੨. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ

੨੬੯. ਦੁਤਿਯੇ ਕੇਸੁਚਿ ਵਾਤਪਾਨੇਸੁ ਵਿਵਟੇਸੁ ਬਹਿਪਿ ਅਨ੍ਧਕਾਰਤ੍ਤਾ ਆਲੋਕੋ ਨ ਪਵਿਸਤਿ, ਵਿਵਟਕਵਾਟੇਨ ਅਞ੍ਞਤੋ ਆਗਚ੍ਛਨ੍ਤਸ੍ਸ ਆਲੋਕਸ੍ਸ ਨਿਵਾਰਣਤੋ ਕਵਾਟਸ੍ਸ ਪਿਟ੍ਠਿਪਸ੍ਸੇ ਘਨਨ੍ਧਕਾਰੋਵ ਹੋਤਿ, ਤਾਦਿਸਾਨਿ ਸਨ੍ਧਾਯ ‘‘ਯੇਸੁ ਵਿਵਟੇਸੁ ਅਨ੍ਧਕਾਰੋ ਹੋਤੀ’’ਤਿਆਦਿ ਵੁਤ੍ਤਂ.

ਬ੍ਰਾਹ੍ਮਣੀ ਅਤ੍ਤਨੋ ਅਙ੍ਗਮਙ੍ਗਾਨਂ ਪਰਾਮਸਨਕ੍ਖਣੇ ਅਨਾਚਾਰਾਨੁਕੂਲਾ ਹੁਤ੍ਵਾ ਨ ਕਿਞ੍ਚਿ ਵਤ੍ਵਾ ਭਿਕ੍ਖੁਨੋ ਵਣ੍ਣਭਣਨਕ੍ਖਣੇ ਵੁਤ੍ਤਤ੍ਤਾ ਆਹ ‘‘ਪਬ੍ਬਜਿਤੁਕਾਮੋ ਮਞ੍ਞੇਤਿ ਸਲ੍ਲਕ੍ਖੇਤ੍ਵਾ’’ਤਿ, ਪਬ੍ਬਜਿਤੁਕਾਮੋ ਵਿਯਾਤਿ ਸਲ੍ਲਕ੍ਖੇਤ੍ਵਾਤਿ ਅਤ੍ਥੋ. ਕੁਲਿਤ੍ਥੀਨਂ ਏਵਂ ਪਰੇਹਿ ਅਭਿਭਵਨਂ ਨਾਮ ਅਚ੍ਚਨ੍ਤਾਵਮਾਨੋਤਿ ਆਹ ‘‘ਅਤ੍ਤਨੋ ਵਿਪ੍ਪਕਾਰ’’ਨ੍ਤਿ.

੨੭੦. ਓਤਿਣ੍ਣਸਦ੍ਦਸ੍ਸ ਕਮ੍ਮਸਾਧਨਪਕ੍ਖਂ ਸਨ੍ਧਾਯ ‘‘ਯਕ੍ਖਾਦੀਹੀ’’ਤਿਆਦਿ ਵੁਤ੍ਤਂ, ਕਤ੍ਤੁਸਾਧਨਪਕ੍ਖਂ ਸਨ੍ਧਾਯ ‘‘ਕੂਪਾਦੀਨੀ’’ਤਿਆਦਿ ਵੁਤ੍ਤਂ. ਤਸ੍ਮਿਂ ਵਤ੍ਥੁਸ੍ਮਿਨ੍ਤਿ ਇਤ੍ਥਿਸਰੀਰਸਙ੍ਖਾਤੇ ਵਤ੍ਥੁਸ੍ਮਿਂ.

੨੭੧. ਅਸ੍ਸਾਤਿ ਹਤ੍ਥਗ੍ਗਾਹਾਦਿਕਸ੍ਸ ਸਬ੍ਬਸ੍ਸ.

੨੭੩. ਏਤੇਸਂ ਪਦਾਨਨ੍ਤਿ ਆਮਸਨਾਦਿਪਦਾਨਂ. ਇਤ੍ਥਿਸਞ੍ਞੀਤਿ ਮਨੁਸ੍ਸਿਤ੍ਥਿਸਞ੍ਞੀ. ਨਂ-ਸਦ੍ਦਸ੍ਸ ਕਾਯਵਿਸੇਸਨਭਾਵੇਨ ਏਤਂ ਕਾਯਨ੍ਤਿ ਅਤ੍ਥਂ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਓਮਸਨ੍ਤੋ…ਪੇ… ਏਕਾਵ ਆਪਤ੍ਤੀਤਿ ਅਨਿਵਤ੍ਥਂ ਸਨ੍ਧਾਯ ਵੁਤ੍ਤਂ, ਨ ਨਿਵਤ੍ਥਂ. ਸਨਿਵਤ੍ਥਾਯ ਪਨ ਮਤ੍ਥਕਤੋ ਪਟ੍ਠਾਯ ਹਤ੍ਥਂ ਓਤਾਰੇਨ੍ਤਸ੍ਸ ਨਿਵਤ੍ਥਸਾਟਕੋਪਰਿ ਹਤ੍ਥੇ ਆਰੁਲ਼੍ਹੇ ਥੁਲ੍ਲਚ੍ਚਯਂ. ਸਾਟਕਤੋ ਹਤ੍ਥਂ ਓਤਾਰਾਪੇਤ੍ਵਾ ਜਙ੍ਘਤੋ ਪਟ੍ਠਾਯ ਓਮਸਨ੍ਤਸ੍ਸ ਪੁਨ ਸਙ੍ਘਾਦਿਸੇਸੋ.

ਯਥਾਨਿਦ੍ਦਿਟ੍ਠਨਿਦ੍ਦੇਸੇਤਿ ਯਥਾਵੁਤ੍ਤਕਾਯਸਂਸਗ੍ਗਨਿਦ੍ਦੇਸੇ. ਤੇਨਾਤਿ ਯੇਨ ਕਾਰਣੇਨ ਵਤ੍ਥੁਸਞ੍ਞਾਦਯੋ ਹੋਨ੍ਤਿ, ਤੇਨ ਕਾਰਣੇਨ. ਯਥਾਵੁਤ੍ਤਸਿਕ੍ਖਾਪਦਨਿਦ੍ਦੇਸੇ ਵੁਤ੍ਤਂ ਗਰੁਕਂ ਭਿਕ੍ਖੁਨੋ ਕਰੇਯ੍ਯ ਪਕਾਸੇਯ੍ਯਾਤਿ ਯੋਜਨਾ.

ਸਞ੍ਞਾਯ ਵਿਰਾਗਿਤਮ੍ਹੀਤਿ ਸਞ੍ਞਾਯ ਵਿਰਦ੍ਧਾਯ. ਇਦਂ ਨਾਮ ਵਤ੍ਥੁਨ੍ਤਿ ਇਮਸ੍ਮਿਂ ਸਿਕ੍ਖਾਪਦੇ ਆਗਤਂ, ਅਨਾਗਤਞ੍ਚ ਯਂ ਕਿਞ੍ਚਿ ਸਵਿਞ੍ਞਾਣਕਾਵਿਞ੍ਞਾਣਕਂ ਫੁਸਨ੍ਤਸ੍ਸ ਅਨਾਪਤ੍ਤਿਅਭਾਵਂ ਸਨ੍ਧਾਯ ਵੁਤ੍ਤਂ.

ਸਾਰਤ੍ਤਨ੍ਤਿ ਕਾਯਸਂਸਗ੍ਗਰਾਗੇਨੇਵ ਸਾਰਤ੍ਤਂ. ਵਿਰਤ੍ਤਨ੍ਤਿ ਕਾਯਸਂਸਗ੍ਗਰਾਗਰਹਿਤਂ ਮਾਤੁਆਦਿਂ ਸਨ੍ਧਾਯ ਵਦਤਿ. ਦੁਕ੍ਕਟਨ੍ਤਿ ਮਾਤੁਪੇਮਾਦਿਵਸੇਨ ਗਣ੍ਹਨ੍ਤਸ੍ਸ ਵਸੇਨ ਵੁਤ੍ਤਂ, ਵਿਰਤ੍ਤਮ੍ਪਿ ਇਤ੍ਥਿਂ ਕਾਯਸਂਸਗ੍ਗਰਾਗੇਨ ਗਣ੍ਹਨ੍ਤਸ੍ਸ ਪਨ ਸਙ੍ਘਾਦਿਸੇਸੋ ਏਵ. ਇਮਾਯ ਪਾਲ਼ਿਯਾ ਸਮੇਤੀਤਿ ਸਮ੍ਬਨ੍ਧੋ. ਕਥਂ ਸਮੇਤੀਤਿ ਚੇ? ਯਦਿ ਹਿ ‘‘ਇਤ੍ਥਿਯਾ ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇ ਇਤ੍ਥਿਸਞ੍ਞਾ ਵਿਰਾਗਿਤਾ ਭਵੇਯ੍ਯ. ਕਾਯਪ੍ਪਟਿਬਦ੍ਧਗ੍ਗਹਣੇਪਿ ਥੁਲ੍ਲਚ੍ਚਯੇਨਾਪਿ ਨ ਭਵਿਤਬ੍ਬਂ ਇਤ੍ਥਿਸਞ੍ਞਾਯ ਏਵ ਪਾਲ਼ਿਯਂ (ਪਾਰਾ. ੨੭੬) ਥੁਲ੍ਲਚ੍ਚਯਸ੍ਸ ਵੁਤ੍ਤਤ੍ਤਾ, ਤਸ੍ਮਾ ‘‘ਇਤ੍ਥਿਯਾ ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀਤਿ ਕਾਯਂ ਗਣ੍ਹਨ੍ਤਸ੍ਸ ਇਤ੍ਥਿਸਞ੍ਞਾ ਵਿਰਾਗਿਤਾ ਨਾਮ ਨ ਹੋਤੀਤਿ ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀਤਿ ਕਾਯਂ ਗਣ੍ਹਤੋ ਇਤ੍ਥਿਸਞ੍ਞਾਯ ਚੇਵ ਕਾਯਸਂਸਗ੍ਗਰਾਗਸ੍ਸ ਚ ਕਾਯਗ੍ਗਹਣਸ੍ਸ ਚ ਸਮ੍ਭਵਾ ਯਥਾਵਤ੍ਥੁਕਂ ਸਙ੍ਘਾਦਿਸੇਸਮੇਵ ਆਪਜ੍ਜਤੀ’’ਤਿ ਮਹਾਸੁਮਤ੍ਥੇਰੇਨ ਵੁਤ੍ਤਵਾਦੋਵ ਇਮਾਯ ਪਾਲ਼ਿਯਾ ਸਮੇਤਿ. ਅਟ੍ਠਕਥਾਯਞ੍ਹਿ ‘‘ਸਮ੍ਬਹੁਲਾ ਇਤ੍ਥਿਯੋ ਬਾਹਾਹਿ ਪਰਿਕ੍ਖਿਪਿਤ੍ਵਾ ਗਣ੍ਹਾਮੀ’’ਤਿ ਸਞ੍ਞਾਯ ਪਰਿਕ੍ਖਿਪਤੋ ਮਜ੍ਝਗਤਾਨਂ ਵਸੇਨ ਥੁਲ੍ਲਚ੍ਚਯਂ ਵੁਤ੍ਤਂ. ਨ ਹਿ ਤਸ੍ਸ ‘‘ਮਜ੍ਝਗਤਾ ਇਤ੍ਥਿਯੋ ਕਾਯਪ੍ਪਟਿਬਦ੍ਧੇਨ ਗਣ੍ਹਾਮੀ’’ਤਿ ਸਞ੍ਞਾ ਅਤ੍ਥਿ, ਤਸ੍ਮਾ ਅਟ੍ਠਕਥਾਯਪਿ ਸਮੇਤੀਤਿ ਗਹੇਤਬ੍ਬਂ. ਨੀਲੇਨ ਦੁਵਿਞ੍ਞੇਯ੍ਯਭਾਵਤੋ ਕਾਲ਼ਿਤ੍ਥੀ ਵੁਤ੍ਤਾ.

੨੭੯. ਸੇਵਨਾਧਿਪ੍ਪਾਯੋਤਿ ਫਸ੍ਸਸੁਖਸੇਵਨਾਧਿਪ੍ਪਾਯੋ. ਕਾਯਪ੍ਪਟਿਬਦ੍ਧਾਮਸਨਵਾਰੇ ਕਾਯਪ੍ਪਟਿਬਦ੍ਧਵਸੇਨ ਫਸ੍ਸਪਟਿਵਿਜਾਨਨਂ ਵੇਦਿਤਬ੍ਬਂ. ਚਿਤ੍ਤੁਪ੍ਪਾਦਮਤ੍ਤੇ ਆਪਤ੍ਤਿਯਾਭਾਵਤੋ ਅਨਾਪਤ੍ਤੀਤਿ ਇਦਂ ਕਾਯਸਂਸਗ੍ਗਰਾਗਮਤ੍ਤੇਨ ਕਾਯਚਲਨਸ੍ਸ ਅਨੁਪ੍ਪਤ੍ਤਿਤੋ ਇਤ੍ਥਿਯਾ ਕਰਿਯਮਾਨਕਾਯਚਲਨਂ ਸਾਦਿਯਤੋਪਿ ਪਯੋਗਾਭਾਵਂ ਸਨ੍ਧਾਯ ਵੁਤ੍ਤਂ. ਪਠਮਪਾਰਾਜਿਕੇ ਪਨ ਪਰੇਹਿ ਉਪਕ੍ਕਮਿਯਮਾਨਸ੍ਸ ਅਭਾਵਤੋ ਸੇਵਨਾਧਿਪ੍ਪਾਯੇ ਉਪ੍ਪਨ੍ਨੇ ਤੇਨ ਅਧਿਪ੍ਪਾਯੇਨ ਅਙ੍ਗਜਾਤਕ੍ਖੋਭੋ ਸਯਮੇਵ ਅਵਸ੍ਸਂ ਸਞ੍ਜਾਯਤਿ, ਸੋ ਚ ਤੇਨ ਕਤੋ ਨਾਮ ਹੋਤੀਤਿ ਪਾਰਾਜਿਕਂ ਵੁਤ੍ਤਂ, ਤੇਨੇਵ ਨਯੇਨ ਪਠਮਸਙ੍ਘਾਦਿਸੇਸੇਪਿ ਪਰੇਨ ਕਰਿਯਮਾਨਪਯੋਗਸਾਦਿਯਮਾਨੇਪਿ ਅਙ੍ਗਜਾਤਕ੍ਖੋਭਸਮ੍ਭਵੇਨ ਆਪਤ੍ਤਿ ਹੋਤੀਤਿ ਵੇਦਿਤਬ੍ਬਂ. ਚਤੁਤ੍ਥੇਤਿ ‘‘ਨ ਚ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤੀ’’ਤਿ ਇਮਸ੍ਮਿਂ ਵਾਰੇ. ਫਸ੍ਸਪਟਿਵਿਜਾਨਨਮ੍ਪੀਤਿ ਅਪਿ-ਸਦ੍ਦੇਨ ਤਤਿਯਵਾਰੇ ਵਿਯ ਵਾਯਾਮੋਪਿ ਨਤ੍ਥੀਤਿ ਦਸ੍ਸੇਤਿ. ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਾਮਸਨੇ ਵਿਯਾਤਿ ਇਦਂ ਪਨ ਫਸ੍ਸਪਟਿਵਿਜਾਨਨਾਭਾਵਮਤ੍ਤਸ੍ਸੇਵ ਨਿਦਸ੍ਸਨਂ, ਨ ਪਯੋਗਾਭਾਵਸ੍ਸਾਤਿ ਦਟ੍ਠਬ੍ਬਂ. ਮੋਕ੍ਖਾਧਿਪ੍ਪਾਯੋਤਿ ਏਤ੍ਥ ਚਿਤ੍ਤਸ੍ਸ ਲਹੁਪਰਿਵਤ੍ਤਿਤਾਯ ਅਨ੍ਤਰਨ੍ਤਰਾ ਕਾਯਸਂਸਗ੍ਗਰਾਗੇ ਸਮੁਪ੍ਪਨ੍ਨੇਪਿ ਮੋਕ੍ਖਾਧਿਪ੍ਪਾਯਸ੍ਸ ਅਵਿਚ੍ਛਿਨ੍ਨਤਾਯ ਅਨਾਪਤ੍ਤਿਯੇਵ, ਵਿਚ੍ਛਿਨ੍ਨੇ ਪਨ ਤਸ੍ਮਿਂ ਆਪਤ੍ਤਿ ਏਵ.

ਪਦਭਾਜਨੀਯਵਣ੍ਣਨਾਨਯੋ.

੨੮੧. ਏਤ੍ਥ ਗਣ੍ਹਾਹੀਤਿ ਨ ਵਤ੍ਤਬ੍ਬਾਤਿ ਗੇਹਸਿਤਪੇਮੇਨ ਕਾਯਪ੍ਪਟਿਬਦ੍ਧੇਨ ਫੁਸਨੇ ਦੁਕ੍ਕਟਂ ਸਨ੍ਧਾਯ ਵੁਤ੍ਤਂ, ਕਾਰੁਞ੍ਞੇਨ ਪਨ ਵਤ੍ਥਾਦਿਂ ਗਹੇਤੁਂ ਅਸਕ੍ਕੋਨ੍ਤਿਂ ‘‘ਗਣ੍ਹਾ’’ਤਿ ਵਦਨ੍ਤਸ੍ਸਾਪਿ ਅਵਸਸਭਾਵਪ੍ਪਤ੍ਤਂ ਉਦਕੇ ਨਿਮੁਜ੍ਜਨ੍ਤਿਂ ਕਾਰੁਞ੍ਞੇਨ ਸਹਸਾ ਅਨਾਮਾਸਨ੍ਤਿ ਅਚਿਨ੍ਤੇਤ੍ਵਾ ਕੇਸਾਦੀਸੁ ਗਹੇਤ੍ਵਾ ਮੋਕ੍ਖਾਧਿਪ੍ਪਾਯੇਨ ਆਕਡ੍ਢਤੋਪਿ ਅਨਾਪਤ੍ਤਿਯੇਵ. ਨ ਹਿ ਮੀਯਮਾਨਂ ਮਾਤਰਂ ਉਕ੍ਖਿਪਿਤੁਂ ਨ ਵਟ੍ਟਤਿ. ਅਞ੍ਞਾਤਿਕਾਯ ਇਤ੍ਥਿਯਾਪਿ ਏਸੇਵ ਨਯੋ. ਉਕ੍ਕਟ੍ਠਾਯ ਮਾਤੁਯਾਪਿ ਆਮਾਸੋ ਨ ਵਟ੍ਟਤੀਤਿ ਦਸ੍ਸਨਤ੍ਥਂ ‘‘ਮਾਤਰ’’ਨ੍ਤਿ ਵੁਤ੍ਤਂ. ਤਸ੍ਸਾ ਕਾਤਬ੍ਬਂ ਪਨ ਅਞ੍ਞਾਸਮ੍ਪਿ ਇਤ੍ਥੀਨਂ ਕਰੋਨ੍ਤਸ੍ਸਾਪਿ ਅਨਾਪਤ੍ਤਿਯੇਵ ਅਨਾਮਾਸਤ੍ਤੇ ਵਿਸੇਸਾਭਾਵਾ.

ਤਿਣਣ੍ਡੁਪਕਨ੍ਤਿ ਹਿਰਿਵੇਰਾਦਿਮੂਲੇਹਿ ਕੇਸਾਲਙ੍ਕਾਰਤ੍ਥਾਯ ਕਤਚੁਮ੍ਬਟਕਂ. ਪਰਿਵਤ੍ਤੇਤ੍ਵਾਤਿ ਅਤ੍ਤਨੋ ਨਿਵਾਸਨਾਦਿਭਾਵਤੋ ਅਪਨੇਤ੍ਵਾ. ਪੂਜਾਦਿਅਤ੍ਥਂ ਪਨ ਤਾਵਕਾਲਿਕਮ੍ਪਿ ਆਮਸਿਤੁਂ ਵਟ੍ਟਤਿ. ਸੀਸਪਸਾਧਨਕਦਨ੍ਤਸੂਚਿਆਦੀਤਿ ਇਦਂ ਸੀਸਾਲਙ੍ਕਾਰਤ੍ਥਾਯ ਪਟਪਿਲੋਤਿਕਾਦੀਹਿ ਕਤਂ ਸੀਸਪਸਾਧਨਕਞ੍ਚੇਵ ਦਨ੍ਤਸੂਚਿਆਦਿ ਚਾਤਿ ਦ੍ਵਿਧਾ ਯੋਜੇਤ੍ਵਾ ਸੀਸਪਸਾਧਨਂ ਸਿਪਾਟਿਕੋਪਕਰਣਤ੍ਥਾਯ ਚੇਵ ਦਨ੍ਤਸੂਚਿਉਪਕਰਣਤ੍ਥਾਯ ਚ ਗਹੇਤਬ੍ਬਨ੍ਤਿ ਯਥਾਕ੍ਕਮਂ ਅਤ੍ਥਂ ਦਸ੍ਸੇਤਿ. ਕੇਸਕਲਾਪਂ ਬਨ੍ਧਿਤ੍ਵਾ ਤਤ੍ਥ ਤਿਰਿਯਂ ਪਵੇਸਨਤ੍ਥਾਯ ਕਤਾ ਦਨ੍ਤਸੂਚਿ ਏਵ ਸੀਸਪਸਾਧਨਕਦਨ੍ਤਸੂਚੀਤਿ ਏਕਮੇਵ ਕਤ੍ਵਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤਬ੍ਬਸੂਚਿਯੇਵ ਤਸ੍ਸ ਤਸ੍ਸ ਕਿਚ੍ਚਸ੍ਸ ਉਪਕਰਣਨ੍ਤਿ ਸਿਪਾਟਿਕਾਸੂਚਿਉਪਕਰਣਨ੍ਤਿ ਏਵਂ ਵਾ ਯੋਜਨਾ ਕਾਤਬ੍ਬਾ. ਪੋਤ੍ਥਕਰੂਪਨ੍ਤਿ ਸੁਧਾਦੀਹਿ ਕਤਂ, ਪਾਰਾਜਿਕਵਤ੍ਥੁਭੂਤਾਨਂ ਤਿਰਚ੍ਛਾਨਗਤਿਤ੍ਥੀਨਂ ਸਣ੍ਠਾਨੇਨ ਕਤਮ੍ਪਿ ਅਨਾਮਾਸਮੇਵ. ਇਤ੍ਥਿਰੂਪਾਦੀਨਿ ਦਸ੍ਸੇਤ੍ਵਾ ਕਤਂ, ਵਤ੍ਥਭਿਤ੍ਤਿਆਦਿਞ੍ਚ ਇਤ੍ਥਿਰੂਪਂ ਅਨਾਮਸਿਤ੍ਵਾ ਵਲ਼ਞ੍ਜੇਤੁਂ ਵਟ੍ਟਤਿ. ਏਵਰੂਪੇਹਿ ਅਨਾਮਾਸੇ ਕਾਯਸਂਸਗ੍ਗਰਾਗੇ ਅਸਤਿ ਕਾਯਪ੍ਪਟਿਬਦ੍ਧੇਨ ਆਮਸਤੋ ਦੋਸੋ ਨਤ੍ਥਿ. ਭਿਨ੍ਦਿਤ੍ਵਾਤਿ ਏਤ੍ਥ ਅਨਾਮਾਸਮ੍ਪਿ ਦਣ੍ਡਪਾਸਾਣਾਦੀਹਿ ਭੇਦਨਸ੍ਸ ਅਟ੍ਠਕਥਾਯਂ ਵੁਤ੍ਤਤ੍ਤਾ, ਪਾਲ਼ਿਯਮ੍ਪਿ ਆਪਦਾਸੁ ਮੋਕ੍ਖਾਧਿਪ੍ਪਾਯਸ੍ਸ ਆਮਸਨੇਪਿ ਅਨਾਪਤ੍ਤਿਯਾ ਵੁਤ੍ਤਤ੍ਤਾ ਚ. ਸਪ੍ਪਿਨੀਆਦੀਹਿ ਵਾਲ਼ਮਿਗੀਹਿ ਚ ਗਹਿਤਪਾਣਕਾਨਂ ਮੋਚਨਤ੍ਥਾਯ ਤਂ ਸਪ੍ਪਿਨੀਆਦਿਂ ਵਤ੍ਥਦਣ੍ਡਾਦੀਹਿ ਪਰਿਕ੍ਖਿਪਿਤ੍ਵਾ ਗਹੇਤੁਂ, ਮਾਤੁਆਦਿਂ ਉਦਕੇ ਮੀਯਮਾਨਂ ਵਤ੍ਥਾਦੀਹਿ ਗਹੇਤੁਂ, ਅਸਕ੍ਕੋਨ੍ਤਿਂ ਕੇਸਾਦੀਸੁ ਗਹੇਤ੍ਵਾ ਕਾਰੁਞ੍ਞੇਨ ਉਕ੍ਖਿਪਿਤੁਂ ਵਟ੍ਟਤੀਤਿ ਅਯਮਤ੍ਥੋ ਗਹੇਤਬ੍ਬੋਵ. ਅਟ੍ਠਕਥਾਯਂ ‘‘ਨ ਤ੍ਵੇਵ ਆਮਸਿਤਬ੍ਬਾ’’ਤਿ ਇਦਂ ਪਨ ਵਚਨਂ ਅਮੀਯਮਾਨਵਤ੍ਥੁਂ ਸਨ੍ਧਾਯ ਵੁਤ੍ਤਨ੍ਤਿ ਅਯਂ ਅਮ੍ਹਾਕਂ ਖਨ੍ਤਿ.

ਮਗ੍ਗਂ ਅਧਿਟ੍ਠਾਯਾਤਿ ‘‘ਮਗ੍ਗੋ ਅਯ’’ਨ੍ਤਿ ਮਗ੍ਗਸਞ੍ਞਂ ਉਪ੍ਪਾਦੇਤ੍ਵਾਤਿ ਅਤ੍ਥੋ. ਪਞ੍ਞਪੇਤ੍ਵਾ ਦੇਨ੍ਤੀਤਿ ਇਦਂ ਸਾਮੀਚਿਵਸੇਨ ਵੁਤ੍ਤਂ, ਤੇਹਿ ਪਨ ਆਸਨਂ ਅਪਞ੍ਞਪੇਤ੍ਵਾਵ ਨਿਸੀਦਥਾਤਿ ਵੁਤ੍ਤੇ ਸਯਮੇਵ ਪਞ੍ਞਪੇਤ੍ਵਾ ਨਿਸੀਦਿਤੁਮ੍ਪਿ ਵਟ੍ਟਤਿ. ਤਤ੍ਥਜਾਤਕਾਨੀਤਿ ਅਚ੍ਛਿਨ੍ਦਿਤ੍ਵਾ ਭੂਤਗਾਮਭਾਵੇਨੇਵ ਠਿਤਾਨਿ. ਕੀਲ਼ਨ੍ਤੇਨਾਤਿ ਵੁਤ੍ਤਤ੍ਤਾ ਸਤਿ ਪਚ੍ਚਯੇ ਆਮਸਨ੍ਤਸ੍ਸ ਅਨਾਪਤ੍ਤਿ. ਭਿਕ੍ਖੁਸਨ੍ਤਕਂ ਪਨ ਪਰਿਭੋਗਾਰਹਂ ਸਬ੍ਬਥਾ ਆਮਸਿਤੁਂ ਨ ਵਟ੍ਟਤਿ ਦੁਰੁਪਚਿਣ੍ਣਤ੍ਤਾ. ਅਨੁਪਸਮ੍ਪਨ੍ਨਾਨਂ ਦਸ੍ਸਾਮੀਤਿ ਇਦਂ ਅਪ੍ਪਟਿਗ੍ਗਹੇਤ੍ਵਾ ਗਹਣਂ ਸਨ੍ਧਾਯ ਵੁਤ੍ਤਂ. ਅਤ੍ਤਨੋਪਿ ਅਤ੍ਥਾਯ ਪਟਿਗ੍ਗਹੇਤ੍ਵਾ ਗਹਣੇ ਦੋਸੋ ਨਤ੍ਥਿ ਅਨਾਮਾਸਤ੍ਤਾਭਾਵਾ.

ਮਣੀਤਿ ਵੇਲ਼ੁਰਿਯਾਦਿਤੋ ਅਞ੍ਞੋ ਜੋਤਿਰਸਾਦਿਭੇਦੋ ਸਬ੍ਬੋਪਿ ਮਣਿ. ਵੇਲ਼ੁਰਿਯੋਤਿ ਅਲ੍ਲਵੇਲ਼ੁਵਣ੍ਣੋਮਣਿ, ‘‘ਮਜ੍ਜਾਰਕ੍ਖਿ ਮਣ੍ਡਲਵਣ੍ਣੋ’’ਤਿਪਿ ਵਦਨ੍ਤਿ. ਸਿਲਾਤਿ ਮੁਗ੍ਗਮਾਸਵਣ੍ਣਾ ਅਤਿਸਿਨਿਦ੍ਧਾ ਕਾਲ਼ਸਿਲਾ, ਮਣਿਵੋਹਾਰਂ ਆਗਤਾ ਰਤ੍ਤਸੇਤਾਦਿਵਣ੍ਣਾ ਸੁਮਟ੍ਠਾਪਿ ਸਿਲਾ ਅਨਾਮਾਸਾ ਏਵਾਤਿ ਵਦਨ੍ਤਿ. ਰਜਤਨ੍ਤਿ ਕਹਾਪਣਮਾਸਾਦਿਭੇਦਂ ਜਤੁਮਾਸਾਦਿਂ ਉਪਾਦਾਯ ਸਬ੍ਬਂ ਵੁਤ੍ਤਾਵਸੇਸਂ ਰੂਪਿਯਂ ਗਹਿਤਂ. ਲੋਹਿਤਙ੍ਕੋਤਿ ਰਤ੍ਤਮਣਿ. ਮਸਾਰਗਲ੍ਲਨ੍ਤਿ ਕਬਰਵਣ੍ਣੋ ਮਣਿ, ‘‘ਮਰਕਤ’’ਨ੍ਤਿਪਿ ਵਦਨ੍ਤਿ. ਭੇਸਜ੍ਜਤ੍ਥਾਯ ਪਿਸਿਤ੍ਵਾ ਯੋਜਿਤਾਨਂ ਮੁਤ੍ਤਾਨਂ ਰਤਨਭਾਵਵਿਰਹਤੋ ਗਹਣਕ੍ਖਣੇਪਿ ਰਤਨਾਕਾਰੇਨ ਅਪੇਕ੍ਖਿਤਾਭਾਵਾ ‘‘ਭੇਸਜ੍ਜਤ੍ਥਾਯ ਪਨ ਵਟ੍ਟਤੀ’’ਤਿ ਵੁਤ੍ਤਂ. ਯਾਵ ਪਨ ਤਾ ਮੁਤ੍ਤਾ ਰਤਨਰੂਪੇਨ ਤਿਟ੍ਠਨ੍ਤਿ, ਤਾਵ ਆਮਸਿਤੁਂ ਨ ਵਟ੍ਟਤਿ ਏਵ. ਏਵਂ ਅਞ੍ਞਮ੍ਪਿ ਰਤਨਪਾਸਾਣਂ ਪਿਸਿਤ੍ਵਾ ਭੇਸਜ੍ਜੇ ਯੋਜਨਤ੍ਥਾਯ ਗਹੇਤੁਂ ਵਟ੍ਟਤਿ ਏਵ, ਜਾਤਰੂਪਰਜਤਂ ਪਨ ਪਿਸਿਤ੍ਵਾ ਯੋਜਨਭੇਸਜ੍ਜਤ੍ਥਾਯਪਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਗਹਟ੍ਠੇਹਿ ਯੋਜੇਤ੍ਵਾ ਦਿਨ੍ਨਮ੍ਪਿ ਯਦਿ ਭੇਸਜ੍ਜੇ ਸੁਵਣ੍ਣਾਦਿਰੂਪੇਨ ਤਿਟ੍ਠਤਿ, ਵਿਯੋਜੇਤੁਞ੍ਚ ਸਕ੍ਕਾ, ਤਾਦਿਸਂ ਭੇਸਜ੍ਜਮ੍ਪਿ ਨ ਵਟ੍ਟਤਿ. ਤਂ ਅਬ੍ਬੋਹਾਰਿਕਤ੍ਤਂ ਗਤਂ ਚੇ, ਵਟ੍ਟਤਿ. ‘‘ਜਾਤਿਫਲਿਕਂ ਉਪਾਦਾਯਾ’’ਤਿ ਵੁਤ੍ਤਤ੍ਤਾ, ਸੂਰਿਯਕਨ੍ਤਚਨ੍ਦਕਨ੍ਤਾਦਿਕਂ ਜਾਤਿਪਾਸਾਣਂ ਮਣਿਮ੍ਹਿ ਏਵ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਧਮਨਸਙ੍ਖੋ ਚ ਧੋਤਵਿਦ੍ਧੋ ਚ ਰਤਨਮਿਸ੍ਸੋ ਚਾਤਿ ਯੋਜੇਤਬ੍ਬਂ. ਵਿਦ੍ਧੋਤਿ ਮਣਿਆਦਿਭਾਵੇਨ ਕਤਛਿਦ੍ਦੋ.

ਰਤਨਮਿਸ੍ਸੋਤਿ ਕਞ੍ਚਨਲਤਾਦਿਵਿਚਿਤ੍ਤੋ, ਮੁਤ੍ਤਾਦਿਰਤਨਖਚਿਤੋ ਚ, ਏਤੇਨ ਧਮਨਸਙ੍ਖਤੋ ਅਞ੍ਞੋ ਰਤਨਮਿਸ੍ਸੋਵ ਅਨਾਮਾਸੋਤਿ ਦਸ੍ਸੇਤਿ. ਸਿਲਾਯਮ੍ਪਿ ਏਸੇਵ ਨਯੋ. ਪਾਨੀਯਸਙ੍ਖੋਤਿ ਇਮਿਨਾਵ ਥਾਲਕਾਦਿਆਕਾਰੇਨ ਕਤਸਙ੍ਖਮਯਭਾਜਨਾਨਿ ਭਿਕ੍ਖੂਨਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀਤਿ ਸਿਦ੍ਧਂ. ਸੇਸਾਤਿ ਰਤਨਸਂਯੁਤ੍ਤਂ ਠਪੇਤ੍ਵਾ ਅਵਸੇਸਾ.

ਬੀਜਤੋ ਪਟ੍ਠਾਯਾਤਿ ਧਾਤੁਪਾਸਾਣਤੋ ਪਟ੍ਠਾਯ. ਪਟਿਕ੍ਖਿਪੀਤਿ ਸੁਵਣ੍ਣਮਯਧਾਤੁਕਰਣ੍ਡਕਸ੍ਸ, ਬੁਦ੍ਧਰੂਪਾਦਿਸ੍ਸ ਚ ਅਤ੍ਤਨੋ ਸਨ੍ਤਕਕਰਣੇ ਨਿਸ੍ਸਗ੍ਗਿਯਤ੍ਤਾ ਵੁਤ੍ਤਂ. ‘‘ਰੂਪਿਯਛਡ੍ਡਕਟ੍ਠਾਨੇ’’ਤਿ ਵੁਤ੍ਤਤ੍ਤਾ ਰੂਪਿਯਛਡ੍ਡਕਸ੍ਸ ਜਾਤਰੂਪਰਜਤਂ ਆਮਸਿਤ੍ਵਾ ਛਡ੍ਡੇਤੁਂ ਵਟ੍ਟਤੀਤਿ ਸਿਦ੍ਧਂ. ਕੇਲ਼ਾਪਯਿਤੁਨ੍ਤਿ ਆਮਸਿਤ੍ਵਾ ਇਤੋ ਚਿਤੋ ਚ ਸਞ੍ਚਾਰੇਤੁਂ. ਵੁਤ੍ਤਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਕਚਵਰਮੇਵ ਹਰਿਤੁਂ ਵਟ੍ਟਤੀਤਿ ਗੋਪਕਾ ਵਾ ਹੋਨ੍ਤੁ ਅਞ੍ਞੇ ਵਾ, ਹਤ੍ਥੇਨ ਪੁਞ੍ਛਿਤ੍ਵਾ ਕਚਵਰਂ ਅਪਨੇਤੁਂ ਵਟ੍ਟਤਿ, ਮਲਮ੍ਪਿ ਪਮਜ੍ਜਿਤੁਂ ਵਟ੍ਟਤਿ ਏਵਾਤਿ ਵਦਨ੍ਤਿ, ਤਂ ਅਟ੍ਠਕਥਾਯ ਨ ਸਮੇਤਿ ਕੇਲ਼ਾਯਨਸਦਿਸਤ੍ਤਾ. ਆਰਕੂਟਲੋਹਨ੍ਤਿ ਸੁਵਣ੍ਣਵਣ੍ਣੋ ਕਿਤ੍ਤਿਮਲੋਹਵਿਸੇਸੋ. ਤਿਵਿਧਞ੍ਹਿ ਕਿਤ੍ਤਿਮਲੋਹਂ ਕਂਸਲੋਹਂ ਵਟ੍ਟਲੋਹਂ ਹਾਰਕੂਟਲੋਹਨ੍ਤਿ. ਤਤ੍ਥ ਤਿਪੁਤਮ੍ਬੇ ਮਿਸ੍ਸੇਤ੍ਵਾ ਕਤਂ ਕਂਸਲੋਹਂ ਨਾਮ. ਸੀਸਤਮ੍ਬੇ ਮਿਸ੍ਸੇਤ੍ਵਾ ਕਤਂ ਵਟ੍ਟਲੋਹਂ. ਰਸਤਮ੍ਬੇ ਮਿਸ੍ਸੇਤ੍ਵਾ ਕਤਂ ਹਾਰਕੂਟਲੋਹਂ ਨਾਮ. ਤਂ ਪਨ ‘‘ਜਾਤਰੂਪਗਤਿਕ’’ਨ੍ਤਿ ਵੁਤ੍ਤਤ੍ਤਾ ਉਗ੍ਗਣ੍ਹਤੋ ਨਿਸ੍ਸਗ੍ਗਿਯਮ੍ਪਿ ਹੋਤੀਤਿ ਕੇਚਿ ਵਦਨ੍ਤਿ. ਰੂਪਿਯੇਸੁ ਪਨ ਅਗਣਿਤਤ੍ਤਾ ਨਿਸ੍ਸਗ੍ਗਿਯਂ ਨ ਹੋਤਿ, ਆਮਸਨੇ, ਸਮ੍ਪਟਿਚ੍ਛਨੇ ਚ ਦੁਕ੍ਕਟਮੇਵਾਤਿ ਵੇਦਿਤਬ੍ਬਂ. ਸਬ੍ਬਕਪ੍ਪਿਯੋਤਿ ਯਥਾਵੁਤ੍ਤਸੁਵਣ੍ਣਾਦਿਮਯਾਨਂ ਸੇਨਾਸਨਪਰਿਕ੍ਖਾਰਾਨਂ ਆਮਸਨਗੋਪਨਾਦਿਵਸੇਨ ਪਰਿਭੋਗੋ ਸਬ੍ਬਥਾ ਕਪ੍ਪਿਯੋਤਿ ਅਧਿਪ੍ਪਾਯੋ. ਤੇਨਾਹ ‘‘ਤਸ੍ਮਾ’’ਤਿਆਦਿ. ‘‘ਭਿਕ੍ਖੂਨਂ ਧਮ੍ਮਵਿਨਯਵਣ੍ਣਨਟ੍ਠਾਨੇ’’ਤਿ ਵੁਤ੍ਤਤ੍ਤਾ ਸਙ੍ਘਿਕਮੇਵ ਸੁਵਣ੍ਣਾਦਿਮਯਂ ਸੇਨਾਸਨਂ, ਸੇਨਾਸਨਪਰਿਕ੍ਖਾਰਾ ਚ ਵਟ੍ਟਨ੍ਤਿ, ਨ ਪੁਗ੍ਗਲਿਕਾਨੀਤਿ ਗਹੇਤਬ੍ਬਂ.

ਭਿਨ੍ਦਿਤ੍ਵਾਤਿ ਪਠਮਮੇਵ ਅਨਾਮਸਿਤ੍ਵਾ ਪਾਸਾਣਾਦਿਨਾ ਕਿਞ੍ਚਿਮਤ੍ਤਂ ਭੇਦਂ ਕਤ੍ਵਾ ਪਚ੍ਛਾ ਕਪ੍ਪਿਯਭਣ੍ਡਤ੍ਥਾਯ ਅਧਿਟ੍ਠਹਿਤ੍ਵਾ ਹਤ੍ਥੇਨ ਗਹੇਤੁਂ ਵਟ੍ਟਤਿ. ਤੇਨਾਹ ‘‘ਕਪ੍ਪਿਯਭਣ੍ਡਂ ਕਰਿਸ੍ਸਾਮੀਤਿ ਸਬ੍ਬਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ. ਏਤ੍ਥਾਪਿ ਕਿਞ੍ਚਿ ਭਿਨ੍ਦਿਤ੍ਵਾ, ਵਿਯੋਜੇਤ੍ਵਾ ਵਾ ਆਮਸਿਤਬ੍ਬ.

ਫਲਕਜਾਲਿਕਾਦੀਨੀਤਿ ਏਤ੍ਥ ਸਰਪਰਿਤ੍ਤਾਣਾਯ ਹਤ੍ਥੇਨ ਗਹੇਤਬ੍ਬਂ ਕਿਟਿਕਾਫਲਕਂ ਅਕ੍ਖਿਰਕ੍ਖਣਤ੍ਥਾਯ ਅਯਲੋਹਾਦੀਹਿ ਜਾਲਾਕਾਰੇਨ ਕਤ੍ਵਾ ਸੀਸਾਦੀਸੁ ਪਟਿਮੁਞ੍ਚਿਤਬ੍ਬਂ ਜਾਲਿਕਂ ਨਾਮ. ਆਦਿ-ਸਦ੍ਦੇਨ ਕਵਚਾਦਿਂ ਸਙ੍ਗਣ੍ਹਾਤਿ. ਅਨਾਮਾਸਾਨੀਤਿ ਮਚ੍ਛਜਾਲਾਦਿਪਰੂਪਰੋਧਕਂ ਸਨ੍ਧਾਯ ਵੁਤ੍ਤਂ, ਨ ਸਰਪਰਿਤ੍ਤਾਣਂ ਤਸ੍ਸ ਆਵੁਧਭਣ੍ਡਤ੍ਤਾਭਾਵਾ. ਤੇਨੇਵ ਵਕ੍ਖਤਿ ‘‘ਪਰੂਪਰੋਧਨਿਵਾਰਣਂ ਹੀ’’ਤਿਆਦਿ. ਆਸਨਸ੍ਸਾਤਿ ਚੇਤਿਯਸ੍ਸ ਸਮਨ੍ਤਾ ਕਤਪਰਿਭਣ੍ਡਸ੍ਸ. ਬਨ੍ਧਿਸ੍ਸਾਮੀਤਿ ਕਾਕਾਦੀਹਿ ਅਦੂਸਨਤ੍ਥਾਯ ਬਨ੍ਧਿਸ੍ਸਾਮਿ.

‘‘ਭੇਰਿਸਙ੍ਘਾਟੋਤਿ ਸਙ੍ਘਟਿਤਚਮ੍ਮਭੇਰੀ. ਵੀਣਾਸਙ੍ਘਾਟੋਤਿ ਸਙ੍ਘਟਿਤਚਮ੍ਮਵੀਣਾ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੨੮੧) ਵੁਤ੍ਤਂ. ‘‘ਚਮ੍ਮਵਿਨਦ੍ਧਾਨਿ ਵੀਣਾਭੇਰਿਆਦੀਨੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਵਚਨਤੋ ਵਿਸੇਸਾਭਾਵਾ, ‘‘ਕੁਰੁਨ੍ਦਿਯਂ ਪਨਾ’’ਤਿਆਦਿਨਾ ਤਤੋ ਵਿਸੇਸਸ੍ਸ ਵਤ੍ਤੁਮਾਰਦ੍ਧਤ੍ਤਾ ਚ ਭੇਰਿਆਦੀਨਂ ਵਿਨਦ੍ਧਨੋਪਕਰਣਸਮੂਹੋ ਭੇਰਿਵੀਣਾਸਙ੍ਘਾਟੋਤਿ ਵੇਦਿਤਬ੍ਬਂ ਸਙ੍ਘਟਿਤਬ੍ਬੋਤਿ ਸਙ੍ਘਾਟੋਤਿ ਕਤ੍ਵਾ. ਤੁਚ੍ਛਪੋਕ੍ਖਰਨ੍ਤਿ ਅਵਿਨਦ੍ਧਚਮ੍ਮਭੇਰਿਵੀਣਾਨਂ ਪੋਕ੍ਖਰਂ. ਆਰੋਪਿਤਚਮ੍ਮਨ੍ਤਿ ਪੁਬ੍ਬੇ ਆਰੋਪਿਤਂ ਹੁਤ੍ਵਾ ਪਚ੍ਛਾ ਤਤੋ ਅਪਨੇਤ੍ਵਾ ਵਿਸੁਂ ਠਪਿਤਮੁਖਚਮ੍ਮਮਤ੍ਤਂ, ਨ ਸੇਸੋਪਕਰਣਸਹਿਤਂ. ਸਹਿਤਂ ਪਨ ਸਙ੍ਘਾਟੋਤਿ ਅਯਂ ਵਿਸੇਸੋ. ਓਨਹਿਤੁਨ੍ਤਿ ਭੇਰਿਪੋਕ੍ਖਰਾਦੀਨਿ ਚਮ੍ਮਂ ਆਰੋਪੇਤ੍ਵਾ ਚਮ੍ਮਵਟ੍ਟਿਆਦੀਹਿ ਸਬ੍ਬੇਹਿ ਉਪਕਰਣੇਹਿ ਵਿਨਨ੍ਧਿਤੁਂ.

ਪਾਲ਼ਿਯਂ ਪਣ੍ਡਕਸ੍ਸਾਤਿ ਪਣ੍ਡਕੇਨ. ਪਾਰਾਜਿਕਪ੍ਪਹੋਨਕਕਾਲੇਤਿ ਅਕੁਥਿਤਕਾਲੇ. ਕਾਯਸਂਸਗ੍ਗਰਾਗਾਦਿਭਾਵੇ ਸਬ੍ਬਾਵਤ੍ਥਾਯਪਿ ਇਤ੍ਥਿਯਾ ਸਣ੍ਠਾਨੇ ਪਞ੍ਞਾਯਮਾਨੇ ਅਨਾਮਾਸਦੁਕ੍ਕਟਂ ਨ ਵਿਗਚ੍ਛਤੀਤਿ ਦਟ੍ਠਬ੍ਬਂ. ਸਙ੍ਕਮਾਦੀਨਂ ਠਾਨਾਚਾਵਨਵਸੇਨ ਅਚਾਲੇਤਬ੍ਬਤਾਯ ਨ ਕਾਯਪ੍ਪਟਿਬਦ੍ਧਵੋਹਾਰੋਤਿ ਦੁਕ੍ਕਟਂ ਵੁਤ੍ਤਂ.

੨੮੨. ਏਕਪਦਿਕਸਙ੍ਕਮੋਤਿ ਤਨੁਕਸੇਤੁ. ‘‘ਆਵਿਞ੍ਛਨ੍ਤੋ’’ਤਿ ਵੁਤ੍ਤਤ੍ਤਾ ਚਾਲੇਤੁਂ ਯੁਤ੍ਤਾਯ ਏਵ ਰਜ੍ਜੁਯਾ ਥੁਲ੍ਲਚ੍ਚਯਂ, ਨ ਇਤਰਾਯ ਭਿਤ੍ਤਿਥਮ੍ਭਾਦਿਗਤਿਕਤ੍ਤਾਤਿ ਆਹ ‘‘ਯਾ ਮਹਾਰਜ੍ਜੁ ਹੋਤੀ’’ਤਿਆਦਿ. ਤੇਨ ਚਾਲੇਤੁਂ ਯੁਤ੍ਤੇ ਤਨੁਕਰਜ੍ਜੁਦਣ੍ਡਕੇ ਅਚਾਲੇਤ੍ਵਾ ਫੁਸਨ੍ਤਸ੍ਸਾਪਿ ਥੁਲ੍ਲਚ੍ਚਯਮੇਵਾਤਿ ਦੀਪਿਤਨ੍ਤਿ ਵੇਦਿਤਬ੍ਬਂ. ਪਟਿਚ੍ਛਾਦੇਤਬ੍ਬਾਤਿ ਛਾਦਨਾਦਿਵਸੇਨ ਗੂਹਿਤਬ੍ਬਾ. ਮਨੁਸ੍ਸਿਤ੍ਥੀ, ਮਨੁਸ੍ਸਿਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਵਾਯਾਮੋ, ਤੇਨ ਹਤ੍ਥਾਦੀਸੁ ਫੁਸਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.