੨. ਸਙ੍ਘਾਦਿਸੇਸਕਣ੍ਡੋ

੧. ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ

੨੩੪. ਤੇਰਸਕਸ੍ਸਾਤਿ ਤੇਰਸ ਸਿਕ੍ਖਾਪਦਾਨਿ ਪਰਿਮਾਣਾਨਿ ਅਸ੍ਸਾਤਿ ਤੇਰਸਕੋ, ਕਣ੍ਡੋ, ਤਸ੍ਸ. ਸਮਥੇ ਵਿਪਸ੍ਸਨਾਯ ਵਾ ਅਭਿਰਤਿਰਹਿਤੋ ਇਧ ਅਨਭਿਰਤੋ, ਨ ਪਬ੍ਬਜ੍ਜਾਯਾਤਿ ਆਹ ‘‘ਵਿਕ੍ਖਿਤ੍ਤਚਿਤ੍ਤੋ’’ਤਿ. ਵਿਕ੍ਖਿਤ੍ਤਤਾਯ ਕਾਰਣਮਾਹ ਕਾਮਰਾਗਾਇਚ੍ਚਾਦਿ.

੨੩੫. ਅਬ੍ਬੋਹਾਰਿਕਾਤਿ ਸੀਲਵਿਪਤ੍ਤਿਵੋਹਾਰਂ ਨਾਰਹਤੀਤਿ ਕਤ੍ਵਾ ਵੁਤ੍ਤਂ. ਅਕੁਸਲਭਾਵੇ ਪਨਸ੍ਸਾ ਅਬ੍ਬੋਹਾਰਤਾ ਨਤ੍ਥਿ.

੨੩੬-੭. ਚੇਤਨਾ-ਸਦ੍ਦਤੋ ਵਿਸੁਂ ਸਂ-ਸਦ੍ਦਸ੍ਸ ਅਤ੍ਥਾਭਾਵਂ ਇਕ-ਪਚ੍ਚਯਸ੍ਸ ਚ ਅਤ੍ਥਵਨ੍ਤਤਂ ਦਸ੍ਸੇਤੁਂ ਸਞ੍ਚੇਤਨਾ ਵਾਤਿਆਦਿ ਦੁਤਿਯਵਿਕਪ੍ਪੋ ਵੁਤ੍ਤੋ. ਸਿਖਾਪ੍ਪਤ੍ਤੋ ਅਤ੍ਥੋਤਿ ਅਧਿਪ੍ਪੇਤਤ੍ਥਂ ਸਨ੍ਧਾਯ ਵੁਤ੍ਤਂ. ਆਸਯਭੇਦਤੋਤਿ ਪਿਤ੍ਤਸੇਮ੍ਹਪੁਬ੍ਬਲੋਹਿਤਾਨਂ ਚਤੁਨ੍ਨਂ ਆਸਯਾਨਂ ਭੇਦੇਨ. ਧਾਤੁਨਾਨਤ੍ਤਤੋਤਿ ਰਸਰੁਹਿਰਾਦੀਨਂ ਸਤ੍ਤਨ੍ਨਂ, ਪਥਵਾਦੀਨਂ ਵਾ ਚਤੁਨ੍ਨਂ ਧਾਤੂਨਂ ਨਾਨਤ੍ਤੇਨ. ਵਤ੍ਥਿਸੀਸਨ੍ਤਿ ਮੁਤ੍ਤਵਤ੍ਥਿਤੋ ਮਤ੍ਥਕਪਸ੍ਸਂ. ਹਤ੍ਥਿਮਦਚਲਨਂ ਨਾਮਞ੍ਚ ਸਮ੍ਭਵੋਤਿ ਆਹ ‘‘ਸਮ੍ਭਵੋ ਨਿਕ੍ਖਮਤੀ’’ਤਿ. ਸਮ੍ਭਵਵੇਗਨ੍ਤਿ ਸਮ੍ਭਵਸ੍ਸ ਠਾਨਤੋ ਚਵਿਤ੍ਵਾ ਦਕਸੋਤਾਭਿਮੁਖਂ ਓਤਰਣੇਨ ਸਞ੍ਜਾਤਸਰੀਰਕ੍ਖੋਭਵੇਗਂ. ਬਾਹੁਸੀਸਨ੍ਤਿ ਖਨ੍ਧਪ੍ਪਦੇਸਂ. ਦਸ੍ਸੇਸੀਤਿ ਏਤ੍ਥ ਇਤਿ-ਸਦ੍ਦੋ ਹੇਤੁਤ੍ਥੋ, ਤੇਨ ਯਸ੍ਮਾ ਕਣ੍ਣਚੂਲ਼ਿਕਾਹਿ ਸਮ੍ਭਵੋ ਨਿਕ੍ਖਮਤਿ…ਪੇ… ਸਮ੍ਭਵਞ੍ਚ ਦਸ੍ਸੇਸਿ, ਤਸ੍ਮਾ ਤਤਿਯਸ੍ਸ ਭਾਸਿਤਂ ਸੁਭਾਸਿਤਨ੍ਤਿ ਏਵਂ ਯੋਜਨਾ ਵੇਦਿਤਬ੍ਬਾ. ਦਕਸੋਤਨ੍ਤਿ ਮੁਤ੍ਤਸ੍ਸ ਵਤ੍ਥਿਤੋ ਨਿਕ੍ਖਮਨਮਗ੍ਗਂ, ਅਙ੍ਗਜਾਤਪ੍ਪਦੇਸਨ੍ਤਿ ਵੁਤ੍ਤਂ ਹੋਤਿ. ਸੁਕ੍ਕਞ੍ਚ ਨਾਮੇਤਂ ਰਸਰੁਹਿਰਾਦਿਸਤ੍ਤਦੇਹਧਾਤੂਸੁ ਮਜ੍ਝਿਮਧਾਤੁਚਤੁਜਂ ਅਟ੍ਠਿਮਿਞ੍ਜਾਦਿ ਵਿਯ ਪਥਵੀਧਾਤੁਸਙ੍ਗਹਿਤਂ ਆਹਾਰੂਪਜੀਵੀਨਂ ਸਕਲਕਾਯਗਤਂ ਅਤਿਦਹਰਦਾਰਕਾਨਮ੍ਪਿ ਅਤ੍ਥੇਵ, ਤਂ ਪਨ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਤੋ ਪਟ੍ਠਾਯ ਸਤ੍ਤਾਨਂ ਸਮੁਪ੍ਪਜ੍ਜਨਕਕਾਮਰਾਗੇਹੇਵ ਠਾਨਤੋ ਚਲਤਿ, ਚਲਿਤਞ੍ਚ ਆਪੋਧਾਤੁਭਾਵੇਨ ਚਿਤ੍ਤਜਮੇਵ ਹੁਤ੍ਵਾ ਦਕਸੋਤਂ ਓਤਰਤਿ, ਦਕਸੋਤਤੋ ਪਨ ਪਟ੍ਠਾਯ ਚਿਤ੍ਤਪਚ੍ਚਯਉਤੁਜਂ ਹੋਤਿ ਮਤ੍ਥਲੁਙ੍ਗਤੋ ਚਲਿਤਸਿਙ੍ਘਾਣਿਕਾ ਵਿਯ. ਯੇਸਂ ਪਨ ਸਮੁਚ੍ਛੇਦਨਵਿਕ੍ਖਮ੍ਭਨਾਦੀਹਿ ਰਾਗਪਰਿਯੁਟ੍ਠਾਨਂ ਨਤ੍ਥਿ, ਤੇਸਂ ਸੁਕ੍ਕਵਿਸ੍ਸਟ੍ਠਿ ਨ ਸਿਯਾ. ਇਤਿ ਯਥਾਠਾਨਤੋ ਸੁਕ੍ਕਸ੍ਸ ਵਿਸ੍ਸਟ੍ਠਿਯੇਵ ਰਾਗਚਿਤ੍ਤਸਮੁਟ੍ਠਾਨਾ, ਨ ਪਕਤਿਰੂਪਂ, ਤੇਨੇਵ ਕਥਾਵਤ੍ਥੁਅਟ੍ਠਕਥਾਯਂ (ਕਥਾ. ਅਟ੍ਠ. ੩੦੭) ‘‘ਸੁਕ੍ਕਵਿਸ੍ਸਟ੍ਠਿ ਨਾਮ ਰਾਗਸਮੁਟ੍ਠਾਨਾ ਹੋਤੀ’’ਤਿ ਸੁਕ੍ਕਸ੍ਸ ਵਿਸ੍ਸਟ੍ਠਿ ਏਵ ਰਾਗਸਮੁਟ੍ਠਾਨਾ ਵੁਤ੍ਤਾ, ਨ ਪਕਤਿਰੂਪਂ. ਛਨ੍ਨਂ ਪਨ ਕਾਮਾਵਚਰਦੇਵਾਨਂ ਵਿਜ੍ਜਮਾਨਾਪਿ ਸੁਕ੍ਕਧਾਤੁ ਦ੍ਵਯਂਦ੍ਵਯਸਮਾਪਤ੍ਤਿਵਸੇਨ ਪਰਿਯੁਟ੍ਠਿਤਰਾਗੇਨਾਪਿ ਠਾਨਤੋ ਨ ਗਲ਼ਤਿ, ਯਥਾਠਾਨੇ ਏਵ ਠਤ੍ਵਾ ਕਿਞ੍ਚਿ ਵਿਕਾਰਂ ਆਪਜ੍ਜਮਾਨਾ ਤਙ੍ਖਣਿਕਪਰਿਲ਼ਾਹਵੂਪਸਮਾਵਹਾ ਮੇਥੁਨਕਿਚ੍ਚਨਿਟ੍ਠਾਪਿਤਾ ਹੋਤੀਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਕਾਯਸਮ੍ਫਸ੍ਸਸੁਖਮੇਵ ਤੇਸਂ ਕਾਮਕਿਚ੍ਚ’’ਨ੍ਤਿ ਵਦਨ੍ਤਿ. ਖੀਣਾਸਵਾਨਂ ਪਨ ਅਨਾਗਾਮੀਨਞ੍ਚ ਸਬ੍ਬਸੋ ਕਾਮਰਾਗਾਭਾਵੇਨ ਸੁਕ੍ਕਧਾਤੁਵਿਕਾਰਮ੍ਪਿ ਨਾਪਜ੍ਜਤੀਤਿ ਵੇਦਿਤਬ੍ਬਂ. ਰੂਪੀਬ੍ਰਹ੍ਮਾਨਂ ਪਨ ਵਿਕ੍ਖਮ੍ਭਿਤਕਾਮਰਾਗੇਨ ਜਨਿਤਤ੍ਤਾ ਅਨਾਹਾਰੂਪਜੀਵਿਤਤ੍ਤਾ ਚ ਸਬ੍ਬਥਾ ਸੁਕ੍ਕਧਾਤੁਪਿ ਨਤ੍ਥੇਵ. ਤਥੇਵਾਤਿ ਮੋਚਨਸ੍ਸਾਦੇਨ ਨਿਮਿਤ੍ਤੇ ਉਪਕ੍ਕਮਤੋਤਿਆਦਿਂ ਅਤਿਦਿਸਤਿ. ‘‘ਵਿਸ੍ਸਟ੍ਠੀਤਿ ਠਾਨਾਚਾਵਨਾ ਵੁਚ੍ਚਤੀ’’ਤਿ ਪਦਭਾਜਨੇ (ਪਾਰਾ. ੨੩੭) ਵੁਤ੍ਤਤ੍ਤਾ ‘‘ਦਕਸੋਤਂ ਓਤਿਣ੍ਣਮਤ੍ਤੇ’’ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ਦਕਸੋਤੋਰੋਹਣਞ੍ਚੇਤ੍ਥਾਤਿਆਦਿ. ਏਤ੍ਥਾਤਿ ਤੀਸੁਪਿ ਵਾਦੇਸੁ. ਅਧਿਵਾਸੇਤ੍ਵਾਤਿ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਪੁਨ ਵਿਪ੍ਪਟਿਸਾਰੇ ਉਪ੍ਪਨ੍ਨੇ ਮੋਚਨਸ੍ਸਾਦਂ ਵਿਨੋਦੇਤ੍ਵਾ. ਅਨ੍ਤਰਾ ਨਿਵਾਰੇਤੁਨ੍ਤਿ ਅਤ੍ਤਨੋ ਨਿਮਿਤ੍ਤੇ ਕਤੂਪਕ੍ਕਮੇਨ ਠਾਨਾ ਚੁਤਂ ਦਕਸੋਤਂ ਓਤਰਿਤੁਂ ਅਦਤ੍ਵਾ ਅਨ੍ਤਰਾ ਨਿਵਾਰੇਤੁਂ. ਮੋਚਨਸ੍ਸਾਦੇਨ ਹਤ੍ਥਪਰਿਕਮ੍ਮਾਦਿਂ ਕਰੋਨ੍ਤਸ੍ਸ ਮੁਤ੍ਤੇਪਿ ਦੁਕ੍ਕਟਮੇਵ, ਨਿਮਿਤ੍ਤੇ ਉਪਕ੍ਕਮਾਭਾਵਤੋ ਪਨ ਸਙ੍ਘਾਦਿਸੇਸੋ ਨ ਹੋਤੀਤਿ ਆਹ ‘‘ਹਤ੍ਥ…ਪੇ… ਅਨਾਪਤ੍ਤੀ’’ਤਿ. ਦਕਸੋਤੋਰੋਹਣਞ੍ਚੇਤ੍ਥਾਤਿਆਦਿਨਾ ਵੁਤ੍ਤਵਿਨਿਚ੍ਛਯਂ ਸਨ੍ਧਾਯ ‘‘ਅਯਂ ਸਬ੍ਬਾਚਰਿਯਸਾਧਾਰਣਵਿਨਿਚ੍ਛਯੋ’’ਤਿ ਵੁਤ੍ਤਂ.

ਖੋਭਕਰਣਪਚ੍ਚਯੋ ਨਾਮ ਵਿਸਭਾਗਭੇਸਜ੍ਜਸੇਨਾਸਨਾਹਾਰਾਦਿਪਚ੍ਚਯੋ. ਨਾਨਾਵਿਧਂ ਸੁਪਿਨਨ੍ਤਿ ਖੁਭਿਤਵਾਤਾਦਿਧਾਤੂਨਂ ਅਨੁਗੁਣਂ. ਅਨੁਭੂਤਪੁਬ੍ਬਨ੍ਤਿ ਪੁਬ੍ਬੇ ਭੂਤਪੁਬ੍ਬਂ ਮਨਸਾ ਪਰਿਕਪ੍ਪਿਤਪੁਬ੍ਬਞ੍ਚ. ਸਗ੍ਗਨਰਕਦੇਸਨ੍ਤਰਾਦੀਨਮ੍ਪਿ ਹਿ ਸਙ੍ਗਹੇਤ੍ਵਾ ਵੁਤ੍ਤਂ. ਅਤ੍ਥਕਾਮਤਾਯ ਵਾ ਅਨਤ੍ਥਕਾਮਤਾਯ ਵਾਤਿ ਇਦਂ ਦੇਵਤਾਨਂ ਹਿਤਾਹਿਤਾਧਿਪ੍ਪਾਯਤਂ ਦਸ੍ਸੇਤੁਂ ਵੁਤ੍ਤਂ. ਅਤ੍ਥਾਯ ਵਾ ਅਨਤ੍ਥਾਯ ਵਾਤਿ ਸਭਾਵਤੋ ਭਵਿਤਬ੍ਬਂ ਹਿਤਾਹਿਤਂ ਸਨ੍ਧਾਯ ਵੁਤ੍ਤਂ. ਨਨੁ ਦੇਵਤਾਹਿ ਉਪਸਂਹਰਿਯਮਾਨਾਨਿ ਆਰਮ੍ਮਣਾਨਿ ਪਰਮਤ੍ਥਤੋ ਨਤ੍ਥਿ, ਕਥਂ ਤਾਨਿ ਪੁਰਿਸੋ ਪਸ੍ਸਤਿ, ਦੇਵਤਾ ਵਾ ਤਾਨਿ ਅਵਿਜ੍ਜਮਾਨਾਨਿ ਉਪਸਂਹਰਨ੍ਤੀਤਿ ਚੋਦਨਂ ਮਨਸਿ ਕਤ੍ਵਾ ਆਹ ਸੋ ਤਾਸਨ੍ਤਿਆਦਿ. ਤੇਨ ‘‘ਏਵਮੇਸੋ ਪਰਿਕਪ੍ਪਤੂ’’ਤਿ ਦੇਵਤਾਹਿ ਚਿਨ੍ਤਿਤਮਤ੍ਤੇਨ ਸੁਪਨ੍ਤਸ੍ਸ ਚਿਤ੍ਤਂ ਭਵਙ੍ਗਸਨ੍ਤਤਿਤੋ ਨਿਪਤਿਤ੍ਵਾ ਦੇਵਤਾਹਿ ਚਿਨ੍ਤਿਤਨਿਯਾਮੇਨੇਵ ਪਰਿਕਪ੍ਪਮਾਨਂ ਪਵਤ੍ਤਤਿ, ਏਵਂ ਤੇਨ ਪਰਿਕਪ੍ਪਮਾਨਾਨਿ ਆਰਮ੍ਮਣਾਨਿ ਦੇਵਤਾਹਿ ਉਪਸਂਹਟਾਨਿ ਨਾਮ ਹੋਨ੍ਤਿ, ਤਾਨਿ ਚ ਸੋ ਦੇਵਤਾਨੁਭਾਵੇਨ ਪਸ੍ਸਤਿ ਨਾਮਾਤਿ ਦਸ੍ਸੇਤਿ. ਬੋਧਿਸਤ੍ਤਮਾਤਾ ਵਿਯ ਪੁਤ੍ਤਪਟਿਲਾਭਨਿਮਿਤ੍ਤਨ੍ਤਿਆਦੀਸੁ ਬੋਧਿਸਤ੍ਤਸ੍ਸ ਗਬ੍ਭੋਕ੍ਕਨ੍ਤਿਦਿਵਸੇ ਮਹਾਮਾਯਾਦੇਵਿਯਾ ਅਤ੍ਤਨੋ ਦਕ੍ਖਿਣਪਸ੍ਸੇਨ ਏਕਸ੍ਸ ਸੇਤਵਰਵਾਰਣਸ੍ਸ ਅਨ੍ਤੋਕੁਚ੍ਛਿਪਵਿਟ੍ਠਭਾਵਦਸ੍ਸਨਂ ਪੁਤ੍ਤਪਟਿਲਾਭਨਿਮਿਤ੍ਤਂ ਸੁਪਿਨਂ ਨਾਮ. ਅਮ੍ਹਾਕਂ ਪਨ ਬੋਧਿਸਤ੍ਤਸ੍ਸ ‘‘ਸ੍ਵੇ ਬੁਦ੍ਧੋ ਭਵਿਸ੍ਸਤੀ’’ਤਿ ਚਾਤੁਦ੍ਦਸਿਯਂ ਪਕ੍ਖਸ੍ਸ ਰਤ੍ਤਿਵਿਭਾਯਨਕਾਲੇ ਹਿਮਵਨ੍ਤਂ ਬਿਬ੍ਬੋਹਨਂ ਕਤ੍ਵਾ ਪੁਰਤ੍ਥਿਮਪਚ੍ਛਿਮਸਮੁਦ੍ਦੇਸੁ ਵਾਮਦਕ੍ਖਿਣਹਤ੍ਥੇ ਦਕ੍ਖਿਣਸਮੁਦ੍ਦੇ ਪਾਦੇ ਚ ਓਦਹਿਤ੍ਵਾ ਮਹਾਪਥਵਿਯਾ ਸਯਨਂ ਏਕੋ, ਦਬ੍ਬਤਿਣਸਙ੍ਖਾਤਾਯ ਤਿਰਿਯਾ ਨਾਮ ਤਿਣਜਾਤਿਯਾ ਨਙ੍ਗਲਮਤ੍ਤਰਤ੍ਤਦਣ੍ਡਾਯ ਨਾਭਿਤੋ ਉਗ੍ਗਤਾਯ ਖਣੇਨ ਅਨੇਕਯੋਜਨਸਹਸ੍ਸਂ ਨਭਂ ਆਹਚ੍ਚ ਠਾਨਂ ਏਕੋ, ਸੇਤਾਨਂ ਕਣ੍ਹਸੀਸਾਨਂ ਕਿਮੀਨਂ ਪਾਦੇਹਿ ਉਸ੍ਸਕ੍ਕਿਤ੍ਵਾ ਯਾਵ ਜਾਣੁਮਣ੍ਡਲਂ ਆਹਚ੍ਚ ਠਾਨਂ ਏਕੋ, ਨਾਨਾਵਣ੍ਣਾਨਂ ਚਤੁਨ੍ਨਂ ਸਕੁਣਾਨਂ ਚਤੂਹਿ ਦਿਸਾਹਿ ਆਗਨ੍ਤ੍ਵਾ ਪਾਦਮੂਲੇ ਸੇਤਵਣ੍ਣਤਾਪਜ੍ਜਨਂ ਏਕੋ, ਬੋਧਿਸਤ੍ਤਸ੍ਸ ਮਹਤੋ ਮੀਲ਼੍ਹਪਬ੍ਬਤਸ੍ਸ ਉਪਰਿ ਅਲਿਮ੍ਪਮਾਨਸ੍ਸ ਚਙ੍ਕਮਨਂ ਏਕੋਤਿ ਇਮੇ ਪਞ੍ਚ ਮਹਾਸੁਪਿਨਾ ਨਾਮ, ਇਮੇ ਚ ਯਥਾਕ੍ਕਮਂ ਸਮ੍ਬੋਧਿਯਾ, ਦੇਵਮਨੁਸ੍ਸੇਸੁ ਅਰਿਯਮਗ੍ਗਪ੍ਪਕਾਸਨਸ੍ਸ, ਗਿਹੀਨਞ੍ਚ ਸਰਣੂਪਗਮਨਸ੍ਸ, ਖਤ੍ਤਿਯਾਦਿਚਤੁਵਣ੍ਣਾਨਂ ਪਬ੍ਬਜਿਤ੍ਵਾ ਅਰਹਤ੍ਤਪਟਿਲਾਭਸ੍ਸ, ਚਤੁਨ੍ਨਂ ਪਚ੍ਚਯਾਨਂ ਲਾਭੇ ਅਲਿਤ੍ਤਭਾਵਸ੍ਸ ਚ ਪੁਬ੍ਬਨਿਮਿਤ੍ਤਾਨੀਤਿ ਵੇਦਿਤਬ੍ਬਂ. ਸੋਲ਼ਸ ਸੁਪਿਨਾ ਪਾਕਟਾ ਏਵ. ਏਕਨ੍ਤਸਚ੍ਚਮੇਵਾਤਿ ਫਲਨਿਯਮੁਪ੍ਪਤ੍ਤਿਤੋ ਵੁਤ੍ਤਂ. ਦਸ੍ਸਨਂ ਪਨ ਸਬ੍ਬਤ੍ਥ ਵਿਪਲ੍ਲਤ੍ਥਮੇਵ. ਧਾਤੁਕ੍ਖੋਭਾਦੀਸੁ ਚਤੂਸੁ ਮੂਲਕਾਰਣੇਸੁ ਦ੍ਵੀਹਿ ਤੀਹਿਪਿ ਕਾਰਣੇਹਿ ਕਦਾਚਿ ਸੁਪਿਨਂ ਪਸ੍ਸਨ੍ਤੀਤਿ ਆਹ ‘‘ਸਂਸਗ੍ਗਭੇਦਤੋ’’ਤਿ. ਸੁਪਿਨਭੇਦੋਤਿ ਸਚ੍ਚਾਸਚ੍ਚਤ੍ਥਤਾਭੇਦੋ.

ਰੂਪਨਿਮਿਤ੍ਤਾਦਿਆਰਮ੍ਮਣਨ੍ਤਿ ਏਤ੍ਥ ਕਮ੍ਮਨਿਮਿਤ੍ਤਗਤਿਨਿਮਿਤ੍ਤਤੋ ਅਞ੍ਞਰੂਪਮੇਵ ਵਿਞ੍ਞਾਣਸ੍ਸ ਨਿਮਿਤ੍ਤਨ੍ਤਿ ਰੂਪਨਿਮਿਤ੍ਤਂ, ਤਂ ਆਦਿ ਯੇਸਂ ਸਤ੍ਤਨਿਮਿਤ੍ਤਾਦੀਨਂ ਤਾਨਿ ਰੂਪਨਿਮਿਤ੍ਤਾਦੀਨਿ ਆਰਮ੍ਮਣਾਨਿ ਯਸ੍ਸ ਭਵਙ੍ਗਚਿਤ੍ਤਸ੍ਸ ਤਂ ਰੂਪਨਿਮਿਤ੍ਤਾਦਿਆਰਮ੍ਮਣਂ. ਈਦਿਸਾਨੀਤਿ ਰੂਪਨਿਮਿਤ੍ਤਾਦਿਆਰਮ੍ਮਣਾਨਿ ਰਾਗਾਦਿਸਮ੍ਪਯੁਤ੍ਤਾਨਿ ਚ. ਸਬ੍ਬੋਹਾਰਿਕਚਿਤ੍ਤੇਨਾਤਿ ਪਟਿਬੁਦ੍ਧਸ੍ਸ ਪਕਤਿਵੀਥਿਚਿਤ੍ਤੇਨ. ਕੋ ਨਾਮ ਪਸ੍ਸਤੀਤਿ ਸੁਤ੍ਤਪਟਿਬੁਦ੍ਧਭਾਵਵਿਯੁਤ੍ਤਾਯ ਚਿਤ੍ਤਪ੍ਪਵਤ੍ਤਿਯਾ ਅਭਾਵਤੋ ਸੁਪਿਨਂ ਪਸ੍ਸਨ੍ਤੋ ਨਾਮ ਨ ਸਿਯਾਤਿ ਅਧਿਪ੍ਪਾਯੋ, ਤੇਨਾਹ ‘‘ਸੁਪਿਨਸ੍ਸ ਅਭਾਵੋਵ ਆਪਜ੍ਜਤੀ’’ਤਿ. ਕਪਿਮਿਦ੍ਧਪਰੇਤੋਤਿ ਇਮਿਨਾ ਨਿਦ੍ਦਾਵਸੇਨ ਪਵਤ੍ਤਮਾਨਭਵਙ੍ਗਸਨ੍ਤਤਿਬ੍ਯਵਹਿਤਾਯ ਕੁਸਲਾਕੁਸਲਾਯ ਮਨੋਦ੍ਵਾਰਵੀਥਿਯਾ ਚ ਪਸ੍ਸਤੀਤਿ ਦਸ੍ਸੇਤਿ, ਤੇਨਾਹ ਯਾ ਨਿਦ੍ਦਾਤਿਆਦਿ. ਦ੍ਵੀਹਿ ਅਨ੍ਤੇਹਿ ਮੁਤ੍ਤੋਤਿ ਕੁਸਲਾਕੁਸਲਸਙ੍ਖਾਤੇਹਿ ਦ੍ਵੀਹਿ ਅਨ੍ਤੇਹਿ ਮੁਤ੍ਤੋ. ਆਵਜ੍ਜਨਤਦਾਰਮ੍ਮਣਕ੍ਖਣੇਤਿ ਸੁਪਿਨੇ ਪਞ੍ਚਦ੍ਵਾਰਵੀਥਿਯਾ ਅਭਾਵਤੋ ਮਨੋਦ੍ਵਾਰੇ ਉਪ੍ਪਜ੍ਜਨਾਰਹਂ ਗਹੇਤ੍ਵਾ ਵੁਤ੍ਤਂ.

ਏਤ੍ਥ ਚ ਸੁਪਿਨਨ੍ਤੇਪਿ ਤਦਾਰਮ੍ਮਣਵਚਨਤੋ ਅਨੁਭੂਤੇਸੁ ਸੁਤਪੁਬ੍ਬੇਸੁ ਵਾ ਰੂਪਾਦੀਸੁ ਪੁਰਾਪਤ੍ਤਿਭਾਵੇਨ ਪਰਿਕਪ੍ਪੇਤ੍ਵਾ ਵਿਪਲ੍ਲਾਸਤੋ ਪਵਤ੍ਤਮਾਨਾਪਿ ਕਾਮਾਵਚਰਵਿਪਾਕਧਮ੍ਮਾ ਪਰਿਤ੍ਤਧਮ੍ਮੇ ਨਿਸ੍ਸਾਯ ਪਰਿਕਪ੍ਪੇਤ੍ਵਾ ਪਵਤ੍ਤਤ੍ਤਾ ਪਰਿਤ੍ਤਾਰਮ੍ਮਣਾ ਵੁਤ੍ਤਾ, ਨ ਪਨ ਸਰੂਪਤੋ ਪਰਿਤ੍ਤਧਮ੍ਮੇ ਗਹੇਤ੍ਵਾ ਪਵਤ੍ਤਤ੍ਤਾ ਏਵਾਤਿ ਗਹੇਤਬ੍ਬਂ. ਏਵਞ੍ਚ ਇਤ੍ਥਿਪੁਰਿਸਾਦਿਆਕਾਰਂ ਆਰੋਪੇਤ੍ਵਾ ਪਵਤ੍ਤਮਾਨਾਨਂ ਰਾਗਾਦਿਸਵਿਪਾਕਧਮ੍ਮਾਨਮ੍ਪਿ ਤੇਸਂ ਆਰਮ੍ਮਣਂ ਗਹੇਤ੍ਵਾ ਉਪ੍ਪਨ੍ਨਾਨਂ ਪਟਿਸਨ੍ਧਾਦਿਵਿਪਾਕਾਨਮ੍ਪਿ ਪਰਿਤ੍ਤਾਰਮ੍ਮਣਤਾ ਕਮ੍ਮਨਿਮਿਤ੍ਤਾਰਮ੍ਮਣਤਾ ਚ ਉਪਪਨ੍ਨਾ ਏਵ ਹੋਤਿ. ਵਤ੍ਥੁਧਮ੍ਮਵਿਨਿਮੁਤ੍ਤਂ ਪਨ ਸਮ੍ਮੁਤਿਭੂਤਂ ਕਸਿਣਾਦਿਪਟਿਭਾਗਾਰਮ੍ਮਣਂ ਗਹੇਤ੍ਵਾ ਉਪ੍ਪਨ੍ਨਾ ਉਪਚਾਰਪ੍ਪਨਾਦਿਵਸਪ੍ਪਵਤ੍ਤਾ ਚਿਤ੍ਤਚੇਤਸਿਕਧਮ੍ਮਾ ਏਵ ਪਰਿਤ੍ਤਤ੍ਤਿਕੇ (ਧ. ਸ. ਤਿਕਮਾਤਿਕਾ ੧੨) ਨ ਵਤ੍ਤਬ੍ਬਾਰਮ੍ਮਣਾਤਿ ਗਹੇਤਬ੍ਬਾ.

ਸ੍ਵਾਯਨ੍ਤਿ ਸੁਪਿਨੋ. ਵਿਪਲ੍ਲਾਸੇਨ ਪਰਿਕਪ੍ਪਿਤਪਰਿਤ੍ਤਾਰਮ੍ਮਣਤ੍ਤਾ ‘‘ਦੁਬ੍ਬਲਵਤ੍ਥੁਕਤ੍ਤਾ’’ਤਿ ਵੁਤ੍ਤਂ, ਅਵਿਜ੍ਜਮਾਨਾਰਮ੍ਮਣੇ ਅਵਸਵਤ੍ਤਿਤੋਤਿ ਅਧਿਪ੍ਪਾਯੋ, ਤੇਨਾਹ ਅਵਿਸਯੇ ਉਪ੍ਪਨ੍ਨਤ੍ਤਾਤਿਆਦਿ.

ਆਪਤ੍ਤਿਨਿਕਾਯਸ੍ਸਾਤਿ ਇਦਂ ਸਙ੍ਘਾਦਿਸੇਸੋਤਿ ਪੁਲ੍ਲਿਙ੍ਗ-ਸਦ੍ਦਸ੍ਸ ਅਨੁਰੂਪਵਸੇਨ ਵੁਤ੍ਤਂ. ਅਸ੍ਸਾਤਿ ਅਸ੍ਸ ਆਪਤ੍ਤਿਨਿਕਾਯਸ੍ਸ, ਵੁਟ੍ਠਾਪੇਤੁਂ ਇਚ੍ਛਿਤਸ੍ਸਾਤਿ ਅਤ੍ਥੋ, ਤੇਨਾਹ ਕਿਂ ਵੁਤ੍ਤਨ੍ਤਿਆਦਿ. ਰੁਲ਼੍ਹਿਸਦ੍ਦੇਨਾਤਿ ਏਤ੍ਥ ਸਮੁਦਾਯੇ ਨਿਪ੍ਫਨ੍ਨਸ੍ਸਾਪਿ ਸਦ੍ਦਸ੍ਸ ਤਦੇਕਦੇਸੇਪਿ ਪਸਿਦ੍ਧਿ ਇਧ ਰੁਲ਼੍ਹੀ ਨਾਮ, ਤਾਯ ਰੁਲ਼੍ਹਿਯਾ ਯੁਤ੍ਤੋ ਸਦ੍ਦੋ ਰੁਲ਼੍ਹੀਸਦ੍ਦੋ, ਤੇਨ. ਰੁਲ਼੍ਹਿਯਾ ਕਾਰਣਮਾਹ ਅਵਯਵੇਇਚ੍ਚਾਦਿਨਾ.

ਕਾਲਞ੍ਚਾਤਿ ‘‘ਰਾਗੂਪਤ੍ਥਮ੍ਭੇ’’ਤਿਆਦਿਨਾ ਦਸ੍ਸਿਤਕਾਲਞ੍ਚ, ‘‘ਰਾਗੂਪਤ੍ਥਮ੍ਭੇ’’ਤਿ ਵੁਤ੍ਤੇ ਰਾਗੂਪਤ੍ਥਮ੍ਭੇ ਜਾਤੇ ਤਸ੍ਮਿਂ ਕਾਲੇ ਮੋਚੇਤੀਤਿ ਅਤ੍ਥਤੋ ਕਾਲੋ ਗਮ੍ਮਤਿ. ਨਵਮਸ੍ਸ ਅਧਿਪ੍ਪਾਯਸ੍ਸਾਤਿ ਵੀਮਂਸਾਧਿਪ੍ਪਾਯਸ੍ਸ. ਵਤ੍ਥੂਤਿ ਵਿਸਯਂ.

੨੩੮. ਲੋਮਾ ਏਤੇਸਂ ਸਨ੍ਤੀਤਿ ਲੋਮਸਾ, ਬਹੁਲੋਮਪਾਣਕਾ.

੨੩੯. ਮੋਚਨੇਨਾਤਿ ਮੋਚਨਪ੍ਪਯੋਗੇਨ. ਮੋਚਨਸ੍ਸਾਦਸਮ੍ਪਯੁਤ੍ਤਾਯਾਤਿ ਏਤ੍ਥ ਮੋਚਨਿਚ੍ਛਾਵ ਮੋਚਨਸ੍ਸਾਦੋ, ਤੇਨ ਸਮ੍ਪਯੁਤ੍ਤਾ ਚੇਤਨਾ ਮੋਚਨਸ੍ਸਾਦਚੇਤਨਾਤਿ ਅਤ੍ਥੋ, ਨ ਪਨ ਮੋਚਨੇ ਅਸ੍ਸਾਦਂ ਸੁਖਂ ਪਤ੍ਥੇਨ੍ਤਿਯਾ ਚੇਤਨਾਯਾਤਿ ਏਵਂ ਅਤ੍ਥੋ ਗਹੇਤਬ੍ਬੋ, ਇਤਰਥਾ ਸੁਖਤ੍ਥਾਯ ਮੋਚੇਨ੍ਤਸ੍ਸੇਵ ਆਪਤ੍ਤਿ, ਨ ਆਰੋਗ੍ਯਾਦਿਅਤ੍ਥਾਯਾਤਿ ਆਪਜ੍ਜਤਿ. ਤਸ੍ਮਾ ਆਰੋਗ੍ਯਾਦੀਸੁ ਯੇਨ ਕੇਨਚਿ ਅਧਿਪ੍ਪਾਯੇਨ ਮੋਚਨਿਚ੍ਛਾਯ ਚੇਤਨਾਯਾਤਿ ਅਤ੍ਥੋਵ ਗਹੇਤਬ੍ਬੋ.

੨੪੦. ਵਾਯਮਤੋਤਿ ਅਙ੍ਗਜਾਤੇ ਕਾਯੇਨ ਉਪਕ੍ਕਮਤੋ. ਦ੍ਵੇ ਆਪਤ੍ਤਿਸਹਸ੍ਸਾਨੀਤਿ ਖਣ੍ਡਚਕ੍ਕਾਦੀਨਿ ਅਨਾਮਸਿਤ੍ਵਾਵ ਵੁਤ੍ਤਂ, ਇਚ੍ਛਨ੍ਤੇਨ ਪਨ ਖਣ੍ਡਚਕ੍ਕਾਦਿਭੇਦੇਨਾਪਿ ਗਣਨਾ ਕਾਤਬ੍ਬਾ. ਏਕੇਨ ਪਦੇਨਾਤਿ ਗੇਹਸਿਤਪੇਮਪਦੇਨ. ਤਥੇਵਾਤਿ ਮੋਚਨਸ੍ਸਾਦਚੇਤਨਾਯ ਏਵ ਗਾਲ਼੍ਹਂ ਪੀਲ਼ਨਾਦਿਪ੍ਪਯੋਗਂ ਅਵਿਜਹਿਤ੍ਵਾ ਸੁਪਨੇਨ ਸਙ੍ਘਾਦਿਸੇਸੋਤਿ ਵੁਤ੍ਤਂ. ਸੁਦ੍ਧਚਿਤ੍ਤੋਤਿ ਮੋਚਨਸ੍ਸਾਦਸ੍ਸ ਨਿਮਿਤ੍ਤੇ ਊਰੁਆਦੀਹਿ ਕਤਉਪਕ੍ਕਮਸ੍ਸ ਵਿਜਹਨਂ ਸਨ੍ਧਾਯ ਵੁਤ੍ਤਂ. ਤੇਨ ਅਸੁਭਮਨਸਿਕਾਰਾਭਾਵੇਪਿ ਪਯੋਗਾਭਾਵੇਨੇਵ ਮੋਚਨੇਪਿ ਅਨਾਪਤ੍ਤਿ ਦੀਪਿਤਾਤਿ ਵੇਦਿਤਬ੍ਬਾ.

ਤੇਨ ਉਪਕ੍ਕਮੇਨ ਮੁਤ੍ਤੇਤਿ ਮੁਚ੍ਚਮਾਨਂ ਵਿਨਾ ਅਞ੍ਞਸ੍ਮਿਮ੍ਪਿ ਸੁਕ੍ਕੇ ਠਾਨਤੋ ਮੁਤ੍ਤੇ. ਯਦਿ ਪਨ ਉਪਕ੍ਕਮੇ ਕਤੇਪਿ ਮੁਚ੍ਚਮਾਨਮੇਵ ਦਕਸੋਤਂ ਓਤਰਤਿ, ਥੁਲ੍ਲਚ੍ਚਯਮੇਵ ਪਯੋਗੇਨ ਮੁਤ੍ਤਸ੍ਸ ਅਭਾਵਾ. ਜਗ੍ਗਨਤ੍ਥਾਯਾਤਿ ਚੀਵਰਾਦੀਸੁ ਲਿਮ੍ਪਨਪਰਿਹਾਰਾਯ ਹਤ੍ਥੇਨ ਅਙ੍ਗਜਾਤਗ੍ਗਹਣਂ ਵਟ੍ਟਤਿ, ਤਪ੍ਪਯੋਗੋ ਨ ਹੋਤੀਤਿ ਅਧਿਪ੍ਪਾਯੋ. ਅਨੋਕਾਸਨ੍ਤਿ ਅਙ੍ਗਜਾਤਪ੍ਪਦੇਸਂ.

੨੬੨. ਸੁਪਿਨਨ੍ਤੇਨ ਕਾਰਣੇਨਾਤਿ ਸੁਪਿਨਨ੍ਤੇ ਪਵਤ੍ਤਉਪਕ੍ਕਮਹੇਤੁਨਾ. ਆਪਤ੍ਤਿਟ੍ਠਾਨੇਯੇਵ ਹਿ ਅਯਂ ਅਨਾਪਤ੍ਤਿ ਅਵਿਸਯਤ੍ਤਾ ਵੁਤ੍ਤਾ. ਤੇਨਾਹ ‘‘ਸਚਸ੍ਸ ਵਿਸਯੋ ਹੋਤਿ ਨਿਚ੍ਚਲੇਨ ਭਵਿਤਬ੍ਬ’’ਨ੍ਤਿਆਦਿ.

੨੬੩. ਵਿਨੀਤਵਤ੍ਥੁਪਾਲ਼ਿਯਂ ਅਣ੍ਡਕਣ੍ਡੁਵਨਵਤ੍ਥੁਸ੍ਮਿਂ ਮੋਚਨਾਧਿਪ੍ਪਾਯੇਨ ਅਣ੍ਡਚਲਨੇਨ ਅਙ੍ਗਜਾਤਸ੍ਸਾਪਿ ਚਲਨਤੋ ਨਿਮਿਤ੍ਤੇ ਉਪਕ੍ਕਮੋ ਹੋਤੀਤਿ ਸਙ੍ਘਾਦਿਸੇਸੋ ਵੁਤ੍ਤੋ. ਯਥਾ ਪਨ ਅਙ੍ਗਜਾਤਂ ਨ ਚਲਤਿ, ਏਵਂ ਅਣ੍ਡਮੇਵ ਕਣ੍ਡੁਵਨੇਨ ਫੁਸਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ ਅਣ੍ਡਸ੍ਸ ਅਨਙ੍ਗਜਾਤਤ੍ਤਾ.

੨੬੪. ਵਤ੍ਥਿਨ੍ਤਿ ਅਙ੍ਗਜਾਤਸੀਸਚ੍ਛਾਦਕਚਮ੍ਮਂ. ਉਦਰਂ ਤਾਪੇਨ੍ਤਸ੍ਸ…ਪੇ… ਅਨਾਪਤ੍ਤਿਯੇਵਾਤਿ ਉਦਰਤਾਪਨੇਨ ਅਙ੍ਗਜਾਤੇਪਿ ਤਤ੍ਤੇ ਤਾਵਤ੍ਤਕੇਨ ਨਿਮਿਤ੍ਤੇ ਉਪਕ੍ਕਮੋ ਕਤੋ ਨਾਮ ਨ ਹੋਤੀਤਿ ਵੁਤ੍ਤਂ.

੨੬੫. ਏਹਿ ਮੇ ਤ੍ਵਂ, ਆਵੁਸੋ, ਸਾਮਣੇਰਾਤਿ ਵਤ੍ਥੁਸ੍ਮਿਂ ਅਞ੍ਞਂ ਆਣਾਪੇਤੁ, ਤੇਨ ਕਰਿਯਮਾਨਸ੍ਸ ਅਙ੍ਗਜਾਤਚਲਨਸ੍ਸ ਮੋਚਨਸ੍ਸਾਦੇਨ ਸਾਦਿਯਨਤੋ ਤਂ ਚਲਨਂ ਭਿਕ੍ਖੁਸ੍ਸ ਸਾਦਿਯਨਚਿਤ੍ਤਸਮੁਟ੍ਠਿਤਮ੍ਪਿ ਹੋਤੀਤਿ ਸੁਕ੍ਕਵਿਸ੍ਸਟ੍ਠਿਪਚ੍ਚਯਸ੍ਸ ਅਙ੍ਗਜਾਤਚਲਨਸ੍ਸ ਹੇਤੁਭੂਤਾ ਅਸ੍ਸਾਦਚੇਤਨਾਵ ਆਪਤ੍ਤਿਯਾ ਅਙ੍ਗਂ ਹੋਤਿ, ਨ ਆਣਾਪਨਵਾਚਾ ਤਸ੍ਸਾ ਪਵਤ੍ਤਿਕ੍ਖਣੇ ਸਙ੍ਘਾਦਿਸੇਸਸ੍ਸ ਅਸਿਜ੍ਝਨਤੋ. ਏਵਂ ਆਣਾਪੇਤ੍ਵਾਪਿ ਯੋਨਿਸੋਮਨਸਿਕਾਰੇਨ ਮੋਚਨਸ੍ਸਾਦਂ ਪਟਿਵਿਨੋਦੇਨ੍ਤਸ੍ਸ ਆਪਤ੍ਤਿਅਸਮ੍ਭਵਤੋ ਇਦਂ ਸਿਕ੍ਖਾਪਦਂ ਅਨਾਣਤ੍ਤਿਕਂ, ਕਾਯਕਮ੍ਮਂ, ਕਿਰਿਯਸਮੁਟ੍ਠਾਨਞ੍ਚ ਜਾਤਨ੍ਤਿ ਗਹੇਤਬ੍ਬਂ, ਆਣਾਪਨਵਾਚਾਯ ਪਨ ਦੁਕ੍ਕਟਂ ਆਪਜ੍ਜਤਿ. ਯੋ ਪਨ ਪਰੇਨ ਅਨਾਣਤ੍ਤੇਨ ਬਲਕ੍ਕਾਰੇਨਾਪਿ ਕਰਿਯਮਾਨਪ੍ਪਯੋਗਂ ਮੋਚਨਸ੍ਸਾਦੇਨ ਸਾਦਿਯਤਿ, ਤਸ੍ਸਾਪਿ ਮੁਤ੍ਤੇ ਪਠਮਪਾਰਾਜਿਕੇ ਵਿਯ ਸਙ੍ਘਾਦਿਸੇਸੋਵ, ਅਮੁਤ੍ਤੇ ਥੁਲ੍ਲਚ੍ਚਯਂ. ਮੋਚਨਸ੍ਸਾਦੇ ਚੇਤਨਾਯ ਪਨ ਅਸਤਿ ਕਾਯਸਂਸਗ੍ਗਰਾਗੇਨ ਸਾਦਿਯਨ੍ਤਸ੍ਸਾਪਿ ਮੁਤ੍ਤੇਪਿ ਸਙ੍ਘਾਦਿਸੇਸੇਨ ਅਨਾਪਤ੍ਤੀਤਿ ਆਚਰਿਯਾ ਵਦਨ੍ਤਿ, ਤਞ੍ਚ ਯੁਤ੍ਤਮੇਵ.

੨੬੬. ਕਾਯਤ੍ਥਮ੍ਭਨਵਤ੍ਥੁਸ੍ਮਿਂ ਚਲਨਵਸੇਨ ਯਥਾ ਅਙ੍ਗਜਾਤੇ ਉਪਕ੍ਕਮੋ ਸਮ੍ਭਵਤਿ, ਤਥਾ ਵਿਜਮ੍ਭਿਤਤ੍ਤਾ ਆਪਤ੍ਤਿ ਵੁਤ੍ਤਾ.

ਉਪਨਿਜ੍ਝਾਯਨਵਤ੍ਥੁਸ੍ਮਿਂ ਅਙ੍ਗਜਾਤਨ੍ਤਿ ਜੀਵਮਾਨਇਤ੍ਥੀਨਂ ਪਸ੍ਸਾਵਮਗ੍ਗੋਵ ਅਧਿਪ੍ਪੇਤੋ, ਨੇਤਰੋ.

੨੬੭. ਪੁਪ੍ਫਾਵਲੀਤਿ ਕੀਲ਼ਾਵਿਸੇਸੋ. ਤਂ ਕਿਰ ਕੀਲ਼ਨ੍ਤਾ ਨਦੀਆਦੀਸੁ ਛਿਨ੍ਨਤਟਂ ਉਦਕੇਨ ਚਿਕ੍ਖਲ੍ਲਂ ਕਤ੍ਵਾ ਤਤ੍ਥ ਉਭੋ ਪਾਦੇ ਪਸਾਰੇਤ੍ਵਾ ਨਿਸਿਨ੍ਨਾ ਪਤਨ੍ਤਿ, ‘‘ਪੁਪ੍ਫਾਵਲਿਯ’’ਨ੍ਤਿਪਿ ਪਾਠੋ. ਪਵੇਸੇਨ੍ਤਸ੍ਸਾਤਿ ਪਯੋਜਕਤ੍ਤੇਨ ਦ੍ਵਿਕਮ੍ਮਿਕਤ੍ਤਾ ‘‘ਵਾਲਿਕਂ ਅਙ੍ਗਜਾਤ’’ਨ੍ਤਿ ਉਭਯਤ੍ਥਾਪਿ ਉਪਯੋਗਵਚਨਂ ਕਤਂ. ਚੇਤਨਾ, ਉਪਕ੍ਕਮੋ, ਮੁਚ੍ਚਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ ਵੇਦਿਤਬ੍ਬਾਨਿ.

ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ

੨੬੯. ਦੁਤਿਯੇ ਕੇਸੁਚਿ ਵਾਤਪਾਨੇਸੁ ਵਿਵਟੇਸੁ ਬਹਿਪਿ ਅਨ੍ਧਕਾਰਤ੍ਤਾ ਆਲੋਕੋ ਨ ਪਵਿਸਤਿ, ਵਿਵਟਕਵਾਟੇਨ ਅਞ੍ਞਤੋ ਆਗਚ੍ਛਨ੍ਤਸ੍ਸ ਆਲੋਕਸ੍ਸ ਨਿਵਾਰਣਤੋ ਕਵਾਟਸ੍ਸ ਪਿਟ੍ਠਿਪਸ੍ਸੇ ਘਨਨ੍ਧਕਾਰੋਵ ਹੋਤਿ, ਤਾਦਿਸਾਨਿ ਸਨ੍ਧਾਯ ‘‘ਯੇਸੁ ਵਿਵਟੇਸੁ ਅਨ੍ਧਕਾਰੋ ਹੋਤੀ’’ਤਿਆਦਿ ਵੁਤ੍ਤਂ.

ਬ੍ਰਾਹ੍ਮਣੀ ਅਤ੍ਤਨੋ ਅਙ੍ਗਮਙ੍ਗਾਨਂ ਪਰਾਮਸਨਕ੍ਖਣੇ ਅਨਾਚਾਰਾਨੁਕੂਲਾ ਹੁਤ੍ਵਾ ਨ ਕਿਞ੍ਚਿ ਵਤ੍ਵਾ ਭਿਕ੍ਖੁਨੋ ਵਣ੍ਣਭਣਨਕ੍ਖਣੇ ਵੁਤ੍ਤਤ੍ਤਾ ਆਹ ‘‘ਪਬ੍ਬਜਿਤੁਕਾਮੋ ਮਞ੍ਞੇਤਿ ਸਲ੍ਲਕ੍ਖੇਤ੍ਵਾ’’ਤਿ, ਪਬ੍ਬਜਿਤੁਕਾਮੋ ਵਿਯਾਤਿ ਸਲ੍ਲਕ੍ਖੇਤ੍ਵਾਤਿ ਅਤ੍ਥੋ. ਕੁਲਿਤ੍ਥੀਨਂ ਏਵਂ ਪਰੇਹਿ ਅਭਿਭਵਨਂ ਨਾਮ ਅਚ੍ਚਨ੍ਤਾਵਮਾਨੋਤਿ ਆਹ ‘‘ਅਤ੍ਤਨੋ ਵਿਪ੍ਪਕਾਰ’’ਨ੍ਤਿ.

੨੭੦. ਓਤਿਣ੍ਣਸਦ੍ਦਸ੍ਸ ਕਮ੍ਮਸਾਧਨਪਕ੍ਖਂ ਸਨ੍ਧਾਯ ‘‘ਯਕ੍ਖਾਦੀਹੀ’’ਤਿਆਦਿ ਵੁਤ੍ਤਂ, ਕਤ੍ਤੁਸਾਧਨਪਕ੍ਖਂ ਸਨ੍ਧਾਯ ‘‘ਕੂਪਾਦੀਨੀ’’ਤਿਆਦਿ ਵੁਤ੍ਤਂ. ਤਸ੍ਮਿਂ ਵਤ੍ਥੁਸ੍ਮਿਨ੍ਤਿ ਇਤ੍ਥਿਸਰੀਰਸਙ੍ਖਾਤੇ ਵਤ੍ਥੁਸ੍ਮਿਂ.

੨੭੧. ਅਸ੍ਸਾਤਿ ਹਤ੍ਥਗ੍ਗਾਹਾਦਿਕਸ੍ਸ ਸਬ੍ਬਸ੍ਸ.

੨੭੩. ਏਤੇਸਂ ਪਦਾਨਨ੍ਤਿ ਆਮਸਨਾਦਿਪਦਾਨਂ. ਇਤ੍ਥਿਸਞ੍ਞੀਤਿ ਮਨੁਸ੍ਸਿਤ੍ਥਿਸਞ੍ਞੀ. ਨਂ-ਸਦ੍ਦਸ੍ਸ ਕਾਯਵਿਸੇਸਨਭਾਵੇਨ ਏਤਂ ਕਾਯਨ੍ਤਿ ਅਤ੍ਥਂ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਓਮਸਨ੍ਤੋ…ਪੇ… ਏਕਾਵ ਆਪਤ੍ਤੀਤਿ ਅਨਿਵਤ੍ਥਂ ਸਨ੍ਧਾਯ ਵੁਤ੍ਤਂ, ਨ ਨਿਵਤ੍ਥਂ. ਸਨਿਵਤ੍ਥਾਯ ਪਨ ਮਤ੍ਥਕਤੋ ਪਟ੍ਠਾਯ ਹਤ੍ਥਂ ਓਤਾਰੇਨ੍ਤਸ੍ਸ ਨਿਵਤ੍ਥਸਾਟਕੋਪਰਿ ਹਤ੍ਥੇ ਆਰੁਲ਼੍ਹੇ ਥੁਲ੍ਲਚ੍ਚਯਂ. ਸਾਟਕਤੋ ਹਤ੍ਥਂ ਓਤਾਰਾਪੇਤ੍ਵਾ ਜਙ੍ਘਤੋ ਪਟ੍ਠਾਯ ਓਮਸਨ੍ਤਸ੍ਸ ਪੁਨ ਸਙ੍ਘਾਦਿਸੇਸੋ.

ਯਥਾਨਿਦ੍ਦਿਟ੍ਠਨਿਦ੍ਦੇਸੇਤਿ ਯਥਾਵੁਤ੍ਤਕਾਯਸਂਸਗ੍ਗਨਿਦ੍ਦੇਸੇ. ਤੇਨਾਤਿ ਯੇਨ ਕਾਰਣੇਨ ਵਤ੍ਥੁਸਞ੍ਞਾਦਯੋ ਹੋਨ੍ਤਿ, ਤੇਨ ਕਾਰਣੇਨ. ਯਥਾਵੁਤ੍ਤਸਿਕ੍ਖਾਪਦਨਿਦ੍ਦੇਸੇ ਵੁਤ੍ਤਂ ਗਰੁਕਂ ਭਿਕ੍ਖੁਨੋ ਕਰੇਯ੍ਯ ਪਕਾਸੇਯ੍ਯਾਤਿ ਯੋਜਨਾ.

ਸਞ੍ਞਾਯ ਵਿਰਾਗਿਤਮ੍ਹੀਤਿ ਸਞ੍ਞਾਯ ਵਿਰਦ੍ਧਾਯ. ਇਦਂ ਨਾਮ ਵਤ੍ਥੁਨ੍ਤਿ ਇਮਸ੍ਮਿਂ ਸਿਕ੍ਖਾਪਦੇ ਆਗਤਂ, ਅਨਾਗਤਞ੍ਚ ਯਂ ਕਿਞ੍ਚਿ ਸਵਿਞ੍ਞਾਣਕਾਵਿਞ੍ਞਾਣਕਂ ਫੁਸਨ੍ਤਸ੍ਸ ਅਨਾਪਤ੍ਤਿਅਭਾਵਂ ਸਨ੍ਧਾਯ ਵੁਤ੍ਤਂ.

ਸਾਰਤ੍ਤਨ੍ਤਿ ਕਾਯਸਂਸਗ੍ਗਰਾਗੇਨੇਵ ਸਾਰਤ੍ਤਂ. ਵਿਰਤ੍ਤਨ੍ਤਿ ਕਾਯਸਂਸਗ੍ਗਰਾਗਰਹਿਤਂ ਮਾਤੁਆਦਿਂ ਸਨ੍ਧਾਯ ਵਦਤਿ. ਦੁਕ੍ਕਟਨ੍ਤਿ ਮਾਤੁਪੇਮਾਦਿਵਸੇਨ ਗਣ੍ਹਨ੍ਤਸ੍ਸ ਵਸੇਨ ਵੁਤ੍ਤਂ, ਵਿਰਤ੍ਤਮ੍ਪਿ ਇਤ੍ਥਿਂ ਕਾਯਸਂਸਗ੍ਗਰਾਗੇਨ ਗਣ੍ਹਨ੍ਤਸ੍ਸ ਪਨ ਸਙ੍ਘਾਦਿਸੇਸੋ ਏਵ. ਇਮਾਯ ਪਾਲ਼ਿਯਾ ਸਮੇਤੀਤਿ ਸਮ੍ਬਨ੍ਧੋ. ਕਥਂ ਸਮੇਤੀਤਿ ਚੇ? ਯਦਿ ਹਿ ‘‘ਇਤ੍ਥਿਯਾ ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇ ਇਤ੍ਥਿਸਞ੍ਞਾ ਵਿਰਾਗਿਤਾ ਭਵੇਯ੍ਯ. ਕਾਯਪ੍ਪਟਿਬਦ੍ਧਗ੍ਗਹਣੇਪਿ ਥੁਲ੍ਲਚ੍ਚਯੇਨਾਪਿ ਨ ਭਵਿਤਬ੍ਬਂ ਇਤ੍ਥਿਸਞ੍ਞਾਯ ਏਵ ਪਾਲ਼ਿਯਂ (ਪਾਰਾ. ੨੭੬) ਥੁਲ੍ਲਚ੍ਚਯਸ੍ਸ ਵੁਤ੍ਤਤ੍ਤਾ, ਤਸ੍ਮਾ ‘‘ਇਤ੍ਥਿਯਾ ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀਤਿ ਕਾਯਂ ਗਣ੍ਹਨ੍ਤਸ੍ਸ ਇਤ੍ਥਿਸਞ੍ਞਾ ਵਿਰਾਗਿਤਾ ਨਾਮ ਨ ਹੋਤੀਤਿ ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀਤਿ ਕਾਯਂ ਗਣ੍ਹਤੋ ਇਤ੍ਥਿਸਞ੍ਞਾਯ ਚੇਵ ਕਾਯਸਂਸਗ੍ਗਰਾਗਸ੍ਸ ਚ ਕਾਯਗ੍ਗਹਣਸ੍ਸ ਚ ਸਮ੍ਭਵਾ ਯਥਾਵਤ੍ਥੁਕਂ ਸਙ੍ਘਾਦਿਸੇਸਮੇਵ ਆਪਜ੍ਜਤੀ’’ਤਿ ਮਹਾਸੁਮਤ੍ਥੇਰੇਨ ਵੁਤ੍ਤਵਾਦੋਵ ਇਮਾਯ ਪਾਲ਼ਿਯਾ ਸਮੇਤਿ. ਅਟ੍ਠਕਥਾਯਞ੍ਹਿ ‘‘ਸਮ੍ਬਹੁਲਾ ਇਤ੍ਥਿਯੋ ਬਾਹਾਹਿ ਪਰਿਕ੍ਖਿਪਿਤ੍ਵਾ ਗਣ੍ਹਾਮੀ’’ਤਿ ਸਞ੍ਞਾਯ ਪਰਿਕ੍ਖਿਪਤੋ ਮਜ੍ਝਗਤਾਨਂ ਵਸੇਨ ਥੁਲ੍ਲਚ੍ਚਯਂ ਵੁਤ੍ਤਂ. ਨ ਹਿ ਤਸ੍ਸ ‘‘ਮਜ੍ਝਗਤਾ ਇਤ੍ਥਿਯੋ ਕਾਯਪ੍ਪਟਿਬਦ੍ਧੇਨ ਗਣ੍ਹਾਮੀ’’ਤਿ ਸਞ੍ਞਾ ਅਤ੍ਥਿ, ਤਸ੍ਮਾ ਅਟ੍ਠਕਥਾਯਪਿ ਸਮੇਤੀਤਿ ਗਹੇਤਬ੍ਬਂ. ਨੀਲੇਨ ਦੁਵਿਞ੍ਞੇਯ੍ਯਭਾਵਤੋ ਕਾਲ਼ਿਤ੍ਥੀ ਵੁਤ੍ਤਾ.

੨੭੯. ਸੇਵਨਾਧਿਪ੍ਪਾਯੋਤਿ ਫਸ੍ਸਸੁਖਸੇਵਨਾਧਿਪ੍ਪਾਯੋ. ਕਾਯਪ੍ਪਟਿਬਦ੍ਧਾਮਸਨਵਾਰੇ ਕਾਯਪ੍ਪਟਿਬਦ੍ਧਵਸੇਨ ਫਸ੍ਸਪਟਿਵਿਜਾਨਨਂ ਵੇਦਿਤਬ੍ਬਂ. ਚਿਤ੍ਤੁਪ੍ਪਾਦਮਤ੍ਤੇ ਆਪਤ੍ਤਿਯਾਭਾਵਤੋ ਅਨਾਪਤ੍ਤੀਤਿ ਇਦਂ ਕਾਯਸਂਸਗ੍ਗਰਾਗਮਤ੍ਤੇਨ ਕਾਯਚਲਨਸ੍ਸ ਅਨੁਪ੍ਪਤ੍ਤਿਤੋ ਇਤ੍ਥਿਯਾ ਕਰਿਯਮਾਨਕਾਯਚਲਨਂ ਸਾਦਿਯਤੋਪਿ ਪਯੋਗਾਭਾਵਂ ਸਨ੍ਧਾਯ ਵੁਤ੍ਤਂ. ਪਠਮਪਾਰਾਜਿਕੇ ਪਨ ਪਰੇਹਿ ਉਪਕ੍ਕਮਿਯਮਾਨਸ੍ਸ ਅਭਾਵਤੋ ਸੇਵਨਾਧਿਪ੍ਪਾਯੇ ਉਪ੍ਪਨ੍ਨੇ ਤੇਨ ਅਧਿਪ੍ਪਾਯੇਨ ਅਙ੍ਗਜਾਤਕ੍ਖੋਭੋ ਸਯਮੇਵ ਅਵਸ੍ਸਂ ਸਞ੍ਜਾਯਤਿ, ਸੋ ਚ ਤੇਨ ਕਤੋ ਨਾਮ ਹੋਤੀਤਿ ਪਾਰਾਜਿਕਂ ਵੁਤ੍ਤਂ, ਤੇਨੇਵ ਨਯੇਨ ਪਠਮਸਙ੍ਘਾਦਿਸੇਸੇਪਿ ਪਰੇਨ ਕਰਿਯਮਾਨਪਯੋਗਸਾਦਿਯਮਾਨੇਪਿ ਅਙ੍ਗਜਾਤਕ੍ਖੋਭਸਮ੍ਭਵੇਨ ਆਪਤ੍ਤਿ ਹੋਤੀਤਿ ਵੇਦਿਤਬ੍ਬਂ. ਚਤੁਤ੍ਥੇਤਿ ‘‘ਨ ਚ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤੀ’’ਤਿ ਇਮਸ੍ਮਿਂ ਵਾਰੇ. ਫਸ੍ਸਪਟਿਵਿਜਾਨਨਮ੍ਪੀਤਿ ਅਪਿ-ਸਦ੍ਦੇਨ ਤਤਿਯਵਾਰੇ ਵਿਯ ਵਾਯਾਮੋਪਿ ਨਤ੍ਥੀਤਿ ਦਸ੍ਸੇਤਿ. ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਾਮਸਨੇ ਵਿਯਾਤਿ ਇਦਂ ਪਨ ਫਸ੍ਸਪਟਿਵਿਜਾਨਨਾਭਾਵਮਤ੍ਤਸ੍ਸੇਵ ਨਿਦਸ੍ਸਨਂ, ਨ ਪਯੋਗਾਭਾਵਸ੍ਸਾਤਿ ਦਟ੍ਠਬ੍ਬਂ. ਮੋਕ੍ਖਾਧਿਪ੍ਪਾਯੋਤਿ ਏਤ੍ਥ ਚਿਤ੍ਤਸ੍ਸ ਲਹੁਪਰਿਵਤ੍ਤਿਤਾਯ ਅਨ੍ਤਰਨ੍ਤਰਾ ਕਾਯਸਂਸਗ੍ਗਰਾਗੇ ਸਮੁਪ੍ਪਨ੍ਨੇਪਿ ਮੋਕ੍ਖਾਧਿਪ੍ਪਾਯਸ੍ਸ ਅਵਿਚ੍ਛਿਨ੍ਨਤਾਯ ਅਨਾਪਤ੍ਤਿਯੇਵ, ਵਿਚ੍ਛਿਨ੍ਨੇ ਪਨ ਤਸ੍ਮਿਂ ਆਪਤ੍ਤਿ ਏਵ.

ਪਦਭਾਜਨੀਯਵਣ੍ਣਨਾਨਯੋ.

੨੮੧. ਏਤ੍ਥ ਗਣ੍ਹਾਹੀਤਿ ਨ ਵਤ੍ਤਬ੍ਬਾਤਿ ਗੇਹਸਿਤਪੇਮੇਨ ਕਾਯਪ੍ਪਟਿਬਦ੍ਧੇਨ ਫੁਸਨੇ ਦੁਕ੍ਕਟਂ ਸਨ੍ਧਾਯ ਵੁਤ੍ਤਂ, ਕਾਰੁਞ੍ਞੇਨ ਪਨ ਵਤ੍ਥਾਦਿਂ ਗਹੇਤੁਂ ਅਸਕ੍ਕੋਨ੍ਤਿਂ ‘‘ਗਣ੍ਹਾ’’ਤਿ ਵਦਨ੍ਤਸ੍ਸਾਪਿ ਅਵਸਸਭਾਵਪ੍ਪਤ੍ਤਂ ਉਦਕੇ ਨਿਮੁਜ੍ਜਨ੍ਤਿਂ ਕਾਰੁਞ੍ਞੇਨ ਸਹਸਾ ਅਨਾਮਾਸਨ੍ਤਿ ਅਚਿਨ੍ਤੇਤ੍ਵਾ ਕੇਸਾਦੀਸੁ ਗਹੇਤ੍ਵਾ ਮੋਕ੍ਖਾਧਿਪ੍ਪਾਯੇਨ ਆਕਡ੍ਢਤੋਪਿ ਅਨਾਪਤ੍ਤਿਯੇਵ. ਨ ਹਿ ਮੀਯਮਾਨਂ ਮਾਤਰਂ ਉਕ੍ਖਿਪਿਤੁਂ ਨ ਵਟ੍ਟਤਿ. ਅਞ੍ਞਾਤਿਕਾਯ ਇਤ੍ਥਿਯਾਪਿ ਏਸੇਵ ਨਯੋ. ਉਕ੍ਕਟ੍ਠਾਯ ਮਾਤੁਯਾਪਿ ਆਮਾਸੋ ਨ ਵਟ੍ਟਤੀਤਿ ਦਸ੍ਸਨਤ੍ਥਂ ‘‘ਮਾਤਰ’’ਨ੍ਤਿ ਵੁਤ੍ਤਂ. ਤਸ੍ਸਾ ਕਾਤਬ੍ਬਂ ਪਨ ਅਞ੍ਞਾਸਮ੍ਪਿ ਇਤ੍ਥੀਨਂ ਕਰੋਨ੍ਤਸ੍ਸਾਪਿ ਅਨਾਪਤ੍ਤਿਯੇਵ ਅਨਾਮਾਸਤ੍ਤੇ ਵਿਸੇਸਾਭਾਵਾ.

ਤਿਣਣ੍ਡੁਪਕਨ੍ਤਿ ਹਿਰਿਵੇਰਾਦਿਮੂਲੇਹਿ ਕੇਸਾਲਙ੍ਕਾਰਤ੍ਥਾਯ ਕਤਚੁਮ੍ਬਟਕਂ. ਪਰਿਵਤ੍ਤੇਤ੍ਵਾਤਿ ਅਤ੍ਤਨੋ ਨਿਵਾਸਨਾਦਿਭਾਵਤੋ ਅਪਨੇਤ੍ਵਾ. ਪੂਜਾਦਿਅਤ੍ਥਂ ਪਨ ਤਾਵਕਾਲਿਕਮ੍ਪਿ ਆਮਸਿਤੁਂ ਵਟ੍ਟਤਿ. ਸੀਸਪਸਾਧਨਕਦਨ੍ਤਸੂਚਿਆਦੀਤਿ ਇਦਂ ਸੀਸਾਲਙ੍ਕਾਰਤ੍ਥਾਯ ਪਟਪਿਲੋਤਿਕਾਦੀਹਿ ਕਤਂ ਸੀਸਪਸਾਧਨਕਞ੍ਚੇਵ ਦਨ੍ਤਸੂਚਿਆਦਿ ਚਾਤਿ ਦ੍ਵਿਧਾ ਯੋਜੇਤ੍ਵਾ ਸੀਸਪਸਾਧਨਂ ਸਿਪਾਟਿਕੋਪਕਰਣਤ੍ਥਾਯ ਚੇਵ ਦਨ੍ਤਸੂਚਿਉਪਕਰਣਤ੍ਥਾਯ ਚ ਗਹੇਤਬ੍ਬਨ੍ਤਿ ਯਥਾਕ੍ਕਮਂ ਅਤ੍ਥਂ ਦਸ੍ਸੇਤਿ. ਕੇਸਕਲਾਪਂ ਬਨ੍ਧਿਤ੍ਵਾ ਤਤ੍ਥ ਤਿਰਿਯਂ ਪਵੇਸਨਤ੍ਥਾਯ ਕਤਾ ਦਨ੍ਤਸੂਚਿ ਏਵ ਸੀਸਪਸਾਧਨਕਦਨ੍ਤਸੂਚੀਤਿ ਏਕਮੇਵ ਕਤ੍ਵਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤਬ੍ਬਸੂਚਿਯੇਵ ਤਸ੍ਸ ਤਸ੍ਸ ਕਿਚ੍ਚਸ੍ਸ ਉਪਕਰਣਨ੍ਤਿ ਸਿਪਾਟਿਕਾਸੂਚਿਉਪਕਰਣਨ੍ਤਿ ਏਵਂ ਵਾ ਯੋਜਨਾ ਕਾਤਬ੍ਬਾ. ਪੋਤ੍ਥਕਰੂਪਨ੍ਤਿ ਸੁਧਾਦੀਹਿ ਕਤਂ, ਪਾਰਾਜਿਕਵਤ੍ਥੁਭੂਤਾਨਂ ਤਿਰਚ੍ਛਾਨਗਤਿਤ੍ਥੀਨਂ ਸਣ੍ਠਾਨੇਨ ਕਤਮ੍ਪਿ ਅਨਾਮਾਸਮੇਵ. ਇਤ੍ਥਿਰੂਪਾਦੀਨਿ ਦਸ੍ਸੇਤ੍ਵਾ ਕਤਂ, ਵਤ੍ਥਭਿਤ੍ਤਿਆਦਿਞ੍ਚ ਇਤ੍ਥਿਰੂਪਂ ਅਨਾਮਸਿਤ੍ਵਾ ਵਲ਼ਞ੍ਜੇਤੁਂ ਵਟ੍ਟਤਿ. ਏਵਰੂਪੇਹਿ ਅਨਾਮਾਸੇ ਕਾਯਸਂਸਗ੍ਗਰਾਗੇ ਅਸਤਿ ਕਾਯਪ੍ਪਟਿਬਦ੍ਧੇਨ ਆਮਸਤੋ ਦੋਸੋ ਨਤ੍ਥਿ. ਭਿਨ੍ਦਿਤ੍ਵਾਤਿ ਏਤ੍ਥ ਅਨਾਮਾਸਮ੍ਪਿ ਦਣ੍ਡਪਾਸਾਣਾਦੀਹਿ ਭੇਦਨਸ੍ਸ ਅਟ੍ਠਕਥਾਯਂ ਵੁਤ੍ਤਤ੍ਤਾ, ਪਾਲ਼ਿਯਮ੍ਪਿ ਆਪਦਾਸੁ ਮੋਕ੍ਖਾਧਿਪ੍ਪਾਯਸ੍ਸ ਆਮਸਨੇਪਿ ਅਨਾਪਤ੍ਤਿਯਾ ਵੁਤ੍ਤਤ੍ਤਾ ਚ. ਸਪ੍ਪਿਨੀਆਦੀਹਿ ਵਾਲ਼ਮਿਗੀਹਿ ਚ ਗਹਿਤਪਾਣਕਾਨਂ ਮੋਚਨਤ੍ਥਾਯ ਤਂ ਸਪ੍ਪਿਨੀਆਦਿਂ ਵਤ੍ਥਦਣ੍ਡਾਦੀਹਿ ਪਰਿਕ੍ਖਿਪਿਤ੍ਵਾ ਗਹੇਤੁਂ, ਮਾਤੁਆਦਿਂ ਉਦਕੇ ਮੀਯਮਾਨਂ ਵਤ੍ਥਾਦੀਹਿ ਗਹੇਤੁਂ, ਅਸਕ੍ਕੋਨ੍ਤਿਂ ਕੇਸਾਦੀਸੁ ਗਹੇਤ੍ਵਾ ਕਾਰੁਞ੍ਞੇਨ ਉਕ੍ਖਿਪਿਤੁਂ ਵਟ੍ਟਤੀਤਿ ਅਯਮਤ੍ਥੋ ਗਹੇਤਬ੍ਬੋਵ. ਅਟ੍ਠਕਥਾਯਂ ‘‘ਨ ਤ੍ਵੇਵ ਆਮਸਿਤਬ੍ਬਾ’’ਤਿ ਇਦਂ ਪਨ ਵਚਨਂ ਅਮੀਯਮਾਨਵਤ੍ਥੁਂ ਸਨ੍ਧਾਯ ਵੁਤ੍ਤਨ੍ਤਿ ਅਯਂ ਅਮ੍ਹਾਕਂ ਖਨ੍ਤਿ.

ਮਗ੍ਗਂ ਅਧਿਟ੍ਠਾਯਾਤਿ ‘‘ਮਗ੍ਗੋ ਅਯ’’ਨ੍ਤਿ ਮਗ੍ਗਸਞ੍ਞਂ ਉਪ੍ਪਾਦੇਤ੍ਵਾਤਿ ਅਤ੍ਥੋ. ਪਞ੍ਞਪੇਤ੍ਵਾ ਦੇਨ੍ਤੀਤਿ ਇਦਂ ਸਾਮੀਚਿਵਸੇਨ ਵੁਤ੍ਤਂ, ਤੇਹਿ ਪਨ ਆਸਨਂ ਅਪਞ੍ਞਪੇਤ੍ਵਾਵ ਨਿਸੀਦਥਾਤਿ ਵੁਤ੍ਤੇ ਸਯਮੇਵ ਪਞ੍ਞਪੇਤ੍ਵਾ ਨਿਸੀਦਿਤੁਮ੍ਪਿ ਵਟ੍ਟਤਿ. ਤਤ੍ਥਜਾਤਕਾਨੀਤਿ ਅਚ੍ਛਿਨ੍ਦਿਤ੍ਵਾ ਭੂਤਗਾਮਭਾਵੇਨੇਵ ਠਿਤਾਨਿ. ਕੀਲ਼ਨ੍ਤੇਨਾਤਿ ਵੁਤ੍ਤਤ੍ਤਾ ਸਤਿ ਪਚ੍ਚਯੇ ਆਮਸਨ੍ਤਸ੍ਸ ਅਨਾਪਤ੍ਤਿ. ਭਿਕ੍ਖੁਸਨ੍ਤਕਂ ਪਨ ਪਰਿਭੋਗਾਰਹਂ ਸਬ੍ਬਥਾ ਆਮਸਿਤੁਂ ਨ ਵਟ੍ਟਤਿ ਦੁਰੁਪਚਿਣ੍ਣਤ੍ਤਾ. ਅਨੁਪਸਮ੍ਪਨ੍ਨਾਨਂ ਦਸ੍ਸਾਮੀਤਿ ਇਦਂ ਅਪ੍ਪਟਿਗ੍ਗਹੇਤ੍ਵਾ ਗਹਣਂ ਸਨ੍ਧਾਯ ਵੁਤ੍ਤਂ. ਅਤ੍ਤਨੋਪਿ ਅਤ੍ਥਾਯ ਪਟਿਗ੍ਗਹੇਤ੍ਵਾ ਗਹਣੇ ਦੋਸੋ ਨਤ੍ਥਿ ਅਨਾਮਾਸਤ੍ਤਾਭਾਵਾ.

ਮਣੀਤਿ ਵੇਲ਼ੁਰਿਯਾਦਿਤੋ ਅਞ੍ਞੋ ਜੋਤਿਰਸਾਦਿਭੇਦੋ ਸਬ੍ਬੋਪਿ ਮਣਿ. ਵੇਲ਼ੁਰਿਯੋਤਿ ਅਲ੍ਲਵੇਲ਼ੁਵਣ੍ਣੋਮਣਿ, ‘‘ਮਜ੍ਜਾਰਕ੍ਖਿ ਮਣ੍ਡਲਵਣ੍ਣੋ’’ਤਿਪਿ ਵਦਨ੍ਤਿ. ਸਿਲਾਤਿ ਮੁਗ੍ਗਮਾਸਵਣ੍ਣਾ ਅਤਿਸਿਨਿਦ੍ਧਾ ਕਾਲ਼ਸਿਲਾ, ਮਣਿਵੋਹਾਰਂ ਆਗਤਾ ਰਤ੍ਤਸੇਤਾਦਿਵਣ੍ਣਾ ਸੁਮਟ੍ਠਾਪਿ ਸਿਲਾ ਅਨਾਮਾਸਾ ਏਵਾਤਿ ਵਦਨ੍ਤਿ. ਰਜਤਨ੍ਤਿ ਕਹਾਪਣਮਾਸਾਦਿਭੇਦਂ ਜਤੁਮਾਸਾਦਿਂ ਉਪਾਦਾਯ ਸਬ੍ਬਂ ਵੁਤ੍ਤਾਵਸੇਸਂ ਰੂਪਿਯਂ ਗਹਿਤਂ. ਲੋਹਿਤਙ੍ਕੋਤਿ ਰਤ੍ਤਮਣਿ. ਮਸਾਰਗਲ੍ਲਨ੍ਤਿ ਕਬਰਵਣ੍ਣੋ ਮਣਿ, ‘‘ਮਰਕਤ’’ਨ੍ਤਿਪਿ ਵਦਨ੍ਤਿ. ਭੇਸਜ੍ਜਤ੍ਥਾਯ ਪਿਸਿਤ੍ਵਾ ਯੋਜਿਤਾਨਂ ਮੁਤ੍ਤਾਨਂ ਰਤਨਭਾਵਵਿਰਹਤੋ ਗਹਣਕ੍ਖਣੇਪਿ ਰਤਨਾਕਾਰੇਨ ਅਪੇਕ੍ਖਿਤਾਭਾਵਾ ‘‘ਭੇਸਜ੍ਜਤ੍ਥਾਯ ਪਨ ਵਟ੍ਟਤੀ’’ਤਿ ਵੁਤ੍ਤਂ. ਯਾਵ ਪਨ ਤਾ ਮੁਤ੍ਤਾ ਰਤਨਰੂਪੇਨ ਤਿਟ੍ਠਨ੍ਤਿ, ਤਾਵ ਆਮਸਿਤੁਂ ਨ ਵਟ੍ਟਤਿ ਏਵ. ਏਵਂ ਅਞ੍ਞਮ੍ਪਿ ਰਤਨਪਾਸਾਣਂ ਪਿਸਿਤ੍ਵਾ ਭੇਸਜ੍ਜੇ ਯੋਜਨਤ੍ਥਾਯ ਗਹੇਤੁਂ ਵਟ੍ਟਤਿ ਏਵ, ਜਾਤਰੂਪਰਜਤਂ ਪਨ ਪਿਸਿਤ੍ਵਾ ਯੋਜਨਭੇਸਜ੍ਜਤ੍ਥਾਯਪਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਗਹਟ੍ਠੇਹਿ ਯੋਜੇਤ੍ਵਾ ਦਿਨ੍ਨਮ੍ਪਿ ਯਦਿ ਭੇਸਜ੍ਜੇ ਸੁਵਣ੍ਣਾਦਿਰੂਪੇਨ ਤਿਟ੍ਠਤਿ, ਵਿਯੋਜੇਤੁਞ੍ਚ ਸਕ੍ਕਾ, ਤਾਦਿਸਂ ਭੇਸਜ੍ਜਮ੍ਪਿ ਨ ਵਟ੍ਟਤਿ. ਤਂ ਅਬ੍ਬੋਹਾਰਿਕਤ੍ਤਂ ਗਤਂ ਚੇ, ਵਟ੍ਟਤਿ. ‘‘ਜਾਤਿਫਲਿਕਂ ਉਪਾਦਾਯਾ’’ਤਿ ਵੁਤ੍ਤਤ੍ਤਾ, ਸੂਰਿਯਕਨ੍ਤਚਨ੍ਦਕਨ੍ਤਾਦਿਕਂ ਜਾਤਿਪਾਸਾਣਂ ਮਣਿਮ੍ਹਿ ਏਵ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਧਮਨਸਙ੍ਖੋ ਚ ਧੋਤਵਿਦ੍ਧੋ ਚ ਰਤਨਮਿਸ੍ਸੋ ਚਾਤਿ ਯੋਜੇਤਬ੍ਬਂ. ਵਿਦ੍ਧੋਤਿ ਮਣਿਆਦਿਭਾਵੇਨ ਕਤਛਿਦ੍ਦੋ.

ਰਤਨਮਿਸ੍ਸੋਤਿ ਕਞ੍ਚਨਲਤਾਦਿਵਿਚਿਤ੍ਤੋ, ਮੁਤ੍ਤਾਦਿਰਤਨਖਚਿਤੋ ਚ, ਏਤੇਨ ਧਮਨਸਙ੍ਖਤੋ ਅਞ੍ਞੋ ਰਤਨਮਿਸ੍ਸੋਵ ਅਨਾਮਾਸੋਤਿ ਦਸ੍ਸੇਤਿ. ਸਿਲਾਯਮ੍ਪਿ ਏਸੇਵ ਨਯੋ. ਪਾਨੀਯਸਙ੍ਖੋਤਿ ਇਮਿਨਾਵ ਥਾਲਕਾਦਿਆਕਾਰੇਨ ਕਤਸਙ੍ਖਮਯਭਾਜਨਾਨਿ ਭਿਕ੍ਖੂਨਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀਤਿ ਸਿਦ੍ਧਂ. ਸੇਸਾਤਿ ਰਤਨਸਂਯੁਤ੍ਤਂ ਠਪੇਤ੍ਵਾ ਅਵਸੇਸਾ.

ਬੀਜਤੋ ਪਟ੍ਠਾਯਾਤਿ ਧਾਤੁਪਾਸਾਣਤੋ ਪਟ੍ਠਾਯ. ਪਟਿਕ੍ਖਿਪੀਤਿ ਸੁਵਣ੍ਣਮਯਧਾਤੁਕਰਣ੍ਡਕਸ੍ਸ, ਬੁਦ੍ਧਰੂਪਾਦਿਸ੍ਸ ਚ ਅਤ੍ਤਨੋ ਸਨ੍ਤਕਕਰਣੇ ਨਿਸ੍ਸਗ੍ਗਿਯਤ੍ਤਾ ਵੁਤ੍ਤਂ. ‘‘ਰੂਪਿਯਛਡ੍ਡਕਟ੍ਠਾਨੇ’’ਤਿ ਵੁਤ੍ਤਤ੍ਤਾ ਰੂਪਿਯਛਡ੍ਡਕਸ੍ਸ ਜਾਤਰੂਪਰਜਤਂ ਆਮਸਿਤ੍ਵਾ ਛਡ੍ਡੇਤੁਂ ਵਟ੍ਟਤੀਤਿ ਸਿਦ੍ਧਂ. ਕੇਲ਼ਾਪਯਿਤੁਨ੍ਤਿ ਆਮਸਿਤ੍ਵਾ ਇਤੋ ਚਿਤੋ ਚ ਸਞ੍ਚਾਰੇਤੁਂ. ਵੁਤ੍ਤਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਕਚਵਰਮੇਵ ਹਰਿਤੁਂ ਵਟ੍ਟਤੀਤਿ ਗੋਪਕਾ ਵਾ ਹੋਨ੍ਤੁ ਅਞ੍ਞੇ ਵਾ, ਹਤ੍ਥੇਨ ਪੁਞ੍ਛਿਤ੍ਵਾ ਕਚਵਰਂ ਅਪਨੇਤੁਂ ਵਟ੍ਟਤਿ, ਮਲਮ੍ਪਿ ਪਮਜ੍ਜਿਤੁਂ ਵਟ੍ਟਤਿ ਏਵਾਤਿ ਵਦਨ੍ਤਿ, ਤਂ ਅਟ੍ਠਕਥਾਯ ਨ ਸਮੇਤਿ ਕੇਲ਼ਾਯਨਸਦਿਸਤ੍ਤਾ. ਆਰਕੂਟਲੋਹਨ੍ਤਿ ਸੁਵਣ੍ਣਵਣ੍ਣੋ ਕਿਤ੍ਤਿਮਲੋਹਵਿਸੇਸੋ. ਤਿਵਿਧਞ੍ਹਿ ਕਿਤ੍ਤਿਮਲੋਹਂ ਕਂਸਲੋਹਂ ਵਟ੍ਟਲੋਹਂ ਹਾਰਕੂਟਲੋਹਨ੍ਤਿ. ਤਤ੍ਥ ਤਿਪੁਤਮ੍ਬੇ ਮਿਸ੍ਸੇਤ੍ਵਾ ਕਤਂ ਕਂਸਲੋਹਂ ਨਾਮ. ਸੀਸਤਮ੍ਬੇ ਮਿਸ੍ਸੇਤ੍ਵਾ ਕਤਂ ਵਟ੍ਟਲੋਹਂ. ਰਸਤਮ੍ਬੇ ਮਿਸ੍ਸੇਤ੍ਵਾ ਕਤਂ ਹਾਰਕੂਟਲੋਹਂ ਨਾਮ. ਤਂ ਪਨ ‘‘ਜਾਤਰੂਪਗਤਿਕ’’ਨ੍ਤਿ ਵੁਤ੍ਤਤ੍ਤਾ ਉਗ੍ਗਣ੍ਹਤੋ ਨਿਸ੍ਸਗ੍ਗਿਯਮ੍ਪਿ ਹੋਤੀਤਿ ਕੇਚਿ ਵਦਨ੍ਤਿ. ਰੂਪਿਯੇਸੁ ਪਨ ਅਗਣਿਤਤ੍ਤਾ ਨਿਸ੍ਸਗ੍ਗਿਯਂ ਨ ਹੋਤਿ, ਆਮਸਨੇ, ਸਮ੍ਪਟਿਚ੍ਛਨੇ ਚ ਦੁਕ੍ਕਟਮੇਵਾਤਿ ਵੇਦਿਤਬ੍ਬਂ. ਸਬ੍ਬਕਪ੍ਪਿਯੋਤਿ ਯਥਾਵੁਤ੍ਤਸੁਵਣ੍ਣਾਦਿਮਯਾਨਂ ਸੇਨਾਸਨਪਰਿਕ੍ਖਾਰਾਨਂ ਆਮਸਨਗੋਪਨਾਦਿਵਸੇਨ ਪਰਿਭੋਗੋ ਸਬ੍ਬਥਾ ਕਪ੍ਪਿਯੋਤਿ ਅਧਿਪ੍ਪਾਯੋ. ਤੇਨਾਹ ‘‘ਤਸ੍ਮਾ’’ਤਿਆਦਿ. ‘‘ਭਿਕ੍ਖੂਨਂ ਧਮ੍ਮਵਿਨਯਵਣ੍ਣਨਟ੍ਠਾਨੇ’’ਤਿ ਵੁਤ੍ਤਤ੍ਤਾ ਸਙ੍ਘਿਕਮੇਵ ਸੁਵਣ੍ਣਾਦਿਮਯਂ ਸੇਨਾਸਨਂ, ਸੇਨਾਸਨਪਰਿਕ੍ਖਾਰਾ ਚ ਵਟ੍ਟਨ੍ਤਿ, ਨ ਪੁਗ੍ਗਲਿਕਾਨੀਤਿ ਗਹੇਤਬ੍ਬਂ.

ਭਿਨ੍ਦਿਤ੍ਵਾਤਿ ਪਠਮਮੇਵ ਅਨਾਮਸਿਤ੍ਵਾ ਪਾਸਾਣਾਦਿਨਾ ਕਿਞ੍ਚਿਮਤ੍ਤਂ ਭੇਦਂ ਕਤ੍ਵਾ ਪਚ੍ਛਾ ਕਪ੍ਪਿਯਭਣ੍ਡਤ੍ਥਾਯ ਅਧਿਟ੍ਠਹਿਤ੍ਵਾ ਹਤ੍ਥੇਨ ਗਹੇਤੁਂ ਵਟ੍ਟਤਿ. ਤੇਨਾਹ ‘‘ਕਪ੍ਪਿਯਭਣ੍ਡਂ ਕਰਿਸ੍ਸਾਮੀਤਿ ਸਬ੍ਬਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ. ਏਤ੍ਥਾਪਿ ਕਿਞ੍ਚਿ ਭਿਨ੍ਦਿਤ੍ਵਾ, ਵਿਯੋਜੇਤ੍ਵਾ ਵਾ ਆਮਸਿਤਬ੍ਬ.

ਫਲਕਜਾਲਿਕਾਦੀਨੀਤਿ ਏਤ੍ਥ ਸਰਪਰਿਤ੍ਤਾਣਾਯ ਹਤ੍ਥੇਨ ਗਹੇਤਬ੍ਬਂ ਕਿਟਿਕਾਫਲਕਂ ਅਕ੍ਖਿਰਕ੍ਖਣਤ੍ਥਾਯ ਅਯਲੋਹਾਦੀਹਿ ਜਾਲਾਕਾਰੇਨ ਕਤ੍ਵਾ ਸੀਸਾਦੀਸੁ ਪਟਿਮੁਞ੍ਚਿਤਬ੍ਬਂ ਜਾਲਿਕਂ ਨਾਮ. ਆਦਿ-ਸਦ੍ਦੇਨ ਕਵਚਾਦਿਂ ਸਙ੍ਗਣ੍ਹਾਤਿ. ਅਨਾਮਾਸਾਨੀਤਿ ਮਚ੍ਛਜਾਲਾਦਿਪਰੂਪਰੋਧਕਂ ਸਨ੍ਧਾਯ ਵੁਤ੍ਤਂ, ਨ ਸਰਪਰਿਤ੍ਤਾਣਂ ਤਸ੍ਸ ਆਵੁਧਭਣ੍ਡਤ੍ਤਾਭਾਵਾ. ਤੇਨੇਵ ਵਕ੍ਖਤਿ ‘‘ਪਰੂਪਰੋਧਨਿਵਾਰਣਂ ਹੀ’’ਤਿਆਦਿ. ਆਸਨਸ੍ਸਾਤਿ ਚੇਤਿਯਸ੍ਸ ਸਮਨ੍ਤਾ ਕਤਪਰਿਭਣ੍ਡਸ੍ਸ. ਬਨ੍ਧਿਸ੍ਸਾਮੀਤਿ ਕਾਕਾਦੀਹਿ ਅਦੂਸਨਤ੍ਥਾਯ ਬਨ੍ਧਿਸ੍ਸਾਮਿ.

‘‘ਭੇਰਿਸਙ੍ਘਾਟੋਤਿ ਸਙ੍ਘਟਿਤਚਮ੍ਮਭੇਰੀ. ਵੀਣਾਸਙ੍ਘਾਟੋਤਿ ਸਙ੍ਘਟਿਤਚਮ੍ਮਵੀਣਾ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੨੮੧) ਵੁਤ੍ਤਂ. ‘‘ਚਮ੍ਮਵਿਨਦ੍ਧਾਨਿ ਵੀਣਾਭੇਰਿਆਦੀਨੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਵਚਨਤੋ ਵਿਸੇਸਾਭਾਵਾ, ‘‘ਕੁਰੁਨ੍ਦਿਯਂ ਪਨਾ’’ਤਿਆਦਿਨਾ ਤਤੋ ਵਿਸੇਸਸ੍ਸ ਵਤ੍ਤੁਮਾਰਦ੍ਧਤ੍ਤਾ ਚ ਭੇਰਿਆਦੀਨਂ ਵਿਨਦ੍ਧਨੋਪਕਰਣਸਮੂਹੋ ਭੇਰਿਵੀਣਾਸਙ੍ਘਾਟੋਤਿ ਵੇਦਿਤਬ੍ਬਂ ਸਙ੍ਘਟਿਤਬ੍ਬੋਤਿ ਸਙ੍ਘਾਟੋਤਿ ਕਤ੍ਵਾ. ਤੁਚ੍ਛਪੋਕ੍ਖਰਨ੍ਤਿ ਅਵਿਨਦ੍ਧਚਮ੍ਮਭੇਰਿਵੀਣਾਨਂ ਪੋਕ੍ਖਰਂ. ਆਰੋਪਿਤਚਮ੍ਮਨ੍ਤਿ ਪੁਬ੍ਬੇ ਆਰੋਪਿਤਂ ਹੁਤ੍ਵਾ ਪਚ੍ਛਾ ਤਤੋ ਅਪਨੇਤ੍ਵਾ ਵਿਸੁਂ ਠਪਿਤਮੁਖਚਮ੍ਮਮਤ੍ਤਂ, ਨ ਸੇਸੋਪਕਰਣਸਹਿਤਂ. ਸਹਿਤਂ ਪਨ ਸਙ੍ਘਾਟੋਤਿ ਅਯਂ ਵਿਸੇਸੋ. ਓਨਹਿਤੁਨ੍ਤਿ ਭੇਰਿਪੋਕ੍ਖਰਾਦੀਨਿ ਚਮ੍ਮਂ ਆਰੋਪੇਤ੍ਵਾ ਚਮ੍ਮਵਟ੍ਟਿਆਦੀਹਿ ਸਬ੍ਬੇਹਿ ਉਪਕਰਣੇਹਿ ਵਿਨਨ੍ਧਿਤੁਂ.

ਪਾਲ਼ਿਯਂ ਪਣ੍ਡਕਸ੍ਸਾਤਿ ਪਣ੍ਡਕੇਨ. ਪਾਰਾਜਿਕਪ੍ਪਹੋਨਕਕਾਲੇਤਿ ਅਕੁਥਿਤਕਾਲੇ. ਕਾਯਸਂਸਗ੍ਗਰਾਗਾਦਿਭਾਵੇ ਸਬ੍ਬਾਵਤ੍ਥਾਯਪਿ ਇਤ੍ਥਿਯਾ ਸਣ੍ਠਾਨੇ ਪਞ੍ਞਾਯਮਾਨੇ ਅਨਾਮਾਸਦੁਕ੍ਕਟਂ ਨ ਵਿਗਚ੍ਛਤੀਤਿ ਦਟ੍ਠਬ੍ਬਂ. ਸਙ੍ਕਮਾਦੀਨਂ ਠਾਨਾਚਾਵਨਵਸੇਨ ਅਚਾਲੇਤਬ੍ਬਤਾਯ ਨ ਕਾਯਪ੍ਪਟਿਬਦ੍ਧਵੋਹਾਰੋਤਿ ਦੁਕ੍ਕਟਂ ਵੁਤ੍ਤਂ.

੨੮੨. ਏਕਪਦਿਕਸਙ੍ਕਮੋਤਿ ਤਨੁਕਸੇਤੁ. ‘‘ਆਵਿਞ੍ਛਨ੍ਤੋ’’ਤਿ ਵੁਤ੍ਤਤ੍ਤਾ ਚਾਲੇਤੁਂ ਯੁਤ੍ਤਾਯ ਏਵ ਰਜ੍ਜੁਯਾ ਥੁਲ੍ਲਚ੍ਚਯਂ, ਨ ਇਤਰਾਯ ਭਿਤ੍ਤਿਥਮ੍ਭਾਦਿਗਤਿਕਤ੍ਤਾਤਿ ਆਹ ‘‘ਯਾ ਮਹਾਰਜ੍ਜੁ ਹੋਤੀ’’ਤਿਆਦਿ. ਤੇਨ ਚਾਲੇਤੁਂ ਯੁਤ੍ਤੇ ਤਨੁਕਰਜ੍ਜੁਦਣ੍ਡਕੇ ਅਚਾਲੇਤ੍ਵਾ ਫੁਸਨ੍ਤਸ੍ਸਾਪਿ ਥੁਲ੍ਲਚ੍ਚਯਮੇਵਾਤਿ ਦੀਪਿਤਨ੍ਤਿ ਵੇਦਿਤਬ੍ਬਂ. ਪਟਿਚ੍ਛਾਦੇਤਬ੍ਬਾਤਿ ਛਾਦਨਾਦਿਵਸੇਨ ਗੂਹਿਤਬ੍ਬਾ. ਮਨੁਸ੍ਸਿਤ੍ਥੀ, ਮਨੁਸ੍ਸਿਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਵਾਯਾਮੋ, ਤੇਨ ਹਤ੍ਥਾਦੀਸੁ ਫੁਸਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ

੨੮੫. ਤਤਿਯੇ ਅਸਦ੍ਧਮ੍ਮਪਟਿਸਞ੍ਞੁਤ੍ਤਨ੍ਤਿ ਮੇਥੁਨਧਮ੍ਮਪਟਿਸਂਯੁਤ੍ਤਂ. ਬਾਲਾਤਿ ਸੁਭਾਸਿਤਦੁਬ੍ਭਾਸਿਤਂ ਅਜਾਨਨ੍ਤੀ, ਸੁਰਾਮਦਮਤ੍ਤਤਾਯ ਉਮ੍ਮਤ੍ਤਕਾਦਿਭਾਵੇਨ ਚ ਅਜਾਨਨ੍ਤੀਪਿ ਏਤ੍ਥੇਵ ਸਙ੍ਗਯ੍ਹਤਿ. ਨ ਤਾਵ ਸੀਸਂ ਏਤੀਤਿ ਸਙ੍ਘਾਦਿਸੇਸਪਚ੍ਚਯਤ੍ਤਸਙ੍ਖਾਤਂ ਮਤ੍ਥਕਂ ਪਾਰਿਪੂਰਿ ਨ ਹੋਤਿ, ਮਗ੍ਗਮੇਥੁਨੇਹਿ ਅਘਟਿਤਤ੍ਤਾ ਦੁਕ੍ਕਟਂ ਪਨ ਹੋਤਿ ਏਵ.

ਅਪਸਾਦੇਤੀਤਿ ਅਪਸਾਦਕਰਵਚਨਂ ਕਰੋਤਿ. ਦੋਸਂ ਦੇਤੀਤਿ ਦੋਸਂ ਪਤਿਟ੍ਠਾਪੇਤਿ. ਤੀਹੀਤਿ ਅਨਿਮਿਤ੍ਤਾਸੀਤਿਆਦੀਨਂ ਪਦਾਨਂ ਅਦੁਟ੍ਠੁਲ੍ਲਭਾਵੇਨਾਪਿ ਅਤ੍ਥਯੋਜਨਾਰਹਤ੍ਤਾ ਪਸ੍ਸਾਵਮਗ੍ਗਾਦਿਪਟਿਸਞ੍ਞੁਤ੍ਤਤਾਨਿਯਮੋ ਨਤ੍ਥੀਤਿ ਵੁਤ੍ਤਂ, ਤੇਹਿ ਪਨ ਅਟ੍ਠਹਿ ਪਦੇਹਿ ਪਰਿਬ੍ਬਾਜਿਕਾਵਤ੍ਥੁਸ੍ਮਿਂ (ਪਾਰਾ. ੨੮੯) ਵਿਯ ਥੁਲ੍ਲਚ੍ਚਯਨ੍ਤਿ ਵੇਦਿਤਬ੍ਬਂ.

ਕੁਞ੍ਚਿਕਪਨਾਲ਼ਿਮਤ੍ਤਨ੍ਤਿ ਕੁਞ੍ਚਿਕਾਛਿਦ੍ਦਮਤ੍ਤਂ. ਸੁਕ੍ਖਸੋਤਾਤਿ ਦਕਸੋਤਸ੍ਸ ਸੁਕ੍ਖਤਾਯ ਲੋਹਿਤਵਣ੍ਣਵਿਗਮੋ ਹੋਤੀਤਿ ਵੁਤ੍ਤਂ.

ਸੁਦ੍ਧਾਨੀਤਿ ਮੇਥੁਨਾਦਿਪਦੇਹਿ ਅਯੋਜਿਤਾਨਿਪਿ. ਮੇਥੁਨਧਮ੍ਮੇਨ ਘਟਿਤਾਨੇਵਾਤਿ ਇਦਂ ਉਪਲਕ੍ਖਣਮਤ੍ਤਂ, ਵਚ੍ਚਮਗ੍ਗਪਸ੍ਸਾਵਮਗ੍ਗੇਹਿਪਿ ਅਨਿਮਿਤ੍ਤੇ ‘‘ਤਵ ਵਚ੍ਚਮਗ੍ਗੋ, ਪਸ੍ਸਾਵਮਗ੍ਗੋ ਵਾ ਈਦਿਸੋ’’ਤਿਆਦਿਨਾ ਘਟਿਤੇਪਿ ਆਪਤ੍ਤਿਕਰਾਨੇਵ.

੨੮੬. ਗਰੁਕਾਪਤ੍ਤਿਨ੍ਤਿ ਭਿਕ੍ਖੁਨਿਯਾ ਉਬ੍ਭਜਾਣੁਮਣ੍ਡਲਿਕਾਯ ਪਾਰਾਜਿਕਾਪਤ੍ਤਿਂ ਸਨ੍ਧਾਯ ਵਦਤਿ.

੨੮੭. ਹਸਨ੍ਤੋ ਹਸਨ੍ਤੋਤਿ ਉਪਲਕ੍ਖਣਮਤ੍ਤਂ, ਅਹਸਨ੍ਤੋਪਿ ਯੇਨ ਕੇਨਚਿ ਆਕਾਰੇਨ ਅਤ੍ਤਨੋ ਵਿਪਰਿਣਤਚਿਤ੍ਤਤਂ ਇਤ੍ਥਿਯਾ ਪਕਾਸੇਨ੍ਤੋ ਵਦਤਿ, ਆਪਤ੍ਤਿਯੇਵ.

ਕਾਯਚਿਤ੍ਤਤੋਤਿ ਹਤ੍ਥਮੁਦ੍ਦਾਯ ਓਭਾਸੇਨ੍ਤਸ੍ਸ ਕਾਯਚਿਤ੍ਤਤੋ ਸਮੁਟ੍ਠਾਤਿ.

੨੮੮. ਤਸ੍ਮਾ ਦੁਕ੍ਕਟਨ੍ਤਿ ਅਪ੍ਪਟਿਵਿਜਾਨਨਤੋ ਦੁਕ੍ਕਟਂ, ਪਟਿਵਿਜਾਨਨੇ ਪਨ ਸਤਿ ਥੁਲ੍ਲਚ੍ਚਯਮੇਵ ਪਰਿਬ੍ਬਾਜਿਕਾਵਤ੍ਥੁਸ੍ਮਿਂ (ਪਾਰਾ. ੨੮੯) ਵਿਯ ਅਖੇਤ੍ਤਪਦਤ੍ਤਾ. ਖੇਤ੍ਤਪਦੇ ਹਿ ਪਟਿਵਿਜਾਨਨ੍ਤਿਯਾ ਸਙ੍ਘਾਦਿਸੇਸੋਵ ਸਿਯਾ ਮੇਥੁਨਧਮ੍ਮਯਾਚਨਵਤ੍ਥੁਦ੍ਵਯੇ (ਪਾਰਾ. ੨੮੯) ਵਿਯ, ਤਂ ਪਨ ਵਤ੍ਥੁਦ੍ਵਯਂ ਮੇਥੁਨਯਾਚਨਤੋ ਚਤੁਤ੍ਥਸਙ੍ਘਾਦਿਸੇਸੇ ਵਤ੍ਤਬ੍ਬਮ੍ਪਿ ਦੁਟ੍ਠੁਲ੍ਲਵਾਚਸ੍ਸਾਦਮਤ੍ਤੇਨ ਪਵਤ੍ਤਤ੍ਤਾ ਇਧ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਏਵਂ ਖੇਤ੍ਤਪਦੇਨ ਵਦਨ੍ਤਸ੍ਸ ਇਤ੍ਥਿਯਾ ਅਪ੍ਪਟਿਵਿਜਾਨਨ੍ਤਿਯਾ ਕਿਂ ਹੋਤੀਤਿ? ਕਿਞ੍ਚਾਪਿ ਅਯਂ ਨਾਮ ਆਪਤ੍ਤੀਤਿ ਪਾਲ਼ਿਅਟ੍ਠਕਥਾਸੁ ਨ ਵੁਤ੍ਤਂ, ਅਥ ਖੋ ਥੁਲ੍ਲਚ੍ਚਯੇਨੇਵੇਤ੍ਥ ਭਵਿਤਬ੍ਬਂ. ਤਥਾ ਹਿ ਅਖੇਤ੍ਤਪਦੇ ਅਪ੍ਪਟਿਵਿਜਾਨਨ੍ਤਿਯਾ ਦੁਕ੍ਕਟਂ, ਪਟਿਵਿਜਾਨਨ੍ਤਿਯਾ ਥੁਲ੍ਲਚ੍ਚਯਂ ਵੁਤ੍ਤਂ. ਖੇਤ੍ਤਪਦੇ ਪਨ ਪਟਿਵਿਜਾਨਨੇ ਸਙ੍ਘਾਦਿਸੇਸੋਵ ਵੁਤ੍ਤੋ, ਅਪ੍ਪਟਿਵਿਜਾਨਨੇ ਥੁਲ੍ਲਚ੍ਚਯਮੇਵ ਭਵਿਤੁਂ ਯੁਤ੍ਤਂ, ਨ ਦੁਕ੍ਕਟਂ, ਅਖੇਤ੍ਤਪਦਤੋ ਵਿਸੇਸਾਭਾਵਪ੍ਪਸਙ੍ਗੋਤਿ ਗਹੇਤਬ੍ਬਂ. ਯਥਾ ਚੇਤ੍ਥ, ਏਵਂ ਚਤੁਤ੍ਥਸਿਕ੍ਖਾਪਦੇਪਿ ਅਖੇਤ੍ਤਪਦੇ ਪਟਿਵਿਜਾਨਨ੍ਤਿਯਾ ਥੁਲ੍ਲਚ੍ਚਯਂ, ਅਪ੍ਪਟਿਵਿਜਾਨਨ੍ਤਿਯਾ ਦੁਕ੍ਕਟਂ, ਖੇਤ੍ਤਪਦੇ ਪਨ ਅਪ੍ਪਟਿਵਿਜਾਨਨ੍ਤਿਯਾ ਥੁਲ੍ਲਚ੍ਚਯਨ੍ਤਿ ਵੇਦਿਤਬ੍ਬਂ. ਪਾਲ਼ਿਯਂ ਨਵਾਵੁਤਨ੍ਤਿ ਨਵਵੀਤਂ.

੨੮੮. ਅਸਦ੍ਧਮ੍ਮਂ ਸਨ੍ਧਾਯਾਤਿ ਮੇਥੁਨਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਪੁਤ੍ਤਸਮੁਪ੍ਪਤ੍ਤਿਯਾ ਬੀਜਨਿਕ੍ਖੇਪਤੋ ਵਪ੍ਪਪਰਿਯਾਯਂ ਲਭਤੀਤਿ.

ਸਂਸੀਦਤੀਤਿ ਵਹਤਿ, ਸਂਸਰੀਯਤੀਤਿ ਵਾ ਅਤ੍ਥੋ. ਮਨੁਸ੍ਸਿਤ੍ਥੀ, ਤਥਾਸਞ੍ਞਿਤਾ, ਦੁਟ੍ਠੁਲ੍ਲਵਾਚਸ੍ਸਾਦਰਾਗੋ, ਤੇਨ ਓਭਾਸਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਵਣ੍ਣਨਾ

੨੯੦. ਚਤੁਤ੍ਥੇ ਪਰੇਹਿ ਪਤ੍ਤੇ ਪਾਤਿਯਮਾਨਾਨਂ ਭਿਕ੍ਖਾਪਿਣ੍ਡਾਨਂ ਪਾਤੋ ਸਨ੍ਨਿਪਾਤੋਤਿ ਪਿਣ੍ਡਪਾਤੋਤਿ ਭਿਕ੍ਖਾਹਾਰੋ ਵੁਚ੍ਚਤਿ, ਤਂਸਦਿਸਤਾਯ ਅਞ੍ਞੋਪਿ ਯੋ ਕੋਚਿ ਭਿਕ੍ਖਾਚਰਿਯਂ ਵਿਨਾ ਭਿਕ੍ਖੂਹਿ ਲਦ੍ਧੋ ਪਿਣ੍ਡਪਾਤੋਤ੍ਵੇਵ ਵੁਚ੍ਚਤਿ. ਪਤਿ ਏਤਿ ਏਤਸ੍ਮਾਤਿ ਪਚ੍ਚਯੋਤਿ ਆਹ ‘‘ਪਤਿਕਰਣਟ੍ਠੇਨ ਪਚ੍ਚਯੋ’’ਤਿ. ਰੋਗਦੁਕ੍ਖਾਨਂ ਵਾ ਪਟਿਪਕ੍ਖਭਾਵੇਨ ਅਯਤਿ ਪਵਤ੍ਤਤੀਤਿ ਪਚ੍ਚਯੋ. ਸਪ੍ਪਾਯਸ੍ਸਾਤਿ ਹਿਤਸ੍ਸ. ਨਗਰਪਰਿਕ੍ਖਾਰੇਹੀਤਿ ਨਗਰਂ ਪਰਿਵਾਰੇਤ੍ਵਾ ਰਕ੍ਖਣਕੇਹਿ. ਰਾਜੂਨਂ ਗੇਹਪਰਿਕ੍ਖੇਪੋ ਪਰਿਖਾ ਉਦ੍ਦਾਪੋ ਪਾਕਾਰੋ ਏਸਿਕਾ ਪਲਿਘੋ ਅਟ੍ਟੋਤਿ ਇਮੇ ਸਤ੍ਤ ਨਗਰਪਰਿਕ੍ਖਾਰਾਤਿ ਵਦਨ੍ਤਿ. ਸੇਤਪਰਿਕ੍ਖਾਰੋਤਿ ਵਿਸੁਦ੍ਧਿਸੀਲਾਲਙ੍ਕਾਰੋ. ਅਰਿਯਮਗ੍ਗੋ ਹਿ ਇਧ ‘‘ਰਥੋ’’ਤਿ ਅਧਿਪ੍ਪੇਤੋ, ਤਸ੍ਸ ਚ ਸਮ੍ਮਾਵਾਚਾਦਯੋ ਅਲਙ੍ਕਾਰਟ੍ਠੇਨ ‘‘ਪਰਿਕ੍ਖਾਰਾ’’ਤਿ ਵੁਤ੍ਤਾ. ਚਕ੍ਕਵੀਰਿਯੋਤਿ ਵੀਰਿਯਚਕ੍ਕੋ. ਜੀਵਿਤਪਰਿਕ੍ਖਾਰਾਤਿ ਜੀਵਿਤਸ੍ਸ ਪਵਤ੍ਤਿਕਾਰਣਾਨਿ. ਸਮੁਦਾਨੇਤਬ੍ਬਾਤਿ ਸਮ੍ਮਾ ਉਦ੍ਧਂ ਆਨੇਤਬ੍ਬਾ ਪਰਿਯੇਸਿਤਬ੍ਬਾ.

੨੯੧. ਉਪਚਾਰੇਤਿ ਯਤ੍ਥ ਠਿਤੋ ਵਿਞ੍ਞਾਪੇਤੁਂ ਸਕ੍ਕੋਤਿ, ਤਾਦਿਸੇ ਠਾਨੇ. ਕਾਮੋ ਚੇਵ ਹੇਤੁ ਚ ਪਾਰਿਚਰਿਯਾ ਚ ਅਤ੍ਥੋਤਿ ਪਾਲ਼ਿਯਂ ‘‘ਅਤ੍ਤਨੋ ਕਾਮਂ, ਅਤ੍ਤਨੋ ਹੇਤੁਂ, ਅਤ੍ਤਨੋ ਅਧਿਪ੍ਪਾਯਂ, ਅਤ੍ਤਨੋ ਪਾਰਿਚਰਿਯ’’ਨ੍ਤਿ (ਪਾਰਾ. ੨੯੨) ਵੁਤ੍ਤੇਸੁ ਇਮੇਸੁ ਚਤੂਸੁ ਪਦੇਸੁ ਕਾਮੋ, ਹੇਤੁ, ਪਾਰਿਚਰਿਯਾ ਚ ਅਟ੍ਠਕਥਾਯਂ ਵੁਤ੍ਤੇ ਪਠਮੇ ਅਤ੍ਥਵਿਕਪ੍ਪੇ ਵਿਗ੍ਗਹਵਾਕ੍ਯਾਧਿਪ੍ਪਾਯਸੂਚਨਤੋ ਅਤ੍ਥੋ. ਸੇਸਨ੍ਤਿ ਅਧਿਪ੍ਪਾਯਪਦਮੇਕਂ. ਬ੍ਯਞ੍ਜਨਨ੍ਤਿ ਬ੍ਯਞ੍ਜਨਮਤ੍ਤਂ, ਪਠਮਵਿਕਪ੍ਪਾਨੁਪਯੋਗਿਤਾਯ ਵਚਨਮਤ੍ਤਨ੍ਤਿ ਅਤ੍ਥੋ. ਦੁਤਿਯੇ ਅਤ੍ਥਵਿਕਪ੍ਪੇਪਿ ਏਸੇਵ ਨਯੋ.

ਯਥਾਵੁਤ੍ਤਮੇਵ ਅਤ੍ਥਂ ਪਦਭਾਜਨੇਨ ਸਂਸਨ੍ਦਿਤ੍ਵਾ ਦਸ੍ਸੇਤੁਂ ‘‘ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਪਾਰਿਚਰਿਯਨ੍ਤਿ ਹਿ ਵੁਤ੍ਤੇ ਜਾਨਿਸ੍ਸਨ੍ਤਿ ਪਣ੍ਡਿਤਾ’’ਤਿਆਦਿ ਆਰਦ੍ਧਂ. ਇਦਂ ਵੁਤ੍ਤਂ ਹੋਤਿ – ‘‘ਅਤ੍ਤਨੋ ਹੇਤੁ’’ਨ੍ਤਿ ਵੁਤ੍ਤੇ ਅਤ੍ਤਨੋ ਅਤ੍ਥਾਯਾਤਿ ਅਯਮਤ੍ਥੋ ਵਿਞ੍ਞਾਯਤਿ, ‘‘ਅਤ੍ਤਨੋ ਕਾਮਂ ਅਤ੍ਤਨੋ ਪਾਰਿਚਰਿਯ’’ਨ੍ਤਿ ਵੁਤ੍ਤੇ ਕਾਮੇਨ ਪਾਰਿਚਰਿਯਾਤਿ ਅਯਮਤ੍ਥੋ ਵਿਞ੍ਞਾਯਤਿ. ਤਸ੍ਮਾ ਇਮੇਹਿ ਤੀਹਿ ਪਦੇਹਿ ਅਤ੍ਤਨੋ ਅਤ੍ਥਾਯ ਕਾਮੇਨ ਪਾਰਿਚਰਿਯਾ ਅਤ੍ਤਕਾਮਪਾਰਿਚਰਿਯਾਤਿ ਇਮਂ ਅਤ੍ਥਵਿਕਪ੍ਪਂ ਵਿਞ੍ਞੂ ਜਾਨਿਸ੍ਸਨ੍ਤਿ. ‘‘ਅਤ੍ਤਨੋ ਅਧਿਪ੍ਪਾਯ’’ਨ੍ਤਿ ਵੁਤ੍ਤੇ ਪਨ ਅਧਿਪ੍ਪਾਯ-ਸਦ੍ਦਸ੍ਸ ਕਾਮਿਤ-ਸਦ੍ਦੇਨ ਸਮਾਨਤ੍ਥਭਾਵਤੋ ਅਤ੍ਤਨਾ ਅਧਿਪ੍ਪੇਤਕਾਮਿਤਟ੍ਠੇਨ ਅਤ੍ਤਕਾਮਪਾਰਿਚਰਿਯਾਤਿ ਇਮਮਤ੍ਥਂ ਵਿਕਪ੍ਪਂ ਵਿਞ੍ਞੂ ਜਾਨਿਸ੍ਸਨ੍ਤਿ.

ਏਤਦਗ੍ਗਨ੍ਤਿ ਏਸਾ ਅਗ੍ਗਾ. ਦੁਟ੍ਠੁਲ੍ਲਵਾਚਾਸਿਕ੍ਖਾਪਦੇਪਿ (ਪਾਰਾ. ੨੮੫) ਕਾਮਂ ‘‘ਯਾਚਤਿਪਿ ਆਯਾਚਤਿਪੀ’’ਤਿ ਏਵਂ ਮੇਥੁਨਯਾਚਨਂ ਆਗਤਂ, ਤਂ ਪਨ ਦੁਟ੍ਠੁਲ੍ਲਵਾਚਸ੍ਸਾਦਰਾਗਵਸੇਨ ਵੁਤ੍ਤਂ, ਇਧ ਪਨ ਅਤ੍ਤਨੋ ਮੇਥੁਨਸ੍ਸਾਦਰਾਗਵਸੇਨਾਤਿ ਅਯਂ ਵਿਸੇਸੋ.

ਵਿਨੀਤਵਤ੍ਥੂਸੁ ‘‘ਅਗ੍ਗਦਾਨਂ ਦੇਹੀ’’ਤਿ ਇਦਂ ਅਤ੍ਤਨੋ ਅਤ੍ਥਾਯ ਵੁਤ੍ਤਂ, ਦੁਟ੍ਠੁਲ੍ਲਵਾਚਾਸਿਕ੍ਖਾਪਦੇ ਪਨ ਪਰਤ੍ਥਾਯਪਿ ਵੁਤ੍ਤੇ ਸੀਸਂ ਏਤੀਤਿ ਵੇਦਿਤਬ੍ਬਂ. ਸੁਭਗਾਤਿ ਇਸ੍ਸਰਿਯਾਦੀਹਿ ਸੁਨ੍ਦਰੇਹਿ ਭਗੇਹਿ ਸਮਨ੍ਨਾਗਤਾ. ਮਨੁਸ੍ਸਿਤ੍ਥੀ, ਤਥਾਸਞ੍ਞਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਕਾਮਪਾਰਿਚਰਿਯਯਾਚਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ

੨੯੬. ਪਞ੍ਚਮੇ ਪਣ੍ਡਿਚ੍ਚੇਨਾਤਿ ਸਭਾਵਞਾਣੇਨ. ਗਤਿਮਨ੍ਤਾਤਿ ਸਭਾਵਞਾਣਗਤਿਯੁਤ੍ਤਾ. ਵੇਯ੍ਯਤ੍ਤਿਯੇਨਾਤਿ ਇਤ੍ਥਿਕਤ੍ਤਬ੍ਬੇਸੁ ਸਿਕ੍ਖਿਤਞਾਣੇਨ. ਮੇਧਾਯਾਤਿ ਅਸਿਕ੍ਖਿਤੇਸੁਪਿ ਤਂਇਤ੍ਥਿਕਤ੍ਤਬ੍ਬੇਸੁ ਠਾਨੁਪ੍ਪਤ੍ਤਿਯਾ ਪਞ੍ਞਾਯ. ਛੇਕਾਤਿ ਕਾਯੇਨ ਪਚਨਾਦਿਕੁਸਲਾ.

ਆਵਹਨਂ ਆਵਾਹੋ, ਦਾਰਿਕਾਯ ਗਹਣਂ. ਵਿਧਿਨਾ ਪਰਕੁਲੇ ਵਹਨਂ ਪੇਸਨਂ ਵਿਵਾਹੋ, ਦਾਰਿਕਾਯ ਦਾਨਂ.

੨੯੭. ਰਨ੍ਧਾਪਨਂ ਭਤ੍ਤਪਚਾਪਨਂ. ਬ੍ਯਞ੍ਜਨਾਦਿਸਮ੍ਪਾਦਨਂ ਪਚਾਪਨਂ. ਨ ਉਪਾਹਟਨ੍ਤਿ ਨ ਦਿਨ੍ਨਂ. ਕਯੋ ਨਾਮ ਗਹਣਂ. ਵਿਕ੍ਕਯੋ ਨਾਮ ਦਾਨਂ. ਤਦੁਭਯਂ ਸਙ੍ਗਹੇਤ੍ਵਾ ‘‘ਵੋਹਾਰੋ’’ਤਿ ਵੁਤ੍ਤਂ.

੩੦੦. ‘‘ਅਬ੍ਭੁਤਂ ਕਾਤੁਂ ਨ ਵਟ੍ਟਤੀ’’ਤਿ ਇਮਿਨਾ ਦੁਕ੍ਕਟਂ ਹੋਤੀਤਿ ਦੀਪੇਤਿ. ‘‘ਪਰਾਜਿਤੇਨ ਦਾਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਅਦੇਨ੍ਤੋ ਧੁਰਨਿਕ੍ਖੇਪੇਨ ਕਾਰੇਤਬ੍ਬੋ. ਅਚਿਰਕਾਲੇ ਅਧਿਕਾਰੋ ਏਤਸ੍ਸ ਅਤ੍ਥੀਤਿ ਅਚਿਰਕਾਲਾਧਿਕਾਰਿਕਂ, ਸਞ੍ਚਰਿਤ੍ਤਂ. ‘‘ਅਚਿਰਕਾਲਾਚਾਰਿਕ’’ਨ੍ਤਿ ਵਾ ਪਾਠੋ. ਅਚਿਰਕਾਲੇ ਆਚਾਰੋ ਅਜ੍ਝਾਚਾਰੋ ਏਤਸ੍ਸਾਤਿ ਯੋਜਨਾ.

੩੦੧. ਕਿਞ੍ਚਾਪਿ ਏਹਿਭਿਕ੍ਖੁਆਦਿਕਾਪਿ ਸਞ੍ਚਰਿਤ੍ਤਾਦਿਪਣ੍ਣਤ੍ਤਿਵਜ੍ਜਂ ਆਪਤ੍ਤਿਂ ਆਪਜ੍ਜਨ੍ਤਿ, ਤੇਸਂ ਪਨ ਅਸਬ੍ਬਕਾਲਿਕਤ੍ਤਾ, ਅਪ੍ਪਕਤ੍ਤਾ ਚ ਇਧਾਪਿ ਞਤ੍ਤਿਚਤੁਤ੍ਥੇਨੇਵ ਕਮ੍ਮੇਨ ਉਪਸਮ੍ਪਨ੍ਨਂ ਸਨ੍ਧਾਯ ‘‘ਯ੍ਵਾਯ’’ਨ੍ਤਿਆਦਿਪਦਭਾਜਨਮਾਹ. ਸਞ੍ਚਰਣਂ ਸਞ੍ਚਰੋ, ਸੋ ਏਤਸ੍ਸ ਅਤ੍ਥੀਤਿ ਸਞ੍ਚਰੀ, ਤਸ੍ਸ ਭਾਵੋ ਸਞ੍ਚਰਿਤ੍ਤਂ. ਤੇਨਾਹ ‘‘ਸਞ੍ਚਰਣਭਾਵ’’ਨ੍ਤਿ. ਸਞ੍ਚਰਤੀਤਿ ਸਞ੍ਚਰਣੋ, ਪੁਗ੍ਗਲੋ, ਤਸ੍ਸ ਭਾਵੋ ਸਞ੍ਚਰਣਭਾਵੋ, ਤਂ ਇਤ੍ਥਿਪੁਰਿਸਾਨਂ ਅਨ੍ਤਰੇ ਸਞ੍ਚਰਣਭਾਵਨ੍ਤਿ ਅਤ੍ਥੋ.

ਜਾਯਾਭਾਵੇਤਿ ਭਰਿਯਭਾਵਾਯ. ਜਾਰਭਾਵੇਤਿ ਸਾਮਿਭਾਵਾਯ, ਤਂਨਿਮਿਤ੍ਤਨ੍ਤਿ ਅਤ੍ਥੋ. ਨਿਮਿਤ੍ਤਤ੍ਥੇ ਹਿ ਏਤਂ ਭੁਮ੍ਮਵਚਨਂ. ਕਿਞ੍ਚਾਪਿ ‘‘ਜਾਰਤ੍ਤਨੇ’’ਤਿ ਪਦਸ੍ਸ ਪਦਭਾਜਨੇ ‘‘ਜਾਰੀ ਭਵਿਸ੍ਸਸੀ’’ਤਿ (ਪਾਰਾ. ੩੦੨) ਇਤ੍ਥਿਲਿਙ੍ਗਵਸੇਨ ਪਦਭਾਜਨਂ ਵੁਤ੍ਤਂ, ‘‘ਸਞ੍ਚਰਿਤ੍ਤਂ ਸਮਾਪਜ੍ਜੇਯ੍ਯਾ’’ਤਿ ਪਦਸ੍ਸ ਪਨ ਨਿਦ੍ਦੇਸੇ ‘‘ਇਤ੍ਥਿਯਾ ਵਾ ਪਹਿਤੋ ਪੁਰਿਸਸ੍ਸ ਸਨ੍ਤਿਕੇ ਗਚ੍ਛਤਿ, ਪੁਰਿਸੇਨ ਵਾ ਪਹਿਤੋ ਇਤ੍ਥਿਯਾ ਸਨ੍ਤਿਕੇ ਗਚ੍ਛਤੀ’’ਤਿ ਵੁਤ੍ਤਤ੍ਤਾ ਪੁਰਿਸਸ੍ਸਾਪਿ ਸਨ੍ਤਿਕੇ ਵਤ੍ਤਬ੍ਬਾਕਾਰਂ ਦਸ੍ਸੇਤੁਂ ‘‘ਜਾਰਤ੍ਤਨੇ’’ਤਿ ਨਿਦ੍ਦੇਸਸ੍ਸ ਇਤ੍ਥਿਪੁਰਿਸਸਾਧਾਰਣਤ੍ਤਾ ‘‘ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਨ੍ਤੋ ਜਾਰਤ੍ਤਨੇ ਆਰੋਚੇਤੀ’’ਤਿ ਵੁਤ੍ਤਂ. ਪਾਲ਼ਿਯਂ ਪਨ ਪੁਰਿਸਸ੍ਸ ਮਤਿਂ ਇਤ੍ਥਿਯਾ ਆਰੋਚਨਵਸੇਨੇਵ ਪਦਦ੍ਵਯੇਪਿ ਯੋਜਨਾ ਕਤਾ, ਤਦਨੁਸਾਰੇਨ ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚਨਾਕਾਰੋਪਿ ਸਕ੍ਕਾ ਵਿਞ੍ਞਾਤੁਨ੍ਤਿ.

ਇਦਾਨਿ ਪਾਲ਼ਿਯਂ ਵੁਤ੍ਤਨਯੇਨਾਪਿ ਅਤ੍ਥਂ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ‘‘ਪਤਿ ਭਵਿਸ੍ਸਸੀ’’ਤਿ ਇਦਂ ਜਾਯਾਸਦ੍ਦਸ੍ਸ ਇਤ੍ਥਿਲਿਙ੍ਗਨਿਯਮਤੋ ਪੁਰਿਸਪਰਿਯਾਯੇਨ ਵੁਤ੍ਤਂ, ਨਿਬਦ੍ਧਸਾਮਿਕੋ ਭਵਿਸ੍ਸਸੀਤਿ ਅਤ੍ਥੋ. ਜਾਰੋ ਭਵਿਸ੍ਸਸੀਤਿ ਮਿਚ੍ਛਾਚਾਰਭਾਵੇਨ ਉਪਗਚ੍ਛਨਕੋ ਭਵਿਸ੍ਸਸੀਤਿ ਅਧਿਪ੍ਪਾਯੋ.

੩੦੩. ਸੇਰਿਵਿਹਾਰਨ੍ਤਿ ਸਚ੍ਛਨ੍ਦਚਾਰਂ. ਅਤ੍ਤਨੋ ਵਸਨ੍ਤਿ ਅਤ੍ਤਨੋ ਆਣਂ. ਗੋਤ੍ਤਵਨ੍ਤੇਸੁ ਗੋਤ੍ਤ-ਸਦ੍ਦੋ, ਧਮ੍ਮਚਾਰੀਸੁ ਚ ਧਮ੍ਮ-ਸਦ੍ਦੋ ਵਤ੍ਤਤੀਤਿ ਆਹ ‘‘ਸਗੋਤ੍ਤੇਹੀ’’ਤਿਆਦਿ. ਤਤ੍ਥ ਸਗੋਤ੍ਤੇਹੀਤਿ ਸਮਾਨਗੋਤ੍ਤੇਹਿ. ਸਹਧਮ੍ਮਿਕੇਹੀਤਿ ਏਕਸ੍ਸ ਸਤ੍ਥੁ ਸਾਸਨੇ ਸਹਚਰਿਤਬ੍ਬਧਮ੍ਮੇਹਿ, ਸਮਾਨਕੁਲਧਮ੍ਮੇਹਿ ਵਾ. ਤੇਨੇਵਾਹ ‘‘ਏਕਂ ਸਤ੍ਥਾਰ’’ਨ੍ਤਿਆਦਿ. ਏਕਗਣਪਰਿਯਾਪਨ੍ਨੇਹੀਤਿ ਮਾਲਾਕਾਰਾਦਿਏਕਗਣਪਰਿਯਾਪਨ੍ਨੇਹਿ.

ਸਸ੍ਸਾਮਿਕਾ ਸਾਰਕ੍ਖਾ. ਯਸ੍ਸਾ ਗਮਨੇ ਰਞ੍ਞਾ ਦਣ੍ਡੋ ਠਪਿਤੋ, ਸਾ ਸਪਰਿਦਣ੍ਡਾ. ਪਚ੍ਛਿਮਾਨਂ ਦ੍ਵਿਨ੍ਨਨ੍ਤਿ ਸਾਰਕ੍ਖਸਪਰਿਦਣ੍ਡਾਨਂ. ਮਿਚ੍ਛਾਚਾਰੋ ਹੋਤੀਤਿ ਤਾਸੁ ਗਤਪੁਰਿਸਾਨਂ ਵਿਯ ਤਾਸਮ੍ਪਿ ਮਿਚ੍ਛਾਚਾਰੋ ਹੋਤਿ ਸਸ੍ਸਾਮਿਕਭਾਵਤੋ. ਨ ਇਤਰਾਸਨ੍ਤਿ ਮਾਤੁਰਕ੍ਖਿਤਾਦੀਨਂ ਅਟ੍ਠਨ੍ਨਂ ਮਿਚ੍ਛਾਚਾਰੋ ਨਤ੍ਥਿ ਅਸ੍ਸਾਮਿਕਤ੍ਤਾ, ਤਾਸੁ ਗਤਾਨਂ ਪੁਰਿਸਾਨਮੇਵ ਮਿਚ੍ਛਾਚਾਰੋ ਹੋਤਿ ਮਾਤਾਦੀਹਿ ਰਕ੍ਖਿਤਤ੍ਤਾ. ਪੁਰਿਸਾ ਹਿ ਪਰੇਹਿ ਯੇਹਿ ਕੇਹਿਚਿ ਗੋਪਿਤਂ ਇਤ੍ਥਿਂ ਗਨ੍ਤੁਂ ਨ ਲਭਨ੍ਤਿ, ਇਤ੍ਥਿਯੋ ਪਨ ਕੇਨਚਿ ਪੁਰਿਸੇਨ ਭਰਿਯਾਭਾਵੇਨ ਗਹਿਤਾਵ ਪੁਰਿਸਨ੍ਤਰਂ ਗਨ੍ਤੁਂ ਨ ਲਭਨ੍ਤਿ, ਨ ਇਤਰਾ ਅਤ੍ਤਨੋ ਫਸ੍ਸਸ੍ਸ ਸਯਂ ਸਾਮਿਕਤ੍ਤਾ. ਨ ਹਿ ਮਾਤਾਦਯੋ ਸਯਂ ਤਾਸਂ ਫਸ੍ਸਾਨੁਭਵਨਤ੍ਥਂ ਤਾ ਰਕ੍ਖਨ੍ਤਿ, ਕੇਵਲਂ ਪੁਰਿਸਗਮਨਮੇਵ ਤਾਸਂ ਵਾਰੇਨ੍ਤਿ. ਤਸ੍ਮਾ ਕੇਨਚਿ ਅਪਰਿਗ੍ਗਹਿਤਫਸ੍ਸਤ੍ਤਾ, ਅਤ੍ਤਨੋ ਫਸ੍ਸਤ੍ਤਾ ਚ ਇਤ੍ਥੀਨਂ ਨ ਮਿਚ੍ਛਾਚਾਰੋ, ਪੁਰਿਸਾਨਂ ਪਨ ਪਰੇਹਿ ਵਾਰਿਤੇ ਅਤ੍ਤਨੋ ਅਸਨ੍ਤਕਟ੍ਠਾਨੇ ਪਵਿਟ੍ਠਤ੍ਤਾ ਮਿਚ੍ਛਾਚਾਰੋਤਿ ਵੇਦਿਤਬ੍ਬੋ.

ਭੋਗੇਨਾਤਿ ਭੋਗਹੇਤੁ. ਉਦਪਤ੍ਤਂ ਆਮਸਿਤ੍ਵਾ ਗਹਿਤਾ ਓਦਪਤ੍ਤਕਿਨੀ. ਧਜ-ਸਦ੍ਦੇਨ ਸੇਨਾ ਏਵ ਉਪਲਕ੍ਖਿਤਾਤਿ ਆਹ ‘‘ਉਸ੍ਸਿਤਦ੍ਧਜਾਯਾ’’ਤਿਆਦਿ.

੩੦੫. ਬਹਿਦ੍ਧਾ ਵਿਮਟ੍ਠਨ੍ਤਿ ਅਞ੍ਞਤ੍ਥ ਆਰੋਚਿਤਂ. ਤਂ ਕਿਰਿਯਂ ਸਮ੍ਪਾਦੇਸ੍ਸਤੀਤਿ ਤਸ੍ਸਾ ਆਰੋਚੇਤ੍ਵਾ ਤਂ ਕਿਚ੍ਚਂ ਸਮ੍ਪਾਦੇਤੁ ਵਾ ਮਾ ਵਾ, ਤਂ ਕਿਰਿਯਂ ਸਮ੍ਪਾਦਨੇ ਸਾਮਤ੍ਥਿਯਂ ਸਨ੍ਧਾਯ ਵੁਤ੍ਤਂ. ਦਾਰਕਂ, ਦਾਰਿਕਞ੍ਚ ਅਜਾਨਾਪੇਤ੍ਵਾ ਮਾਤਾਪਿਤੁਆਦੀਹਿ ਮਾਤਾਪਿਤੁਆਦੀਨਞ੍ਞੇਵ ਸਨ੍ਤਿਕਂ ਸਾਸਨੇ ਪੇਸਿਤੇਪਿ ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਸਙ੍ਖਾਤਾਯ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ ਹੋਤਿ ਏਵਾਤਿ ਦਟ੍ਠਬ੍ਬਂ.

ਯਂ ਉਦ੍ਦਿਸ੍ਸ ਸਾਸਨਂ ਪੇਸਿਤਂ, ਤਂ ਏਵ ਸਨ੍ਧਾਯ ਤਸ੍ਸਾ ਮਾਤੁਆਦੀਨਂ ਆਰੋਚਿਤੇਪਿ ਖੇਤ੍ਤਮੇਵ ਓਤਿਣ੍ਣਭਾਵਂ ਦਸ੍ਸੇਤੁਂ ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿਆਦਿ ਉਦਾਹਟਂ, ਇਦਞ੍ਚ ਵਚਨਬ੍ਯਤ੍ਤਯਹੇਤੁਬ੍ਯਤ੍ਤਯਾਨਂ ਭੇਦੇਪਿ ਬ੍ਯਤ੍ਤਯਸਾਮਞ੍ਞਤੋ ਉਦਾਹਟਨ੍ਤਿ ਦਟ੍ਠਬ੍ਬਂ. ਤਮ੍ਪਿ ਉਦਾਹਰਣਦੋਸਂ ਪਰਿਹਰਿਤ੍ਵਾ ਸੁਤ੍ਤਾਨੁਲੋਮਤਂ ਦਸ੍ਸੇਤੁਂ ‘‘ਤਂ ਪਨਾ’’ਤਿਆਦਿ ਵੁਤ੍ਤਂ. ਇਮਿਨਾ ਸਮੇਤੀਤਿ ਏਤ੍ਥਾਯਮਧਿਪ੍ਪਾਯੋ – ਯਥਾ ਸਯਂ ਅਨਾਰੋਚੇਤ੍ਵਾ ਅਞ੍ਞੇਸਂ ਅਨ੍ਤੇਵਾਸਿਕਾਦੀਨਂ ਵਤ੍ਵਾ ਵੀਮਂਸਾਪੇਤ੍ਵਾ ਪਚ੍ਚਾਹਰਨ੍ਤਸ੍ਸ ਨਤ੍ਥਿ ਵਿਸਙ੍ਕੇਤੋ, ਏਵਂ ਤਸ੍ਸਾ ਸਯਂ ਅਨਾਰੋਚੇਤ੍ਵਾ ਆਰੋਚਨਤ੍ਥਂ ਮਾਤੁਆਦੀਨਂ ਵਦਨ੍ਤਸ੍ਸਾਪਿ ਮਾਤੁਆਦਯੋ ਤਂ ਕਿਰਿਯਂ ਸਮ੍ਪਾਦੇਨ੍ਤੁ ਵਾ ਮਾ ਵਾ. ਯਦਿ ਹਿ ਤੇਸਂ ਮਾਤੁਆਦੀਨਂ ਤੁਣ੍ਹੀਭੂਤਭਾਵਮ੍ਪਿ ਪਚ੍ਚਾਹਰਤਿ, ਵਿਸਙ੍ਕੇਤੋ ਨਤ੍ਥੀਤਿ.

ਘਰਕਿਚ੍ਚਂ ਨੇਤੀਤਿ ਘਰਣੀ. ਅਞ੍ਞਤਰਂ ਵਦਨ੍ਤਸ੍ਸ ਵਿਸਙ੍ਕੇਤਂ ਅਦਿਨ੍ਨਾਦਾਨਾਦੀਸੁ ਆਣਤ੍ਤਿਯਂ ਵਤ੍ਥੁਸਙ੍ਕੇਤੋ ਵਿਯਾਤਿ ਅਧਿਪ੍ਪਾਯੋ. ਮੂਲਟ੍ਠਾਨਞ੍ਚ ਵਸੇਨਾਤਿ ਏਤ੍ਥ ਪੁਰਿਸਸ੍ਸ ਮਾਤੁਆਦਯੋ ਸਾਸਨਪੇਸਨੇ ਮੂਲਭੂਤਤ੍ਤਾ ‘‘ਮੂਲਟ੍ਠਾ’’ਤਿ ਵੁਤ੍ਤਾ.

੩੨੨. ਪਾਲ਼ਿਯਂ ਮਾਤੁਰਕ੍ਖਿਤਾਯ ਮਾਤਾ ਭਿਕ੍ਖੁਂ ਪਹਿਣਤੀਤਿ ਏਤ੍ਥ ਅਤ੍ਤਨੋ ਵਾ ਧੀਤੁ ਸਨ੍ਤਿਕਂ ‘‘ਇਤ੍ਥਨ੍ਨਾਮਸ੍ਸ ਭਰਿਯਾ ਹੋਤੂ’’ਤਿ ਭਿਕ੍ਖੁਂ ਪਹਿਣਤਿ, ਪੁਰਿਸਸ੍ਸ ਵਾ ਤਸ੍ਸ ਞਾਤਕਾਨਂ ਵਾ ਸਨ੍ਤਿਕਂ ‘‘ਮਮ ਧੀਤਾ ਇਤ੍ਥਨ੍ਨਾਮਸ੍ਸ ਭਰਿਯਾ ਹੋਤੂ’’ਤਿ ਪਹਿਣਤੀਤਿ ਗਹੇਤਬ੍ਬਂ. ਏਸੇਵ ਨਯੋ ਸੇਸੇਸੁਪਿ. ਪੁਬ੍ਬੇ ਵੁਤ੍ਤਨਯਤ੍ਤਾਤਿ ਪਠਮਸਙ੍ਘਾਦਿਸੇਸੇ ਵੁਤ੍ਤਨਯਤ੍ਤਾ.

੩੩੮. ਅਨ੍ਤੇ ਏਕੇਨਾਤਿ ਏਕੇਨ ਪਦੇਨ. ਏਤ੍ਤੋਵ ਪਕ੍ਕਮਤੀਤਿ ਅਪਚ੍ਚਾਹਰਿਤ੍ਵਾ ਤਤੋਵ ਪਕ੍ਕਮਤਿ. ‘‘ਅਨਭਿਨਨ੍ਦਿਤ੍ਵਾ’’ਤਿ ਇਦਂ ਤਥਾ ਪਟਿਪਜ੍ਜਮਾਨਂ ਸਨ੍ਧਾਯ ਵੁਤ੍ਤਂ. ਸਤਿਪਿ ਅਭਿਨਨ੍ਦਨੇ ਸਾਸਨਂ ਅਨਾਰੋਚੇਨ੍ਤੋ ਪਨ ਨ ਵੀਮਂਸਤਿ ਨਾਮ. ਤਤਿਯਪਦੇ ਵੁਤ੍ਤਨਯੇਨਾਤਿ ‘‘ਸੋ ਤਸ੍ਸਾ ਵਚਨਂ ਅਨਭਿਨਨ੍ਦਿਤ੍ਵਾ’’ਤਿਆਦਿਨਾ ਵੁਤ੍ਤਨਯੇਨ. ਪਾਲ਼ਿਯਂ ਅਨ੍ਤੇਵਾਸਿਂ ਵੀਮਂਸਾਪੇਤ੍ਵਾਤਿ ‘‘ਅਯਂ ਤੇਸਂ ਵਤ੍ਤੁਂ ਸਮਤ੍ਥੋ’’ਤਿ ਅਨ੍ਤੇਵਾਸਿਨਾ ਵੀਮਂਸਾਪੇਤ੍ਵਾ. ਸਚੇ ਪਨ ਸੋ ਅਨ੍ਤੇਵਾਸਿਕੋ ਤਂ ਵਚਨਂ ਆਦਿਯਿਤ੍ਵਾ ਤੁਣ੍ਹੀ ਹੋਤਿ, ਤਸ੍ਸਾਪਿ ਤਂ ਪਵਤ੍ਤਿਂ ਪਚ੍ਚਾਹਰਨ੍ਤਸ੍ਸ ਆਚਰਿਯਸ੍ਸ ਸਙ੍ਘਾਦਿਸੇਸੋਵ ਮਾਤੁਆਦੀਸੁ ਤੁਣ੍ਹੀਭੂਤੇਸੁ ਤੇਸਂ ਤੁਣ੍ਹਿਭਾਵਂ ਪਚ੍ਚਾਹਰਨ੍ਤਸ੍ਸ ਵਿਯਾਤਿ ਦਟ੍ਠਬ੍ਬਂ.

ਪਾਲ਼ਿਯਂ ਚਤੁਤ੍ਥਵਾਰੇ ਅਸਤਿਪਿ ਗਚ੍ਛਨ੍ਤੋ ਸਮ੍ਪਾਦੇਤਿ, ਆਗਚ੍ਛਨ੍ਤੋ ਵਿਸਂਵਾਦੇਤਿ ਅਨਾਪਤ੍ਤੀਤਿ ਅਤ੍ਥਤੋ ਆਪਨ੍ਨਮੇਵਾਤਿਕਤ੍ਵਾ ਵੁਤ੍ਤਂ ‘‘ਚਤੁਤ੍ਥੇ ਅਨਾਪਤ੍ਤੀ’’ਤਿ.

੩੪੦. ਕਾਰੁਕਾਨਨ੍ਤਿ ਵਡ੍ਢਕੀਆਦੀਨਂ ਤਚ੍ਛਕਅਯੋਕਾਰਤਨ੍ਤਵਾਯਰਜਕਨ੍ਹਾਪਿਤਕਾ ਪਞ੍ਚ ਕਾਰਵੋ ‘‘ਕਾਰੁਕਾ’’ਤਿ ਵੁਚ੍ਚਨ੍ਤਿ. ਏਵਰੂਪੇਨ…ਪੇ… ਅਨਾਪਤ੍ਤੀਤਿ ਤਾਦਿਸਂ ਗਿਹਿਵੇਯ੍ਯਾਵਚ੍ਚਮ੍ਪਿ ਨ ਹੋਤੀਤਿ ਕਤ੍ਵਾ ਵੁਤ੍ਤਂ.

ਕਾਯਤੋ ਸਮੁਟ੍ਠਾਤੀਤਿ ਪਣ੍ਣਤ੍ਤਿਂ ਵਾ ਅਲਂਵਚਨੀਯਭਾਵਂ ਵਾ ਤਦੁਭਯਂ ਵਾ ਅਜਾਨਨ੍ਤਸ੍ਸ ਕਾਯਤੋ ਸਮੁਟ੍ਠਾਤਿ. ਏਸ ਨਯੋ ਇਤਰਦ੍ਵਯੇਪਿ. ਅਲਂਵਚਨੀਯਾ ਹੋਨ੍ਤੀਤਿ ਇਤ੍ਥੀ ਵਾ ਪੁਰਿਸੋ ਵਾ ਉਭੋਪਿ ਵਾ ਜਾਯਾਭਾਵੇ, ਸਾਮਿਕਭਾਵੇ ਚ ਨਿਕ੍ਖਿਤ੍ਤਛਨ੍ਦਤਾਯ ਅਚ੍ਚਨ੍ਤਵਿਯੁਤ੍ਤਤ੍ਤਾ ਪੁਨ ਅਞ੍ਞਮਞ੍ਞਂ ਸਮਾਗਮਤ੍ਥਂ ‘‘ਮਾ ਏਵਂ ਅਕਰਿਤ੍ਥਾ’’ਤਿਆਦਿਨਾ ਵਚਨੀਯਤਾਯ ਵਤ੍ਤਬ੍ਬਤਾਯ ਅਲਂ ਅਰਹਾਤਿ ਅਲਂਵਚਨੀਯਾ, ਅਲਂ ਵਾ ਕਤ੍ਤੁਂ ਅਰਹਂ ਸਨ੍ਧਾਨਵਚਨਮੇਤੇਸੁ ਇਤ੍ਥਿਪੁਰਿਸੇਸੂਤਿ ਅਲਂਵਚਨੀਯਾ, ਸਨ੍ਧਾਨਕਾਰਸ੍ਸ ਵਚਨਂ ਵਿਨਾ ਅਸਙ੍ਗਚ੍ਛਨਕਾ ਪਰਿਚ੍ਚਤ੍ਤਾਯੇਵਾਤਿ ਅਧਿਪ੍ਪਾਯੋ.

ਪਣ੍ਣਤ੍ਤਿਂ ਪਨ ਜਾਨਿਤ੍ਵਾਤਿ ਏਤ੍ਥ ਅਲਂਵਚਨੀਯਭਾਵਂ ਵਾਤਿ ਵਤ੍ਤਬ੍ਬਂ. ਤੇਨੇਵ ਮਾਤਿਕਾਟ੍ਠਕਥਾਯਞ੍ਚ ‘‘ਤਦੁਭਯਂ ਪਨ ਜਾਨਿਤ੍ਵਾ’’ਤਿਆਦਿ ਵੁਤ੍ਤਂ. ਭਿਕ੍ਖੁਂ ਅਜਾਨਾਪੇਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਣ੍ਣੇ ਲਿਖਿਤ੍ਵਾ ‘‘ਇਮਂ ਪਣ੍ਣਂ ਅਸੁਕਸ੍ਸ ਦੇਹੀ’’ਤਿ ਦਿਨ੍ਨਂ ਹਰਨ੍ਤਸ੍ਸ ਸਞ੍ਚਰਿਤ੍ਤਂ ਨ ਹੋਤਿ. ਪਣ੍ਣਤ੍ਤਿਅਲਂਵਚਨੀਯਭਾਵਅਜਾਨਨਵਸੇਨੇਵ ਹਿ ਇਮਂ ਸਿਕ੍ਖਾਪਦਂ ਅਚਿਤ੍ਤਕਂ, ਨ ਸਬ੍ਬੇਨ ਸਬ੍ਬਂ ਸਞ੍ਚਰਣਭਾਵਮ੍ਪਿ ਅਜਾਨਨਵਸੇਨ, ਪਾਲ਼ਿਯਞ੍ਚ ਅਟ੍ਠਕਥਾਯਞ੍ਚ ਆਰੋਚਨਮੇਵ ਦਸ੍ਸਿਤਂ. ਤਸ੍ਮਾ ਸਨ੍ਦਸ੍ਸਨਤ੍ਥਂ ਞਤ੍ਵਾ ਪਣ੍ਣਸਨ੍ਦਸ੍ਸਨਵਸੇਨਾਪਿ ਕਾਯੇਨ ਵਾ ਵਾਚਾਯ ਵਾ ਆਰੋਚੇਨ੍ਤਸ੍ਸੇਵ ਆਪਤ੍ਤਿ ਹੋਤੀਤਿ ਗਹੇਤਬ੍ਬਂ.

੩੪੧. ਯਥਾ ਯਥਾ ਯੇਸੁ ਯੇਸੁ ਜਨਪਦੇਸੂਤਿ ਪਰਿਚ੍ਚਤ੍ਤਭਾਵਪ੍ਪਕਾਸਨਤ੍ਥਂ ਕਤ੍ਤਬ੍ਬਂ ਪਣ੍ਣਦਾਨਞਾਤਿਜਨਿਸ੍ਸਰਾਦਿਜਾਨਾਪਨਾਦਿਤਂਤਂਦੇਸਨਿਯਤਂ ਪਕਾਰਂ ਦਸ੍ਸੇਤਿ, ਇਦਞ੍ਚ ਨਿਬਦ੍ਧਭਰਿਯਾਭਾਵੇਨ ਗਹਿਤਂ ਸਨ੍ਧਾਯ ਵੁਤ੍ਤਂ. ਅਤ੍ਤਨੋ ਰੁਚਿਯਾ ਸਙ੍ਗਤਾਨਂ ਪਨ ਇਤ੍ਥੀਨਂ, ਮੁਹੁਤ੍ਤਿਕਾਯ ਚ ਪੁਰਿਸੇ ਚਿਤ੍ਤਸ੍ਸ ਵਿਰਜ੍ਜਨਮੇਵ ਅਲਂਵਚਨੀਯਭਾਵੇ ਕਾਰਣਨ੍ਤਿ ਦਟ੍ਠਬ੍ਬਂ. ਦੁਟ੍ਠੁਲ੍ਲਾਦੀਸੁਪੀਤਿ ਆਦਿ-ਸਦ੍ਦੇਨ ਅਤ੍ਤਕਾਮਸਞ੍ਚਰਿਤ੍ਤਾਨਿ ਸਙ੍ਗਣ੍ਹਾਤਿ, ਏਤ੍ਥ ਪਨ ਪਾਲ਼ਿਯਂ ਕਿਞ੍ਚਾਪਿ ‘‘ਇਤ੍ਥੀ ਨਾਮ ਮਨੁਸ੍ਸਿਤ੍ਥੀ ਨ ਯਕ੍ਖੀ’’ਤਿਆਦਿਨਾ ਮਨੁਸ੍ਸਿਤ੍ਥਿਪੁਰਿਸਾ ਨ ਦਸ੍ਸਿਤਾ, ਤਥਾਪਿ ‘‘ਦਸ ਇਤ੍ਥਿਯੋ ਮਾਤੁਰਕ੍ਖਿਤਾ’’ਤਿਆਦਿਨਾ ਮਨੁਸ੍ਸਿਤ੍ਥੀਨਞ੍ਞੇਵ ਦਸ੍ਸਿਤਤ੍ਤਾ ਪੁਰਿਸਾਨਮ੍ਪਿ ਤਦਨੁਗੁਣਾਨਮੇਵ ਗਹੇਤਬ੍ਬਤੋ ਮਨੁਸ੍ਸਜਾਤਿਕਾਵ ਇਤ੍ਥਿਪੁਰਿਸਾ ਇਧਾਧਿਪ੍ਪੇਤਾ. ਤਸ੍ਮਾ ਯੇਸੁ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਤੇਸਂ ਮਨੁਸ੍ਸਜਾਤਿਕਤਾ, ਨ ਨਾਲਂਵਚਨੀਯਤਾ, ਪਟਿਗ੍ਗਣ੍ਹਨ, ਵੀਮਂਸਨ, ਪਚ੍ਚਾਹਰਣਾਨੀਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਕੁਟਿਕਾਰਸਿਕ੍ਖਾਪਦਵਣ੍ਣਨਾ

੩੪੨. ਛਟ੍ਠੇ ਏਤ੍ਤਕੇਨਾਤਿ ਏਤ੍ਤਕੇਨ ਦਾਰੁਆਦਿਨਾ. ਅਪਰਿਚ੍ਛਿਨ੍ਨਪ੍ਪਮਾਣਾਯੋਤਿ ਅਪਰਿਚ੍ਛਿਨ੍ਨਦਾਰੁਆਦਿਪਮਾਣਾਯੋ. ਮੂਲਚ੍ਛੇਜ੍ਜਾਯਾਤਿ ਪਰਸਨ੍ਤਕਭਾਵਤੋ ਮੋਚੇਤ੍ਵਾ ਅਤ੍ਤਨੋ ਏਵ ਸਨ੍ਤਕਕਰਣਵਸੇਨਾਤਿ ਅਤ੍ਥੋ. ਏਵਂ ਯਾਚਤੋ ਅਞ੍ਞਾਤਕਵਿਞ੍ਞਤ੍ਤਿਦੁਕ੍ਕਟਞ੍ਚੇਵ ਦਾਸਪਟਿਗ੍ਗਹਣਦੁਕ੍ਕਟਞ੍ਚ ਹੋਤਿ ‘‘ਦਾਸਿਦਾਸਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦, ੧੯੪) ਵਚਨਂ ਨਿਸ੍ਸਾਯ ਅਟ੍ਠਕਥਾਸੁ ਪਟਿਕ੍ਖਿਤ੍ਤਤ੍ਤਾ. ਸਕਕਮ੍ਮਨ੍ਤਿ ਪਾਣਵਧਕਮ੍ਮਂ. ਇਦਞ੍ਚ ਪਾਣਾਤਿਪਾਤਦੋਸਪਰਿਹਾਰਾਯ ਦੁਕ੍ਕਟਂ ਵੁਤ੍ਤਂ, ਨ ਵਿਞ੍ਞਤ੍ਤਿਪਰਿਹਾਰਾਯ. ਅਨਿਯਮੇਤ੍ਵਾਪਿ ਨ ਯਾਚਿਤਬ੍ਬਾਤਿ ਸਾਮੀਚਿਦਸ੍ਸਨਤ੍ਥਂ ਵੁਤ੍ਤਂ, ਸੁਦ੍ਧਚਿਤ੍ਤੇਨ ਪਨ ਹਤ੍ਥਕਮ੍ਮਂ ਯਾਚਨ੍ਤਸ੍ਸ ਆਪਤ੍ਤਿ ਨਾਮ ਨਤ੍ਥਿ. ਯਦਿਚ੍ਛਕਂ ਕਾਰਾਪੇਤੁਂ ਵਟ੍ਟਤੀਤਿ ‘‘ਹਤ੍ਥਕਮ੍ਮਂ ਯਾਚਾਮਿ, ਦੇਥਾ’’ਤਿਆਦਿਨਾ ਅਯਾਚਿਤ੍ਵਾਪਿ ਵਟ੍ਟਤਿ. ਸਕਿਚ੍ਚਪਸੁਤਮ੍ਪਿ ਏਵਂ ਕਾਰਾਪੇਨ੍ਤਸ੍ਸ ਵਿਞ੍ਞਤ੍ਤਿ ਨਤ੍ਥਿ ਏਵ, ਸਾਮੀਚਿਦਸ੍ਸਨਤ੍ਥਂ ਪਨ ਵਿਭਜਿਤ੍ਵਾ ਵੁਤ੍ਤਂ.

ਸਬ੍ਬਕਪ੍ਪਿਯਭਾਵਦੀਪਨਤ੍ਥਨ੍ਤਿ ਸਬ੍ਬਸੋ ਕਪ੍ਪਿਯਭਾਵਦੀਪਨਤ੍ਥਂ. ਮੂਲਂ ਦੇਥਾਤਿ ਵਤ੍ਤੁਂ ਵਟ੍ਟਤੀਤਿ ‘‘ਮੂਲਂ ਦਸ੍ਸਾਮਾ’’ਤਿ ਪਠਮਂ ਵੁਤ੍ਤਤ੍ਤਾ ਵਿਞ੍ਞਤ੍ਤਿ ਵਾ ਮੂਲਨ੍ਤਿ ਵਚਨਸ੍ਸ ਕਪ੍ਪਿਯਾਕਪ੍ਪਿਯਵਤ੍ਥੁਸਾਮਞ੍ਞਵਚਨਤ੍ਤੇਪਿ ਨਿਟ੍ਠਿਤਭਤਿਕਿਚ੍ਚਾਨਂ ਦਾਪਨਤੋ ਅਕਪ੍ਪਿਯਵਤ੍ਥੁਸਾਦਿਯਨਂ ਵਾ ਨ ਹੋਤੀਤਿ ਕਤ੍ਵਾ ਵੁਤ੍ਤਂ. ਅਨਜ੍ਝਾਵੁਤ੍ਥਕਨ੍ਤਿ ਅਪਰਿਗ੍ਗਹਿਤਂ.

ਮਞ੍ਚ…ਪੇ… ਚੀਵਰਾਦੀਨਿ ਕਾਰਾਪੇਤੁਕਾਮੇਨਾਪੀਤਿਆਦੀਸੁ ਚੀਵਰਂ ਕਾਰਾਪੇਤੁਕਾਮਸ੍ਸ ਅਞ੍ਞਾਤਕਅਪ੍ਪਵਾਰਿਤਤਨ੍ਤਵਾਯੇਹਿ ਹਤ੍ਥਕਮ੍ਮਯਾਚਨਵਸੇਨ ਵਾਯਾਪਨੇ ਵਿਞ੍ਞਤ੍ਤਿਪਚ੍ਚਯਾ ਦੁਕ੍ਕਟਾਭਾਵੇਪਿ ਚੀਵਰਵਾਯਾਪਨਸਿਕ੍ਖਾਪਦੇਨ ਯਥਾਰਹਂ ਪਾਚਿਤ੍ਤਿਯਦੁਕ੍ਕਟਾਨਿ ਹੋਨ੍ਤੀਤਿ ਵੇਦਿਤਬ੍ਬਂ. ਅਕਪ੍ਪਿਯਕਹਾਪਣਾਦਿ ਨ ਦਾਤਬ੍ਬਨ੍ਤਿ ਕਪ੍ਪਿਯਮੁਖੇਨ ਲਦ੍ਧਮ੍ਪਿ ਹਤ੍ਥਕਮ੍ਮਕਰਣਤ੍ਥਾਯ ਇਮਸ੍ਸ ਕਹਾਪਣਂ ਦੇਹੀਤਿ ਵਤ੍ਵਾ ਦਾਨਂ ਨ ਵਟ੍ਟਤੀਤਿ ਵੁਤ੍ਤਂ. ਪੁਬ੍ਬੇ ਕਤਕਮ੍ਮਸ੍ਸ ਦਾਪਨੇ ਕਿਞ੍ਚਾਪਿ ਦੋਸੋ ਨ ਦਿਸ੍ਸਤਿ, ਤਥਾਪਿ ਅਸਾਰੁਪ੍ਪਮੇਵਾਤਿ ਵਦਨ੍ਤਿ. ਕਤਕਮ੍ਮਤ੍ਥਾਯਪਿ ਕਾਤਬ੍ਬਕਮ੍ਮਤ੍ਥਾਯਪਿ ਕਪ੍ਪਿਯਵੋਹਾਰੇਨ ਪਰਿਯਾਯਤੋ ਭਤਿਂ ਦਾਪੇਨ੍ਤਸ੍ਸ ਨਤ੍ਥਿ ਦੋਸੋ. ਵਤ੍ਤਨ੍ਤਿ ਚਾਰਿਤ੍ਤਂ, ਆਪਤ੍ਤਿ ਨ ਹੋਤੀਤਿ ਅਧਿਪ੍ਪਾਯੋ.

ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤਬ੍ਬਾਨੀਤਿ ਸਾਖਾਯ ਮਕ੍ਖਿਕਬੀਜਨੇਨ ਪਣ੍ਣਾਦਿਚ੍ਛੇਦੇ ਬੀਜਗਾਮਕੋਪਨਸ੍ਸ ਚੇਵ ਤਤ੍ਥ ਲਗ੍ਗਰਜਾਦਿਅਪ੍ਪਟਿਗ੍ਗਹਿਤਸ੍ਸ ਚ ਪਰਿਹਾਰਤ੍ਥਾਯ ਵੁਤ੍ਤਂ. ਤਦੁਭਯਾਸਙ੍ਕਾਯ ਅਸਤਿ ਤਥਾ ਅਕਰਣੇ ਦੋਸੋ ਨਤ੍ਥਿ. ਨਦੀਯਾਦੀਸੁ ਉਦਕਸ੍ਸ ਅਪਰਿਗ੍ਗਹਿਤਤਾਯ ‘‘ਆਹਰਾਤਿ ਵਤ੍ਤੁਂ ਵਟ੍ਟਤੀ’’ਤਿ ਵੁਤ੍ਤਂ. ‘‘ਨ ਆਹਟਂ ਪਰਿਭੁਞ੍ਜਿਤੁ’’ਨ੍ਤਿ ਵਚਨਤੋ ਵਿਞ੍ਞਤ੍ਤਿਯਾ ਆਪਨ੍ਨਂ ਦੁਕ੍ਕਟਂ ਦੇਸੇਤ੍ਵਾਪਿ ਤਂ ਵਤ੍ਥੁਂ ਪਰਿਭੁਞ੍ਜਨ੍ਤਸ੍ਸ ਪੁਨ ਪਰਿਭੋਗੇ ਦੁਕ੍ਕਟਮੇਵ, ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਵਟ੍ਟਤਿ. ‘‘ਅਲਜ੍ਜੀਹਿ ਪਨ ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਹਤ੍ਥਕਮ੍ਮਂ ਨ ਕਾਰੇਤਬ੍ਬ’’ਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਅਤ੍ਤਨੋ ਅਤ੍ਥਾਯ ਯਂਕਿਞ੍ਚਿ ਹਤ੍ਥਕਮ੍ਮਂ ਕਾਰੇਤੁਂ ਨ ਵਟ੍ਟਤਿ. ਯਂ ਪਨ ਅਲਜ੍ਜੀ ਨਿਵਾਰਿਯਮਾਨੋਪਿ ਬੀਜਨਾਦਿਂ ਕਰੋਤਿ, ਤਤ੍ਥ ਦੋਸੋ ਨਤ੍ਥਿ. ਚੇਤਿਯਕਮ੍ਮਾਦੀਨਿ ਪਨ ਤੇਹਿ ਕਾਰਾਪੇਤੁਂ ਵਟ੍ਟਤਿ. ਏਤ੍ਥ ਚ ‘‘ਅਲਜ੍ਜੀਹਿ ਸਾਮਣੇਰੇਹੀ’’ਤਿ ਵੁਤ੍ਤਤ੍ਤਾ ‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀ’’ਤਿਆਦਿ (ਪਰਿ. ੩੫੯) ਅਲਜ੍ਜੀਲਕ੍ਖਣਂ ਉਕ੍ਕਟ੍ਠਵਸੇਨ ਉਪਸਮ੍ਪਨ੍ਨੇ ਪਟਿਚ੍ਚ ਉਪਲਕ੍ਖਣਤੋ ਵੁਤ੍ਤਨ੍ਤਿ ਤਂਲਕ੍ਖਣਵਿਰਹਿਤਾਨਂ ਸਾਮਣੇਰਾਦੀਨਂ ਲਿਙ੍ਗਤ੍ਥੇਨਕਗੋਤ੍ਰਭੁਪਰਿਯੋਸਾਨਾਨਂ ਭਿਕ੍ਖੁਪਟਿਞ੍ਞਾਨਂ ਦੁਸ੍ਸੀਲਾਨਮ੍ਪਿ ਸਾਧਾਰਣਵਸੇਨ ਅਲਜ੍ਜਿਤਾਲਕ੍ਖਣਂ ਯਥਾਵਿਹਿਤਪਟਿਪਤ੍ਤਿਯਂ ਸਞ੍ਚਿਚ੍ਚ ਅਤਿਟ੍ਠਨਮੇਵਾਤਿ ਗਹੇਤਬ੍ਬਂ.

ਆਹਰਾਪੇਨ੍ਤਸ੍ਸ ਦੁਕ੍ਕਟਨ੍ਤਿ ਵਿਞ੍ਞਤ੍ਤਿਕ੍ਖਣੇ ਵਿਞ੍ਞਤ੍ਤਿਪਚ੍ਚਯਾ, ਪਟਿਲਾਭਕ੍ਖਣੇ ਗੋਣਾਨਂ ਸਾਦਿਯਨਪਚ੍ਚਯਾ ਚ ਦੁਕ੍ਕਟਂ. ਗੋਣਞ੍ਹਿ ਅਤ੍ਤਨੋ ਅਤ੍ਥਾਯ ਅਵਿਞ੍ਞਤ੍ਤਿਯਾ ਲਦ੍ਧਮ੍ਪਿ ਸਾਦਿਤੁਂ ਨ ਵਟ੍ਟਤਿ ‘‘ਹਤ੍ਥਿਗਵਸ੍ਸਵਲ਼ਵਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦, ੧੯੪) ਵੁਤ੍ਤਤ੍ਤਾ. ਤੇਨੇਵਾਹ ‘‘ਞਾਤਿਪਵਾਰਿਤਟ੍ਠਾਨਤੋਪਿ ਮੂਲਚ੍ਛੇਜ੍ਜਾਯ ਯਾਚਿਤੁਂ ਨ ਵਟ੍ਟਤੀ’’ਤਿ. ਏਤ੍ਥ ਚ ਵਿਞ੍ਞਤ੍ਤਿਦੁਕ੍ਕਟਾਭਾਵੇਪਿ ਅਕਪ੍ਪਿਯਵਤ੍ਥੁਯਾਚਨੇਪਿ ਪਟਿਗ੍ਗਹਣੇਪਿ ਦੁਕ੍ਕਟਮੇਵ. ਰਕ੍ਖਿਤ੍ਵਾਤਿ ਚੋਰਾਦਿਉਪਦ੍ਦਵਤੋ ਰਕ੍ਖਿਤ੍ਵਾ. ਜਗ੍ਗਿਤ੍ਵਾਤਿ ਤਿਣਦਾਨਾਦੀਹਿ ਪੋਸੇਤ੍ਵਾ.

ਞਾਤਿਪਵਾਰਿਤਟ੍ਠਾਨੇ ਪਨ ਵਟ੍ਟਤੀਤਿ ਸਕਟਸ੍ਸ ਸਮ੍ਪਟਿਚ੍ਛਿਤਬ੍ਬਤ੍ਤਾ ਮੂਲਚ੍ਛੇਜ੍ਜਵਸੇਨ ਯਾਚਿਤੁਂ ਵਟ੍ਟਤਿ. ਤਾਵਕਾਲਿਕਂ ਵਟ੍ਟਤੀਤਿ ਉਭਯਤ੍ਥਾਪਿ ਵਟ੍ਟਤੀਤਿ ਅਤ੍ਥੋ. ਵਾਸਿਆਦੀਨਿ ਪੁਗ੍ਗਲਿਕਾਨਿਪਿ ਵਟ੍ਟਨ੍ਤੀਤਿ ਆਹ ‘‘ਏਸ ਨਯੋ ਵਾਸੀ’’ਤਿਆਦਿ. ਵਲ੍ਲਿਆਦੀਸੁ ਚ ਪਰਪਰਿਗ੍ਗਹਿਤੇਸੁ ਚ ਏਸੇਵ ਨਯੋਤਿ ਯੋਜੇਤਬ੍ਬਂ. ‘‘ਗਰੁਭਣ੍ਡਪ੍ਪਹੋਨਕੇਸੁਯੇਵਾ’’ਤਿ ਇਦਂ ਵਿਞ੍ਞਤ੍ਤਿਂ ਸਨ੍ਧਾਯ ਵੁਤ੍ਤਂ. ਅਦਿਨ੍ਨਾਦਾਨੇ ਪਨ ਤਿਣਸਲਾਕਂ ਉਪਾਦਾਯ ਪਰਪਰਿਗ੍ਗਹਿਤਂ ਥੇਯ੍ਯਚਿਤ੍ਤੇਨ ਗਣ੍ਹਤੋ ਅਵਹਾਰੋ ਏਵ, ਭਣ੍ਡਗ੍ਘੇਨ ਕਾਰੇਤਬ੍ਬੋ. ਵਲ੍ਲਿਆਦੀਸੂਤਿ ਏਤ੍ਥ ਆਦਿ-ਸਦ੍ਦੇਨ ਪਾਲ਼ਿਆਗਤਾਨਂ (ਪਾਰਾ. ੩੪੯) ਵੇਲ਼ੁਆਦੀਨਂ ਸਙ੍ਗਹੋ. ਤਤ੍ਥ ਯਸ੍ਮਿਂ ਪਦੇਸੇ ਹਰਿਤਾਲਜਾਤਿਹਿਙ੍ਗੁਲਾਦਿ ਅਪ੍ਪਕਮ੍ਪਿ ਮਹਗ੍ਘਂ ਹੋਤਿ, ਤਤ੍ਥ ਤਂ ਤਾਲਪਕ੍ਕਪਮਾਣਤੋ ਊਨਮ੍ਪਿ ਗਰੁਭਣ੍ਡਮੇਵ, ਵਿਞ੍ਞਾਪੇਤੁਞ੍ਚ ਨ ਵਟ੍ਟਤਿ.

ਸਾਤਿ ਵਿਞ੍ਞਤ੍ਤਿ. ਪਰਿਕਥਾਦੀਸੁ ‘‘ਸੇਨਾਸਨਂ ਸਮ੍ਬਾਧ’’ਨ੍ਤਿਆਦਿਨਾ (ਵਿਸੁਦ੍ਧਿ. ੧.੧੯) ਪਰਿਯਾਯੇਨ ਕਥਨਂ ਪਰਿਕਥਾ ਨਾਮ. ਉਜੁਕਮੇਵ ਅਕਥੇਤ੍ਵਾ ‘‘ਭਿਕ੍ਖੂਨਂ ਕਿਂ ਪਾਸਾਦੋ ਨ ਵਟ੍ਟਤੀ’’ਤਿਆਦਿਨਾ (ਵਿਸੁਦ੍ਧਿ. ੧.੧੯) ਅਧਿਪ੍ਪਾਯੋ ਯਥਾਵਿਭੂਤੋ ਹੋਤਿ, ਏਵਂ ਭਾਸਨਂ ਓਭਾਸੋ ਨਾਮ. ਸੇਨਾਸਨਾਦਿਅਤ੍ਥਂ ਭੂਮਿਪਰਿਕਮ੍ਮਾਦਿਕਰਣਵਸੇਨ ਪਚ੍ਚਯੁਪ੍ਪਾਦਾਯ ਨਿਮਿਤ੍ਤਕਰਣਂ ਨਿਮਿਤ੍ਤਕਮ੍ਮਂ ਨਾਮ. ਉਕ੍ਕਮਨ੍ਤੀਤਿ ਅਪਗਚ੍ਛਨ੍ਤਿ.

੩੪੪. ਮਣਿ ਕਣ੍ਠੇ ਅਸ੍ਸਾਤਿ ਮਣਿਕਣ੍ਠੋ. ਦੇਵਵਣ੍ਣਨ੍ਤਿ ਦੇਵਤ੍ਤਭਾਵਂ.

੩੪੫. ਪਾਲ਼ਿਯਂ ਪਤ੍ਤੇਨ ਮੇ ਅਤ੍ਥੋਤਿ (ਪਾਰਾ. ੩੪੫) ਅਨਤ੍ਥਿਕਮ੍ਪਿ ਪਤ੍ਤੇਨ ਭਿਕ੍ਖੁਂ ਏਵਂ ਵਦਾਪੇਨ੍ਤੋ ਭਗਵਾ ਸੋਤ੍ਥਿਯਾ ਮਨ੍ਤਪਦਵਸੇਨ ਵਦਾਪੇਸਿ. ਸੋਪਿ ਭਿਕ੍ਖੁ ਭਗਵਤਾ ਆਣਤ੍ਤਵਚਨਂ ਵਦੇਮੀਤਿ ਅਵੋਚ, ਤੇਨਸ੍ਸ ਮੁਸਾ ਨ ਹੋਤਿ. ਅਥ ਵਾ ‘‘ਪਤ੍ਤੇਨ ਮੇ ਅਤ੍ਥੋ’’ਤਿ ਇਦਂ ‘‘ਪਤ੍ਤਂ ਦਦਨ੍ਤੂ’’ਤਿ ਇਮਿਨਾ ਸਮਾਨਤ੍ਥਨ੍ਤਿ ਦਟ੍ਠਬ੍ਬਂ. ਏਸ ਨਯੋ ਮਣਿਨਾ ਮੇ ਅਤ੍ਥੋਤਿ ਏਤ੍ਥਾਪਿ. ਤਸ੍ਮਾ ਅਞ੍ਞੇਸਮ੍ਪਿ ਏਵਰੂਪਂ ਕਥੇਨ੍ਤਸ੍ਸ, ਕਥਾਪੇਨ੍ਤਸ੍ਸ ਚ ਵਚਨਦੋਸੋ ਨਤ੍ਥੀਤਿ ਗਹੇਤਬ੍ਬਂ.

੩੪੯. ਉਦ੍ਧਂਮੁਖਂ ਲਿਤ੍ਤਾ ਉਲ੍ਲਿਤ੍ਤਾ, ਛਦਨਸ੍ਸ ਅਨ੍ਤੋ ਲਿਮ੍ਪਨ੍ਤਾ ਹਿ ਯੇਭੁਯ੍ਯੇਨ ਉਦ੍ਧਂਮੁਖਾ ਲਿਮ੍ਪਨ੍ਤਿ. ਤੇਨਾਹ ‘‘ਅਨ੍ਤੋਲਿਤ੍ਤਾ’’ਤਿ. ਅਧੋਮੁਖਂ ਲਿਤ੍ਤਾ ਅਵਲਿਤ੍ਤਾ. ਬਹਿ ਲਿਮ੍ਪਨ੍ਤਾ ਹਿ ਯੇਭੁਯ੍ਯੇਨ ਅਧੋਮੁਖਾ ਲਿਮ੍ਪਨ੍ਤਿ. ਤੇਨਾਹ ‘‘ਬਹਿਲਿਤ੍ਤਾ’’ਤਿ.

ਬ੍ਯਞ੍ਜਨਂ ਵਿਲੋਮਿਤਂ ਭਵੇਯ੍ਯਾਤਿ ਯਸ੍ਮਾ ‘‘ਕਾਰਯਮਾਨੇਨਾ’’ਤਿ ਇਮਸ੍ਸ ਹੇਤੁਕਤ੍ਤੁਵਚਨਸ੍ਸ ‘‘ਕਰੋਨ੍ਤੇਨਾ’’ਤਿ ਇਦਂ ਸੁਦ੍ਧਕਤ੍ਤੁਵਚਨਂ ਪਰਿਯਾਯਵਚਨਂ ਨ ਹੋਤਿ, ਤਸ੍ਮਾ ‘‘ਕਰੋਨ੍ਤੇਨ ਵਾ ਕਾਰਾਪੇਨ੍ਤੇਨ ਵਾ’’ਤਿ ਕਾਰਯਮਾਨੇਨਾਤਿ ਬਹੁਉਦ੍ਦੇਸਪਦਾਨੁਗੁਣਂ ਕਰਣਵਚਨੇਨੇਵ ਪਦਤ੍ਥਂ ਕਤ੍ਵਾ ਨਿਦ੍ਦੇਸੇ ਕਤੇ ਬ੍ਯਞ੍ਜਨਂ ਵਿਰੁਦ੍ਧਂ ਭਵੇਯ੍ਯ, ਤਥਾ ਪਨ ਪਦਤ੍ਥਵਸੇਨ ਅਦਸ੍ਸੇਤ੍ਵਾ ਸਾਮਤ੍ਥਿਯਤੋ ਸਿਦ੍ਧਮੇਵਤ੍ਥਂ ਦਸ੍ਸੇਤੁਂ ਪਚ੍ਚਤ੍ਤਵਸੇਨ ‘‘ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ’’ਤਿ ਪਦਭਾਜਨਂ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਅਤ੍ਥਮਤ੍ਤਮੇਵਾ’’ਤਿਆਦਿ. ਪਦਤ੍ਥਤੋ, ਸਾਮਤ੍ਥਿਯਤੋ ਚ ਲਬ੍ਭਮਾਨਂ ਅਤ੍ਥਮਤ੍ਤਮੇਵਾਤਿ ਅਤ੍ਥੋ. ਯਞ੍ਹਿ ਕਾਰਯਮਾਨੇਨ ਪਟਿਪਜ੍ਜਿਤਬ੍ਬਂ, ਤਂ ਕਰੋਨ੍ਤੇਨਾਪਿ ਪਟਿਪਜ੍ਜਿਤਬ੍ਬਮੇਵਾਤਿ ਇਦਮੇਤ੍ਥ ਸਾਮਤ੍ਥਿਯਂ ਦਟ੍ਠਬ੍ਬਂ.

ਉਦ੍ਦੇਸੋਤਿ ਸਾਮਿਭਾਵੇਨ ਉਦ੍ਦਿਸਿਤਬ੍ਬੋ. ਸੇਤਕਮ੍ਮਨ੍ਤਿ ਸੇਤਵਣ੍ਣਕਰਣਤ੍ਥਂ ਸੇਤਵਣ੍ਣਮਤ੍ਤਿਕਾਯ ਵਾ ਸੁਧਾਯ ਵਾ ਕਤਤਨੁਕਲੇਪੋ, ਤੇਨ ਪਨ ਸਹ ਮਿਨਿਯਮਾਨੇ ਪਮਾਣਾਤਿਕ੍ਕਨ੍ਤਂ ਹੋਤੀਤਿ ਸਙ੍ਕਾਨਿਵਾਰਣਤ੍ਥਂ ਆਹ ‘‘ਅਬ੍ਬੋਹਾਰਿਕ’’ਨ੍ਤਿ. ਤੇਨ ਪਮਾਣਾਤਿਕ੍ਕਨ੍ਤਵੋਹਾਰਂ ਨ ਗਚ੍ਛਤਿ ਕੁਟਿਯਾ ਅਨਙ੍ਗਤ੍ਤਾਤਿ ਅਧਿਪ੍ਪਾਯੋ.

ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਵੁਤ੍ਤਨਯਂ ਦਸ੍ਸੇਨ੍ਤੇਨ ‘‘ਵੁਤ੍ਤਞ੍ਹੇਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ‘‘ਆਯਾਮਤੋ ਚ ਵਿਤ੍ਥਾਰਤੋ ਚਾ’’ਤਿ ਅਵਤ੍ਵਾ ‘‘ਆਯਾਮਤੋ ਵਾ ਵਿਤ੍ਥਾਰਤੋ ਵਾ’’ਤਿ ਵਿਕਪ੍ਪਤ੍ਥਸ੍ਸ ਵਾ-ਸਦ੍ਦਸ੍ਸ ਵੁਤ੍ਤਤ੍ਤਾ ਏਕਤੋਭਾਗੇ ਵਡ੍ਢਿਤੇਪਿ ਆਪਤ੍ਤੀਤਿ ਪਕਾਸਿਤਨ੍ਤਿ ਅਧਿਪ੍ਪਾਯੋ. ਤਿਹਤ੍ਥਾਤਿ ਪਕਤਿਹਤ੍ਥੇਨ ਤਿਹਤ੍ਥਾ, ‘‘ਵਡ੍ਢਕੀਹਤ੍ਥੇਨਾ’’ਤਿਪਿ (ਸਾਰਤ੍ਥ. ਟੀ. ੨.੩੪੮-੩੪੯) ਵਦਨ੍ਤਿ, ਤਂ ‘‘ਯਤ੍ਥ…ਪੇ… ਅਯਂ ਕੁਟੀਤਿ ਸਙ੍ਖ੍ਯਂ ਨ ਗਚ੍ਛਤੀ’’ਤਿ ਇਮਿਨਾ ਵਿਰੁਜ੍ਝਤਿ ਵਡ੍ਢਕੀਹਤ੍ਥੇਨ ਤਿਹਤ੍ਥਾਯਪਿ ਕੁਟਿਯਾ ਪਮਾਣਯੁਤ੍ਤਸ੍ਸ ਮਞ੍ਚਸ੍ਸ ਸੁਖੇਨ ਪਰਿਵਤ੍ਤਨਤੋ. ‘‘ਊਨਕਚਤੁਹਤ੍ਥਾ ਵਾ’’ਤਿ ਇਦਞ੍ਚ ਪਚ੍ਛਿਮਪ੍ਪਮਾਣਯੁਤ੍ਤਸ੍ਸ ਮਞ੍ਚਸ੍ਸ ਅਪਰਿਵਤ੍ਤਨਾਰਹਂ ਸਨ੍ਧਾਯ ਵੁਤ੍ਤਂ. ਯਦਿ ਹਿ ਪਕਤਿਹਤ੍ਥੇਨ ਚਤੁਹਤ੍ਥਾਯਪਿ ਕੁਟਿਯਾ ਪਮਾਣਯੁਤ੍ਤੋ ਮਞ੍ਚੋ ਨ ਪਰਿਵਤ੍ਤਤਿ, ਸਾ ਅਕੁਟੀਯੇਵ, ਤਸ੍ਮਾ ਮਞ੍ਚਪਰਿਵਤ੍ਤਨਮਤ੍ਤੇਨੇਵ ਪਮਾਣਨ੍ਤਿ ਗਹੇਤਬ੍ਬਂ. ਪਮਾਣਯੁਤ੍ਤੋ ਮਞ੍ਚੋਤਿ ਸਬ੍ਬਪਚ੍ਛਿਮਪ੍ਪਮਾਣਯੁਤ੍ਤੋ ਮਞ੍ਚੋ. ਸੋ ਹਿ ਪਕਤਿਵਿਦਤ੍ਥਿਯਾ ਨਵਵਿਦਤ੍ਥਿਕੋ, ਅਟ੍ਠਵਿਦਤ੍ਥਿਕੋ ਵਾ ਹੋਤਿ, ਤਤੋ ਖੁਦ੍ਦਕੋ ਮਞ੍ਚੋ ਸੀਸੂਪਧਾਨਂ ਠਪੇਤ੍ਵਾ ਪਾਦਂ ਪਸਾਰੇਤ੍ਵਾ ਨਿਪਜ੍ਜਿਤੁਂ ਨ ਪਹੋਤਿ. ਪਮਾਣਤੋ ਊਨਤਰਮ੍ਪੀਤਿ ਉਕ੍ਕਟ੍ਠਪ੍ਪਮਾਣਤੋ ਊਨਤਰਮ੍ਪਿ, ਇਦਞ੍ਚ ਹੇਟ੍ਠਿਮਪ੍ਪਮਾਣਯੁਤ੍ਤਾਯਪਿ ਵਤ੍ਥੁਦੇਸਨਾ ਕਾਤਬ੍ਬਾ, ਨ ਵਾਤਿ ਸਨ੍ਦੇਹਨਿਵਤ੍ਤਨਤ੍ਥਂ ਵੁਤ੍ਤਂ.

ਕਲਲਲੇਪੋਤਿ ਕੇਨਚਿ ਸਿਲੇਸੇਨ ਕਤਲੇਪੋ, ਸੇਤਰਤ੍ਤਾਦਿਵਣ੍ਣਕਰਣਤ੍ਥਂ ਕਤਤਮ੍ਬਮਤ੍ਤਿਕਾਦਿਕਲਲਲੇਪੋ ਵਾ. ਤੇਨਾਹ ‘‘ਅਲੇਪੋ ਏਵਾ’’ਤਿ. ਤੇਨ ਤਲ਼ਾਕਾਦੀਸੁ ਘਨੇਨ ਕਲਲੇਨ ਕਤਬਹਲਲੇਪੋ ਮਤ੍ਤਿਕਾਲੇਪਨੇ ਏਵ ਪਵਿਸਤਿ ਲੇਪਵੋਹਾਰਗਮਨਤੋਤਿ ਦਸ੍ਸੇਤਿ. ਪਿਟ੍ਠਸਙ੍ਘਾਟੋ ਨਾਮ ਦ੍ਵਾਰਬਾਹਸਙ੍ਖਾਤੋ ਚਤੁਰਸ੍ਸਦਾਰੁਸਙ੍ਘਾਟੋ, ਯਤ੍ਥ ਸਉਤ੍ਤਰਪਾਸਂ ਕਵਾਟਂ ਅਪਸ੍ਸਾਯ ਦ੍ਵਾਰਂ ਪਿਦਹਨ੍ਤਿ.

ਓਲੋਕੇਤ੍ਵਾਪੀਤਿ ਅਪਲੋਕੇਤ੍ਵਾਪਿ, ਅਪਲੋਕਨਕਮ੍ਮਵਸੇਨਾਪੀਤਿ ਅਤ੍ਥੋ, ਅਪਸਦ੍ਦਸ੍ਸਾਪਿ ਓਆਦੇਸੋ ਕਤੋਤਿ ਦਟ੍ਠਬ੍ਬੋ.

੩੫੩. ਨਿਬਦ੍ਧਗੋਚਰਟ੍ਠਾਨਮ੍ਪੀਤਿ ਏਤ੍ਥ ਗੋਚਰਾਯ ਪਕ੍ਕਮਨ੍ਤਾਨਂ ਹਤ੍ਥੀਨਂ ਨਿਬਦ੍ਧਗਮਨਮਗ੍ਗੋਪਿ ਸਙ੍ਗਯ੍ਹਤਿ. ਏਤੇਸਨ੍ਤਿ ਸੀਹਾਦੀਨਂ. ਗੋਚਰਭੂਮੀਤਿ ਆਮਿਸਗ੍ਗਹਣਟ੍ਠਾਨਂ. ਨ ਗਹਿਤਾਤਿ ਪਟਿਕ੍ਖਿਪਿਤਬ੍ਬਭਾਵੇਨ ਨ ਗਹਿਤਾ, ਨ ਵਾਰਿਤਾਤਿ ਅਤ੍ਥੋ. ਸੀਹਾਦੀਨਞ੍ਹਿ ਗੋਚਰਗ੍ਗਹਣਟ੍ਠਾਨਂ ਹਤ੍ਥੀਨਂ ਵਿਯ ਨਿਬਦ੍ਧਂ ਨ ਹੋਤਿ, ਯਤ੍ਥ ਪਨ ਗੋਮਹਿਂਸਾਦਿਪਾਣਕਾ ਸਨ੍ਤਿ, ਦੂਰਮ੍ਪਿ ਤਂ ਠਾਨਂ ਸੀਘਂ ਗਨ੍ਤ੍ਵਾ ਗੋਚਰਂ ਗਣ੍ਹਨ੍ਤਿ. ਤਸ੍ਮਾ ਤੇਸਂ ਤਂ ਨ ਵਾਰਿਤਂ, ਨਿਬਦ੍ਧਗਮਨਮਗ੍ਗੋਵ ਵਾਰਿਤੋ ਆਸਯਤੋ ਗਮਨਮਗ੍ਗਸ੍ਸ ਨਿਬਦ੍ਧਤ੍ਤਾ. ਅਞ੍ਞੇਸਮ੍ਪਿ ਵਾਲ਼ਾਨਨ੍ਤਿ ਅਰਞ੍ਞਮਹਿਂਸਾਦੀਨਂ. ਆਰੋਗ੍ਯਤ੍ਥਾਯਾਤਿ ਨਿਰੁਪਦ੍ਦਵਾਯ. ਸੇਸਾਨੀਤਿ ਪੁਬ੍ਬਣ੍ਣਨਿਸ੍ਸਿਤਾਦੀਨਿ ਸੋਲ਼ਸ. ਤਾਨਿ ਚ ਜਨਸਮ੍ਮਦ੍ਦਮਹਾਸਮ੍ਮਦ੍ਦਕੁਟਿਵਿਲੋਪਸਰੀਰਪੀਲ਼ਾਦਿਉਪਦ੍ਦਵੇਹਿ ਸਉਪਦ੍ਦਵਾਨੀਤਿ ਵੇਦਿਤਬ੍ਬਾਨਿ. ਅਭਿਹਨਨ੍ਤਿ ਏਤ੍ਥਾਤਿ ਅਬ੍ਭਾਘਾਤਂ. ‘‘ਵੇਰਿਘਰ’’ਨ੍ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਚੋਰਾਨਂ ਮਾਰਣਤ੍ਥਾਯ ਕਤ’’ਨ੍ਤਿ ਵੁਤ੍ਤਂ.

ਧਮ੍ਮਗਨ੍ਧਿਕਾਤਿ ਧਮ੍ਮੇਨ ਦਣ੍ਡਨੀਤਿਯਾ ਹਤ੍ਥਪਾਦਾਦਿਚ੍ਛਿਨ੍ਦਨਗਨ੍ਧਿਕਾ. ਗਨ੍ਧਿਕਾਤਿ ਚ ਯਸ੍ਸ ਉਪਰਿ ਹਤ੍ਥਾਦਿਂ ਠਪੇਤ੍ਵਾ ਛਿਨ੍ਦਨ੍ਤਿ, ਤਾਦਿਸਂ ਦਾਰੁਖਣ੍ਡਫਲਕਾਤਿ ਵੁਚ੍ਚਤਿ, ਤੇਨ ਚ ਉਪਲਕ੍ਖਿਤਂ ਠਾਨਂ. ਪਾਲ਼ਿਯਂ ਰਚ੍ਛਾਨਿਸ੍ਸਿਤਨ੍ਤਿ ਰਥਿਕਾਨਿਸ੍ਸਿਤਂ. ਚਚ੍ਚਰਨਿਸ੍ਸਿਤਨ੍ਤਿ ਚਤੁਨ੍ਨਂ ਰਥਿਕਾਨਂ ਸਨ੍ਧਿਨਿਸ੍ਸਿਤਂ. ਸਕਟੇਨਾਤਿ ਇਟ੍ਠਕਸੁਧਾਦਿਭਣ੍ਡਾਹਰਣਸਕਟੇਨ.

ਪਾਚਿਨਨ੍ਤਿ ਸੇਨਾਸਨਸ੍ਸ ਭੂਮਿਤੋ ਪਟ੍ਠਾਯ ਯਾਵ ਤਲਾਵਸਾਨਂ ਚਿਨਿਤਬ੍ਬਵਤ੍ਥੁਕਂ ਅਧਿਟ੍ਠਾਨਂ, ਯਸ੍ਸ ਉਪਰਿ ਭਿਤ੍ਤਿਥਮ੍ਭਾਦੀਨਿ ਚ ਪਤਿਟ੍ਠਪੇਨ੍ਤਿ. ਤੇਨਾਹ ‘‘ਤਤੋ ਪਟ੍ਠਾਯਾ’’ਤਿਆਦਿ. ਕਿਞ੍ਚਾਪਿ ਇਧ ਪੁਬ੍ਬਪਯੋਗਸਹਪਯੋਗਾਨਂ ਅਦਿਨ੍ਨਾਦਾਨੇ ਵਿਯ ਵਿਸੇਸੋ ਨਤ੍ਥਿ, ਤਥਾਪਿ ਤੇਸਂ ਵਿਭਾਗੇਨ ਦਸ੍ਸਨਂ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾਤਿ ਏਤ੍ਥ ਕੁਟਿਯਾ ਭੇਦੇਨ ਪਰਿਚ੍ਛੇਦਦਸ੍ਸਨਤ੍ਥਂ ਕਤਂ. ਤਦਤ੍ਥਾਯਾਤਿ ਤਚ੍ਛਨਤ੍ਥਾਯ. ਏਵਂ ਕਤਨ੍ਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਵਾ ਕਤਂ. ਪਣ੍ਣਸਾਲਨ੍ਤਿ ਪਣ੍ਣਕੁਟਿਯਾ ਤਿਣਪਣ੍ਣਚੁਣ੍ਣਸ੍ਸ ਅਪਰਿਪਤਨਤ੍ਥਾਯ ਅਨ੍ਤੋ ਚ ਬਹਿ ਚ ਲਿਮ੍ਪਨ੍ਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਤੇਨੇਵ ਵਕ੍ਖਤਿ ‘‘ਪਣ੍ਣਸਾਲਂ ਲਿਮ੍ਪਤੀ’’ਤਿ.

ਅਨ੍ਤੋਲੇਪੇਨੇਵ ਨਿਟ੍ਠਾਪੇਤੁਕਾਮਂ ਸਨ੍ਧਾਯ ‘‘ਅਨ੍ਤੋਲੇਪੇ ਵਾ’’ਤਿਆਦਿ ਵੁਤ੍ਤਂ. ਬਹਿਲੇਪੇ ਵਾਤਿ ਏਤ੍ਥਾਪਿ ਏਸੇਵ ਨਯੋ. ਤਸ੍ਮਿਨ੍ਤਿ ਦ੍ਵਾਰਬਨ੍ਧੇ ਵਾ ਵਾਤਪਾਨੇ ਵਾ ਠਪਿਤੇਤਿ ਯੋਜੇਤਬ੍ਬਂ. ਤਸ੍ਸੋਕਾਸਨ੍ਤਿ ਤਸ੍ਸ ਦ੍ਵਾਰਬਨ੍ਧਾਦਿਸ੍ਸ ਓਕਾਸਭੂਤਂ ਛਿਦ੍ਦਂ. ਪੁਨ ਵਡ੍ਢੇਤ੍ਵਾਤਿ ਪੁਬ੍ਬੇ ਠਪਿਤੋਕਾਸਂ ਖੁਦ੍ਦਕਂ ਚੇ, ਤਂ ਦ੍ਵਾਰਵਾਤਪਾਨਚ੍ਛਿਦ੍ਦਭੇਦਨੇਨ ਪੁਨ ਵਡ੍ਢੇਤ੍ਵਾ. ਠਪਿਤੇਤਿ ਦ੍ਵਾਰਬਨ੍ਧੇ ਵਾ ਗਵਕ੍ਖਸਙ੍ਘਾਟੇ ਵਾ ਆਨੇਤ੍ਵਾ ਤਸ੍ਮਿਂ ਵਡ੍ਢਿਤੇ ਵਾ ਅਵਡ੍ਢਿਤੇ ਵਾ ਛਿਦ੍ਦੇ ਪਤਿਟ੍ਠਾਪਿਤੇ. ਲੇਪੋ ਨ ਘਟੀਯਤੀਤਿ ਸਮਨ੍ਤਤੋ ਦਿਨ੍ਨੋ ਲੇਪੋ ਤਥਾ ਠਪਿਤੇਨ ਦ੍ਵਾਰਬਨ੍ਧਨੇਨ ਵਾ ਵਾਤਪਾਨੇਨ ਵਾ ਸਦ੍ਧਿਂ ਨ ਘਟੀਯਤਿ, ਏਕਾਬਦ੍ਧਂ ਨ ਹੋਤੀਤਿ ਵੁਤ੍ਤਂ ਹੋਤਿ. ਤਨ੍ਤਿ ਦ੍ਵਾਰਬਨ੍ਧਂ ਵਾ ਵਾਤਪਾਨਂ ਵਾ. ਪਠਮਮੇਵ ਸਙ੍ਘਾਦਿਸੇਸੋਤਿ ਤੇਸਂ ਸਮਨ੍ਤਤੋ ਪੁਬ੍ਬੇਵ ਲੇਪਸ੍ਸ ਘਟੇਤ੍ਵਾ ਨਿਟ੍ਠਾਪਿਤਤ੍ਤਾ ਦ੍ਵਾਰਬਨ੍ਧਵਾਤਪਾਨਾਨਂ ਠਪਨਤੋ ਪੁਬ੍ਬੇ ਏਵ ਸਙ੍ਘਾਦਿਸੇਸੋ.

ਲੇਪਘਟਨੇਨੇਵਾਤਿ ਇਟ੍ਠਕਾਹਿ ਕਤਵਾਤਪਾਨਾਦੀਨਿ ਵਿਨਾ ਸਮਨ੍ਤਾ ਲੇਪਘਟਨੇਨੇਵ ਆਪਤ੍ਤਿ ਵਾਤਪਾਨਾਦੀਨਂ ਅਲੇਪੋਕਾਸਤ੍ਤਾ, ਇਟ੍ਠਕਾਹਿ ਕਤਤ੍ਤਾ ਵਾ, ਵਾਤਪਾਨਾਦੀਸੁਪਿ ਲੇਪਸ੍ਸ ਭਿਤ੍ਤਿਲੇਪੇਨ ਸਦ੍ਧਿਂ ਘਟਨੇਨੇਵਾਤਿਪਿ ਅਤ੍ਥਂ ਵਦਨ੍ਤਿ. ਤਤ੍ਥਾਤਿ ਪਣ੍ਣਸਾਲਾਯਂ. ਆਲੋਕਤ੍ਥਾਯ ਅਟ੍ਠਙ੍ਗੁਲਮਤ੍ਤਂ ਠਪੇਤ੍ਵਾ ਲਿਮ੍ਪਤੀਤਿ ਦਾਰੁਕੁਟ੍ਟਸ੍ਸ ਦਾਰੂਨਮਨ੍ਤਰਾ ਅਟ੍ਠਙ੍ਗੁਲਮਤ੍ਤਂ ਵਿਵਰਂ ਯਾਵ ਲਿਮ੍ਪਤਿ, ਤਾਵ ਆਲੋਕਤ੍ਥਾਯ ਠਪੇਤ੍ਵਾ ਅਵਸੇਸਂ ਸਕੁਟ੍ਟਚ੍ਛਦਨਂ ਲਿਮ੍ਪਤਿ, ਪਚ੍ਛਾ ਏਤਂ ਵਿਵਰਂ ਲਿਮ੍ਪਿਸ੍ਸਾਮੀਤਿ ਏਵਂ ਠਪਨੇ ਅਨਾਪਤ੍ਤੀਤਿ ਅਧਿਪ੍ਪਾਯੋ. ਸਚੇ ਪਨ ਏਵਂ ਅਕਤ੍ਵਾ ਸਬ੍ਬਦਾਪਿ ਆਲੋਕਤ੍ਥਾਯ ਵਾਤਪਾਨਵਸੇਨ ਠਪੇਤਿ, ਵਾਤਪਾਨਦ੍ਵਾਰਸਙ੍ਘਾਟੇ ਘਟਿਤੇ ਲੇਪੋ ਚ ਘਟੀਯਤਿ, ਪਠਮਮੇਵ ਸਙ੍ਘਾਦਿਸੇਸੋਤਿ ਦਸ੍ਸੇਨ੍ਤੋ ਆਹ ‘‘ਸਚੇ’’ਤਿਆਦਿ. ਮਤ੍ਤਿਕਾਕੁਟ੍ਟਮੇਵ ਮਤ੍ਤਿਕਾਲੇਪਸਙ੍ਖ੍ਯਂ ਗਚ੍ਛਤੀਤਿ ਆਹ ‘‘ਸਚੇ ਮਤ੍ਤਿਕਾਯ ਕੁਟ੍ਟਂ ਕਰੋਤਿ, ਛਦਨਲੇਪੇਨ ਸਦ੍ਧਿਂ ਘਟਨੇ ਆਪਤ੍ਤੀ’’ਤਿ. ਉਭਿਨ੍ਨਂ ਅਨਾਪਤ੍ਤੀਤਿ ਪੁਰਿਮਸ੍ਸ ਲੇਪਸ੍ਸ ਅਘਟਿਤਤ੍ਤਾ ਦੁਤਿਯਸ੍ਸ ਅਤ੍ਤੁਦ੍ਦੇਸਿਕਤਾਯ ਅਸਮ੍ਭਵਤੋ.

੩੫੪. ਆਪਤ੍ਤਿਭੇਦਦਸ੍ਸਨਤ੍ਥਨ੍ਤਿ ਤਤ੍ਥ ‘‘ਸਾਰਮ੍ਭੇ ਚ ਅਪਰਿਕ੍ਕਮਨੇ ਚ ਦੁਕ੍ਕਟਂ ਅਦੇਸਿਤਵਤ੍ਥੁਕਤਾਯ, ਪਮਾਣਾਤਿਕ੍ਕਨ੍ਤਤਾਯ ਚ ਸਙ੍ਘਾਦਿਸੇਸੋ’’ਤਿ ਏਵਂ ਆਪਤ੍ਤਿਯੇਵ ਵਿਭਾਗਦਸ੍ਸਨਤ੍ਥਂ.

੩੬੧. ਅਨਿਟ੍ਠਿਤੇ ਕੁਟਿਕਮ੍ਮੇਤਿ ਲੇਪਪਰਿਯੋਸਾਨੇ ਕੁਟਿਕਮ੍ਮੇ ਏਕਪਿਣ੍ਡਮਤ੍ਤੇਨਪਿ ਅਨਿਟ੍ਠਿਤੇ. ‘‘ਅਞ੍ਞਸ੍ਸ ਪੁਗ੍ਗਲਸ੍ਸ ਵਾ’’ਤਿ ਇਦਂ ਮੂਲਟ੍ਠਸ੍ਸ ਅਨਾਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ. ਯੇਨ ਪਨ ਲਦ੍ਧਂ, ਤਸ੍ਸਾਪਿ ਤਂ ਨਿਟ੍ਠਾਪੇਨ੍ਤਸ੍ਸ ‘‘ਪਰੇਹਿ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿਆਦਿਵਚਨਤੋ (ਪਾਰਾ. ੩੬੩) ਆਪਤ੍ਤਿਯੇਵ. ਪੁਬ੍ਬੇ ਕਤਕਮ੍ਮਮ੍ਪਿ ਲਦ੍ਧਕਾਲਤੋ ਪਟ੍ਠਾਯ ਅਤ੍ਤਨੋ ਅਤ੍ਥਾਯੇਵ ਕਤਂ ਨਾਮ ਹੋਤਿ, ਤਸ੍ਮਾ ਤੇਨਾਪਿ ਸਙ੍ਘਸ੍ਸ ਵਾ ਸਾਮਣੇਰਾਦੀਨਂ ਵਾ ਦਤ੍ਵਾ ਨਿਟ੍ਠਾਪੇਤਬ੍ਬਂ. ‘‘ਅਞ੍ਞਸ੍ਸ ਵਾ’’ਤਿ ਇਦਂ ਅਨੁਪਸਮ੍ਪਨ੍ਨਂਯੇਵ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ, ਕੇਚਿ ਪਨ ‘‘ਪਰਤੋ ਲਦ੍ਧਾਯ ਕੁਟਿਯਾ ਨਿਟ੍ਠਾਪਨੇ ਅਨਾਪਤ੍ਤਿਆਦਿਤੋ ਪਟ੍ਠਾਯ ਅਤ੍ਤਨੋ ਅਤ੍ਥਾਯ ਅਕਤਤ੍ਤਾ’’ਤਿ ਵਦਨ੍ਤਿ. ਅਪਚਿਨਿਤਬ੍ਬਾਤਿ ਯਾਵ ਪਾਚਿਨਾ ਵਿਦ੍ਧਂਸੇਤਬ੍ਬਾ. ਭੂਮਿਸਮਂ ਕਤ੍ਵਾਤਿ ਪਾਚਿਨਤਲਾਵਸਾਨਂ ਕਤ੍ਵਾ.

੩੬੪. ਲੇਣਨ੍ਤਿ ਪਬ੍ਬਤਲੇਣਂ. ਨ ਹੇਤ੍ਥ ਲੇਪੋ ਘਟੀਯਤੀਤਿ ਛਦਨਲੇਪਸ੍ਸ ਅਭਾਵਤੋ ਵੁਤ੍ਤਂ, ਵਿਸੁਂ ਏਵ ਵਾ ਅਨੁਞ੍ਞਾਤਤ੍ਤਾ. ਸਚੇ ਲੇਣਸ੍ਸ ਅਨ੍ਤੋ ਉਪਰਿਭਾਗੇ ਚਿਤ੍ਤਕਮ੍ਮਾਦਿਕਰਣਤ੍ਥਂ ਲੇਪਂ ਦੇਨ੍ਤਿ, ਉਲ੍ਲਿਤ੍ਤਕੁਟਿਸਙ੍ਖ੍ਯਂ ਨ ਗਚ੍ਛਤਿ, ਵਟ੍ਟਤਿ ਏਵ. ਇਟ੍ਠਕਾਦੀਹਿ ਕਤਂ ਚਤੁਰਸ੍ਸਕੂਟਾਗਾਰਸਣ੍ਠਾਨਂ ਏਕਕਣ੍ਣਿਕਾਬਦ੍ਧਂ ਨਾਤਿਉਚ੍ਚਂ ਪਟਿਸ੍ਸਯਵਿਸੇਸਂ ‘‘ਗੁਹਾ’’ਤਿ ਵਦਨ੍ਤਿ, ਤਾਦਿਸਂ ਮਹਨ੍ਤਮ੍ਪਿ ਉਲ੍ਲਿਤ੍ਤਾਵਲਿਤ੍ਤਂ ਕਰੋਨ੍ਤਸ੍ਸ ਅਨਾਪਤ੍ਤਿ. ਭੂਮਿਗੁਹਨ੍ਤਿ ਉਮਙ੍ਗਗੁਹਂ.

ਅਟ੍ਠਕਥਾਸੂਤਿ ਕੁਕ੍ਕੁਟਚ੍ਛਿਕਗੇਹਨ੍ਤਿਆਦੀਸੁ ਅਟ੍ਠਕਥਾਸੁ ਤਿਣਕੁਟਿਕਾ ਕੁਕ੍ਕੁਟਚ੍ਛਿਕਗੇਹਨ੍ਤਿ ਵਤ੍ਵਾ ਪੁਨ ਤਂ ਵਿਵਰਨ੍ਤੇਹਿ ਅਟ੍ਠਕਥਾਚਰਿਯੇਹਿ ਛਦਨਂ ਦਣ੍ਡਕੇਹਿ…ਪੇ… ਵੁਤ੍ਤਾਤਿ ਯੋਜਨਾ ਦਟ੍ਠਬ੍ਬਾ. ਤਤ੍ਥ ਦਣ੍ਡਕੇਹਿ ਜਾਲਬਦ੍ਧਂ ਕਤ੍ਵਾਤਿ ਦੀਘਤੋ, ਤਿਰਿਯਤੋ ਚ ਠਪੇਤ੍ਵਾ ਵਲ੍ਲਿਯਾਦੀਹਿ ਬਦ੍ਧਦਣ੍ਡਕੇਹਿ ਜਾਲਂ ਵਿਯ ਕਤ੍ਵਾ. ਸੋ ਚਾਤਿ ਉਲ੍ਲਿਤ੍ਤਾਦਿਭਾਵੋ. ਛਦਨਮੇਵ ਸਨ੍ਧਾਯ ਵੁਤ੍ਤੋਤਿ ਛਦਨਸ੍ਸ ਅਨ੍ਤੋ ਚ ਬਹਿ ਚ ਲਿਮ੍ਪਨਮੇਵ ਸਨ੍ਧਾਯ ਵੁਤ੍ਤੋ. ਮਤ੍ਤਿਕਾਕੁਟ੍ਟੇ ਭਿਤ੍ਤਿਲੇਪਂ ਵਿਨਾਪਿ ਭਿਤ੍ਤਿਯਾ ਸਦ੍ਧਿਂ ਛਦਨਲੇਪਸ੍ਸ ਘਟਨਮਤ੍ਤੇਨਾਪਿ ਆਪਤ੍ਤਿਸਮ੍ਭਵਤੋ ਛਦਨਲੇਪੋਵ ਪਧਾਨਨ੍ਤਿ ਵੇਦਿਤਬ੍ਬਂ. ਕਿਞ੍ਚਾਪਿ ਏਵਂ, ਅਥ ਖੋ ‘‘ਉਪਚਿਕਾਮੋਚਨਤ੍ਥਮੇਵ ਹੇਟ੍ਠਾ ਪਾਸਾਣਕੁਟ੍ਟਂ ਕਤ੍ਵਾ ਤਂ ਅਲਿਮ੍ਪਿਤ੍ਵਾ ਉਪਰਿ ਲਿਮ੍ਪਤਿ, ਲੇਪੋ ਨ ਘਟੀਯਤਿ ਨਾਮ, ਅਨਾਪਤ੍ਤਿਯੇਵਾ’’ਤਿਆਦਿਵਚਨਤੋ ਪਨ ਛਦਨਲੇਪਘਟਨਤ੍ਥਂ ਸਕਲਾਯਪਿ ਭਿਤ੍ਤਿਯਾ ਲੇਪੋ ਅਵਸ੍ਸਂ ਇਚ੍ਛਿਤਬ੍ਬੋਵ ਤਸ੍ਸਾ ਏਕਦੇਸਸ੍ਸ ਅਲੇਪੇਪਿ ਛਦਨਲੇਪਸ੍ਸ ਅਘਟਨਤੋ. ਤੇਨਾਹ ‘‘ਲੇਪੋ ਨ ਘਟੀਯਤੀ’’ਤਿ. ਏਤ੍ਥਾਤਿ ਤਿਣਕੁਟਿਕਾਯਂ. ਨ ਕੇਵਲਞ੍ਚ ਤਿਣਕੁਟਿਕਾਯਂ ਏਵ, ਲੇਣਗੁਹਾਦੀਸੁਪਿ ਸਾਰਮ੍ਭਾਪਰਿਕ੍ਕਮਨਪਚ੍ਚਯਾਪਿ ਅਨਾਪਤ੍ਤਿ ਏਵ, ਇਮਿਨਾ ਪਨ ਨਯੇਨ ਅਞ੍ਞਸ੍ਸਤ੍ਥਾਯ ਕੁਟਿਂ ਕਰੋਨ੍ਤਸ੍ਸਾਪਿ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿਭਾਵੋ ਅਤ੍ਥਤੋ ਦਸ੍ਸਿਤੋ ਏਵ ਹੋਤੀਤਿ.

ਤਤ੍ਥ ਪਾਲ਼ਿਵਿਰੋਧਂ ਪਰਿਹਰਿਤੁਂ ‘‘ਯਂ ਪਨਾ’’ਤਿਆਦਿ ਵੁਤ੍ਤਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਅਞ੍ਞਸ੍ਸ ਉਪਜ੍ਝਾਯਾਦਿਨੋ ਅਤ੍ਥਾਯ ਕਰੋਨ੍ਤਸ੍ਸ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿ ਏਵ, ਯਂ ਪਨ ਪਾਲ਼ਿਯਂ ‘‘ਆਪਤ੍ਤਿਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨ’’ਨ੍ਤਿਆਦਿਵਚਨਂ, ਤਂ ਅਞ੍ਞਸ੍ਸਤ੍ਥਾਯ ਕਰੋਨ੍ਤਸ੍ਸ, ਨ ਸਾਰਮ੍ਭਾਦਿਪਚ੍ਚਯਾ ਆਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ, ਕਿਞ੍ਚਰਹਿ ਯਥਾਸਮਾਦਿਟ੍ਠਾਯ ਕੁਟਿਯਾ ਅਕਰਣਪਚ੍ਚਯਾ ਆਪਤ੍ਤਿਦਸ੍ਸਨਤ੍ਥਨ੍ਤਿ. ਤਤ੍ਥ ਯਥਾਸਮਾਦਿਟ੍ਠਾਯਾਤਿ ‘‘ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ, ‘ਕੁਟਿਂ ਮੇ ਕਰੋਥਾ’ਤਿ ਸਮਾਦਿਸਤਿ ਚ, ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ ਏਵਂ ਕਾਰਾਪਕੇਨ ਆਣਤ੍ਤਿਕ੍ਕਮਂ ਮੁਞ੍ਚਿਤ੍ਵਾ ਕਰਣਪਚ੍ਚਯਾਤਿ ਅਧਿਪ੍ਪਾਯੋ. ਕਤ੍ਥਚਿ ਪਨ ਪੋਤ੍ਥਕੇ ‘‘ਕੁਟਿਲਕ੍ਖਣਪ੍ਪਤ੍ਤਮ੍ਪਿ ਕੁਟਿਂ ਅਞ੍ਞਸ੍ਸ…ਪੇ… ਕਰੋਨ੍ਤਸ੍ਸ ਅਨਾਪਤ੍ਤੀ’’ਤਿ ਇਮਸ੍ਸ ਪਾਠਸ੍ਸ ਅਨਨ੍ਤਰਂ ‘‘ਯਂ ਪਨ ਆਪਤ੍ਤਿ ਕਾਰੁਕਾਨ’’ਨ੍ਤਿਆਦਿਪਾਠੋ ਦਿਸ੍ਸਤਿ, ਸੋਵ ਯੁਤ੍ਤਤਰੋ. ਏਵਞ੍ਹਿ ਸਤਿ ਤਤ੍ਥ ਅਧਿਪ੍ਪਾਯੋ ਪਾਕਟੋ ਹੋਤਿ.

ਅਨਾਪਤ੍ਤੀਤਿ ਵਤ੍ਵਾਤਿ ਵਾਸਾਗਾਰਤ੍ਥਾਯ ਏਵ ਅਨਿਯਮਿਤਤ੍ਤਾ ਅਨਾਪਤ੍ਤੀਤਿ ਵਤ੍ਵਾ. ਅਦੇਸਾਪੇਤ੍ਵਾ ਕਰੋਤੋਤਿ ਪਮਾਣਯੁਤ੍ਤਮ੍ਪਿ ਕਰੋਤੋ. ਅਚਿਤ੍ਤਕਨ੍ਤਿ ਪਣ੍ਣਤ੍ਤਿਅਜਾਨਨਚਿਤ੍ਤੇਨ ਅਚਿਤ੍ਤਕਂ. ਉਲ੍ਲਿਤ੍ਤਾਦੀਨਂ ਅਞ੍ਞਤਰਤਾ, ਹੇਟ੍ਠਿਮਪ੍ਪਮਾਣਸਮ੍ਭਵੋ, ਅਦੇਸਿਤਵਤ੍ਥੁਕਤਾ, ਪਮਾਣਾਤਿਕ੍ਕਨ੍ਤਤਾ, ਅਤ੍ਤੁਦ੍ਦੇਸਿਕਤਾ, ਵਾਸਾਗਾਰਤਾ, ਲੇਪਘਟਨਾਤਿ ਸਤ੍ਤ ਵਾ ਪਮਾਣਯੁਤ੍ਤਙ੍ਗਾਦੀਸੁ ਛ ਵਾ ਅਙ੍ਗਾਨਿ.

ਕੁਟਿਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ

੩੬੫. ਸਤ੍ਤਮੇ ਪੂਜਾਵਚਨਪ੍ਪਯੋਗੇ ਕਤ੍ਤਰਿ ਸਾਮਿਵਚਨਸ੍ਸਪਿ ਇਚ੍ਛਿਤਤ੍ਤਾ ‘‘ਗਾਮਸ੍ਸ ਵਾ ਪੂਜਿਤ’’ਨ੍ਤਿ ਵੁਤ੍ਤਂ. ਰੂਪਿਨ੍ਦ੍ਰਿਯੇਸੁ ਵਿਜ੍ਜਮਾਨਂ ਸਨ੍ਧਾਯ ਏਕਿਨ੍ਦ੍ਰਿਯਤਾ ਵੁਚ੍ਚਤੀਤਿ ਆਹ ‘‘ਕਾਯਿਨ੍ਦ੍ਰਿਯਂ ਸਨ੍ਧਾਯਾ’’ਤਿ. ਤੇ ਹਿ ਮਨਿਨ੍ਦ੍ਰਿਯਮ੍ਪਿ ਭੂਤਗਾਮਾਨਂ ਇਚ੍ਛਨ੍ਤਿ.

੩੬੬. ਕਿਰਿਯਤੋ ਸਮੁਟ੍ਠਾਨਾਭਾਵੋਤਿ ਵਤ੍ਥੁਨੋ ਅਦੇਸਨਾਸਙ੍ਖਾਤਂ ਅਕਿਰਿਯਂ ਵਿਨਾ ਨ ਕੇਵਲਂ ਕਿਰਿਯਾਯ ਸਮੁਟ੍ਠਾਨਭਾਵੋ. ਕਿਰਿਯਾਕਿਰਿਯਤੋ ਹਿ ਇਦਂ ਸਮੁਟ੍ਠਾਤਿ. ਇਮਸ੍ਮਿਂ ਸਿਕ੍ਖਾਪਦੇ ਭਿਕ੍ਖੂ ਵਾ ਅਨਭਿਨੇਯ੍ਯਾਤਿ ਏਤ੍ਥ ਵਾ-ਸਦ੍ਦੋ ਸਮੁਚ੍ਚਯਤ੍ਥੋ, ਤੇਨ ‘‘ਮਹਲ੍ਲਕਞ੍ਚ ਵਿਹਾਰਂ ਕਰੇਯ੍ਯ, ਭਿਕ੍ਖੂ ਚ ਅਨਭਿਨੇਯ੍ਯਾ’’ਤਿ ਕਿਰਿਯਞ੍ਚ ਅਕਿਰਿਯਞ੍ਚ ਸਮੁਚ੍ਚਿਨੋਤਿ.

ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ

੩੮੦. ਅਟ੍ਠਮੇ ਪਾਕਾਰੇਨ ਚ ਪਰਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਗੋਪੁਰਟ੍ਟਾਲਕਯੁਤ੍ਤਨ੍ਤਿ ਏਤ੍ਥ ਪਾਕਾਰੇਸੁ ਯੁਦ੍ਧਤ੍ਥਾਯ ਕਤੋ ਵਙ੍ਕਸਣ੍ਠਾਨੋ ਸਰਕ੍ਖੇਪਛਿਦ੍ਦਸਹਿਤੋ ਪਤਿਸ੍ਸਯਵਿਸੇਸੋ ਅਟ੍ਟਾਲਕੋ ਨਾਮ.

ਸੋਲ਼ਸਵਿਧਸ੍ਸਾਤਿ ਚਤੂਹਿ ਮਗ੍ਗੇਹਿ ਪਚ੍ਚੇਕਂ ਚਤੂਸੁ ਸਚ੍ਚੇਸੁ ਕਤ੍ਤਬ੍ਬਸ੍ਸ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਸਙ੍ਖਾਤਸ੍ਸ ਸੋਲ਼ਸਵਿਧਸ੍ਸ. ਤੇ ਗਾਰਵੇਨਾਤਿ ਤੇ ਕਿਲਨ੍ਤਰੂਪਾ ਭਿਕ੍ਖੂ ਭਤ੍ਤੁਦ੍ਦੇਸਕਟ੍ਠਾਨੇ ਸਨ੍ਨਿਪਤਿਤਾਨਂ ਭਿਕ੍ਖੂਨਂ ਪੁਰਤੋ ਅਤ੍ਤਨੋ ਕਿਲਨ੍ਤਸਰੀਰਂ ਦਸ੍ਸੇਤ੍ਵਾ ਉਦ੍ਦਿਸਾਪਨੇ ਗਾਰਵੇਨ, ਲਜ੍ਜਾਯਾਤਿ ਅਤ੍ਥੋ. ਤੇਰਸਪੀਤਿ ਭਤ੍ਤੁਦ੍ਦੇਸਕਸੇਨਾਸਨਗਾਹਾਪਕਭਣ੍ਡਾਗਾਰਿਕਚੀਵਰਪਟਿਗ੍ਗਾਹਕਚੀਵਰਭਾਜਕਯਾਗੁਭਾਜਕਫਲਭਾਜਕਖਜ੍ਜਭਾਜਕਅਪ੍ਪਮਤ੍ਤਕਵਿਸ੍ਸਜ੍ਜਕਸਾਟਿਯਗਾਹਾਪਕਪਤ੍ਤਗਾਹਾਪਕਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤੀਨਂ ਵਸੇਨ ਤੇਰਸਪਿ.

ਪਾਲ਼ਿਯਂ ‘‘ਅਪਿਸੂ’’ਤਿ ਇਦਂ ‘‘ਅਪਿਚਾ’’ਤਿ ਇਮਿਨਾ ਸਮਾਨਤ੍ਥੋ ਨਿਪਾਤੋ. ਏਵਂ ਸਬ੍ਬਪਦੇਸੂਤਿ ਪੀਠਾਦੀਸੁ ਸੇਨਾਸਨਸਾਧਾਰਣੇਸੁ, ਕਤਿਕਸਣ੍ਠਾਨਪਵੇਸਨਿਕ੍ਖਮਨਕਾਲਾਦੀਸੁ ਪਨ ਵਿਸੁਂ ਵਿਸੁਂ ਅਧਿਟ੍ਠਹਿਤ੍ਵਾ ਕਥਾਪੇਤੀਤਿ ਵੇਦਿਤਬ੍ਬਂ. ਅਯਞ੍ਹਿ ਨਿਮ੍ਮਿਤਾਨਂ ਧਮ੍ਮਤਾਤਿ ਅਨਿਯਮੇਤ੍ਵਾ ਨਿਮ੍ਮਿਤਾਨਂ ਵਸੇਨ ਵੁਤ੍ਤਂ, ਨਿਯਮੇਤ੍ਵਾ ਪਨ ‘‘ਏਤ੍ਤਕਾ ਇਦਞ੍ਚਿਦਞ੍ਚ ਕਥੇਨ੍ਤੁ, ਏਤ੍ਤਕਾ ਤੁਣ੍ਹੀ ਭਵਨ੍ਤੁ, ਨਾਨਾਪ੍ਪਕਾਰਂ ਇਰਿਯਾਪਥਂ, ਕਿਰਿਯਞ੍ਚ ਕਪ੍ਪੇਨ੍ਤੁ, ਨਾਨਾਵਣ੍ਣਸਣ੍ਠਾਨਵਯੋਨਿਯਮਾ ਚ ਹੋਨ੍ਤੂ’’ਤਿ ਪਰਿਕਮ੍ਮਂ ਕਤ੍ਵਾ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਿਤੇ ਇਚ੍ਛਿਤਿਚ੍ਛਿਤਪ੍ਪਕਾਰਾ ਅਞ੍ਞਮਞ੍ਞਮ੍ਪਿ ਵਿਸਦਿਸਾਵ ਹੋਨ੍ਤਿ. ਅਵਤ੍ਥੁਕਵਚਨਨ੍ਤਿ ਨਿਰਤ੍ਥਕਵਚਨਂ.

੩੮੩. ਏਕਚਾਰਿਕਭਤ੍ਤਨ੍ਤਿ ਅਤਿਮਨਾਪਤ੍ਤਾ ਸਬ੍ਬੇਸਮ੍ਪਿ ਪਟਿਲਾਭਤ੍ਥਾਯ ਵਿਸੁਂ ਠਿਤਿਕਾਯ ਪਾਪੇਤਬ੍ਬਭਤ੍ਤਂ. ਤਦ੍ਧਿਤਵੋਹਾਰੇਨਾਤਿ ਚਤ੍ਤਾਰਿ ਪਮਾਣਮਸ੍ਸ ਚਤੁਕ੍ਕਨ੍ਤਿ ਏਵਂ ਤਦ੍ਧਿਤਵੋਹਾਰੇਨ. ਭਵੋਤਿ ਭਵਿਤਬ੍ਬੋ. ਅਤੀਤਂ ਦਿਵਸਭਾਗਨ੍ਤਿ ਤਸ੍ਮਿਞ੍ਞੇਵ ਦਿਵਸੇ ਸਲਾਕਦਾਨਕ੍ਖਣਂ ਸਨ੍ਧਾਯ ਵੁਤ੍ਤਂ. ਹਿਯ੍ਯੋਤਿ ਇਮਸ੍ਸ ਅਜ੍ਜ ਇਚ੍ਚੇਵ ਅਤ੍ਥੋ. ਤੇਨੇਵਾਹਂਸੁ ‘‘ਸ੍ਵੇ ਅਮ੍ਹੇ’’ਤਿਆਦਿ. ਪਧੂਪਾਯਨ੍ਤਾਤਿ ਪੁਨਪ੍ਪੁਨਂ ਉਪ੍ਪਜ੍ਜਨਕੋਧਵਸੇਨ ਪਧੂਪਾਯਨ੍ਤਾ. ਪਾਲ਼ਿਯਂ ਕਿਸ੍ਸ ਮਨ੍ਤਿ ਕੇਨ ਕਾਰਣੇਨ ਮਯਾਤਿ ਅਤ੍ਥੋ.

੩੮੪. ‘‘ਸਰਸਿ ਤ੍ਵ’’ਨ੍ਤਿ ਇਦਂ ਏਕਂ ਵਾਕ੍ਯਂ ਕਤ੍ਵਾ, ‘‘ਕਤ੍ਤਾ’’ਤਿ ਇਦਞ੍ਚ ਕਤ੍ਤਰਿ ਰਿਤੁਪਚ੍ਚਯਨ੍ਤਂ ਕਤ੍ਵਾ, ‘‘ਅਸੀ’’ਤਿ ਅਜ੍ਝਾਹਾਰਪਦੇਨ ਸਹ ਏਕਵਾਕ੍ਯਂ ਕਤ੍ਵਾ, ‘‘ਏਵਰੂਪ’’ਨ੍ਤਿ ਇਦਂ, ‘‘ਯਥਾਯਂ ਭਿਕ੍ਖੁਨੀ ਆਹਾ’’ਤਿ ਇਦਞ੍ਚ ਦ੍ਵੀਸੁ ਵਾਕ੍ਯੇਸੁ ਪਚ੍ਚੇਕਂ ਯੋਜੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿਮਾਹ. ਉਜੁਕਮੇਵਾਤਿ ਤ੍ਵਾ-ਪਚ੍ਚਯਨ੍ਤਵਸੇਨ ਪਠਮਂ ਅਤ੍ਥਗ੍ਗਹਣਂ ਉਜੁਕਨ੍ਤਿ ਅਧਿਪ੍ਪਾਯੋ.

ਦੁਤਿਯੋ ਦਬ੍ਬ-ਸਦ੍ਦੋ ਪਣ੍ਡਿਤਾਦਿਵਚਨੋਤਿ ਆਹ ‘‘ਨ ਖੋ ਦਬ੍ਬ ਦਬ੍ਬਾ ਪਣ੍ਡਿਤਾ’’ਤਿ. ਨਿਬ੍ਬੇਠੇਨ੍ਤੀਤਿ ਦੋਸਤੋ ਮੋਚੇਨ੍ਤਿ. ਵਿਨਯਲਕ੍ਖਣੇ ਤਨ੍ਤਿਨ੍ਤਿ ਵਿਨਯਵਿਨਿਚ੍ਛਯਲਕ੍ਖਣਵਿਸਯੇ ਆਗਮਂ ਠਪੇਨ੍ਤੋ. ਪਾਲ਼ਿਯਂ ਯਤੋ ਅਹਨ੍ਤਿਆਦੀਸੁ ਯਸ੍ਮਿਂ ਕਾਲੇ ਅਹਂ ਜਾਤੋ, ਤਤੋ ਪਭੁਤਿ ਸੁਪਿਨਨ੍ਤੇਨਪਿ ਮੇਥੁਨਂ ਧਮ੍ਮਂ ਨਾਭਿਜਾਨਾਮਿ, ਨ ਚ ਤਸ੍ਸ ਮੇਥੁਨਧਮ੍ਮਸ੍ਸ ਪਟਿਸੇਵਿਤਾ ਅਹੋਸਿਨ੍ਤਿ ਅਤ੍ਥੋ ਦਟ੍ਠਬ੍ਬੋ. ਤੇਨਾਹ ‘‘ਸੁਪਿਨਨ੍ਤੇਨਪੀ’’ਤਿਆਦਿ. ਇਦਾਨਿ ਏਕਵਾਕ੍ਯਵਸੇਨ ਯੋਜਨਂ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਨ ਘਟਤੀਤਿ ਯਸ੍ਮਾ ਖੀਣਾਸਵਸ੍ਸ ਵਚਨੇਨ ਏਤਿਸ੍ਸਾ ਵਚਨਂ ਨ ਸਮੇਤਿ, ਤਞ੍ਚ ਨ ਘਟਨਂ ਯਸ੍ਮਾ ਪੁਬ੍ਬੇ ਭਿਕ੍ਖੂਸੁ ਪਸਿਦ੍ਧਾਯ ਏਵ ਅਚ੍ਚਨ੍ਤਦੁਸ੍ਸੀਲਤਾਯ ਏਵ ਅਹੋਸਿ, ਤਸ੍ਮਾ ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾਤਿ ਅਧਿਪ੍ਪਾਯੋ.

ਚਰ ਪਿਰੇਤਿ ਚਰ ਗਚ੍ਛ ਪਿਰੇ ਪਰ ਅਮਾਮਕ ਤ੍ਵਂ. ਵਿਨਸ੍ਸਾਤਿ ਅਦਸ੍ਸਨਂ ਗਚ੍ਛ. ਅਕਾਰਿਕਾਤਿ ਅਮੂਲਕੇਨ ਚੋਦਨਾਯ ਨ ਕਾਰਿਕਾ. ਕਾਰਕੋ ਹੋਤੀਤਿ ‘‘ਅਯ੍ਯੇਨਮ੍ਹਿ ਦੂਸਿਤਾ’’ਤਿ ਇਮਾਯ ਪਟਿਞ੍ਞਾਯ ਯਦਿ ਨਾਸਿਤਾ, ਤਦਾ ਥੇਰੋ ਭਿਕ੍ਖੁਨੀਦੂਸਕਤ੍ਤਸਿਦ੍ਧਿਤੋ ਤਸ੍ਸ ਦੋਸਸ੍ਸ ਕਾਰਕੋ ਹੋਤਿ. ਅਕਾਰਕੋ ਹੋਤੀਤਿ ਤਾਯ ਕਤਪਟਿਞ੍ਞਂ ਅਨਪੇਕ੍ਖਿਤ੍ਵਾ ਸਾਮਞ੍ਞਤੋ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ ਭਗਵਤਾ ਵੁਤ੍ਤਤ੍ਤਾ ਅਕਾਰਕੋ ਹੋਤਿ. ਯਦਿ ਹਿ ਥੇਰੋ ਕਾਰਕੋ ਭਵੇਯ੍ਯ, ਅਵਸ੍ਸਂ ਤਮੇਵ ਦੋਸਂ ਅਪਦਿਸਿਤ੍ਵਾ ਇਮਿਨਾ ਨਾਮ ਕਾਰਣੇਨ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ ਵਤ੍ਤਬ੍ਬਂ ਸਿਯਾ, ਤਥਾ ਅਵੁਤ੍ਤਤ੍ਤਾ, ‘‘ਦਬ੍ਬਞ੍ਚ ਅਨੁਯੁਞ੍ਜਥਾ’’ਤਿ ਅਵਤ੍ਵਾ ‘‘ਇਮੇ ਚ ਭਿਕ੍ਖੂ ਅਨੁਯੁਞ੍ਜਥਾ’’ਤਿ ਵੁਤ੍ਤਤ੍ਤਾ ਚ ਸਾਮਤ੍ਥਿਯਤੋ ਮੇਤ੍ਤਿਯਾਯ ਭਿਕ੍ਖੁਨਿਯਾ ਅਞ੍ਞੇਨ ਦੋਸੇਨ ਨਾਸਨਾਰਹਤਾ, ਵਤ੍ਥੁਸ੍ਸ ਚ ਅਮੂਲਕਭਾਵੋ, ਥੇਰਸ੍ਸ ਅਕਾਰਕਭਾਵੋ ਚ ਸਿਦ੍ਧੋ ਹੋਤੀਤਿ ਅਧਿਪ੍ਪਾਯੋ.

ਅਤ੍ਤਨੋ ਸੁਤ੍ਤਨ੍ਤਿ ‘‘ਸਕਾਯ ਪਟਿਞ੍ਞਾਯਾ’’ਤਿ ਇਮਿਨਾ ਪਕ੍ਖੇਪਵਚਨੇਨ ਸਹਿਤਂ ਕੂਟਸੁਤ੍ਤਂ. ਥੇਰੋ ਕਾਰਕੋ ਹੋਤੀਤਿ ਏਤ੍ਥ ਅਯਮਧਿਪ੍ਪਾਯੋ – ‘‘ਸਕਾਯ ਪਟਿਞ੍ਞਾਯਾ’’ਤਿ ਅਵਤ੍ਵਾ ਸਾਮਞ੍ਞਤੋ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ ਓਤਿਣ੍ਣਵਤ੍ਥੁਸ੍ਮਿਂਯੇਵ ਤਸ੍ਸਾ ਨਾਸਨਾ ਵਿਹਿਤਾਤਿ ਤੁਮ੍ਹਾਕਂ ਵਾਦੇ ਥੇਰੋ ਕਾਰਕੋ ਹੋਤਿ, ‘‘ਸਕਾਯ ਪਟਿਞ੍ਞਾਯਾ’’ਤਿ ਪਨ ਵੁਤ੍ਤੇ ਪੁਬ੍ਬੇਯੇਵ ਸਿਦ੍ਧਸ੍ਸ ਪਾਰਾਜਿਕਸ੍ਸ ਸੁਚਿਕਾਯ ਅਸ੍ਸਾ ਸਕਾਯ ਪਟਿਞ੍ਞਾਯ ਨਾਸੇਥਾਤਿ ਸਿਜ੍ਝਨਤੋ ਅਮ੍ਹਾਕਂ ਵਾਦੇ ਥੇਰੋ ਅਕਾਰਕੋ ਹੋਤੀਤਿ. ਮਹਾਵਿਹਾਰਵਾਸੀਨਮ੍ਪਿ ਪਨ ‘‘ਸਕਾਯ ਪਟਿਞ੍ਞਾਯਾ’’ਤਿ ਵੁਤ੍ਤੇ ਓਤਿਣ੍ਣਵਤ੍ਥੁਸ੍ਮਿਂਯੇਵ ਤਸ੍ਸਾ ਨਾਸਨਾ ਵਿਹਿਤਾ ਹੋਤਿ, ਨ ਸਾਮਞ੍ਞਤੋਤਿ ਅਧਿਪ੍ਪਾਯੋ. ਏਤ੍ਥਾਤਿ ਇਮੇਸੁ ਦ੍ਵੀਸੁ ਵਾਦੇਸੁ, ਸੁਤ੍ਤੇਸੁ ਵਾ. ਯਂ ਪਚ੍ਛਾ ਵੁਤ੍ਤਨ੍ਤਿ ਮਹਾਵਿਹਾਰਵਾਸੀਹਿ ਯਂ ਵੁਤ੍ਤਂ, ਤਂ ਯੁਤ੍ਤਨ੍ਤਿ ਅਤ੍ਥੋ. ਵਿਚਾਰਿਤਂ ਹੇਤਨ੍ਤਿ ਏਤਂ ਪਚ੍ਛਿਮਸ੍ਸ ਯੁਤ੍ਤਤ੍ਤਂ ਵਿਚਾਰਿਤਂ, ‘‘ਤਤ੍ਰ ਸਙ੍ਘਾਦਿਸੇਸੋ ਵੁਟ੍ਠਾਨਗਾਮਿਨੀ…ਪੇ… ਅਸੁਦ੍ਧਤਾਯੇਵ ਨਾਸੇਸੀ’’ਤਿ ਵਕ੍ਖਮਾਨਨਯੇਨ ਵਿਨਿਚ੍ਛਿਤਨ੍ਤਿ ਅਤ੍ਥੋ. ‘‘ਭਿਕ੍ਖੁਨਿਂ ਅਨੁਦ੍ਧਂਸੇਤਿ ਦੁਕ੍ਕਟ’’ਨ੍ਤਿ ਇਮਿਨਾ ਮਹਾਅਟ੍ਠਕਥਾਵਾਦੋ ਦਸ੍ਸਿਤੋ.

ਤਤ੍ਰਾਤਿ ਤੇਸੁ ਦੁਕ੍ਕਟਪਾਚਿਤ੍ਤਿਯੇਸੁ. ਦੁਕ੍ਕਟਨ੍ਤਿ ਵੁਤ੍ਤਮਹਾਅਟ੍ਠਕਥਾਵਾਦਸ੍ਸ ਅਧਿਪ੍ਪਾਯਂ ਦਸ੍ਸੇਤ੍ਵਾ ‘‘ਪਾਚਿਤ੍ਤਿਯ’’ਨ੍ਤਿ ਪਵਤ੍ਤਸ੍ਸ ਕੁਰੁਨ੍ਦਿਵਾਦਸ੍ਸ ਅਧਿਪ੍ਪਾਯਂ ਦਸ੍ਸੇਤੁਂ ‘‘ਪਚ੍ਛਿਮਨਯੇਪੀ’’ਤਿਆਦਿ ਵੁਤ੍ਤਂ. ਵਚਨਪ੍ਪਮਾਣਤੋਤਿ ਵਿਸਂਵਾਦਨਾਧਿਪ੍ਪਾਯੇ ਸਮਾਨੇਪਿ ਅਨੁਦ੍ਧਂਸਨਾਦਿਵਿਸੇਸੇ ਸਙ੍ਘਾਦਿਸੇਸਾਦਿਨੋ ਵਿਧਾਯਕਵਚਨਬਲੇਨਾਤਿ ਅਤ੍ਥੋ. ਭਿਕ੍ਖੁਸ੍ਸ ਪਨ ਭਿਕ੍ਖੁਨਿਯਾ ਦੁਕ੍ਕਟਨ੍ਤਿ ਭਿਕ੍ਖੁਨਿਂ ਅਨੁਦ੍ਧਂਸੇਨ੍ਤਸ੍ਸ ਭਿਕ੍ਖੁਸ੍ਸ ਦੁਕ੍ਕਟਂ.

ਏਵਂ ਦ੍ਵੀਸੁਪਿ ਅਟ੍ਠਕਥਾਵਚਨੇਸੁ ਅਧਿਪ੍ਪਾਯਂ ਵਿਭਾਵੇਤ੍ਵਾ ਇਦਾਨਿ ਪਚ੍ਛਿਮੇ ਪਾਚਿਤ੍ਤਿਯਵਾਦੇ ਦੋਸਂ ਦਸ੍ਸੇਤ੍ਵਾ ਪੁਰਿਮਦੁਕ੍ਕਟਵਾਦਮੇਵ ਪਤਿਟ੍ਠਾਪੇਤੁਂ ‘‘ਤਤ੍ਰ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਵਿਸੁਨ੍ਤਿ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਤੋ (ਪਾਚਿ. ੧) ਵਿਸੁਂ ਪਾਚਿਤ੍ਤਿਯਂ ਵੁਤ੍ਤਂ, ਤਤ੍ਥ ਅਨਨ੍ਤੋਗਧਭਾਵਾਤਿ ਅਧਿਪ੍ਪਾਯੋ. ਤਸ੍ਮਾਤਿ ਯਸ੍ਮਾ ਅਮੂਲਕਾਨੁਦ੍ਧਂਸਨੇ ਵਿਸੁਞ੍ਞੇਵ ਪਾਚਿਤ੍ਤਿਯਂ ਪਞ੍ਞਤ੍ਤਂ, ਤਸ੍ਮਾ ਪੁਰਿਮਨਯੋਤਿ ਦੁਕ੍ਕਟਵਾਦੋ. ਏਵਂ ਅਨ੍ਤਰਾ ਪਵਿਟ੍ਠਂ ਦੁਕ੍ਕਟਪਾਚਿਤ੍ਤਿਯਵਾਦਂ ਦਸ੍ਸੇਤ੍ਵਾ ਇਦਾਨਿ ਪਾਕਟਮੇਵ ਅਤ੍ਥਂ ਵਿਭਾਵੇਤੁਂ ‘‘ਤਥਾ ਭਿਕ੍ਖੁਨੀ’’ਤਿਆਦਿ ਆਰਦ੍ਧਂ. ਤਤ੍ਥ ਤਥਾਤਿ ਯਥਾ ਭਿਕ੍ਖੁਸ੍ਸ ਭਿਕ੍ਖੁਂ, ਭਿਕ੍ਖੁਨਿਞ੍ਚ ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿਸੇਸਦੁਕ੍ਕਟਾਨਿ ਵੁਤ੍ਤਾਨਿ, ਤਥਾਤਿ ਅਤ੍ਥੋ. ਏਤੇਹਿ ਨਾਸਨਾ ਨਤ੍ਥੀਤਿ ਸਾਮਞ੍ਞਤੋ ਵੁਤ੍ਤਂ, ਦੁਕ੍ਕਟੇਨ ਇਮਿਸ੍ਸਾ ਪਨ ਨਾਸਨਾ ਨਤ੍ਥੀਤਿ ਅਧਿਪ੍ਪਾਯੋ. ਦੁਸ੍ਸੀਲਾਤਿ ਪਾਰਾਜਿਕਾ.

੩੮੬. ਆਕਾਰਨਾਨਤ੍ਤੇਨਾਤਿ ਦੂਸਿਤਾਕਾਰਸ੍ਸ, ਦੂਸਕਾਕਾਰਸ੍ਸ ਚ ਨਾਨਤ੍ਤੇਨ. ਅਨਭਿਰਦ੍ਧੋਤਿ ਅਤੁਟ੍ਠੋ. ਤੇਨਾਹ ‘‘ਨ ਸੁਖਿਤੋ’’ਤਿ. ਨ ਪਸਾਦਿਤੋਤਿ ਅਨੁਪ੍ਪਾਦਿਤਪ੍ਪਸਾਦੋ. ਖੀਲ-ਸਦ੍ਦੋ ਥਦ੍ਧਭਾਵਵਚਨੋ, ਕਚਵਰਪਰਿਯਾਯੋ ਚ ਹੋਤੀਤਿ ਆਹ ‘‘ਚਿਤ੍ਤ…ਪੇ… ਖੀਲ’’ਨ੍ਤਿ. ਨਪ੍ਪਤੀਤੋਤਿ ਪੀਤਿਸੁਖਾਦੀਹਿ ਨ ਅਭਿਗਤੋ ਨ ਉਪਗਤੋ. ਤੇਨਾਹ ‘‘ਨ ਅਭਿਸਟੋ’’ਤਿ.

ਯੇਨ ਦੁਟ੍ਠੋਤਿ ਚ ਕੁਪਿਤੋਤਿ ਚ ਵੁਤ੍ਤੋਤਿ ਏਤ੍ਥ ਯੇਨ ਦੁਟ੍ਠੋਤਿ ਚ ਵੁਤ੍ਤੋ ਯੇਨ ਕੁਪਿਤੋਤਿ ਚ ਵੁਤ੍ਤੋ, ਤਂ ਮਾਤਿਕਾਯਞ੍ਚ ਪਦਭਾਜਨੇ (ਪਾਰਾ. ੩੮੬) ਚ ਵੁਤ੍ਤਂ ਉਭਯਮ੍ਪੇਤਨ੍ਤਿ ਯੋਜੇਤਬ੍ਬਂ. ਦ੍ਵੀਹੀਤਿ ‘‘ਤੇਨ ਚ ਕੋਪੇਨ, ਤੇਨ ਚ ਦੋਸੇਨਾ’’ਤਿ ਵੁਤ੍ਤਕੋਪਦੋਸਪਦੇਹਿ ਦ੍ਵੀਹਿ, ਅਤ੍ਥਤੋ ਪਨ ਦ੍ਵੀਹਿਪਿ ਦੋਸੋਵ ਦਸ੍ਸਿਤੋਤਿ ਆਹ ‘‘ਸਙ੍ਖਾਰਕ੍ਖਨ੍ਧਮੇਵ ਦਸ੍ਸੇਤੀ’’ਤਿ. ਯਾਯਾਤਿ ਅਨਤ੍ਤਮਨਤਾਯ.

ਨ ਚੁਦਿਤਕਵਸੇਨਾਤਿ ਯਦਿ ਚੁਦਿਤਕਵਸੇਨਾਪਿ ਅਮੂਲਕਂ ਅਧਿਪ੍ਪੇਤਂ ਸਿਯਾ, ਅਮੂਲਕਂ ਨਾਮ ਅਨਜ੍ਝਾਪਨ੍ਨਨ੍ਤਿ ਪਦਭਾਜਨਂ ਵਦੇਯ੍ਯਾਤਿ ਅਧਿਪ੍ਪਾਯੋ. ਯਂ ਪਾਰਾਜਿਕਨ੍ਤਿ ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਪਾਰਾਜਿਕੇਸੁ ਅਞ੍ਞਤਰਂ. ਪਦਭਾਜਨੇ (ਪਾਰਾ. ੩੮੬) ਪਨ ਭਿਕ੍ਖੁਵਿਭਙ੍ਗੇ ਆਗਤਾਨੇਵ ਗਹੇਤ੍ਵਾ ‘‘ਚਤੁਨ੍ਨਂ ਅਞ੍ਞਤਰੇਨਾ’’ਤਿ ਵੁਤ੍ਤਂ. ਏਤਂ ਇਧ ਅਪ੍ਪਮਾਣਨ੍ਤਿ ਏਤਂ ਆਪਨ੍ਨਾਨਾਪਨ੍ਨਤਂ ਇਧਾਨੁਦ੍ਧਂਸਨੇ ਆਪਤ੍ਤਿਯਾ ਅਨਙ੍ਗਂ, ਆਪਤ੍ਤਿਂ ਪਨ ਆਪਨ੍ਨੇ ਵਾ ਅਨਾਪਨ੍ਨੇ ਵਾ ਪੁਗ੍ਗਲੇ ‘‘ਅਨਾਪਨ੍ਨੋ ਏਸੋ ਸੁਦ੍ਧੋ’’ਤਿ ਸੁਦ੍ਧਸਞ੍ਞਾਯ ਵਾ ਵਿਮਤਿਯਾ ਵਾ ਚਾਵਨਾਧਿਪ੍ਪਾਯੋਵ ਇਧ ਅਙ੍ਗਨ੍ਤਿ ਅਧਿਪ੍ਪਾਯੋ.

ਤਥੇਵਾਤਿ ਪਸਾਦਸੋਤੇਨ, ਦਿਬ੍ਬਸੋਤੇਨ ਵਾਤਿ ਇਮਮਤ੍ਥਂ ਅਤਿਦਿਸਤਿ. ਦਿਟ੍ਠਾਨੁਸਾਰੇਨੇਵ ਸਮੁਪ੍ਪਨ੍ਨਾ ਪਰਿਸਙ੍ਕਾਵ ਦਿਟ੍ਠਪਰਿਸਙ੍ਕਿਤਂ ਨਾਮ. ਏਵਂ ਸੇਸੇਸੁਪਿ. ‘‘ਅਦਿਸ੍ਵਾ ਵਾ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ, ਦਿਸ੍ਵਾ ਪਕ੍ਕਨ੍ਤੇਸੁਪਿ ਦੋਸੋ ਨਤ੍ਥਿਯੇਵ. ਇਮੇਸਨ੍ਤਿ ਇਮੇਹਿ. ਕਰਿਸ੍ਸਨ੍ਤੀਤਿ ਤਸ੍ਮਿਂ ਖਣੇ ਉਪ੍ਪਜ੍ਜਨਾਕਾਰਦਸ੍ਸਨਂ, ਪਚ੍ਛਾ ਪਨ ਏਤ੍ਤਕੇਨ ਕਾਲੇਨ ਕਤਂ ਵਾਤਿ ਸਙ੍ਕਾਯ ਚੋਦੇਤਿ. ਨ ਹਿ ਕਰਿਸ੍ਸਨ੍ਤੀਤਿ ਚੋਦਨਾ ਅਤ੍ਥਿ. ‘‘ਅਰਿਟ੍ਠਂ ਪੀਤ’’ਨ੍ਤਿ ਇਦਂ ਮੁਖੇ ਸੁਰਾਗਨ੍ਧਵਾਯਨਨਿਮਿਤ੍ਤਦਸ੍ਸਨਂ. ਅਰਿਟ੍ਠਞ੍ਹਿ ਸੁਰਾਸਦਿਸਵਣ੍ਣਗਨ੍ਧਂ ਕਪ੍ਪਿਯਭੇਸਜ੍ਜਂ.

ਦਿਟ੍ਠਂ ਅਤ੍ਥਿ ਸਮੂਲਕਨ੍ਤਿਆਦੀਸੁ ਅਜ੍ਝਾਚਾਰਸ੍ਸ ਸਮ੍ਭਵਾਸਮ੍ਭਵਾਨਂ ਮੂਲਾਮੂਲਭਾਵਦਸ੍ਸਨਂ. ਅਤ੍ਥਿ ਸਞ੍ਞਾਸਮੂਲਕਨ੍ਤਿਆਦਿ ਪਨ ਦਿਟ੍ਠਸਞ੍ਞਾਯ ਸਮ੍ਭਵਾਸਮ੍ਭਵਾਨਂ ਮੂਲਾਮੂਲਭਾਵਦਸ੍ਸਨਂ. ਦਿਸ੍ਵਾਵ ਦਿਟ੍ਠਸਞ੍ਞੀ ਹੁਤ੍ਵਾ ਚੋਦੇਤੀਤਿ ਏਤ੍ਥ ਯਂ ਚੋਦੇਤਿ, ਤਤੋ ਅਞ੍ਞਂ ਪੁਗ੍ਗਲਂ ਵੀਤਿਕ੍ਕਮਨ੍ਤਂ, ਪਟਿਚ੍ਛਨ੍ਨੋਕਾਸਤੋ ਨਿਕ੍ਖਮਨ੍ਤਂ ਵਾ ਦਿਸ੍ਵਾ ‘‘ਅਯਂ ਸੋ’’ਤਿ ਸਞ੍ਞਾਯ ਚੋਦੇਨ੍ਤੋਪਿ ਸਙ੍ਗਯ੍ਹਤਿ. ਏਸ ਨਯੋ ਸੁਤਾਦੀਸੁਪਿ. ਸਮੂਲਕੇਨ ਵਾ ਸਞ੍ਞਾਸਮੂਲਕੇਨ ਵਾਤਿ ਏਤ੍ਥ ਪਾਰਾਜਿਕਮਾਪਨ੍ਨਂ ਦਿਟ੍ਠਾਦਿਮੂਲਕੇਨ ਚ ‘‘ਅਯਂ ਆਪਨ੍ਨੋ’’ਤਿ ਅਸੁਦ੍ਧਸਞ੍ਞਾਯ ਚੋਦੇਨ੍ਤੋ ਸਮੂਲਕੇਨ ਚੋਦੇਤਿ ਨਾਮ. ਸਞ੍ਞਾਸਮੂਲਕਤ੍ਤੇ ਏਵ ਅਨਾਪਤ੍ਤਿਸਮ੍ਭਵਤੋ ਆਪਨ੍ਨੇ ਵਾ ਅਨਾਪਨ੍ਨੇ ਵਾ ਪੁਗ੍ਗਲੇ ਆਪਨ੍ਨਸਞ੍ਞੀ ਦਿਟ੍ਠਾਦੀਸੁ, ਅਦਿਟ੍ਠਾਦੀਸੁ ਵਾ ਮੂਲੇਸੁ ਦਿਟ੍ਠਸੁਤਾਦਿਸਞ੍ਞੀ ਤੇਨ ਦਿਟ੍ਠਾਦਿਮੂਲਕੇਨ ਤਂ ਪੁਗ੍ਗਲਂ ਚੋਦੇਨ੍ਤੋ ਸਞ੍ਞਾਸਮੂਲਕੇਨ ਚੋਦੇਤਿ ਨਾਮ. ਇਮੇਸਂ ਅਨਾਪਤ੍ਤਿ, ਵੁਤ੍ਤਵਿਪਰਿਯਾਯੇਨ ਆਪਤ੍ਤਿਵਾਰੇ ਅਤ੍ਥੋ ਵੇਦਿਤਬ੍ਬੋ.

ਸਮੀਪੇ ਠਤ੍ਵਾਤਿ ਹਤ੍ਥਵਿਕਾਰਵਚੀਘੋਸਾਨਂ ਚੋਦਨਾਵਸੇਨ ਪਵਤ੍ਤਿਯਮਾਨਾਨਂ ਦਸ੍ਸਨਸਵਨੂਪਚਾਰੇ ਠਤ੍ਵਾਤਿ ਅਤ੍ਥੋ. ਕੇਚਿ ਪਨ ‘‘ਦ੍ਵਾਦਸਹਤ੍ਥਬ੍ਭਨ੍ਤਰੇ ਠਤ੍ਵਾ’’ਤਿ (ਸਾਰਤ੍ਥ. ਟੀ. ੨.੩੮੫-੩੮੬) ਵਦਨ੍ਤਿ, ਤਂ ਨ ਯੁਤ੍ਤਂ. ਪਰਤੋ ਬ੍ਯਤਿਰੇਕਤੋ ਅਨਾਪਤ੍ਤਿਂ ਦਸ੍ਸੇਨ੍ਤੇਨ ‘‘ਦੂਤਂ ਵਾ ਪਣ੍ਣਂ ਵਾ ਸਾਸਨਂ ਵਾ ਪੇਸੇਤ੍ਵਾ’’ਤਿ ਏਤ੍ਤਕਮੇਵ ਵੁਤ੍ਤਂ, ਨ ਪਨ ‘‘ਦ੍ਵਾਦਸਹਤ੍ਥਂ ਮੁਞ੍ਚਿਤ੍ਵਾ ਚੋਦੇਨ੍ਤਸ੍ਸ ਸੀਸਂ ਨ ਏਤੀ’’ਤਿ ਵੁਤ੍ਤਂ. ਵਾਚਾਯ ਵਾਚਾਯਾਤਿ ਸਕਿਂ ਆਣਤ੍ਤਸ੍ਸ ਸਕਲਮ੍ਪਿ ਦਿਵਸਂ ਵਦਤੋ ਵਾਚਾਯ ਵਾਚਾਯ ਚੋਦਾਪਕਸ੍ਸੇਵ ਆਪਤ੍ਤਿ. ਸੋਪੀਤਿ ਆਣਤ੍ਤੋਪਿ. ਤਸ੍ਸ ਚ ‘‘ਮਯਾਪਿ ਦਿਟ੍ਠ’’ਨ੍ਤਿਆਦਿਂ ਅਵਤ੍ਵਾਪਿ ‘‘ਅਮੂਲਕ’’ਨ੍ਤਿ ਸਞ੍ਞਾਯ ਚਾਵਨਾਧਿਪ੍ਪਾਯੇਨ ‘‘ਤ੍ਵਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ਤਿ ਇਦਮੇਵ ਵਾਚਂ ਪਰਸ੍ਸ ਵਚਨਂ ਵਿਯ ਅਕਤ੍ਵਾ ਸਾਮਞ੍ਞਤੋ ਵਦਨ੍ਤਸ੍ਸਾਪਿ ਸਙ੍ਘਾਦਿਸੇਸੋ ਏਵ. ਸਤਿਪਿ ਪਨ ਅਨੁਦ੍ਧਂਸਨਾਧਿਪ੍ਪਾਯੇ ‘‘ਅਸੁਕੇਨ ਏਵਂ ਵੁਤ੍ਤ’’ਨ੍ਤਿ ਪਰੇਨ ਵੁਤ੍ਤਮੇਵ ਵਦਨ੍ਤਸ੍ਸ ਨਤ੍ਥਿ ਸਙ੍ਘਾਦਿਸੇਸੋ. ਸਚੇ ਪਨ ਪਰੇਨ ਅਵੁਤ੍ਤਮ੍ਪਿ ਵੁਤ੍ਤਨ੍ਤਿ ਵਦਤਿ, ਆਪਤ੍ਤਿ ਏਵ.

ਸਮ੍ਬਹੁਲਾ ਸਮ੍ਬਹੁਲੇ ਸਮ੍ਬਹੁਲੇਹਿ ਵਤ੍ਥੂਹੀਤਿ ਏਤ੍ਥ ਸਮ੍ਬਹੁਲੇਤਿ ਚੁਦਿਤਕਬਹੁਤ੍ਤਨਿਦ੍ਦੇਸੇਨ ਪੁਰਿਮੇਸੁ ਤੀਸੁ ਵਾਰੇਸੁ ਚੁਦਿਤਕਬਹੁਤ੍ਤੇਨਾਪਿ ਵਾਰਭੇਦਸਬ੍ਭਾਵਂ ਞਾਪੇਤਿ. ਏਕਸ੍ਮਿਞ੍ਹਿ ਚੁਦਿਤਕਵਤ੍ਥੁਚੋਦਕਭੇਦੇਨ ਇਦਂ ਚਤੁਕ੍ਕਂ ਵੁਤ੍ਤਂ, ਚੁਦਿਤਕਬਹੁਤ੍ਤੇਨਾਪਿ ਚਤੁਕ੍ਕਨ੍ਤਰਂ ਲਬ੍ਭਤੀਤਿ ਅਟ੍ਠਕਂ ਹੋਤਿ ਏਵ.

ਅਮੂਲਕਚੋਦਨਾਪਸਙ੍ਗੇਨ ਸਮੂਲਕਚੋਦਨਾਲਕ੍ਖਣਾਦਿਂ ਦਸ੍ਸੇਤੁਂ ‘‘ਚੋਦੇਤੁਂ ਪਨ ਕੋ ਲਭਤੀ’’ਤਿਆਦਿ ਆਰਦ੍ਧਂ. ਭਿਕ੍ਖੁਸ੍ਸ ਸੁਤ੍ਵਾ ਚੋਦੇਤੀਤਿਆਦਿ ਸੁਤ੍ਤਂ ਯਸ੍ਮਾ ਯੇ ਚੋਦਕਸ੍ਸ ਅਞ੍ਞੇਸਂ ਵਿਪਤ੍ਤਿਂ ਪਕਾਸੇਨ੍ਤਿ, ਤੇਪਿ ਤਸ੍ਮਿਂ ਖਣੇ ਚੋਦਕਭਾਵੇ ਠਤ੍ਵਾਵ ਪਕਾਸੇਨ੍ਤਿ, ਤੇਸਞ੍ਚ ਵਚਨਂ ਗਹੇਤ੍ਵਾ ਇਤਰੋਪਿ ਯਸ੍ਮਾ ਚੋਦੇਤੁਞ੍ਚ ਅਸਮ੍ਪਟਿਚ੍ਛਨ੍ਤਂ ਤੇਹਿ ਤਿਤ੍ਥਿਯਸਾਵਕਪਰਿਯੋਸਾਨੇਹਿ ਪਠਮਚੋਦਕੇਹਿ ਸਮ੍ਪਟਿਚ੍ਛਾਪੇਤੁਞ੍ਚ ਲਭਤਿ, ਤਸ੍ਮਾ ਇਧ ਸਾਵਕਭਾਵੇਨ ਉਦ੍ਧਟਨ੍ਤਿ ਵੇਦਿਤਬ੍ਬਂ.

ਦੂਤਂ ਵਾਤਿਆਦੀਸੁ ‘‘ਤ੍ਵਂ ਏਵਂ ਗਨ੍ਤ੍ਵਾ ਚੋਦੇਹੀ’’ਤਿ ਦੂਤਂ ਵਾ ਪੇਸੇਤ੍ਵਾ ਯੋ ਚੋਦੇਤੁਂ ਸਕ੍ਕੋਤਿ, ਤਸ੍ਸ ਪਣ੍ਣਂ, ਮੂਲਸਾਸਨਂ ਵਾ ਪੇਸੇਤ੍ਵਾ. ਸਮਯੇਨਾਤਿ ਪਕਤਿਯਾ ਜਾਨਨਕ੍ਖਣੇ.

ਗਰੁਕਾਨਂ ਦ੍ਵਿਨ੍ਨਨ੍ਤਿ ਪਾਰਾਜਿਕਸਙ੍ਘਾਦਿਸੇਸਾਨਂ. ਮਿਚ੍ਛਾਦਿਟ੍ਠਿ ਨਾਮ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾ (ਮ. ਨਿ. ੧.੪੪੫; ੨.੯੪, ੯੫, ੨੨੫; ੩.੯੧, ੧੧੬, ੧੩੬; ਸਂ. ਨਿ. ੩.੨੧੦) ਦਸਵਤ੍ਥੁਕਾ ਦਿਟ੍ਠਿ, ਸਸ੍ਸਤੁਚ੍ਛੇਦਸਙ੍ਖਾਤਂ ਅਨ੍ਤਂ ਗਣ੍ਹਾਪਕਦਿਟ੍ਠਿ ਅਨ੍ਤਗ੍ਗਾਹਿਕਾ ਨਾਮ. ਆਜੀਵਹੇਤੁ ਪਞ੍ਞਤ੍ਤਾਨਂ ਛਨ੍ਨਨ੍ਤਿ ਆਜੀਵਹੇਤੁਪਿ ਆਪਜ੍ਜਿਤਬ੍ਬਾਨਂ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਂ (ਪਾਰਾ. ੧੯੫), ਸਞ੍ਚਰਿਤ੍ਤੇ (ਪਾਰਾ. ੩੦੧, ੩੦੨) ਸਙ੍ਘਾਦਿਸੇਸੋ, ‘‘ਯੋ ਤੇ ਵਿਹਾਰੇ ਵਸਤਿ, ਸੋ ਅਰਹਾ’’ਤਿ (ਪਾਰਾ. ੨੨੦) ਪਰਿਯਾਯੇਨ ਥੁਲ੍ਲਚ੍ਚਯਂ, ਭਿਕ੍ਖੁਸ੍ਸ ਪਣੀਤਭੋਜਨਵਿਞ੍ਞਤ੍ਤਿਯਾ ਪਾਚਿਤ੍ਤਿਯਂ (ਪਾਚਿ. ੨੫੭), ਭਿਕ੍ਖੁਨਿਯਾਪਣੀਤਭੋਜਨਵਿਞ੍ਞਤ੍ਤਿਯਾ ਪਾਟਿਦੇਸਨੀਯਂ (ਪਾਚਿ. ੧੨੩੬), ਸੂਪੋਦਨਵਿਞ੍ਞਤ੍ਤਿਯਾ (ਪਾਚਿ. ੬੧੨-੬੧੩) ਦੁਕ੍ਕਟਨ੍ਤਿ ਇਮੇਸਂ ਪਰਿਵਾਰੇ (ਪਰਿ. ੨੮੭) ਵੁਤ੍ਤਾਨਂ ਛਨ੍ਨਂ. ਨ ਹੇਤਾ ਆਪਤ੍ਤਿਯੋ ਆਜੀਵਹੇਤੁ ਏਵ ਪਞ੍ਞਤ੍ਤਾ ਸਞ੍ਚਰਿਤ੍ਤਾਦੀਨਂ ਅਞ੍ਞਥਾਪਿ ਆਪਜ੍ਜਿਤਬ੍ਬਤੋ. ਆਜੀਵਹੇਤੁਪਿ ਏਤਾਸਂ ਆਪਜ੍ਜਨਂ ਸਨ੍ਧਾਯ ਏਵਂ ਵੁਤ੍ਤਂ, ਆਜੀਵਹੇਤੁਪਿ ਪਞ੍ਞਤ੍ਤਾਨਨ੍ਤਿ ਅਤ੍ਥੋ. ਨ ਕੇਵਲਞ੍ਚ ਏਤਾ ਏਵ, ਅਞ੍ਞਾਪਿ ਅਦਿਨ੍ਨਾਦਾਨਕੁਲਦੂਸਨਪਾਣਵਧਵੇਜ੍ਜਕਮ੍ਮਾਦਿਵਸੇਨ ਆਜੀਵਹੇਤੁ ਆਪਜ੍ਜਿਤਬ੍ਬਾਪਿ ਸਨ੍ਤਿ, ਤਾ ਪਨ ਆਪਤ੍ਤਿਸਭਆਗਤਾਯ ਪਾਰਾਜਿਕਾਦੀਸੁ ਛਸੁ ਏਵ ਸਙ੍ਗਯ੍ਹਨ੍ਤੀਤਿ ਵਿਸੁਂ ਨ ਵੁਤ੍ਤਾਤਿ ਵੇਦਿਤਬ੍ਬਾ.

ਏਤ੍ਤਾਵਤਾ ਪਨ ਸੀਸਂ ਨ ਏਤੀਤਿ ਸਙ੍ਘਾਦਿਸੇਸਂ ਸਨ੍ਧਾਯ ਵੁਤ੍ਤਂ, ਚੋਦਨਾ ਪਨ ਕਤਾ ਏਵ ਹੋਤਿ. ਤਿਂਸਾਨੀਤਿ ਤਿਂਸਂ ਏਤੇਸਮਤ੍ਥੀਤਿ ਤਿਂਸਾਨਿ, ਤਿਂਸਾਧਿਕਾਨੀਤਿ ਵੁਤ੍ਤਂ ਹੋਤਿ. ਨਵੁਤਾਨੀਤਿ ਏਤ੍ਥਾਪਿ ਏਸੇਵ ਨਯੋ.

ਅਤ੍ਤਾਦਾਨਂ ਆਦਾਤੁਕਾਮੇਨਾਤਿ ਏਤ੍ਥ ਅਤ੍ਤਨਾ ਆਦਾਤਬ੍ਬਤੋ ਦਿਟ੍ਠਾਦਿਮੂਲਕੇਹਿ ਗਹੇਤਬ੍ਬਤੋ ਪਰਸ੍ਸ ਵਿਪ੍ਫਨ੍ਦਿਤੁਂ ਅਦਤ੍ਵਾ ਪਗ੍ਗਣ੍ਹਨਤੋ ਅਤ੍ਤਾਦਾਨਨ੍ਤਿ ਚੋਦਨਾ ਵੁਚ੍ਚਤਿ, ਤਂ ਆਦਾਤੁਕਾਮੇਨ, ਚੋਦਨਂ ਕਤ੍ਤੁਕਾਮੇਨਾਤਿ ਅਤ੍ਥੋ.

ਉਬ੍ਬਾਹਿਕਾਯਾਤਿ ਉਬ੍ਬਹਨ੍ਤਿ ਵਿਯੋਜੇਨ੍ਤਿ ਏਤਾਯ ਅਲਜ੍ਜੀਨਂ ਤਜ੍ਜਨਿਂ ਵਾ ਕਲਹਂ ਵਾਤਿ ਉਬ੍ਬਾਹਿਕਾ, ਸਙ੍ਘਸਮ੍ਮੁਤਿ, ਤਾਯ. ਵਿਨਿਚ੍ਛਿਨਨਂ ਨਾਮ ਤਾਯ ਸਮ੍ਮਤਭਿਕ੍ਖੂਹਿ ਵਿਨਿਚ੍ਛਨਨਮੇਵ. ਅਲਜ੍ਜੁਸ੍ਸਨ੍ਨਾਯ ਹਿ ਪਰਿਸਾਯ ਸਮਥਕ੍ਖਨ੍ਧਕੇ (ਚੂਲ਼ਵ. ੨੨੭) ਆਗਤੇਹਿ ਦਸਙ੍ਗੇਹਿ ਸਮਨ੍ਨਾਗਤਾ ਦ੍ਵੇ ਤਯੋ ਭਿਕ੍ਖੂ ਤਤ੍ਥੇਵ ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਨ੍ਨਿਤਬ੍ਬਾ, ਤੇਹਿ ਚ ਸਮ੍ਮਤੇਹਿ ਵਿਸੁਂ ਵਾ ਨਿਸੀਦਿਤ੍ਵਾ, ਤਸ੍ਸਾ ਏਵ ਵਾ ਪਰਿਸਾਯ ‘‘ਅਞ੍ਞੇਹਿ ਨ ਕਿਞ੍ਚਿ ਕਥੇਤਬ੍ਬ’’ਨ੍ਤਿ ਸਾਵੇਤ੍ਵਾ ਤਂ ਅਧਿਕਰਣਂ ਵਿਨਿਚ੍ਛਿਤਬ੍ਬਂ.

ਕਿਮ੍ਹੀਤਿ ਕਿਸ੍ਮਿਂ ਵਤ੍ਥੁਸ੍ਮਿਂ, ਕਤਰਵਿਪਤ੍ਤਿਯਨ੍ਤਿ ਅਤ੍ਥੋ. ‘‘ਕਿਮ੍ਹਿ ਨਂ ਨਾਮਾ’’ਤਿ ਇਦਂ ‘‘ਕਤਰਾਯ ਵਿਪਤ੍ਤਿਯਾ ਏਤਂ ਚੋਦੇਸੀ’’ਤਿ ਯਾਯ ਕਾਯਚਿ ਵਿਞ੍ਞਾਯਮਾਨਾਯ ਭਾਸਾਯ ਵੁਤ੍ਤੇਪਿ ਚੋਦਕਸ੍ਸ ਵਿਨਯੇ ਅਪਕਤਞ੍ਞੁਤਾਯ ‘‘ਸੀਲਾਚਾਰਦਿਟ੍ਠਿਆਜੀਵਵਿਪਤ੍ਤੀਸੁ ਕਤਰਾਯਾਤਿ ਮਂ ਪੁਚ੍ਛਤੀ’’ਤਿ ਞਾਤੁਂ ਅਸਕ੍ਕੋਨ੍ਤਸ੍ਸ ਪੁਚ੍ਛਾ, ਨ ਪਨ ਕਿਮ੍ਹੀਤਿਆਦਿਪਦਤ੍ਥਮਤ੍ਤਂ ਅਜਾਨਨ੍ਤਸ੍ਸ. ਨ ਹਿ ਅਨੁਵਿਜ੍ਜਕੋ ਚੋਦਕਂ ਬਾਲਂ ਅਪਰਿਚਿਤਭਾਸਾਯ ‘‘ਕਿਮ੍ਹਿ ਨ’’ਨ੍ਤਿ ਪੁਚ੍ਛਤਿ. ‘‘ਕਿਮ੍ਹਿ ਨਮ੍ਪਿ ਨ ਜਾਨਾਸੀ’’ਤਿ ਇਦਮ੍ਪਿ ਵਚਨਮਤ੍ਤਂ ਸਨ੍ਧਾਯ ਵੁਤ੍ਤਂ ਨ ਹੋਤਿ, ‘‘ਕਤਰਵਿਪਤ੍ਤਿਯਾ’’ਤਿ ਵੁਤ੍ਤੇ ‘‘ਅਸੁਕਾਯ ਵਿਪਤ੍ਤਿਯਾ’’ਤਿ ਵਤ੍ਤੁਮ੍ਪਿ ਨ ਜਾਨਾਸੀਤਿ ਵਚਨਸ੍ਸ ਅਧਿਪ੍ਪਾਯਮੇਵ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ. ਤੇਨੇਵ ਵਕ੍ਖਤਿ ‘‘ਬਾਲਸ੍ਸ ਲਜ੍ਜਿਸ੍ਸ ਨਯੋ ਦਾਤਬ੍ਬੋ’’ਤਿ ਵਤ੍ਵਾ ਚ ‘‘ਕਿਮ੍ਹਿ ਨਂ ਚੋਦੇਸੀਤਿ ਸੀਲਵਿਪਤ੍ਤਿਯਾ’’ਤਿਆਦਿ ਅਧਿਪ੍ਪਾਯਪ੍ਪਕਾਸਨਮੇਵ ਨਯਦਾਨਂ ਵੁਤ੍ਤਂ, ਨ ਪਨ ਕਿਮ੍ਹਿ-ਨਂ-ਪਦਾਨਂ ਪਰਿਯਾਯਮਤ੍ਤਦਸ੍ਸਨਂ. ਨ ਹਿ ਬਾਲੋ ‘‘ਕਤਰਵਿਪਤ੍ਤਿਯਂ ਨਂ ਚੋਦੇਸੀ’’ਤਿ ਇਮਸ੍ਸ ਵਚਨਸ੍ਸ ਅਤ੍ਥੇ ਞਾਤੇਪਿ ਵਿਪਤ੍ਤਿਪ੍ਪਭੇਦਨਂ, ਅਤ੍ਤਨਾ ਚੋਦਿਯਮਾਨਂ ਵਿਪਤ੍ਤਿਸਰੂਪਞ੍ਚ ਜਾਨਿਤੁਂ ਸਕ੍ਕੋਤਿ, ਤਸ੍ਮਾ ਤੇਨੇਵ ਅਜਾਨਨੇਨ ਅਲਜ੍ਜੀ ਅਪਸਾਦੇਤਬ੍ਬੋ. ‘‘ਕਿਮ੍ਹਿ ਨ’’ਨ੍ਤਿ ਇਦਮ੍ਪਿ ਉਪਲਕ੍ਖਣਮਤ੍ਤਂ, ਅਞ੍ਞੇਨ ਵਾ ਯੇਨ ਕੇਨਚਿ ਆਕਾਰੇਨ ਅਵਿਞ੍ਞੁਤਂ ਪਕਾਸੇਤ੍ਵਾ ਵਿਸ੍ਸਜ੍ਜੇਤਬ੍ਬੋਵ.

‘‘ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯਾ’’ਤਿਆਦਿਵਚਨਤੋ (ਪਾਰਾ. ੩੯; ਪਰਿ. ੨) ‘‘ਅਲਜ੍ਜੀਨਿਗ੍ਗਹਤ੍ਥਾਯ…ਪੇ… ਪਞ੍ਞਤ੍ਤ’’ਨ੍ਤਿ ਵੁਤ੍ਤਂ. ਏਹਿਤੀਤਿ ਹਿ-ਕਾਰੋ ਏਤ੍ਥ ਆਗਮੋ ਦਟ੍ਠਬ੍ਬੋ, ਆਗਮਿਸ੍ਸਤੀਤਿ ਅਤ੍ਥੋ. ਦਿਟ੍ਠਸਨ੍ਤਾਨੇਨਾਤਿ ਦਿਟ੍ਠਨਿਯਾਮੇਨ. ਅਲਜ੍ਜਿਸ੍ਸ ਪਟਿਞ੍ਞਾਯ ਏਵ ਕਾਤਬ੍ਬਨ੍ਤਿ ਵਚਨਪਟਿਵਚਨਕ੍ਕਮੇਨੇਵ ਦੋਸੇ ਆਵਿਭੂਤੇਪਿ ਅਲਜ੍ਜਿਸ੍ਸ ‘‘ਅਸੁਦ੍ਧੋਹ’’ਨ੍ਤਿ ਦੋਸਸਮ੍ਪਟਿਚ੍ਛਨਪਅਞ੍ਞਾਯ ਏਵ ਆਪਤ੍ਤਿਯਾ ਕਾਤਬ੍ਬਨ੍ਤਿ ਅਤ੍ਥੋ. ਕੇਚਿ ਪਨ ‘‘ਅਲਜ੍ਜਿਸ੍ਸ ਏਤਂ ਨਤ੍ਥੀਤਿ ਸੁਦ੍ਧਪਟਿਞ੍ਞਾਯ ਏਵ ਅਨਾਪਤ੍ਤਿਯਾ ਕਾਤਬ੍ਬਨ੍ਤਿ ਅਯਮੇਤ੍ਥ ਅਤ੍ਥੋ ਸਙ੍ਗਹਿਤੋ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਅਨੁਵਿਜ੍ਜਕਸ੍ਸੇਵ ਨਿਰਤ੍ਥਕਤ੍ਤਾਪਤ੍ਤਿਤੋ ਚੋਦਕੇਨੇਵ ਅਲਜ੍ਜਿਪਟਿਞ੍ਞਾਯ ਠਾਤਬ੍ਬਤੋ. ਦੋਸਾਪਗਮਪਟਿਞ੍ਞਾ ਏਵ ਹਿ ਇਧ ਪਟਿਞ੍ਞਾਤਿ ਅਧਿਪ੍ਪੇਤਾ. ਤੇਨੇਵ ਵਕ੍ਖਤਿ ‘‘ਏਤਮ੍ਪਿ ਨਤ੍ਥੀਤਿ ਪਟਿਞ੍ਞਂ ਨ ਦੇਤੀ’’ਤਿਆਦਿ (ਪਾਰਾ. ਅਟ੍ਠ. ੨.੩੮੫-੩੮੬).

ਤਦਤ੍ਥਦੀਪਨਤ੍ਥਨ੍ਤਿ ਅਲਜ੍ਜਿਸ੍ਸ ਦੋਸੇ ਆਵਿਭੂਤੇਪਿ ਤਸ੍ਸ ਦੋਸਾਪਗਮਪਟਿਞ੍ਞਾਯ ਏਵ ਕਾਤਬ੍ਬਤਾਦੀਪਨਤ੍ਥਂ. ਵਿਵਾਦਵਤ੍ਥੁਸਙ੍ਖਾਤੇ ਅਤ੍ਥੇ ਪਚ੍ਚਤ੍ਥਿਕਾ ਅਤ੍ਥਪਚ੍ਚਤ੍ਥਿਕਾ. ਸਞ੍ਞਂ ਦਤ੍ਵਾਤਿ ਨੇਸਂ ਕਥਾਪਚ੍ਛੇਦਤ੍ਥਂ, ਅਭਿਮੁਖਕਰਣਤ੍ਥਞ੍ਚ ਸਦ੍ਦਂ ਕਤ੍ਵਾ. ਵਿਨਿਚ੍ਛਿਨਿਤੁਂ ਅਨਨੁਚ੍ਛਵਿਕੋਤਿ ‘‘ਅਸੁਦ੍ਧੋ’’ਤਿ ਸਞ੍ਞਾਯ ਚੋਦਕਪਕ੍ਖੇ ਪਵਿਟ੍ਠਤ੍ਤਾ ਅਨੁਵਿਜ੍ਜਕਭਾਵਤੋ ਬਹਿਭੂਤਤ੍ਤਾ ਅਨੁਵਿਜ੍ਜਿਤੁਂ ਅਸਕ੍ਕੁਣੇਯ੍ਯਤਂ ਸਨ੍ਧਾਯ ਵੁਤ੍ਤਂ. ਸਨ੍ਦੇਹੇ ਏਵ ਹਿ ਸਤਿ ਅਨੁਵਿਜ੍ਜਿਤੁਂ ਸਕ੍ਕਾ, ਅਸੁਦ੍ਧਦਿਟ੍ਠਿਯਾ ਪਨ ਸਤਿ ਚੁਦਿਤਕੇਨ ਵੁਤ੍ਤਂ ਸਬ੍ਬਂ ਅਸਚ੍ਚਤੋਪਿ ਪਟਿਭਾਤਿ, ਕਥਂ ਤਤ੍ਥ ਅਨੁਵਿਜ੍ਜਨਾ ਸਿਯਾਤਿ.

‘‘ਤਥਾ ਨਾਸਿਤਕੋਵ ਭਵਿਸ੍ਸਤੀ’’ਤਿ ਇਮਿਨਾ ਵਿਨਿਚ੍ਛਯਂ ਅਦਤ੍ਵਾ ਸਙ੍ਘਤੋ ਵਿਯੋਜਨਂ ਨਾਮ ਲਿਙ੍ਗਨਾਸਨਾ ਵਿਯ ਅਯਮ੍ਪਿ ਏਕੋ ਨਾਸਨਪ੍ਪਕਾਰੋਤਿ ਦਸ੍ਸੇਤਿ. ਵਿਰਦ੍ਧਂ ਹੋਤੀਤਿ ਸਞ੍ਚਿਚ੍ਚ ਆਪਤ੍ਤਿਂ ਸਹਸਾ ਆਪਨ੍ਨੋ ਹੋਤਿ. ‘‘ਆਦਿਤੋ ਪਟ੍ਠਾਯ ਅਲਜ੍ਜੀ ਨਾਮ ਨਤ੍ਥੀ’’ਤਿ ਇਦਂ ‘‘ਪਕ੍ਖਾਨੁਰਕ੍ਖਣਤ੍ਥਾਯ ਪਟਿਞ੍ਞਂ ਨ ਦੇਤੀ’’ਤਿ ਇਮਸ੍ਸ ਅਲਜ੍ਜਿਲਕ੍ਖਣਸਮ੍ਭਵਸ੍ਸ ਕਾਰਣਵਚਨਂ. ਪਟਿਚ੍ਛਾਦਿਤਕਾਲਤੋ ਪਟ੍ਠਾਯ ਅਲਜ੍ਜੀ ਨਾਮ ਏਵ, ਪੁਰਿਮੋ ਲਜ੍ਜਿਭਾਵੋ ਨ ਰਕ੍ਖਤੀਤਿ ਅਤ੍ਥੋ. ਪਟਿਞ੍ਞਂ ਨ ਦੇਤੀਤਿ ਸਚੇ ਮਯਾ ਕਤਦੋਸਂ ਵਕ੍ਖਾਮਿ, ਮਯ੍ਹਂ ਅਨੁਵਤ੍ਤਕਾ ਭਿਜ੍ਜਿਸ੍ਸਨ੍ਤੀਤਿ ਪਟਿਞ੍ਞਂ ਨ ਦੇਤਿ. ਠਾਨੇ ਨ ਤਿਟ੍ਠਤੀਤਿ ਲਜ੍ਜਿਟ੍ਠਾਨੇ ਨ ਤਿਟ੍ਠਤਿ, ਕਾਯਵਾਚਾਸੁ ਵੀਤਿਕ੍ਕਮੋ ਹੋਤਿ ਏਵਾਤਿ ਅਧਿਪ੍ਪਾਯੋ. ਤੇਨਾਹ ‘‘ਵਿਨਿਚ੍ਛਯੋ ਨ ਦਾਤਬ੍ਬੋ’’ਤਿ, ਪੁਬ੍ਬੇ ਪਕ੍ਖਿਕਾਨਂ ਪਟਿਞ੍ਞਾਯ ਵੂਪਸਮਿਤਸ੍ਸਾਪਿ ਅਧਿਕਰਣਸ੍ਸ ਦੁਵੂਪਸਨ੍ਤਤਾਯ ਅਯਮ੍ਪਿ ਤਥਾ ਨਾਸਿਤਕੋਵ ਭਵਿਸ੍ਸਤੀਤਿ ਅਧਿਪ੍ਪਾਯੋ.

ਚੁਦਿਤਕਚੋਦਕੇਸੁ ਪਟਿਪਤ੍ਤਿਂ ਞਤ੍ਵਾਤਿ ‘‘ਤੁਮ੍ਹੇ ਅਮ੍ਹਾਕਂ ਵਿਨਿਚ੍ਛਯੇਨ ਤੁਟ੍ਠਾ ਭਵਿਸ੍ਸਥਾ’’ਤਿਆਦਿਨਾ ਵੁਤ੍ਤਂ ਚੁਦਿਤਕਚੋਦਕੇਸੁ ਅਨੁਵਿਜ੍ਜਕੇਨ ਪਟਿਪਜ੍ਜਿਤਬ੍ਬਕਮ੍ਮਂ ਞਤ੍ਵਾ. ਵਿਨਿਚ੍ਛਯੋ ਮਜ੍ਝੇਤਿ ਆਪਤ੍ਤੀਤਿ ਵਾ ਅਨਾਪਤ੍ਤੀਤਿ ਵਾ ਵਿਨਿਚ੍ਛਯਪਰਿਯੋਸਾਨਅਨੁਵਿਜ੍ਜਨਾਨਂ ਮਜ੍ਝਂ ਨਾਮਾਤਿ ਅਤ੍ਥੋ.

ਅਮੂਲਕਮ੍ਪਿ ਸਮੂਲਕਂ ਕਤ੍ਵਾ ਵਦਨ੍ਤੀਤਿ ਆਹ ‘‘ਦ੍ਵੇ ਮੂਲਾਨੀ’’ਤਿ. ਕਾਲੇਨ ਵਕ੍ਖਾਮੀਤਿਆਦੀਸੁ ਓਕਾਸਂ ਕਾਰਾਪੇਤ੍ਵਾ ਵਦਨ੍ਤੋ ਕਾਲੇਨ ਵਦਤਿ ਨਾਮ. ਸਲਾਕਗ੍ਗਯਾਗੁਅਗ੍ਗਭਿਕ੍ਖਾਚਾਰਟ੍ਠਾਨਾਦੀਸੁ ਚੋਦੇਨ੍ਤੋ ਅਕਾਲੇਨ ਵਦਤਿ ਨਾਮ. ਦੋਸਤੋ ਵੁਟ੍ਠਾਪੇਤੁਕਾਮਤਾਯ ਵਦਨ੍ਤੋ ਅਤ੍ਥਸਂਹਿਤੇਨ ਵਦਤਿ ਨਾਮ. ਦੋਸਨ੍ਤਰੋਤਿ ਦੋਸਚਿਤ੍ਤੋ. ਪਨ੍ਨਰਸਸੁ ਧਮ੍ਮੇਸੂਤਿ ‘‘ਪਰਿਸੁਦ੍ਧਕਾਯਸਮਆਚਾਰਤਾ, ਤਥਾ ਵਚੀਸਮਾਚਾਰਤਾ, ਸਬ੍ਰਹ੍ਮਚਾਰੀਸੁ ਮੇਤ੍ਤਚਿਤ੍ਤਤਾ, ਬਹੁਸ੍ਸੁਤਤਾ, ਉਭਿਨ੍ਨਂ ਪਾਤਿਮੋਕ੍ਖਾਨਂ ਸ੍ਵਾਗਤਾਦਿਤਾ, ਕਾਲੇਨ ਵਕ੍ਖਾਮੀ’’ਤਿਆਦਿਨਾ (ਪਰਿ. ੩੬੨) ਵੁਤ੍ਤਪਞ੍ਚਧਮ੍ਮਾ ਚ ਕਾਰੁਞ੍ਞਤਾ, ਹਿਤੇਸਿਤਾ, ਅਨੁਕਮ੍ਪਤਾ, ਆਪਤ੍ਤਿਵੁਟ੍ਠਾਨਤਾ, ਵਿਨਯਪੁਰੇਕ੍ਖਾਰਤਾਤਿ (ਚੂਲ਼ਵ. ੪੦੧) ਇਮੇਸੁ ਪਨ੍ਨਰਸਸੁ. ਤਤ੍ਥ ‘‘ਕਾਰੁਞ੍ਞਤਾ’’ਤਿ ਇਮਿਨਾ ਕਰੁਣਾ ਦਸ੍ਸਿਤਾ. ਹਿਤੇਸਿਤਾਤਿ ਹਿਤਗਵੇਸਨਤਾ. ਅਨੁਕਮ੍ਪਤਾਤਿ ਤੇਨ ਹਿਤੇਨ ਸਂਯੋਜਨਤਾ, ਇਮੇਹਿ ਦ੍ਵੀਹਿਪਿ ਮੇਤ੍ਤਾ ਦਸ੍ਸਿਤਾ. ਆਪਤ੍ਤਿਵੁਟ੍ਠਾਨਤਾਤਿ ਸੁਦ੍ਧਨ੍ਤੇ ਪਤਿਟ੍ਠਾਪਨਤਾ. ਵਤ੍ਥੁਂ ਚੋਦੇਤ੍ਵਾ ਸਾਰੇਤ੍ਵਾ ਪਟਿਞ੍ਞਂ ਆਰੋਪੇਤ੍ਵਾ ਯਥਾਪਟਿਞ੍ਞਾਯ ਕਮ੍ਮਕਰਣਂ ਵਿਨਯਪੁਰੇਕ੍ਖਾਰਤਾ ਨਾਮ.

ਅਧਿਕਰਣਟ੍ਠੇਨਾਤਿ ਅਧਿਕਾਤਬ੍ਬਟ੍ਠੇਨ, ਸਮਥੇਹਿ ਵੂਪਸਮੇਤਬ੍ਬਟ੍ਠੇਨਾਤਿ ਅਤ੍ਥੋ. ਤਂ ਨਾਨਤ੍ਤਂ ਦਸ੍ਸੇਤੁਨ੍ਤਿ ਇਧ ਅਨਧਿਪ੍ਪੇਤਮ੍ਪਿ ਅਤ੍ਥੁਦ੍ਧਾਰਵਸੇਨ ਤਂ ਨਾਨਤ੍ਤਂ ਦਸ੍ਸੇਤੁਨ੍ਤਿ ਅਧਿਪ੍ਪਾਯੋ. ਤੇਨੇਵ ਵਕ੍ਖਤਿ ‘‘ਸੇਸਾਨਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਾਨੀ’’ਤਿ (ਪਾਰਾ. ਅਟ੍ਠ. ੨.੩੮੫-੩੮੬). ਯਂ ਅਧਿਕਿਚ੍ਚਾਤਿਆਦਿਨਾ ਅਧਿਕਰਣਸਦ੍ਦਸ੍ਸ ਕਮ੍ਮਸਾਧਨਤਾ ਵੁਤ੍ਤਾ.