੧. ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ

੨੩੪. ਤੇਰਸਕਸ੍ਸਾਤਿ ਤੇਰਸ ਸਿਕ੍ਖਾਪਦਾਨਿ ਪਰਿਮਾਣਾਨਿ ਅਸ੍ਸਾਤਿ ਤੇਰਸਕੋ, ਕਣ੍ਡੋ, ਤਸ੍ਸ. ਸਮਥੇ ਵਿਪਸ੍ਸਨਾਯ ਵਾ ਅਭਿਰਤਿਰਹਿਤੋ ਇਧ ਅਨਭਿਰਤੋ, ਨ ਪਬ੍ਬਜ੍ਜਾਯਾਤਿ ਆਹ ‘‘ਵਿਕ੍ਖਿਤ੍ਤਚਿਤ੍ਤੋ’’ਤਿ. ਵਿਕ੍ਖਿਤ੍ਤਤਾਯ ਕਾਰਣਮਾਹ ਕਾਮਰਾਗਾਇਚ੍ਚਾਦਿ.

੨੩੫. ਅਬ੍ਬੋਹਾਰਿਕਾਤਿ ਸੀਲਵਿਪਤ੍ਤਿਵੋਹਾਰਂ ਨਾਰਹਤੀਤਿ ਕਤ੍ਵਾ ਵੁਤ੍ਤਂ. ਅਕੁਸਲਭਾਵੇ ਪਨਸ੍ਸਾ ਅਬ੍ਬੋਹਾਰਤਾ ਨਤ੍ਥਿ.

੨੩੬-੭. ਚੇਤਨਾ-ਸਦ੍ਦਤੋ ਵਿਸੁਂ ਸਂ-ਸਦ੍ਦਸ੍ਸ ਅਤ੍ਥਾਭਾਵਂ ਇਕ-ਪਚ੍ਚਯਸ੍ਸ ਚ ਅਤ੍ਥਵਨ੍ਤਤਂ ਦਸ੍ਸੇਤੁਂ ਸਞ੍ਚੇਤਨਾ ਵਾਤਿਆਦਿ ਦੁਤਿਯਵਿਕਪ੍ਪੋ ਵੁਤ੍ਤੋ. ਸਿਖਾਪ੍ਪਤ੍ਤੋ ਅਤ੍ਥੋਤਿ ਅਧਿਪ੍ਪੇਤਤ੍ਥਂ ਸਨ੍ਧਾਯ ਵੁਤ੍ਤਂ. ਆਸਯਭੇਦਤੋਤਿ ਪਿਤ੍ਤਸੇਮ੍ਹਪੁਬ੍ਬਲੋਹਿਤਾਨਂ ਚਤੁਨ੍ਨਂ ਆਸਯਾਨਂ ਭੇਦੇਨ. ਧਾਤੁਨਾਨਤ੍ਤਤੋਤਿ ਰਸਰੁਹਿਰਾਦੀਨਂ ਸਤ੍ਤਨ੍ਨਂ, ਪਥਵਾਦੀਨਂ ਵਾ ਚਤੁਨ੍ਨਂ ਧਾਤੂਨਂ ਨਾਨਤ੍ਤੇਨ. ਵਤ੍ਥਿਸੀਸਨ੍ਤਿ ਮੁਤ੍ਤਵਤ੍ਥਿਤੋ ਮਤ੍ਥਕਪਸ੍ਸਂ. ਹਤ੍ਥਿਮਦਚਲਨਂ ਨਾਮਞ੍ਚ ਸਮ੍ਭਵੋਤਿ ਆਹ ‘‘ਸਮ੍ਭਵੋ ਨਿਕ੍ਖਮਤੀ’’ਤਿ. ਸਮ੍ਭਵਵੇਗਨ੍ਤਿ ਸਮ੍ਭਵਸ੍ਸ ਠਾਨਤੋ ਚਵਿਤ੍ਵਾ ਦਕਸੋਤਾਭਿਮੁਖਂ ਓਤਰਣੇਨ ਸਞ੍ਜਾਤਸਰੀਰਕ੍ਖੋਭਵੇਗਂ. ਬਾਹੁਸੀਸਨ੍ਤਿ ਖਨ੍ਧਪ੍ਪਦੇਸਂ. ਦਸ੍ਸੇਸੀਤਿ ਏਤ੍ਥ ਇਤਿ-ਸਦ੍ਦੋ ਹੇਤੁਤ੍ਥੋ, ਤੇਨ ਯਸ੍ਮਾ ਕਣ੍ਣਚੂਲ਼ਿਕਾਹਿ ਸਮ੍ਭਵੋ ਨਿਕ੍ਖਮਤਿ…ਪੇ… ਸਮ੍ਭਵਞ੍ਚ ਦਸ੍ਸੇਸਿ, ਤਸ੍ਮਾ ਤਤਿਯਸ੍ਸ ਭਾਸਿਤਂ ਸੁਭਾਸਿਤਨ੍ਤਿ ਏਵਂ ਯੋਜਨਾ ਵੇਦਿਤਬ੍ਬਾ. ਦਕਸੋਤਨ੍ਤਿ ਮੁਤ੍ਤਸ੍ਸ ਵਤ੍ਥਿਤੋ ਨਿਕ੍ਖਮਨਮਗ੍ਗਂ, ਅਙ੍ਗਜਾਤਪ੍ਪਦੇਸਨ੍ਤਿ ਵੁਤ੍ਤਂ ਹੋਤਿ. ਸੁਕ੍ਕਞ੍ਚ ਨਾਮੇਤਂ ਰਸਰੁਹਿਰਾਦਿਸਤ੍ਤਦੇਹਧਾਤੂਸੁ ਮਜ੍ਝਿਮਧਾਤੁਚਤੁਜਂ ਅਟ੍ਠਿਮਿਞ੍ਜਾਦਿ ਵਿਯ ਪਥਵੀਧਾਤੁਸਙ੍ਗਹਿਤਂ ਆਹਾਰੂਪਜੀਵੀਨਂ ਸਕਲਕਾਯਗਤਂ ਅਤਿਦਹਰਦਾਰਕਾਨਮ੍ਪਿ ਅਤ੍ਥੇਵ, ਤਂ ਪਨ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਤੋ ਪਟ੍ਠਾਯ ਸਤ੍ਤਾਨਂ ਸਮੁਪ੍ਪਜ੍ਜਨਕਕਾਮਰਾਗੇਹੇਵ ਠਾਨਤੋ ਚਲਤਿ, ਚਲਿਤਞ੍ਚ ਆਪੋਧਾਤੁਭਾਵੇਨ ਚਿਤ੍ਤਜਮੇਵ ਹੁਤ੍ਵਾ ਦਕਸੋਤਂ ਓਤਰਤਿ, ਦਕਸੋਤਤੋ ਪਨ ਪਟ੍ਠਾਯ ਚਿਤ੍ਤਪਚ੍ਚਯਉਤੁਜਂ ਹੋਤਿ ਮਤ੍ਥਲੁਙ੍ਗਤੋ ਚਲਿਤਸਿਙ੍ਘਾਣਿਕਾ ਵਿਯ. ਯੇਸਂ ਪਨ ਸਮੁਚ੍ਛੇਦਨਵਿਕ੍ਖਮ੍ਭਨਾਦੀਹਿ ਰਾਗਪਰਿਯੁਟ੍ਠਾਨਂ ਨਤ੍ਥਿ, ਤੇਸਂ ਸੁਕ੍ਕਵਿਸ੍ਸਟ੍ਠਿ ਨ ਸਿਯਾ. ਇਤਿ ਯਥਾਠਾਨਤੋ ਸੁਕ੍ਕਸ੍ਸ ਵਿਸ੍ਸਟ੍ਠਿਯੇਵ ਰਾਗਚਿਤ੍ਤਸਮੁਟ੍ਠਾਨਾ, ਨ ਪਕਤਿਰੂਪਂ, ਤੇਨੇਵ ਕਥਾਵਤ੍ਥੁਅਟ੍ਠਕਥਾਯਂ (ਕਥਾ. ਅਟ੍ਠ. ੩੦੭) ‘‘ਸੁਕ੍ਕਵਿਸ੍ਸਟ੍ਠਿ ਨਾਮ ਰਾਗਸਮੁਟ੍ਠਾਨਾ ਹੋਤੀ’’ਤਿ ਸੁਕ੍ਕਸ੍ਸ ਵਿਸ੍ਸਟ੍ਠਿ ਏਵ ਰਾਗਸਮੁਟ੍ਠਾਨਾ ਵੁਤ੍ਤਾ, ਨ ਪਕਤਿਰੂਪਂ. ਛਨ੍ਨਂ ਪਨ ਕਾਮਾਵਚਰਦੇਵਾਨਂ ਵਿਜ੍ਜਮਾਨਾਪਿ ਸੁਕ੍ਕਧਾਤੁ ਦ੍ਵਯਂਦ੍ਵਯਸਮਾਪਤ੍ਤਿਵਸੇਨ ਪਰਿਯੁਟ੍ਠਿਤਰਾਗੇਨਾਪਿ ਠਾਨਤੋ ਨ ਗਲ਼ਤਿ, ਯਥਾਠਾਨੇ ਏਵ ਠਤ੍ਵਾ ਕਿਞ੍ਚਿ ਵਿਕਾਰਂ ਆਪਜ੍ਜਮਾਨਾ ਤਙ੍ਖਣਿਕਪਰਿਲ਼ਾਹਵੂਪਸਮਾਵਹਾ ਮੇਥੁਨਕਿਚ੍ਚਨਿਟ੍ਠਾਪਿਤਾ ਹੋਤੀਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਕਾਯਸਮ੍ਫਸ੍ਸਸੁਖਮੇਵ ਤੇਸਂ ਕਾਮਕਿਚ੍ਚ’’ਨ੍ਤਿ ਵਦਨ੍ਤਿ. ਖੀਣਾਸਵਾਨਂ ਪਨ ਅਨਾਗਾਮੀਨਞ੍ਚ ਸਬ੍ਬਸੋ ਕਾਮਰਾਗਾਭਾਵੇਨ ਸੁਕ੍ਕਧਾਤੁਵਿਕਾਰਮ੍ਪਿ ਨਾਪਜ੍ਜਤੀਤਿ ਵੇਦਿਤਬ੍ਬਂ. ਰੂਪੀਬ੍ਰਹ੍ਮਾਨਂ ਪਨ ਵਿਕ੍ਖਮ੍ਭਿਤਕਾਮਰਾਗੇਨ ਜਨਿਤਤ੍ਤਾ ਅਨਾਹਾਰੂਪਜੀਵਿਤਤ੍ਤਾ ਚ ਸਬ੍ਬਥਾ ਸੁਕ੍ਕਧਾਤੁਪਿ ਨਤ੍ਥੇਵ. ਤਥੇਵਾਤਿ ਮੋਚਨਸ੍ਸਾਦੇਨ ਨਿਮਿਤ੍ਤੇ ਉਪਕ੍ਕਮਤੋਤਿਆਦਿਂ ਅਤਿਦਿਸਤਿ. ‘‘ਵਿਸ੍ਸਟ੍ਠੀਤਿ ਠਾਨਾਚਾਵਨਾ ਵੁਚ੍ਚਤੀ’’ਤਿ ਪਦਭਾਜਨੇ (ਪਾਰਾ. ੨੩੭) ਵੁਤ੍ਤਤ੍ਤਾ ‘‘ਦਕਸੋਤਂ ਓਤਿਣ੍ਣਮਤ੍ਤੇ’’ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ਦਕਸੋਤੋਰੋਹਣਞ੍ਚੇਤ੍ਥਾਤਿਆਦਿ. ਏਤ੍ਥਾਤਿ ਤੀਸੁਪਿ ਵਾਦੇਸੁ. ਅਧਿਵਾਸੇਤ੍ਵਾਤਿ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਪੁਨ ਵਿਪ੍ਪਟਿਸਾਰੇ ਉਪ੍ਪਨ੍ਨੇ ਮੋਚਨਸ੍ਸਾਦਂ ਵਿਨੋਦੇਤ੍ਵਾ. ਅਨ੍ਤਰਾ ਨਿਵਾਰੇਤੁਨ੍ਤਿ ਅਤ੍ਤਨੋ ਨਿਮਿਤ੍ਤੇ ਕਤੂਪਕ੍ਕਮੇਨ ਠਾਨਾ ਚੁਤਂ ਦਕਸੋਤਂ ਓਤਰਿਤੁਂ ਅਦਤ੍ਵਾ ਅਨ੍ਤਰਾ ਨਿਵਾਰੇਤੁਂ. ਮੋਚਨਸ੍ਸਾਦੇਨ ਹਤ੍ਥਪਰਿਕਮ੍ਮਾਦਿਂ ਕਰੋਨ੍ਤਸ੍ਸ ਮੁਤ੍ਤੇਪਿ ਦੁਕ੍ਕਟਮੇਵ, ਨਿਮਿਤ੍ਤੇ ਉਪਕ੍ਕਮਾਭਾਵਤੋ ਪਨ ਸਙ੍ਘਾਦਿਸੇਸੋ ਨ ਹੋਤੀਤਿ ਆਹ ‘‘ਹਤ੍ਥ…ਪੇ… ਅਨਾਪਤ੍ਤੀ’’ਤਿ. ਦਕਸੋਤੋਰੋਹਣਞ੍ਚੇਤ੍ਥਾਤਿਆਦਿਨਾ ਵੁਤ੍ਤਵਿਨਿਚ੍ਛਯਂ ਸਨ੍ਧਾਯ ‘‘ਅਯਂ ਸਬ੍ਬਾਚਰਿਯਸਾਧਾਰਣਵਿਨਿਚ੍ਛਯੋ’’ਤਿ ਵੁਤ੍ਤਂ.

ਖੋਭਕਰਣਪਚ੍ਚਯੋ ਨਾਮ ਵਿਸਭਾਗਭੇਸਜ੍ਜਸੇਨਾਸਨਾਹਾਰਾਦਿਪਚ੍ਚਯੋ. ਨਾਨਾਵਿਧਂ ਸੁਪਿਨਨ੍ਤਿ ਖੁਭਿਤਵਾਤਾਦਿਧਾਤੂਨਂ ਅਨੁਗੁਣਂ. ਅਨੁਭੂਤਪੁਬ੍ਬਨ੍ਤਿ ਪੁਬ੍ਬੇ ਭੂਤਪੁਬ੍ਬਂ ਮਨਸਾ ਪਰਿਕਪ੍ਪਿਤਪੁਬ੍ਬਞ੍ਚ. ਸਗ੍ਗਨਰਕਦੇਸਨ੍ਤਰਾਦੀਨਮ੍ਪਿ ਹਿ ਸਙ੍ਗਹੇਤ੍ਵਾ ਵੁਤ੍ਤਂ. ਅਤ੍ਥਕਾਮਤਾਯ ਵਾ ਅਨਤ੍ਥਕਾਮਤਾਯ ਵਾਤਿ ਇਦਂ ਦੇਵਤਾਨਂ ਹਿਤਾਹਿਤਾਧਿਪ੍ਪਾਯਤਂ ਦਸ੍ਸੇਤੁਂ ਵੁਤ੍ਤਂ. ਅਤ੍ਥਾਯ ਵਾ ਅਨਤ੍ਥਾਯ ਵਾਤਿ ਸਭਾਵਤੋ ਭਵਿਤਬ੍ਬਂ ਹਿਤਾਹਿਤਂ ਸਨ੍ਧਾਯ ਵੁਤ੍ਤਂ. ਨਨੁ ਦੇਵਤਾਹਿ ਉਪਸਂਹਰਿਯਮਾਨਾਨਿ ਆਰਮ੍ਮਣਾਨਿ ਪਰਮਤ੍ਥਤੋ ਨਤ੍ਥਿ, ਕਥਂ ਤਾਨਿ ਪੁਰਿਸੋ ਪਸ੍ਸਤਿ, ਦੇਵਤਾ ਵਾ ਤਾਨਿ ਅਵਿਜ੍ਜਮਾਨਾਨਿ ਉਪਸਂਹਰਨ੍ਤੀਤਿ ਚੋਦਨਂ ਮਨਸਿ ਕਤ੍ਵਾ ਆਹ ਸੋ ਤਾਸਨ੍ਤਿਆਦਿ. ਤੇਨ ‘‘ਏਵਮੇਸੋ ਪਰਿਕਪ੍ਪਤੂ’’ਤਿ ਦੇਵਤਾਹਿ ਚਿਨ੍ਤਿਤਮਤ੍ਤੇਨ ਸੁਪਨ੍ਤਸ੍ਸ ਚਿਤ੍ਤਂ ਭਵਙ੍ਗਸਨ੍ਤਤਿਤੋ ਨਿਪਤਿਤ੍ਵਾ ਦੇਵਤਾਹਿ ਚਿਨ੍ਤਿਤਨਿਯਾਮੇਨੇਵ ਪਰਿਕਪ੍ਪਮਾਨਂ ਪਵਤ੍ਤਤਿ, ਏਵਂ ਤੇਨ ਪਰਿਕਪ੍ਪਮਾਨਾਨਿ ਆਰਮ੍ਮਣਾਨਿ ਦੇਵਤਾਹਿ ਉਪਸਂਹਟਾਨਿ ਨਾਮ ਹੋਨ੍ਤਿ, ਤਾਨਿ ਚ ਸੋ ਦੇਵਤਾਨੁਭਾਵੇਨ ਪਸ੍ਸਤਿ ਨਾਮਾਤਿ ਦਸ੍ਸੇਤਿ. ਬੋਧਿਸਤ੍ਤਮਾਤਾ ਵਿਯ ਪੁਤ੍ਤਪਟਿਲਾਭਨਿਮਿਤ੍ਤਨ੍ਤਿਆਦੀਸੁ ਬੋਧਿਸਤ੍ਤਸ੍ਸ ਗਬ੍ਭੋਕ੍ਕਨ੍ਤਿਦਿਵਸੇ ਮਹਾਮਾਯਾਦੇਵਿਯਾ ਅਤ੍ਤਨੋ ਦਕ੍ਖਿਣਪਸ੍ਸੇਨ ਏਕਸ੍ਸ ਸੇਤਵਰਵਾਰਣਸ੍ਸ ਅਨ੍ਤੋਕੁਚ੍ਛਿਪਵਿਟ੍ਠਭਾਵਦਸ੍ਸਨਂ ਪੁਤ੍ਤਪਟਿਲਾਭਨਿਮਿਤ੍ਤਂ ਸੁਪਿਨਂ ਨਾਮ. ਅਮ੍ਹਾਕਂ ਪਨ ਬੋਧਿਸਤ੍ਤਸ੍ਸ ‘‘ਸ੍ਵੇ ਬੁਦ੍ਧੋ ਭਵਿਸ੍ਸਤੀ’’ਤਿ ਚਾਤੁਦ੍ਦਸਿਯਂ ਪਕ੍ਖਸ੍ਸ ਰਤ੍ਤਿਵਿਭਾਯਨਕਾਲੇ ਹਿਮਵਨ੍ਤਂ ਬਿਬ੍ਬੋਹਨਂ ਕਤ੍ਵਾ ਪੁਰਤ੍ਥਿਮਪਚ੍ਛਿਮਸਮੁਦ੍ਦੇਸੁ ਵਾਮਦਕ੍ਖਿਣਹਤ੍ਥੇ ਦਕ੍ਖਿਣਸਮੁਦ੍ਦੇ ਪਾਦੇ ਚ ਓਦਹਿਤ੍ਵਾ ਮਹਾਪਥਵਿਯਾ ਸਯਨਂ ਏਕੋ, ਦਬ੍ਬਤਿਣਸਙ੍ਖਾਤਾਯ ਤਿਰਿਯਾ ਨਾਮ ਤਿਣਜਾਤਿਯਾ ਨਙ੍ਗਲਮਤ੍ਤਰਤ੍ਤਦਣ੍ਡਾਯ ਨਾਭਿਤੋ ਉਗ੍ਗਤਾਯ ਖਣੇਨ ਅਨੇਕਯੋਜਨਸਹਸ੍ਸਂ ਨਭਂ ਆਹਚ੍ਚ ਠਾਨਂ ਏਕੋ, ਸੇਤਾਨਂ ਕਣ੍ਹਸੀਸਾਨਂ ਕਿਮੀਨਂ ਪਾਦੇਹਿ ਉਸ੍ਸਕ੍ਕਿਤ੍ਵਾ ਯਾਵ ਜਾਣੁਮਣ੍ਡਲਂ ਆਹਚ੍ਚ ਠਾਨਂ ਏਕੋ, ਨਾਨਾਵਣ੍ਣਾਨਂ ਚਤੁਨ੍ਨਂ ਸਕੁਣਾਨਂ ਚਤੂਹਿ ਦਿਸਾਹਿ ਆਗਨ੍ਤ੍ਵਾ ਪਾਦਮੂਲੇ ਸੇਤਵਣ੍ਣਤਾਪਜ੍ਜਨਂ ਏਕੋ, ਬੋਧਿਸਤ੍ਤਸ੍ਸ ਮਹਤੋ ਮੀਲ਼੍ਹਪਬ੍ਬਤਸ੍ਸ ਉਪਰਿ ਅਲਿਮ੍ਪਮਾਨਸ੍ਸ ਚਙ੍ਕਮਨਂ ਏਕੋਤਿ ਇਮੇ ਪਞ੍ਚ ਮਹਾਸੁਪਿਨਾ ਨਾਮ, ਇਮੇ ਚ ਯਥਾਕ੍ਕਮਂ ਸਮ੍ਬੋਧਿਯਾ, ਦੇਵਮਨੁਸ੍ਸੇਸੁ ਅਰਿਯਮਗ੍ਗਪ੍ਪਕਾਸਨਸ੍ਸ, ਗਿਹੀਨਞ੍ਚ ਸਰਣੂਪਗਮਨਸ੍ਸ, ਖਤ੍ਤਿਯਾਦਿਚਤੁਵਣ੍ਣਾਨਂ ਪਬ੍ਬਜਿਤ੍ਵਾ ਅਰਹਤ੍ਤਪਟਿਲਾਭਸ੍ਸ, ਚਤੁਨ੍ਨਂ ਪਚ੍ਚਯਾਨਂ ਲਾਭੇ ਅਲਿਤ੍ਤਭਾਵਸ੍ਸ ਚ ਪੁਬ੍ਬਨਿਮਿਤ੍ਤਾਨੀਤਿ ਵੇਦਿਤਬ੍ਬਂ. ਸੋਲ਼ਸ ਸੁਪਿਨਾ ਪਾਕਟਾ ਏਵ. ਏਕਨ੍ਤਸਚ੍ਚਮੇਵਾਤਿ ਫਲਨਿਯਮੁਪ੍ਪਤ੍ਤਿਤੋ ਵੁਤ੍ਤਂ. ਦਸ੍ਸਨਂ ਪਨ ਸਬ੍ਬਤ੍ਥ ਵਿਪਲ੍ਲਤ੍ਥਮੇਵ. ਧਾਤੁਕ੍ਖੋਭਾਦੀਸੁ ਚਤੂਸੁ ਮੂਲਕਾਰਣੇਸੁ ਦ੍ਵੀਹਿ ਤੀਹਿਪਿ ਕਾਰਣੇਹਿ ਕਦਾਚਿ ਸੁਪਿਨਂ ਪਸ੍ਸਨ੍ਤੀਤਿ ਆਹ ‘‘ਸਂਸਗ੍ਗਭੇਦਤੋ’’ਤਿ. ਸੁਪਿਨਭੇਦੋਤਿ ਸਚ੍ਚਾਸਚ੍ਚਤ੍ਥਤਾਭੇਦੋ.

ਰੂਪਨਿਮਿਤ੍ਤਾਦਿਆਰਮ੍ਮਣਨ੍ਤਿ ਏਤ੍ਥ ਕਮ੍ਮਨਿਮਿਤ੍ਤਗਤਿਨਿਮਿਤ੍ਤਤੋ ਅਞ੍ਞਰੂਪਮੇਵ ਵਿਞ੍ਞਾਣਸ੍ਸ ਨਿਮਿਤ੍ਤਨ੍ਤਿ ਰੂਪਨਿਮਿਤ੍ਤਂ, ਤਂ ਆਦਿ ਯੇਸਂ ਸਤ੍ਤਨਿਮਿਤ੍ਤਾਦੀਨਂ ਤਾਨਿ ਰੂਪਨਿਮਿਤ੍ਤਾਦੀਨਿ ਆਰਮ੍ਮਣਾਨਿ ਯਸ੍ਸ ਭਵਙ੍ਗਚਿਤ੍ਤਸ੍ਸ ਤਂ ਰੂਪਨਿਮਿਤ੍ਤਾਦਿਆਰਮ੍ਮਣਂ. ਈਦਿਸਾਨੀਤਿ ਰੂਪਨਿਮਿਤ੍ਤਾਦਿਆਰਮ੍ਮਣਾਨਿ ਰਾਗਾਦਿਸਮ੍ਪਯੁਤ੍ਤਾਨਿ ਚ. ਸਬ੍ਬੋਹਾਰਿਕਚਿਤ੍ਤੇਨਾਤਿ ਪਟਿਬੁਦ੍ਧਸ੍ਸ ਪਕਤਿਵੀਥਿਚਿਤ੍ਤੇਨ. ਕੋ ਨਾਮ ਪਸ੍ਸਤੀਤਿ ਸੁਤ੍ਤਪਟਿਬੁਦ੍ਧਭਾਵਵਿਯੁਤ੍ਤਾਯ ਚਿਤ੍ਤਪ੍ਪਵਤ੍ਤਿਯਾ ਅਭਾਵਤੋ ਸੁਪਿਨਂ ਪਸ੍ਸਨ੍ਤੋ ਨਾਮ ਨ ਸਿਯਾਤਿ ਅਧਿਪ੍ਪਾਯੋ, ਤੇਨਾਹ ‘‘ਸੁਪਿਨਸ੍ਸ ਅਭਾਵੋਵ ਆਪਜ੍ਜਤੀ’’ਤਿ. ਕਪਿਮਿਦ੍ਧਪਰੇਤੋਤਿ ਇਮਿਨਾ ਨਿਦ੍ਦਾਵਸੇਨ ਪਵਤ੍ਤਮਾਨਭਵਙ੍ਗਸਨ੍ਤਤਿਬ੍ਯਵਹਿਤਾਯ ਕੁਸਲਾਕੁਸਲਾਯ ਮਨੋਦ੍ਵਾਰਵੀਥਿਯਾ ਚ ਪਸ੍ਸਤੀਤਿ ਦਸ੍ਸੇਤਿ, ਤੇਨਾਹ ਯਾ ਨਿਦ੍ਦਾਤਿਆਦਿ. ਦ੍ਵੀਹਿ ਅਨ੍ਤੇਹਿ ਮੁਤ੍ਤੋਤਿ ਕੁਸਲਾਕੁਸਲਸਙ੍ਖਾਤੇਹਿ ਦ੍ਵੀਹਿ ਅਨ੍ਤੇਹਿ ਮੁਤ੍ਤੋ. ਆਵਜ੍ਜਨਤਦਾਰਮ੍ਮਣਕ੍ਖਣੇਤਿ ਸੁਪਿਨੇ ਪਞ੍ਚਦ੍ਵਾਰਵੀਥਿਯਾ ਅਭਾਵਤੋ ਮਨੋਦ੍ਵਾਰੇ ਉਪ੍ਪਜ੍ਜਨਾਰਹਂ ਗਹੇਤ੍ਵਾ ਵੁਤ੍ਤਂ.

ਏਤ੍ਥ ਚ ਸੁਪਿਨਨ੍ਤੇਪਿ ਤਦਾਰਮ੍ਮਣਵਚਨਤੋ ਅਨੁਭੂਤੇਸੁ ਸੁਤਪੁਬ੍ਬੇਸੁ ਵਾ ਰੂਪਾਦੀਸੁ ਪੁਰਾਪਤ੍ਤਿਭਾਵੇਨ ਪਰਿਕਪ੍ਪੇਤ੍ਵਾ ਵਿਪਲ੍ਲਾਸਤੋ ਪਵਤ੍ਤਮਾਨਾਪਿ ਕਾਮਾਵਚਰਵਿਪਾਕਧਮ੍ਮਾ ਪਰਿਤ੍ਤਧਮ੍ਮੇ ਨਿਸ੍ਸਾਯ ਪਰਿਕਪ੍ਪੇਤ੍ਵਾ ਪਵਤ੍ਤਤ੍ਤਾ ਪਰਿਤ੍ਤਾਰਮ੍ਮਣਾ ਵੁਤ੍ਤਾ, ਨ ਪਨ ਸਰੂਪਤੋ ਪਰਿਤ੍ਤਧਮ੍ਮੇ ਗਹੇਤ੍ਵਾ ਪਵਤ੍ਤਤ੍ਤਾ ਏਵਾਤਿ ਗਹੇਤਬ੍ਬਂ. ਏਵਞ੍ਚ ਇਤ੍ਥਿਪੁਰਿਸਾਦਿਆਕਾਰਂ ਆਰੋਪੇਤ੍ਵਾ ਪਵਤ੍ਤਮਾਨਾਨਂ ਰਾਗਾਦਿਸਵਿਪਾਕਧਮ੍ਮਾਨਮ੍ਪਿ ਤੇਸਂ ਆਰਮ੍ਮਣਂ ਗਹੇਤ੍ਵਾ ਉਪ੍ਪਨ੍ਨਾਨਂ ਪਟਿਸਨ੍ਧਾਦਿਵਿਪਾਕਾਨਮ੍ਪਿ ਪਰਿਤ੍ਤਾਰਮ੍ਮਣਤਾ ਕਮ੍ਮਨਿਮਿਤ੍ਤਾਰਮ੍ਮਣਤਾ ਚ ਉਪਪਨ੍ਨਾ ਏਵ ਹੋਤਿ. ਵਤ੍ਥੁਧਮ੍ਮਵਿਨਿਮੁਤ੍ਤਂ ਪਨ ਸਮ੍ਮੁਤਿਭੂਤਂ ਕਸਿਣਾਦਿਪਟਿਭਾਗਾਰਮ੍ਮਣਂ ਗਹੇਤ੍ਵਾ ਉਪ੍ਪਨ੍ਨਾ ਉਪਚਾਰਪ੍ਪਨਾਦਿਵਸਪ੍ਪਵਤ੍ਤਾ ਚਿਤ੍ਤਚੇਤਸਿਕਧਮ੍ਮਾ ਏਵ ਪਰਿਤ੍ਤਤ੍ਤਿਕੇ (ਧ. ਸ. ਤਿਕਮਾਤਿਕਾ ੧੨) ਨ ਵਤ੍ਤਬ੍ਬਾਰਮ੍ਮਣਾਤਿ ਗਹੇਤਬ੍ਬਾ.

ਸ੍ਵਾਯਨ੍ਤਿ ਸੁਪਿਨੋ. ਵਿਪਲ੍ਲਾਸੇਨ ਪਰਿਕਪ੍ਪਿਤਪਰਿਤ੍ਤਾਰਮ੍ਮਣਤ੍ਤਾ ‘‘ਦੁਬ੍ਬਲਵਤ੍ਥੁਕਤ੍ਤਾ’’ਤਿ ਵੁਤ੍ਤਂ, ਅਵਿਜ੍ਜਮਾਨਾਰਮ੍ਮਣੇ ਅਵਸਵਤ੍ਤਿਤੋਤਿ ਅਧਿਪ੍ਪਾਯੋ, ਤੇਨਾਹ ਅਵਿਸਯੇ ਉਪ੍ਪਨ੍ਨਤ੍ਤਾਤਿਆਦਿ.

ਆਪਤ੍ਤਿਨਿਕਾਯਸ੍ਸਾਤਿ ਇਦਂ ਸਙ੍ਘਾਦਿਸੇਸੋਤਿ ਪੁਲ੍ਲਿਙ੍ਗ-ਸਦ੍ਦਸ੍ਸ ਅਨੁਰੂਪਵਸੇਨ ਵੁਤ੍ਤਂ. ਅਸ੍ਸਾਤਿ ਅਸ੍ਸ ਆਪਤ੍ਤਿਨਿਕਾਯਸ੍ਸ, ਵੁਟ੍ਠਾਪੇਤੁਂ ਇਚ੍ਛਿਤਸ੍ਸਾਤਿ ਅਤ੍ਥੋ, ਤੇਨਾਹ ਕਿਂ ਵੁਤ੍ਤਨ੍ਤਿਆਦਿ. ਰੁਲ਼੍ਹਿਸਦ੍ਦੇਨਾਤਿ ਏਤ੍ਥ ਸਮੁਦਾਯੇ ਨਿਪ੍ਫਨ੍ਨਸ੍ਸਾਪਿ ਸਦ੍ਦਸ੍ਸ ਤਦੇਕਦੇਸੇਪਿ ਪਸਿਦ੍ਧਿ ਇਧ ਰੁਲ਼੍ਹੀ ਨਾਮ, ਤਾਯ ਰੁਲ਼੍ਹਿਯਾ ਯੁਤ੍ਤੋ ਸਦ੍ਦੋ ਰੁਲ਼੍ਹੀਸਦ੍ਦੋ, ਤੇਨ. ਰੁਲ਼੍ਹਿਯਾ ਕਾਰਣਮਾਹ ਅਵਯਵੇਇਚ੍ਚਾਦਿਨਾ.

ਕਾਲਞ੍ਚਾਤਿ ‘‘ਰਾਗੂਪਤ੍ਥਮ੍ਭੇ’’ਤਿਆਦਿਨਾ ਦਸ੍ਸਿਤਕਾਲਞ੍ਚ, ‘‘ਰਾਗੂਪਤ੍ਥਮ੍ਭੇ’’ਤਿ ਵੁਤ੍ਤੇ ਰਾਗੂਪਤ੍ਥਮ੍ਭੇ ਜਾਤੇ ਤਸ੍ਮਿਂ ਕਾਲੇ ਮੋਚੇਤੀਤਿ ਅਤ੍ਥਤੋ ਕਾਲੋ ਗਮ੍ਮਤਿ. ਨਵਮਸ੍ਸ ਅਧਿਪ੍ਪਾਯਸ੍ਸਾਤਿ ਵੀਮਂਸਾਧਿਪ੍ਪਾਯਸ੍ਸ. ਵਤ੍ਥੂਤਿ ਵਿਸਯਂ.

੨੩੮. ਲੋਮਾ ਏਤੇਸਂ ਸਨ੍ਤੀਤਿ ਲੋਮਸਾ, ਬਹੁਲੋਮਪਾਣਕਾ.

੨੩੯. ਮੋਚਨੇਨਾਤਿ ਮੋਚਨਪ੍ਪਯੋਗੇਨ. ਮੋਚਨਸ੍ਸਾਦਸਮ੍ਪਯੁਤ੍ਤਾਯਾਤਿ ਏਤ੍ਥ ਮੋਚਨਿਚ੍ਛਾਵ ਮੋਚਨਸ੍ਸਾਦੋ, ਤੇਨ ਸਮ੍ਪਯੁਤ੍ਤਾ ਚੇਤਨਾ ਮੋਚਨਸ੍ਸਾਦਚੇਤਨਾਤਿ ਅਤ੍ਥੋ, ਨ ਪਨ ਮੋਚਨੇ ਅਸ੍ਸਾਦਂ ਸੁਖਂ ਪਤ੍ਥੇਨ੍ਤਿਯਾ ਚੇਤਨਾਯਾਤਿ ਏਵਂ ਅਤ੍ਥੋ ਗਹੇਤਬ੍ਬੋ, ਇਤਰਥਾ ਸੁਖਤ੍ਥਾਯ ਮੋਚੇਨ੍ਤਸ੍ਸੇਵ ਆਪਤ੍ਤਿ, ਨ ਆਰੋਗ੍ਯਾਦਿਅਤ੍ਥਾਯਾਤਿ ਆਪਜ੍ਜਤਿ. ਤਸ੍ਮਾ ਆਰੋਗ੍ਯਾਦੀਸੁ ਯੇਨ ਕੇਨਚਿ ਅਧਿਪ੍ਪਾਯੇਨ ਮੋਚਨਿਚ੍ਛਾਯ ਚੇਤਨਾਯਾਤਿ ਅਤ੍ਥੋਵ ਗਹੇਤਬ੍ਬੋ.

੨੪੦. ਵਾਯਮਤੋਤਿ ਅਙ੍ਗਜਾਤੇ ਕਾਯੇਨ ਉਪਕ੍ਕਮਤੋ. ਦ੍ਵੇ ਆਪਤ੍ਤਿਸਹਸ੍ਸਾਨੀਤਿ ਖਣ੍ਡਚਕ੍ਕਾਦੀਨਿ ਅਨਾਮਸਿਤ੍ਵਾਵ ਵੁਤ੍ਤਂ, ਇਚ੍ਛਨ੍ਤੇਨ ਪਨ ਖਣ੍ਡਚਕ੍ਕਾਦਿਭੇਦੇਨਾਪਿ ਗਣਨਾ ਕਾਤਬ੍ਬਾ. ਏਕੇਨ ਪਦੇਨਾਤਿ ਗੇਹਸਿਤਪੇਮਪਦੇਨ. ਤਥੇਵਾਤਿ ਮੋਚਨਸ੍ਸਾਦਚੇਤਨਾਯ ਏਵ ਗਾਲ਼੍ਹਂ ਪੀਲ਼ਨਾਦਿਪ੍ਪਯੋਗਂ ਅਵਿਜਹਿਤ੍ਵਾ ਸੁਪਨੇਨ ਸਙ੍ਘਾਦਿਸੇਸੋਤਿ ਵੁਤ੍ਤਂ. ਸੁਦ੍ਧਚਿਤ੍ਤੋਤਿ ਮੋਚਨਸ੍ਸਾਦਸ੍ਸ ਨਿਮਿਤ੍ਤੇ ਊਰੁਆਦੀਹਿ ਕਤਉਪਕ੍ਕਮਸ੍ਸ ਵਿਜਹਨਂ ਸਨ੍ਧਾਯ ਵੁਤ੍ਤਂ. ਤੇਨ ਅਸੁਭਮਨਸਿਕਾਰਾਭਾਵੇਪਿ ਪਯੋਗਾਭਾਵੇਨੇਵ ਮੋਚਨੇਪਿ ਅਨਾਪਤ੍ਤਿ ਦੀਪਿਤਾਤਿ ਵੇਦਿਤਬ੍ਬਾ.

ਤੇਨ ਉਪਕ੍ਕਮੇਨ ਮੁਤ੍ਤੇਤਿ ਮੁਚ੍ਚਮਾਨਂ ਵਿਨਾ ਅਞ੍ਞਸ੍ਮਿਮ੍ਪਿ ਸੁਕ੍ਕੇ ਠਾਨਤੋ ਮੁਤ੍ਤੇ. ਯਦਿ ਪਨ ਉਪਕ੍ਕਮੇ ਕਤੇਪਿ ਮੁਚ੍ਚਮਾਨਮੇਵ ਦਕਸੋਤਂ ਓਤਰਤਿ, ਥੁਲ੍ਲਚ੍ਚਯਮੇਵ ਪਯੋਗੇਨ ਮੁਤ੍ਤਸ੍ਸ ਅਭਾਵਾ. ਜਗ੍ਗਨਤ੍ਥਾਯਾਤਿ ਚੀਵਰਾਦੀਸੁ ਲਿਮ੍ਪਨਪਰਿਹਾਰਾਯ ਹਤ੍ਥੇਨ ਅਙ੍ਗਜਾਤਗ੍ਗਹਣਂ ਵਟ੍ਟਤਿ, ਤਪ੍ਪਯੋਗੋ ਨ ਹੋਤੀਤਿ ਅਧਿਪ੍ਪਾਯੋ. ਅਨੋਕਾਸਨ੍ਤਿ ਅਙ੍ਗਜਾਤਪ੍ਪਦੇਸਂ.

੨੬੨. ਸੁਪਿਨਨ੍ਤੇਨ ਕਾਰਣੇਨਾਤਿ ਸੁਪਿਨਨ੍ਤੇ ਪਵਤ੍ਤਉਪਕ੍ਕਮਹੇਤੁਨਾ. ਆਪਤ੍ਤਿਟ੍ਠਾਨੇਯੇਵ ਹਿ ਅਯਂ ਅਨਾਪਤ੍ਤਿ ਅਵਿਸਯਤ੍ਤਾ ਵੁਤ੍ਤਾ. ਤੇਨਾਹ ‘‘ਸਚਸ੍ਸ ਵਿਸਯੋ ਹੋਤਿ ਨਿਚ੍ਚਲੇਨ ਭਵਿਤਬ੍ਬ’’ਨ੍ਤਿਆਦਿ.

੨੬੩. ਵਿਨੀਤਵਤ੍ਥੁਪਾਲ਼ਿਯਂ ਅਣ੍ਡਕਣ੍ਡੁਵਨਵਤ੍ਥੁਸ੍ਮਿਂ ਮੋਚਨਾਧਿਪ੍ਪਾਯੇਨ ਅਣ੍ਡਚਲਨੇਨ ਅਙ੍ਗਜਾਤਸ੍ਸਾਪਿ ਚਲਨਤੋ ਨਿਮਿਤ੍ਤੇ ਉਪਕ੍ਕਮੋ ਹੋਤੀਤਿ ਸਙ੍ਘਾਦਿਸੇਸੋ ਵੁਤ੍ਤੋ. ਯਥਾ ਪਨ ਅਙ੍ਗਜਾਤਂ ਨ ਚਲਤਿ, ਏਵਂ ਅਣ੍ਡਮੇਵ ਕਣ੍ਡੁਵਨੇਨ ਫੁਸਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ ਅਣ੍ਡਸ੍ਸ ਅਨਙ੍ਗਜਾਤਤ੍ਤਾ.

੨੬੪. ਵਤ੍ਥਿਨ੍ਤਿ ਅਙ੍ਗਜਾਤਸੀਸਚ੍ਛਾਦਕਚਮ੍ਮਂ. ਉਦਰਂ ਤਾਪੇਨ੍ਤਸ੍ਸ…ਪੇ… ਅਨਾਪਤ੍ਤਿਯੇਵਾਤਿ ਉਦਰਤਾਪਨੇਨ ਅਙ੍ਗਜਾਤੇਪਿ ਤਤ੍ਤੇ ਤਾਵਤ੍ਤਕੇਨ ਨਿਮਿਤ੍ਤੇ ਉਪਕ੍ਕਮੋ ਕਤੋ ਨਾਮ ਨ ਹੋਤੀਤਿ ਵੁਤ੍ਤਂ.

੨੬੫. ਏਹਿ ਮੇ ਤ੍ਵਂ, ਆਵੁਸੋ, ਸਾਮਣੇਰਾਤਿ ਵਤ੍ਥੁਸ੍ਮਿਂ ਅਞ੍ਞਂ ਆਣਾਪੇਤੁ, ਤੇਨ ਕਰਿਯਮਾਨਸ੍ਸ ਅਙ੍ਗਜਾਤਚਲਨਸ੍ਸ ਮੋਚਨਸ੍ਸਾਦੇਨ ਸਾਦਿਯਨਤੋ ਤਂ ਚਲਨਂ ਭਿਕ੍ਖੁਸ੍ਸ ਸਾਦਿਯਨਚਿਤ੍ਤਸਮੁਟ੍ਠਿਤਮ੍ਪਿ ਹੋਤੀਤਿ ਸੁਕ੍ਕਵਿਸ੍ਸਟ੍ਠਿਪਚ੍ਚਯਸ੍ਸ ਅਙ੍ਗਜਾਤਚਲਨਸ੍ਸ ਹੇਤੁਭੂਤਾ ਅਸ੍ਸਾਦਚੇਤਨਾਵ ਆਪਤ੍ਤਿਯਾ ਅਙ੍ਗਂ ਹੋਤਿ, ਨ ਆਣਾਪਨਵਾਚਾ ਤਸ੍ਸਾ ਪਵਤ੍ਤਿਕ੍ਖਣੇ ਸਙ੍ਘਾਦਿਸੇਸਸ੍ਸ ਅਸਿਜ੍ਝਨਤੋ. ਏਵਂ ਆਣਾਪੇਤ੍ਵਾਪਿ ਯੋਨਿਸੋਮਨਸਿਕਾਰੇਨ ਮੋਚਨਸ੍ਸਾਦਂ ਪਟਿਵਿਨੋਦੇਨ੍ਤਸ੍ਸ ਆਪਤ੍ਤਿਅਸਮ੍ਭਵਤੋ ਇਦਂ ਸਿਕ੍ਖਾਪਦਂ ਅਨਾਣਤ੍ਤਿਕਂ, ਕਾਯਕਮ੍ਮਂ, ਕਿਰਿਯਸਮੁਟ੍ਠਾਨਞ੍ਚ ਜਾਤਨ੍ਤਿ ਗਹੇਤਬ੍ਬਂ, ਆਣਾਪਨਵਾਚਾਯ ਪਨ ਦੁਕ੍ਕਟਂ ਆਪਜ੍ਜਤਿ. ਯੋ ਪਨ ਪਰੇਨ ਅਨਾਣਤ੍ਤੇਨ ਬਲਕ੍ਕਾਰੇਨਾਪਿ ਕਰਿਯਮਾਨਪ੍ਪਯੋਗਂ ਮੋਚਨਸ੍ਸਾਦੇਨ ਸਾਦਿਯਤਿ, ਤਸ੍ਸਾਪਿ ਮੁਤ੍ਤੇ ਪਠਮਪਾਰਾਜਿਕੇ ਵਿਯ ਸਙ੍ਘਾਦਿਸੇਸੋਵ, ਅਮੁਤ੍ਤੇ ਥੁਲ੍ਲਚ੍ਚਯਂ. ਮੋਚਨਸ੍ਸਾਦੇ ਚੇਤਨਾਯ ਪਨ ਅਸਤਿ ਕਾਯਸਂਸਗ੍ਗਰਾਗੇਨ ਸਾਦਿਯਨ੍ਤਸ੍ਸਾਪਿ ਮੁਤ੍ਤੇਪਿ ਸਙ੍ਘਾਦਿਸੇਸੇਨ ਅਨਾਪਤ੍ਤੀਤਿ ਆਚਰਿਯਾ ਵਦਨ੍ਤਿ, ਤਞ੍ਚ ਯੁਤ੍ਤਮੇਵ.

੨੬੬. ਕਾਯਤ੍ਥਮ੍ਭਨਵਤ੍ਥੁਸ੍ਮਿਂ ਚਲਨਵਸੇਨ ਯਥਾ ਅਙ੍ਗਜਾਤੇ ਉਪਕ੍ਕਮੋ ਸਮ੍ਭਵਤਿ, ਤਥਾ ਵਿਜਮ੍ਭਿਤਤ੍ਤਾ ਆਪਤ੍ਤਿ ਵੁਤ੍ਤਾ.

ਉਪਨਿਜ੍ਝਾਯਨਵਤ੍ਥੁਸ੍ਮਿਂ ਅਙ੍ਗਜਾਤਨ੍ਤਿ ਜੀਵਮਾਨਇਤ੍ਥੀਨਂ ਪਸ੍ਸਾਵਮਗ੍ਗੋਵ ਅਧਿਪ੍ਪੇਤੋ, ਨੇਤਰੋ.

੨੬੭. ਪੁਪ੍ਫਾਵਲੀਤਿ ਕੀਲ਼ਾਵਿਸੇਸੋ. ਤਂ ਕਿਰ ਕੀਲ਼ਨ੍ਤਾ ਨਦੀਆਦੀਸੁ ਛਿਨ੍ਨਤਟਂ ਉਦਕੇਨ ਚਿਕ੍ਖਲ੍ਲਂ ਕਤ੍ਵਾ ਤਤ੍ਥ ਉਭੋ ਪਾਦੇ ਪਸਾਰੇਤ੍ਵਾ ਨਿਸਿਨ੍ਨਾ ਪਤਨ੍ਤਿ, ‘‘ਪੁਪ੍ਫਾਵਲਿਯ’’ਨ੍ਤਿਪਿ ਪਾਠੋ. ਪਵੇਸੇਨ੍ਤਸ੍ਸਾਤਿ ਪਯੋਜਕਤ੍ਤੇਨ ਦ੍ਵਿਕਮ੍ਮਿਕਤ੍ਤਾ ‘‘ਵਾਲਿਕਂ ਅਙ੍ਗਜਾਤ’’ਨ੍ਤਿ ਉਭਯਤ੍ਥਾਪਿ ਉਪਯੋਗਵਚਨਂ ਕਤਂ. ਚੇਤਨਾ, ਉਪਕ੍ਕਮੋ, ਮੁਚ੍ਚਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ ਵੇਦਿਤਬ੍ਬਾਨਿ.

ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.