੩. ਤਤਿਯਪਾਰਾਜਿਕਂ
ਤੀਹੀਤਿ ਕਾਯਵਚੀਮਨੋਦ੍ਵਾਰੇਹਿ.
ਪਠਮਪਞ੍ਞਤ੍ਤਿਨਿਦਾਨਵਣ੍ਣਨਾ
੧੬੨. ਯਾ ਅਯਂ ਹੇਟ੍ਠਾ ਤਂ ਪਨੇਤਂ ਬੁਦ੍ਧਕਾਲੇ ਚ ਚਕ੍ਕਵਤ੍ਤਿਕਾਲੇ ਚ ਨਗਰਂ ਹੋਤੀਤਿਆਦਿਨਾ (ਪਾਰਾ. ਅਟ੍ਠ. ੧.੮੪) ਰਾਜਗਹਸ੍ਸ ਬੁਦ੍ਧੁਪ੍ਪਾਦੇਯੇਵ ਵੇਪੁਲ੍ਲਪ੍ਪਤ੍ਤਿ ਵੁਤ੍ਤਾ, ਸਾ ਏਤ੍ਥਾਪਿ ਸਮਾਨਾਤਿ ਦਸ੍ਸੇਤੁਂ ‘‘ਇਦਮ੍ਪਿ ਚ ਨਗਰ’’ਨ੍ਤਿ ਵੁਤ੍ਤਂ, ਤੇਨ ਚ ਨ ਕੇਵਲਂ ਰਾਜਗਹਾਦਯੋ ਏਵਾਤਿ ਦਸ੍ਸੇਤਿ. ਮਹਾਵਨਂ ਨਾਮਾਤਿਆਦਿ ਮਜ੍ਝਿਮਭਾਣਕਸਂਯੁਤ੍ਤਭਾਣਕਾਨਂ ਮਤੇਨ ਵੁਤ੍ਤਂ, ਦੀਘਭਾਣਕਾ ਪਨ ‘‘ਹਿਮਵਨ੍ਤੇਨ ਸਦ੍ਧਿਂ ਏਕਾਬਦ੍ਧਂ ਹੁਤ੍ਵਾ ਠਿਤਂ ਮਹਾਵਨ’’ਨ੍ਤਿ ਵਦਨ੍ਤਿ. ਹਂਸਵਟ੍ਟਕਚ੍ਛਦਨੇਨਾਤਿ ਹਂਸਵਟ੍ਟਕਪਟਿਚ੍ਛਨ੍ਨੇਨ, ਹਂਸਮਣ੍ਡਲਾਕਾਰੇਨਾਤਿ ਅਤ੍ਥੋ. ਕਾਯਵਿਚ੍ਛਨ੍ਦਨਿਯਕਥਨ੍ਤਿ ਕਰਜਕਾਯੇ ਵਿਰਾਗੁਪ੍ਪਾਦਨਕਥਂ. ਛਨ੍ਦੋਤਿ ਦੁਬ੍ਬਲਰਾਗੋ. ਰਾਗੋਤਿ ਬਲਵਰਾਗੋ. ‘‘ਕੇਸਲੋਮਾਦਿ’’ਨ੍ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਭਾਗੇਨ ਦਸ੍ਸੇਤੁਂ ਯੇਪਿ ਹੀਤਿਆਦਿ ਵੁਤ੍ਤਂ. ਪਞ੍ਚਪਞ੍ਚਪ੍ਪਭੇਦੇਨਾਤਿ ਏਤ੍ਥ ਪਞ੍ਚ ਪਞ੍ਚ ਪਭੇਦਾ ਏਤਸ੍ਸ ਪਰਿਯਾਯਸ੍ਸਾਤਿ ਪਞ੍ਚਪਞ੍ਚਪ੍ਪਭੇਦੋ, ਤੇਨ ਪਞ੍ਚਪਞ੍ਚਪ੍ਪਭੇਦੇਨਾਤਿ ਏਵਂ ਬਾਹਿਰਤ੍ਥਸਮਾਸਵਸੇਨ ਪਰਿਯਾਯਵਿਸੇਸਨਤਾ ਦਟ੍ਠਬ੍ਬਾ.
ਅਸੁਭਾਯਾਤਿ ਅਸੁਭਮਾਤਿਕਾਯ. ਵਣ੍ਣੇਤਬ੍ਬਮਾਤਿਕਞ੍ਹਿ ਅਪੇਕ੍ਖਿਤ੍ਵਾ ਇਤ੍ਥਿਲਿਙ੍ਗੇ ਸਾਮਿਵਚਨਂ, ਤੇਨਾਹ ਮਾਤਿਕਂ ਨਿਕ੍ਖਿਪਿਤ੍ਵਾਤਿਆਦਿ. ਤਂ ਵਿਭਜਨ੍ਤੋਤਿ ਮਾਤਿਕਂ ਵਿਭਜਨ੍ਤੋ. ਫਾਤਿਕਮ੍ਮਨ੍ਤਿ ਨਿਪ੍ਫਤ੍ਤਿਕਰਣਂ. ਪਞ੍ਚਙ੍ਗਵਿਪ੍ਪਹੀਨਨ੍ਤਿ ਕਾਮਚ੍ਛਨ੍ਦਾਦਿਪਞ੍ਚਨੀਵਰਣਙ੍ਗਵਿਗਮੇਨ ਪਞ੍ਚਙ੍ਗਵਿਪ੍ਪਹੀਨਤਾ, ਅਪ੍ਪਨਾਪ੍ਪਤ੍ਤਵਿਤਕ੍ਕਾਦਿਜ੍ਝਾਨਙ੍ਗਾਨਂ ਉਪ੍ਪਤ੍ਤਿਵਸੇਨ ਪਞ੍ਚਙ੍ਗਸਮਨ੍ਨਾਗਤਤਾ ਚ ਵੇਦਿਤਬ੍ਬਾ. ਤਿਵਿਧਕਲ੍ਯਾਣਂ ਦਸਲਕ੍ਖਣਸਮ੍ਪਨ੍ਨਨ੍ਤਿ ਏਤ੍ਥ ਪਨ ਝਾਨਸ੍ਸ ਆਦਿਮਜ੍ਝਪਰਿਯੋਸਾਨਾਨਂ ਵਸੇਨ ਤਿਵਿਧਕਲ੍ਯਾਣਤਾ, ਤੇਸਂਯੇਵ ਆਦਿਮਜ੍ਝਪਰਿਯੋਸਾਨਾਨਂ ਲਕ੍ਖਣਵਸੇਨ ਦਸਲਕ੍ਖਣਸਮ੍ਪਨ੍ਨਤਾ ਚ ਵੇਦਿਤਬ੍ਬਾ. ਅਟ੍ਠਕਥਾਯਂ ਪਨ ‘‘ਦਸਲਕ੍ਖਣਵਿਭਾਵਨੇਨੇਵ ਤਨ੍ਨਿਸ੍ਸਯਭੂਤਾ ਤਿਵਿਧਕਲ੍ਯਾਣਤਾਪਿ ਝਾਨਸ੍ਸ ਪਾਕਟਾ ਹੋਤੀਤਿ ਤਤ੍ਰਿਮਾਨੀਤਿਆਦਿ ਵੁਤ੍ਤਂ.
ਤਤ੍ਰਾਯਂ ਪਾਲ਼ੀਤਿ ਤਸ੍ਮਿਂ ਦਸਲਕ੍ਖਣਵਿਭਾਵਨਵਿਸਯੇ ਅਯਂ ਪਾਲ਼ਿ. ਪਟਿਪਦਾਵਿਸੁਦ੍ਧੀਤਿ ਗੋਤ੍ਰਭੁਪਰਿਯੋਸਾਨਾਯ ਪੁਬ੍ਬਭਾਗਪਟਿਪਦਾਯ ਝਾਨਸ੍ਸ ਨੀਵਰਣਾਦਿਪਰਿਬਨ੍ਧਤੋ ਵਿਸੁਦ੍ਧਿ, ਸਾਯਂ ਯਸ੍ਮਾ ਉਪੇਕ੍ਖਾਨੁਬ੍ਰੂਹਨਾਦੀਨਮ੍ਪਿ ਪਚ੍ਚਯਤ੍ਤੇਨ ਪਧਾਨਾ ਪੁਰਿਮਕਾਰਣਸਿਦ੍ਧਾ ਚ, ਤਸ੍ਮਾ ਵੁਤ੍ਤਂ ‘‘ਪਟਿਪਦਾਵਿਸੁਦ੍ਧਿ ਆਦੀ’’ਤਿ. ਉਪੇਕ੍ਖਾਨੁਬ੍ਰੂਹਨਾਤਿ ਵਿਸੋਧੇਤਬ੍ਬਤਾਦੀਨਂ ਅਭਾਵਤੋ ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਕਿਚ੍ਚਨਿਪ੍ਫਤ੍ਤਿਯਾ ਅਨੁਬ੍ਰੂਹਨਾ, ਸਾ ਪਨ ਪਰਿਬਨ੍ਧਵਿਸੁਦ੍ਧਿਸਮਕਾਲਵਿਭਾਵਿਨੀਪਿ ਤਬ੍ਬਿਸੁਦ੍ਧਿਯਾਵ ਨਿਪ੍ਫਨ੍ਨਾਤਿ ਦੀਪਨਤ੍ਥਮਾਹ ‘‘ਉਪੇਕ੍ਖਾਨੁਬ੍ਰੂਹਨਾ ਮਜ੍ਝੇ’’ਤਿ. ਸਮ੍ਪਹਂਸਨਾਤਿ ਵਤ੍ਥੁਧਮ੍ਮਾਦੀਨਂ ਅਨਤਿਵਤ੍ਤਨਾਦਿਸਾਧਕਸ੍ਸ ਞਾਣਸ੍ਸ ਕਿਚ੍ਚਨਿਪ੍ਫਤ੍ਤਿਵਸੇਨ ਪਰਿਯੋਦਪਨਾ, ਸਾ ਪਨ ਯਸ੍ਮਾ ਕਤ੍ਤਬ੍ਬਸ੍ਸ ਸਬ੍ਬਕਿਚ੍ਚਸ੍ਸ ਨਿਪ੍ਫਤ੍ਤਿਯਾਵ ਸਿਦ੍ਧਾ ਨਾਮ ਹੋਤਿ, ਤਸ੍ਮਾ ਵੁਤ੍ਤਂ ‘‘ਸਮ੍ਪਹਂਸਨਾ ਪਰਿਯੋਸਾਨ’’ਨ੍ਤਿ. ਤੀਣਿਪਿ ਚੇਤਾਨਿ ਕਲ੍ਯਾਣਾਨਿ ਏਕਕ੍ਖਣੇ ਲਬ੍ਭਮਾਨਾਨਿਪਿ ਪਚ੍ਚਯਪਚ੍ਚਯੁਪ੍ਪਨ੍ਨਤਾਦਿਵਸੇਨ ਪਵਤ੍ਤਨ੍ਤੀਤਿ ਦਸ੍ਸਨਤ੍ਥਂ ਆਦਿਮਜ੍ਝਪਰਿਯੋਸਾਨਭਾਵੇਨ ਵੁਤ੍ਤਾਨਿ, ਨ ਪਨ ਝਾਨਸ੍ਸ ਉਪ੍ਪਾਦਾਦਿਕ੍ਖਣਤ੍ਤਯੇ ਯਥਾਕ੍ਕਮਂ ਲਬ੍ਭਮਾਨਤ੍ਤਾਤਿ ਦਟ੍ਠਬ੍ਬਂ. ਮਜ੍ਝਿਮਂ ਸਮਾਧਿਨਿਮਿਤ੍ਤਂ ਪਟਿਪਜ੍ਜਤੀਤਿਆਦੀਸੁ ਮਜ੍ਝਿਮਂ ਸਮਾਧਿਨਿਮਿਤ੍ਤਂ ਨਾਮ ਸਮਪ੍ਪਵਤ੍ਤੋ ਅਪ੍ਪਨਾਸਮਾਧਿਯੇਵ. ਸੋ ਹਿ ਲੀਨੁਦ੍ਧਚ੍ਚਸਙ੍ਖਾਤਾਨਂ ਉਭਿਨ੍ਨਂ ਅਨ੍ਤਾਨਂ ਅਨੁਪਗਮਨੇਨ ਮਜ੍ਝਿਮੋ, ਸਵਿਸੇਸਂ ਚਿਤ੍ਤਸ੍ਸ ਏਕਤ੍ਤਾਰਮ੍ਮਣੇ ਠਪਨਤੋ ਸਮਾਧਿਯੇਵ ਉਪਰਿਵਿਸੇਸਾਨਂ ਕਾਰਣਭਾਵਤੋ ‘‘ਸਮਾਧਿਨਿਮਿਤ੍ਤ’’ਨ੍ਤਿ ਵੁਚ੍ਚਤਿ, ਤਂ ਪਟਿਪਜ੍ਜਤਿ ਪਟਿਲਬ੍ਭਤੀਤਿ ਅਤ੍ਥੋ. ਏਵਂ ਪਟਿਪਨ੍ਨਤ੍ਤਾ ਮਜ੍ਝਿਮੇਨ ਸਮਾਧਿਨਿਮਿਤ੍ਤੇਨ ਤਤ੍ਥ ਏਕਤ੍ਤਾਰਮ੍ਮਣੇ ਅਪ੍ਪਨਾਗੋਚਰੇ ਪਕ੍ਖਨ੍ਦਤਿ ਉਪਤਿਟ੍ਠਤਿ, ਏਵਂ ਵਿਸੁਦ੍ਧਸ੍ਸ ਪਨ ਤਸ੍ਸ ਚਿਤ੍ਤਸ੍ਸ ਪੁਨ ਵਿਸੋਧੇਤਬ੍ਬਾਭਾਵਤੋ ਵਿਸੋਧਨੇ ਬ੍ਯਾਪਾਰਂ ਅਕਰੋਨ੍ਤੋ ਪੁਗ੍ਗਲੋ ਵਿਸੁਦ੍ਧਂ ਚਿਤ੍ਤਂ ਅਜ੍ਝੁਪੇਕ੍ਖਤਿ ਨਾਮ. ਸਮਥਭਾਵੂਪਗਮਨੇਨ ਸਮਥਪਟਿਪਨ੍ਨਸ੍ਸ ਪੁਨ ਸਮਾਧਾਨੇ ਬ੍ਯਾਪਾਰਂ ਅਕਰੋਨ੍ਤੋ ਸਮਥਪਟਿਪਨ੍ਨਂ ਅਜ੍ਝੁਪੇਕ੍ਖਤਿ, ਸਮਥਪਟਿਪਨ੍ਨਭਾਵਤੋ ਏਵਮਸ੍ਸ ਕਿਲੇਸਸਂਸਗ੍ਗਂ ਪਹਾਯ ਏਕਤ੍ਤੇਨ ਉਪਟ੍ਠਿਤਸ੍ਸ ਪੁਨ ਏਕਤ੍ਤੁਪਟ੍ਠਾਨੇ ਬ੍ਯਾਪਾਰਂ ਅਕਰੋਨ੍ਤੋ ਏਕਤ੍ਤੁਪਟ੍ਠਾਨਂ ਅਜ੍ਝੁਪੇਕ੍ਖਤਿ ਨਾਮ.
ਤਤ੍ਥ ਜਾਤਾਨਨ੍ਤਿਆਦੀਸੁ ਯੇ ਪਨ ਤੇ ਏਵਂ ਉਪੇਕ੍ਖਾਨੁਬ੍ਰੂਹਿਤੇ ਤਸ੍ਮਿਂ ਝਾਨਚਿਤ੍ਤੇ ਜਾਤਾ ਸਮਾਧਿਪਞ੍ਞਾਸਙ੍ਖਾਤਾ ਯੁਗਨਦ੍ਧਧਮ੍ਮਾ, ਤੇਸਂ ਅਞ੍ਞਮਞ੍ਞਂ ਅਨਤਿਵਤ੍ਤਨਸਭਾਵੇਨ ਸਮ੍ਪਹਂਸਨਾ ਵਿਸੋਧਨਾ ਪਰਿਯੋਦਪਨਾ ਚ, ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਕਿਲੇਸੇਹਿ ਵਿਮੁਤ੍ਤਤ੍ਤਾ ਵਿਮੁਤ੍ਤਿਰਸੇਨ ਏਕਰਸਤਾਯ ਸਮ੍ਪਹਂਸਨਾ ਚ, ਯਞ੍ਚੇਤਂ ਤਦੁਪਗਂ ਤੇਸਂ ਅਨਤਿਵਤ੍ਤਨਏਕਰਸਭਾਵਾਨਂ ਅਨੁਚ੍ਛਵਿਕਂ ਵੀਰਿਯਂ, ਤਸ੍ਸ ਤਦੁਪਗਵੀਰਿਯਸ੍ਸ ਵਾਹਨਟ੍ਠੇਨ ਪਵਤ੍ਤਨਟ੍ਠੇਨ ਸਮ੍ਪਹਂਸਨਾ ਚ, ਤਸ੍ਮਿਂ ਖਣੇ ਯਥਾਵੁਤ੍ਤਧਮ੍ਮਾਨਂ ਆਸੇਵਨਟ੍ਠੇਨ ਸਮ੍ਪਹਂਸਨਾ ਚ, ਪਰਿਯੋਦਪਨਾ ਚ ਪਰਿਯੋਦਪਨਕਸ੍ਸ ਞਾਣਸ੍ਸ ਕਿਚ੍ਚਨਿਪ੍ਫਤ੍ਤਿਵਸੇਨੇਵ ਇਜ੍ਝਤੀਤਿ ਵੇਦਿਤਬ੍ਬਂ. ਏਵਂ ਤਿਵਿਧਤ੍ਤਗਤਂ ਚਿਤ੍ਤਨ੍ਤਿਆਦੀਨਿ ਤਸ੍ਸੇਵ ਚਿਤ੍ਤਸ੍ਸ ਥੋਮਨਵਚਨਾਨਿ. ਵਿਤਕ੍ਕਸਮ੍ਪਨ੍ਨਨ੍ਤਿ ਵਿਤਕ੍ਕਙ੍ਗੇਨ ਸੁਨ੍ਦਰਭਾਵਮੁਪਗਤਂ. ਚਿਤ੍ਤਸ੍ਸ ਅਧਿਟ੍ਠਾਨਸਮ੍ਪਨ੍ਨਨ੍ਤਿ ਤਸ੍ਮਿਞ੍ਞੇਵ ਆਰਮ੍ਮਣੇ ਚਿਤ੍ਤਸ੍ਸ ਨਿਰਨ੍ਤਰਪ੍ਪਵਤ੍ਤਿਸਙ੍ਖਾਤੇਨ ਸਮਾਧਿਨਾ ਸਮ੍ਪਨ੍ਨਂ, ਇਦਂ ਝਾਨਙ੍ਗਵਸੇਨ ਵੁਤ੍ਤਂ. ਸਮਾਧਿਸਮ੍ਪਨ੍ਨਨ੍ਤਿ ਇਦਂ ਪਨ ਇਨ੍ਦ੍ਰਿਯਵਸੇਨਾਤਿ ਵੇਦਿਤਬ੍ਬਂ.
ਪਟਿਕੁਟਤੀਤਿ ਸਙ੍ਕੁਚਤਿ. ਪਟਿਵਟ੍ਟਤੀਤਿ ਪਟਿਨਿਵਟ੍ਟਤਿ. ਨ੍ਹਾਰੁਦਦ੍ਦੁਲਨ੍ਤਿ ਨ੍ਹਾਰੁਖਣ੍ਡਂ. ਪਯੁਤ੍ਤਵਾਚਨ੍ਤਿ ਪਚ੍ਚਯਪਰਿਯੇਸਨੇ ਨਿਯੁਤ੍ਤਵਾਚਂ. ਦਣ੍ਡਵਾਗੁਰਾਹੀਤਿ ਦਣ੍ਡਪਟਿਬਦ੍ਧਾਹਿ ਦੀਘਜਾਲਸਙ੍ਖਾਤਾਹਿ ਵਾਗੁਰਾਹਿ.
ਸਮਣਕੁਤ੍ਤਕੋਤਿ ਕਾਸਾਯਨਿਵਾਸਨਾਦਿਸਮਣਕਿਚ੍ਚਕੋ. ਵਗ੍ਗੁਮੁਦਾਤਿ ਏਤ੍ਥ ‘‘ਵਗ੍ਗੁਮਤਾ’’ਤਿ ਵਤ੍ਤਬ੍ਬੇ ਲੋਕਿਕਾ ‘‘ਮੁਦਾ’’ਤਿ ਵੋਹਰਿਂਸੂਤਿ ਦਸ੍ਸੇਨ੍ਤੋ ਆਹ ‘‘ਵਗ੍ਗੁਮਤਾ’’ਤਿ. ‘‘ਵਗ੍ਗੂ’’ਤਿ ਮਤਾ, ਸੁਦ੍ਧਸਮ੍ਮਤਾਤਿ ਅਤ੍ਥੋ, ਤੇਨਾਹ ‘‘ਪੁਞ੍ਞਸਮ੍ਮਤਾ’’ਤਿ. ਸਤ੍ਤਾਨਂ ਪਾਪੁਨਨੇਨ ਸੋਧਨੇਨ ਸਾ ਪੁਞ੍ਞਸਮ੍ਮਤਾ.
੧੬੩. ਮਾਰਸ੍ਸ ਧੇਯ੍ਯਂ ਠਾਨਂ, ਵਤ੍ਥੁ ਵਾ ਨਿਵਾਸੋ ਮਾਰਧੇਯ੍ਯਂ, ਸੋ ਅਤ੍ਥਤੋ ਤੇਭੂਮਕਧਮ੍ਮਾ ਏਵ, ਇਧ ਪਨ ਪਞ੍ਚ ਕਾਮਗੁਣਾ ਅਧਿਪ੍ਪੇਤਾ, ਤਂ ਮਾਰਧੇਯ੍ਯਂ. ‘‘ਅਯਂ ਸਮਣਕੁਤ੍ਤਕੋ ਯਥਾਸਮੁਪ੍ਪਨ੍ਨਸਂਵੇਗਮੂਲਕੇਨ ਸਮਣਭਾਵੂਪਗਮਨੇਨ ਅਤਿਕ੍ਕਮਿਤੁਂ ਸਕ੍ਖਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਅਵੋਚ, ਨ ਪਨ ‘‘ਅਰਹਤ੍ਤਪ੍ਪਤ੍ਤਿਯਾ ਤੀਸੁ ਭਵੇਸੁ ਅਪ੍ਪਟਿਸਨ੍ਧਿਕਤਾਯ ਤਂ ਅਤਿਕ੍ਕਮਿਤੁਂ ਸਕ੍ਖਿਸ੍ਸਤੀ’’ਤਿ ਮਰਣੇਨੇਵ ਸਤ੍ਤਾਨਂ ਸਂਸਾਰਮੋਚਨਲਦ੍ਧਿਕਤ੍ਤਾ ਦੇਵਤਾਯ. ਨ ਹਿ ਮਤਾਨਂ ਕਤ੍ਥਚਿ ਪਟਿਸਨ੍ਧਿ ਗਚ੍ਛਤਿ. ਇਮਿਨਾ ਅਤ੍ਥੇਨ ਏਵਮੇਵ ਭਵਿਤਬ੍ਬਨ੍ਤਿ ਇਮਿਨਾ ਪਰੇਸਂ ਜੀਵਿਤਾ ਵੋਰੋਪਨਤ੍ਥੇਨ ਏਵਮੇਵ ਸਂਸਾਰਮੋਚਨਸਭਾਵੇਨੇਵ ਭਵਿਤਬ੍ਬਂ. ‘‘ਅਤ੍ਤਨਾਪਿ ਅਤ੍ਤਾਨਂ ਜੀਵਿਤਾ ਵੋਰੋਪੇਨ੍ਤਿ, ਅਞ੍ਞਮਞ੍ਞਮ੍ਪਿ ਜੀਵਿਤਾ ਵੋਰੋਪੇਨ੍ਤੀ’’ਤਿ (ਪਾਰਾ. ੧੬੨) ਵੁਤ੍ਤਤ੍ਤਾ ਸਬ੍ਬਾਨਿਪਿ ਤਾਨਿ ਪਞ੍ਚਭਿਕ੍ਖੁਸਤਾਨਿ ਜੀਵਿਤਾ ਵੋਰੋਪੇਸੀਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਨ੍ਤਿ ਗਹੇਤਬ੍ਬਂ. ਤਸ੍ਮਾ ਯੇ ਅਤ੍ਤਨਾਪਿ ਅਤ੍ਤਾਨਂ ਅਞ੍ਞਮਞ੍ਞਞ੍ਚ ਜੀਵਿਤਾ ਵੋਰੋਪੇਸੁਂ, ਤੇ ਪੁਥੁਜ੍ਜਨਭਿਕ੍ਖੂ ਠਪੇਤ੍ਵਾ ਤਦਵਸੇਸੇ ਚ ਪੁਥੁਜ੍ਜਨਭਿਕ੍ਖੂ, ਸਬ੍ਬੇ ਚ ਅਰਿਯੇ ਅਯਂ ਜੀਵਿਤਾ ਵੋਰੋਪੇਸੀਤਿ ਵੇਦਿਤਬ੍ਬਂ.
੧੬੪. ਏਕੀਭਾਵਤੋਤਿ ਪਵਿਵੇਕਤੋ. ਉਦ੍ਦੇਸਂ ਪਰਿਪੁਚ੍ਛਂ ਗਣ੍ਹਨ੍ਤੀਤਿ ਅਤ੍ਤਨੋ ਅਤ੍ਤਨੋ ਆਚਰਿਯਾਨਂ ਸਨ੍ਤਿਕੇ ਗਣ੍ਹਨ੍ਤਿ, ਗਹੇਤ੍ਵਾ ਚ ਆਚਰਿਯੇਹਿ ਸਦ੍ਧਿਂ ਭਗਵਨ੍ਤਂ ਉਪਟ੍ਠਹਨ੍ਤਿ. ਤਦਾ ਪਨ ਉਦ੍ਦੇਸਾਦਿਦਾਯਕਾ ਤਨੁਭੂਤੇਹਿ ਭਿਕ੍ਖੂਹਿ ਭਗਵਨ੍ਤਂ ਉਪਗਤਾ, ਤਂ ਸਨ੍ਧਾਯ ਭਗਵਾ ਪੁਚ੍ਛਤਿ.
ਆਨਾਪਾਨਸ੍ਸਤਿਸਮਾਧਿਕਥਾਵਣ੍ਣਨਾ
੧੬੫. ਦਸਾਨੁਸ੍ਸਤੀਸੁ ਅਨ੍ਤੋਗਧਾਪਿ ਆਨਾਪਾਨਸ੍ਸਤਿ ਤਦਾ ਭਿਕ੍ਖੂਨਂ ਬਹੂਨਂ ਸਪ੍ਪਾਯਤਂ ਦਸ੍ਸੇਤੁਂ ਪੁਨ ਗਹਿਤਾ. ਤਥਾ ਹਿ ਤਂ ਭਗਵਾ ਤੇਸਂ ਦੇਸੇਸਿ. ਆਹਾਰੇ ਪਟਿਕ੍ਕੂਲਸਞ੍ਞਾ ਅਸੁਭਕਮ੍ਮਟ੍ਠਾਨਸਦਿਸਾ, ਚਤ੍ਤਾਰੋ ਪਨ ਆਰੁਪ੍ਪਾ ਆਦਿਕਮ੍ਮਿਕਾਨਂ ਅਨਨੁਰੂਪਾਤਿ ਤੇਸਂ ਇਧ ਅਗ੍ਗਹਣਂ ਦਟ੍ਠਬ੍ਬਂ. ਅਞ੍ਞਂ ਪਰਿਯਾਯਨ੍ਤਿ ਅਰਹਤ੍ਤਾਧਿਗਮਤ੍ਥਾਯ ਅਞ੍ਞਂ ਕਾਰਣਂ. ਅਤ੍ਥਯੋਜਨਾਕ੍ਕਮਨ੍ਤਿ ਅਤ੍ਥਞ੍ਚ ਯੋਜਨਾਕ੍ਕਮਞ੍ਚ. ਅਸ੍ਸਾਸਵਸੇਨਾਤਿ ਅਸ੍ਸਾਸਂ ਆਰਮ੍ਮਣਂ ਕਤ੍ਵਾਤਿ ਵੁਤ੍ਤਂ ਹੋਤਿ. ਉਪਟ੍ਠਾਨਂ ਸਤੀਤਿ ਅਪ੍ਪਮੁਸ੍ਸਨਤਾਯ ਤਮੇਵ ਅਸ੍ਸਾਸਂ ਪਸ੍ਸਾਸਞ੍ਚ ਉਪਗਨ੍ਤ੍ਵਾ ਠਾਨਂ, ਤਥਾ ਤਿਟ੍ਠਨਕਧਮ੍ਮੋ ਸਤਿ ਨਾਮਾਤਿ ਅਤ੍ਥੋ. ਇਦਾਨਿ ਸਤਿਵਸੇਨੇਵ ਪੁਗ੍ਗਲਂ ਨਿਦ੍ਦਿਸਿਤੁਕਾਮੇਨ ਯੋ ਅਸ੍ਸਸਤੀਤਿਆਦਿ ਵੁਤ੍ਤਂ. ਤਤ੍ਥ ਯੋ ਅਸ੍ਸਸਤਿ, ਤਸ੍ਸ ਸਤਿ ਅਸ੍ਸਾਸਂ ਉਪਗਨ੍ਤ੍ਵਾ ਤਿਟ੍ਠਤੀਤਿਆਦਿਨਾ ਅਤ੍ਥੋ ਗਹੇਤਬ੍ਬੋ. ਅਕੋਸਲ੍ਲਸਮ੍ਭੂਤੇਤਿ ਅਵਿਜ੍ਜਾਸਮ੍ਭੂਤੇ. ਖਣੇਨੇਵਾਤਿ ਅਤ੍ਤਨੋ ਪਵਤ੍ਤਿਕ੍ਖਣੇਨੇਵ. ਅਰਿਯਮਗ੍ਗਸ੍ਸ ਪਾਦਕਭੂਤੋ ਅਯਂ ਸਮਾਧਿ ਅਨੁਕ੍ਕਮੇਨ ਵਡ੍ਢਿਤ੍ਵਾ ਅਰਿਯਮਗ੍ਗਭਾਵਂ ਉਪਗਤੋ ਵਿਯ ਹੋਤੀਤਿ ਆਹ ‘‘ਅਰਿਯਮਗ੍ਗਵੁਡ੍ਢਿਪ੍ਪਤ੍ਤੋ’’ਤਿ. ਓਪਮ੍ਮਨਿਦਸ੍ਸਨਨ੍ਤਿ ਏਤ੍ਥ ਉਪਮਾਵ ਓਪਮ੍ਮਂ, ਤਸ੍ਸ ਨਿਦਸ੍ਸਨਂ.
ਬਾਹਿਰਕਾ ਆਨਾਪਾਨਸ੍ਸਤਿਂ ਜਾਨਨ੍ਤਾ ਆਦਿਤੋ ਚਤੁਪ੍ਪਕਾਰਮੇਵ ਜਾਨਨ੍ਤਿ, ਨ ਸਬ੍ਬਂ ਸੋਲ਼ਸਪ੍ਪਕਾਰਨ੍ਤਿ ਆਹ ਸਬ੍ਬਪ੍ਪਕਾਰਇਚ੍ਚਾਦਿ. ਏਵਮਸ੍ਸੇਤਂ ਸੇਨਾਸਨਨ੍ਤਿ ਏਤ੍ਥ ਏਵਨ੍ਤਿ ਭਾਵਨਾਸਤਿਯਾ ਯਥਾਵੁਤ੍ਤਨਯੇਨ ਆਰਮ੍ਮਣੇ ਚਿਤ੍ਤਸ੍ਸ ਨਿਬਨ੍ਧਨੇ ਸਤਿਯੇਵ, ਨਾਸਤੀਤਿ ਅਤ੍ਥੋ, ਤੇਨ ਮੁਟ੍ਠਸ੍ਸਤਿਸ੍ਸ ਅਰਞ੍ਞਵਾਸੋ ਨਿਰਤ੍ਥਕੋ ਅਨਨੁਰੂਪੋਤਿ ਦਸ੍ਸੇਤਿ. ਅਵਸੇਸਸਤ੍ਤਵਿਧਸੇਨਾਸਨਨ੍ਤਿ ‘‘ਪਬ੍ਬਤਂ ਕਨ੍ਦਰਂ ਗਿਰਿਗੁਹਂ ਸੁਸਾਨਂ ਵਨਪਤ੍ਥਂ ਅਬ੍ਭੋਕਾਸਂ ਪਲਾਲਪੁਞ੍ਜ’’ਨ੍ਤਿ (ਵਿਭ. ੫੦੮) ਏਵਂ ਵੁਤ੍ਤਂ. ਉਤੁਤ੍ਤਯਾਨੁਕੂਲਂ ਧਾਤੁਚਰਿਯਾਨੁਕੂਲਨ੍ਤਿ ਗਿਮ੍ਹਾਨਾਦਿਉਤੁਤ੍ਤਯਸ੍ਸ ਸੇਮ੍ਹਾਦਿਧਾਤੁਤ੍ਤਯਸ੍ਸ ਮੋਹਾਦਿਚਰਿਯਤ੍ਤਯਸ੍ਸ ਚ ਅਨੁਕੂਲਂ. ਨਿਸਜ੍ਜਾਯ ਦਲ਼੍ਹਭਾਵਂ ਪਲ੍ਲਙ੍ਕਾਭੁਜਨੇਨ, ਅਸ੍ਸਾਸਪਸ੍ਸਾਸਾਨਂ ਪਵਤ੍ਤਨਸੁਖਤਂ ਉਪਰਿਮਕਾਯਸ੍ਸ ਉਜੁਕਂ ਠਪਨੇਨ, ਆਰਮ੍ਮਣਪਰਿਗ੍ਗਹੂਪਾਯਂ ਪਰਿਮੁਖਂ ਸਤਿਯਾ ਠਪਨੇਨ ਉਪਦਿਸਨ੍ਤੋ. ਨ ਪਣਮਨ੍ਤੀਤਿ ਨ ਓਣਮਨ੍ਤਿ. ਪਰਿਗ੍ਗਹਿਤਨਿਯ੍ਯਾਨਂ ਸਤਿਨ੍ਤਿ ਸਬ੍ਬਥਾ ਗਹਿਤਂ ਸਮ੍ਮੋਸਪਟਿਪਕ੍ਖਤੋ ਨਿਗ੍ਗਮਨਸਙ੍ਖਾਤਂ ਸਤਿਂ ਕਤ੍ਵਾ, ਪਰਮਂ ਸਤਿਨੇਪਕ੍ਕਂ ਉਪਟ੍ਠਪੇਤ੍ਵਾਤਿ ਅਤ੍ਥੋ.
ਸਤੋਵਾਤਿ ਸਤਿਯਾ ਸਮਨ੍ਨਾਗਤੋ ਏਵ. ਬਾਤ੍ਤਿਂਸਾਯ ਆਕਾਰੇਹੀਤਿ ਚਤੂਸੁ ਚਤੁਕ੍ਕੇਸੁ ਆਗਤਾਨਿ ਦੀਘਰਸ੍ਸਾਦੀਨਿ ਸੋਲ਼ਸ ਪਦਾਨਿ ਅਸ੍ਸਾਸਪਸ੍ਸਾਸਵਸੇਨ ਦ੍ਵਿਧਾ ਵਿਭਜਿਤ੍ਵਾ ਵੁਤ੍ਤੇਹਿ ਦ੍ਵਤ੍ਤਿਂਸਾਕਾਰੇਹਿ. ਦੀਘਂਅਸ੍ਸਾਸਵਸੇਨਾਤਿ ਦੀਘਅਸ੍ਸਾਸਵਸੇਨ, ਵਿਭਤ੍ਤਿਅਲੋਪਂ ਕਤ੍ਵਾ ਨਿਦ੍ਦੇਸੋ, ਦੀਘਨ੍ਤਿ ਵਾ ਭਗਵਤਾ ਵੁਤ੍ਤਅਸ੍ਸਾਸਵਸੇਨ. ਚਿਤ੍ਤਸ੍ਸ ਏਕਗ੍ਗਤਂ ਅਵਿਕ੍ਖੇਪਨ੍ਤਿ ਵਿਕ੍ਖੇਪਪਟਿਪਕ੍ਖਭਾਵਤੋ ‘‘ਅਵਿਕ੍ਖੇਪੋ’’ਤਿ ਲਦ੍ਧਨਾਮਂ ਚਿਤ੍ਤਸ੍ਸ ਏਕਗ੍ਗਭਾਵਂ ਪਜਾਨਤੋ. ਪਟਿਨਿਸ੍ਸਗ੍ਗਾਨੁਪਸ੍ਸੀ ਅਸ੍ਸਾਸਵਸੇਨਾਤਿ ਪਟਿਨਿਸ੍ਸਗ੍ਗਾਨੁਪਸ੍ਸੀ ਹੁਤ੍ਵਾ ਅਸ੍ਸਾਸਵਸੇਨ, ‘‘ਪਟਿਨਿਸ੍ਸਗ੍ਗਾਨੁਪਸ੍ਸਿਅਸ੍ਸਾਸਨਵਸੇਨਾ’’ਤਿ ਵਾ ਪਾਠੋ, ਤਸ੍ਸ ਪਟਿਨਿਸ੍ਸਗ੍ਗਾਨੁਪਸ੍ਸਿਨੋ ਅਸ੍ਸਾਸਵਸੇਨਾਤਿ ਅਤ੍ਥੋ. ਆ ਪਠਮਂ ਬਹਿਮੁਖਂ ਸਸਨਂ ਅਸ੍ਸਾਸੋ, ਤਤੋ ਅਨ੍ਤੋਮੁਖਂ ਪਟਿਸਸਨਂ ਪਸ੍ਸਾਸੋਤਿ ਆਹ ਅਸ੍ਸਾਸੋਤਿ ਬਹਿਨਿਕ੍ਖਮਨਵਾਤੋਤਿਆਦਿ, ਸੁਤ੍ਤਨ੍ਤਟ੍ਠਕਥਾਸੁ ਪਨ ਆਕਡ੍ਢਨਵਸੇਨ ਅਨ੍ਤੋ ਸਸਨਂ ਅਸ੍ਸਾਸੋ, ਬਹਿ ਪਟਿਸਸਨਂ ਪਸ੍ਸਾਸੋਤਿ ਕਤ੍ਵਾ ਉਪ੍ਪਟਿਪਾਟਿਯਾ ਵੁਤ੍ਤਂ.
ਤਤ੍ਥਾਤਿ ਬਹਿਨਿਕ੍ਖਮਨਅਨ੍ਤੋਪਵਿਸਨਵਾਤੇਸੁ, ਤਸ੍ਸ ਚ ਪਠਮਂ ਅਬ੍ਭਨ੍ਤਰਵਾਤੋ ਨਿਕ੍ਖਮਤੀਤਿ ਇਮਿਨਾ ਸਮ੍ਬਨ੍ਧੋ. ‘‘ਸਬ੍ਬੇਸਮ੍ਪਿ ਗਬ੍ਭਸੇਯ੍ਯਕਾਨਨ੍ਤਿਆਦਿਨਾ ਦਾਰਕਾਨਂ ਪਵਤ੍ਤਿਕ੍ਕਮੇਨ ਅਸ੍ਸਾਸੋ ਬਹਿਨਿਕ੍ਖਮਨਵਾਤੋਤਿ ਗਹੇਤਬ੍ਬਨ੍ਤਿ ਦੀਪੇਤੀ’’ਤਿ ਕੇਚਿ ਵਦਨ੍ਤਿ. ਸੁਤ੍ਤਨਯੋ ਏਵ ਚੇਤ੍ਥ ‘‘ਅਸ੍ਸਾਸਾਦਿਮਜ੍ਝਪਰਿਯੋਸਾਨਂ ਸਤਿਯਾ ਅਨੁਗਚ੍ਛਤੋ ਅਜ੍ਝਤ੍ਤਂ ਵਿਕ੍ਖੇਪਗਤੇਨ ਚਿਤ੍ਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ ਪਸ੍ਸਾਸਾਦਿਮਜ੍ਝਪਰਿਯੋਸਾਨਂ ਸਤਿਯਾ ਅਨੁਗਚ੍ਛਤੋ ਬਹਿਦ੍ਧਾ ਵਿਕ੍ਖੇਪਗਤੇਨ ਚਿਤ੍ਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚਾ’’ਤਿ ਇਮਾਯ ਪਾਲ਼ਿਯਾ ਸਮੇਤੀਤਿ ਗਹੇਤਬ੍ਬਂ. ਅਦ੍ਧਾਨਵਸੇਨਾਤਿ ਕਾਲਦ੍ਧਾਨਵਸੇਨ. ਅਯਞ੍ਹਿ ਅਦ੍ਧਾਨ-ਸਦ੍ਦੋ ਕਾਲਸ੍ਸ ਦੇਸਸ੍ਸ ਚ ਵਾਚਕੋ. ਤਤ੍ਥ ਯਥਾ ਹੀਤਿਆਦਿਨਾ ਦੇਸਦ੍ਧਾਨਂ ਉਪਮਾਵਸੇਨ ਦਸ੍ਸਿਤਂ. ਇਦਾਨਿ ਤਬ੍ਬਿਸਿਟ੍ਠਕਾਲਦ੍ਧਾਨਵਸੇਨ ਅਸ੍ਸਾਸਪਸ੍ਸਾਸਾਨਂ ਦੀਘਰਸ੍ਸਤਂ ਉਪਮੇਯ੍ਯਵਸੇਨ ਵਿਭਾਵੇਤੁਂ ਏਵਨ੍ਤਿਆਦਿ ਵੁਤ੍ਤਂ. ਚੁਣ੍ਣਵਿਚੁਣ੍ਣਾ ਅਨੇਕਕਲਾਪਭਾਵੇਨ. ਏਤ੍ਥ ਚ ਹਤ੍ਥਿਆਦਿਸਰੀਰੇ ਸੁਨਖਾਦਿਸਰੀਰੇ ਚ ਅਸ੍ਸਾਸਪਸ੍ਸਾਸਾਨਂ ਦੇਸਦ੍ਧਾਨਵਿਸਿਟ੍ਠਕਾਲਦ੍ਧਾਨਵਸੇਨੇਵ ਦੀਘਰਸ੍ਸਤਾ ਵੁਤ੍ਤਾਤਿ ਵੇਦਿਤਬ੍ਬਾ ਅਤ੍ਤਭਾਵਸਙ੍ਖਾਤਂ ਦੀਘਂ ਅਦ੍ਧਾਨਂ ਸਣਿਕਂ ਪੂਰੇਤ੍ਵਾਤਿਆਦਿਵਚਨਤੋ. ਤੇਸਨ੍ਤਿ ਸਤ੍ਤਾਨਂ. ਤੇਤਿ ਅਸ੍ਸਾਸਪਸ੍ਸਾਸਾ. ਇਤ੍ਤਰਮਦ੍ਧਾਨਨ੍ਤਿ ਅਪ੍ਪਕਂ ਕਾਲਂ. ਨਵਹਾਕਾਰੇਹੀਤਿ ਭਾਵਨਮਨੁਯੁਞ੍ਜਨ੍ਤਸ੍ਸ ਪੁਬ੍ਬੇਨਾਪਰਂ ਅਲਦ੍ਧਵਿਸੇਸਸ੍ਸ ਕੇਵਲਂ ਅਦ੍ਧਾਨਵਸੇਨ ਆਦਿਤੋ ਵੁਤ੍ਤਾ ਤਯੋ ਆਕਾਰਾ, ਤੇ ਚ ਕਸ੍ਸਚਿ ਅਸ੍ਸਾਸੋਵ, ਕਸ੍ਸਚਿ ਪਸ੍ਸਾਸੋਵ, ਕਸ੍ਸਚਿ ਤਦੁਭਯਮ੍ਪਿ ਉਪਟ੍ਠਾਤੀਤਿ ਤਿਣ੍ਣਂ ਪੁਗ੍ਗਲਾਨਂ ਵਸੇਨ ਵੁਤ੍ਤਾ, ਤਥਾ ਛਨ੍ਦਵਸੇਨ ਤਯੋ, ਤਥਾ ਪਾਮੋਜ੍ਜਵਸੇਨਾਤਿ ਇਮੇਹਿ ਨਵਹਿ ਆਕਾਰੇਹਿ. ਏਕੇਨਾਕਾਰੇਨਾਤਿ ਦੀਘਂ ਅਸ੍ਸਾਸਾਦੀਸੁ ਏਕੇਨਾਕਾਰੇਨ.
ਅਦ੍ਧਾਨਸਙ੍ਖਾਤੇਤਿ ਦੀਘੇ ਓਕਾਸਦ੍ਧਾਨਸਙ੍ਖਾਤੇ ਅਤ੍ਤਭਾਵੇ ਕਾਲਦ੍ਧਾਨੇਪਿ ਵਾ, ਏਵਂ ਉਪਰਿ ਇਤ੍ਤਰਸਙ੍ਖਾਤੇਤਿ ਏਤ੍ਥਾਪਿ. ਛਨ੍ਦੋ ਉਪ੍ਪਜ੍ਜਤੀਤਿ ਭਾਵਨਾਯ ਪੁਬ੍ਬੇਨਾਪਰਂ ਵਿਸੇਸਂ ਆਵਹਨ੍ਤਿਯਾ ਲਦ੍ਧਸ੍ਸਾਦਤ੍ਤਾ ਤਤ੍ਥ ਸਾਤਿਸਯੋ ਕਤ੍ਤੁਕਾਮਤਾਲਕ੍ਖਣੋ ਕੁਸਲਚ੍ਛਨ੍ਦੋ ਉਪ੍ਪਜ੍ਜਤਿ. ਛਨ੍ਦਵਸੇਨਾਤਿ ਤਥਾਪਵਤ੍ਤਛਨ੍ਦਸ੍ਸ ਵਸੇਨ. ਪਾਮੋਜ੍ਜਂ ਉਪ੍ਪਜ੍ਜਤੀਤਿ ਅਸ੍ਸਾਸਪਸ੍ਸਾਸਾਨਂ ਸੁਖੁਮਤਰਭਾਵੇ ਆਰਮ੍ਮਣਸ੍ਸ ਸਨ੍ਤਤਰਤਾਯ, ਕਮ੍ਮਟ੍ਠਾਨਸ੍ਸ ਚ ਵੀਥਿਪਟਿਪਨ੍ਨਤਾਯ ਭਾਵਨਾਚਿਤ੍ਤਸਹਗਤੋ ਪਮੋਦੋ ਖੁਦ੍ਦਕਾਦਿਭੇਦਾ ਤਰੁਣਾ ਪੀਤਿ ਉਪ੍ਪਜ੍ਜਤਿ. ਚਿਤ੍ਤਂ ਵਿਵਤ੍ਤਤੀਤਿ ਪਟਿਭਾਗਨਿਮਿਤ੍ਤੇ ਉਪ੍ਪਨ੍ਨੇ ਪਕਤਿਅਸ੍ਸਾਸਪਸ੍ਸਾਸਤੋ ਚਿਤ੍ਤਂ ਨਿਵਤ੍ਤਤਿ. ਉਪੇਕ੍ਖਾ ਸਣ੍ਠਾਤੀਤਿ ਤਸ੍ਮਿਂ ਪਟਿਭਾਗਨਿਮਿਤ੍ਤੇ ਉਪਚਾਰਪ੍ਪਨਾਭੇਦੇ ਸਮਾਧਿਮ੍ਹਿ ਉਪ੍ਪਨ੍ਨੇ ਪੁਨ ਝਾਨਨਿਬ੍ਬਤ੍ਤਨਤ੍ਥਂ ਬ੍ਯਾਪਾਰਾਭਾਵਤੋ ਅਜ੍ਝੁਪੇਕ੍ਖਨਂ ਹੋਤਿ, ਸਾ ਪਨਾਯਂ ਉਪੇਕ੍ਖਾ ਤਤ੍ਰਮਜ੍ਝਤ੍ਤੁਪੇਕ੍ਖਾਤਿ ਵੇਦਿਤਬ੍ਬਾ. ਅਨੁਪਸ੍ਸਨਾਞਾਣਨ੍ਤਿ ਸਮਥਵਸੇਨ ਨਿਮਿਤ੍ਤਸ੍ਸ ਅਨੁਪਸ੍ਸਨਾ, ਵਿਪਸ੍ਸਨਾਵਸੇਨ ਅਸ੍ਸਾਸਪਸ੍ਸਾਸਮੁਖੇਨ ਤਨ੍ਨਿਸ੍ਸਯਨਾਮਰੂਪਸ੍ਸ ਅਨੁਪਸ੍ਸਨਾ ਚ ਞਾਣਂ. ਕਾਯੋ ਉਪਟ੍ਠਾਨਨ੍ਤਿ ਅਸ੍ਸਾਸਪਸ੍ਸਾਸਸਙ੍ਖਾਤੋ ਕਾਯੋ ਉਪਗਨ੍ਤ੍ਵਾ ਤਿਟ੍ਠਤਿ ਏਤ੍ਥ ਸਤੀਤਿ ਉਪਟ੍ਠਾਨਂ, ਨੋ ਸਤਿ, ਸਤਿ ਪਨ ਸਰਸਤੋ ਉਪਤਿਟ੍ਠਨਟ੍ਠੇਨ ਸਰਣਟ੍ਠੇਨ ਚ ਉਪਟ੍ਠਾਨਞ੍ਚੇਵ ਸਤਿ ਚ. ਤੇਨ ਵੁਚ੍ਚਤੀਤਿਆਦੀਸੁ ਯਾ ਅਯਂ ਯਥਾਵੁਤ੍ਤਅਸ੍ਸਾਸਪਸ੍ਸਾਸਕਾਯੇ, ਤਨ੍ਨਿਸ੍ਸਯਭੂਤੇ ਕਰਜਕਾਯੇ ਚ ਕਾਯਸ੍ਸੇਵ ਅਨੁਪਸ੍ਸਨਾ ਨਿਚ੍ਚਾਦਿਭਾਵਂ ਵਾ ਇਤ੍ਥਿਪੁਰਿਸਸਤ੍ਤਜੀਵਾਦਿਭਾਵਂ ਵਾ ਅਨਨੁਪਸ੍ਸਿਤ੍ਵਾ ਅਸ੍ਸਾਸਪਸ੍ਸਾਸਕਾਯਮਤ੍ਤਸ੍ਸੇਵ ਅਨਿਚ੍ਚਾਦਿਭਾਵਸ੍ਸ ਚ ਅਨੁਪਸ੍ਸਨਾ, ਤਾਯ ਕਾਯਾਨੁਪਸ੍ਸਨਾਯ ਸਤਿਸਙ੍ਖਾਤਸ੍ਸ ਪਟ੍ਠਾਨਸ੍ਸ ਭਾਵਨਾ ਵਡ੍ਢਨਾ ਕਾਯੇ ਕਾਯਾਨੁਪਸ੍ਸਨਾ ਸਤਿਪਟ੍ਠਾਨਭਾਵਨਾਤਿ ਅਯਂ ਸਙ੍ਖੇਪਤ੍ਥੋ.
ਇਤ੍ਤਰਵਸੇਨਾਤਿ ਪਰਿਤ੍ਤਕਾਲਵਸੇਨ. ਤਾਦਿਸੋਤਿ ਦੀਘੋ ਰਸ੍ਸੋ ਚ. ਵਣ੍ਣਾਤਿ ਦੀਘਾਦਿਆਕਾਰਾ. ਨਾਸਿਕਗ੍ਗੇਵ ਭਿਕ੍ਖੁਨੋਤਿ ਨਾਸਿਕਗ੍ਗੇ ਵਾ, ਵਾ-ਸਦ੍ਦੇਨ ਉਤ੍ਤਰੋਟ੍ਠੇ ਵਾਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ‘‘ਆਦਿਮਜ੍ਝਪਰਿਯੋਸਾਨਵਸੇਨ ਸਬ੍ਬਂ ਅਸ੍ਸਾਸਪਸ੍ਸਾਸਕਾਯਂ ਵਿਦਿਤਂ ਪਾਕਟਂ ਕਰਿਸ੍ਸਾਮੀ’’ਤਿ ਪੁਬ੍ਬੇ ਪਵਤ੍ਤਆਭੋਗਵਸੇਨ ਪਚ੍ਛਾ ਤਥਾ ਸਮੁਪ੍ਪਨ੍ਨੇਨ ਞਾਣਸਮ੍ਪਯੁਤ੍ਤਚਿਤ੍ਤੇਨ ਤਂ ਅਸ੍ਸਾਸਪਸ੍ਸਾਸਕਾਯਂ ਏਵਂ ਵਿਦਿਤਂ ਪਾਕਟਂ ਕਰੋਨ੍ਤੋ ਅਸ੍ਸਸਤਿ ਚੇਵ ਪਸ੍ਸਸਤਿ ਚ, ਤਸ੍ਮਾ ਏਵਂਭੂਤੋ ਸਬ੍ਬਕਾਯਪਟਿਸਂਵੇਦੀ ਅਸ੍ਸਸਿਸ੍ਸਾਮਿ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ ਨਾਮ, ਨ ਪਨ ‘‘ਅਨਾਗਤੇ ਏਵਂ ਕਰਿਸ੍ਸਾਮੀ’’ਤਿ ਚਿਨ੍ਤਨਮਤ੍ਤੇਨ ਸੋ ਏਵਂ ਵੁਚ੍ਚਤੀਤਿ ਅਧਿਪ੍ਪਾਯੋ. ਤਥਾਭੂਤਸ੍ਸਾਤਿ ਆਦਿਮਜ੍ਝਪਰਿਯੋਸਾਨਂ ਵਿਦਿਤਂ ਕਰੋਨ੍ਤਸ੍ਸ. ਸਂਵਰੋਤਿ ਸਤਿ ਵੀਰਿਯਮ੍ਪਿ ਵਾ. ਨ ਅਞ੍ਞਂ ਕਿਞ੍ਚੀਤਿ ਸਬ੍ਬਕਾਯਂ ਵਿਦਿਤਂ ਕਰਿਸ੍ਸਾਮੀਤਿਆਦਿਕਂ ਪੁਬ੍ਬਾਭੋਗਂ ਸਨ੍ਧਾਯ ਵਦਤਿ. ਞਾਣੁਪ੍ਪਾਦਨਾਦੀਸੂਤਿ ਆਦਿ-ਸਦ੍ਦੇਨ ਕਾਯਸਙ੍ਖਾਰਪਸ੍ਸਮ੍ਭਨਪੀਤਿਪਟਿਸਂਵੇਦਨਾਦਿਂ ਸਙ੍ਗਣ੍ਹਾਤਿ. ਕਾਯਸਙ੍ਖਾਰਨ੍ਤਿ ਅਸ੍ਸਾਸਪਸ੍ਸਾਸਂ. ਸੋ ਹਿ ਚਿਤ੍ਤਸਮੁਟ੍ਠਾਨੋਪਿ ਸਮਾਨੋ ਕਰਜਕਾਯਪਟਿਬਦ੍ਧਵੁਤ੍ਤਿਤਾਯ ਤੇਨ ਸਙ੍ਖਰੀਯਤੀਤਿ ਕਾਯਸਙ੍ਖਾਰੋਤਿ ਵੁਚ੍ਚਤਿ. ਅਪਰਿਗ੍ਗਹਿਤਕਾਲੇਤਿ ਕਮ੍ਮਟ੍ਠਾਨਸ੍ਸ ਅਨਾਰਦ੍ਧਕਾਲੇ, ਤਦਾਰਮ੍ਭਤ੍ਥਾਯ ਕਾਯਚਿਤ੍ਤਾਨਮ੍ਪਿ ਅਪਰਿਗ੍ਗਹਿਤਕਾਲੇਤਿ ਅਤ੍ਥੋ. ਨਿਸੀਦਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯਾਤਿ ਹਿ ਇਮਿਨਾ ਕਾਯਪਰਿਗ੍ਗਹੋ, ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾਤਿ ਇਮਿਨਾ ਚਿਤ੍ਤਪਰਿਗ੍ਗਹੋ ਵੁਤ੍ਤੋ. ਅਧਿਮਤ੍ਤਨ੍ਤਿ ਬਲਵਂ ਓਲ਼ਾਰਿਕਂ, ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਕਾਯਸਙ੍ਖਾਰੋ ਹਿ ਅਧਿਪ੍ਪੇਤੋ. ਅਧਿਮਤ੍ਤਂ ਹੁਤ੍ਵਾ ਪਵਤ੍ਤਤੀਤਿ ਕਿਰਿਯਾਵਿਸੇਸਨਂ ਵਾ ਏਤਂ. ਸਬ੍ਬੇਸਂਯੇਵਾਤਿ ਉਭਯੇਸਮ੍ਪਿ.
ਮਹਾਭੂਤਪਰਿਗ੍ਗਹੇ ਸੁਖੁਮੋਤਿ ਚਤੁਧਾਤੁਮੁਖੇਨ ਵਿਪਸ੍ਸਨਾਭਿਨਿਵੇਸਂ ਸਨ੍ਧਾਯ ਵੁਤ੍ਤਂ. ਲਕ੍ਖਣਾਰਮ੍ਮਣਿਕਵਿਪਸ੍ਸਨਾਯਾਤਿ ਕਲਾਪਸਮ੍ਮਸਨਮਾਹ. ਨਿਬ੍ਬਿਦਾਨੁਪਸ੍ਸਨਤੋ ਪਟ੍ਠਾਯ ਬਲਵਵਿਪਸ੍ਸਨਾ, ਤਤੋ ਓਰਂ ਦੁਬ੍ਬਲਵਿਪਸ੍ਸਨਾ. ਪੁਬ੍ਬੇ ਵੁਤ੍ਤਨਯੇਨਾਤਿ ਅਪਰਿਗ੍ਗਹਿਤਕਾਲੇਤਿਆਦਿਨਾ ਸਮਥਨਯੇ ਵੁਤ੍ਤਨਯੇਨ.
ਚੋਦਨਾਸੋਧਨਾਹੀਤਿ ਅਨੁਯੋਗਪਰਿਹਾਰੇਹਿ. ਕਥਨ੍ਤਿਆਦਿ ਪਟਿਸਮ੍ਭਿਦਾਪਾਲ਼ਿ, ਤਤ੍ਥ ਕਥਂ ਸਿਕ੍ਖਤੀਤਿ ਸਮ੍ਬਨ੍ਧੋ. ਇਤਿ ਕਿਰਾਤਿਆਦਿ ਚੋਦਕਵਚਨਂ. ਇਤਿ ਕਿਰਾਤਿ ਏਵਞ੍ਚੇਤਿ ਅਤ੍ਥੋ. ਅਸ੍ਸਾਸਪਸ੍ਸਾਸੋ ਸਬ੍ਬਥਾ ਅਭਾਵਂ ਉਪਨੇਤਿ ਚੇਤਿ ਚੋਦਕਸ੍ਸ ਅਧਿਪ੍ਪਾਯੋ. ਵਾਤੂਪਲਦ੍ਧਿਯਾਤਿ ਅਸ੍ਸਾਸਪਸ੍ਸਾਸਵਾਤਸ੍ਸ ਅਭਾਵੇਨ ਤਬ੍ਬਿਸਯਾਯ ਉਪਲਦ੍ਧਿਯਾ ਭਾਵਨਾਚਿਤ੍ਤਸ੍ਸ ਉਪ੍ਪਾਦੋ ਵਡ੍ਢਿ ਚ ਨ ਹੋਤੀਤਿ ਅਤ੍ਥੋ. ਨ ਚ ਨਨ੍ਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ. ਪੁਨ ਇਤਿ ਕਿਰਾਤਿਆਦਿ ਯਥਾਵੁਤ੍ਤਾਯ ਚੋਦਨਾਯ ਵਿਸ੍ਸਜ੍ਜਨਾ, ਤਤ੍ਥ ਇਤਿ ਕਿਰ ਸਿਕ੍ਖਤੀਤਿ ਮਯਾ ਵੁਤ੍ਤਾਕਾਰੇਨ ਯਦਿ ਸਿਕ੍ਖਤੀਤਿ ਅਤ੍ਥੋ. ਪਭਾਵਨਾ ਹੋਤੀਤਿ ਯਦਿਪਿ ਓਲ਼ਾਰਿਕਾ ਕਾਯਸਙ੍ਖਾਰਾ ਪਟਿਪ੍ਪਸ੍ਸਮ੍ਭਨ੍ਤਿ, ਸੁਖੁਮਾ ਪਨ ਅਤ੍ਥੇਵਾਤਿ ਭਾਵਨਾਯਪਿ ਵਡ੍ਢਿ ਹੋਤੇਵਾਤਿ ਅਧਿਪ੍ਪਾਯੋ. ਕਂਸੇਤਿ ਕਂਸਭਾਜਨੇ. ਨਿਮਿਤ੍ਤਨ੍ਤਿ ਨਿਮਿਤ੍ਤਸ੍ਸ, ਤੇਸਂ ਸਦ੍ਦਾਨਂ ਪਵਤ੍ਤਿਆਕਾਰਸ੍ਸਾਤਿ ਅਤ੍ਥੋ. ਸੁਖੁਮਕਾ ਸਦ੍ਦਾਤਿ ਅਨੁਰਵੇ ਆਹ. ਸੁਖੁਮਸਦ੍ਦਨਿਮਿਤ੍ਤਾਰਮ੍ਮਣਤਾਪੀਤਿ ਸੁਖੁਮੋ ਸਦ੍ਦੋਵ ਨਿਮਿਤ੍ਤਂ ਤਦਾਰਮ੍ਮਣਤਾਯਪਿ.
ਆਭਿਸਮਾਚਾਰਿਕਸੀਲਨ੍ਤਿ ਏਤ੍ਥ ਅਭਿਸਮਾਚਾਰੋਤਿ ਉਤ੍ਤਮਸਮਾਚਾਰੋ, ਤਦੇਵ ਆਭਿਸਮਾਚਾਰਿਕਂ ਸੀਲਂ, ਖਨ੍ਧਕਵਤ੍ਤਪਰਿਯਾਪਨ੍ਨਸ੍ਸ ਸੀਲਸ੍ਸੇਤਂ ਅਧਿਵਚਨਂ. ਅਹਂ ਸੀਲਂ ਰਕ੍ਖਾਮੀਤਿ ਉਭਤੋਵਿਭਙ੍ਗਪਰਿਯਾਪਨ੍ਨਂ ਸੀਲਂ ਸਨ੍ਧਾਯ ਵੁਤ੍ਤਂ. ਆਵਾਸੋਤਿ ਆਵਾਸਪਲਿਬੋਧੋ. ਕੁਲਨ੍ਤਿਆਦੀਸੁਪਿ ਏਸੇਵ ਨਯੋ. ਕਮ੍ਮਨ੍ਤਿ ਨਵਕਮ੍ਮਂ. ਇਦ੍ਧੀਤਿ ਪੋਥੁਜ੍ਜਨਿਕਾ ਇਦ੍ਧਿ, ਸਾ ਵਿਪਸ੍ਸਨਾਯ ਪਲਿਬੋਧੋ. ਸੋ ਉਪਚ੍ਛਿਨ੍ਦਿਤਬ੍ਬੋਤਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੪੧) ਵੁਤ੍ਤੇਨ ਤਸ੍ਸ ਤਸ੍ਸ ਪਲਿਬੋਧਸ੍ਸ ਉਪਚ੍ਛੇਦਪ੍ਪਕਾਰੇਨ ਉਪਚ੍ਛਿਨ੍ਦਿਤਬ੍ਬੋ. ਯੋਗਾਨੁਯੋਗੋਤਿ ਯੋਗਸ੍ਸ ਭਾਵਨਾਯ ਅਨੁਯੁਞ੍ਜਨਂ. ਅਟ੍ਠਤਿਂਸਾਰਮ੍ਮਣੇਸੂਤਿ ਆਲੋਕਾਕਾਸਕਸਿਣਦ੍ਵਯਂ ਵਜ੍ਜੇਤ੍ਵਾ ਪਾਲ਼ਿਯਂ ਆਗਤਾਨਂ ਅਟ੍ਠਨ੍ਨਂ ਕਸਿਣਾਨਂ ਵਸੇਨ ਵੁਤ੍ਤਂ, ਚਤ੍ਤਾਰੀਸਞ੍ਞੇਵ ਪਨ ਕਮ੍ਮਟ੍ਠਾਨਾਨਿ. ਯਥਾਵੁਤ੍ਤੇਨੇਵ ਨਯੇਨਾਤਿ ਯੋਗਾਨੁਯੋਗਕਮ੍ਮਸ੍ਸ ਪਦਟ੍ਠਾਨਤ੍ਤਾਤਿ ਇਮਮਤ੍ਥਂ ਅਤਿਦਿਸਤਿ. ਇਮਿਨਾਵ ਕਮ੍ਮਟ੍ਠਾਨੇਨਾਤਿ ਇਮਿਨਾ ਆਨਾਪਾਨਸ੍ਸਤਿਕਮ੍ਮਟ੍ਠਾਨੇਨ. ਮਹਾਹਤ੍ਥਿਪਥਂ ਨੀਹਰਨ੍ਤੋ ਵਿਯਾਤਿ ਕਮ੍ਮਟ੍ਠਾਨਵੀਥਿਂ ਮਹਾਹਤ੍ਥਿਮਗ੍ਗਂ ਕਤ੍ਵਾ ਦਸ੍ਸੇਨ੍ਤੋ ਵਿਯ.
ਵੁਤ੍ਤਪ੍ਪਕਾਰਮਾਚਰਿਯਨ੍ਤਿ ‘‘ਇਮਿਨਾਵ ਕਮ੍ਮਟ੍ਠਾਨੇਨ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤਸ੍ਸਾ’’ਤਿਆਦਿਨਾ ਹੇਟ੍ਠਾ ਵੁਤ੍ਤਪ੍ਪਕਾਰਂ ਆਚਰਿਯਂ. ‘‘ਪਿਯੋ ਗਰੁ ਭਾਵਨੀਯੋ’’ਤਿਆਦਿਨਾ (ਅ. ਨਿ. ੭.੩੭; ਨੇਤ੍ਤਿ. ੧੧੩; ਮਿ. ਪ. ੬.੧.੧੦) ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੪੨) ਵੁਤ੍ਤਪ੍ਪਕਾਰਮਾਚਰਿਯਨ੍ਤਿਪਿ ਵਦਨ੍ਤਿ. ਪਞ੍ਚਸਨ੍ਧਿਕਨ੍ਤਿ ਪਞ੍ਚਪਬ੍ਬਂ, ਪਞ੍ਚਭਾਗਨ੍ਤਿ ਅਤ੍ਥੋ. ਕਮ੍ਮਟ੍ਠਾਨਸ੍ਸ ਉਗ੍ਗਣ੍ਹਨਨ੍ਤਿ ਕਮ੍ਮਟ੍ਠਾਨਗਨ੍ਥਸ੍ਸ ਉਗ੍ਗਣ੍ਹਨਂ. ਤਦਤ੍ਥਪਰਿਪੁਚ੍ਛਾ ਕਮ੍ਮਟ੍ਠਾਨਸ੍ਸ ਪਰਿਪੁਚ੍ਛਾ, ਤਤ੍ਥ ਸਂਸਯਪਰਿਪੁਚ੍ਛਾ ਵਾ. ਕਮ੍ਮਟ੍ਠਾਨਸ੍ਸ ਉਪਟ੍ਠਾਨਨ੍ਤਿ ਏਵਂ ਭਾਵਨਮਨੁਯੁਞ੍ਜਨ੍ਤਸ੍ਸ ਏਵਮਿਧ ਨਿਮਿਤ੍ਤਂ ਉਪਤਿਟ੍ਠਤੀਤਿ ਉਪਧਾਰਣਂ. ਤਥਾ ਕਮ੍ਮਟ੍ਠਾਨਪ੍ਪਨਾ ਏਵਂ ਝਾਨਮਪ੍ਪੇਤੀਤਿ. ਕਮ੍ਮਟ੍ਠਾਨਸ੍ਸ ਲਕ੍ਖਣਨ੍ਤਿ ਗਣਨਾਨੁਬਨ੍ਧਨਾਫੁਸਨਾਨਂ ਵਸੇਨ ਭਾਵਨਂ ਉਸ੍ਸੁਕ੍ਕਾਪੇਤ੍ਵਾ ਠਪਨਾਵਸੇਨ ਮਤ੍ਥਕਪ੍ਪਤ੍ਤਿ ਇਧ ਭਾਵਨਾਤਿ ਕਮ੍ਮਟ੍ਠਾਨਸਭਾਵਸ੍ਸ ਸਲ੍ਲਕ੍ਖਣਂ, ਤੇਨਾਹ ‘‘ਕਮ੍ਮਟ੍ਠਾਨਸਭਾਵੂਪਧਾਰਣਨ੍ਤਿ ਵੁਤ੍ਤਂ ਹੋਤੀ’’ਤਿ.
ਅਟ੍ਠਾਰਸਸੇਨਾਸਨਦੋਸਵਿਵਜ੍ਜਿਤਨ੍ਤਿ ਮਹਤ੍ਤਂ ਨਵਤ੍ਤਂ ਜਿਣ੍ਣਤ੍ਤਂ ਪਨ੍ਥਨਿਸ੍ਸਿਤਤ੍ਤਂ ਸੋਣ੍ਡਿਪਣ੍ਣਪੁਪ੍ਫਫਲਯੁਤ੍ਤਤਾ ਪਤ੍ਥਨੀਯਤਾ ਨਗਰਦਾਰੁਖੇਤ੍ਤਸਨ੍ਨਿਸ੍ਸਿਤਤਾ ਵਿਸਭਾਗਾਨਂ ਪੁਗ੍ਗਲਾਨਂ ਅਤ੍ਥਿਤਾ ਪਟ੍ਟਨਸਨ੍ਨਿਸ੍ਸਿਤਤਾ ਪਚ੍ਚਨ੍ਤਸਨ੍ਨਿਸ੍ਸਿਤਤਾ ਰਜ੍ਜਸੀਮਸਨ੍ਨਿਸ੍ਸਿਤਤਾ ਅਸਪ੍ਪਾਯਤਾ ਕਲ੍ਯਾਣਮਿਤ੍ਤਾਨਂ ਅਲਾਭੋਤਿ ਇਮੇਹਿ ਅਟ੍ਠਾਰਸਹਿ ਸੇਨਾਸਨਦੋਸੇਹਿ ਵਿਵਜ੍ਜਿਤਂ. ਪਞ੍ਚਸੇਨਾਸਨਙ੍ਗਸਮਨ੍ਨਾਗਤਨ੍ਤਿ –
‘‘ਇਧ, ਭਿਕ੍ਖਵੇ, ਸੇਨਾਸਨਂ ਨਾਤਿਦੂਰਂ ਹੋਤਿ ਨਾਚ੍ਚਾਸਨ੍ਨਂ ਗਮਨਾਗਮਨਸਮ੍ਪਨ੍ਨਂ ਦਿਵਾ ਅਪ੍ਪਾਕਿਣ੍ਣਂ ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਂ, ਤਸ੍ਮਿਂ ਖੋ ਪਨ ਸੇਨਾਸਨੇ ਵਿਹਰਨ੍ਤਸ੍ਸ ਅਪ੍ਪਕਸਿਰੇਨ ਉਪ੍ਪਜ੍ਜਨ੍ਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾ, ਤਸ੍ਮਿਂ ਖੋ ਪਨ ਸੇਨਾਸਨੇ ਥੇਰਾ ਭਿਕ੍ਖੂ ਵਿਹਰਨ੍ਤਿ …ਪੇ… ਏਵਂ ਖੋ, ਭਿਕ੍ਖਵੇ, ਸੇਨਾਸਨਂ ਪਞ੍ਚਙ੍ਗਸਮਨ੍ਨਾਗਤਂ ਹੋਤੀ’’ਤਿ (ਅ. ਨਿ. ੧੦.੧੧) –
ਏਵਂ ਭਗਵਤਾ ਵੁਤ੍ਤੇਹਿ ਪਞ੍ਚਹਿ ਸੇਨਾਸਨਙ੍ਗੇਹਿ ਸਮਨ੍ਨਾਗਤਂ, ਏਤ੍ਥ ਚ ਨਾਤਿਦੂਰਤਾਦਿ ਏਕਂ, ਦਿਵਾ ਅਪ੍ਪਾਕਿਣ੍ਣਤਾਦਿ ਏਕਂ, ਅਪ੍ਪਡਂਸਾਦਿਤਾ ਏਕਂ, ਚੀਵਰਾਦਿਲਾਭੋ ਏਕਂ, ਥੇਰਾਨਂ ਭਿਕ੍ਖੂਨਂ ਨਿਵਾਸੋ ਏਕਨ੍ਤਿ ਏਵਂ ਪਞ੍ਚਙ੍ਗਾਨਿ ਵੇਦਿਤਬ੍ਬਾਨਿ.
ਉਪਚ੍ਛਿਨ੍ਨਖੁਦ੍ਦਕਪਲਿਬੋਧੇਨਾਤਿ ਦੀਘਾਨਂ ਕੇਸਾਦੀਨਂ ਹਰਣੇਨ ਪਤ੍ਤਚੀਵਰਾਦੀਨਂ ਪਚਨਤੁਨ੍ਨਕਰਣਰਜਨਾਦਿਕਰਣੇਹਿ ਚ ਉਪਚ੍ਛਿਨ੍ਨਾ ਖੁਦ੍ਦਕਾ ਪਲਿਬੋਧਾ ਯੇਨ, ਤੇਨ. ਭਤ੍ਤਸਮ੍ਮਦਨ੍ਤਿ ਭੋਜਨਨਿਮਿਤ੍ਤਂ ਪਰਿਸ੍ਸਮਂ. ਆਚਰਿਯਤੋ ਉਗ੍ਗਹੋ ਆਚਰਿਯੁਗ੍ਗਹੋ, ਸਬ੍ਬੋਪਿ ਕਮ੍ਮਟ੍ਠਾਨਵਿਧਿ, ਨ ਪੁਬ੍ਬੇ ਵੁਤ੍ਤਉਗ੍ਗਹਮਤ੍ਤਂ, ਤਤੋ. ਏਕਪਦਮ੍ਪੀਤਿ ਏਕਕੋਟ੍ਠਾਸਮ੍ਪਿ.
ਅਨੁਵਹਨਾਤਿ ਅਸ੍ਸਾਸਪਸ੍ਸਾਸਾਨਂ ਅਨੁਗਮਨਵਸੇਨ ਸਤਿਯਾ ਨਿਰਨ੍ਤਰਂ ਅਨੁਪ੍ਪਵਤ੍ਤਨਾ. ਯਸ੍ਮਾ ਪਨ ਗਣਨਾਦਿਵਸੇਨ ਵਿਯ ਫੁਸਨਾਵਸੇਨ ਵਿਸੁਂ ਮਨਸਿਕਾਰੋ ਨਤ੍ਥਿ, ਫੁਟ੍ਠਫੁਟ੍ਠਟ੍ਠਾਨੇ ਏਵ ਗਣਨਾਦਿ ਕਾਤਬ੍ਬਨ੍ਤਿ ਦਸ੍ਸੇਤੁਂ ਇਧ ਫੁਸਨਾਗਹਣਨ੍ਤਿ ਦੀਪੇਨ੍ਤੋ ‘‘ਫੁਸਨਾਤਿ ਫੁਟ੍ਠਟ੍ਠਾਨ’’ਨ੍ਤਿ ਆਹ. ਠਪਨਾਤਿ ਸਮਾਧਾਨਂ, ਸਮਾਧਿਪ੍ਪਧਾਨਾ ਪਨ ਅਪ੍ਪਨਾਤਿ ਆਹ ‘‘ਠਪਨਾਤਿ ਅਪ੍ਪਨਾ’’ਤਿ. ਅਨਿਚ੍ਚਤਾਦੀਨਂ ਲਕ੍ਖਣਤੋ ਸਲ੍ਲਕ੍ਖਣਾ ਵਿਪਸ੍ਸਨਾ. ਪਵਤ੍ਤਤੋ ਨਿਮਿਤ੍ਤਤੋ ਚ ਵਿਨਿਵਟ੍ਟਨਤੋ ਵਿਨਿਵਟ੍ਟਨਾ ਮਗ੍ਗੋ. ਕਿਲੇਸਪਟਿਪ੍ਪਸ੍ਸਦ੍ਧਿਭਾਵਤੋ ਪਾਰਿਸੁਦ੍ਧਿ ਫਲਂ. ਤੇਸਨ੍ਤਿ ਵਿਨਿਵਟ੍ਟਨਾਪਾਰਿਸੁਦ੍ਧੀਨਂ. ਖਣ੍ਡਨ੍ਤਿ ‘‘ਏਕਂ ਤੀਣਿ ਪਞ੍ਚਾ’’ਤਿ ਏਕਨ੍ਤਰਿਕਾਦਿਭਾਵੇਨ ਗਣਨਾਯ ਖਣ੍ਡਨਂ. ਅਥ ਵਾ ਖਣ੍ਡਨ੍ਤਿ ਅਨ੍ਤਰਨ੍ਤਰਾ ਕਤਿਪਯਕਾਲਂ ਅਗਣੇਤ੍ਵਾ ਪੁਨ ਗਣਨਵਸੇਨ ਅਨ੍ਤਰਾ ਓਧਿਪਰਿਚ੍ਛੇਦੋ ਨ ਦਸ੍ਸੇਤਬ੍ਬੋ. ਤਥਾ ਖਣ੍ਡਂ ਦਸ੍ਸੇਨ੍ਤਸ੍ਸ ਹਿ ‘‘ਕਮ੍ਮਟ੍ਠਾਨਨਿਨ੍ਨਂ ਪਵਤ੍ਤਤਿ ਨੁ ਖੋ ਮੇ ਚਿਤ੍ਤਂ, ਨੋ’’ਤਿ ਵੀਮਂਸੁਪ੍ਪਤ੍ਤਿਯਾ ਵਿਕ੍ਖੇਪੋ ਹੋਤਿ, ਤੇਨਾਹ ਸਿਖਾਪ੍ਪਤ੍ਤਂ ਨੁ ਖੋ ਮੇਤਿਆਦਿ, ਇਦਞ੍ਚ ਏਵਂ ਖਣ੍ਡਂ ਦਸ੍ਸੇਤ੍ਵਾ ਚਿਰਤਰਂ ਗਣਨਾਯ ਮਨਸਿਕਰੋਨ੍ਤਸ੍ਸ ਵਸੇਨ ਵੁਤ੍ਤਂ. ਸੋ ਹਿ ਤਥਾ ਲਦ੍ਧਂ ਅਵਿਕ੍ਖੇਪਮਤ੍ਤਂ ਨਿਸ੍ਸਾਯ ਏਵਂ ਮਞ੍ਞੇਯ੍ਯ. ਯੋ ਉਪਟ੍ਠਾਤਿ, ਤਂ ਗਹੇਤ੍ਵਾਤਿ ਇਦਂ ਅਸ੍ਸਾਸਪਸ੍ਸਾਸੇਸੁ ਯਸ੍ਸ ਏਕੋਵ ਪਠਮਂ ਉਪਟ੍ਠਾਤਿ, ਤਂ ਸਨ੍ਧਾਯ ਵੁਤ੍ਤਂ, ਯਸ੍ਸ ਪਨ ਉਭੋਪਿ ਉਪਟ੍ਠਹਨ੍ਤਿ, ਤੇਨ ਉਭਯਮ੍ਪਿ ਗਹੇਤ੍ਵਾ ਗਣਿਤਬ੍ਬਂ. ਯੋ ਉਪਟ੍ਠਾਤੀਤਿ ਇਮਿਨਾਵ ਦ੍ਵੀਸੁ ਨਾਸਾਪੁਟਵਾਤੇਸੁ ਯੋ ਪਾਕਟੋ ਹੋਤਿ, ਸੋ ਗਹੇਤਬ੍ਬੋਤਿ ਅਯਮ੍ਪਿ ਅਤ੍ਥੋ ਦੀਪਿਤੋਤਿ ਗਹੇਤਬ੍ਬਂ. ਪਠਮਂ ਏਕੇਕਸ੍ਮਿਂ ਉਪਟ੍ਠਿਤੇਪਿ ਉਪਲਕ੍ਖੇਤ੍ਵਾ ਗਣਨ੍ਤਸ੍ਸੇਵ ਕਮੇਨ ਉਭੋਪਿ ਪਾਕਟਾ ਹੋਨ੍ਤੀਤਿ ਆਹ ‘‘ਅਸ੍ਸਾਸਪਸ੍ਸਾਸਾ ਪਾਕਟਾ ਹੋਨ੍ਤੀ’’ਤਿ. ਏਵਂ ਸੀਘਂ ਸੀਘਂ ਗਣੇਤਬ੍ਬਮੇਵਾਤਿ ਸਮ੍ਬਨ੍ਧੋ. ਏਵਂ ਸੀਘਗਣਨਾਰਮ੍ਭਸ੍ਸ ਓਕਾਸਂ ਦਸ੍ਸੇਤੁਂ ਇਮਸ੍ਸਾਪਿ ਪੁਰਿਮਨਯੇਨ ਗਣਯਤੋਤਿਆਦਿ ਵੁਤ੍ਤਂ. ਤਤ੍ਥ ਪੁਰਿਮਨਯੇਨਾਤਿ ਦਨ੍ਧਗਣਨਾਯ, ਪਾਕਟਾ ਹੁਤ੍ਵਾਤਿ ਇਮਿਨਾ ਦਨ੍ਧਗਣਨਾਯ ਆਰਦ੍ਧਕਾਲੇ ਚਿਤ੍ਤਸ੍ਸ ਅਵਿਸਦਤਾਯ ਸੁਖੁਮਸ੍ਸਾਸਾਦੀਨਂ ਅਪਾਕਟਤਂ, ਪਚ੍ਛਾ ਵਿਸਦਕਾਲੇ ਪਾਕਟਤਞ੍ਚ ਤੇਸੁ ਚ ਪਾਕਟੇਸੁ ਦਨ੍ਧਗਣਨਂ ਪਹਾਯ ਸੀਘਗਣਨਾ ਕਾਤਬ੍ਬਾਤਿ ਦਸ੍ਸੇਤਿ. ਸੀਘਗਣਨਾਯ ਨਿਪ੍ਪਰਿਯਾਯਤੋ ਨਿਰਨ੍ਤਰਪ੍ਪਵਤ੍ਤਿ ਅਪ੍ਪਨਾਵੀਥਿਯਮੇਵ, ਨ ਕਾਮਾਵਚਰੇ ਭਵਙ੍ਗਨ੍ਤਰਿਕਤ੍ਤਾਤਿ ਆਹ ‘‘ਨਿਰਨ੍ਤਰਪ੍ਪਵਤ੍ਤਂ ਵਿਯਾ’’ਤਿ. ਪੁਰਿਮਨਯੇਨੇਵਾਤਿ ਸੀਘਗਣਨਾਯ. ਅਨ੍ਤੋ ਪਵਿਸਨ੍ਤਂ ਵਾਤਂ ਮਨਸਿਕਰੋਨ੍ਤੋ ਅਨ੍ਤੋ ਚਿਤ੍ਤਂ ਪਵੇਸੇਤਿ ਨਾਮ.
ਏਤਨ੍ਤਿ ਏਤਂ ਅਸ੍ਸਾਸਪਸ੍ਸਾਸਜਾਤਂ. ਅਨੁਗਮਨਨ੍ਤਿ ਫੁਟ੍ਠਟ੍ਠਾਨੇ ਮਨਸਿਕਰਣਮੇਵ, ਨ ਅਸ੍ਸਾਸਪਸ੍ਸਾਸਾਨਂ ਅਨੁਵਤ੍ਤਨਂ, ਤੇਨਾਹ – ‘‘ਤਞ੍ਚ ਖੋ ਨ ਆਦਿਮਜ੍ਝਪਰਿਯੋਸਾਨਾਨੁਗਮਨਵਸੇਨਾ’’ਤਿ. ਫੁਸਨਾਠਪਨਾਵਸੇਨ ਵਿਸੁਂ ਮਨਸਿਕਾਰੋ ਨਤ੍ਥੀਤਿ ਇਮਿਨਾ ਯਥਾ ਗਣਨਾਯ ਫੁਸਨਾਯ ਚ ਮਨਸਿਕਰੋਤਿ, ਏਵਂ ਅਨੁਬਨ੍ਧਨਂ ਵਿਨਾ ਕੇਵਲਂ ਠਪਨਾਯ ਚ ਫੁਸਨਾਯ ਚ ਮਨਸਿਕਾਰੋਪਿ ਨਤ੍ਥੀਤਿ ਦਸ੍ਸੇਨ੍ਤੇਨ ਗਣਨਂ ਪਟਿਸਂਹਰਿਤ੍ਵਾ ਯਾਵ ਅਪ੍ਪਨਾ ਉਪ੍ਪਜ੍ਜਤਿ, ਤਾਵ ਅਨੁਬਨ੍ਧਨਾਯ ਚ ਫੁਸਨਾਯ ਚ ਮਨਸਿਕਰੋਤਿ, ਅਪ੍ਪਨਾਯ ਪਨ ਉਪ੍ਪਨ੍ਨਾਯ ਅਨੁਬਨ੍ਧਨਾਯ ਠਪਨਾਯ ਚ ਮਨਸਿਕਰੋਤਿ ਨਾਮਾਤਿ ਦੀਪਿਤਂ ਹੋਤਿ, ਅਟ੍ਠਕਥਾਯਂ ਪਨ ਅਨੁਬਨ੍ਧਨਾਯ ਵਿਨਾ ਠਪਨਾਯ ਮਨਸਿਕਾਰੋ ਨਤ੍ਥੀਤਿ ਦਸ੍ਸਨਤ੍ਥਂ ‘‘ਅਨੁਬਨ੍ਧਨਾਯ ਚ ਫੁਸਨਾਯ ਚ ਠਪਨਾਯ ਚ ਮਨਸਿਕਰੋਤੀਤਿ ਵੁਚ੍ਚਤੀ’’ਤਿ ਏਤ੍ਤਕਮੇਵ ਵੁਤ੍ਤਨ੍ਤਿ ਗਹੇਤਬ੍ਬਂ. ਯਾ ਅਚ੍ਚਨ੍ਤਾਯ ਨ ਮਿਨੋਤਿ ਨ ਵਿਨਿਚ੍ਛਨਤਿ, ਸਾ ਮਾਨਸ੍ਸ ਸਮੀਪੇਤਿ ਉਪਮਾਨਂ ਸਿਦ੍ਧਸਾਦਿਸੇਨ ਸਾਧ੍ਯਸਾਧਨਂ ਯਥਾ ਗੋ ਵਿਯ ਗਵਯੋਤਿ. ਪਙ੍ਗੁਲ਼ੋਤਿ ਪੀਠਸਪ੍ਪੀ. ਦੋਲਾਤਿ ਪੇਙ੍ਖੋਲੋ. ਕੀਲ਼ਤਨ੍ਤਿ ਕੀਲ਼ਨ੍ਤਾਨਂ. ਉਪਨਿਬਨ੍ਧਨਤ੍ਥਮ੍ਭਮੂਲੇਤਿ ਨਾਸਿਕਗ੍ਗਂ ਮੁਖਨਿਮਿਤ੍ਤਞ੍ਚ ਸਨ੍ਧਾਯ ਵੁਤ੍ਤਂ. ਆਦਿਤੋ ਪਭੁਤੀਤਿ ਉਪਮੇਯ੍ਯਤ੍ਥਦਸ੍ਸਨਤੋ ਪਟ੍ਠਾਯ. ਨਿਮਿਤ੍ਤਨ੍ਤਿ ਉਪਨਿਬਨ੍ਧਨਨਿਮਿਤ੍ਤਂ ਨਾਸਿਕਗ੍ਗਂ, ਮੁਖਨਿਮਿਤ੍ਤਂ ਵਾ. ਅਨਾਰਮ੍ਮਣਮੇਕਚਿਤ੍ਤਸ੍ਸਾਤਿ ਅਸ੍ਸਾਸਪਸ੍ਸਾਸਾਨਂ ਏਕਕ੍ਖਣੇ ਅਪ੍ਪਵਤ੍ਤਨਤੋ ਏਕਸ੍ਸ ਚਿਤ੍ਤਸ੍ਸ ਤਯੋਪਿ ਆਰਮ੍ਮਣਂ ਨ ਹੋਨ੍ਤਿ, ਨਿਮਿਤ੍ਤੇਨ ਸਹ ਅਸ੍ਸਾਸੋ ਪਸ੍ਸਾਸੋ ਵਾਤਿ ਦ੍ਵੇਯੇਵ ਏਕਕ੍ਖਣੇ ਆਰਮ੍ਮਣਂ ਹੋਨ੍ਤੀਤਿ ਅਤ੍ਥੋ. ਅਜਾਨਤੋ ਚ ਤਯੋ ਧਮ੍ਮੇਤਿ ਨਿਮਿਤ੍ਤਂ ਅਸ੍ਸਾਸੋ ਪਸ੍ਸਾਸੋਤਿ ਇਮੇ ਤਯੋ ਧਮ੍ਮੇ ਆਰਮ੍ਮਣਕਰਣਵਸੇਨ ਅਵਿਨ੍ਦਨ੍ਤਸ੍ਸ, ਚ-ਸਦ੍ਦੋ ਬ੍ਯਤਿਰੇਕੋ, ਤੇਨ ਏਵਞ੍ਚ ਸਤਿ ਅਯਂ ਅਨਿਟ੍ਠਪ੍ਪਸਙ੍ਗੋਤਿ ਬ੍ਯਤਿਰੇਕਂ ਦਸ੍ਸੇਤਿ. ਭਾਵਨਾਤਿ ਆਨਾਪਾਨਸ੍ਸਤਿਭਾਵਨਾ.
ਕਥਂ ਇਮੇ…ਪੇ… ਵਿਸੇਸਮਧਿਗਚ੍ਛਤੀਤਿ ਇਦਂ ਪਰਿਹਾਰਗਾਥਾਯ ਵੁਤ੍ਤਮੇਵਤ੍ਥਂ ਕਕਚੋਪਮਾਯ (ਮ. ਨਿ. ੧.੨੨੨ ਆਦਯੋ) ਵਿਵਰਿਤੁਂ ਪੁਚ੍ਛਾਠਪਨਂ. ਤਤ੍ਥ ਕਥਂ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ ‘‘ਕਥਮਿਮੇ ਅਵਿਦਿਤਾ…ਪੇ… ਕਥਂ ਵਿਸੇਸਮਧਿਗਚ੍ਛਤੀ’’ਤਿ. ਪਧਾਨਨ੍ਤਿ ਭਾਵਨਾਨਿਪ੍ਫਾਦਕਂ ਵੀਰਿਯਂ. ਪਯੋਗਨ੍ਤਿ ਨੀਵਰਣਵਿਕ੍ਖਮ੍ਭਕਂ ਭਾਵਨਾਨੁਯੋਗਂ. ਵਿਸੇਸਨ੍ਤਿ ਅਰਹਤ੍ਤਪਰਿਯੋਸਾਨਵਿਸੇਸਂ. ਪਧਾਨਨ੍ਤਿ ਰੁਕ੍ਖਸ੍ਸ ਛੇਦਨਵੀਰਿਯਂ. ਪਯੋਗਨ੍ਤਿ ਤਸ੍ਸੇਵ ਛੇਦਨਕਕਿਰਿਯਂ. ਕਿਞ੍ਚਾਪੇਤ੍ਥ ‘‘ਵਿਸੇਸਮਧਿਗਚ੍ਛਤੀ’’ਤਿ ਉਪਮਾਯਂ ਨ ਵੁਤ੍ਤਂ, ਤਥਾਪਿ ਅਤ੍ਥਤੋ ਯੋਜੇਤਬ੍ਬਮੇਵ. ਯਥਾ ਰੁਕ੍ਖੋਤਿਆਦਿ ਉਪਮਾਸਂਸਨ੍ਦਨਂ. ਨਾਸਿਕਗ੍ਗੇ ਵਾ ਮੁਖਨਿਮਿਤ੍ਤੇ ਵਾਤਿ ਦੀਘਨਾਸਿਕੋ ਨਾਸਿਕਗ੍ਗੇ, ਇਤਰੋ ਮੁਖਂ ਨਿਮਿਯਤਿ ਛਾਦਿਯਤਿ ਏਤੇਨਾਤਿ ਮੁਖਨਿਮਿਤ੍ਤਨ੍ਤਿ ਲਦ੍ਧਨਾਮੇ ਉਤ੍ਤਰੋਟ੍ਠੇ.
ਇਦਂ ਪਧਾਨਨ੍ਤਿ ਯੇਨ ਵੀਰਿਯਾਰਮ੍ਭੇਨ ਕਾਯੋਪਿ ਚਿਤ੍ਤਮ੍ਪਿ ਭਾਵਨਾਕਮ੍ਮਸ੍ਸ ਅਰਹਂ ਇਧ ਪਧਾਨਨ੍ਤਿ ਫਲੇਨ ਹੇਤੁਂ ਦਸ੍ਸੇਤਿ. ਉਪਕ੍ਕਿਲੇਸਾਤਿ ਨੀਵਰਣਾ. ਵਿਤਕ੍ਕਾਤਿ ਕਾਮਵਿਤਕ੍ਕਾਦਿਮਿਚ੍ਛਾਵਿਤਕ੍ਕਾ, ਨੀਵਰਣਪ੍ਪਹਾਨੇਨ ਵਾ ਪਠਮਜ੍ਝਾਨਾਧਿਗਮਂ ਦਸ੍ਸੇਤ੍ਵਾ ਵਿਤਕ੍ਕੂਪਸਮਾਪਦੇਸੇਨ ਦੁਤਿਯਜ੍ਝਾਨਾਦੀਨਮਧਿਗਮਮਾਹ. ਅਯਂ ਪਯੋਗੋਤਿ ਅਯਂ ਝਾਨਾਧਿਗਮਸ੍ਸ ਹੇਤੁਭੂਤੋ ਕਮ੍ਮਟ੍ਠਾਨਾਨੁਯੋਗਸਙ੍ਖਾਤੋ ਪਯੋਗੋ. ਸਂਯੋਜਨਾ ਪਹੀਯਨ੍ਤੀਤਿ ਦਸਪਿ ਸਂਯੋਜਨਾਨਿ ਮਗ੍ਗਪਅਪਾਟਿਯਾ ਸਮੁਚ੍ਛੇਦਵਸੇਨ ਪਹੀਯਨ੍ਤਿ. ਬ੍ਯਨ੍ਤੀ ਹੋਨ੍ਤੀਤਿ ਤਥਾ ਸਤ੍ਤਪਿ ਅਨੁਸਯਾ ਭਙ੍ਗਮਤ੍ਤਸ੍ਸਪਿ ਅਨਵਸੇਸਤੋ ਵਿਗਤਨ੍ਤਾ ਹੋਨ੍ਤਿ. ਅਯਂ ਵਿਸੇਸੋਤਿ ਇਮਂ ਸਮਾਧਿਂ ਨਿਸ੍ਸਾਯ ਅਨੁਕ੍ਕਮੇਨ ਲਬ੍ਭਮਾਨੋ ਅਯਂ ਸਂਯੋਜਨਪ੍ਪਹਾਨਾਦਿਕੋ ਇਮਸ੍ਸ ਸਮਾਧਿਸ੍ਸ ਵਿਸੇਸੋਤਿ ਅਤ੍ਥੋ. ਏਵਂ ਇਮੇ ਤਯੋ ਧਮ੍ਮਾਤਿਆਦਿ ਨਿਗਮਨਵਚਨਂ. ਪਰਿਪੁਣ੍ਣਾਤਿ ਸੋਲ਼ਸਨ੍ਨਂ ਵਤ੍ਥੂਨਂ ਪਾਰਿਪੂਰਿਯਾ ਸਬ੍ਬਸੋ ਪੁਣ੍ਣਾ. ਅਨੁਪੁਬ੍ਬਨ੍ਤਿ ਅਨੁਕ੍ਕਮੇਨ. ਪਰਿਚਿਤਾਤਿ ਪਰਿਚਿਣ੍ਣਾ. ਇਮਂ ਲੋਕਨ੍ਤਿ ਖਨ੍ਧਾਦਿਲੋਕਂ ਪਞ੍ਞਾਪਭਾਸੇਨ ਪਭਾਸੇਤਿ.
ਇਧਾਤਿ ਇਮਸ੍ਮਿਂ ਠਾਨੇ. ਅਸ੍ਸਾਤਿ ਉਪਮਾਭੂਤਸ੍ਸ ਕਕਚਸ੍ਸ. ਆਨਯਨੇ ਪਯੋਜਨਨ੍ਤਿ ਯੋਜੇਤਬ੍ਬਂ. ਨਿਮਿਤ੍ਤਨ੍ਤਿ ਪਟਿਭਾਗਨਿਮਿਤ੍ਤਂ. ਅਵਸੇਸਝਾਨਙ੍ਗਪਟਿਮਣ੍ਡਿਤਾਤਿ ਵਿਤਕ੍ਕਾਦਿਅਵਸੇਸਝਾਨਙ੍ਗਪਟਿਮਣ੍ਡਿਤਾਤਿ ਵਦਨ੍ਤਿ. ਵਿਚਾਰਾਦੀਹੀਤਿ ਪਨ ਵਤ੍ਤਬ੍ਬਂ ਨਿਪ੍ਪਰਿਯਾਯੇਨ ਵਿਤਕ੍ਕਸ੍ਸ ਅਪ੍ਪਨਾਭਾਵਤੋ. ਸੋ ਹਿ ‘‘ਅਪ੍ਪਨਾ ਬ੍ਯਪ੍ਪਨਾ’’ਤਿ ਨਿਦ੍ਦਿਟ੍ਠੋ. ਏਵਞ੍ਹਿ ਸਤਿ ਅਵਸੇਸ-ਸਦ੍ਦੋ ਉਪਪਨ੍ਨੋ ਹੋਤਿ, ਵਿਤਕ੍ਕਸਮ੍ਪਯੋਗਤੋ ਵਾ ਝਾਨਙ੍ਗੇਸੁ ਪਧਾਨਭੂਤੋ ਸਮਾਧਿ ਅਪ੍ਪਨਾਤਿ ਕਤ੍ਵਾ ‘‘ਅਵਸੇਸਝਾਨਙ੍ਗਪਟਿਮਣ੍ਡਿਤਾ ਅਪ੍ਪਨਾਸਙ੍ਖਾਤਾ ਠਪਨਾ ਚ ਸਮ੍ਪਜ੍ਜਤੀ’’ਤਿ ਵੁਤ੍ਤਂ. ਕਸ੍ਸਚਿ ਪਨ ਗਣਨਾਵਸੇਨੇਵ ਮਨਸਿਕਾਰਕਾਲਤੋ ਪਭੁਤੀਤਿ ਏਤ੍ਥ ‘‘ਅਨੁਕ੍ਕਮਤੋ…ਪੇ… ਪਤ੍ਤਂ ਵਿਯ ਹੋਤੀ’’ਤਿ ਉਪਰਿ ਵਕ੍ਖਮਾਨੋ ਗਨ੍ਥੋ ਪੁਰਾਣਪੋਤ੍ਥਕੇਸੁ ਦਿਸ੍ਸਤਿ, ਤਸ੍ਮਾ ਅਯਂ ਪਾਠੋ ਏਤ੍ਥਾਪਿ ਲਿਖਿਤਬ੍ਬੋ, ਲੇਖਕਾਨਂ ਪਨ ਦੋਸੇਨ ਗਲ਼ਿਤੋਤਿ ਵੇਦਿਤਬ੍ਬੋ.
ਓਲ਼ਾਰਿਕੇ ਅਸ੍ਸਾਸਪਸ੍ਸਾਸੇ ਨਿਰੁਦ੍ਧੇਤਿਆਦਿ ਹੇਟ੍ਠਾ ਵੁਤ੍ਤਨਯਮ੍ਪਿ ਵਿਚੇਤਬ੍ਬਾਕਾਰਪ੍ਪਤ੍ਤਸ੍ਸ ਕਾਯਸਙ੍ਖਾਰਸ੍ਸ ਵਿਚਯਨਵਿਧਿਂ ਦਸ੍ਸੇਤੁਂ ਆਨੀਤਂ. ਦੇਸਤੋਤਿ ਪੁਬ੍ਬੇ ਫੁਸਨਵਸੇਨ ਗਹਿਤਟ੍ਠਾਨਤੋ. ਨਿਮਿਤ੍ਤਂ ਪਟ੍ਠਪੇਤਬ੍ਬਨ੍ਤਿ ਪੁਬ੍ਬੇ ਗਹਿਤਾਕਾਰਨਿਮਿਤ੍ਤਗ੍ਗਾਹਿਕਾ ਸਞ੍ਞਾ ਫੁਸਨਟ੍ਠਾਨੇ ਪਟ੍ਠਪੇਤਬ੍ਬਾ. ਇਮਮੇਵ ਹਿ ਅਤ੍ਥਵਸਨ੍ਤਿ ਇਮਂ ਅਨੁਪਟ੍ਠਹਨ੍ਤਸ੍ਸ ਆਰਮ੍ਮਣਸ੍ਸ ਉਪਟ੍ਠਾਨਵਿਧਿਸਙ੍ਖਾਤਂ ਕਾਰਣਂ ਪਟਿਚ੍ਚ. ਇਤੋਤਿ ਆਨਾਪਾਨਕਮ੍ਮਟ੍ਠਾਨਤੋ. ਗਰੁਕਤਾ ਚ ਭਾਵਨਾਦੁਕ੍ਕਰਤਾਯਾਤਿ ਆਹ ‘‘ਗਰੁਕਭਾਵਨ’’ਨ੍ਤਿ. ਚਰਿਤ੍ਵਾਤਿ ਗੋਚਰਂ ਗਹੇਤ੍ਵਾ. ਨਿਮਿਤ੍ਤਨ੍ਤਿ ਉਗ੍ਗਹਨਿਮਿਤ੍ਤਂ, ਪਟਿਭਾਗਨਿਮਿਤ੍ਤਂ ਵਾ. ਉਭਯਮ੍ਪਿ ਹਿ ਇਧ ਏਕਜ੍ਝਂ ਵੁਤ੍ਤਂ. ਤਥਾ ਹਿ ਤੂਲਪਿਚੁਆਦਿਉਪਮਤ੍ਤਯਂ ਉਗ੍ਗਹੇ ਯੁਜ੍ਜਤਿ, ਸੇਸਂ ਉਭਯਤ੍ਥ.
ਤਾਰਕਰੂਪਂ ਵਿਯਾਤਿ ਤਾਰਕਾਯ ਸਰੂਪਂ ਵਿਯ. ਸਞ੍ਞਾਨਾਨਤਾਯਾਤਿ ਨਿਮਿਤ੍ਤੁਪਟ੍ਠਾਨਤੋ ਪੁਬ੍ਬੇ ਪਵਤ੍ਤਸਞ੍ਞਾਨਂ ਨਾਨਤਾਯ. ਸਞ੍ਞਜਨ੍ਤਿ ਭਾਵਨਾਸਞ੍ਞਾਯ ਪਰਿਕਪ੍ਪਿਤਂ, ਨ ਉਪ੍ਪਾਦਿਤਂ ਅਵਿਜ੍ਜਮਾਨਤ੍ਤਾ, ਤੇਨਾਹ ‘‘ਨਾਨਤੋ ਉਪਟ੍ਠਾਤੀ’’ਤਿ. ਏਵਂ ਹੋਤੀਤਿ ਭਾਵਨਮਨੁਯੁਤ੍ਤਸ੍ਸ ਏਵਂ ਉਪਟ੍ਠਾਤਿ. ਏਵਨ੍ਤਿ ਏਵਂ ਸਤਿ, ਯਥਾਵੁਤ੍ਤਨਯੇਨ ਨਿਮਿਤ੍ਤੇ ਏਵ ਚਿਤ੍ਤਸ੍ਸ ਠਪਨੇ ਸਤੀਤਿ ਅਤ੍ਥੋ. ਇਤੋ ਪਭੁਤੀਤਿ ਇਤੋ ਪਟਿਭਾਗਨਿਮਿਤ੍ਤੁਪ੍ਪਤ੍ਤਿਤੋ ਪਟ੍ਠਾਯ. ਨਿਮਿਤ੍ਤੇਤਿ ਪਟਿਭਾਗਨਿਮਿਤ੍ਤੇ. ਠਪਯਨ੍ਤਿ ਠਪਨਾਵਸੇਨ ਚਿਤ੍ਤਂ ਠਪਨ੍ਤੋ. ਨਾਨਾਕਾਰਨ੍ਤਿ ‘‘ਚਤ੍ਤਾਰੋ ਵਣ੍ਣਾ’’ਤਿ ਏਵਂ ਵੁਤ੍ਤਂ ਨਾਨਾਕਾਰਂ. ਵਿਭਾਵਯਨ੍ਤਿ ਵਿਭਾਵੇਨ੍ਤੋ ਅਨ੍ਤਰਧਾਪੇਨ੍ਤੋ. ਨਿਮਿਤ੍ਤੁਪ੍ਪਤ੍ਤਿਤੋ ਪਟ੍ਠਾਯ ਹਿ ਤੇ ਆਕਾਰਾ ਅਮਨਸਿਕਰੋਤੋ ਅਨ੍ਤਰਹਿਤਾ ਵਿਯ ਹੋਨ੍ਤਿ. ਅਸ੍ਸਾਸਪਸ੍ਸਾਸੇਤਿ ਅਸ੍ਸਾਸੇ ਪਸ੍ਸਾਸੇ ਚ ਯੋ ਨਾਨਾਕਾਰੋ, ਤਂ ਵਿਭਾਵਯਂ ਅਸ੍ਸਾਸਪਸ੍ਸਾਸਸਮ੍ਭੂਤੇ ਵਾ ਨਿਮਿਤ੍ਤੇ ਚਿਤ੍ਤਂ ਠਪਯਂ ਸਕਂ ਚਿਤ੍ਤਂ ਨਿਬਨ੍ਧਤਿ ਨਾਮਾਤਿ ਯੋਜਨਾ. ਕੇਚਿ ਪਨ ਵਿਭਾਵਯਨ੍ਤਿ ਏਤਸ੍ਸ ਵਿਭਾਵੇਨ੍ਤੋ ਵਿਦਿਤਂ ਪਾਕਟਂ ਕਰੋਨ੍ਤੋਤਿ ਅਤ੍ਥਂ ਵਦਨ੍ਤਿ, ਤਂ ਪੁਬ੍ਬਭਾਗਵਸੇਨ ਯੁਜ੍ਜੇਯ੍ਯ. ਅਯਞ੍ਹੇਤ੍ਥ ਅਤ੍ਥੋ – ਅਸ੍ਸਾਸਪਸ੍ਸਾਸੇ ਨਾਨਾਕਾਰਂ ਵਿਭਾਵੇਨ੍ਤੋ ਪਜਾਨਨ੍ਤੋ ਤਤ੍ਥ ਯਂ ਲਦ੍ਧਂ ਨਿਮਿਤ੍ਤਂ, ਤਸ੍ਮਿਂ ਚਿਤ੍ਤਂ ਠਪੇਨ੍ਤੋ ਅਨੁਕ੍ਕਮੇਨ ਸਕਂ ਚਿਤ੍ਤਂ ਨਿਬਨ੍ਧਤਿ ਅਪ੍ਪੇਤੀਤਿ.
ਕਿਲੇਸਾਤਿ ਅਵਸੇਸਕਿਲੇਸਾ. ਸਨ੍ਨਿਸਿਨ੍ਨਾਯੇਵਾਤਿ ਅਲਦ੍ਧਨੀਵਰਣਸਹਾਯਾ ਓਲੀਨਾਯੇਵ. ਉਪਚਾਰਭੂਮਿਯਨ੍ਤਿ ਉਪਚਾਰਾਵਤ੍ਥਾਯਂ. ਲਕ੍ਖਣਤੋਤਿ ਵਿਕ੍ਖਮ੍ਭਨਾਦਿਸਭਾਵਤੋ ਵਾ ਅਨਿਚ੍ਚਾਦਿਸਭਾਵਤੋ ਵਾ. ਗੋਚਰੋਤਿ ਭਿਕ੍ਖਾਚਾਰਗਾਮੋ. ਯਤ੍ਥ ਦੁਲ੍ਲਭਾ ਸਪ੍ਪਾਯਭਿਕ੍ਖਾ, ਸੋ ਅਸਪ੍ਪਾਯੋ, ਇਤਰੋ ਸਪ੍ਪਾਯੋ. ਭਸ੍ਸਨ੍ਤਿ ਦਸਕਥਾਵਤ੍ਥੁਨਿਸ੍ਸਿਤਂ ਭਸ੍ਸਂ, ਤਂ ਸਪ੍ਪਾਯਂ, ਇਤਰਮਸਪ੍ਪਾਯਂ. ਸੇਸੇਸੁ ਆਵਾਸਾਦੀਸੁ ਯਤ੍ਥ ਯਤ੍ਥ ਅਸਮਾਹਿਤਂ ਚਿਤ੍ਤਂ ਸਮਾਧਿਯਤਿ, ਤਂ ਤਂ ਸਪ੍ਪਾਯਂ, ਇਤਰਮਸਪ੍ਪਾਯਨ੍ਤਿ ਗਹੇਤਬ੍ਬਂ. ਯਸ੍ਸ ਪਨ ਏਵਂ ਸਤ੍ਤਵਿਧਂ ਅਸਪ੍ਪਾਯਂ ਵਜ੍ਜੇਤ੍ਵਾ ਸਪ੍ਪਾਯਮੇਵ ਸੇਵਨ੍ਤਸ੍ਸਪਿ ਅਪ੍ਪਨਾ ਨ ਹੋਤਿ, ਤੇਨ ਸਮ੍ਪਾਦੇਤਬ੍ਬਂ ਦਸਵਿਧਂ ਅਪ੍ਪਨਾਕੋਸਲ੍ਲਂ ਦਸ੍ਸੇਨ੍ਤੋ ਵਤ੍ਥੁਵਿਸਦਕਿਰਿਯਾਤਿਆਦਿਮਾਹ. ਤਤ੍ਥ ਵਤ੍ਥੁਵਿਸਦਕਿਰਿਯਾ ਨਾਮ ਕੇਸਨਖਚ੍ਛੇਦਨਾਦੀਹਿ ਅਜ੍ਝਤ੍ਤਿਕਸ੍ਸ ਸਰੀਰਵਤ੍ਥੁਸ੍ਸ, ਚੀਵਰਸੇਨਾਸਨਾਦਿਧੋਵਨਪਰਿਕਮ੍ਮਾਦੀਹਿ ਬਾਹਿਰਵਤ੍ਥੁਸ੍ਸ ਚ ਵਿਸਦਭਾਵਕਰਣਂ. ਏਵਞ੍ਹਿ ਞਾਣਮ੍ਪਿ ਵਿਸਦਕਿਚ੍ਚਨਿਪ੍ਫਤ੍ਤਿਕਰਂ ਹੋਤਿ. ਇਨ੍ਦ੍ਰਿਯਸਮਤ੍ਤਪਟਿਪਾਦਨਤਾ ਨਾਮ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਸਮਭਾਵਕਰਣਂ. ਨਿਮਿਤ੍ਤਕੁਸਲਤਾ ਨਾਮ ਭਾਵਨਾਯ ਲਦ੍ਧਨਿਮਿਤ੍ਤਸ੍ਸ ਰਕ੍ਖਣਕੋਸਲ੍ਲਂ. ਯਸ੍ਮਿਂ ਸਮਯੇ ਚਿਤ੍ਤਂ ਨਿਗ੍ਗਹੇਤਬ੍ਬਨ੍ਤਿਆਦੀਸੁ ਯਸ੍ਮਿਂ ਸਮਯੇ ਚਿਤ੍ਤਂ ਅਚ੍ਚਾਰਦ੍ਧਤਾਦੀਹਿ ਕਾਰਣੇਹਿ ਉਦ੍ਧਤਤਾਯ ਨਿਗ੍ਗਹੇਤਬ੍ਬਂ, ਤਦਾ ਧਮ੍ਮਵਿਚਯਸਮ੍ਬੋਜ੍ਝਙ੍ਗਾਦਯੋ ਤਯੋ ਅਭਾਵੇਤ੍ਵਾ ਪਸ੍ਸਦ੍ਧਾਦੀਨਂ ਤਿਣ੍ਣਂ ਭਾਵਨੇਨ ਚਿਤ੍ਤਸ੍ਸ ਨਿਗ੍ਗਣ੍ਹਨਾ ਹੋਤਿ. ਯਦਾਸ੍ਸ ਚਿਤ੍ਤਂ ਅਤਿਸਿਥਿਲਵੀਰਿਯਤਾਦੀਹਿ ਲੀਨਤਾਯ ਪਗ੍ਗਹੇਤਬ੍ਬਂ, ਤਦਾ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਾਦਯੋ ਤਯੋ ਅਭਾਵੇਤ੍ਵਾ ਧਮ੍ਮਵਿਚਯਾਦੀਨਂ ਤਿਣ੍ਣਂ ਭਾਵਨੇਨ ਚਿਤ੍ਤਸ੍ਸ ਪਗ੍ਗਣ੍ਹਨਂ ਹੋਤਿ. ਯਦਾਸ੍ਸ ਪਞ੍ਞਾਪਯੋਗਮਨ੍ਦਤਾਦੀਹਿ ਨਿਰਸ੍ਸਾਦਂ ਚਿਤ੍ਤਂ ਹੋਤਿ, ਤਦਾ ਤਸ੍ਸ ਚਿਤ੍ਤਸ੍ਸ ਅਟ੍ਠਸਂਵੇਗਵਤ੍ਥੁਪਚ੍ਚਵੇਕ੍ਖਣਾਦਿਨਾ (ਅ. ਨਿ. ਅਟ੍ਠ. ੧.੧.੪੧੮) ਸਮ੍ਪਹਂਸਨਸਙ੍ਖਾਤਾ ਸਂਵੇਜਨਾ ਹੋਤਿ. ਯਦਾ ਪਨਸ੍ਸ ਏਵਂ ਪਟਿਪਜ੍ਜਨਤੋ ਅਲੀਨਂ ਅਨੁਦ੍ਧਤਂ ਅਨਿਰਸ੍ਸਾਦਂ ਆਰਮ੍ਮਣੇ ਸਮਪ੍ਪਵਤ੍ਤਂ ਸਮਥਵੀਥਿਪਟਿਪਨ੍ਨਞ੍ਚ ਚਿਤ੍ਤਂ ਹੋਤਿ, ਤਦਾ ਤਸ੍ਸ ਪਗ੍ਗਹਨਿਗ੍ਗਹਸਮ੍ਪਹਂਸਨੇਸੁ ਅਬ੍ਯਾਪਾਰਤਾਸਮਾਪਜ੍ਜਨੇਨ ਅਜ੍ਝੁਪੇਕ੍ਖਨਾ ਹੋਤਿ.
ਤਦਧਿਮੁਤ੍ਤਤਾ ਨਾਮ ਸਮਾਧਿਅਧਿਮੁਤ੍ਤਤਾ, ਸਮਾਧਿਨਿਨ੍ਨਪੋਣਪਬ੍ਭਾਰਤਾਤਿ ਅਤ੍ਥੋ. ਏਤ੍ਥਾਤਿ ਏਤਿਸ੍ਸਂ ਕਾਯਾਨੁਪਸ੍ਸਨਾਯਂ.
ਪਾਰਿਸੁਦ੍ਧਿਂ ਪਤ੍ਤੁਕਾਮੋਤਿ ਫਲਂ ਅਧਿਗਨ੍ਤੁਕਾਮੋ ਸਮਾਪਜ੍ਜਿਤੁਕਾਮੋ ਚ. ਤਤ੍ਥ ਸਲ੍ਲਕ੍ਖਣਾਵਿਵਟ੍ਟਨਾਵਸੇਨ ਪਠਮਂ ਮਗ੍ਗਾਨਨ੍ਤਰਫਲਂ ਅਧਿਗਨ੍ਤੁਕਾਮੋ. ਤਤੋ ਪਰਂ ਸਲ੍ਲਕ੍ਖਣਵਸੇਨ ਫਲਸਮਾਪਤ੍ਤਿਂ ਸਮਾਪਜ੍ਜਿਤੁਕਾਮੋਪੀਤਿ ਏਵਮਤ੍ਥੋ ਗਹੇਤਬ੍ਬੋ. ਆਵਜ੍ਜਨਸਮਾਪਜ੍ਜਨ…ਪੇ… ਵਸਿਪ੍ਪਤ੍ਤਨ੍ਤਿ ਏਤ੍ਥ ਪਟਿਲਦ੍ਧਝਾਨਤੋ ਵੁਟ੍ਠਾਯ ਵਿਤਕ੍ਕਾਦੀਸੁ ਝਾਨਙ੍ਗੇਸੁ ਏਕੇਕਂ ਆਵਜ੍ਜਯਤੋ ਭਵਙ੍ਗਂ ਉਪਚ੍ਛਿਨ੍ਦਿਤ੍ਵਾ ਉਪ੍ਪਨ੍ਨਾਵਜ੍ਜਨਾਨਨ੍ਤਰਂ ਵਿਤਕ੍ਕਾਦੀਸੁ ਯਥਾਵਜ੍ਜਿਤਝਾਨਙ੍ਗਾਰਮ੍ਮਣਾਨਿ ਕਾਮਾਵਚਰਜਵਨਾਨਿ ਭਵਙ੍ਗਨ੍ਤਰਿਤਾਨਿ ਯਦਾ ਨਿਰਨ੍ਤਰਂ ਪਵਤ੍ਤਨ੍ਤਿ, ਅਥਸ੍ਸ ਆਵਜ੍ਜਨਵਸੀ ਸਿਦ੍ਧਾ ਹੋਤਿ. ਤਂ ਪਨ ਝਾਨਂ ਸਮਾਪਜ੍ਜਿਤੁਕਾਮਤਾਨਨ੍ਤਰਂ ਸੀਘਂ ਸਮਾਪਜ੍ਜਨਸਮਤ੍ਥਤਾ ਸਮਾਪਜ੍ਜਨਵਸੀ ਨਾਮ. ਅਚ੍ਛਰਾਮਤ੍ਤਂ ਵਾ ਦਸਚ੍ਛਰਾਮਤ੍ਤਂ ਵਾ ਖਣਂ ਝਾਨਂ ਠਪੇਤੁਂ ਸਮਤ੍ਥਤਾ ਅਧਿਟ੍ਠਾਨਵਸੀ ਨਾਮ. ਤਥੇਵ ਲਹੁਂ ਖਣਂ ਝਾਨਸਮਙ੍ਗੀ ਹੁਤ੍ਵਾ ਝਾਨਤੋ ਭਵਙ੍ਗੁਪ੍ਪਤ੍ਤਿਵਸੇਨ ਵੁਟ੍ਠਾਤੁਂ ਸਮਤ੍ਥਤਾ ਵੁਟ੍ਠਾਨਵਸੀ ਨਾਮ. ‘‘ਏਤ੍ਤਕਮੇਵ ਖਣਂ ਸਮਾਪਜ੍ਜਿਸ੍ਸਾਮੀ’’ਤਿ, ‘‘ਏਤ੍ਤਕਮੇਵ ਖਣਂ ਝਾਨਸਮਙ੍ਗੀ ਹੁਤ੍ਵਾ ਝਾਨਤੋ ਵੁਟ੍ਠਹਿਸ੍ਸਾਮੀ’’ਤਿ ਚ ਪਵਤ੍ਤਪੁਬ੍ਬਪਰਿਕਮ੍ਮਭੇਦੇਨੇਤ੍ਥ ਅਧਿਟ੍ਠਾਨਵੁਟ੍ਠਾਨਵਸਿਯੋ ਭਿਨ੍ਨਾ, ਨ ਸਰੂਪਭੇਦੇਨ, ਯਾ ‘‘ਸਮਾਪਤ੍ਤਿਕੁਸਲਤਾ, ਵੁਟ੍ਠਾਨਕੁਸਲਤਾ’’ਤਿ ਵੁਚ੍ਚਨ੍ਤਿ. ਪਚ੍ਚਵੇਕ੍ਖਣਵਸੀ ਪਨ ਆਵਜ੍ਜਨਵਸਿਯਾ ਏਵ ਵੁਤ੍ਤਾ. ਪਚ੍ਚਵੇਕ੍ਖਣਵੀਥਿਯਞ੍ਹਿ ਸੀਘਂ ਆਵਜ੍ਜਨੁਪ੍ਪਤ੍ਤਿਯਾ ਆਵਜ੍ਜਨਵਸੀ ਤਦਨਨ੍ਤਰਾਨਂ ਜਵਨਾਨਂ ਸਮੁਪ੍ਪਤ੍ਤਿਯਾ ਪਚ੍ਚਵੇਕ੍ਖਣਵਸੀਤਿ ਆਵਜ੍ਜਨਵਸੀਸਿਦ੍ਧਿਯਾਵ ਪਚ੍ਚਵੇਕ੍ਖਣਵਸੀ ਸਿਦ੍ਧਾ ਏਵ ਹੋਤੀਤਿ ਵੇਦਿਤਬ੍ਬਾ. ਝਾਨਙ੍ਗਾਨਿ ਪਰਿਗ੍ਗਹੇਤ੍ਵਾਤਿ ਝਾਨਚਿਤ੍ਤਸਮ੍ਪਯੁਤ੍ਤਾਨਿ ਝਾਨਙ੍ਗਾਨਿ ਲਕ੍ਖਣਾਦਿਵਸੇਨ ਪਰਿਗ੍ਗਹੇਤ੍ਵਾ. ਤੇਸਞ੍ਚ ਨਿਸ੍ਸਯਨ੍ਤਿ ਤੇਸਂ ਵਤ੍ਥੁਨਿਸ੍ਸਯਾਨਂ ਭੂਤਾਨਂ ਨਿਸ੍ਸਯਂ. ਇਦਞ੍ਚ ਕਰਜਕਾਯਸ੍ਸ ਵਤ੍ਥੁਦਸਕਸ੍ਸ ਭੂਤਨਿਸ੍ਸਯਤ੍ਤਾ ਸੁਤ੍ਤਨ੍ਤਨਯੇਨ ਵੁਤ੍ਤਂ, ਨ ਪਟ੍ਠਾਨਨਯੇਨ. ਨ ਹਿ ਕਲਾਪਨ੍ਤਰਗਤਾਨਿ ਭੂਤਾਨਿ ਕਲਾਪਨ੍ਤਰਗਤਾਨਂ ਭੂਤਾਨਂ ਨਿਸ੍ਸਯਪਚ੍ਚਯਾ ਹੋਨ੍ਤਿ, ਸੁਤ੍ਤਨ੍ਤਨਯੇਨ ਪਨ ਉਪਨਿਸ੍ਸਯਪਚ੍ਚਯੋਤਿ ਵੇਦਿਤਬ੍ਬਾਨਿ. ਪਟ੍ਠਾਨੇ ਹਿ ਅਸਙ੍ਗਹਿਤਾ ਸਬ੍ਬੇ ਪਚ੍ਚਯਾ ਸੁਤ੍ਤਨ੍ਤਿਕਨਯੇਨ ਉਪਨਿਸ੍ਸਯਪਚ੍ਚਯੇ ਸਙ੍ਗਯ੍ਹਨ੍ਤੀਤਿ ਵੇਦਿਤਬ੍ਬਂ. ਤਂਨਿਸ੍ਸਿਤਰੂਪਾਨੀਤਿ ਉਪਾਦਾਰੂਪਾਨਿ. ਯਥਾਪਰਿਗ੍ਗਹਿਤਰੂਪਵਤ੍ਥੁਦ੍ਵਾਰਾਰਮ੍ਮਣਂ ਵਾਤਿ ਏਤ੍ਥ ਯਥਾਪਰਿਗ੍ਗਹਿਤਕੇਸਾਦਿਰੂਪਾਰਮ੍ਮਣਂ ਤਤੋ ਪੁਬ੍ਬੇ ਵੁਤ੍ਤਨਯਵਤ੍ਥਾਰਮ੍ਮਣਞ੍ਚ ਤਨ੍ਨਿਸ੍ਸਯਕਰਜਕਾਯਪਅਗ੍ਗਹਮੁਖੇਨ ਉਪਟ੍ਠਿਤਚਕ੍ਖਾਦਿਦ੍ਵਾਰਞ੍ਚ ਸਸਮ੍ਪਯੁਤ੍ਤਧਮ੍ਮਵਿਞ੍ਞਾਣਂ ਵਾਤਿ ਯੋਜੇਤਬ੍ਬਂ. ਕਮ੍ਮਾਰਗਗ੍ਗਰੀਤਿ ਕਮ੍ਮਾਰਾਨਂ ਅਗ੍ਗਿਧਮਨਭਸ੍ਤਾ. ਤਜ੍ਜਨ੍ਤਿ ਤਦਨੁਰੂਪਂ. ਤਸ੍ਸਾਤਿ ਨਾਮਰੂਪਸ੍ਸ. ਤਂ ਦਿਸ੍ਵਾਤਿ ਅਵਿਜ੍ਜਾਤਣ੍ਹਾਦਿਪਚ੍ਚਯਂ ਦਿਸ੍ਵਾ. ਕਙ੍ਖਂ ਵਿਤਰਤੀਤਿ ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨਨ੍ਤਿਆਦਿਨਯਪ੍ਪਵਤ੍ਤਂ (ਮ. ਨਿ. ੧.੧੮; ਸਂ. ਨਿ. ੨.੨੦) ਸੋਲ਼ਸਵਤ੍ਥੁਕਂ ਵਿਚਿਕਿਚ੍ਛਂ ਅਤਿਕ੍ਕਮਤਿ. ਕਲਾਪਸਮ੍ਮਸਨਵਸੇਨਾਤਿ ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਨ੍ਤਿਆਦਿਨਾ (ਮ. ਨਿ. ੧.੩੬੧; ੩.੮੬, ੮੯; ਅ. ਨਿ. ੪.੧੮੧) ਪਞ੍ਚਸੁ ਖਨ੍ਧੇਸੁ ਅਤੀਤਾਦਿਕੋਟ੍ਠਾਸਂ ਏਕੇਕਕਲਾਪਤੋ ਗਹੇਤ੍ਵਾ ਅਨਿਚ੍ਚਾਦਿਵਸੇਨ ਸਮ੍ਮਸਨਂ ਕਲਾਪਸਮ੍ਮਸਨਂ, ਤਸ੍ਸ ਵਸੇਨ. ਪੁਬ੍ਬਭਾਗੇਤਿ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਪਰਿਯਾਪਨ੍ਨਾਯ ਉਦਯਬ੍ਬਯਾਨੁਪਸ੍ਸਨਾਯ ਪੁਬ੍ਬਭਾਗੇ. ਓਭਾਸਾਦਯੋਤਿ ਓਭਾਸੋ ਞਾਣਂ ਪੀਤਿ ਪਸ੍ਸਦ੍ਧਿ ਸੁਖਂ ਅਧਿਮੋਕ੍ਖੋ ਪਗ੍ਗਹੋ ਉਪੇਕ੍ਖਾ ਉਪਟ੍ਠਾਨਂ ਨਿਕਨ੍ਤਿ ਚ. ਤਤ੍ਥ ਅਧਿਮੋਕ੍ਖੋਤਿ ਸਦ੍ਧਾ. ਉਪਟ੍ਠਾਨਨ੍ਤਿ ਸਤਿ. ਉਪੇਕ੍ਖਾਤਿ ਤਤ੍ਰਮਜ੍ਝਤ੍ਤਤਾ. ਏਤ੍ਥ ਚ ਓਭਾਸਾਦਯੋ ਨਵ ਨਿਕਨ੍ਤਿਸਙ੍ਖਾਤਤਣ੍ਹੁਪਕ੍ਕਿਲੇਸਵਤ੍ਥੁਤਾਯ ਉਪਕ੍ਕਿਲੇਸਾ ਵੁਤ੍ਤਾ, ਨਿਕਨ੍ਤਿ ਪਨ ਉਪਕ੍ਕਿਲੇਸਤਾਯ ਤਬ੍ਬਤ੍ਥੁਤਾਯ ਚ. ਨਿਬ੍ਬਿਨ੍ਦਨ੍ਤੋ ਆਦੀਨਵਾਨੁਪਸ੍ਸਨਾਪੁਬ੍ਬਙ੍ਗਮਾਯ ਨਿਬ੍ਬਿਦਾਨੁਪਸ੍ਸਨਾਯ ਨਿਬ੍ਬਿਨ੍ਦਨ੍ਤੋ. ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਨੁਪਸ੍ਸਨਾਸਙ੍ਖਾਰੁਪੇਕ੍ਖਾਨੁਲੋਮਞਾਣਾਨਂ ਚਿਣ੍ਣਪਰਿਯਨ੍ਤੇ ਉਪ੍ਪਨ੍ਨਗੋਤ੍ਰਭੁਞਾਣਾਨਨ੍ਤਰਂ ਉਪ੍ਪਨ੍ਨੇਨ ਮਗ੍ਗਞਾਣੇਨ ਸਬ੍ਬਸਙ੍ਖਾਰੇਸੁ ਵਿਰਜ੍ਜਨ੍ਤੋ ਵਿਮੁਚ੍ਚਨ੍ਤੋ. ਫਲਕ੍ਖਣੇ ਹਿ ਵਿਮੁਤ੍ਤੋ ਨਾਮ ਵੁਚ੍ਚਤਿ, ਮਗ੍ਗਕ੍ਖਣੇ ਵਿਮੁਚ੍ਚਨ੍ਤੋਤਿ. ਏਕੂਨਵੀਸਤਿਭੇਦਸ੍ਸਾਤਿ ਚਤੁਨ੍ਨਂ ਮਗ੍ਗਵੀਥੀਨਂ ਅਨਨ੍ਤਰਂ ਪਚ੍ਚੇਕਂ ਉਪ੍ਪਜ੍ਜਨ੍ਤਸ੍ਸ ਮਗ੍ਗਫਲਨਿਬ੍ਬਾਨਪਹੀਨਾਵਸਿਟ੍ਠਕਿਲੇਸਾਨਂ ਪਞ੍ਚਨ੍ਨਂ ਪਚ੍ਚਵੇਕ੍ਖਿਤਬ੍ਬਾਨਂ ਵਸੇਨ ਏਕੂਨਵੀਸਤਿਭੇਦਸ੍ਸ. ਅਰਹਤੋ ਹਿ ਅਵਸਿਟ੍ਠਕਿਲੇਸਾਭਾਵੇਨ ਏਕੂਨਵੀਸਤਿਤਾ. ਅਸ੍ਸਾਤਿ ਆਨਾਪਾਨਕਮ੍ਮਟ੍ਠਾਨਿਕਸ੍ਸ.
ਸਪ੍ਪੀਤਿਕੇ ਦ੍ਵੇ ਝਾਨੇਤਿ ਪੀਤਿਸਹਗਤਾਨਿ ਚਤੁਕ੍ਕਨਯੇ ਦ੍ਵੇ ਪਠਮਦੁਤਿਯਜ੍ਝਾਨਾਨਿ. ਤਸ੍ਸਾਤਿ ਤੇਨ ਯੋਗਿਨਾ. ਸਮਾਪਤ੍ਤਿਕ੍ਖਣੇਤਿ ਸਮਾਪਨ੍ਨਕ੍ਖਣੇ. ਆਰਮ੍ਮਣਤੋਤਿ ਪਟਿਭਾਗਾਰਮ੍ਮਣਗ੍ਗਹਣਮੁਖੇਨ ਪੀਤਿ ਪਟਿਸਂਵਿਦਿਤਾ ਹੋਤਿ, ਆਰਮ੍ਮਣਸ੍ਸ ਪਟਿਸਂਵਿਦਿਤਤ੍ਤਾ. ਆਰਮ੍ਮਣੇ ਹਿ ਵਿਦਿਤੇ ਤਬ੍ਬਿਸਯਾ ਚਿਤ੍ਤਚੇਤਸਿਕਾ ਧਮ੍ਮਾ ਸਯਂ ਅਤ੍ਤਨੋ ਪਟਿਸਂਵਿਦਿਤਾ ਨਾਮ ਹੋਤਿ ਸਲਕ੍ਖਣਤੋ ਸਾਮਞ੍ਞਲਕ੍ਖਣਤੋ ਚ ਪਚ੍ਛਾ ਗਹਣੇ ਸਨ੍ਦੇਹਾਭਾਵਤੋ. ਵਿਪਸ੍ਸਨਾਕ੍ਖਣੇਤਿ ਵਿਪਸ੍ਸਨਾਪਞ੍ਞਾਯ ਵਿਸਯਤੋ ਦਸ੍ਸਨਕ੍ਖਣੇ. ਏਵਂ ਪੀਤਿਂ ਅਨਿਚ੍ਚਾਦਿਵਸੇਨ ਗਹਣਮੇਵ ਅਸਮ੍ਮੋਹਤੋ ਪੀਤਿਪਟਿਸਂਵੇਦਨਂ ਨਾਮ.
ਦੀਘਂ ਅਸ੍ਸਾਸਵਸੇਨਾਤਿ ਦੀਘਸ੍ਸ ਅਸ੍ਸਾਸਸ੍ਸ ਆਰਮ੍ਮਣਭੂਤਸ੍ਸ ਵਸੇਨ, ਪਜਾਨਤੋ ਸਾ ਪੀਤਿ ਪਟਿਸਂਵਿਦਿਤਾ ਹੋਤੀਤਿ ਸਮ੍ਬਨ੍ਧੋ. ਚਿਤ੍ਤਸ੍ਸ ਏਕਗ੍ਗਤਂ ਅਵਿਕ੍ਖੇਪਂ ਪਜਾਨਤੋਤਿ ਝਾਨਪਰਿਯਾਪਨ੍ਨਂ ਅਵਿਕ੍ਖੇਪਾਪਨ੍ਨਂ ਨਾਮ ਚਿਤ੍ਤਸ੍ਸੇਕਗ੍ਗਤਂ ਤਂਸਮ੍ਪਯੁਤ੍ਤਾਯ ਪਞ੍ਞਾਯ ਪਜਾਨਤੋ. ਯਥੇਵ ਹਿ ਆਰਮ੍ਮਣਮੁਖੇਨ ਪੀਤਿ ਪਟਿਸਂਵਿਦਿਤਾ ਹੋਤਿ, ਏਵਂ ਤਂਸਮ੍ਪਯੁਤ੍ਤਧਮ੍ਮਾਪਿ ਪਟਿਸਂਵਿਦਿਤਾ ਏਵ ਹੋਨ੍ਤੀਤਿ. ਸਤਿ ਉਪਟ੍ਠਿਤਾ ਹੋਤੀਤਿ ਦੀਘਂ ਅਸ੍ਸਾਸਵਸੇਨ ਝਾਨਸਮ੍ਪਯੁਤ੍ਤਾ ਸਤਿ ਤਸ੍ਸ ਆਰਮ੍ਮਣੇ ਉਪਟ੍ਠਿਤਾ ਤਦਾਰਮ੍ਮਣਜ੍ਝਾਨੇਪਿ ਉਪਟ੍ਠਿਤਾ ਨਾਮ ਹੋਤੀਤਿ. ਦੀਘਂ ਪਸ੍ਸਾਸਵਸੇਨਾਤਿਆਦੀਸੁਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਏਵਂ ਦਸ੍ਸਿਤਂ ਪੀਤਿਪਟਿਸਂਵੇਦਨਂ ਆਰਮ੍ਮਣਤੋ ਅਸਮ੍ਮੋਹਤੋ ਚ ਵਿਭਾਗਤੋ ਦਸ੍ਸੇਤੁਂ ਆਵਜ੍ਜਤੋਤਿਆਦਿ ਵੁਤ੍ਤਂ. ਤਤ੍ਥ ਆਵਜ੍ਜਤੋਤਿ ਝਾਨਂ ਆਵਜ੍ਜਨ੍ਤਸ੍ਸ. ਸਾ ਪੀਤੀਤਿ ਸਾ ਝਾਨਪਰਿਯਾਪਨ੍ਨਾ ਪੀਤਿ. ਜਾਨਤੋਤਿ ਸਮਾਪਨ੍ਨਕ੍ਖਣੇ ਆਰਮ੍ਮਣਮੁਖੇਨ ਜਾਨਤੋ, ਤਸ੍ਸ ਸਾ ਪੀਤਿ ਪਟਿਸਂਵਿਦਿਤਾ ਹੋਤੀਤਿ ਸਮ੍ਬਨ੍ਧੋ. ਪਸ੍ਸਤੋਤਿ ਦਸ੍ਸਨਭੂਤੇਨ ਞਾਣੇਨ ਝਾਨਤੋ ਵੁਟ੍ਠਾਯ ਪਸ੍ਸਨ੍ਤਸ੍ਸ. ਪਚ੍ਚਵੇਕ੍ਖਤੋਤਿ ਝਾਨਂ ਪਚ੍ਚਵੇਕ੍ਖਨ੍ਤਸ੍ਸ. ਚਿਤ੍ਤਂ ਅਧਿਟ੍ਠਹਤੋਤਿ ‘‘ਏਤ੍ਤਕਂ ਵੇਲਂ ਝਾਨਸਮਙ੍ਗੀ ਭਵਿਸ੍ਸਾਮੀ’’ਤਿ ਝਾਨਚਿਤ੍ਤਂ ਅਧਿਟ੍ਠਹਨ੍ਤਸ੍ਸ. ਏਵਂ ਪਞ੍ਚਨ੍ਨਂ ਵਸਿਭਾਵਾਨਂ ਵਸੇਨ ਝਾਨਸ੍ਸ ਪਜਾਨਨਮੁਖੇਨ ਆਰਮ੍ਮਣਤੋ ਪੀਤਿਯਾ ਪਟਿਸਂਵੇਦਨਾ ਦਸ੍ਸਿਤਾ. ਅਧਿਮੁਚ੍ਚਤੋਤਿ ਸਦ੍ਦਹਨ੍ਤਸ੍ਸ, ਸਮਥਵਿਪਸ੍ਸਨਾਵਸੇਨਾਤਿ ਅਧਿਪ੍ਪਾਯੋ. ਵੀਰਿਯਂ ਪਗ੍ਗਣ੍ਹਤੋਤਿਆਦੀਸੁਪਿ ਏਸੇਵ ਨਯੋ. ਅਭਿਞ੍ਞੇਯ੍ਯਨ੍ਤਿ ਵਿਸਿਟ੍ਠਾਯ ਪਞ੍ਞਾਯ ਜਾਨਿਤਬ੍ਬਂ ਚਤੁਸਚ੍ਚਂ ਵਿਪਸ੍ਸਨਾਪਞ੍ਞਾਪੁਬ੍ਬਙ੍ਗਮਾਯ ਮਗ੍ਗਪਞ੍ਞਾਯ ਅਭਿਜਾਨਤੋਤਿਆਦਿ ਯੋਜਨਾ. ਏਵਂ ਪਰਿਞ੍ਞੇਯ੍ਯਨ੍ਤਿਆਦੀਸੁਪਿ ਪਰਿਜਾਨਤੋਤਿਆਦਿਨਾ ਯੋਜਨਾ ਵੇਦਿਤਬ੍ਬਾ. ਤਤ੍ਥ ਪਰਿਞ੍ਞੇਯ੍ਯਨ੍ਤਿ ਦੁਕ੍ਖਸਚ੍ਚਂ. ਅਵਸੇਸਪਦਾਨੀਤਿ ਸੁਖਪਟਿਸਂਵੇਦੀ ਚਿਤ੍ਤਸਙ੍ਖਾਰਪਟਿਸਂਵੇਦੀਤਿ ਪਦਾਨਿ.
ਵੇਦਨਾਦਯੋਤਿ ਆਦਿ-ਸਦ੍ਦੇਨ ਸਞ੍ਞਾ ਗਹਿਤਾ, ਤੇਨਾਹ ‘‘ਦ੍ਵੇ ਖਨ੍ਧਾ’’ਤਿ. ਵਿਪਸ੍ਸਨਾਭੂਮਿਦਸ੍ਸਨਤ੍ਥਨ੍ਤਿ ਕਾਯਿਕਸੁਖਾਦਿਸੀਸੇਨ ਪਕਿਣ੍ਣਕਸਙ੍ਖਾਰਦਸ੍ਸਨਤੋ ਵੁਤ੍ਤਂ ਸਮਥੇ ਕਾਯਿਕਸੁਖਾਭਾਵਤੋ. ਸੋਤਿ ਪਸ੍ਸਮ੍ਭਨਪਰਿਯਾਯੇਨ ਵੁਤ੍ਤੋ ਨਿਰੋਧੋ. ਵੁਤ੍ਤਨਯੇਨਾਤਿ ਇਮਸ੍ਸ ਹਿ ਭਿਕ੍ਖੁਨੋ ਪੁਬ੍ਬੇ ਅਪਰਿਗ੍ਗਹਿਤਕਾਲੇਤਿਆਦਿਨਾ (ਪਾਰਾ. ਅਟ੍ਠ. ੨.੧੬੫) ਕਾਯਸਙ੍ਖਾਰੇ ਵੁਤ੍ਤਨਯੇਨ. ਪੀਤਿਸੀਸੇਨ ਵੇਦਨਾ ਵੁਤ੍ਤਾਤਿ ਪੀਤਿਅਪਦੇਸੇਨ ਵੇਦਨਾ ਵੁਤ੍ਤਾ, ਸੁਖਗ੍ਗਹਣਤੋ ਵੇਦਨਾਨੁਪਸ੍ਸਨਾਪਸਙ੍ਗਤੋਤਿ ਅਧਿਪ੍ਪਾਯੋ. ਦ੍ਵੀਸੁ ਚਿਤ੍ਤਸਙ੍ਖਾਰਪਦੇਸੂਤਿ ‘‘ਚਿਤ੍ਤਸਙ੍ਖਾਰਪਟਿਸਂਵੇਦੀ ਪਸ੍ਸਮ੍ਭਯਂ ਚਿਤ੍ਤਸਙ੍ਖਾਰ’’ਨ੍ਤਿ ਇਮੇਸੁ ਦ੍ਵੀਸੁ ਕੋਟ੍ਠਾਸੇਸੁ. ਸਞ੍ਞਾਸਮ੍ਪਯੁਤ੍ਤਾ ਵੇਦਨਾਤਿ ਵੇਦਨਾਨੁਪਸ੍ਸਨਾਭਾਵਤੋ ਵੁਤ੍ਤਂ. ਚਿਤ੍ਤਪਟਿਸਂਵੇਦਿਤਾ ਵੇਦਿਤਬ੍ਬਾਤਿ ਆਰਮ੍ਮਣਤੋ ਅਸਮ੍ਮੋਹਤੋਤਿਆਦਿਨਾ ਵੁਤ੍ਤਨਯਂ ਸਨ੍ਧਾਯ ਵੁਤ੍ਤਂ. ਚਿਤ੍ਤਨ੍ਤਿ ਝਾਨਸਮ੍ਪਯੁਤ੍ਤਂ ਵਿਪਸ੍ਸਨਾਸਮ੍ਪਯੁਤ੍ਤਞ੍ਚ ਚਿਤ੍ਤਂ. ਆਮੋਦੇਤੀਤਿ ਸਮ੍ਪਯੁਤ੍ਤਾਯ ਪੀਤਿਯਾ ਝਾਨਵਿਸਯਾਯ ਮੋਦੇਤਿ. ਵਿਪਸ੍ਸਨਾਕ੍ਖਣੇਤਿਆਦਿਨਾ ਵੁਤ੍ਤਭਙ੍ਗਾਨੁਪਸ੍ਸਨਕ੍ਖਣੇ.
ਆਨਾਪਾਨਸ੍ਸਤਿਸਮਾਧਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.
੧੬੭. ਯਦਿਪਿ ਅਰਿਯਾ ਨੇਵ ਅਤ੍ਤਨਾਵ ਅਤ੍ਤਾਨਂ ਅਞ੍ਞਮਞ੍ਞਂ ਵਾ ਜੀਵਿਤਾ ਵੋਰੋਪੇਨ੍ਤਿ, ਨਾਪਿ ਪਰੇਹਿ ਸਮਾਦਪੇਨ੍ਤਿ, ਤਥਾਪਿ ਯਥਾਵੁਤ੍ਤੇਹਿ ਤੀਹਿ ਪਕਾਰੇਹਿ ਮਤਾਨਂ ਪੁਥੁਜ੍ਜਨਾਨਂ ਅਨ੍ਤਰੇ ਮਿਗਲਣ੍ਡਿਕੇਨ ਮਾਰਿਤਾਨਂ ਅਰਿਯਪੁਗ੍ਗਲਾਨਮ੍ਪਿ ਅਤ੍ਥਿਤਾਯ ‘‘ਅਰਿਯਪੁਗ੍ਗਲਮਿਸ੍ਸਕਤ੍ਤਾ’’ਤਿ ਵੁਤ੍ਤਂ. ਅਥ ਵਾ ਪੁਥੁਜ੍ਜਨਕਾਲੇ ਅਤ੍ਤਨਾਵ ਅਤ੍ਤਾਨਂ ਘਾਤੇਤ੍ਵਾ ਮਰਣਸਮਯੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਿਯਮਗ੍ਗਂ ਪਟਿਲਭਿਤ੍ਵਾ ਮਤਾਨਮ੍ਪਿ ਸਬ੍ਭਾਵਤੋ ਏਵਂ ਵੁਤ੍ਤਨ੍ਤਿ ਗਹੇਤਬ੍ਬਂ.
ਪਦਭਾਜਨੀਯਵਣ੍ਣਨਾ
੧੭੨. ਬ੍ਯਞ੍ਜਨੇ ਆਦਰਂ ਅਕਤ੍ਵਾਤਿ ਜਾਨਿਤ੍ਵਾ ਸਞ੍ਜਾਨਿਤ੍ਵਾਤਿਆਦਿਨਾ ਬ੍ਯਞ੍ਜਨਾਨੁਰੂਪਂ ਅਵੁਤ੍ਤਤ੍ਤਾ ਵੁਤ੍ਤਂ. ਪਾਣੋਤਿ ਜਾਨਨ੍ਤੋਤਿ ਇਦਂ ਮਨੁਸ੍ਸੋਤਿ ਅਜਾਨਿਤ੍ਵਾਪਿ ਕੇਵਲਂ ਸਤ੍ਤਸਞ੍ਞਾਯ ਏਵ ਪਾਰਾਜਿਕਭਾਵਦਸ੍ਸਨਤ੍ਥਂ ਵੁਤ੍ਤਂ. ਵਧਕਚੇਤਨਾਵਸੇਨ ਚੇਤੇਤ੍ਵਾਤਿ ‘‘ਇਮਂ ਮਾਰੇਮੀ’’ਤਿ ਵਧਕਚੇਤਨਾਯ ਚਿਨ੍ਤੇਤ੍ਵਾ. ਪਕਪ੍ਪੇਤ੍ਵਾਤਿ ‘‘ਵਧਾਮਿ ਨ’’ਨ੍ਤਿ ਏਵਂ ਚਿਤ੍ਤੇਨ ਪਰਿਚ੍ਛਿਨ੍ਦਿਤ੍ਵਾ. ਅਭਿਵਿਤਰਿਤ੍ਵਾਤਿ ਸਨ੍ਨਿਟ੍ਠਾਨਂ ਕਤ੍ਵਾ, ਤੇਨਾਹ ‘‘ਨਿਰਾਸਙ੍ਕਚਿਤ੍ਤਂ ਪੇਸੇਤ੍ਵਾ’’ਤਿ. ਸਿਖਾਪ੍ਪਤ੍ਤੋ ਅਤ੍ਥੋਤਿ ਸਞ੍ਚਿਚ੍ਚਾਤਿ ਪੁਬ੍ਬਕਾਲਕਿਰਿਯਾਵਸੇਨ ਵੁਤ੍ਤਸ੍ਸਪਿ ਵੀਤਿਕ੍ਕਮਭੂਤਸ੍ਸ ਅਪਰਕਾਲਕਿਰਿਯਾਯੁਤ੍ਤਦਸ੍ਸਨੇਨ ਕੋਟਿਪ੍ਪਤ੍ਤੋ ਅਤ੍ਥੋ. ਜਾਤਿਉਣ੍ਣਾ ਨਾਮ ਤਦਹੁਜਾਤਏਲ਼ਕਸ੍ਸ ਲੋਮਂ. ਏਵਂ ਵਣ੍ਣਪ੍ਪਟਿਭਾਗਨ੍ਤਿ ਏਵਂ ਵਣ੍ਣਸਣ੍ਠਾਨਂ. ਤਤੋ ਵਾ ਉਦ੍ਧਨ੍ਤਿ ਦੁਤਿਯਸਤ੍ਤਾਹਾਦੀਸੁ ਅਬ੍ਬੁਦਾਦਿਭਾਵਪ੍ਪਤ੍ਤਂ ਸਨ੍ਧਾਯ ਵੁਤ੍ਤਂ. ਪਰਿਹੀਨਵੇਗਸ੍ਸ ਸਨ੍ਤਾਨਸ੍ਸ ਪਚ੍ਚਯੋ ਹੋਤੀਤਿ ਸਹਕਾਰੀਪਚ੍ਚਯੋ ਹੋਤਿ, ਨ ਜਨਕੋ. ਕਮ੍ਮਮੇਵ ਹਿ ਖਣੇ ਖਣੇ ਉਪ੍ਪਜ੍ਜਮਾਨਾਨਂ ਕਮ੍ਮਜਰੂਪਾਨਂ ਜਨਕਪਚ੍ਚਯੋ, ਤਞ੍ਚ ਪਵਤ੍ਤਿਯਂ ਪੁਬ੍ਬੇ ਉਪ੍ਪਜ੍ਜਿਤ੍ਵਾ ਠਿਤਂ ਅਨੁਪਹਤਂ ਚਤੁਸਨ੍ਤਤਿਰੂਪਂ ਸਹਕਾਰੀਪਚ੍ਚਯਂ ਲਭਿਤ੍ਵਾਵ ਕਾਤੁਂ ਸਕ੍ਕੋਤਿ, ਨ ਅਞ੍ਞਥਾ, ਯੇਨ ਕੇਨਚਿ ਵਿਰੋਧਿਪਚ੍ਚਯੇਨ ਨਿਰੁਦ੍ਧਚਕ੍ਖਾਦਿਪ੍ਪਸਾਦਾਨਂ ਪੁਗ੍ਗਲਾਨਂ ਵਿਜ੍ਜਮਾਨਮ੍ਪਿ ਕਮ੍ਮਂ ਚਕ੍ਖਾਦਿਕਂ ਜਨੇਤੁਂ ਨ ਸਕ੍ਕੋਤੀਤਿ ਸਿਦ੍ਧਮੇਵ ਹੋਤਿ.
ਅਤਿਪਾਤੇਨ੍ਤੋਤਿ ਅਤਿਪਾਤੇਨ੍ਤੋ ਵਿਨਾਸੇਨ੍ਤੋ. ਵੁਤ੍ਤਪਕਾਰਮੇਵਾਤਿ ਜੀਵਿਤਿਨ੍ਦ੍ਰਿਯਾਤਿਪਾਤਨਵਿਧਾਨਂ ਵੁਤ੍ਤਪ੍ਪਕਾਰਮੇਵ. ਸਰਸੇਨੇਵ ਪਤਨਸਭਾਵਸ੍ਸ ਸਣਿਕਂ ਪਤਿਤੁਂ ਅਦਤ੍ਵਾ ਅਤੀਵ ਪਾਤਨਂ ਸੀਘਪਾਤਨਂ ਅਤਿਪਾਤੋ, ਪਾਣਸ੍ਸ ਅਤਿਪਾਤੋ ਪਾਣਾਤਿਪਾਤੋ. ਆਥਬ੍ਬਣਿਕਾਤਿ ਅਥਬ੍ਬਣਵੇਦਿਨੋ. ਅਥਬ੍ਬਣਨ੍ਤਿ ਅਥਬ੍ਬਣਵੇਦਵਿਹਿਤਂ. ਮਨ੍ਤਂ ਪਯੋਜੇਨ੍ਤੀਤਿ ਅਲੋਣਭੋਜਨਦਬ੍ਬਸਯਨਸੁਸਾਨਗਮਨਾਦੀਹਿ ਪਯੋਗੇਹਿ ਮਨ੍ਤਂ ਪਰਿਵਤ੍ਤੇਨ੍ਤਿ, ਤੇਨ ਯਥਿਚ੍ਛਿਤਪਾਣਵਧਾਦਿਫਲਂ ਉਪਪਜ੍ਜਤਿ, ਤਸ੍ਮਾ ਤਂ ਕਾਯਵਚੀਕਮ੍ਮੇਸੁ ਪਵਿਟ੍ਠਂ. ਈਤਿਨ੍ਤਿ ਪੀਲ਼ਂ. ਉਪਦ੍ਦਵਨ੍ਤਿ ਤਤੋ ਅਧਿਕਤਰਂ ਪੀਲ਼ਂ. ਪਜ੍ਜਰਕਨ੍ਤਿ ਵਿਸਮਜ੍ਜਰਂ. ਸੂਚਿਕਨ੍ਤਿ ਸੂਚੀਹਿ ਵਿਯ ਵਿਜ੍ਝਮਾਨਂ ਸੂਲਂ. ਵਿਸੂਚਿਕਨ੍ਤਿ ਸਸੂਲਂ ਆਮਾਤਿਸਾਰਂ. ਪਕ੍ਖਨ੍ਦਿਯਨ੍ਤਿ ਰਤ੍ਤਾਤਿਸਾਰਂ. ਵਿਜ੍ਜਂ ਪਰਿਵਤ੍ਤੇਤ੍ਵਾਤਿ ਗਨ੍ਧਾਰਵਿਜ੍ਜਾਦਿਕਂ ਅਤ੍ਤਨੋ ਵਿਜ੍ਜਂ ਕਤੂਪਚਾਰਂ ਮਨ੍ਤਪਠਨਕ੍ਕਮੇਨ ਪਰਿਜਪ੍ਪਿਤ੍ਵਾ. ਤੇਹੀਤਿ ਤੇਹਿ ਵਤ੍ਥੂਹਿ. ਪਯੋਜਨਨ੍ਤਿ ਪਵਤ੍ਤਨਂ. ਅਹੋ ਵਤਾਯਨ੍ਤਿ ਅਯਂ ਤਂ ਕੁਚ੍ਛਿਗਤਂ. ਗਬ੍ਭਨ੍ਤਿ ਇਦਂ ਕੁਚ੍ਛਿਗਤਂ ਗਬ੍ਭਂ. ਕੁਲੁਮ੍ਬਸ੍ਸਾਤਿ ਗਬ੍ਭਸ੍ਸ, ਕੁਲਸ੍ਸੇਵ ਵਾ, ਕੁਟੁਮ੍ਬਸ੍ਸਾਤਿ ਵੁਤ੍ਤਂ ਹੋਤਿ. ਭਾਵਨਾਮਯਿਦ੍ਧਿਯਾਤਿ ਅਧਿਟ੍ਠਾਨਿਦ੍ਧਿਂ ਸਨ੍ਧਾਯ ਵੁਤ੍ਤਂ. ਤਂ ਤੇਸਂ ਇਚ੍ਛਾਮਤ੍ਤਨ੍ਤਿ ਸੁਤ੍ਤਤ੍ਥਤੋ ਨ ਸਮੇਤੀਤਿ ਅਧਿਪ੍ਪਾਯੋ. ਅਥਬ੍ਬਣਿਦ੍ਧਿਵਸੇਨੇਵ ਹਿ ਸੁਤ੍ਤੇ ‘‘ਇਦ੍ਧਿਮਾ ਚੇਤੋਵਸਿਪ੍ਪਤ੍ਤੋ’’ਤਿ ਵੁਤ੍ਤਂ, ਨ ਭਾਵਨਾਮਯਿਦ੍ਧਿਵਸੇਨਾਤਿ ਦਟ੍ਠਬ੍ਬਂ.
ਇਤਰਥਾਤਿ ਪਰਿਯੇਸੇਯ੍ਯਾਤਿ ਪਦਸ੍ਸ ਗਵੇਸਨਮਤ੍ਤਮੇਵ ਯਥਾਰੁਤਵਸੇਨ ਅਤ੍ਥੋ ਸਿਯਾ, ਤਦਾ ਪਰਿਯਿਟ੍ਠਮਤ੍ਤੇਨ ਪਰਿਯੇਸਿਤ੍ਵਾ ਸਤ੍ਥਾਦੀਨਂ ਲਦ੍ਧਮਤ੍ਤੇਨਾਤਿ ਅਤ੍ਥੋ. ਸਸਨ੍ਤਿ ਹਿਂਸਨ੍ਤਿ ਏਤੇਨਾਤਿ ਸਤ੍ਥਨ੍ਤਿ ਵਧੋਪਕਰਣਸ੍ਸ ਪਾਸਾਣਰਜ੍ਜੁਆਦਿਨੋ ਸਬ੍ਬਸ੍ਸਾਪਿ ਨਾਮਨ੍ਤਿ ਆਹ ਲਗੁਲ਼ਾਤਿਆਦਿ. ਲਗੁਲ਼ਨ੍ਤਿ ਮੁਗ੍ਗਰਸ੍ਸੇਤਂ ਅਧਿਵਚਨਂ. ਸਤ੍ਥਸਙ੍ਗਹੋਤਿ ਮਾਤਿਕਾਯਂ ਸਤ੍ਥਹਾਰਕਨ੍ਤਿ ਏਤ੍ਥ ਵੁਤ੍ਤਸਤ੍ਥਸਙ੍ਗਹੋ. ਪਰਤੋ ਵੁਤ੍ਤਨਯਤ੍ਤਾਤਿ ਪਰਤੋ ਨਿਗਮਨਵਸੇਨ ਵੁਤ੍ਤਸ੍ਸ ਦੁਤਿਯਪਦਸ੍ਸ ਪਦਭਾਜਨੇ ਵੁਤ੍ਤਨਯਤ੍ਤਾ. ਚਿਤ੍ਤਸਦ੍ਦਸ੍ਸ ਅਤ੍ਥਦੀਪਨਤ੍ਥਂ ਵੁਤ੍ਤੋਤਿ ਚਿਤ੍ਤ-ਸਦ੍ਦਸ੍ਸ ਵਿਚਿਤ੍ਤਾਦਿਅਨੇਕਤ੍ਥਵਿਸਯਤ੍ਤਾ ਇਤਰੇਹਿ ਨਿਵਤ੍ਤੇਤ੍ਵਾ ਵਿਞ੍ਞਾਣਤ੍ਥਂ ਨਿਯਮੇਤੁਂ ਵੁਤ੍ਤੋ.
੧੭੪. ਕਮ੍ਮੁਨਾ ਬਜ੍ਝਤੀਤਿ ਪਾਣਾਤਿਪਾਤਕਮ੍ਮੁਨਾ ਬਜ੍ਝਤਿ, ਤਂ ਕਮ੍ਮਮਸ੍ਸ ਸਿਦ੍ਧਨ੍ਤਿ ਅਤ੍ਥੋ. ਉਭਯਥਾਪੀਤਿ ਉਦ੍ਦਿਸਕਾਨੁਦ੍ਦਿਸਕਵਸੇਨ. ਪਚ੍ਛਾ ਵਾ ਤੇਨ ਰੋਗੇਨਾਤਿ ਏਤੇਨ ਅਨਾਗਤਮ੍ਪਿ ਜੀਵਿਤਿਨ੍ਦ੍ਰਿਯਂ ਆਰਬ੍ਭ ਪਾਣਾਤਿਪਾਤਸ੍ਸ ਪਵਤ੍ਤਿਂ ਦਸ੍ਸੇਤਿ. ਏਵਞ੍ਚ ‘‘ਯਦਾ ਸਕ੍ਕੋਤਿ, ਤਦਾ ਤਂ ਜੀਵਿਤਾ ਵੋਰੋਪੇਹੀ’’ਤਿ ਆਣਤ੍ਤਿਯਾ ਚਿਰੇਨ ਸਮਿਦ੍ਧਿਯਮ੍ਪਿ ਆਣਤ੍ਤਿਕ੍ਖਣੇਯੇਵ ਪਾਣਾਤਿਪਾਤੋ. ਓਪਾਤਖਣਨਾਦਿਥਾਵਰਪਯੋਗੇਸੁ ਪਯੋਗਕਰਣਤੋ ਪਚ੍ਛਾ ਗਹਿਤਪਟਿਸਨ੍ਧਿਕਸ੍ਸਾਪਿ ਸਤ੍ਤਸ੍ਸ ਮਰਣੇ ਪਾਣਾਤਿਪਾਤੋ ਚ ਅਨਾਗਤਾਰਮ੍ਮਣੋ ਉਪਪਨ੍ਨੋ ਹੋਤਿ. ਯਂ ਪਨ ਸਿਕ੍ਖਾਪਦਵਿਭਙ੍ਗੇ ‘‘ਪਞ੍ਚ ਸਿਕ੍ਖਾਪਦਾਨਿ ਪਚ੍ਚੁਪ੍ਪਨ੍ਨਾਰਮ੍ਮਣਾਯੇਵਾ’’ਤਿ ਵੁਤ੍ਤਂ, ਤਂ ਪਾਣਾਤਿਪਾਤਾਦਿਤੋ ਵਿਰਤਿਂ ਸਨ੍ਧਾਯ ਵੁਤ੍ਤਂ, ਨ ਪਾਣਾਤਿਪਾਤਾਦਿਨ੍ਤਿ ਗਹੇਤਬ੍ਬਂ. ਅਞ੍ਞਚਿਤ੍ਤੇਨਾਤਿ ਅਮਾਰੇਤੁਕਾਮਤਾਚਿਤ੍ਤੇਨ. ਦੁਤਿਯਪ੍ਪਹਾਰੇਨ ਮਰਤੀਤਿ ਪਠਮਪ੍ਪਹਾਰਂ ਵਿਨਾ ਦੁਤਿਯੇਨੇਵ ਮਰਤੀਤਿ ਅਤ੍ਥੋ. ਪਠਮਪ੍ਪਹਾਰੇਨੇਵਾਤਿ ਪਠਮਪ੍ਪਹਾਰਸਮੁਟ੍ਠਾਪਕਚੇਤਨਾਕ੍ਖਣੇਯੇਵਾਤਿ ਅਤ੍ਥੋ. ਕਿਞ੍ਚਾਪਿ ਪਠਮਪ੍ਪਹਾਰੋ ਸਯਮੇਵ ਨ ਸਕ੍ਕੋਤਿ ਮਾਰੇਤੁਂ, ਦੁਤਿਯਂ ਪਨ ਲਭਿਤ੍ਵਾ ਸਕ੍ਕੋਨ੍ਤੋ ਜੀਵਿਤਵਿਨਾਸਹੇਤੁ ਹੋਤਿ, ਤਸ੍ਮਾ ਪਠਮਪ੍ਪਹਾਰਂ ਵਿਨਾ ਮਰਣਸ੍ਸ ਅਸਿਦ੍ਧਤ੍ਤਾ ‘‘ਪਯੋਗੋ ਤੇਨ ਚ ਮਰਣ’’ਨ੍ਤਿ ਇਮਿਨਾ ਸਂਸਨ੍ਦਨਤੋ ਪਠਮਪ੍ਪਹਾਰੇਨੇਵ ਕਮ੍ਮਬਦ੍ਧੋ ਯੁਤ੍ਤੋ, ਨ ਦੁਤਿਯੇਨ ਤਸ੍ਸ ਅਞ੍ਞਚਿਤ੍ਤੇਨ ਦਿਨ੍ਨਤ੍ਤਾ. ਯਥਾ ਚੇਤ੍ਥ, ਏਵਂ ਅਞ੍ਞੇਨ ਪੁਗ੍ਗਲੇਨ ਦੁਤਿਯਪ੍ਪਹਾਰਦਾਨਾਦੀਸੁ ਵਿਯ. ਯਦਿ ਪਨ ਦੁਤਿਯਪ੍ਪਹਾਰਦਾਯਕਸ੍ਸਾਪਿ ਪੁਗ੍ਗਲਸ੍ਸ ਵਧਕਚੇਤਨਾ ਅਤ੍ਥਿ, ਤਸ੍ਸਾਪਿ ਅਤ੍ਤਨੋ ਪਯੋਗੇਨਾਪਿ ਮਤਤ੍ਤਾ ਪਯੋਗਕ੍ਖਣੇ ਪਾਣਾਤਿਪਾਤੋਤਿ ਵੇਦਿਤਬ੍ਬਂ.
ਕਮ੍ਮਾਪਤ੍ਤਿਬ੍ਯਤ੍ਤਿਭਾਵਤ੍ਥਨ੍ਤਿ ਆਨਨ੍ਤਰਿਯਾਦਿਕਮ੍ਮਵਿਭਾਗਸ੍ਸ ਪਾਰਾਜਿਕਾਦਿਆਪਤ੍ਤਿਵਿਭਾਗਸ੍ਸ ਚ ਪਾਕਟਭਾਵਤ੍ਥਂ. ‘‘ਏਲ਼ਕਂ ਮਾਰੇਮੀ’’ਤਿ ਵਿਪਰੀਤਗ੍ਗਹਣੇਪਿ ‘‘ਇਮ’’ਨ੍ਤਿ ਯਥਾਨਿਪਨ੍ਨਸ੍ਸੇਵ ਪਰਮਤ੍ਥਤੋ ਗਹਿਤਤ੍ਤਾ ਯਥਾਵਤ੍ਥੁਕਂ ਕਮ੍ਮਬਦ੍ਧੋ ਹੋਤਿਯੇਵਾਤਿ ਆਹ ਇਮਂ ਵਤ੍ਥੁਨ੍ਤਿਆਦਿ. ਘਾਤਕੋ ਚ ਹੋਤੀਤਿ ਪਾਣਾਤਿਪਾਤਕਮ੍ਮੇਨ ਬਦ੍ਧੋਤਿ ਅਤ੍ਥੋ. ਮਾਤਾਦਿਗੁਣਮਹਨ੍ਤੇ ਆਰਬ੍ਭ ਪਵਤ੍ਤਵਧਕਚੇਤਨਾਯ ਮਹਾਸਾਵਜ੍ਜਤਾਯ ਵੁਤ੍ਤਂ ‘‘ਇਧ ਪਨ ਚੇਤਨਾ ਦਾਰੁਣਾ ਹੋਤੀ’’ਤਿ.
ਲੋਹਿਤਕਨ੍ਤਿ ਲੋਹਿਤਮਕ੍ਖਿਤਂ. ਕਮ੍ਮਂ ਕਰੋਨ੍ਤੇਤਿ ਯੁਦ੍ਧਕਮ੍ਮਂ ਕਰੋਨ੍ਤੇ. ਯਥਾਧਿਪ੍ਪਾਯਂ ਗਤੇਤਿ ਯੋਧਂ ਵਿਜ੍ਝਿਤ੍ਵਾ ਪਿਤਰਿ ਵਿਦ੍ਧੇ, ਯੋਧਂ ਪਨ ਅਵਿਜ੍ਝਿਤ੍ਵਾ ਕੇਵਲਂ ਪਿਤਰਿ ਵਿਦ੍ਧੇਪਿ ਵਿਸਙ੍ਕੇਤੋ ਨਤ੍ਥਿਯੇਵ ਪਿਤਰਿਪਿ ਵਧਕਚਿਤ੍ਤਸ੍ਸ ਅਤ੍ਥਿਤਾਯ, ਕੇਵਲਂ ਯੋਧੇ ਵਿਦ੍ਧੇਪਿ ਏਸੇਵ ਨਯੋ. ਆਨਨ੍ਤਰਿਯਂ ਪਨ ਨਤ੍ਥੀਤਿ ਪਿਤੁਵਿਸਯਂ ਪਾਣਾਤਿਪਾਤਕਮ੍ਮਂ ਨਤ੍ਥੀਤਿ ਅਤ੍ਥੋ.
ਏਵਂ ਵਿਜ੍ਝਾਤਿ ਏਵਂ ਪਾਦੇਹਿ ਭੂਮਿਯਂ ਠਤ੍ਵਾ ਏਵਂ ਧਨੁਂ ਗਹੇਤ੍ਵਾ ਆਕਡ੍ਢਿਤ੍ਵਾਤਿਆਦਿਨਾ ਵਿਜ੍ਝਨਪ੍ਪਕਾਰਸਿਕ੍ਖਾਪਨਮੁਖੇਨ ਆਣਾਪੇਤੀਤਿ ਅਤ੍ਥੋ. ਏਵਂ ਪਹਰਾਤਿ ਦਲ਼੍ਹਂ ਅਸਿਂ ਗਹੇਤ੍ਵਾ ਏਵਂ ਪਹਰ. ਏਵਂ ਘਾਤੇਹੀਤਿ ਏਵਂ ਕਮ੍ਮਕਾਰਣਂ ਕਤ੍ਵਾ ਮਾਰੇਹਿ. ਤਤ੍ਤਕਾ ਉਭਿਨ੍ਨਂ ਪਾਣਾਤਿਪਾਤਾਤਿ ਅਨੁਦ੍ਦਿਸਿਤ੍ਵਾ ਯੇਸਂ ਕੇਸਞ੍ਚਿ ਮਾਰਣਤ੍ਥਾਯ ਉਭੋਹਿ ਪਯੋਗਸ੍ਸ ਕਤਤ੍ਤਾ ਵੁਤ੍ਤਂ. ਸਚੇ ਹਿ ਆਣਾਪਕੋ ‘‘ਏਵਂ ਵਿਦ੍ਧੇ ਅਸੁਕੋ ਏਵਂ ਮਰਤੀ’’ਤਿ ਸਞ੍ਞਾਯ ‘‘ਏਵਂ ਵਿਜ੍ਝਾ’’ਤਿ ਆਣਾਪੇਤਿ, ਨਿਯਮਿਤਸ੍ਸੇਵ ਮਰਣੇ ਆਣਾਪਕਸ੍ਸ ਕਮ੍ਮਬਦ੍ਧੋਤਿ ਵਦਨ੍ਤਿ. ਸਚੇ ਆਣਤ੍ਤੋ ‘‘ਅਸੁਕ’’ਨ੍ਤਿ ਨਿਯਮੇਤ੍ਵਾ ਉਦ੍ਦਿਸ੍ਸ ਸਰਂ ਖਿਪਤਿ, ਆਣਾਪਕੋ ਅਨਿਯਮੇਤ੍ਵਾ ਆਣਾਪੇਤਿ, ਆਣਾਪਕਸ੍ਸ ਯੇਸਂ ਕੇਸਞ੍ਚਿ ਮਰਣੇਪਿ ਕਮ੍ਮਬਦ੍ਧੋ, ਆਣਤ੍ਤਸ੍ਸ ਪਨ ਨਿਯਮਿਤਮਰਣੇਯੇਵਾਤਿ ਵੇਦਿਤਬ੍ਬਂ. ਮਜ੍ਝੇਤਿ ਹਤ੍ਥਿਨੋ ਪਿਟ੍ਠਿਨੋ ਮਜ੍ਝੇ. ਏਤੇਨਾਤਿ ਅਧਿਟ੍ਠਹਿਤ੍ਵਾ ਆਣਾਪੇਤੀਤਿਆਦਿਪਾਲ਼ਿਵਚਨੇਨ. ਤਤ੍ਥਾਤਿ ਆਣਤ੍ਤਿਕਪਯੋਗੇ.
ਕਿਞ੍ਚਾਪਿ ਕਿਰਿਯਾਵਿਸੇਸੋ ਅਟ੍ਠਕਥਾਸੁ ਅਨਾਗਤੋ, ਪਾਲ਼ਿਯਂ ਪਨ ‘‘ਏਵਂ ਵਿਜ੍ਝ, ਏਵਂ ਪਹਰ, ਏਵਂ ਘਾਤੇਹੀ’’ਤਿ (ਪਾਰਾ. ੧੭੪) ਕਿਰਿਯਾਵਿਸੇਸਸ੍ਸ ਪਰਾਮਟ੍ਠਤ੍ਤਾ ਆਚਰਿਯਪਰਮ੍ਪਰਾ ਆਗਤਂ ਕਿਰਿਯਾਵਿਸੇਸਮ੍ਪਿ ਪਾਲ਼ਿਸਂਸਨ੍ਦਨਤੋ ਗਹੇਤ੍ਵਾ ਦਸ੍ਸੇਨ੍ਤੋ ਅਪਰੋ ਨਯੋਤਿਆਦਿਮਾਹ. ਵਿਜ੍ਝਨਨ੍ਤਿ ਉਸੁਸਤ੍ਤਿਆਦੀਹਿ ਵਿਜ੍ਝਨਂ. ਛੇਦਨਨ੍ਤਿ ਅਸਿਆਦੀਹਿ ਹਤ੍ਥਪਾਦਾਦਿਚ੍ਛੇਦਨਂ. ਭੇਦਨਨ੍ਤਿ ਮੁਗ੍ਗਰਾਦੀਹਿ ਸੀਸਾਦਿਭੇਦਨਂ ਦ੍ਵਿਧਾਕਰਣਂ. ਸਙ੍ਖਮੁਣ੍ਡਕਨ੍ਤਿ ਸੀਸਕਟਾਹੇ ਚਮ੍ਮਂ ਸਹ ਕੇਸੇਹਿ ਉਪ੍ਪਾਟੇਤ੍ਵਾ ਥੂਲਸਕ੍ਖਰਾਹਿ ਸੀਸਕਟਾਹਂ ਘਂਸਿਤ੍ਵਾ ਸਙ੍ਖਵਣ੍ਣਕਰਣਵਸੇਨ ਸਙ੍ਖਮੁਣ੍ਡਕਮ੍ਮਕਰਣਂ. ਏਵਮਾਦੀਤਿ ਆਦਿ-ਸਦ੍ਦੇਨ ਬਿਲ਼ਙ੍ਗਥਾਲਿਕਾਦਿਂ ਸਙ੍ਗਣ੍ਹਾਤਿ. ਉਰੇ ਪਹਰਿਤ੍ਵਾ ਪਿਟ੍ਠਿਯਂ ਪਹਰਿਤ੍ਵਾ ਗੀਵਾਯਂ ਪਹਰਿਤ੍ਵਾਤਿਆਦਿਨਾ ਸਰੀਰਾਵਯਵਪ੍ਪਦੇਸੇਸੁ ਪਹਰਣਵਿਜ੍ਝਨਾਦਿਨਿਯਮੋਪਿ ਕਿਰਿਯਾਵਿਸੇਸੇਯੇਵ ਸਙ੍ਗਯ੍ਹਤਿ ਅਟ੍ਠਕਥਾਸੁ ਸਙ੍ਖਮੁਣ੍ਡਕਾਦਿਸਰੀਰਪ੍ਪਦੇਸਵਿਸਯਾਯਪਿ ਘਾਤਨਾਯ ਤਤ੍ਥ ਪਵੇਸਿਤਤ੍ਤਾ, ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੧੭੪ ਪਯੋਗਕਥਾਵਣ੍ਣਨਾ) ਪੁਰਤੋ ਪਹਰਿਤ੍ਵਾ ਮਾਰੇਹੀਤਿਆਦਿਕਸ੍ਸ ਅਟ੍ਠਕਥਾਪਾਠਸ੍ਸ ‘‘ਪੁਰਿਮਪਸ੍ਸਾਦੀਨਮ੍ਪਿ ਵਤ੍ਥੁਸਭਾਗਤੋ ਵਤ੍ਥੁਗ੍ਗਹਣੇਨੇਵ ਗਹਣਨ੍ਤਿ ਆਹ ਪੁਰਤੋ ਪਹਰਿਤ੍ਵਾਤਿਆਦੀ’’ਤਿ ਏਵਮਧਿਪ੍ਪਾਯਕਥਨਂ, ਤਂ ਸਙ੍ਖਮੁਣ੍ਡਕਾਦਿਕਸ੍ਸ ਸਰੀਰਪ੍ਪਦੇਸੇ ਕਮ੍ਮਕਾਰਣਾਕਰਣਸ੍ਸ ਅਟ੍ਠਕਥਾਯ ਕਿਰਿਯਾਵਿਸੇਸਵਿਸਯੇ ਵੁਤ੍ਤਤ੍ਤਾ ਨ ਯੁਜ੍ਜਤਿ. ਯਥਾਣਤ੍ਤਂ ਮੁਞ੍ਚਿਤ੍ਵਾ ਪੁਗ੍ਗਲਨ੍ਤਰਮਾਰਣਮੇਵ ਹਿ ਵਤ੍ਥੁਵਿਸਂਵਾਦੋ, ਨ ਪਹਰਿਤੁਂ ਆਣਤ੍ਤਂ ਸਰੀਰਪ੍ਪਦੇਸਵਿਸਂਵਾਦਨਂ, ਤੇਨਾਹ ‘‘ਵਤ੍ਥੁਂ ਵਿਸਂ ਵਾਦੇਤ੍ਵਾ…ਪੇ… ਤਤੋ ਅਞ੍ਞਂ ਮਾਰੇਤਿ. ਪੁਰਤੋ ਪਹਰਿਤ੍ਵਾ ਮਾਰੇਹੀਤਿ ਵਾ…ਪੇ… ਨਤ੍ਥਿ ਕਮ੍ਮਬਦ੍ਧੋ’’ਤਿ, ਇਦਂ ਪਨ ਯਥਾਣਤ੍ਤਵਤ੍ਥੁਸ੍ਮਿਮ੍ਪਿ ਕਿਰਿਯਾਵਿਸੇਸਵਿਸਙ੍ਕੇਤੇਨ ਕਮ੍ਮਬਦ੍ਧਾਭਾਵਂ ਦਸ੍ਸੇਤੁਂ ਵੁਤ੍ਤਨ੍ਤਿ ਪਞ੍ਞਾਯਤਿ. ਤੇਨ ‘‘ਵਤ੍ਥੁਂ ਅਵਿਸਂਵਾਦੇਤ੍ਵਾ ਮਾਰੇਨ੍ਤੀ’’ਤਿ ਏਤ੍ਤਕਮੇਵ ਅਵਤ੍ਵਾ ‘‘ਯਥਾਣਤ੍ਤਿਯਾ’’ਤਿ ਕਿਰਿਯਾਵਿਸੇਸਨਿਯਮੋਪਿ ਦਸ੍ਸਿਤੋ, ਇਤਰਥਾ ਯਥਾਣਤ੍ਤਿਯਾਤਿ ਵਚਨਸ੍ਸ ਨਿਰਤ੍ਥਕਤਾਪਤ੍ਤਿਤੋ. ਵਤ੍ਥੁਨਿਦ੍ਦੇਸੇ ਚ ‘‘ਵਤ੍ਥੂਤਿ ਮਾਰੇਤਬ੍ਬੋ ਸਤ੍ਤੋ’’ਤਿ (ਪਾਰਾ. ਅਟ੍ਠ. ੨.੧੭੪) ਏਤ੍ਤਕਮੇਵ ਵੁਤ੍ਤਂ, ਨ ਪਨ ‘‘ਯਥਾਣਤ੍ਤਸ੍ਸ ਪਹਰਿਤਬ੍ਬਸਰੀਰਪ੍ਪਦੇਸੋਪੀ’’ਤਿ ਵੁਤ੍ਤਂ. ਤਸ੍ਮਾ ਪੁਰਤੋ ਪਹਰਣਾਦਿਪਿ ਕਿਰਿਯਾਵਿਸੇਸੇ ਏਵ ਸਙ੍ਗਯ੍ਹਤੀਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਵਤ੍ਥੁਵਿਸੇਸੇਨਾਤਿ ਮਾਤੁਆਦਿਮਤਸਤ੍ਤਵਿਸੇਸੇਨ. ਕਮ੍ਮਵਿਸੇਸੋਤਿ ਆਨਨ੍ਤਰਿਯਾਦਿਕਮ੍ਮਵਿਸੇਸੋ. ਆਪਤ੍ਤਿਵਿਸੇਸੋਤਿ ਪਾਰਾਜਿਕਾਦਿਆਪਤ੍ਤਿਵਿਸੇਸੋ.
ਯਦਾ ਕਦਾਚਿ ਪੁਬ੍ਬਣ੍ਹੇਤਿ ਆਣਤ੍ਤਦਿਵਸਤੋ ਅਞ੍ਞਸ੍ਸਪਿ ਯਸ੍ਸ ਕਸ੍ਸਚਿ ਦਿਵਸਸ੍ਸ ਪੁਬ੍ਬਣ੍ਹੇ. ਏਤਂ ਗਾਮੇ ਠਿਤਨ੍ਤਿ ਗਾਮੋ ਪੁਗ੍ਗਲਨਿਯਮਨਤ੍ਥਂ ਵੁਤ੍ਤੋ, ਨ ਓਕਾਸਨਿਯਮਨਤ੍ਥਂ, ਤਸ੍ਮਾ ‘‘ਯਤ੍ਥ ਕਤ੍ਥਚਿ ਮਾਰੇਤਿ, ਨਤ੍ਥਿ ਵਿਸਙ੍ਕੇਤੋ’’ਤਿ ਵੁਤ੍ਤਂ, ਏਤੇਨ ਕਾਲੋਕਾਸਆਵੁਧਇਅਯਾਪਥਕਿਰਿਯਾਵਿਸੇਸਾਨਂ ਨਿਯਮਿਚ੍ਛਾਯ ਅਸਤਿ ਯੇਨ ਕੇਨਚਿ ਪਕਾਰੇਨ ਮਰਣਮੇਵ ਇਚ੍ਛਨ੍ਤਸ੍ਸ ਆਣਾਪਕਸ੍ਸ ਮੁਖਾਰੁਲ਼੍ਹਵਸੇਨ ਵੁਤ੍ਤਸ੍ਸ ਦੇਸਕਾਲਾਦਿਨਿਯਮਸ੍ਸ ਵਿਸਙ੍ਕੇਤੇਪਿ ਕਮ੍ਮਬਦ੍ਧੋਯੇਵਾਤਿ ਞਾਪਿਤਂ ਹੋਤਿ. ਯੋ ਪਨ ਚਿਤ੍ਤੇਨ ਯਤ੍ਥ ਕਤ੍ਥਚਿ ਯਦਾ ਕਦਾਚਿ ਯੇਨ ਕੇਨਚਿ ਪਕਾਰੇਨ ਮਰਣਮੇਵ ਇਚ੍ਛਨ੍ਤੋਪਿ ਕਾਲਾਦਿਵਿਸਙ੍ਕੇਤੇਨ ਅਕੁਸਲਤੋ ਚੋਦਨਤੋ ਵਾ ਮੁਚ੍ਚਿਤੁਕਾਮੋ ਲੇਸੇਨ ਕਾਲਾਦਿਨਿਯਮਂ ਕਰੋਤਿ, ਤਸ੍ਸ ਮਨੁਸ੍ਸਵਿਗ੍ਗਹਪਾਰਾਜਿਕਤੋ ਪਰਿਯਾਯੇਨ ਅਮੁਚ੍ਚਨਤੋ ਕਾਲਾਦਿਵਿਸਙ੍ਕੇਤੇਪਿ ਕਮ੍ਮਬਦ੍ਧੋਵਾਤਿ ਗਹੇਤ੍ਵਾ ਵਿਚਾਰਣਤੋ ਗਹੇਤਬ੍ਬਂ, ਕੇਚਿ ਪਨੇਤਂ ਨ ਇਚ੍ਛਨ੍ਤਿ, ਵੀਮਂਸਿਤਬ੍ਬਂ. ਤੁਣ੍ਡੇਨਾਤਿ ਅਗ੍ਗਕੋਟਿਯਾ. ਥਰੁਨਾਤਿ ਖਗ੍ਗਮੁਟ੍ਠਿਨਾ. ਏਤਂ ਗਚ੍ਛਨ੍ਤਨ੍ਤਿ ਗਮਨੇਨ ਪੁਗ੍ਗਲੋਵ ਨਿਯਮਿਤੋ, ਨ ਇਰਿਯਾਪਥੋ, ਤੇਨਾਹ ‘‘ਨਤ੍ਥਿ ਵਿਸਙ੍ਕੇਤ’’ਨ੍ਤਿ.
‘‘ਦੀਘਂ ਮਾਰੇਹੀ’’ਤਿ ਵੁਤ੍ਤੇਪਿ ਦੀਘਸਣ੍ਠਾਨਾਨਂ ਬਹੁਭਾਵਤੋ ‘‘ਇਤ੍ਥਨ੍ਨਾਮਂ ਏਵਰੂਪਞ੍ਚ ਦੀਘ’’ਨ੍ਤਿ ਅਞ੍ਞੇਸਂ ਅਸਾਧਾਰਣਲਕ੍ਖਣੇਨ ਅਨਿਦ੍ਦਿਟ੍ਠਤ੍ਤਾ ‘‘ਅਨਿਯਮੇਤ੍ਵਾ ਆਣਾਪੇਤੀ’’ਤਿ ਵੁਤ੍ਤਂ, ਤੇਨੇਵਾਹ ‘‘ਯਂ ਕਿਞ੍ਚਿ ਤਾਦਿਸਂ ਮਾਰੇਮੀ’’ਤਿ. ਏਤ੍ਥ ਚ ਚਿਤ੍ਤੇਨ ਬਹੂਸੁ ਦੀਘਸਣ੍ਠਾਨੇਸੁ ਏਕਂ ਨਿਯਮੇਤ੍ਵਾ ਵੁਤ੍ਤੇਪਿ ਵਾਚਾਯ ਅਨਿਯਮਿਤਤ੍ਤਾ ਅਞ੍ਞਸ੍ਮਿਂ ਤਾਦਿਸੇ ਮਾਰਿਤੇ ਨਤ੍ਥਿ ਵਿਸਙ੍ਕੇਤੋਤਿ ਵਦਨ੍ਤਿ. ਅਤ੍ਤਾਨਂ ਮੁਞ੍ਚਿਤ੍ਵਾ ਪਰਪਾਣਿਮ੍ਹਿ ਪਾਣਸਞ੍ਞਿਤਾਲਕ੍ਖਣਸ੍ਸ ਅਙ੍ਗਸ੍ਸ ਅਭਾਵਤੋ ਨੇਵਤ੍ਥਿ ਪਾਣਾਤਿਪਾਤੋਤਿ ਆਹ ‘‘ਆਣਾਪਕੋ ਮੁਚ੍ਚਤੀ’’ਤਿ. ਅਤ੍ਤਾਨਂ ਉਦ੍ਦਿਸ੍ਸ ‘‘ਅਸੁਕਟ੍ਠਾਨੇ ਨਿਸਿਨ੍ਨ’’ਨ੍ਤਿ ਓਕਾਸਨਿਯਮੇ ਤਸ੍ਮਿਂ ਪਦੇਸੇ ਨਿਸਿਨ੍ਨਸ੍ਸ ਯਸ੍ਸ ਕਸ੍ਸਚਿ ਜੀਵਿਤਿਨ੍ਦ੍ਰਿਯਂ ਆਰਬ੍ਭ ਵਧਕਚਿਤ੍ਤਂ ਉਪ੍ਪਜ੍ਜਤੀਤਿ ਵੁਤ੍ਤਂ ‘‘ਨੇਵ ਵਧਕੋ ਮੁਚ੍ਚਤਿ ਨ ਆਣਾਪਕੋ’’ਤਿ. ਓਕਾਸਞ੍ਹਿ ਨਿਯਮੇਤ੍ਵਾ ਨਿਦ੍ਦਿਸਨ੍ਤੋ ਤਸ੍ਮਿਂ ਓਕਾਸੇ ਨਿਸਿਨ੍ਨਂ ਮਾਰੇਤੁਕਾਮੋ ਹੋਤਿ, ਸਯਂ ਪਨ ਤਦਾ ਤਤ੍ਥ ਨਤ੍ਥਿ, ਤਸ੍ਮਾ ਓਕਾਸੇਨ ਸਹ ਤਤ੍ਥ ਨਿਸਿਨ੍ਨਸ੍ਸੇਵ ਜੀਵਿਤਿਨ੍ਦ੍ਰਿਯਂ ਆਰਮ੍ਮਣਂ ਹੋਤਿ, ਨ ਅਤ੍ਤਨੋਤਿ ਗਹੇਤਬ੍ਬਂ. ਸਚੇ ਪਨ ਸਯਂ ਤਤ੍ਥੇਵ ਨਿਸੀਦਿਤ੍ਵਾ ਅਤ੍ਤਨੋ ਨਿਸਿਨ੍ਨਟ੍ਠਾਨਮੇਵ ਨਿਯਮੇਤ੍ਵਾ ‘‘ਮਾਰੇਹੀ’’ਤਿ ਵੁਤ੍ਤੇਪਿ ਅਞ੍ਞੋ ਤਤ੍ਥ ਨਿਸਿਨ੍ਨੋ ਮਾਰਿਯਤਿ, ਤਸ੍ਸਾਪਿ ਅਤ੍ਤਨੋਪਿ ਜੀਵਿਤਂ ਆਰਬ੍ਭ ਵਧਕਚੇਤਨਾ ਪਵਤ੍ਤਤਿ, ਪਰਸ੍ਮਿਂ ਤਤ੍ਥ ਮਾਰਿਤੇ ਆਣਾਪਕਸ੍ਸ ਕਮ੍ਮਬਦ੍ਧੋਤਿ ਗਹੇਤਬ੍ਬਂ. ਏਵਰੂਪੇ ਠਾਨੇ ਚਿਤ੍ਤਪ੍ਪਵਤ੍ਤਿਨਿਯਮੋ ਬੁਦ੍ਧਵਿਸਯੋ, ਨ ਅਞ੍ਞੇਸਂ ਵਿਸਯੋਤਿ ਆਹ ‘‘ਤਸ੍ਮਾ ਏਤ੍ਥ ਨ ਅਨਾਦਰਿਯਂ ਕਾਤਬ੍ਬ’’ਨ੍ਤਿ.
ਏਵਂ ਆਣਾਪੇਨ੍ਤਸ੍ਸ ਆਚਰਿਯਸ੍ਸ ਤਾਵ ਦੁਕ੍ਕਟਨ੍ਤਿ ਸਚੇ ਆਣਤ੍ਤਿਕੋ ਯਥਾਧਿਪ੍ਪਾਯਂ ਨ ਗਚ੍ਛਤਿ, ਆਚਰਿਯਸ੍ਸ ਆਣਤ੍ਤਿਕ੍ਖਣੇ ਦੁਕ੍ਕਟਂ. ਸਚੇ ਪਨ ਸੋ ਯਥਾਧਿਪ੍ਪਾਯਂ ਗਚ੍ਛਤਿ, ਯਂ ਪਰਤੋ ਥੁਲ੍ਲਚ੍ਚਯਂ ਵੁਤ੍ਤਂ, ਆਣਤ੍ਤਿਕ੍ਖਣੇ ਤਦੇਵ ਹੋਤਿ. ਅਥ ਸੋ ਅਵਸ੍ਸਂ ਘਾਤੇਤਿ, ਯਂ ਪਰਤੋ ‘‘ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੭੪) ਵੁਤ੍ਤਂ, ਤਤੋ ਇਮਸ੍ਸ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕਂ ਹੋਤਿ, ਨ ਦੁਕ੍ਕਟਥੁਲ੍ਲਚ੍ਚਯਾਨੀਤਿ ਗਹੇਤਬ੍ਬਂ. ਤੇਸਮ੍ਪਿ ਦੁਕ੍ਕਟਨ੍ਤਿ ਬੁਦ੍ਧਰਕ੍ਖਿਤਾਦੀਨਮ੍ਪਿ ਆਰੋਚਨਪਚ੍ਚਯਾ ਦੁਕ੍ਕਟਂ, ਇਦਞ੍ਚ ਯਥਾਣਤ੍ਤਿਵਸੇਨ ਸਙ੍ਘਰਕ੍ਖਿਤਸ੍ਸ ਜੀਵਿਤਾ ਵੋਰੋਪਨੇ ਅਸਤਿ ਯੁਜ੍ਜਤਿ, ਵੋਰੋਪਨੇ ਸਤਿ ਤੇਸਮ੍ਪਿ ਆਰੋਚਨਕ੍ਖਣੇਯੇਵ ਪਾਰਾਜਿਕਂ. ਪਟਿਗ੍ਗਹਿਤਮਤ੍ਤੇਤਿ ਇਦਂ ਅਵਸ੍ਸਂ ਪਟਿਗ੍ਗਹਣਸਭਾਵਦੀਪਨਤ੍ਥਂ ਵੁਤ੍ਤਂ, ਨ ਪਟਿਗ੍ਗਹਿਤਕ੍ਖਣੇਯੇਵ ਥੁਲ੍ਲਚ੍ਚਯਨ੍ਤਿ ਦਸ੍ਸਨਤ੍ਥਂ. ਸਚੇ ਹਿ ਸੋ ਅਵਸ੍ਸਂ ਪਟਿਗ੍ਗਹੇਸ੍ਸਤਿ, ਕਮ੍ਮਂ ਪਨ ਨ ਨਿਪ੍ਫਾਦੇਸ੍ਸਤਿ, ਤਦਾ ਆਚਰਿਯਸ੍ਸ ਆਣਤ੍ਤਿਕ੍ਖਣੇਯੇਵ ਥੁਲ੍ਲਚ੍ਚਯਂ ਹੋਤੀਤਿ ਦਟ੍ਠਬ੍ਬਂ.
ਮੂਲਟ੍ਠਸ੍ਸੇਵ ਦੁਕ੍ਕਟਨ੍ਤਿ ਇਦਂ ਮਹਾਅਟ੍ਠਕਥਾਯਂ ਆਗਤਨਯਦਸ੍ਸਨਮਤ੍ਤਂ, ਨ ਪਨੇਤਂ ਅਤ੍ਤਨਾ ਅਧਿਪ੍ਪੇਤਂ, ਤੇਨਾਹ ਏਵਂ ਸਨ੍ਤੇਤਿਆਦਿ, ਏਵਂ ਮਹਾਅਟ੍ਠਕਥਾਯਂ ਵੁਤ੍ਤਨਯੇਨ ਅਤ੍ਥੇ ਸਤੀਤਿ ਅਤ੍ਥੋ. ਪਟਿਗ੍ਗਹਣੇ ਆਪਤ੍ਤਿਯੇਵ ਨ ਸਿਯਾਤਿ ਵਧਕਸ੍ਸ ‘‘ਸਾਧੁ ਸੁਟ੍ਠੂ’’ਤਿ ਮਰਣਪਟਿਗ੍ਗਹਣੇ ਦੁਕ੍ਕਟਾਪਤ੍ਤਿ ਨੇਵ ਸਿਯਾ, ਏਵਂ ਅਨੋਲ਼ਾਰਿਕਵਿਸਯੇਪਿ ਤਾਵ ਦੁਕ੍ਕਟਂ, ਕਿਮਙ੍ਗਂ ਪਨ ਮਰਣਪਟਿਗ੍ਗਹਣੇਤਿ ਦਸ੍ਸਨਤ੍ਥਂ ਸਞ੍ਚਰਿਤ੍ਤਪਟਿਗ੍ਗਹਣਾਦਿ ਨਿਦਸ੍ਸਿਤਂ. ‘‘ਅਹੋ ਵਤ ਇਤ੍ਥਨ੍ਨਾਮੋ ਹਤੋ ਅਸ੍ਸਾ’’ਤਿ ਏਵਂ ਮਰਣਾਭਿਨਨ੍ਦਨਦਸ੍ਸਨਤ੍ਥਂ ਸਞ੍ਚਰਿਤ੍ਤਪਟਿਗ੍ਗਹਣਾਦਿਭਿਨਨ੍ਦਨੇ ਦੁਕ੍ਕਟੇ ਸਤਿ ਪਗੇਵ ‘‘ਅਹਂ ਤਂ ਮਾਰੇਸ੍ਸਾਮੀ’’ਤਿ ਮਰਣਪਟਿਗ੍ਗਹਣੇਤਿ ਅਧਿਪ੍ਪਾਯੋ. ਪਟਿਗ੍ਗਣ੍ਹਨ੍ਤਸ੍ਸੇਵੇਤਂ ਦੁਕ੍ਕਟਨ੍ਤਿ ਅਵਧਾਰਣੇਨ ਸਙ੍ਘਰਕ੍ਖਿਤਸ੍ਸ ਪਟਿਗ੍ਗਹਣਪਚ੍ਚਯਾ ਮੂਲਟ੍ਠਸ੍ਸ ਨਤ੍ਥੇਵ ਆਪਤ੍ਤੀਤਿ ਦਸ੍ਸੇਤਿ, ਵਿਸਙ੍ਕੇਤਤ੍ਤਾ ਪਠਮਂ ਆਣਤ੍ਤਦੁਕ੍ਕਟਮੇਵਸ੍ਸ ਹੋਤਿ. ਕੇਚਿ ਪਨ ‘‘ਮੂਲਟ੍ਠਸ੍ਸਾਪਿ ਦੁਕ੍ਕਟਮੇਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਏਕੇਨ ਪਯੋਗੇਨ ਦ੍ਵਿਨ੍ਨਂ ਦੁਕ੍ਕਟਾਨਂ ਅਸਮ੍ਭਵਾ. ਪੁਰਿਮਨਯੇਤਿ ਸਮਨਨ੍ਤਰਾਤੀਤੇ ਅਵਿਸਕ੍ਕਿਯਦੂਤਨਿਦ੍ਦੇਸੇ. ਏਤਨ੍ਤਿ ਦੁਕ੍ਕਟਂ. ਓਕਾਸਾਭਾਵੇਨਾਤਿ ਮੂਲਟ੍ਠਸ੍ਸ ਥੁਲ੍ਲਚ੍ਚਯਸ੍ਸ ਵੁਚ੍ਚਮਾਨਤ੍ਤਾ ਪਟਿਗ੍ਗਣ੍ਹਨ੍ਤਸ੍ਸ ਦੁਕ੍ਕਟਂ ਨ ਵੁਤ੍ਤਂ ਓਕਾਸਾਭਾਵੇਨ, ਨ ਪਨ ਆਪਤ੍ਤਿਅਭਾਵਤੋਤਿ ਅਧਿਪ੍ਪਾਯੋ.
੧੭੫. ਸਯਂ ਸਙ੍ਘਤ੍ਥੇਰਤ੍ਤਾ ‘‘ਉਪਟ੍ਠਾਨਕਾਲੇ’’ਤਿ ਵੁਤ੍ਤਂ. ਵਾਚਾਯ ਵਾਚਾਯ ਦੁਕ੍ਕਟਨ੍ਤਿ ‘‘ਯੋ ਕੋਚਿ ਮਮ ਵਚਨਂ ਸੁਤ੍ਵਾ ਇਮਂ ਮਾਰੇਤੂ’’ਤਿ ਇਮਿਨਾ ਅਧਿਪ੍ਪਾਯੇਨ ਅਵਤ੍ਵਾ ਕੇਵਲਂ ਮਰਣਾਭਿਨਨ੍ਦਨਵਸੇਨੇਵ ਵੁਤ੍ਤਤ੍ਤਾ ਚੋਰਾਪਿ ਨਾਮ ਤਂ ਨ ਹਨਨ੍ਤੀਤਿਆਦਿਵਾਚਾਯਪਿ ਦੁਕ੍ਕਟਮੇਵ ਵੁਤ੍ਤਂ. ਦ੍ਵਿਨ੍ਨਂ ਉਦ੍ਦਿਸ੍ਸਾਤਿ ਦ੍ਵੇ ਉਦ੍ਦਿਸ੍ਸ, ਦ੍ਵਿਨ੍ਨਂ ਵਾ ਮਰਣਂ ਉਦ੍ਦਿਸ੍ਸ. ਉਭੋ ਉਦ੍ਦਿਸ੍ਸ ਮਰਣਂ ਸਂਵਣ੍ਣੇਨ੍ਤਸ੍ਸ ਪਯੋਗਸਮੁਟ੍ਠਾਪਿਕਾਯ ਚੇਤਨਾਯ ਏਕਤ੍ਤੇਪਿ ‘‘ਦ੍ਵੇ ਪਾਣਾਤਿਪਾਤਾ’’ਤਿ ਵਤ੍ਤਬ੍ਬਤਾਸਙ੍ਖਾਤਂ ਬਲਵਭਾਵਂ ਆਪਜ੍ਜਿਤ੍ਵਾ ਪਟਿਸਨ੍ਧਿਪਵਤ੍ਤੀਸੁ ਮਹਾਵਿਪਾਕਤ੍ਤਾ ‘‘ਅਕੁਸਲਰਾਸੀ’’ਤਿ ਵੁਤ੍ਤਂ, ਬਹੂ ਉਦ੍ਦਿਸ੍ਸ ਮਰਣਸਂਵਣ੍ਣਨੇਪਿ ਏਸੇਵ ਨਯੋ. ਤਤ੍ਤਕਾ ਪਾਣਾਤਿਪਾਤਾਤਿ ਯਤ੍ਤਕਾ ਸਂਵਣ੍ਣਨਂ ਸੁਤ੍ਵਾ ਮਰਿਸ੍ਸਨ੍ਤਿ, ਤਤ੍ਤਕਾਨਮ੍ਪਿ ਵਤ੍ਤਮਾਨਂ ਅਨਾਗਤਞ੍ਚ ਜੀਵਿਤਿਨ੍ਦ੍ਰਿਯਂ ਸਬ੍ਬਂ ਆਲਮ੍ਬਿਤ੍ਵਾਵ ਚੇਤਨਾਯ ਪਵਤ੍ਤਨਤੋ ਤਤ੍ਤਕਾ ਪਾਣਾਤਿਪਾਤਾ ਹੋਨ੍ਤਿ, ਤਤ੍ਤਕਾਹਿ ਚੇਤਨਾਹਿ ਦਾਤਬ੍ਬਂ ਪਵਤ੍ਤਿਵਿਪਾਕਂ ਏਕਾਵ ਸਾ ਚੇਤਨਾ ਦਾਤੁਂ ਸਕ੍ਕੋਤੀਤਿ ਅਤ੍ਥੋ, ਪਟਿਸਨ੍ਧਿਵਿਪਾਕਂ ਪਨ ਸਯਞ੍ਚ ਪੁਬ੍ਬਾਪਰਚੇਤਨਾ ਚ ਏਕੇਕਮੇਵ ਦਾਤੁਂ ਸਕ੍ਕੋਤੀਤਿ ਗਹੇਤਬ੍ਬਂ.
੧੭੬. ਯੇਸਂ ਹਤ੍ਥਤੋਤਿ ਯੇਸਂ ਞਾਤਕਪਵਾਰਿਤਾਦੀਨਂ ਹਤ੍ਥਤੋ, ਇਦਞ੍ਚ ਭਿਕ੍ਖੁਨੋ ਰੂਪਿਯਮੂਲਸ੍ਸ ਅਭਾਵਂ ਸਨ੍ਧਾਯ ਵੁਤ੍ਤਂ, ਅਤ੍ਤਨੋਵ ਧਨਞ੍ਚੇ, ਸਯਮੇਵ ਮੂਲਂ ਗਹੇਤ੍ਵਾ ਮੁਞ੍ਚਤਿ, ਮੂਲਂ ਪਨ ਅਗ੍ਗਹੇਤ੍ਵਾਪਿ ਪੋਤ੍ਥਕਸ੍ਸ ਪੋਤ੍ਥਕਸਾਮਿਨੋ ਸਨ੍ਤਕਤ੍ਤਾਪਾਦਨਮੇਵੇਤ੍ਥ ਪਮਾਣਨ੍ਤਿ ਗਹੇਤਬ੍ਬਂ. ਲੇਖਾਦਸ੍ਸਨਕੋਤੂਹਲਕਾਤਿ ਸੁਨ੍ਦਰਕ੍ਖਰਂ ਦਿਸ੍ਵਾ ਵਾ ‘‘ਕੀਦਿਸਂ ਨੁ ਖੋ ਪੋਤ੍ਥਕ’’ਨ੍ਤਿ ਵਾ ਓਲੋਕੇਤੁਕਾਮਾ.
ਪਾਣਾਤਿਪਾਤਸ੍ਸ ਪਯੋਗਤ੍ਤਾਤਿ ਸਰੀਰਤੋ ਪਾਣਵਿਯੋਜਨਸ੍ਸ ਨਿਟ੍ਠਾਪਕਪਯੋਗਤ੍ਤਾ. ਓਪਾਤਖਣਨਤ੍ਥਂ ਪਨ ਕੁਦਾਲਾਦਿਅਤ੍ਥਾਯ ਅਯੋਬੀਜਸਮੁਟ੍ਠਾਪਨਤ੍ਥਂ ਅਕਪ੍ਪਿਯਪਥਵਿਂ ਵਾ ਕੁਦਾਲਦਣ੍ਡਾਦੀਨਂ ਅਤ੍ਥਾਯ ਭੂਤਗਾਮਂ ਵਿਕੋਪੇਨ੍ਤਸ੍ਸ ਪਾਚਿਤ੍ਤਿਯਮੇਵ. ਪਾਣਾਤਿਪਾਤਪਯੋਗਤ੍ਤਾਭਾਵਾ ਅਦਿਨ੍ਨਾਦਾਨਪੁਬ੍ਬਪਯਓਗੇ ਵਿਯ ਦੁਤਿਯਪਰਿਯੇਸਨਾਦੀਸੁਪਿ ਏਤ੍ਥ ਦੁਕ੍ਕਟਟ੍ਠਾਨੇ ਦੁਕ੍ਕਟਂ, ਮੁਸਾਵਾਦਾਦਿਪਾਚਿਤ੍ਤਿਯਟ੍ਠਾਨੇ ਪਾਚਿਤ੍ਤਿਯਮੇਵਾਤਿ ਗਹੇਤਬ੍ਬਂ. ਪਮਾਣੇਤਿ ਅਤ੍ਤਨਾ ਸਲ੍ਲਕ੍ਖਿਤੇ ਪਮਾਣੇ. ਤਚ੍ਛੇਤ੍ਵਾਤਿ ਉਨ੍ਨਤਪ੍ਪਦੇਸਂ ਤਚ੍ਛੇਤ੍ਵਾ. ਪਂਸੁਪਚ੍ਛਿਨ੍ਤਿ ਸਬ੍ਬਨ੍ਤਿਮਂ ਪਂਸੁਪਚ੍ਛਿਂ. ਏਤ੍ਤਕਂ ਅਲਨ੍ਤਿ ਨਿਟ੍ਠਾਪੇਤੁਕਾਮਤਾਯ ਸਬ੍ਬਨ੍ਤਿਮਪਯਓਗਸਾਧਿਕਾ ਚੇਤਨਾ ਸਨ੍ਨਿਟ੍ਠਾਪਕਚੇਤਨਾ, ਮਹਾਅਟ੍ਠਕਥਾਯਂ ‘‘ਏਕਸ੍ਮਿਂ ਦਿਵਸੇ ਅਵੂਪਸਨ੍ਤੇਨੇਵ ਪਯੋਗੇਨ ਖਣਿਤ੍ਵਾ ਨਿਟ੍ਠਾਪੇਨ੍ਤਂ ਸਨ੍ਧਾਯ ਸਬ੍ਬਨ੍ਤਿਮਾ ਸਨ੍ਨਿਟ੍ਠਾਪਕਚੇਤਨਾ ਵੁਤ੍ਤਾ, ਇਤਰਾਸੁ ਪਨ ਅਟ੍ਠਕਥਾਸੁ ‘‘ਇਮਸ੍ਮਿਂ ਪਤਿਤ੍ਵਾ ਮਰਨ੍ਤੂ’’ਤਿ ਅਧਿਪ੍ਪਾਯੇਨ ਏਕਸ੍ਮਿਂ ਦਿਵਸੇ ਕਿਞ੍ਚਿ ਖਣਿਤ੍ਵਾ ਅਪਰਸ੍ਮਿਮ੍ਪਿ ਦਿਵਸੇ ਤਤੋ ਕਿਞ੍ਚਿ ਕਿਞ੍ਚਿ ਖਣਿਤ੍ਵਾ ਨਿਟ੍ਠਾਪੇਨ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਏਵਂ ਅਟ੍ਠਕਥਾਨਂ ਅਞ੍ਞਮਞ੍ਞਵਿਰੋਧੋ ਞਾਤਬ੍ਬੋ. ਅਤ੍ਤਨੋ ਧਮ੍ਮਤਾਯਾਤਿ ਅਜਾਨਿਤ੍ਵਾ, ਪਕ੍ਖਲਿਤ੍ਵਾ ਵਾ. ਅਰਹਨ੍ਤਾਪਿ ਸਙ੍ਗਹਂ ਗਚ੍ਛਨ੍ਤੀਤਿ ਅਞ੍ਞੇਹਿ ਪਾਤਿਯਮਾਨਾਨਂ ਅਮਰਿਤੁਕਾਮਾਨਮ੍ਪਿ ਅਰਹਨ੍ਤਾਨਂ ਮਰਣਂ ਸਮ੍ਭਵਤੀਤਿ ਵੁਤ੍ਤਂ. ਪੁਰਿਮਨਯੇਤਿ ‘‘ਮਰਿਤੁਕਾਮਾ ਇਧ ਮਰਿਸ੍ਸਨ੍ਤੀ’’ਤਿ ਵੁਤ੍ਤਨਯੇ. ਵਿਸਙ੍ਕੇਤੋਤਿ ਮਰਿਤੁਕਾਮਾਨਂ ਮਾਰੇਤੁਕਾਮਾਨਞ੍ਚ ਉਦ੍ਦਿਸ੍ਸ ਖਤਤ੍ਤਾ ਅਮਰਿਤੁਕਾਮਾਨਂ ਮਰਣੇ ਕਮ੍ਮਬਦ੍ਧੋ ਨਤ੍ਥੀਤਿ ਅਤ੍ਥੋ.
ਤਤ੍ਥ ਪਤਿਤਂ ਬਹਿ ਨੀਹਰਿਤ੍ਵਾਤਿ ਇਦਂ ਤਤ੍ਥ ਪਤਨਪਚ੍ਚਯਾ ਮਰਣਸ੍ਸ ਪਵਤ੍ਤਤ੍ਤਾ ਵੁਤ੍ਤਂ. ਆਵਾਟੇ ਪਤਿਤ੍ਵਾ ਥੋਕਂ ਚਿਰਾਯਿਤ੍ਵਾ ਗਚ੍ਛਨ੍ਤਂ ਗਹੇਤ੍ਵਾ ਮਾਰਿਤੇ ਤਤ੍ਥ ਪਤਿਤਰੋਗੇਨ ਪੀਲ਼ਿਤਸ੍ਸ ਗਚ੍ਛਤੋ ਪਕ੍ਖਲਿਤ੍ਵਾ ਪਾਸਾਣਾਦੀਸੁ ਪਤਨੇਨਾਪਿ ਮਰਣੇਪਿ ਓਪਾਤਖਣਕੋ ਨ ਮੁਚ੍ਚਤੀਤਿ ਵੇਦਿਤਬ੍ਬਂ. ਅਮਰਿਤੁਕਾਮਾ ਵਾਤਿ ਅਧਿਪ੍ਪਾਯਸ੍ਸ ਸਮ੍ਭਵਤੋ ਓਪਪਾਤਿਕੇ ਉਤ੍ਤਰਿਤੁਂ ਅਸਕ੍ਕੁਣਿਤ੍ਵਾ ਮਤੇਪਿ ਪਾਰਾਜਿਕਂ ਵੁਤ੍ਤਂ. ‘‘ਨਿਬ੍ਬਤ੍ਤਿਤ੍ਵਾ’’ਤਿ ਵੁਤ੍ਤਤ੍ਤਾ ਪਤਨਂ ਨ ਦਿਸ੍ਸਤੀਤਿ ਚੇ? ਤਤ੍ਥਸ੍ਸ ਨਿਬ੍ਬਤ੍ਤਿਯੇਵ ਪਤਨਨ੍ਤਿ ਨਤ੍ਥਿ ਵਿਰੋਧੋ. ਯਸ੍ਮਾ ਮਾਤੁਯਾ ਪਤਿਤ੍ਵਾ ਪਰਿਵਤ੍ਤਿਤਲਿਙ੍ਗਾਯ ਮਤਾਯ ਸੋ ਮਾਤੁਘਾਤਕੋ ਹੋਤਿ, ਨ ਕੇਵਲਂ ਮਨੁਸ੍ਸਪੁਰਿਸਘਾਤਕੋ, ਤਸ੍ਮਾ ਪਤਿਤਸ੍ਸੇਵ ਵਸੇਨ ਆਪਤ੍ਤੀਤਿ ਅਧਿਪ੍ਪਾਯੇਨ ‘‘ਪਤਨਰੂਪਂ ਪਮਾਣ’’ਨ੍ਤਿ ਵੁਤ੍ਤਂ, ਇਦਂ ਪਨ ਅਕਾਰਣਂ ‘‘ਲਿਙ੍ਗੇ ਪਰਿਵਤ੍ਤੇਪਿ ਏਕਸਨ੍ਤਾਨਤ੍ਤਸ੍ਸ ਅਵਿਗਤਤ੍ਤਾ. ਮਨੁਸ੍ਸਭੂਤਂ ਮਾਤਰਂ ਵਾ ਪਿਤਰਂ ਵਾ ਅਪਿ ਪਰਿਵਤ੍ਤਲਿਙ੍ਗਂ ਜੀਵਿਤਾ ਵੋਰੋਪੇਨ੍ਤਸ੍ਸ ਕਮ੍ਮਂ ਆਨਨ੍ਤਰਿਯ’’ਨ੍ਤਿ ਹਿ ਅਟ੍ਠਕਥਾਯਂ ਵੁਤ੍ਤਂ. ਯੇਨ ਪਨ ਸਭਾਵੇਨ ਸਤ੍ਤਾ ਜਾਯਨ੍ਤਿ, ਤੇਨੇਵ ਮਰਨ੍ਤਿ, ਸੋਵ ਤੇਸਂ ਰੂਪਨ੍ਤਰਗ੍ਗਹਣੇਪਿ ਸਭਾਵੋਤਿ ‘‘ਮਰਣਰੂਪਮੇਵ ਪਮਾਣਂ, ਤਸ੍ਮਾ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤੋ. ਪਚ੍ਛਿਮੋ ਵਾਦੋ ਪਮਾਣਂ, ਏਵਂ ਸਨ੍ਤੇ ਪਾਲ਼ਿਯਂ ‘‘ਯਕ੍ਖੋ ਵਾ ਪੇਤੋ ਵਾ ਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹੋ ਵਾ ਤਸ੍ਮਿਂ ਪਤਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਤਿਤੇ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਮਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਕਸ੍ਮਾ ਵੁਤ੍ਤਨ੍ਤਿ ਚੇ? ਨਾਯਂ ਦੋਸੋ. ‘‘ਯਕ੍ਖੋ ਵਾ ਪੇਤੋ ਵਾ’’ਤਿ ਹਿ ਪਠਮਂ ਸਕਰੂਪਂ ਦਸ੍ਸੇਤ੍ਵਾ ਰੂਪਨ੍ਤਰਂ ਗਹੇਤ੍ਵਾਪਿ ਠਿਤੇਯੇਵ ਯਕ੍ਖਪੇਤੇ ਦਸ੍ਸੇਤੁਂ ‘‘ਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹੋ ਵਾ’’ਤਿ ਵੁਤ੍ਤਂ. ਤਸ੍ਮਾ ਤਿਰਚ੍ਛਾਨਗਤਵਿਗ੍ਗਹੋ ਮਨੁਸ੍ਸਵਿਗ੍ਗਹੋ ਵਾ ਯਕ੍ਖੋ ਵਾ ਪੇਤੋ ਵਾਤਿ ਏਵਮੇਤ੍ਥ ਯੋਜਨਾ ਕਾਤਬ੍ਬਾ. ਕੇਚਿ ਪਨ ‘‘ਮਨੁਸ੍ਸਵਿਗ੍ਗਹੇਨ ਠਿਤਤਿਰਚ੍ਛਾਨਗਤਾਨਂ ਆਵੇਣਿਕਂ ਕਤ੍ਵਾ ਥੁਲ੍ਲਚ੍ਚਯਂ ਵੁਤ੍ਤਂ ਵਿਯ ਦਿਸ੍ਸਤੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਤਿਰਚ੍ਛਾਨੋ ਵਾ ਮਨੁਸ੍ਸਵਿਗ੍ਗਹੋਤਿ ਵਤ੍ਤਬ੍ਬਤੋ, ਅਟ੍ਠਕਥਾਸੁ ਚ ਇਮਸ੍ਸ ਵਿਸੇਸਸ੍ਸ ਅਵੁਤ੍ਤਤ੍ਤਾ. ਯਕ੍ਖਪੇਤਰੂਪੇਨ ਮਤੇਪਿ ਏਸੇਵ ਨਯੋਤਿ ਇਮਿਨਾ ਮਰਣਰੂਪਸ੍ਸੇਵ ਪਮਾਣਤ੍ਤਾ ਥੁਲ੍ਲਚ੍ਚਯਂ ਅਤਿਦਿਸਤਿ.
ਮੁਧਾਤਿ ਅਮੂਲੇਨ. ਸੋ ਨਿਦ੍ਦੋਸੋਤਿ ਤੇਨ ਤਤ੍ਥ ਕਤਪਯੋਗਸ੍ਸ ਅਭਾਵਤੋ, ਯਦਿ ਪਨ ਸੋਪਿ ਤਤ੍ਥ ਕਿਞ੍ਚਿ ਕਰੋਤਿ, ਨ ਮੁਚ੍ਚਤਿ ਏਵਾਤਿ ਦਸ੍ਸੇਨ੍ਤੋ ਏਵਂ ਪਤਿਤਾਤਿਆਦਿਮਾਹ. ਤਤ੍ਥ ਏਵਨ੍ਤਿ ਏਵਂ ਮਯਾ ਕਤੇਤਿ ਅਤ੍ਥੋ. ਨ ਨਸ੍ਸਿਸ੍ਸਨ੍ਤੀਤਿ ਅਦਸ੍ਸਨਂ ਨ ਗਮਿਸ੍ਸਨ੍ਤਿ, ਨ ਪਲਾਯਿਸ੍ਸਨ੍ਤੀਤਿ ਅਧਿਪ੍ਪਾਯੋ. ਸੁਉਦ੍ਧਰਾ ਵਾ ਭਵਿਸ੍ਸਨ੍ਤੀਤਿ ਇਦਂ ਗਮ੍ਭੀਰਸ੍ਸ ਓਪਾਤਸ੍ਸ ਪੂਰਣੇ ਪਯੋਜਨਦਸ੍ਸਨਂ. ਉਤ੍ਤਾਨੇ ਕਤੇ ਓਪਾਤੇ ਸੀਘਂ ਅਮ੍ਹੇਹਿ ਗਹੇਤ੍ਵਾ ਮਾਰੇਤੁਂ ਸੁਉਦ੍ਧਰਾ ਭਵਿਸ੍ਸਨ੍ਤੀਤਿ ਅਧਿਪ੍ਪਾਯੋ. ਵਿਪ੍ਪਟਿਸਾਰੇ ਉਪ੍ਪਨ੍ਨੇਤਿ ਮੂਲਟ੍ਠਂ ਸਨ੍ਧਾਯ ਵੁਤ੍ਤਂ. ਯਦਿ ਪਨ ਪਚ੍ਛਿਮੋਪਿ ਲਭਿਤ੍ਵਾ ਤਤ੍ਥ ਵੁਤ੍ਤਪ੍ਪਕਾਰਂ ਕਿਞ੍ਚਿ ਕਤ੍ਵਾ ਪੁਨ ਵਿਪ੍ਪਟਿਸਾਰੇ ਉਪ੍ਪਨ੍ਨੇ ਏਵਂ ਕਰੋਤਿ, ਤਸ੍ਸਾਪਿ ਏਸੇਵ ਨਯੋ. ਜਾਤਪਥਵੀ ਜਾਤਾਤਿ ਈਦਿਸੇ ਪੁਨ ਅਞ੍ਞੇਨ ਓਪਾਤੇ ਖਤੇ ਤਦਾ ਮੁਚ੍ਚਤੀਤਿ ਦਸ੍ਸਨਤ੍ਥਂ ਵੁਤ੍ਤਂ, ਜਾਤਪਥਵੀਸਦਿਸਂ ਕਤ੍ਵਾ ਪੁਨ ਸੁਟ੍ਠੁ ਕੋਟ੍ਟੇਤ੍ਵਾ ਦਲ਼੍ਹਤਰਂ ਪੂਰਿਤੇਪਿ ਮੁਚ੍ਚਤਿਯੇਵਾਤਿ ਗਹੇਤਬ੍ਬਂ.
ਥਦ੍ਧਤਰਨ੍ਤਿ ਥਿਰਕਰਣਤ੍ਥਂ ਅਪਰਾਪਰਾਯ ਪਾਸਯਟ੍ਠਿਯਾ ਸਦ੍ਧਿਂ ਬਨ੍ਧਿਤ੍ਵਾ ਵਾ ਤਮੇਵ ਵਾ ਸਿਥਿਲਭੂਤਪਾਸਂ ਥਦ੍ਧਤਰਂ ਬਨ੍ਧਿਤ੍ਵਾ ਠਪੇਤਿ. ਖਾਣੁਕਨ੍ਤਿ ਪਾਸਯਟ੍ਠਿਬਨ੍ਧਨਖਾਣੁਕਂ. ਤਤ੍ਥਜਾਤਕਯਟ੍ਠਿਂ ਛਿਨ੍ਦਿਤ੍ਵਾ ਮੁਚ੍ਚਤੀਤਿ ਇਦਂ ਅਰਞ੍ਞੇ ਯਥਾਠਿਤਮੇਵ ਦਣ੍ਡਂ ਮੂਲੇ ਅਚ੍ਛਿਨ੍ਦਿਤ੍ਵਾ ਪਾਸਬਨ੍ਧਨਯੋਗ੍ਗਂ ਕਤ੍ਵਾ ਠਪਿਤਤ੍ਤਾ ਤਤ੍ਥ ਅਞ੍ਞੋਪਿ ਕੋਚਿ ਪਾਸਂ ਬਨ੍ਧੇਯ੍ਯ, ਮੂਲਟ੍ਠੋ ਨ ਮੁਚ੍ਚਤਿ, ਤਂ ਪਨ ਮੂਲੇਪਿ ਛਿਨ੍ਦਿਤ੍ਵਾ ਖਣ੍ਡਾਖਣ੍ਡਂ ਕਤ੍ਵਾ ਮੁਚ੍ਚਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਰਜ੍ਜੁਕੇਤਿ ਵਾਕੇਹਿ ਏਕਵਾਰਂ ਵਟ੍ਟਿਤਰਜ੍ਜੁਕੇ. ਸਯਂ ਵਟ੍ਟਿਤਨ੍ਤਿ ਤਨੁਕਵਟ੍ਟਿਤਂ ਦਿਗੁਣਤਿਗੁਣਤਾਪਾਦਨੇਨ ਅਤ੍ਤਨਾ ਵਟ੍ਟਿਤਂ. ਉਬ੍ਬਟ੍ਟੇਤ੍ਵਾਤਿ ਪਾਕਤਿਕਂ ਕਤ੍ਵਾ. ਗੋਪੇਨ੍ਤੋਪੀਤਿ ਹੀਰਂ ਹੀਰਂ ਕਤ੍ਵਾ ਗੋਪੇਨ੍ਤੋਪਿ.
੧੭੭. ਆਲਮ੍ਬਨਰੁਕ੍ਖੋ ਵਾਤਿ ਤਤ੍ਥਜਾਤਕਂ ਸਨ੍ਧਾਯ ਵੁਤ੍ਤਂ. ਤਦਤ੍ਥਮੇਵ ਕਤ੍ਵਾਤਿ ਮਾਰਣਤ੍ਥਮੇਵ ਅਯੋਬੀਜਸਮੁਟ੍ਠਾਪਨਾਦਿਨਾ ਵਾਸਿਆਦਿਂ ਸਤ੍ਥਂ ਕਾਰੇਤ੍ਵਾ. ਪਾਕਤਿਕਨ੍ਤਿ ਅਞ੍ਞੇਹਿ ਕਤਂ ਪਕਤਿਸਤ੍ਥਮੇਵ ਲਭਿਤ੍ਵਾ ਮੂਲਟ੍ਠੇਨ ਠਪਿਤਂ ਹੋਤੀਤਿ ਅਤ੍ਥੋ. ਮੁਚ੍ਚਤੀਤਿ ਮੂਲਟ੍ਠੋ ਮੁਚ੍ਚਤਿ. ਵਿਸਮਣ੍ਡਲਨ੍ਤਿ ਮਞ੍ਚਪੀਠਾਦੀਸੁ ਆਲਿਤ੍ਤਂ ਵਿਸਮਣ੍ਡਲਂ.
ਵਤ੍ਵਾ ਅਸਿਂ ਉਪਨਿਕ੍ਖਿਪਤੀਤਿ ਏਤ੍ਥ ਮੁਖੇਨ ਅਵਤ੍ਵਾ ਮਨਸਾਵ ਚਿਨ੍ਤੇਤ੍ਵਾ ਉਪਨਿਕ੍ਖਿਪਨੇਪਿ ਏਸੇਵ ਨਯੋ. ਪੁਰਿਮਨਯੇਨਾਤਿ ਯੇਸਂ ਹਤ੍ਥਤੋ ਮੂਲਂ ਗਹਿਤਨ੍ਤਿਆਦਿਨਾ. ਵਿਸਭਾਗਰੋਗੋ ਨਾਮ ਕੁਟ੍ਠਾਦਿਵਿਰੂਪਭਾਵਤੋ, ਗਣ੍ਡਪੀਲ਼ਕਾਦਿ ਵਾ ਜੀਵਿਤਪ੍ਪਵਤ੍ਤਿਯਾ ਪਚ੍ਚਨੀਕਤ੍ਤਾ.
੧੭੮. ਮਨਾਪਿਯੇਪਿ ਏਸੇਵ ਨਯੋਤਿ ਏਤੇਨ ਮਨਾਪਿਯਂ ਰੂਪਂ ਉਪਸਂਹਰਤੀਤਿ ਏਤ੍ਥ ਯਂ ਵਾ ਮਨਾਪਰੂਪਂ, ਤਸ੍ਸ ਸਮੀਪੇ ਠਪੇਤਿ, ਅਤ੍ਤਨਾ ਵਾ ਮਨਾਪਿਯੇਨ ਰੂਪੇਨ ਸਮਨ੍ਨਾਗਤੋ ਤਿਟ੍ਠਤੀਤਿਆਦਿ ਯੋਜੇਤਬ੍ਬਨ੍ਤਿ ਦਸ੍ਸੇਤਿ. ਅਲਙ੍ਕਰਿਤ੍ਵਾ ਉਪਸਂਹਰਤੀਤਿ ‘‘ਅਲਾਭਕੇਨ ਸੁਸ੍ਸਿਤ੍ਵਾ ਮਰਤੂ’’ਤਿ ਇਮਿਨਾ ਅਧਿਪ੍ਪਾਯੇਨ ਉਪਸਂਹਰਤਿ, ਤੇਨੇਵ ‘‘ਸਚੇ ਉਤ੍ਤਸਿਤ੍ਵਾ ਮਰਤਿ, ਵਿਸਙ੍ਕੇਤੋ’’ਤਿ ਵੁਤ੍ਤਂ. ਅਲਾਭਕੇਨ ਸੁਸ੍ਸਿਤ੍ਵਾ ਮਰਤੀਤਿ ਏਤ੍ਥ ਪਾਰਾਜਿਕੋਤਿ ਪਾਠਸੇਸੋ ਦਟ੍ਠਬ੍ਬੋ. ਮਹਾਕਚ੍ਛੁ ਨਾਮ ਵਲ੍ਲਿਫਲਵਿਸੇਸੋ, ਯਸ੍ਸ ਮਜ੍ਜਾਰਪਾਦਸ੍ਸੇਵ ਸਣ੍ਠਾਨਂ ਦੁਕ੍ਖਸਮ੍ਫਸ੍ਸਾਨਿ ਸੁਖੁਮਲੋਮਾਨਿ ਚ ਹੋਨ੍ਤਿ. ਹਂਸਪੁਪ੍ਫਨ੍ਤਿ ਹਂਸਾਦੀਨਂ ਪਕ੍ਖਲੋਮਂ ਸਨ੍ਧਾਯ ਵਦਨ੍ਤਿ. ਅਤ੍ਤਨੋ ਧਮ੍ਮਤਾਯ ਮਰਤਿ, ਅਨਾਪਤ੍ਤੀਤਿ ਪਾਰਾਜਿਕਂ ਸਨ੍ਧਾਯ ਵੁਤ੍ਤਂ ਦੁਕ੍ਕਟਾ ਨ ਮੁਚ੍ਚਨਤੋ.
੧੭੯. ਅਸਞ੍ਚਿਚ੍ਚਾਤਿ ਇਦਂ ਮਰਣਸਂਵਤ੍ਤਨਿਕਉਪਕ੍ਕਮਸ੍ਸ ਅਸਲ੍ਲਕ੍ਖਣਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ਇਮਿਨਾ ਉਪਕ੍ਕਮੇਨਾਤਿਆਦਿ. ਅਜਾਨਨ੍ਤਸ੍ਸਾਤਿ ਇਦਂ ਪਨ ਮਰਣਸਂਵਤ੍ਤਨਿਕਵਿਸਾਦਿਉਪਕ੍ਕਮਕਰਣਸ੍ਸ ਅਜਾਨਨਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ਇਮਿਨਾ ਅਯਂ ਮਰਿਸ੍ਸਤੀਤਿਆਦਿ. ਨ ਮਰਣਾਧਿਪ੍ਪਾਯਸ੍ਸਾਤਿ ਇਦਂ ਦੁਕ੍ਖੁਪ੍ਪਾਦਕਂ ਉਪਕ੍ਕਮਨ੍ਤਿ ਜਾਨਨ੍ਤਸ੍ਸਾਪਿ ਮਰਣਾਧਿਪ੍ਪਾਯਸ੍ਸ ਅਭਾਵਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ਮਰਣਂ ਅਨਿਚ੍ਛਨ੍ਤਸ੍ਸਾਤਿਆਦਿ. ਅਨੁਪ੍ਪਬਨ੍ਧਾਭਾਵਾਤਿ ਦੋਮਨਸ੍ਸਵੀਥੀਨਂ ਨਿਰਨ੍ਤਰਪ੍ਪਵਤ੍ਤਿਅਭਾਵਾ.
ਪਦਭਾਜਨੀਯਵਣ੍ਣਨਾਨਯੋ ਨਿਟ੍ਠਿਤੋ.
ਵਿਨੀਤਵਤ੍ਥੁਵਣ੍ਣਨਾ
੧੮੦. ਵੋਹਾਰਵਸੇਨਾਤਿ ਪੁਬ੍ਬਭਾਗਵੋਹਾਰਵਸੇਨ, ਮਰਣਾਧਿਪ੍ਪਾਯਸ੍ਸ ਸਨ੍ਨਿਟ੍ਠਾਪਕਚੇਤਨਾਕ੍ਖਣੇ ਕਰੁਣਾਯ ਅਭਾਵਤੋ ਕਾਰੁਞ੍ਞੇਨ ਪਾਸੇ ਬਦ੍ਧਸੂਕਰਮੋਚਨਂ (ਪਾਰਾ. ੧੫੩) ਵਿਯ ਨ ਹੋਤੀਤਿ ਅਧਿਪ੍ਪਾਯੋ. ‘‘ਯਥਾਯੁਨਾ’’ਤਿ ਵੁਤ੍ਤਮੇਵਤ੍ਥਂ ‘‘ਯਥਾਨੁਸਨ੍ਧਿਨਾ’’ਤਿ ਪਰਿਯਾਯਨ੍ਤਰੇਨ ਵੁਤ੍ਤਂ. ਹੇਟ੍ਠਾ ਕਿਸ੍ਮਿਞ੍ਚਿ ਵਿਜ੍ਜਮਾਨੇ ਸਾਟਕਂ ਵਲਿਂ ਗਣ੍ਹਾਤੀਤਿ ਆਹ ‘‘ਯਸ੍ਮਿਂ ਵਲਿ ਨ ਪਞ੍ਞਾਯਤੀ’’ਤਿ. ਪਟਿਵੇਕ੍ਖਣਞ੍ਚੇਤਂ ਗਿਹੀਨਂ ਸਨ੍ਤਕੇ ਏਵਾਤਿ ਦਟ੍ਠਬ੍ਬਂ. ਪਾਲ਼ਿਯਂ ਮੁਸਲੇ ਉਸ੍ਸਿਤੇਤਿ ਅਞ੍ਞਮਞ੍ਞਂ ਉਪਤ੍ਥਮ੍ਭੇਤ੍ਵਾ ਦ੍ਵੀਸੁ ਮੁਸਲੇਸੁ ਭਿਤ੍ਤਿਂ ਅਪਸ੍ਸਾਯ ਠਪਿਤੇਸੂਤਿ ਅਤ੍ਥੋ. ਉਦੁਕ੍ਖਲਭਣ੍ਡਿਕਨ੍ਤਿ ਉਦੁਕ੍ਖਲਤ੍ਥਾਯ ਆਨੀਤਂ ਦਾਰੁਭਣ੍ਡਂ. ਪਰਿਬਨ੍ਧਨ੍ਤਿ ਭੋਜਨਪਰਿਬਨ੍ਧਂ, ਭੋਜਨਨ੍ਤਰਾਯਨ੍ਤਿ ਵੁਤ੍ਤਂ ਹੋਤਿ.
੧੮੧. ਅਗ੍ਗਕਾਰਿਕਨ੍ਤਿ ਏਤ੍ਥ ਕਾਰਿਕ-ਸਦ੍ਦਸ੍ਸ ਭਾਵਵਚਨਤ੍ਤਾ ‘‘ਅਗ੍ਗਕਿਰਿਯ’’ਨ੍ਤਿ ਅਤ੍ਥਂ ਵਤ੍ਵਾਪਿ ਯਸ੍ਮਾ ਕਿਰਿਯਂ ਦਾਤੁਂ ਨ ਸਕ੍ਕਾ, ਤਸ੍ਮਾ ਦਾਨਸਙ੍ਖਾਤਾਯ ਅਗ੍ਗਕਿਰਿਯਾਯ ਯੁਤ੍ਤਪਿਣ੍ਡਪਾਤਮੇਵ ਇਧ ਉਪਚਾਰਯੁਤ੍ਤਿਯਾ ਅਗ੍ਗਕਿਰਿਯਾਤਿ ਗਹੇਤਬ੍ਬਨ੍ਤਿ ਆਹ ਪਠਮਂ ਲਦ੍ਧਪਿਣ੍ਡਪਾਤਨ੍ਤਿਆਦਿ.
੧੮੨-੩. ਦਣ੍ਡਮੁਗ੍ਗਰਨਿਖਾਦਨਵੇਮਾਦੀਨਂ ਵਸੇਨਾਤਿ ਏਤ੍ਥ ਦਣ੍ਡੋ ਨਾਮ ਦੀਘਦਣ੍ਡੋ. ਮੁਗ੍ਗਰੋ ਨਾਮ ਰਸ੍ਸੋ. ਵੇਮਂ ਨਾਮ ਤਨ੍ਤਵਾਯਾਨਂ ਵਤ੍ਥਵਾਯਨਉਪਕਰਣਂ, ਯੇਨ ਵੀਤਂ ਤਨ੍ਤਂ ਘਟ੍ਟੇਨ੍ਤਿ. ਵਿਭਤ੍ਤਿਬ੍ਯਤ੍ਤਯੇਨਾਤਿ ਵਿਭਤ੍ਤਿਵਿਪਰਿਣਾਮੇਨ. ਵਿਸੇਸਾਧਿਗਮੋਤਿ ਸਮਾਧਿ ਵਿਪਸ੍ਸਨਾ ਚ. ਵਿਸੇਸਾਧਿਗਮਨ੍ਤਿ ਲੋਕੁਤ੍ਤਰਧਮ੍ਮਪਟਿਲਾਭਂ. ਬ੍ਯਾਕਰਿਤ੍ਵਾਤਿ ਆਰੋਚੇਤ੍ਵਾ, ਇਦਞ੍ਚ ਵਿਸੇਸਸ੍ਸ ਅਧਿਗਤਭਾਵਦਸ੍ਸਨਤ੍ਥਂ ਵੁਤ੍ਤਂ. ਅਧਿਗਤਵਿਸੇਸਾ ਹਿ ਦਿਟ੍ਠਾਨੁਗਤਿਆਪਜ੍ਜਨਤ੍ਥਂ ਲਜ੍ਜੀਭਿਕ੍ਖੂਨਂ ਅਵਸ੍ਸਂ ਅਧਿਗਮਂ ਬ੍ਯਾਕਰੋਨ੍ਤਿ, ਅਧਿਗਤਵਿਸੇਸੇਨ ਪਨ ਅਬ੍ਯਾਕਰਿਤ੍ਵਾਪਿ ਆਹਾਰਂ ਉਪਚ੍ਛਿਨ੍ਦਿਤੁਂ ਨ ਵਟ੍ਟਤਿ, ਅਧਿਗਮਨ੍ਤਰਾਯਵਿਨੋਦਨਤ੍ਥਮੇਵ ਆਹਾਰੂਪਚ੍ਛੇਦਸ੍ਸ ਅਨੁਞ੍ਞਾਤਤ੍ਤਾ ਤਦਧਿਗਮੇ ਸੋ ਨ ਕਾਤਬ੍ਬੋਵ. ਕਿਂ ਪਨਾਧਿਗਮਂ ਆਰੋਚੇਤੁਂ ਵਟ੍ਟਤੀਤਿ ਆਹ ਸਭਾਗਾਨਨ੍ਤਿਆਦਿ. ਭਣ੍ਡਕਂ ਵਾ ਧੋਵਨ੍ਤਾਤਿ ਚੀਵਰਂ ਵਾ ਧੋਵਨ੍ਤਾ. ਧੋਵਨਦਣ੍ਡਕਨ੍ਤਿ ਚੀਵਰਧੋਵਨਦਣ੍ਡਂ.
੧੮੫. ਮਦ੍ਦਾਪੇਤ੍ਵਾ ਪਾਤੇਤਿ, ਵਿਸਙ੍ਕੇਤੋਤਿ ਯਥਾਣਤ੍ਤਿਯਾ ਅਕਤਤ੍ਤਾ ਵੁਤ੍ਤਂ, ਯਦਿ ਪਨ ਆਣਾਪਕੋ ਮਦ੍ਦਨਮ੍ਪਿ ਮਦ੍ਦਾਪਨਮ੍ਪਿ ਸਨ੍ਧਾਯ ਵੋਹਾਰਵਸੇਨ ‘‘ਮਦ੍ਦਿਤ੍ਵਾ ਪਾਤੇਹੀ’’ਤਿ ਵਦਤਿ, ਵਿਸਙ੍ਕੇਤੋ ਨਤ੍ਥੀਤਿ ਵੇਦਿਤਬ੍ਬਂ. ‘‘ਮਰਣਵਣ੍ਣਂ ਵਾ ਸਂਵਣ੍ਣੇਯ੍ਯਾ’’ਤਿ (ਪਾਰਾ. ੧੭੧) ਵੁਤ੍ਤਤ੍ਤਾ ਆਹ ‘‘ਪਰਿਯਾਯੋ ਨਾਮ ਨਤ੍ਥੀ’’ਤਿ, ਪਰਿਯਾਯੇਨ ਆਪਤ੍ਤਿਮੋਕ੍ਖੋ ਨ ਹੋਤੀਤਿ ਅਧਿਪ੍ਪਾਯੋ. ਅਵਿਜਾਯਨਤ੍ਥਾਯ ਗਬ੍ਭਗ੍ਗਹਣਤੋ ਪੁਰੇਤਰਮੇਵ ਭੇਸਜ੍ਜਂ ਦੇਨ੍ਤਸ੍ਸ ਕੁਚ੍ਛਿਯਂ ਉਪ੍ਪਜ੍ਜਿਤ੍ਵਾ ਗਬ੍ਭੋ ਵਿਨਸ੍ਸਤੀਤਿ ਇਮਿਨਾ ਅਧਿਪ੍ਪਾਯੇਨ ਦਿਨ੍ਨੇ ਤਥਾਮਰਨ੍ਤਾਨਂ ਵਸੇਨ ਕਮ੍ਮਬਦ੍ਧੋ, ਕੁਚ੍ਛਿਯਂ ਨ ਉਪ੍ਪਜ੍ਜਿਸ੍ਸਤੀਤਿ ਇਮਿਨਾ ਅਧਿਪ੍ਪਾਯੇਨ ਦਿਨ੍ਨੇ ਉਪ੍ਪਜ੍ਜਿਤ੍ਵਾ ਮਰਤੁ ਵਾ ਮਾ ਵਾ, ਨੇਵਤ੍ਥਿ ਕਮ੍ਮਬਦ੍ਧੋ.
ਸਹਧਮ੍ਮਿਕਾਨਨ੍ਤਿ ਏਕਸ੍ਸ ਸਤ੍ਥੁ ਸਾਸਨੇ ਸਹਸਿਕ੍ਖਮਾਨਧਮ੍ਮਾਨਂ, ਸਹਧਮ੍ਮੇ ਵਾ ਸਿਕ੍ਖਾਪਦੇ ਸਿਕ੍ਖਨਭਾਵੇਨ ਨਿਯੁਤ੍ਤਾਨਂ. ਸਮਸੀਲਸਦ੍ਧਾਨਨ੍ਤਿਆਦਿਨਾ ਦੁਸ੍ਸੀਲਾਨਂ ਭਿਨ੍ਨਲਦ੍ਧਿਕਾਨਞ੍ਚ ਅਕਾਤੁਮ੍ਪਿ ਲਬ੍ਭਤੀਤਿ ਦਸ੍ਸੇਤਿ. ਞਾਤਕਪਵਾਰਿਤਟ੍ਠਾਨਤੋਤਿ ਅਤ੍ਤਨੋ ਤੇਸਂ ਵਾ ਞਾਤਕਪਵਾਰਿਤਟ੍ਠਾਨਤੋ. ਅਰਿਯੇਹਿ ਅਕਤਾ ਅਯੁਤ੍ਤਵਸੇਨ ਅਕਤਪੁਬ੍ਬਾ ਵਿਞ੍ਞਤ੍ਤਿ ਅਕਤਵਿਞ੍ਞਤ੍ਤਿ.
ਪਟਿਯਾਦਿਯਤੀਤਿ ਸਮ੍ਪਾਦਿਯਤਿ. ਅਕਾਤੁਂ ਨ ਵਟ੍ਟਤੀਤਿ ਏਤ੍ਥ ਦੁਕ੍ਕਟਂ ਵਦਨ੍ਤਿ, ਅਯੁਤ੍ਤਤਾਵਸੇਨੇਵ ਪਨੇਤ੍ਥ ਅਕਰਣਪਟਿਕ੍ਖੇਪੋ ਯੁਤ੍ਤੋ, ਨ ਆਪਤ੍ਤਿਵਸੇਨਾਤਿ ਗਹੇਤਬ੍ਬਂ. ਯਾਵ ਞਾਤਕਾ ਪਸ੍ਸਨ੍ਤੀਤਿ ਯਾਵ ਤਸ੍ਸ ਞਾਤਕਾ ਪਸ੍ਸਨ੍ਤਿ.
ਪਿਤੁਭਗਿਨੀ ਪਿਤੁਚ੍ਛਾ. ਮਾਤੁਭਾਤਾ ਮਾਤੁਲੋ. ਨਪ੍ਪਹੋਨ੍ਤੀਤਿ ਕਾਤੁਂ ਨ ਸਕ੍ਕੋਨ੍ਤਿ. ਨ ਯਾਚਨ੍ਤੀਤਿ ਲਜ੍ਜਾਯ ਨ ਯਾਚਨ੍ਤਿ. ‘‘ਆਭੋਗਂ ਕਤ੍ਵਾ’’ਤਿ ਵੁਤ੍ਤਤ੍ਤਾ ਅਞ੍ਞਥਾ ਦੇਨ੍ਤਸ੍ਸ ਆਪਤ੍ਤਿਯੇਵ. ਕੇਚਿ ਪਨ ‘‘ਆਭੋਗਂ ਅਕਤ੍ਵਾਪਿ ਦਾਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਭੇਸਜ੍ਜਕਰਣਸ੍ਸ ਪਾਲ਼ਿਯਂ ‘‘ਅਨਾਪਤ੍ਤਿ ਭਿਕ੍ਖੁ ਪਾਰਾਜਿਕਸ੍ਸ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੧੮੭) ਏਵਂ ਅਨ੍ਤਰਾਪਤ੍ਤਿਦਸ੍ਸਨਵਸੇਨ ਸਾਮਞ੍ਞਤੋ ਪਟਿਕ੍ਖਿਤ੍ਤਤ੍ਤਾ, ਅਟ੍ਠਕਥਾਯਂ ਅਵੁਤ੍ਤਪ੍ਪਕਾਰੇਨ ਕਰੋਨ੍ਤਸ੍ਸ ਸੁਤ੍ਤੇਨੇਵ ਆਪਤ੍ਤਿ ਸਿਦ੍ਧਾਤਿ ਦਟ੍ਠਬ੍ਬਾ, ਤੇਨੇਵ ਅਟ੍ਠਕਥਾਯਮ੍ਪਿ ‘‘ਤੇਸਞ੍ਞੇਵ ਸਨ੍ਤਕ’’ਨ੍ਤਿਆਦਿ ਵੁਤ੍ਤਂ. ਅਞ੍ਞੇਸਨ੍ਤਿ ਅਸਾਲੋਹਿਤਾਨਂ, ਤੇਨਾਹ ਏਤੇਸਂ ਪੁਤ੍ਤਪਰਮ੍ਪਰਾਯਾਤਿਆਦਿ. ਕੁਲਪਰਿਵਟ੍ਟੋਤਿ ਕੁਲਸ੍ਮਿਂ ਞਾਤਿਪਰਮ੍ਪਰਾ. ਭੇਸਜ੍ਜਂ ਕਰੋਨ੍ਤਸ੍ਸਾਤਿ ਯਥਾਵੁਤ੍ਤਵਿਧਿਨਾ ਕਰੋਨ੍ਤਸ੍ਸ, ‘‘ਤਾਵਕਾਲਿਕਂ ਦਸ੍ਸਾਮੀ’’ਤਿ ਆਭੋਗਂ ਅਕਤ੍ਵਾ ਦੇਨ੍ਤਸ੍ਸਾਪਿ ਪਨ ਅਨ੍ਤਰਾਪਤ੍ਤਿ ਦੁਕ੍ਕਟਂ ਵਿਨਾ ਮਿਚ੍ਛਾਜੀਵਂ ਵਾ ਕੁਲਦੂਸਨਂ ਵਾ ਨ ਹੋਤਿਯੇਵ, ਤੇਨਾਹ – ‘‘ਵੇਜ੍ਜਕਮ੍ਮਂ ਵਾ ਕੁਲਦੂਸਕਾਪਤ੍ਤਿ ਵਾ ਨ ਹੋਤੀ’’ਤਿ. ਞਾਤਕਾਨਞ੍ਹਿ ਸਨ੍ਤਕਂ ਯਾਚਿਤ੍ਵਾਪਿ ਗਹੇਤੁਂ ਵਟ੍ਟਤਿ, ਤਸ੍ਮਾ ਤਤ੍ਥ ਕੁਲਦੂਸਨਾਦਿ ਨ ਸਿਯਾ. ਸਬ੍ਬਪਦੇਸੂਤਿ ‘‘ਚੂਲ਼ਮਾਤੁਯਾ’’ਤਿਆਦੀਸੁ ਸਬ੍ਬਪਦੇਸੁ.
ਉਪਜ੍ਝਾਯਸ੍ਸ ਆਹਰਾਮਾਤਿ ਇਦਂ ਉਪਜ੍ਝਾਯੇਨ ‘‘ਮਮ ਞਾਤਕਾਨਂ ਭੇਸਜ੍ਜਂ ਆਹਰਥਾ’’ਤਿ ਆਣਤ੍ਤੇਹਿ ਕਤ੍ਤਬ੍ਬਵਿਧਿਦਸ੍ਸਨਤ੍ਥਂ ਵੁਤ੍ਤਂ, ਇਮਿਨਾ ਚ ਸਾਮਣੇਰਾਦੀਨਂ ਅਪਚ੍ਚਾਸਾਯਪਿ ਪਰਜਨਸ੍ਸ ਭੇਸਜ੍ਜਕਰਣਂ ਨ ਵਟ੍ਟਤੀਤਿ ਦਸ੍ਸੇਤਿ. ਵੁਤ੍ਤਨਯੇਨ ਪਰਿਯੇਸਿਤ੍ਵਾਤਿ ਇਮਿਨਾ ‘‘ਭਿਕ੍ਖਾਚਾਰਵਤ੍ਤੇਨ ਵਾ’’ਤਿ ਇਮਿਨਾ, ‘‘ਞਾਤਿਸਾਮਣੇਰੇਹੀ’’ਤਿ ਇਮਿਨਾ ਚ ਵੁਤ੍ਤਮਤ੍ਥਂ ਅਤਿਦਿਸਤਿ. ਅਪਚ੍ਚਾਸੀਸਨ੍ਤੇਨਾਤਿ ਆਗਨ੍ਤੁਕਚੋਰਾਦੀਨਂ ਕਰੋਨ੍ਤੇਨਾਪਿ ‘‘ਮਨੁਸ੍ਸਾ ਨਾਮ ਉਪਕਾਰਕਾ ਹੋਨ੍ਤੀ’’ਤਿ ਅਤ੍ਤਨੋ ਤੇਹਿ ਲਾਭਂ ਅਪਤ੍ਥਯਨ੍ਤੇਨ. ਪਚ੍ਚਾਸਾਯ ਕਰੋਨ੍ਤਸ੍ਸ ਪਨ ਵੇਜ੍ਜਕਮ੍ਮਕੁਲਦੂਸਨਾਦਿਦੋਸੋ ਹੋਤੀਤਿ ਅਧਿਪ੍ਪਾਯੋ. ‘‘ਏਵਂ ਉਪਕਾਰੇ ਕਤੇ ਸਾਸਨਗੁਣਂ ਞਤ੍ਵਾ ਪਸੀਦਨ੍ਤਿ, ਸਙ੍ਘਸ੍ਸ ਵਾ ਉਪਕਾਰਕਾ ਹੋਨ੍ਤੀ’’ਤਿ ਕਰਣੇ ਪਨ ਦੋਸੋ ਨਤ੍ਥਿ. ਕੇਚਿ ਪਨ ‘‘ਅਪਚ੍ਚਾਸੀਸਨ੍ਤੇਨ ਆਗਨ੍ਤੁਕਾਦੀਨਂ ਪਟਿਕ੍ਖਿਤ੍ਤਪੁਗ੍ਗਲਾਦੀਨਮ੍ਪਿ ਦਾਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਕਤ੍ਤਬ੍ਬਾਕਤ੍ਤਬ੍ਬਟ੍ਠਾਨਵਿਭਾਗਸ੍ਸਨਿਰਤ੍ਥਕਤ੍ਤਪ੍ਪਸਙ੍ਗਤੋ ‘‘ਅਪਚ੍ਚਾਸੀਸਨ੍ਤੇਨ ਸਬ੍ਬੇਸਂ ਦਾਤੁਂ ਕਾਤੁਞ੍ਚ ਵਟ੍ਟਤੀ’’ਤਿ ਏਤ੍ਤਕਮਤ੍ਤਸ੍ਸੇਵ ਵਤ੍ਤਬ੍ਬਤੋ. ਅਪਚ੍ਚਾਸੀਸਨਞ੍ਚ ਮਿਚ੍ਛਾਜੀਵਕੁਲਦੂਸਨਾਦਿਦੋਸਨਿਸੇਧਨਤ੍ਥਮੇਵ ਵੁਤ੍ਤਂ ਭੇਸਜ੍ਜਕਰਣਸਙ੍ਖਤਾਯ ਇਮਿਸ੍ਸਾ ਅਨ੍ਤਰਾਪਤ੍ਤਿਯਾ ਮੁਚ੍ਚਨਤ੍ਥਂ ਆਗਨ੍ਤੁਕਚੋਰਾਦੀਨਂ ਅਨੁਞ੍ਞਾਤਾਨਂ ਦਾਨੇਨੇਵ ਤਾਯ ਆਪਤ੍ਤਿਯਾ ਮੁਚ੍ਚਨਤੋਤਿ ਗਹੇਤਬ੍ਬਂ. ਤੇਨੇਵ ਅਪਚ੍ਚਾਸੀਸਨ੍ਤੇਨਾਪਿ ਅਕਾਤਬ੍ਬਟ੍ਠਾਨਂ ਦਸ੍ਸੇਤੁਂ ਸਦ੍ਧਂ ਕੁਲਨ੍ਤਿਆਦਿ ਵੁਤ੍ਤਂ. ਪੁਚ੍ਛਨ੍ਤੀਤਿ ਇਮਿਨਾ ਦਿਟ੍ਠਦਿਟ੍ਠਰੋਗੀਨਂ ਪਰਿਯਾਯੇਨਾਪਿ ਵਤ੍ਵਾ ਵਿਚਰਣਂ ਅਯੁਤ੍ਤਨ੍ਤਿ ਦਸ੍ਸੇਤਿ. ਪੁਚ੍ਛਿਤਸ੍ਸਾਪਿ ਪਨ ਪਚ੍ਚਾਸੀਸਨ੍ਤਸ੍ਸ ਪਰਿਯਾਯਕਥਾਪਿ ਨ ਵਟ੍ਟਤੀਤਿ ਵਦਨ੍ਤਿ.
ਸਮੁਲ੍ਲਪੇਸੀਤਿ ਅਪਚ੍ਚਾਸੀਸਨ੍ਤੋ ਏਵਂ ਅਞ੍ਞਮਞ੍ਞਂ ਕਥਂ ਸਮੁਟ੍ਠਾਪੇਸਿ. ਆਚਰਿਯਭਾਗੋਤਿ ਵਿਨਯਾਚਾਰਂ ਅਕੋਪੇਤ੍ਵਾ ਭੇਸਜ੍ਜਾਚਿਕ੍ਖਣੇਨ ਵੇਜ੍ਜਾਚਰਿਯਭਾਗੋਤਿ ਅਤ੍ਥੋ. ਪੁਪ੍ਫਪੂਜਨਤ੍ਥਾਯ ਸਮ੍ਪਟਿਚ੍ਛਿਯਮਾਨਂ ਰੂਪਿਯਂ ਅਤ੍ਤਨੋ ਸਨ੍ਤਕਤ੍ਤਭਜਨੇਨ ਨਿਸ੍ਸਗ੍ਗਿਯਮੇਵਾਤਿ ਆਹ ‘‘ਕਪ੍ਪਿਯਵਸੇਨ ਗਾਹਾਪੇਤ੍ਵਾ’’ਤਿ, ‘‘ਅਮ੍ਹਾਕਂ ਰੂਪਿਯਂ ਨ ਵਟ੍ਟਤਿ, ਪੁਪ੍ਫਪੂਜਨਤ੍ਥਂ ਪੁਪ੍ਫਂ ਵਟ੍ਟਤੀ’’ਤਿਆਦਿਨਾ ਪਟਿਕ੍ਖਿਪਿਤ੍ਵਾ ਕਪ੍ਪਿਯੇਨ ਕਮ੍ਮੇਨ ਗਾਹਾਪੇਤ੍ਵਾਤਿ ਅਤ੍ਥੋ.
ਯਦਿ ‘‘ਪਰਿਤ੍ਤਂ ਕਰੋਥਾ’’ਤਿ ਵੁਤ੍ਤੇ ਕਰੋਨ੍ਤਿ, ਭੇਸਜ੍ਜਕਰਣਂ ਵਿਯ ਗਿਹਿਕਮ੍ਮਂ ਵਿਯ ਹੋਤੀਤਿ ‘‘ਨ ਕਾਤਬ੍ਬ’’ਨ੍ਤਿ ਵੁਤ੍ਤਂ. ‘‘ਪਰਿਤ੍ਤਂ ਭਣਥਾ’’ਤਿ ਵੁਤ੍ਤੇ ਪਨ ਧਮ੍ਮਜ੍ਝੇਸਨਤ੍ਤਾ ਅਨਜ੍ਝਿਟ੍ਠੇਨਪਿ ਭਣਿਤਬ੍ਬੋ ਧਮ੍ਮੋ, ਪਗੇਵ ਅਜ੍ਝਿਟ੍ਠੇਨਾਪੀਤਿ ‘‘ਕਾਤਬ੍ਬ’’ਨ੍ਤਿ ਵੁਤ੍ਤਂ. ਚਾਲੇਤ੍ਵਾ ਸੁਤ੍ਤਂ ਪਰਿਮਜ੍ਜਿਤ੍ਵਾਤਿ ਇਦਂ ‘‘ਪਰਿਤ੍ਤਾਣਂ ਏਤ੍ਥ ਪਵੇਸੇਮੀ’’ਤਿ ਚਿਤ੍ਤੇਨ ਏਵਂ ਕਤੇ ਪਰਿਤ੍ਤਾਣਾ ਤਤ੍ਥ ਪਵੇਸਿਤਾ ਨਾਮ ਹੋਤੀਤਿ ਵੁਤ੍ਤਂ. ਵਿਹਾਰਤੋ…ਪੇ… ਦੁਕ੍ਕਟਨ੍ਤਿ ਇਦਂ ਅਞ੍ਞਾਤਕਗਹਟ੍ਠੇ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ. ਪਾਦੇਸੁ ਉਦਕਂ ਆਕਿਰਿਤ੍ਵਾਤਿ ਇਦਂ ਤਸ੍ਮਿਂ ਦੇਸੇ ਚਾਰਿਤ੍ਤਵਸੇਨ ਵੁਤ੍ਤਂ. ਵੁਤ੍ਤਞ੍ਹਿ ‘‘ਤਤ੍ਥ ਪਾਲ਼ਿਯਾ ਨਿਸਿਨ੍ਨਾਨਂ ਭਿਕ੍ਖੂਨਂ ਪਾਦੇਸੁ ਰੋਗਵੂਪਸਮਨਾਦਿਅਤ੍ਥਾਯ ਉਦਕਂ ਸਿਞ੍ਚਿਤ੍ਵਾ ਪਰਿਤ੍ਤਂ ਕਾਤੁਂ ਸੁਤ੍ਤਞ੍ਚ ਠਪੇਤ੍ਵਾ ‘ਪਰਿਤ੍ਤਂ ਭਣਥਾ’ਤਿ ਵਤ੍ਵਾ ਗਚ੍ਛਨ੍ਤਿ. ਏਵਞ੍ਹਿ ਕਰਿਯਮਾਨੇ ਯਦਿ ਪਾਦੇ ਅਪਨੇਨ੍ਤਿ, ਮਨੁਸ੍ਸਾ ਤਂ ਅਵਮਙ੍ਗਲਨ੍ਤਿ ਮਞ੍ਞਨ੍ਤਿ, ਰੋਗੋ ਵਾ ਨ ਵੂਪਸਮਿਸ੍ਸਤੀ’’ਤਿ. ਤੇਨਾਹ ‘‘ਨ ਪਾਦਾ ਅਪਨੇਤਬ੍ਬਾ’’ਤਿ. ਮਤਸਰੀਰਦਸ੍ਸਨੇ ਵਿਯ ਕੇਵਲਂ ਸੁਸਾਨਦਸ੍ਸਨੇਪਿ ‘‘ਇਦਂ ਜਾਤਾਨਂ ਸਤ੍ਤਾਨਂ ਖਯਗਮਨਟ੍ਠਾਨ’’ਨ੍ਤਿ ਮਰਣਸਞ੍ਞਾ ਉਪ੍ਪਜ੍ਜਤੀਤਿ ਆਹ ‘‘ਸੀਵਥਿਕਦਸ੍ਸਨੇ…ਪੇ… ‘ਮਰਣਸ੍ਸਤਿਂ ਪਟਿਲਭਿਸ੍ਸਾਮਾ’ਤਿ ਕਮ੍ਮਟ੍ਠਾਨਸੀਸੇਨ ਗਨ੍ਤੁਂ ਵਟ੍ਟਤੀ’’ਤਿ. ਲੇਸਕਪ੍ਪਂ ਅਕਤ੍ਵਾ ਸਮੁਪ੍ਪਨ੍ਨਸੁਦ੍ਧਚਿਤ੍ਤੇਨ ‘‘ਪਰਿਵਾਰਤ੍ਥਾਯ ਆਗਚ੍ਛਨ੍ਤੂ’’ਤਿ ਵੁਤ੍ਤੇਪਿ ਗਨ੍ਤੁਂ ਵਟ੍ਟਤਿ.
ਅਨਾਮਟ੍ਠਪਿਣ੍ਡਪਾਤੋਤਿ ਅਗ੍ਗਹਿਤਅਗ੍ਗੋ, ਅਪਰਿਭੁਤ੍ਤੋਤਿ ਅਤ੍ਥੋ. ਕਹਾਪਣਗ੍ਘਨਕੋ ਹੋਤੀਤਿ ਇਮਿਨਾ ਦਾਯਕੇਹਿ ਬਹੁਬ੍ਯਞ੍ਜਨੇਨ ਸਮ੍ਪਾਦੇਤ੍ਵਾ ਸਕ੍ਕਚ੍ਚਂ ਦਿਨ੍ਨਭਾਵਂ ਦੀਪੇਤਿ. ਥਾਲਕੇਤਿ ਸਙ੍ਘਿਕੇ ਕਂਸਾਦਿਮਯੇ ਥਾਲਕੇ, ਪਤ੍ਤੋਪਿ ਏਤ੍ਥ ਸਙ੍ਗਯ੍ਹਤਿ. ਨ ਵਟ੍ਟਤੀਤਿ ਇਮਿਨਾ ਦੁਕ੍ਕਟਨ੍ਤਿ ਦਸ੍ਸੇਤਿ. ਦਾਮਰਿਕਚੋਰਸ੍ਸਾਤਿ ਰਜ੍ਜਂ ਪਤ੍ਥੇਨ੍ਤਸ੍ਸ ਪਾਕਟਚੋਰਸ੍ਸ. ਅਦੀਯਮਾਨੇਪਿ ‘‘ਨ ਦੇਨ੍ਤੀ’’ਤਿ ਕੁਜ੍ਝਨ੍ਤੀਤਿ ਸਮ੍ਬਨ੍ਧੋ. ਆਮਿਸਸ੍ਸ ਧਮ੍ਮਸ੍ਸ ਚ ਅਲਾਭੇਨ ਅਤ੍ਤਨੋ ਪਰਸ੍ਸ ਚ ਅਨ੍ਤਰੇ ਸਮ੍ਭਵਨ੍ਤਸ੍ਸ ਛਿਦ੍ਦਸ੍ਸ ਚ ਵਿਵਰਸ੍ਸ ਪਟਿਸਨ੍ਥਰਣਂ ਪਿਦਹਨਂ ਪਟਿਸਨ੍ਥਾਰੋ, ਸੋ ਪਨ ਧਮ੍ਮਾਮਿਸਵਸੇਨ ਦੁਵਿਧੋ. ਤਤ੍ਥ ਆਮਿਸਪਟਿਸਨ੍ਥਾਰਂ ਸਨ੍ਧਾਯ ‘‘ਕਸ੍ਸ ਕਾਤਬ੍ਬੋ, ਕਸ੍ਸ ਨ ਕਾਤਬ੍ਬੋ’’ਤਿ ਵੁਤ੍ਤਂ. ‘‘ਆਗਨ੍ਤੁਕਸ੍ਸ ਵਾ…ਪੇ… ਕਤ੍ਤਬ੍ਬੋ ਯੇਵਾ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਪਾਕਟਂ ਕਾਤੁਂ ਆਗਨ੍ਤੁਕਂ ਤਾਵਾਤਿਆਦਿਮਾਹ. ਖੀਣਪਰਿਬ੍ਬਯਨ੍ਤਿ ਇਮਿਨਾ ਅਗਤਿਭਾਵਂ ਕਾਰੁਞ੍ਞਭਾਜਨਤਞ੍ਚ ਦਸ੍ਸੇਤਿ, ਤੇਨ ਚ ਤਬ੍ਬਿਧੁਰਾਨਂ ਸਮਿਦ੍ਧਾਨਂ ਦਾਯਕਾਦੀਨਂ ਆਗਨ੍ਤੁਕਤ੍ਤੇਪਿ ਦਾਤੁਂ ਨ ਵਟ੍ਟਤੀਤਿ ਸਿਦ੍ਧਂ ਹੋਤਿ. ਤਣ੍ਡੁਲਾਦਿਮ੍ਹਿ ਦਾਤਬ੍ਬੇ ਸਤਿ ‘‘ਅਵੇਲਾਯਂ…ਪੇ… ਨ ਵਤ੍ਤਬ੍ਬੋ’’ਤਿ ਵੁਤ੍ਤਂ. ‘‘ਅਪਚ੍ਚਾਸੀਸਨ੍ਤੇਨਾ’’ਤਿ ਵਤ੍ਵਾ ਪਚ੍ਚਾਸੀਸਨਪ੍ਪਕਾਰਂ ਦਸ੍ਸੇਤੁਂ ਮਨੁਸ੍ਸਾ ਨਾਮਾਤਿਆਦਿ ਵੁਤ੍ਤਂ. ਅਨਨੁਞ੍ਞਾਤਾਨਂ ਪਨ ਅਪਚ੍ਚਾਸੀਸਨ੍ਤੇਨਾਪਿ ਦਾਤੁਂ ਨ ਵਟ੍ਟਤਿ ਸਦ੍ਧਾਦੇਯ੍ਯਵਿਨਿਪਾਤਤ੍ਤਾ, ਪਚ੍ਚਾਸੀਸਾਯ ਪਨ ਸਤਿ ਕੁਲਦੂਸਨਮ੍ਪਿ ਹੋਤਿ.
ਉਬ੍ਬਾਸੇਤ੍ਵਾਤਿ ਸਮਨ੍ਤਤੋ ਤਿਯੋਜਨਂ ਵਿਲੁਮ੍ਪਨ੍ਤੇ ਮਨੁਸ੍ਸੇ ਪਲਾਪੇਤ੍ਵਾ. ਵਰਪੋਤ੍ਥਕਚਿਤ੍ਤਤ੍ਥਰਣਨ੍ਤਿ ਅਨੇਕਪ੍ਪਕਾਰਇਤ੍ਥਿਪੁਰਿਸਾਦਿਉਤ੍ਤਮਰੂਪਵਿਚਿਤ੍ਤਂ ਅਤ੍ਥਰਣਂ.
੧੮੭. ਸਤ੍ਤਰਸਵਗ੍ਗਿਯੇਸੁ ਪੁਬ੍ਬੇ ਏਕਸ੍ਸ ਅਙ੍ਗੁਲਿਪਤੋਦਕੇਨ ਮਾਰਿਤਤ੍ਤਾ ਸੇਸੇਸੁ ਸੋਲ਼ਸਜਨੇਸੁ ਉਦਰਂ ਆਰੁਹਿਤ੍ਵਾ ਨਿਸਿਨ੍ਨਮੇਕਂ ਠਪੇਤ੍ਵਾ ‘‘ਸੇਸਾਪਿ ਪਨ੍ਨਰਸ ਜਨਾ’’ਤਿ ਵੁਤ੍ਤਂ. ਅਦੂਹਲਪਾਸਾਣਾ ਵਿਯਾਤਿ ਅਦੂਹਲੇ ਆਰੋਪਿਤਪਾਸਾਣਾ ਵਿਯ. ਕਮ੍ਮਾਧਿਪ੍ਪਾਯਾਤਿ ਤਜ੍ਜਨੀਯਾਦਿਕਮ੍ਮਕਰਣਾਧਿਪ੍ਪਾਯਾ.
ਆਵਾਹੇਤ੍ਵਾਤਿ ਆਵਿਸਾਪੇਤ੍ਵਾ. ਰੂਪਂ ਕਤ੍ਵਾ ਹਤ੍ਥਪਾਦਾਦੀਨਿ ਛਿਨ੍ਦਨ੍ਤੀਤਿ ਤਸ੍ਮਿਂ ਪਿਟ੍ਠਾਦਿਮਯੇ ਰੂਪੇ ਅਮਨੁਸ੍ਸਂ ਆਵਾਹੇਤ੍ਵਾ ਤਸ੍ਸ ਹਤ੍ਥਪਾਦਾਦੀਨਿ ਛਿਨ੍ਦਨ੍ਤਿ. ਸਕ੍ਕਂ ਦੇਵਰਾਜਾਨਂ ਮਾਰੇਯ੍ਯਾਤਿ ਇਦਂ ਸਮ੍ਭਾਵਨਵਸੇਨ ਵੁਤ੍ਤਂ. ਨ ਹਿ ਤਾਦਿਸਾ ਮਹਾਨੁਭਾਵਾ ਯਕ੍ਖਾ ਸਤ੍ਥਘਾਤਾਰਹਾ ਹੋਨ੍ਤਿ ਦੇਵਾਸੁਰਯੁਦ੍ਧੇਪਿ ਤੇਸਂ ਸਤ੍ਥਪ੍ਪਹਾਰੇਨ ਮਰਣਾਭਾਵਾ.
੧੮੮. ਪਹਾਰੋ ਨ ਦਾਤਬ੍ਬੋਤਿ ਸਮ੍ਬਨ੍ਧੋ. ਅਮਨੁਸ੍ਸਂ ਕੋਧਚਿਤ੍ਤੇਨ ਪਹਰਨ੍ਤਸ੍ਸ ਦੁਕ੍ਕਟਮੇਵ. ਚਿਕਿਚ੍ਛਾਧਿਪ੍ਪਾਯੇਨ ਪਹਰਨ੍ਤਸ੍ਸ ਅਨਾਚਾਰੋਤਿ ਗਹੇਤਬ੍ਬੋ. ਤਾਲਪਣ੍ਣਂ…ਪੇ… ਬਨ੍ਧਿਤਬ੍ਬਨ੍ਤਿ ਅਮਨੁਸ੍ਸਾ ਤਾਲਪਣ੍ਣਬਨ੍ਧਨੇਨ ਪਲਾਯਨ੍ਤੀਤਿ ਕਤ੍ਵਾ ਵੁਤ੍ਤਂ, ਇਦਞ੍ਚ ਗਿਹੀਨਂ ਵੇਜ੍ਜਕਮ੍ਮਵਸੇਨ ਕਾਤੁਂ ਨ ਵਟ੍ਟਤਿ.
੧੮੯. ਯੋ ਰੁਕ੍ਖੇਨ ਓਤ੍ਥਤੋਪਿ ਨ ਮਰਤੀਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਭੂਤਗਾਮਸਿਕ੍ਖਾਪਦਟ੍ਠਕਥਾਯਂ ਸਯਮੇਵ ਵਕ੍ਖਤਿ, ਤਂ ਤਤ੍ਥੇਵ ਗਹੇਤਬ੍ਬਂ.
੧੯੦. ਦਬ੍ਬੂਪਕਰਣਾਨੀਤਿ ਕੇਹਿਚਿ ਛਿਨ੍ਦਿਤ੍ਵਾ ਠਪਿਤਾਨਿ ਸਪਰਿਗ੍ਗਹਿਤਾਨਿ ਸਨ੍ਧਾਯ ਵੁਤ੍ਤਂ. ਤਤ੍ਥ ਹਿ ਠਾਨਾਚਾਵਨਾਭਾਵੇਨ ਵਿਨਾਸਾਧਿਪ੍ਪਾਯਸ੍ਸ ਦੁਕ੍ਕਟਂ ਵੁਤ੍ਤਂ. ਖਿਡ੍ਡਾਧਿਪ੍ਪਾਯੇਨਾਪਿ ਦੁਕ੍ਕਟਨ੍ਤਿ ਸੁਕ੍ਖਤਿਣਾਦੀਸੁ ਅਗ੍ਗਿਕਰਣਂ ਸਨ੍ਧਾਯ ਵੁਤ੍ਤਂ, ਅਲ੍ਲੇਸੁ ਪਨ ਕੀਲ਼ਾਧਿਪ੍ਪਾਯੇਨਪਿ ਕਰੋਨ੍ਤਸ੍ਸ ਪਾਚਿਤ੍ਤਿਯਮੇਵ. ਪਟਿਪਕ੍ਖਭੂਤੋ, ਪਟਿਮੁਖਂ ਗਚ੍ਛਨ੍ਤੋ ਵਾ ਅਗ੍ਗਿ ਪਟਗ੍ਗਿ, ਤਸ੍ਸ ਅਲ੍ਲਤਿਣਾਦੀਸੁਪਿ ਦਾਨਂ ਅਨੁਞ੍ਞਾਤਂ, ਤਂ ਦੇਨ੍ਤੇਨ ਦੂਰਤੋ ਆਗਚ੍ਛਨ੍ਤਂ ਦਾਵਗ੍ਗਿਂ ਦਿਸ੍ਵਾ ਵਿਹਾਰਸ੍ਸ ਸਮਨ੍ਤਤੋ ਏਕਕ੍ਖਣੇ ਅਦਤ੍ਵਾ ਏਕਦੇਸਤੋ ਪਟ੍ਠਾਯ ਵਿਹਾਰਸ੍ਸ ਸਮਨ੍ਤਤੋ ਸਣਿਕਂ ਝਾਪੇਤ੍ਵਾ ਯਥਾ ਮਹਨ੍ਤੋਪਿ ਅਗ੍ਗਿ ਵਿਹਾਰਂ ਪਾਪੁਣਿਤੁਂ ਨ ਸਕ੍ਕੋਤਿ, ਏਵਂ ਵਿਹਾਰਸ੍ਸ ਸਮਨ੍ਤਾ ਅਬ੍ਭੋਕਾਸਂ ਕਤ੍ਵਾ ਪਟਗ੍ਗਿ ਦਾਤਬ੍ਬੋ, ਸੋ ਦਾਵਗ੍ਗਿਨੋ ਪਟਿਪਥਂ ਗਨ੍ਤ੍ਵਾ ਏਕਤੋ ਹੁਤ੍ਵਾ ਤੇਨ ਸਹ ਨਿਬ੍ਬਾਤਿ. ਪਰਿਤ੍ਤਕਰਣਨ੍ਤਿ ਸਮਨ੍ਤਾ ਰੁਕ੍ਖਤਿਣਾਦਿਚ੍ਛੇਦਨਪਰਿਖਾਖਣਨਾਦਿਆਰਕ੍ਖਕਰਣਂ, ਤੇਨਾਹ ਤਿਣਕੁਟਿਕਾਨਂ ਸਮਨ੍ਤਾ ਭੂਮਿਤਚ੍ਛਨਨ੍ਤਿਆਦਿ.
੧੯੧. ਖੇਤ੍ਤਮੇਵ ਓਤਿਣ੍ਣਤ੍ਤਾ ਪਾਰਾਜਿਕਨ੍ਤਿ ਦ੍ਵੀਸੁ ਏਕਸ੍ਸਾਪਿ ਅਨ੍ਤੋਗਧਤ੍ਤਾ ‘‘ਦ੍ਵੀਹੀ’’ਤਿ ਵੁਤ੍ਤਖੇਤ੍ਤੇ ਏਕਸ੍ਸਾਪਿ ਓਤਿਣ੍ਣਤ੍ਤਾ ਪਾਰਾਜਿਕਂ, ‘‘ਦ੍ਵੀਹਿ ਏਵ ਮਾਰੇਹਿ ਨ ਏਕੇਨਾ’’ਤਿ ਨਿਯਮਿਤੇ ਪਨ ਏਕੇਨੇਵ ਮਾਰਿਤੇ ਨਤ੍ਥਿ ਪਾਰਾਜਿਕਨ੍ਤਿ ਵਦਨ੍ਤਿ, ਏਵਂ ਦ੍ਵੇ ਏਵ ਪੁਰਿਸਾਤਿਆਦੀਸੁਪਿ. ਪੁਬ੍ਬੇ ਕਤਸੀਸਚ੍ਛੇਦਪਯੋਗਤੋ ਅਞ੍ਞੋ ਪਯੋਗੋ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕੋ ਨ ਉਪਲਬ੍ਭਤਿ, ਪਠਮੇਨ ਪਯੋਗੇਨਸ੍ਸ ਜੀਵਿਤਿਨ੍ਦ੍ਰਿਯਂ ਉਪਚ੍ਛਿਜ੍ਜਤੀਤਿ ‘‘ਸੀਸਚ੍ਛੇਦਕਸ੍ਸਾ’’ਤਿ ਵੁਤ੍ਤਂ, ਯਂ ਪਨ ਸਾਰਤ੍ਥਦੀਪਨਿਯਂ ‘‘ਜੀਵਿਤਿਨ੍ਦ੍ਰਿਯਸ੍ਸ ਅਵਿਜ੍ਜਮਾਨਤ੍ਤਾ’’ਤਿ ਕਾਰਣਂ ਵੁਤ੍ਤਂ, ਤਂ ਅਕਾਰਣਂ ਜੀਵਿਤਿਨ੍ਦ੍ਰਿਯਸਨ੍ਨਿਸ੍ਸਿਤਚਿਤ੍ਤਸਨ੍ਤਤਿਂ ਵਿਨਾ ਉਕ੍ਖਿਪਨਸਨ੍ਨਿਰੁਜ੍ਝਨਾਦਿਵਸਪ੍ਪਵਤ੍ਤਸ੍ਸ ਗਮਨਸ੍ਸ ਅਸਮ੍ਭਵਤੋ. ਨ ਹਿ ਵਾਯੁਵੇਗੇਨ ਪਣ੍ਣਪਟਾਦਯੋ ਵਿਯ ਕਾਯੋ ਗਚ੍ਛਤਿ, ਨ ਚ ਉਕ੍ਖਿਪਨੇ ਪਵਤ੍ਤਾਵ ਚਿਤ੍ਤਜਵਿਞ੍ਞਤ੍ਤਿਆਦਯੋਵ ਨਿਕ੍ਖਿਪਨਾਦਿਨੋਪਿ ਹੇਤੁਭੂਤਾਤਿ ਸਕ੍ਕਾ ਵਤ੍ਤੁਂ ਵਿਚ੍ਛਿਨ੍ਦਿਤ੍ਵਾ ਪਵਤ੍ਤਨਤੋ. ਪੁਬ੍ਬੇ ਅਨਾਹਿਤਵੇਗਾਪਿ ਹਿ ਕਾਚਿ ਸਰੀਸਪਜਾਤਿ ਦ੍ਵਿਧਾ ਛਿਨ੍ਨਾ ਛੇਦਨਮਤ੍ਤਾ ਦ੍ਵੀਹਿ ਵਿਭਾਗੇਹਿ ਕਤਿਪਯਕ੍ਖਣਂ ਦ੍ਵੀਸੁ ਦਿਸਾਸੁ ਗਚ੍ਛਤਿ, ਤਤ੍ਥ ਚ ਯਸ੍ਮਿਂ ਭਾਗੇ ਹਦਯਵਤ੍ਥੁ ਤਿਟ੍ਠਤਿ, ਤਤ੍ਰਟ੍ਠਂ ਪਞ੍ਚਦ੍ਵਾਰਾਵਜ੍ਜਨਚਿਤ੍ਤਂ ਦ੍ਵੀਸੁਪਿ ਭਾਗੇਸੁ ਕਾਯਪ੍ਪਸਾਦੇ ਘਟ੍ਟਿਤਂ ਫੋਟ੍ਠਬ੍ਬਂ ਆਲਮ੍ਬਿਤ੍ਵਾ ਉਪ੍ਪਜ੍ਜਤਿ, ਤਤੋ ਤਦਾਰਮ੍ਮਣਮੇਵ ਯਥਾਰਹਮੇਕਸ੍ਮਿਂ ਭਾਗੇ ਏਕਦਾ ਅਞ੍ਞਸ੍ਮਿਂ ਅਞ੍ਞਦਾਤਿ ਏਵਂ ਪਰਿਯਾਯੇਨ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ, ਤਤੋ ਹਦਯਵਤ੍ਥੁਸ੍ਮਿਂਯੇਵ ਸਮ੍ਪਟਿਚ੍ਛਨਾਦਿਵੀਥਿਚਿਤ੍ਤਾਨਿ ਭਵਙ੍ਗਨ੍ਤਰਿਤਾਨਿ ਮਨੋਦ੍ਵਾਰਵੀਥਿਵਿਞ੍ਞਾਣਾਨਿ ਚ ਵਿਞ੍ਞਤ੍ਤਿਜਨਕਾਨਿ ਉਪ੍ਪਜ੍ਜਨ੍ਤਿ, ਯੇ ਹਿ ਉਭਯਭਾਗਾ ਗਚ੍ਛਨ੍ਤਿ ਵਾ ਚਲਨ੍ਤਿ ਵਾ ਫਨ੍ਦਨ੍ਤਿ ਵਾ. ਚਿਤ੍ਤਸ੍ਸ ਪਨ ਲਹੁਪਰਿਵਤ੍ਤਿਯਾ ਏਕਕ੍ਖਣੇ ਉਭਯਭਾਗਾਪਿ ਚਲਨ੍ਤਾ ਵਿਯ ਉਪਟ੍ਠਹਨ੍ਤਿ, ਸੇਯ੍ਯਥਾਪਿ ਨਾਮ ਕੁਕ੍ਕੁਲ਼ਾਦਿਨਰਕੇਸੁ ਨਿਮੁਗ੍ਗਸਕਲਸਰੀਰਸ੍ਸ ਸਤ੍ਤਸ੍ਸ ਏਕਸ੍ਮਿਂ ਖਣੇ ਸਕਲਸਰੀਰੇਪਿ ਕਾਯਵਿਞ੍ਞਾਣਦੁਕ੍ਖਂ ਉਪ੍ਪਜ੍ਜਮਾਨਂ ਵਿਯ ਉਪਟ੍ਠਾਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ, ਤਤੋ ਪਨ ਯਸ੍ਮਿਂ ਭਾਗੇ ਜੀਵਿਤਿਨ੍ਦ੍ਰਿਯਂ ਸਸੇਸਕਮ੍ਮਜਰੂਪਂ ਨਿਰੁਜ੍ਝਤਿ, ਤਤ੍ਥ ਕਾਯਵਿਞ੍ਞਾਣਂ ਨਪ੍ਪਵਤ੍ਤਤਿ, ਹਦਯਵਤ੍ਥੁਸਹਿਤਭਾਗੇਯੇਵ ਯਾਵ ਜੀਵਿਤਿਨ੍ਦ੍ਰਿਯਨਿਰੋਧਾ ਪਵਤ੍ਤਤਿ.
ਨਨੁ ਨਰਕਾਦੀਸੁ ਏਕਾਬਦ੍ਧੇ ਸਰੀਰੇ ਸਬ੍ਬਤ੍ਥ ਪਰਿਯਾਯੇਨ ਕਾਯਵਿਞ੍ਞਾਣਸਮੁਪ੍ਪਤ੍ਤਿ ਯੁਤ੍ਤਾ ਹੋਤੁ, ਦ੍ਵਿਧਾ ਹੁਤ੍ਵਾ ਵਿਚ੍ਛਿਨ੍ਨੇ ਪਨ ਭਾਗਦ੍ਵਯੇ ਕਥਨ੍ਤਿ? ਨਾਯਂ ਦੋਸੋ. ਸਰੀਰੇ ਹਿ ਏਕਾਬਦ੍ਧਤਾ ਨਾਮ ਪਰਮਤ੍ਥਧਮ੍ਮਬ੍ਯਤਿਰਿਤ੍ਤਾ ਕਾਚਿ ਨਤ੍ਥਿ ਪਰਵਾਦੀਨਂ ਅਵਯਵੀਆਦਿ ਵਿਯ, ਕਮ੍ਮਾਦਿਏਕਕਾਰਣਪੁਞ੍ਜਾਯਤ੍ਤਤਾਯ ਬਹੂਨਂ ਸਹੁਪ੍ਪਤ੍ਤਿਯੇਵ ਏਕਾਬਦ੍ਧਤਾ. ਤਤ੍ਥ ਚ ਸਤ੍ਥਪ੍ਪਹਾਰਾਦਿਵਿਰੁਦ੍ਧਪਚ੍ਚਯੋਪਨਿਪਾਤੇਨ ਵਿਭਿਨ੍ਨਾਨਮ੍ਪਿ ਕਮ੍ਮਾਦਿਏਕਕਾਰਣਾਨਂ ਪੁਞ੍ਜਾਯਤ੍ਤਤਾ ਨ ਵਿਗਚ੍ਛਤਿ, ਯਾਵ ਸਾ ਨ ਵਿਗਚ੍ਛਤਿ, ਤਾਵ ਅਵਿਚ੍ਛਿਨ੍ਨਾਵ ਤਤ੍ਥ ਵਿਞ੍ਞਾਣਪ੍ਪਵਤ੍ਤਿ. ਵਿਭਿਨ੍ਨਾਨਂ ਪਨ ਕਮ੍ਮਜਰੂਪਾਨਂ ਅਞ੍ਞੇਸਞ੍ਚ ਸੇਸਤਿਸਨ੍ਤਤਿਰੂਪਾਨਞ੍ਚ ਉਪਤ੍ਥਮ੍ਭਨਭਾਵੇਨ ਚਿਰਂ ਪਵਤ੍ਤਿਤੁਂ ਨ ਸਕ੍ਕੋਨ੍ਤਿ, ਯਾਵ ਚ ਧਰਨ੍ਤਿ, ਤਾਵ ਵਿਞ੍ਞਾਣਪਚ੍ਚਯਾ ਹੋਨ੍ਤਿ, ਵਿਞ੍ਞਾਣੇਨ ਚ ਤੇਸਂ ਚਲਨਗਮਨਾਦਿਦੇਸਨ੍ਤਰੁਪ੍ਪਤ੍ਤਿ. ਤਸ੍ਮਾ ਕਬਨ੍ਧਸ੍ਸਪਿ ਧਾਵਕ੍ਖਣੇ ਸਵਿਞ੍ਞਾਣਜੀਵਿਤਿਨ੍ਦ੍ਰਿਯਂ ਅਤ੍ਥੇਵ, ਤਞ੍ਚ ਸੀਸਚ੍ਛੇਦਕਪ੍ਪਯੋਗੇਨੇਵ ਸੀਘਂ ਪਤਤਿ, ਤਤੋ ਅਞ੍ਞਪ੍ਪਯੋਗਸ੍ਸ ਸਰੀਰੇ ਵਿਸੇਸੁਪ੍ਪਾਦਨਤੋ ਪੁਰੇਤਰਮੇਵ ਪਠਮੇਨੇਵ ਕਿਚ੍ਚਨਿਪ੍ਫਤ੍ਤਿਤੋ ਸੀਸਚ੍ਛੇਦਕਸ੍ਸੇਵ ਕਮ੍ਮਬਦ੍ਧੋਤਿ ਗਹੇਤਬ੍ਬੋ. ਏਵਰੂਪਾਨੀਤਿ ਕਬਨ੍ਧਵਤ੍ਥੁਸਦਿਸਾਨਿ. ਇਮਸ੍ਸ ਵਤ੍ਥੁਸ੍ਸਾਤਿ ਆਘਾਤਨਵਤ੍ਥੁਸ੍ਸ. ਅਤ੍ਥਦੀਪਨੇਤਿ ਏਕੇਨ ਪੁਰਿਸੇਨ ਪਯੋਗੇਨ ਵਾ ਮਾਰਿਤਤਾਸਙ੍ਖਾਤਸ੍ਸ ਅਤ੍ਥਸ੍ਸ ਦੀਪਨੇ.
੧੯੨. ਪਾਨਪਰਿਭੋਗੇਨ ਵਟ੍ਟਤੀਤਿ ਸਮ੍ਬਨ੍ਧੋ. ਏਵਂ ਪਨ ਵੁਤ੍ਤਤ੍ਤਾ ‘‘ਲੋਣਸੋਵੀਰਕਂ ਯਾਮਕਾਲਿਕ’’ਨ੍ਤਿ ਕੇਚਿ ਵਦਨ੍ਤਿ, ਕੇਚਿ ਪਨ ‘‘ਗਿਲਾਨਾਨਂ ਪਾਕਤਿਕਮੇਵ, ਅਗਿਲਾਨਾਨਂ ਪਨ ਉਦਕਸਮ੍ਭਿਨ੍ਨ’’ਨ੍ਤਿ ਵੁਤ੍ਤਤ੍ਤਾ ‘‘ਗੁਲ਼ਂ ਵਿਯ ਸਤ੍ਤਾਹਕਾਲਿਕ’’ਨ੍ਤਿ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ
ਤਤਿਯਪਾਰਾਜਿਕਵਣ੍ਣਨਾਨਯੋ ਨਿਟ੍ਠਿਤੋ.