੪. ਚਤੁਤ੍ਥਪਾਰਾਜਿਕਂ

ਵਗ੍ਗੁਮੁਦਾਤੀਰਿਯਭਿਕ੍ਖੁਵਤ੍ਥੁਵਣ੍ਣਨਾ

੧੯੩. ਅਧਿਟ੍ਠੇਮਾਤਿ ਸਂਵਿਦਹਾਮ. ਇਰਿਯਾਪਥਂ ਸਣ੍ਠਪੇਤ੍ਵਾਤਿ ਪਧਾਨਾਨੁਰੂਪਂ ਕਤ੍ਵਾ. ਅਨਾਗਤਸਮ੍ਬਨ੍ਧੇ ਪਨ ਅਸਤੀਤਿ ਭਾਸਿਤੋ ਭਵਿਸ੍ਸਤੀਤਿ ਪਾਠਸੇਸਂ ਕਤ੍ਵਾ ਅਨਾਗਤਸਮ੍ਬਨ੍ਧੇ ਅਸਤਿ. ਭਾਸਿਤੋਤਿ ਅਤੀਤਵਚਨਂ ਕਥਂ ਅਨਾਗਤਵਚਨੇਨ ਸਮ੍ਬਨ੍ਧਮੁਪਗਚ੍ਛਤੀਤਿ ਆਹ ਲਕ੍ਖਣਂ ਪਨਾਤਿਆਦਿ. ਈਦਿਸੇ ਹਿ ਠਾਨੇ ਧਾਤੁਸਮ੍ਬਨ੍ਧੇ ਪਚ੍ਚਯਾਤਿ ਇਮਿਨਾ ਲਕ੍ਖਣੇਨ ਧਾਤ੍ਵਤ੍ਥਸਮ੍ਬਨ੍ਧੇ ਸਤਿ ਅਯਥਾਕਾਲਵਿਹਿਤਾਪਿ ਪਚ੍ਚਯਾ ਸਾਧਵੋ ਭਵਨ੍ਤੀਤਿ ਸਦ੍ਦਸਤ੍ਥਵਿਦੂ ਵਦਨ੍ਤਿ.

੧੯੪. ਵਣ੍ਣਵਾਤਿ ਇਮਿਨਾ ਅਭਿਨਵੁਪ੍ਪਨ੍ਨਵਣ੍ਣਤਾ ਵੁਤ੍ਤਾ. ਪਸਨ੍ਨਮੁਖਵਣ੍ਣਾਤਿ ਇਮਿਨਾ ਮੁਖਵਣ੍ਣਸ੍ਸ ਅਤਿਪਣੀਤਤਾ ਵੁਤ੍ਤਾ. ਵਿਪ੍ਪਸਨ੍ਨਚ੍ਛਵਿਵਣ੍ਣਾਤਿ ਇਮਿਨਾ ਪਕਤਿਸਰੀਰਵਣ੍ਣਸ੍ਸੇਵ ਯਥਾਵੁਤ੍ਤਨਯੇਨ ਵਿਪ੍ਪਸਨ੍ਨਤਾ ਵੁਤ੍ਤਾ. ਯਸ੍ਮਾ ਇਨ੍ਦ੍ਰਿਯਾਨਂ ਉਪਾਦਾਰੂਪਤ੍ਤਾ ਨਿਸ੍ਸਯਵਸੇਨੇਵ ਪੀਣਨਨ੍ਤਿ ਆਹ ‘‘ਅਭਿਨਿਵਿਟ੍ਠੋਕਾਸਸ੍ਸ ਪਰਿਪੁਣ੍ਣਤ੍ਤਾ’’ਤਿ. ਪਞ੍ਚਪ੍ਪਸਾਦਾਨਂ ਵਿਯ ਹਦਯਰੂਪਸ੍ਸਾਪਿ ਪਰਿਪੁਣ੍ਣਤਾ ਵੁਤ੍ਤਾਯੇਵਾਤਿ ਆਹ ‘‘ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨ’’ਨ੍ਤਿ. ਉਦ੍ਦੇਸਂ ਪਰਿਪੁਚ੍ਛਂ ਅਨੁਯੁਞ੍ਜਨ੍ਤਾ ਇਮਂ ਸਰੀਰਸੋਭਂ ਨੇਵ ਪਾਪੁਣਿਂਸੂਤਿ ਸਮ੍ਬਨ੍ਧੋ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਚਤੁਚਕ੍ਕਨ੍ਤਿ ਏਤ੍ਥ ਪਵਤ੍ਤਨਟ੍ਠੇਨ ਇਰਿਯਾਪਥੋਵ ਚਕ੍ਕਨ੍ਤਿ ਵੁਤ੍ਤੋ.

੧੯੫. ਉਪਲਬ੍ਭਨ੍ਤੀਤਿ ਦਿਸ੍ਸਨ੍ਤਿ, ਞਾਯਨ੍ਤੀਤਿ ਅਤ੍ਥੋ. ਪਚਨ੍ਤੋਤਿ ਪੀਲ਼ੇਨ੍ਤੋ, ਗੇਹਾਦੀਨਿ ਵਾ ਸਯਂ ਡਹਨ੍ਤੋ, ਅਞ੍ਞੇਹਿ ਵਾ ਪਾਚੇਨ੍ਤੋ. ਉਦ੍ਧਤੇਤਿ ਉਦ੍ਧਚ੍ਚਪਕਤਿਕੇ. ਉਨ੍ਨਲ਼ੇਤਿ ਉਗ੍ਗਤਨਲ਼ਸਦਿਸੇਨ ਉਗ੍ਗਤਤੁਚ੍ਛਮਾਨੇਨ ਸਹਿਤੇ. ਚਪਲੇਤਿ ਪਤ੍ਤਚੀਵਰਮਣ੍ਡਨਾਦਿਨਾ ਚਾਪਲ੍ਲੇਨ ਯੁਤ੍ਤੇ. ਮੁਖਰੇਤਿ ਖਰਵਚਨੇ. ਪਾਕਤਿਨ੍ਦ੍ਰਿਯੇਤਿ ਅਸਂਵੁਤਤ੍ਤਾ ਗਿਹਿਕਾਲੇ ਵਿਯ ਪਕਤਿਯਂ ਠਿਤਿਨ੍ਦ੍ਰਿਯੇ. ਇਰਿਯਾਪਥਸਣ੍ਠਪਨਾਦੀਨੀਤਿ ਆਦਿ-ਸਦ੍ਦੇਨ ਪਚ੍ਚਯਪਟਿਸੇਵਨਸਾਮਨ੍ਤਜਪ੍ਪਾਨਂ ਗਹਣਂ ਵੇਦਿਤਬ੍ਬਂ. ਪਰਮਸਲ੍ਲੇਖਵੁਤ੍ਤੀਹਿ ਮਹਾਅਰਿਯਵਂਸੇਹਿ ਭਿਕ੍ਖੂਹਿ ਨਿਵੁਤ੍ਥਸੇਨਾਸਨਾਨਿ ਲੋਕਸਮ੍ਮਤਸੇਨਾਸਨਾਨਿ ਨਾਮ. ਪਰਿਪਾਚੇਤੁਨ੍ਤਿ ਵਿਮ੍ਹਾਪਨਵਸੇਨ ਪਰਿਣਾਮੇਤੁਂ. ਭਿਕ੍ਖਾਚਾਰੇ ਅਸਮ੍ਪਜ੍ਜਮਾਨੇਤਿ ਇਦਂ ਜਨਪਦਚਾਰਿਕਂ ਚਰਨ੍ਤੀਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ, ਨ ਪਨ ਪਾਲ਼ਿਂ ਵਾਚੇਨ੍ਤੋਤਿਆਦੀਹਿ, ਤਾਨਿ ਪਨ ਪਦਾਨਿ ਅਤ੍ਤਨੋ ਨਿਰਨ੍ਤਰਵਾਸਟ੍ਠਾਨੇਪਿ ਜਨਪਦੇਸੁਪਿ ਕਤ੍ਤਬ੍ਬਕਿਚ੍ਚਦਸ੍ਸਨਵਸੇਨ ਵੁਤ੍ਤਾਨਿ, ਤਾਨਿ ਚ ਤੇ ਵਤ੍ਤਸੀਸੇਨ ਕਰੋਨ੍ਤਿ, ਨ ਲਾਭਨਿਮਿਤ੍ਤਂ, ਤੇਨਾਹ ਤਨ੍ਤੀਤਿਆਦਿ. ਕਿਚ੍ਛੇਨਾਤਿ ਇਮਸ੍ਸੇਵ ਵੇਵਚਨਂ ਕਸਿਰੇਨਾਤਿ. ਤਦੁਭਯਮ੍ਪਿ ਪਾਰਮੀਪੂਰਣਵਾਯਾਮਂ ਸਨ੍ਧਾਯ ਵੁਤ੍ਤਂ. ਸਾਧਾਰਣਪਰਿਕ੍ਖਾਰਭਾਵੇਨਾਤਿ ਸਙ੍ਘਿਕਪਰਿਕ੍ਖਾਰਭਾਵੇਨ. ਤਥਾਭਾਵਤੋ ਥੇਨੇਤ੍ਵਾਤਿ ਅਵਿਸ੍ਸਜ੍ਜਿਯਅਵੇਭਙ੍ਗਿਯਭਾਵਤੋ ਥੇਨੇਤ੍ਵਾ, ਨ ਠਾਨਾਚਾਵਨਵਸੇਨਾਤਿ ਅਧਿਪ੍ਪਾਯੋ, ਤੇਨਾਹ ‘‘ਕੁਲਦੂਸਕਦੁਕ੍ਕਟਂ ਆਪਜ੍ਜਤੀ’’ਤਿ. ਅਸਨ੍ਤਨ੍ਤਿ ਇਮਸ੍ਸ ਅਭੂਤਨ੍ਤਿ ਇਦਂ ਕਾਰਣਵਚਨਂ, ਅਨੁਪ੍ਪਨ੍ਨਤ੍ਤਾ ਅਵਿਜ੍ਜਮਾਨਨ੍ਤਿ ਅਤ੍ਥੋ. ਕਿਤਵਸ੍ਸੇਵਾਤਿ ਕਿਤਵਸ੍ਸ ਸਕੁਣਗਹਣਮਿਵ. ਕੇਰਾਟਿਕਸ੍ਸਾਤਿ ਸਠਸ੍ਸ. ਸਮਣੋਤਿ ਗੋਤ੍ਤਮਤ੍ਤਂ ਅਨੁਭੋਨ੍ਤਿ ਧਾਰੇਨ੍ਤੀਤਿ ਗੋਤ੍ਰਭੁਨੋ, ਨਾਮਮਤ੍ਤਸਮਣਾਤਿ ਅਤ੍ਥੋ. ਦੁਜ੍ਜਾਨਪਰਿਚ੍ਛੇਦਨ੍ਤਿ ਅਨਨ੍ਤਦੁਕ੍ਖਤ੍ਤਾ ‘‘ਏਤ੍ਤਕਂ ਦੁਕ੍ਖ’’ਨ੍ਤਿ ਸਙ੍ਖ੍ਯਾਵਸੇਨ ਪਰਿਚ੍ਛਿਨ੍ਦਿਤ੍ਵਾ ਞਾਤੁਂ ਸਬ੍ਬਞ੍ਞੁਤਞ੍ਞਾਣੇਨਾਪਿ ਦੁਕ੍ਕਰਂ, ਨ ਪਨ ਸਰੂਪਵਸੇਨ ਞਾਤੁਂ ਬੁਦ੍ਧਞਾਣਸ੍ਸ ਅਵਿਸਯਭਾਵਾ.

ਅਧਿਮਾਨਵਤ੍ਥੁਵਣ੍ਣਨਾ

੧੯੬. ਅਰਹਤ੍ਤੇਤਿ ਅਗ੍ਗਫਲੇ. ਞਾਣਚਕ੍ਖੁਨਾਤਿ ਪਚ੍ਚਵੇਕ੍ਖਣਞਾਣਸਙ੍ਖਾਤੇਨ ਚਕ੍ਖੁਨਾ, ਅਥ ਵਾ ਫਲਚਿਤ੍ਤਸਮ੍ਪਯੁਤ੍ਤੇਨੇਵ ਞਾਣਚਕ੍ਖੁਨਾ. ਅਤ੍ਤਨਾ ਸਮ੍ਪਯੁਤ੍ਤੇਨਾਪਿ ਹਿ ਞਾਣੇਨ ਅਸਮ੍ਮੋਹਤੋ ਸਯਂ ਦਿਟ੍ਠਂ ਨਾਮ ਹੋਤਿ, ਤਥਾ ਤਸ੍ਮਿਂ ਅਦਿਟ੍ਠੇਤਿ ਅਤ੍ਥੋ. ਸਬ੍ਬੇਸਂ ਕਿਲੇਸਾਨਂ ਪਹਾਯਕਵਸੇਨ ਆਜਾਨਾਤਿ, ਸਮਨ੍ਤਤੋ ਸਬ੍ਬੇਨ ਵਾ ਪਕਾਰੇਨ ਜਾਨਾਤੀਤਿ ‘‘ਅਞ੍ਞਾ’’ਤਿ ਅਗ੍ਗਮਗ੍ਗੋ ਵੁਚ੍ਚਤਿ, ਤਦੁਪਚਾਰੇਨ ਪਨ ਤਪ੍ਫਲਮ੍ਪੀਤਿ ਆਹ ‘‘ਅਞ੍ਞਂ ਬ੍ਯਾਕਰਿਂਸੂਤਿ ਅਰਹਤ੍ਤਂ ਬ੍ਯਾਕਰਿਂਸੂ’’ਤਿ. ਅਨ੍ਤਰਾ ਠਪੇਤੀਤਿ ਸੇਖਭੂਮਿਯਂ ਅਧਿਮਾਨੋ ਠਪੇਤਿ. ਕਿਲੇਸਸਮੁਦਾਚਾਰਂ ਅਪਸ੍ਸਨ੍ਤੋਤਿ ਪੁਰਿਮਮਗ੍ਗਤ੍ਤਯਵਜ੍ਝਾਨਂਯੇਵ ਕਿਲੇਸਾਨਂ ਵਸੇਨ ਵੁਤ੍ਤਂ, ਨ ਭਵਰਾਗਾਦੀਨਂ.

ਸਵਿਭਙ੍ਗਸਿਕ੍ਖਾਪਦਵਣ੍ਣਨਾ

੧੯੭. ਪਕਤਿਮਨੁਸ੍ਸੇਹਿ ਉਤ੍ਤਰਿਤਰਾਨਂ ਬੁਦ੍ਧਾਦਿਉਤ੍ਤਮਪੁਰਿਸਾਨਂ ਅਧਿਗਮਧਮ੍ਮੋ ਉਤ੍ਤਰਿਮਨੁਸ੍ਸਧਮ੍ਮੋਤਿ ਆਹ ਉਤ੍ਤਰਿਮਨੁਸ੍ਸਾਨਨ੍ਤਿਆਦਿ. ਪਾਲ਼ਿਯਂ (ਪਾਰਾ. ੧੯੮) ‘‘ਅਤ੍ਥਿ ਚ ਮੇ ਏਤੇ ਧਮ੍ਮਾ ਮਯੀ’’ਤਿ ਏਤ੍ਥ ਮੇਤਿ ਇਦਂ ਪਦਪੂਰਣਮਤ੍ਤਂ. ਅਧਿਗਨ੍ਤਬ੍ਬਤੋ ਅਧਿਗਮਸਙ੍ਖਾਤਸ੍ਸ ਝਾਨਾਦਿਨੋ ਪੁਚ੍ਛਾ ਅਧਿਗਮਪੁਚ੍ਛਾ, ਸਾ ਚ ਝਾਨਾਦੀਸੁ ਸਾਮਞ੍ਞਤੋ ਪਵਤ੍ਤਾਤਿ ਇਦਾਨਿ ਤਤ੍ਥ ਪਠਮਜ੍ਝਾਨਂ ਵਾ ਦੁਤਿਯਾਦੀਸੁ ਅਞ੍ਞਤਰਂ ਵਾ ਤਤ੍ਥਾਪਿ ਕਸਿਣਾਦਿਆਰਮ੍ਮਣੇਸੁ ਕਤਰਮਾਰਮ੍ਮਣਂ ਝਾਨਂ ਵਾ ਲੋਕੁਤ੍ਤਰੇਸੁ ਚ ਸੋਤਾਪਤ੍ਤਿਮਗ੍ਗਂ ਵਾ ਸਕਦਾਗਾਮਿਮਗ੍ਗਾਦੀਸੁ ਅਞ੍ਞਤਰਂ ਵਾ ਤਤ੍ਥਾਪਿ ਸੁਞ੍ਞਤਵਿਮੋਕ੍ਖਂ ਵਾ ਅਪ੍ਪਣਿਹਿਤਵਿਮੋਕ੍ਖਾਦੀਸੁ ਅਞ੍ਞਤਰਂ ਵਾਤਿ ਏਵਂ ਪਚ੍ਚੇਕਂ ਭੇਦਨਿਦ੍ਧਾਰਣਵਸੇਨ ਪੁਚ੍ਛਨਾਕਾਰਂ ਦਸ੍ਸੇਤੁਂ ਪਾਲ਼ਿਯਂ (ਪਾਰਾ. ੧੯੮) ‘‘ਪੁਨ ਕਤਮੇਸਂ ਤ੍ਵਂ ਧਮ੍ਮਾਨਂ ਲਾਭੀ’’ਤਿ ਅਯਂ ਪੁਚ੍ਛਾ ਦਸ੍ਸਿਤਾਤਿ ਦਟ੍ਠਬ੍ਬਾ, ਤੇਨਾਹ ਪਠਮਮਗ੍ਗਾਦੀਸੂਤਿਆਦਿ. ਯਾਯ ਅਨੁਕ੍ਕਮਪਟਿਪਤ੍ਤਿਯਾ ਲੋਕੁਤ੍ਤਰੋ ਅਧਿਗਮੋ ਆਗਚ੍ਛਤਿ, ਸਾ ਪੁਬ੍ਬਭਾਗਪਟਿਪਤ੍ਤਿ ਆਗਮਨਪਟਿਪਦਾ. ਨ ਸੁਜ੍ਝਤੀਤਿ ਪੁਚ੍ਛਿਯਮਾਨੋ ਪਟਿਪਤ੍ਤਿਕ੍ਕਮਂ ਉਲ੍ਲਙ੍ਘਿਤ੍ਵਾ ਕਥੇਤਿ. ਅਪਨੇਤਬ੍ਬੋਤਿ ਤਯਾ ਵੁਤ੍ਤਕ੍ਕਮੇਨਾਯਂ ਨ ਸਕ੍ਕਾ ਅਧਿਗਨ੍ਤੁਨ੍ਤਿ ਅਧਿਗਤਮਾਨਤੋ ਅਪਨੇਤਬ੍ਬੋ. ਸਨ੍ਨਿਹਿਤੇਸੁ ਕਪ੍ਪਿਯੇਸੁਪਿ ਚਤੂਸੁ ਪਚ੍ਚਯੇਸੁ ਅਲਗ੍ਗਤ੍ਤਾ ‘‘ਆਕਾਸੇ ਪਾਣਿਸਮੇਨ ਚੇਤਸਾ’’ਤਿ ਵੁਤ੍ਤਂ. ਵੁਤ੍ਤਸਦਿਸਂ ਬ੍ਯਾਕਰਣਂ ਹੋਤੀਤਿ ਯੋਜਨਾ. ਖੀਣਾਸਵਪਟਿਪਤ੍ਤਿਸਦਿਸਾ ਪਟਿਪਦਾ ਹੋਤਿ ਸੁਵਿਕ੍ਖਮ੍ਭਿਤਕਿਲੇਸਤ੍ਤਾ. ਇਦਞ੍ਚ ਅਰਹਤ੍ਤਂ ਪਟਿਜਾਨਨ੍ਤਸ੍ਸ ਵਸੇਨ ਵੁਤ੍ਤਂ, ਤੇਨਾਹ ਖੀਣਾਸਵਸ੍ਸ ਨਾਮਾਤਿਆਦਿ. ਏਵਂ ਸੁਵਿਕ੍ਖਮ੍ਭਿਤਕਿਲੇਸਸ੍ਸ ਵਤ੍ਤਨਸੇਕ੍ਖਧਮ੍ਮਪਟਿਜਾਨਨਂ ਇਮਿਨਾ ਭਯੁਪ੍ਪਾਦਨੇਨ, ਅਮ੍ਬਿਲਾਦਿਦਸ੍ਸਨੇ ਖੇਲ਼ੁਪ੍ਪਾਦਾਦਿਨਾ ਚ ਨ ਸਕ੍ਕਾ ਵੀਮਂਸਿਤੁਂ, ਤਸ੍ਮਾ ਤਸ੍ਸ ਵਚਨੇਨੇਵ ਤਂ ਸਦ੍ਧਾਤਬ੍ਬਂ. ਅਯਂ ਭਿਕ੍ਖੁ ਸਮ੍ਪਨ੍ਨਬ੍ਯਾਕਰਣੋਤਿ ਇਦਂ ਨ ਕੇਵਲਂ ਅਭਾਯਨਕਮੇਵ ਸਨ੍ਧਾਯ ਵੁਤ੍ਤਂ ਏਕਚ੍ਚਸ੍ਸ ਸੂਰਜਾਤਿਕਸ੍ਸ ਪੁਥੁਜ੍ਜਨਸ੍ਸਾਪਿ ਅਭਾਯਨਤੋ, ਰਜ੍ਜਨੀਯਾਰਮ੍ਮਣਾਨਂ ਬਦਰਸਾਲ਼ਵਾਦਿਅਮ੍ਬਿਲਮਦ੍ਦਨਾਦੀਨਂ ਉਪਨਯਨੇਪਿ ਖੇਲ਼ੁਪ੍ਪਾਦਾਦਿਤਣ੍ਹਾਪਵਤ੍ਤਰਹਿਤਂ ਸਬ੍ਬਥਾ ਸੁਸੋਧਿਤਮੇਵ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ.

ਅਸਨ੍ਤਗੁਣਸਮ੍ਭਾਵਨਲਕ੍ਖਣਾ ਪਾਪਿਚ੍ਛਾਤਿ ਆਹ ਯਾ ਸਾ ਇਧੇਕਚ੍ਚੋਤਿਆਦਿ. ਆਦਿ-ਸਦ੍ਦੇਨ ਅਸ੍ਸਦ੍ਧੋਤਿਆਦਿਪਾਠਂ ਸਙ੍ਗਣ੍ਹਾਤਿ. ਸਾਮਞ੍ਞਂ ਦੁਪ੍ਪਰਾਮਟ੍ਠਨ੍ਤਿ ਸਮਣਧਮ੍ਮਸਙ੍ਖਾਤਂ ਸਾਮਞ੍ਞਂ ਖਣ੍ਡਸੀਲਾਦਿਤਾਯ ਦੁਪ੍ਪਰਾਮਟ੍ਠਂ ਦੁਟ੍ਠੁ ਗਹਿਤਂ ਨਿਰਯਾਯ ਨਿਰਯਦੁਕ੍ਖਾਯ ਤਂ ਪੁਗ੍ਗਲਂ ਤਤ੍ਥ ਨਿਰਯੇ ਉਪਕਡ੍ਢਤਿ ਨਿਬ੍ਬਤ੍ਤਾਪੇਤੀਤਿ ਅਤ੍ਥੋ. ਸਿਥਿਲੋਤਿ ਓਲੀਯਿਤ੍ਵਾ ਕਰਣੇਨ ਸਿਥਿਲਗਾਹੇਨ ਕਤੋ, ਸਥੇਨ ਵਾ ਸਾਠੇਯ੍ਯੇਨ ਆਦਿਣ੍ਣੋ ਸਿਥਿਲੋ. ਪਰਿਬ੍ਬਜੋਤਿ ਸਮਣਭਾਵੋ. ਭਿਯ੍ਯੋਤਿ ਪੁਬ੍ਬੇ ਵਿਜ੍ਜਮਾਨਾਨਂ ਰਾਗਰਜਾਦੀਨਂ ਉਪਰਿ ਅਪਰਮ੍ਪਿ ਰਜਂ ਆਕਿਰਤੀਤਿ ਅਤ੍ਥੋ. ਭਿਕ੍ਖੁਭਾਵੋਤਿ ਅਧਮ੍ਮਿਕਪਟਿਞ੍ਞਾਮਤ੍ਤਸਿਦ੍ਧੋ ਭਿਕ੍ਖੁਭਾਵੋ. ਅਜਾਨਮੇਵਾਤਿ ਏਤ੍ਥ ਏਵ-ਸਦ੍ਦੋ ਅਵਧਾਰਣੇ ਅਜਾਨਨ੍ਤੋ ਏਵਾਤਿ, ‘‘ਅਜਾਨਮੇਵ’’ਨ੍ਤਿਪਿ ਪਾਠੋ, ਤਤ੍ਥ ਪਨ ਏਵਂ ਜਾਨਾਮਿ ਏਵਂ ਪਸ੍ਸਾਮੀਤਿ ਯੋਜੇਤਬ੍ਬਂ.

ਪਦਭਾਜਨੀਯਵਣ੍ਣਨਾ

੧੯੯. ਏਵਨ੍ਤਿ ਚ ਪਠਮਜ੍ਝਾਨਾਦਿਪਰਾਮਸਨਂ ਪਠਮਜ੍ਝਾਨਂ ਜਾਨਾਮਿ ਦੁਤਿਯਾਦਿਝਾਨਨ੍ਤਿ. ਅਸੁਭਜ੍ਝਾਨਾਦੀਨੀਤਿ ਆਦਿ-ਸਦ੍ਦੇਨ ਕਾਯਗਤਾਸਤਿਜ੍ਝਾਨਂ ਕਸਿਣਜ੍ਝਾਨਂ ਕਸਿਣਮੂਲਕਾਨਿ ਆਰੁਪ੍ਪਜ੍ਝਾਨਾਨਿ ਚ ਸਙ੍ਗਣ੍ਹਾਤਿ. ਵਿਮੋਕ੍ਖੋਤਿ ਚਤੁਬ੍ਬਿਧੋ ਮਗ੍ਗੋ, ਤਸ੍ਸ ਸਗੁਣਤੋ ਸੁਞ੍ਞਤਾਦਿਨਾਮਂ ਦਸ੍ਸੇਨ੍ਤੋ ਆਹ ਸੋ ਪਨਾਯਨ੍ਤਿਆਦਿ. ਮਗ੍ਗੋ ਹਿ ਨਾਮ ਪਞ੍ਚਹਿ ਕਾਰਣੇਹਿ ਨਾਮਂ ਲਭਤਿ ਸਰਸੇਨ ਵਾ ਪਚ੍ਚਨੀਕੇਨ ਵਾ ਸਗੁਣੇਨ ਵਾ ਆਰਮ੍ਮਣੇਨ ਵਾ ਆਗਮਨੇਨ ਵਾ. ਸਚੇ ਹਿ ਸਙ੍ਖਾਰੁਪੇਕ੍ਖਾ ਅਨਿਚ੍ਚਤੋ ਸਙ੍ਖਾਰੇ ਸਮ੍ਮਸਿਤ੍ਵਾ ਵੁਟ੍ਠਾਤਿ, ਮਗ੍ਗੋ ਅਨਿਮਿਤ੍ਤਵਿਮੋਕ੍ਖੇਨ ਵਿਮੁਚ੍ਚਤਿ. ਸਚੇ ਦੁਕ੍ਖਤੋ ਸਮ੍ਮਸਿਤ੍ਵਾ ਵੁਟ੍ਠਾਤਿ, ਅਪ੍ਪਣਿਹਿਤਵਿਮੋਕ੍ਖੇਨ ਵਿਮੁਚ੍ਚਤਿ. ਸਚੇ ਅਨਤ੍ਤਤੋ ਸਮ੍ਮਸਿਤ੍ਵਾ ਵੁਟ੍ਠਾਤਿ, ਸੁਞ੍ਞਤਵਿਮੋਕ੍ਖੇਨ ਵਿਮੁਚ੍ਚਤਿ, ਇਦਂ ਸਰਸਤੋ ਨਾਮਂ ਨਾਮ. ਯਸ੍ਮਾ ਪਨੇਸ ਸਙ੍ਖਾਰੇਸੁ ਅਨਿਚ੍ਚਾਨੁਪਸ੍ਸਨਾਯ ਨਿਚ੍ਚਨਿਮਿਤ੍ਤਂ ਪਜਹਨ੍ਤੋ ਆਗਤੋ, ਤਸ੍ਮਾ ਅਨਿਮਿਤ੍ਤੋ. ਦੁਕ੍ਖਾਨੁਪਸ੍ਸਨਾਯ ਸੁਖਸਞ੍ਞਂ ਪਣਿਧਿਂ ਪਤ੍ਥਨਂ ਪਹਾਯ ਆਗਤਤ੍ਤਾ ਅਪ੍ਪਣਿਹਿਤੋ. ਅਨਤ੍ਤਾਨੁਪਸ੍ਸਨਾਯ ਅਤ੍ਤਸਞ੍ਞਂ ਪਹਾਯ ਅਤ੍ਤਸੁਞ੍ਞਤਾਦਸ੍ਸਨਵਸੇਨ ਸੁਞ੍ਞਤਾ ਹੋਤਿ, ਇਦਂ ਪਚ੍ਚਨੀਕਤੋ ਨਾਮਂ ਨਾਮ. ਰਾਗਾਦੀਹਿ ਪਨੇਸ ਸੁਞ੍ਞਤਤ੍ਤਾ ਸੁਞ੍ਞਤੋ, ਰੂਪਨਿਮਿਤ੍ਤਾਦੀਨਂ, ਰਾਗਨਿਮਿਤ੍ਤਾਦੀਨਂ ਏਵ ਵਾ ਅਭਾਵੇਨ ਅਨਿਮਿਤ੍ਤੋ, ਰਾਗਪਣਿਧਿਆਦੀਨਂ ਅਭਾਵਤੋ ਅਪ੍ਪਣਿਹਿਤੋਤਿ ਵੁਚ੍ਚਤਿ, ਇਦਂ ਅਸ੍ਸ ਸਗੁਣਤੋ ਨਾਮਂ. ਰਾਗਾਦਿਸੁਞ੍ਞਂ ਅਨਿਮਿਤ੍ਤਂ ਅਪ੍ਪਣਿਹਿਤਞ੍ਚ ਨਿਬ੍ਬਾਨਂ ਆਰਮ੍ਮਣਂ ਕਰੋਤੀਤਿ ਸੁਞ੍ਞਤੋ ਅਨਿਮਿਤ੍ਤੋ ਅਪ੍ਪਣਿਹਿਤੋਤਿ ਵੁਚ੍ਚਤਿ, ਇਦਮਸ੍ਸ ਆਰਮ੍ਮਣਤੋ ਨਾਮਂ. ਆਗਮਨਂ ਪਨ ਦੁਵਿਧਂ ਵਿਪਸ੍ਸਨਾਗਮਨਂ ਮਗ੍ਗਾਗਮਨਞ੍ਚ. ਤਤ੍ਥ ਮਗ੍ਗੇ ਵਿਪਸ੍ਸਨਾਗਮਨਮੇਵ, ਫਲੇ ਪਨ ਮਗ੍ਗਾਨਨ੍ਤਰੇ ਮਗ੍ਗਾਗਮਨਂ, ਫਲਸਮਾਪਤ੍ਤਿਯਂ ਵਿਪਸ੍ਸਨਾਗਮਨਮ੍ਪਿ. ਅਨਤ੍ਤਾਨੁਪਸ੍ਸਨਾਵਸੇਨ ਮਗ੍ਗੋ ਸੁਞ੍ਞਤੋ ਅਨਿਚ੍ਚਦੁਕ੍ਖਾਨੁਪਸ੍ਸਨਾਹਿ ਅਨਿਮਿਤ੍ਤੋ ਅਪ੍ਪਣਿਹਿਤੋਤਿ ਏਵਂ ਵਿਪਸ੍ਸਨਾ ਅਤ੍ਤਨੋ ਨਾਮਂ ਮਗ੍ਗਸ੍ਸ ਦੇਤਿ, ਮਗ੍ਗੋ ਫਲਸ੍ਸਾਤਿ ਇਦਂ ਆਗਮਨਤੋ ਨਾਮਂ.

ਸੁਞ੍ਞਤ੍ਤਾਤਿ ਵਿਵਿਤ੍ਤਤ੍ਤਾ. ਰਾਗਾਦਯੋਵ ਪਤਿਟ੍ਠਾਨਟ੍ਠੇਨ ਪਣਿਧੀਤਿ ਆਹ ‘‘ਰਾਗਦੋਸਮੋਹਪਣਿਧੀਨ’’ਨ੍ਤਿ. ਇਮਿਸ੍ਸਾ ਵਿਜ੍ਜਾਯਾਤਿ ਦਿਬ੍ਬਚਕ੍ਖੁਵਿਜ੍ਜਾਯਾਤਿਆਦਿਨਾ ਏਕੇਕਵਿਜ੍ਜਂ ਸਨ੍ਧਾਯ ਵਦਨ੍ਤਿ. ਏਵਂ ਏਕਿਸ੍ਸਾਪਿ ਨਾਮਂ ਅਗ੍ਗਹੇਤ੍ਵਾਪਿ ਤਾ ਏਵ ਸਨ੍ਧਾਯ ‘‘ਵਿਜ੍ਜਾਨਂ ਲਾਭਿਮ੍ਹੀ’’ਤਿ ਭਣਨ੍ਤੋਪਿ ਪਾਰਾਜਿਕੋ ਹੋਤੀਤਿ ਸਙ੍ਖੇਪਟ੍ਠਕਥਾਯਂ ਅਧਿਪ੍ਪਾਯੋ. ਵਤ੍ਥੁਵਿਜ੍ਜਾਦੀਨਿ ਪਨ ਸਨ੍ਧਾਯ ਵਦਨ੍ਤੋ ਨ ਹੋਤਿ. ਏਕੇਕਕੋਟ੍ਠਾਸਵਸੇਨਾਤਿ ਮਹਾਅਟ੍ਠਕਥਾਯਂ ਵੁਤ੍ਤਨਯੇਨ ਲੋਕੁਤ੍ਤਰਵਿਸੇਸਂ ਅਕਤ੍ਵਾ ਕੇਵਲਂ ‘‘ਸਤਿਪਟ੍ਠਾਨਾਨਂ ਲਾਭੀ’’ਤਿ ਏਕੇਕਕੋਟ੍ਠਾਸਵਸੇਨਾਤਿ ਅਧਿਪ੍ਪਾਯੋ. ਤਤ੍ਥਾਤਿ ਤੇਸੁ ਕੋਟ੍ਠਾਸੇਸੁ. ਕਿਲੇਸਾਨਂ ਪਹਾਨਂ ਨਾਮ ਅਭਾਵਮਤ੍ਤਮ੍ਪਿ ਲੋਕੁਤ੍ਤਰਕਿਚ੍ਚਤ੍ਤਾ ਲੋਕੁਤ੍ਤਰਨ੍ਤਿ ਸਮਤ੍ਥੇਤੁਂ ਤਂ ਪਨਾਤਿਆਦਿ ਵੁਤ੍ਤਂ. ਰਾਗਾ ਚਿਤ੍ਤਂ ਵਿਨੀਵਰਣਤਾਤਿ ਰਾਗਤੋ ਚਿਤ੍ਤਸ੍ਸ ਵਿਨੀਵਰਣਤਾ, ਤਤੋ ਰਾਗਤੋ ਵਿਮੁਤ੍ਤਤ੍ਤਾ ਏਵ ਵੀਤਰਾਗਨੀਵਰਣਤਾਤਿ ਅਤ੍ਥੋ, ਯਾ ਚ ਪਞ੍ਚ ਵਿਜ੍ਜਾਤਿ ਯੋਜੇਤਬ੍ਬਂ. ਨ ਆਗਤਾਤਿ ਇਧ ਪਦਭਾਜਨੇ ‘‘ਞਾਣਨ੍ਤਿ ਤਿਸ੍ਸੋ ਵਿਜ੍ਜਾ’’ਤਿ (ਪਾਰਾ. ੧੯੯) ਵੁਤ੍ਤਤ੍ਤਾ ਸੇਸਾ ਪਞ੍ਚ ਵਿਜ੍ਜਾ ਨ ਆਗਤਾਤਿ ਅਤ੍ਥੋ. ਨਿਬ੍ਬਤ੍ਤਿਤਲੋਕੁਤ੍ਤਰਤ੍ਤਾਤਿ ਲੋਕਿਯਧਮ੍ਮਸਾਧਾਰਣਸਙ੍ਖਤਸ੍ਸਾਪਿ ਅਭਾਵਾ ਲੋਕਿਯੇਹਿ ਸਬ੍ਬਥਾ ਅਸਮ੍ਮਿਸ੍ਸਲੋਕੁਤ੍ਤਰਤ੍ਤਾ. ਅਞ੍ਞਨ੍ਤਿ ਸਙ੍ਖੇਪਟ੍ਠਕਥਾਦਿਂ ਵਦਨ੍ਤਿ, ਤਮ੍ਪਿ ਤਤ੍ਥੇਵ ਪਟਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ.

੨੦੦. ਪੁਨ ਆਨੇਤ੍ਵਾ ਪਠਮਜ੍ਝਾਨਾਦੀਹਿ ਨ ਯੋਜਿਤਨ੍ਤਿ ਏਤ੍ਥ ‘‘ਪਠਮਜ੍ਝਾਨੇਨਾਤਿ ਪਾਠੋ’’ਤਿ ਕੇਚਿ ਵਦਨ੍ਤਿ, ਤਂ ਯੁਤ੍ਤਮੇਵ ਆਦਿ-ਸਦ੍ਦੇਨ ਗਹੇਤਬ੍ਬਸ੍ਸ ਝਾਨਸ੍ਸ ਅਭਾਵਾ. ਪਠਮਜ੍ਝਾਨਮੂਲਕਞ੍ਹਿ ਏਕਮੇਵ ਖਣ੍ਡਚਕ੍ਕਂ. ਕਤ੍ਤੁਸਾਧਨੋਪਿ ਭਣਿਤ-ਸਦ੍ਦੋ ਹੋਤੀਤਿ ਆਹ ਅਥ ਵਾਤਿਆਦਿ. ਯੇਨ ਚਿਤ੍ਤੇਨ ਮੁਸਾ ਭਣਤਿ, ਤੇਨੇਵ ਚਿਤ੍ਤੇਨ ਨ ਸਕ੍ਕਾ ‘‘ਮੁਸਾ ਭਣਾਮੀ’’ਤਿ ਜਾਨਿਤੁਂ, ਅਨ੍ਤਰਨ੍ਤਰਾ ਪਨ ਅਞ੍ਞਾਹਿ ਮਨੋਦ੍ਵਾਰਵੀਥੀਹਿ ‘‘ਮੁਸਾ ਭਣਾਮੀ’’ਤਿ ਜਾਨਾਤੀਤਿ ਵੁਤ੍ਤਂ ‘‘ਭਣਨ੍ਤਸ੍ਸ ਹੋਤਿ ਮੁਸਾ ਭਣਾਮੀ’’ਤਿ. ਅਯਮੇਤ੍ਥ ਅਤ੍ਥੋ ਦਸ੍ਸਿਤੋਤਿ ਤੀਹਿ ਅਙ੍ਗੇਹਿ ਸਮਨ੍ਨਾਗਤੋ ਮੁਸਾਵਾਦੋਤਿ ਅਯਮਤ੍ਥੋ ਦਸ੍ਸਿਤੋ. ਦਵਾਤਿ ਸਹਸਾ. ਰਵਾਤਿ ਅਞ੍ਞਂ ਵਤ੍ਤੁਕਾਮਸ੍ਸ ਖਲਿਤ੍ਵਾ ਅਞ੍ਞਭਣਨਂ. ਤਂ ਜਾਨਾਤੀਤਿ ਤਂਞਾਣਂ, ਤਸ੍ਸ ਭਾਵੋ ਤਂਞਾਣਤਾ, ਞਾਣਸ੍ਸ ਵਿਸਯਵਿਸਯੀਭਾਵੇਨ ਅਤ੍ਤਸਂਵੇਦਨਨ੍ਤਿ ਅਤ੍ਥੋ. ਞਾਣਸਮੋਧਾਨਨ੍ਤਿ ਬਹੂਨਂ ਞਾਣਾਨਂ ਏਕਸ੍ਮਿਂ ਖਣੇ ਸਮੋਧਾਨਂ, ਸਹੁਪ੍ਪਤ੍ਤੀਤਿ ਅਤ੍ਥੋ. ਯੇਨ ਚਿਤ੍ਤੇਨ ‘‘ਮੁਸਾ ਭਣਿਸ੍ਸ’’ਨ੍ਤਿ ਜਾਨਾਤੀਤਿ ਇਦਂ ਪੁਬ੍ਬਭਾਗਚੇਤਨਞ੍ਚ ਸਨ੍ਨਿਟ੍ਠਾਨਚੇਤਨਞ੍ਚ ਏਕਤੋ ਕਤ੍ਵਾ ਵੁਤ੍ਤਂ. ਯੇਨ ਚਿਤ੍ਤੇਨ ਪੁਬ੍ਬਭਾਗਚੇਤਨਾਭੂਤੇਨ ਸਨ੍ਨਿਟ੍ਠਾਨਚੇਤਨਾਭੂਤੇਨ ਚ ਵਿਸਂਵਾਦਿਤਬ੍ਬਸਤ੍ਤਸਙ੍ਖਾਰੇ ਜਾਨਾਤਿ, ਯੇਨ ਚਿਤ੍ਤੇਨ ਮੁਸਾ ਭਣਿਸ੍ਸਨ੍ਤਿ ਅਤ੍ਥੋ. ਤੇਨੇਵ…ਪੇ… ਪਰਿਚ੍ਚਜਿਤਬ੍ਬਾਤਿ ਤੇਨੇਵ ਚਿਤ੍ਤੇਨ ‘‘ਏਵਂ ਅਹਂ ਮੁਸਾ ਭਣਾਮੀ’’ਤਿ ਵਾ ‘‘ਭਣਿਤ’’ਨ੍ਤਿ ਵਾ ਤਦੇਵ ਮੁਸਾਵਾਦਚਿਤ੍ਤਮਾਰਮ੍ਮਣਂ ਕਤ੍ਵਾ ਭਿਕ੍ਖੁ ਜਾਨਾਤੀਤਿ ਏਵਂ ਪੁਬ੍ਬਾਪਰਸਨ੍ਨਿਟ੍ਠਾਨਚੇਤਨਾਕ੍ਖਣੇਸੁ ਤੀਸੁ ਏਕੇਨੇਵ ਚਿਤ੍ਤੇਨ ਞਾਣਵਿਸਯਞ੍ਚ ਞਾਣਞ੍ਚਾਤਿ ਉਭਯਮ੍ਪਿ ਏਕਕ੍ਖਣੇ ਪੁਗ੍ਗਲੋ ਜਾਨਾਤੀਤਿ ਅਯਂ ਤਂਞਾਣਤਾ ਪਰਿਚ੍ਚਜਿਤਬ੍ਬਾ ਵਿਸਯਸ੍ਸੇਵ ਤਦਾ ਪਕਾਸਨਤੋਤਿ ਅਧਿਪ੍ਪਾਯੋ, ਤੇਨਾਹ ਨ ਹੀਤਿਆਦਿ. ਯਦਿ ਞਾਣਸ੍ਸ ਅਤ੍ਤਨੋ ਸਰੂਪਂ ਨ ਞਾਯਤਿ, ਕਥਂ ਪਚ੍ਛਿਮਂ ਚਿਤ੍ਤਂ ਜਾਨਾਤੀਤਿ ਆਹ ਪੁਰਿਮਂ ਪੁਰਿਮਨ੍ਤਿਆਦਿ. ਤਤ੍ਥ ਭਣਿਸ੍ਸਾਮੀਤਿਆਦਿਨਾ ਤੀਸੁ ਕਾਲੇਸੁ ਉਪ੍ਪਨ੍ਨਂ ਪੁਰਿਮਪੁਰਿਮਚਿਤ੍ਤਂ ਅਤ੍ਤਾਨਂ ਵਿਸਯਂ ਕਤ੍ਵਾ ਉਪ੍ਪਜ੍ਜਮਾਨਸ੍ਸ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਚਿਤ੍ਤਸ੍ਸ ਤਥਾ ਉਪ੍ਪਤ੍ਤਿਯਾ ਪਚ੍ਚਯੋ ਹੋਤੀਤਿ ਅਤ੍ਥੋ. ਤੇਨਾਤਿ ਯੇਨ ਕਾਰਣੇਨ ਤੀਸੁ ਖਣੇਸੁ ਚਿਤ੍ਤਾਨਿ ਤਦਞ੍ਞੇਹੇਵ ਚਿਤ੍ਤੇਹਿ ਜਾਨਿਤਬ੍ਬਾਨਿ, ਤਾਨਿ ਚ ਪੁਰਿਮਪੁਰਿਮਚਿਤ੍ਤੇਨੇਵ ਅਵਸ੍ਸਂ ਉਪ੍ਪਜ੍ਜਨ੍ਤਿ, ਤੇਨ ਕਾਰਣੇਨਾਤਿ ਅਤ੍ਥੋ. ਤਸ੍ਮਿਂ ਸਤੀਤਿ ਭਣਿਸ੍ਸਾਮੀਤਿ ਪੁਬ੍ਬਭਾਗੇ ਸਤਿ. ਸੇਸਦ੍ਵਯਨ੍ਤਿ ਭਣਾਮਿ, ਭਣਿਤਨ੍ਤਿ ਇਦਂ ਦ੍ਵਯਂ ਨ ਹੇਸ੍ਸਤੀਤਿ ਏਤਂ ਨਤ੍ਥੀਤਿ ਯੋਜਨਾ ਹੋਤਿਯੇਵਾਤਿ ਅਤ੍ਥੋ. ਏਕਂ ਵਿਯ ਪਕਾਸਤੀਤਿ ਭਿਨ੍ਨਕ੍ਖਣਾਨਮ੍ਪਿ ਨਿਰਨ੍ਤਰੁਪ੍ਪਤ੍ਤਿਯਾ ‘‘ਤਦੇਵੇਦ’’ਨ੍ਤਿ ਗਹੇਤਬ੍ਬਤਂ ਸਨ੍ਧਾਯ ਵਦਤਿ.

ਬਲਵਧਮ੍ਮਵਿਨਿਧਾਨਵਸੇਨਾਤਿ ਬਲਵਗਾਹਸ੍ਸ ਵਿਨਿਧਾਨਵਸੇਨ. ਦੁਬ੍ਬਲਦੁਬ੍ਬਲਾਨਨ੍ਤਿ ਦੁਬ੍ਬਲਦੁਬ੍ਬਲਾਨਂ ਗਾਹਾਨਂ. ਸਕਭਾਵਪਰਿਚ੍ਚਜਨਵਸੇਨਾਤਿ ਅਤ੍ਤਨੋ ਸਨ੍ਤਕਭਾਵਸ੍ਸ ਪਰਿਚ੍ਚਜਨਵਸੇਨ.

੨੦੭. ਉਤ੍ਤਾਸਿਤਤ੍ਤਾਤਿ ਭਯਂ ਜਨੇਤ੍ਵਾ ਵਿਯ ਪਲਾਪਿਤਤ੍ਤਾ. ਏਵਂ ਪਲਾਪਿਤੋ ਨ ਪੁਨ ਤਂ ਠਾਨਂ ਆਗਚ੍ਛਤੀਤਿ ਆਹ ‘‘ਪੁਨ ਅਨਲ੍ਲੀਯਨਭਾਵਦਸ੍ਸਨਵਸੇਨਾ’’ਤਿ. ਖੇਟ-ਸਦ੍ਦਂ ਸਦ੍ਦਤ੍ਥਵਿਦੂ ਉਤ੍ਤਾਸਤ੍ਥੇ ਪਠਨ੍ਤੀਤਿ ਆਹ ਸ੍ਵਾਯਮਤ੍ਥੋਤਿਆਦਿ. ਅਣੁ ਏਵ ਅਣੁਸਹਗਤਂ, ਅਣੁਤ੍ਤੇਨ ਵਾ ਯੁਤ੍ਤਨ੍ਤਿ ਅਤ੍ਥੋ.

ਵਤ੍ਤੁਕਾਮਵਾਰਕਥਾਵਣ੍ਣਨਾ

੨੧੫. ਕੇਵਲਞ੍ਹਿਯਨ੍ਤਿ ਕੇਵਲਞ੍ਹਿ ਅਯਂ ਵਾਰੋਤਿ ਅਜ੍ਝਾਹਰਿਤਬ੍ਬਂ. ਤਙ੍ਖਣਞ੍ਞੇਵ ਜਾਨਾਤੀਤਿ ਪਕਤਿਯਾ ਵਚਨਾਨਨ੍ਤਰਂ ਵਿਜਾਨਨਂ ਸਨ੍ਧਾਯ ਵੁਤ੍ਤਂ. ਏਵਂ ਪਨ ਵਚੀਭੇਦਂ ਅਕਤ੍ਵਾ ‘‘ਯੋ ਇਮਮ੍ਹਾ ਆਵਾਸਾ ਪਠਮਂ ਪਕ੍ਕਮਿਸ੍ਸਤਿ, ਨਂ ਮਯਂ ‘ਅਰਹਾ’ਤਿ ਜਾਨਿਸ੍ਸਾਮਾ’’ਤਿ ਏਵਂ ਕਤਸਙ੍ਕੇਤਾ ਵਿਹਾਰਾ ਪਠਮਂ ਪਕ੍ਕਮਨੇਨ ਤਸ੍ਮਿਂ ਖਣੇ ਅਵੀਤਿਵਤ੍ਤੇਪਿ ਨਿਕ੍ਖਨ੍ਤਮਤ੍ਤੇਪਿ ਪਾਰਾਜਿਕਂ ਅਞ੍ਞਤਰੋ ਭਿਕ੍ਖੁ ‘‘ਮਂ ‘ਅਰਹਾ’ਤਿ ਜਾਨਨ੍ਤੂ’’ਤਿ ਤਮ੍ਹਾ ਆਵਾਸਾ ਪਠਮਂ ਪਕ੍ਕਾਮੀਤਿ ਆਗਤਵਤ੍ਥੁਮ੍ਹਿ (ਪਾਰਾ. ੨੨੭) ਵਿਯ. ਵਿਞ੍ਞਤ੍ਤਿਪਥੇਤਿ ਕਾਯਵਚੀਵਿਞ੍ਞਤ੍ਤੀਨਂ ਗਹਣਯੋਗ੍ਗੇ ਪਦੇਸੇ, ਤੇਨ ਵਿਞ੍ਞਤ੍ਤਿਪਥਂ ਅਤਿਕ੍ਕਮਿਤ੍ਵਾ ਠਿਤੋ ਕੋਚਿ ਦਿਬ੍ਬੇਨ ਚਕ੍ਖੁਨਾ ਕਾਯਵਿਕਾਰਂ ਦਿਸ੍ਵਾ ਦਿਬ੍ਬਾਯ ਸੋਤਧਾਤੁਯਾ ਵਚੀਭੇਦਞ੍ਚ ਸੁਤ੍ਵਾ ਜਾਨਾਤਿ, ਨ ਪਾਰਾਜਿਕਨ੍ਤਿ ਦੀਪੇਤਿ. ਪਾਲ਼ਿਯਂ ‘‘ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੨੧੫) ਇਮਸ੍ਮਿਂ ਪਟਿਵਿਜਾਨਨਵਾਰੇ ਯਸ੍ਮਿਂ ਅਕ੍ਖਰੇ ਵਾ ਉਚ੍ਚਾਰਿਤੇ ਕਾਯਪ੍ਪਯੋਗੇ ਵਾ ਕਤੇਯੇਵ ਅਯਂ ਪਠਮਜ੍ਝਾਨਂ ਸਮਾਪਨ੍ਨੋਤਿਆਦਿਅਤ੍ਥਂ ਪਰੋ ਵਿਜਾਨਾਤਿ, ਤਤੋ ਪੁਰਿਮੇਸੁ ਅਕ੍ਖਰੁਚ੍ਚਾਰਣਾਦਿਪ੍ਪਯੋਗੇਸੁ ਥੁਲ੍ਲਚ੍ਚਯਂ ਆਪਜ੍ਜਿਤ੍ਵਾ ਪਚ੍ਛਿਮੇਵ ਪਟਿਵਿਜਾਨਨਪਯੋਗਕ੍ਖਣੇ ਪਾਰਾਜਿਕਂ ਆਪਜ੍ਜਤੀਤਿ ਵੇਦਿਤਬ੍ਬਂ ਥੁਲ੍ਲਚ੍ਚਯਸ੍ਸੇਵੇਤ੍ਥ ਸਾਮਨ੍ਤਤ੍ਤਾ, ਤੇਨੇਵ ਬੁਦ੍ਧਦਤ੍ਤਾਚਰਿਯੇਨ –

‘‘ਦੁਕ੍ਕਟਂ ਪਠਮਸ੍ਸੇਵ, ਸਾਮਨ੍ਤਮਿਤਿ ਵਣ੍ਣਿਤਂ;

ਸੇਸਾਨਂ ਪਨ ਤਿਣ੍ਣਮ੍ਪਿ, ਥੁਲ੍ਲਚ੍ਚਯਮੁਦੀਰਿਤ’’ਨ੍ਤਿ –

ਵੁਤ੍ਤਂ, ਅਯਞ੍ਚਤ੍ਥੋ ‘‘ਨ ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਇਮਿਨਾ ਸੁਤ੍ਤੇਨ ਸਙ੍ਗਹਿਤੋਤਿ ਦਟ੍ਠਬ੍ਬੋ. ਉਗ੍ਗਹਪਰਿਪੁਚ੍ਛਾਦਿਵਸੇਨਾਤਿਆਦਿਨਾ ਝਾਨਸਮਾਧਿਆਦਿਸਦ੍ਦਾਨਮਤ੍ਥੇਸੁ ਪੁਬ੍ਬੇ ਅਕਤਪਰਿਚਯਤ੍ਤਾ ਸੁਤ੍ਵਾ ‘‘ਅਤ੍ਥਂ ਈਦਿਸ’’ਨ੍ਤਿ ਅਜਾਨਿਤ੍ਵਾ ਕੇਵਲਂ ‘‘ਵਿਸਿਟ੍ਠੋ ਕੋਚਿ ਸਮਣਗੁਣੋ ਅਨੇਨ ਲਦ੍ਧੋ’’ਤਿ ਪਰੇਨ ਞਾਤੇਪਿ ਪਾਰਾਜਿਕਮੇਵਾਤਿ ਦਸ੍ਸੇਤਿ.

ਅਨਾਪਤ੍ਤਿਭੇਦਕਥਾਵਣ੍ਣਨਾ

੨੨੦. ਅਨੁਲ੍ਲਪਨਾਧਿਪ੍ਪਾਯਸ੍ਸਾਤਿ ‘‘ਏਵਂ ਵੁਤ੍ਤੇ ਉਤ੍ਤਰਿਮਨੁਸ੍ਸਧਮ੍ਮੋ ਮਯਾ ਪਕਾਸਿਤੋ ਹੋਤੀ’’ਤਿ ਅਮਨਸਿਕਤ੍ਵਾ ‘‘ਨਾਹਂ, ਆਵੁਸੋ, ਮਚ੍ਚੁਨੋ ਭਾਯਾਮੀ’’ਤਿਆਦਿਕਂ ਕਥੇਨ੍ਤਸ੍ਸ. ਏਵਂ ਕਥੇਨ੍ਤੋ ਚ ਵੋਹਾਰਤੋ ਅਞ੍ਞਂ ਬ੍ਯਾਕਰੋਨ੍ਤੋ ਨਾਮ ਹੋਤੀਤਿ ਵੁਤ੍ਤਂ ‘‘ਅਞ੍ਞਂ ਬ੍ਯਾਕਰੋਨ੍ਤਸ੍ਸਾ’’ਤਿ. ਭਾਯਨ੍ਤੋਤਿ ‘‘ਞਤ੍ਵਾ ਗਰਹਨ੍ਤਿ ਨੁ ਖੋ’’ਤਿ ਭਾਯਨ੍ਤੋ.

ਪਦਭਾਜਨੀਯਵਣ੍ਣਨਾਨਯੋ ਨਿਟ੍ਠਿਤੋ.

ਵਿਨੀਤਵਤ੍ਥੁਵਣ੍ਣਨਾ

੨੨੩. ਸੇਕ੍ਖਭੂਮਿਯਨ੍ਤਿ ਇਮਿਨਾ ਝਾਨਭੂਮਿਮ੍ਪਿ ਸਙ੍ਗਣ੍ਹਾਤਿ. ਤਿਣ੍ਣਂ ਵਿਵੇਕਾਨਨ੍ਤਿ ਕਾਯਚਿਤ੍ਤਉਪਧਿਵਿਵੇਕਾਨਂ. ਪਿਣ੍ਡਾਯ ਚਰਣਸ੍ਸ ਭੋਜਨਪਰਿਯੋਸਾਨਤਾਯ ਵੁਤ੍ਤਂ ‘‘ਯਾਵ ਭੋਜਨਪਅਯੋਸਾਨ’’ਨ੍ਤਿ. ਅਨ੍ਤਰਘਰੇ ਭੁਤ੍ਵਾ ਆਗਚ੍ਛਨ੍ਤਸ੍ਸਾਪਿ ਵੁਤ੍ਤਨਯੇਨੇਵ ਸਮ੍ਭਾਵਨਿਚ੍ਛਾਯ ਚੀਵਰਸਣ੍ਠਾਪਨਾਦੀਨਿ ਕਰੋਨ੍ਤਸ੍ਸ ਦੁਕ੍ਕਟਮੇਵ, ਪਾਲ਼ਿਯਂ ਪਨ ਦੁਕ੍ਕਰਾਦਿਵਤ੍ਥੂਸੁ ‘‘ਅਨਾਪਤ੍ਤਿ ਅਨੁਲ੍ਲਪਨਾਧਿਪ੍ਪਾਯਸ੍ਸਾ’’ਤਿ ਇਦਂ ਥੁਲ੍ਲਚ੍ਚਯੇਨਾਪਿ ਅਨਾਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ. ਉਲ੍ਲਪਨਾਧਿਪ੍ਪਾਯਸ੍ਸਾਪਿ ਹਿ ‘‘ਨਾਵੁਸੋ, ਦੁਕ੍ਕਰਂ ਅਞ੍ਞਂ ਬ੍ਯਾਕਾਤੁ’’ਨ੍ਤਿ ਵੁਤ੍ਤੇ ਥੁਲ੍ਲਚ੍ਚਯਮੇਵ ਅਤ੍ਤੁਪਨਾਯਿਕਤ੍ਤਾਭਾਵਤੋਤਿ ਦਟ੍ਠਬ੍ਬਂ.

੨੨੭. ਨ ਦਾਨਾਹਂ ਤਤ੍ਥ ਗਮਿਸ੍ਸਾਮੀਤਿ ਪੁਨ ਤਤ੍ਥ ਵਸਿਤਟ੍ਠਾਨੇ ਨ ਗਮਿਸ੍ਸਾਮਿ, ਏਵਂ ਸਤਿ ਪਠਮਂ ਗਤੋ ਅਯਂ ਪੁਨ ਚ ਨਾਗਤੋ, ਤਸ੍ਮਾ ਅਰਹਾਤਿ ਮਞ੍ਞਿਸ੍ਸਨ੍ਤੀਤਿ ਅਧਿਪ੍ਪਾਯੋ. ਤਂ ਠਾਨਨ੍ਤਿ ਆਵਾਸਂ ਵਾਤਿਆਦਿਨਾ ਪੁਬ੍ਬੇ ਪਰਿਚ੍ਛਿਨ੍ਨਟ੍ਠਾਨਂ. ਪਦਸਾ ਗਮਨਂ ਸਨ੍ਧਾਯ ਕਤਿਕਾਯ ਕਤਤ੍ਤਾ ਯਾਨੇਨਾਤਿਆਦਿ ਵੁਤ੍ਤਂ. ਵਿਜ੍ਜਾਮਯਿਦ੍ਧਿਂ ਸਨ੍ਧਾਯ ‘‘ਇਦ੍ਧਿਯਾ’’ਤਿ ਵੁਤ੍ਤਂ ਉਲ੍ਲਪਨਾਧਿਪ੍ਪਾਯਸ੍ਸ ਅਭਿਞ੍ਞਿਦ੍ਧਿਯਾ ਅਸਮ੍ਭਵਤੋ. ਅਞ੍ਞਮਞ੍ਞਂ ਰਕ੍ਖਨ੍ਤੀਤਿ ਉਲ੍ਲਪਨਾਧਿਪ੍ਪਾਯੇ ਸਤਿਪਿ ਏਕਸ੍ਸਾਪਿ ਪਠਮਗਮਨਾਭਾਵਾ ਰਕ੍ਖਨ੍ਤਿ. ਸਚੇ ਪਨ ਕਤਿਕਂ ਕਤ੍ਵਾ ਨਿਸਿਨ੍ਨੇਸੁ ਏਕਂ ਦ੍ਵੇ ਠਪੇਤ੍ਵਾ ਅਵਸੇਸਾ ਉਲ੍ਲਪਨਾਧਿਪ੍ਪਾਯੇਨ ਏਕਤੋ ਗਚ੍ਛਨ੍ਤਿ, ਗਤਾਨਂ ਸਬ੍ਬੇਸਂ ਪਾਰਾਜਿਕਮੇਵ. ਤੇਸੁ ਯਸ੍ਸ ਉਲ੍ਲਪਨਾਧਿਪ੍ਪਾਯੋ ਨਤ੍ਥਿ, ਤਸ੍ਸ ਅਨਾਪਤ੍ਤਿ. ਏਤਨ੍ਤਿ ਹੇਟ੍ਠਾ ਵੁਤ੍ਤਂ ਸਬ੍ਬਂ ਕਤਿਕਵਤ੍ਤਂ. ਨਾਨਾਵੇਰਜ੍ਜਕਾਤਿ ਨਾਨਾਜਨਪਦਵਾਸਿਨੋ. ਸਙ੍ਘਲਾਭੋਤਿ ਯਥਾਵੁਡ੍ਢਂ ਪਾਪੁਣਨਕਕੋਟ੍ਠਾਸੋ. ਅਯਞ੍ਚ ਪਟਿਕ੍ਖੇਪੋ ਅਵਿਸੇਸੇਤ੍ਵਾ ਕਰਣਂ ਸਨ੍ਧਾਯ ਕਤੋ, ਵਿਸੇਸੇਤ੍ਵਾ ਪਨ ‘‘ਏਤ੍ਤਕੋ ਅਸੁਕਸ੍ਸਾ’’ਤਿ ਪਰਿਚ੍ਛਿਨ੍ਦਿਤ੍ਵਾ ਅਪਲੋਕੇਤ੍ਵਾ ਦਾਤੁਂ ਵਟ੍ਟਤਿ.

੨੨੮. ਧਮ੍ਮਧਾਤੂਤਿ ਸਬ੍ਬਞ੍ਞੁਤਞ੍ਞਾਣਂ, ਧਮ੍ਮਾਨਂ ਸਭਾਵੋ ਵਾ. ਉਪਪਤ੍ਤੀਤਿ ਅਤ੍ਤਭਾਵਂ ਸਨ੍ਧਾਯ ਵਦਤਿ. ਦੁਸ੍ਸਦ੍ਧਾਪਯਾ ਹੋਨ੍ਤੀਤਿ ਪੁਥੁਜ੍ਜਨੇ ਸਨ੍ਧਾਯ ਵੁਤ੍ਤਂ, ਨ ਲਕ੍ਖਣਤ੍ਥੇਰਾਦਿਕੇ ਅਰਿਯਪੁਗ੍ਗਲੇ. ਵਿਤੁਡੇਨ੍ਤੀਤਿ ਵਿਨਿਵਿਜ੍ਝਿਤ੍ਵਾ ਡੇਨ੍ਤਿ ਗਚ੍ਛਨ੍ਤਿ, ਫਾਸੁਲ਼ਨ੍ਤਰਿਕਾਯੋ ਛਿਦ੍ਦਾਵਛਿਦ੍ਦਂ ਕਤ੍ਵਾ ਤਾਹਿ ਗਚ੍ਛਨ੍ਤੀਤਿ ਨਿਸ੍ਸਕ੍ਕਵਸੇਨ ਅਤ੍ਥੋ. ਵਿਤੁਦੇਨ੍ਤੀਤਿ ਪਾਠੇ ਫਾਸੁਲ਼ਨ੍ਤਰਿਕਾਹੀਤਿ ਆਧਾਰਤ੍ਥੇ ਨਿਸ੍ਸਕ੍ਕਵਚਨਂ. ਲੋਹਤੁਣ੍ਡੇਹੀਤਿ ਕਾਲ਼ਲੋਹਮਯੇਹਿ ਤੁਣ੍ਡੇਹਿ. ਅਚ੍ਛਰਿਯਂ ਵਤਾਤਿ ਗਰਹਿਤਬ੍ਬਤਾਯ ਅਚ੍ਛਰਂ ਪਹਰਿਤੁਂ ਯੁਤ੍ਤਰੂਪਂ. ਚਕ੍ਖੁਭੂਤਾਤਿ ਲੋਕਸ੍ਸ ਚਕ੍ਖੁ ਵਿਯ ਭੂਤਾ ਸਞ੍ਜਾਤਾ, ਚਕ੍ਖੁਸਦਿਸਾਤਿਪਿ ਅਤ੍ਥੋ. ਤਸ੍ਸੇਵ ਕਮ੍ਮਸ੍ਸਾਤਿ ਯੇਨ ਗੋਘਾਤਕਕਮ੍ਮੇਨੇਵ ਨਿਰਯੇ ਨਿਬ੍ਬਤ੍ਤੋ, ਤਸ੍ਸੇਵਾਤਿ ਅਤ੍ਥੇ ਗਯ੍ਹਮਾਨੇ ਏਕਾਯ ਚੇਤਨਾਯ ਬਹੁਪਟਿਸਨ੍ਧਿਯੋ ਹੋਨ੍ਤੀਤਿ ਆਪਜ੍ਜਤਿ, ਨ ਚੇਤਂ ਯੁਤ੍ਤਂ ਏਕਸ੍ਸ ਅਮ੍ਬਾਦਿਬੀਜਸ੍ਸ ਅਨੇਕਙ੍ਕੁਰੁਪ੍ਪਤ੍ਤਿ ਵਿਯਾਤਿ ਤਂ ਪਰਿਹਰਨ੍ਤੋ ਆਹ ਤਸ੍ਸ ਨਾਨਾਚੇਤਨਾਹਿ ਆਯੂਹਿਤਸ੍ਸਾਤਿਆਦਿ, ਤੇਨ ਗੋਘਾਤਕਕਮ੍ਮਕ੍ਖਣੇ ਪੁਬ੍ਬਚੇਤਨਾ ਅਪਰਚੇਤਨਾ ਸਨ੍ਨਿਟ੍ਠਾਪਕਚੇਤਨਾਤਿ ਏਕਸ੍ਮਿਮ੍ਪਿ ਪਾਣਾਤਿਪਾਤੇ ਬਹੂ ਚੇਤਨਾ ਹੋਨ੍ਤਿ, ਨਾਨਾਪਾਣਾਤਿਪਾਤੇਸੁ ਵਤ੍ਤਬ੍ਬਮੇਵ ਨਤ੍ਥਿ. ਤਤ੍ਥ ਏਕਾਯ ਚੇਤਨਾਯ ਨਰਕੇ ਪਚਿਤ੍ਵਾ ਤਦਞ੍ਞਚੇਤਨਾਸੁ ਏਕਾਯ ਅਪਰਾਪਰਿਯਚੇਤਨਾਯ ਇਮਸ੍ਮਿਂ ਪੇਤਤ੍ਤਭਾਵੇ ਨਿਬ੍ਬਤ੍ਤੋਤਿ ਦਸ੍ਸੇਤਿ, ਤੇਨਾਹ ‘‘ਅਵਸੇਸਕਮ੍ਮਂ ਵਾ ਕਮ੍ਮਨਿਮਿਤ੍ਤਂ ਵਾ’’ਤਿ. ਏਤ੍ਥ ਚ ਕਮ੍ਮਸਰਿਕ੍ਖਵਿਪਾਕੁਪ੍ਪਤ੍ਤਿਂ ਸਨ੍ਧਾਯ ਕਮ੍ਮਕਮ੍ਮਨਿਮਿਤ੍ਤਾਨਮੇਵ ਗਹਣਂ ਕਤਂ, ਨ ਗਤਿਨਿਮਿਤ੍ਤਸ੍ਸ, ਤੇਨਾਹ ‘‘ਅਟ੍ਠਿਰਾਸਿਯੇਵ ਨਿਮਿਤ੍ਤਂ ਅਹੋਸੀ’’ਤਿ. ਪਾਲ਼ਿਯਂ ਵਿਤਚ੍ਛੇਨ੍ਤੀਤਿ ਤੁਣ੍ਡੇਹਿ ਤਚ੍ਛੇਨ੍ਤੋ ਵਿਯ ਲੁਞ੍ਚਨ੍ਤਿ. ਵਿਰਾਜੇਨ੍ਤੀਤਿ ਵਿਲਿਖਨ੍ਤਿ.

੨੨੯. ਵਲ੍ਲੂਰਵਿਕ੍ਕਯੇਨਾਤਿ ਸੁਕ੍ਖਾਪਿਤਮਂਸਵਿਕ੍ਕਯੇਨ. ਨਿਪ੍ਪਕ੍ਖਚਮ੍ਮੇਤਿ ਵਿਗਤਪਕ੍ਖਲੋਮਚਮ੍ਮੇ. ਏਕਂ ਮਿਗਨ੍ਤਿ ਦੀਪਕਮਿਗਂ. ਕਾਰਣਾਹੀਤਿ ਘਾਤਨਾਹਿ. ਞਤ੍ਵਾਤਿ ਕਮ੍ਮਟ੍ਠਾਨਂ ਞਤ੍ਵਾ.

੨੩੦. ਮਙ੍ਗਨਵਸੇਨ ਉਲਤੀਤਿ ਮਙ੍ਗੁਲਿ, ਵਿਰੂਪਬੀਭਚ੍ਛਭਾਵੇਨ ਪਵਤ੍ਤਤੀਤਿ ਅਤ੍ਥੋ. ਚਿਤ੍ਤਕੇਲ਼ਿਨ੍ਤਿ ਚਿਤ੍ਤਰੁਚਿਯਂ ਅਨਾਚਾਰਕੀਲ਼ਂ.

੨੩੧. ਨਿਸ੍ਸੇਵਾਲਪਣਕਕਦ੍ਦਮੋਤਿ ਤਿਲਬੀਜਕਾਦਿਸੇਵਾਲੇਨ ਨੀਲਮਣ੍ਡੂਕਪਿਟ੍ਠਿਵਣ੍ਣੇਨ ਉਦਕਪਿਟ੍ਠੇ ਉਦਕਂ ਨੀਲਵਣ੍ਣਂ ਕੁਰੁਮਾਨੇਨ ਪਣਕੇਨ ਕਦ੍ਦਮੇਨ ਚ ਵਿਰਹਿਤੋ. ਉਣ੍ਹਭਾਵੇਨ ਤਪਨਤੋ ਤਪਂ ਉਦਕਂ ਅਸ੍ਸਾਤਿ ਤਪੋਦਕਾਤਿ ਵਤ੍ਤਬ੍ਬੇ ਕ-ਕਾਰਲੋਪਂ ਕਤ੍ਵਾ ‘‘ਤਪੋਦਾ’’ਤਿ ਵੁਚ੍ਚਤਿ. ਪੇਤਲੋਕੋਤਿ ਪਕਟ੍ਠੇਨ ਅਕੁਸਲਕਮ੍ਮੇਨ ਸੁਗਤਿਤੋ ਦੁਗ੍ਗਤਿਂ ਇਤਾਨਂ ਗਤਾਨਂ ਲੋਕੋ ਸਮੂਹੋ, ਨਿਵਾਸਟ੍ਠਾਨਂ ਵਾ. ਕਤਹਤ੍ਥਾਤਿ ਧਨੁਸਿਪ੍ਪੇ ਸੁਟ੍ਠੁ ਸਿਕ੍ਖਿਤਹਤ੍ਥਾ, ਅਵਿਰਜ੍ਝਨਲਕ੍ਖਵੇਧਾਤਿ ਅਤ੍ਥੋ. ਸਿਪ੍ਪਦਸ੍ਸਨਵਸੇਨ ਰਾਜਕੁਲਾਦੀਸੁ ਰਾਜਸਮੂਹਂ ਉਪੇਚ੍ਚ ਕਤਂ ਅਸਨਂ ਸਰਕ੍ਖੇਪੋ ਏਤੇਸਨ੍ਤਿ ਕਤੁਪਾਸਨਾ, ਸਬ੍ਬਤ੍ਥ ਦਸ੍ਸਿਤਸਿਪ੍ਪਾਤਿ ਅਤ੍ਥੋ. ਪਭਗ੍ਗੋਤਿ ਪਭਞ੍ਜਿਤੋ, ਪਰਾਜਿਤੋਤਿ ਅਤ੍ਥੋ.

੨੩੨. ਆਨੇਞ੍ਜਸਮਾਧਿਨ੍ਤਿ ਅਰੂਪਸਮਾਪਤ੍ਤਿਯਂ ਨਿਰੁਦ੍ਧੇ ਸਤਿਪਿ ਸਦ੍ਦਕਣ੍ਟਕੇਨ ਉਟ੍ਠਾਨਾਰਹੋ ਰੂਪਾਵਚਰਸਮਾਧਿਯੇਵ ਇਧ ਵਤ੍ਤਬ੍ਬੋਤਿ ਆਹ ਅਨੇਜਂ ਅਚਲਨ੍ਤਿਆਦਿ. ਸਮਾਧਿਪਰਿਪਨ੍ਥਕੇਤਿ ਵਿਤਕ੍ਕਾਦਿਕੇ ਸਨ੍ਧਾਯ ਵਦਤਿ, ਇਦਂ ਪਨ ਪਠਮਬੋਧਿਯਂ ਉਪ੍ਪਨ੍ਨਮ੍ਪਿ ਵਤ੍ਥੁਂ ਅਨਾਚਾਰਮਤ੍ਤਵਸੇਨ ਭਿਕ੍ਖੂਹਿ ਚੋਦਿਤੇਪਿ ਭਗਵਤਾ ‘‘ਅਨਾਪਤ੍ਤਿ, ਭਿਕ੍ਖਵੇ, ਮੋਗ੍ਗਲ੍ਲਾਨਸ੍ਸਾ’’ਤਿ (ਪਾਰਾ. ੨੨੮) ਏਵਂ ਆਯਤਿਂ ਅਤ੍ਤਨਾ ਪਞ੍ਞਪਿਯਮਾਨਪਾਰਾਜਿਕਾਨੁਗੁਣਂ ਤਦਾ ਏਵ ਵਿਨੀਤਨ੍ਤਿ ਧਮ੍ਮਸਙ੍ਗਾਹਕਤ੍ਥੇਰੇਹਿ ਪਚ੍ਛਾ ਪਞ੍ਞਤ੍ਤਸ੍ਸ ਇਮਸ੍ਸ ਸਿਕ੍ਖਾਪਦਸ੍ਸ ਵਿਨੀਤਵਤ੍ਥੁਭਾਵੇਨ ਸਙ੍ਗਹਮਾਰੋਪਿਤਨ੍ਤਿ ਦਟ੍ਠਬ੍ਬਂ. ਸਾਵਕਾਨਂ ਉਪ੍ਪਟਿਪਾਟਿਯਾ ਅਨੁਸ੍ਸਰਣਾਭਾਵਂ ਦਸ੍ਸੇਤੁਂ ‘‘ਨ ਉਪ੍ਪਟਿਪਾਟਿਯਾ’’ਤਿ ਵੁਤ੍ਤਂ. ਦੁਕ੍ਕਰਂ ਕਤਨ੍ਤਿ ਅਨਨ੍ਤਰੇ ਪਞ੍ਚਕਪ੍ਪਸਤਿਕੇ ਕਾਲੇ ਵਿਞ੍ਞਾਣਸਨ੍ਤਤਿਂ ਅਦਿਸ੍ਵਾਪਿ ਅਸਮ੍ਮੁਯ੍ਹਿਤ੍ਵਾ ਪਰਤੋ ਤਤਿਯਤ੍ਤਭਾਵੇ ਦਿਟ੍ਠਚੁਤਿਚਿਤ੍ਤੇਨ ਸਦ੍ਧਿਂ ਵਤ੍ਤਮਾਨਭਵਪਟਿਸਨ੍ਧਿਯਾ ਅਨੁਮਾਨੇਨਾਪਿ ਕਾਰਿਯਕਾਰਣਾਭਾਵਗਹਣਂ ਨਾਮ ਸਾਵਕਾਨਂ ਦੁਕ੍ਕਰਤ੍ਤਾ ਵੁਤ੍ਤਂ. ਪਟਿਵਿਦ੍ਧਾਤਿ ਪਟਿਵਿਦ੍ਧਸਦਿਸਾ. ਯਥਾ ਨਾਮ ਸਤ੍ਤਧਾ ਫਾਲਿਤਸ੍ਸ ਚਾਮਰਵਾਲਲੋਮਸ੍ਸ ਏਕਾਯ ਅਗ੍ਗਕੋਟਿਯਾ ਅਪਰਸ੍ਸ ਵਾਲਲੋਮਂਸੁਨੋ ਕੋਟਿਂ ਦੂਰੇ ਠਤ੍ਵਾ ਵਿਜ੍ਝੇਯ੍ਯ ਆਵੁਨਨ੍ਤੋ ਵਿਯ ਪਟਿਪਾਦੇਯ੍ਯ, ਏਵਮੇਵ ਇਮਿਨਾਪਿ ਦੁਕ੍ਕਰਂ ਕਤਨ੍ਤਿ ਵੁਤ੍ਤਂ ਹੋਤਿ. ਏਤਦਗ੍ਗਨ੍ਤਿ ਏਸੋ ਅਗ੍ਗੋ. ਯਦਿਦਨ੍ਤਿ ਯੋ ਅਯਂ.

ਨਿਗਮਨਵਣ੍ਣਨਾ

੨੩੩. ਇਧਾਤਿ ਭਿਕ੍ਖੁਵਿਭਙ੍ਗੇ. ਉਦ੍ਦਿਟ੍ਠਪਾਰਾਜਿਕਪਰਿਦੀਪਨਨ੍ਤਿ ਸਿਕ੍ਖਾਪਦੇਸੁ ਪਾਤਿਮੋਕ੍ਖੁਦ੍ਦੇਸਵਸੇਨ ਉਦ੍ਦਿਟ੍ਠਪਾਰਾਜਿਕਪਰਿਦੀਪਨਂ, ਨ ਪਨ ਸਬ੍ਬਸ੍ਮਿਂ ਪਾਰਾਜਿਕਵਿਭਙ੍ਗੇ ਆਗਤਆਪਤ੍ਤਿਪਰਿਦੀਪਨਂ ਤਤ੍ਥ ਥੁਲ੍ਲਚ੍ਚਯਾਦੀਨਮ੍ਪਿ ਆਗਤਤ੍ਤਾ ਤੇਨੇਵ ਉਦ੍ਦਿਟ੍ਠ-ਸਦ੍ਦੇਨ ਵੁਤ੍ਤਵਿਭਙ੍ਗਸ੍ਸ ਨਿਦ੍ਦੇਸਤ੍ਤਾ. ਭਿਕ੍ਖੁਨੀਨਂ ਅਸਾਧਾਰਣਾਨਿ ਚਤ੍ਤਾਰੀਤਿ ਉਬ੍ਭਜਾਣੁਮਣ੍ਡਲਿਕਾ (ਪਾਚਿ. ੬੫੮) ਵਜ੍ਜਪ੍ਪਟਿਚ੍ਛਾਦਿਕਾ (ਪਾਚਿ. ੬੬੫) ਉਕ੍ਖਿਤ੍ਤਾਨੁਵਤ੍ਤਿਕਾ (ਪਾਚਿ. ੬੬੯) ਅਟ੍ਠਵਤ੍ਥੁਕਾਤਿ (ਪਾਚਿ. ੬੭੫) ਇਮਾਨਿ ਭਿਕ੍ਖੂਹਿ ਅਸਾਧਾਰਣਾਨਿ ਭਿਕ੍ਖੁਨੀਨਂ ਏਵ ਪਞ੍ਞਤ੍ਤਾਨਿ ਪਾਰਾਜਿਕਾਨੀਤਿ ਅਤ੍ਥੋ. ਵਤ੍ਥੁਵਿਪਨ੍ਨਾਤਿ ਪਬ੍ਬਜ੍ਜੁਪਸਮ੍ਪਦਾਨਂ ਵਤ੍ਥੁਭਾਵੋ ਵਤ੍ਥੁ ਨਾਮ, ਤੇਨ ਵਤ੍ਥੁਮਤ੍ਤੇਨ ਵਿਪਨ੍ਨਾ, ਵਿਪਨ੍ਨਵਤ੍ਥੁਕਾਤਿ ਅਤ੍ਥੋ. ਅਹੇਤੁਕਪਟਿਸਨ੍ਧਿਕਾਤਿ ਮਗ੍ਗਾਨੁਪ੍ਪਤ੍ਤਿਕਾਰਣਮਾਹ. ਕਿਞ੍ਚਾਪਿ ਦੁਹੇਤੁਕਾਨਮ੍ਪਿ ਮਗ੍ਗੋ ਨੁਪ੍ਪਜ੍ਜਤਿ, ਤੇ ਪਨ ਪਬ੍ਬਜ੍ਜੁਪਸਮ੍ਪਦਾਸੁ ਠਤ੍ਵਾ ਆਯਤਿਂ ਮਗ੍ਗਹੇਤੁਂ ਸਮ੍ਪਾਦੇਤੁਂ ਸਕ੍ਕੋਨ੍ਤਿ, ਅਹੇਤੁਕਾ ਪਨ ਪਰਿਸੁਦ੍ਧੇ ਚਤੁਪਾਰਿਸੁਦ੍ਧਿਸੀਲੇ ਠਤ੍ਵਾ ਸਮ੍ਪਾਦੇਤੁਂ ਨ ਸਕ੍ਕੋਨ੍ਤਿ, ਤਸ੍ਮਾ ਤੇ ਤਮ੍ਪਿ ਪਟਿਚ੍ਚ ਵਤ੍ਥੁਵਿਪਨ੍ਨਾਵਾਤਿ ਵੇਦਿਤਬ੍ਬਾ. ਪਾਰਾਜਿਕਾਤਿ ਕਮ੍ਮਵਿਪਤ੍ਤਿਯਾ ਪਟਿਸਨ੍ਧਿਕ੍ਖਣੇਯੇਵ ਪਰਾਜਯਂ ਆਪਨ੍ਨਾ. ਥੇਯ੍ਯਸਂਵਾਸਕਾਦੀਨਂ ਗਿਹਿਭਾਵੇ ਠਤ੍ਵਾ ਵਿਪਸ੍ਸਨਾਯ ਵਾਯਮਨ੍ਤਾਨਮ੍ਪਿ ਤਸ੍ਮਿਂ ਅਤ੍ਤਭਾਵੇ ਮਗ੍ਗੁਪ੍ਪਤ੍ਤਿਅਭਾਵਤੋ ‘‘ਮਗ੍ਗੋ ਪਨ ਵਾਰਿਤੋ’’ਤਿ ਵੁਤ੍ਤਂ. ਦੀਘਤਾਯ ਲਮ੍ਬਮਾਨਂ ਅਙ੍ਗਜਾਤਂ ਲਮ੍ਬਂ ਨਾਮ, ਤਂ ਯਸ੍ਸ ਅਤ੍ਥਿ ਸੋ ਲਮ੍ਬੀ. ਸੋ ਏਤ੍ਤਾਵਤਾ ਨ ਪਾਰਾਜਿਕੋ, ਤਂ ਪਨ ਦੀਘਂ ਅਙ੍ਗਜਾਤਂ ਅਤ੍ਤਨੋ ਮੁਖੇ ਵਾ ਵਚ੍ਚਮਗ੍ਗੇ ਵਾ ਸੇਵਨਾਧਿਪ੍ਪਾਯੇਨ ਪਵੇਸੇਨ੍ਤੋਵ ਪਾਰਾਜਿਕੋ, ਇਧ ਪਨ ਵਚ੍ਚਮਗ੍ਗੇ ਪਵੇਸੇਨ੍ਤੋਵ ਅਧਿਪ੍ਪੇਤੋ ਮੁਦੁਪਿਟ੍ਠਿਕੇਨੇਵ ਮੁਖੇ ਪਵੇਸਨਸ੍ਸ ਵੁਤ੍ਤਤ੍ਤਾ. ਸੋਪਿ ਹਿ ਕਤਪਰਿਕਮ੍ਮਤਾਯ ਮੁਦੁਭੂਤਾਯ ਪਿਟ੍ਠਿਯਾ ਓਨਮਿਤ੍ਵਾ ਅਤ੍ਤਨੋ ਅਙ੍ਗਜਾਤਂ ਮੁਖੇਨ ਗਣ੍ਹਨ੍ਤੋਵ ਪਾਰਾਜਿਕੋ ਹੋਤਿ, ਨ ਕੇਵਲੋ. ਯੋ ਪਨ ਮੁਖੇਨ ਅਤ੍ਤਨੋ ਵਚ੍ਚਮਗ੍ਗਂ ਵਾ ਪਰੇਸਂ ਵਚ੍ਚਮਗ੍ਗਮੁਖਂ ਵਾ ਇਤ੍ਥੀਨਂ ਪਸ੍ਸਾਵਮਗ੍ਗਂ ਵਾ ਗਣ੍ਹਾਤਿ, ਤਸ੍ਸ ਚ ਪੁਰਿਸਨਿਮਿਤ੍ਤੇਨ ਪੁਰਿਸਨਿਮਿਤ੍ਤਂ ਛੁਪਨ੍ਤਸ੍ਸ ਚ ਮਗ੍ਗੇਨ ਮਗ੍ਗਪਟਿਪਾਦਨੇਪਿ ਪਾਰਾਜਿਕਂ ਨ ਹੋਤਿ ਪੁਰਿਸਨਿਮਿਤ੍ਤੇਨ ਤਦਿਤਰਮਗ੍ਗਸਮ੍ਪਟਿਪਾਦਨੇਨੇਵ ਮੇਥੁਨਧਮ੍ਮਵੋਹਾਰਤੋ. ਪਰਸ੍ਸ ਅਙ੍ਗਜਾਤੇ ਅਭਿਨਿਸੀਦਤੀਤਿ ਪਰਸ੍ਸ ਉਤ੍ਤਾਨਂ ਸਯਨ੍ਤਸ੍ਸ ਕਮ੍ਮਨਿਯੇ ਅਙ੍ਗਜਾਤੇ ਅਤ੍ਤਨੋ ਵਚ੍ਚਮਗ੍ਗਂ ਪਵੇਸੇਨ੍ਤੋ ਤਸ੍ਸੂਪਰਿ ਨਿਸੀਦਤਿ, ਇਦਞ੍ਚ ਉਪਲਕ੍ਖਣਮਤ੍ਤਂ ਪਰੇਸਂ ਅਙ੍ਗਜਾਤਂ ਵਚ੍ਚਮਗ੍ਗੇ ਪਵੇਸੇਨ੍ਤੋ ਸਾਦਿਯਨ੍ਤੋਪਿ ਪਾਰਾਜਿਕੋਵ, ਬਲਕ੍ਕਾਰੇਨ ਪਨ ਵਚ੍ਚਮਗ੍ਗੇ ਵਾ ਮੁਖੇ ਵਾ ਪਰੇਨ ਪਵੇਸਿਯਮਾਨੋ ਯਦਿ ਨ ਸਾਦਿਯਤਿ, ਅਨਾਪਤ੍ਤਿਕੋਵ. ਏਤ੍ਥ ਅਸਾਦਿਯਨਂ ਨਾਮ ਦੁਕ੍ਕਰਂ ਵਿਰਜ੍ਜਿਤਬ੍ਬਤੋ. ਏਤ੍ਥ ਚ ਅਨੁਪਸਮ੍ਪਨ੍ਨਭਾਵੇ ਠਤ੍ਵਾ ਮਾਤੁਪਿਤੁਅਰਹਨ੍ਤੇਸੁ ਅਞ੍ਞਤਰਂ ਘਾਤੇਨ੍ਤੋ ਭਿਕ੍ਖੁਨਿਂ ਦੂਸੇਨ੍ਤੋ ਚ ਸਾਮਣੇਰਪਬ੍ਬਜ੍ਜਮ੍ਪਿ ਨ ਲਭਤੀਤਿ ਦਸ੍ਸਨਤ੍ਥਂ ਵਿਸੁਂ ਗਹਿਤਤ੍ਤਾ ਮਾਤੁਘਾਤਕਾਦੀਨਂ ਚਤੁਨ੍ਨਂ ਤਤਿਯਪਠਮਪਾਰਾਜਿਕੇਸੁ ਅਨ੍ਤੋਗਧਤਾ ਵੇਦਿਤਬ੍ਬਾ. ਯਥਾ ਏਤ੍ਥ, ਏਵਂ ਗਿਹਿਭਾਵੇ ਠਤ੍ਵਾ ਲੋਹਿਤੁਪ੍ਪਾਦਂ ਕਰੋਨ੍ਤੋ ਲੋਹਿਤੁਪ੍ਪਾਦਕੋਵਾਤਿ ਗਹੇਤਬ੍ਬਂ. ਏਤੇਨ ਪਰਿਯਾਯੇਨਾਤਿ ਉਭਿਨ੍ਨਂ ਰਾਗਪਰਿਯੁਟ੍ਠਾਨਸਙ੍ਖਾਤੇਨ ਪਰਿਯਾਯੇਨ. ਦੁਤਿਯਵਿਕਪ੍ਪੇ ਕਚ੍ਚਿ ਅਤ੍ਥਾਤਿ ਪਦਚ੍ਛੇਦੋ ਵੇਦਿਤਬ੍ਬੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਚਤੁਤ੍ਥਪਾਰਾਜਿਕਵਣ੍ਣਨਾਨਯੋ ਨਿਟ੍ਠਿਤੋ.

ਨਿਟ੍ਠਿਤੋ ਚ ਪਾਰਾਜਿਕਕਣ੍ਡਵਣ੍ਣਨਾਨਯੋ.