਯਾ ਵਤ੍ਤਬ੍ਬਂ ਅਞ੍ਞਤ੍ਥ ਕਥਨਞ੍ਹਿ ਤਨ੍ਤਿਕ੍ਕਮਂ ਵੋਕ੍ਕਮਿਤ੍ਵਾ ਕਥਨਂ ਨਾਮ. ਤਥਾ ਹਿ ਵੁਤ੍ਤਂ ‘‘ਤਥੇਵ ਵਣ੍ਣਿਤੁਂ ਯੁਤ੍ਤਰੂਪਂ ਹੁਤ੍ਵਾ ਅਨੁਕ੍ਕਮੇਨ ਆਗਤਂ ਪਾਲ਼ਿਂ ਪਰਿਚ੍ਚਜਿਤ੍ਵਾ ਸਂਵਣ੍ਣਨਤੋ ਸੀਹਲ਼ਟ੍ਠਕਥਾਸੁ ਅਯੁਤ੍ਤਟ੍ਠਾਨੇ ਵਣ੍ਣਿਤਂ ਯਥਾਠਾਨੇਯੇਵ ਵਣ੍ਣਨਤੋ ਚ ਵੁਤ੍ਤਂ ‘ਤਨ੍ਤਿਕ੍ਕਮਂ ਕਞ੍ਚਿ ਅਵੋਕ੍ਕਮਿਤ੍ਵਾ’’’ਤਿ. ਤਸ੍ਮਾ ਯਥਾਵੁਤ੍ਤਨਯੇਨੇਵ ਅਤ੍ਥੋ ਗਹੇਤਬ੍ਬੋ. ਕਥਂ ਪਨ ਵਿਤ੍ਥਾਰਮਗ੍ਗਸ੍ਸ ਸਙ੍ਖਿਪਨੇ ਵਿਨਿਚ੍ਛਯੋ ਨ ਹੀਯਤੀਤਿ? ਆਹ ‘‘ਵਿਨਿਚ੍ਛਯਂ ਸਬ੍ਬਮਸੇਸਯਿਤ੍ਵਾ’’ਤਿ. ਸਙ੍ਖਿਪਨ੍ਤੋਪਿ ਪੁਨਪ੍ਪੁਨਂ ਵਚਨਾਦਿਮੇਵ ਸਙ੍ਖਿਪਨ੍ਤੋ, ਵਿਨਿਚ੍ਛਯਂ ਪਨ ਅਟ੍ਠਕਥਾਸੁ ਸਬ੍ਬਾਸੁਪਿ ਵੁਤ੍ਤਂ ਸਬ੍ਬਮ੍ਪਿ ਅਸੇਸਯਿਤ੍ਵਾ, ਕਿਞ੍ਚਿਮਤ੍ਤਮ੍ਪਿ ਅਪਰਿਹਾਪੇਤ੍ਵਾਤਿ ਵੁਤ੍ਤਂ ਹੋਤਿ. ਤਨ੍ਤਿਕ੍ਕਮਂ ਕਞ੍ਚਿ ਅਵੋਕ੍ਕਮਿਤ੍ਵਾਤਿ ਕਞ੍ਚਿ ਪਾਲ਼ਿਕ੍ਕਮਂ ਅਨਤਿਕ੍ਕਮਿਤ੍ਵਾ, ਅਨੁਕ੍ਕਮੇਨੇਵ ਪਾਲ਼ਿਂ ਵਣ੍ਣਯਿਸ੍ਸਾਮਾਤਿ ਅਤ੍ਥੋ.

ਸੁਤ੍ਤਨ੍ਤਿਕਾਨਂ ਵਚਨਾਨਮਤ੍ਥਨ੍ਤਿ ਵੇਰਞ੍ਜਕਣ੍ਡਾਦੀਸੁ ਆਗਤਾਨਂ ਝਾਨਕਥਾਦੀਨਂ ਸੁਤ੍ਤਨ੍ਤਵਚਨਾਨਂ ਸੀਹਲ਼ਟ੍ਠਕਥਾਸੁ ‘‘ਸੁਤ੍ਤਨ੍ਤਿਕਾਨਂ ਭਾਰੋ’’ਤਿ ਵਤ੍ਵਾ ਅਵਣ੍ਣਿਤਬ੍ਬਟ੍ਠਾਨਂ ਅਤ੍ਥਂ ਤਂਤਂਸੁਤ੍ਤਾਨੁਰੂਪਂ ਸਬ੍ਬਸੋ ਪਰਿਦੀਪਯਿਸ੍ਸਾਮਾਤਿ ਅਧਿਪ੍ਪਾਯੋ. ਹੇਸ੍ਸਤੀਤਿ ਭਵਿਸ੍ਸਤਿ, ਕਰੀਯਿਸ੍ਸਤੀਤਿ ਵਾ ਅਤ੍ਥੋ. ਏਤ੍ਥ ਚ ਪਠਮਸ੍ਮਿਂ ਅਤ੍ਥਵਿਕਪ੍ਪੇ ‘‘ਭਾਸਨ੍ਤਰਪਰਿਚ੍ਚਾਗਾਦਿਕਂ ਚਤੁਬ੍ਬਿਧਂ ਕਿਚ੍ਚਂ ਨਿਪ੍ਫਾਦੇਤ੍ਵਾ ਸੁਤ੍ਤਨ੍ਤਿਕਾਨਂ ਵਚਨਾਨਮਤ੍ਥਂ ਪਰਿਦੀਪਯਨ੍ਤੀ ਅਯਂ ਵਣ੍ਣਨਾ ਭਵਿਸ੍ਸਤੀ’’ਤਿ ਵਣ੍ਣਨਾਵਸੇਨ ਸਮਾਨਕਤ੍ਤੁਕਤਾ ਵੇਦਿਤਬ੍ਬਾ. ਪਚ੍ਛਿਮਸ੍ਮਿਂ ਅਤ੍ਥਵਿਕਪ੍ਪੇ ਪਨ ‘‘ਹੇਟ੍ਠਾ ਵੁਤ੍ਤਭਾਸਨ੍ਤਰਪਰਿਚ੍ਚਾਗਾਦਿਕਂ ਕਤ੍ਵਾ ਸੁਤ੍ਤਨ੍ਤਿਕਾਨਂ ਵਚਨਾਨਮਤ੍ਥਂ ਪਰਿਦੀਪਯਨ੍ਤੀ ਅਯਂ ਵਣ੍ਣਨਾ ਅਮ੍ਹੇਹਿ ਕਰੀਯਿਸ੍ਸਤੀ’’ਤਿ ਏਵਂ ਆਚਰਿਯਵਸੇਨ ਸਮਾਨਕਤ੍ਤੁਕਤਾ ਵੇਦਿਤਬ੍ਬਾ.

ਗਨ੍ਥਾਰਮ੍ਭਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਬਾਹਿਰਨਿਦਾਨਕਥਾ

ਇਦਾਨਿ ਸਂਵਰਵਿਨਯਪਹਾਨਵਿਨਯਾਦੀਸੁ ਬਹੂਸੁ ਵਿਨਯੇਸੁ ਅਤ੍ਤਨਾ ‘‘ਤਂ ਵਣ੍ਣਯਿਸ੍ਸਂ ਵਿਨਯ’’ਨ੍ਤਿ ਏਵਂ ਸਂਵਣ੍ਣੇਤਬ੍ਬਭਾਵੇਨ ਪਟਿਞ੍ਞਾਤਂ ਵਿਨਯਂ ਦਸ੍ਸੇਨ੍ਤੋ ਆਹ ਤਤ੍ਥਾਤਿਆਦਿ. ਤਤ੍ਥ ਤਤ੍ਥਾਤਿ ਯਥਾਵੁਤ੍ਤਾਸੁ ਗਾਥਾਸੁ. ਤਾਵ-ਸਦ੍ਦੋ ਪਠਮਨ੍ਤਿ ਇਮਸ੍ਮਿਂ ਅਤ੍ਥੇ ਦਟ੍ਠਬ੍ਬੋ, ਤੇਨ ਪਠਮਂ ਵਿਨਯਂ ਵਵਤ੍ਥਪੇਤ੍ਵਾ ਪਚ੍ਛਾ ਤਸ੍ਸ ਵਣ੍ਣਨਂ ਕਰਿਸ੍ਸਾਮਾਤਿ ਦੀਪੇਤਿ. ਵਵਤ੍ਥਪੇਤਬ੍ਬੋਤਿ ਨਿਯਮੇਤਬ੍ਬੋ. ਤੇਨੇਤਂ ਵੁਚ੍ਚਤੀਤਿ ਯਸ੍ਮਾ ਵਵਤ੍ਥਪੇਤਬ੍ਬੋ, ਤੇਨ ਹੇਤੁਨਾ ਏਤਂ ਵਿਨਯੋ ਨਾਮਾਤਿਆਦਿਕਂ ਨਿਯਾਮਕਵਚਨਂ ਵੁਚ੍ਚਤੀਤਿ ਅਤ੍ਥੋ. ਅਸ੍ਸਾਤਿ ਵਿਨਯਸ੍ਸ. ਮਾਤਿਕਾਤਿ ਉਦ੍ਦੇਸੋ. ਸੋ ਹਿ ਨਿਦ੍ਦੇਸਪਦਾਨਂ ਜਨਨੀਠਾਨੇ ਠਿਤਤ੍ਤਾ ਮਾਤਾ ਵਿਯਾਤਿ ‘‘ਮਾਤਿਕਾ’’ਤਿ ਵੁਚ੍ਚਤਿ.

ਇਦਾਨਿ ਸਂਵਣ੍ਣੇਤਬ੍ਬਮਤ੍ਥਂ ਮਾਤਿਕਂ ਪਟ੍ਠਪੇਤ੍ਵਾ ਦਸ੍ਸੇਨ੍ਤੋ ਆਹ ਵੁਤ੍ਤਂ ਯੇਨਾਤਿਆਦਿ. ਇਦਂ ਵੁਤ੍ਤਂ ਹੋਤਿ – ਏਤਂ ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਰਞ੍ਜਾਯਂ ਵਿਹਰਤੀਤਿਆਦਿਨਿਦਾਨਵਚਨਪਟਿਮਣ੍ਡਿਤਂ ਵਿਨਯਪਿਟਕਂ ਯੇਨ ਪੁਗ੍ਗਲੇਨ ਵੁਤ੍ਤਂ, ਯਸ੍ਮਿਂ ਕਾਲੇ ਵੁਤ੍ਤਂ, ਯਸ੍ਮਾ ਕਾਰਣਾ ਵੁਤ੍ਤਂ, ਯੇਨ ਧਾਰਿਤਂ, ਯੇਨ ਚ ਆਭਤਂ, ਯੇਸੁ ਪਤਿਟ੍ਠਿਤਂ, ਏਤਂ ਯਥਾਵੁਤ੍ਤਵਿਧਾਨਂ ਵਤ੍ਵਾ ਤਤੋ ਤੇਨ ਸਮਯੇਨਾਤਿਆਦਿਪਾਠਸ੍ਸ ਅਤ੍ਥਂ ਅਨੇਕਪ੍ਪਕਾਰਤੋ ਦਸ੍ਸੇਨ੍ਤੋ ਵਿਨਯਸ੍ਸ ਅਤ੍ਥਵਣ੍ਣਨਂ ਕਰਿਸ੍ਸਾਮੀਤਿ.

ਏਤ੍ਥ ਚ ਵੁਤ੍ਤਂ ਯੇਨ ਯਦਾ ਯਸ੍ਮਾਤਿ ਇਦਂ ਵਚਨਂ ਤੇਨ ਸਮਯੇਨ ਬੁਦ੍ਧੋ ਭਗਵਾਤਿਆਦਿਨਿਦਾਨਵਚਨਮਤ੍ਤਂ ਅਪੇਕ੍ਖਿਤ੍ਵਾ ਵਤ੍ਤੁਕਾਮੋਪਿ ਵਿਸੁਂ ਅਵਤ੍ਵਾ ‘‘ਨਿਦਾਨੇਨ ਆਦਿਕਲ੍ਯਾਣਂ, ਇਦਮਵੋਚਾਤਿ ਨਿਗਮਨੇਨ ਪਰਿਯੋਸਾਨਕਲ੍ਯਾਣ’’ਨ੍ਤਿ ਵਚਨਤੋ ਨਿਦਾਨਨਿਗਮਨਾਨਿਪਿ ਸਤ੍ਥੁਦੇਸਨਾਯ ਅਨੁਵਿਧਾਨਤ੍ਤਾ ਤਦਨ੍ਤੋਗਧਾਨੇਵਾਤਿ ਨਿਦਾਨਸ੍ਸਾਪਿ ਵਿਨਯਪਾਲ਼ਿਯਂਯੇਵ ਅਨ੍ਤੋਗਧਤ੍ਤਾ ਵੁਤ੍ਤਂ ਯੇਨ ਯਦਾ ਯਸ੍ਮਾਤਿ ਇਦਮ੍ਪਿ ਵਿਨਯਪਿਟਕਸਮ੍ਬਨ੍ਧਂਯੇਵ ਕਤ੍ਵਾ ਮਾਤਿਕਂ ਠਪੇਤਿ. ਮਾਤਿਕਾਯ ਹਿ ਏਤਨ੍ਤਿ ਵੁਤ੍ਤਂ ਵਿਨਯਪਿਟਕਂਯੇਵ ਸਾਮਞ੍ਞਤੋ ਸਬ੍ਬਤ੍ਥ ਸਮ੍ਬਨ੍ਧਮੁਪਗਚ੍ਛਤਿ.

ਇਦਾਨਿ ਪਨ ਤਂ ਵਿਸੁਂ ਨੀਹਰਿਤ੍ਵਾ ਦਸ੍ਸੇਨ੍ਤੋ ਤਤ੍ਥ ਵੁਤ੍ਤਂ ਯੇਨਾਤਿਆਦਿਮਾਹ. ਤਤ੍ਥਾਤਿ ਤੇਸੁ ਮਾਤਿਕਾਪਦੇਸੁ. ਇਦਨ੍ਤਿ ਤੇਨ ਸਮਯੇਨਾਤਿਆਦਿਨਿਦਾਨਵਚਨਂ. ਹਿ-ਸਦ੍ਦੋ ਯਸ੍ਮਾਤਿ ਅਤ੍ਥੋ ਦਟ੍ਠਬ੍ਬੋ, ਯਸ੍ਮਾ ਬੁਦ੍ਧਸ੍ਸ ਭਗਵਤੋ ਅਤ੍ਤਪਚ੍ਚਕ੍ਖਵਚਨਂ ਨ ਹੋਤਿ, ਤਸ੍ਮਾਤਿ ਵੁਤ੍ਤਂ ਹੋਤਿ. ਅਤ੍ਤਪਚ੍ਚਕ੍ਖਵਚਨਂ ਨ ਹੋਤੀਤਿ ਅਤ੍ਤਨਾ ਪਚ੍ਚਕ੍ਖਂ ਕਤ੍ਵਾ ਵੁਤ੍ਤਵਚਨਂ ਨ ਹੋਤਿ. ਅਥ ਵਾ ਅਤ੍ਤਨੋ ਪਚ੍ਚਕ੍ਖਕਾਲੇ ਧਰਮਾਨਕਾਲੇ ਵੁਤ੍ਤਵਚਨਂ ਨ ਹੋਤਿ. ਤਦੁਭਯੇਨਾਪਿ ਭਗਵਤੋ ਵੁਤ੍ਤਵਚਨਂ ਨ ਹੋਤੀਤਿ ਅਤ੍ਥੋ.

ਪਠਮਮਹਾਸਙ੍ਗੀਤਿਕਥਾਵਣ੍ਣਨਾ

ਪਠਮਮਹਾਸਙ੍ਗੀਤਿ ਨਾਮ ਚੇਸਾਤਿ ਏਤ੍ਥ ਚ-ਸਦ੍ਦੋ ਵਤ੍ਤਬ੍ਬਸਮ੍ਪਿਣ੍ਡਨਤ੍ਥੋ, ਉਪਞ੍ਞਾਸਤ੍ਥੋ ਵਾ, ਉਪਞ੍ਞਾਸੋਤਿ ਚ ਵਾਕ੍ਯਾਰਮ੍ਭੋ ਵੁਚ੍ਚਤਿ. ਏਸਾ ਹਿ ਗਨ੍ਥਕਾਰਾਨਂ ਪਕਤਿ, ਯਦਿਦਂ ਕਿਞ੍ਚਿ ਵਤ੍ਵਾ ਪੁਨ ਅਪਰਂ ਵਤ੍ਤੁਮਾਰਭਨ੍ਤਾਨਂ ਚ-ਸਦ੍ਦਪ੍ਪਯੋਗੋ. ਯਥਾਪਚ੍ਚਯਂ ਤਤ੍ਥ ਤਤ੍ਥ ਦੇਸਿਤਤ੍ਤਾ ਵਿਪ੍ਪਕਿਣ੍ਣਾਨਂ ਧਮ੍ਮਵਿਨਯਾਨਂ ਸਭਾਗਤ੍ਥਵਸੇਨ ਸਙ੍ਗਹੇਤ੍ਵਾ ਗਾਯਨਂ ਕਥਨਂ ਸਙ੍ਗੀਤਿ, ਮਹਾਵਿਸਯਤ੍ਤਾ ਪੂਜਨੀਯਤ੍ਤਾ ਚ ਮਹਤੀ ਸਙ੍ਗੀਤਿ ਮਹਾਸਙ੍ਗੀਤਿ. ਦੁਤਿਯਾਦਿਂ ਉਪਾਦਾਯ ਚੇਸਾ ‘‘ਪਠਮਮਹਾਸਙ੍ਗੀਤੀ’’ਤਿ ਵੁਤ੍ਤਾ. ਨਿਦਦਾਤਿ ਦੇਸਨਂ ਦੇਸਕਾਲਾਦਿਵਸੇਨ ਅਵਿਦਿਤਂ ਵਿਦਿਤਂ ਕਤ੍ਵਾ ਨਿਦਸ੍ਸੇਤੀਤਿ ਨਿਦਾਨਂ, ਤਤ੍ਥ ਕੋਸਲ੍ਲਤ੍ਥਂ.

ਵੇਨੇਯ੍ਯਾਨਂ ਮਗ੍ਗਫਲੁਪ੍ਪਤ੍ਤਿਹੇਤੁਭੂਤਾਵ ਕਿਰਿਯਾ ਨਿਪ੍ਪਰਿਯਾਯੇਨ ਬੁਦ੍ਧਕਿਚ੍ਚਨ੍ਤਿ ਆਹ ‘‘ਧਮ੍ਮਚਕ੍ਕਪ੍ਪਵਤ੍ਤਨਞ੍ਹਿ ਆਦਿਂ ਕਤ੍ਵਾ’’ਤਿ. ਤਤ੍ਥ ਸਤਿਪਟ੍ਠਾਨਾਦਿਧਮ੍ਮੋ ਏਵ ਪਵਤ੍ਤਨਟ੍ਠੇਨ ਚਕ੍ਕਨ੍ਤਿ ਧਮ੍ਮਚਕ੍ਕਂ, ਚਕ੍ਕਨ੍ਤਿ ਵਾ ਆਣਾ, ਤਂ ਧਮ੍ਮਤੋ ਅਨਪੇਤਤ੍ਤਾ ਧਮ੍ਮਚਕ੍ਕਂ, ਧਮ੍ਮੇਨ ਞਾਯੇਨ ਚਕ੍ਕਨ੍ਤਿਪਿ ਧਮ੍ਮਚਕ੍ਕਂ. ਕਤਬੁਦ੍ਧਕਿਚ੍ਚੇਤਿ ਨਿਟ੍ਠਿਤਬੁਦ੍ਧਕਿਚ੍ਚੇ ਭਗਵਤਿ ਲੋਕਨਾਥੇਤਿ ਸਮ੍ਬਨ੍ਧੋ. ਕੁਸਿਨਾਰਾਯਨ੍ਤਿ ਸਮੀਪਤ੍ਥੇ ਏਤਂ ਭੁਮ੍ਮਵਚਨਂ. ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇਤਿ ਤਸ੍ਸ ਨਗਰਸ੍ਸ ਉਪਵਤ੍ਤਨਭੂਤਂ ਮਲ੍ਲਰਾਜੂਨਂ ਸਾਲਵਨੁਯ੍ਯਾਨਂ ਦਸ੍ਸੇਤਿ. ਤਤ੍ਥ ਨਗਰਂ ਪਵਿਸਨ੍ਤਾ ਉਯ੍ਯਾਨਤੋ ਉਪੇਚ੍ਚ ਵਤ੍ਤਨ੍ਤਿ ਗਚ੍ਛਨ੍ਤਿ ਏਤੇਨਾਤਿ ‘‘ਉਪਵਤ੍ਤਨ’’ਨ੍ਤਿ ਉਯ੍ਯਾਨਸ੍ਸ ਚ ਨਗਰਸ੍ਸ ਚ ਮਜ੍ਝੇ ਸਾਲਵਨਂ ਵੁਚ੍ਚਤਿ. ਕੁਸਿਨਾਰਾਯ ਹਿ ਦਕ੍ਖਿਣਪਚ੍ਛਿਮਦਿਸਾਯ ਤਂ ਉਯ੍ਯਾਨਂ ਹੋਤਿ, ਤਤੋ ਉਯ੍ਯਾਨਤੋ ਸਾਲਵਨਰਾਜਿਵਿਰਾਜਿਤੋ ਮਗ੍ਗੋ ਪਾਚੀਨਾਭਿਮੁਖੋ ਗਨ੍ਤ੍ਵਾ ਨਗਰਸ੍ਸ ਦਕ੍ਖਿਣਦ੍ਵਾਰਾਭਿਮੁਖੋ ਉਤ੍ਤਰੇਨ ਨਿਵਤ੍ਤੋ, ਤੇਨ ਮਗ੍ਗੇਨ ਮਨੁਸ੍ਸਾ ਨਗਰਂ ਪਵਿਸਨ੍ਤਿ, ਤਸ੍ਮਾ ਤਂ ‘‘ਉਪਵਤ੍ਤਨ’’ਨ੍ਤਿ ਵੁਚ੍ਚਤਿ. ਤਤ੍ਥ ਕਿਰ ਉਪਵਤ੍ਤਨੇ ਅਞ੍ਞਮਞ੍ਞਸਂਸਟ੍ਠਵਿਟਪਾਨਂ ਸਮ੍ਪਨ੍ਨਛਾਯਾਨਂ ਸਾਲਪਨ੍ਤੀਨਮਨ੍ਤਰੇ ਭਗਵਤੋ ਪਰਿਨਿਬ੍ਬਾਨਮਞ੍ਚੋ ਪਞ੍ਞਤ੍ਤੋ, ਤਂ ਸਨ੍ਧਾਯ ਵੁਤ੍ਤਂ ‘‘ਯਮਕਸਾਲਾਨਮਨ੍ਤਰੇ’’ਤਿ. ਉਪਾਦੀਯਤਿ ਕਮ੍ਮਕਿਲੇਸੇਹੀਤਿ ਉਪਾਦਿ, ਵਿਪਾਕਕ੍ਖਨ੍ਧਾ ਕਟਤ੍ਤਾ ਚ ਰੂਪਂ. ਤਦੇਵ ਕਮ੍ਮਕਿਲੇਸੇਹਿ ਸਮ੍ਮਾ ਅਪ੍ਪਹੀਨਤਾਯ ਸੇਸੋ, ਨਤ੍ਥਿ ਏਤ੍ਥ ਉਪਾਦਿਸੇਸੋਤਿ ਅਨੁਪਾਦਿਸੇਸਾ, ਨਿਬ੍ਬਾਨਧਾਤੁ, ਤਾਯ. ਇਤ੍ਥਮ੍ਭੂਤਲਕ੍ਖਣੇ ਚਾਯਂ ਕਰਣਨਿਦ੍ਦੇਸੋ. ਪਰਿਨਿਬ੍ਬਾਨੇਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਪਰਿਨਿਬ੍ਬਾਨਹੇਤੁ ਤਸ੍ਮਿਂ ਠਾਨੇ ਸਨ੍ਨਿਪਤਿਤਾਨਨ੍ਤਿ ਅਤ੍ਥੋ. ਸਙ੍ਘਸ੍ਸ ਥੇਰੋ ਜੇਟ੍ਠੋ ਸਙ੍ਘਤ੍ਥੇਰੋ. ਏਤ੍ਥ ਚ ਸਙ੍ਘਸਦ੍ਦਸ੍ਸ ਭਿਕ੍ਖੁਸਤਸਹਸ੍ਸਸਦ੍ਦਸਾਪੇਕ੍ਖਤ੍ਤੇਪਿ ਗਮਕਤ੍ਤਾ ਥੇਰਸਦ੍ਦੇਨ ਸਮਾਸੋ ਯਥਾ ਦੇਵਦਤ੍ਤਸ੍ਸ ਗਰੁਕੁਲਨ੍ਤਿ. ਆਯਸ੍ਮਾ ਮਹਾਕਸ੍ਸਪੋ ਧਮ੍ਮਵਿਨਯਸਙ੍ਗਾਯਨਤ੍ਥਂ ਭਿਕ੍ਖੂਨਂ ਉਸ੍ਸਾਹਂ ਜਨੇਸੀਤਿ ਸਮ੍ਬਨ੍ਧੋ.

ਤਥਾ ਉਸ੍ਸਾਹਂ ਜਨਨਸ੍ਸ ਕਾਰਣਮਾਹ ਸਤ੍ਤਾਹਪਰਿਨਿਬ੍ਬੁਤੇਤਿਆਦਿ. ਸਤ੍ਤ ਅਹਾਨਿ ਸਮਾਹਟਾਨਿ ਸਤ੍ਤਾਹਂ, ਸਤ੍ਤਾਹਂ ਪਰਿਨਿਬ੍ਬੁਤਸ੍ਸ ਅਸ੍ਸਾਤਿ ਸਤ੍ਤਾਹਪਰਿਨਿਬ੍ਬੁਤੋ, ਸਤ੍ਤਾਹਪਰਿਨਿਬ੍ਬੁਤੇ ਸੁਭਦ੍ਦੇਨ ਵੁਡ੍ਢਪਬ੍ਬਜਿਤੇਨ ਵੁਤ੍ਤਵਚਨਮਨੁਸ੍ਸਰਨ੍ਤੋਤਿ ਸਮ੍ਬਨ੍ਧੋ. ਅਲਂ, ਆਵੁਸੋਤਿਆਦਿਨਾ ਤੇਨ ਵੁਤ੍ਤਵਚਨਂ ਦਸ੍ਸੇਤਿ. ਤਤ੍ਥ ਅਲਨ੍ਤਿ ਪਟਿਕ੍ਖੇਪਵਚਨਂ. ਤੇਨ ਮਹਾਸਮਣੇਨਾਤਿ ਨਿਸ੍ਸਕ੍ਕੇ ਕਰਣਵਚਨਂ, ਤਤੋ ਮਹਾਸਮਣਤੋ ਸੁਟ੍ਠੁ ਮੁਤ੍ਤਾ ਮਯਨ੍ਤਿ ਅਤ੍ਥੋ, ਉਪਦ੍ਦੁਤਾ ਚ ਹੋਮ ਤਦਾਤਿ ਅਧਿਪ੍ਪਾਯੋ, ਹੋਮਾਤਿ ਵਾ ਅਤੀਤਤ੍ਥੇ ਵਤ੍ਤਮਾਨਵਚਨਂ, ਅਹੁਮ੍ਹਾਤਿ ਅਤ੍ਥੋ. ਠਾਨਂ ਖੋ ਪਨੇਤਂ ਵਿਜ੍ਜਤੀਤਿ ਤਿਟ੍ਠਤਿ ਏਤ੍ਥ ਫਲਂ ਤਦਾਯਤ੍ਤਵੁਤ੍ਤਿਤਾਯਾਤਿ ਠਾਨਂ, ਹੇਤੁ. ਖੋਤਿ ਅਵਧਾਰਣੇ, ਏਤਂ ਕਾਰਣਂ ਵਿਜ੍ਜਤੇਵ, ਨੋ ਨ ਵਿਜ੍ਜਤੀਤਿ ਅਤ੍ਥੋ. ਕਿਂ ਤਂ ਕਾਰਣਨ੍ਤਿ? ਆਹ ਯਂ ਪਾਪਭਿਕ੍ਖੂਤਿਆਦਿ. ਏਤ੍ਥ ਯਨ੍ਤਿ ਨਿਪਾਤਮਤ੍ਤਂ, ਕਾਰਣਨਿਦ੍ਦੇਸੋ ਵਾ, ਯੇਨ ਕਾਰਣੇਨ ਅਨ੍ਤਰਧਾਪੇਯ੍ਯੁਂ, ਤਦੇਤਂ ਕਾਰਣਂ ਵਿਜ੍ਜਤੀਤਿ ਅਤ੍ਥੋ. ਅਤੀਤੋ ਅਤਿਕ੍ਕਨ੍ਤੋ ਸਤ੍ਥਾ ਏਤ੍ਥ, ਏਤਸ੍ਸਾਤਿ ਵਾ ਅਤੀਤਸਤ੍ਥੁਕਂ, ਪਾਵਚਨਂ. ਪਧਾਨਂ ਵਚਨਂ ਪਾਵਚਨਂ, ਧਮ੍ਮਵਿਨਯਨ੍ਤਿ ਵੁਤ੍ਤਂ ਹੋਤਿ. ਪਕ੍ਖਂ ਲਭਿਤ੍ਵਾਤਿ ਅਲਜ੍ਜੀਪਕ੍ਖਂ ਲਭਿਤ੍ਵਾ. ਨ ਚਿਰਸ੍ਸੇਵਾਤਿ ਨ ਚਿਰੇਨੇਵ. ਯਾਵ ਚ ਧਮ੍ਮਵਿਨਯੋ ਤਿਟ੍ਠਤੀਤਿ ਯਤ੍ਤਕਂ ਕਾਲਂ ਧਮ੍ਮੋ ਚ ਵਿਨਯੋ ਚ ਲਜ੍ਜੀਪੁਗ੍ਗਲੇਸੁ ਤਿਟ੍ਠਤਿ.

ਵੁਤ੍ਤਞ੍ਹੇਤਂ ਭਗਵਤਾਤਿ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨੇਨ ਭਗਵਤਾ ਵੁਤ੍ਤਨ੍ਤਿ ਅਤ੍ਥੋ. ਦੇਸਿਤੋ ਪਞ੍ਞਤ੍ਤੋਤਿ ਸੁਤ੍ਤਾਭਿਧਮ੍ਮਪਿਟਕਸਙ੍ਗਹਿਤਸ੍ਸ ਧਮ੍ਮਸ੍ਸ ਚੇਵ ਵਿਨਯਪਿਟਕਸਙ੍ਗਹਿਤਸ੍ਸ ਵਿਨਯਸ੍ਸ ਚ ਅਤਿਸਜ੍ਜਨਂ ਪਬੋਧਨਂ ਦੇਸਨਾ. ਤਸ੍ਸੇਵ ਪਕਾਰਤੋ ਞਾਪਨਂ ਅਸਙ੍ਕਰਤੋ ਠਪਨਂ ਪਞ੍ਞਾਪਨਂ. ਸੋ ਵੋ ਮਮਚ੍ਚਯੇਨ ਸਤ੍ਥਾਤਿ ਸੋ ਧਮ੍ਮਵਿਨਯੋ ਤੁਮ੍ਹਾਕਂ ਮਮਚ੍ਚਯੇਨ ਸਤ੍ਥਾ ਮਯਿ ਪਰਿਨਿਬ੍ਬੁਤੇ ਸਤ੍ਥੁਕਿਚ੍ਚਂ ਸਾਧੇਸ੍ਸਤਿ. ਸਾਸਨਨ੍ਤਿ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਂ ਸਾਸਨਂ, ਨਿਪ੍ਪਰਿਯਾਯਤੋ ਪਨ ਸਤ੍ਤਤ੍ਤਿਂਸ ਬੋਧਿਪਕ੍ਖਿਯਧਮ੍ਮਾ. ਅਦ੍ਧਨਿਯਨ੍ਤਿ ਅਦ੍ਧਾਨਕ੍ਖਮਂ, ਤਦੇਵ ਚਿਰਟ੍ਠਿਤਿਕਂ ਅਸ੍ਸ ਭਵੇਯ੍ਯਾਤਿ ਸਮ੍ਬਨ੍ਧੋ.

ਇਦਾਨਿ ਸਮ੍ਮਾਸਮ੍ਬੁਦ੍ਧੇਨ ਅਤ੍ਤਨੋ ਕਤਂ ਅਨੁਗ੍ਗਹਵਿਸੇਸਂ ਵਿਭਾਵੇਨ੍ਤੋ ਆਹ ਯਞ੍ਚਾਹਂ ਭਗਵਤਾਤਿਆਦਿ. ਤਤ੍ਥ ਯਞ੍ਚਾਹਨ੍ਤਿ ਏਤਸ੍ਸ ਅਨੁਗ੍ਗਹਿਤੋਤਿ ਏਤੇਨ ਸਮ੍ਬਨ੍ਧੋ. ਤਤ੍ਥ ਯਨ੍ਤਿ ਯਸ੍ਮਾ, ਯੇਨ ਕਾਰਣੇਨਾਤਿ ਵੁਤ੍ਤਂ ਹੋਤਿ. ਕਿਰਿਯਾਪਰਾਮਸਨਂ ਵਾ ਏਤਂ, ਤੇਨ ਅਨੁਗ੍ਗਹਿਤੋਤਿ ਏਤ੍ਥ ਅਨੁਗ੍ਗਹਣਂ ਪਰਾਮਸਤਿ. ਧਾਰੇਸ੍ਸਸੀਤਿਆਦਿਕਂ ਭਗਵਤਾ ਮਹਾਕਸ੍ਸਪਤ੍ਥੇਰੇਨ ਸਦ੍ਧਿਂ ਚੀਵਰਪਰਿਵਤ੍ਤਨਂ ਕਾਤੁਕਾਮੇਨ ਵੁਤ੍ਤਵਚਨਂ. ਧਾਰੇਸ੍ਸਸਿ ਪਨ ਮੇ ਤ੍ਵਂ ਕਸ੍ਸਪਾਤਿ ‘‘ਕਸ੍ਸਪ, ਤ੍ਵਂ ਇਮਾਨਿ ਪਰਿਭੋਗਜਿਣ੍ਣਾਨਿ ਪਂਸੁਕੂਲਾਨਿ ਪਾਰੁਪਿਤੁਂ ਸਕ੍ਖਿਸ੍ਸਸੀ’’ਤਿ ਵਦਤਿ, ਤਞ੍ਚ ਖੋ ਨ ਕਾਯਬਲਂ ਸਨ੍ਧਾਯ, ਪਟਿਪਤ੍ਤਿਪੂਰਣਂ ਪਨ ਸਨ੍ਧਾਯ ਏਵਮਾਹ. ਸਾਣਾਨਿ ਪਂਸੁਕੂਲਾਨੀਤਿ ਮਤਕਲ਼ੇਵਰਂ ਪਲਿਵੇਠੇਤ੍ਵਾ ਛਡ੍ਡਿਤਾਨਿ ਤੁਮ੍ਬਮਤ੍ਤੇ ਕਿਮਯੋ ਪਪ੍ਫੋਟੇਤ੍ਵਾ ਗਹਿਤਾਨਿ ਸਾਣਵਾਕਮਯਾਨਿ ਪਂਸੁਕੂਲਚੀਵਰਾਨਿ. ਰਥਿਕਾਦੀਨਂ ਯਤ੍ਥ ਕਤ੍ਥਚਿ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਤੇਸੁ ਕੂਲਮਿਵਾਤਿ ਪਂਸੁਕੂਲਂ. ਅਥ ਵਾ ਪਂਸੁ ਵਿਯ ਕੁਚ੍ਛਿਤਭਾਵਂ ਉਲਤਿ ਗਚ੍ਛਤੀਤਿ ਪਂਸੁਕੂਲਨ੍ਤਿ ਪਂਸੁਕੂਲਸਦ੍ਦਸ੍ਸ ਅਤ੍ਥੋ ਦਟ੍ਠਬ੍ਬੋ. ਨਿਬ੍ਬਸਨਾਨੀਤਿ ਨਿਟ੍ਠਿਤਵਸਨਕਿਚ੍ਚਾਨਿ, ਪਰਿਭੋਗਜਿਣ੍ਣਾਨੀਤਿ ਅਤ੍ਥੋ. ਏਕਮੇਵ ਤਂ ਚੀਵਰਂ ਅਨੇਕਾਵਯਵਤ੍ਤਾ ਬਹੁਵਚਨਂ ਕਤਂ. ਸਾਧਾਰਣਪਰਿਭੋਗੇਨਾਤਿ ਅਤ੍ਤਨਾ ਸਮਾਨਪਰਿਭੋਗੇਨ, ਸਾਧਾਰਣਪਰਿਭੋਗੇਨ ਚ ਸਮਸਮਟ੍ਠਪਨੇਨ ਚ ਅਨੁਗ੍ਗਹਿਤੋਤਿ ਸਮ੍ਬਨ੍ਧੋ.

ਇਦਾਨਿ ਨਵਾਨੁਪੁਬ੍ਬਵਿਹਾਰਛਲ਼ਭਿਞ੍ਞਾਪ੍ਪਭੇਦੇ ਉਤ੍ਤਰਿਮਨੁਸ੍ਸਧਮ੍ਮੇ ਅਤ੍ਤਨਾ ਸਮਸਮਟ੍ਠਪਨਤ੍ਥਾਯ ਭਗਵਤਾ ਵੁਤ੍ਤਂ ਕਸ੍ਸਪਸਂਯੁਤ੍ਤੇ (ਸਂ. ਨਿ. ੨.੧੫੨) ਆਗਤਂ ਪਾਲ਼ਿਂ ਪੇਯ੍ਯਾਲਮੁਖੇਨ ਆਦਿਗ੍ਗਹਣੇਨ ਚ ਸਙ੍ਖਿਪਿਤ੍ਵਾ ਦਸ੍ਸੇਨ੍ਤੋ ਆਹ ਅਹਂ, ਭਿਕ੍ਖਵੇਤਿਆਦਿ. ਤਤ੍ਥ ਯਾਵਦੇ ਆਕਙ੍ਖਾਮੀਤਿ ਯਾਵਦੇਵ ਆਕਙ੍ਖਾਮਿ, ਯਤ੍ਤਕਂ ਕਾਲਂ ਇਚ੍ਛਾਮੀਤਿ ਅਤ੍ਥੋ, ‘‘ਯਾਵਦੇਵਾ’’ਤਿਪਿ ਪਾਠੋ. ਨਵਾਨੁਪੁਬ੍ਬਵਿਹਾਰਛਲ਼ਭਿਞ੍ਞਾਪ੍ਪਭੇਦੇਤਿ ਏਤ੍ਥ ਨਵਾਨੁਪੁਬ੍ਬਵਿਹਾਰੋ ਨਾਮ ਅਨੁਪਟਿਪਾਟਿਯਾ ਸਮਾਪਜ੍ਜਿਤਬ੍ਬਭਾਵਤੋ ਏਵਂਸਞ੍ਞਿਤਾ ਨਿਰੋਧਸਮਾਪਤ੍ਤਿਯਾ ਸਹ ਅਟ੍ਠ ਰੂਪਾਰੂਪਸਮਾਪਤ੍ਤਿਯੋ. ਛਲ਼ਭਿਞ੍ਞਾ ਨਾਮ ਆਸਵਕ੍ਖਯਞਾਣੇਨ ਸਦ੍ਧਿਂ ਪਞ੍ਚਾਭਿਞ੍ਞਾਯੋ. ਅਤ੍ਤਨਾ ਸਮਸਮਟ੍ਠਪਨੇਨਾਤਿ ‘‘ਅਹਂ ਯਤ੍ਤਕਂ ਕਾਲਂ ਯਤ੍ਤਕੇ ਸਮਾਪਤ੍ਤਿਵਿਹਾਰੇ ਅਭਿਞ੍ਞਾਯੋ ਚ ਵਲ਼ਞ੍ਜੇਮਿ, ਤਥਾ ਕਸ੍ਸਪੋਪੀ’’ਤਿ ਏਵਂ ਯਥਾਵੁਤ੍ਤਉਤ੍ਤਰਿਮਨੁਸ੍ਸਧਮ੍ਮੇ ਅਤ੍ਤਨਾ ਸਮਸਮਂ ਕਤ੍ਵਾ ਠਪਨੇਨ, ਇਦਞ੍ਚ ਉਤ੍ਤਰਿਮਨੁਸ੍ਸਧਮ੍ਮਸਾਮਞ੍ਞੇਨ ਥੇਰਸ੍ਸ ਪਸਂਸਾਮਤ੍ਤੇਨ ਵੁਤ੍ਤਂ, ਨ ਭਗਵਤਾ ਸਦ੍ਧਿਂ ਸਬ੍ਬਥਾ ਸਮਤਾਯ. ਭਗਵਤੋ ਹਿ ਗੁਣਵਿਸੇਸਂ ਉਪਾਦਾਯ ਸਾਵਕਾ ਪਚ੍ਚੇਕਬੁਦ੍ਧਾ ਚ ਕਲਮ੍ਪਿ ਕਲਭਾਗਮ੍ਪਿ ਨ ਉਪੇਨ੍ਤਿ, ਤਸ੍ਸ ਕਿਮਞ੍ਞਂ ਆਣਣ੍ਯਂ ਭਵਿਸ੍ਸਤਿ ਅਞ੍ਞਤ੍ਰ ਧਮ੍ਮਵਿਨਯਸਙ੍ਗਾਯਨਾਤਿ ਅਧਿਪ੍ਪਾਯੋ. ਤਤ੍ਥ ਤਸ੍ਸਾਤਿ ਤਸ੍ਸ ਅਨੁਗ੍ਗਹਸ੍ਸ, ਤਸ੍ਸ ਮੇਤਿ ਵਾ ਅਤ੍ਥੋ ਗਹੇਤਬ੍ਬੋ. ਪੋਤ੍ਥਕੇਸੁ ਹਿ ਕੇਸੁਚਿ ‘‘ਤਸ੍ਸ ਮੇ’’ਤਿ ਪਾਠੋ ਦਿਸ੍ਸਤਿ. ਆਣਣ੍ਯਂ ਅਣਣਭਾਵੋ. ਸਕਕਵਚਇਸ੍ਸਰਿਯਾਨੁਪ੍ਪਦਾਨੇਨਾਤਿ ਏਤ੍ਥ ਚੀਵਰਸ੍ਸ ਨਿਦਸ੍ਸਨਵਸੇਨ ਕਵਚਸ੍ਸੇਵ ਗਹਣਂ ਕਤਂ, ਸਮਾਪਤ੍ਤਿਯਾ ਨਿਦਸ੍ਸਨਵਸੇਨ ਇਸ੍ਸਰਿਯਂ ਗਹਿਤਂ.

ਇਦਾਨਿ ਯਥਾਵੁਤ੍ਤਮਤ੍ਥਂ ਪਾਲ਼ਿਯਾ ਵਿਭਾਵੇਨ੍ਤੋ ਆਹ ਯਥਾਹਾਤਿਆਦਿ. ਤਤ੍ਥ ਏਕਮਿਦਾਹਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ. ਏਕਂ ਸਮਯਨ੍ਤਿ ਏਕਸ੍ਮਿਂ ਸਮਯੇਤਿ ਅਤ੍ਥੋ. ਪਾਵਾਯਾਤਿ ਪਾਵਾਨਗਰਤੋ. ਅਦ੍ਧਾਨਮਗ੍ਗਪ੍ਪਟਿਪਨ੍ਨੋਤਿ ਦੀਘਮਗ੍ਗਪ੍ਪਟਿਪਨ੍ਨੋ. ਦੀਘਪਰਿਯਾਯੋ ਹੇਤ੍ਥ ਅਦ੍ਧਾਨਸਦ੍ਦੋ. ਸਬ੍ਬਂ ਸੁਭਦ੍ਦਕਣ੍ਡਂ ਵਿਤ੍ਥਾਰਤੋ ਵੇਦਿਤਬ੍ਬਨ੍ਤਿ ਪਞ੍ਚਸਤਿਕਕ੍ਖਨ੍ਧਕੇ ਆਗਤਂ ਸੁਭਦ੍ਦਕਣ੍ਡਂ ਇਧ ਆਨੇਤ੍ਵਾ ਵਿਤ੍ਥਾਰੇਤਬ੍ਬਂ.

ਤਤੋ ਪਰਨ੍ਤਿ ਸੁਭਦ੍ਦਕਣ੍ਡਤੋ ਪਰਂ. ਸਬ੍ਬਂ ਸੁਭਦ੍ਦਕਣ੍ਡਂ ਵਿਤ੍ਥਾਰਤੋ ਵੇਦਿਤਬ੍ਬਨ੍ਤਿ ਇਮਿਨਾ ‘‘ਯਂ ਨ ਇਚ੍ਛਿਸ੍ਸਾਮ, ਨ ਤਂ ਕਰਿਸ੍ਸਾਮਾ’’ਤਿ ਏਤਂ ਪਰਿਯਨ੍ਤਂ ਸੁਭਦ੍ਦਕਣ੍ਡਪਾਲ਼ਿਂ ਦਸ੍ਸੇਤ੍ਵਾ ਇਦਾਨਿ ਅਵਸੇਸਂ ਉਸ੍ਸਾਹਜਨਨਪ੍ਪਕਾਰਪ੍ਪਵਤ੍ਤਂ ਪਾਲ਼ਿਮੇਵ ਦਸ੍ਸੇਨ੍ਤੋ ਹਨ੍ਦ ਮਯਂ ਆਵੁਸੋਤਿਆਦਿਮਾਹ. ਤਤ੍ਥ ਪੁਰੇ ਅਧਮ੍ਮੋ ਦਿਪ੍ਪਤੀਤਿ ਏਤ੍ਥ ‘‘ਅਧਮ੍ਮੋ ਨਾਮ ਦਸਕੁਸਲਕਮ੍ਮਪਥਪਟਿਪਕ੍ਖਭੂਤੋ ਅਧਮ੍ਮੋ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.ਪਠਮਮਹਾਸਙ੍ਗੀਤਿਕਥਾਵਣ੍ਣਨਾ) ਵੁਤ੍ਤਂ. ਧਮ੍ਮਸਙ੍ਗਹਣਤ੍ਥਂ ਉਸ੍ਸਾਹਜਨਨਪ੍ਪਸਙ੍ਗਤ੍ਤਾ ਪਨ ਧਮ੍ਮਵਿਨਯਾਨਂ ਅਸਙ੍ਗਾਯਨਹੇਤੁਦੋਸਗਣੋ ਸਮ੍ਭਵਤਿ, ਸੋ ਏਵ ਏਤ੍ਥ ਅਧਮ੍ਮੋ ਦਿਪ੍ਪਤਿ ਤਪ੍ਪਟਿਪਕ੍ਖੋ ਧਮ੍ਮੋ ਚ ਪਟਿਬਾਹੀਯਤੀਤਿ ਵਤ੍ਤਬ੍ਬਂ. ਅਪਿ ਚ ‘‘ਅਧਮ੍ਮਵਾਦਿਨੋ ਬਲਵਨ੍ਤੋ ਹੋਨ੍ਤਿ ਧਮ੍ਮਵਾਦਿਨੋ ਦੁਬ੍ਬਲਾ ਹੋਨ੍ਤੀ’’ਤਿ ਵੁਚ੍ਚਮਾਨਤ੍ਤਾ ਯੇਨ ਅਧਮ੍ਮੇਨ ਤੇ ਸੁਭਦ੍ਦਵਜ੍ਜਿਪੁਤ੍ਤਕਾਦਯੋ ਅਧਮ੍ਮਵਾਦਿਨੋ, ਯੇਨ ਚ ਧਮ੍ਮੇਨ ਇਤਰੇ ਧਮ੍ਮਵਾਦਿਨੋਵ ਹੋਨ੍ਤਿ. ਤੇਯੇਵ ਇਧ ‘‘ਅਧਮ੍ਮੋ’’ ‘‘ਧਮ੍ਮੋ’’ਤਿ ਚ ਵਤ੍ਤਬ੍ਬਾ. ਤਸ੍ਮਾ ਸੀਲਵਿਪਤ੍ਤਿਆਦਿਹੇਤੁਕੋ ਪਾਪਿਚ੍ਛਤਾਦਿਦੋਸਗਣੋ ਅਧਮ੍ਮੋ, ਤਪ੍ਪਟਿਪਕ੍ਖੋ ਸੀਲਸਮ੍ਪਦਾਦਿਹੇਤੁਕੋ ਅਪ੍ਪਿਚ੍ਛਤਾਦਿਗੁਣਸਮੂਹੋ ਧਮ੍ਮੋਤਿ ਚ ਗਹੇਤਬ੍ਬਂ. ਪੁਰੇ ਦਿਪ੍ਪਤੀਤਿ ਅਪਿ ਨਾਮ ਦਿਪ੍ਪਤਿ. ਅਥ ਵਾ ਯਾਵ ਅਧਮ੍ਮੋ ਧਮ੍ਮਂ ਪਟਿਬਾਹਿਤੁਂ ਸਮਤ੍ਥੋ ਹੋਤਿ, ਤਤੋ ਪੁਰੇਤਰਮੇਵਾਤਿ ਅਤ੍ਥੋ. ਦਿਪ੍ਪਤੀਤਿ ਦਿਪ੍ਪਿਸ੍ਸਤਿ. ਪੁਰੇਸਦ੍ਦਯੋਗੇਨ ਹਿ ਅਨਾਗਤਤ੍ਥੇ ਅਯਂ ਵਤ੍ਤਮਾਨਪ੍ਪਯੋਗੋ, ਯਥਾ ਪੁਰਾ ਵਸ੍ਸਤਿ ਦੇਵੋਤਿ. ਅਵਿਨਯੋਤਿ ਪਹਾਨਵਿਨਯਾਦੀਨਂ ਪਟਿਪਕ੍ਖਭੂਤੋ ਅਵਿਨਯੋ.

ਤੇਨ ਹੀਤਿ ਉਯ੍ਯੋਜਨਤ੍ਥੇ ਨਿਪਾਤੋ. ਸਕਲਨਵਙ੍ਗਸਤ੍ਥੁਸਾਸਨਪਰਿਯਤ੍ਤਿਧਰੇਤਿ ਸਕਲਂ ਸੁਤ੍ਤਗੇਯ੍ਯਾਦਿਨਵਙ੍ਗਂ ਏਤ੍ਥ, ਏਤਸ੍ਸ ਵਾ ਅਤ੍ਥੀਤਿ ਸਕਲਨਵਙ੍ਗਂ, ਸਤ੍ਥੁਸਾਸਨਂ. ਅਤ੍ਥਕਾਮੇਨ ਪਰਿਯਾਪੁਣਿਤਬ੍ਬਤੋ ਦਿਟ੍ਠਧਮ੍ਮਿਕਾਦਿਪੁਰਿਸਤ੍ਥਪਰਿਯਤ੍ਤਿਭਾਵਤੋ ਚ ‘‘ਪਰਿਯਤ੍ਤੀ’’ਤਿ ਤੀਣਿ ਪਿਟਕਾਨਿ ਵੁਚ੍ਚਨ੍ਤਿ, ਤਂ ਸਕਲਨਵਙ੍ਗਸਤ੍ਥੁਸਾਸਨਸਙ੍ਖਾਤਂ ਪਰਿਯਤ੍ਤਿਂ ਧਾਰੇਨ੍ਤੀਤਿ ਸਕਲਨਵਙ੍ਗਸਤ੍ਥੁਸਾਸਨਪਅਯਤ੍ਤਿਧਰਾ, ਤਾਦਿਸੇਤਿ ਅਤ੍ਥੋ. ਸਮਥਭਾਵਨਾਸਿਨੇਹਾਭਾਵੇਨ ਸੁਕ੍ਖਾ ਲੂਖਾ ਅਸਿਨਿਦ੍ਧਾ ਵਿਪਸ੍ਸਨਾ ਏਤੇਸਨ੍ਤਿ ਸੁਕ੍ਖਵਿਪਸ੍ਸਕਾ. ਤਿਪਿਟਕਸਬ੍ਬਪਰਿਯਤ੍ਤਿਪ੍ਪਭੇਦਧਰੇਤਿ ਤਿਣ੍ਣਂ ਪਿਟਕਾਨਂ ਸਮਾਹਾਰੋ ਤਿਪਿਟਕਂ, ਤਦੇਵ ਨਵਙ੍ਗਾਦਿਵਸੇਨ ਅਨੇਕਭੇਦਭਿਨ੍ਨਂ ਸਬ੍ਬਂ ਪਰਿਯਤ੍ਤਿਪ੍ਪਭੇਦਂ ਧਾਰੇਨ੍ਤੀਤਿ ਤਿਪਿਟਕਸਬ੍ਬਪਰਿਯਤ੍ਤਿਪ੍ਪਭੇਦਧਰਾ.

ਕਿਸ੍ਸ ਪਨਾਤਿ ਕਸ੍ਮਾ ਪਨ. ਸਿਕ੍ਖਤੀਤਿ ਸੇਕ੍ਖੋ. ਤਮੇਵਾਹ ‘‘ਸਕਰਣੀਯੋ’’ਤਿ. ਉਪਰਿਮਗ੍ਗਤ੍ਤਯਕਿਚ੍ਚਸ੍ਸ ਅਪਰਿਯੋਸਿਤਤ੍ਤਾ ਸਕਿਚ੍ਚੋਤਿ ਅਤ੍ਥੋ. ਅਸ੍ਸਾਤਿ ਅਨੇਨ. ਬਹੁਕਾਰਤ੍ਤਾਤਿ ਬਹੁਪਕਾਰਤ੍ਤਾ. ਅਸ੍ਸਾਤਿ ਭਵੇਯ੍ਯ. ਅਤਿਵਿਯ ਵਿਸ੍ਸਤ੍ਥੋਤਿ ਅਤਿਵਿਯ ਵਿਸ੍ਸਾਸਿਕੋ. ਨਨ੍ਤਿ ਆਨਨ੍ਦਤ੍ਥੇਰਂ ਓਵਦਤੀਤਿ ਸਮ੍ਬਨ੍ਧੋ. ਆਨਨ੍ਦਤ੍ਥੇਰਸ੍ਸ ਕਦਾਚਿ ਅਸਞ੍ਞਤਾਯ ਨਵਕਾਯ ਸਦ੍ਧਿਵਿਹਾਰਿਕਪਰਿਸਾਯ ਜਨਪਦਚਾਰਿਕਾਚਰਣਂ, ਤੇਸਞ੍ਚ ਸਦ੍ਧਿਵਿਹਾਰਿਕਾਨਂ ਏਕਕ੍ਖਣੇ ਉਪ੍ਪਬ੍ਬਜ੍ਜਨਞ੍ਚ ਪਟਿਚ੍ਚ ਮਹਾਕਸ੍ਸਪਤ੍ਥੇਰੋ ਤਂ ਨਿਗ੍ਗਣ੍ਹਨ੍ਤੋ ਏਵਮਾਹ ‘‘ਨ ਵਾਯਂ ਕੁਮਾਰਕੋ ਮਤ੍ਤਮਞ੍ਞਾਸੀ’’ਤਿ. ਏਤ੍ਥ ਚ ਵਾ-ਸਦ੍ਦੋ ਪਦਪੂਰਣੋ, ਅਯਂ ਕੁਮਾਰੋ ਅਤ੍ਤਨੋ ਪਮਾਣਂ ਨ ਪਟਿਜਾਨਾਤੀਤਿ ਥੇਰਂ ਤਜ੍ਜੇਨ੍ਤੋ ਆਹ. ਤਤ੍ਰਾਤਿ ਏਵਂ ਸਤਿ.

ਕਿਞ੍ਚਾਪਿ ਸੇਕ੍ਖੋਤਿ ਇਦਂ ਨ ਸੇਕ੍ਖਾਨਂ ਅਗਤਿਗਮਨਸਬ੍ਭਾਵੇਨ ਵੁਤ੍ਤਂ, ਅਸੇਕ੍ਖਾਨਞ੍ਞੇਵ ਪਨ ਉਚ੍ਚਿਨਿਤ੍ਵਾ ਗਹਿਤਤ੍ਤਾਤਿ ਦਟ੍ਠਬ੍ਬਂ. ਤਸ੍ਮਾ ‘‘ਕਿਞ੍ਚਾਪਿ ਸੇਕ੍ਖੋ, ਤਥਾਪਿ ਥੇਰੋ ਆਯਸ੍ਮਨ੍ਤਮ੍ਪਿ ਆਨਨ੍ਦਂ ਉਚ੍ਚਿਨਤੂ’’ਤਿ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ, ਨ ਪਨ ਕਿਞ੍ਚਾਪਿ ਸੇਕ੍ਖੋ, ਤਥਾਪਿ ਅਭਬ੍ਬੋ ਅਗਤਿਂ ਗਨ੍ਤੁਨ੍ਤਿ ਯੋਜੇਤਬ੍ਬਂ. ਅਭਬ੍ਬੋਤਿਆਦਿ ਪਨਸ੍ਸ ਸਭਾਵਕਥਨਂ. ਤਤ੍ਥ ਛਨ੍ਦਾਤਿ ਛਨ੍ਦੇਨ ਸਿਨੇਹੇਨ. ਅਗਤਿਂ ਗਨ੍ਤੁਨ੍ਤਿ ਅਕਤ੍ਤਬ੍ਬਂ ਕਾਤੁਂ. ਪਰਿਯਤ੍ਤੋਤਿ ਅਧੀਤੋ ਉਗ੍ਗਹਿਤੋ.

ਰਾਜਗਹਂ ਖੋ ਮਹਾਗੋਚਰਨ੍ਤਿ ਏਤ੍ਥ ਗਾਵੋ ਚਰਨ੍ਤਿ ਏਤ੍ਥਾਤਿ ਗੋਚਰੋ, ਗੁਨ੍ਨਂ ਗੋਚਰਟ੍ਠਾਨਂ. ਗੋਚਰੋ ਵਿਯਾਤਿ ਗੋਚਰੋ, ਭਿਕ੍ਖਾਚਰਣਟ੍ਠਾਨਂ. ਸੋ ਮਹਨ੍ਤੋ ਅਸ੍ਸਾਤਿ ਮਹਾਗੋਚਰਂ, ਰਾਜਗਹਂ. ਉਕ੍ਕੋਟੇਯ੍ਯਾਤਿ ਨਿਵਾਰੇਯ੍ਯ.

ਸਤ੍ਤਸੁ ਸਾਧੁਕੀਲ਼ਨਦਿਵਸੇਸੂਤਿ ਏਤ੍ਥ ਸਂਵੇਗਵਤ੍ਥੁਂ ਕਿਤ੍ਤੇਤ੍ਵਾ ਕਿਤ੍ਤੇਤ੍ਵਾ ਸਾਧੁਕਂ ਏਵ ਪੂਜਾਵਸੇਨ ਕੀਲ਼ਨਤੋ ਸਾਧੁਕੀਲ਼ਨਂ. ਉਪਕਟ੍ਠਾਤਿ ਆਸਨ੍ਨਾ. ਵਸ੍ਸਂ ਉਪਨੇਤਿ ਉਪਗਚ੍ਛਤਿ ਏਤ੍ਥਾਤਿ ਵਸ੍ਸੂਪਨਾਯਿਕਾ.

ਤਤ੍ਰ ਸੁਦਨ੍ਤਿ ਤਸ੍ਸਂ ਸਾਵਤ੍ਥਿਯਂ, ਸੁਦਨ੍ਤਿ ਨਿਪਾਤਮਤ੍ਤਂ. ਉਸ੍ਸਨ੍ਨਧਾਤੁਕਨ੍ਤਿ ਉਪਚਿਤਪਿਤ੍ਤਸੇਮ੍ਹਾਦਿਧਾਤੁਕਂ. ਸਮਸ੍ਸਾਸੇਤੁਨ੍ਤਿ ਸਨ੍ਤਪ੍ਪੇਤੁਂ. ਦੁਤਿਯਦਿਵਸੇਤਿ ਜੇਤਵਨਵਿਹਾਰਂ ਪਵਿਟ੍ਠਦਿਵਸਤੋ ਦੁਤਿਯਦਿਵਸੇਤਿ ਵਦਨ੍ਤਿ. ਵਿਰਿਚ੍ਚਤਿ ਏਤੇਨਾਤਿ ਵਿਰੇਚਨਂ. ਓਸਧਪਰਿਭਾਵਿਤਂ ਖੀਰਮੇਵ ਵਿਰੇਚਨਨ੍ਤਿ ਖੀਰਵਿਰੇਚਨਂ. ਯਂ ਸਨ੍ਧਾਯਾਤਿ ਯਂ ਭੇਸਜ੍ਜਪਾਨਂ ਸਨ੍ਧਾਯ ਵੁਤ੍ਤਂ. ਭੇਸਜ੍ਜਮਤ੍ਤਾਤਿ ਅਪ੍ਪਮਤ੍ਤਕਂ ਭੇਸਜ੍ਜਂ. ਅਪ੍ਪਤ੍ਥੋ ਹਿ ਅਯਂ ਮਤ੍ਤਾ-ਸਦ੍ਦੋ ਮਤ੍ਤਾ ਸੁਖਪਰਿਚ੍ਚਾਗਾਤਿਆਦੀਸੁ (ਧ. ਪ. ੨੯੦) ਵਿਯ.

ਖਣ੍ਡਫੁਲ੍ਲਪ੍ਪਟਿਸਙ੍ਖਰਣਨ੍ਤਿ ਏਤ੍ਥ ਖਣ੍ਡਨ੍ਤਿ ਛਿਨ੍ਨਂ, ਫੁਲ੍ਲਨ੍ਤਿ ਭਿਨ੍ਨਂ, ਤੇਸਂ ਪਟਿਸਙ੍ਖਰਣਂ ਅਭਿਨਵਕਰਣਂ.

ਪਰਿਚ੍ਛੇਦਵਸੇਨ ਵੇਦਿਯਤਿ ਦਿਸ੍ਸਤੀਤਿ ਪਰਿਵੇਣਂ. ਤਤ੍ਥਾਤਿ ਤੇਸੁ ਵਿਹਾਰੇਸੁ ਖਣ੍ਡਫੁਲ੍ਲਪ੍ਪਟਿਸਙ੍ਖਰਣਨ੍ਤਿ ਸਮ੍ਬਨ੍ਧੋ. ਪਠਮਂ ਮਾਸਨ੍ਤਿ ਵਸ੍ਸਾਨਸ੍ਸ ਪਠਮਂ ਮਾਸਂ, ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਸੇਨਾਸਨਵਤ੍ਤਾਨਂ ਬਹੂਨਂ ਪਞ੍ਞਤ੍ਤਤ੍ਤਾ, ਸੇਨਾਸਨਕ੍ਖਨ੍ਧਕੇ (ਚੂਲ਼ਵ. ੨੯੪ ਆਦਯੋ) ਸੇਨਾਸਨਪਟਿਬਦ੍ਧਾਨਂ ਬਹੂਨਂ ਕਮ੍ਮਾਨਂ ਵਿਹਿਤਤ੍ਤਾ ‘‘ਭਗਵਤਾ…ਪੇ… ਵਣ੍ਣਿਤ’’ਨ੍ਤਿ ਵੁਤ੍ਤਂ.

ਦੁਤਿਯਦਿਵਸੇਤਿ ‘‘ਖਣ੍ਡਫੁਲ੍ਲਪ੍ਪਟਿਸਙ੍ਖਰਣਂ ਕਰੋਮਾ’’ਤਿ ਚਿਨ੍ਤਿਤਦਿਵਸਤੋ ਦੁਤਿਯਦਿਵਸੇ. ਵਸ੍ਸੂਪਨਾਯਿਕਦਿਵਸੇਯੇਵ ਤੇ ਏਵਂ ਚਿਨ੍ਤੇਸੁਂ. ਸਿਰਿਯਾ ਨਿਕੇਤਨਮਿਵਾਤਿ ਸਿਰਿਯਾ ਨਿਵਾਸਨਟ੍ਠਾਨਂ ਵਿਯ. ਏਕਸ੍ਮਿਂ ਪਾਨੀਯਤਿਤ੍ਥੇ ਸਨ੍ਨਿਪਤਨ੍ਤਾ ਪਕ੍ਖਿਨੋ ਵਿਯ ਸਬ੍ਬੇਸਂ ਜਨਾਨਂ ਚਕ੍ਖੂਨਿ ਮਣ੍ਡਪੇਯੇਵ ਨਿਪਤਨ੍ਤੀਤਿ ਵੁਤ੍ਤਂ ‘ਏਕਨਿਪਾਤਤਿਤ੍ਥਮਿਵ ਚ ਦੇਵਮਨੁਸ੍ਸਨਯਨਵਿਹਙ੍ਗਾਨ’’ਨ੍ਤਿ. ਲੋਕਰਾਮਣੇਯ੍ਯਕਨ੍ਤਿ ਲੋਕੇ ਰਮਣੀਯਭਾਵਂ, ਰਮਣਂ ਅਰਹਤੀਤਿ ਵਾ ਲੋਕਰਾਮਣੇਯ੍ਯਕਂ. ਦਟ੍ਠਬ੍ਬਸਾਰਮਣ੍ਡਨ੍ਤਿ ਦਟ੍ਠਬ੍ਬੇਸੁ ਸਾਰਂ ਦਟ੍ਠਬ੍ਬਸਾਰਂ, ਤਤੋ ਵਿਪ੍ਪਸਨ੍ਨਨ੍ਤਿ ਦਟ੍ਠਬ੍ਬਸਾਰਮਣ੍ਡਂ. ਅਥ ਵਾ ਦਟ੍ਠਬ੍ਬੋ ਸਾਰਭੂਤੋ ਵਿਸਿਟ੍ਠਤਰੋ ਮਣ੍ਡੋ ਮਣ੍ਡਨਂ ਅਲਙ੍ਕਾਰੋ ਏਤਸ੍ਸਾਤਿ ਦਟ੍ਠਬ੍ਬਸਾਰਮਣ੍ਡੋ, ਮਣ੍ਡਪੋ. ਮਣ੍ਡਂ ਸੂਰਿਯਰਸ੍ਮਿਂ ਪਾਤਿ ਨਿਵਾਰੇਤੀਤਿ ਮਣ੍ਡਪੋ. ਵਿਵਿਧਾਨਿ ਕੁਸੁਮਦਾਮਾਨਿ ਚੇਵ ਮੁਤ੍ਤੋਲਮ੍ਬਕਾਨਿ ਚ ਵਿਨਿਗ੍ਗਲਨ੍ਤਂ ਵਮੇਨ੍ਤਂ ਨਿਕ੍ਖਾਮੇਨ੍ਤਮਿਵ ਚਾਰੁ ਸੋਭਨਂ ਵਿਤਾਨਂ ਏਤ੍ਥਾਤਿ ਵਿਵਿਧਕੁਸੁਮਦਾਮੋਲਮ੍ਬਕਵਿਨਿਗ੍ਗਲਨ੍ਤਚਾਰੁਵਿਤਾਨੋ. ਨਾਨਾਪੁਪ੍ਫੂਪਹਾਰਵਿਚਿਤ੍ਤਸੁਪਰਿਨਿਟ੍ਠਿਤਭੂਮਿਕਮ੍ਮਤ੍ਤਾ ਏਵ ‘‘ਰਤਨਵਿਚਿਤ੍ਤਮਣਿਕੋਟ੍ਟਿਮਤਲਮਿਵਾ’’ਤਿ ਵੁਤ੍ਤਂ. ਏਤ੍ਥ ਚ ਮਣਿਯੋ ਕੋਟ੍ਟੇਤ੍ਵਾ ਕਤਤਲਂ ਮਣਿਕੋਟ੍ਟਿਮਤਲਂ ਨਾਮ, ਤਮਿਵਾਤਿ ਵੁਤ੍ਤਂ ਹੋਤਿ. ਆਸਨਾਰਹਨ੍ਤਿ ਨਿਸੀਦਨਾਰਹਂ. ਦਨ੍ਤਖਚਿਤਨ੍ਤਿ ਦਨ੍ਤੇਹਿ ਖਚਿਤਂ.

ਆਵਜ੍ਜੇਸੀਤਿ ਉਪਨਾਮੇਸਿ. ਅਨੁਪਾਦਾਯਾਤਿ ਤਣ੍ਹਾਦਿਟ੍ਠਿਵਸੇਨ ਕਞ੍ਚਿ ਧਮ੍ਮਂ ਅਗ੍ਗਹੇਤ੍ਵਾ. ਕਥਾਦੋਸੋਤਿ ਕਥਾਯ ਅਸਚ੍ਚਂ ਨਾਮ ਨਤ੍ਥਿ.

ਯਥਾਵੁਡ੍ਢਨ੍ਤਿ ਵੁਡ੍ਢਪਟਿਪਾਟਿਂ ਅਨਤਿਕ੍ਕਮਿਤ੍ਵਾ. ਏਕੇਤਿ ਮਜ੍ਝਿਮਭਾਣਕਾਨਂਯੇਵ ਏਕੇ. ਪੁਬ੍ਬੇ ਵੁਤ੍ਤਮ੍ਪਿ ਹਿ ਸਬ੍ਬਂ ਮਜ੍ਝਿਮਭਾਣਕਾ ਵਦਨ੍ਤਿਯੇਵਾਤਿ ਵੇਦਿਤਬ੍ਬਂ. ਦੀਘਭਾਣਕਾ ਪਨ ‘‘ਪਦਸਾਵ ਥੇਰੋ ਸਨ੍ਨਿਪਾਤਮਾਗਤੋ’’ਤਿ ਵਦਨ੍ਤਿ. ਤੇਸੁ ਕੇਚਿ ‘‘ਆਕਾਸੇਨਾ’’ਤਿ, ‘‘ਤੇ ਸਬ੍ਬੇਪਿ ਤਥਾ ਤਥਾ ਆਗਤਦਿਵਸਾਨਮ੍ਪਿ ਅਤ੍ਥਿਤਾਯ ਏਕਮੇਕਂ ਗਹੇਤ੍ਵਾ ਤਥਾ ਤਥਾ ਵਦਿਂਸੂ’’ਤਿ ਵਦਨ੍ਤਿ.

ਕਂ ਧੁਰਂ ਕਤ੍ਵਾਤਿ ਕਂ ਜੇਟ੍ਠਕਂ ਕਤ੍ਵਾ. ਬੀਜਨਿਂ ਗਹੇਤ੍ਵਾਤਿ ਏਤ੍ਥ ਬੀਜਨੀਗਹਣਂ ਪਰਿਸਾਯ ਧਮ੍ਮਕਥਿਕਾਨਂ ਹਤ੍ਥਕੁਕ੍ਕੁਚ੍ਚਵਿਨੋਦਨਮੁਖਵਿਕਾਰਪਟਿਚ੍ਛਾਦਨਤ੍ਥਂ ਧਮ੍ਮਤਾਵਸੇਨ ਆਚਿਣ੍ਣਨ੍ਤਿ ਵੇਦਿਤਬ੍ਬਂ. ਤੇਨੇਵ ਹਿ ਅਚ੍ਚਨ੍ਤਸਞ੍ਞਤਪ੍ਪਤ੍ਤਾ ਬੁਦ੍ਧਾਪਿ ਸਾਵਕਾਪਿ ਧਮ੍ਮਕਥਿਕਾਨਂ ਧਮ੍ਮਤਾਦਸ੍ਸਨਤ੍ਥਮੇਵ ਚਿਤ੍ਤਬੀਜਨਿਂ ਗਣ੍ਹਨ੍ਤਿ. ਪਠਮਂ, ਆਵੁਸੋ ਉਪਾਲਿ, ਪਾਰਾਜਿਕਂ ਕਤ੍ਥ ਪਞ੍ਞਤ੍ਤਨ੍ਤਿ ਏਤ੍ਥ ਕਥਂ ਸਙ੍ਗੀਤਿਯਾ ਪੁਬ੍ਬੇ ਪਠਮਭਾਵੋ ਸਿਦ੍ਧੋਤਿ? ਪਾਤਿਮੋਕ੍ਖੁਦ੍ਦੇਸਾਨੁਕ੍ਕਮਾਦਿਨਾ ਪੁਬ੍ਬੇ ਪਠਮਭਾਵਸ੍ਸ ਸਿਦ੍ਧਤ੍ਤਾ. ਯੇਭੁਯ੍ਯੇਨ ਹਿ ਤੀਣਿ ਪਿਟਕਾਨਿ ਭਗਵਤੋ ਧਰਮਾਨਕਾਲੇਯੇਵ ਇਮਿਨਾ ਅਨੁਕ੍ਕਮੇਨ ਸਜ੍ਝਾਯਿਤਾਨਿ, ਤੇਨੇਵ ਕਮੇਨ ਪਚ੍ਛਾਪਿ ਸਙ੍ਗੀਤਾਨਿ ਵਿਸੇਸਤੋ ਵਿਨਯਾਭਿਧਮ੍ਮਪਿਟਕਾਨੀਤਿ ਦਟ੍ਠਬ੍ਬਂ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ ਨਿਮਿਤ੍ਤਤ੍ਥੇ ਭੁਮ੍ਮਂ. ਅਨ੍ਤਰਾ ਚ, ਭਨ੍ਤੇ, ਰਾਜਗਹਂ ਅਨ੍ਤਰਾ ਚ ਨਾਲ਼ਨ੍ਦਨ੍ਤਿ ਰਾਜਗਹਸ੍ਸ ਚ ਨਾਲ਼ਨ੍ਦਾਯ ਚ ਅਨ੍ਤਰਾ, ਵਿਵਰੇ ਮਜ੍ਝੇਤਿ ਅਤ੍ਥੋ. ਅਨ੍ਤਰਾ-ਸਦ੍ਦੇਨ ਪਨ ਯੁਤ੍ਤਤ੍ਤਾ ਉਪਯੋਗਵਚਨਂ ਕਤਂ. ਰਾਜਾਗਾਰਕੇਤਿ ਰਞ੍ਞੋ ਕੀਲ਼ਨਤ੍ਥਾਯ ਕਤੇ ਅਗਾਰਕੇ. ਅਮ੍ਬਲਟ੍ਠਿਕਾਯਨ੍ਤਿ ਰਞ੍ਞੋ ਏਵਂਨਾਮਕਂ ਉਯ੍ਯਾਨਂ. ਕੇਨ ਸਦ੍ਧਿਨ੍ਤਿ ਇਧ ਕਸ੍ਮਾ ਵੁਤ੍ਤਨ੍ਤਿ? ਯਸ੍ਮਾ ਪਨੇਤਂ ਨ ਭਗਵਤਾ ਏਵ ਵੁਤ੍ਤਂ, ਰਞ੍ਞਾਪਿ ਕਿਞ੍ਚਿ ਕਿਞ੍ਚਿ ਵੁਤ੍ਤਮਤ੍ਥਿ, ਤਸ੍ਮਾ ‘‘ਕਮਾਰਬ੍ਭਾ’’ਤਿ ਅਵਤ੍ਵਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵੇਦੇਹਿਪੁਤ੍ਤੇਨਾਤਿ ਅਯਂ ਕੋਸਲਰਞ੍ਞੋ ਧੀਤਾਯ ਪੁਤ੍ਤੋ, ਨ ਵਿਦੇਹਰਞ੍ਞੋ ਧੀਤਾਯ. ਯਸ੍ਮਾ ਮਾਤਾ ਪਨਸ੍ਸ ਪਣ੍ਡਿਤਾ, ਤਸ੍ਮਾ ਸਾ ਵੇਦੇਨ ਞਾਣੇਨ ਈਹਤਿ ਘਟਤਿ ਵਾਯਮਤੀਤਿ ‘‘ਵੇਦੇਹੀ’’ਤਿ ਪਾਕਟਨਾਮਾ ਜਾਤਾਤਿ ਵੇਦਿਤਬ੍ਬਾ.

ਏਵਂ ਨਿਮਿਤ੍ਤਪਯੋਜਨਕਾਲਦੇਸਦੇਸਕਕਾਰਕਕਰਣਪ੍ਪਕਾਰੇਹਿ ਪਠਮਮਹਾਸਙ੍ਗੀਤਿਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥ ਵਵਤ੍ਥਾਪਿਤੇਸੁ ਧਮ੍ਮਵਿਨਯੇਸੁ ਨਾਨਪ੍ਪਕਾਰਕੋਸਲ੍ਲਤ੍ਥਂ ਏਕਵਿਧਾਦਿਭੇਦੇ ਦਸ੍ਸੇਤੁਂ ਤਦੇਤਂ ਸਬ੍ਬਮ੍ਪੀਤਿਆਦਿਮਾਹ. ਤਤ੍ਥ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਨ੍ਤਿ ਏਤ੍ਥ ਅਨਾਵਰਣਞਾਣਪਦਟ੍ਠਾਨਂ ਮਗ੍ਗਞਾਣਂ, ਮਗ੍ਗਞਾਣਪਦਟ੍ਠਾਨਞ੍ਚ ਅਨਾਵਰਣਞਾਣਂ ‘‘ਸਮ੍ਮਾਸਮ੍ਬੋਧੀ’’ਤਿ ਵੁਚ੍ਚਤਿ. ਪਚ੍ਚਵੇਕ੍ਖਨ੍ਤੇਨ ਵਾਤਿ ਉਦਾਨਾਦਿਵਸੇਨ ਪਵਤ੍ਤਧਮ੍ਮਂ ਸਨ੍ਧਾਯਾਹ. ਵਿਮੁਤ੍ਤਿਰਸਨ੍ਤਿ ਅਰਹਤ੍ਤਫਲਸ੍ਸਾਦਂ, ਵਿਮੁਤ੍ਤਿਸਮ੍ਪਤ੍ਤਿਕਂ ਵਾ ਅਗ੍ਗਫਲਨਿਪ੍ਫਾਦਨਤੋ, ਵਿਮੁਤ੍ਤਿਕਿਚ੍ਚਂ ਵਾ ਕਿਲੇਸਾਨਂ ਅਚ੍ਚਨ੍ਤਵਿਮੁਤ੍ਤਿਸਮ੍ਪਾਦਨਤੋ. ਅਵਸੇਸਂ ਬੁਦ੍ਧਵਚਨਂ ਧਮ੍ਮੋਤਿ ਏਤ੍ਥ ਯਦਿਪਿ ਧਮ੍ਮੋ ਏਵ ਵਿਨਯੋਪਿ ਪਰਿਯਤ੍ਤਿਯਾਦਿਭਾਵਤੋ, ਤਥਾਪਿ ਵਿਨਯਸਦ੍ਦਸਨ੍ਨਿਧਾਨੇਨ ਭਿਨ੍ਨਾਧਿਕਰਣਭਾਵੇਨ ਪਯੁਤ੍ਤੋ ਧਮ੍ਮ-ਸਦ੍ਦੋ ਵਿਨਯਤਨ੍ਤਿਵਿਰਹਿਤਂ ਤਨ੍ਤਿਂ ਦੀਪੇਤਿ, ਯਥਾ ਪੁਞ੍ਞਞਾਣਸਮ੍ਭਾਰੋ ਗੋਬਲਿਬਦ੍ਦਨ੍ਤਿਆਦਿ.

ਅਨੇਕਜਾਤਿਸਂਸਾਰਨ੍ਤਿ ਇਮਿਸ੍ਸਾ ਗਾਥਾਯ ਅਯਂ ਸਙ੍ਖੇਪਤ੍ਥੋ – ਅਹਂ ਇਮਸ੍ਸ ਅਤ੍ਤਭਾਵਗੇਹਸ੍ਸ ਕਾਰਕਂ ਤਣ੍ਹਾਵਡ੍ਢਕਿਂ ਗਵੇਸਨ੍ਤੋ ਯੇਨ ਞਾਣੇਨ ਤਂ ਦਟ੍ਠੁਂ ਸਕ੍ਕਾ, ਤਂ ਬੋਧਿਞਾਣਂ ਅਨਿਬ੍ਬਿਸਂ ਅਲਭਨ੍ਤੋ ਏਵ ਅਭਿਨੀਹਾਰਤੋ ਪਭੁਤਿ ਏਤ੍ਤਕਂ ਕਾਲਂ ਅਨੇਕਜਾਤਿਸਤਸਹਸ੍ਸਸਙ੍ਖ੍ਯਂ ਇਮਂ ਸਂਸਾਰਵਟ੍ਟਂ ਸਨ੍ਧਾਵਿਸ੍ਸਂ ਸਂਸਰਿਂ, ਯਸ੍ਮਾ ਜਰਾਬ੍ਯਾਧਿਮਰਣਮਿਸ੍ਸਤਾਯ ਜਾਤਿ ਨਾਮੇਸਾ ਪੁਨਪ੍ਪੁਨਂ ਉਪਗਨ੍ਤੁਂ ਦੁਕ੍ਖਾ, ਨ ਚ ਸਾ ਤਸ੍ਮਿਂ ਅਦਿਟ੍ਠੇ ਨਿਵਤ੍ਤਤਿ, ਤਸ੍ਮਾ ਤਂ ਗਵੇਸਨ੍ਤੋ ਸਨ੍ਧਾਵਿਸ੍ਸਨ੍ਤਿ ਅਤ੍ਥੋ. ਦਿਟ੍ਠੋਸੀਤਿ ਇਦਾਨਿ ਮਯਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਨ੍ਤੇਨ ਦਿਟ੍ਠੋ ਅਸਿ. ਪੁਨ ਗੇਹਨ੍ਤਿ ਪੁਨ ਇਮਂ ਅਤ੍ਤਭਾਵਸਙ੍ਖਾਤਂ ਮਮ ਗੇਹਂ. ਨ ਕਾਹਸੀਤਿ ਨ ਕਰਿਸ੍ਸਸਿ. ਕਾਰਣਮਾਹ ਸਬ੍ਬਾ ਤੇਤਿਆਦਿ. ਤਵ ਸਬ੍ਬਾ ਅਵਸੇਸਕਿਲੇਸਫਾਸੁਕਾ ਮਯਾ ਭਗ੍ਗਾ. ਇਮਸ੍ਸ ਤਯਾ ਕਤਸ੍ਸ ਅਤ੍ਤਭਾਵਗੇਹਸ੍ਸ ਅਵਿਜ੍ਜਾਸਙ੍ਖਾਤਂ ਕੂਟਂ ਕਣ੍ਣਿਕਮਣ੍ਡਲਂ ਵਿਸਙ੍ਖਤਂ ਵਿਦ੍ਧਂਸਿਤਂ. ਵਿਸਙ੍ਖਾਰਂ ਨਿਬ੍ਬਾਨਂ ਆਰਮ੍ਮਣਕਰਣਵਸੇਨ ਗਤਂ ਮਮ ਚਿਤ੍ਤਂ. ਅਹਞ੍ਚ ਤਣ੍ਹਾਨਂ ਖਯਸਙ੍ਖਾਤਂ ਅਰਹਤ੍ਤਮਗ੍ਗਫਲਂ ਅਜ੍ਝਗਾ ਪਤ੍ਤੋਸ੍ਮੀਤਿ ਅਤ੍ਥੋ. ਕੇਚਿ ਪਨ ‘‘ਵਿਸਙ੍ਖਾਰਗਤਂ ਚਿਤ੍ਤਮੇਵ ਤਣ੍ਹਾਨਂ ਖਯਂ ਅਜ੍ਝਗਾ’’ਤਿ ਏਵਮ੍ਪਿ ਅਤ੍ਥਂ ਵਦਨ੍ਤਿ.

ਕੇਚੀਤਿ ਖਨ੍ਧਕਭਾਣਕਾ. ਪਾਟਿਪਦਦਿਵਸੇਤਿ ਇਦਂ ਪਚ੍ਚਵੇਕ੍ਖਨ੍ਤਸ੍ਸ ਉਪ੍ਪਨ੍ਨਾਤਿ ਏਤੇਨ ਸਮ੍ਬਨ੍ਧਿਤਬ੍ਬਂ, ਨ ਸਬ੍ਬਞ੍ਞੁਭਾਵਪ੍ਪਤ੍ਤਸ੍ਸਾਤਿ ਏਤੇਨ. ਸੋਮਨਸ੍ਸਮਯਞਾਣੇਨਾਤਿ ਸੋਮਨਸ੍ਸਸਮ੍ਪਯੁਤ੍ਤਞਾਣੇਨ. ਆਮਨ੍ਤਯਾਮੀਤਿ ਨਿਵੇਦਯਾਮਿ, ਬੋਧੇਮੀਤਿ ਅਤ੍ਥੋ. ਅਨ੍ਤਰੇਤਿ ਅਨ੍ਤਰਾਲ਼ੇ, ਵੇਮਜ੍ਝੇਤਿ ਅਤ੍ਥੋ.

ਸੁਤ੍ਤਨ੍ਤਪਿਟਕਨ੍ਤਿ ਯਥਾ ਕਮ੍ਮਮੇਵ ਕਮ੍ਮਨ੍ਤਂ, ਏਵਂ ਸੁਤ੍ਤਮੇਵ ਸੁਤ੍ਤਨ੍ਤਨ੍ਤਿ ਵੇਦਿਤਬ੍ਬਂ. ਅਸਙ੍ਗੀਤਨ੍ਤਿ ਸਙ੍ਗੀਤਿਕ੍ਖਨ੍ਧਕ (ਚੂਲ਼ਵ. ੪੩੭ ਆਦਯੋ) ਕਥਾਵਤ੍ਥੁਪ੍ਪਕਰਣਾਦਿਕਂ. ਸੋਲ਼ਸਹਿ ਵਾਰੇਹਿ ਉਪਲਕ੍ਖਿਤਤ੍ਤਾ ‘‘ਸੋਲ਼ਸ ਪਰਿਵਾਰਾ’’ਤਿ ਵੁਤ੍ਤਂ. ਤਥਾ ਹਿ ਪਰਿਵਾਰਪਾਲ਼ਿਯਂ (ਪਰਿ. ੧ ਆਦਯੋ) ਪਠਮਂ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤਨ੍ਤਿਆਦਿਨਾ ਵੁਤ੍ਤਂ. ਪਞ੍ਞਤ੍ਤਿਵਾਰੋ ਕਥਾਪਤ੍ਤਿਵਾਰੋ ਵਿਪਤ੍ਤਿਵਾਰੋ ਸਙ੍ਗਹਵਾਰੋ ਸਮੁਟ੍ਠਾਨਵਾਰੋ ਅਧਿਕਰਣਵਾਰੋ ਸਮਥਵਾਰੋ ਸਮੁਚ੍ਚਯਵਾਰੋਤਿ ਇਮੇ ਅਟ੍ਠ ਵਾਰਾ, ਤਦਨਨ੍ਤਰਂ ‘‘ਮੇਥੁਨਂ ਧਮ੍ਮਂ ਪਟਿਸੇਵਨਪਚ੍ਚਯਾ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤ’’ਨ੍ਤਿ (ਪਰਿ. ੧੮੮) ਏਵਂ ਪਚ੍ਚਯਮਤ੍ਤਵਿਸੇਸੇਨ ਪੁਨ ਵੁਤ੍ਤਾ ਤੇਯੇਵ ਅਟ੍ਠ ਵਾਰਾ ਚਾਤਿ ਇਮੇਸਂ ਸੋਲ਼ਸਨ੍ਨਂ ਵਾਰਾਨਂ ਵਸੇਨ ਭਿਕ੍ਖੁਵਿਭਙ੍ਗਸ੍ਸ ਚ ਭਿਕ੍ਖੁਨੀਵਿਭਙ੍ਗਸ੍ਸ ਚ ਪਕਾਸਿਤਤ੍ਤਾ ਸੋਲ਼ਸਹਿ ਵਾਰੇਹਿ ਉਪਲਕ੍ਖਿਤੋ ਪਰਿਵਾਰੋ ‘‘ਸੋਲ਼ਸਪਰਿਵਾਰੋ’’ਤਿ ਵੁਤ੍ਤੋਤਿ ਵੇਦਿਤਬ੍ਬੋ.

ਦਲ਼੍ਹੀਕਮ੍ਮਸਿਥਿਲਕਰਣਪ੍ਪਯੋਜਨਾਤਿ ਇਦਂ ਲੋਕਵਜ੍ਜਪਣ੍ਣਤ੍ਤਿਵਜ੍ਜੇਸੁ ਯਥਾਕ੍ਕਮਂ ਯੋਜੇਤਬ੍ਬਂ. ਸਞ੍ਞਮਵੇਲਂ ਅਭਿਭਵਿਤ੍ਵਾ ਪਵਤ੍ਤੋ ਆਚਾਰੋ ਅਜ੍ਝਾਚਾਰੋ, ਵੀਤਿਕ੍ਕਮੋ. ਤੇਨਾਤਿ ਵਿਵਿਧਨਯਤ੍ਤਾਦਿਹੇਤੁਨਾ. ਏਤਨ੍ਤਿ ਵਿਵਿਧਵਿਸੇਸਨਯਤ੍ਤਾਤਿਆਦਿਗਾਥਾਵਚਨਂ. ਏਤਸ੍ਸਾਤਿ ਵਿਨਯਸ੍ਸ.

ਇਤਰਂ ਪਨਾਤਿ ਸੁਤ੍ਤਂ. ਅਤ੍ਤਤ੍ਥਪਰਤ੍ਥਾਦਿਭੇਦੇਤਿ ਏਤ੍ਥ ਆਦਿ-ਸਦ੍ਦੇਨ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇ ਲੋਕਿਯਲੋਕੁਤ੍ਤਰਾਦਿਅਤ੍ਥੇ ਚ ਸਙ੍ਗਣ੍ਹਾਤਿ. ਵੇਨੇਯਜ੍ਝਾਸਯਾਨੁਲੋਮੇਨ ਵੁਤ੍ਤਤ੍ਤਾਤਿ ਵਿਨਯਂ ਵਿਯ ਇਸ੍ਸਰਭਾਵਤੋ ਆਣਾਪਤਿਟ੍ਠਾਪਨਵਸੇਨ ਅਦੇਸੇਤ੍ਵਾ ਵੇਨੇਯ੍ਯਾਨਂ ਅਜ੍ਝਾਸਯਾਨੁਲੋਮੇਨ ਚਰਿਤਾਨੁਰੂਪਂ ਵੁਤ੍ਤਤ੍ਤਾ. ਅਨੁਪੁਬ੍ਬਸਿਕ੍ਖਾਦਿਵਸੇਨ ਅਦੇਸੇਤ੍ਵਾ ਵੇਨੇਯ੍ਯਾਨਂ ਕਾਲਨ੍ਤਰੇ ਅਭਿਨਿਬ੍ਬਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਸਸ੍ਸਮਿਵ ਫਲ’’ਨ੍ਤਿ. ਉਪਾਯਸਮਙ੍ਗੀਨਂਯੇਵ ਨਿਪ੍ਪਜ੍ਜਨਭਾਵਂ ਦਸ੍ਸੇਨ੍ਤੋ ‘‘ਧੇਨੁ ਵਿਯ ਖੀਰ’’ਨ੍ਤਿ ਆਹ. ਨ ਹਿ ਧੇਨੁਂ ਵਿਸਾਣਾਦੀਸੁ, ਅਕਾਲੇ ਵਾ ਅਵਿਜਾਤਂ ਵਾ ਦੋਹਨ੍ਤੋ ਖੀਰਂ ਪਟਿਲਭਤਿ.

ਯਨ੍ਤਿ ਯਸ੍ਮਾ. ਏਤ੍ਥਾਤਿ ਅਭਿਧਮ੍ਮੇ. ਅਭਿਧਮ੍ਮੇਤਿ ਸੁਪਿਨਨ੍ਤੇਨ ਸੁਕ੍ਕਵਿਸ੍ਸਟ੍ਠਿਯਾ ਅਨਾਪਤ੍ਤਿਭਾਵੇਪਿ ਅਕੁਸਲਚੇਤਨਾ ਉਪਲਬ੍ਭਤੀਤਿਆਦਿਨਾ ਵਿਨਯਪਞ੍ਞਤ੍ਤਿਯਾ ਸਙ੍ਕਰਵਿਰਹਿਤੇ ਧਮ੍ਮੇ, ‘‘ਪੁਬ੍ਬਾਪਰਵਿਰੋਧਾਭਾਵਤੋ ਸਙ੍ਕਰਵਿਰਹਿਤੇ ਧਮ੍ਮੇ’’ਤਿਪਿ ਵਦਨ੍ਤਿ. ਆਰਮ੍ਮਣਾਦੀਹੀਤਿ ਆਰਮ੍ਮਣਸਮ੍ਪਯੁਤ੍ਤਕਮ੍ਮਦ੍ਵਾਰਪਟਿਪਦਾਦੀਹਿ. ਲਕ੍ਖਣੀਯਤ੍ਤਾਤਿ ਸਞ੍ਜਾਨਿਤਬ੍ਬਤ੍ਤਾ. ਯਂ ਪਨੇਤ੍ਥ ਅਵਿਸਿਟ੍ਠਨ੍ਤਿ ਏਤ੍ਥ ਵਿਨਯਪਿਟਕਨ੍ਤਿਆਦੀਸੁ ਤੀਸੁ ਸਦ੍ਦੇਸੁ ਯਂ ਅਵਿਸਿਟ੍ਠਂ ਸਮਾਨਂ, ਤਂ ਪਿਟਕਸਦ੍ਦਨ੍ਤਿ ਅਤ੍ਥੋ. ਮਾ ਪਿਟਕਸਮ੍ਪਦਾਨੇਨਾਤਿ ਪਾਲ਼ਿਸਮ੍ਪਦਾਨਵਸੇਨ ਮਾ ਗਣ੍ਹਿਤ੍ਥਾਤਿ ਵੁਤ੍ਤਂ ਹੋਤਿ. ਯਥਾਵੁਤ੍ਤੇਨਾਤਿ ਏਵਂ ਦੁਵਿਧਤ੍ਥੇਨਾਤਿਆਦਿਨਾ ਵੁਤ੍ਤਪ੍ਪਕਾਰੇਨ.

ਦੇਸਨਾਸਾਸਨਕਥਾਭੇਦਨ੍ਤਿ ਏਤ੍ਥ ਦੇਸਨਾਭੇਦਂ ਸਾਸਨਭੇਦਂ ਕਥਾਭੇਦਨ੍ਤਿ ਭੇਦਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਭੇਦਨ੍ਤਿ ਚ ਨਾਨਤ੍ਤਨ੍ਤਿ ਅਤ੍ਥੋ. ਤੇਸੂਤਿ ਪਿਟਕੇਸੁ. ਸਿਕ੍ਖਾ ਚ ਪਹਾਨਾਨਿ ਚ ਗਮ੍ਭੀਰਭਾਵੋ ਚ ਸਿਕ੍ਖਾਪਹਾਨਗਮ੍ਭੀਰਭਾਵੋ, ਤਞ੍ਚ ਯਥਾਰਹਂ ਪਰਿਦੀਪਯੇਤਿ ਅਤ੍ਥੋ. ਪਰਿਯਤ੍ਤਿਭੇਦਨ੍ਤਿ ਪਰਿਯਾਪੁਣਨਭੇਦਂ ਵਿਭਾਵਯੇਤਿ ਸਮ੍ਬਨ੍ਧੋ. ਯਹਿਂ ਯਸ੍ਮਿਂ ਵਿਨਯਾਦਿਕੇ ਯਂ ਸਮ੍ਪਤ੍ਤਿਞ੍ਚ ਵਿਪਤ੍ਤਿਞ੍ਚ ਯਥਾ ਪਾਪੁਣਾਤਿ, ਤਮ੍ਪਿ ਸਬ੍ਬਂ ਵਿਭਾਵਯੇਤਿ ਸਮ੍ਬਨ੍ਧੋ. ਅਥ ਵਾ ਯਂ ਪਰਿਯਤ੍ਤਿਭੇਦਂ ਸਮ੍ਪਤ੍ਤਿਂ ਵਿਪਤ੍ਤਿਞ੍ਚ ਯਹਿਂ ਯਥਾ ਪਾਪੁਣਾਤਿ, ਤਮ੍ਪਿ ਸਬ੍ਬਂ ਵਿਭਾਵਯੇਤਿ ਯੋਜੇਤਬ੍ਬਂ. ਪਰਿਦੀਪਨਾ ਵਿਭਾਵਨਾ ਚਾਤਿ ਹੇਟ੍ਠਾ ਗਾਥਾਸੁ ਵੁਤ੍ਤਸ੍ਸ ਅਨੁਰੂਪਤੋ ਵੁਤ੍ਤਂ, ਅਤ੍ਥਤੋ ਪਨ ਏਕਮੇਵ.

ਆਣਾਰਹੇਨਾਤਿ ਆਣਂ ਪਣੇਤੁਂ ਅਰਹਤੀਤਿ ਆਣਾਰਹੋ, ਭਗਵਾ ਸਮ੍ਮਾਸਮ੍ਬੁਦ੍ਧਤ੍ਤਾ. ਸੋ ਹਿ ਮਹਾਕਾਰੁਣਿਕਤਾਯ ਚ ਅਵਿਪਰੀਤਤੋ ਦੇਸਕਭਾਵੇਨ ਪਮਾਣਵਚਨਤ੍ਤਾ ਚ ਆਣਂ ਪਣੇਤੁਂ ਅਰਹਤਿ. ਵੋਹਾਰਪਰਮਤ੍ਥਾਨਮ੍ਪਿ ਸਮ੍ਭਵਤੋ ਆਹ ‘‘ਆਣਾਬਾਹੁਲ੍ਲਤੋ’’ਤਿ. ਇਤੋ ਪਰੇਸੁਪਿ ਏਸੇਵ ਨਯੋ. ਪਠਮਨ੍ਤਿ ਵਿਨਯਪਿਟਕਂ. ਪਚੁਰਾਪਰਾਧਾ ਸੇਯ੍ਯਸਕਤ੍ਥੇਰਾਦਯੋ. ਤੇ ਹਿ ਦੋਸਬਾਹੁਲ੍ਲਤੋ ‘‘ਪਚੁਰਾਪਰਾਧਾ’’ਤਿ ਵੁਤ੍ਤਾ. ਪਚੁਰੋ ਬਹੁਕੋ ਬਹੁਲੋ ਅਪਰਾਧੋ ਦੋਸੋ ਵੀਤਿਕ੍ਕਮੋ ਯੇਸਨ੍ਤੇ ਪਚੁਰਾਪਰਾਧਾ. ਅਨੇਕਜ੍ਝਾਸਯਾਤਿਆਦੀਸੁ ਆਸਯੋਵ ਅਜ੍ਝਾਸਯੋ, ਸੋ ਚ ਅਤ੍ਥਤੋ ਦਿਟ੍ਠਿ ਞਾਣਞ੍ਚ. ਚਰਿਯਾਤਿ ਰਾਗਚਰਿਯਾਦਿਕਾ ਛ ਮੂਲਚਰਿਯਾ. ਅਥ ਵਾ ਚਰਿਯਾਤਿ ਚਰਿਤਂ, ਤਂ ਸੁਚਰਿਤਦੁਚ੍ਚਰਿਤਵਸੇਨ ਦੁਵਿਧਂ. ਅਧਿਮੁਤ੍ਤਿ ਨਾਮ ਸਤ੍ਤਾਨਂ ਪੁਬ੍ਬਪਰਿਚਯਵਸੇਨ ਅਭਿਰੁਚਿ, ਸਾ ਦੁਵਿਧਾ ਹੀਨਪਣੀਤਭੇਦੇਨ. ਯਥਾਨੁਲੋਮਨ੍ਤਿ ਅਜ੍ਝਾਸਯਾਦੀਨਂ ਅਨੁਰੂਪਂ. ਯਥਾਧਮ੍ਮਨ੍ਤਿ ਧਮ੍ਮਸਭਾਵਾਨੁਰੂਪਂ.

ਸਂਵਰਾਸਂਵਰੋਤਿ ਏਤ੍ਥ ਖੁਦ੍ਦਕੋ ਮਹਨ੍ਤੋ ਚ ਸਂਵਰੋਤਿ ਅਤ੍ਥੋ. ਵੁਡ੍ਢਿਅਤ੍ਥੋ ਹੇਤ੍ਥ ਅ-ਕਾਰੋ. ਦਿਟ੍ਠਿਵਿਨਿਵੇਠਨਾਤਿ ਦਿਟ੍ਠਿਯਾ ਵਿਮੋਚਨਂ. ਸੁਤ੍ਤਨ੍ਤਪਾਲ਼ਿਯਂ ਵਿਵਿਚ੍ਚੇਵ ਕਾਮੇਹੀਤਿਆਦਿਨਾ (ਦੀ. ਨਿ. ੧.੨੨੬; ਸਂ. ਨਿ. ੨.੧੫੨) ਸਮਾਧਿਦੇਸਨਾਬਾਹੁਲ੍ਲਤੋ ਸੁਤ੍ਤਨ੍ਤਪਿਟਕੇ ‘‘ਅਧਿਚਿਤ੍ਤਸਿਕ੍ਖਾ’’ਤਿ ਵੁਤ੍ਤਂ. ਵੀਤਿਕ੍ਕਮਪ੍ਪਹਾਨਂ ਕਿਲੇਸਾਨਨ੍ਤਿ ਸਂਕਿਲੇਸਧਮ੍ਮਾਨਂ, ਕਮ੍ਮਕਿਲੇਸਾਨਂ ਵਾ ਯੋ ਕਾਯਵਚੀਦ੍ਵਾਰੇਹਿ ਵੀਤਿਕ੍ਕਮੋ, ਤਸ੍ਸ ਪਹਾਨਂ. ਅਨੁਸਯਵਸੇਨ ਸਨ੍ਤਾਨਮਨੁਵਤ੍ਤਨ੍ਤਾ ਕਿਲੇਸਾ ਪਰਿਯੁਟ੍ਠਿਤਾਪਿ ਸੀਲਭੇਦਵਸੇਨ ਵੀਤਿਕ੍ਕਮਿਤੁਂ ਨ ਲਭਨ੍ਤੀਤਿ ਆਹ ‘‘ਵੀਤਿਕ੍ਕਮਪਟਿਪਕ੍ਖਤ੍ਤਾ ਸੀਲਸ੍ਸਾ’’ਤਿ. ਪਰਿਯੁਟ੍ਠਾਨਪ੍ਪਹਾਨਨ੍ਤਿ ਓਕਾਸਦਾਨਵਸੇਨ ਚਿਤ੍ਤੇ ਕੁਸਲਪ੍ਪਵਤ੍ਤਿਂ ਪਰਿਯਾਦਿਯਿਤ੍ਵਾ ਸਮੁਪ੍ਪਤ੍ਤਿਵਸੇਨ ਠਾਨਂ ਪਰਿਯੁਟ੍ਠਾਨਂ, ਤਸ੍ਸ ਪਹਾਨਂ. ਅਨੁਸਯਪ੍ਪਹਾਨਨ੍ਤਿ ਅਰਿਯਮਗ੍ਗੇਨ ਅਪ੍ਪਹੀਨਭਾਵੇਨ ਸਨ੍ਤਾਨੇ ਕਾਰਣਲਾਭੇ ਉਪ੍ਪਜ੍ਜਨਾਰਹਾ ਥਾਮਗਤਾ ਕਾਮਰਾਗਾਦਯੋ ਸਤ੍ਤ ਕਿਲੇਸਾ ਸਨ੍ਤਾਨੇ ਅਨੁ ਅਨੁ ਸਯਨਤੋ ਅਨੁਸਯਾ ਨਾਮ, ਤੇਸਂ ਪਹਾਨਂ.

ਤਦਙ੍ਗਪ੍ਪਹਾਨਨ੍ਤਿ ਤੇਨ ਤੇਨ ਦਾਨਸੀਲਾਦਿਕੁਸਲਙ੍ਗੇਨ ਤਸ੍ਸ ਤਸ੍ਸ ਅਕੁਸਲਙ੍ਗਸ੍ਸ ਪਹਾਨਂ ਤਦਙ੍ਗਪ੍ਪਹਾਨਂ. ਦੁਚ੍ਚਰਿਤਸਂਕਿਲੇਸਸ੍ਸ ਪਹਾਨਨ੍ਤਿ ਕਾਯਵਚੀਦੁਚ੍ਚਰਿਤਮੇਵ ਯਤ੍ਥ ਉਪ੍ਪਜ੍ਜਤਿ, ਤਂ ਸਨ੍ਤਾਨਂ ਸਮ੍ਮਾ ਕਿਲੇਸੇਤਿ ਉਪਤਾਪੇਤੀਤਿ ਸਂਕਿਲੇਸੋ, ਤਸ੍ਸ ਤਦਙ੍ਗਵਸੇਨ ਪਹਾਨਂ. ਸਮਾਧਿਸ੍ਸ ਕਾਮਚ੍ਛਨ੍ਦਪਟਿਪਕ੍ਖਤ੍ਤਾ ਸੁਤ੍ਤਨ੍ਤਪਿਟਕੇ ਤਣ੍ਹਾਸਂਕਿਲੇਸਸ੍ਸ ਪਹਾਨਂ ਵੁਤ੍ਤਂ. ਅਤ੍ਤਾਦਿਸੁਞ੍ਞਸਭਾਵਧਮ੍ਮਪ੍ਪਕਾਸਨਤੋ ਅਭਿਧਮ੍ਮਪਿਟਕੇ ਦਿਟ੍ਠਿਸਂਕਿਲੇਸਸ੍ਸ ਪਹਾਨਂ ਵੁਤ੍ਤਂ.

ਏਕਮੇਕਸ੍ਮਿਞ੍ਚੇਤ੍ਥਾਤਿ ਏਤ੍ਥ ਏਤੇਸੁ ਤੀਸੁ ਪਿਟਕੇਸੁ ਏਕੇਕਸ੍ਮਿਂ ਪਿਟਕੇਤਿ ਅਤ੍ਥੋ. ਧਮ੍ਮੋਤਿ ਪਾਲ਼ੀਤਿ ਏਤ੍ਥ ਧਮ੍ਮਸ੍ਸ ਸੀਲਾਦਿਵਿਸਿਟ੍ਠਤ੍ਥਯੋਗਤੋ, ਬੁਦ੍ਧਾਨਂ ਸਭਾਵਨਿਰੁਤ੍ਤਿਭਾਵਤੋ ਚ ਪਕਟ੍ਠਾਨਂ ਉਕ੍ਕਟ੍ਠਾਨਂ ਵਚਨਪ੍ਪਬਨ੍ਧਾਨਂ ਆਲ਼ਿ ਪਨ੍ਤੀਤਿ ਪਾਲ਼ਿ, ਪਰਿਯਤ੍ਤਿਧਮ੍ਮੋ. ਸਮ੍ਮੁਤਿਪਰਮਤ੍ਥਭੇਦਸ੍ਸ ਅਤ੍ਥਸ੍ਸ ਅਨੁਰੂਪਵਾਚਕਭਾਵੇਨ ਪਰਮਤ੍ਥਸਦ੍ਦੇਸੁ ਏਕਨ੍ਤੇਨ ਭਗਵਤਾ ਮਨਸਾ ਵਵਤ੍ਥਾਪਿਤੋ ਨਾਮਪਞ੍ਞਤ੍ਤਿਪ੍ਪਬਨ੍ਧੋ ਪਾਲ਼ਿਧਮ੍ਮੋ ਨਾਮ. ਦੇਸਨਾਯ ਧਮ੍ਮਸ੍ਸ ਚ ਕੋ ਵਿਸੇਸੋਤਿ ਚੇ? ਯਥਾਵੁਤ੍ਤਨਯੇਨ ਮਨਸਾ ਵਵਤ੍ਥਾਪਿਤਧਮ੍ਮਸ੍ਸ ਪਰੇਸਂ ਬੋਧਨਭਾਵੇਨ ਅਤਿਸਜ੍ਜਨਾ ਵਾਚਾਯ ਪਕਾਸਨਾ ‘‘ਦੇਸਨਾ’’ਤਿ ਵੇਦਿਤਬ੍ਬਾ. ਤੇਨਾਹ – ‘‘ਦੇਸਨਾਤਿ ਤਸ੍ਸਾ ਮਨਸਾ ਵਵਤ੍ਥਾਪਿਤਾਯ ਪਾਲ਼ਿਯਾ ਦੇਸਨਾ’’ਤਿ. ਤਦੁਭਯਮ੍ਪਿ ਪਨ ਪਰਮਤ੍ਥਤੋ ਸਦ੍ਦੋ ਏਵ ਪਰਮਤ੍ਥਵਿਨਿਮੁਤ੍ਤਾਯ ਸਮ੍ਮੁਤਿਯਾ ਅਭਾਵਾ. ਇਮਮੇਵ ਨਯਂ ਗਹੇਤ੍ਵਾ ਕੇਚਿ ਆਚਰਿਯਾ ‘‘ਧਮ੍ਮੋ ਚ ਦੇਸਨਾ ਚ ਪਰਮਤ੍ਥਤੋ ਸਦ੍ਦੋ ਏਵਾ’’ਤਿ ਵੋਹਰਨ੍ਤਿ, ਤੇਪਿ ਅਨੁਪਵਜ੍ਜਾਯੇਵ. ਯਥਾ ‘‘ਕਾਮਾਵਚਰਪਟਿਸਨ੍ਧਿਵਿਪਾਕਾ ਪਰਿਤ੍ਤਾਰਮ੍ਮਣਾ’’ਤਿ ਵੁਚ੍ਚਨ੍ਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ. ਨ ਹਿ ‘‘ਕਾਮਾਵਚਰਪਟਿਸਨ੍ਧਿਵਿਪਾਕਾ ਨਿਬ੍ਬਤ੍ਤਿਤਪਰਮਤ੍ਥਵਿਸਯਾਯੇਵਾ’’ਤਿ ਸਕ੍ਕਾ ਵਤ੍ਤੁਂ ਇਤ੍ਥਿਪੁਰਿਸਾਦਿਆਕਾਰਪਰਿਵਿਤਕ੍ਕਪੁਬ੍ਬਕਾਨਂ ਰਾਗਾਦਿਅਕੁਸਲਾਨਂ ਮੇਤ੍ਤਾਦਿਕੁਸਲਾਨਞ੍ਚ ਆਰਮ੍ਮਣਂ ਗਹੇਤ੍ਵਾਪਿ ਸਮੁਪ੍ਪਜ੍ਜਨਤੋ. ਪਰਮਤ੍ਥਧਮ੍ਮਮੂਲਕਤ੍ਤਾ ਪਨਸ੍ਸ ਪਰਿਕਪ੍ਪਸ੍ਸ ਪਰਮਤ੍ਥਵਿਸਯਤਾ ਸਕ੍ਕਾ ਪਞ੍ਞਪੇਤੁਂ, ਏਵਮਿਧਾਪੀਤਿ ਦਟ੍ਠਬ੍ਬਂ. ਤੀਸੁਪਿ ਚੇਤੇਸੁ ਏਤੇ ਧਮ੍ਮਤ੍ਥਦੇਸਨਾਪਟਿਵੇਧਾ ਗਮ੍ਭੀਰਾਤਿ ਸਮ੍ਬਨ੍ਧੋ. ਏਤ੍ਥ ਚ ਪਿਟਕਾਵਯਵਾਨਂ ਧਮ੍ਮਾਦੀਨਂ ਵੁਚ੍ਚਮਾਨੋ ਗਮ੍ਭੀਰਭਾਵੋ ਤਂਸਮੁਦਾਯਸ੍ਸ ਪਿਟਕਸ੍ਸਾਪਿ ਵੁਤ੍ਤੋ ਯੇਵਾਤਿ ਦਟ੍ਠਬ੍ਬੋ. ਦੁਕ੍ਖੇਨ ਓਗਯ੍ਹਨ੍ਤਿ, ਦੁਕ੍ਖੋ ਵਾ ਓਗਾਹੋ ਓਗਾਹਨਂ ਅਨ੍ਤੋਪਵਿਸਨਮੇਤੇਸੂਤਿ ਦੁਕ੍ਖੋਗਾਹਾ. ਏਤ੍ਥਾਤਿ ਏਤੇਸੁ ਪਿਟਕੇਸੁ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ.

ਹੇਤੁਨੋ ਫਲਂ ਹੇਤੁਫਲਂ. ਧਮ੍ਮਾਭਿਲਾਪੋਤਿ ਅਤ੍ਥਬ੍ਯਞ੍ਜਨਕੋ ਅਵਿਪਰੀਤਾਭਿਲਾਪੋ. ਵਿਸਯਤੋ ਅਸਮ੍ਮੋਹਤੋ ਚਾਤਿ ਲੋਕਿਯਲੋਕੁਤ੍ਤਰਾਨਂ ਯਥਾਕ੍ਕਮਂ ਅਵਬੋਧਪ੍ਪਕਾਰਦਸ੍ਸਨਂ, ਏਤਸ੍ਸ ਅਵਬੋਧੋਤਿ ਇਮਿਨਾ ਸਮ੍ਬਨ੍ਧੋ. ਲੋਕਿਯੋ ਹਿ ਧਮ੍ਮਤ੍ਥਾਦਿਂ ਆਲਮ੍ਬਿਤ੍ਵਾਵ ਪਵਤ੍ਤਨਤੋ ਵਿਸਯਤੋ ਅਵਬੋਧੋਤਿ ਵੁਚ੍ਚਤਿ. ਲੋਕੁਤ੍ਤਰੋ ਪਨ ਨਿਬ੍ਬਾਨਾਰਮ੍ਮਣਤਾਯ ਤਂ ਅਨਾਲਮ੍ਬਮਾਨੋਪਿ ਤਬ੍ਬਿਸਯਮੋਹਵਿਦ੍ਧਂਸਨੇਨ ਧਮ੍ਮਾਦੀਸੁ ਪਵਤ੍ਤਨਤੋ ਅਸਮ੍ਮੋਹਤੋ ਅਵਬੋਧੋਤਿ ਵੁਚ੍ਚਤਿ. ਅਤ੍ਥਾਨੁਰੂਪਂ ਧਮ੍ਮੇਸੂਤਿ ਕਾਰਿਯਾਨੁਰੂਪਂ ਕਾਰਣੇਸੂਤਿ ਅਤ੍ਥੋ. ਪਞ੍ਞਤ੍ਤਿਪਥਾਨੁਰੂਪਂ ਪਞ੍ਞਤ੍ਤੀਸੂਤਿ ਛਬ੍ਬਿਧਨਾਮਪਞ੍ਞਤ੍ਤਿਯਾ ਪਥੋ ਪਞ੍ਞਤ੍ਤਿਪਥੋ, ਤਸ੍ਸ ਅਨੁਰੂਪਂ ਪਞ੍ਞਤ੍ਤੀਸੂਤਿ ਅਤ੍ਥੋ.

ਧਮ੍ਮਜਾਤਨ੍ਤਿ ਕਾਰਣਪ੍ਪਭੇਦੋ ਕਾਰਣਮੇਵ ਵਾ. ਅਤ੍ਥਜਾਤਨ੍ਤਿ ਕਾਰਿਯਪ੍ਪਭੇਦੋ, ਕਾਰਿਯਮੇਵ ਵਾ. ਯਾ ਚਾਯਂ ਦੇਸਨਾਤਿ ਸਮ੍ਬਨ੍ਧੋ. ਯੋ ਚੇਤ੍ਥਾਤਿ ਏਤਾਸੁ ਧਮ੍ਮਤ੍ਥਦੇਸਨਾਸੁ ਯੋ ਪਟਿਵੇਧੋਤਿ ਅਤ੍ਥੋ. ਏਤ੍ਥਾਤਿ ਏਤੇਸੁ ਤੀਸੁ ਪਿਟਕੇਸੁ.

ਅਲਗਦ੍ਦੂਪਮਾਤਿ ਏਤ੍ਥ ਅਲਗਦ੍ਦਸਦ੍ਦੇਨ ਅਲਗਦ੍ਦਗ੍ਗਹਣਂ ਵੁਚ੍ਚਤਿ ਵੀਣਾਵਾਦਨਂ ਵੀਣਾਤਿਆਦੀਸੁ ਵਿਯ, ਗਹਣਞ੍ਚੇਤ੍ਥ ਯਥਾ ਡਂਸਤਿ, ਤਥਾ ਦੁਗ੍ਗਹਣਂ ਦਟ੍ਠਬ੍ਬਂ, ਇਤਰਗ੍ਗਹਣੇ ਵਿਰੋਧਾਭਾਵਾ. ਤਸ੍ਮਾ ਅਲਗਦ੍ਦਸ੍ਸ ਗਹਣਂ ਉਪਮਾ ਏਤਿਸ੍ਸਾਤਿ ਅਲਗਦ੍ਦੂਪਮਾ. ਅਲਗਦ੍ਦੋਤਿ ਚੇਤ੍ਥ ਆਸਿਵਿਸੋ ਵੁਚ੍ਚਤਿ. ਸੋ ਹਿ ਅਲਂ ਪਰਿਯਤ੍ਤੋ, ਜੀਵਿਤਹਰਣਸਮਤ੍ਥੋ ਵਾ ਵਿਸਸਙ੍ਖਾਤੋ ਗਦੋ ਅਸ੍ਸਾਤਿ ‘‘ਅਲਂਗਦੋ’’ਤਿ ਵਤ੍ਤਬ੍ਬੇ ‘‘ਅਲਗਦ੍ਦੋ’’ਤਿ ਵੁਚ੍ਚਤਿ.

ਵਟ੍ਟਤੋ ਨਿਸ੍ਸਰਣਂ ਅਤ੍ਥੋ ਪਯੋਜਨਂ ਏਤਿਸ੍ਸਾਤਿ ਨਿਸ੍ਸਰਣਤ੍ਥਾ. ਭਣ੍ਡਾਗਾਰਿਕੋ ਵਿਯਾਤਿ ਭਣ੍ਡਾਗਾਰਿਕੋ, ਧਮ੍ਮਰਤਨਾਨੁਪਾਲਕੋ, ਤਸ੍ਸ ਅਤ੍ਥਨਿਰਪੇਕ੍ਖਸ੍ਸ ਪਰਿਯਤ੍ਤਿ ਭਣ੍ਡਾਗਾਰਿਕਪਰਿਯਤ੍ਤਿ. ਦੁਗ੍ਗਹਿਤਾਨੀਤਿ ਦੁਟ੍ਠੁ ਗਹਿਤਾਨਿ. ਤੇਨਾਹ ‘‘ਉਪਾਰਮ੍ਭਾਦਿਹੇਤੁ ਪਰਿਯਾਪੁਟਾ’’ਤਿ. ਏਤ੍ਥ ਚ ਉਪਾਰਮ੍ਭੋ ਨਾਮ ਪਰਿਯਤ੍ਤਿਂ ਨਿਸ੍ਸਾਯ ਪਰਵਮ੍ਭਨਂ. ਆਦਿ-ਸਦ੍ਦੇਨ ਇਤਿਵਾਦਪ੍ਪਮੋਕ੍ਖਲਾਭਸਕ੍ਕਾਰਾਦਿਂ ਸਙ੍ਗਣ੍ਹਾਤਿ. ਯਂ ਸਨ੍ਧਾਯਾਤਿ ਯਂ ਪਰਿਯਤ੍ਤਿਦੁਗ੍ਗਹਣਂ ਸਨ੍ਧਾਯ. ਵੁਤ੍ਤਨ੍ਤਿ ਅਲਗਦ੍ਦੂਪਮਸੁਤ੍ਤੇ (ਮ. ਨਿ. ੧.੨੩੮) ਵੁਤ੍ਤਂ. ਤਞ੍ਚਸ੍ਸ ਅਤ੍ਥਂ ਨਾਨੁਭੋਨ੍ਤੀਤਿ ਤਞ੍ਚ ਅਸ੍ਸ ਧਮ੍ਮਸ੍ਸ ਸੀਲਪਰਿਪੂਰਣਾਦਿਸਙ੍ਖਾਤਂ ਅਤ੍ਥਂ ਏਤੇ ਦੁਗ੍ਗਹਿਤਗਾਹਿਨੋ ਨਾਨੁਭੋਨ੍ਤਿ ਨ ਵਿਨ੍ਦਨ੍ਤਿ. ਪਟਿਵਿਦ੍ਧਾਕੁਪ੍ਪੋਤਿ ਪਟਿਵਿਦ੍ਧਅਰਹਤ੍ਤਫਲੋ.

ਇਦਾਨਿ ਤੀਸੁ ਪਿਟਕੇਸੁ ਯਥਾਰਹਂ ਸਮ੍ਪਤ੍ਤਿਵਿਪਤ੍ਤਿਯੋ ਨਿਦ੍ਧਾਰੇਤ੍ਵਾ ਦਸ੍ਸੇਨ੍ਤੋ ਆਹ ਵਿਨਯੇ ਪਨਾਤਿਆਦਿ. ਤਤ੍ਥ ਤਾਸਂਯੇਵਾਤਿ ਅਵਧਾਰਣਂ ਛਲ਼ਭਿਞ੍ਞਾਚਤੁਪਟਿਸਮ੍ਭਿਦਾਨਂ ਵਿਨਯੇ ਪਭੇਦਵਚਨਾਭਾਵਂ ਸਨ੍ਧਾਯ ਵੁਤ੍ਤਂ. ਵੇਰਞ੍ਜਕਣ੍ਡੇ (ਪਾਰਾ. ੧੨) ਹਿ ਤਿਸ੍ਸੋ ਵਿਜ੍ਜਾਵ ਵਿਭਤ੍ਤਾ. ਦੁਤਿਯੇ ਤਾਸਂਯੇਵਾਤਿ ਅਵਧਾਰਣਂ ਚਤਸ੍ਸੋ ਪਟਿਸਮ੍ਭਿਦਾ ਅਪੇਕ੍ਖਿਤ੍ਵਾ ਕਤਂ ਤਿਸ੍ਸਨ੍ਨਮ੍ਪਿ ਵਿਜ੍ਜਾਨਂ ਛਸੁ ਅਭਿਞ੍ਞਾਸੁ ਅਨ੍ਤੋਪਵਿਟ੍ਠਤ੍ਤਾ. ਤਾਸਞ੍ਚਾਤਿ ਏਤ੍ਥ ਚ-ਸਦ੍ਦੇਨ ਸੇਸਾਨਮ੍ਪਿ ਤਤ੍ਥ ਅਤ੍ਥਿਭਾਵਂ ਦੀਪੇਤਿ. ਅਭਿਧਮ੍ਮਪਿਟਕੇ ਹਿ ਤਿਸ੍ਸੋ ਵਿਜ੍ਜਾ ਛ ਅਭਿਞ੍ਞਾ ਚਤਸ੍ਸੋ ਪਟਿਸਮ੍ਭਿਦਾ ਚ ਵੁਤ੍ਤਾ ਏਵ. ਪਟਿਸਮ੍ਭਿਦਾਨਂ ਤਤ੍ਥੇਵ ਸਮ੍ਮਾ ਵਿਭਤ੍ਤਭਾਵਂ ਦੀਪੇਤੁਂ ਤਤ੍ਥੇਵਾਤਿ ਅਵਧਾਰਣਂ ਕਤਂ. ਉਪਾਦਿਨ੍ਨਫਸ੍ਸੋਤਿ ਮਗ੍ਗੇਨ ਮਗ੍ਗਪਟਿਪਾਦਨਫਸ੍ਸੋ. ਤੇਸਨ੍ਤਿ ਤੇਸਂ ਪਿਟਕਾਨਂ. ਏਤਨ੍ਤਿ ਏਤਂ ਬੁਦ੍ਧਵਚਨਂ.

ਚਤੁਤ੍ਤਿਂਸੇਵ ਸੁਤ੍ਤਨ੍ਤਾਤਿ ਗਾਥਾਯ ਅਯਮਤ੍ਥਯੋਜਨਾ – ਯਸ੍ਸ ਨਿਕਾਯਸ੍ਸ ਸੁਤ੍ਤਗਣਨਤੋ ਚਤੁਤ੍ਤਿਂਸੇਵ ਸੁਤ੍ਤਨ੍ਤਾ ਵਗ੍ਗਸਙ੍ਗਹਵਸੇਨ ਤਯੋ ਵਗ੍ਗਾ ਯਸ੍ਸ ਸਙ੍ਗਹਸ੍ਸਾਤਿ ਤਿਵਗ੍ਗੋ ਸਙ੍ਗਹੋ, ਏਸ ਪਠਮੋ ਨਿਕਾਯੋ ਇਧ ਦੀਘਨਿਕਾਯੋਤਿ. ਅਨੁਲੋਮਿਕੋਤਿ ਅਪਚ੍ਚਨੀਕੋ, ਅਤ੍ਥਾਨੁਲੋਮਨਤੋ ਅਨ੍ਵਤ੍ਥਨਾਮੋਤਿ ਵੁਤ੍ਤਂ ਹੋਤਿ. ਏਕਨਿਕਾਯਮ੍ਪੀਤਿ ਏਕਸਮੂਹਮ੍ਪਿ. ਏਵਂ ਚਿਤ੍ਤਨ੍ਤਿ ਏਵਂ ਵਿਚਿਤ੍ਤਂ. ਯਥਯਿਦਨ੍ਤਿ ਯਥਾ ਇਮੇ. ਪੋਣਿਕਚਿਕ੍ਖਲ੍ਲਿਕਾ ਖਤ੍ਤਿਯਾ, ਤੇਸਂ ਨਿਵਾਸੋ ‘‘ਪੋਣਿਕਨਿਕਾਯੋ ਚਿਕ੍ਖਲ੍ਲਿਕਨਿਕਾਯੋ’’ਤਿ ਵੁਚ੍ਚਤਿ. ਪਞ੍ਚਦਸਵਗ੍ਗਪਰਿਗ੍ਗਹੋਤਿ ਪਞ੍ਚਦਸਹਿ ਵਗ੍ਗੇਹਿ ਪਰਿਗ੍ਗਹਿਤੋ. ਸੁਤ੍ਤਨ੍ਤਾਨਂ ਸਹਸ੍ਸਾਨਿ ਸਤ੍ਤ ਸੁਤ੍ਤਸਤਾਨਿ ਚਾਤਿ ਪਾਠੇ ਸੁਤ੍ਤਨ੍ਤਾਨਂ ਸਤ੍ਤਸਹਸ੍ਸਾਨਿ ਸਤ੍ਤ ਸੁਤ੍ਤਸਤਾਨਿ ਚਾਤਿ ਯੋਜੇਤਬ੍ਬਂ. ਕਤ੍ਥਚਿ ਪਨ ‘‘ਸਤ੍ਤ ਸੁਤ੍ਤਸਹਸ੍ਸਾਨਿ, ਸਤ੍ਤ ਸੁਤ੍ਤਸਤਾਨਿ ਚਾ’’ਤਿ ਪਾਠੋ. ਪੁਬ੍ਬੇ ਨਿਦਸ੍ਸਿਤਾਤਿ ਸੁਤ੍ਤਨ੍ਤਪਿਟਕਨਿਦ੍ਦੇਸੇ ਨਿਦਸ੍ਸਿਤਾ.

ਵੇਦਨ੍ਤਿ ਞਾਣਂ. ਤੁਟ੍ਠਿਨ੍ਤਿ ਪੀਤਿਂ. ਧਮ੍ਮਕ੍ਖਨ੍ਧਵਸੇਨਾਤਿ ਧਮ੍ਮਰਾਸਿਵਸੇਨ. ਦ੍ਵਾਸੀਤਿਸਹਸ੍ਸਾਨਿ ਬੁਦ੍ਧਤੋ ਗਣ੍ਹਿਨ੍ਤਿ ਸਮ੍ਬਨ੍ਧੋ. ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋਤਿ ਧਮ੍ਮਸੇਨਾਪਤਿਆਦੀਨਂ ਭਿਕ੍ਖੂਨਂ ਸਨ੍ਤਿਕਾ ਤੇਹਿਯੇਵ ਦੇਸਿਤਾਨਿ ਦ੍ਵੇ ਸਹਸ੍ਸਾਨਿ ਗਣ੍ਹਿਂ. ਮੇਤਿ ਮਮ ਹਦਯੇ, ਇਤਿ ਆਨਨ੍ਦਤ੍ਥੇਰੋ ਅਤ੍ਤਾਨਂ ਨਿਦ੍ਦਿਸਤਿ. ਯੇ ਧਮ੍ਮਾ ਮਮ ਹਦਯੇ ਪਵਤ੍ਤਿਨੋ, ਤੇ ਚਤੁਰਾਸੀਤਿਸਹਸ੍ਸਾਨੀਤਿ ਯੋਜਨਾ. ਇਦਞ੍ਚ ਭਗਵਤੋ ਧਰਮਾਨਕਾਲੇ ਉਗ੍ਗਹਿਤਧਮ੍ਮਕ੍ਖਨ੍ਧਵਸੇਨ ਵੁਤ੍ਤਂ, ਪਰਿਨਿਬ੍ਬੁਤੇ ਪਨ ਭਗਵਤਿ ਆਨਨ੍ਦਤ੍ਥੇਰੇਨ ਦੇਸਿਤਾਨਂ ਸੁਭਸੁਤ੍ਤ(ਦਈ. ਨਿ. ੧.੪੪੪ ਆਦਯੋ) ਗੋਪਕਮੋਗ੍ਗਲ੍ਲਾਨਸੁਤ੍ਤਾਨਂ (ਮ. ਨਿ. ੩.੭੯ ਆਦਯੋ), ਤਤਿਯਸਙ੍ਗੀਤਿਯਂ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਕਥਿਤਕਥਾਵਤ੍ਥੁਪ੍ਪਕਰਣਸ੍ਸ ਚ ਵਸੇਨ ਧਮ੍ਮਕ੍ਖਨ੍ਧਾਨਂ ਚਤੁਰਾਸੀਤਿਸਹਸ੍ਸਤੋਪਿ ਅਧਿਕਤਾ ਵੇਦਿਤਬ੍ਬਾ.

ਏਕਾਨੁਸਨ੍ਧਿਕਂ ਸੁਤ੍ਤਨ੍ਤਿ ਸਤਿਪਟ੍ਠਾਨਾਦਿ (ਦੀ. ਨਿ. ੨.੩੭੨ ਆਦਯੋ; ਮ. ਨਿ. ੧.੧੦੫ ਆਦਯੋ). ਅਨੇਕਾਨੁਸਨ੍ਧਿਕਨ੍ਤਿ ਪਰਿਨਿਬ੍ਬਾਨਸੁਤ੍ਤਾਦਿ (ਦੀ. ਨਿ. ੨.੧੩੪ ਆਦਯੋ). ਤਞ੍ਹਿ ਨਾਨਾਠਾਨੇਸੁ ਨਾਨਾਧਮ੍ਮਦੇਸਨਾਨਂ ਵਸੇਨ ਪਵਤ੍ਤਂ. ਤਿਕਦੁਕਭਾਜਨਂ ਧਮ੍ਮਸਙ੍ਗਣਿਯਂ ਨਿਕ੍ਖੇਪਕਣ੍ਡ(ਧ. ਸ. ੯੮੫ ਆਦਯੋ) ਅਟ੍ਠਕਥਾਕਣ੍ਡਵਸੇਨ (ਧ. ਸ. ੧੩੮੪ ਆਦਯੋ) ਗਹੇਤਬ੍ਬਂ. ਚਿਤ੍ਤਵਾਰਭਾਜਨਨ੍ਤਿ ਇਦਂ ਚਿਤ੍ਤੁਪ੍ਪਾਦਕਣ੍ਡਵਸੇਨ (ਧ. ਸ. ੧ ਆਦਯੋ) ਵੁਤ੍ਤਂ. ਅਤ੍ਥਿ ਵਤ੍ਥੂਤਿਆਦੀਸੁ ਵਤ੍ਥੁ ਨਾਮ ਸੁਦਿਨ੍ਨਕਣ੍ਡਾਦਿ (ਪਾਰਾ. ੨੪ ਆਦਯੋ). ਮਾਤਿਕਾਤਿ ਸਿਕ੍ਖਾਪਦਂ. ਅਨ੍ਤਰਾਪਤ੍ਤੀਤਿ ਸਿਕ੍ਖਾਪਦਨ੍ਤਰੇਸੁ ਅਞ੍ਞਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਾ ਆਪਤ੍ਤਿ. ਤਿਕਚ੍ਛੇਦੋਤਿ ਤਿਕਪਾਚਿਤ੍ਤਿਯਾਦਿਤਿਕਪਰਿਚ੍ਛੇਦੋ. ਬੁਦ੍ਧਵਚਨਂ ਸਙ੍ਗਹਿਤਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਬੁਦ੍ਧਵਚਨਸ੍ਸ. ਸਙ੍ਗੀਤਿਪਰਿਯੋਸਾਨੇ ਸਾਧੁਕਾਰਂ ਦਦਮਾਨਾ ਵਿਯਾਤਿ ਸਮ੍ਬਨ੍ਧੋ. ਅਚ੍ਛਰਂ ਪਹਰਿਤੁਂ ਯੁਤ੍ਤਾਨਿ ਅਚ੍ਛਰਿਯਾਨਿ, ਪੁਪ੍ਫਵਸ੍ਸਚੇਲੁਕ੍ਖੇਪਾਦੀਨਿ. ਯਾ ‘‘ਪਞ੍ਚਸਤਾ’’ਤਿ ਚ ‘‘ਥੇਰਿਕਾ’’ਤਿ ਚ ਪਵੁਚ੍ਚਤਿ, ਅਯਂ ਪਠਮਮਹਾਸਙ੍ਗੀਤਿ ਨਾਮਾਤਿ ਸਮ੍ਬਨ੍ਧੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਪਠਮਮਹਾਸਙ੍ਗੀਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਦੁਤਿਯਸਙ੍ਗੀਤਿਕਥਾਵਣ੍ਣਨਾ

ਏਵਂ ਪਠਮਮਹਾਸਙ੍ਗੀਤਿਂ ਦਸ੍ਸੇਤ੍ਵਾ ਯਦਤ੍ਥਂ ਸਾ ਇਧ ਦਸ੍ਸਿਤਾ, ਤਂ ਨਿਗਮਨਵਸੇਨ ਦਸ੍ਸੇਨ੍ਤੋ ਇਮਿਸ੍ਸਾਤਿਆਦਿਮਾਹ. ਤਤ੍ਰਾਯਂ ਆਚਰਿਯਪਰਮ੍ਪਰਾਤਿ ਤਸ੍ਮਿਂ ਜਮ੍ਬੁਦੀਪੇ ਅਯਂ ਆਚਰਿਯਾਨਂ ਪਵੇਣੀ ਪਟਿਪਾਟਿ. ਵਿਜਿਤਾਵਿਨੋਤਿ ਵਿਜਿਤਸਬ੍ਬਕਿਲੇਸਪਟਿਪਕ੍ਖਤ੍ਤਾ ਵਿਜਿਤਵਨ੍ਤੋ. ਜਮ੍ਬੁਸਿਰਿਵ੍ਹਯੇਤਿ ਜਮ੍ਬੁਸਦਿਸੋ ਸਿਰਿਮਨ੍ਤੋ ਅਵ੍ਹਯੋ ਨਾਮਂ ਯਸ੍ਸ ਦੀਪਸ੍ਸ, ਤਸ੍ਮਿਂ ਜਮ੍ਬੁਦੀਪੇਤਿ ਵੁਤ੍ਤਂ ਹੋਤਿ. ਮਹਨ੍ਤੇਨ ਹਿ ਜਮ੍ਬੁਰੁਕ੍ਖੇਨ ਅਭਿਲਕ੍ਖਿਤਤ੍ਤਾ ਦੀਪੋਪਿ ‘‘ਜਮ੍ਬੂ’’ਤਿ ਵੁਚ੍ਚਤਿ. ਅਚ੍ਛਿਜ੍ਜਮਾਨਂ ਅਵਿਨਸ੍ਸਮਾਨਂ ਕਤ੍ਵਾ. ਵਿਨਯਵਂਸਨ੍ਤਿਆਦੀਹਿ ਤੀਹਿ ਵਿਨਯਪਾਲ਼ਿਯੇਵ ਕਥਿਤਾ ਪਰਿਯਾਯਵਚਨਤ੍ਤਾ ਤੇਸਂ. ਪਕਤਞ੍ਞੁਤਨ੍ਤਿ ਵੇਯ੍ਯਤ੍ਤਿਯਂ, ਪਟੁਭਾਵਨ੍ਤਿ ਵੁਤ੍ਤਂ ਹੋਤਿ. ਧੁਰਗ੍ਗਾਹੋਤਿ ਪਧਾਨਗ੍ਗਾਹੀ, ਸਬ੍ਬੇਸਂ ਪਾਮੋਕ੍ਖੋ ਹੁਤ੍ਵਾ ਗਣ੍ਹੀਤਿ ਵੁਤ੍ਤਂ ਹੋਤਿ. ਭਿਕ੍ਖੂਨਂ ਸਮੁਦਾਯੋ ਸਮੂਹੋ ਭਿਕ੍ਖੁਸਮੁਦਾਯੋ.

ਯਦਾਤਿ ਨਿਬ੍ਬਾਯਿਂਸੂਤਿ ਸਮ੍ਬਨ੍ਧੋ. ਜੋਤਯਿਤ੍ਵਾ ਚ ਸਬ੍ਬਧੀਤਿ ਤਮੇਵ ਸਦ੍ਧਮ੍ਮਂ ਸਬ੍ਬਤ੍ਥ ਪਕਾਸਯਿਤ੍ਵਾ. ਜੁਤਿਮਨ੍ਤੋਤਿ ਪਞ੍ਞਾਜੁਤਿਯਾ ਯੁਤ੍ਤਾ, ਤੇਜਵਨ੍ਤੋ ਵਾ, ਮਹਾਨੁਭਾਵਾਤਿ ਅਤ੍ਥੋ. ਨਿਬ੍ਬਾਯਿਂਸੂਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬਾਯਿਂਸੁ. ਅਨਾਲਯਾਤਿ ਅਸਙ੍ਗਾ.

ਅਥਾਤਿ ਪਚ੍ਛਾ, ਯਦਾ ਪਰਿਨਿਬ੍ਬਾਯਿਂਸੁ, ਤਤੋ ਪਰਨ੍ਤਿ ਅਤ੍ਥੋ. ਕਪ੍ਪਤਿ ਸਿਙ੍ਗੀਲੋਣਕਪ੍ਪੋਤਿ ਏਤ੍ਥ ਕਪ੍ਪ-ਸਦ੍ਦੋ ਵਿਕਪ੍ਪਤ੍ਥੋ, ਤੇਨ ਸਿਙ੍ਗੀਲੋਣਵਿਕਪ੍ਪੋਪਿ ਕਪ੍ਪਤਿ. ਇਦਮ੍ਪਿ ਪਕ੍ਖਨ੍ਤਰਂ ਕਪ੍ਪਤੀਤਿ ਅਤ੍ਥੋ, ਏਵਂ ਸਬ੍ਬਤ੍ਥ. ਤਤ੍ਥ ਸਿਙ੍ਗੇਨ ਲੋਣਂ ਪਰਿਹਰਿਤ੍ਵਾ ਅਲੋਣਕਪਿਣ੍ਡਪਾਤੇਨ ਸਦ੍ਧਿਂ ਭੁਞ੍ਜਿਤੁਂ ਕਪ੍ਪਤਿ, ਸਨ੍ਨਿਧਿਂ ਨ ਕਰੋਤੀਤਿ ਅਧਿਪ੍ਪਾਯੋ. ਕਪ੍ਪਤਿ ਦ੍ਵਙ੍ਗੁਲਕਪ੍ਪੋਤਿ ਦ੍ਵਙ੍ਗੁਲਂ ਅਤਿਕ੍ਕਨ੍ਤਾਯ ਛਾਯਾਯ ਵਿਕਾਲੇ ਭੋਜਨਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ. ਕਪ੍ਪਤਿ ਗਾਮਨ੍ਤਰਕਪ੍ਪੋਤਿ ‘‘ਗਾਮਨ੍ਤਰਂ ਗਮਿਸ੍ਸਾਮੀ’’ਤਿ ਪਵਾਰਿਤੇਨ ਅਨਤਿਰਿਤ੍ਤਭੋਜਨਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ. ਕਪ੍ਪਤਿ ਆਵਾਸਕਪ੍ਪੋਤਿ ਏਕਸੀਮਾਯ ਨਾਨਾਸੇਨਾਸਨੇਸੁ ਵਿਸੁਂ ਵਿਸੁਂ ਉਪੋਸਥਾਦੀਨਿ ਸਙ੍ਘਕਮ੍ਮਾਨਿ ਕਾਤੁਂ ਵਟ੍ਟਤੀਤਿ ਅਤ੍ਥੋ. ਕਪ੍ਪਤਿ ਅਨੁਮਤਿਕਪ੍ਪੋਤਿ ‘‘ਅਨਾਗਤਾਨਂ ਆਗਤਕਾਲੇ ਅਨੁਮਤਿਂ ਗਹੇਸ੍ਸਾਮਾ’’ਤਿ ਤੇਸੁ ਅਨਾਗਤੇਸੁਯੇਵ ਵਗ੍ਗੇਨ ਸਙ੍ਘੇਨ ਕਮ੍ਮਂ ਕਤ੍ਵਾ ਪਚ੍ਛਾ ਅਨੁਮਤਿਂ ਗਹੇਤੁਂ ਕਪ੍ਪਤਿ, ਵਗ੍ਗਕਮ੍ਮਂ ਨ ਹੋਤੀਤਿ ਅਧਿਪ੍ਪਾਯੋ. ਕਪ੍ਪਤਿ ਆਚਿਣ੍ਣਕਪ੍ਪੋਤਿ ਆਚਰਿਯੁਪਜ੍ਝਾਯੇਹਿ ਆਚਿਣ੍ਣੋ ਕਪ੍ਪਤੀਤਿ ਅਤ੍ਥੋ. ਸੋ ਪਨ ਏਕਚ੍ਚੋ ਕਪ੍ਪਤਿ ਧਮ੍ਮਿਕੋ, ਏਕਚ੍ਚੋ ਨ ਕਪ੍ਪਤਿ ਅਧਮ੍ਮਿਕੋਤਿ ਵੇਦਿਤਬ੍ਬੋ. ਕਪ੍ਪਤਿ ਅਮਥਿਤਕਪ੍ਪੋਤਿ ਯਂ ਖੀਰਂ ਖੀਰਭਾਵਂ ਵਿਜਹਿਤਂ ਦਧਿਭਾਵਂ ਅਸਮ੍ਪਤ੍ਤਂ, ਤਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ. ਕਪ੍ਪਤਿ ਜਲ਼ੋਗਿਂ ਪਾਤੁਨ੍ਤਿ ਏਤ੍ਥ ਜਲ਼ੋਗੀਤਿ ਤਰੁਣਸੁਰਾ, ਯਂ ਮਜ੍ਜਸਮ੍ਭਾਰਂ ਏਕਤੋ ਕਤਂ ਮਜ੍ਜਭਾਵਮਸਮ੍ਪਤ੍ਤਂ, ਤਂ ਪਾਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਜਾਤਰੂਪਰਜਤਨ੍ਤਿ ਏਤ੍ਥ ਸਰਸਤੋ ਵਿਕਾਰਂ ਅਨਾਪਜ੍ਜਿਤ੍ਵਾ ਸਬ੍ਬਦਾ ਜਾਤਰੂਪਮੇਵ ਹੋਤੀਤਿ ਜਾਤਂ ਰੂਪਂ ਏਤਸ੍ਸਾਤਿ ਜਾਤਰੂਪਂ, ਸੁਵਣ੍ਣਂ. ਧਵਲਸਭਾਵਤਾਯ ਰਾਜਤੀਤਿ ਰਜਤਂ, ਰੂਪਿਯਂ. ਸੁਸੁਨਾਗਪੁਤ੍ਤੋਤਿ ਸੁਸੁਨਾਗਸ੍ਸ ਪੁਤ੍ਤੋ. ਕਾਕਣ੍ਡਕਪੁਤ੍ਤੋਤਿ ਕਾਕਣ੍ਡਕਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ. ਵਜ੍ਜੀਸੂਤਿ ਜਨਪਦਨਾਮਤ੍ਤਾ ਬਹੁਵਚਨਂ ਕਤਂ.

ਤਦਹੁਪੋਸਥੇਤਿ ਏਤ੍ਥ ਤਦਹੂਤਿ ਤਸ੍ਮਿਂ ਅਹਨਿ. ਉਪਵਸਨ੍ਤਿ ਏਤ੍ਥਾਤਿ ਉਪੋਸਥੋ, ਉਪਵਸਨ੍ਤੀਤਿ ਚ ਸੀਲਸਮਾਦਾਨੇਨ ਵਾ ਅਨਸਨਾਦਿਨਾ ਵਾ ਉਪੇਤਾ ਹੁਤ੍ਵਾ ਵਸਨ੍ਤੀਤਿ ਅਤ੍ਥੋ. ਕਂਸਪਾਤਿਨ੍ਤਿ ਸੁਵਣ੍ਣਪਾਤਿਂ. ਮਾਸਕਰੂਪਨ੍ਤਿ ਮਾਸਕੋ ਏਵ. ਸਬ੍ਬਂ ਤਾਵ ਵਤ੍ਤਬ੍ਬਨ੍ਤਿ ਇਮਿਨਾ ਸਤ੍ਤਸਤਿਕਕ੍ਖਨ੍ਧਕੇ (ਚੂਲ਼ਵ. ੪੪੬ ਆਦਯੋ) ਆਗਤਾ ਸਬ੍ਬਾਪਿ ਪਾਲ਼ਿ ਇਧ ਆਨੇਤ੍ਵਾ ਵਤ੍ਤਬ੍ਬਾਤਿ ਦਸ੍ਸੇਤਿ. ਸਙ੍ਗਾਯਿਤਸਦਿਸਮੇਵ ਸਙ੍ਗਾਯਿਂਸੂਤਿ ਸਮ੍ਬਨ੍ਧੋ.

ਸਾ ਪਨਾਯਂ ਸਙ੍ਗੀਤੀਤਿ ਸਮ੍ਬਨ੍ਧੋ. ਤੇਸੂਤਿ ਤੇਸੁ ਸਙ੍ਗੀਤਿਕਾਰਕੇਸੁ ਥੇਰੇਸੁ. ਵਿਸ੍ਸੁਤਾ ਏਤੇ ਸਦ੍ਧਿਵਿਹਾਰਿਕਾ ਞੇਯ੍ਯਾਤਿ ਸਮ੍ਬਨ੍ਧੋ. ਸਾਣਸਮ੍ਭੂਤੋਤਿ ਸਾਣਦੇਸਵਾਸੀ ਸਮ੍ਭੂਤਤ੍ਥੇਰੋ. ਦੁਤਿਯੋ ਸਙ੍ਗਹੋਤਿ ਸਮ੍ਬਨ੍ਧਿਤਬ੍ਬਂ. ਪਨ੍ਨਭਾਰਾਤਿ ਪਤਿਤਕ੍ਖਨ੍ਧਭਾਰਾ.

ਅਬ੍ਬੁਦਨ੍ਤਿ ਉਪਦ੍ਦਵਂ ਵਦਨ੍ਤਿ. ‘‘ਭਗਵਤੋ ਵਚਨਂ ਥੇਨੇਤ੍ਵਾ ਅਤ੍ਤਨੋ ਵਚਨਸ੍ਸ ਦੀਪਨਤੋ ਅਬ੍ਬੁਦਨ੍ਤਿ ਚੋਰਕਮ੍ਮ’’ਨ੍ਤਿ ਏਕੇ. ਇਦਨ੍ਤਿ ਵਕ੍ਖਮਾਨਨਿਦਸ੍ਸਨਂ. ਸਨ੍ਦਿਸ੍ਸਮਾਨਾ ਮੁਖਾ ਸਮ੍ਮੁਖਾ. ਭਾਵਿਤਮਗ੍ਗਨ੍ਤਿ ਉਪ੍ਪਾਦਿਤਜ੍ਝਾਨਂ. ਸਾਧੁ ਸਪ੍ਪੁਰਿਸਾਤਿ ਏਤ੍ਥ ਸਾਧੂਤਿ ਆਯਾਚਨਤ੍ਥੇ ਨਿਪਾਤੋ, ਤਂ ਯਾਚਾਮੀਤਿ ਅਤ੍ਥੋ. ਹਟ੍ਠਪਹਟ੍ਠੋਤਿ ਪੁਨਪ੍ਪੁਨਂ ਸਨ੍ਤੁਟ੍ਠੋ. ਉਦਗ੍ਗੁਦਗ੍ਗੋਤਿ ਸਰੀਰਵਿਕਾਰੁਪ੍ਪਾਦਨਪੀਤਿਵਸੇਨ ਉਦਗ੍ਗੁਦਗ੍ਗੋ, ਪੀਤਿਮਾ ਹਿ ਪੁਗ੍ਗਲੋ ਕਾਯਚਿਤ੍ਤਾਨਂ ਉਗ੍ਗਤਤ੍ਤਾ ‘‘ਉਦਗ੍ਗੁਦਗ੍ਗੋ’’ਤਿ ਵੁਚ੍ਚਤਿ.

ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਦੁਤਿਯਂ ਸਙ੍ਗੀਤਿਂ ਅਕਰਿਂਸੁ, ਤਸ੍ਮਿਂ ਸਮਯੇਤਿ ਅਤ੍ਥੋ. ਤਂ ਅਧਿਕਰਣਂ ਨ ਸਮ੍ਪਾਪੁਣਿਂਸੂਤਿ ਤਂ ਵਜ੍ਜਿਪੁਤ੍ਤਕੇਹਿ ਉਪ੍ਪਾਦਿਤਂ ਅਧਿਕਰਣਂ ਵਿਨਿਚ੍ਛਿਨਿਤੁਂ ਨ ਸਮ੍ਪਾਪੁਣਿਂਸੁ ਨਾਗਮਿਂਸੁ. ਨੋ ਅਹੁਵਤ੍ਥਾਤਿ ਸਮ੍ਬਨ੍ਧੋ. ਯਾਵਤਾਯੁਕਂ ਠਤ੍ਵਾ ਪਰਿਨਿਬ੍ਬੁਤਾਤਿ ਸਮ੍ਬਨ੍ਧੋ. ਕਿਂ ਪਨ ਕਤ੍ਵਾ ਥੇਰਾ ਪਰਿਨਿਬ੍ਬੁਤਾਤਿ? ਆਹ ਦੁਤਿਯਂ ਸਙ੍ਗਹਂ ਕਤ੍ਵਾਤਿਆਦਿ. ਅਨਿਚ੍ਚਤਾਵਸਨ੍ਤਿ ਅਨਿਚ੍ਚਤਾਧੀਨਤਂ. ਜਮ੍ਮਿਨ੍ਤਿ ਲਾਮਕਂ. ਦੁਰਭਿਸਮ੍ਭਵਂ ਅਨਭਿਭਵਨੀਯਂ ਅਤਿਕ੍ਕਮਿਤੁਂ ਅਸਕ੍ਕੁਣੇਯ੍ਯਂ ਅਨਿਚ੍ਚਤਂ ਏਵਂ ਞਤ੍ਵਾਤਿ ਸਮ੍ਬਨ੍ਧੋ.

ਦੁਤਿਯਸਙ੍ਗੀਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਤਤਿਯਸਙ੍ਗੀਤਿਕਥਾਵਣ੍ਣਨਾ

ਸਤ੍ਤ ਵਸ੍ਸਾਨੀਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਅਤਿਚ੍ਛਥਾਤਿ ਅਤਿਕ੍ਕਮਿਤ੍ਵਾ ਇਚ੍ਛਥ, ਇਤੋ ਅਞ੍ਞਤ੍ਥ ਗਨ੍ਤ੍ਵਾ ਭਿਕ੍ਖਂ ਪਰਿਯੇਸਥਾਤਿ ਅਤ੍ਥੋ. ਭਤ੍ਤਵਿਸ੍ਸਗ੍ਗਕਰਣਤ੍ਥਾਯਾਤਿ ਭਤ੍ਤਸ੍ਸ ਅਜ੍ਝੋਹਰਣਕਿਚ੍ਚਤ੍ਥਾਯ, ਭੁਞ੍ਜਨਤ੍ਥਾਯਾਤਿ ਅਤ੍ਥੋ. ‘‘ਸੋਲ਼ਸਵਸ੍ਸੋ’’ਤਿ ਉਦ੍ਦੇਸੋ ਕਥਨਂ ਅਸ੍ਸ ਅਤ੍ਥੀਤਿ ਸੋਲ਼ਸਵਸ੍ਸੁਦ੍ਦੇਸਿਕੋ, ‘‘ਸੋਲ਼ਸਵਸ੍ਸਿਕੋ’’ਤਿ ਅਤ੍ਥੋ.

ਤੀਸੁ ਵੇਦੇਸੂਤਿਆਦੀਸੁ ਇਰੁਵੇਦਯਜੁਵੇਦਸਾਮਵੇਦਸਙ੍ਖਾਤੇਸੁ ਤੀਸੁ ਵੇਦੇਸੁ. ਤਯੋ ਏਵ ਕਿਰ ਵੇਦਾ ਅਟ੍ਠਕਾਦੀਹਿ ਧਮ੍ਮਿਕੇਹਿ ਇਸੀਹਿ ਲੋਕਸ੍ਸ ਸਗ੍ਗਮਗ੍ਗਵਿਭਾਵਨਤ੍ਥਾਯ ਕਤਾ. ਤੇਨੇਵ ਹਿ ਤੇ ਤੇਹਿ ਵੁਚ੍ਚਨ੍ਤਿ. ਆਥਬ੍ਬਣਵੇਦੋ ਪਨ ਪਚ੍ਛਾ ਅਧਮ੍ਮਿਕੇਹਿ ਬ੍ਰਾਹ੍ਮਣੇਹਿ ਪਾਣਵਧਾਦਿਅਤ੍ਥਾਯ ਕਤੋ. ਪੁਰਿਮੇਸੁ ਚ ਤੀਸੁ ਵੇਦੇਸੁ ਤੇਹੇਵ ਧਮ੍ਮਿਕਸਾਖਾਯੋ ਅਪਨੇਤ੍ਵਾ ਯਾਗਵਧਾਦਿਦੀਪਿਕਾ ਅਧਮ੍ਮਿਕਸਾਖਾ ਪਕ੍ਖਿਤ੍ਤਾਤਿ ਵੇਦਿਤਬ੍ਬਾ. ਨਿਘਣ੍ਡੂਤਿ ਰੁਕ੍ਖਾਦੀਨਂ ਵੇਵਚਨਪ੍ਪਕਾਸਕਂ ਪਰਿਯਾਯਨਾਮਾਨੁਰੂਪਂ ਸਤ੍ਥਂ. ਤਞ੍ਹਿ ਲੋਕੇ ‘‘ਨਿਘਣ੍ਡੂ’’ਤਿ ਵੁਚ੍ਚਤਿ. ਕੇਟੁਭਨ੍ਤਿ ਕਿਟਤਿ ਗਮੇਤਿ ਕਿਰਿਯਾਦਿਵਿਭਾਗਨ੍ਤਿ ਕੇਟੁਭਂ, ਕਿਰਿਯਾਕਪ੍ਪਵਿਕਪ੍ਪੋ ਕਵੀਨਂ ਉਪਕਾਰਸਤ੍ਥਂ. ਏਤ੍ਥ ਚ ਕਿਰਿਯਾਕਪ੍ਪਵਿਕਪ੍ਪੋਤਿ ਵਚੀਭੇਦਾਦਿਲਕ੍ਖਣਾ ਕਿਰਿਯਾ ਕਪ੍ਪੀਯਤਿ ਵਿਕਪ੍ਪੀਯਤਿ ਏਤੇਨਾਤਿ ਕਿਰਿਯਾਕਪ੍ਪੋ, ਸੋ ਪਨ ਵਣ੍ਣਪਦਬਨ੍ਧਪਦਤ੍ਥਾਦਿਵਿਭਾਗਤੋ ਬਹੁਵਿਕਪ੍ਪੋਤਿ ‘‘ਕਿਰਿਯਾਕਪ੍ਪਵਿਕਪ੍ਪੋ’’ਤਿ ਵੁਚ੍ਚਤਿ. ਇਦਞ੍ਚ ਮੂਲਕਿਰਿਯਾਕਪ੍ਪਗਨ੍ਥਂ ਸਨ੍ਧਾਯ ਵੁਤ੍ਤਂ. ਸਹ ਨਿਘਣ੍ਡੁਨਾ ਕੇਟੁਭੇਨ ਚ ਸਨਿਘਣ੍ਡੁਕੇਟੁਭਾ, ਤਯੋ ਵੇਦਾ, ਤੇਸੁ ਸਨਿਘਣ੍ਡੁਕੇਟੁਭੇਸੁ. ਠਾਨਕਰਣਾਦਿਵਿਭਾਗਤੋ ਚ ਨਿਬ੍ਬਚਨਵਿਭਾਗਤੋ ਚ ਅਕ੍ਖਰਾ ਪਭੇਦੀਯਨ੍ਤਿ ਏਤੇਨਾਤਿ ਅਕ੍ਖਰਪ੍ਪਭੇਦੋ, ਸਿਕ੍ਖਾ ਚ ਨਿਰੁਤ੍ਤਿ ਚ. ਸਹ ਅਕ੍ਖਰਪ੍ਪਭੇਦੇਨਾਤਿ ਸਾਕ੍ਖਰਪ੍ਪਭੇਦਾ, ਤੇਸੁ ਸਾਕ੍ਖਰਪ੍ਪਭੇਦੇਸੁ. ਆਥਬ੍ਬਣਵੇਦਂ ਚਤੁਤ੍ਥਂ ਕਤ੍ਵਾ ‘‘ਇਤਿਹ ਆਸ ਇਤਿਹ ਆਸਾ’’ਤਿ ਈਦਿਸਵਚਨਪਟਿਸਂਯੁਤ੍ਤੋ ਪੋਰਾਣਕਥਾਸਙ੍ਖਾਤੋ ਇਤਿਹਾਸੋ ਪਞ੍ਚਮੋ ਏਤੇਸਨ੍ਤਿ ਇਤਿਹਾਸਪਞ੍ਚਮਾ, ਤਯੋ ਵੇਦਾ, ਤੇਸੁ ਇਤਿਹਾਸਪਞ੍ਚਮੇਸੁ.

ਯਸ੍ਸ ਚਿਤ੍ਤਨ੍ਤਿਆਦਿ ਪਞ੍ਹਦ੍ਵਯਂ ਖੀਣਾਸਵਾਨਂ ਚੁਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਪਠਮਪਞ੍ਹੇ ਉਪ੍ਪਜ੍ਜਤੀਤਿ ਉਪ੍ਪਾਦਕ੍ਖਣਸਮਙ੍ਗਿਤਾਯ ਉਪ੍ਪਜ੍ਜਤਿ. ਨ ਨਿਰੁਜ੍ਝਤੀਤਿ ਨਿਰੋਧਕ੍ਖਣਂ ਅਪ੍ਪਤ੍ਤਤਾਯ ਨ ਨਿਰੁਜ੍ਝਤਿ. ਤਸ੍ਸ ਚਿਤ੍ਤਨ੍ਤਿ ਤਸ੍ਸ ਪੁਗ੍ਗਲਸ੍ਸ ਤਂ ਚਿਤ੍ਤਂ ਕਿਂ ਨਿਰੁਜ੍ਝਿਸ੍ਸਤਿ ਆਯਤਿਞ੍ਚ ਨੁਪ੍ਪਜ੍ਜਿਸ੍ਸਤੀਤਿ ਪੁਚ੍ਛਾ, ਤਸ੍ਸਾ ਚ ਵਿਭਜ੍ਜਬ੍ਯਾਕਰਣੀਯਤਾਯ ਏਵਮੇਤ੍ਥ ਵਿਸ੍ਸਜ੍ਜਨਂ ਵੇਦਿਤਬ੍ਬਂ. ਅਰਹਤੋ ਪਚ੍ਛਿਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਨ ਨਿਰੁਜ੍ਝਤਿ, ਆਯਤਿਞ੍ਚ ਨੁਪ੍ਪਜ੍ਜਿਸ੍ਸਤਿ, ਅਵਸ੍ਸਮੇਵ ਨਿਰੋਧਕ੍ਖਣਂ ਪਤ੍ਵਾ ਨਿਰੁਜ੍ਝਿਸ੍ਸਤਿ, ਤਤੋ ਅਪ੍ਪਟਿਸਨ੍ਧਿਕਤ੍ਤਾ ਅਞ੍ਞਂ ਨੁਪ੍ਪਜ੍ਜਿਸ੍ਸਤਿ. ਠਪੇਤ੍ਵਾ ਪਨ ਪਚ੍ਛਿਮਚਿਤ੍ਤਸਮਙ੍ਗਿਂ ਖੀਣਾਸਵਂ ਇਤਰੇਸਂ ਉਪ੍ਪਾਦਕ੍ਖਣਸਮਙ੍ਗਿਚਿਤ੍ਤਂ ਉਪ੍ਪਾਦਕ੍ਖਣਸਮਙ੍ਗਿਤਾਯ ਉਪ੍ਪਜ੍ਜਤਿ ਭਙ੍ਗਂ ਅਪ੍ਪਤ੍ਤਤਾਯ ਨ ਨਿਰੁਜ੍ਝਤਿ, ਭਙ੍ਗਂ ਪਨ ਪਤ੍ਵਾ ਨਿਰੁਜ੍ਝਿਸ੍ਸਤੇਵ, ਅਞ੍ਞਂ ਪਨ ਤਸ੍ਮਿਂ ਵਾ ਅਞ੍ਞਸ੍ਮਿਂ ਵਾ ਅਤ੍ਤਭਾਵੇ ਉਪ੍ਪਜ੍ਜਿਸ੍ਸਤਿ ਚੇਵ ਨਿਰੁਜ੍ਝਿਸ੍ਸਤਿ ਚਾਤਿ. ਯਸ੍ਸ ਵਾ ਪਨਾਤਿਆਦਿ ਦੁਤਿਯਪਞ੍ਹੇ ਪਨ ਨਿਰੁਜ੍ਝਿਸ੍ਸਤਿ ਨੁਪ੍ਪਜ੍ਜਿਸ੍ਸਤੀਤਿ ਯਸ੍ਸ ਚਿਤ੍ਤਂ ਉਪ੍ਪਾਦਕ੍ਖਣਸਮਙ੍ਗਿਤਾਯ ਭਙ੍ਗਕ੍ਖਣਂ ਪਤ੍ਵਾ ਨਿਰੁਜ੍ਝਿਸ੍ਸਤਿ ਅਪ੍ਪਟਿਸਨ੍ਧਿਕਤਾਯ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਖੀਣਾਸਵਸ੍ਸ ਤਂ ਚਿਤ੍ਤਂ ਕਿਂ ਉਪ੍ਪਜ੍ਜਤਿ ਨ ਨਿਰੁਜ੍ਝਤੀਤਿ ਪੁਚ੍ਛਾ, ਤਸ੍ਸਾ ਏਕਂਸਬ੍ਯਾਕਰਣੀਯਤਾਯ ‘‘ਆਮਨ੍ਤਾ’’ਤਿ ਵਿਸ੍ਸਜ੍ਜਨਂ ਵੇਦਿਤਬ੍ਬਂ. ਉਦ੍ਧਂ ਵਾ ਅਧੋ ਵਾ ਹਰਿਤੁਂ ਅਸਕ੍ਕੋਨ੍ਤੋਤਿ ਉਪਰਿਮਪਦੇ ਵਾ ਹੇਟ੍ਠਿਮਪਦਂ ਹੇਟ੍ਠਿਮਪਦੇ ਵਾ ਉਪਰਿਮਪਦਂ ਅਤ੍ਥਤੋ ਸਮਨ੍ਨਾਹਰਿਤੁਂ ਘਟੇਤੁਂ ਪੁਬ੍ਬੇਨਾਪਰਂ ਯੋਜੇਤ੍ਵਾ ਅਤ੍ਥਂ ਪਰਿਚ੍ਛਿਨ੍ਦਿਤੁਂ ਅਸਕ੍ਕੋਨ੍ਤੋਤਿ ਅਤ੍ਥੋ.

ਸੋਤਾਪਨ੍ਨਾਨਂ ਸੀਲੇਸੁ ਪਰਿਪੂਰਕਾਰਿਤਾਯ ਸਮਾਦਿਨ੍ਨਸੀਲਤੋ ਨਤ੍ਥਿ ਪਰਿਹਾਨੀਤਿ ਆਹ ‘‘ਅਭਬ੍ਬੋ ਦਾਨਿ ਸਾਸਨਤੋ ਨਿਵਤ੍ਤਿਤੁ’’ਨ੍ਤਿ. ਵਡ੍ਢੇਤ੍ਵਾਤਿ ਉਪਰਿਮਗ੍ਗਤ੍ਥਾਯ ਕਮ੍ਮਟ੍ਠਾਨਂ ਵਡ੍ਢੇਤ੍ਵਾ. ਦਨ੍ਤੇ ਪੁਨਨ੍ਤਿ ਵਿਸੋਧੇਨ੍ਤਿ ਏਤੇਨਾਤਿ ਦਨ੍ਤਪੋਨਂ ਵੁਚ੍ਚਤਿ ਦਨ੍ਤਕਟ੍ਠਂ. ਅਭਿਨਵਾਨਂ ਆਗਨ੍ਤੁਕਾਨਂ ਲਜ੍ਜੀਸਭਾਵਂ ਖਨ੍ਤਿਮੇਤ੍ਤਾਦਿਗੁਣਸਮਙ੍ਗਿਤਞ੍ਚ ਕਤਿਪਾਹਂ ਸੁਟ੍ਠੁ ਵੀਮਂਸਿਤ੍ਵਾਵ ਹਤ੍ਥਕਮ੍ਮਾਦਿਸਮ੍ਪਟਿਚ੍ਛਨਂ ਸਙ੍ਗਹਕਰਣਞ੍ਚ ਯੁਤ੍ਤਨ੍ਤਿ ਸਾਮਣੇਰਸ੍ਸ ਚੇਵ ਅਞ੍ਞੇਸਞ੍ਚ ਭਿਕ੍ਖੂਨਂ ਦਿਟ੍ਠਾਨੁਗਤਿਂ ਆਪਜ੍ਜਨ੍ਤਾਨਂ ਞਾਪਨਤ੍ਥਂ ਥੇਰੋ ਤਸ੍ਸ ਭਬ੍ਬਰੂਪਤਂ ਅਭਿਞ੍ਞਾਯ ਞਤ੍ਵਾਪਿ ਪੁਨ ਸਮ੍ਮਜ੍ਜਨਾਦਿਂ ਅਕਾਸਿ. ‘‘ਤਸ੍ਸ ਚਿਤ੍ਤਦਮਨਤ੍ਥ’’ਨ੍ਤਿਪਿ ਵਦਨ੍ਤਿ. ਬੁਦ੍ਧਵਚਨਂ ਪਟ੍ਠਪੇਸੀਤਿ ਬੁਦ੍ਧਵਚਨਂ ਉਗ੍ਗਣ੍ਹਾਪੇਤੁਂ ਆਰਭਿ. ਸਕਲਵਿਨਯਾਚਾਰਪਟਿਪਤ੍ਤਿ ਉਪਸਮ੍ਪਨ੍ਨਾਨਮੇਵ ਵਿਹਿਤਾਤਿ ਤਪ੍ਪਰਿਯਾਪੁਣਨਮਪਿ ਤੇਸਞ੍ਞੇਵ ਅਨੁਰੂਪਨ੍ਤਿ ਆਹ ‘‘ਠਪੇਤ੍ਵਾ ਵਿਨਯਪਿਟਕ’’ਨ੍ਤਿ. ਤਸ੍ਸ ਚਿਤ੍ਤੇ ਠਪਿਤਮ੍ਪਿ ਬੁਦ੍ਧਵਚਨਂ ਸਙ੍ਗੋਪਨਤ੍ਥਾਯ ਨਿਯ੍ਯਾਤਿਤਭਾਵਂ ਦਸ੍ਸੇਤੁਂ ‘‘ਹਤ੍ਥੇ ਪਤਿਟ੍ਠਾਪੇਤ੍ਵਾ’’ਤਿ ਵੁਤ੍ਤਂ.

ਏਕਰਜ੍ਜਾਭਿਸੇਕਨ੍ਤਿ ਸਕਲਜਮ੍ਬੁਦੀਪੇ ਏਕਾਧਿਪਚ੍ਚਵਸੇਨ ਕਰਿਯਮਾਨਂ ਅਭਿਸੇਕਂ. ਰਾਜਿਦ੍ਧਿਯੋਤਿ ਰਾਜਾਨੁਭਾਵਾਨੁਗਤਪ੍ਪਭਾਵਾ. ਯਤੋਤਿ ਯਤੋ ਸੋਲ਼ਸਘਟਤੋ. ਦੇਵਤਾ ਏਵ ਦਿਵਸੇ ਦਿਵਸੇ ਆਹਰਨ੍ਤੀਤਿ ਸਮ੍ਬਨ੍ਧੋ. ਦੇਵਸਿਕਨ੍ਤਿ ਦਿਵਸੇ ਦਿਵਸੇ. ਅਗਦਾਮਲਕਨ੍ਤਿ ਅਪ੍ਪਕੇਨੇਵ ਸਰੀਰਸੋਧਨਾਦਿਸਮਤ੍ਥਂ ਸਬ੍ਬਦੋਸਹਰਂ ਓਸਧਾਮਲਕਂ. ਛਦ੍ਦਨ੍ਤਦਹਤੋਤਿ ਛਦ੍ਦਨ੍ਤਦਹਸਮੀਪੇ ਠਿਤਦੇਵਵਿਮਾਨਤੋ, ਕਪ੍ਪਰੁਕ੍ਖਤੋ ਵਾ, ਤਤ੍ਥ ਤਾਦਿਸਾ ਕਪ੍ਪਰੁਕ੍ਖਵਿਸੇਸਾ ਸਨ੍ਤਿ, ਤਤੋ ਵਾ ਆਹਰਨ੍ਤੀਤਿ ਅਤ੍ਥੋ. ਅਸੁਤ੍ਤਮਯਿਕਨ੍ਤਿ ਸੁਤ੍ਤੇਹਿ ਅਬਦ੍ਧਂ ਦਿਬ੍ਬਸੁਮਨਪੁਪ੍ਫੇਹੇਵ ਕਤਂ ਸੁਮਨਪੁਪ੍ਫਪਟਂ. ਉਟ੍ਠਿਤਸ੍ਸ ਸਾਲਿਨੋਤਿ ਸਯਂਜਾਤਸਾਲਿਨੋ, ਸਮੁਦਾਯਾਪੇਕ੍ਖਞ੍ਚੇਤ੍ਥ ਏਕਵਚਨਂ, ਸਾਲੀਨਨ੍ਤਿ ਅਤ੍ਥੋ. ਨਵ ਵਾਹਸਹਸ੍ਸਾਨੀਤਿ ਏਤ੍ਥ ਚਤਸ੍ਸੋ ਮੁਟ੍ਠਿਯੋ ਏਕੋ ਕੁਡੁਵੋ, ਚਤ੍ਤਾਰੋ ਕੁਡੁਵਾ ਏਕੋ ਪਤ੍ਥੋ, ਚਤ੍ਤਾਰੋ ਪਤ੍ਥਾ ਏਕੋ ਆਲ਼੍ਹਕੋ, ਚਤ੍ਤਾਰੋ ਆਲ਼੍ਹਕਾ ਏਕਂ ਦੋਣਂ, ਚਤ੍ਤਾਰਿ ਦੋਣਾਨਿ ਏਕਾ ਮਾਨਿਕਾ, ਚਤਸ੍ਸੋ ਮਾਨਿਕਾ ਏਕਾ ਖਾਰੀ, ਵੀਸਤਿ ਖਾਰਿਕਾ ਏਕੋ ਵਾਹੋ, ਤਦੇਵ ‘‘ਏਕਂ ਸਕਟ’’ਨ੍ਤਿ ਸੁਤ੍ਤਨਿਪਾਤਟ੍ਠਕਥਾਦੀਸੁ (ਸੁ. ਨਿ. ਅਟ੍ਠ. ੨.ਕੋਕਾਲਿਕਸੁਤ੍ਤਵਣ੍ਣਨਾ) ਵੁਤ੍ਤਂ. ਨਿਤ੍ਥੁਸਕਣੇ ਕਰੋਨ੍ਤੀਤਿ ਥੁਸਕੁਣ੍ਡਕਰਹਿਤੇ ਕਰੋਨ੍ਤਿ. ਤੇਨ ਨਿਮ੍ਮਿਤਂ ਬੁਦ੍ਧਰੂਪਂ ਪਸ੍ਸਨ੍ਤੋਤਿ ਸਮ੍ਬਨ੍ਧੋ. ਪੁਞ੍ਞਪ੍ਪਭਾਵਨਿਬ੍ਬਤ੍ਤਗ੍ਗਹਣਂ ਨਾਗਰਾਜਨਿਮ੍ਮਿਤਾਨਂ ਪੁਞ੍ਞਪ੍ਪਭਾਵਨਿਬ੍ਬਤ੍ਤੇਹਿ ਸਦਿਸਤਾਯ ਕਤਂ. ਵਿਮਲਕੇਤੁਮਾਲਾਤਿ ਏਤ੍ਥ ਕੇਤੁਮਾਲਾ ਨਾਮ ਸੀਸਤੋ ਨਿਕ੍ਖਮਿਤ੍ਵਾ ਉਪਰਿਮੁਦ੍ਧਨਿ ਪੁਞ੍ਜੋ ਹੁਤ੍ਵਾ ਦਿਸ੍ਸਮਾਨਰਸ੍ਮਿਰਾਸੀਤਿ ਵਦਨ੍ਤਿ.

ਬਾਹਿਰਕਪਾਸਣ੍ਡਨ੍ਤਿ ਬਾਹਿਰਕਪ੍ਪਵੇਦਿਤਂ ਸਮਯਵਾਦਂ. ਪਰਿਗ੍ਗਣ੍ਹੀਤਿ ਵੀਮਂਸਮਾਨੋ ਪਰਿਗ੍ਗਹੇਸਿ. ਭਦ੍ਦਪੀਠਕੇਸੂਤਿ ਵੇਤ੍ਤਮਯਪੀਠੇਸੁ. ਸਾਰੋਤਿ ਗੁਣਸਾਰੋ. ਸੀਹਪਞ੍ਜਰੇਤਿ ਮਹਾਵਾਤਪਾਨਸਮੀਪੇ. ਕਿਲੇਸਵਿਪ੍ਫਨ੍ਦਰਹਿਤਚਿਤ੍ਤਤਾਯ ਦਨ੍ਤਂ. ਨਿਚ੍ਚਂ ਪਚ੍ਚੁਪਟ੍ਠਿਤਸਤਾਰਕ੍ਖਤਾਯ ਗੁਤ੍ਤਂ. ਖੁਰਗ੍ਗੇਯੇਵਾਤਿ ਕੇਸੋਰੋਪਨਾਵਸਾਨੇ. ਅਤਿਵਿਯ ਸੋਭਤੀਤਿ ਸਮ੍ਬਨ੍ਧੋ. ਵਾਣਿਜਕੋ ਅਹੋਸੀਤਿ ਮਧੁਵਾਣਿਜਕੋ ਅਹੋਸਿ.

ਪੁਬ੍ਬੇ ਵ ਸਨ੍ਨਿਵਾਸੇਨਾਤਿ ਪੁਬ੍ਬੇ ਵਾ ਪੁਬ੍ਬਜਾਤਿਯਂ ਵਾ ਸਹਵਾਸੇਨਾਤਿ ਅਤ੍ਥੋ. ਪਚ੍ਚੁਪ੍ਪਨ੍ਨਹਿਤੇਨ ਵਾਤਿ ਵਤ੍ਤਮਾਨਭਵੇ ਹਿਤਚਰਣੇਨ ਵਾ. ਏਵਂ ਇਮੇਹਿ ਦ੍ਵੀਹਿ ਕਾਰਣੇਹਿ ਤਂ ਸਿਨੇਹਸਙ੍ਖਾਤਂ ਪੇਮਂ ਜਾਯਤੇ. ਕਿਂ ਵਿਯਾਤਿ? ਆਹ ‘‘ਉਪ੍ਪਲਂ ਵ ਯਥੋਦਕੇ’’ਤਿ. ਉਪ੍ਪਲਂ ਵਾਤਿ ਰਸ੍ਸਕਤੋ ਵਾ-ਸਦ੍ਦੋ ਅਵੁਤ੍ਤਸਮ੍ਪਿਣ੍ਡਨਤ੍ਥੋ. ਯਥਾ-ਸਦ੍ਦੋ ਉਪਮਾਯਂ. ਇਦਂ ਵੁਤ੍ਤਂ ਹੋਤਿ – ਯਥਾ ਉਪ੍ਪਲਞ੍ਚ ਸੇਸਞ੍ਚ ਪਦੁਮਾਦਿ ਉਦਕੇ ਜਾਯਮਾਨਂ ਦ੍ਵੇ ਕਾਰਣਾਨਿ ਨਿਸ੍ਸਾਯ ਜਾਯਤਿ ਉਦਕਞ੍ਚੇਵ ਕਲਲਞ੍ਚ, ਏਵਂ ਪੇਮਮ੍ਪੀਤਿ (ਜਾ. ਅਟ੍ਠ. ੨.੨.੧੭੪).

ਧੁਵਭਤ੍ਤਾਨੀਤਿ ਨਿਚ੍ਚਭਤ੍ਤਾਨਿ. ਵਜ੍ਜਾਵਜ੍ਜਨ੍ਤਿ ਖੁਦ੍ਦਕਂ ਮਹਨ੍ਤਞ੍ਚ ਵਜ੍ਜਂ. ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਭਾਰਮਕਾਸੀਤਿ ਥੇਰਸ੍ਸ ਮਹਾਨੁਭਾਵਤਂ, ਤਦਾ ਸਾਸਨਕਿਚ੍ਚਸ੍ਸ ਨਾਯਕਭਾਵੇਨ ਸਙ੍ਘਪਰਿਣਾਯਕਤਞ੍ਚ ਰਞ੍ਞੋ ਞਾਪੇਤੁਂ ਸਙ੍ਘੋ ਤਸ੍ਸ ਭਾਰਮਕਾਸੀਤਿ ਵੇਦਿਤਬ੍ਬਂ, ਨ ਅਞ੍ਞੇਸਂ ਅਜਾਨਨਤਾਯ. ਸਾਸਨਸ੍ਸ ਦਾਯਾਦੋਤਿ ਸਾਸਨਸ੍ਸ ਅਬ੍ਭਨ੍ਤਰੋ ਞਾਤਕੋ ਹੋਮਿ ਨ ਹੋਮੀਤਿ ਅਤ੍ਥੋ. ਯੇ ਸਾਸਨੇ ਪਬ੍ਬਜਿਤੁਂ ਪੁਤ੍ਤਧੀਤਰੋ ਪਰਿਚ੍ਚਜਨ੍ਤਿ, ਤੇ ਬੁਦ੍ਧਸਾਸਨੇ ਸਾਲੋਹਿਤਞਾਤਕਾ ਨਾਮ ਹੋਨ੍ਤਿ, ਸਕਲਸਾਸਨਧਾਰਣੇ ਸਮਤ੍ਥਾਨਂ ਅਤ੍ਤਨੋ ਓਰਸਪੁਤ੍ਤਾਨਂ ਪਰਿਚ੍ਚਤ੍ਤਤ੍ਤਾ ਨ ਪਚ੍ਚਯਮਤ੍ਤਦਾਯਕਾਤਿ ਇਮਮਤ੍ਥਂ ਸਨ੍ਧਾਯ ਥੇਰੋ ‘‘ਨ ਖੋ, ਮਹਾਰਾਜ, ਏਤ੍ਤਾਵਤਾ ਸਾਸਨਸ੍ਸ ਦਾਯਾਦੋ ਹੋਤੀ’’ਤਿ ਆਹ. ਕਥਞ੍ਚਰਹੀਤਿ ਏਤ੍ਥ ਚਰਹੀਤਿ ਨਿਪਾਤੋ ਅਕ੍ਖਨ੍ਤਿਂ ਦੀਪੇਤਿ. ਤਿਸ੍ਸਕੁਮਾਰਸ੍ਸਾਤਿ ਰਞ੍ਞੋ ਏਕਮਾਤੁਕਸ੍ਸ ਕਨਿਟ੍ਠਸ੍ਸ. ਸਕ੍ਖਸੀਤਿ ਸਕ੍ਖਿਸ੍ਸਸਿ. ਸਿਕ੍ਖਾਯ ਪਤਿਟ੍ਠਾਪੇਸੁਨ੍ਤਿ ਪਾਣਾਤਿਪਾਤਾ ਵੇਰਮਣਿਆਦੀਸੁ ਵਿਕਾਲਭੋਜਨਾ ਵੇਰਮਣਿਪਰਿਯੋਸਾਨਾਸੁ ਛਸੁ ਸਿਕ੍ਖਾਸੁ ਪਾਣਾਤਿਪਾਤਾ ਵੇਰਮਣਿਂ ਦ੍ਵੇ ਵਸ੍ਸਾਨਿ ਅਵੀਤਿਕ੍ਕਮ੍ਮ ਸਮਾਦਾਨਂ ਸਮਾਦਿਯਾਮੀਤਿਆਦਿਨਾ (ਪਾਚਿ. ੧੦੭੯) ਸਮਾਦਾਨਵਸੇਨ ਸਿਕ੍ਖਾਸਮ੍ਮੁਤਿਦਾਨਾਨਨ੍ਤਰਂ ਸਿਕ੍ਖਾਯ ਪਤਿਟ੍ਠਾਪੇਸੁਂ. ਛ ਵਸ੍ਸਾਨਿ ਅਭਿਸੇਕਸ੍ਸ ਅਸ੍ਸਾਤਿ ਛਵਸ੍ਸਾਭਿਸੇਕੋ.

ਸਬ੍ਬਂ ਥੇਰਵਾਦਨ੍ਤਿ ਦ੍ਵੇ ਸਙ੍ਗੀਤਿਯੋ ਆਰੁਲ਼੍ਹਾ ਪਾਲ਼ਿ. ਸਾ ਹਿ ਮਹਾਸਙ੍ਘਿਕਾਦਿਭਿਨ੍ਨਲਦ੍ਧਿਕਾਹਿ ਵਿਵੇਚੇਤੁਂ ‘‘ਥੇਰਵਾਦੋ’’ਤਿ ਵੁਤ੍ਤਾ. ਅਯਞ੍ਹਿ ਵਿਭਜ੍ਜਵਾਦੋ ਮਹਾਕਸ੍ਸਪਤ੍ਥੇਰਾਦੀਹਿ ਅਸਙ੍ਕਰਤੋ ਰਕ੍ਖਿਤੋ ਆਨੀਤੋ ਚਾਤਿ ‘‘ਥੇਰਵਾਦੋ’’ਤਿ ਵੁਚ੍ਚਤਿ, ‘‘ਸਥੇਰਵਾਦ’’ਨ੍ਤਿਪਿ ਲਿਖਨ੍ਤਿ. ਤਤ੍ਥ ‘‘ਅਟ੍ਠਕਥਾਸੁ ਆਗਤਥੇਰਵਾਦਸਹਿਤਂ ਸਾਟ੍ਠਕਥਂ ਤਿਪਿਟਕਸਙ੍ਗਹਿਤਂ ਬੁਦ੍ਧਵਚਨ’’ਨ੍ਤਿ ਆਨੇਤ੍ਵਾ ਯੋਜੇਤਬ੍ਬਂ. ਤੇਜੋਧਾਤੁਂ ਸਮਾਪਜ੍ਜਿਤ੍ਵਾਤਿ ਤੇਜੋਕਸਿਣਾਰਮ੍ਮਣਂ ਝਾਨਂ ਸਮਾਪਜ੍ਜਿਤ੍ਵਾ.

ਸਭਾਯਨ੍ਤਿ ਨਗਰਮਜ੍ਝੇ ਵਿਨਿਚ੍ਛਯਸਾਲਾਯਂ. ਦਿਟ੍ਠਿਗਤਾਨੀਤਿ ਦਿਟ੍ਠਿਯੋਵ. ਨ ਖੋ ਪਨੇਤਂ ਸਕ੍ਕਾ ਇਮੇਸਂ ਮਜ੍ਝੇ ਵਸਨ੍ਤੇਨ ਵੂਪਸਮੇਤੁਨ੍ਤਿ ਤੇਸਞ੍ਹਿ ਮਜ੍ਝੇ ਵਸਨ੍ਤੋ ਤੇਸੁਯੇਵ ਅਨ੍ਤੋਗਧਤ੍ਤਾ ਆਦੇਯ੍ਯਵਚਨੋ ਨ ਹੋਤਿ, ਤਸ੍ਮਾ ਏਵਂ ਚਿਨ੍ਤੇਸਿ. ਅਹੋਗਙ੍ਗਪਬ੍ਬਤਨ੍ਤਿ ਏਵਂਨਾਮਕਂ ਪਬ੍ਬਤਂ. ‘‘ਅਧੋਗਙ੍ਗਾਪਬ੍ਬਤ’’ਨ੍ਤਿਪਿ ਲਿਖਨ੍ਤਿ, ਤਂ ਨ ਸੁਨ੍ਦਰਂ. ਪਞ੍ਚਾਤਪੇਨ ਤਪ੍ਪੇਨ੍ਤੀਤਿ ਚਤੂਸੁ ਠਾਨੇਸੁ ਅਗ੍ਗਿਂ ਜਾਲੇਤ੍ਵਾ ਮਜ੍ਝੇ ਠਤ੍ਵਾ ਸੂਰਿਯਮਣ੍ਡਲਂ ਉਲ੍ਲੋਕੇਨ੍ਤਾ ਸੂਰਿਯਾਤਪੇਨ ਤਪ੍ਪੇਨ੍ਤਿ. ਆਦਿਚ੍ਚਂ ਅਨੁਪਰਿਵਤ੍ਤਨ੍ਤੀਤਿ ਉਦਯਕਾਲਤੋ ਪਭੁਤਿ ਸੂਰਿਯਂ ਓਲੋਕਯਮਾਨਾ ਯਾਵ ਅਤ੍ਥਙ੍ਗਮਨਾ ਸੂਰਿਯਾਭਿਮੁਖਾਵ ਪਰਿਵਤ੍ਤਨ੍ਤਿ. ਵੋਭਿਨ੍ਦਿਸ੍ਸਾਮਾਤਿ ਪਗ੍ਗਣ੍ਹਿਂਸੂਤਿ ਵਿਨਾਸੇਸ੍ਸਾਮਾਤਿ ਉਸ੍ਸਾਹਮਕਂਸੁ.

ਵਿਸ੍ਸਟ੍ਠੋਤਿ ਮਰਣਸਙ੍ਕਾਰਹਿਤੋ, ਨਿਬ੍ਭਯੋਤਿ ਅਤ੍ਥੋ. ਮਿਗਵਂ ਨਿਕ੍ਖਮਿਤ੍ਵਾਤਿ ਅਰਞ੍ਞੇ ਵਿਚਰਿਤ੍ਵਾ ਮਿਗਮਾਰਣਕੀਲ਼ਾ ਮਿਗਵਂ, ਤਂ ਉਦ੍ਦਿਸ੍ਸ ਨਿਕ੍ਖਮਿਤ੍ਵਾ ਮਿਗਵਧਤ੍ਥਂ ਨਿਕ੍ਖਮਿਤ੍ਵਾਤਿ ਅਤ੍ਥੋ. ਅਹਿਨਾਗਾਦਿਤੋ ਵਿਸੇਸਨਤ੍ਥਂ ‘‘ਹਤ੍ਥਿਨਾਗੇਨਾ’’ਤਿ ਵੁਤ੍ਤਂ. ਤਸ੍ਸ ਪਸ੍ਸਨ੍ਤਸ੍ਸੇਵਾਤਿ ਅਨਾਦਰੇ ਸਾਮਿਵਚਨਂ, ਤਸ੍ਮਿਂ ਪਸ੍ਸਨ੍ਤੇਯੇਵਾਤਿ ਅਤ੍ਥੋ. ਆਕਾਸੇ ਉਪ੍ਪਤਿਤ੍ਵਾਤਿ ਏਤ੍ਥ ਅਯਂ ਵਿਕੁਬ੍ਬਨਿਦ੍ਧਿ ਨ ਹੋਤੀਤਿ ਗਿਹਿਸ੍ਸਾਪਿ ਇਮਂ ਇਦ੍ਧਿਂ ਦਸ੍ਸੇਸਿ ਅਧਿਟ੍ਠਾਨਿਦ੍ਧਿਯਾ ਅਪ੍ਪਟਿਕ੍ਖਿਤ੍ਤਤ੍ਤਾ. ਪਕਤਿਵਣ੍ਣਞ੍ਹਿ ਵਿਜਹਿਤ੍ਵਾ ਨਾਗਵਣ੍ਣਾਦਿਦਸ੍ਸਨਂ ਵਿਕੁਬ੍ਬਨਿਦ੍ਧਿ. ਛਣਵੇਸਨ੍ਤਿ ਉਸ੍ਸਵਵੇਸਂ. ਪਧਾਨਘਰਨ੍ਤਿ ਭਾਵਨਾਨੁਯੋਗਵਸੇਨ ਵੀਰਿਯਾਰਮ੍ਭਸ੍ਸ ਅਨੁਰੂਪਂ ਵਿਵਿਤ੍ਤਸੇਨਾਸਨਂ. ਸੋਪੀਤਿ ਰਞ੍ਞੋ ਭਾਗਿਨੇਯ੍ਯਂ ਸਨ੍ਧਾਯ ਵੁਤ੍ਤਂ.

ਕੁਸਲਾਧਿਪ੍ਪਾਯੋਤਿ ਮਨਾਪਜ੍ਝਾਸਯੋ. ਦ੍ਵੇਲ਼੍ਹਕਜਾਤੋਤਿ ਸਂਸਯਮਾਪਨ੍ਨੋ. ਏਕੇਕਂ ਭਿਕ੍ਖੁਸਹਸ੍ਸਪਰਿਵਾਰਨ੍ਤਿ ਏਤ੍ਥ ‘‘ਗਣ੍ਹਿਤ੍ਵਾ ਆਗਚ੍ਛਥਾ’’ਤਿ ਆਣਾਕਾਰੇਨ ਵੁਤ੍ਤੇਪਿ ਥੇਰਾ ਭਿਕ੍ਖੂ ਸਾਸਨਹਿਤਤ੍ਤਾ ਗਤਾ. ਕਪ੍ਪਿਯਸਾਸਨਞ੍ਹੇਤਂ, ਨ ਗਿਹੀਨਂ ਗਿਹਿਕਮ੍ਮਪਟਿਸਂਯੁਤ੍ਤਂ. ਥੇਰੋ ਨਾਗਚ੍ਛੀਤਿ ਕਿਞ੍ਚਾਪਿ ‘‘ਰਾਜਾ ਪਕ੍ਕੋਸਤੀ’’ਤਿ ਵੁਤ੍ਤੇਪਿ ਧਮ੍ਮਕਮ੍ਮਤ੍ਥਾਯ ਆਗਨ੍ਤੁਂ ਵਟ੍ਟਤਿ, ਦ੍ਵਿਕ੍ਖਤ੍ਤੁਂ ਪਨ ਪੇਸਿਤੇਪਿ ‘‘ਅਨਨੁਰੂਪਾ ਯਾਚਨਾ’’ਤਿ ਨਾਗਤੋ, ‘‘ਮਹਾਨੁਭਾਵੋ ਥੇਰੋ ਯਥਾਨੁਸਿਟ੍ਠਂ ਪਟਿਪਤ੍ਤਿਕੋ ਪਮਾਣਭੂਤੋ’’ਤਿ ਰਞ੍ਞੋ ਚੇਵ ਉਭਯਪਕ੍ਖਿਕਾਨਞ੍ਚ ਅਤ੍ਤਨਿ ਬਹੁਮਾਨੁਪ੍ਪਾਦਨਵਸੇਨ ਉਦ੍ਧਂ ਕਤ੍ਤਬ੍ਬਕਮ੍ਮਸਿਦ੍ਧਿਂ ਆਕਙ੍ਖਨ੍ਤੋ ਅਸਾਰੁਪ੍ਪਵਚਨਲੇਸੇਨ ਨਾਗਚ੍ਛਿ. ਏਕਤੋ ਸਙ੍ਘਟਿਤਾ ਨਾਵਾ ਨਾਵਾਸਙ੍ਘਾਟਂ. ਸਾਸਨਪਚ੍ਚਤ੍ਥਿਕਾਨਂ ਬਹੁਭਾਵਤੋ ਆਹ ‘‘ਆਰਕ੍ਖਂ ਸਂਵਿਧਾਯਾ’’ਤਿ. ਯਨ੍ਤਿ ਯਸ੍ਮਾ. ਅਬ੍ਬਾਹਿਂਸੂਤਿ ਆਕਡ੍ਢਿਂਸੁ. ਬਾਹਿਰਤੋਤਿ ਉਯ੍ਯਾਨਸ੍ਸ ਬਾਹਿਰਤੋ. ਪਸ੍ਸਨ੍ਤਾਨਂ ਅਤਿਦੁਕ੍ਕਰਭਾਵੇਨ ਉਪਟ੍ਠਾਨਂ ਸਨ੍ਧਾਯ ‘‘ਪਦੇਸਪਥਵੀਕਮ੍ਪਨਂ ਦੁਕ੍ਕਰ’’ਨ੍ਤਿ ਆਹ. ਅਧਿਟ੍ਠਾਨੇ ਪਨੇਤ੍ਥ ਵਿਸੁਂ ਦੁਕ੍ਕਰਤਾ ਨਾਮ ਨਤ੍ਥਿ.

ਦੀਪਕਤਿਤ੍ਤਿਰੋਤਿ ਸਾਕੁਣਿਕੇਹਿ ਸਮਜਾਤਿਕਾਨਂ ਗਹਣਤ੍ਥਾਯ ਪੋਸੇਤ੍ਵਾ ਸਿਕ੍ਖੇਤ੍ਵਾ ਪਾਸਟ੍ਠਾਨੇ ਠਪਨਕਤਿਤ੍ਤਿਰੋ. ਨ ਪਟਿਚ੍ਚ ਕਮ੍ਮਂ ਫੁਸਤੀਤਿ ਗਾਥਾਯ ਯਦਿ ਤਵ ਪਾਪਕਿਰਿਯਾਯ ਮਨੋ ਨਪ੍ਪਦੁਸ੍ਸਤਿ, ਲੁਦ੍ਦੇਨ ਤਂ ਨਿਸ੍ਸਾਯ ਕਤਮ੍ਪਿ ਪਾਪਕਮ੍ਮਂ ਤਂ ਨ ਫੁਸਤਿ. ਪਾਪਕਿਰਿਯਾਯ ਹਿ ਅਪ੍ਪੋਸ੍ਸੁਕ੍ਕਸ੍ਸ ਨਿਰਾਲਯਸ੍ਸ ਭਦ੍ਰਸ੍ਸ ਸਤੋ ਤਵ ਤਂ ਪਾਪਂ ਨ ਉਪਲਿਮ੍ਪਤਿ, ਤਵ ਚਿਤ੍ਤਂ ਨ ਅਲ੍ਲੀਯਤੀਤਿ ਅਤ੍ਥੋ.

ਕਿਂ ਵਦਤਿ ਸੀਲੇਨਾਤਿ ਕਿਂਵਾਦੀ. ਅਥ ਵਾ ਕੋ ਕਤਮੋ ਵਾਦੋ ਕਿਂਵਾਦੋ, ਸੋ ਏਤਸ੍ਸ ਅਤ੍ਥੀਤਿ ਕਿਂਵਾਦੀ. ਅਤ੍ਤਾਨਞ੍ਚ ਲੋਕਞ੍ਚ ਸਸ੍ਸਤੋਤਿ ਵਾਦੋ ਏਤੇਸਨ੍ਤਿ ਸਸ੍ਸਤਵਾਦਿਨੋ. ਸਤ੍ਤੇਸੁ ਸਙ੍ਖਾਰੇਸੁ ਵਾ ਏਕਚ੍ਚਂ ਸਸ੍ਸਤਨ੍ਤਿ ਪਵਤ੍ਤੋ ਵਾਦੋ ਏਕਚ੍ਚਸਸ੍ਸਤੋ, ਤਸ੍ਮਿਂ ਨਿਯੁਤ੍ਤਾ ਏਕਚ੍ਚਸਸ੍ਸਤਿਕਾ. ‘‘ਅਨ੍ਤੋ, ਅਨਨ੍ਤੋ, ਅਨ੍ਤਾਨਨ੍ਤੋ, ਨੇਵਨ੍ਤੋ ਨਾਨਨ੍ਤੋ’’ਤਿ ਏਵਂ ਅਨ੍ਤਾਨਨ੍ਤਂ ਆਰਬ੍ਭ ਪਵਤ੍ਤਾ ਚਤ੍ਤਾਰੋ ਵਾਦਾ ਅਨ੍ਤਾਨਨ੍ਤਾ, ਤੇਸੁ ਨਿਯੁਤ੍ਤਾ ਅਨ੍ਤਾਨਨ੍ਤਿਕਾ. ਨ ਮਰਤਿ ਨ ਉਪਚ੍ਛਿਜ੍ਜਤੀਤਿ ਅਮਰਾ, ਏਵਨ੍ਤਿਪਿ ਮੇ ਨੋ, ਤਥਾਤਿਪਿ ਮੇ ਨੋਤਿਆਦਿਨਾ (ਦੀ. ਨਿ. ੧.੬੨) ਪਵਤ੍ਤਾ ਦਿਟ੍ਠਿ ਚੇਵ ਵਾਚਾ ਚ, ਤਸ੍ਸਾ ਵਿਕ੍ਖੇਪੋ ਏਤੇਸਨ੍ਤਿ ਅਮਰਾਵਿਕ੍ਖੇਪਿਕਾ. ਅਥ ਵਾ ਅਮਰਾ ਨਾਮ ਮਚ੍ਛਜਾਤਿ ਦੁਗ੍ਗਹਾ ਹੋਤਿ, ਤਸ੍ਸਾ ਅਮਰਾਯ ਵਿਯ ਵਿਕ੍ਖੇਪੋ ਏਤੇਸਨ੍ਤਿ ਅਮਰਾਵਿਕ੍ਖੇਪਿਕਾ. ਅਧਿਚ੍ਚ ਯਦਿਚ੍ਛਕਂ ਯਂ ਕਿਞ੍ਚਿ ਕਾਰਣਂ ਅਨਪੇਕ੍ਖਿਤ੍ਵਾ ਸਮੁਪ੍ਪਨ੍ਨੋ ਅਤ੍ਤਾ ਚ ਲੋਕੋ ਚਾਤਿ ਵਾਦੇ ਨਿਯੁਤ੍ਤਾ ਅਧਿਚ੍ਚਸਮੁਪ੍ਪਨ੍ਨਿਕਾ. ਸਞ੍ਞੀ ਅਤ੍ਤਾਤਿ ਵਾਦੋ ਯੇਸਨ੍ਤੇ ਸਞ੍ਞੀਵਾਦਾ. ਏਵਂ ਅਸਞ੍ਞੀਵਾਦਾ ਨੇਵਸਞ੍ਞੀਨਾਸਞ੍ਞੀਵਾਦਾਤਿ ਏਤ੍ਥਾਪਿ. ‘‘ਕਾਯਸ੍ਸ ਭੇਦਾ ਸਤ੍ਤੋ ਉਚ੍ਛਿਜ੍ਜਤੀ’’ਤਿ (ਦੀ. ਨਿ. ੧.੮੫-੮੬) ਏਵਂ ਉਚ੍ਛੇਦਂ ਵਦਨ੍ਤੀਤਿ ਉਚ੍ਛੇਦਵਾਦਾ. ਦਿਟ੍ਠਧਮ੍ਮੋਤਿ ਪਚ੍ਚਕ੍ਖੋ ਯਥਾਸਕਂ ਅਤ੍ਤਭਾਵੋ, ਤਸ੍ਮਿਂਯੇਵ ਯਥਾਕਾਮਂ ਪਞ੍ਚਕਾਮਗੁਣਪਰਿਭੋਗੇਨ ਨਿਬ੍ਬਾਨਂ ਦੁਕ੍ਖੂਪਸਮਂ ਵਦਨ੍ਤੀਤਿ ਦਿਟ੍ਠਧਮ੍ਮਨਿਬ੍ਬਾਨਵਾਦਾ. ਵਿਭਜਿਤ੍ਵਾ ਵਾਦੋ ਏਤਸ੍ਸਾਤਿ ਵਿਭਜ੍ਜਵਾਦੀ, ਭਗਵਾ. ਸਬ੍ਬਂ ਏਕਰੂਪੇਨ ਅਵਤ੍ਵਾ ਯਥਾਧਮ੍ਮਂ ਵਿਭਜਿਤ੍ਵਾ ਨਿਜ੍ਜਟਂ ਨਿਗੁਮ੍ਬਂ ਕਤ੍ਵਾ ਯਥਾ ਦਿਟ੍ਠਿਸਨ੍ਦੇਹਾਦਯੋ ਵਿਗਚ੍ਛਨ੍ਤਿ, ਸਮ੍ਮੁਤਿਪਰਮਤ੍ਥਾ ਚ ਧਮ੍ਮਾ ਅਸਙ੍ਕਰਾ ਪਟਿਭਨ੍ਤਿ, ਏਵਂ ਏਕਨ੍ਤਵਿਭਜਨਸੀਲੋਤਿ ਵੁਤ੍ਤਂ ਹੋਤਿ. ਪਰਪ੍ਪਵਾਦਂ ਮਦ੍ਦਮਾਨੋਤਿ ਤਸ੍ਮਿਂ ਕਾਲੇ ਉਪ੍ਪਨ੍ਨਂ, ਆਯਤਿਂ ਉਪ੍ਪਜ੍ਜਨਕਞ੍ਚ ਸਬ੍ਬਂ ਪਰਵਾਦਂ ਕਥਾਵਤ੍ਥੁਮਾਤਿਕਾਵਿਵਰਣਮੁਖੇਨ ਨਿਮ੍ਮਦ੍ਦਨਂ ਕਰੋਨ੍ਤੋਤਿ ਅਤ੍ਥੋ.

ਤਤਿਯਸਙ੍ਗੀਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਆਚਰਿਯਪਰਮ੍ਪਰਕਥਾਵਣ੍ਣਨਾ

ਕੇਨਾਭਤਨ੍ਤਿ ਇਮਂ ਪਞ੍ਹਂ ਵਿਸ੍ਸਜ੍ਜੇਨ੍ਤੇਨ ਜਮ੍ਬੁਦੀਪੇ ਤਾਵ ਯਾਵ ਤਤਿਯਸਙ੍ਗੀਤਿ, ਤਾਵ ਦਸ੍ਸੇਤ੍ਵਾ ਇਦਾਨਿ ਸੀਹਲ਼ਦੀਪੇ ਆਚਰਿਯਪਰਮ੍ਪਰਂ ਦਸ੍ਸੇਤੁਂ ਤਤਿਯਸਙ੍ਗਹਤੋ ਪਨ ਉਦ੍ਧਨ੍ਤਿਆਦਿ ਆਰਦ੍ਧਂ. ਇਮਂ ਦੀਪਨ੍ਤਿ ਤਮ੍ਬਪਣ੍ਣਿਦੀਪਂ. ਤਸ੍ਮਿਂ ਦੀਪੇ ਨਿਸੀਦਿਤ੍ਵਾ ਆਚਰਿਯੇਨ ਅਟ੍ਠਕਥਾਯ ਕਤਤ੍ਤਾ ‘‘ਇਮਂ ਦੀਪ’’ਨ੍ਤਿ ਵੁਤ੍ਤਂ. ਕਞ੍ਚਿ ਕਾਲਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਕਿਸ੍ਮਿਞ੍ਚਿ ਕਾਲੇਤਿ ਅਤ੍ਥੋ. ਪੋਰਾਣਾਤਿ ਸੀਹਲ਼ਦੀਪੇ ਸੀਹਲ਼ਟ੍ਠਕਥਾਕਾਰਕਾ. ਭਦ੍ਦਨਾਮੋਤਿ ਭਦ੍ਦਸਾਲਤ੍ਥੇਰੋ. ਆਗੁਂ ਪਾਪਂ ਨ ਕਰੋਨ੍ਤੀਤਿ ਨਾਗਾ. ਵਿਨਯਪਿਟਕਂ ਵਾਚਯਿਂਸੂਤਿ ਸਮ੍ਬਨ੍ਧੋ. ਤਮ੍ਬਪਣ੍ਣਿਯਾਤਿ ਭੁਮ੍ਮਵਚਨਂ. ਨਿਕਾਯੇ ਪਞ੍ਚਾਤਿ ਵਿਨਯਾਭਿਧਮ੍ਮਾਨਂ ਵਿਸੁਂ ਗਹਿਤਤ੍ਤਾ ਤਬ੍ਬਿਨਿਮੁਤ੍ਤਾ ਪਞ੍ਚ ਨਿਕਾਯਾ ਗਹੇਤਬ੍ਬਾ. ਪਕਰਣੇਤਿ ਅਭਿਧਮ੍ਮਪਕਰਣੇ ਵਾਚੇਸੁਨ੍ਤਿ ਯੋਜਨਾ. ਤੀਣਿ ਪਿਟਕਾਨਿ ਸ੍ਵਾਗਤਾਨਿ ਅਸ੍ਸਾਤਿ ‘‘ਤੇਪਿਟਕੋ’’ਤਿ ਵਤ੍ਤਬ੍ਬੇ ‘‘ਤਿਪੇਟਕੋ’’ਤਿ ਛਨ੍ਦਾਨੁਰਕ੍ਖਣਤ੍ਥਂ ਵੁਤ੍ਤਂ. ਤਾਰਕਰਾਜਾਤਿ ਚਨ੍ਦਿਮਾ. ਪੁਪ੍ਫਨਾਮੋਤਿ ਏਤ੍ਥ ਮਹਾਪਦੁਮਤ੍ਥੇਰੋ ਸੁਮਨਤ੍ਥੇਰੋ ਚ ਞਾਤਬ੍ਬੋਤਿ ਦ੍ਵਿਕ੍ਖਤ੍ਤੁਂ ‘‘ਪੁਪ੍ਫਨਾਮੋ’’ਤਿ ਵੁਤ੍ਤਂ.

ਵਨਵਾਸਿਨ੍ਤਿ ਵਨਵਾਸੀਰਟ੍ਠਂ. ਕਰਕਵਸ੍ਸਨ੍ਤਿ ਹਿਮਪਾਤਨਕਵਸ੍ਸਂ, ਕਰਕਧਾਰਾਸਦਿਸਂ ਵਾ ਵਸ੍ਸਂ. ਹਰਾਪੇਤ੍ਵਾਤਿ ਉਦਕੋਘੇਨ ਹਰਾਪੇਤ੍ਵਾ. ਛਿਨ੍ਨਭਿਨ੍ਨਪਟਧਰੋਤਿ ਸਤ੍ਥਕੇਨ ਛਿਨ੍ਨਂ ਰਙ੍ਗੇਨ ਭਿਨ੍ਨਂ ਪਟਂ ਧਾਰਣਕੋ. ਭਣ੍ਡੂਤਿ ਮੁਣ੍ਡਕੋ. ਮਕ੍ਖਂ ਅਸਹਮਾਨੋਤਿ ਥੇਰਸ੍ਸ ਆਨੁਭਾਵਂ ਪਟਿਚ੍ਚ ਅਤ੍ਤਨੋ ਉਪ੍ਪਨ੍ਨਂ ਪਰੇਸਂ ਗੁਣਮਕ੍ਖਨਲਕ੍ਖਣਂ ਮਕ੍ਖਂ ਤਥਾ ਪਵਤ੍ਤਂ ਕੋਧਂ ਅਸਹਮਾਨੋ. ਅਸਨਿਯੋ ਫਲਨ੍ਤੀਤਿ ਗਜ੍ਜਨ੍ਤਾ ਪਤਨ੍ਤਿ. ਮੇ ਮਮ ਭਯਭੇਰਵਂ ਜਨੇਤੁਂ ਪਟਿਬਲੋ ਨ ਅਸ੍ਸ ਨ ਭਵੇਯ੍ਯਾਤਿ ਯੋਜਨਾ. ਅਞ੍ਞਦਤ੍ਥੂਤਿ ਏਕਂਸੇਨ. ਕਸ੍ਮੀਰਗਨ੍ਧਾਰਾਤਿ ਕਸ੍ਮੀਰਗਨ੍ਧਾਰਰਟ੍ਠਵਾਸਿਨੋ. ਇਸਿਵਾਤਪਟਿਵਾਤਾਤਿ ਭਿਕ੍ਖੂਨਂ ਚੀਵਰਚਲਨਕਾਯਚਲਨੇਹਿ ਸਞ੍ਜਨਿਤਵਾਤੇਹਿ ਪਰਿਤੋ ਸਮਨ੍ਤਤੋ ਬੀਜਯਮਾਨਾ ਅਹੇਸੁਂ. ਧਮ੍ਮਚਕ੍ਖੁਨ੍ਤਿ ਹੇਟ੍ਠਾਮਗ੍ਗਤ੍ਤਯੇ ਞਾਣਂ. ਅਨਮਤਗ੍ਗਿਯਨ੍ਤਿ ਅਨਮਤਗ੍ਗਸਂਯੁਤ੍ਤਂ (ਸਂ. ਨਿ. ੨.੧੨੪ ਆਦਯੋ). ਸਮਧਿਕਾਨੀਤਿ ਸਾਧਿਕਾਨਿ. ਪਞ੍ਚ ਰਟ੍ਠਾਨੀਤਿ ਪਞ੍ਚ ਚਿਨਰਟ੍ਠਾਨਿ. ਵੇਗਸਾਤਿ ਵੇਗੇਨ. ਸਮਨ੍ਤਤੋ ਰਕ੍ਖਂ ਠਪੇਸੀਤਿ ਤੇਸਂ ਅਪ੍ਪਵੇਸਨਤ੍ਥਾਯ ਅਧਿਟ੍ਠਾਨਵਸੇਨ ਰਕ੍ਖਂ ਠਪੇਸਿ. ਅਡ੍ਢੁਡ੍ਢਾਨਿ ਸਹਸ੍ਸਾਨੀਤਿ ਅਡ੍ਢੇਨ ਚਤੁਤ੍ਥਾਨਿ ਅਡ੍ਢੁਡ੍ਢਾਨਿ, ਅਤਿਰੇਕਪਞ੍ਚਸਤਾਨਿ ਤੀਣਿ ਸਹਸ੍ਸਾਨੀਤਿ ਅਤ੍ਥੋ. ਦਿਯਡ੍ਢਸਹਸ੍ਸਨ੍ਤਿ ਅਡ੍ਢੇਨ ਦੁਤਿਯਂ ਦਿਯਡ੍ਢਂ, ਅਤਿਰੇਕਪਞ੍ਚਸਤਿਕਂ ਸਹਸ੍ਸਨ੍ਤਿ ਅਤ੍ਥੋ. ਨਿਦ੍ਧਮੇਤ੍ਵਾਨਾਤਿ ਪਲਾਪੇਤ੍ਵਾ.

ਰਾਜਗਹਨਗਰਪਰਿਵਤ੍ਤਕੇਨਾਤਿ ਰਾਜਗਹਨਗਰਂ ਪਰਿਵਤ੍ਤੇਤ੍ਵਾ ਤਤੋ ਬਹਿ ਤਂ ਪਦਕ੍ਖਿਣਂ ਕਤ੍ਵਾ ਗਤਮਗ੍ਗੇਨ, ਗਮਨੇਨ ਵਾ. ਆਰੋਪੇਸੀਤਿ ਪਟਿਪਾਦੇਸਿ. ਪਲ਼ਿਨਾਤਿ ਆਕਾਸਂ ਪਕ੍ਖਨ੍ਦਿਂਸੁ. ਨਗੁਤ੍ਤਮੇਤਿ ਚੇਤਿਯਗਿਰਿਮਾਹ. ਪੁਰਤੋਤਿ ਪਾਚੀਨਦਿਸਾਭਾਗੇ. ਪੁਰਸੇਟ੍ਠਸ੍ਸਾਤਿ ਸੇਟ੍ਠਸ੍ਸ ਅਨੁਰਾਧਪੁਰਸ੍ਸ. ਸਿਲਕੂਟਮ੍ਹੀਤਿ ਏਵਂਨਾਮਕੇ ਪਬ੍ਬਤਕੂਟੇ. ਸੀਹਕੁਮਾਰਸ੍ਸ ਪੁਤ੍ਤੋਤਿ ਏਤ੍ਥ ‘‘ਕਲਿਙ੍ਗਰਾਜਧੀਤੁ ਕੁਚ੍ਛਿਸ੍ਮਿਂ ਸੀਹਸ੍ਸ ਜਾਤੋ ਸੀਹਕੁਮਾਰੋ’’ਤਿ ਵਦਨ੍ਤਿ. ਜੇਟ੍ਠਮਾਸਸ੍ਸ ਪੁਣ੍ਣਮਿਯਂ ਜੇਟ੍ਠਨਕ੍ਖਤ੍ਤਂ ਵਾ ਮੂਲਨਕ੍ਖਤ੍ਤਂ ਵਾ ਹੋਤੀਤਿ ਆਹ ‘‘ਜੇਟ੍ਠਮੂਲਨਕ੍ਖਤ੍ਤਂ ਨਾਮ ਹੋਤੀ’’ਤਿ. ਮਿਗਾਨਂ ਵਾਨਤੋ ਹਿਂਸਨਤੋ ਬਾਧਨਤੋ ਮਿਗਵਂ, ਮਿਗਵਿਜ੍ਝਨਕੀਲ਼ਾ. ਰੋਹਿਤਮਿਗਰੂਪਨ੍ਤਿ ਗੋਕਣ੍ਣਮਿਗਵੇਸਂ. ਰਥਯਟ੍ਠਿਪ੍ਪਮਾਣਾਤਿ ਰਥਪਤੋਦਪ੍ਪਮਾਣਾ. ਏਕਾ ਲਤਾਯਟ੍ਠਿ ਨਾਮਾਤਿ ਏਕਾ ਰਜਤਮਯਾ ਕਞ੍ਚਨਲਤਾਯ ਪਟਿਮਣ੍ਡਿਤਤ੍ਤਾ ਏਵਂ ਲਦ੍ਧਨਾਮਾ. ਪੁਪ੍ਫਯਟ੍ਠਿਯਂ ਨੀਲਾਦੀਨਿ ਪੁਪ੍ਫਾਨਿ, ਸਕੁਣਯਟ੍ਠਿਯਂ ਨਾਨਪ੍ਪਕਾਰਾ ਮਿਗਪਕ੍ਖਿਨੋ ਵਿਚਿਤ੍ਤਕਮ੍ਮਕਤਾ ਵਿਯ ਖਾਯਨ੍ਤੀਤਿ ਦਟ੍ਠਬ੍ਬਂ. ਰਾਜਕਕੁਧਭਣ੍ਡਾਨੀਤਿ ਰਾਜਾਰਹਉਤ੍ਤਮਭਣ੍ਡਾਨਿ. ਸਙ੍ਖਨ੍ਤਿ ਦਕ੍ਖਿਣਾਵਟ੍ਟਂ ਅਭਿਸੇਕਸਙ੍ਖਂ. ਵਡ੍ਢਮਾਨਨ੍ਤਿ ਅਲਙ੍ਕਾਰਚੁਣ੍ਣਂ, ‘‘ਨਹਾਨਚੁਣ੍ਣ’’ਨ੍ਤਿ ਕੇਚਿ. ਵਟਂਸਕਨ੍ਤਿ ਕਣ੍ਣਪਿਲ਼ਨ੍ਧਨਂ ਵਟਂਸਕਨ੍ਤਿ ਵੁਤ੍ਤਂ ਹੋਤਿ. ਨਨ੍ਦਿਯਾਵਟ੍ਟਨ੍ਤਿ ਨਨ੍ਦਿਯਾਵਟ੍ਟਪੁਪ੍ਫਾਕਾਰੇਨ ਮਙ੍ਗਲਤ੍ਥਂ ਸੁਵਣ੍ਣੇਨ ਕਤਂ. ਕਞ੍ਞਨ੍ਤਿ ਖਤ੍ਤਿਯਕੁਮਾਰਿਂ. ਹਤ੍ਥਪੁਞ੍ਛਨਨ੍ਤਿ ਪੀਤਵਣ੍ਣਂ ਮਹਗ੍ਘਹਤ੍ਥਪੁਞ੍ਛਨਵਤ੍ਥਂ. ਅਰੁਣਵਣ੍ਣਮਤ੍ਤਿਕਨ੍ਤਿ ਨਾਗਭਵਨਸਮ੍ਭਵਂ. ਵਤ੍ਥਕੋਟਿਕਨ੍ਤਿ ਵਤ੍ਥਯੁਗਮੇਵ. ਨਾਗਮਾਹਟਨ੍ਤਿ ਨਾਗੇਹਿ ਆਹਟਂ. ਅਮਤੋਸਧਨ੍ਤਿ ਏਵਂਨਾਮਿਕਾ ਗੁਲ਼ਿਕਜਾਤਿ. ਅਮਤਸਦਿਸਕਿਚ੍ਚਤ੍ਤਾ ਏਵਂ ਵੁਚ੍ਚਤਿ. ਭੂਮਤ੍ਥਰਣਸਙ੍ਖੇਪੇਨਾਤਿ ਭੂਮਤ੍ਥਰਣਾਕਾਰੇਨ. ਉਪ੍ਪਾਤਪਾਠਕਾਤਿ ਨਿਮਿਤ੍ਤਪਾਠਕਾ. ਅਲਂ ਗਚ੍ਛਾਮਾਤਿ ‘‘ਪੁਰਸ੍ਸ ਅਚ੍ਚਾਸਨ੍ਨਤ੍ਤਾ ਸਾਰੁਪ੍ਪਂ ਨ ਹੋਤੀ’’ਤਿ ਪਟਿਕ੍ਖਿਪਨ੍ਤੋ ਆਹ. ਅਡ੍ਢਨਵਮਾਨਂ ਪਾਣਸਹਸ੍ਸਾਨਨ੍ਤਿ (ਅ. ਨਿ. ੬.੫੩) ਪਞ੍ਚਸਤਾਧਿਕਾਨਂ ਅਟ੍ਠਨ੍ਨਂ ਪਾਣਸਹਸ੍ਸਾਨਂ. ਅਪ੍ਪਮਾਦਸੁਤ੍ਤਨ੍ਤਿ ਅਙ੍ਗੁਤ੍ਤਰਨਿਕਾਯੇ ਮਹਾਅਪ੍ਪਮਾਦਸੁਤ੍ਤਂ, ਰਾਜੋਵਾਦਸੁਤ੍ਤਨ੍ਤਿ ਵੁਤ੍ਤਂ ਹੋਤਿ.

ਮਹਚ੍ਚਾਤਿ ਮਹਤਾ. ਉਪਸਙ੍ਕਮਨ੍ਤੋਤਿ ਅਤਿਵਿਯ ਕਿਲਨ੍ਤਰੂਪੋ ਹੁਤ੍ਵਾ ਉਪਸਙ੍ਕਮੀਤਿ ਅਤ੍ਥੋ. ਤੁਮ੍ਹੇ ਜਾਨਨਤ੍ਥਨ੍ਤਿ ਸਮ੍ਬਨ੍ਧੋ. ਪਞ੍ਚਪਣ੍ਣਾਸਾਯਾਤਿ ਏਤ੍ਥ ‘‘ਚਤੁਪਞ੍ਞਾਸਾਯਾਤਿ ਵਤ੍ਤਬ੍ਬਂ. ਏਵਞ੍ਹਿ ਸਤਿ ਉਪਰਿ ਵੁਚ੍ਚਮਾਨਂ ਦ੍ਵਾਸਟ੍ਠਿ ਅਰਹਨ੍ਤੋਤਿ ਵਚਨਂ ਸਮੇਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.ਆਚਰਿਯਪਰਮ੍ਪਰਕਥਾਵਣ੍ਣਨਾ) ਵੁਤ੍ਤਂ. ਦਸਭਾਤਿਕਸਮਾਕੁਲਨ੍ਤਿ ਮੁਟਸਿਵਸ੍ਸ ਪੁਤ੍ਤੇਹਿ ਦੇਵਾਨਂਪਿਯਤਿਸ੍ਸਾਦੀਹਿ ਦਸਹਿ ਭਾਤਿਕੇਹਿ ਸਮਾਕਿਣ੍ਣਂ. ਚਿਰਦਿਟ੍ਠੋ ਸਮ੍ਮਾਸਮ੍ਬੁਦ੍ਧੋਤਿ ਧਾਤੁਯੋ ਸਨ੍ਧਾਯਾਹ. ਸਬ੍ਬਤਾਲ਼ਾਵਚਰੇਤਿ ਸਬ੍ਬਾਨਿ ਤੁਰਿਯਭਣ੍ਡਾਨਿ, ਤਂਸਹਚਰਿਤੇ ਵਾ ਵਾਦਕੇ. ਉਪਟ੍ਠਾਪੇਤ੍ਵਾਤਿ ਉਪਹਾਰਕਾਰਾਪਨਵਸੇਨ ਸਨ੍ਨਿਪਾਤੇਤ੍ਵਾ. ਵਡ੍ਢਮਾਨਕਚ੍ਛਾਯਾਯਾਤਿ ਪਚ੍ਛਾਭਤ੍ਤਂ. ਪੋਕ੍ਖਰਵਸ੍ਸਨ੍ਤਿ ਪੋਕ੍ਖਰਪਤ੍ਤੇ ਵਿਯ ਅਤੇਮਿਤੁਕਾਮਾਨਂ ਉਪਰਿ ਅਤੇਮੇਤ੍ਵਾ ਪਵਤ੍ਤਨਕਵਸ੍ਸਂ. ਮਹਾਵੀਰੋਤਿ ਸਤ੍ਥੁਵੋਹਾਰੇਨ ਧਾਤੁ ਏਵ ਵੁਤ੍ਤਾ. ਪਚ੍ਛਿਮਦਿਸਾਭਿਮੁਖੋਵ ਹੁਤ੍ਵਾ ਅਪਸਕ੍ਕਨ੍ਤੋਤਿ ਏਤ੍ਥ ਪੁਰਤ੍ਥਾਭਿਮੁਖੋ ਠਿਤੋਵ ਪਿਟ੍ਠਿਤੋ ਅਪਸਕ੍ਕਨੇਨ ਪਚ੍ਛਿਮਦਿਸਾਯ ਗਚ੍ਛਨ੍ਤੋ ਤਾਦਿਸੋਪਸਙ੍ਕਮਨਂ ਸਨ੍ਧਾਯ ‘‘ਪਚ੍ਛਿਮਦਿਸਾਭਿਮੁਖੋ’’ਤਿ ਵੁਤ੍ਤੋ. ‘‘ਮਹੇਜਵਤ੍ਥੁ ਨਾਮ ਏਵਂਨਾਮਕਂ ਦੇਵਟ੍ਠਾਨ’’ਨ੍ਤਿ ਵਦਨ੍ਤਿ.

ਪਜ੍ਜਰਕੇਨਾਤਿ ਅਮਨੁਸ੍ਸਸਮੁਟ੍ਠਾਪਿਤੇਨ ਪਜ੍ਜਰਕਰੋਗੇਨ. ਦੇਵੋਤਿ ਮੇਘੋ. ਅਨੁਪ੍ਪਵੇਚ੍ਛੀਤਿ ਵਿਮੁਚ੍ਚਿ. ਵਿਵਾਦੋ ਹੋਤੀਤਿ ਏਤ੍ਥ ਕਿਰਿਯਾਕਾਲਮਪੇਕ੍ਖਿਤ੍ਵਾ ਵਤ੍ਤਮਾਨਪ੍ਪਯੋਗੋ ਦਟ੍ਠਬ੍ਬੋ. ਏਵਂ ਈਦਿਸੇਸੁ ਸਬ੍ਬਤ੍ਥ. ਤਦੇਤਨ੍ਤਿ ਠਾਨਂ ਤਿਟ੍ਠਤੀਤਿ ਸਮ੍ਬਨ੍ਧੋ. ‘‘ਛਨ੍ਨਂ ਵਣ੍ਣਾਨਂ ਸਮ੍ਬਨ੍ਧਭੂਤਾਨਂ ਰਂਸਿਯੋ ਚਾ’’ਤਿ ਅਜ੍ਝਾਹਰਿਤਬ੍ਬਂ, ‘‘ਛਨ੍ਨਂ ਵਣ੍ਣਾਨਂ ਉਦਕਧਾਰਾ ਚਾ’’ਤਿ ਏਵਮ੍ਪੇਤ੍ਥ ਸਮ੍ਬਨ੍ਧਂ ਵਦਨ੍ਤਿ. ਪਰਿਨਿਬ੍ਬੁਤੇਪਿ ਭਗਵਤਿ ਤਸ੍ਸਾਨੁਭਾਵੇਨ ਏਵਰੂਪਂ ਪਾਟਿਹਾਰਿਯਂ ਅਹੋਸਿ ਏਵਾਤਿ ਦਸ੍ਸੇਤੁਂ ਏਵਂ ਅਚਿਨ੍ਤਿਯਾਤਿਆਦਿਗਾਥਮਾਹ. ਰਕ੍ਖਂ ਕਰੋਨ੍ਤੋਤਿ ਅਤ੍ਤਨਾ ਉਪਾਯੇਨ ਪਲਾਪਿਤਾਨਂ ਯਕ੍ਖਾਨਂ ਪੁਨ ਅਪ੍ਪਵਿਸਨਤ੍ਥਾਯ ਪਰਿਤ੍ਤਾਨਂ ਕਰੋਨ੍ਤੋ. ਆਵਿਜ੍ਜੀਤਿ ਪਰਿਯਾਯਿ.

ਰਞ੍ਞੋ ਭਾਤਾਤਿ ਰਞ੍ਞੋ ਕਨਿਟ੍ਠਭਾਤਾ. ਅਨੁਲ਼ਾਦੇਵੀ ਨਾਮ ਰਞ੍ਞੋ ਜੇਟ੍ਠਭਾਤੁ ਜਾਯਾ. ਸਰਸਰਂਸਿਜਾਲਵਿਸ੍ਸਜ੍ਜਨਕੇਨਾਤਿ ਸਿਨਿਦ੍ਧਤਾਯ ਰਸਵਨ੍ਤਂ ਓਜਵਨ੍ਤਂ ਰਂਸਿਜਾਲਂ ਵਿਸ੍ਸਜ੍ਜੇਨ੍ਤੇਨ. ਏਕਦਿਵਸੇਨ ਅਗਮਾਸੀਤਿ ਸਮ੍ਬਨ੍ਧੋ. ਅਪ੍ਪੇਸੀਤਿ ਲੇਖਸਾਸਨਂ ਪਤਿਟ੍ਠਾਪੇਸਿ. ਉਦਿਕ੍ਖਤੀਤਿ ਅਪੇਕ੍ਖਤਿ ਪਤ੍ਥੇਤਿ. ਭਾਰਿਯਨ੍ਤਿ ਗਰੁਕਂ, ਅਨਤਿਕ੍ਕਮਨੀਯਨ੍ਤਿ ਅਤ੍ਥੋ. ਮਂ ਪਟਿਮਾਨੇਤੀਤਿ ਮਂ ਉਦਿਕ੍ਖਤਿ. ਕਮ੍ਮਾਰਵਣ੍ਣਨ੍ਤਿ ਰਞ੍ਞੋ ਪਕਤਿਸੁਵਣ੍ਣਕਾਰਵਣ੍ਣਂ. ਤਿਹਤ੍ਥਵਿਕ੍ਖਮ੍ਭਨ੍ਤਿ ਤਿਹਤ੍ਥਵਿਤ੍ਥਾਰਂ. ਸਕਲਜਮ੍ਬੁਦੀਪਰਜ੍ਜੇਨਾਤਿ ਏਤ੍ਥ ਰਞ੍ਞੋ ਇਦਨ੍ਤਿ ਰਜ੍ਜਂ, ਸਕਲਜਮ੍ਬੁਦੀਪਤੋ ਉਪ੍ਪਜ੍ਜਨਕਆਯੋ ਚੇਵ ਆਣਾਦਯੋ ਚ, ਤੇਨ ਪੂਜੇਮੀਤਿ ਅਤ੍ਥੋ, ਨ ਸਕਲਪਥਵੀਪਾਸਾਦਾਦਿਵਤ੍ਥੁਨਾ ਤਸ੍ਸ ਸਤ੍ਤਾਹਂ ਦੇਮੀਤਿਆਦਿਨਾ ਕਾਲਪਰਿਚ੍ਛੇਦਂ ਕਤ੍ਵਾ ਦਾਤੁਂ ਅਯੁਤ੍ਤਤ੍ਤਾ. ਏਵਞ੍ਹਿ ਦੇਨ੍ਤੋ ਤਾਵਕਾਲਿਕਂ ਦੇਤਿ ਨਾਮ ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸ, ਪਥਵਾਦਿਵਤ੍ਥੁਪਰਿਚ੍ਚਾਗੇਨ ਚ ਪੁਨ ਗਹਣਸ੍ਸ ਅਯੁਤ੍ਤਤ੍ਤਾ. ਨਿਯਮਿਤਕਾਲੇ ਪਨ ਆਯਾਦਯੋ ਪਰਿਚ੍ਚਤ੍ਤਾ ਏਵਾਤਿ ਤਤੋ ਪਰਂ ਅਪਰਿਚ੍ਚਤ੍ਤਤ੍ਤਾ ਗਹੇਤੁਂ ਵਟ੍ਟਤਿ. ਤਸ੍ਮਾ ਵੁਤ੍ਤਨਯੇਨੇਤ੍ਥ ਇਤੋ ਪਰਮ੍ਪਿ ਆਯਾਦਿਦਾਨਵਸੇਨੇਵ ਰਜ੍ਜਦਾਨਂ ਵੇਦਿਤਬ੍ਬਂ. ਪੁਪ੍ਫੁਲ਼ਕਾ ਹੁਤ੍ਵਾਤਿ ਕੇਤਕੀਪਾਰੋਹਙ੍ਕੁਰਾ ਵਿਯ ਉਦਕਪੁਪ੍ਫੁਲ਼ਕਾਕਾਰਾ ਹੁਤ੍ਵਾ. ਗਵਕ੍ਖਜਾਲਸਦਿਸਨ੍ਤਿ ਭਾਵਨਪੁਂਸਕਂ, ਵਾਤਪਾਨੇਸੁ ਜਾਲਾਕਾਰੇਨ ਠਪਿਤਦਾਰੁਪਟਸਦਿਸਨ੍ਤਿ ਅਤ੍ਥੋ, ਗਵਕ੍ਖੇਨ ਚ ਸੁਤ੍ਤਾਦਿਮਯਜਾਲੇਨ ਚ ਸਦਿਸਨ੍ਤਿ ਵਾ ਅਤ੍ਥੋ.

ਦੇਵਦੁਨ੍ਦੁਭਿਯੋਤਿ ਏਤ੍ਥ ਦੇਵੋਤਿ ਮੇਘੋ, ਤਸ੍ਸ ਅਚ੍ਛਸੁਕ੍ਖਤਾਯ ਆਕਾਸਮਿਵ ਖਾਯਮਾਨਸ੍ਸ ਅਨਿਮਿਤ੍ਤਗਜ੍ਜਿਤਂ ਦੇਵਦੁਨ੍ਦੁਭਿ ਨਾਮ, ਯਂ ‘‘ਆਕਾਸਦੁਨ੍ਦੁਭੀ’’ਤਿਪਿ ਵਦਨ੍ਤਿ. ਫਲਿਂਸੂਤਿ ਥਨਿਂਸੁ. ਪਬ੍ਬਤਾਨਂ ਨਚ੍ਚੇਹੀਤਿ ਪਥਵੀਕਮ੍ਪੇਨ ਇਤੋ ਚਿਤੋ ਚ ਭਮਨ੍ਤਾਨਂ ਪਬ੍ਬਤਾਨਂ ਨਚ੍ਚੇਹਿ. ਵਿਮ੍ਹਯਜਾਤਾ ਯਕ੍ਖਾ ‘‘ਹਿ’’ਨ੍ਤਿਸਦ੍ਦਂ ਨਿਚ੍ਛਾਰੇਨ੍ਤੀਤਿ ਆਹ ‘‘ਯਕ੍ਖਾਨਂ ਹਿਙ੍ਕਾਰੇਹੀ’’ਤਿ. ਸਕਸਕਪਟਿਭਾਨੇਹੀਤਿ ਅਤ੍ਤਨੋ ਅਤ੍ਤਨੋ ਸਿਪ੍ਪਕੋਸਲ੍ਲੇਹਿ. ਅਭਿਸੇਕਂ ਦਤ੍ਵਾਤਿ ਅਨੋਤਤ੍ਤਦਹੋਦਕੇਨ ਅਭਿਸੇਕਂ ਦਤ੍ਵਾ.

ਦੇਵਤਾਕੁਲਾਨੀਤਿ ਮਹਾਬੋਧਿਂ ਪਰਿਵਾਰੇਤ੍ਵਾ ਠਿਤਨਾਗਯਕ੍ਖਾਦਿਦੇਵਤਾਕੁਲਾਨਿ ਦਤ੍ਵਾਤਿ ਸਮ੍ਬਨ੍ਧੋ. ਗੋਪਕਰਾਜਕਮ੍ਮਿਨੋ ਤਥਾ ‘‘ਤਰਚ੍ਛਾ’’ਤਿ ਵਦਨ੍ਤਿ. ਇਮਿਨਾ ਪਰਿਵਾਰੇਨਾਤਿ ਸਹਤ੍ਥੇ ਕਰਣਵਚਨਂ, ਇਮਿਨਾ ਪਰਿਵਾਰੇਨ ਸਹਾਤਿ ਅਤ੍ਥੋ. ਤਾਮਲਿਤ੍ਤਿਨ੍ਤਿ ਏਵਂਨਾਮਕਂ ਸਮੁਦ੍ਦਤੀਰੇ ਪਟ੍ਟਨਂ. ਇਦਮਸ੍ਸ ਤਤਿਯਨ੍ਤਿ ਸੁਵਣ੍ਣਕਟਾਹੇ ਪਤਿਟ੍ਠਿਤਸਾਖਾਬੋਧਿਯਾ ਰਜ੍ਜਸਮ੍ਪਦਾਨਂ ਸਨ੍ਧਾਯ ਵੁਤ੍ਤਂ. ਤਤੋ ਪਨ ਪੁਬ੍ਬੇ ਏਕਵਾਰਂ ਰਜ੍ਜਸਮ੍ਪਦਾਨਂ ਅਚ੍ਛਿਨ੍ਨਾਯ ਸਾਖਾਯ ਮਹਾਬੋਧਿਯਾ ਏਵ ਕਤਂ, ਤੇਨ ਸਦ੍ਧਿਂ ਚਤੁਕ੍ਖਤ੍ਤੁਂ ਰਾਜਾ ਰਜ੍ਜੇਨ ਪੂਜੇਸਿ. ਰਜ੍ਜੇਨ ਪੂਜਿਤਦਿਵਸੇਸੁ ਕਿਰ ਸਕਲਦੀਪਤੋ ਉਪ੍ਪਨ੍ਨਂ ਆਯਂ ਗਹੇਤ੍ਵਾ ਮਹਾਬੋਧਿਮੇਵ ਪੂਜੇਸਿ.

ਪਠਮਪਾਟਿਪਦਦਿਵਸੇਤਿ ਸੁਕ੍ਕਪਕ੍ਖਪਾਟਿਪਦਦਿਵਸੇ. ਤਞ੍ਹਿ ਕਣ੍ਹਪਕ੍ਖਪਾਟਿਪਦਦਿਵਸਂ ਅਪੇਕ੍ਖਿਤ੍ਵਾ ‘‘ਪਠਮਪਾਟਿਪਦਦਿਵਸ’’ਨ੍ਤਿ ਵੁਤ੍ਤਂ, ਇਦਞ੍ਚ ਤਸ੍ਮਿਂ ਤਮ੍ਬਪਣ੍ਣਿਦੀਪੇ ਵੋਹਾਰਂ ਗਹੇਤ੍ਵਾ ਵੁਤ੍ਤਂ, ਇਧ ਪਨ ਪੁਣ੍ਣਮਿਤੋ ਪਟ੍ਠਾਯ ਯਾਵ ਅਪਰਾ ਪੁਣ੍ਣਮੀ, ਤਾਵ ਏਕੋ ਮਾਸੋਤਿ ਵੋਹਾਰੋ. ਤਸ੍ਮਾ ਇਮਿਨਾ ਵੋਹਾਰੇਨ ‘‘ਦੁਤਿਯਪਾਟਿਪਦਦਿਵਸੇ’’ਤਿ ਵਤ੍ਤਬ੍ਬਂ ਸਿਯਾ ਕਣ੍ਹਪਕ੍ਖਪਾਟਿਪਦਸ੍ਸ ਇਧ ਪਠਮਪਾਟਿਪਦਤ੍ਤਾ. ਗਚ੍ਛਤਿ ਵਤਰੇਤਿ ਏਤ੍ਥ ਅਰੇਤਿ ਖੇਦੇ. ਸਮਨ੍ਤਾਯੋਜਨਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਯੋਜਨਪ੍ਪਮਾਣੇ ਪਦੇਸੇ ਸਬ੍ਬਤ੍ਥਾਤਿ ਅਤ੍ਥੋ. ਸੁਪਣ੍ਣਰੂਪੇਨਾਤਿ ਮਹਾਬੋਧਿਂ ਬਲਕ੍ਕਾਰੇਨ ਗਹੇਤ੍ਵਾ ਨਾਗਭਵਨਂ ਨੇਤੁਕਾਮਾਨਿ ਨਾਗਰਾਜਕੁਲਾਨਿ ਇਦ੍ਧਿਯਾ ਗਹਿਤੇਨ ਗਰੁਲ਼ਰੂਪੇਨ ਸਨ੍ਤਾਸੇਤਿ. ਤਂ ਵਿਭੂਤਿਂ ਪਸ੍ਸਿਤ੍ਵਾਤਿ ਦੇਵਤਾਦੀਹਿ ਕਰੀਯਮਾਨਂ ਪੂਜਾਮਹਤ੍ਤਂ, ਮਹਾਬੋਧਿਯਾ ਚ ਆਨੁਭਾਵਮਹਤ੍ਤਂ ਦਿਸ੍ਵਾ ਸਯਮ੍ਪਿ ਤਥਾ ਪੂਜੇਤੁਕਾਮਾ ਥੇਰਿਂ ਯਾਚਿਤ੍ਵਾਤਿ ਯੋਜਨਾ. ਸਮੁਦ੍ਦਸਾਲਵਤ੍ਥੁਸ੍ਮਿਨ੍ਤਿ ਯਸ੍ਮਿਂ ਪਦੇਸੇ ਠਤ੍ਵਾ ਰਾਜਾ ਸਮੁਦ੍ਦੇ ਆਗਚ੍ਛਨ੍ਤਂ ਬੋਧਿਂ ਥੇਰਾਨੁਭਾਵੇਨ ਅਦ੍ਦਸ, ਯਤ੍ਥ ਚ ਪਚ੍ਛਾ ਸਮੁਦ੍ਦਸ੍ਸ ਦਿਟ੍ਠਟ੍ਠਾਨਨ੍ਤਿ ਪਕਾਸੇਤੁਂ ਸਮੁਦ੍ਦਸਾਲਂ ਨਾਮ ਸਾਲਂ ਅਕਂਸੁ, ਤਸ੍ਮਿਂ ਸਮੁਦ੍ਦਸਾਲਾਯ ਵਤ੍ਥੁਭੂਤੇ ਪਦੇਸੇ. ਥੇਰਸ੍ਸਾਤਿ ਮਹਾਮਹਿਨ੍ਦਤ੍ਥੇਰਸ੍ਸ. ਪੁਪ੍ਫਅਗ੍ਘਿਯਾਨੀਤਿ ਕੂਟਾਗਾਰਸਦਿਸਾਨਿ ਪੁਪ੍ਫਚੇਤਿਯਾਨਿ. ਆਗਤੋ ਵਤਰੇਤਿ ਏਤ੍ਥ ਅਰੇਤਿ ਪਮੋਦੇ. ਅਟ੍ਠਹਿ ਅਮਚ੍ਚਕੁਲੇਹਿ ਅਟ੍ਠਹਿ ਬ੍ਰਾਹ੍ਮਣਕੁਲੇਹਿ ਚਾਤਿ ਸੋਲ਼ਸਹਿ ਜਾਤਿਸਮ੍ਪਨ੍ਨਕੁਲੇਹਿ. ਰਜ੍ਜਂ ਵਿਚਾਰੇਸੀਤਿ ਰਜ੍ਜਂ ਵਿਚਾਰੇਤੁਂ ਵਿਸ੍ਸਜ੍ਜੇਸਿ. ਰਾਜਵਤ੍ਥੁਦ੍ਵਾਰਕੋਟ੍ਠਕਟ੍ਠਾਨੇਤਿ ਰਾਜੁਯ੍ਯਾਨਸ੍ਸ ਦ੍ਵਾਰਕੋਟ੍ਠਕਟ੍ਠਾਨੇ. ਅਨੁਪੁਬ੍ਬਵਿਪਸ੍ਸਨਨ੍ਤਿ ਉਦਯਬ੍ਬਯਾਦਿਅਨੁਪੁਬ੍ਬਵਿਪਸ੍ਸਨਂ. ‘‘ਸਹ ਬੋਧਿਪਤਿਟ੍ਠਾਨੇਨਾ’’ਤਿ ਕਰਣਵਚਨੇਨ ਵਤ੍ਤਬ੍ਬੇ ਵਿਭਤ੍ਤਿਪਰਿਣਾਮੇਨ ‘‘ਸਹ ਬੋਧਿਪਤਿਟ੍ਠਾਨਾ’’ਤਿ ਨਿਸ੍ਸਕ੍ਕਵਚਨਂ ਕਤਂ. ਸਤਿ ਹਿ ਸਹਸਦ੍ਦਪ੍ਪਯੋਗੇ ਕਰਣਵਚਨੇਨੇਵ ਭਵਿਤਬ੍ਬਂ. ਦਸ੍ਸਿਂਸੂਤਿ ਪਞ੍ਞਾਯਿਂਸੁ. ਮਹਾਆਸਨਟ੍ਠਾਨੇਤਿ ਪੁਬ੍ਬਪਸ੍ਸੇ ਮਹਾਸਿਲਾਸਨੇਨ ਪਤਿਟ੍ਠਿਤਟ੍ਠਾਨੇ. ਪੂਜੇਤ੍ਵਾ ਵਨ੍ਦੀਤਿ ਆਗਾਮਿਨਂ ਮਹਾਚੇਤਿਯਂ ਵਨ੍ਦਿ. ਪੁਰਿਮੇ ਪਨ ਮਹਾਵਿਹਾਰਟ੍ਠਾਨੇ ਪੂਜਾਮਤ੍ਤਸ੍ਸੇਵ ਕਤਤ੍ਤਾ ਅਨਾਗਤੇ ਸਙ੍ਘਸ੍ਸਪਿ ਨਵਕਤਾ ਅਵਨ੍ਦਿਤਬ੍ਬਤਾ ਚ ਪਕਾਸਿਤਾਤਿ ਵੇਦਿਤਬ੍ਬਾ. ਅਨਾਗਤੇ ਪਨ ਮੇਤ੍ਤੇਯ੍ਯਾਦਿਬੁਦ੍ਧਾ ਪਚ੍ਚੇਕਬੁਦ੍ਧਾ ਚ ਬੁਦ੍ਧਭਾਵਕ੍ਖਣਂ ਉਦ੍ਦਿਸ੍ਸ ਵਨ੍ਦਿਤਬ੍ਬਾਵ ਸਭਾਵੇਨ ਵਿਸਿਟ੍ਠਪੁਗ੍ਗਲਤ੍ਤਾਤਿ ਗਹੇਤਬ੍ਬਂ.

ਮਹਾਅਰਿਟ੍ਠੋਤਿ ਪਞ੍ਚਪਞ੍ਞਾਸਾਯ ਭਾਤੁਕੇਹਿ ਸਦ੍ਧਿਂ ਚੇਤਿਯਗਿਰਿਮ੍ਹਿ ਪਬ੍ਬਜਿਤਂ ਸਨ੍ਧਾਯ ਵੁਤ੍ਤਂ. ਮੇਘਵਣ੍ਣਾਭਯਅਮਚ੍ਚਸ੍ਸ ਪਰਿਵੇਣਟ੍ਠਾਨੇਤਿ ਮੇਘਵਣ੍ਣਅਭਯਸ੍ਸ ਰਞ੍ਞੋ ਅਮਚ੍ਚੇਨ ਕਤ੍ਤਬ੍ਬਸ੍ਸ ਪਰਿਵੇਣਸ੍ਸ ਵਤ੍ਥੁਭੂਤੇ ਠਾਨੇ. ਮਙ੍ਗਲਨਿਮਿਤ੍ਤਭਾਵੇਨ ਆਕਾਸੇ ਸਮੁਪ੍ਪਨ੍ਨੋ ਮਨੋਹਰਸਦ੍ਦੋ ਆਕਾਸਸ੍ਸ ਰਵੋ ਵਿਯ ਹੋਤੀਤਿ ਵੁਤ੍ਤਂ ‘‘ਆਕਾਸਂ ਮਹਾਵਿਰਵਂ ਰਵੀ’’ਤਿ. ਨ ਹਿ ਆਕਾਸੋ ਨਾਮ ਕੋਚਿ ਧਮ੍ਮੋ ਅਤ੍ਥਿ, ਯੋ ਸਦ੍ਦਂ ਸਮੁਟ੍ਠਾਪੇਯ੍ਯ, ਆਕਾਸਗਤਉਤੁਵਿਸੇਸਸਮੁਟ੍ਠਿਤੋਵ ਸੋ ਸਦ੍ਦੋਤਿ ਗਹੇਤਬ੍ਬੋ. ਪਠਮਕਤ੍ਤਿਕਪਵਾਰਣਦਿਵਸੇ…ਪੇ… ਵਿਨਯਪਿਟਕਂ ਪਕਾਸੇਸੀਤਿ ਇਦਂ ਵਿਨਯਂ ਵਾਚੇਤੁਂ ਆਰਦ੍ਧਦਿਵਸਂ ਸਨ੍ਧਾਯ ਵੁਤ੍ਤਂ. ਅਨੁਸਿਟ੍ਠਿਕਰਾਨਨ੍ਤਿ ਅਨੁਸਾਸਨੀਕਰਾਨਂ. ਰਾਜਿਨੋਤਿ ਉਪਯੋਗਤ੍ਥੇ ਸਾਮਿਵਚਨਂ, ਦੇਵਾਨਂਪਿਯਤਿਸ੍ਸਰਾਜਾਨਨ੍ਤਿ ਅਤ੍ਥੋ. ਅਞ੍ਞੇਪੀਤਿ ਮਹਿਨ੍ਦਾਦੀਹਿ ਅਟ੍ਠਸਟ੍ਠਿਮਹਾਥੇਰੇਹਿ ਅਞ੍ਞੇਪਿ, ਤੇਸਂ ਸਰੂਪਂ ਦਸ੍ਸੇਨ੍ਤੋ ਆਹ ਤੇਸਂ ਥੇਰਾਨਨ੍ਤਿਆਦਿ. ਤਤ੍ਥ ਤੇਸਂ ਥੇਰਾਨਂ ਅਨ੍ਤੇਵਾਸਿਕਾਤਿ ਮਹਿਨ੍ਦਤ੍ਥੇਰਾਦੀਨਂ ਅਟ੍ਠਸਟ੍ਠਿਮਹਾਥੇਰਾਨਂ ਅਰਿਟ੍ਠਾਦਯੋ ਅਨ੍ਤੇਵਾਸਿਕਾ ਚ ਮਹਾਅਰਿਟ੍ਠਤ੍ਥੇਰਸ੍ਸ ਅਨ੍ਤੇਵਾਸਿਕਾ ਤਿਸ੍ਸਦਤ੍ਤਕਾਲ਼ਸੁਮਨਾਦਯੋ ਚਾਤਿ ਯੋਜੇਤਬ੍ਬਂ. ਅਨ੍ਤੇਵਾਸਿਕਾਨਂ ਅਨ੍ਤੇਵਾਸਿਕਾਤਿ ਉਭਯਤ੍ਥ ਵੁਤ੍ਤਅਨ੍ਤੇਵਾਸਿਕਾਨਂ ਅਨ੍ਤੇਵਾਸਿਕਪਰਮ੍ਪਰਾ ਚਾਤਿ ਅਤ੍ਥੋ. ਪੁਬ੍ਬੇ ਵੁਤ੍ਤਪ੍ਪਕਾਰਾਤਿ ਮਹਿਨ੍ਦੋ ਇਟ੍ਟਿਯੋ ਉਤ੍ਤਿਯੋਤਿਆਦਿਗਾਥਾਹਿ (ਪਾਰਾ. ਅਟ੍ਠ. ੧.ਤਤਿਯਸਙ੍ਗੀਤਿਕਥਾ) ਪਕਾਸਿਤਾ ਆਚਰਿਯਪਰਮ੍ਪਰਾ.

ਨ ਪਗ੍ਘਰਤੀਤਿ ਨ ਗਲ਼ਤਿ, ਨ ਪਮੁਸ੍ਸਤੀਤਿ ਅਤ੍ਥੋ. ਸਤਿਗਤਿਧਿਤਿਮਨ੍ਤੇਸੂਤਿ ਏਤ੍ਥ ਸਤੀਤਿ ਉਗ੍ਗਹਧਾਰਣੇ ਸਤਿ. ਗਤੀਤਿ ਸਦ੍ਦਤ੍ਥਵਿਭਾਗਗ੍ਗਹਣੇ ਞਾਣਂ. ਧਿਤੀਤਿ ਉਗ੍ਗਹਪਰਿਹਰਣਾਦੀਸੁ ਵੀਰਿਯਂ. ਕੁਕ੍ਕੁਚ੍ਚਕੇਸੂਤਿ ‘‘ਕਪ੍ਪਤਿ ਨ ਕਪ੍ਪਤੀ’’ਤਿ ਵੀਮਂਸਕੁਕ੍ਕੁਚ੍ਚਕਾਰੀਸੁ. ਮਾਤਾਪਿਤੁਟ੍ਠਾਨਿਯੋਤਿ ਵਤ੍ਵਾ ਤਮੇਵਤ੍ਥਂ ਸਮਤ੍ਥੇਤੁਂ ਆਹ ਤਦਾਯਤ੍ਤਾਹੀਤਿਆਦਿ. ਵਿਨਯਪਰਿਯਤ੍ਤਿਂ ਨਿਸ੍ਸਾਯਾਤਿ ਵਿਨਯਪਿਟਕਪਰਿਯਾਪੁਣਨਂ ਨਿਸ੍ਸਾਯ. ਅਤ੍ਤਨੋ ਸੀਲਕ੍ਖਨ੍ਧੋ ਸੁਗੁਤ੍ਤੋਤਿ ਲਜ੍ਜਿਨੋ ਵਿਨਯਧਾਰਣਸ੍ਸ ਅਲਜ੍ਜਿਅਞ੍ਞਾਣਤਾਦੀਹਿ ਛਹਿ ਆਕਾਰੇਹਿ ਆਪਤ੍ਤਿਯਾ ਅਨਾਪਜ੍ਜਨਤੋ ਅਤ੍ਤਨੋ ਸੀਲਕ੍ਖਨ੍ਧੋ ਖਣ੍ਡਾਦਿਦੋਸਵਿਰਹਿਤੋ ਸੁਗੁਤ੍ਤੋ ਸੁਰਕ੍ਖਿਤੋ ਹੋਤਿ. ਕੁਕ੍ਕੁਚ੍ਚਪਕਤਾਨਨ੍ਤਿ ਕਪ੍ਪਿਯਾਕਪ੍ਪਿਯਂ ਨਿਸ੍ਸਾਯ ਉਪ੍ਪਨ੍ਨੇਨ ਕੁਕ੍ਕੁਚ੍ਚੇਨ ਪਕਤਾਨਂ ਉਪਦ੍ਦੁਤਾਨਂ ਅਭਿਭੂਤਾਨਂ ਯਥਾਵਿਨਯਂ ਕੁਕ੍ਕੁਚ੍ਚਂ ਵਿਨੋਦੇਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਪਨੇਨ ਪਟਿਸਰਣਂ ਹੋਤਿ. ਵਿਗਤੋ ਸਾਰਦੋ ਭਯਮੇਤਸ੍ਸਾਤਿ ਵਿਸਾਰਦੋ. ‘‘ਏਵਂ ਕਥੇਨ੍ਤਸ੍ਸ ਦੋਸੋ ਏਵਂ ਨ ਦੋਸੋ’’ਤਿ ਞਤ੍ਵਾਵ ਕਥਨਤੋ ਨਿਬ੍ਭਯੋਵ ਸਙ੍ਘਮਜ੍ਝੇ ਵੋਹਰਤਿ . ਪਚ੍ਚਤ੍ਥਿਕੇਤਿ ਅਤ੍ਤਪਚ੍ਚਤ੍ਥਿਕੇ ਚੇਵ ਵਜ੍ਜਿਪੁਤ੍ਤਕਾਦਿਸਾਸਨਪਚ੍ਚਤ੍ਥਿਕੇ ਚ. ਸਹਧਮ੍ਮੇਨਾਤਿ ਸਕਾਰਣੇਨ ਵਚਨੇਨ ਸਿਕ੍ਖਾਪਦਂ ਦਸ੍ਸੇਤ੍ਵਾ ਯਥਾ ਤੇ ਅਸਦ੍ਧਮ੍ਮਂ ਪਤਿਟ੍ਠਾਪੇਤੁਂ ਨ ਸਕ੍ਕੋਨ੍ਤਿ, ਏਵਂ ਸੁਨਿਗ੍ਗਹਿਤਂ ਕਤ੍ਵਾ ਨਿਗ੍ਗਣ੍ਹਾਤਿ. ਸਦ੍ਧਮ੍ਮਟ੍ਠਿਤਿਯਾਤਿ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਸਙ੍ਖਾਤਸ੍ਸ ਤਿਵਿਧਸ੍ਸਾਪਿ ਸਦ੍ਧਮ੍ਮਸ੍ਸ ਠਿਤਿਯਾ, ਪਵਤ੍ਤਿਯਾਤਿ ਅਤ੍ਥੋ.

ਵਿਨਯੋ ਸਂਵਰਤ੍ਥਾਯਾਤਿਆਦੀਸੁ ਵਿਨਯਪਰਿਯਾਪੁਣਨਂ ਵਿਨਯੋ, ਵਿਨਯਪਞ੍ਞਤ੍ਤਿ ਵਾ ਕਾਯਵਚੀਦ੍ਵਾਰਸਂਵਰਤ੍ਥਾਯ. ਅਵਿਪ੍ਪਟਿਸਾਰੋਤਿ ਕਤਾਕਤਂ ਨਿਸ੍ਸਾਯ ਵਿਪ੍ਪਟਿਸਾਰਾਭਾਵੋ ਸਨ੍ਤਾਪਾਭਾਵੋ. ਪਾਮੋਜ੍ਜਂ ਤਰੁਣਪੀਤਿ. ਪੀਤਿ ਨਾਮ ਬਲਵਪੀਤਿ. ਪਸ੍ਸਦ੍ਧੀਤਿ ਕਾਯਚਿਤ੍ਤਪਸ੍ਸਦ੍ਧਿ. ਯਥਾਭੂਤਞਾਣਦਸ੍ਸਨਨ੍ਤਿ ਸਪ੍ਪਚ੍ਚਯਨਾਮਰੂਪਪਰਿਗ੍ਗਹੋ. ਨਿਬ੍ਬਿਦਾਤਿ ਵਿਪਸ੍ਸਨਾ. ਵਿਰਾਗੋਤਿ ਅਰਿਯਮਗ੍ਗੋ. ਵਿਮੁਤ੍ਤੀਤਿ ਅਗ੍ਗਫਲਂ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਪਚ੍ਚਵੇਕ੍ਖਣਞਾਣਂ. ਅਨੁਪਾਦਾਤਿ ਕਞ੍ਚਿ ਧਮ੍ਮਂ ਅਨੁਪਾਦਿਯਿਤ੍ਵਾ ਪਰਿਚ੍ਚਜਿਤ੍ਵਾ. ਪਰਿਨਿਬ੍ਬਾਨਤ੍ਥਾਯਾਤਿ ਪਚ੍ਚਵੇਕ੍ਖਣਞਾਣੇ ਅਨੁਪ੍ਪਨ੍ਨੇ ਅਨ੍ਤਰਾ ਪਰਿਨਿਬ੍ਬਾਨਾਭਾਵੇਨ ਤਂਪਰਿਨਿਬ੍ਬਾਨਤ੍ਥਾਯਾਤਿ ਪਚ੍ਚਯਤ੍ਤੇਨ ਵੁਤ੍ਤਂ ਅਨਨ੍ਤਰਾਦਿਪਚ੍ਚਯਤ੍ਤਾ. ਏਤਦਤ੍ਥਾ ਕਥਾਤਿ ਅਯਂ ਵਿਨਯਕਥਾ ਨਾਮ ਏਤਸ੍ਸ ਅਨੁਪਾਦਾਪਰਿਨਿਬ੍ਬਾਨਸ੍ਸ ਅਤ੍ਥਾਯਾਤਿ ਅਤ੍ਥੋ. ਮਨ੍ਤਨਾਤਿ ਵਿਨਯਮਨ੍ਤਨਾਯੇਵ, ਭਿਕ੍ਖੂਨਂ ‘‘ਏਵਂ ਕਰਿਸ੍ਸਾਮ, ਏਵਂ ਨ ਕਰਿਸ੍ਸਾਮਾ’’ਤਿ ਵਿਨਯਪਟਿਬਦ੍ਧਮਨ੍ਤਨਾ. ਉਪਨਿਸਾਤਿ ਉਪਨਿਸੀਦਤਿ ਏਤ੍ਥ ਫਲਨ੍ਤਿ ਉਪਨਿਸਾ, ਕਾਰਣਂ. ਵਿਨਯੋ ਸਂਵਰਤ੍ਥਾਯਾਤਿਆਦਿਕਾਰਣਪਰਮ੍ਪਰਾਪਿ ਏਤਦਤ੍ਥਾਤਿ ਅਤ੍ਥੋ. ਸੋਤਾਵਧਾਨਨ੍ਤਿ ਇਮਿਸ੍ਸਾ ਪਰਮ੍ਪਰਪਚ੍ਚਯਕਥਾਯ ਅਤ੍ਤਾਨਂ ਸਮਨਤ੍ਥਾਯ ਸੋਤਾਵਧਾਨਂ, ਤਮ੍ਪਿ ਏਤਮਤ੍ਥਂ. ਯਦਿਦਨ੍ਤਿ ਨਿਪਾਤੋ. ਯੋ ਅਯਂ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ ਚਿਤ੍ਤਸ੍ਸ ਅਰਹਤ੍ਤਮਗ੍ਗਸਙ੍ਖਾਤੋ, ਤਪ੍ਫਲਸਙ੍ਖਾਤੋ ਵਾ ਵਿਮੋਕ੍ਖੋ, ਸੋਪਿ ਏਤਦਤ੍ਥਾਯ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯ. ਅਥ ਵਾ ਯੋ ਅਯਂ ਕਞ੍ਚਿ ਧਮ੍ਮਂ ਅਨੁਪਾਦਾਚਿਤ੍ਤਸ੍ਸ ਵਿਮੋਕ੍ਖੋ ਵਿਮੁਚ੍ਚਨਂ ਵਿਗਮੋ ਪਰਿਨਿਬ੍ਬਾਨਂ ਏਤਦਤ੍ਥਾ ਕਥਾਤਿ ਏਵਂ ਉਪਸਂਹਰਣਵਸੇਨ ਯੋਜੇਤੁਮ੍ਪਿ ਵਟ੍ਟਤਿ ਮਗ੍ਗਫਲਵਿਮੋਕ੍ਖਸ੍ਸ ਪੁਬ੍ਬੇ ਵੁਤ੍ਤਤ੍ਤਾ. ਆਯੋਗੋਤਿ ਉਗ੍ਗਹਣਾਦਿਵਸੇਨ ਪੁਨਪ੍ਪੁਨਂ ਅਭਿਯੋਗੋ.

ਆਚਰਿਯਪਰਮ੍ਪਰਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਬਾਹਿਰਨਿਦਾਨਕਥਾਵਣ੍ਣਨਾਨਯੋ ਨਿਟ੍ਠਿਤੋ.

ਵੇਰਞ੍ਜਕਣ੍ਡਵਣ੍ਣਨਾ

ਸੇਯ੍ਯਥਿਦਨ੍ਤਿ ਤਂ ਕਤਮਂ, ਤਂ ਕਥਨ੍ਤਿ ਵਾ ਅਤ੍ਥੋ. ਅਨਿਯਮਨਿਦ੍ਦੇਸਵਚਨਨ੍ਤਿ ਅਤ੍ਤਨੋ ਅਤ੍ਥਂ ਸਰੂਪੇਨ ਨਿਯਮੇਤ੍ਵਾ ਨਿਦ੍ਦਿਸਤੀਤਿ ਨਿਯਮਨਿਦ੍ਦੇਸੋ, ਨ ਨਿਯਮਨਿਦ੍ਦੇਸੋ ਅਨਿਯਮਨਿਦ੍ਦੇਸੋ. ਸੋਵ ਵੁਚ੍ਚਤੇ ਅਨੇਨਾਤਿ ਵਚਨਨ੍ਤਿ ਅਨਿਯਮਨਿਦ੍ਦੇਸਵਚਨਂ. ਤਸ੍ਸਾਤਿ ਤੇਨਾਤਿਪਦਸ੍ਸ. ਪਰਿਵਿਤਕ੍ਕੋਤਿ ‘‘ਕਤਮੇਸਾਨਂ ਖੋ ਬੁਦ੍ਧਾਨਂ ਭਗਵਨ੍ਤਾਨਂ ਬ੍ਰਹ੍ਮਚਰਿਯਂ ਨ ਚਿਰਟ੍ਠਿਤਿਕਂ ਅਹੋਸੀ’’ਤਿਆਦਿਨਾ (ਪਾਰਾ. ੧੮) ਪਵਤ੍ਤੋ. ਪੁਬ੍ਬੇ ਵਾ ਪਚ੍ਛਾ ਵਾਤਿ ਤੇਨਾਤਿਪਦਤੋ ਹੇਟ੍ਠਾ ਵੁਤ੍ਤਪਾਠੇ ਵਾ ਉਪਰਿ ਵਕ੍ਖਮਾਨਪਾਠੇ ਵਾਤਿ ਅਤ੍ਥੋ. ਅਤ੍ਥਤੋ ਸਿਦ੍ਧੇਨਾਤਿ ਸਾਮਤ੍ਥਿਯਤੋ ਸਿਦ੍ਧੇਨ. ਤਤ੍ਰਿਦਂ ਮੁਖਮਤ੍ਤਨਿਦਸ੍ਸਨਨ੍ਤਿ ਤਸ੍ਸਾ ਯਥਾਵੁਤ੍ਤਯੁਤ੍ਤਿਯਾ ਪਰਿਦੀਪਨੇ ਇਦਂ ਉਪਾਯਮਤ੍ਤਨਿਦਸ੍ਸਨਂ. ਮੁਖਂ ਦ੍ਵਾਰਂ ਉਪਾਯੋਤਿ ਹਿ ਅਤ੍ਥਤੋ ਏਕਂ.

ਸਮਯਸਦ੍ਦੋ ਦਿਸ੍ਸਤੀਤਿ ਸਮ੍ਬਨ੍ਧੋ. ਅਸ੍ਸਾਤਿ ਸਮਯਸਦ੍ਦਸ੍ਸ ਸਮਵਾਯੋ ਅਤ੍ਥੋਤਿ ਸਮ੍ਬਨ੍ਧੋ. ਕਾਲਞ੍ਚ ਸਮਯਞ੍ਚ ਉਪਾਦਾਯਾਤਿ ਏਤ੍ਥ ਕਾਲੋ ਨਾਮ ਉਪਸਙ੍ਕਮਨਸ੍ਸ ਯੁਤ੍ਤਕਾਲੋ, ਸਮਯੋ ਨਾਮ ਸਰੀਰਬਲਾਦਿਕਾਰਣਸਮਵਾਯੋ, ਤੇ ਉਪਾਦਾਯ ਪਟਿਚ੍ਚਾਤਿ ਅਤ੍ਥੋ. ਖਣੋਤਿ ਓਕਾਸੋ. ਬੁਦ੍ਧੁਪ੍ਪਾਦਾਦਯੋ ਹਿ ਮਗ੍ਗਬ੍ਰਹ੍ਮਚਰਿਯਸ੍ਸ ਓਕਾਸੋ. ਸੋ ਏਵ ਸਮਯੋ. ਤੇਨੇਵ ‘‘ਏਕੋਵਾ’’ਤਿ ਵੁਤ੍ਤਂ. ਮਹਾਸਮਯੋਤਿ ਮਹਾਸਮੂਹੋ. ਪਵਨਸ੍ਮਿਨ੍ਤਿ ਵਨਸਣ੍ਡੇ. ਸਮਯੋਪਿ ਖੋ ਤੇ ਭਦ੍ਦਾਲੀਤਿ ਏਤ੍ਥ ਸਮਯੋਤਿ ਸਿਕ੍ਖਾਪਦਾਵਿਲਙ੍ਘਨਸ੍ਸ ਹੇਤੁ, ਕੋ ਸੋ? ਅਤ੍ਤਨੋ ਵਿਪ੍ਪਟਿਪਤ੍ਤਿਯਾ ਭਗਵਤੋ ਜਾਨਨਂ, ਸੋ ਸਮਯਸਙ੍ਖਾਤੋ ਹੇਤੁ ਤਸ੍ਸਾ ਅਪ੍ਪਟਿਵਿਦ੍ਧੋਤਿ ਅਤ੍ਥੋ. ਭਗਵਾਤਿਆਦਿ ਤਸ੍ਸ ਪਟਿਵਿਜ੍ਝਨਾਕਾਰਦਸ੍ਸਨਂ. ਉਗ੍ਗਹਮਾਨੋਤਿ ਕਿਞ੍ਚਿ ਕਿਞ੍ਚਿ ਉਗ੍ਗਹੇਤੁਂ ਸਮਤ੍ਥਤਾਯ ਉਗ੍ਗਹਮਾਨੋ, ਸੁਮਨਪਰਿਬ੍ਬਾਜਕਸ੍ਸੇਵੇਤਂ ਨਾਮਂ. ਸਮਯਂ ਦਿਟ੍ਠਿਂ ਪਵਦਨ੍ਤਿ ਏਤ੍ਥਾਤਿ ਸਮਯਪ੍ਪਵਾਦਕੋ, ਮਲ੍ਲਿਕਾਯ ਆਰਾਮੋ. ਸ੍ਵੇਵ ਤਿਨ੍ਦੁਕਾਚੀਰਸਙ੍ਖਾਤਾਯ ਤਿਮ੍ਬਰੁਰੁਕ੍ਖਪਨ੍ਤਿਯਾ ਪਰਿਕ੍ਖਿਤ੍ਤਤ੍ਤਾ ‘‘ਤਿਨ੍ਦੁਕਾਚੀਰ’’ਨ੍ਤਿ ਚ, ਏਕਾਵ ਨਿਵਾਸਾ ਸਾਲਾ ਏਤ੍ਥਾਤਿ ‘‘ਏਕਸਾਲਕੋ’’ਤਿ ਚ ਵੁਚ੍ਚਤਿ. ਅਤ੍ਥਾਭਿਸਮਯਾਤਿ ਯਥਾਵੁਤ੍ਤਸ੍ਸ ਦਿਟ੍ਠਧਮ੍ਮਿਕਸਮ੍ਪਰਾਯਿਕਸ੍ਸ ਅਤ੍ਥਸ੍ਸ ਹਿਤਸ੍ਸ ਪਟਿਲਾਭਤੋ. ਮਾਨਾਭਿਸਮਯਾਤਿ ਮਾਨਪ੍ਪਹਾਨਾ. ਪੀਲ਼ਨਟ੍ਠੋਤਿ ਪੀਲ਼ਨਂ ਤਂਸਮਙ੍ਗਿਨੋ ਹਿਂਸਨਂ, ਅਵਿਪ੍ਫਾਰਿਕਤਾਕਰਣਂ, ਪੀਲ਼ਨਮੇਵ ਅਤ੍ਥੋ ਪੀਲ਼ਨਟ੍ਠੋ. ਸਨ੍ਤਾਪੋਤਿ ਦੁਕ੍ਖਦੁਕ੍ਖਤਾਦਿਵਸੇਨ ਸਨ੍ਤਾਪਨਂ. ਵਿਪਰਿਣਾਮੋਤਿ ਜਰਾਯ ਮਰਣੇਨ ਚਾਤਿ ਦ੍ਵਿਧਾ ਵਿਪਰਿਣਾਮੇਤਬ੍ਬਤਾ ਅਭਿਸਮੇਤਬ੍ਬੋ ਪਟਿਵਿਜ੍ਝਿਤਬ੍ਬੋਤਿ ਅਭਿਸਮਯੋ, ਸੋਵ ਅਭਿਸਮਯਟ੍ਠੋ, ਪੀਲ਼ਨਾਦੀਨਿ.

ਏਤ੍ਥ ਚ ਉਪਸਗ੍ਗਾਨਂ ਜੋਤਕਮਤ੍ਤਤ੍ਤਾ ਸਮਯਸਦ੍ਦਸ੍ਸ ਅਤ੍ਥੁਦ੍ਧਾਰੇਪਿ ਸਉਪਸਗ੍ਗੋ ਅਭਿਸਮਯਸਦ੍ਦੋ ਉਦ੍ਧਟੋ. ਤਤ੍ਥ ਸਙ੍ਗਮਵਸੇਨ ਪਚ੍ਚਯਾਨਂ ਫਲੁਪ੍ਪਾਦਨਂ ਪਟਿ ਅਯਨਂ ਏਕਤੋ ਪਵਤ੍ਤਿ ਏਤ੍ਥਾਤਿ ਸਮਯੋ, ਸਮਵਾਯੋ. ਵਿਵਟ੍ਟੂਪਨਿਸ੍ਸਯਸਙ੍ਗਮੇ ਸਤਿ ਏਨ੍ਤਿ ਏਤ੍ਥ ਸਤ੍ਤਾ ਪਵਤ੍ਤਨ੍ਤੀਤਿ ਸਮਯੋ, ਖਣੋ. ਸਮੇਤਿ ਏਤ੍ਥ ਸਙ੍ਖਤਧਮ੍ਮੋ, ਸਯਂ ਵਾ ਏਤਿ ਆਗਚ੍ਛਤਿ ਵਿਗਚ੍ਛਤਿ ਚਾਤਿ ਸਮਯੋ, ਕਾਲੋ. ਸਮੇਨ੍ਤਿ ਅਵਯਵਾ ਏਤਸ੍ਮਿਂ, ਸਯਂ ਵਾ ਤੇਸੂਤਿ ਸਮਯੋ, ਸਮੂਹੋ. ਪਚ੍ਚਯਨ੍ਤਰਸਙ੍ਗਮੇ ਏਤਿ ਆਗਚ੍ਛਤਿ ਏਤਸ੍ਮਾ ਫਲਨ੍ਤਿ ਸਮਯੋ, ਹੇਤੁ. ਸਞ੍ਞਾਵਸੇਨ ਵਿਪਲ੍ਲਾਸਤੋ ਧਮ੍ਮੇਸੁ ਏਤਿ ਅਭਿਨਿਵਿਸਤੀਤਿ ਸਮਯੋ, ਦਿਟ੍ਠਿ. ਸਮੀਪਂ ਅਯਨਂ ਉਪਗਮਨਂ ਸਮਯੋ, ਪਟਿਲਾਭੋ. ਸਮ੍ਮਦੇਵ ਸਹਿਤਾਨਂ ਵਾਚਾਨਂ ਅਯਨਂ ਵਿਗਮੋਤਿ ਸਮਯੋ, ਪਹਾਨਂ. ਸਮ੍ਮਦੇਵ, ਸਹਿਤਾਨਂ ਵਾ ਸਚ੍ਚਾਨਂ ਅਯਨਂ ਜਾਨਨਨ੍ਤਿ ਸਮਯੋ, ਪਟਿਵੇਧੋ. ਏਵਂ ਤਸ੍ਮਿਂ ਤਸ੍ਮਿਂ ਅਤ੍ਥੇ ਸਮਯਸਦ੍ਦਸ੍ਸ ਪਵਤ੍ਤਿ ਵੇਦਿਤਬ੍ਬਾ.

ਏਤ੍ਥ ਚ ਸਮਯਸਦ੍ਦਸ੍ਸ ਸਾਮਞ੍ਞੇਨ ਅਨੇਕਤ੍ਥਤਾ ਵੁਤ੍ਤਾ. ਨ ਹਿ ਏਕਸ੍ਮਿਂ ਅਤ੍ਥਵਿਸੇਸੇ ਵਤ੍ਤਮਾਨੋ ਸਦ੍ਦੋ ਤਦਞ੍ਞੇਪਿ ਵਤ੍ਤਤਿ. ਤਸ੍ਮਾ ਅਤ੍ਥਾ ਵਿਯ ਤਂਤਂਵਾਚਕਾ ਸਮਯਸਦ੍ਦਾਪਿ ਭਿਨ੍ਨਾ ਏਵਾਤਿ ਗਹੇਤਬ੍ਬਾ. ਏਵਂ ਸਬ੍ਬਤ੍ਥ ਅਤ੍ਥੁਦ੍ਧਾਰੇਸੁ.

ਤਤ੍ਥ ਤਥਾਤਿ ਤੇਸੁ ਸੁਤ੍ਤਾਭਿਧਮ੍ਮੇਸੁ ਉਪਯੋਗਭੁਮ੍ਮਵਚਨੇਹਿ. ਇਧਾਤਿ ਵਿਨਯੇ, ਅਞ੍ਞਥਾਤਿ ਕਰਣਵਚਨੇਨ. ਅਚ੍ਚਨ੍ਤਮੇਵਾਤਿ ਨਿਰਨ੍ਤਰਮੇਵ. ਭਾਵੋ ਨਾਮ ਕਿਰਿਯਾ, ਕਿਰਿਯਾਯ ਕਿਰਿਯਨ੍ਤਰੂਪਲਕ੍ਖਣਂ ਭਾਵੇਨਭਾਵਲਕ੍ਖਣਂ, ਯਥਾ ਉਦਯੇ ਸਤਿ ਚਨ੍ਦੇ ਜਾਤੋ ਰਾਜਪੁਤ੍ਤੋਤਿ. ਅਧਿਕਰਣਞ੍ਹੀਤਿਆਦਿ ਅਭਿਧਮ੍ਮੇ ਸਮਯਸਦ੍ਦੋ ਕਾਲਸਮੂਹਖਣਸਮਵਾਯਹੇਤੁਸਙ੍ਖਾਤੇਸੁ ਪਞ੍ਚਸੁ ਅਤ੍ਥੇਸੁ ਵਤ੍ਤਤਿ, ਨ ਵਿਨਯੇ ਵਿਯ ਕਾਲੇ ਏਵ, ਤੇਸੁ ਚ ਕਾਲਸਮੂਹਤ੍ਥਾ ਦ੍ਵੇ ਤਤ੍ਥ ਵੁਤ੍ਤਾਨਂ ਫਸ੍ਸਾਦਿਧਮ੍ਮਾਨਂ ਅਧਿਕਰਣਭਾਵੇਨ ਨਿਦ੍ਦਿਸਿਤੁਂ ਯੁਤ੍ਤਾ. ਖਣਸਮਵਾਯਹੇਤੁਅਤ੍ਥਾ ਪਨ ਤਯੋਪਿ ਅਤ੍ਤਨੋ ਭਾਵੇਨ ਫਸ੍ਸਾਦੀਨਂ ਭਾਵਸ੍ਸ ਉਪਲਕ੍ਖਣਭਾਵੇਨ ਨਿਦ੍ਦਿਸਿਤੁਂ ਯੁਤ੍ਤਾਤਿ ਵਿਭਾਵਨਮੁਖੇਨ ਯਥਾਵੁਤ੍ਤਮਤ੍ਥਂ ਸਮਤ੍ਥੇਤੁਂ ਵੁਤ੍ਤਂ. ਤਤ੍ਥ ਯਸ੍ਮਿਞ੍ਹਿ ਕਾਲੇ, ਧਮ੍ਮਸਮੂਹੇ ਵਾ ਸਮਯੇ ਅਧਿਕਰਣਭੂਤੇ ਕੁਸਲਂ ਉਪ੍ਪਨ੍ਨਂ, ਤਸ੍ਮਿਞ੍ਞੇਵ ਕਾਲੇ, ਧਮ੍ਮਸਮੂਹੇ ਵਾ ਸਮਯੇ ਫਸ੍ਸਾਦਯੋ ਹੋਨ੍ਤੀਤਿ ਏਵਂ ਅਧਿਕਰਣਤ੍ਥਯੋਜਨਾ, ਯਸ੍ਮਿਂ ਪਨ ਖਣੇ, ਸਮਵਾਯੇ ਹੇਤੁਮ੍ਹਿ ਵਾ ਸਮਯੇ ਸਤਿ ਵਿਜ੍ਜਮਾਨੇ ਕੁਸਲਂ ਉਪ੍ਪਨ੍ਨਂ, ਤਸ੍ਮਿਞ੍ਞੇਵ ਖਣਾਦਿਮ੍ਹਿ ਸਮਯੇਪਿ ਵਿਜ੍ਜਮਾਨੇ ਫਸ੍ਸਾਦਯੋ ਹੋਨ੍ਤੀਤਿ ਭਾਵੇਨਭਾਵਲਕ੍ਖਣਤ੍ਥਯੋਜਨਾ ਚ ਵੇਦਿਤਬ੍ਬਾ.

ਹੋਤਿ ਚੇਤ੍ਥਾਤਿ ਏਤ੍ਥ ਯਥਾਵੁਤ੍ਤਅਤ੍ਥਵਿਸਯੇ ਸਙ੍ਗਹਗਾਥਾ ਹੋਤਿ. ਅਞ੍ਞਤ੍ਰਾਤਿ ਸੁਤ੍ਤਾਭਿਧਮ੍ਮੇਸੁ. ਅਭਿਲਾਪਮਤ੍ਤਭੇਦੋਤਿ ਦੇਸਨਾਵਿਲਾਸਤੋ ਸਦ੍ਦਮਤ੍ਤੇਨੇਵ ਭੇਦੋ, ਨ ਅਤ੍ਥਤੋ.

ਅਵਿਸੇਸੇਨਾਤਿ ਸਾਮਞ੍ਞੇਨ. ਇਰਿਯਾਪਥੋਤਿਆਦੀਸੁ ਇਰਿਯਾਯ ਸਬ੍ਬਦ੍ਵਾਰਿਕਕਿਰਿਯਾਯ ਪਥੋ ਪਵਤ੍ਤਨਟ੍ਠਾਨਂ ਤਬ੍ਬਿਨਿਮੁਤ੍ਤਕਮ੍ਮਸ੍ਸ ਅਭਾਵਾਤਿ ਠਾਨਾਦਯੋ ਇਰਿਯਾਪਥੋ, ਸੋਵ ਵਿਹਾਰੋ. ਬ੍ਰਹ੍ਮਭੂਤਾ ਸੇਟ੍ਠਭੂਤਾ ਪਰਹਿਤਚਿਤ੍ਤਾਦਿਵਸਪ੍ਪਵਤ੍ਤਿਤੋ ਮੇਤ੍ਤਾਦਯੋ ਬ੍ਰਹ੍ਮਵਿਹਾਰੋ ਨਾਮ. ਤਦਵਸੇਸਾ ਪਨ ਮਹਗ੍ਗਤਾ ਸਬ੍ਬਨੀਵਰਣਵਿਗਮਨਾਦਿਸਿਦ੍ਧੇਨ ਜੋਤਨਾਦਿਅਤ੍ਥੇਨ ਦਿਬ੍ਬਵਿਹਾਰੋ ਨਾਮ. ਬ੍ਰਹ੍ਮਵਿਹਾਰਭਾਵੇਨ ਵਿਸੁਂ ਗਹਿਤਤ੍ਤਾ ਮੇਤ੍ਤਾਦਯੋ ਇਧ ਅਸਙ੍ਗਹਿਤਾ. ਅਰਿਯਾਨਮੇਵ ਵਿਹਾਰੋਤਿ ਫਲਸਮਾਪਤ੍ਤਿਯੋ ਅਰਿਯਵਿਹਾਰੋ ਨਾਮ.

ਰੁਕ੍ਖਾਦਿਮੂਲੇਯੇਵ ਮੂਲਸਦ੍ਦਸ੍ਸ ਨਿਰੁਲ਼੍ਹਭਾਵਂ ਦਸ੍ਸੇਤੁਂ ਅਪਰੇਨ ਮੂਲਸਦ੍ਦੇਨ ਵਿਸੇਸੇਤ੍ਵਾ ‘‘ਮੂਲਮੂਲੇ’’ਤਿ ਵੁਤ੍ਤਂ, ਯਥਾ ਦੁਕ੍ਖਦੁਕ੍ਖਨ੍ਤਿ (ਵਿਭ. ਅਟ੍ਠ. ੧੯੦). ਲੋਭਾਦੀਨਂ ਦੋਸਮੂਲਾਦਿਚਿਤ੍ਤਾਸਾਧਾਰਣਤ੍ਤਾ ‘‘ਅਸਾਧਾਰਣਹੇਤੁਮ੍ਹੀ’’ਤਿ ਵੁਤ੍ਤਂ.

ਤਤ੍ਥ ਸਿਯਾਤਿ ਤਤ੍ਥ ਵੇਰਞ੍ਜਾਯਨ੍ਤਿਆਦੀਸੁ ਪਦੇਸੁ ਕਸ੍ਸਚਿ ਚੋਦਨਾ ਸਿਯਾਤਿ ਅਤ੍ਥੋ. ਉਭਯਥਾ ਨਿਦਾਨਕਿਤ੍ਤਨਸ੍ਸ ਪਨ ਕਿਂ ਪਯੋਜਨਨ੍ਤਿ? ਆਹ ਗੋਚਰਗਾਮਨਿਦਸ੍ਸਨਤ੍ਥਨ੍ਤਿਆਦਿ. ਤਤ੍ਥ ਅਸ੍ਸਾਤਿ ਭਗਵਤੋ.

ਕਿਲਮੋਵ ਕਿਲਮਥੋ, ਅਤ੍ਤਨੋ ਅਤ੍ਤਭਾਵਸ੍ਸ ਕਿਲਮਥੋ ਅਤ੍ਤਕਿਲਮਥੋ, ਤਸ੍ਸ ਅਨੁ ਅਨੁ ਯੋਗੋ ਪੁਨਪ੍ਪੁਨਂ ਪਵਤ੍ਤਨਂ ਅਤ੍ਤਕਿਲਮਥਾਨੁਯੋਗੋ. ਵਤ੍ਥੁਕਾਮਾਰਮ੍ਮਣੇ ਸੁਖੇ ਸਮ੍ਪਯੋਗਵਸੇਨ ਲੀਨਾ ਯੁਤ੍ਤਾ, ਕਾਮਤਣ੍ਹਾ, ਤਂਸਹਚਰਿਤੇ ਕਾਮੇ ਸੁਖੇ ਵਾ ਆਰਮ੍ਮਣਭੂਤੇ ਅਲ੍ਲੀਨਾ ਪਵਤ੍ਤਤੀਤਿ ਕਾਮਸੁਖਲ੍ਲਿਕਾ ਤਣ੍ਹਾ, ਤਸ੍ਸਾ ਕਾਮਸੁਖਲ੍ਲਿਕਾਯ ਅਨੁ ਅਨੁ ਯੋਗੋ ਕਾਮਸੁਖਲ੍ਲਿਕਾਨੁਯੋਗੋ. ਲੋਕੇ ਸਂਵਡ੍ਢਭਾਵਨ੍ਤਿ ਆਮਿਸੋਪਭੋਗੇਨ ਸਂਵਡ੍ਢਿਤਭਾਵਂ. ਉਪ੍ਪਜ੍ਜਮਾਨੋ ਬਹੁਜਨਹਿਤਾਦਿਅਤ੍ਥਾਯੇਵ ਉਪ੍ਪਜ੍ਜਤੀਤਿ ਯੋਜਨਾ.

ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਤ੍ਤਾ ਸਙ੍ਘੋਤਿ ਇਮਮਤ੍ਥਂ ਵਿਭਾਵੇਨ੍ਤੋ ਆਹ ਦਿਟ੍ਠੀਤਿਆਦਿ. ਏਤ੍ਥ ਚ ‘‘ਯਾਯਂ ਦਿਟ੍ਠਿ ਅਰਿਯਾ ਨਿਯ੍ਯਾਨਿਕਾ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯ, ਤਥਾਰੂਪਾਯ ਦਿਟ੍ਠਿਯਾ ਦਿਟ੍ਠਿਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਏਵਂ ਵੁਤ੍ਤਾਯ ਦਿਟ੍ਠਿਯਾ. ‘‘ਯਾਨਿ ਤਾਨਿ ਸੀਲਾਨਿ ਅਖਣ੍ਡਾਨਿ…ਪੇ… ਸਮਾਧਿਸਂਵਤ੍ਤਨਿਕਾਨਿ, ਤਥਾਰੂਪੇਸੁ ਸੀਲੇਸੁ ਸੀਲਸਾਮਞ੍ਞਗਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੪, ੩੫੬; ਮ. ਨਿ. ੧.੪੯੨; ੩.੫੪; ਅ. ਨਿ. ੬.੧੨; ਪਰਿ. ੨੭੪) ਏਵਂ ਵੁਤ੍ਤਾਨਞ੍ਚ ਸੀਲਾਨਂ ਸਾਮਞ੍ਞਸਙ੍ਖਾਤੇਨ ਸਙ੍ਘਾਤੋ ਸਙ੍ਘਟਿਤੋ ਸਮਣਗਣੋ, ਤੇਨਾਤਿ ਅਤ੍ਥੋ. ‘‘ਦਿਟ੍ਠਿਸੀਲਸਾਮਞ੍ਞਸਙ੍ਘਾਤਸਙ੍ਘਾਤੇਨਾ’’ਤਿ ਵਾ ਪਾਠੇਨੇਤ੍ਥ ਭਵਿਤਬ੍ਬਂ, ਤਸ੍ਸ ਦਿਟ੍ਠਿਸੀਲਸਾਮਞ੍ਞਭੂਤੇਨ ਸਂਹਨਨੇਨ ਸਙ੍ਘਾਤੋ ਸਮਣਗਣੋ, ਤੇਨਾਤਿ ਅਤ੍ਥੋ. ਏਵਞ੍ਹਿ ਪਾਠੇ ਸਦ੍ਦਤੋ ਅਤ੍ਥੋ ਯੁਤ੍ਤਤਰੋ ਹੋਤਿ. ਅਸ੍ਸਾਤਿ ਮਹਤੋ ਭਿਕ੍ਖੁਸਙ੍ਘਸ੍ਸ.

ਬ੍ਰਹ੍ਮਂ ਅਣਤੀਤਿ ਏਤ੍ਥ ਬ੍ਰਹ੍ਮ-ਸਦ੍ਦੇਨ ਵੇਦੋ ਵੁਚ੍ਚਤਿ, ਸੋ ਮਨ੍ਤਬ੍ਰਹ੍ਮਕਪ੍ਪਵਸੇਨ ਤਿਵਿਧੋ. ਤਤ੍ਥ ਇਰੁਵੇਦਾਦਯੋ ਤਯੋ ਵੇਦਾ ਮਨ੍ਤਾ, ਤੇ ਚ ਪਧਾਨਾ, ਇਤਰੇ ਪਨ ਸਨ੍ਨਿਸ੍ਸਿਤਾ, ਤੇਨ ਪਧਾਨਸ੍ਸੇਵ ਗਹਣਂ. ਮਨ੍ਤੇ ਸਜ੍ਝਾਯਤੀਤਿ ਇਰੁਵੇਦਾਦਿਕੇ ਮਨ੍ਤਸਤ੍ਥੇ ਸਜ੍ਝਾਯਤੀਤਿ ਅਤ੍ਥੋ. ਇਰੁਵੇਦਾਦਯੋ ਹਿ ਗੁਤ੍ਤਭਾਸਿਤਬ੍ਬਤਾਯ ‘‘ਮਨ੍ਤਾ’’ਤਿ ਵੁਚ੍ਚਨ੍ਤਿ. ‘‘ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ, ਸਮਿਤਪਾਪਤ੍ਤਾ ਸਮਣੋ’’ਤਿ ਯਥਾਵੁਤ੍ਤਮਤ੍ਥਦ੍ਵਯਂ ਉਦਾਹਰਣਦ੍ਵਯੇਨ ਵਿਭਾਵੇਤੁਂ ਵੁਤ੍ਤਞ੍ਹੇਤਨ੍ਤਿਆਦਿ ਵੁਤ੍ਤਂ. ‘‘ਸਮਿਤਤ੍ਤਾ ਹਿ ਪਾਪਾਨਂ ‘ਸਮਣੋ’ਤਿ ਪਵੁਚ੍ਚਤੀ’’ਤਿ ਹਿ ਇਦਂ ਵਚਨਂ ਗਹੇਤ੍ਵਾ ‘‘ਸਮਿਤਪਾਪਤ੍ਤਾ ‘ਸਮਣੋ’ਤਿ ਵੁਚ੍ਚਤੀ’’ਤਿ ਵੁਤ੍ਤਂ, ਬਾਹਿਤਪਾਪੋਤਿ ਇਦਂ ਪਨ ਅਞ੍ਞਸ੍ਮਿਂ ਗਾਥਾਬਨ੍ਧੇ ਵੁਤ੍ਤਵਚਨਂ. ਯਥਾਭੁਚ੍ਚਗੁਣਾਧਿਗਤਨ੍ਤਿ ਯਥਾਭੂਤਗੁਣਾਧਿਗਤਂ. ਸਕਿਞ੍ਚਨੋਤਿ ਸਦੋਸੋ.

ਗੋਤ੍ਤਵਸੇਨਾਤਿ ਏਤ੍ਥ ਗਂ ਤਾਯਤੀਤਿ ਗੋਤ੍ਤਂ, ਗੋ-ਸਦ੍ਦੇਨ ਚੇਤ੍ਥ ਅਭਿਧਾਨਂ ਬੁਦ੍ਧਿ ਚ ਵੁਚ੍ਚਤਿ. ਕੇਨਚਿ ਪਾਰਿਜੁਞ੍ਞੇਨਾਤਿ ਞਾਤਿਪਾਰਿਜੁਞ੍ਞਾਦਿਨਾ ਕੇਨਚਿ ਪਾਰਿਜੁਞ੍ਞੇਨ, ਪਰਿਹਾਨਿਯਾਤਿ ਅਤ੍ਥੋ. ਤਤੋ ਪਰਨ੍ਤਿ ਵੇਰਞ੍ਜਾਯਨ੍ਤਿਆਦਿਵਚਨਂ. ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਉਪਯੋਗਵਚਨਨ੍ਤਿ ਇਤ੍ਥਂ ਇਮਂ ਪਕਾਰਂ ਭੂਤੋ ਆਪਨ੍ਨੋਤਿ ਇਤ੍ਥਮ੍ਭੂਤੋ, ਤਸ੍ਸ ਆਖ੍ਯਾਨਂ ਇਤ੍ਥਮ੍ਭੂਤਾਖ੍ਯਾਨਂ, ਸੋਯੇਵਤ੍ਥੋ ਇਤ੍ਥਮ੍ਭੂਤਾਖ੍ਯਾਨਤ੍ਥੋ. ਅਥ ਵਾ ‘‘ਇਤ੍ਥਂ ਏਵਂਪਕਾਰੋ ਭੂਤੋ ਜਾਤੋ’’ਤਿ ਏਵਂ ਕਥਨਤ੍ਥੋ ਇਤ੍ਥਮ੍ਭੂਤਾਖ੍ਯਾਨਤ੍ਥੋ, ਤਸ੍ਮਿਂ ਉਪਯੋਗਵਚਨਨ੍ਤਿ ਅਤ੍ਥੋ. ਏਤ੍ਥ ਚ ਅਬ੍ਭੁਗ੍ਗਤੋਤਿ ਏਤ੍ਥ ਅਭਿ-ਸਦ੍ਦੋ ਇਤ੍ਥਮ੍ਭੂਤਾਖ੍ਯਾਨਤ੍ਥਜੋਤਕੋ ਅਭਿਭਵਿਤ੍ਵਾ ਉਗ੍ਗਮਨਪ੍ਪਕਾਰਸ੍ਸ ਦੀਪਨਤੋ, ਤੇਨ ਯੋਗਤੋ ਤਂ ਖੋ ਪਨ ਭਵਨ੍ਤਂ ਗੋਤਮਨ੍ਤਿ ਇਦਂ ਉਪਯੋਗਵਚਨਂ ਸਾਮਿਅਤ੍ਥੇਪਿ ਸਮਾਨੇ ਇਤ੍ਥਮ੍ਭੂਤਾਖ੍ਯਾਨਦੀਪਨਤੋ ‘‘ਇਤ੍ਥਮ੍ਭੂਤਾਖ੍ਯਾਨਤ੍ਥੇ’’ਤਿ ਵੁਤ੍ਤਂ, ਤੇਨੇਵਾਹ ‘‘ਤਸ੍ਸ ਖੋ ਪਨ ਭੋਤੋ ਗੋਤਮਸ੍ਸਾਤਿ ਅਤ੍ਥੋ’’ਤਿ.

ਇਦਂ ਵੁਤ੍ਤਂ ਹੋਤਿ – ਯਥਾ ਸਾਧੁ ਦੇਵਦਤ੍ਤੋ ਮਾਤਰਮਭੀਤਿ ਏਤ੍ਥ ਅਭਿਸਦ੍ਦਯੋਗਤੋ ਇਤ੍ਥਮ੍ਭੂਤਾਖ੍ਯਾਨੇ ਉਪਯੋਗਵਚਨਂ ਕਤਂ, ਏਵਮਿਧਾਪਿ ਤਂ ਖੋ ਪਨ ਭਵਨ੍ਤਂ ਗੋਤਮਂ ਅਭਿ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਉਗ੍ਗਤੋਤਿ ਅਭਿਸਦ੍ਦਯੋਗਤੋ ਇਤ੍ਥਮ੍ਭੂਤਾਖ੍ਯਾਨੇ ਉਪਯੋਗਵਚਨਨ੍ਤਿ. ਸਾਧੁ ਦੇਵਦਤ੍ਤੋ ਮਾਤਰਮਭੀਤਿ ਏਤ੍ਥ ਹਿ ‘‘ਦੇਵਦਤ੍ਤੋ ਮਾਤਰਮਭਿ ਮਾਤਰਿ ਵਿਸਯੇ ਮਾਤੁਯਾ ਵਾ ਸਾਧੂ’’ਤਿ ਏਵਂ ਅਧਿਕਰਣਤ੍ਥੇ ਵਾ ਸਾਮਿਅਤ੍ਥੇ ਵਾ ਭੁਮ੍ਮਵਚਨਸ੍ਸ ਸਾਮਿਵਚਨਸ੍ਸ ਵਾ ਪਸਙ੍ਗੇ ਇਤ੍ਥਮ੍ਭੂਤਾਖ੍ਯਾਨਤ੍ਥਜੋਤਕੇਨ ਅਭਿਸਦ੍ਦੇਨ ਯੋਗੇ ਉਪਯੋਗਵਚਨਂ ਕਤਂ, ਯਥਾ ਚੇਤ੍ਥ ਦੇਵਦਤ੍ਤੋ ਮਾਤੁਵਿਸਯੇ ਮਾਤੁਸਮ੍ਬਨ੍ਧੀ ਵਾ ਸੋ ਵੁਤ੍ਤਪ੍ਪਕਾਰਪ੍ਪਤ੍ਤੋਤਿ ਅਯਮਤ੍ਥੋ ਵਿਞ੍ਞਾਯਤਿ, ਏਵਮਿਧਾਪਿ ਭੋਤੋ ਗੋਤਮਸ੍ਸ ਸਮ੍ਬਨ੍ਧੀ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ ਅਭਿਭਵਿਤ੍ਵਾ ਉਗ੍ਗਮਨਪਕਾਰਪ੍ਪਤ੍ਤੋਤਿ ਅਯਮਤ੍ਥੋ ਵਿਞ੍ਞਾਯਤਿ. ਤਤ੍ਥ ਹਿ ਦੇਵਦਤ੍ਤਗ੍ਗਹਣਂ ਵਿਯ ਇਧ ਕਿਤ੍ਤਿਸਦ੍ਦਗ੍ਗਹਣਂ, ਤਤ੍ਥ ਮਾਤਰਨ੍ਤਿ ਵਚਨਂ ਵਿਯ ਇਧ ਤਂ ਖੋ ਪਨ ਭਵਨ੍ਤਂ ਗੋਤਮਨ੍ਤਿ ਵਚਨਂ, ਤਤ੍ਥ ਸਾਧੁਸਦ੍ਦਗ੍ਗਹਣਂ ਵਿਯ ਇਧ ਉਗ੍ਗਤਸਦ੍ਦਗ੍ਗਹਣਂ ਵੇਦਿਤਬ੍ਬਂ. ਕਿਤ੍ਤਿਸਦ੍ਦੋਤਿ ਕਿਤ੍ਤਿਭੂਤੋ ਸਦ੍ਦੋ, ਨ ਕੇਵਲੋਤਿ ਦਸ੍ਸਨਤ੍ਥਂ ਵਿਸੇਸਿਤਨ੍ਤਿ ਆਹ ‘‘ਕਿਤ੍ਤਿ ਏਵਾ’’ਤਿ. ਤਤੋ ਕਿਤ੍ਤੀਤਿ ਥੁਤਿ, ਤਸ੍ਸਾ ਪਕਾਸਕੋ ਸਦ੍ਦੋ ਕਿਤ੍ਤਿਸਦ੍ਦੋਤਿ ਦਸ੍ਸੇਤੁਂ ‘‘ਥੁਤਿਘੋਸੋ ਵਾ’’ਤਿ ਵੁਤ੍ਤਂ.

ਸੋ ਭਗਵਾਤਿ ਏਤ੍ਥ ਸੋਤਿ ਪਸਿਦ੍ਧਿਯਂ, ਯੋ ਸੋ ਸਮਤ੍ਤਿਂਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਦਸਸਹਸ੍ਸਿਲੋਕਧਾਤੁਂ ਕਮ੍ਪੇਨ੍ਤੋ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਸੋ ਲੋਕੇ ਅਤਿਪਾਕਟੋਤਿ ‘‘ਸੋ ਭਗਵਾ’’ਤਿ ਵੁਤ੍ਤਂ. ਭਗਵਾਤਿ ਚ ਇਦਂ ਸਤ੍ਥੁ ਨਾਮਕਿਤ੍ਤਨਂ, ਨ ਗੁਣਕਿਤ੍ਤਨਂ. ਪਰਤੋ ਪਨ ਭਗਵਾਤਿ ਗੁਣਕਿਤ੍ਤਨਮੇਵ. ਇਮਿਨਾ ਚ ਇਮਿਨਾ ਚਾਤਿ ਏਤੇਨ ਅਰਹਨ੍ਤਿਆਦਿਪਦਾਨਂ ਪਚ੍ਚੇਕਂ ਅਨੇਕਗੁਣਗਣਂ ਪਟਿਚ੍ਚ ਪਵਤ੍ਤਭਾਵਂ ਦਸ੍ਸੇਤਿ.

ਸੁਵਿਦੂਰਵਿਦੂਰੇਤਿ ਦ੍ਵੀਹਿ ਸਦ੍ਦੇਹਿ ਅਤਿਵਿਯ ਦੂਰੇਤਿ ਦਸ੍ਸੇਤਿ, ਸੁਵਿਦੂਰਤਾ ਏਵ ਹਿ ਵਿਦੂਰਤਾ. ਸਵਾਸਨਾਨਂ ਕਿਲੇਸਾਨਂ ਵਿਦ੍ਧਂਸਿਤਤ੍ਤਾਤਿ ਇਮਿਨਾ ਪਚ੍ਚੇਕਬੁਦ੍ਧਾਦੀਹਿ ਅਸਾਧਾਰਣਂ ਭਗਵਤੋ ਅਰਹਤ੍ਤਨ੍ਤਿ ਦਸ੍ਸੇਤਿ ਤੇਸਂ ਵਾਸਨਾਯ ਅਪ੍ਪਹੀਨਤ੍ਤਾ, ਵਾਸਨਾ ਚ ਨਾਮ ਨਿਕ੍ਕਿਲੇਸਸ੍ਸਾਪਿ ਸਕਲਞੇਯ੍ਯਾਨਵਬੋਧਾਦਿਦ੍ਵਾਰਤ੍ਤਯਪ੍ਪਯੋਗਵਿਗੁਣਤਾਹੇਤੁਭੂਤੋ ਕਿਲੇਸਨਿਹਿਤੋ ਆਕਾਰੋ ਚਿਰਨਿਗਲ਼ਿਤਪਾਦਾਨਂ ਨਿਗਲ਼ਮੋਕ੍ਖੇਪਿ ਸਙ੍ਕੁਚਿਤਤਾਗਮਨਹੇਤੁਕੋ ਨਿਗਲ਼ਨਿਹਿਤੋ ਆਕਾਰੋ ਵਿਯ. ਯਾਯ ਪਿਲਿਨ੍ਦਵਚ੍ਛਾਦੀਨਂ ਵਸਲਵੋਹਾਰਾਦਿਵਿਗੁਣਤਾ ਹੋਤਿ, ਅਯਂ ਵਾਸਨਾਤਿ ਗਹੇਤਬ੍ਬਾ. ਆਰਕਾਤਿ ਏਤ੍ਥ ਆਕਾਰਸ੍ਸ ਰਸ੍ਸਤ੍ਤਂ ਕ-ਕਾਰਸ੍ਸ ਚ ਹ-ਕਾਰਂ ਸਾਨੁਸ੍ਸਰਂ ਕਤ੍ਵਾ ਨਿਰੁਤ੍ਤਿਨਯੇਨ ‘‘ਅਰਹ’’ਨ੍ਤਿ ਪਦਸਿਦ੍ਧਿ ਵੇਦਿਤਬ੍ਬਾ. ਏਵਂ ਉਪਰਿਪਿ ਯਥਾਰਹਂ ਨਿਰੁਤ੍ਤਿਨਯੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਯਞ੍ਚੇਤਂ ਸਂਸਾਰਚਕ੍ਕਨ੍ਤਿ ਸਮ੍ਬਨ੍ਧੋ. ਪੁਞ੍ਞਾਦੀਤਿ ਆਦਿ-ਸਦ੍ਦੇਨ ਅਪੁਞ੍ਞਾਭਿਸਙ੍ਖਾਰਆਨੇਞ੍ਜਾਭਿਸਙ੍ਖਾਰੇ ਸਙ੍ਗਣ੍ਹਾਤਿ. ਆਸਵਾ ਏਵ ਅਵਿਜ੍ਜਾਦੀਨਂ ਕਾਰਣਤ੍ਤਾ ਸਮੁਦਯੋਤਿ ਆਹ ‘‘ਆਸਵਸਮੁਦਯਮਯੇਨਾ’’ਤਿ. ‘‘ਆਸਵਸਮੁਦਯਾ ਅਵਿਜ੍ਜਾਸਮੁਦਯੋ’’ਤਿ (ਮ. ਨਿ. ੧.੧੦੩) ਹਿ ਵੁਤ੍ਤਂ. ਵਿਪਾਕਕਟਤ੍ਤਾਰੂਪਪ੍ਪਭੇਦੋ ਤਿਭਵੋ ਏਵ ਰਥੋ, ਤਸ੍ਮਿਂ ਤਿਭਵਰਥੇ. ਸਂਸਾਰਚਕ੍ਕਨ੍ਤਿ ਯਥਾਵੁਤ੍ਤਕਿਲੇਸਕਮ੍ਮਵਿਪਾਕਸਮੁਦਯੋ.

‘‘ਖਨ੍ਧਾਨਞ੍ਚ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਬੋਚ੍ਛਿਨ੍ਨਂ ਵਤ੍ਤਮਾਨਾ, ‘ਸਂਸਾਰੋ’ਤਿ ਪਵੁਚ੍ਚਤੀ’’ਤਿ. (ਵਿਸੁਦ੍ਧਿ. ੨.੬੧੮; ਦੀ. ਨਿ. ਅਟ੍ਠ. ੨.੯੫ ਅਪਸਾਦਨਾਵਣ੍ਣਨਾ; ਸਂ. ਨਿ. ਅਟ੍ਠ. ੨.੨.੬੦; ਅ. ਨਿ. ਅਟ੍ਠ. ੨.੪.੧੯੯; ਧ. ਸ. ਅਟ੍ਠ. ਨਿਦਾਨਕਥਾ; ਵਿਭ. ਅਟ੍ਠ. ੨੨੬ ਸਙ੍ਖਾਰਪਦਨਿਦ੍ਦੇਸ; ਸੁ. ਨਿ. ਅਟ੍ਠ. ੨.੫੨੩; ਉਦਾ. ਅਟ੍ਠ. ੩੯; ਇਤਿਵੁ. ਅਟ੍ਠ. ੧੪, ੫੮; ਥੇਰਗਾ. ਅਟ੍ਠ. ੧.੬੭, ੯੯; ਬੁ. ਵਂ. ਅਟ੍ਠ. ੫੮; ਪਟਿ. ਮ. ਅਟ੍ਠ. ੨.੧.੧੧੭; ਚੂਲ਼ਨਿ. ਅਟ੍ਠ. ੬) –

ਏਵਂ ਵੁਤ੍ਤੋ ਸਂਸਾਰੋਵ ਚਕ੍ਕਂ ਵਿਯ ਪਰਿਬ੍ਭਮਨਤੋ ਚਕ੍ਕਂ, ਤਸ੍ਸ ਚਕ੍ਕਸ੍ਸ ਸਬ੍ਬੇ ਅਰਾ ਹਤਾਤਿ ਸਮ੍ਬਨ੍ਧੋ. ਅਨੇਨਾਤਿ ਭਗਵਤਾ. ਬੋਧੀਤਿ ਞਾਣਂ, ਤਂ ਏਤ੍ਥ ਮਣ੍ਡਂ ਪਸਨ੍ਨਂ ਜਾਤਨ੍ਤਿ ਬੋਧਿਮਣ੍ਡੋ. ਕਮ੍ਮਕ੍ਖਯਕਰਂ ਞਾਣਫਰਸੁਨ੍ਤਿ ਅਰਹਤ੍ਤਮਗ੍ਗਞਾਣਂ ਵੁਤ੍ਤਂ, ਤਂ ਛਿਨ੍ਦਿਤਬ੍ਬਂ ਅਭਿਸਙ੍ਖਾਰਸਙ੍ਖਾਤਂ ਕਮ੍ਮਂ ਪਰਿਚ੍ਛਿਨ੍ਦਤੀਤਿ ਦਸ੍ਸੇਤੁਂ ਕਮ੍ਮਕ੍ਖਯਕਰਵਿਸੇਸਨਵਿਸਿਟ੍ਠਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਏਵਂ ਕਤਿਪਯਙ੍ਗੇਹਿ ਸਂਸਾਰਚਕ੍ਕਂ ਤਦਵਸੇਸਙ੍ਗੇਹਿ ਫਲਭੂਤਨਾਮਰੂਪਧਮ੍ਮੇਹਿ ਤਿਭਵਰਥਞ੍ਚ ਤਸ੍ਮਿਂ ਰਥੇ ਯੋਜਿਤਸਂਸਾਰਚਕ੍ਕਾਰਾਨਂ ਹਨਨਪ੍ਪਕਾਰਞ੍ਚ ਦਸ੍ਸੇਤ੍ਵਾ ਇਦਾਨਿ ਸਬ੍ਬੇਹਿਪਿ ਦ੍ਵਾਦਸਹਿ ਪਟਿਚ੍ਚਸਮੁਪ੍ਪਾਦਙ੍ਗੇਹਿ ਰਥਵਿਰਹਿਤਮੇਵ ਕੇਵਲਂ ਸਂਸਾਰਚਕ੍ਕਂ, ਤਸ੍ਸ ਅਰਘਾਤਨਪ੍ਪਕਾਰਭੇਦਞ੍ਚ ਦਸ੍ਸੇਤੁਂ ਅਥਵਾਤਿਆਦਿ ਵੁਤ੍ਤਂ. ਤਤ੍ਥ ਅਨਮਤਗ੍ਗਨ੍ਤਿ ਅਨੁ ਅਨੁ ਅਮਤਗ੍ਗਂ, ਸਬ੍ਬਥਾ ਅਨੁਗਚ੍ਛਨ੍ਤੇਹਿਪਿ ਅਵਿਞ੍ਞਾਤਕੋਟਿਕਨ੍ਤਿ ਅਤ੍ਥੋ. ਅਵਿਜ੍ਜਾਮੂਲਕਤ੍ਤਾ ਜਰਾਮਰਣਪਰਿਯੋਸਾਨਤ੍ਤਾਤਿ ਇਦਂ ਸਙ੍ਖਾਰਾਦੀਨਂ ਦਸਨ੍ਨਂ ਅਰਭਾਵੇਨ ਏਕਤ੍ਤਂ ਸਮਾਰੋਪੇਤ੍ਵਾਤਿ ਵੁਤ੍ਤਂ. ਨ ਹਿ ਤੇਸਂ ਪਚ੍ਚੇਕਂ ਅਵਿਜ੍ਜਾਮੂਲਕਤਾ ਜਰਾਮਰਣਪਰਿਯੋਸਾਨਤਾ ਚ ਅਤ੍ਥਿ ਤਥਾ ਪਟਿਚ੍ਚਸਮੁਪ੍ਪਾਦਪਾਲ਼ਿਯਂ ਅਵੁਤ੍ਤਤ੍ਤਾ. ਅਥ ਵਾ ਤੇਸਮ੍ਪਿ ਯਥਾਰਹਂ ਅਤ੍ਥਤੋ ਅਵਿਜ੍ਜਾਮੂਲਕਤ੍ਤਂ, ਅਤ੍ਤਨੋ ਅਤ੍ਤਨੋ ਲਕ੍ਖਣਭੂਤਖਣਿਕਜਰਾਮਰਣਵਸੇਨ ਤਪ੍ਪਰਿਯੋਸਾਨਤਞ੍ਚ ਸਨ੍ਧਾਯੇਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਏਵਞ੍ਚ ਤੇਸਂ ਪਚ੍ਚੇਕਂ ਅਰਭਾਵੋ ਸਿਦ੍ਧੋ ਹੋਤਿ.

ਏਵਂ ਸਬ੍ਬਾਕਾਰਂ ਸਂਸਾਰਚਕ੍ਕਮੇਵ ਦਸ੍ਸੇਤ੍ਵਾ ਇਦਾਨਿ ਯੇਨ ਞਾਣੇਨ ਇਮਸ੍ਸ ਸਂਸਾਰਚਕ੍ਕਸ੍ਸ ਅਰਾਨਂ ਛੇਦੋ ਭਗਵਤੋ ਸਿਦ੍ਧੋ, ਤਸ੍ਸ ਧਮ੍ਮਟ੍ਠਿਤਿਞਾਣਸ੍ਸ ‘‘ਪਚ੍ਚਯਪਰਿਗ੍ਗਹੇ ਪਞ੍ਞਾ ਧਮ੍ਮਟ੍ਠਿਤਿਞਾਣ’’ਨ੍ਤਿ (ਪਟਿ. ਮ. ੪; ੧.੪੫) ਮਾਤਿਕਾ ਵੁਤ੍ਤਤ੍ਤਾ ਭਵਚਕ੍ਕਾਵਯਵੇਸੁ ਅਵਿਜ੍ਜਾਦੀਸੁ ਪਚ੍ਚਯਪਚ੍ਚਯੁਪ੍ਪਨ੍ਨਤ੍ਤਾ ਪਰਿਗ੍ਗਹਵਸੇਨ ਪਵਤ੍ਤਿਆਕਾਰਂ ਦਸ੍ਸੇਤ੍ਵਾ ਪਰਤੋ ਤਸ੍ਸ ਅਤ੍ਥਸ੍ਸ ਨਿਗਮਨਵਸੇਨ ਵੁਤ੍ਤੇਨ ਏਵਮਯਂ ਅਵਿਜ੍ਜਾਹੇਤੂਤਿਆਦਿਕੇਨ ਪਟਿਸਮ੍ਭਿਦਾਪਾਲ਼ਿਸਹਿਤੇਨ (ਪਟਿ. ਮ. ੧.੪੫) ਪਾਠੇਨ ਸਰੂਪਤੋ ਧਮ੍ਮਟ੍ਠਿਤਿਞਾਣਂ, ਤਸ੍ਸ ਚ ਤੇਸੁਯੇਵ ਅਵਿਜ੍ਜਾਦੀਸੁ ਚਤੁਸਙ੍ਖੇਪਾਦਿਵਸੇਨ ਪਵਤ੍ਤਿਵਿਭਾਗਞ੍ਚ ਦਸ੍ਸੇਤ੍ਵਾ ਤਤੋ ਪਰਂ ਇਤਿ ਭਗਵਾਤਿਆਦਿਪਾਠੇਨ ਭਗਵਤੋ ਤੇਨ ਧਮ੍ਮਟ੍ਠਿਤਿਞਾਣੇਨ ਪਟਿਚ੍ਚਸਮੁਪ੍ਪਾਦਸ੍ਸ ਸਬ੍ਬਾਕਾਰਤੋ ਪਟਿਵਿਦ੍ਧਭਾਵਂ ਦਸ੍ਸੇਤ੍ਵਾ ਪੁਨ ਇਮਿਨਾ ਧਮ੍ਮਟ੍ਠਿਤਿਞਾਣੇਨਾਤਿਆਦਿਨਾ ਭਗਵਤੋ ਤੇਨ ਞਾਣੇਨ ਸਂਸਾਰਚਕ੍ਕਾਰਾਨਂ ਵਿਦ੍ਧਂਸਿਤਭਾਵਂ ਦਸ੍ਸੇਤੁਂ ਤਤ੍ਥ ਦੁਕ੍ਖਾਦੀਸੁ ਅਞ੍ਞਾਣਂ ਅਵਿਜ੍ਜਾਤਿਆਦਿ ਵੁਤ੍ਤਂ. ਤਤ੍ਥ ਤਿਣ੍ਣਂ ਆਯਤਨਾਨਨ੍ਤਿ ਚਕ੍ਖੁਸੋਤਮਨਾਯਤਨਾਨਂ ਤਿਣ੍ਣਂ. ਏਸ ਨਯੋ ਤਿਣ੍ਣਂ ਫਸ੍ਸਾਨਨ੍ਤਿਆਦੀਸੁਪਿ. ਰੂਪਤਣ੍ਹਾਦਿਵਸੇਨ ਛ ਤਣ੍ਹਾਕਾਯਾ ਏਵ ਵੇਦਿਤਬ੍ਬਾ.

ਸਗ੍ਗਸਮ੍ਪਤ੍ਤਿਨ੍ਤਿ ਕਾਮਸੁਗਤੀਸੁ ਸਮ੍ਪਤ੍ਤਿਂ. ਤਥੇਵਾਤਿ ਕਾਮੁਪਾਦਾਨਪਚ੍ਚਯਾ ਏਵ. ਬ੍ਰਹ੍ਮਲੋਕਸਮ੍ਪਤ੍ਤਿਨ੍ਤਿ ਰੂਪੀਬ੍ਰਹ੍ਮਲੋਕਸਮ੍ਪਤ੍ਤਿਂ. ਤੇਭੂਮਕਧਮ੍ਮਵਿਸਯਸ੍ਸ ਸਬ੍ਬਸ੍ਸਾਪਿ ਰਾਗਸ੍ਸ ਕਿਲੇਸਕਾਮਭਾਵਤੋ ਭਵਰਾਗੋਪਿ ਕਾਮੁਪਾਦਾਨਮੇਵਾਤਿ ਆਹ ‘‘ਕਾਮੁਪਾਦਾਨਪਚ੍ਚਯਾਯੇਵ ਮੇਤ੍ਤਂ ਭਾਵੇਤੀ’’ਤਿ. ਸੇਸੁਪਾਦਾਨਮੂਲਿਕਾਸੁਪੀਤਿ ਦਿਟ੍ਠੁਪਾਦਾਨਸੀਲਬ੍ਬਤੁਪਾਦਾਨਅਤ੍ਤਵਾਦੁਪਾਦਾਨਮੂਲਿਕਾਸੁਪਿ ਯੋਜਨਾਸੁ. ਤਤ੍ਰਾਯਂ ਯੋਜਨਾਨਯੋ – ਇਧੇਕਚ੍ਚੋ ‘‘ਨਤ੍ਥਿ ਪਰਲੋਕੋ ਉਚ੍ਛਿਜ੍ਜਤਿ ਅਤ੍ਤਾ’’ਤਿ (ਦੀ. ਨਿ. ੧.੮੫-੮੬ ਅਤ੍ਥਤੋ ਸਮਾਨਂ) ਦਿਟ੍ਠਿਂ ਗਣ੍ਹਾਤਿ, ਸੋ ਦਿਟ੍ਠੁਪਾਦਾਨਪਚ੍ਚਯਾ ਕਾਯੇਨ ਦੁਚ੍ਚਰਿਤਂ ਚਰਤੀਤਿਆਦਿਨਾ, ਅਪਰੋ ‘‘ਅਸੁਕਸ੍ਮਿਂ ਭਵੇ ਅਤ੍ਤਾ ਉਚ੍ਛਿਜ੍ਜਤੀ’’ਤਿ ਦਿਟ੍ਠਿਂ ਗਹੇਤ੍ਵਾ ਕਾਮਰੂਪਾਰੂਪਭਵੂਪਪਤ੍ਤਿਯਾ ਤਂ ਤਂ ਕੁਸਲਂ ਕਰੋਤੀਤਿਆਦਿਨਾ ਚ ਦਿਟ੍ਠੁਪਾਦਾਨਮੂਲਿਕਾ ਯੋਜਨਾ, ਇਮਿਨਾਵ ਨਯੇਨ ਅਤ੍ਤਵਾਦੁਪਾਦਾਨਮੂਲਿਕਾ ਯੋਜਨਾ ਵੇਦਿਤਬ੍ਬਾ. ਅਪਰੋ ‘‘ਸੀਲੇਨ ਸੁਦ੍ਧਿ ਵਤੇਨ ਸੁਦ੍ਧੀ’’ਤਿ ਅਸੁਦ੍ਧਿਮਗ੍ਗਂ ‘‘ਸੁਦ੍ਧਿਮਗ੍ਗੋ’’ਤਿ ਪਰਾਮਸਨ੍ਤੋ ਸੀਲਬ੍ਬਤੁਪਾਦਾਨਪਚ੍ਚਯਾ ਕਾਯੇਨ ਦੁਚ੍ਚਰਿਤਂ ਚਰਤੀਤਿਆਦਿਨਾ ਸਬ੍ਬਭਵੇਸੁ ਸੀਲਬ੍ਬਤੁਪਾਦਾਨਮੂਲਿਕਾ ਯੋਜਨਾ ਵੇਦਿਤਬ੍ਬਾ.

ਇਦਾਨਿ ਯਸ੍ਸ ਸਂਸਾਰਚਕ੍ਕਾਰਾਨਂ ਘਾਤਨਸਮਤ੍ਥਸ੍ਸ ਧਮ੍ਮਟ੍ਠਿਤਿਞਾਣਸ੍ਸ ਅਵਿਜ੍ਜਾਦਿਪਚ੍ਚਯਪਅਗ੍ਗਹਾਕਾਰਂ ਦਸ੍ਸੇਤੁਂ ਕਾਮਭਵੇ ਚ ਅਵਿਜ੍ਜਾ ਕਾਮਭਵੇ ਸਙ੍ਖਾਰਾਨਂ ਪਚ੍ਚਯੋ ਹੋਤੀਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵੋ ਦਸ੍ਸਿਤੋ, ਤਮੇਵ ਞਾਣਂ ਅਵਿਜ੍ਜਾਦੀਸੁ ਪਵਤ੍ਤਿਆਕਾਰੇਨ ਸਦ੍ਧਿਂ ਪਟਿਸਮ੍ਭਿਦਾਮਗ੍ਗਪਾਲ਼ਿਂ ਆਨੇਤ੍ਵਾ ਨਿਗਮਨਵਸੇਨ ਦਸ੍ਸੇਨ੍ਤੋ ਏਵਮਯਨ੍ਤਿਆਦਿਮਾਹ. ਵਿਸੁਦ੍ਧਿਮਗ੍ਗਟੀਕਾਯਂ ਪਨ ‘‘ਇਦਾਨਿ ਯ੍ਵਾਯਂ ਸਂਸਾਰਚਕ੍ਕਂ ਦਸ੍ਸੇਨ੍ਤੇਨ ਕਾਮਭਵੇ ਅਵਿਜ੍ਜਾ ਕਾਮਭਵੇ ਸਙ੍ਖਾਰਾਨਂ ਪਚ੍ਚਯੋ ਹੋਤੀਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਭਾਵੋ ਸਙ੍ਖਾਰਾਦੀਨਂ ਪਚ੍ਚਯੁਪ੍ਪਨ੍ਨਭਾਵੋ ਦਸ੍ਸਿਤੋ, ਤਮੇਵ ਪਟਿਸਮ੍ਭਿਦਾਮਗ੍ਗਪਾਲ਼ਿਂ ਆਨੇਤ੍ਵਾ ਨਿਗਮਨਵਸੇਨ ਦਸ੍ਸੇਨ੍ਤੋ ਏਵਮਯਨ੍ਤਿਆਦਿਮਾਹਾ’’ਤਿ ਵੁਤ੍ਤਂ. ਸਾਰਤ੍ਥਦੀਪਨਿਯਾ ਵਿਨਯਟੀਕਾਯਪਿ ਅਯਮੇਵ ਪਾਠੋ ਲਿਖਿਤੋ. ਤਤ੍ਥ ਚ ਕਾਮਭਵੇ ਚ ਅਵਿਜ੍ਜਾਤਿਆਦਿਨਾ ਅਵਿਜ੍ਜਾਦੀਨਂ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵੋ ਸਂਸਾਰਚਕ੍ਕਂ ਦਸ੍ਸੇਨ੍ਤੇਨ ਵੁਤ੍ਤੋ ਨ ਹੋਤਿ ਤਸ੍ਸ ਚ ਅਵਿਜ੍ਜਾ ਨਾਭਿ, ਮੂਲਤ੍ਤਾਤਿਆਦਿਨਾ ਪੁਬ੍ਬੇਵ ਦਸ੍ਸਿਤਤ੍ਤਾ ਉਪਰਿ ਚਕ੍ਕਰੂਪਤੋ ਪਯੋਗਤ੍ਤੇਨ ਉਪਸਂਹਾਰਾਭਾਵਾ ਚ. ‘‘ਅਪਿ ਚ ਤਮੇਵ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵਂ ਨਿਗਮਨਵਸੇਨ ਦਸ੍ਸੇਨ੍ਤੋ’’ਤਿ ਚ ਵੁਤ੍ਤਂ, ਨ ਚੇਤ੍ਥ ਪਚ੍ਚਯਪਚ੍ਚਯੁਪ੍ਪਨ੍ਨਭਾਵੋ ਨਿਗਮਨਵਸੇਨ ਪਧਾਨਤ੍ਤੇਨ ਦਸ੍ਸਿਤੋ, ਅਥ ਖੋ ਪਚ੍ਚਯਪਰਿਗ੍ਗਹਵਸਪ੍ਪਵਤ੍ਤਂ ਧਮ੍ਮਟ੍ਠਿਤਿਞਾਣਮੇਵ ਯਥਾਵੁਤ੍ਤਪਚ੍ਚਯਪਰਿਗ੍ਗਹਾਕਾਰਸ੍ਸ ਨਿਗਮਨਵਸੇਨ ਦਸ੍ਸਿਤਂ. ਤਥਾ ਹਿ ‘‘ਏਵਮਯਂ ਅਵਿਜ੍ਜਾ ਹੇਤੁ, ਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾ, ਉਭੋਪੇਤੇ ਧਮ੍ਮਾ ਹੇਤੁਸਮੁਪ੍ਪਨ੍ਨਾਤਿ ਪਚ੍ਚਯਪਰਿਗ੍ਗਹੇ ਪਞ੍ਞਾ ਧਮ੍ਮਟ੍ਠਿਤਿਞਾਣਂ. ਅਤੀਤਮ੍ਪਿ ਅਦ੍ਧਾਨਂ. ਅਨਾਗਤਮ੍ਪਿ ਅਦ੍ਧਾਨਂ ਅਵਿਜ੍ਜਾ ਹੇਤੁ…ਪੇ… ਧਮ੍ਮਟ੍ਠਿਤਿਞਾਣ’’ਨ੍ਤਿ (ਪਟਿ. ਮ. ੧.੪੬) ਧਮ੍ਮਟ੍ਠਿਤਿਞਾਣਮੇਵ ਪਧਾਨਤ੍ਤੇਨ ਦਸ੍ਸਿਤਂ. ‘‘ਅਵਿਜ੍ਜਾ ਹੇਤੁ, ਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾ’’ਤਿਆਦਿ ਪਨ ਪਚ੍ਚਯਪਰਿਗ੍ਗਹੇ ਪਞ੍ਞਾ ਧਮ੍ਮਟ੍ਠਿਤਿਞਾਣਨ੍ਤਿ (ਪਟਿ. ਮ. ਮਾਤਿਕਾ ੪; ੧.੪੫) ਵੁਚ੍ਚਮਾਨਤ੍ਤਾ ਤਸ੍ਸ ਪਚ੍ਚਯਪਰਿਗ੍ਗਹਾਕਾਰਪਰਿਦੀਪਨਤ੍ਥਂ ਵਿਸਯਤ੍ਤੇਨ ਵੁਤ੍ਤਂ, ਨ ਪਧਾਨਤ੍ਤੇਨ.

ਅਯਞ੍ਹੇਤ੍ਥ ਅਤ੍ਥੋ – ਏਵਨ੍ਤਿ ਅਨਨ੍ਤਰੇ ਵੁਤ੍ਤਨਯੇਨ ਅਯਂ ਅਵਿਜ੍ਜਾ ਸਙ੍ਖਾਰਾਨਂ ਹੇਤੁ, ਸਙ੍ਖਾਰਾ ਚ ਤੇਨ ਹੇਤੁਨਾ ਸਮੁਪ੍ਪਨ੍ਨਾ. ਉਭੋਪੇਤੇਤਿ ਯਸ੍ਮਾ ਅਯਂ ਅਵਿਜ੍ਜਾ ਪਰਪਰਿਕਪ੍ਪਿਤਪਕਤਿਇਸ੍ਸਰਾਦਿ ਵਿਯ ਅਹੇਤੁਕਾ ਨਿਚ੍ਚਾ ਧੁਵਾ ਨ ਹੋਤਿ, ਅਥ ਖੋ ‘‘ਆਸਵਸਮੁਦਯਾ ਅਵਿਜ੍ਜਾਸਮੁਦਯੋ’’ਤਿ (ਮ. ਨਿ. ੧.੧੦੩) ਵਚਨਤੋ ਸਯਮ੍ਪਿ ਸਹੇਤੁਕਾ ਸਙ੍ਖਤਾ ਅਨਿਚ੍ਚਾਯੇਵ ਹੋਤਿ, ਤਸ੍ਮਾ ਉਭੋਪੇਤੇ ਅਵਿਜ੍ਜਾਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾਯੇਵ. ਇਤੀਤਿ ਏਵਂ ਯਥਾਵੁਤ੍ਤਨਯੇਨ ਪਚ੍ਚਯਪਰਿਗ੍ਗਣ੍ਹਨੇ ਯਾ ਪਞ੍ਞਾ, ਤਂ ਧਮ੍ਮਾਨਂ ਠਿਤਿਸਙ੍ਖਾਤੇ ਕਾਰਣੇ ਯਾਥਾਵਤੋ ਪਵਤ੍ਤਤ੍ਤਾ ਧਮ੍ਮਟ੍ਠਿਤਿਞਾਣਂ ਨਾਮਾਤਿ.