੨. ਦੁਤਿਯਪਾਰਾਜਿਕਂ
ਅਦੁਤਿਯੇਨਾਤਿ ਅਸਦਿਸੇਨ ਜਿਨੇਨ ਯਂ ਦੁਤਿਯਂ ਪਾਰਾਜਿਕਂ ਪਕਾਸਿਤਂ, ਤਸ੍ਸ ਇਦਾਨਿ ਯਸ੍ਮਾ ਸਂਵਣ੍ਣਨਾਕ੍ਕਮੋ ਪਤ੍ਤੋ, ਤਸ੍ਮਾ ਅਸ੍ਸ ਦੁਤਿਯਸ੍ਸ ਅਯਂ ਸਂਵਣ੍ਣਨਾ ਹੋਤੀਤਿ ਯੋਜਨਾ.
ਧਨਿਯਵਤ੍ਥੁਵਣ੍ਣਨਾ
੮੪. ਰਾਜੂਹਿ ਗਹਿਤਨ੍ਤਿ ਰਾਜਗਹਨ੍ਤਿ ਆਹ ‘‘ਮਨ੍ਧਾਤੂ’’ਤਿ. ਰਾਜਪੁਰੋਹਿਤੇਨ ਪਰਿਗ੍ਗਹਿਤਮ੍ਪਿ ਰਾਜਪਰਿਗ੍ਗਹਿਤਮੇਵਾਤਿ ਮਹਾਗੋਵਿਨ੍ਦਗ੍ਗਹਣਂ, ਨਗਰਸਦ੍ਦਾਪੇਕ੍ਖਾਯ ਚੇਤ੍ਥ ‘‘ਰਾਜਗਹ’’ਨ੍ਤਿ ਨਪੁਂਸਕਨਿਦ੍ਦੇਸੋ. ਅਞ੍ਞੇਪੇਤ੍ਥ ਪਕਾਰੇਤਿ ਸੁਸਂਵਿਹਿਤਾਰਕ੍ਖਤ੍ਤਾ ਰਾਜੂਨਂ ਗਹਂ ਗੇਹਭੂਤਨ੍ਤਿ ਰਾਜਗਹਨ੍ਤਿਆਦਿਕੇ ਪਕਾਰੇ. ਵਸਨ੍ਤਵਨਨ੍ਤਿ ਕੀਲ਼ਾਵਨਂ, ਵਸਨ੍ਤਕਾਲੇ ਕੀਲ਼ਾਯ ਯੇਭੁਯ੍ਯਤ੍ਤਾ ਪਨ ਵਸਨ੍ਤਵਨਨ੍ਤਿ ਵੁਤ੍ਤਂ.
ਸਦ੍ਵਾਰਬਨ੍ਧਾਤਿ ਵਸ੍ਸੂਪਗਮਨਯੋਗ੍ਗਤਾਦਸ੍ਸਨਂ. ਨਾਲਕਪਟਿਪਦਨ੍ਤਿ ਸੁਤ੍ਤਨਿਪਾਤੇ (ਸੁ. ਨਿ. ੬੮੪ ਆਦਯੋ) ਨਾਲਕਤ੍ਥੇਰਸ੍ਸ ਦੇਸਿਤਂ ਮੋਨੇਯ੍ਯਪਟਿਪਦਂ. ਪਞ੍ਚਨ੍ਨਂ ਛਦਨਾਨਨ੍ਤਿ ਤਿਣਪਣ੍ਣਇਟ੍ਠਕਸਿਲਾਸੁਧਾਸਙ੍ਖਾਤਾਨਂ ਪਞ੍ਚਨ੍ਨਂ. ਨੋ ਚੇ ਲਭਤਿ…ਪੇ… ਸਾਮਮ੍ਪਿ ਕਾਤਬ੍ਬਨ੍ਤਿ ਇਮਿਨਾ ਨਾਵਾਸਤ੍ਥਵਜੇ ਠਪੇਤ੍ਵਾ ਅਞ੍ਞਤ੍ਥ ‘‘ਅਸੇਨਾਸਨਿਕੋ ਅਹ’’ਨ੍ਤਿ ਆਲਯਕਰਣਮਤ੍ਤੇਨ ਉਪਗਮਨਂ ਨ ਵਟ੍ਟਤਿ. ਸੇਨਾਸਨਂ ਪਰਿਯੇਸਿਤ੍ਵਾ ਵਚੀਭੇਦਂ ਕਤ੍ਵਾ ਵਸ੍ਸਂ ਉਪਗਨ੍ਤਬ੍ਬਮੇਵਾਤਿ ਦਸ੍ਸੇਤਿ. ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨਾ’’ਤਿਆਦਿਨਾ (ਮਹਾਵ. ੨੦੪) ਹਿ ਪਾਲ਼ਿਯਂ ‘‘ਨਾਲਕਪਟਿਪਦਂ ਪਟਿਪਨ੍ਨੇਨਾਪੀ’’ਤਿ ਅਟ੍ਠਕਥਾਯਞ੍ਚ ਅਵਿਸੇਸੇਨ ਦਲ਼੍ਹਂ ਕਤ੍ਵਾ ਵੁਤ੍ਤਂ, ਨਾਵਾਸਤ੍ਥਵਜੇਸੁਯੇਵ ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਨਾਵਾਯ ਵਸ੍ਸਂ ਉਪਗਨ੍ਤੁ’’ਨ੍ਤਿਆਦਿਨਾ (ਮਹਾਵ. ੨੦੩) ਅਸਤਿਪਿ ਸੇਨਾਸਨੇ ਆਲਯਕਰਣਵਸੇਨ ਵਸ੍ਸੂਪਗਮਨਂ ਅਨੁਞ੍ਞਾਤਂ, ਨਾਞ੍ਞਤ੍ਥਾਤਿ ਗਹੇਤਬ੍ਬਂ. ਅਯਮਨੁਧਮ੍ਮਤਾਤਿ ਸਾਮੀਚਿਵਤ੍ਤਂ. ਕਤਿਕਵਤ੍ਤਾਨੀਤਿ ਭਸ੍ਸਾਰਾਮਤਾਦਿਂ ਵਿਹਾਯ ਸਬ੍ਬਦਾ ਅਪ੍ਪਮਤ੍ਤੇਹਿ ਭਵਿਤਬ੍ਬਨ੍ਤਿਆਦਿਕਤਿਕਵਤ੍ਤਾਨਿ. ਖਨ੍ਧਕਵਤ੍ਤਾਨੀਤਿ ‘‘ਆਗਨ੍ਤੁਕਾਦਿਖਨ੍ਧਕਵਤ੍ਤਂ ਪੂਰੇਤਬ੍ਬ’’ਨ੍ਤਿ ਏਵਂ ਖਨ੍ਧਕਵਤ੍ਤਾਨਿ ਚ ਅਧਿਟ੍ਠਹਿਤ੍ਵਾ.
ਵਸ੍ਸਂਵੁਤ੍ਥਾਤਿ ਪਦਸ੍ਸ ਅਟ੍ਠਕਥਾਯਂ ‘‘ਪੁਰਿਮਿਕਾਯ ਉਪਗਤਾ ਮਹਾਪਵਾਰਣਾਯ ਪਵਾਰਿਤਾ ਪਾਟਿਪਦਦਿਵਸਤੋ ਪਟ੍ਠਾਯ ‘ਵੁਤ੍ਥਵਸ੍ਸਾ’ਤਿ ਵੁਚ੍ਚਨ੍ਤੀ’’ਤਿ ਵੁਤ੍ਤਤ੍ਤਾ ਮਹਾਪਵਾਰਣਾਦਿਵਸੇ ਪਵਾਰੇਤ੍ਵਾ ਵਾ ਅਪ੍ਪਵਾਰੇਤ੍ਵਾ ਵਾ ਅਞ੍ਞਤ੍ਥ ਗਚ੍ਛਨ੍ਤੇਹਿ ਸਤ੍ਤਾਹਕਰਣੀਯਨਿਮਿਤ੍ਤੇ ਸਤਿ ਏਵ ਗਨ੍ਤਬ੍ਬਂ, ਨਾਸਤਿ, ਇਤਰਥਾ ਵਸ੍ਸਚ੍ਛੇਦੋ ਦੁਕ੍ਕਟਞ੍ਚ ਹੋਤੀਤਿ ਵੇਦਿਤਬ੍ਬਂ. ‘‘ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਹਿ ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ’’ਤਿ (ਮਹਾਵ. ੧੮੫) ਚ ਵੁਤ੍ਤਂ. ਇਧੇਵ ਚ ਵਸ੍ਸਂਵੁਤ੍ਥਾ ਤੇਮਾਸਚ੍ਚਯੇਨ…ਪੇ… ਪਕ੍ਕਮਿਂਸੂਤਿ ਵੁਤ੍ਤਂ. ਪਵਾਰਣਾਦਿਵਸੋਪਿ ਤੇਮਾਸਪਰਿਯਾਪਨ੍ਨੋਵ. ਕੇਚਿ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਤ੍ਥਾਨਂ ਭਿਕ੍ਖੂਨਂ ਤੀਹਿ ਠਾਨੇਹਿ ਪਵਾਰੇਤੁਨ੍ਤਿ (ਮਹਾਵ. ੨੦੯) ਪਵਾਰਣਾਕਮ੍ਮਸ੍ਸ ਪੁਬ੍ਬੇਯੇਵ ਵਸ੍ਸਂਵੁਤ੍ਥਾਨਨ੍ਤਿ ਵੁਤ੍ਥਵਸ੍ਸਤਾਯ ਵੁਤ੍ਤਤ੍ਤਾ ਮਹਾਪਵਾਰਣਾਦਿਵਸੇ ਸਤ੍ਤਾਹਕਰਣੀਯਨਿਮਿਤ੍ਤਂ ਵਿਨਾਪਿ ਯਥਾਸੁਖਂ ਗਨ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਵੁਤ੍ਥਵਸ੍ਸਾਨਞ੍ਹਿ ਪਵਾਰਣਾਨੁਜਾਨਨਂ ਅਨੁਪਗਤਛਿਨ੍ਨਵਸ੍ਸਾਦੀਨਂ ਨਿਵਤ੍ਤਨਤ੍ਥਂ ਕਤਂ, ਨ ਪਨ ਪਵਾਰਣਾਦਿਵਸੇ ਅਵਸਿਤ੍ਵਾ ਪਕ੍ਕਮਿਤਬ੍ਬਨ੍ਤਿ ਦਸ੍ਸਨਤ੍ਥਂ ਤਦਤ੍ਥਸ੍ਸ ਇਧ ਪਸਙ੍ਗਾਭਾਵਾ, ਪਵਾਰਣਂ ਕਾਤੁਂ ਅਨੁਚ੍ਛਵਿਕਾਨਂ ਪਵਾਰਣਾ ਇਧ ਵਿਧੀਯਤਿ, ਯੇ ਚ ਵਸ੍ਸਂ ਉਪਗਨ੍ਤ੍ਵਾ ਵਸ੍ਸਚ੍ਛੇਦਞ੍ਚ ਅਕਤ੍ਵਾ ਯਾਵ ਪਵਾਰਣਾਦਿਵਸਾ ਵਸਿਂਸੁ, ਤੇ ਤਤ੍ਤਕੇਨ ਪਵਾਰਣਾਕਮ੍ਮਂ ਪਤਿ ਪਰਿਯਾਯਤੋ ਵੁਤ੍ਥਵਸ੍ਸਾਤਿ ਵੁਚ੍ਚਨ੍ਤਿ, ਅਪ੍ਪਕਂ ਊਨਮਧਿਕਂ ਵਾ ਗਣਨੂਪਗਂ ਨ ਹੋਤੀਤਿ ਞਾਯਤੋ, ਨ ਕਥਿਨਕਮ੍ਮਂ ਪਤਿ ਤੇਮਾਸਸ੍ਸ ਅਪਰਿਪੁਣ੍ਣਤ੍ਤਾ, ਇਤਰਥਾ ਤਸ੍ਮਿਂ ਮਹਾਪਵਾਰਣਾਦਿਵਸੇਪਿ ਕਥਿਨਤ੍ਥਾਰਪ੍ਪਸਙ੍ਗਤੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਤ੍ਥਾਨਂ ਭਿਕ੍ਖੂਨਂ ਕਥਿਨਂ ਅਤ੍ਥਰਿਤੁ’’ਨ੍ਤਿ (ਮਹਾਵ. ੩੦੬) ਇਦਂ ਪਨ ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ’’ਤਿਆਦਿ (ਮਹਾਵ. ੧੮੫) ਚ ਨਿਪ੍ਪਰਿਯਾਯਤੋ ਮਹਾਪਵਾਰਣਾਯ ਅਨਨ੍ਤਰਪਾਟਿਪਦਦਿਵਸਤੋ ਪਟ੍ਠਾਯ ਕਥਿਨਤ੍ਥਾਰਂ ਪਕ੍ਕਮਨਞ੍ਚ ਸਨ੍ਧਾਯ ਵੁਤ੍ਤਂ, ਪਰਿਵਾਰੇ ਚ ‘‘ਕਥਿਨਸ੍ਸ ਅਤ੍ਥਾਰਮਾਸੋ ਜਾਨਿਤਬ੍ਬੋ’’ਤਿ (ਪਰਿ. ੪੧੨) ਵਤ੍ਵਾ ‘‘ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ ਜਾਨਿਤਬ੍ਬੋ’’ਤਿ (ਪਰਿ. ੪੧੨) ਵੁਤ੍ਤਂ. ਯੋ ਹਿ ਕਥਿਨਤ੍ਥਾਰਸ੍ਸ ਕਾਲੋ, ਤਤੋ ਪਟ੍ਠਾਯੇਵ ਚਾਰਿਕਾਪਕ੍ਕਮਨਸ੍ਸਾਪਿ ਕਾਲੋ, ਨ ਤਤੋ ਪੁਰੇ ਵਸ੍ਸਂਵੁਤ੍ਥਾਨਂਯੇਵ ਕਥਿਨਤ੍ਥਾਰਾਰਹਤ੍ਤਾ. ਯਦਗ੍ਗੇਨ ਹਿ ਪਵਾਰਣਾਦਿਵਸੇ ਕਥਿਨਤ੍ਥਾਰੋ ਨ ਵਟ੍ਟਤਿ, ਤਦਗ੍ਗੇਨ ਭਿਕ੍ਖੂਪਿ ਵੁਤ੍ਥਵਸ੍ਸਾ ਨ ਹੋਨ੍ਤਿ ਪਵਾਰਣਾਦਿਵਸਸ੍ਸ ਅਵੁਤ੍ਥਤ੍ਤਾ.
ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਰਾਜਿਕਕਣ੍ਡ ੨.੮੪) ‘‘ਏਕਦੇਸੇਨ ਅਵੁਤ੍ਥਮ੍ਪਿ ਤਂ ਦਿਵਸਂ ਵੁਤ੍ਥਭਾਗਾਪੇਕ੍ਖਾਯ ਵੁਤ੍ਥਮੇਵ ਹੋਤੀ’’ਤਿਆਦਿ ਵੁਤ੍ਤਂ, ਤਂ ਨ ਯੁਤ੍ਤਂ, ਤਂਦਿਵਸਪਰਿਯੋਸਾਨੇ ਅਰੁਣੁਗ੍ਗਮਨਕਾਲੇ ਵਸਨ੍ਤੋਵ ਹਿ ਤਂ ਦਿਵਸਂ ਵੁਤ੍ਥੋ ਨਾਮ ਹੋਤਿ ਪਰਿਵਾਸਅਰਞ੍ਞਵਾਸਾਦੀਸੁ ਵਿਯ, ਅਯਞ੍ਚ ਵਿਚਾਰਣਾ ਉਪਰਿ ਵਸ੍ਸੂਪਨਾਯਿਕਕ੍ਖਨ੍ਧਕੇ ਆਵਿ ਭਵਿਸ੍ਸਤੀਤਿ ਤਤ੍ਥੇਵ ਤਂ ਪਾਕਟਂ ਕਰਿਸ੍ਸਾਮ.
ਮਹਾਪਵਾਰਣਾਯ ਪਵਾਰਿਤਾਤਿ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਅਚ੍ਛਿਨ੍ਨਵਸ੍ਸਤਾਦਸ੍ਸਨਪਰਂ ਏਤਂ ਕੇਨਚਿ ਅਨ੍ਤਰਾਯੇਨ ਅਪ੍ਪਵਾਰਿਤਾਨਮ੍ਪਿ ਵੁਤ੍ਥਵਸ੍ਸਤ੍ਤਾ. ਨ ਓਵਸ੍ਸਿਯਤੀਤਿ ਅਨੋਵਸ੍ਸਕਨ੍ਤਿ ਕਮ੍ਮਸਾਧਨਂ ਦਟ੍ਠਬ੍ਬਂ, ਯਥਾ ਨ ਤੇਮਿਯਤਿ, ਤਥਾ ਕਤ੍ਵਾਤਿ ਅਤ੍ਥੋ. ਅਨਵਯੋਤਿ ਏਤ੍ਥ ਅਨੁਸਦ੍ਦੋ ਵਿਚ੍ਛਾਯਂ ਵਤ੍ਤਤੀਤਿ ਆਹ ਅਨੁ ਅਨੁ ਅਵਯੋਤਿਆਦਿ. ਆਚਰਿਯਸ੍ਸ ਕਮ੍ਮਂ ਆਚਰਿਯਕਨ੍ਤਿ ਆਹ ‘‘ਆਚਰਿਯਕਮ੍ਮੇ’’ਤਿ. ਕਟ੍ਠਕਮ੍ਮਂ ਥਮ੍ਭਾਦਿ. ਤੇਲਤਮ੍ਬਮਤ੍ਤਿਕਾਯਾਤਿ ਤੇਲਮਿਸ੍ਸਾਯ ਤਮ੍ਬਮਤ੍ਤਿਕਾਯ.
੮੫. ਕੁਟਿਕਾਯ ਕਰਣਭਾਵਨ੍ਤਿ ਕੁਟਿਯਾ ਕਤਭਾਵਂ. ਕਿਂ-ਸਦ੍ਦਪ੍ਪਯੋਗੇ ਅਨਾਗਤਪ੍ਪਚ੍ਚਯਵਿਧਾਨਂ ਸਨ੍ਧਾਯ ਤਸ੍ਸ ਲਕ੍ਖਣਨ੍ਤਿਆਦਿ ਵੁਤ੍ਤਂ. ਕਿਞ੍ਚਾਪਿ ਥੇਰਸ੍ਸ ਪਾਣਘਾਤਾਧਿਪ੍ਪਾਯੋ ਨਤ੍ਥਿ, ਅਨੁਪਪਰਿਕ੍ਖਿਤ੍ਵਾ ਕਰਣੇਨ ਪਨ ਬਹੂਨਂ ਪਾਣਾਨਂ ਮਰਣਤ੍ਤਾ ਪਾਣੇ ਬ੍ਯਾਬਾਧੇਨ੍ਤਸ੍ਸਾਤਿਆਦਿ ਵੁਤ੍ਤਂ. ਪਾਤਬ੍ਯਭਾਵਨ੍ਤਿ ਵਿਨਾਸੇਤਬ੍ਬਤਂ. ਪਾਣਾਤਿਪਾਤਂ ਕਰੋਨ੍ਤਾਨਨ੍ਤਿ ਥੇਰੇਨ ਅਕਤੇਪਿ ਪਾਣਾਤਿਪਾਤੇ ਪਾਣਕਾਨਂ ਮਰਣਮਤ੍ਤੇਨ ਪਚ੍ਛਿਮਾਨਂ ਲੇਸੇਨ ਗਹਣਾਕਾਰਂ ਦਸ੍ਸੇਤਿ, ਤੇਨ ਚ ‘‘ਮਮ ਤਾਦਿਸਂ ਅਕੁਸਲਂ ਨਤ੍ਥੀ’’ਤਿ ਪਚ੍ਛਿਮਾਨਂ ਵਿਪਲ੍ਲਾਸਲੇਸਗ੍ਗਹਣਨਿਮਿਤ੍ਤਕਿਚ੍ਚਂ ਨ ਕਤ੍ਤਬ੍ਬਨ੍ਤਿ ਦੀਪਿਤਂ ਹੋਤਿ. ਦਿਟ੍ਠਾਨੁਗਤਿਨ੍ਤਿ ਦਿਟ੍ਠਸ੍ਸ ਕਮ੍ਮਸ੍ਸ ਅਨੁਪਗਮਨਂ ਅਨੁਕਿਰਿਯਂ, ਦਿਟ੍ਠਿਯਾ ਵਾ ਲਦ੍ਧਿਯਾ ਅਨੁਗਮਨਂ ਗਾਹਂ. ਘਂਸਿਤਬ੍ਬੇਤਿ ਮਦ੍ਦਿਤਬ੍ਬੇ, ਵਿਨਾਸਿਤਬ੍ਬੇਤਿ ਅਤ੍ਥੋ. ਕਤਂ ਲਭਿਤ੍ਵਾ ਤਤ੍ਥ ਵਸਨ੍ਤਾਨਮ੍ਪਿ ਦੁਕ੍ਕਟਮੇਵਾਤਿ ਇਦਂ ਭਗਵਤਾ ਕੁਟਿਯਾ ਭੇਦਾਪਨਵਚਨੇਨ ਸਿਦ੍ਧਂ, ਸਾਪਿ ਤਿਣਦਬ੍ਬਸਮ੍ਭਾਰੇਹਿ ਤੁਲਾਥਮ੍ਭਾਦੀਹਿ ਅਮਿਸ੍ਸਾ ਸੁਦ੍ਧਮਤ੍ਤਿਕਾਮਯਾਪਿ ਇਟ੍ਠਕਾਹਿ ਕਤਾ ਵਟ੍ਟਤਿ. ਕੇਚਿ ਹਿ ਇਟ੍ਠਕਾਹਿਯੇਵ ਥਮ੍ਭੇ ਚਿਨਿਤ੍ਵਾ ਤਦੁਪਰਿ ਇਟ੍ਠਕਾਹਿਯੇਵ ਵਿਤਾਨਾਦਿਸਣ੍ਠਾਨੇਨ ਤੁਲਾਦਿਦਾਰੁਸਮ੍ਭਾਰਵਿਰਹਿਤਂ ਛਦਨਮ੍ਪਿ ਬਨ੍ਧਿਤ੍ਵਾ ਇਟ੍ਠਕਾਮਯਮੇਵ ਆਵਸਥਂ ਕਰੋਨ੍ਤਿ, ਤਾਦਿਸਂ ਵਟ੍ਟਤਿ. ਗਿਞ੍ਜਕਾਵਸਥਸਙ੍ਖੇਪੇਨ ਕਤਾਤਿ ਏਤ੍ਥ ਗਿਞ੍ਜਕਾ ਵੁਚ੍ਚਨ੍ਤਿ ਇਟ੍ਠਕਾ, ਤਾਹਿਯੇਵ ਕਤੋ ਆਵਸਥੋ ਗਿਞ੍ਜਕਾਵਸਥੋ. ਵਯਕਮ੍ਮਮ੍ਪੀਤਿ ਮਤ੍ਤਿਕੁਦ੍ਧਾਰਣਇਟ੍ਠਕਦਾਰੁਚ੍ਛੇਦਨਾਦਿਕਾਰਕਾਨਂ ਦਿਨ੍ਨਭਤ੍ਤਵੇਤ੍ਤਨਾਦਿਵਤ੍ਥੁਬ੍ਬਯੇਨ ਨਿਪ੍ਫਨ੍ਨਕਮ੍ਮਮ੍ਪਿ ਅਤ੍ਥਿ, ਏਤੇਨ ਕੁਟਿਭੇਦਕਾਨਂ ਗੀਵਾਦਿਭਾਵਂ ਪਰਿਸਙ੍ਕਤਿ. ਤਿਤ੍ਥਿਯਧਜੋਤਿ ਤਿਤ੍ਥਿਯਾਨਮੇਵ ਸਞ੍ਞਾਣਭੂਤਤ੍ਤਾ ਵੁਤ੍ਤਂ. ਤੇ ਹਿ ਈਦਿਸੇਸੁ ਚਾਟਿਆਦੀਸੁ ਵਸਨ੍ਤਿ. ਅਞ੍ਞਾਨਿਪੀਤਿ ਪਿ-ਸਦ੍ਦੇਨ ਅਤ੍ਤਨਾ ਵੁਤ੍ਤਕਾਰਣਦ੍ਵਯਮ੍ਪਿ ਮਹਾਅਟ੍ਠਕਥਾਯਮੇਵ ਵੁਤ੍ਤਨ੍ਤਿ ਦਸ੍ਸੇਤਿ. ਯਸ੍ਮਾ ਸਬ੍ਬਮਤ੍ਤਿਕਾਮਯਾ ਕੁਟਿ ਸੀਤਕਾਲੇ ਅਤਿਸੀਤਾ ਉਣ੍ਹਕਾਲੇ ਚ ਉਣ੍ਹਾ ਸੁਕਰਾ ਚ ਹੋਤਿ ਚੋਰੇਹਿ ਭਿਨ੍ਦਿਤੁਂ, ਤਸ੍ਮਾ ਤਤ੍ਥ ਠਪਿਤਪਤ੍ਤਚੀਵਰਾਦਿਕਂ ਸੀਤੁਣ੍ਹਚੋਰਾਦੀਹਿ ਵਿਨਸ੍ਸਤੀਤਿ ਵੁਤ੍ਤਂ ‘‘ਪਤ੍ਤਚੀਵਰਗੁਤ੍ਤਤ੍ਥਾਯਾ’’ਤਿ. ਛਿਨ੍ਦਾਪੇਯ੍ਯ ਵਾ ਭਿਨ੍ਦਾਪੇਯ੍ਯ ਵਾ ਅਨੁਪਵਜ੍ਜੋਤਿ ਇਦਂ ਅਯਂ ਕੁਟਿ ਵਿਯ ਸਬ੍ਬਥਾ ਅਨੁਪਯੋਗਾਰਹਂ ਸਨ੍ਧਾਯ ਵੁਤ੍ਤਂ. ਯਂ ਪਨ ਪਞ੍ਚਵਣ੍ਣਸੁਤ੍ਤੇਹਿ ਵਿਨਦ੍ਧਛਤ੍ਤਾਦਿਕਂ, ਤਤ੍ਥ ਅਕਪ੍ਪਿਯਭਾਗੋਵ ਛਿਨ੍ਦਿਤਬ੍ਬੋ, ਨ ਤਦਵਸੇਸੋ ਤਸ੍ਸ ਕਪ੍ਪਿਯਤ੍ਤਾ, ਤਂ ਛਿਨ੍ਦਨ੍ਤੋ ਉਪਵਜ੍ਜੋਵ ਹੋਤਿ. ਤੇਨੇਵ ਵਕ੍ਖਤਿ ‘‘ਘਟਕਮ੍ਪਿ ਵਾਲ਼ਰੂਪਮ੍ਪਿ ਭਿਨ੍ਦਿਤ੍ਵਾ ਧਾਰੇਤਬ੍ਬ’’ਨ੍ਤਿਆਦਿ.
ਪਾਲ਼ਿਮੁਤ੍ਤਕਵਿਨਿਚ੍ਛਯਵਣ੍ਣਨਾ
ਛਤ੍ਤਦਣ੍ਡਗ੍ਗਾਹਕਂ ਸਲਾਕਪਞ੍ਜਰਨ੍ਤਿ ਏਤ੍ਥ ਯੋ ਪਞ੍ਜਰਸਲਾਕਾਨਂ ਮਜ੍ਝਟ੍ਠੋ ਬੁਨ੍ਦੇ ਪੁਥੁਲੋ ਅਹਿਚ੍ਛਤ੍ਤਕਸਦਿਸੋ ਅਗ੍ਗੇ ਸਛਿਦ੍ਦੋ ਯਤ੍ਥ ਦਣ੍ਡਨ੍ਤਰਂ ਪਵੇਸੇਤ੍ਵਾ ਛਤ੍ਤਂ ਗਣ੍ਹਨ੍ਤਿ, ਯੋ ਵਾ ਸਯਮੇਵ ਦੀਘਤਾਯ ਗਹਣਦਣ੍ਡੋ ਹੋਤਿ, ਅਯਂ ਛਤ੍ਤਦਣ੍ਡੋ ਨਾਮ, ਤਸ੍ਸ ਅਪਰਿਗਲ਼ਨਤ੍ਥਾਯ ਛਤ੍ਤਸਲਾਕਾਨਂ ਮੂਲਪ੍ਪਦੇਸਦਣ੍ਡਸ੍ਸ ਸਮਨ੍ਤਤੋ ਦਲ਼੍ਹਪਞ੍ਜਰਂ ਕਤ੍ਵਾ ਸੁਤ੍ਤੇਹਿ ਵਿਨਨ੍ਧਨ੍ਤਿ, ਸੋ ਪਦੇਸੋ ਛਤ੍ਤਦਣ੍ਡਗਾਹਕਸਲਾਕਪਞ੍ਜਰਂ ਨਾਮ, ਤਂ ਵਿਨਨ੍ਧਿਤੁਂ ਵਟ੍ਟਤਿ. ਨ ਵਣ੍ਣਮਟ੍ਠਤ੍ਥਾਯਾਤਿ ਇਮਿਨਾ ਥਿਰਕਰਣਤ੍ਥਮੇਵ ਏਕਵਣ੍ਣਸੁਤ੍ਤੇਨ ਵਿਨਨ੍ਧਿਯਮਾਨਂ ਯਦਿ ਵਣ੍ਣਮਟ੍ਠਂ ਹੋਤਿ, ਨ ਤਤ੍ਥ ਦੋਸੋਤਿ ਦਸ੍ਸੇਤਿ. ਆਰਗ੍ਗੇਨਾਤਿ ਨਿਖਾਦਨਮੁਖੇਨ. ਦਣ੍ਡਬੁਨ੍ਦੇਤਿ ਦਣ੍ਡਮੂਲੇ ਕੋਟਿਯਂ. ਛਤ੍ਤਮਣ੍ਡਲਿਕਨ੍ਤਿ ਛਤ੍ਤਪਞ੍ਜਰੇ ਮਣ੍ਡਲਾਕਾਰੇਨ ਬਦ੍ਧਦਣ੍ਡਵਲਯਂ. ਉਕ੍ਕਿਰਿਤ੍ਵਾਤਿ ਨਿਨ੍ਨਂ, ਉਨ੍ਨਤਂ ਵਾ ਕਤ੍ਵਾ.
ਨਾਨਾਸੁਤ੍ਤਕੇਹੀਤਿ ਨਾਨਾਵਣ੍ਣੇਹਿ ਸੁਤ੍ਤੇਹਿ. ਇਦਞ੍ਚ ਤਥਾ ਕਰੋਨ੍ਤਾਨਂ ਵਸੇਨ ਵੁਤ੍ਤਂ, ਏਕਵਣ੍ਣਸੁਤ੍ਤਕੇਨਾਪਿ ਨ ਵਟ੍ਟਤਿਯੇਵ, ‘‘ਪਕਤਿਸੂਚਿਕਮ੍ਮਮੇਵ ਵਟ੍ਟਤੀ’’ਤਿ ਹਿ ਵੁਤ੍ਤਂ. ਪਟ੍ਟਮੁਖੇਤਿ ਦ੍ਵਿਨ੍ਨਂ ਪਟ੍ਟਾਨਂ ਸਙ੍ਘਟਿਤਟ੍ਠਾਨਂ ਸਨ੍ਧਾਯੇਤਂ ਵੁਤ੍ਤਂ. ਪਰਿਯਨ੍ਤੇਤਿ ਚੀਵਰਪਰਿਯਨ੍ਤੇ, ਅਨੁਵਾਤਂ ਸਨ੍ਧਾਯੇਤਂ ਵੁਤ੍ਤਂ. ਵੇਣਿਨ੍ਤਿ ਵਰਕਸੀਸਾਕਾਰੇਨ ਸਿਬ੍ਬਨਂ. ਸਙ੍ਖਲਿਕਨ੍ਤਿ ਦਿਗੁਣਸਙ੍ਖਲਿਕਾਕਾਰੇਨ ਸਿਬ੍ਬਨਂ, ਵੇਣਿਂ ਵਾ ਸਙ੍ਖਲਿਕਂ ਵਾ ਕਰੋਨ੍ਤੀਤਿ ਪਕਤੇਨ ਸਮ੍ਬਨ੍ਧੋ. ਅਗ੍ਘਿਯਂ ਨਾਮ ਚੇਤਿਯਸਣ੍ਠਾਨਂ, ਯਂ ਅਗ੍ਘਿਯਤ੍ਥਮ੍ਭੋਤਿ ਵਦਨ੍ਤਿ. ਉਕ੍ਕਿਰਨ੍ਤੀਤਿ ਉਟ੍ਠਪੇਨ੍ਤਿ. ਚਤੁਕੋਣਮੇਵ ਵਟ੍ਟਤੀਤਿ ਗਣ੍ਠਿਕਪਾਸਕਪਟ੍ਟਾਨਿ ਸਨ੍ਧਾਯ ਵੁਤ੍ਤਂ. ਕੋਣਸੁਤ੍ਤਪਿਲ਼ਕਾਤਿ ਗਣ੍ਠਿਕਪਾਸਕਪਟ੍ਟਾਨਂ ਕੋਣੇਹਿ ਬਹਿ ਨਿਗ੍ਗਤਸੁਤ੍ਤਾਨਂ ਪਿਲ਼ਕਾਕਾਰੇਨ ਠਪਿਤਕੋਟਿਯੋਤਿ ਕੇਚਿ ਵਦਨ੍ਤਿ, ਤੇ ਪਿਲ਼ਕੇ ਛਿਨ੍ਦਿਤ੍ਵਾ ਦੁਵਿਞ੍ਞੇਯ੍ਯਾ ਕਾਤਬ੍ਬਾਤਿ ਤੇਸਂ ਅਧਿਪ੍ਪਾਯੋ. ਕੇਚਿ ਪਨ ‘‘ਕੋਣਸੁਤ੍ਤਾ ਚ ਪਿਲ਼ਕਾਤਿ ਦ੍ਵੇਯੇਵਾ’’ਤਿ ਵਦਨ੍ਤਿ, ਤੇਸਂ ਮਤੇਨ ਗਣ੍ਠਿਕਪਾਸਕਪਟ੍ਟਾਨਂ ਕੋਣਤੋ ਕੋਣੇਹਿ ਨੀਹਤਸੁਤ੍ਤਾ ਕੋਣਸੁਤ੍ਤਾ ਨਾਮ. ਸਮਨ੍ਤਤੋ ਪਨ ਪਰਿਯਨ੍ਤੇਨ ਕਤਾ ਚਤੁਰਸ੍ਸਸੁਤ੍ਤਾ ਪਿਲ਼ਕਾ ਨਾਮ. ਤਂ ਦੁਵਿਧਮ੍ਪਿ ਕੇਚਿ ਚੀਵਰਤੋ ਵਿਸੁਂ ਪਞ੍ਞਾਯਨਤ੍ਥਾਯ ਵਿਕਾਰਯੁਤ੍ਤਂ ਕਰੋਨ੍ਤਿ, ਤਂ ਨਿਸੇਧਾਯ ‘‘ਦੁਵਿਞ੍ਞੇਯ੍ਯਰੂਪਾ ਵਟ੍ਟਨ੍ਤੀ’’ਤਿ ਵੁਤ੍ਤਂ, ਨ ਪਨ ਸਬ੍ਬਥਾ ਅਚਕ੍ਖੁਗੋਚਰਭਾਵੇਨ ਸਿਬ੍ਬਨਤ੍ਥਾਯ ਤਥਾਸਿਬ੍ਬਨਸ੍ਸ ਅਸਕ੍ਕੁਣੇਯ੍ਯਤ੍ਤਾ. ਯਥਾ ਪਕਤਿਚੀਵਰਤੋ ਵਿਕਾਰੋ ਨ ਪਞ੍ਞਾਯਤਿ, ਏਵਂ ਸਿਬ੍ਬਿਤਬ੍ਬਨ੍ਤਿ ਅਧਿਪ੍ਪਾਯੋ. ਰਜਨਕਮ੍ਮਤੋ ਪੁਬ੍ਬੇ ਪਞ੍ਞਾਯਮਾਨੋਪਿ ਵਿਸੇਸੋ ਚੀਵਰੇ ਰਤ੍ਤੇ ਏਕਵਣ੍ਣਤਾਯ ਨ ਪਞ੍ਞਾਯਤੀਤਿ ਆਹ ‘‘ਚੀਵਰੇ ਰਤ੍ਤੇ’’ਤਿ. ਮਣਿਨਾਤਿ ਨੀਲਮਣਿਆਦਿਮਟ੍ਠਪਾਸਾਣੇਨ, ਅਂਸਵਦ੍ਧਕਕਾਯਬਨ੍ਧਨਾਦਿਕਂ ਪਨ ਅਚੀਵਰਤ੍ਤਾ ਸਙ੍ਖਾਦੀਹਿ ਘਂਸਿਤੁਂ ਵਟ੍ਟਤੀਤਿ ਵਦਨ੍ਤਿ. ਕਣ੍ਣਸੁਤ੍ਤਕਨ੍ਤਿ ਚੀਵਰਸ੍ਸ ਦੀਘਤੋ ਤਿਰਿਯਞ੍ਚ ਸਿਬ੍ਬਿਤਾਨਂ ਚਤੂਸੁ ਕਣ੍ਣੇਸੁ ਕੋਣੇਸੁ ਚ ਨਿਕ੍ਖਨ੍ਤਾਨਂ ਸੁਤ੍ਤਸੀਸਾਨਮੇਤਂ ਨਾਮਂ, ਤਂ ਛਿਨ੍ਦਿਤ੍ਵਾਵ ਪਾਰੁਪਿਤਬ੍ਬਂ, ਤੇਨਾਹ ‘‘ਰਜਿਤਕਾਲੇ ਛਿਨ੍ਦਿਤਬ੍ਬ’’ਨ੍ਤਿ. ਭਗਵਤਾ ਅਨੁਞ੍ਞਾਤਂ ਏਕਂ ਕਣ੍ਣਸੁਤ੍ਤਮ੍ਪਿ ਅਤ੍ਥਿ, ਤਂ ਪਨ ਨਾਮੇਨ ਸਦਿਸਮ੍ਪਿ ਇਤੋ ਅਞ੍ਞਮੇਵਾਤਿ ਦਸ੍ਸੇਤੁਂ ਯਂ ਪਨਾਤਿਆਦਿ ਵੁਤ੍ਤਂ. ਲਗ੍ਗਨਤ੍ਥਾਯਾਤਿ ਚੀਵਰਰਜ੍ਜੁਯਂ ਚੀਵਰਬਨ੍ਧਨਤ੍ਥਾਯ. ਗਣ੍ਠਿਕੇਤਿ ਦਨ੍ਤਾਦਿਮਯੇ. ਪੀਲ਼ਕਾਤਿ ਬਿਨ੍ਦੁਂ ਬਿਨ੍ਦੁਂ ਕਤ੍ਵਾ ਉਟ੍ਠਾਪੇਤਬ੍ਬਪੀਲ਼ਕਾ.
ਥਾਲਕੇ ਵਾਤਿ ਤਮ੍ਬਾਦਿਮਯੇ ਪੁਗ੍ਗਲਿਕੇ ਤਿਵਿਧੇਪਿ ਕਪ੍ਪਿਯਥਾਲਕੇ. ਨ ਵਟ੍ਟਤੀਤਿ ਮਣਿਵਣ੍ਣਕਰਣਪ੍ਪਯੋਗੋ ਨ ਵਟ੍ਟਤਿ, ਤੇਲਵਣ੍ਣਕਰਣਤ੍ਥਂ ਪਨ ਵਟ੍ਟਤਿ. ਪਤ੍ਤਮਣ੍ਡਲੇਤਿ ਤਿਪੁਸੀਸਾਦਿਮਯੇ. ‘‘ਨ, ਭਿਕ੍ਖਵੇ, ਚਿਤ੍ਤਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨੀ’’ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ‘‘ਭਿਤ੍ਤਿਕਮ੍ਮਂ ਨ ਵਟ੍ਟਤੀ’’ਤਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਰਦਨ੍ਤਕਂ ਛਿਨ੍ਦਿਤੁ’’ਨ੍ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ‘‘ਮਕਰਦਨ੍ਤਕਂ ਪਨ ਵਟ੍ਟਤੀ’’ਤਿ ਵੁਤ੍ਤਂ, ਇਦਂ ਪਨ ਪਾਲ਼ਿਯਾ ਲਦ੍ਧਮ੍ਪਿ ਇਧ ਪਾਲ਼ਿਯਾ ਮੁਤ੍ਤਤ੍ਤਾ ਪਾਲ਼ਿਮੁਤ੍ਤਕਨਯੇ ਵੁਤ੍ਤਂ. ਏਵਮਞ੍ਞਮ੍ਪਿ ਈਦਿਸਂ.
ਲੇਖਾ ਨ ਵਟ੍ਟਤੀਤਿ ਆਰਗ੍ਗੇਨ ਦਿਨ੍ਨਲੇਖਾਵ ਨ ਵਟ੍ਟਤਿ, ਜਾਤਿਹਿਙ੍ਗੁਲਿਕਾਦਿਵਣ੍ਣੇਹਿ ਕਤਲੇਖਾ ਵਟ੍ਟਤਿ. ਛਤ੍ਤਮੁਖਵਟ੍ਟਿਯਨ੍ਤਿ ਧਮਕਰਣਸ੍ਸ ਹਤ੍ਥੇਨ ਗਹਣਛਤ੍ਤਾਕਾਰਸ੍ਸ ਮੁਖਵਟ੍ਟਿਯਂ, ‘‘ਪਰਿਸ੍ਸਾਵਨਚੋਲ਼ਬਨ੍ਧਨਟ੍ਠਾਨੇ’’ਤਿ ਕੇਚਿ.
ਦੇਡ੍ਡੁਭਸੀਸਨ੍ਤਿ ਉਦਕਸਪ੍ਪਸੀਸਂ. ਅਚ੍ਛੀਨੀਤਿ ਕੁਞ੍ਜਰਚ੍ਛਿਸਣ੍ਠਾਨਾਨਿ. ਏਕਮੇਵ ਵਟ੍ਟਤੀਤਿ ਏਤ੍ਥ ਏਕਰਜ੍ਜੁਕਂ ਦਿਗੁਣਂ ਤਿਗੁਣਂ ਕਤ੍ਵਾਪਿ ਬਨ੍ਧਿਤੁਂ ਨ ਵਟ੍ਟਤਿ, ਏਕਮੇਵ ਪਨ ਸਤਵਾਰਮ੍ਪਿ ਸਰੀਰਂ ਪਰਿਕ੍ਖਿਪਿਤ੍ਵਾ ਬਨ੍ਧਿਤੁਂ ਵਟ੍ਟਤਿ, ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ‘‘ਬਹੁਰਜ੍ਜੁਕ’’ਨ੍ਤਿ ਨ ਵਤ੍ਤਬ੍ਬਂ ‘‘ਵਟ੍ਟਤੀ’’ਤਿ ਵੁਤ੍ਤਤ੍ਤਾ, ਤਂ ਮੁਰਜਸਙ੍ਖਂ ਨ ਗਚ੍ਛਤੀਤਿ ਵੇਦਿਤਬ੍ਬਂ. ਮੁਰਜਞ੍ਹਿ ਨਾਨਾਵਣ੍ਣੇਹਿ ਸੁਤ੍ਤੇਹਿ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਂ, ਇਦਂ ਪਨ ਮੁਰਜਂ ਮਦ੍ਦਵੀਣਸਙ੍ਖਾਤਂ ਪਾਮਙ੍ਗਸਣ੍ਠਾਨਞ੍ਚ ਦਸਾਸੁ ਵਟ੍ਟਤਿ ‘‘ਕਾਯਬਨ੍ਧਨਸ੍ਸ ਦਸਾ ਜੀਰਨ੍ਤਿ; ਅਨੁਜਾਨਾਮਿ, ਭਿਕ੍ਖਵੇ, ਮੁਰਜਂ ਮਦ੍ਦਵੀਣ’’ਨ੍ਤਿ (ਚੂਲ਼ਵ. ੨੭੮) ਵੁਤ੍ਤਤ੍ਤਾ.
ਵਿਧੇਤਿ ਦਸਾਪਰਿਯੋਸਾਨੇ ਥਿਰਭਾਵਾਯ ਦਨ੍ਤਵਿਸਾਣਸੁਤ੍ਤਾਦੀਹਿ ਕਤ੍ਤਬ੍ਬੇ ਵਿਧੇ. ਅਟ੍ਠ ਮਙ੍ਗਲਾਨਿ ਨਾਮ ਸਙ੍ਖੋ ਚਕ੍ਕਂ ਪੁਣ੍ਣਕੁਮ੍ਭੋ ਗਯਾ ਸਿਰੀਵਚ੍ਛੋ ਅਙ੍ਕੁਸੋ ਧਜਂ ਸੋਵਤ੍ਤਿਕਨ੍ਤਿ ਵਦਨ੍ਤਿ. ਮਚ੍ਛਯੁਗਲ਼ਛਤ੍ਤਨਨ੍ਦਿਯਾਵਟ੍ਟਾਦਿਵਸੇਨਪਿ ਵਦਨ੍ਤਿ. ਪਰਿਚ੍ਛੇਦਲੇਖਾਮਤ੍ਤਨ੍ਤਿ ਦਨ੍ਤਾਦੀਹਿ ਕਤਵਿਧਸ੍ਸ ਉਭੋਸੁ ਕੋਟੀਸੁ ਕਤਪਰਿਚ੍ਛੇਦਰਾਜਿਮਤ੍ਤਂ.
‘‘ਉਜੁਕਮੇਵਾ’’ਤਿ ਵੁਤ੍ਤਤ੍ਤਾ ਚਤੁਰਸ੍ਸਾਦਿਸਣ੍ਠਾਨਾਪਿ ਅਞ੍ਜਨੀ ਵਙ੍ਕਗਤਿਕਾ ਨ ਵਟ੍ਟਤਿ. ਸਿਪਾਟਿਕਾਯਾਤਿ ਵਾਸਿਆਦਿਭਣ੍ਡਨਿਕ੍ਖਿਪਨਪਸਿਬ੍ਬਕੇ. ਆਰਕਣ੍ਟਕਂ ਨਾਮ ਪੋਤ੍ਥਕਾਦਿਅਅਸਙ੍ਖਾਰਣਤ੍ਥਂ ਕਤਦੀਘਮੁਖਸਤ੍ਥਕਨ੍ਤਿ ਵਦਨ੍ਤਿ. ‘‘ਭਮਕਾਰਾਨਂ ਦਾਰੁਆਦਿਲਿਖਨਸਤ੍ਥਕ’’ਨ੍ਤਿ ਕੇਚਿ. ਵਟ੍ਟਮਣਿਕਨ੍ਤਿ ਵਟ੍ਟਂ ਕਤ੍ਵਾ ਉਟ੍ਠਪੇਤਬ੍ਬਂ ਪੁਪ੍ਫੁਲ਼ਕਂ. ਅਞ੍ਞਨ੍ਤਿ ਇਮਿਨਾ ਪਿਲ਼ਕਾਦਿਂ ਸਙ੍ਗਣ੍ਹਾਤਿ. ਪਿਪ੍ਫਲਿਕੇਤਿ ਯਂ ਕਿਞ੍ਚਿ ਛੇਦਨਕੇ ਖੁਦ੍ਦਕਸਤ੍ਥੇ. ਵਲਿਤਕਨ੍ਤਿ ਨਖਚ੍ਛੇਦਨਕਾਲੇ ਦਲ਼੍ਹਗ੍ਗਹਣਤ੍ਥਂ ਵਲੀਹਿ ਯੁਤ੍ਤਮੇਵ ਕਰੋਨ੍ਤਿ. ਤਸ੍ਮਾ ਤਂ ਵਟ੍ਟਤੀਤਿ ਇਮਿਨਾ ਯਂ ਅਞ੍ਞਮ੍ਪਿ ਵਿਕਾਰਂ ਦਲ਼੍ਹੀਕਮ੍ਮਾਦਿਅਤ੍ਥਾਯ ਕਰੋਨ੍ਤਿ, ਨ ਵਣ੍ਣਮਟ੍ਠਤ੍ਥਾਯ, ਤਂ ਵਟ੍ਟਤੀਤਿ ਦੀਪਿਤਂ, ਤੇਨ ਚ ਕਤ੍ਤਰਦਣ੍ਡਕੋਟਿਯਂ ਅਞ੍ਞਮਞ੍ਞਮ੍ਪਿ ਘਟ੍ਟਨੇਨ ਸਦ੍ਦਨਿਚ੍ਛਰਣਤ੍ਥਾਯ ਕਤਂ ਅਯੋਵਲਯਾਦਿਕਂ ਸਂਯੁਤ੍ਤਮ੍ਪਿ ਕਪ੍ਪਿਯਤੋ ਉਪਪਨ੍ਨਂ ਹੋਤਿ. ਮਣ੍ਡਲਨ੍ਤਿ ਉਤ੍ਤਰਾਰਣਿਯਾ ਪਵੇਸਨਤ੍ਥਂ ਆਵਾਟਮਣ੍ਡਲਂ ਹੋਤਿ. ਉਜੁਕਮੇਵ ਬਨ੍ਧਿਤੁਨ੍ਤਿ ਸਮ੍ਬਨ੍ਧੋ, ਉਭੋਸੁ ਵਾ ਪਸ੍ਸੇਸੁ ਏਕਪਸ੍ਸੇ ਵਾਤਿ ਵਚਨਸੇਸੋ. ਵਾਸਿਦਣ੍ਡਸ੍ਸ ਉਭੋਸੁ ਪਸ੍ਸੇਸੁ ਦਣ੍ਡਕੋਟੀਨਂ ਅਚਲਨਤ੍ਥਂ ਬਨ੍ਧਿਤੁਨ੍ਤਿ ਅਤ੍ਥੋ.
ਆਮਣ੍ਡਸਾਰਕੇਤਿ ਆਮਲਕਫਲਾਨਿ ਪਿਸਿਤ੍ਵਾ ਤੇਨ ਕਕ੍ਕੇਨ ਕਤਤੇਲਭਾਜਨੇ. ਤਤ੍ਥ ਕਿਰ ਪਕ੍ਖਿਤ੍ਤਂ ਤੇਲਂ ਸੀਤਲਂ ਹੋਤਿ. ਭੂਮਤ੍ਥਰਣੇਤਿ ਕਟਸਾਰਾਦਿਮਯੇ ਪਰਿਕਮ੍ਮਕਤਾਯ ਭੂਮਿਯਾ ਅਤ੍ਥਰਿਤਬ੍ਬਅਤ੍ਥਰਣੇ. ਪਾਨੀਯਘਟੇਤਿ ਸਬ੍ਬਂ ਭਾਜਨਵਿਕਤਿਂ ਸਙ੍ਗਣ੍ਹਾਤਿ. ਸਬ੍ਬਂ…ਪੇ… ਵਟ੍ਟਤੀਤਿ ਯਥਾਵੁਤ੍ਤੇਸੁ ਮਞ੍ਚਾਦੀਸੁ ਇਤ੍ਥਿਪੁਰਿਸਰੂਪਮ੍ਪਿ ਵਟ੍ਟਤਿ ਤੇਲਭਾਜਨੇਸੁਯੇਵ ਇਤ੍ਥਿਪੁਰਿਸਰੂਪਾਨਂ ਪਟਿਕ੍ਖਿਤ੍ਤਤ੍ਤਾ, ਤੇਲਭਾਜਨੇਨ ਸਹ ਅਗਣੇਤ੍ਵਾ ਵਿਸੁਂ ਮਞ੍ਚਾਦੀਨਂ ਗਹਿਤਤ੍ਤਾ ਚਾਤਿ ਵਦਨ੍ਤਿ, ਕਿਞ੍ਚਾਪਿ ਵਦਨ੍ਤਿ, ਏਤੇਸਂ ਪਨ ਮਞ੍ਚਾਦੀਨਂ ਹਤ੍ਥੇਨ ਆਮਸਿਤਬ੍ਬਭਣ੍ਡਤ੍ਤਾ ਇਤ੍ਥਿਰੂਪਮੇਵੇਤ੍ਥ ਨ ਵਟ੍ਟਤੀਤਿ ਗਹੇਤਬ੍ਬਂ. ਅਞ੍ਞੇਸਨ੍ਤਿ ਸੀਮਸਾਮਿਕਾਨਂ. ਰਾਜਵਲ੍ਲਭੇਹੀਤਿ ਲਜ੍ਜੀਪੇਸਲਾਦੀਨਂ ਉਪੋਸਥਾਦਿਅਨ੍ਤਰਾਯਕਰਾ ਅਲਜ੍ਜਿਨੋ ਭਿਨ੍ਨਲਦ੍ਧਿਕਾ ਚ ਭਿਕ੍ਖੂ ਅਧਿਪ੍ਪੇਤਾ ਤੇਹਿ ਸਹ ਉਪੋਸਥਾਦਿਕਰਣਾਯੋਗਾ, ਤੇਨੇਵ ‘‘ਸੀਮਾਯਾ’’ਤਿ ਵੁਤ੍ਤਂ. ਤੇਸਂ ਲਜ੍ਜੀਪਰਿਸਾਤਿ ਤੇਸਂ ਸੀਮਾਸਾਮਿਕਾਨਂ ਅਨੁਬਲਂ ਦਾਤੁਂ ਸਮਤ੍ਥਾ ਲਜ੍ਜੀਪਰਿਸਾ. ਭਿਕ੍ਖੂਹਿ ਕਤਨ੍ਤਿ ਯਂ ਅਲਜ੍ਜੀਨਂ ਸੇਨਾਸਨਭੇਦਨਾਦਿਕਂ ਲਜ੍ਜੀਭਿਕ੍ਖੂਹਿ ਕਤਂ, ਸਬ੍ਬਞ੍ਚੇਤਂ ਸੁਕਤਮੇਵ ਅਲਜ੍ਜੀਨਿਗ੍ਗਹਤ੍ਥਾਯ ਪਵਤ੍ਤਿਤਬ੍ਬਤੋ.
੮੮. ਅਵਜ੍ਝਾਯਨ੍ਤੀਤਿ ਨੀਚਤੋ ਚਿਨ੍ਤੇਨ੍ਤਿ. ਉਜ੍ਝਾਯਨਤ੍ਥੋਤਿ ਭਿਕ੍ਖੁਨੋ ਥੇਯ੍ਯਕਮ੍ਮਨਿਨ੍ਦਨਤ੍ਥੋ ‘‘ਕਥਞ੍ਹਿ ਨਾਮ ਅਦਿਨ੍ਨਂ ਆਦਿਯਿਸ੍ਸਤੀ’’ਤਿ, ਨ ਪਨ ਦਾਰੁ-ਸਦ੍ਦਵਿਸੇਸਨਤ੍ਥੋ ਤਸ੍ਸ ਬਹੁਵਚਨਤ੍ਤਾ. ਵਚਨਭੇਦੇਤਿ ਏਕਵਚਨਬਹੁਵਚਨਾਨਂ ਭੇਦੇ. ਸਬ੍ਬਾਵਨ੍ਤਨ੍ਤਿ ਭਿਕ੍ਖੁਭਿਕ੍ਖੁਨੀਆਦਿਸਬ੍ਬਾਵਯਵਵਨ੍ਤਂ. ਬਿਮ੍ਬਿਸਾਰੋਤਿ ਤਸ੍ਸ ਨਾਮਨ੍ਤਿ ਏਤ੍ਥ ਬਿਮ੍ਬੀਤਿ ਸੁਵਣ੍ਣਂ. ਤਸ੍ਮਾ ਸਾਰਸੁਵਣ੍ਣਸਦਿਸਵਣ੍ਣਤਾਯ ‘‘ਬਿਮ੍ਬਿਸਾਰੋ’’ਤਿ ਵੁਚ੍ਚਤੀਤਿ ਵੇਦਿਤਬ੍ਬਂ. ਪੋਰਾਣਸਤ੍ਥਾਨੁਰੂਪਂ ਉਪ੍ਪਾਦਿਤੋ ਵੀਸਤਿਮਾਸਪ੍ਪਮਾਣਉਤ੍ਤਮਸੁਵਣ੍ਣਗ੍ਘਨਕੋ ਲਕ੍ਖਣਸਮ੍ਪਨ੍ਨੋ ਨੀਲਕਹਾਪਣੋਤਿ ਵੇਦਿਤਬ੍ਬੋ. ਰੁਦ੍ਰਦਾਮੇਨ ਨਾਮ ਕੇਨਚਿ ਉਪ੍ਪਾਦਿਤੋ ਰੁਦ੍ਰਦਾਮਕੋ. ਸੋ ਕਿਰ ਨੀਲਕਹਾਪਣਸ੍ਸ ਤਿਭਾਗਂ ਅਗ੍ਘਤਿ. ਯਸ੍ਮਿਂ ਪਨ ਦੇਸੇ ਨੀਲਕਹਾਪਣਾ ਨ ਸਨ੍ਤਿ, ਤਤ੍ਥਾਪਿ ਕਾਲ਼ਕਵਿਰਹਿਤਸ੍ਸ ਨਿਦ੍ਧਨ੍ਤਸੁਵਣ੍ਣਸ੍ਸ ਪਞ੍ਚਮਾਸਗ੍ਘਨਕੇਨ ਭਣ੍ਡੇਨ ਪਾਦਪਰਿਚ੍ਛੇਦੋ ਕਾਤਬ੍ਬੋ. ਤੇਨਾਤਿ ਨੀਲਕਹਾਪਣਸ੍ਸ ਚਤੁਤ੍ਥਭਾਗਭੂਤੇਨ. ਪਾਰਾਜਿਕਵਤ੍ਥੁਮ੍ਹਿ ਵਾਤਿਆਦਿ ਪਾਰਾਜਿਕਾਨਂ ਸਬ੍ਬਬੁਦ੍ਧੇਹਿ ਪਞ੍ਞਤ੍ਤਭਾਵੇਨ ਵੁਤ੍ਤਂ, ਸਙ੍ਘਾਦਿਸੇਸਾਦੀਸੁ ਪਨ ਇਤਰਾਪਤ੍ਤੀਸੁਪਿ ਤਬ੍ਬਤ੍ਥੂਸੁ ਚ ਨਾਨਤ੍ਤਂ ਨਤ੍ਥੇਵ, ਕੇਵਲਂ ਕੇਚਿ ਸਬ੍ਬਾਕਾਰੇਨ ਪਞ੍ਞਪੇਨ੍ਤਿ, ਕੇਚਿ ਏਕਦੇਸੇਨਾਤਿ ਏਤ੍ਤਕਮੇਵ ਵਿਸੇਸੋ. ਨ ਹਿ ਕਦਾਚਿਪਿ ਸਮ੍ਮਾਸਮ੍ਬੁਦ੍ਧਾ ਯਥਾਪਰਾਧਂ ਅਤਿਕ੍ਕਮ੍ਮ ਊਨਮਧਿਕਂ ਵਾ ਸਿਕ੍ਖਾਪਦਂ ਪਞ੍ਞਪੇਨ੍ਤਿ.
ਪਦਭਾਜਨੀਯਵਣ੍ਣਨਾ
੯੨. ਪੁਨਪਿ ‘‘ਆਗਨ੍ਤੁਕਾਮਾ’’ਤਿ ਵੁਤ੍ਤਤ੍ਤਾ ਚ ਸਬ੍ਬਥਾ ਮਨੁਸ੍ਸੇਹਿ ਅਨਿਵੁਤ੍ਥਪੁਬ੍ਬੇ ਅਭਿਨਵਮਾਪਿਤੇ, ‘‘ਪੁਨ ਨ ਪਵਿਸਿਸ੍ਸਾਮਾ’’ਤਿ ਨਿਰਾਲਯੇਹਿ ਪਰਿਚ੍ਚਤ੍ਤੇ ਚ ਗਾਮੇ ਗਾਮਵੋਹਾਰਾਭਾਵਾ ਗਾਮਪ੍ਪਵੇਸਨਾਪੁਚ੍ਛਨਾਦਿਕਿਚ੍ਚਂ ਨਤ੍ਥੀਤਿ ਵੇਦਿਤਬ੍ਬਂ. ਅਰਞ੍ਞਪਰਿਚ੍ਛੇਦਦਸ੍ਸਨਤ੍ਥਨ੍ਤਿ ਗਾਮਗਾਮੂਪਚਾਰੇਸੁ ਦਸ੍ਸਿਤੇਸੁ ਤਦਞ੍ਞਂ ਅਰਞ੍ਞਨ੍ਤਿ ਅਰਞ੍ਞਪਰਿਚ੍ਛੇਦੋ ਸਕ੍ਕਾ ਞਾਤੁਨ੍ਤਿ ਵੁਤ੍ਤਂ. ਮਾਤਿਕਾਯਂ ਪਨ ਗਾਮਗ੍ਗਹਣੇਨੇਵ ਗਾਮੂਪਚਾਰੋਪਿ ਗਹਿਤੋਤਿ ਦਟ੍ਠਬ੍ਬੋ. ਇਨ੍ਦਖੀਲੇਤਿ ਉਮ੍ਮਾਰੇ. ਅਰਞ੍ਞਸਙ੍ਖੇਪਂ ਗਚ੍ਛਤਿ ਤਥਾ ਅਭਿਧਮ੍ਮੇ ਵੁਤ੍ਤਤ੍ਤਾ. ਅਸਤਿਪਿ ਇਨ੍ਦਖੀਲੇ ਇਨ੍ਦਖੀਲਟ੍ਠਾਨਿਯਤ੍ਤਾ ‘‘ਵੇਮਜ੍ਝਮੇਵ ਇਨ੍ਦਖੀਲੋਤਿ ਵੁਚ੍ਚਤੀ’’ਤਿ ਵੁਤ੍ਤਂ. ਯਤ੍ਥ ਪਨ ਦ੍ਵਾਰਬਾਹਾਪਿ ਨਤ੍ਥਿ, ਤਤ੍ਥ ਪਾਕਾਰਵੇਮਜ੍ਝਮੇਵ ਇਨ੍ਦਖੀਲੋਤਿ ਗਹੇਤਬ੍ਬਂ. ਲੁਠਿਤ੍ਵਾਤਿ ਪਵਟ੍ਟਿਤ੍ਵਾ.
ਮਜ੍ਝਿਮਸ੍ਸ ਪੁਰਿਸਸ੍ਸ ਸੁਪ੍ਪਪਾਤੋ ਵਾਤਿਆਦਿ ਮਾਤੁਗਾਮਸ੍ਸ ਕਾਕੁਟ੍ਠਾਪਨਵਸੇਨ ਗਹੇਤਬ੍ਬਂ, ਨ ਬਲਦਸ੍ਸਨਵਸੇਨ ‘‘ਮਾਤੁਗਾਮੋ ਭਾਜਨਧੋਵਨਉਦਕਂ ਛਡ੍ਡੇਤੀ’’ਤਿ (ਪਾਰਾ. ਅਟ੍ਠ. ੧.੯੨) ਉਪਰਿ ਵੁਚ੍ਚਮਾਨਤ੍ਤਾ, ਤੇਨੇਵ ‘‘ਲੇਡ੍ਡੁਪਾਤੋ’’ਤਿ ਅਵਤ੍ਵਾ ਸੁਪ੍ਪਪਾਤੋਤਿਆਦਿ ਵੁਤ੍ਤਂ. ਕੁਰੁਨ੍ਦਟ੍ਠਕਥਾਯਂ ਮਹਾਪਚ੍ਚਰਿਯਞ੍ਚ ਘਰੂਪਚਾਰੋਵ ਗਾਮੋਤਿ ਅਧਿਪ੍ਪਾਯੇਨ ‘‘ਘਰੂਪਚਾਰੇ ਠਿਤਸ੍ਸ ਲੇਡ੍ਡੁਪਾਤੋ ਗਾਮੂਪਚਾਰੋ’’ਤਿ ਵੁਤ੍ਤਂ. ਕਤਪਰਿਕ੍ਖੇਪੋਤਿ ਇਮਿਨਾ ਪਰਿਕ੍ਖੇਪਤੋ ਬਹਿ ਉਪਚਾਰੋ ਨ ਗਹੇਤਬ੍ਬੋਤਿ ਦਸ੍ਸੇਤਿ. ਸੁਪ੍ਪਮੁਸਲਪਾਤੋਪਿ ਅਪਰਿਕ੍ਖਿਤ੍ਤਗੇਹਸ੍ਸੇਵ, ਸੋ ਚ ਯਤੋ ਪਹੋਤਿ, ਤਤ੍ਥੇਵ ਗਹੇਤਬ੍ਬੋ, ਅਪ੍ਪਹੋਨਟ੍ਠਾਨੇ ਪਨ ਵਿਜ੍ਜਮਾਨਟ੍ਠਾਨਮੇਵ ਗਹੇਤਬ੍ਬਂ. ਯਸ੍ਸ ਪਨ ਘਰਸ੍ਸ ਸਮਨ੍ਤਤੋ ਪਾਕਾਰਾਦੀਹਿ ਪਰਿਕ੍ਖੇਪੋ ਕਤੋ ਹੋਤਿ, ਤਤ੍ਥ ਸੋਵ ਪਰਿਕ੍ਖੇਪੋ ਘਰੂਪਚਾਰੋਤਿ ਗਹੇਤਬ੍ਬਂ.
ਪੁਬ੍ਬੇ ਵੁਤ੍ਤਨਯੇਨਾਤਿ ਪਰਿਕ੍ਖਿਤ੍ਤਗਾਮੇ ਵੁਤ੍ਤਨਯੇਨ. ਸਙ੍ਕਰੀਯਤੀਤਿ ਮਿਸ੍ਸੀਯਤਿ. ਵਿਕਾਲੇ ਗਾਮਪ੍ਪਵੇਸਨੇ ‘‘ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸ ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੫੧੩) ਵੁਤ੍ਤਤ੍ਤਾ ਗਾਮਗਾਮੂਪਚਾਰਾਨਂ ਅਸਙ੍ਕਰਤਾ ਇਚ੍ਛਿਤਬ੍ਬਾਤਿ ਆਹ ਅਸਙ੍ਕਰਤੋ ਚਾਤਿਆਦਿ. ਕੇਚਿ ਪਨੇਤ੍ਥ ਪਾਲ਼ਿਯਂ ‘‘ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸਾਤਿ ਇਦਂ ਪਰਿਕ੍ਖੇਪਾਰਹਟ੍ਠਾਨਂ ਸਨ੍ਧਾਯ ਵੁਤ੍ਤਂ, ਨ ਤਤੋ ਪਰਂ ਏਕਲੇਡ੍ਡੁਪਾਤਪਰਿਚ੍ਛਿਨ੍ਨਂ ਉਪਚਾਰਂ. ਤਸ੍ਮਾ ਪਰਿਕ੍ਖੇਪਾਰਹਟ੍ਠਾਨਸਙ੍ਖਾਤਂ ਗਾਮਂ ਓਕ੍ਕਮਨ੍ਤਸ੍ਸੇਵ ਆਪਤ੍ਤਿ, ਨ ਉਪਚਾਰ’’ਨ੍ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ‘‘ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਬ੍ਭਨ੍ਤਰਂ ਗਾਮੋ ਨਾਮ. ਤਤੋ ਅਞ੍ਞਸ੍ਸ ਲੇਡ੍ਡੁਪਾਤਸ੍ਸ ਅਬ੍ਭਨ੍ਤਰਂ ਗਾਮੂਪਚਾਰੋ ਨਾਮਾ’’ਤਿ (ਪਾਰਾ. ਅਟ੍ਠ. ੧.੯੨) ਇਧੇਵ ਅਟ੍ਠਕਥਾਯਂ ਵੁਤ੍ਤਤ੍ਤਾ. ਵਿਕਾਲੇ ਗਾਮਪ੍ਪਵੇਸਨਸਿਕ੍ਖਾਪਦਟ੍ਠਕਥਾਯਞ੍ਹਿ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰੋ ਅਦਿਨ੍ਨਾਦਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ (ਪਾਚਿ. ਅਟ੍ਠ. ੫੧੨) ਅਯਮੇਵ ਨਯੋ ਅਤਿਦਿਸਿਤੋ. ਤੇਨੇਵ ਮਾਤਿਕਾਟ੍ਠਕਥਾਯਮ੍ਪਿ ‘‘ਯ੍ਵਾਯਂ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰੋ ਦਸ੍ਸਿਤੋ, ਤਸ੍ਸ ਵਸੇਨ ਵਿਕਾਲੇ ਗਾਮਪ੍ਪਵੇਸਨਾਦੀਸੁ ਆਪਤ੍ਤਿ ਪਰਿਚ੍ਛਿਨ੍ਦਿਤਬ੍ਬਾ’’ਤਿ (ਕਙ੍ਖਾ. ਅਟ੍ਠ. ਦੁਤਿਯਪਾਰਾਜਿਕਵਣ੍ਣਨਾ) ਵੁਤ੍ਤਂ, ਤਸ੍ਮਾ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ, ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਘਰੂਪਚਾਰਤੋ ਪਟ੍ਠਾਯ ਦੁਤਿਯਲੇਡ੍ਡੁਪਾਤਸਙ੍ਖਾਤਂ ਗਾਮੂਪਚਾਰਂ ਓਕ੍ਕਮਨ੍ਤਸ੍ਸ ਵਿਕਾਲੇ ਗਾਮਪ੍ਪਵੇਸਨਾਪਤ੍ਤਿ ਹੋਤਿ, ਮਾਤਿਕਾਯਞ੍ਚ ਵਿਕਾਲੇ ਗਾਮਂ ਪਵਿਸੇਯ੍ਯਾਤਿ ਗਾਮਗ੍ਗਹਣੇਨੇਵ ਗਾਮੂਪਚਾਰੋਪਿ ਗਹਿਤੋਤਿ ਵੇਦਿਤਬ੍ਬਂ. ਵਿਕਾਲੇ ਗਾਮਪ੍ਪਵੇਸਨਾਦੀਸੂਤਿ ਆਦਿ-ਸਦ੍ਦੇਨ ਘਰਘਰੂਪਚਾਰਾਦੀਸੁ ਠਿਤਾਨਂ ਉਪ੍ਪਨ੍ਨਲਾਭਭਾਜਨਾਦਿਂ ਸਙ੍ਗਣ੍ਹਾਤਿ.
ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾਤਿ ਇਨ੍ਦਖੀਲਤੋ ਬਹਿ ਨਿਕ੍ਖਮਿਤ੍ਵਾ ਠਿਤਂ ਯਂ ਠਾਨਂ ਸਬ੍ਬਮੇਤਂ ਅਰਞ੍ਞਨ੍ਤਿ ਯੋਜਨਾ. ਆਚਰਿਯਧਨੁ ਨਾਮ ਪਕਤਿਹਤ੍ਥੇਨ ਨਵਵਿਦਤ੍ਥਿਪਮਾਣਂ, ਜਿਯਾਯ ਪਨ ਆਰੋਪਿਤਾਯ ਸਤ੍ਤਟ੍ਠਵਿਦਤ੍ਥਿਮਤ੍ਤਨ੍ਤਿ ਵਦਨ੍ਤਿ.
ਕਪ੍ਪਿਯਨ੍ਤਿ ਅਨੁਰੂਪਵਸੇਨ ਵੁਤ੍ਤਂ ਅਕਪ੍ਪਿਯਸ੍ਸਾਪਿ ਅਪ੍ਪਟਿਗ੍ਗਹਿਤਸ੍ਸ ਪਰਿਭੋਗੇ ਪਾਚਿਤ੍ਤਿਯਤ੍ਤਾ. ਪਰਿਚ੍ਚਾਗਾਦਿਮ੍ਹਿ ਅਕਤੇ ‘‘ਇਦਂ ਮਯ੍ਹਂ ਸਨ੍ਤਕ’’ਨ੍ਤਿ ਵਤ੍ਥੁਸਾਮਿਨਾ ਅਵਿਦਿਤਮ੍ਪਿ ਪਰਿਗ੍ਗਹਿਤਮੇਵ ਬਾਲੁਮ੍ਮਤ੍ਤਾਦੀਨਂ ਸਨ੍ਤਕਂ ਵਿਯ, ਤਾਦਿਸਂ ਅਵਹਰਨ੍ਤੋਪਿ ਞਾਤਕਾਦੀਹਿ ਪਚ੍ਛਾ ਞਤ੍ਵਾ ਵਤ੍ਥੁਸਾਮਿਨਾ ਚ ਅਨੁਬਨ੍ਧਿਤਬ੍ਬਤੋ ਪਾਰਾਜਿਕੋਵ ਹੋਤਿ. ਯਸ੍ਸ ਵਸੇਨ ਪੁਰਿਸੋ ਥੇਨੋ ਹੋਤਿ, ਤਂ ਥੇਯ੍ਯਨ੍ਤਿ ਆਹ ‘‘ਅਵਹਰਣਚਿਤ੍ਤਸ੍ਸੇਤਂ ਅਧਿਵਚਨ’’ਨ੍ਤਿ. ਪਪਞ੍ਚਸਙ੍ਖਾਤਿ ਤਣ੍ਹਾਮਾਨਦਿਟ੍ਠਿਸਙ੍ਖਾਤਾ ਪਪਞ੍ਚਕੋਟ੍ਠਾਸਾ. ਏਕੋ ਚਿਤ੍ਤਕੋਟ੍ਠਾਸੋਤਿ ਠਾਨਾਚਾਵਨਪਯੋਗਸਮੁਟ੍ਠਾਪਕੋ ਏਕੋ ਚਿਤ੍ਤਕੋਟ੍ਠਾਸੋਤਿ ਅਤ੍ਥੋ.
ਅਭਿਯੋਗਵਸੇਨਾਤਿ ਅਟ੍ਟਕਰਣਵਸੇਨ. ਸਵਿਞ੍ਞਾਣਕੇਨੇਵਾਤਿ ਇਦਂ ਸਵਿਞ੍ਞਾਣਕਾਨਞ੍ਞੇਵ ਆਵੇਣਿਕਵਿਨਿਚ੍ਛਯਂ ਸਨ੍ਧਾਯ ਵੁਤ੍ਤਂ. ਪਾਣੋ ਅਪਦਨ੍ਤਿਆਦੀਸੁ ਹਿ ‘‘ਪਦਸਾ ਨੇਸ੍ਸਾਮੀ’’ਤਿ ਪਠਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾਤਿਆਦਿਨਾ ਪਾਲ਼ਿਯਂ (ਪਾਰਾ. ੧੧੧), ਭਿਕ੍ਖੁ ਦਾਸਂ ਦਿਸ੍ਵਾ ਸੁਖਦੁਕ੍ਖਂ ਪੁਚ੍ਛਿਤ੍ਵਾ ਵਾ ਅਪੁਚ੍ਛਿਤ੍ਵਾ ਵਾ ‘‘ਗਚ੍ਛ, ਪਲਾਯਿਤ੍ਵਾ ਸੁਖਂ ਜੀਵਾ’’ਤਿ ਵਦਤਿ, ਸੋ ਚੇ ਪਲਾਯਤਿ, ਦੁਤਿਯਪਦਵਾਰੇ ਪਾਰਾਜਿਕਨ੍ਤਿਆਦਿਨਾ (ਪਾਰਾ. ਅਟ੍ਠ. ੧.੧੧੪) ਅਟ੍ਠਕਥਾਯਞ੍ਚ ਯੋ ਸਵਿਞ੍ਞਾਣਕਾਨਞ੍ਞੇਵ ਆਵੇਣਿਕੋ ਵਿਨਿਚ੍ਛਯੋ ਵੁਤ੍ਤੋ, ਸੋ ਆਰਾਮਾਦਿਅਵਿਞ੍ਞਾਣਕੇਸੁ ਨ ਲਬ੍ਭਤੀਤਿ ਤਾਦਿਸਂ ਸਨ੍ਧਾਯ ‘‘ਸਵਿਞ੍ਞਾਣਕੇਨੇਵਾ’’ਤਿ ਵੁਤ੍ਤਂ. ਯੋ ਪਨ ਵਿਨਿਚ੍ਛਯੋ ਆਰਾਮਾਦਿਅਵਿਞ੍ਞਾਣਕੇਸੁ ਲਬ੍ਭਤਿ, ਸੋ ਯਸ੍ਮਾ ਸਵਿਞ੍ਞਾਣਕੇਸੁ ਅਲਬ੍ਭਨਕੋ ਨਾਮ ਨਤ੍ਥਿ, ਤਸ੍ਮਾ ਵੁਤ੍ਤਂ ‘‘ਨਾਨਾਭਣ੍ਡਵਸੇਨ ਸਵਿਞ੍ਞਾਣਕਾਵਿਞ੍ਞਾਣਕਮਿਸ੍ਸਕੇਨਾ’’ਤਿ. ਸਵਿਞ੍ਞਾਣਕੇਨ ਚ ਅਵਿਞ੍ਞਾਣਕੇਨ ਚਾਤਿ ਅਤ੍ਥੋ. ਯਸ੍ਮਾ ਚੇਤ੍ਥ ਅਵਿਞ੍ਞਾਣਕੇਨੇਵ ਆਦਿਯਨਾਦੀਨਿ ਛਪਿ ਪਦਾਨਿ ਨ ਸਕ੍ਕਾ ਯੋਜੇਤੁਂ ਇਰਿਯਾਪਥਵਿਕੋਪਨਸ੍ਸ ਸਵਿਞ੍ਞਾਣਕਵਸੇਨੇਵ ਯੋਜੇਤਬ੍ਬਤੋ, ਤਸ੍ਮਾ ‘‘ਅਵਿਞ੍ਞਾਣਕੇਨੇਵਾ’’ਤਿ ਤਤਿਯਂ ਪਕਾਰਂ ਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.
ਆਰਾਮਨ੍ਤਿ ਇਦਂ ਉਪਲਕ੍ਖਣਮਤ੍ਤਂ ਦਾਸਾਦਿਸਵਿਞ੍ਞਾਣਕਸ੍ਸਾਪਿ ਇਧ ਸਙ੍ਗਹੇਤਬ੍ਬਤੋ, ਨਾਨਾਭਣ੍ਡਵਸੇਨ ਹੇਤ੍ਥ ਯੋਜਨਾ ਦਸ੍ਸਿਯਤਿ. ਪਰਿਕਪ੍ਪਿਤਟ੍ਠਾਨਨ੍ਤਿ ਪਰਿਕਪ੍ਪਿਤੋਕਾਸਂ. ਸੁਙ੍ਕਘਾਤਨ੍ਤਿ ਏਤ੍ਥ ਮਗ੍ਗਂ ਗਚ੍ਛਨ੍ਤੇਹਿ ਸਤ੍ਥਿਕੇਹਿ ਅਤ੍ਤਨਾ ਨੀਯਮਾਨਭਣ੍ਡਤੋ ਰਞ੍ਞੋ ਦਾਤਬ੍ਬਭਾਗੋ ਸੁਙ੍ਕੋ ਨਾਮ, ਸੋ ਏਤ੍ਥ ਹਞ੍ਞਤਿ ਅਦਤ੍ਵਾ ਗਚ੍ਛਨ੍ਤੇਹਿ ਅਵਹਰੀਯਤਿ, ਤਂ ਵਾ ਹਨ੍ਤਿ ਏਤ੍ਥ ਰਾਜਪੁਰਿਸਾ ਅਦਦਨ੍ਤਾਨਂ ਸਨ੍ਤਕਂ ਬਲਕ੍ਕਾਰੇਨਾਤਿ ਸੁਙ੍ਕਘਾਤੋ, ‘‘ਏਤ੍ਥ ਪਵਿਟ੍ਠੇਹਿ ਸੁਙ੍ਕੋ ਦਾਤਬ੍ਬੋ’’ਤਿ ਰੁਕ੍ਖਪਬ੍ਬਤਾਦਿਸਞ੍ਞਾਣੇਨ ਨਿਯਮਿਤਪ੍ਪਦੇਸਸ੍ਸੇਤਂ ਅਧਿਵਚਨਂ.
ਪਞ੍ਚਵੀਸਤਿਅਵਹਾਰਕਥਾਵਣ੍ਣਨਾ
ਕਤ੍ਥਚੀਤਿ ਏਕਿਸ੍ਸਾ ਅਟ੍ਠਕਥਾਯਂ. ਏਕਂ ਪਞ੍ਚਕਂ ਦਸ੍ਸਿਤਨ੍ਤਿ ‘‘ਪਰਪਰਿਗ੍ਗਹਿਤਞ੍ਚ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ, ਠਾਨਾ ਚਾਵੇਤੀ’’ਤਿ (ਪਾਰਾ. ੧੨੨) ਵੁਤ੍ਤਪਞ੍ਚਅਵਹਾਰਙ੍ਗਾਨਿ ਏਕਂ ਪਞ੍ਚਕਨ੍ਤਿ ਦਸ੍ਸਿਤਂ. ਦ੍ਵੇ ਪਞ੍ਚਕਾਨਿ ਦਸ੍ਸਿਤਾਨੀਤਿ ‘‘ਛਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ. ਨ ਚ ਸਕਸਞ੍ਞੀ, ਨ ਚ ਵਿਸ੍ਸਾਸਗ੍ਗਾਹੀ, ਨ ਚ ਤਾਵਕਾਲਿਕਂ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ, ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੨੫) ਏਵਂ ਵੁਤ੍ਤੇਸੁ ਛਸੁ ਪਦੇਸੁ ਏਕਂ ਅਪਨੇਤ੍ਵਾ ਸੇਸਾਨਿ ਪਞ੍ਚ ਪਦਾਨਿ ਏਕਂ ਪਞ੍ਚਕਂ ਕਤ੍ਵਾ ਹੇਟ੍ਠਾ ਵੁਤ੍ਤਪਞ੍ਚਕਞ੍ਚ ਗਹੇਤ੍ਵਾ ਦ੍ਵੇ ਪਞ੍ਚਕਾਨਿ ਦਸ੍ਸਿਤਾਨਿ. ਏਤ੍ਥ ਪਨਾਤਿ ਪਞ੍ਚਹਾਕਾਰੇਹੀਤਿਆਦੀਸੁ. ਸਬ੍ਬੇਹਿਪਿ ਪਦੇਹੀਤਿ ਪਰਪਰਿਗ੍ਗਹਿਤਞ੍ਚ ਹੋਤੀਤਿਆਦੀਹਿ ਸਬ੍ਬੇਹਿ ਪਞ੍ਚਹਿ ਪਦੇਹਿ.
ਪਞ੍ਚਨ੍ਨਂ ਅਵਹਾਰਾਨਂ ਸਮੂਹੋ ਪਞ੍ਚਕਂ. ਸਕੋ ਹਤ੍ਥੋ ਸਹਤ੍ਥੋ, ਤੇਨ ਨਿਬ੍ਬਤ੍ਤੋ, ਤਸ੍ਸ ਵਾ ਸਮ੍ਬਨ੍ਧੀਤਿ ਸਾਹਤ੍ਥਿਕੋ, ਅਵਹਾਰੋ. ਸਾਹਤ੍ਥਿਕਾਦਿ ਪਞ੍ਚਕਂ ਸਾਹਤ੍ਥਿਕਪਞ੍ਚਕਨ੍ਤਿਆਦਿਪਦਵਸੇਨ ਨਾਮਲਾਭੋ ਦਟ੍ਠਬ੍ਬੋ. ਏਵਂ ਸੇਸੇਸੁਪਿ. ਤਤਿਯਪਞ੍ਚਮੇਸੁ ਪਞ੍ਚਕੇਸੂਤਿ ਸਾਹਤ੍ਥਿਕਪਞ੍ਚਕਥੇਯ੍ਯਾਵਹਾਰਪਞ੍ਚਕੇਸੁ. ਲਬ੍ਭਮਾਨਪਦਵਸੇਨਾਤਿ ਸਾਹਤ੍ਥਿਕਪਞ੍ਚਕੇ ਲਬ੍ਭਮਾਨਸ੍ਸ ਨਿਸ੍ਸਗ੍ਗਿਯਾਵਹਾਰਪਦਸ੍ਸ ਵਸੇਨ, ਥੇਯ੍ਯਾਵਹਾਰਪਞ੍ਚਕੇ ਲਬ੍ਭਮਾਨਸ੍ਸ ਪਰਿਕਪ੍ਪਾਵਹਾਰਪਦਸ੍ਸ ਚ ਵਸੇਨ ਯੋਜੇਤਬ੍ਬਨ੍ਤਿ ਅਤ੍ਥੋ.
ਨਿਸ੍ਸਗ੍ਗਿਯੋ ਨਾਮ…ਪੇ… ਪਾਰਾਜਿਕਸ੍ਸਾਤਿ ਇਮਿਨਾ ਬਹਿਸੁਙ੍ਕਘਾਤਪਾਤਨਂ ਨਿਸ੍ਸਗ੍ਗਿਯਪਯੋਗੋਤਿ ਦਸ੍ਸੇਤਿ. ‘‘ਹਤ੍ਥੇ ਭਾਰਂ ਥੇਯ੍ਯਚਿਤ੍ਤੋ ਭੂਮਿਯਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੦੧) ਵੁਤ੍ਤਤ੍ਤਾ ਪਨ ਸੁਦ੍ਧਚਿਤ੍ਤੇਨ ਗਹਿਤਪਰਭਣ੍ਡਸ੍ਸ ਥੇਯ੍ਯਚਿਤ੍ਤੇਨ ਗੁਮ੍ਬਾਦਿਪਟਿਚ੍ਛਨ੍ਨਟ੍ਠਾਨੇ ਖਿਪਨਮ੍ਪਿ ਇਮਸ੍ਮਿਂ ਨਿਸ੍ਸਗ੍ਗਿਯਪਯੋਗੇ ਸਙ੍ਗਯ੍ਹਤੀਤਿ ਦਟ੍ਠਬ੍ਬਂ. ਕਿਰਿਯਾਸਿਦ੍ਧਿਤੋ ਪੁਰੇਤਰਮੇਵ ਪਾਰਾਜਿਕਾਪਤ੍ਤਿਸਙ੍ਖਾਤਂ ਅਤ੍ਥਂ ਸਾਧੇਤੀਤਿ ਅਤ੍ਥਸਾਧਕੋ. ਅਥ ਵਾ ਅਤ੍ਤਨੋ ਵਤ੍ਤਮਾਨਕ੍ਖਣੇ ਅਵਿਜ੍ਜਮਾਨਮ੍ਪਿ ਕਿਰਿਯਾਸਿਦ੍ਧਿਸਙ੍ਖਾਤਂ ਅਤ੍ਥਂ ਅਵਸ੍ਸਂ ਆਪਤ੍ਤਿਂ ਸਾਧੇਤੀਤਿਪਿ ਅਤ੍ਥਸਾਧਕੋ. ਅਸੁਕਂ ਨਾਮ ਭਣ੍ਡਂ ਯਦਾ ਸਕ੍ਕੋਸੀਤਿ ਇਦਂ ਨਿਦਸ੍ਸਨਮਤ੍ਤਂ ਪਰਸ੍ਸ ਤੇਲਕੁਮ੍ਭਿਯਾ ਉਪਾਹਨਾਦੀਨਂ ਨਿਕ੍ਖੇਪਪਯੋਗਸ੍ਸਾਪਿ ਅਤ੍ਥਸਾਧਕਤ੍ਤਾ. ਤਥਾ ਹਿ ਵੁਤ੍ਤਂ ਮਾਤਿਕਾਟ੍ਠਕਥਾਯਂ –
‘‘ਅਤ੍ਥਸਾਧਕੋ ਨਾਮ ‘ਅਸੁਕਸ੍ਸ ਭਣ੍ਡਂ ਯਦਾ ਸਕ੍ਕੋਤਿ, ਤਦਾ ਤਂ ਅਵਹਰਾ’ਤਿ ਅਞ੍ਞਂ ਆਣਾਪੇਤਿ. ਤਤ੍ਥ ਸਚੇ ਪਰੋ ਅਨਨ੍ਤਰਾਯਿਕੋ ਹੁਤ੍ਵਾ ਤਂ ਅਵਹਰਤਿ, ਆਣਾਪਕਸ੍ਸ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕਂ. ਪਰਸ੍ਸ ਵਾ ਪਨ ਤੇਲਕੁਮ੍ਭਿਯਾ ਪਾਦਗ੍ਘਨਕਤੇਲਂ ਅਵਸ੍ਸਂ ਪਿਵਨਕਾਨਿ ਉਪਾਹਨਾਦੀਨਿ ਪਕ੍ਖਿਪਤਿ, ਹਤ੍ਥਤੋ ਮੁਤ੍ਤਮਤ੍ਤੇਯੇਵ ਪਾਰਾਜਿਕ’’ਨ੍ਤਿ (ਕਙ੍ਖਾ. ਅਟ੍ਠ. ਦੁਤਿਯਪਾਰਾਜਿਕਵਣ੍ਣਨਾ).
ਇਮਸ੍ਸ ਅਤ੍ਥਸਾਧਕਸ੍ਸ ਆਣਤ੍ਤਿਯਾ ਚ ਕੋ ਵਿਸੇਸੋਤਿ? ਤਙ੍ਖਣਞ੍ਞੇਵ ਗਹਣੇ ਨਿਯੁਞ੍ਜਨਂ ਆਣਤ੍ਤਿਕਪਯੋਗੋ, ਕਾਲਨ੍ਤਰੇਨ ਗਹਣਤ੍ਥਂ ਨਿਯੋਗੋ ਅਤ੍ਥਸਾਧਕੋਤਿ ਅਯਂ ਨੇਸਂ ਵਿਸੇਸੋ. ਤੇਨੇਵਾਹ ‘‘ਅਸੁਕਂ ਨਾਮ ਭਣ੍ਡਂ ਯਦਾ ਸਕ੍ਕੋਸੀ’’ਤਿਆਦਿ. ਧੁਰਨਿਕ੍ਖੇਪੋ ਪਨ ਉਪਨਿਕ੍ਖਿਤ੍ਤਭਣ੍ਡਵਸੇਨ ਵੇਦਿਤਬ੍ਬੋਤਿ ਇਦਂ ਨਿਦਸ੍ਸਨਮਤ੍ਤਂ, ਆਰਾਮਾਭਿਯੁਞ੍ਜਨਾਦੀਸੁਪਿ ਤਾਵਕਾਲਿਕਭਣ੍ਡਦੇਯ੍ਯਾਨਂ ਅਦਾਨੇਪਿ ਏਸੇਵ ਨਯੋ. ਭਣ੍ਡਗ੍ਗਹਣਪ੍ਪਯੋਗਤੋ ਆਣਤ੍ਤਿਯਾ ਪੁਬ੍ਬਤ੍ਤਾ ਆਹ ‘‘ਆਣਤ੍ਤਿਵਸੇਨ ਪੁਬ੍ਬਪਯੋਗੋ ਵੇਦਿਤਬ੍ਬੋ’’ਤਿ. ਪਯੋਗੇਨ ਸਹ ਵਤ੍ਤਮਾਨੋ ਅਵਹਾਰੋ ਸਹਪਯੋਗੋਤਿ ਆਹ ‘‘ਠਾਨਾਚਾਵਨਵਸੇਨਾ’’ਤਿ, ਇਦਞ੍ਚ ਨਿਦਸ੍ਸਨਮਤ੍ਤਂ ਖੀਲਸਙ੍ਕਮਨਾਦੀਸੁਪਿ ਅਸਤਿ ਠਾਨਾਚਾਵਨੇ ਸਹਪਯੋਗਤ੍ਤਾ. ਵੁਤ੍ਤਞ੍ਹਿ ਮਾਤਿਕਾਟ੍ਠਕਥਾਯਂ ‘‘ਠਾਨਾਚਾਵਨਵਸੇਨ ਖੀਲਾਦੀਨਿ ਸਙ੍ਕਾਮੇਤ੍ਵਾ ਖੇਤ੍ਤਾਦਿਗ੍ਗਹਣਵਸੇਨ ਚ ਸਹਪਯੋਗੋ ਵੇਦਿਤਬ੍ਬੋ’’ਤਿ (ਕਙ੍ਖਾ. ਅਟ੍ਠ. ਦੁਤਿਯਪਾਰਾਜਿਕਵਣ੍ਣਨਾ).
ਤੁਲਯਿਤ੍ਵਾਤਿ ਉਪਪਰਿਕ੍ਖਿਤ੍ਵਾ. ਸਾਮੀਚੀਤਿ ਵਤ੍ਤਂ. ਸਕਸਞ੍ਞਾਯ ਅਦੇਨ੍ਤਸ੍ਸ ਆਪਤ੍ਤਿ ਨਤ੍ਥੀਤਿ ਵਦਨ੍ਤਿ. ਸਮ੍ਮਦ੍ਦੋਤਿ ਨਿਵਿਦ੍ਧਤਾਸਙ੍ਖੋਭੋ. ਭਟ੍ਠੇ ਜਨਕਾਯੇਤਿ ਅਪਗਤੇ ਜਨਸਮੂਹੇ. ਅਤ੍ਤਨੋ ਸਨ੍ਤਕਂ ਕਤ੍ਵਾ ਏਤਸ੍ਸੇਵ ਭਿਕ੍ਖੁਨੋ ਦੇਹੀਤਿ ਇਦਂ ਉਭਿਨ੍ਨਮ੍ਪਿ ਕੁਕ੍ਕੁਚ੍ਚਵਿਨੋਦਨਤ੍ਥਂ ਵੁਤ੍ਤਂ. ਅਵਹਾਰਕਸ੍ਸ ਹਿ ‘‘ਮਯਾ ਸਹਤ੍ਥੇਨ ਨ ਦਿਨ੍ਨਂ, ਭਣ੍ਡਦੇਯ੍ਯਂ ਏਤ’’ਨ੍ਤਿ ਕੁਕ੍ਕੁਚ੍ਚਂ ਉਪ੍ਪਜ੍ਜੇਯ੍ਯ, ਇਤਰਸ੍ਸ ਚ ‘‘ਮਯਾ ਪਠਮਂ ਧੁਰਨਿਕ੍ਖੇਪਂ ਕਤ੍ਵਾ ਪਚ੍ਛਾ ਅਦਿਨ੍ਨਂ ਗਹਿਤ’’ਨ੍ਤਿ ਕੁਕ੍ਕੁਚ੍ਚਂ ਉਪ੍ਪਜ੍ਜੇਯ੍ਯਾਤਿ.
ਸਮਗ੍ਘਨ੍ਤਿ ਅਪ੍ਪਗ੍ਘਂ. ਦਾਰੁਅਤ੍ਥਂ ਫਰਤੀਤਿ ਦਾਰੂਹਿ ਕਤ੍ਤਬ੍ਬਕਿਚ੍ਚਂ ਸਾਧੇਤਿ. ਏਕਦਿਵਸਂ ਦਨ੍ਤਕਟ੍ਠਚ੍ਛੇਦਨਾਦਿਨਾ ਯਾ ਅਯਂ ਅਗ੍ਘਹਾਨਿ ਵੁਤ੍ਤਾ, ਸਾ ਸਬ੍ਬਾ ਭਣ੍ਡਸਾਮਿਨਾ ਕਿਣਿਤ੍ਵਾ ਗਹਿਤਮੇਵ ਸਨ੍ਧਾਯ ਵੁਤ੍ਤਾ. ਸਬ੍ਬਂ ਪਨੇਤਂ ਅਟ੍ਠਕਥਾਚਰਿਯਪ੍ਪਮਾਣੇਨ ਵੇਦਿਤਬ੍ਬਂ. ਪਾਸਾਣਞ੍ਚ ਸਕ੍ਖਰਞ੍ਚ ਪਾਸਾਣਸਕ੍ਖਰਂ.
ਅਕ੍ਖਦਸ੍ਸਾਤਿ ਏਤ੍ਥ ਅਕ੍ਖ-ਸਦ੍ਦੇਨ ਕਿਰ ਵਿਨਿਚ੍ਛਯਸਾਲਾ ਵੁਚ੍ਚਤਿ, ਤਤ੍ਥ ਨਿਸੀਦਿਤ੍ਵਾ ਵਜ੍ਜਾਵਜ੍ਜਂ ਨਿਰੂਪਯਨ੍ਤੀਤਿ ‘‘ਅਕ੍ਖਦਸ੍ਸਾ’’ਤਿ ਵੁਚ੍ਚਨ੍ਤਿ ਧਮ੍ਮਵਿਨਿਚ੍ਛਨਕਾ. ਹਨਨਂ ਨਾਮ ਹਤ੍ਥਪਾਦਾਦੀਹਿ ਪੋਥਨਞ੍ਚੇਵ ਹਤ੍ਥਨਾਸਾਦਿਚ੍ਛੇਦਨਞ੍ਚ ਹੋਤੀਤਿ ਆਹ ‘‘ਹਨੇਯ੍ਯੁਨ੍ਤਿ ਪੋਥੇਯ੍ਯੁਞ੍ਚੇਵ ਛਿਨ੍ਦੇਯ੍ਯੁਞ੍ਚਾ’’ਤਿ.
ਪਦਭਾਜਨੀਯਞ੍ਚ ‘‘ਹਤ੍ਥੇਨ ਵਾ ਪਾਦੇਨ ਵਾ ਕਸਾਯ ਵਾ ਵੇਤ੍ਤੇਨ ਵਾ ਅਡ੍ਢਦਣ੍ਡਕੇਨ ਵਾ ਛਜ੍ਜਾਯ ਵਾ ਹਨੇਯ੍ਯੁ’’ਨ੍ਤਿ (ਪਾਰਾ. ੯੨) ਵੁਤ੍ਤਂ. ਤਤ੍ਥ ਅਡ੍ਢਦਣ੍ਡਕੇਨਾਤਿ ਦ੍ਵਿਹਤ੍ਥਪ੍ਪਮਾਣੇਨ ਰਸ੍ਸਮੁਗ੍ਗਰੇਨ, ਵੇਲ਼ੁਪੇਸਿਕਾਯ ਵਾ. ਛੇਜ੍ਜਾਯ ਵਾਤਿ ਹਤ੍ਥਾਦੀਨਂ ਛੇਦਨੇਨ. ਛਿਨ੍ਦਨ੍ਤਿ ਏਤਾਯ ਹਤ੍ਥਪਾਦਾਦੀਨੀਤਿ ਛੇਜ੍ਜਾ, ਸਤ੍ਥਂ, ਤੇਨ ਸਤ੍ਥੇਨਾਤਿਪਿ ਅਤ੍ਥੋ. ਨੀਹਰੇਯ੍ਯੁਨ੍ਤਿ ਰਟ੍ਠਤੋ ਨੀਹਰੇਯ੍ਯੁਂ. ‘‘ਚੋਰੋਸਿ…ਪੇ… ਥੇਨੋਸੀ’’ਤਿ ਏਤ੍ਥ ਪਰਿਭਾਸੇਯ੍ਯੁਨ੍ਤਿ ਪਦਂ ਅਜ੍ਝਾਹਰਿਤ੍ਵਾ ਅਤ੍ਥੋ ਵੇਦਿਤਬ੍ਬੋਤਿ ਆਹ ‘‘ਚੋਰੋਸਿ…ਪੇ… ਪਰਿਭਾਸੇਯ੍ਯੁ’’ਨ੍ਤਿ. ਯਂ ਤਂ ਭਣ੍ਡਂ ਦਸ੍ਸਿਤਨ੍ਤਿ ਸਮ੍ਬਨ੍ਧੋ.
੯੩. ਯਤ੍ਥ ਯਤ੍ਥ ਠਿਤਨ੍ਤਿ ਭੂਮਿਯਾਦੀਸੁ ਯਤ੍ਥ ਯਤ੍ਥ ਠਿਤਂ. ਯਥਾ ਯਥਾ ਆਦਾਨਂ ਗਚ੍ਛਤੀਤਿ ਯੇਨ ਯੇਨ ਆਕਾਰੇਨ ਗਹਣਂ ਉਪਗਚ੍ਛਤਿ.
ਭੂਮਟ੍ਠਕਥਾਵਣ੍ਣਨਾ
੯੪. ਵਾਚਾਯ ਵਾਚਾਯਾਤਿ ਏਕੇਕਤ੍ਥਦੀਪਿਕਾਯ ਵਾਚਾਯ ਵਾਚਾਯ. ਉਪਲਦ੍ਧੋਤਿ ਞਾਤੋ. ਪਾਲ਼ਿਯਂ ਸੇਸਅਟ੍ਠਕਥਾਸੁ ਚ ਕੁਦਾਲਂ ਵਾ ਪਿਟਕਂ ਵਾਤਿ ਇਦਮੇਵ ਦ੍ਵਯਂ ਵਤ੍ਵਾ ਵਾਸਿਫਰਸੂਨਂ ਅਵੁਤ੍ਤਤ੍ਤਾ ਤੇਸਮ੍ਪਿ ਸਙ੍ਖੇਪਟ੍ਠਕਥਾਦੀਸੁ ਆਗਤਭਾਵਂ ਦਸ੍ਸੇਤੁਂ ਸਙ੍ਖੇਪਟ੍ਠਕਥਾਯਨ੍ਤਿਆਦਿ ਵੁਤ੍ਤਂ. ਥੇਯ੍ਯਚਿਤ੍ਤੇਨ ਕਤਤ੍ਤਾ ‘‘ਦੁਕ੍ਕਟੇਹਿ ਸਦ੍ਧਿਂ ਪਾਚਿਤ੍ਤਿਯਾਨੀ’’ਤਿ ਵੁਤ੍ਤਂ.
ਅਟ੍ਠਵਿਧਂ ਹੇਤਨ੍ਤਿਆਦੀਸੁ ਏਤਂ ਦੁਕ੍ਕਟਂ ਨਾਮ ਥੇਰੇਹਿ ਧਮ੍ਮਸਙ੍ਗਾਹਕੇਹਿ ਇਮਸ੍ਮਿਂ ਠਾਨੇ ਸਮੋਧਾਨੇਤ੍ਵਾ ਅਟ੍ਠਵਿਧਨ੍ਤਿ ਦਸ੍ਸਿਤਨ੍ਤਿ ਯੋਜਨਾ. ਸਬ੍ਬੇਸਮ੍ਪਿ ਦੁਕ੍ਕਟਾਨਂ ਇਮੇਸੁਯੇਵ ਅਟ੍ਠਸੁ ਸਙ੍ਗਹੇਤਬ੍ਬਭਾਵਤੋ ਪਨ ਇਤਰੇਹਿ ਸਤ੍ਤਹਿ ਦੁਕ੍ਕਟੇਹਿ ਵਿਨਿਮੁਤ੍ਤਂ ਵਿਨਯਦੁਕ੍ਕਟੇਯੇਵ ਸਙ੍ਗਹੇਤਬ੍ਬਂ. ਦਸਵਿਧਂ ਰਤਨਨ੍ਤਿ ‘‘ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਰਜਤਂ ਜਾਤਰੂਪਂ ਲੋਹਿਤਕੋ ਮਸਾਰਗਲ੍ਲ’’ਨ੍ਤਿ ਏਵਮਾਗਤਂ ਦਸਵਿਧਂ ਰਤਨਂ.
‘‘ਮੁਤ੍ਤਾ ਮਣਿ ਵੇਲ਼ੁਰਿਯੋ ਚ ਸਙ੍ਖੋ,
ਸਿਲਾ ਪਵਾਲ਼ਂ ਰਜਤਞ੍ਚ ਹੇਮਂ;
ਲੋਹਿਤਕਞ੍ਚ ਮਸਾਰਗਲ੍ਲਂ,
ਦਸੇਤੇ ਧੀਰੋ ਰਤਨਾਨਿ ਜਞ੍ਞਾ’’ਤਿ. –
ਹਿ ਵੁਤ੍ਤਂ. ਸਤ੍ਤਵਿਧਂ ਧਞ੍ਞਨ੍ਤਿ ਸਾਲਿ ਵੀਹਿ ਯਵੋ ਕਙ੍ਗੁ ਕੁਦ੍ਰੂਸਂ ਵਰਕੋ ਗੋਧੁਮੋਤਿ ਇਮਂ ਸਤ੍ਤਵਿਧਂ ਧਞ੍ਞਂ. ਆਵੁਧਭਣ੍ਡਾਦਿਨ੍ਤਿ ਆਦਿ-ਸਦ੍ਦੇਨ ਤੁਰਿਯਭਣ੍ਡਇਤ੍ਥਿਰੂਪਾਦਿਂ ਸਙ੍ਗਣ੍ਹਾਤਿ. ਅਨਾਮਸਿਤਬ੍ਬੇ ਵਤ੍ਥੁਮ੍ਹਿ ਦੁਕ੍ਕਟਂ ਅਨਾਮਾਸਦੁਕ੍ਕਟਂ. ਦੁਰੂਪਚਿਣ੍ਣਦੁਕ੍ਕਟਨ੍ਤਿ ‘‘ਅਕਤ੍ਤਬ੍ਬ’’ਨ੍ਤਿ ਵਾਰਿਤਸ੍ਸ ਕਤਤ੍ਤਾ ਦੁਟ੍ਠੁ ਉਪਚਿਣ੍ਣਂ ਚਰਿਤਨ੍ਤਿ ਦੁਰੂਪਚਿਣ੍ਣਂ, ਤਸ੍ਮਿਂ ਦੁਕ੍ਕਟਂ ਦੁਰੂਪਚਿਣ੍ਣਦੁਕ੍ਕਟਂ. ਵਿਨਯੇ ਪਞ੍ਞਤ੍ਤਂ ਅਵਸੇਸਂ ਦੁਕ੍ਕਟਂ ਵਿਨਯਦੁਕ੍ਕਟਂ. ਏਕਾਦਸ ਸਮਨੁਭਾਸਨਾ ਨਾਮ ਭਿਕ੍ਖੁਪਾਤਿਮੋਕ੍ਖੇ ਚਤ੍ਤਾਰੋ ਯਾਵਤਤਿਯਕਾ ਸਙ੍ਘਾਦਿਸੇਸਾ ਅਰਿਟ੍ਠਸਿਕ੍ਖਾਪਦਨ੍ਤਿ ਪਞ੍ਚ, ਭਿਕ੍ਖੁਨੀਪਾਤਿਮੋਕ੍ਖੇ ਏਕਂ ਯਾਵਤਤਿਯਕਪਾਰਾਜਿਕਂ ਚਤ੍ਤਾਰੋ ਸਙ੍ਘਾਦਿਸੇਸਾ ਚਣ੍ਡਕਾਲ਼ੀਸਿਕ੍ਖਾਪਦਨ੍ਤਿ ਛ.
ਸਹਪਯੋਗਤੋ ਪਟ੍ਠਾਯ ਚੇਤ੍ਥ ਪੁਰਿਮਪੁਰਿਮਾ ਆਪਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤੀਤਿ ਆਹ ਅਥ ਧੁਰਨਿਕ੍ਖੇਪਂ ਅਕਤ੍ਵਾਤਿਆਦਿ. ‘‘ਧੁਰਨਿਕ੍ਖੇਪਂ ਅਕਤ੍ਵਾ’’ਤਿ ਵੁਤ੍ਤਤ੍ਤਾ ਧੁਰਨਿਕ੍ਖੇਪਂ ਕਤ੍ਵਾ ਪੁਨ ਖਣਨ੍ਤਸ੍ਸ ਪੁਰਿਮਾਪਤ੍ਤਿਯੋ ਨ ਪਟਿਪ੍ਪਸ੍ਸਮ੍ਭਨ੍ਤੀਤਿ ਵਦਨ੍ਤਿ. ‘‘ਛੇਦਨਪਚ੍ਚਯਾ ਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤੀ’’ਤਿ ਵਤ੍ਵਾ ਪੁਬ੍ਬਪਯੋਗੇ ਆਪਤ੍ਤੀਨਂ ਦੇਸੇਤਬ੍ਬਤਾਯ ਅਵੁਤ੍ਤਤ੍ਤਾ ਸਹਪਯੋਗੇ ਪਤ੍ਤੇ ਪੁਬ੍ਬਪਯੋਗੇ ਆਪਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤੀਤਿ ਵੇਦਿਤਬ੍ਬਂ.
ਅਪਰਦ੍ਧਂ ਵਿਰਦ੍ਧਂ ਖਲਿਤਨ੍ਤਿ ਸਬ੍ਬਮੇਤਂ ਯਞ੍ਚ ਦੁਕ੍ਕਟਨ੍ਤਿ ਏਤ੍ਥ ਵੁਤ੍ਤਸ੍ਸ ਦੁਕ੍ਕਟਸ੍ਸ ਪਰਿਯਾਯਵਚਨਂ, ਯਂ ਮਨੁਸ੍ਸੋ ਕਰੇਤਿਆਦਿ ਪਨੇਤ੍ਥ ਓਪਮ੍ਮਨਿਦਸ੍ਸਨਂ. ਸਂਯੋਗਭਾਵੋਤਿ ਦ੍ਵਿਤ੍ਤਂ ਸਨ੍ਧਾਯ ਵੁਤ੍ਤਂ, ਤੇਨ ਰਸ੍ਸਤ੍ਤਸ੍ਸਾਪਿ ਨਿਮਿਤ੍ਤਂ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਏਕਸ੍ਸ ਮੂਲੇਤਿ ਏਕਸ੍ਸ ਸਨ੍ਤਿਕੇ. ਸਬ੍ਬਤ੍ਥਾਪਿ ਆਮਸਨੇ ਦੁਕ੍ਕਟਂ, ਫਨ੍ਦਾਪਨੇ ਥੁਲ੍ਲਚ੍ਚਯਞ੍ਚ ਵਿਸੁਂ ਵਿਸੁਂ ਆਮਸਨਫਨ੍ਦਾਪਨਪਯੋਗਂ ਕਰੋਨ੍ਤਸ੍ਸੇਵ ਹੋਤਿ, ਏਕਪਯੋਗੇਨ ਗਣ੍ਹਨ੍ਤਸ੍ਸ ਪਨ ਉਦ੍ਧਾਰੇ ਪਾਰਾਜਿਕਮੇਵ, ਨ ਦੁਕ੍ਕਟਥੁਲ੍ਲਚ੍ਚਯਾਨੀਤਿ ਵਦਨ੍ਤਿ, ਏਕਪਯੋਗੇਨ ਗਣ੍ਹਨ੍ਤਸ੍ਸਾਪਿ ਆਮਸਨਫਨ੍ਦਾਪਨਾਨਮ੍ਪਿ ਲਬ੍ਭਮਾਨਤ੍ਤਾ ਤਂ ਨ ਗਹੇਤਬ੍ਬਂ. ਨ ਹਿ ਸਕ੍ਕਾ ਅਨਾਮਸਿਤ੍ਵਾ ਅਫਨ੍ਦਾਪੇਤ੍ਵਾ ਚ ਕਿਞ੍ਚਿ ਗਹੇਤੁਂ. ‘‘ਏਕਮੇਵ ਦੇਸੇਤ੍ਵਾ ਮੁਚ੍ਚਤੀ’’ਤਿ ਪਂਸੁਖਣਨਾਦਿਸਮਾਨਪਯੋਗੇਪਿ ਪੁਰਿਮਾ ਆਪਤ੍ਤਿ ਉਤ੍ਤਰਮੁਤ੍ਤਰਂ ਆਪਤ੍ਤਿਂ ਪਤ੍ਵਾ ਪਟਿਪ੍ਪਸ੍ਸਮ੍ਭਨ੍ਤੀਤਿ ਸਞ੍ਞਾਯ ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਂ, ਇਤਰਟ੍ਠਕਥਾਸੁ ਪਨ ਖਣਨਪਯੋਗਭੇਦੇਹਿ ਪਯੋਗੇ ਪਯੋਗੇ ਆਪਨ੍ਨਾ ਆਪਤ੍ਤਿਯੋ ਉਤ੍ਤਰਮੁਤ੍ਤਰਂ ਪਤ੍ਵਾ ਨ ਪਟਿਪ੍ਪਸ੍ਸਮ੍ਭਨ੍ਤਿ ਅਞ੍ਞਮਞ੍ਞਂ ਸਦਿਸਤ੍ਤਾ ਵਿਯੂਹਨਂ ਪਤ੍ਵਾ ਤਾ ਸਬ੍ਬਾਪਿ ਪਟਿਪ੍ਪਸ੍ਸਮ੍ਭਨ੍ਤਿ ਵਿਸਦਿਸਪਯੋਗਤ੍ਤਾਤਿ ਇਮਿਨਾ ਅਧਿਪ੍ਪਾਯੇਨ ਪਟਿਪ੍ਪਸ੍ਸਦ੍ਧਿਵਿਧਾਨਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਇਮਿਨਾ ਹਿ ਅਵਹਾਰਕਸ੍ਸ ਆਸਨ੍ਨਂ ਓਰਿਮਨ੍ਤਂ ਪਰਾਮਸਤਿ.
ਤਤ੍ਥੇਵਾਤਿ ਮੁਖਵਟ੍ਟਿਯਮੇਵ. ਬੁਨ੍ਦੇਨਾਤਿ ਕੁਮ੍ਭਿਯਾ ਹੇਟ੍ਠਿਮਤਲੇਨ. ਏਕਟ੍ਠਾਨੇ ਠਿਤਾਯ ਕੁਮ੍ਭਿਯਾ ਠਾਨਾ ਚਾਵਨਂ ਛਹਿ ਆਕਾਰੇਹਿ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਏਕਟ੍ਠਾਨੇਤਿ ਚ ਸਙ੍ਖਲਿਕਬਦ੍ਧਭਾਵੇਨ ਏਕਸ੍ਮਿਂ ਪਤਿਟ੍ਠਿਤੋਕਾਸਟ੍ਠਾਨੇਤਿ ਅਤ੍ਥੋ. ਖਾਣੁਕਂ ਕੇਸਗ੍ਗਮਤ੍ਤਮ੍ਪਿ ਠਾਨਾ ਚਾਵੇਤੀਤਿ ਖਾਣੁਕਂ ਅਤ੍ਤਨੋ ਪਤਿਟ੍ਠਿਤਟ੍ਠਾਨਤੋ ਪਞ੍ਚਹਿ ਆਕਾਰੇਹਿ ਠਾਨਾ ਚਾਵੇਤਿ. ਛਿਨ੍ਨਮਤ੍ਤੇ ਪਾਰਾਜਿਕਨ੍ਤਿ ਅਵਸ੍ਸਂ ਚੇ ਪਤਤਿ, ਛਿਨ੍ਨਮਤ੍ਤੇ ਪਾਰਾਜਿਕਂ. ਪਰਿਚ੍ਛੇਦੋਤਿ ਪਞ੍ਚਮਾਸਕਾਦਿਗਰੁਭਾਵਪਰਿਚ੍ਛੇਦੋ. ਅਪਬ੍ਯੂਹਨ੍ਤੋਤਿ ਠਿਤਟ੍ਠਾਨਤੋ ਅਪਨਯਨਵਸੇਨ ਵਿਯੂਹਨ੍ਤੋ ਰਾਸਿਂ ਕਰੋਨ੍ਤੋ. ਏਵਂ ਕਤ੍ਵਾਤਿ ਭਾਜਨਮੁਖਵਟ੍ਟਿਯਾ ਕੁਮ੍ਭਿਗਤੇਨ ਭਾਜਨਗਤਸ੍ਸ ਏਕਾਬਦ੍ਧਭਾਵਂ ਵਿਯੋਜੇਤ੍ਵਾਤਿ ਅਤ੍ਥੋ. ਉਪਡ੍ਢਕੁਮ੍ਭੀਯਨ੍ਤਿ ਉਪਡ੍ਢਪੁਣ੍ਣਾਯ ਕੁਮ੍ਭਿਯਾ. ਵਿਨਯਧਮ੍ਮਤਾਤਿ ਅਧਿਕਕਾਰਣਾਲਾਭੇ ਵਿਨਯਵਿਨਿਚ੍ਛਯਧਮ੍ਮਤਾਤਿ ਅਧਿਪ੍ਪਾਯੋ. ਨ ਕੇਵਲਞ੍ਚੇਤ੍ਥ ਗਰੁਕਤਾਵ, ਸੁਤ੍ਤਾਨੁਗਮਨਮ੍ਪਿ ਅਤ੍ਥੀਤਿ ਦਸ੍ਸੇਨ੍ਤੋ ਅਪਿਚਾਤਿਆਦਿਮਾਹ. ਕਣ੍ਠੇਨ ਪਨ ਪਰਿਚ੍ਛਿਨ੍ਨਕਾਲੇਤਿ ਮੁਖਗਤਂ ਅਜ੍ਝੋਹਟਕਾਲੇਤਿ ਅਤ੍ਥੋ. ਅਜ੍ਝੋਹਰਣਮੇਵ ਹੇਤ੍ਥ ਪਰਿਚ੍ਛਿਨ੍ਦਨਂ, ਨ ਕਣ੍ਠਪਿਦਹਨਂ. ਚਿਕ੍ਕਨਨ੍ਤਿ ਥਦ੍ਧਂ, ਬਹਲਂ ਘਨਨ੍ਤਿ ਅਤ੍ਥੋ.
ਯੋਪਿ ਥੇਯ੍ਯਚਿਤ੍ਤੇਨ ਪਰਸ੍ਸ ਕੁਮ੍ਭਿਯਾ ਪਾਦਗ੍ਘਨਕਂ ਸਪ੍ਪਿਂ ਵਾ ਤੇਲਂ ਵਾ ਅਵਸ੍ਸਂ ਪਿਵਨਕਂ ਯਂ ਕਿਞ੍ਚਿ ਦੁਕੂਲਸਾਟਕਂ ਵਾ ਚਮ੍ਮਖਣ੍ਡਾਦੀਨਂ ਵਾ ਅਞ੍ਞਤਰਂ ਪਕ੍ਖਿਪਤਿ, ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਨ੍ਤਿ ਏਤ੍ਥ ਅਵਹਾਰੋ ਵੀਮਂਸਿਤਬ੍ਬੋ. ਯਦਿ ਚ ਦੁਕੂਲਾਦੀਸੁ ਸਪ੍ਪਿਤੇਲਾਨਂ ਪਵਿਸਨਂ ਸਨ੍ਧਾਯ ਪਾਰਾਜਿਕਂ ਭਵੇਯ੍ਯ, ਤਤ੍ਥ ਪਵਿਟ੍ਠਤੇਲਾਦਿਨੋ ਕੁਮ੍ਭਿਗਤੇਨ ਏਕਾਬਦ੍ਧਤਾਯ ਨ ਤਾਵ ਅਵਹਾਰੋ ਭਾਜਨਨ੍ਤਰਂ ਪਵੇਸੇਤ੍ਵਾ ਗਹਣਕਾਲੇ ਵਿਯ. ਤਥਾ ਹਿ ਵੁਤ੍ਤਂ – ‘‘ਭਾਜਨਂ ਪਨ ਨਿਮੁਜ੍ਜਾਪੇਤ੍ਵਾ ਗਣ੍ਹਨ੍ਤਸ੍ਸ ਯਾਵ ਏਕਾਬਦ੍ਧਂ ਹੋਤਿ, ਤਾਵ ਰਕ੍ਖਤੀ’’ਤਿਆਦਿ. ਅਥ ਤੇਲਾਦਿਵਿਨਾਸੇਨ ਪਾਰਾਜਿਕਂ ਭਵੇਯ੍ਯ, ਤਦਾਪਿ ਤਿਣਜ੍ਝਾਪਨਾਦੀਸੁ ਵਿਯ ਅਵਹਾਰੋ ਨਤ੍ਥਿ, ਦੁਕ੍ਕਟੇਨ ਸਦ੍ਧਿਂ ਭਣ੍ਡਦੇਯ੍ਯਮੇਵ ਹੋਤਿ, ਤਥਾ ਚ ਪਾਦਗ੍ਘਨਕਂ ਤੇਲਾਦਿਂ ਪੀਤਂ ਦੁਕੂਲਾਦਿਂ ਉਦ੍ਧਰਨ੍ਤਸ੍ਸਾਪਿ ਪਾਰਾਜਿਕਂ ਨ ਸਿਯਾ ਤਤ੍ਥ ਪਵਿਟ੍ਠਸ੍ਸ ਤੇਲਾਦਿਨੋ ਵਿਨਟ੍ਠਟ੍ਠੇਨ ਗਹਣਕ੍ਖਣੇ ਅਵਿਜ੍ਜਮਾਨਤ੍ਤਾ, ਵਿਜ੍ਜਮਾਨਤ੍ਤੇਨ ਚ ਉਦ੍ਧਾਰੇਯੇਵ ਪਾਰਾਜਿਕਂ ਵਤ੍ਤਬ੍ਬਂ, ਨ ਹਤ੍ਥਤੋ ਮੁਤ੍ਤਮਤ੍ਤੇਤਿ. ਸਬ੍ਬਅਟ੍ਠਕਥਾਸੁ ਚ ਦੁਕੂਲਾਦੀਨਂ ਪਕ੍ਖਿਪਨੇ ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਸ੍ਸ ਵੁਤ੍ਤਤ੍ਤਾ ਨ ਤਂ ਪਟਿਕ੍ਖਿਪਿਤੁਂ ਸਕ੍ਕਾ. ਅਟ੍ਠਕਥਾਪ੍ਪਮਾਣੇਨ ਪਨੇਤਂ ਗਹੇਤਬ੍ਬਂ, ਯੁਤ੍ਤਿ ਪਨੇਤ੍ਥ ਪਣ੍ਡਿਤੇਹਿ ਪੁਬ੍ਬਾਪਰਂ ਸਂਸਨ੍ਦਿਤ੍ਵਾ ਉਦ੍ਧਾਰੇਤਬ੍ਬਾ.
ਪਲਿਬੁਜ੍ਝਿਸ੍ਸਤੀਤਿ ਨਿਵਾਰੇਸ੍ਸਤਿ. ਵੁਤ੍ਤਨਯੇਨ ਪਾਰਾਜਿਕਨ੍ਤਿ ਹਤ੍ਥਤੋ ਮੁਤ੍ਤਮਤ੍ਤੇਯੇਵ ਪਾਰਾਜਿਕਂ. ਨੇਵ ਅਵਹਾਰੋ, ਨ ਗੀਵਾਤਿ ਅਤ੍ਤਨੋ ਭਾਜਨਤ੍ਤਾ ਵੁਤ੍ਤਂ, ਅਨਾਪਤ੍ਤਿਮਤ੍ਤਮੇਵ ਵੁਤ੍ਤਂ, ਨ ਪਨ ਏਵਂ ਵਿਚਾਰਿਤਨ੍ਤਿ ਅਧਿਪ੍ਪਾਯੋ. ਬਹਿਗਤਂ ਨਾਮ ਹੋਤੀਤਿ ਤਤੋ ਪਟ੍ਠਾਯ ਤੇਲਸ੍ਸ ਅਟ੍ਠਾਨਤੋ ਅਧੋਮੁਖਭਾਵਤੋ ਚ ਬਹਿਗਤਂ ਨਾਮ ਹੋਤਿ. ਅਨ੍ਤੋ ਪਟ੍ਠਾਯ ਛਿਦ੍ਦੇ ਕਰਿਯਮਾਨੇ ਤੇਲਸ੍ਸ ਨਿਕ੍ਖਮਿਤ੍ਵਾ ਗਤਗਤਟ੍ਠਾਨਂ ਭਾਜਨਸਙ੍ਖ੍ਯਮੇਵ ਗਚ੍ਛਤੀਤਿ ਆਹ ‘‘ਬਾਹਿਰਨ੍ਤਤੋ ਪਾਦਗ੍ਘਨਕੇ ਗਲ਼ਿਤੇ ਪਾਰਾਜਿਕ’’ਨ੍ਤਿ. ਯਥਾ ਤਥਾ ਵਾ ਕਤਸ੍ਸਾਤਿ ਬਾਹਿਰਨ੍ਤਤੋ ਵਾ ਅਬ੍ਭਨ੍ਤਰਨ੍ਤਤੋ ਵਾ ਪਟ੍ਠਾਯ ਕਤਸ੍ਸ. ਮਜ੍ਝੇ ਠਪੇਤ੍ਵਾ ਕਤਛਿਦ੍ਦੇਤਿ ਮਜ੍ਝੇ ਥੋਕਂ ਕਪਾਲਂ ਠਪੇਤ੍ਵਾ ਪਚ੍ਛਾ ਤਂ ਛਿਨ੍ਦਨ੍ਤੇਨ ਕਤਛਿਦ੍ਦੇ.
ਪਤ੍ਥੀਨਸ੍ਸ ਖਾਦਨਂ ਇਤਰਸ੍ਸ ਪਾਨਞ੍ਚ ਸਪ੍ਪਿਆਦੀਨਂ ਪਰਿਭੋਗੋਤਿ ਆਹ ‘‘ਅਖਾਦਿਤਬ੍ਬਂ ਵਾ ਅਪਾਤਬ੍ਬਂ ਵਾ ਕਰੋਤੀ’’ਤਿ. ਕਸ੍ਮਾ ਪਨੇਤ੍ਥ ਦੁਕ੍ਕਟਂ ਵੁਤ੍ਤਨ੍ਤਿ ਆਹ ‘‘ਠਾਨਾਚਾਵਨਸ੍ਸ ਨਤ੍ਥਿਤਾਯ ਦੁਕ੍ਕਟ’’ਨ੍ਤਿ. ਪੁਰਿਮਦ੍ਵਯਨ੍ਤਿ ਭੇਦਨਂ ਛਡ੍ਡਨਞ੍ਚ. ਕੁਮ੍ਭਿਜਜ੍ਜਰਕਰਣੇਨਾਤਿ ਪੁਣ੍ਣਕੁਮ੍ਭਿਯਾ ਜਜ੍ਜਰਕਰਣੇਨ. ਮਾਤਿਕਾਉਜੁਕਰਣੇਨਾਤਿ ਉਦਕਪੁਣ੍ਣਾਯ ਮਾਤਿਕਾਯ ਉਜੁਕਰਣੇਨ. ਏਕਲਕ੍ਖਣਨ੍ਤਿ ਭੇਦਨਂ ਕੁਮ੍ਭਿਯਾ ਜਜ੍ਜਰਕਰਣੇਨ, ਛਡ੍ਡਨਂ ਮਾਤਿਕਾਯ ਉਜੁਕਰਣੇਨ ਚ ਸਦ੍ਧਿਂ ਏਕਸਭਾਵਂ. ਪਚ੍ਛਿਮਂ ਪਨ ਦ੍ਵਯਨ੍ਤਿ ਝਾਪਨਂ ਅਪਰਿਭੋਗਕਰਣਞ੍ਚ. ਏਤ੍ਥ ਏਵਂ ਵਿਨਿਚ੍ਛਯਂ ਵਦਨ੍ਤੀਤਿ ਏਤਸ੍ਮਿਂ ਮਹਾਅਟ੍ਠਕਥਾਯਂ ਵੁਤ੍ਤੇ ਅਤ੍ਥੇ ਏਕੇ ਆਚਰਿਯਾ ਏਵਂ ਵਿਨਿਚ੍ਛਯਂ ਵਦਨ੍ਤਿ. ਪਚ੍ਛਿਮਦ੍ਵਯਂ ਸਨ੍ਧਾਯ ਵੁਤ੍ਤਨ੍ਤਿ ਏਤ੍ਥ ਪੁਰਿਮਪਦਦ੍ਵਯੇ ਵਿਨਿਚ੍ਛਯੋ ਹੇਟ੍ਠਾ ਵੁਤ੍ਤਾਨੁਸਾਰੇਨ ਸਕ੍ਕਾ ਵਿਞ੍ਞਾਤੁਨ੍ਤਿ ਤਤ੍ਥ ਕਿਞ੍ਚਿ ਅਵਤ੍ਵਾ ਪਚ੍ਛਿਮਪਦਦ੍ਵਯਂ ਸਨ੍ਧਾਯ ‘‘ਠਾਨਾਚਾਵਨਸ੍ਸ ਨਤ੍ਥਿਤਾਯ ਦੁਕ੍ਕਟ’’ਨ੍ਤਿ ਇਦਂ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਥੇਯ੍ਯਚਿਤ੍ਤੇਨਾਤਿ ਅਤ੍ਤਨੋ ਵਾ ਪਰਸ੍ਸ ਵਾ ਕਾਤੁਕਾਮਤਾਵਸੇਨ ਉਪ੍ਪਨ੍ਨਥੇਯ੍ਯਚਿਤ੍ਤੇਨ. ਵਿਨਾਸੇਤੁਕਾਮਤਾਯਾਤਿ ਹਤ੍ਥਪਾਦਾਦੀਨਿ ਛਿਨ੍ਦਨ੍ਤੋ ਵਿਯ ਕੇਵਲਂ ਵਿਨਾਸੇਤੁਕਾਮਤਾਯ. ਵੁਤ੍ਤਨਯੇਨ ਭਿਨ੍ਦਨ੍ਤਸ੍ਸ ਵਾ ਛਡ੍ਡੇਨ੍ਤਸ੍ਸ ਵਾਤਿ ਮੁਗ੍ਗਰੇਨ ਪੋਥੇਤ੍ਵਾ ਭਿਨ੍ਦਨ੍ਤਸ੍ਸ ਵਾ ਉਦਕਂ ਵਾ ਵਾਲਿਕਂ ਵਾ ਆਕਿਰਿਤ੍ਵਾ ਉਤ੍ਤਰਾਪੇਨ੍ਤਸ੍ਸ ਵਾਤਿ ਅਤ੍ਥੋ. ਅਯੁਤ੍ਤਨ੍ਤਿ ਚੇਤਿ ਪਾਲ਼ਿਯਂ ਪੁਰਿਮਦ੍ਵਯੇਪਿ ਦੁਕ੍ਕਟਸ੍ਸੇਵ ਵੁਤ੍ਤਤ੍ਤਾ ‘‘ਪੁਰਿਮਦ੍ਵਯੇ ਪਾਰਾਜਿਕ’’ਨ੍ਤਿ ਇਦਂ ਅਯੁਤ੍ਤਨ੍ਤਿ ਯਦਿ ਤੁਮ੍ਹਾਕਂ ਸਿਯਾਤਿ ਅਤ੍ਥੋ. ਨਾਤਿ ਅਯੁਤ੍ਤਭਾਵਂ ਨਿਸੇਧੇਤ੍ਵਾ ਤਤ੍ਥ ਕਾਰਣਮਾਹ ‘‘ਅਞ੍ਞਥਾ ਗਹੇਤਬ੍ਬਤ੍ਥਤੋ’’ਤਿ.
ਏਵਮੇਕੇ ਵਦਨ੍ਤੀਤਿ ਹੇਟ੍ਠਾ ਵੁਤ੍ਤਸ੍ਸ ਅਤ੍ਥਨਯਸ੍ਸ ਅਤ੍ਤਨਾ ਅਨਭਿਮਤਭਾਵਂ ਦਸ੍ਸੇਤ੍ਵਾ ਸਯਂ ਅਞ੍ਞਥਾਪਿ ਪਾਲ਼ਿਂ ਅਟ੍ਠਕਥਞ੍ਚ ਸਂਸਨ੍ਦਿਤ੍ਵਾ ਅਤ੍ਥਂ ਦਸ੍ਸੇਤੁਕਾਮੋ ਅਯਂ ਪਨੇਤ੍ਥ ਸਾਰੋਤਿਆਦਿਮਾਹ. ਅਚਾਵੇਤੁਕਾਮੋਵਾਤਿ ਥੇਯ੍ਯਚਿਤ੍ਤੇਨ ਠਾਨਾ ਅਚਾਵੇਤੁਕਾਮੋਵ. ਅਛਡ੍ਡੇਤੁਕਾਮੋਯੇਵਾਤਿ ਏਤ੍ਥਾਪਿ ਥੇਯ੍ਯਚਿਤ੍ਤੇਨਾਤਿ ਸਮ੍ਬਨ੍ਧਿਤਬ੍ਬਂ. ਇਦਞ੍ਹਿ ਥੇਯ੍ਯਚਿਤ੍ਤਪਕ੍ਖਂ ਸਨ੍ਧਾਯ ਵੁਤ੍ਤਂ ਨਾਸੇਤੁਕਾਮਤਾਪਕ੍ਖਸ੍ਸ ਵਕ੍ਖਮਾਨਤ੍ਤਾ. ਤੇਨੇਵਾਹ ਨਾਸੇਤੁਕਾਮਤਾਪਕ੍ਖੇ ਪਨਾਤਿਆਦਿ. ਇਤਰਥਾਪਿ ਯੁਜ੍ਜਤੀਤਿ ਥੇਯ੍ਯਚਿਤ੍ਤਾਭਾਵਾ ਠਾਨਾ ਚਾਵੇਤੁਕਾਮਸ੍ਸਾਪਿ ਦੁਕ੍ਕਟਂ ਯੁਜ੍ਜਤੀਤਿ ਵੁਤ੍ਤਂ ਹੋਤਿ.
ਭੂਮਟ੍ਠਕਥਾਵਣ੍ਣਨਾਨਯੋ ਨਿਟ੍ਠਿਤੋ.
ਆਕਾਸਟ੍ਠਕਥਾਵਣ੍ਣਨਾ
੯੬. ਆਕਾਸਟ੍ਠਕਥਾਯਂ ਅਨ੍ਤੋਵਤ੍ਥੁਮ੍ਹੀਤਿ ਪਰਿਕ੍ਖਿਤ੍ਤਸ੍ਸ ਵਤ੍ਥੁਸ੍ਸ ਅਨ੍ਤੋ. ਅਨ੍ਤੋਗਾਮੇਤਿ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਅਨ੍ਤੋ. ਅਪਰਿਕ੍ਖਿਤ੍ਤੇ ਪਨ ਵਤ੍ਥੁਮ੍ਹਿ ਗਾਮੇ ਵਾ ਠਿਤਟ੍ਠਾਨਮੇਵ ਠਾਨਂ. ਅਟਵਿਮੁਖਂ ਕਰੋਤਿ…ਪੇ… ਰਕ੍ਖਤੀਤਿ ਤੇਨ ਪਯੋਗੇਨ ਤਸ੍ਸ ਇਚ੍ਛਿਤਟ੍ਠਾਨਂ ਆਗਤਤ੍ਤਾ ਰਕ੍ਖਤਿ. ਗਾਮਤੋ ਨਿਕ੍ਖਨ੍ਤਸ੍ਸਾਤਿ ਪਰਿਕ੍ਖਿਤ੍ਤਗਾਮਤੋ ਨਿਕ੍ਖਨ੍ਤਸ੍ਸ. ਕਪਿਞ੍ਜਰੋ ਨਾਮ ਅਞ੍ਞਮਞ੍ਞਂ ਯੁਜ੍ਝਾਪਨਤ੍ਥਾਯ ਬਾਲਜਨੇਹਿ ਪੋਸਾਵਨਿਯਪਕ੍ਖਿਜਾਤਿ.
ਵੇਹਾਸਟ੍ਠਕਥਾਵਣ੍ਣਨਾ
੯੭. ਵੇਹਾਸਟ੍ਠਕਥਾਯਂ ਛਿਨ੍ਨਮਤ੍ਤੇ ਮੁਤ੍ਤਮਤ੍ਤੇਤਿ ਯਥਾ ਛਿਨ੍ਨਂ ਮੁਤ੍ਤਞ੍ਚ ਪਕਤਿਟ੍ਠਾਨੇ ਨ ਤਿਟ੍ਠਤਿ, ਤਥਾ ਛੇਦਨਂ ਮੋਚਨਞ੍ਚ ਸਨ੍ਧਾਯ ਵੁਤ੍ਤਂ.
ਉਦਕਟ੍ਠਕਥਾਵਣ੍ਣਨਾ
੯੮. ਉਦਕਟ੍ਠਕਥਾਯਂ ਸਨ੍ਦਮਾਨਉਦਕੇ ਨਿਕ੍ਖਿਤ੍ਤਂ ਨ ਤਿਟ੍ਠਤੀਤਿ ਆਹ ‘‘ਅਸਨ੍ਦਨਕੇ ਉਦਕੇ’’ਤਿ. ਅਨਾਪਤ੍ਤੀਤਿ ਹਤ੍ਥਵਾਰਪਦਵਾਰੇਸੁ ਦੁਕ੍ਕਟਾਪਤ੍ਤਿਯਾ ਅਭਾਵਂ ਸਨ੍ਧਾਯ ਵੁਤ੍ਤਂ. ਕਡ੍ਢਤੀਤਿ ਹੇਟ੍ਠਤੋ ਓਸਾਰੇਤਿ. ਸਕਲਮੁਦਕਨ੍ਤਿ ਦਣ੍ਡੇਨ ਫੁਟ੍ਠੋਕਾਸਗਤਂ ਸਕਲਮੁਦਕਂ. ਨ ਉਦਕਂ ਠਾਨਨ੍ਤਿ ਅਤ੍ਤਨਾ ਕਤਟ੍ਠਾਨਸ੍ਸ ਅਟ੍ਠਾਨਤ੍ਤਾ. ਪਦੁਮਿਨਿਯਨ੍ਤਿ ਪਦੁਮਗਚ੍ਛੇ. ਕਲਾਪਬਨ੍ਧਨ੍ਤਿ ਹਤ੍ਥਕਵਸੇਨ ਖੁਦ੍ਦਕਂ ਕਤ੍ਵਾ ਬਦ੍ਧਂ ਕਲਾਪਬਦ੍ਧਂ. ਭਾਰਬਦ੍ਧਂ ਨਾਮ ਸੀਸਭਾਰਾਦਿਵਸੇਨ ਬਦ੍ਧਂ. ਮੁਲ਼ਾਲਨ੍ਤਿ ਕਨ੍ਦਂ. ਪਤ੍ਤਂ ਵਾ ਪੁਪ੍ਫਂ ਵਾਤਿ ਇਦਂ ਕਦ੍ਦਮਸ੍ਸ ਅਨ੍ਤੋ ਪਵਿਸਿਤ੍ਵਾ ਠਿਤਂ ਸਨ੍ਧਾਯ ਵੁਤ੍ਤਂ. ਨਿਦ੍ਧਮਨਤੁਮ੍ਬਨ੍ਤਿ ਵਾਪਿਯਾ ਉਦਕਸ੍ਸ ਨਿਕ੍ਖਮਨਨਾਲ਼ਂ. ਉਦਕਵਾਹਕਨ੍ਤਿ ਮਹਾਮਾਤਿਕਂ. ਅਵਹਾਰੇਨ ਸੋ ਨ ਕਾਰੇਤਬ੍ਬੋਤਿ ਇਮਿਨਾ ਪਾਣਂ ਜੀਵਿਤਾ ਵੋਰੋਪਨੇ ਆਪਤ੍ਤਿਯਾ ਸਬ੍ਬਤ੍ਥ ਨ ਮੁਚ੍ਚਤੀਤਿ ਦੀਪੇਤਿ. ਮਾਤਿਕਂ ਆਰੋਪੇਤ੍ਵਾਤਿ ਖੁਦ੍ਦਕਮਾਤਿਕਂ ਆਰੋਪੇਤ੍ਵਾ. ਮਰਿਤ੍ਵਾ…ਪੇ… ਤਿਟ੍ਠਨ੍ਤੀਤਿ ਏਤ੍ਥ ਮਤਮਚ੍ਛਾਨਂਯੇਵ ਤੇਸਂ ਸਨ੍ਤਕਤ੍ਤਾ ਅਮਤੇ ਗਣ੍ਹਨ੍ਤਸ੍ਸ ਨਤ੍ਥਿ ਅਵਹਾਰੋ.
ਨਾਵਟ੍ਠਕਥਾਵਣ੍ਣਨਾ
੯੯. ਨਾਵਟ੍ਠਕਥਾਯਂ ਥੁਲ੍ਲਚ੍ਚਯਮ੍ਪਿ ਪਾਰਾਜਿਕਮ੍ਪਿ ਹੋਤੀਤਿ ਏਤ੍ਥ ਪਠਮਂ ਠਾਨਾ ਅਚਾਵੇਤ੍ਵਾ ਮੁਤ੍ਤੇ ਥੁਲ੍ਲਚ੍ਚਯਂ, ਪਠਮਂ ਪਨ ਠਾਨਾ ਚਾਵੇਤ੍ਵਾ ਮੁਤ੍ਤੇ ਪਾਰਾਜਿਕਨ੍ਤਿ ਵੇਦਿਤਬ੍ਬਂ. ਪਾਸੇ ਬਦ੍ਧਸੂਕਰੋ ਵਿਯਾਤਿਆਦਿਨਾ ਵੁਤ੍ਤਂ ਸਨ੍ਧਾਯਾਹ ‘‘ਤਤ੍ਥ ਯੁਤ੍ਤਿ ਪੁਬ੍ਬੇ ਵੁਤ੍ਤਾਏਵਾ’’ਤਿ. ਵਿਪਨ੍ਨਟ੍ਠਨਾਵਾਤਿ ਵਿਸਮਵਾਤੇਹਿ ਦੇਸਨ੍ਤਰਂ ਪਲਾਤਾ, ਭਿਜ੍ਜਿਤ੍ਵਾ ਵਾ ਵਿਨਾਸਂ ਪਤ੍ਵਾ ਉਦਕੇ ਨਿਮੁਜ੍ਜਿਤ੍ਵਾ ਹੇਟ੍ਠਾ ਭੂਮਿਤਲਂ ਅਪ੍ਪਤ੍ਵਾ ਸਾਮਿਕੇਹਿ ਚ ਅਪਰਿਚ੍ਚਤ੍ਤਾਲਯਾ ਵੁਚ੍ਚਤਿ. ਬਲਵਾ ਚ ਵਾਤੋ ਆਗਮ੍ਮਾਤਿ ਇਮਿਨਾ ਅਸਤਿ ਵਾਤੇ ਅਯਂ ਪਯੋਗੋ ਕਤੋਤਿ ਦਸ੍ਸੇਤਿ. ਪੁਗ੍ਗਲਸ੍ਸ ਨਤ੍ਥਿ ਅਵਹਾਰੋਤਿ ਸੁਕ੍ਖਮਾਤਿਕਾਯਂ ਉਜੁਕਰਣਨਯੇਨ ਵੁਤ੍ਤਂ. ਤਂ ਅਤ੍ਤਨੋ ਪਾਦੇਨ ਅਨਕ੍ਕਮਿਤ੍ਵਾ ਹਤ੍ਥੇਨ ਚ ਅਨੁਕ੍ਖਿਪਿਤ੍ਵਾ ਅਞ੍ਞਸ੍ਮਿਂ ਦਣ੍ਡਾਦੀਸੁ ਬਨ੍ਧਿਤ੍ਵਾ ਠਪਿਤੇ ਯੁਜ੍ਜਤਿ, ਅਤ੍ਤਨੋ ਪਾਦੇਨ ਅਕ੍ਕਮਿਤ੍ਵਾ ਹਤ੍ਥੇਨ ਚ ਉਕ੍ਖਿਪਿਤ੍ਵਾ ਠਿਤਸ੍ਸ ਪਨ ਬਲਵਵਾਤੇਨ ਛਤ੍ਤਚੀਵਰਾਦੀਸੁ ਪਹਟੇਸੁ ਪਕਤਿਂ ਵਿਜਹਿਤ੍ਵਾ ਦਲ਼੍ਹਤਰਂ ਅਕ੍ਕਮਨਗਹਣਾਦਿਪਯੋਗੋ ਅਭਿਨਵੋ ਕਾਤਬ੍ਬੋ ਸਿਯਾ. ਇਤਰਥਾ ਛਤ੍ਤਚੀਵਰਾਦੀਨਿ ਵਾ ਵਿਗਚ੍ਛਨ੍ਤਿ, ਅਵਹਾਰਕੋ ਵਾ ਸਯਂ ਪਤਿਸ੍ਸਤਿ, ਨਾਵਾ ਚ ਤਦਾ ਨ ਗਮਿਸ੍ਸਤਿ. ਤਸ੍ਮਾ ਈਦਿਸੇ ਅਭਿਨਵਪ੍ਪਯੋਗੇ ਸਤਿ ਅਵਹਾਰੇਨ ਭਵਿਤਬ੍ਬਂ. ਸੁਕ੍ਖਮਾਤਿਕਾਯਂ ਉਜੁਕਤਾਯ ਉਦਕਾਗਮਨਕਾਲੇ ਕਾਤਬ੍ਬਕਿਚ੍ਚਂ ਨਤ੍ਥੀਤਿ ਤਂ ਇਧ ਨਿਦਸ੍ਸਨਂ ਨ ਹੋਤਿ. ਦਾਸਂ ਪਨ ਪਕਤਿਯਾ ਪਲਾਯਨ੍ਤਂ ‘‘ਸੀਘਂ ਯਾਹੀ’’ਤਿ ਵਤ੍ਵਾ ਪਕਤਿਗਮਨਤੋ ਤੁਰਿਤਗਮਨੁਪ੍ਪਾਦਨਾਦਿਨਾ ਇਧ ਨਿਦਸ੍ਸਨੇਨ ਭਵਿਤਬ੍ਬਨ੍ਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਵਾਤੇ ਆਗਤੇਪਿ ਯਤ੍ਥ ਅਤਿਲਹੁਕਤ੍ਤਾ ਨਾਵਾਯ ਕਞ੍ਚਿ ਪਯੋਗਂ ਅਕਤ੍ਵਾ ਪਕਤਿਯਾ ਅਵਹਾਰਕੋ ਤਿਟ੍ਠਤਿ, ਤਤ੍ਥਿਦਂ ਅਟ੍ਠਕਥਾਯਂ ਵੁਤ੍ਤਨ੍ਤਿ ਗਹੇਤਬ੍ਬਂ.
ਯਾਨਟ੍ਠਕਥਾਵਣ੍ਣਨਾ
੧੦੦. ਯਾਨਟ੍ਠਕਥਾਯਂ ਉਭੋਸੁ ਪਸ੍ਸੇਸੂਤਿ ਚਤੁਨ੍ਨਂ ਥਮ੍ਭਾਨਂ ਉਪਰਿ ਚਤੁਰਸ੍ਸਂ ਦਾਰੁਸਙ੍ਘਾਟਂ ਆਰੋਪੇਤ੍ਵਾ ਤਸ੍ਸ ਵਾਮਦਕ੍ਖਿਣਪਸ੍ਸੇਸੁ ਉਭੋਸੁ ਵਾਤਾਤਪਾਦਿਪਰਿਸ੍ਸਯਵਿਨੋਦਨਤ੍ਥਂ ਗਰੁਲ਼ਪਕ੍ਖਿਨੋ ਉਭੋ ਪਕ੍ਖਾ ਵਿਯ ਕਤਾ ਸਨ੍ਦਮਾਨਿਕਾ. ਦੁਕਯੁਤ੍ਤਸ੍ਸਾਤਿ ਦ੍ਵੀਹਿ ਗੋਣੇਹਿ ਯੁਤ੍ਤਸ੍ਸ. ਅਯੁਤ੍ਤਕਨ੍ਤਿ ਗੋਣੇਹਿ ਅਯੁਤ੍ਤਂ. ਕਪ੍ਪਕਤਾਤਿ ਦ੍ਵਿਨ੍ਨਂ ਸਿਖਾਨਂ ਸਨ੍ਧਿਟ੍ਠਾਨੇ ਗੋਸਿਙ੍ਗਾਨਿ ਵਿਯ ਦ੍ਵੇ ਕੋਟਿਯੋ ਠਪੇਤ੍ਵਾ ਉਪਤ੍ਥਮ੍ਭਨੀ ਕਪ੍ਪਕਤਾ ਨਾਮ, ਸਾ ਦ੍ਵੀਹਿਪਿ ਕੋਟੀਹਿ ਭੂਮਿਯਂ ਪਤਿਟ੍ਠਾਤਿ, ਤੇਨਾਹ ‘‘ਛ ਠਾਨਾਨੀ’’ਤਿ. ਤੀਣਿ ਵਾ ਚਤ੍ਤਾਰਿ ਵਾ ਠਾਨਾਨੀਤਿ ਅਕਪ੍ਪਕਤਾਯ ਉਪਤ੍ਥਮ੍ਭਨਿਯਾ ਚ ਦ੍ਵਿਨ੍ਨਂ ਚਕ੍ਕਾਨਞ੍ਚ ਵਸੇਨ ਤੀਣਿ ਠਾਨਾਨਿ, ਕਪ੍ਪਕਤਾਯ ਵਸੇਨ ਚਤ੍ਤਾਰਿ ਠਾਨਾਨਿ, ਤਥਾ ਪਥਵਿਯਂ ਠਪਿਤਸ੍ਸ ਤੀਣਿ ਠਾਨਾਨੀਤਿ ਸਮ੍ਬਨ੍ਧੋ. ਅਕ੍ਖਸੀਸੇਹੀਤਿ ਅਕ੍ਖਦਾਰੁਨੋ ਦ੍ਵੀਹਿ ਕੋਟੀਹਿ. ਅਕ੍ਖੁਦ੍ਧੀਹੀਤਿ ਅਕ੍ਖਦਾਰੁਨਾ ਸਮ੍ਪਟਿਚ੍ਛਕਾ ਹੇਟ੍ਠਿਮਭਾਗੇ ਕਪ੍ਪਕਤਾ ਦ੍ਵੇ ਦਾਰੁਖਣ੍ਡਾ ਅਕ੍ਖੁਦ੍ਧਿਯੋ ਨਾਮ, ਤਾਸਂ ਕਪ੍ਪਕਤਾਨਂ ਦ੍ਵਿਨ੍ਨਂ ਕਪ੍ਪਸੀਸਾਨਿ ਚਤ੍ਤਾਰਿ ਇਧ ‘‘ਅਕ੍ਖੁਦ੍ਧਿਯੋ’’ਤਿ ਵੁਚ੍ਚਨ੍ਤਿ, ਤੇਨਾਹ ‘‘ਚਤੂਹਿ ਚ ਅਕ੍ਖੁਦ੍ਧੀਹੀ’’ਤਿ. ਤਾਹਿ ਪਤਿਟ੍ਠਿਤਾਹਿ ਪਤਿਟ੍ਠਿਤਟ੍ਠਾਨਾਨਿ ਚਤ੍ਤਾਰਿ ਧੁਰੇਨ ਪਤਿਟ੍ਠਿਤਟ੍ਠਾਨਂ ਏਕਨ੍ਤਿ ਪਞ੍ਚ ਠਾਨਾਨਿ ਹੋਨ੍ਤਿ. ਉਦ੍ਧਿਯੋਵ ‘‘ਉਦ੍ਧਿਖਾਣੁਕਾ’’ਤਿ ਵੁਤ੍ਤਾ, ਉਦ੍ਧਿਖਾਣੁਕਾਨਂ ਅਭਾਵੇ ਅਕ੍ਖਸੀਸਾਨਂ ਪਤਿਟ੍ਠਾਨੋਕਾਸਂ ਦਸ੍ਸੇਨ੍ਤੋ ਆਹ ਸਮਮੇਵ ਬਾਹਂ ਕਤ੍ਵਾਤਿਆਦਿ. ਤਤ੍ਥ ਸਮਮੇਵਾਤਿ ਉਦ੍ਧਿਯੋ ਹੇਟ੍ਠਾ ਅਨੋਲਮ੍ਬੇਤ੍ਵਾ ਬਾਹੁਨੋ ਹੇਟ੍ਠਿਮਭਾਗਂ ਸਮਂ ਕਤ੍ਵਾ ਦ੍ਵਿਨ੍ਨਂ ਬਾਹੁਦਾਰੂਨਂ ਮਜ੍ਝੇ ਅਕ੍ਖਸੀਸਪ੍ਪਮਾਣੇਨ ਛਿਦ੍ਦਂ ਕਤ੍ਵਾ ਤਤ੍ਥ ਅਕ੍ਖਸੀਸਾਨਿ ਪਵੇਸਿਤਾਨਿ ਹੋਨ੍ਤਿ, ਤੇਨ ਬਾਹਾਨਂ ਹੇਟ੍ਠਾਭਾਗਂ ਸਬ੍ਬਂ ਭੂਮਿਂ ਫੁਸਿਤ੍ਵਾ ਤਿਟ੍ਠਤਿ, ਤੇਨਾਹ ‘‘ਸਬ੍ਬਂ ਪਥਵਿਂ ਫੁਸਿਤ੍ਵਾ ਤਿਟ੍ਠਤੀ’’ਤਿ. ਸੇਸਂ ਨਾਵਾਯਂ ਵੁਤ੍ਤਸਦਿਸਨ੍ਤਿ ਇਮਿਨਾ ਯਦਿ ਪਨ ਤਂ ਏਵਂ ਗਚ੍ਛਨ੍ਤਂ ਪਕਤਿਗਮਨਂ ਪਚ੍ਛਿਨ੍ਦਿਤ੍ਵਾ ਅਞ੍ਞਂ ਦਿਸਾਭਾਗਂ ਨੇਤਿ, ਪਾਰਾਜਿਕਂ. ਸਯਮੇਵ ਯਂ ਕਿਞ੍ਚਿ ਠਾਨਂ ਸਮ੍ਪਤ੍ਤਂ ਠਾਨਾ ਅਚਾਲੇਨ੍ਤੋਵ ਵਿਕ੍ਕਿਣਿਤ੍ਵਾ ਗਚ੍ਛਤਿ, ਨੇਵਤ੍ਥਿ ਅਵਹਾਰੋ, ਭਣ੍ਡਦੇਯ੍ਯਂ ਪਨ ਹੋਤੀਤਿ ਇਮਂ ਨਯਂ ਅਤਿਦਿਸਤਿ.
ਭਾਰਟ੍ਠਕਥਾਵਣ੍ਣਨਾ
੧੦੧. ਭਾਰਟ੍ਠਕਥਾਯਂ ਭਾਰਟ੍ਠਨ੍ਤਿ ਮਾਤਿਕਾਪਦਸ੍ਸ ਭਾਰੋ ਨਾਮਾਤਿ ਇਦਂ ਅਤ੍ਥਦਸ੍ਸਨਨ੍ਤਿ ਆਹ ‘‘ਭਾਰੋਯੇਵ ਭਾਰਟ੍ਠ’’ਨ੍ਤਿ. ਪੁਰਿਮਗਲੇਤਿ ਗਲਸ੍ਸ ਪੁਰਿਮਭਾਗੇ. ਗਲਵਾਟਕੋਤਿ ਗੀਵਾਯ ਉਪਰਿਮਗਲਵਾਟਕੋ. ਉਰਪਰਿਚ੍ਛੇਦਮਜ੍ਝੇਤਿ ਉਰਪਰਿਯਨ੍ਤਸ੍ਸ ਮਜ੍ਝੇ. ਸਾਮਿਕੇਹਿ ਅਨਾਣਤ੍ਤੋਤਿ ਇਦਂ ਯਦਿ ਸਾਮਿਕੇਹਿ ‘‘ਇਮਂ ਭਾਰਂ ਨੇਤ੍ਵਾ ਅਸੁਕਟ੍ਠਾਨੇ ਦੇਹੀ’’ਤਿ ਆਣਤ੍ਤੋ ਭਵੇਯ੍ਯ, ਤਦਾ ਤੇਨ ਗਹਿਤਭਣ੍ਡਂ ਉਪਨਿਕ੍ਖਿਤ੍ਤਂ ਸਿਯਾ, ਤਞ੍ਚ ਥੇਯ੍ਯਚਿਤ੍ਤੇਨ ਸੀਸਾਦਿਤੋ ਓਰੋਪੇਨ੍ਤਸ੍ਸਾਪਿ ਅਵਹਾਰੋ ਨ ਸਿਯਾ, ਸਾਮਿਕਾਨਂ ਪਨ ਧੁਰਨਿਕ੍ਖੇਪੇ ਏਵ ਸਿਯਾਤਿ ਤਤੋ ਉਪਨਿਕ੍ਖਿਤ੍ਤਭਣ੍ਡਭਾਵਤੋ ਵਿਯੋਜੇਤੁਂ ਵੁਤ੍ਤਂ, ਤੇਨੇਵ ਵਕ੍ਖਤਿ ‘‘ਤੇਹਿ ਪਨ ਅਨਾਣਤ੍ਤਤ੍ਤਾ ਪਾਰਾਜਿਕ’’ਨ੍ਤਿ. ਘਂਸਨ੍ਤੋਤਿ ਸੀਸਤੋ ਅਨੁਕ੍ਖਿਪਨ੍ਤੋ, ਯਦਿ ਉਕ੍ਖਿਪੇਯ੍ਯ, ਉਕ੍ਖਿਤ੍ਤਮਤ੍ਤੇ ਪਾਰਾਜਿਕਂ, ਤੇਨਾਹ ਸੀਸਤੋ ਕੇਸਗ੍ਗਮਤ੍ਤਮ੍ਪੀਤਿਆਦਿ. ਯੋ ਚਾਯਨ੍ਤਿ ਯੋ ਅਯਂ ਵਿਨਿਚ੍ਛਯੋ.
ਆਰਾਮਟ੍ਠਕਥਾਵਣ੍ਣਨਾ
੧੦੨. ਆਰਾਮਟ੍ਠਕਥਾਯਂ ਆਰਾਮਂ ਅਭਿਯੁਞ੍ਜਤੀਤਿ ਇਦਂ ਅਭਿਯੋਗਕਰਣਂ ਪਰੇਸਂ ਭੂਮਟ੍ਠਭਣ੍ਡਾਦੀਸੁਪਿ ਕਾਤੁਂ ਵਟ੍ਟਤਿਯੇਵ. ਆਰਾਮਾਦਿਥਾਵਰੇਸੁ ਪਨ ਯੇਭੁਯ੍ਯੇਨ ਅਭਿਯੋਗਵਸੇਨੇਵ ਗਹਣਸਮ੍ਭਵਤੋ ਏਤ੍ਥੇਵ ਪਾਲ਼ਿਯਂ ਅਭਿਯੋਗੋ ਵੁਤ੍ਤੋ, ਇਤਿ ਇਮਿਨਾ ਨਯੇਨ ਸਬ੍ਬਤ੍ਥਾਪਿ ਸਕ੍ਕਾ ਞਾਤੁਨ੍ਤਿ ਗਹੇਤਬ੍ਬਂ. ਅਦਿਨ੍ਨਾਦਾਨਸ੍ਸ ਪਯੋਗਤ੍ਤਾਤਿ ਸਹਪਯੋਗਮਾਹ. ਵਤ੍ਥੁਮ੍ਹਿਯੇਵ ਕਤਪਯੋਗਤ੍ਤਾ ਸਹਪਯੋਗਵਸੇਨ ਹੇਤਂ ਦੁਕ੍ਕਟਂ. ਸਯਮ੍ਪੀਤਿ ਅਭਿਯੁਞ੍ਜਕੋਪਿ. ‘‘ਕਿਂ ਕਰੋਮਿ ਕਿਂ ਕਰੋਮੀ’’ਤਿ ਏਵਂ ਕਿਙ੍ਕਾਰਮੇਵ ਪਟਿਸ੍ਸੁਣਨ੍ਤੋ ਵਿਯ ਚਰਤੀਤਿ ਕਿਙ੍ਕਾਰਪਟਿਸ੍ਸਾਵੀ, ਤਸ੍ਸ ਭਾਵੋ ਕਿਙ੍ਕਾਰਪਟਿਸ੍ਸਾਵਿਭਾਵੋ, ਤਸ੍ਮਿਂ, ਅਤ੍ਤਨੋ ਵਸਵਤ੍ਤਿਭਾਵੇਤਿ ਵੁਤ੍ਤਂ ਹੋਤਿ. ਉਕ੍ਕੋਚਨ੍ਤਿ ਲਞ੍ਜਂ. ਸਬ੍ਬੇਸਂ ਪਾਰਾਜਿਕਨ੍ਤਿ ਕੂਟਵਿਨਿਚ੍ਛਯਿਕਾਦੀਨਂ. ਅਯਂ ਵਤ੍ਥੁਸਾਮੀਤਿਆਦਿਕਸ੍ਸ ਉਭਿਨ੍ਨਂ ਧੁਰਨਿਕ੍ਖੇਪਕਰਣਹੇਤੁਨੋ ਪਯੋਗਸ੍ਸ ਕਰਣਕ੍ਖਣੇਵ ਪਾਰਾਜਿਕਂ ਹੋਤੀਤਿ ਵੇਦਿਤਬ੍ਬਂ. ਸਚੇ ਪਨ ਸਾਮਿਕਸ੍ਸ ਵਿਮਤਿ ਚ ਧੁਰਨਿਕ੍ਖੇਪੋ ਚ ਕਮੇਨ ਉਪ੍ਪਜ੍ਜਨ੍ਤਿ, ਪਯੋਗਸਮੁਟ੍ਠਾਪਕਚਿਤ੍ਤਕ੍ਖਣੇ ਪਾਰਾਜਿਕਮੇਵ ਹੋਤਿ, ਨ ਥੁਲ੍ਲਚ੍ਚਯਂ. ਯਦਿ ਵਿਮਤਿਯੇਵ ਉਪ੍ਪਜ੍ਜਤਿ, ਤਦਾ ਥੁਲ੍ਲਚ੍ਚਯਮੇਵਾਤਿ ਵੇਦਿਤਬ੍ਬਂ, ਅਯਂ ਨਯੋ ਸਬ੍ਬਤ੍ਥ ਯਥਾਨੁਰੂਪਂ ਗਹੇਤਬ੍ਬੋ. ਧੁਰਨਿਕ੍ਖੇਪਵਸੇਨੇਵ ਪਰਾਜਯੋਤਿ ਸਾਮਿਕੋ ‘‘ਅਹਂ ਨ ਮੁਚ੍ਚਾਮੀ’’ਤਿ ਧੁਰਂ ਅਨਿਕ੍ਖਿਪਨ੍ਤੋ ਅਟ੍ਟੋ ਪਰਾਜਿਤੋ ਨਾਮ ਨ ਹੋਤੀਤਿ ਦਸ੍ਸੇਤਿ.
ਵਿਹਾਰਟ੍ਠਕਥਾਵਣ੍ਣਨਾ
੧੦੩. ਵਿਹਾਰਟ੍ਠਕਥਾਯਂ ਵਿਹਾਰਨ੍ਤਿ ਉਪਚਾਰਸੀਮਾਸਙ੍ਖਾਤਂ ਸਕਲਂ ਵਿਹਾਰਂ. ਪਰਿਵੇਣਨ੍ਤਿ ਤਸ੍ਸ ਵਿਹਾਰਸ੍ਸ ਅਬ੍ਭਨ੍ਤਰੇ ਵਿਸੁਂ ਵਿਸੁਂ ਪਾਕਾਰਾਦਿਪਰਿਚ੍ਛਿਨ੍ਨਟ੍ਠਾਨਂ. ਆਵਾਸਨ੍ਤਿ ਏਕਂ ਆਵਸਥਮਤ੍ਤਂ. ਗਣਸਨ੍ਤਕੇ ਪਰਿਚ੍ਛਿਨ੍ਨਸਾਮਿਕਤ੍ਤਾ ਸਕ੍ਕਾ ਧੁਰਂ ਨਿਕ੍ਖਿਪਾਪੇਤੁਨ੍ਤਿ ਆਹ ‘‘ਦੀਘਭਾਣਕਾਦਿਭੇਦਸ੍ਸ ਪਨ ਗਣਸ੍ਸਾ’’ਤਿ. ਇਧਾਪਿ ਸਚੇ ਏਕੋਪਿ ਧੁਰਂ ਨ ਨਿਕ੍ਖਿਪਤਿ, ਰਕ੍ਖਤਿਯੇਵ. ਏਸ ਨਯੋ ਬਹੂਨਂ ਸਨ੍ਤਕੇ ਸਬ੍ਬਤ੍ਥ.
ਖੇਤ੍ਤਟ੍ਠਕਥਾਵਣ੍ਣਨਾ
੧੦੪. ਖੇਤ੍ਤਟ੍ਠਕਥਾਯਂ ਨਿਰੁਮ੍ਭਿਤ੍ਵਾ ਵਾਤਿਆਦੀਸੁ ਗਣ੍ਹਨ੍ਤਸ੍ਸਾਤਿ ਪਚ੍ਚੇਕਂ ਯੋਜੇਤਬ੍ਬਂ, ਤਤ੍ਥ ਨਿਰੁਮ੍ਭਿਤ੍ਵਾ ਗਹਣਂ ਨਾਮ ਵੀਹਿਸੀਸਂ ਅਚ੍ਛਿਨ੍ਦਿਤ੍ਵਾ ਯਥਾਠਿਤਮੇਵ ਹਤ੍ਥੇਨ ਗਹੇਤ੍ਵਾ ਆਕਡ੍ਢਿਤ੍ਵਾ ਬੀਜਮਤ੍ਤਸ੍ਸੇਵ ਗਹਣਂ. ਏਕਮੇਕਨ੍ਤਿ ਏਕਂ ਵੀਹਿਸੀਸਂ. ਯਸ੍ਮਿਂ ਬੀਜੇ ਵਾਤਿਆਦਿ ਨਿਰੁਮ੍ਭਿਤ੍ਵਾ ਗਹਣਾਦੀਸੁ ਯਥਾਕ੍ਕਮਂ ਯੋਜੇਤਬ੍ਬਂ. ‘‘ਤਸ੍ਮਿਂ ਬਨ੍ਧਨਾ ਮੋਚਿਤਮਤ੍ਤੇ’’ਤਿ ਵਚਨਤੋ ਤਸ੍ਮਿਂ ਬੀਜਾਦਿਮ੍ਹਿ ਬਨ੍ਧਨਾ ਮੁਤ੍ਤੇ ਸਤਿ ਤਤੋ ਅਨਪਨੀਤੇਪਿ ਠਾਨਨ੍ਤਰਸ੍ਸ ਅਭਾਵਾ ਪਾਰਾਜਿਕਮੇਵ. ਯਸ੍ਸ ਪਨ ਸੀਸਾਦਿਕਸ੍ਸ ਸਨ੍ਤਰਾਦਿਨਾ ਸਹ ਸਂਸਿਬ੍ਬਨਂ ਵਾ ਏਕਾਬਦ੍ਧਤਾ ਵਾ ਹੋਤਿ, ਤਸ੍ਸ ਬਨ੍ਧਨਾ ਮੋਚਿਤੇ ਥੁਲ੍ਲਚ੍ਚਯਂ, ਇਤਰਟ੍ਠਾਨਤੋ ਮੋਚਿਤੇ ਪਾਰਾਜਿਕਨ੍ਤਿ ਗਹੇਤਬ੍ਬਂ, ਤੇਨਾਹ ਵੀਹਿਨਾਲ਼ਨ੍ਤਿਆਦਿ. ਸਭੁਸਨ੍ਤਿ ਪਲਾਲਸਹਿਤਂ. ਖੀਲੇਨਾਤਿ ਖਾਣੁਕੇਨ. ਏਤ੍ਥ ਚ ਖੀਲਸਙ੍ਕਮਨਾਦੀਸੁ ਸਹਪਯੋਗੋ ਧੁਰਨਿਕ੍ਖੇਪੋ ਚਾਤਿ ਉਭਯਂ ਸਮ੍ਭਵਤਿ. ਖੀਲਸਙ੍ਕਮਨਾਦਿ ਏਤ੍ਥ ਸਹਪਯੋਗੋ. ਤਸ੍ਮਿਞ੍ਚ ਕਤੇ ਯਦਿ ਸਾਮਿਕਾ ਧੁਰਂ ਨ ਨਿਕ੍ਖਿਪਨ੍ਤਿ ਪੁਨ ਗਣ੍ਹਿਤੁਕਾਮਾਵ ਹੋਨ੍ਤਿ, ਨ ਤਾਵ ਅਵਹਾਰੋ, ‘‘ਖੀਲਂ ਸਙ੍ਕਾਮੇਤ੍ਵਾ ਖੇਤ੍ਤਾਦਿਂ ਅਸੁਕੋ ਰਾਜਵਲ੍ਲਭੋ ਭਿਕ੍ਖੁ ਗਣ੍ਹਿਤੁਕਾਮੋ’’ਤਿ ਞਤ੍ਵਾ ਤਸ੍ਸ ਬਲਂ ਕਕ੍ਖਲ਼ਾਦਿਭਾਵਞ੍ਚ ਨਿਸ੍ਸਾਯ ਖੀਲਸਙ੍ਕਮਨਾਦਿਕਿਰਿਯਾਨਿਟ੍ਠਾਨਤੋ ਪਠਮਮੇਵ ਸਾਮਿਕਾ ਧੁਰਂ ਨਿਕ੍ਖਿਪਨ੍ਤਿ, ਨ ਅਵਹਾਰੋ ਏਤਸ੍ਸ ਪਯੋਗਨਿਟ੍ਠਾਨਤੋ ਪੁਰੇਤਰਮੇਵ ਧੁਰਸ੍ਸ ਨਿਕ੍ਖਿਤ੍ਤਤ੍ਤਾ. ਯਦਾ ਪਨ ਖੀਲਸਙ੍ਕਮਨਾਦਿਪਯੋਗੇਨੇਵ ਧੁਰਨਿਕ੍ਖੇਪੋ ਹੋਤਿ, ਤਦਾਯੇਵ ਅਵਹਾਰੋ, ਤੇਨੇਵੇਤ੍ਥ ‘‘ਤਞ੍ਚ ਖੋ ਸਾਮਿਕਾਨਂ ਧੁਰਨਿਕ੍ਖੇਪੇਨਾ’’ਤਿ ਵੁਤ੍ਤਂ. ਖੀਲਾਦੀਨਂ ਸਙ੍ਕਮਿਤਭਾਵਂ ਅਜਾਨਿਤ੍ਵਾ ਸਾਮਿਕਾਨਂ ਸਮ੍ਪਟਿਚ੍ਛਨਮ੍ਪੇਤ੍ਥ ਧੁਰਨਿਕ੍ਖੇਪੋਤਿ ਵੇਦਿਤਬ੍ਬੋ. ਏਵਂ ਸਬ੍ਬਤ੍ਥਾਤਿ ਯਥਾਵੁਤ੍ਤਮਤ੍ਥਂ ਰਜ੍ਜੁਸਙ੍ਕਮਨਾਦੀਸੁਪਿ ਅਤਿਦਿਸਤਿ. ਯਟ੍ਠਿਨ੍ਤਿ ਮਾਨਦਣ੍ਡਂ. ਏਕਸ੍ਮਿਂ ਅਨਾਗਤੇ ਥੁਲ੍ਲਚ੍ਚਯਂ, ਤਸ੍ਮਿਂ ਆਗਤੇ ਪਾਰਾਜਿਕਨ੍ਤਿ ਸਚੇ ਦਾਰੂਨਿ ਨਿਖਣਿਤ੍ਵਾ ਤਤ੍ਤਕੇਨੇਵ ਗਣ੍ਹਿਤੁਕਾਮੋ ਹੋਤਿ, ਅਵਸਾਨੇ ਦਾਰੁਮ੍ਹਿ ਪਾਰਾਜਿਕਂ. ਸਚੇ ਤਤ੍ਥ ਕਣ੍ਟਕਸਾਖਾਦੀਹਿ ਪਾਦਾਨਂ ਅਨ੍ਤਰਂ ਪਟਿਚ੍ਛਾਦੇਤ੍ਵਾ ਕਸ੍ਸਚਿ ਅਪ੍ਪਵੇਸਾਰਹਂ ਕਤ੍ਵਾ ਗਹੇਤੁਕਾਮੋ ਹੋਤਿ, ਅਵਸਾਨਸਾਖਾਯ ਪਾਰਾਜਿਕਂ, ਤੇਨਾਹ ‘‘ਸਾਖਾਪਰਿਵਾਰੇਨੇਵ ਅਤ੍ਤਨੋ ਕਾਤੁਂ ਸਕ੍ਕੋਤੀ’’ਤਿ, ਦਾਰੂਨਿ ਚ ਨਿਖਣਿਤ੍ਵਾ ਸਾਖਾਪਰਿਵਾਰਞ੍ਚ ਕਤ੍ਵਾ ਏਵ ਅਤ੍ਤਨੋ ਸਨ੍ਤਕਂ ਕਾਤੁਂ ਸਕ੍ਕੋਤੀਤਿ ਅਤ੍ਥੋ. ਖੇਤ੍ਤਮਰਿਯਾਦਨ੍ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਕੇਦਾਰਪਾਲ਼ਿ’’ਨ੍ਤਿ ਵੁਤ੍ਤਂ. ਇਦਞ੍ਚ ਖੀਲਸਙ੍ਕਮਨਾਦਿਨਾ ਗਹਣਂ ਆਰਾਮਾਦੀਸੁਪਿ ਲਬ੍ਭਤੇਵ.
ਵਤ੍ਥੁਟ੍ਠਕਥਾਵਣ੍ਣਨਾ
੧੦੫. ਵਤ੍ਥੁਟ੍ਠਕਥਾਯਂ ਤਿਣ੍ਣਂ ਪਾਕਾਰਾਨਨ੍ਤਿ ਇਟ੍ਠਕਸਿਲਾਦਾਰੂਨਂ ਵਸੇਨ ਤਿਣ੍ਣਂ ਪਾਕਾਰਾਨਂ.
੧੦੬. ਗਾਮਟ੍ਠਕਥਾਯਂ ‘‘ਗਾਮੋ ਨਾਮਾ’’ਤਿ ਪਾਲ਼ਿਯਂ ਨ ਵੁਤ੍ਤਂ ਸਬ੍ਬਸੋ ਗਾਮਲਕ੍ਖਣਸ੍ਸ ਪੁਬ੍ਬੇ ਵੁਤ੍ਤਤ੍ਤਾ.
ਅਰਞ੍ਞਟ੍ਠਕਥਾਵਣ੍ਣਨਾ
੧੦੭. ਅਰਞ੍ਞਟ੍ਠਕਥਾਯਂ ਵਿਨਿਵਿਜ੍ਝਿਤ੍ਵਾਤਿ ਉਜੁਕਮੇਵ ਵਿਨਿਵਿਜ੍ਝਿਤ੍ਵਾ. ਲਕ੍ਖਣਚ੍ਛਿਨ੍ਨਸ੍ਸਾਤਿ ਅਰਞ੍ਞਸਾਮਿਕਾਨਂ ਹਤ੍ਥਤੋ ਕਿਣਿਤ੍ਵਾ ਗਣ੍ਹਨ੍ਤੇਹਿ ਕਤਅਕ੍ਖਰਾਦਿਸਞ੍ਞਾਣਸ੍ਸ. ਛਲ੍ਲਿਯਾ ਪਰਿਯੋਨਦ੍ਧਨ੍ਤਿ ਇਮਿਨਾ ਸਾਮਿਕਾਨਂ ਨਿਰਾਪੇਕ੍ਖਤਾਯ ਚਿਰਛਡ੍ਡਿਤਭਾਵਂ ਦੀਪੇਤਿ, ਤੇਨਾਹ ‘‘ਗਹੇਤੁਂ ਵਟ੍ਟਤੀ’’ਤਿ. ਯਦਿ ਸਾਮਿਕਾਨਂ ਸਾਪੇਕ੍ਖਤਾ ਅਤ੍ਥਿ, ਨ ਵਟ੍ਟਤਿ. ਤਾਨਿ ਕਤਾਨਿ ਅਜ੍ਝਾਵੁਤ੍ਥਾਨਿ ਚ ਹੋਨ੍ਤੀਤਿ ਤਾਨਿ ਗੇਹਾਦੀਨਿ ਕਤਾਨਿ ਪਰਿਨਿਟ੍ਠਿਤਾਨਿ ਮਨੁਸ੍ਸੇਹਿ ਚ ਅਜ੍ਝਾਵੁਤ੍ਥਾਨਿ ਚ ਹੋਨ੍ਤਿ. ਦਾਰੂਨੀਤਿ ਗੇਹਾਦੀਨਂ ਕਤਤ੍ਤਾ ਅਵਸਿਟ੍ਠਦਾਰੂਨਿ. ਗਹੇਤੁਂ ਵਟ੍ਟਤੀਤਿ ਸਾਮਿਕਾਨਂ ਅਨਾਲਯਤ੍ਤਾ ਵੁਤ੍ਤਂ, ਤੇ ਚ ਯਦਿ ਗਹਣਕਾਲੇ ਦਿਸ੍ਵਾ ਸਾਲਯਾ ਹੁਤ੍ਵਾ ਵਾਰੇਨ੍ਤਿ, ਗਹੇਤੁਂ ਨ ਵਟ੍ਟਤਿਯੇਵ. ‘‘ਦੇਹੀ’’ਤਿ ਵੁਤ੍ਤੇ ਦਾਤਬ੍ਬਮੇਵਾਤਿ ‘‘ਦੇਹੀ’’ਤਿ ਵੁਤ੍ਤੇ ‘‘ਦਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਚ੍ਛਨ੍ਤਸ੍ਸ ‘‘ਦੇਹੀ’’ਤਿ ਅਵੁਤ੍ਤੇ ਅਦਤ੍ਵਾ ਗਮਨੇ ਆਪਤ੍ਤਿ ਨਤ੍ਥਿ. ਪਚ੍ਛਾਪਿ ਤੇਹਿ ਚੋਦਿਤੇ ਦਾਤਬ੍ਬਮੇਵ.
ਅਦਿਸ੍ਵਾ ਗਚ੍ਛਤਿ, ਭਣ੍ਡਦੇਯ੍ਯਨ੍ਤਿ ਸੁਦ੍ਧਚਿਤ੍ਤੇਨ ਗਤਸ੍ਸ ਭਣ੍ਡਦੇਯ੍ਯਂ. ਆਰਕ੍ਖਟ੍ਠਾਨਮ੍ਪਿ ਸੁਦ੍ਧਚਿਤ੍ਤੇਨ ਅਤਿਕ੍ਕਮਿਤ੍ਵਾ ਥੇਯ੍ਯਚਿਤ੍ਤੇ ਉਪ੍ਪਨ੍ਨੇਪਿ ਅਵਹਾਰੋ ਨਤ੍ਥਿ ਆਰਕ੍ਖਟ੍ਠਾਨਸ੍ਸ ਅਤਿਕ੍ਕਨ੍ਤਤ੍ਤਾ. ਕੇਚਿ ਪਨ ‘‘ਯਤ੍ਥ ਕਤ੍ਥਚਿ ਨੀਤਾਨਮ੍ਪਿ ਦਾਰੂਨਂ ਅਰਞ੍ਞਸਾਮਿਕਾਨਞ੍ਞੇਵ ਸਨ੍ਤਕਤ੍ਤਾ ਪੁਨ ਥੇਯ੍ਯਚਿਤ੍ਤਂ ਉਪ੍ਪਾਦੇਤ੍ਵਾ ਗਚ੍ਛਤਿ, ਪਾਰਾਜਿਕਮੇਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ‘‘ਆਰਕ੍ਖਟ੍ਠਾਨਂ ਪਤ੍ਵਾ…ਪੇ… ਅਸ੍ਸਤਿਯਾ ਅਤਿਕ੍ਕਮਤੀ’’ਤਿ, ਸਹਸਾ ਤਂ ਠਾਨਂ ਅਤਿਕ੍ਕਮਤੀਤਿਆਦਿਨਾ (ਪਾਰਾ. ਅਟ੍ਠ. ੧.੧੦੭) ਚ ਆਰਕ੍ਖਟ੍ਠਾਨਾਤਿਕ੍ਕਮੇਯੇਵ ਆਪਤ੍ਤਿਯਾ ਵੁਚ੍ਚਮਾਨਤ੍ਤਾ, ਆਰਕ੍ਖਟ੍ਠਾਨਾਤਿਕ੍ਕਮਮੇਵ ਸਨ੍ਧਾਯ ‘‘ਇਦਂ ਪਨ ਥੇਯ੍ਯਚਿਤ੍ਤੇਨ ਪਰਿਹਰਨ੍ਤਸ੍ਸ ਆਕਾਸੇਨ ਗਚ੍ਛਤੋਪਿ ਪਾਰਾਜਿਕਮੇਵਾ’’ਤਿ ਵੁਤ੍ਤਂ. ਯਞ੍ਚ ‘‘ਯਤ੍ਥ ਕਤ੍ਥਚਿ ਨੀਤਾਨਮ੍ਪਿ ਦਾਰੂਨਂ ਅਰਞ੍ਞਸਾਮਿਕਾਨਞ੍ਞੇਵ ਸਨ੍ਤਕਤ੍ਤਾ’’ਤਿ ਕਾਰਣਂ ਵੁਤ੍ਤਂ, ਤਮ੍ਪਿ ਆਰਕ੍ਖਟ੍ਠਾਨਤੋ ਬਹਿ ਪਾਰਾਜਿਕਾਪਜ੍ਜਨਸ੍ਸ ਕਾਰਣਂ ਨ ਹੋਤਿ ਭਣ੍ਡਦੇਯ੍ਯਭਾਵਸ੍ਸੇਵ ਕਾਰਣਤ੍ਤਾ. ਤੇਸਂ ਸਨ੍ਤਕਤ੍ਤੇਨੇਵ ਹਿ ਬਹਿ ਕਤਸ੍ਸਾਪਿ ਭਣ੍ਡਦੇਯ੍ਯਂ ਜਾਤਂ, ਇਤਰਥਾ ਚ ਭਣ੍ਡਦੇਯ੍ਯਮ੍ਪਿ ਨ ਸਿਯਾ ਸੁਙ੍ਕਘਾਤਾਤਿਕ੍ਕਮੇ ਵਿਯ. ਅਦ੍ਧਿਕੇਹਿ ਦਿਨ੍ਨਮੇਵ ਸੁਙ੍ਕਿਕਾਨਂ ਸਨ੍ਤਕਂ ਹੋਤਿ, ਨਾਦਿਨ੍ਨਂ, ਤੇਨ ਤਂ ਠਾਨਂ ਯਤੋ ਕੁਤੋਚਿ ਪਚ੍ਚਯਤੋ ਸੁਦ੍ਧਚਿਤ੍ਤੇਨ ਅਤਿਕ੍ਕਨ੍ਤਸ੍ਸ ਭਣ੍ਡਦੇਯ੍ਯਮ੍ਪਿ ਨ ਹੋਤਿ. ਇਧ ਪਨ ਅਰਞ੍ਞਸਾਮਿਕਾਨਂ ਸਨ੍ਤਕਤ੍ਤਾ ਸਬ੍ਬਤ੍ਥਾਪਿ ਭਣ੍ਡਦੇਯ੍ਯਮੇਵ ਹੋਤਿ, ਤੇਨੇਵੇਤਂ ਅਰਞ੍ਞੇ ਆਰਕ੍ਖਟ੍ਠਾਨਂ ਸੁਙ੍ਕਘਾਤਤੋਪਿ ਗਰੁਤਰਂ ਜਾਤਂ. ਯਦਿ ਹਿ ਆਰਕ੍ਖਟ੍ਠਾਨਤੋ ਬਹਿਪਿ ਥੇਯ੍ਯਚਿਤ੍ਤੇ ਸਤਿ ਅਵਹਾਰੋ ਭਵੇਯ੍ਯ, ਆਰਕ੍ਖਟ੍ਠਾਨਂ ਪਤ੍ਵਾਤਿਆਦਿਨਾ ਠਾਨਨਿਯਮੋ ਨਿਰਤ੍ਥਕੋ ਸਿਯਾ ਯਤ੍ਥ ਕਤ੍ਥਚਿ ਥੇਯ੍ਯਚਿਤ੍ਤੇ ਉਪ੍ਪਨ੍ਨੇ ਪਾਰਾਜਿਕਨ੍ਤਿ ਵਤ੍ਤਬ੍ਬਤੋ. ਤਸ੍ਮਾ ਆਰਕ੍ਖਟ੍ਠਾਨਤੋ ਬਹਿ ਥੇਯ੍ਯਚਿਤ੍ਤੇਨ ਗਚ੍ਛਨ੍ਤਸ੍ਸ ਅਵਹਾਰੋ ਨ ਭਵਤਿ ਏਵਾਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਇਦਂ ਪਨ ਥੇਯ੍ਯਚਿਤ੍ਤੇਨ ਪਰਿਹਰਨ੍ਤਸ੍ਸਾਤਿ ਯਸ੍ਮਿਂ ਪਦੇਸੇ ਅਤਿਕ੍ਕਨ੍ਤੇ ਤੇਸਂ ਅਰਞ੍ਞਂ ਆਰਕ੍ਖਟ੍ਠਾਨਞ੍ਚ ਅਤਿਕ੍ਕਨ੍ਤੋ ਨਾਮ ਹੋਤਿ, ਤਂ ਪਦੇਸਂ ਆਕਾਸੇਨਾਪਿ ਅਤਿਕ੍ਕਮਨਵਸੇਨ ਗਚ੍ਛਨ੍ਤਸ੍ਸਾਪੀਤਿ ਅਤ੍ਥੋ.
ਉਦਕਕਥਾਵਣ੍ਣਨਾ
੧੦੮. ਉਦਕਕਥਾਯਂ ਮਹਾਕੁਚ੍ਛਿਕਾ ਉਦਕਚਾਟਿ ਉਦਕਮਣਿਕੋ, ‘‘ਸਮੇਖਲਾ ਚਾਟਿ ਉਦਕਮਣਿਕੋ’’ਤਿਪਿ ਵਦਨ੍ਤਿ. ਤਤ੍ਥਾਤਿ ਤੇਸੁ ਭਾਜਨੇਸੁ. ਭੂਤਗਾਮੇਨ ਸਦ੍ਧਿਮ੍ਪੀਤਿ ਪਿ-ਸਦ੍ਦੇਨ ਅਕਪ੍ਪਿਯਪਥਵਿਮ੍ਪਿ ਸਙ੍ਗਣ੍ਹਾਤਿ. ਤਲ਼ਾਕਰਕ੍ਖਣਤ੍ਥਾਯਾਤਿ ‘‘ਮਹੋਦਕਂ ਆਗਨ੍ਤ੍ਵਾ ਤਲ਼ਾਕਮਰਿਯਾਦਂ ਮਾ ਛਿਨ੍ਦੀ’’ਤਿ ਤਲ਼ਾਕਰਕ੍ਖਣਤ੍ਥਂ. ਨਿਬ੍ਬਹਨਉਦਕਨ੍ਤਿ ਏਤ੍ਥ ਤਲ਼ਾਕਸ੍ਸ ਏਕੇਨ ਉਨ੍ਨਤੇਨ ਪਸ੍ਸੇਨ ਅਧਿਕਜਲਂ ਨਿਬ੍ਬਹਤਿ ਨਿਗਚ੍ਛਤਿ ਏਤੇਨਾਤਿ ‘‘ਨਿਬ੍ਬਹਨ’’ਨ੍ਤਿ ਅਧਿਕਜਲਨਿਕ੍ਖਮਨਮਾਤਿਕਾ ਵੁਚ੍ਚਤਿ. ਤਤ੍ਥ ਗਚ੍ਛਮਾਨਂ ਉਦਕਂ ਨਿਬ੍ਬਹਨਉਦਕਂ ਨਾਮ. ਨਿਦ੍ਧਮਨਤੁਮ੍ਬਨ੍ਤਿ ਸਸ੍ਸਾਦੀਨਂ ਅਤ੍ਥਾਯ ਇਟ੍ਠਕਾਦੀਹਿ ਕਤਂ ਉਦਕਨਿਕ੍ਖਮਨਪਨਾਲ਼ਿ. ਮਰਿਯਾਦਂ ਦੁਬ੍ਬਲਂ ਕਤ੍ਵਾਤਿ ਏਤ੍ਥ ਦੁਬ੍ਬਲਂ ਅਕਤ੍ਵਾਪਿ ਯਥਾਵੁਤ੍ਤਪ੍ਪਯੋਗੇ ਕਤੇ ਮਰਿਯਾਦਂ ਛਿਨ੍ਦਿਤ੍ਵਾ ਨਿਕ੍ਖਨ੍ਤਉਦਕਗ੍ਘਾਨੁਰੂਪੇਨ ਅਵਹਾਰੇਨ ਕਤ੍ਤਬ੍ਬਮੇਵ. ਯਤ੍ਤਕਂ ਤਪ੍ਪਚ੍ਚਯਾ ਸਸ੍ਸਂ ਉਪ੍ਪਜ੍ਜਤੀਤਿ ਬੀਜਕਸਿਕਮ੍ਮਾਦਿਬ੍ਬਯਂ ਠਪੇਤ੍ਵਾ ਯਂ ਅਧਿਕਲਾਭਂ ਉਪ੍ਪਜ੍ਜਤਿ, ਤਂ ਸਨ੍ਧਾਯ ਵੁਤ੍ਤਂ. ਨ ਹਿ ਤੇਹਿ ਕਾਤਬ੍ਬਂ ਵਯਕਰਣਮ੍ਪਿ ਏਤਸ੍ਸ ਦਾਤਬ੍ਬਂ. ਇਦਞ੍ਚ ਤਰੁਣਸਸ੍ਸੇ ਜਾਤੇ ਉਦਕਂ ਵਿਨਾਸੇਨ੍ਤਸ੍ਸ ਯੁਜ੍ਜਤਿ, ਸਸ੍ਸੇ ਪਨ ਸਬ੍ਬਥਾ ਅਕਤੇਯੇਵ ਉਦਕਂ ਵਿਨਾਸੇਨ੍ਤੇਨ ਚ ਉਦਕਗ੍ਘਮੇਵ ਦਾਤਬ੍ਬਂ, ਨ ਤਪ੍ਪਚ੍ਚਯਾ ਸਕਲਂ ਸਸ੍ਸਂ ਤੇਨ ਵਿਨਾਸਿਤਭਣ੍ਡਸ੍ਸੇਵ ਭਣ੍ਡਦੇਯ੍ਯਤ੍ਤਾ, ਇਤਰਥਾ ਵਾਣਿਜ੍ਜਾਦਿਅਤ੍ਥਾਯ ਪਰੇਹਿ ਠਪਿਤਭਣ੍ਡਂ ਅਵਹਰਨ੍ਤਸ੍ਸ ਤਦੁਭਯਮ੍ਪਿ ਗਹੇਤ੍ਵਾ ਭਣ੍ਡਗ੍ਘਂ ਕਾਤਬ੍ਬਂ ਸਿਯਾ, ਤਞ੍ਚ ਨ ਯੁਤ੍ਤਨ੍ਤਿ ਅਮ੍ਹਾਕਂ ਖਨ੍ਤਿ. ਸਾਮਿਕਾਨਂ ਧੁਰਨਿਕ੍ਖੇਪੇਨਾਤਿ ਏਤ੍ਥ ਏਕਸ੍ਸ ਸਨ੍ਤਕੇ ਤਲ਼ਾਕੇ ਖੇਤ੍ਤੇ ਚ ਜਾਤੇ ਤਸ੍ਸੇਵ ਧੁਰਨਿਕ੍ਖੇਪੇਨ ਪਾਰਾਜਿਕਂ, ਯਦਿ ਪਨ ਤਂ ਤਲ਼ਾਕਂ ਸਬ੍ਬਸਾਧਾਰਣਂ, ਖੇਤ੍ਤਾਨਿ ਪਾਟਿਪੁਗ੍ਗਲਿਕਾਨਿ, ਤਸ੍ਸ ਤਸ੍ਸ ਪੁਗ੍ਗਲਸ੍ਸੇਵ ਧੁਰਨਿਕ੍ਖੇਪੇ ਅਵਹਾਰੋ, ਅਥ ਖੇਤ੍ਤਾਨਿਪਿ ਸਬ੍ਬਸਾਧਾਰਣਾਨਿ, ਸਬ੍ਬੇਸਂ ਧੁਰਨਿਕ੍ਖੇਪੇਯੇਵ ਪਾਰਾਜਿਕਂ, ਨਾਸਤੀਤਿ ਦਟ੍ਠਬ੍ਬਂ.
ਅਨਿਗ੍ਗਤੇਤਿ ਅਨਿਕ੍ਖਨ੍ਤੇ, ਤਲ਼ਾਕੇਯੇਵ ਠਿਤੇਤਿ ਅਤ੍ਥੋ. ਪਰੇਸਂ ਮਾਤਿਕਾਮੁਖਨ੍ਤਿ ਖੁਦ੍ਦਕਮਾਤਿਕਾਮੁਖਂ. ਅਸਮ੍ਪਤ੍ਤੇਵਾਤਿ ਤਲ਼ਾਕਤੋ ਨਿਕ੍ਖਮਿਤ੍ਵਾ ਮਹਾਮਾਤਿਕਾਯਂ ਏਵ ਠਿਤੇ. ਅਨਿਕ੍ਖਨ੍ਤੇ ਬਦ੍ਧਾ ਸੁਬਦ੍ਧਾਤਿ ਤਲ਼ਾਕਤੋ ਅਨਿਕ੍ਖਨ੍ਤੇ ਭਣ੍ਡਦੇਯ੍ਯਮ੍ਪਿ ਨ ਹੋਤਿ ਸਬ੍ਬਸਾਧਾਰਣਤ੍ਤਾ ਉਦਕਸ੍ਸਾਤਿ ਅਧਿਪ੍ਪਾਯੋ. ਨਿਕ੍ਖਨ੍ਤੇ ਪਨ ਪਾਟਿਪੁਗ੍ਗਲਿਕਂ ਹੋਤੀਤਿ ਆਹ ‘‘ਨਿਕ੍ਖਨ੍ਤੇ ਬਦ੍ਧਾ ਭਣ੍ਡਦੇਯ੍ਯ’’ਨ੍ਤਿ. ਇਧ ਪਨ ਖੁਦ੍ਦਕਮਾਤਿਕਾਯਂ ਅਪ੍ਪਵਿਟ੍ਠਤ੍ਤਾ ਅਵਹਾਰੋ ਨ ਜਾਤੋ, ‘‘ਤਲ਼ਾਕਤੋ ਅਨਿਗ੍ਗਤੇ ਪਰੇਸਂ ਮਾਤਿਕਾਮੁਖਂ ਅਸਮ੍ਪਤ੍ਤੇਵਾ’’ਤਿ ਹੇਟ੍ਠਾ ਵੁਤ੍ਤਸ੍ਸ ਵਿਕਪ੍ਪਦ੍ਵਯਸ੍ਸ ‘‘ਅਨਿਕ੍ਖਨ੍ਤੇ ਬਦ੍ਧਾ ਸੁਬਦ੍ਧਾ, ਨਿਕ੍ਖਨ੍ਤੇ ਬਦ੍ਧਾ ਭਣ੍ਡਦੇਯ੍ਯ’’ਨ੍ਤਿ ਇਦਂ ਦ੍ਵਯਂ ਯਥਾਕ੍ਕਮੇਨ ਯੋਜਨਤ੍ਥਂ ਵੁਤ੍ਤਂ. ਨਤ੍ਥਿ ਅਵਹਾਰੋਤਿ ਏਤ੍ਥ ‘‘ਅਵਹਾਰੋ ਨਤ੍ਥਿ, ਭਣ੍ਡਦੇਯ੍ਯਂ ਪਨ ਹੋਤੀ’’ਤਿ ਕੇਚਿ ਵਦਨ੍ਤਿ, ਤਂ ਨ ਯੁਤ੍ਤਂ. ਵਤ੍ਥੁਂ…ਪੇ… ਨ ਸਮੇਤੀਤਿ ਏਤ੍ਥ ਤਲ਼ਾਕਗਤਉਦਕਸ੍ਸ ਸਬ੍ਬਸਾਧਾਰਣਤ੍ਤਾ ਪਰਸਨ੍ਤਕਵਤ੍ਥੁ ਨ ਹੋਤੀਤਿ ਅਧਿਪ੍ਪਾਯੋ.
ਦਨ੍ਤਪੋਨਕਥਾਵਣ੍ਣਨਾ
੧੦੯. ਦਨ੍ਤਕਟ੍ਠਕਥਾਯਂ ਤਤੋ ਪਟ੍ਠਾਯ ਅਵਹਾਰੋ ਨਤ੍ਥੀਤਿ ‘‘ਯਥਾਸੁਖਂ ਭਿਕ੍ਖੁਸਙ੍ਘੋ ਪਰਿਭੁਞ੍ਜਤੂ’’ਤਿ ਅਭਾਜੇਤ੍ਵਾਵ ਯਾਵਦਿਚ੍ਛਕਂ ਗਹਣਤ੍ਥਮੇਵ ਠਪਿਤਤ੍ਤਾ ਅਰਕ੍ਖਿਤਤ੍ਤਾ ਸਬ੍ਬਸਾਧਾਰਣਤ੍ਤਾ ਚ ਅਞ੍ਞਂ ਸਙ੍ਘਿਕਂ ਵਿਯ ਨ ਹੋਤੀਤਿ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤਸ੍ਸਾਪਿ ਨਤ੍ਥਿ ਅਵਹਾਰੋ. ਖਾਦਨ੍ਤੁ, ਪੁਨ ਸਾਮਣੇਰਾ ਆਹਰਿਸ੍ਸਨ੍ਤੀਤਿ ਕੇਚਿ ਥੇਰਾ ਵਦੇਯ੍ਯੁਨ੍ਤਿ ਯੋਜੇਤਬ੍ਬਂ.
ਵਨਪ੍ਪਤਿਕਥਾਵਣ੍ਣਨਾ
੧੧੦. ਵਨਪ੍ਪਤਿਕਥਾਯਂ ਸਨ੍ਧਾਰਿਤਤ੍ਤਾਤਿ ਛਿਨ੍ਨਸ੍ਸ ਰੁਕ੍ਖਸ੍ਸ ਪਤਿਤੁਂ ਆਰਦ੍ਧਸ੍ਸ ਸਨ੍ਧਾਰਣਮਤ੍ਤੇਨ ਵੁਤ੍ਤਂ, ਨ ਪਨ ਮਰਿਚਵਲ੍ਲਿਆਦੀਹਿ ਪੁਬ੍ਬੇ ਵੇਠੇਤ੍ਵਾ ਠਿਤਭਾਵੇਨ. ਤਾਦਿਸੇ ਹਿ ਛਿਨ੍ਨੇਪਿ ਅਵਹਾਰੋ ਨਤ੍ਥਿ ਅਰਞ੍ਞਟ੍ਠਕਥਾਯਂ ਵੇਠਿਤਵਲ੍ਲਿਯਂ ਵਿਯ. ਉਜੁਕਮੇਵ ਤਿਟ੍ਠਤੀਤਿ ਇਮਿਨਾ ਸਬ੍ਬਸੋ ਛਿਨ੍ਦਨਮੇਵ ਵਲ੍ਲਿਆਦੀਹਿ ਅਸਮ੍ਬਦ੍ਧਸ੍ਸ ਰੁਕ੍ਖਸ੍ਸ ਠਾਨਾਚਾਵਨਂ ਪੁਬ੍ਬੇ ਵਿਯ ਆਕਾਸਾਦੀਸੁ ਫੁਟ੍ਠਸਕਲਪਦੇਸਤੋ ਮੋਚਨਨ੍ਤਿ ਆਵੇਣਿਕਮਿਧ ਠਾਨਾਚਾਵਨਂ ਦਸ੍ਸੇਤਿ. ਕੇਚਿ ਪਨ ‘‘ਰੁਕ੍ਖਭਾਰੇਨ ਕਿਞ੍ਚਿਦੇਵ ਭਸ੍ਸਿਤ੍ਵਾ ਠਿਤਤ੍ਤਾ ਹੋਤਿਯੇਵ ਠਾਨਾਚਾਵਨ’’ਨ੍ਤਿ ਵਦਨ੍ਤਿ, ਤਨ੍ਨ, ਰੁਕ੍ਖੇਨ ਫੁਟ੍ਠਸ੍ਸ ਸਕਲਸ੍ਸ ਆਕਾਸਪਦੇਸਸ੍ਸ ਪਞ੍ਚਹਿ ਛਹਿ ਵਾ ਆਕਾਰੇਹਿ ਅਨਤਿਕ੍ਕਮਿਤਤ੍ਤਾ. ਵਾਤਮੁਖਂ ਸੋਧੇਤੀਤਿ ਯਥਾ ਵਾਤੋ ਆਗਨ੍ਤ੍ਵਾ ਰੁਕ੍ਖਂ ਪਾਤੇਤਿ, ਏਵਂ ਵਾਤਸ੍ਸ ਆਗਮਨਮਗ੍ਗਂ ਰੁਨ੍ਧਿਤ੍ਵਾ ਠਿਤਾਨਿ ਸਾਖਾਗੁਮ੍ਬਾਦੀਨਿ ਛਿਨ੍ਦਿਤ੍ਵਾ ਅਪਨੇਨ੍ਤੋ ਸੋਧੇਤਿ. ਮਣ੍ਡੂਕਕਣ੍ਟਕਂ ਵਾਤਿ ਮਣ੍ਡੂਕਾਨਂ ਨਙ੍ਗੁਟ੍ਠੇ ਅਗ੍ਗਕੋਟਿਯਂ ਠਿਤਕਣ੍ਟਕਨ੍ਤਿ ਵਦਨ੍ਤਿ, ਏਕੇ ‘‘ਵਿਸਮਚ੍ਛਕਣ੍ਟਕ’’ਨ੍ਤਿਪਿ ਵਦਨ੍ਤਿ.
ਹਰਣਕਕਥਾਵਣ੍ਣਨਾ
੧੧੧. ਹਰਣਕਕਥਾਯਂ ਹਰਣਕਨ੍ਤਿ ਵਤ੍ਥੁਸਾਮਿਨਾ ਹਰਿਯਮਾਨਂ. ਸੋ ਚ ਪਾਦਂ ਅਗ੍ਘਤਿ, ਪਾਰਾਜਿਕਮੇਵਾਤਿ ‘‘ਅਨ੍ਤਂ ਨ ਗਣ੍ਹਿਸ੍ਸਾਮੀ’’ਤਿ ਅਸਲ੍ਲਕ੍ਖਿਤਤ੍ਤਾ ਸਾਮਞ੍ਞਤੋ ‘‘ਗਣ੍ਹਿਸ੍ਸਾਮਿ ਏਤ’’ਨ੍ਤਿ ਸਲ੍ਲਕ੍ਖਿਤਸ੍ਸੇਵ ਪਟਸ੍ਸ ਏਕਦੇਸਤਾਯ ਤਮ੍ਪਿ ਗਣ੍ਹਿਤੁਕਾਮੋਵਾਤਿ ਪਾਰਾਜਿਕਂ ਵੁਤ੍ਤਂ. ਸਭਣ੍ਡਹਾਰਕਨ੍ਤਿ ਸਹਭਣ੍ਡਹਾਰਕਂ, ਸਕਾਰਾਦੇਸਸ੍ਸ ਵਿਕਪ੍ਪਤ੍ਤਾ ਸਹ ਸਦ੍ਦੋਵ ਠਿਤੋ, ਭਣ੍ਡਹਾਰਕੇਨ ਸਹ ਤਂ ਭਣ੍ਡਨ੍ਤਿ ਅਤ੍ਥੋ. ਸਾਸਙ੍ਕੋਤਿ ‘‘ਯਦਿ ਉਪਸਙ੍ਕਮਿਤ੍ਵਾ ਭਣ੍ਡਂ ਗਣ੍ਹਿਸ੍ਸਾਮਿ, ਆਵੁਧੇਨ ਮਂ ਪਹਰੇਯ੍ਯਾ’’ਤਿ ਭਯੇਨ ਸਞ੍ਜਾਤਾਸਙ੍ਕੋ. ਏਕਮਨ੍ਤਂ ਪਟਿਕ੍ਕਮ੍ਮਾਤਿ ਭਯੇਨੇਵ ਅਨੁਪਗਨ੍ਤ੍ਵਾ ਮਗ੍ਗਤੋ ਸਯਂ ਪਟਿਕ੍ਕਮ੍ਮ. ਸਨ੍ਤਜ੍ਜੇਤ੍ਵਾਤਿ ਫਰੁਸਵਾਚਾਯ ਚੇਵ ਆਵੁਧਪਰਿਵਤ੍ਤਨਾਦਿਕਾਯਵਿਕਾਰੇਨ ਚ ਸਨ੍ਤਜ੍ਜੇਤ੍ਵਾ. ਅਨਜ੍ਝਾਵੁਤ੍ਥਕਨ੍ਤਿ ਅਪਰਿਗ੍ਗਹਿਤਕਂ. ਆਲਯੇਨ ਅਨਧਿਮੁਤ੍ਤਮ੍ਪਿ ਭਣ੍ਡਂ ਅਨਜ੍ਝਾਵੁਤ੍ਥਕਂ ਨਾਮ ਹੋਤੀਤਿ ਆਹ ‘‘ਆਹਰਾਪੇਨ੍ਤੇ ਦਾਤਬ੍ਬ’’ਨ੍ਤਿ, ਇਮਿਨਾ ਪਠਮਂ ਪਰਿਚ੍ਚਤ੍ਤਾਲਯਾਨਮ੍ਪਿ ਯਦਿ ਪਚ੍ਛਾਪਿ ਸਕਸਞ੍ਞਾ ਉਪ੍ਪਜ੍ਜਤਿ, ਤੇਸਞ੍ਞੇਵ ਤਂ ਭਣ੍ਡਂ ਹੋਤਿ, ਬਲਕ੍ਕਾਰੇਨਾਪਿ ਸਕਸਞ੍ਞਾਯ ਤਸ੍ਸ ਗਹਣੇ ਦੋਸੋ ਨਤ੍ਥਿ, ਅਦਦਨ੍ਤਸ੍ਸੇਵ ਅਵਹਾਰੋਤਿ ਦਸ੍ਸੇਤਿ. ਯਦਿ ਪਨ ਸਾਮਿਨੋ ‘‘ਪਰਿਚ੍ਚਤ੍ਤਂ ਮਯਾ ਪਠਮਂ, ਇਦਾਨਿ ਮਮ ਸਨ੍ਤਕਂ ਵਾ ਏਤਂ, ਨੋ’’ਤਿ ਆਸਙ੍ਕਾ ਹੋਤਿ, ਬਲਕ੍ਕਾਰੇਨ ਗਹੇਤੁਂ ਨ ਵਟ੍ਟਤਿ ਸਕਸਞ੍ਞਾਬਲੇਨੇਵ ਪੁਨ ਗਹੇਤਬ੍ਬਭਾਵਸ੍ਸ ਆਪਨ੍ਨਤ੍ਤਾ. ‘‘ਅਦੇਨ੍ਤਸ੍ਸ ਪਾਰਾਜਿਕ’’ਨ੍ਤਿ ਵਚਨਤੋ ਚੋਰਸ੍ਸ ਸਕਸਞ੍ਞਾਯ ਵਿਜ੍ਜਮਾਨਾਯਪਿ ਸਾਮਿਕੇਸੁ ਸਾਲਯੇਸੁ ਅਦਾਤੁਂ ਨ ਵਟ੍ਟਤੀਤਿ ਦੀਪਿਤਂ ਹੋਤਿ. ਅਞ੍ਞੇਸੂਤਿ ਮਹਾਪਚ੍ਚਰਿਯਾਦੀਸੁ. ਵਿਚਾਰਣਾਯੇਵ ਨਤ੍ਥੀਤਿ ਇਮਿਨਾ ਤਤ੍ਥਾਪਿ ਪਟਿਕ੍ਖੇਪਾਭਾਵਤੋ ਅਯਮੇਵ ਅਤ੍ਥੋਤਿ ਦਸ੍ਸੇਤਿ.
ਉਪਨਿਧਿਕਥਾਵਣ੍ਣਨਾ
੧੧੨. ਉਪਨਿਧਿਕਥਾਯਂ ਸਙ੍ਗੋਪਨਤ੍ਥਾਯ ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਸ੍ਸ ਭਣ੍ਡਸ੍ਸ ਗੁਤ੍ਤਟ੍ਠਾਨੇ ਪਟਿਸਾਮਨਪ੍ਪਯੋਗਂ ਵਿਨਾ ਨਾਹਂ ਗਣ੍ਹਾਮੀਤਿਆਦਿਨਾ ਅਞ੍ਞਸ੍ਮਿਂ ਪਯੋਗੇ ਅਕਤੇ ਰਜ੍ਜਸਙ੍ਖੋਭਾਦਿਕਾਲੇ ‘‘ਨ ਦਾਨਿ ਤਸ੍ਸ ਦਸ੍ਸਾਮਿ, ਨ ਮਯ੍ਹਂ ਦਾਨਿ ਦਸ੍ਸਤੀ’’ਤਿ ਉਭੋਹਿਪਿ ਸਕਸਕਟ੍ਠਾਨੇ ਨਿਸੀਦਿਤ੍ਵਾ ਧੁਰਨਿਕ੍ਖੇਪੇ ਕਤੇਪਿ ਅਵਹਾਰੋ ਨਤ੍ਥਿ. ਕੇਚਿ ਪਨੇਤ੍ਥ ‘‘ਪਾਰਾਜਿਕਮੇਵ ਪਟਿਸਾਮਨਪ੍ਪਯੋਗਸ੍ਸ ਕਤਤ੍ਤਾ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਨ ਸਾਰਤੋ ਪਚ੍ਚੇਤਬ੍ਬਂ. ਪਟਿਸਾਮਨਕਾਲੇ ਹਿਸ੍ਸ ਥੇਯ੍ਯਚਿਤ੍ਤਂ ਨਤ੍ਥਿ, ‘‘ਨ ਦਾਨਿ ਤਸ੍ਸ ਦਸ੍ਸਾਮੀ’’ਤਿ ਥੇਯ੍ਯਚਿਤ੍ਤੁਪ੍ਪਤ੍ਤਿਕ੍ਖਣੇ ਪਨ ਸਾਮਿਨੋ ਧੁਰਨਿਕ੍ਖੇਪਚਿਤ੍ਤੁਪ੍ਪਤ੍ਤਿਯਾ ਹੇਤੁਭੂਤੋ ਕਾਯਵਚੀਪਯੋਗੋ ਨਤ੍ਥਿ, ਯੇਨ ਸੋ ਆਪਤ੍ਤਿਂ ਆਪਜ੍ਜੇਯ੍ਯ. ਨ ਹਿ ਅਕਿਰਿਯਸਮੁਟ੍ਠਾਨਾਯਂ ਆਪਤ੍ਤੀਤਿ. ਦਾਨੇ ਸਉਸ੍ਸਾਹੋ, ਰਕ੍ਖਤਿ ਤਾਵਾਤਿ ਅਵਹਾਰਂ ਸਨ੍ਧਾਯ ਅਵੁਤ੍ਤਤ੍ਤਾ ਨਾਹਂ ਗਣ੍ਹਾਮੀਤਿਆਦਿਨਾ ਮੁਸਾਵਾਦਕਰਣੇ ਪਾਚਿਤ੍ਤਿਯਮੇਵ ਹੋਤਿ, ਨ ਦੁਕ੍ਕਟਂ ਥੇਯ੍ਯਚਿਤ੍ਤਾਭਾਵੇਨ ਸਹਪਯੋਗਸ੍ਸਾਪਿ ਅਭਾਵਤੋਤਿ ਗਹੇਤਬ੍ਬਂ. ਯਦਿਪਿ ਮੁਖੇਨ ਦਸ੍ਸਾਮੀਤਿ ਵਦਤਿ…ਪੇ… ਪਾਰਾਜਿਕਨ੍ਤਿ ਏਤ੍ਥ ਕਤਰਪਯੋਗੇਨ ਆਪਤ੍ਤਿ, ਨ ਤਾਵ ਪਠਮੇਨ ਭਣ੍ਡਪਟਿਸਾਮਨਪ੍ਪਯੋਗੇਨ ਤਦਾ ਥੇਯ੍ਯਚਿਤ੍ਤਾਭਾਵਾ, ਨਾਪਿ ‘‘ਦਸ੍ਸਾਮੀ’’ਤਿ ਕਥਨਪ੍ਪਯੋਗੇਨ ਤਦਾ ਥੇਯ੍ਯਚਿਤ੍ਤੇ ਵਿਜ੍ਜਮਾਨੇਪਿ ਪਯੋਗਸ੍ਸ ਕਪ੍ਪਿਯਤ੍ਤਾਤਿ? ਵੁਚ੍ਚਤੇ – ਸਾਮਿਨਾ ‘‘ਦੇਹੀ’’ਤਿ ਬਹੁਸੋ ਯਾਚਿਯਮਾਨੋਪਿ ਅਦਤ੍ਵਾ ਯੇਨ ਪਯੋਗੇਨ ਅਤ੍ਤਨੋ ਅਦਾਤੁਕਾਮਤਂ ਸਾਮਿਕਸ੍ਸ ਞਾਪੇਤਿ, ਯੇਨ ਚ ਸੋ ‘‘ਅਦਾਤੁਕਾਮੋ ਅਯਂ ਵਿਕ੍ਖਿਪਤੀ’’ਤਿ ਞਤ੍ਵਾ ਧੁਰਂ ਨਿਕ੍ਖਿਪਤਿ, ਤੇਨੇਵ ਪਯੋਗੇਨਸ੍ਸ ਆਪਤ੍ਤਿ. ਨ ਹੇਤ੍ਥ ਉਪਨਿਕ੍ਖਿਤ੍ਤਭਣ੍ਡੇ ਪਰਿਯਾਯੇਨ ਮੁਤ੍ਤਿ ਅਤ੍ਥਿ. ਅਦਾਤੁਕਾਮਤਾਯ ਹਿ ਕਦਾ ਤੇ ਦਿਨ੍ਨਂ, ਕਤ੍ਥ ਤੇ ਦਿਨ੍ਨਨ੍ਤਿਆਦਿਪਰਿਯਾਯਵਚਨੇਨਾਪਿ ਸਾਮਿਕਸ੍ਸ ਧੁਰੇ ਨਿਕ੍ਖਿਪਾਪਿਤੇ ਆਪਤ੍ਤਿਯੇਵ. ਤੇਨੇਵ ਅਟ੍ਠਕਥਾਯਂ ਵੁਤ੍ਤਂ – ‘‘ਕਿਂ ਤੁਮ੍ਹੇ ਭਣਥ…ਪੇ… ਏਵਂ ਉਭਿਨ੍ਨਂ ਧੁਰਨਿਕ੍ਖੇਪੇਨ ਭਿਕ੍ਖੁਨੋ ਪਾਰਾਜਿਕ’’ਨ੍ਤਿ (ਪਾਰਾ. ਅਟ੍ਠ. ੧.੧੧੧). ਪਰਸਨ੍ਤਕਸ੍ਸ ਪਰੇਹਿ ਗਣ੍ਹਾਪਨੇ ਏਵ ਪਰਿਯਾਯਤੋ ਮੁਤ੍ਤਿ, ਨ ਸਬ੍ਬਤ੍ਥਾਤਿ ਗਹੇਤਬ੍ਬਂ. ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਤ੍ਤਾਤਿ ਏਤ੍ਥ ਅਤ੍ਤਨੋ ਹਤ੍ਥੇ ਸਾਮਿਨਾ ਦਿਨ੍ਨਤਾਯ ਭਣ੍ਡਾਗਾਰਿਕਟ੍ਠਾਨੇ ਠਿਤਤ੍ਤਾ ਚ ਠਾਨਾਚਾਵਨੇਪਿ ਨਤ੍ਥਿ ਅਵਹਾਰੋ, ਥੇਯ੍ਯਚਿਤ੍ਤੇਨ ਪਨ ਗਹਣੇ ਦੁਕ੍ਕਟਤੋ ਨ ਮੁਚ੍ਚਤੀਤਿ ਵੇਦਿਤਬ੍ਬਂ.
ਏਸੇਵ ਨਯੋਤਿ ਉਦ੍ਧਾਰੇਯੇਵ ਚੋਰਸ੍ਸ ਪਾਰਾਜਿਕਂ, ਕਸ੍ਮਾ? ਅਞ੍ਞੇਹਿ ਸਾਧਾਰਣਸ੍ਸ ਅਭਿਞ੍ਞਾਣਸ੍ਸ ਵੁਤ੍ਤਤ੍ਤਾ. ਅਞ੍ਞਂ ਤਾਦਿਸਮੇਵ ਗਣ੍ਹਨ੍ਤੇ ਯੁਜ੍ਜਤੀਤਿ ਸਞ੍ਞਾਣਤੋ ਓਕਾਸਤੋ ਚ ਤੇਨ ਸਦਿਸਮੇਵ ਅਞ੍ਞਂ ਗਣ੍ਹਨ੍ਤੇ ਯੁਜ੍ਜਤਿ, ਚੋਰੇਨ ਸਲ੍ਲਕ੍ਖਿਤਪ੍ਪਦੇਸਤੋ ਤਂ ਅਪਨੇਤ੍ਵਾ ਕੇਹਿਚਿ ਤਤ੍ਥ ਤਾਦਿਸੇ ਅਞ੍ਞਸ੍ਮਿਂ ਪਤ੍ਤੇ ਠਪਿਤੇ ਤਂ ਗਣ੍ਹਨ੍ਤੇਯੇਵ ਯੁਜ੍ਜਤੀਤਿ ਅਧਿਪ੍ਪਾਯੋ, ਤੇਨ ਚੋਰੇਨ ਦਿਵਾ ਸਲ੍ਲਕ੍ਖਿਤਪਤ੍ਤਂ ਅਞ੍ਞਤ੍ਥ ਅਪਨੇਤ੍ਵਾ ਤਦਞ੍ਞੇ ਤਾਦਿਸੇ ਪਤ੍ਤੇ ਤਤ੍ਥ ਠਪਿਤੇਪਿ ਚੋਰਸ੍ਸ ਪਚ੍ਛਾ ਰਤ੍ਤਿਭਾਗੇ ਉਪ੍ਪਜ੍ਜਮਾਨਂ ਥੇਯ੍ਯਚਿਤ੍ਤਂ ਦਿਵਾ ਸਲ੍ਲਕ੍ਖਿਤਪ੍ਪਦੇਸੇ ਠਪਿਤਂ ਅਞ੍ਞਂ ਤਾਦਿਸਂ ਪਤ੍ਤਮੇਵ ਆਲਮ੍ਬਿਤ੍ਵਾ ਉਪ੍ਪਜ੍ਜਤੀਤਿ ਦਸ੍ਸਿਤਂ ਹੋਤਿ. ਪਦਵਾਰੇਨਾਤਿ ਥੇਰੇਨ ਨੀਹਰਿਤ੍ਵਾ ਦਿਨ੍ਨਂ ਪਤ੍ਤਂ ਗਹੇਤ੍ਵਾ ਗਚ੍ਛਤੋ ਚੋਰਸ੍ਸ ਪਦਵਾਰੇਨ. ਅਤਾਦਿਸਮੇਵ ਗਣ੍ਹਨ੍ਤੇ ਯੁਜ੍ਜਤੀਤਿ ਅਤਾਦਿਸਸ੍ਸ ਥੇਰੇਨ ਗਹਣਕ੍ਖਣੇ ਅਵਹਾਰਾਭਾਵਤੋ ਪਚ੍ਛਾ ਹਤ੍ਥਪਤ੍ਤਂ ‘‘ਤ’’ਨ੍ਤਿ ਵਾ ‘‘ਅਞ੍ਞ’’ਨ੍ਤਿ ਵਾ ਸਞ੍ਞਾਯ ‘‘ਇਦਂ ਗਹੇਤ੍ਵਾ ਗਚ੍ਛਾਮੀ’’ਤਿ ਗਮਨੇ ਪਦਵਾਰੇਨੇਵ ਅਵਹਾਰੋ ਯੁਜ੍ਜਤੀਤਿ ਅਧਿਪ੍ਪਾਯੋ.
ਪਾਰਾਜਿਕਂ ਨਤ੍ਥੀਤਿ ਪਦਵਾਰੇਪਿ ਪਾਰਾਜਿਕਂ ਨਤ੍ਥਿ ਉਪਨਿਧਿਭਣ੍ਡੇ ਵਿਯਾਤਿ ਗਹੇਤਬ੍ਬਂ. ਗਾਮਦ੍ਵਾਰਨ੍ਤਿ ਬਹਿਗਾਮੇ ਵਿਹਾਰਸ੍ਸ ਪਤਿਟ੍ਠਿਤਤ੍ਤਾ ਗਾਮਪ੍ਪਵੇਸਸ੍ਸ ਆਰਮ੍ਭਪ੍ਪਦੇਸਦਸ੍ਸਨਵਸੇਨ ਵੁਤ੍ਤਂ, ਅਨ੍ਤੋਗਾਮਨ੍ਤਿ ਅਤ੍ਥੋ. ਦ੍ਵਿਨ੍ਨਮ੍ਪਿ ਉਦ੍ਧਾਰੇਯੇਵ ਪਾਰਾਜਿਕਨ੍ਤਿ ਥੇਰਸ੍ਸ ਅਭਣ੍ਡਾਗਾਰਿਕਤ੍ਤਾ ਵੁਤ੍ਤਂ. ਯਦਿ ਹਿ ਸੋ ਭਣ੍ਡਾਗਾਰਿਕੋ ਭਵੇਯ੍ਯ, ਸਬ੍ਬਮ੍ਪਿ ਉਪਨਿਕ੍ਖਿਤ੍ਤਮੇਵ ਸਿਯਾ, ਉਪਨਿਕ੍ਖਿਤ੍ਤਭਣ੍ਡੇ ਚ ਥੇਯ੍ਯਚਿਤ੍ਤੇਨ ਗਣ੍ਹਤੋਪਿ ਨ ਤਾਵ ਥੇਰਸ੍ਸ ਅਵਹਾਰੋ ਹੋਤਿ, ਚੋਰਸ੍ਸੇਵ ਅਵਹਾਰੋ. ਉਭਿਨ੍ਨਮ੍ਪਿ ਦੁਕ੍ਕਟਨ੍ਤਿ ਥੇਰਸ੍ਸ ਅਤ੍ਤਨੋ ਸਨ੍ਤਕਤਾਯ ਚੋਰਸ੍ਸ ਸਾਮਿਕੇਨ ਦਿਨ੍ਨਤ੍ਤਾ ਅਵਹਾਰੋ ਨ ਜਾਤੋ, ਉਭਿਨ੍ਨਮ੍ਪਿ ਅਸੁਦ੍ਧਚਿਤ੍ਤੇਨ ਗਹਿਤਤ੍ਤਾ ਦੁਕ੍ਕਟਨ੍ਤਿ ਅਤ੍ਥੋ.
ਆਣਤ੍ਤਿਯਾ ਗਹਿਤਤ੍ਤਾਤਿ ‘‘ਪਤ੍ਤਚੀਵਰਂ ਗਣ੍ਹਾ’’ਤਿ ਏਵਂ ਥੇਰੇਨ ਕਤਆਣਤ੍ਤਿਯਾ ਗਹਿਤਤ੍ਤਾ. ਅਟਵਿਂ ਪਵਿਸਤਿ, ਪਦਵਾਰੇਨ ਕਾਰੇਤਬ੍ਬੋਤਿ ‘‘ਪਤ੍ਤਚੀਵਰਂ ਗਣ੍ਹ, ਅਸੁਕਂ ਨਾਮ ਗਾਮਂ ਗਨ੍ਤ੍ਵਾ ਪਿਣ੍ਡਾਯ ਚਰਿਸ੍ਸਾਮਾ’’ਤਿ ਥੇਰੇਨ ਵਿਹਾਰਤੋ ਪਟ੍ਠਾਯ ਗਾਮਮਗ੍ਗੇਪਿ ਸਕਲੇਪਿ ਗਾਮੇ ਵਿਚਰਣਸ੍ਸ ਨਿਯਮਿਤਤ੍ਤਾ ਮਗ੍ਗਤੋ ਓਕ੍ਕਮ੍ਮ ਗਚ੍ਛਨ੍ਤਸ੍ਸੇਵ ਪਦਵਾਰੇਨ ਆਪਤ੍ਤਿ ਵੁਤ੍ਤਾ. ਵਿਹਾਰਸ੍ਸ ਹਿ ਪਰਭਾਗੇ ਉਪਚਾਰਤੋ ਪਟ੍ਠਾਯ ਯਾਵ ਤਸ੍ਸ ਗਾਮਸ੍ਸ ਪਰਤੋ ਉਪਚਾਰੋ, ਤਾਵ ਸਬ੍ਬਂ ਦਹਰਸ੍ਸ ਥੇਰਾਣਤ੍ਤਿਯਾ ਸਞ੍ਚਰਣੂਪਚਾਰੋਵ ਹੋਤਿ, ਨ ਪਨ ਤਤੋ ਪਰਂ. ਤੇਨੇਵ ‘‘ਉਪਚਾਰਾਤਿਕ੍ਕਮੇ ਪਾਰਾਜਿਕਂ. ਗਾਮੂਪਚਾਰਾਤਿਕ੍ਕਮੇ ਪਾਰਾਜਿਕ’’ਨ੍ਤਿ ਚ ਵੁਤ੍ਤਂ. ਪਟਿਨਿਵਤ੍ਤਨੇ ਚੀਵਰਧੋਵਨਾਦਿਅਤ੍ਥਾਯ ਪੇਸਨੇਪਿ ਏਸੇਵ ਨਯੋ. ਅਟ੍ਠਤ੍ਵਾ ਅਨਿਸੀਦਿਤ੍ਵਾਤਿ ਏਤ੍ਥ ਵਿਹਾਰਂ ਪਵਿਸਿਤ੍ਵਾ ਸੀਸਾਦੀਸੁ ਭਾਰਂ ਭੂਮਿਯਂ ਅਨਿਕ੍ਖਿਪਿਤ੍ਵਾ ਤਿਟ੍ਠਨ੍ਤੋ ਵਾ ਨਿਸੀਦਨ੍ਤੋ ਵਾ ਵਿਸ੍ਸਮਿਤ੍ਵਾ ਥੇਯ੍ਯਚਿਤ੍ਤੇ ਵੂਪਸਨ੍ਤੇ ਪੁਨ ਥੇਯ੍ਯਚਿਤ੍ਤਂ ਉਪ੍ਪਾਦੇਤ੍ਵਾ ਗਚ੍ਛਤਿ ਚੇ, ਪਾਦੁਦ੍ਧਾਰੇਨ ਕਾਰੇਤਬ੍ਬੋ. ਸਚੇ ਭੂਮਿਯਂ ਨਿਕ੍ਖਿਪਿਤ੍ਵਾ ਪੁਨ ਤਂ ਗਹੇਤ੍ਵਾ ਗਚ੍ਛਤਿ, ਉਦ੍ਧਾਰੇਨ ਕਾਰੇਤਬ੍ਬੋ. ਕਸ੍ਮਾ? ਆਣਾਪਕਸ੍ਸ ਆਣਤ੍ਤਿਯਾ ਯਂ ਕਤ੍ਤਬ੍ਬਂ, ਤਸ੍ਸ ਤਾਵਤਾ ਪਰਿਨਿਟ੍ਠਿਤਤ੍ਤਾ. ‘‘ਅਸੁਕਂ ਨਾਮ ਗਾਮ’’ਨ੍ਤਿ ਅਨਿਯਮੇਤ੍ਵਾ ‘‘ਅਨ੍ਤੋਗਾਮਂ ਗਮਿਸ੍ਸਾਮਾ’’ਤਿ ਅਵਿਸੇਸੇਨ ਵੁਤ੍ਤੇ ਵਿਹਾਰਸਾਮਨ੍ਤਾ ਪੁਬ੍ਬੇ ਪਿਣ੍ਡਾਯ ਪਵਿਟ੍ਠਪੁਬ੍ਬਾ ਸਬ੍ਬੇ ਗੋਚਰਗਾਮਾਪਿ ਖੇਤ੍ਤਮੇਵਾਤਿ ਵਦਨ੍ਤਿ. ਸੇਸਨ੍ਤਿ ਮਗ੍ਗੁਕ੍ਕਮਨਵਿਹਾਰਾਭਿਮੁਖਗਮਨਾਦਿ ਸਬ੍ਬਂ. ਪੁਰਿਮਸਦਿਸਮੇਵਾਤਿ ਅਨਾਣਤ੍ਤਿਯਾ ਗਹਿਤੇਪਿ ਸਾਮਿਕਸ੍ਸ ਕਥੇਤ੍ਵਾ ਗਹਿਤਤ੍ਤਾ ਹੇਟ੍ਠਾ ਵੁਤ੍ਤਵਿਹਾਰੂਪਚਾਰਾਦਿ ਸਬ੍ਬਂ ਖੇਤ੍ਤਮੇਵਾਤਿ ਕਤ੍ਵਾ ਵੁਤ੍ਤਂ. ਏਸੇਵ ਨਯੋਤਿ ਅਨ੍ਤਰਾਮਗ੍ਗੇ ਥੇਯ੍ਯਚਿਤ੍ਤਂ ਉਪ੍ਪਾਦੇਤ੍ਵਾਤਿਆਦਿਨਾ (ਪਾਰਾ. ਅਟ੍ਠ. ੧.੧੧੨) ਵੁਤ੍ਤਂ ਨਯਂ ਅਤਿਦਿਸਤਿ.
ਨਿਮਿਤ੍ਤੇ ਵਾ ਕਤੇਤਿ ਚੀਵਰਂ ਮੇ ਕਿਲਿਟ੍ਠਂ, ਕੋ ਨੁ ਖੋ ਰਜਿਤ੍ਵਾ ਦਸ੍ਸਤੀਤਿਆਦਿਨਾ ਨਿਮਿਤ੍ਤੇ ਕਤੇ. ਵੁਤ੍ਤਨਯੇਨੇਵਾਤਿ ਅਨਾਣਤ੍ਤਸ੍ਸ ਥੇਰੇਨ ਸਦ੍ਧਿਂ ਪਤ੍ਤਚੀਵਰਂ ਗਹੇਤ੍ਵਾ ਗਮਨਵਾਰੇ ਵੁਤ੍ਤਨਯੇਨੇਵ. ਏਕਪਸ੍ਸੇਤਿ ਵਿਹਾਰਸ੍ਸ ਮਹਨ੍ਤਤਾਯ ਅਤ੍ਤਾਨਂ ਅਦਸ੍ਸੇਤ੍ਵਾ ਏਕਸ੍ਮਿਂ ਪਸ੍ਸੇ. ਥੇਯ੍ਯਚਿਤ੍ਤੇਨ ਪਰਿਭੁਞ੍ਜਨ੍ਤੋ ਜੀਰਾਪੇਤੀਤਿ ਥੇਯ੍ਯਚਿਤ੍ਤੇ ਉਪ੍ਪਨ੍ਨੇ ਠਾਨਾਚਾਵਨਂ ਅਕਤ੍ਵਾ ਨਿਵਤ੍ਥਪਾਰੁਤਨੀਹਾਰੇਨੇਵ ਪਰਿਭੁਞ੍ਜਨ੍ਤੋ ਜੀਰਾਪੇਤਿ, ਠਾਨਾ ਚਾਵੇਨ੍ਤਸ੍ਸ ਪਨ ਥੇਯ੍ਯਚਿਤ੍ਤੇ ਸਤਿ ਪਾਰਾਜਿਕਮੇਵ ਸੀਸੇ ਭਾਰਂ ਖਨ੍ਧੇ ਕਰਣਾਦੀਸੁ ਵਿਯ (ਪਾਰਾ. ੧੦੧). ਯਥਾ ਵਾ ਤਥਾ ਵਾ ਨਸ੍ਸਤੀਤਿ ਅਗ੍ਗਿਆਦਿਨਾ ਨਸ੍ਸਤਿ, ਅਞ੍ਞੋ ਵਾ ਕੋਚੀਤਿ ਇਮਿਨਾ ਯੇਨ ਠਪਿਤਂ, ਸੋਪਿ ਸਙ੍ਗਹਿਤੋਤਿ ਵੇਦਿਤਬ੍ਬਂ.
ਇਤਰਸ੍ਸਾਤਿ ਚੋਰਸ੍ਸ. ਇਤਰਂ ਗਣ੍ਹਤੋ ਉਦ੍ਧਾਰੇ ਪਾਰਾਜਿਕਨ੍ਤਿ ਏਤ੍ਥ ‘‘ਪਵਿਸਿਤ੍ਵਾ ਤਵ ਸਾਟਕਂ ਗਣ੍ਹਾਹੀ’’ਤਿ ਇਮਿਨਾਵ ਉਪਨਿਧਿਭਾਵਤੋ ਮੋਚਿਤਤ੍ਤਾ, ਸਾਮਿਕਸ੍ਸ ਇਤਰਂ ਗਣ੍ਹਤੋ ਅਤ੍ਤਨੋ ਸਾਟਕੇ ਆਲਯਸ੍ਸ ਸਬ੍ਭਾਵਤੋ ਚ ‘‘ਉਦ੍ਧਾਰੇ ਪਾਰਾਜਿਕ’’ਨ੍ਤਿ ਵੁਤ੍ਤਂ. ਸਾਮਿਕੋ ਚੇ ‘‘ਮਮ ਸਨ੍ਤਕਂ ਇਦਂ ਵਾ ਹੋਤੁ, ਅਞ੍ਞਂ ਵਾ, ਕਿਂ ਤੇਨ, ਅਲਂ ਮਯ੍ਹਂ ਇਮਿਨਾ’’ਤਿ ਏਵਂ ਸੁਟ੍ਠੁ ਨਿਰਾਲਯੋ ਹੋਤਿ, ਚੋਰਸ੍ਸ ਪਾਰਾਜਿਕਂ ਨਤ੍ਥੀਤਿ ਗਹੇਤਬ੍ਬਂ. ਨ ਜਾਨਨ੍ਤੀਤਿ ਤੇਨ ਵੁਤ੍ਤਵਚਨਂ ਅਸੁਣਨ੍ਤਾ ਨ ਜਾਨਨ੍ਤਿ. ਏਸੇਵ ਨਯੋਤਿ ਏਤ੍ਥ ਸਚੇ ਜਾਨਿਤ੍ਵਾਪਿ ਚਿਤ੍ਤੇਨ ਨ ਸਮ੍ਪਟਿਚ੍ਛਨ੍ਤਿ, ਏਸੇਵ ਨਯੋਤਿ ਦਟ੍ਠਬ੍ਬਂ. ਪਟਿਕ੍ਖਿਪਨ੍ਤੀਤਿ ਏਤ੍ਥ ਚਿਤ੍ਤੇਨ ਪਟਿਕ੍ਖੇਪੋਪਿ ਸਙ੍ਗਹਿਤੋਵਾਤਿ ਵੇਦਿਤਬ੍ਬਂ. ਉਪਚਾਰੇ ਵਿਜ੍ਜਮਾਨੇਤਿ ਭਣ੍ਡਾਗਾਰਸ੍ਸ ਸਮੀਪੇ ਉਚ੍ਚਾਰਪਸ੍ਸਾਵਟ੍ਠਾਨੇ ਵਿਜ੍ਜਮਾਨੇ. ਮਯਿ ਚ ਮਤੇ ਸਙ੍ਘਸ੍ਸ ਚ ਸੇਨਾਸਨੇ ਵਿਨਟ੍ਠੇਤਿ ਏਤ੍ਥ ‘‘ਤਂ ਮਾਰੇਸ੍ਸਾਮਾ’’ਤਿ ਏਤ੍ਤਕੇ ਵੁਤ੍ਤੇਪਿ ਵਿਵਰਿਤੁਂ ਵਟ੍ਟਤਿ ਗਿਲਾਨਪਕ੍ਖੇ ਠਿਤਤ੍ਤਾ ਅਵਿਸਯੋਤਿ ਵੁਤ੍ਤਤ੍ਤਾ. ਮਰਣਤੋ ਹਿ ਪਰਂ ਗੇਲਞ੍ਞਂ ਅਵਿਸਯਤ੍ਤਞ੍ਚ ਨਤ੍ਥਿ. ‘‘ਦ੍ਵਾਰਂ ਛਿਨ੍ਦਿਤ੍ਵਾ ਪਰਿਕ੍ਖਾਰਂ ਹਰਿਸ੍ਸਾਮਾ’’ਤਿ ਏਤ੍ਤਕੇ ਵੁਤ੍ਤੇਪਿ ਵਿਵਰਿਤੁਂ ਵਟ੍ਟਤਿਯੇਵ. ਸਹਾਯੇਹਿ ਭਵਿਤਬ੍ਬਨ੍ਤਿ ਤੇਹਿਪਿ ਭਿਕ੍ਖਾਚਾਰਾਦੀਹਿ ਪਰਿਯੇਸਿਤ੍ਵਾ ਅਤ੍ਤਨੋ ਸਨ੍ਤਕੇਪਿ ਕਿਞ੍ਚਿ ਕਿਞ੍ਚਿ ਦਾਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਅਯਂ ਸਾਮੀਚੀਤਿ ਭਣ੍ਡਾਗਾਰੇ ਵਸਨ੍ਤਾਨਂ ਇਦਂ ਵਤ੍ਤਂ.
ਲੋਲਮਹਾਥੇਰੋਤਿ ਮਨ੍ਦੋ ਮੋਮੂਹੋ ਆਕਿਣ੍ਣਵਿਹਾਰੀ. ਇਤਰੇਹੀਤਿ ਤਸ੍ਮਿਂਯੇਵ ਗਬ੍ਭੇ ਵਸਨ੍ਤੇਹਿ ਇਤਰਭਿਕ੍ਖੂਹਿ. ਵਿਹਾਰਰਕ੍ਖਣਵਾਰੇ ਨਿਯੁਤ੍ਤੋ ਵਿਹਾਰਵਾਰਿਕੋ, ਵੁਡ੍ਢਪਟਿਪਾਟਿਯਾ ਅਤ੍ਤਨੋ ਵਾਰੇ ਵਿਹਾਰਰਕ੍ਖਣਕੋ. ਨਿਵਾਪਨ੍ਤਿ ਭਤ੍ਤਵੇਤਨਂ. ਚੋਰਾਨਂ ਪਟਿਪਥਂ ਗਤੇਸੂਤਿ ਚੋਰਾਨਂ ਆਗਮਨਂ ਞਤ੍ਵਾ ‘‘ਪਠਮਤਰਞ੍ਞੇਵ ਗਨ੍ਤ੍ਵਾ ਸਦ੍ਦਂ ਕਰਿਸ੍ਸਾਮਾ’’ਤਿ ਚੋਰਾਨਂ ਅਭਿਮੁਖਂ ਗਤੇਸੁ, ‘‘ਚੋਰੇਹਿ ਹਟਭਣ੍ਡਂ ਆਹਰਿਸ੍ਸਾਮਾ’’ਤਿ ਤਦਨੁਪਥਂ ਗਤੇਸੁਪਿ ਏਸੇਵ ਨਯੋ. ਨਿਬਦ੍ਧਂ ਕਤ੍ਵਾਤਿ ‘‘ਅਸੁਕਕੁਲੇ ਯਾਗੁਭਤ੍ਤਂ ਵਿਹਾਰਵਾਰਿਕਾਨਞ੍ਞੇਵਾ’’ਤਿ ਏਵਂ ਨਿਯਮਨਂ ਕਤ੍ਵਾ. ਦ੍ਵੇ ਤਿਸ੍ਸੋ ਯਾਗੁਸਲਾਕਾ ਚਤ੍ਤਾਰਿ ਪਞ੍ਚ ਸਲਾਕਭਤ੍ਤਾਨਿ ਚ ਲਭਮਾਨੋਵਾਤਿ ਇਦਂ ਨਿਦਸ੍ਸਨਮਤ੍ਤਂ, ਤਤੋ ਊਨਂ ਵਾ ਹੋਤੁ ਅਧਿਕਂ ਵਾ ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਚ ਯਾਪਨਮਤ੍ਤਂ ਲਭਨਮੇਵ ਪਮਾਣਨ੍ਤਿ ਗਹੇਤਬ੍ਬਂ. ਨਿਸ੍ਸਿਤਕੇ ਜਗ੍ਗੇਨ੍ਤੀਤਿ ਤੇਹਿ ਵਿਹਾਰਂ ਜਗ੍ਗਾਪੇਨ੍ਤੀਤਿ ਅਤ੍ਥੋ. ਅਸਹਾਯਕਸ੍ਸਾਤਿ ਸਹਾਯਰਹਿਤਸ੍ਸ. ਅਤ੍ਤਦੁਤਿਯਸ੍ਸਾਤਿ ਅਪ੍ਪਿਚ੍ਛਸ੍ਸ ਅਤ੍ਤਾ ਸਰੀਰਮੇਵ ਦੁਤਿਯੋ ਅਸ੍ਸ ਨਾਞ੍ਞੋਤਿ ਅਤ੍ਤਦੁਤਿਯੋ. ਤਦੁਭਯਸ੍ਸਾਪਿ ਅਤ੍ਥਸ੍ਸ ਵਿਭਾਵਨਂ ਯਸ੍ਸਾਤਿਆਦਿ, ਏਤੇਨ ਸਬ੍ਬੇਨ ਏਕੇਕਸ੍ਸ ਵਾਰੋ ਨ ਪਾਪੇਤਬ੍ਬੋਤਿ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਪਾਕਵਤ੍ਤਤ੍ਥਾਯਾਤਿ ਨਿਚ੍ਚਂ ਪਚਿਤਬ੍ਬਯਾਗੁਭਤ੍ਤਸਙ੍ਖਾਤਵਤ੍ਤਤ੍ਥਾਯ. ਠਪੇਨ੍ਤੀਤਿ ਦਾਯਕਾ ਠਪੇਨ੍ਤਿ. ਤਂ ਗਹੇਤ੍ਵਾਤਿ ਤਂ ਆਰਾਮਿਕਾਦੀਹਿ ਦਿਯ੍ਯਮਾਨਂ ਭਾਗਂ ਗਹੇਤ੍ਵਾ. ਨ ਗਾਹਾਪੇਤਬ੍ਬੋਤਿ ਏਤ੍ਥ ਅਬ੍ਭੋਕਾਸਿਕਸ੍ਸਾਪਿ ਅਤ੍ਤਨੋ ਅਧਿਕਪਰਿਕ੍ਖਾਰੋ ਵਾ ਠਪਿਤੋ ਅਤ੍ਥਿ, ਚੀਵਰਾਦਿਸਙ੍ਘਿਕਭਾਗੇਪਿ ਆਲਯੋ ਵਾ ਅਤ੍ਥਿ, ਸੋਪਿ ਗਾਹਾਪੇਤਬ੍ਬੋਵ. ਦਿਗੁਣਨ੍ਤਿ ਅਞ੍ਞੇਹਿ ਲਬ੍ਭਮਾਨਤੋ ਦਿਗੁਣਂ. ਪਕ੍ਖਵਾਰੇਨਾਤਿ ਅਡ੍ਢਮਾਸਵਾਰੇਨ.
ਸੁਙ੍ਕਘਾਤਕਥਾਵਣ੍ਣਨਾ
੧੧੩. ਸੁਙ੍ਕਘਾਤਕਥਾਯਂ ਸੁਙ੍ਕਂ ਯਤ੍ਥ ਰਾਜਪੁਰਿਸਾ ਹਨਨ੍ਤਿ ਅਦਦਨ੍ਤਾਨਂ ਸਨ੍ਤਕਂ ਅਚ੍ਛਿਨ੍ਦਿਤ੍ਵਾਪਿ ਗਣ੍ਹਨ੍ਤਿ, ਤਂ ਠਾਨਂ ਸੁਙ੍ਕਘਾਤਨ੍ਤਿ ਏਵਮ੍ਪਿ ਅਤ੍ਥੋ ਦਟ੍ਠਬ੍ਬੋ. ਵੁਤ੍ਤਮੇਵਤ੍ਥਂ ਪਾਕਟਂ ਕਾਤੁਂ ਤਞ੍ਹੀਤਿਆਦਿ ਵੁਤ੍ਤਂ. ਦੁਤਿਯਂ ਪਾਦਂ ਅਤਿਕ੍ਕਾਮੇਤੀਤਿ ਏਤ੍ਥ ਪਠਮਪਾਦਂ ਪਰਿਚ੍ਛੇਦਤੋ ਬਹਿ ਠਪੇਤ੍ਵਾ ਦੁਤਿਯਪਾਦੇ ਉਦ੍ਧਟਮਤ੍ਤੇ ਪਾਰਾਜਿਕਂ. ਉਦ੍ਧਰਿਤ੍ਵਾ ਬਹਿ ਅਟ੍ਠਪਿਤੇਪਿ ਬਹਿ ਠਿਤੋ ਏਵ ਨਾਮ ਹੋਤੀਤਿ ਕਤ੍ਵਾ ਏਵਂ ਸਬ੍ਬਤ੍ਥ ਪਦਵਾਰੇਸੁਪੀਤਿ ਦਟ੍ਠਬ੍ਬਂ. ਪਰਿਵਤ੍ਤਿਤ੍ਵਾ ਅਬ੍ਭਨ੍ਤਰਿਮਂ ਬਹਿ ਠਪੇਤਿ, ਪਾਰਾਜਿਕਨ੍ਤਿ ਇਦਂ ਸਯਂ ਬਹਿ ਠਤ੍ਵਾ ਪਠਮਂ ਅਬ੍ਭਨ੍ਤਰਿਮਂ ਉਕ੍ਖਿਪਿਤ੍ਵਾ ਵਾ ਸਮਕਂ ਉਕ੍ਖਿਪਿਤ੍ਵਾ ਵਾ ਪਰਿਵਤ੍ਤਨਂ ਸਨ੍ਧਾਯ ਵੁਤ੍ਤਂ. ਬਹਿ ਠਤ੍ਵਾ ਉਕ੍ਖਿਤ੍ਤਮਤ੍ਤੇ ਹਿ ਸਬ੍ਬਂ ਬਹਿਗਤਮੇਵ ਹੋਤੀਤਿ. ਸਚੇ ਪਨ ਸੋ ਬਹਿ ਠਤ੍ਵਾਪਿ ਬਾਹਿਰਪੁਟਕਂ ਪਠਮਂ ਅਨ੍ਤੋ ਠਪੇਤ੍ਵਾ ਪਚ੍ਛਾ ਅਬ੍ਭਨ੍ਤਰਿਮਂ ਉਕ੍ਖਿਪਿਤ੍ਵਾ ਬਹਿ ਠਪੇਤਿ, ਤਦਾਪਿ ਏਕਾਬਦ੍ਧਤਾਯ ਅਵਿਜਹਿਤਤ੍ਤਾ ਅਵਹਾਰੋ ਨ ਦਿਸ੍ਸਤਿ. ਕੇਚਿ ਪਨ ‘‘ਭੂਮਿਯਂ ਪਤਿਤ੍ਵਾ ਵਤ੍ਤਨ੍ਤਂ ਪੁਨ ਅਨ੍ਤੋ ਪਵਿਸਤਿ, ਪਾਰਾਜਿਕਮੇਵਾਤਿ (ਪਾਰਾ. ਅਟ੍ਠ. ੧.੧੧੩) ਵੁਤ੍ਤਤ੍ਤਾ ਬਾਹਿਰਪੁਟਕੇ ਅਨ੍ਤੋਪਵਿਟ੍ਠੇਪਿ ਬਹਿਗਤਭਾਵਤੋ ਨ ਮੁਚ੍ਚਤਿ, ਅਨ੍ਤੋਗਤਂ ਪਨ ਪੁਟਕਂ ਪਠਮਂ, ਪਚ੍ਛਾ ਏਵ ਵਾ ਬਹਿ ਠਪਿਤਮਤ੍ਤੇ ਵਾ ਪਾਰਾਜਿਕਮੇਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ. ਬਹਿ ਭੂਮਿਯਂ ਪਾਤਿਤਸ੍ਸ ਕੇਨਚਿ ਸਦ੍ਧਿਂ ਏਕਾਬਦ੍ਧਤਾਯ ਅਭਾਵੇਨ ਅਨ੍ਤੋਪਵਿਟ੍ਠੇਪਿ ਪਾਰਾਜਿਕਮੇਵਾਤਿ ਵਤ੍ਤੁਂ ਯੁਤ੍ਤਂ, ਇਦਂ ਪਨ ਏਕਾਬਦ੍ਧਤ੍ਤਾ ਤੇਨ ਸਦ੍ਧਿਂ ਨ ਸਮੇਤਿ. ਤਸ੍ਮਾ ਯਥਾ ਅਨ੍ਤੋਭੂਮਿਗਤੇਨ ਏਕਾਬਦ੍ਧਤਾ ਨ ਹੋਤਿ, ਏਵਂ ਉਭਯਸ੍ਸਾਪਿ ਬਹਿਗਤਭਾਵੇ ਸਾਧਿਤੇਯੇਵ ਅਵਹਾਰੋਤਿ ਵਿਞ੍ਞਾਯਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਯੇ ਪਨ ਪਰਿਵਤ੍ਤਿਤ੍ਵਾਤਿ ਇਮਸ੍ਸ ਨਿਵਤ੍ਤਿਤ੍ਵਾਤਿ ਅਤ੍ਥਂ ਵਦਨ੍ਤਿ, ਤੇਹਿ ਪਨ ਅਬ੍ਭਨ੍ਤਰਿਮਂ ਬਹਿ ਠਪੇਤੀਤਿ ਅਯਮਤ੍ਥੋ ਗਹਿਤੋ ਹੋਤੀਤਿ ਤਤ੍ਥ ਸਙ੍ਕਾਯੇਵ ਨਤ੍ਥਿ. ਏਕਾਬਦ੍ਧਨ੍ਤਿ ਕਾਜਕੋਟਿਯਂ ਰਜ੍ਜੁਯਾ ਬਨ੍ਧਨਂ ਸਨ੍ਧਾਯ ਵੁਤ੍ਤਂ. ਅਬਨ੍ਧਿਤ੍ਵਾ ਕਾਜਕੋਟਿਯਂ ਠਪਿਤਮਤ੍ਤਮੇਵ ਹੋਤਿ, ਪਾਰਾਜਿਕਨ੍ਤਿ ਬਹਿ ਗਹਿਤਕਾਜਕੋਟਿਯਂ ਠਪਿਤਂ ਯਦਿ ਪਾਦਂ ਅਗ੍ਘਤਿ, ਪਾਰਾਜਿਕਮੇਵ, ਅਨ੍ਤੋਠਪਿਤੇਨ ਏਕਾਬਦ੍ਧਤਾਯ ਅਭਾਵਾਤਿ ਅਧਿਪ੍ਪਾਯੋ. ਗਚ੍ਛਨ੍ਤੇ ਯਾਨੇ ਵਾ…ਪੇ… ਠਪੇਤੀਤਿ ਸੁਙ੍ਕਘਾਤਂ ਪਵਿਸਿਤ੍ਵਾ ਅਪ੍ਪਵਿਸਿਤ੍ਵਾ ਵਾ ਠਪੇਤਿ. ਸੁਙ੍ਕਟ੍ਠਾਨਸ੍ਸ ਬਹਿ ਠਿਤਨ੍ਤਿ ਯਾਨਾਦੀਹਿ ਨੀਹਟਤ੍ਤਾ ਬਹਿ ਠਿਤਂ. ਕੇਚਿ ਪਨ ‘‘ਬਹਿ ਠਪਿਤ’’ਨ੍ਤਿ ਪਾਠਂ ਵਿਕਪ੍ਪੇਤ੍ਵਾ ਸੁਙ੍ਕਟ੍ਠਾਨਤੋ ਪੁਬ੍ਬੇਵ ਬਹਿ ਠਪਿਤਨ੍ਤਿ ਅਤ੍ਥਂ ਵਦਨ੍ਤਿ, ਤਂ ਨ ਸੁਨ੍ਦਰਂ; ਸੁਙ੍ਕਟ੍ਠਾਨੇ ਪਵਿਸਿਤ੍ਵਾ ਯਾਨੇ ਠਪਿਤੇਪਿ ਪਵਤ੍ਤਿਤ੍ਵਾ ਗਤੇ ਵਿਯ ਦੋਸਾਭਾਵਤੋ. ਯੋ ਪਨ ਸੁਙ੍ਕਟ੍ਠਾਨਸ੍ਸ ਅਨ੍ਤੋਵ ਪਵਿਸਿਤ੍ਵਾ ‘‘ਸੁਙ੍ਕਟ੍ਠਾਨ’’ਨ੍ਤਿ ਞਤ੍ਵਾ ਥੇਯ੍ਯਚਿਤ੍ਤੇਨ ਆਗਤਮਗ੍ਗੇਨ ਪਟਿਨਿਵਤ੍ਤਿਤ੍ਵਾ ਗਚ੍ਛਤਿ, ਤਸ੍ਸਾਪਿ ਯਦਿ ਤੇਨ ਦਿਸਾਭਾਗੇਨ ਗਚ੍ਛਨ੍ਤਾਨਮ੍ਪਿ ਹਤ੍ਥਤੋ ਸੁਙ੍ਕਂ ਗਣ੍ਹਨ੍ਤਿ, ਪਾਰਾਜਿਕਮੇਵ. ਇਮਸ੍ਮਿਂ ਠਾਨੇਤਿ ਯਾਨਾਦੀਹਿ ਨੀਹਰਣੇ. ਤਤ੍ਰਾਤਿ ਤਸ੍ਮਿਂ ਏਲ਼ਕਲੋਮਸਿਕ੍ਖਾਪਦੇ (ਪਾਰਾ. ੫੭੧ ਆਦਯੋ).
ਪਾਣਕਥਾਵਣ੍ਣਨਾ
੧੧੪. ਪਾਣਕਥਾਯਂ ਆਠਪਿਤੋਤਿ ਮਾਤਾਪਿਤੂਹਿ ਇਣਂ ਗਣ੍ਹਨ੍ਤੇਹਿ ‘‘ਯਾਵ ਇਣਦਾਨਾ ਅਯਂ ਤੁਮ੍ਹਾਕਂ ਸਨ੍ਤਿਕੇ ਹੋਤੂ’’ਤਿ ਇਣਦਾਯਕਾਨਂ ਨਿਯ੍ਯਾਤਿਤੋ. ਅਵਹਾਰੋ ਨਤ੍ਥੀਤਿ ਮਾਤਾਪਿਤੂਹਿ ਪੁਤ੍ਤਸ੍ਸ ਅਪਰਿਚ੍ਚਤ੍ਤਤ੍ਤਾ ਮਾਤਾਪਿਤੂਨਞ੍ਚ ਅਸਨ੍ਤਕਤ੍ਤਾ ਅਵਹਾਰੋ ਨਤ੍ਥਿ. ਧਨਂ ਪਨ ਗਤਟ੍ਠਾਨੇ ਵਡ੍ਢਤੀਤਿ ਇਮਿਨਾ ਆਠਪੇਤ੍ਵਾ ਗਹਿਤਧਨਂ ਵਡ੍ਢਿਯਾ ਸਹ ਆਠਪਿਤਪੁਤ੍ਤਹਾਰਕਸ੍ਸ ਗੀਵਾਤਿ ਦਸ੍ਸਿਤਨ੍ਤਿ ਵਦਨ੍ਤਿ. ਦਾਸਸ੍ਸ ਜਾਤੋਤਿ ਉਕ੍ਕਟ੍ਠਲਕ੍ਖਣਂ ਦਸ੍ਸੇਤੁਂ ਵੁਤ੍ਤਂ. ਦਾਸਿਕੁਚ੍ਛਿਯਂ ਪਨ ਅਦਾਸਸ੍ਸ ਜਾਤੋਪਿ ਏਤ੍ਥੇਵ ਸਙ੍ਗਹਿਤੋ. ਪਰਦੇਸਤੋ ਪਹਰਿਤ੍ਵਾਤਿ ਪਰਦੇਸਵਿਲੁਮ੍ਪਕੇਹਿ ਰਾਜਚੋਰਾਦੀਹਿ ਪਹਰਿਤ੍ਵਾ. ਸੁਖਂ ਜੀਵਾਤਿ ਵਦਤੀਤਿ ਥੇਯ੍ਯਚਿਤ੍ਤੇਨ ਸਾਮਿਕਾਨਂ ਸਨ੍ਤਿਕਤੋ ਪਲਾਪੇਤੁਕਾਮਤਾਯ ਵਦਤਿ, ਤਥਾ ਪਨ ਅਚਿਨ੍ਤੇਤ੍ਵਾ ਕਾਰੁਞ੍ਞੇਨ ‘‘ਸੁਖਂ ਗਨ੍ਤ੍ਵਾ ਜੀਵਾ’’ਤਿ ਵਦਨ੍ਤਸ੍ਸ ਨਤ੍ਥਿ ਅਵਹਾਰੋ, ਗੀਵਾ ਪਨ ਹੋਤਿ. ਦੁਤਿਯਪਦਵਾਰੇਤਿ ਯਦਿ ਦੁਤਿਯਪਦਂ ਅਵਸ੍ਸਂ ਉਦ੍ਧਰਿਸ੍ਸਤਿ, ਭਿਕ੍ਖੁਸ੍ਸ ‘‘ਪਲਾਯਿਤ੍ਵਾ ਸੁਖਂ ਜੀਵਾ’’ਤਿ ਵਚਨਕ੍ਖਣੇਯੇਵ ਪਾਰਾਜਿਕਂ. ਅਨਾਪਤ੍ਤਿ ਪਾਰਾਜਿਕਸ੍ਸਾਤਿ ਤਸ੍ਸ ਵਚਨੇਨ ਵੇਗਵਡ੍ਢਨੇ ਅਕਤੇਪਿ ਦੁਕ੍ਕਟਾ ਨ ਮੁਚ੍ਚਤੀਤਿ ਦਸ੍ਸੇਤਿ. ‘‘ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯੇਯ੍ਯਾ’’ਤਿ (ਪਾਰਾ. ੮੯, ੯੧) ਆਦਾਨਸ੍ਸੇਵ ਵੁਤ੍ਤਤ੍ਤਾ ਵੁਤ੍ਤਪਰਿਯਾਯੇਨ ਮੁਚ੍ਚਤੀਤਿ.
ਚਤੁਪ੍ਪਦਕਥਾਵਣ੍ਣਨਾ
੧੧੭. ਚਤੁਪ੍ਪਦਕਥਾਯਂ ਪਾਲ਼ਿਯਂ ਆਗਤਾਵਸੇਸਾਤਿ ਪਾਲ਼ਿਯਂ ਆਗਤੇਹਿ ਹਤ੍ਥਿ ਆਦੀਹਿ ਅਞ੍ਞੇ ਪਸੁ-ਸਦ੍ਦਸ੍ਸ ਸਬ੍ਬਸਾਧਾਰਣਤ੍ਤਾ. ਭਿਙ੍ਕਚ੍ਛਾਪਨ੍ਤਿ ‘‘ਭਿਙ੍ਕਾ ਭਿਙ੍ਕਾ’’ਤਿ ਸਦ੍ਦਾਯਨਤੋ ਏਵਂ ਲਦ੍ਧਨਾਮਂ ਹਤ੍ਥਿਪੋਤਕਂ. ਅਨ੍ਤੋਵਤ੍ਥੁਮ੍ਹੀਤਿ ਪਰਿਕ੍ਖਿਤ੍ਤੇ. ਬਹਿਨਗਰੇ ਠਿਤਸ੍ਸਾਤਿ ਪਰਿਕ੍ਖਿਤ੍ਤਨਗਰਂ ਸਨ੍ਧਾਯ ਵੁਤ੍ਤਂ, ਅਪਰਿਕ੍ਖਿਤ੍ਤਨਗਰੇ ਪਨ ਅਨ੍ਤੋਨਗਰੇ ਠਿਤਸ੍ਸਾਪਿ ਠਿਤਟ੍ਠਾਨਮੇਵ ਠਾਨਂ. ਖਣ੍ਡਦ੍ਵਾਰਨ੍ਤਿ ਅਤ੍ਤਨਾ ਖਣ੍ਡਿਤਦ੍ਵਾਰਂ. ਏਕੋ ਨਿਪਨ੍ਨੋਤਿ ਏਤ੍ਥਾਪਿ ਬਨ੍ਧੋਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ, ਤੇਨਾਹ ‘‘ਨਿਪਨ੍ਨਸ੍ਸ ਦ੍ਵੇ’’ਤਿ. ਘਾਤੇਤੀਤਿ ਏਤ੍ਥ ਥੇਯ੍ਯਚਿਤ੍ਤੇਨ ਵਿਨਾਸੇਨ੍ਤਸ੍ਸ ਸਹਪਯੋਗਤ੍ਤਾ ਦੁਕ੍ਕਟਮੇਵਾਤਿ ਵਦਨ੍ਤਿ.
ਓਚਰਕਕਥਾਵਣ੍ਣਨਾ
੧੧੮. ਓਚਰਕਕਥਾਯਂ ਪਰਿਯਾਯੇਨ ਹਿ ਅਦਿਨ੍ਨਾਦਾਨਤੋ ਮੁਚ੍ਚਤੀਤਿ ਇਦਂ ਆਣਤ੍ਤਿਕਪਯੋਗਂ ਸਨ੍ਧਾਯ ਵੁਤ੍ਤਂ, ਸਯਮੇਵ ਪਨ ਅਭਿਯੁਞ੍ਜਨਾਦੀਸੁ ਪਰਿਯਾਯੇਨਪਿ ਮੋਕ੍ਖੋ ਨਤ੍ਥਿ.
ਓਣਿਰਕ੍ਖਕਥਾਵਣ੍ਣਨਾ
ਓਣਿਰਕ੍ਖਕਥਾਯਂ ਓਣਿਨ੍ਤਿ ਓਣੀਤਂ, ਆਨੀਤਨ੍ਤਿ ਅਤ੍ਥੋ. ਓਣਿਰਕ੍ਖਸ੍ਸ ਸਨ੍ਤਿਕੇ ਠਪਿਤਭਣ੍ਡਂ ਉਪਨਿਧਿ (ਪਾਰਾ. ੧੧੨) ਵਿਯ ਗੁਤ੍ਤਟ੍ਠਾਨੇ ਠਪੇਤ੍ਵਾ ਸਙ੍ਗੋਪਨਤ੍ਥਾਯ ਅਨਿਕ੍ਖਿਪਿਤ੍ਵਾ ਯਥਾਠਪਿਤਟ੍ਠਾਨੇ ਏਵ ਮੁਹੁਤ੍ਤਮਤ੍ਤਂ ਓਲੋਕਨਤ੍ਥਾਯ ਠਪਿਤਤ੍ਤਾ ਤਸ੍ਸ ਭਣ੍ਡਸ੍ਸ ਠਾਨਾਚਾਵਨਮਤ੍ਤੇਨ ਓਣਿਰਕ੍ਖਕਸ੍ਸ ਪਾਰਾਜਿਕਂ ਹੋਤਿ.
ਸਂਵਿਦਾਵਹਾਰਕਥਾਵਣ੍ਣਨਾ
ਸਂਵਿਦਾਵਹਾਰਕਥਾਯਂ ਸਂਵਿਧਾਯਾਤਿ ਸਂਵਿਦਹਿਤ੍ਵਾ. ਤੇਨ ਨੇਸਂ ਦੁਕ੍ਕਟਾਪਤ੍ਤਿਯੋਤਿ ਆਣਤ੍ਤਿਵਸੇਨ ਪਾਰਾਜਿਕਾਪਤ੍ਤਿਯਾ ਅਸਮ੍ਭਵੇ ਸਤੀਤਿ ਵੁਤ੍ਤਂ. ਯਦਿ ਹਿ ਤੇਨ ਆਣਤ੍ਤਾ ਯਥਾਣਤ੍ਤਿਵਸੇਨ ਹਰਨ੍ਤਿ, ਆਣਤ੍ਤਿਕ੍ਖਣੇ ਏਵ ਪਾਰਾਜਿਕਾਪਤ੍ਤਿਂ ਆਪਜ੍ਜਨ੍ਤਿ. ਪਾਲ਼ਿਯਂ ‘‘ਸਮ੍ਬਹੁਲਾ ਸਂਵਿਦਹਿਤ੍ਵਾ ਏਕੋ ਭਣ੍ਡਂ ਅਵਹਰਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੧੮) ਏਤ੍ਥਾਪਿ ਆਣਾਪਕਾਨਂ ਆਣਤ੍ਤਿਕ੍ਖਣੇਯੇਵ ਆਪਤ੍ਤਿ, ਅਵਹਾਰਕਸ੍ਸ ਉਦ੍ਧਾਰੇਤਿ ਗਹੇਤਬ੍ਬੋ. ਸਮ੍ਬਹੁਲਾ ਭਿਕ੍ਖੂ ਏਕਂ ਆਣਾਪੇਨ੍ਤਿ ‘ਗਚ੍ਛੇਤਂ ਆਹਰਾ’ਤਿ, ਤਸ੍ਸੁਦ੍ਧਾਰੇ ਸਬ੍ਬੇਸਂ ਪਾਰਾਜਿਕਨ੍ਤਿਆਦੀਸੁਪਿ ਏਵਮੇਵ ਅਤ੍ਥੋ ਗਹੇਤਬ੍ਬੋ. ਸਾਹਤ੍ਥਿਕਂ ਵਾ ਆਣਤ੍ਤਿਕਸ੍ਸ ਆਣਤ੍ਤਿਕਂ ਵਾ ਸਾਹਤ੍ਥਿਕਸ੍ਸ ਅਙ੍ਗਂ ਨ ਹੋਤੀਤਿ ਭਿਨ੍ਨਕਾਲਿਕਤ੍ਤਾ ਅਞ੍ਞਮਞ੍ਞਸ੍ਸ ਅਙ੍ਗਂ ਨ ਹੋਤਿ. ਤਥਾ ਹਿ ਸਹਤ੍ਥਾ ਅਵਹਰਨ੍ਤਸ੍ਸ ਠਾਨਾਚਾਵਨਕ੍ਖਣੇ ਆਪਤ੍ਤਿ, ਆਣਤ੍ਤਿਯਾ ਪਨ ਆਣਤ੍ਤਿਕ੍ਖਣੇਯੇਵਾਤਿ ਭਿਨ੍ਨਕਾਲਿਕਤ੍ਤਾ ਆਪਤ੍ਤਿਯੋਤਿ.
ਸਙ੍ਕੇਤਕਮ੍ਮਕਥਾਵਣ੍ਣਨਾ
੧੧੯. ਸਙ੍ਕੇਤਕਮ੍ਮਕਥਾਯਂ ਓਚਰਕੇ ਵੁਤ੍ਤਨਯੇਨੇਵਾਤਿ ਏਤ੍ਥ ਅਵਸ੍ਸਂ ਹਾਰਿਯੇ ਭਣ੍ਡੇਤਿਆਦਿਨਾ (ਪਾਰਾ. ਅਟ੍ਠ. ੧.੧੧੮) ਵੁਤ੍ਤਨਯੇਨੇਵ. ਪਾਲ਼ਿਯਂ ‘‘ਤਂ ਸਙ੍ਕੇਤਂ ਪੁਰੇ ਵਾ ਪਚ੍ਛਾ ਵਾ’’ਤਿ ਤਸ੍ਸ ਸਙ੍ਕੇਤਸ੍ਸ ਪੁਰੇ ਵਾ ਪਚ੍ਛਾ ਵਾਤਿ ਅਤ੍ਥੋ. ‘‘ਤਂ ਨਿਮਿਤ੍ਤਂ ਪੁਰੇ ਵਾ ਪਚ੍ਛਾ ਵਾ’’ਤਿ ਏਤ੍ਥਾਪਿ ਏਸੇਵ ਨਯੋ.
ਨਿਮਿਤ੍ਤਕਮ੍ਮਕਥਾਵਣ੍ਣਨਾ
੧੨੦. ਨਿਮਿਤ੍ਤਕਮ੍ਮਕਥਾਯਂ ਅਕ੍ਖਿਨਿਖਣਨਾਦਿਨਿਮਿਤ੍ਤਕਮ੍ਮਂ ਪਨ ਲਹੁਕਂ ਇਤ੍ਤਰਕਾਲਂ, ਤਸ੍ਮਾ ਤਙ੍ਖਣੇਯੇਵ ਤਂ ਭਣ੍ਡਂ ਅਵਹਰਿਤੁਂ ਨ ਸਕ੍ਕਾ. ਨਿਮਿਤ੍ਤਕਮ੍ਮਾਨਨ੍ਤਰਮੇਵ ਗਣ੍ਹਿਤੁਂ ਆਰਦ੍ਧਤ੍ਤਾ ਤੇਨੇਵ ਨਿਮਿਤ੍ਤੇਨ ਅਵਹਰਤੀਤਿ ਵੁਚ੍ਚਤਿ. ਯਦਿ ਏਵਂ ਪੁਰੇਭਤ੍ਤਪ੍ਪਯੋਗੋਵ ਏਸੋਤਿ ਵਾਦੋ ਪਮਾਣਭਾਵਂ ਆਪਜ੍ਜਤੀਤਿ? ਨਾਪਜ੍ਜਤਿ. ਨ ਹਿ ਸਙ੍ਕੇਤਕਮ੍ਮਂ (ਪਾਰਾ. ੧੧੯) ਵਿਯ ਨਿਮਿਤ੍ਤਕਮ੍ਮਂ ਕਾਲਪਰਿਚ੍ਛੇਦਯੁਤ੍ਤਂ. ਕਾਲਵਸੇਨ ਹਿ ਸਙ੍ਕੇਤਕਮ੍ਮਂ ਵੁਤ੍ਤਂ, ਕਿਰਿਯਾਵਸੇਨ ਨਿਮਿਤ੍ਤਕਮ੍ਮਨ੍ਤਿ ਅਯਮੇਵ ਤੇਸਂ ਵਿਸੇਸੋ. ‘‘ਤਂ ਨਿਮਿਤ੍ਤਂ ਪੁਰੇ ਵਾ ਪਚ੍ਛਾ ਵਾ ਤਂ ਭਣ੍ਡਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤੀ’’ਤਿ ਇਦਂ ਪਨ ਨਿਮਿਤ੍ਤਕਰਣਤੋ ਪੁਰੇ ਗਣ੍ਹਨ੍ਤਸ੍ਸ ਚੇਵ ਨਿਮਿਤ੍ਤਕਮ੍ਮੇ ਚ ਕਤੇਪਿ ਗਣ੍ਹਿਤੁਂ ਅਨਾਰਭਿਤ੍ਵਾ ਪਚ੍ਛਾ ਸਯਮੇਵ ਗਣ੍ਹਨ੍ਤਸ੍ਸ ਚ ਵਸੇਨ ਵੁਤ੍ਤਂ.
ਆਣਤ੍ਤਿਕਥਾਵਣ੍ਣਨਾ
੧੨੧. ਆਣਤ੍ਤਿਕਥਾਯਂ ਅਸਮ੍ਮੋਹਤ੍ਥਨ੍ਤਿ ਯਸ੍ਮਾ ਸਙ੍ਕੇਤਕਮ੍ਮਨਿਮਿਤ੍ਤਕਮ੍ਮਾਨਿ ਕਰੋਨ੍ਤੋ ਨ ਕੇਵਲਂ ਪੁਰੇਭਤ੍ਤਾਦਿਕਾਲਸਙ੍ਕੇਤਕਮ੍ਮਂ ਅਕ੍ਖਿਨਿਖਣਨਾਦਿਨਿਮਿਤ੍ਤਕਮ੍ਮਮੇਵ ਵਾ ਕਰੋਤਿ, ਅਥ ਖੋ ਏਵਂਵਣ੍ਣਸਣ੍ਠਾਨਭਣ੍ਡਂ ਗਣ੍ਹਾਤਿ, ਭਣ੍ਡਨਿਯਮਮ੍ਪਿ ਕਰੋਤਿ, ਤ੍ਵਂ ਇਤ੍ਥਨ੍ਨਾਮਸ੍ਸ ਪਾਵਦ, ਸੋ ਅਞ੍ਞਸ੍ਸ ਪਾਵਦਤੂਤਿਆਦਿਨਾ ਪੁਗ੍ਗਲਪਟਿਪਾਟਿਯਾ ਚ ਆਣਾਪੇਤਿ, ਤਸ੍ਮਾ ਪੁਬ੍ਬਣ੍ਹਾਦਿਕਾਲਵਸੇਨ ਅਕ੍ਖਿਨਿਖਣਨਾਦਿਕਿਰਿਯਾਵਸੇਨ ਭਣ੍ਡਪੁਗ੍ਗਲਪਟਿਪਾਟਿਵਸੇਨ ਚ ਆਣਤ੍ਤੇ ਏਤੇਸੁ ਸਙ੍ਕੇਤਕਮ੍ਮਨਿਮਿਤ੍ਤਕਮ੍ਮੇਸੁ ਵਿਸਙ੍ਕੇਤਾ ਵਿਸਙ੍ਕੇਤਭਾਵੇ ਸਮ੍ਮੋਹੋ ਜਾਯਤਿ, ਤਦਪਗਮੇਨ ਅਸਮ੍ਮੋਹਤ੍ਥਂ. ਯਂ ਆਣਾਪਕੇਨ ਨਿਮਿਤ੍ਤਸਞ੍ਞਂ ਕਤ੍ਵਾ ਵੁਤ੍ਤਨ੍ਤਿ ਪੁਬ੍ਬਣ੍ਹਾਦੀਸੁ ਅਕ੍ਖਿਨਿਖਣਨਾਦੀਸੁ ਵਾ ਗਹਣਤ੍ਥਂ ਆਣਾਪੇਨ੍ਤੇਨ ਈਦਿਸਵਣ੍ਣਸਣ੍ਠਾਨਾਦਿਯੁਤ੍ਤਂ ਗਣ੍ਹਾਤਿ ਏਵਂ ਗਹਣਸ੍ਸ ਨਿਮਿਤ੍ਤਭੂਤਸਞ੍ਞਾਣਂ ਕਤ੍ਵਾ ਯਂ ਭਣ੍ਡਂ ਵੁਤ੍ਤਂ. ਅਯਂ ਯੁਤ੍ਤਿ ਸਬ੍ਬਤ੍ਥਾਤਿ ਹੇਟ੍ਠਾ ਵੁਤ੍ਤੇਸੁ ਉਪਰਿ ਵਕ੍ਖਮਾਨੇਸੁ ਚ ਸਬ੍ਬਤ੍ਥ ਆਣਤ੍ਤਿਪ੍ਪਸਙ੍ਗੇਸੁ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕਾਦੀਨਂ ਭਾਵਸਙ੍ਖਾਤਾ ਵਿਨਯਯੁਤ੍ਤਿ, ਸਾ ਚ ਆਣਤ੍ਤਸ੍ਸ ਕਿਰਿਯਾਨਿਟ੍ਠਾਪਨਕ੍ਖਣੇ ਆਣਾਪਕਸ੍ਸ ਪਯੋਗੇ ਥੇਯ੍ਯਚਿਤ੍ਤਾਨਂ ਅਭਾਵਾ ਆਣਤ੍ਤਿਕ੍ਖਣੇ ਏਕਾ ਏਵ ਆਪਤ੍ਤਿ ਹੋਤੀਤਿ ਏਵਂ ਉਪਪਤ੍ਤਿਯਾ ਪਵਤ੍ਤਤ੍ਤਾ ਯੁਤ੍ਤੀਤਿ ਵੁਤ੍ਤਾ. ‘‘ਮੂਲਟ੍ਠਸ੍ਸ ਥੁਲ੍ਲਚ੍ਚਯ’’ਨ੍ਤਿ ਵੁਤ੍ਤਤ੍ਤਾ ਸਙ੍ਘਰਕ੍ਖਿਤੇਨ ਪਟਿਗ੍ਗਹਿਤੇਪਿ ਬੁਦ੍ਧਰਕ੍ਖਿਤਧਮ੍ਮਰਕ੍ਖਿਤਾਨਂ ਦੁਕ੍ਕਟਮੇਵ, ਕਸ੍ਮਾ ਪਨੇਤ੍ਥ ਆਚਰਿਯਸ੍ਸ ਥੁਲ੍ਲਚ੍ਚਯਨ੍ਤਿ ਆਹ ‘‘ਮਹਾਜਨੋ ਹੀ’’ਤਿਆਦਿ. ਮਹਾਜਨੋਤਿ ਚ ਬੁਦ੍ਧਰਕ੍ਖਿਤਧਮ੍ਮਰਕ੍ਖਿਤਸਙ੍ਘਰਕ੍ਖਿਤੇ ਸਨ੍ਧਾਯ ਵੁਤ੍ਤਂ. ਮੂਲਟ੍ਠਸ੍ਸੇਵ ਦੁਕ੍ਕਟਨ੍ਤਿ ਬੁਦ੍ਧਰਕ੍ਖਿਤਸ੍ਸ ਦੁਕ੍ਕਟਂ. ਇਦਞ੍ਚ ਮੂਲਟ੍ਠਸ੍ਸ ਥੁਲ੍ਲਚ੍ਚਯਾਭਾਵਦਸ੍ਸਨਤ੍ਥਂ ਪਠਮਂ ਆਣਤ੍ਤਿਕ੍ਖਣੇ ਦੁਕ੍ਕਟਂ ਸਨ੍ਧਾਯ ਵੁਤ੍ਤਂ, ਨ ਪਨ ਸਙ੍ਘਰਕ੍ਖਿਤਸ੍ਸ ਪਟਿਗ੍ਗਹਣਪਚ੍ਚਯਾ ਪੁਨ ਦੁਕ੍ਕਟਸਮ੍ਭਵਂ ਸਨ੍ਧਾਯ. ਨ ਹਿ ਸੋ ਏਕਪਯੋਗੇਨ ਦੁਕ੍ਕਟਦ੍ਵਯਂ ਆਪਜ੍ਜਤਿ. ਕੇਚਿ ਪਨ ‘‘ਵਿਸਙ੍ਕੇਤਤ੍ਤਾ ਪਾਲ਼ਿਯਂ ‘ਮੂਲਟ੍ਠਸ੍ਸਾ’ਤਿ ਅਵਤ੍ਵਾ ‘ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ ਸਾਮਞ੍ਞੇਨ ਵੁਤ੍ਤਤ੍ਤਾ ਇਦਂ ਸਙ੍ਘਰਕ੍ਖਿਤਸ੍ਸ ਦੁਕ੍ਕਟਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਕਿਞ੍ਚਾਪਿ ਅਟ੍ਠਕਥਾਯ ਨ ਸਮੇਤਿ, ਪਾਲ਼ਿਤੋ ਪਨ ਯੁਤ੍ਤਂ ਵਿਯ ਦਿਸ੍ਸਤਿ. ਨ ਹਿ ਤਸ੍ਸ ਪਟਿਗ੍ਗਹਣਪ੍ਪਯੋਗੇ ਅਨਾਪਤ੍ਤਿ ਹੋਤੀਤਿ. ਇਮਿਨਾਵ ਹੇਟ੍ਠਾ ਆਗਤਵਾਰੇਸੁਪਿ ਪਟਿਗ੍ਗਣ੍ਹਨ੍ਤਾਨਂ ਦੁਕ੍ਕਟਂ ਵੇਦਿਤਬ੍ਬਂ. ‘‘ਪਣ੍ਣੇ ਵਾ ਸਿਲਾਦੀਸੁ ਵਾ ‘ਚੋਰਿਯਂ ਕਾਤਬ੍ਬ’ਨ੍ਤਿ ਲਿਖਿਤ੍ਵਾ ਠਪਿਤੇ ਪਾਰਾਜਿਕਮੇਵਾ’’ਤਿ ਕੇਚਿ ਵਦਨ੍ਤਿ, ਤਂ ਪਨ ‘‘ਅਸੁਕਸ੍ਸ ਗੇਹੇ ਭਣ੍ਡ’’ਨ੍ਤਿ ਏਵਂ ਨਿਯਮੇਤ੍ਵਾ ਲਿਖਿਤੇ ਯੁਜ੍ਜਤਿ, ਨ ਅਨਿਯਮੇਤ੍ਵਾ ਲਿਖਿਤੇਤਿ ਵੀਮਂਸਿਤਬ੍ਬਂ. ਮਗ੍ਗਾਨਨ੍ਤਰਫਲਸਦਿਸਾਤਿ ਇਮਿਨਾ ਯਥਾ ਅਰਿਯਪੁਗ੍ਗਲਾਨਂ ਮਗ੍ਗਾਨਨ੍ਤਰੇ ਫਲੇ ਉਪ੍ਪਨ੍ਨੇ ਕਿਲੇਸਪਟਿਪ੍ਪਸ੍ਸਦ੍ਧਿਪਰਿਯੋਸਾਨਂ ਭਾਵਨਾਕਿਚ੍ਚਂ ਨਿਪ੍ਫਨ੍ਨਂ ਨਾਮ ਹੋਤਿ, ਏਵਮੇਤਿਸ੍ਸਾ ਅਤ੍ਥਸਾਧਕਚੇਤਨਾਯ ਉਪ੍ਪਨ੍ਨਾਯ ਆਣਤ੍ਤਿਕਿਚ੍ਚਂ ਨਿਪ੍ਫਨ੍ਨਮੇਵਾਤਿ ਦਸ੍ਸੇਤਿ, ਤੇਨਾਹ ‘‘ਤਸ੍ਮਾ ਅਯਂ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕੋ’’ਤਿ, ਆਣਤ੍ਤਿਵਚੀਪਯੋਗਸਮੁਟ੍ਠਾਪਕਚੇਤਨਾਕ੍ਖਣੇਯੇਵ ਪਾਰਾਜਿਕੋ ਹੋਤੀਤਿ ਅਤ੍ਥੋ.
ਆਣਤ੍ਤਿਕਥਾਵਣ੍ਣਨਾਨਯੋ ਨਿਟ੍ਠਿਤੋ.
ਆਪਤ੍ਤਿਭੇਦਵਣ੍ਣਨਾ
੧੨੨. ਤਤ੍ਥ ਤਤ੍ਥਾਤਿ ਭੂਮਟ੍ਠਥਲਟ੍ਠਾਦੀਸੁ. ਪਾਲ਼ਿਯਂ ਮਨੁਸ੍ਸਪਰਿਗ੍ਗਹਿਤਂ ਸਨ੍ਧਾਯ ‘‘ਪਰਪਰਿਗ੍ਗਹਿਤ’’ਨ੍ਤਿ ਵੁਤ੍ਤਂ. ਆਮਸਤਿ ਫਨ੍ਦਾਪੇਤਿ ਠਾਨਾ ਚਾਵੇਤੀਤਿ ਇਮੇਹਿ ਤੀਹਿ ਪਦੇਹਿ ਪੁਬ੍ਬਪਯੋਗਸਹਿਤਂ ਪਞ੍ਚਮਂ ਅਵਹਾਰਙ੍ਗਂ ਵੁਤ੍ਤਂ, ਠਾਨਾ ਚਾਵੇਤੀਤਿ ਚ ਇਦਂ ਉਪਲਕ੍ਖਣਮਤ੍ਤਂ. ਆਣਤ੍ਤਿਕਾਦਯੋ ਸਬ੍ਬੇਪਿ ਪਯੋਗਾ ਧੁਰਨਿਕ੍ਖੇਪੋ ਚ ਇਧ ਸਙ੍ਗਹੇਤਬ੍ਬਾਵਾਤਿ ਦਟ੍ਠਬ੍ਬਂ.
੧੨੫. ਠਾਨਾਚਾਵਨਨ੍ਤਿ ਇਦਂ ਪਾਲ਼ਿਅਨੁਸਾਰਤੋ ਵੁਤ੍ਤਂ ਧੁਰਨਿਕ੍ਖੇਪਸ੍ਸਾਪਿ ਸਙ੍ਗਹੇਤਬ੍ਬਤੋ. ਏਸ ਨਯੋ ਉਪਰਿਪਿ ਸਬ੍ਬਤ੍ਥ. ਤਤ੍ਥ ਹਿ ਨ ਚ ਸਕਸਞ੍ਞੀਤਿ ਇਮਿਨਾ ਪਰਪਰਿਗ੍ਗਹਿਤਤਾ ਵੁਤ੍ਤਾ, ਨ ਚ ਵਿਸ੍ਸਾਸਗ੍ਗਾਹੀ ਨ ਚ ਤਾਵਕਾਲਿਕਨ੍ਤਿ ਇਮੇਹਿ ਪਰਪਰਿਗ੍ਗਹਿਤਸਞ੍ਞਿਤਾ, ਤੀਹਿ ਵਾ ਏਤੇਹਿ ਪਰਪਰਿਗ੍ਗਹਿਤਤਾ ਪਰਪਰਿਗ੍ਗਹਿਤਸਞ੍ਞਿਤਾ ਚ ਵੁਤ੍ਤਾਤਿ ਵੇਦਿਤਬ੍ਬਾ. ਅਨਜ੍ਝਾਵੁਤ੍ਥਕਨ੍ਤਿ ‘‘ਮਮੇਦ’’ਨ੍ਤਿ ਪਰਿਗ੍ਗਹਵਸੇਨ ਅਨਜ੍ਝਾਵੁਤ੍ਥਕਂ ਅਰਞ੍ਞੇ ਦਾਰੁਤਿਣਪਣ੍ਣਾਦਿ. ਛਡ੍ਡਿਤਨ੍ਤਿ ਪਠਮਂ ਪਰਿਗ੍ਗਹੇਤ੍ਵਾ ਪਚ੍ਛਾ ਅਨਤ੍ਥਿਕਤਾਯ ਛਡ੍ਡਿਤਂ ਯਂ ਕਿਞ੍ਚਿ. ਛਿਨ੍ਨਮੂਲਕਨ੍ਤਿ ਨਟ੍ਠਂ ਪਰਿਯੇਸਿਤ੍ਵਾ ਆਲਯਸਙ੍ਖਾਤਸ੍ਸ ਮੂਲਸ੍ਸ ਛਿਨ੍ਨਤ੍ਤਾ ਛਿਨ੍ਨਮੂਲਕਂ. ਅਸ੍ਸਾਮਿਕਨ੍ਤਿ ਅਨਜ੍ਝਾਵੁਤ੍ਥਕਾਦੀਹਿ ਤੀਹਿ ਆਕਾਰੇਹਿ ਦਸ੍ਸਿਤਂ ਅਸ੍ਸਾਮਿਕਵਤ੍ਥੁ. ਉਭਯਮ੍ਪੀਤਿ ਅਸ੍ਸਾਮਿਕਂ ਅਤ੍ਤਨੋ ਸਨ੍ਤਕਞ੍ਚ.
ਅਨਾਪਤ੍ਤਿਭੇਦਵਣ੍ਣਨਾ
੧੩੧. ਤਸ੍ਮਿਂਯੇਵ ਅਤ੍ਤਭਾਵੇ ਨਿਬ੍ਬਤ੍ਤਾਤਿ ਤਸ੍ਮਿਂਯੇਵ ਮਤਸਰੀਰੇ ਪੇਤਤ੍ਤਭਾਵੇਨ ਨਿਬ੍ਬਤ੍ਤਾ. ਰੁਕ੍ਖਾਦੀਸੁ ਲਗ੍ਗਿਤਸਾਟਕੇ ਵਤ੍ਤਬ੍ਬਮੇਵ ਨਤ੍ਥੀਤਿ ਮਨੁਸ੍ਸੇਹਿ ਅਗੋਪਿਤਂ ਸਨ੍ਧਾਯ ਵੁਤ੍ਤਂ, ਸਚੇ ਪਨੇਤਂ ਦੇਵਾਲਯਚੇਤਿਯਰੁਕ੍ਖਾਦੀਸੁ ਨਿਯੁਤ੍ਤੇਹਿ ਪੁਰਿਸੇਹਿ ਰਕ੍ਖਿਤਗੋਪਿਤਂ ਹੋਤਿ, ਗਹੇਤੁਂ ਨ ਵਟ੍ਟਤਿ. ਥੋਕੇ ਖਾਯਿਤੇ…ਪੇ… ਗਹੇਤੁਂ ਵਟ੍ਟਤੀਤਿ ਇਦਂ ਅਦਿਨ੍ਨਾਦਾਨਾਭਾਵਂ ਸਨ੍ਧਾਯ ਵੁਤ੍ਤਂ. ਜਿਘਚ੍ਛਿਤਪਾਣਿਨਾ ਖਾਦਿਯਮਾਨਮਂਸਸ੍ਸ ਅਚ੍ਛਿਨ੍ਦਿਤ੍ਵਾ ਖਾਦਨਂ ਨਾਮ ਕਾਰੁਞ੍ਞਹਾਨਿਤੋ ਲੋਲਭਾਵਤੋ ਚ ਅਸਾਰੁਪ੍ਪਮੇਵ. ਤੇਨੇਵ ਹਿ ਅਰਿਯਵਂਸਿਕਾ ਅਤ੍ਤਨੋ ਪਤ੍ਤੇ ਭਤ੍ਤਂ ਖਾਦਨ੍ਤਮ੍ਪਿ ਸੁਨਖਾਦਿਂ ਤਜ੍ਜੇਤ੍ਵਾ ਨ ਵਾਰੇਨ੍ਤਿ, ਤਿਰਚ੍ਛਾਨਾਨਂ ਆਮਿਸਦਾਨੇ ਕੁਸਲਂ ਵਿਯ ਤੇਸਂ ਆਮਿਸਸ੍ਸ ਅਚ੍ਛਿਨ੍ਦਨੇਪਿ ਅਕੁਸਲਮੇਵਾਤਿ ਗਹੇਤਬ੍ਬਂ, ਤੇਨੇਵ ਵਕ੍ਖਤਿ ‘‘ਪਰਾਨੁਦ੍ਦਯਤਾਯ ਚ ਨ ਗਹੇਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੧.੧੪੦).
ਪਕਿਣ੍ਣਕਕਥਾਵਣ੍ਣਨਾ
ਬਹੁ ਏਕਤੋ ਦਾਰੁਆਦਿਭਾਰਿਯਸ੍ਸ ਏਕਸ੍ਸ ਭਣ੍ਡਸ੍ਸ ਉਕ੍ਖਿਪਨਕਾਲੇ ‘‘ਗਣ੍ਹਥ ਉਕ੍ਖਿਪਥਾ’’ਤਿ ਵਚੀਪਯੋਗੇਨ ਸਦ੍ਧਿਂ ਕਾਯਪਯੋਗਸਬ੍ਭਾਵਟ੍ਠਾਨਂ ਸਨ੍ਧਾਯ ‘‘ਸਾਹਤ੍ਥਿਕਾਣਤ੍ਤਿਕ’’ਨ੍ਤਿ ਵੁਤ੍ਤਂ. ‘‘ਤ੍ਵਂ ਏਤਂ ਵਤ੍ਥੁਂ ਗਣ੍ਹ, ਅਹਂ ਅਞ੍ਞ’’ਨ੍ਤਿ ਏਵਂ ਪਵਤ੍ਤੇ ਪਨ ਅਵਹਾਰੇ ਅਤ੍ਤਨਾ ਗਹਿਤਂ ਸਾਹਤ੍ਥਿਕਮੇਵ, ਪਰੇਨ ਗਾਹਾਪਿਤਂ ਆਣਤ੍ਤਿਕਮੇਵ, ਤੇਨੇਵ ਤਦੁਭਯਗ੍ਘੇਨ ਪਞ੍ਚਮਾਸੇਪਿ ਪਾਰਾਜਿਕਂ ਨ ਹੋਤਿ, ਏਕੇਕਭਣ੍ਡਗ੍ਘਵਸੇਨ ਥੁਲ੍ਲਚ੍ਚਯਾਦਿਮੇਵ ਹੋਤਿ. ਵੁਤ੍ਤਞ੍ਹਿ ‘‘ਸਾਹਤ੍ਥਿਕਂ ਵਾ ਆਣਤ੍ਤਿਕਸ੍ਸ ਅਙ੍ਗਂ ਨ ਹੋਤੀ’’ਤਿਆਦਿ. ਉਪਨਿਕ੍ਖਿਤ੍ਤਭਣ੍ਡਂ ਭਣ੍ਡਦੇਯ੍ਯਞ੍ਚ ਅਦਾਤੁਕਾਮਤਾਯ ‘‘ਦੇਮਿ ਦਮ੍ਮੀ’’ਤਿ ਵਿਕ੍ਖਿਪਨ੍ਤੋ ਤੁਣ੍ਹੀਭਾਵੇਨ ਵਿਹੇਠੇਨ੍ਤੋਪਿ ਤੇਨ ਤੇਨ ਕਾਯਵਿਕਾਰਾਦਿਕਿਰਿਯਾਯ ਪਰਸ੍ਸ ਧੁਰਂ ਨਿਕ੍ਖਿਪਾਪੇਸੀਤਿ ‘‘ਕਿਰਿਯਾਸਮੁਟ੍ਠਾਨਞ੍ਚਾ’’ਤਿ ਵੁਤ੍ਤਂ.
ਪਦਭਾਜਨੀਯਵਣ੍ਣਨਾਨਯੋ ਨਿਟ੍ਠਿਤੋ.
ਵਿਨੀਤਵਤ੍ਥੁਵਣ੍ਣਨਾ
੧੩੫. ਵਿਨੀਤਵਤ੍ਥੂਸੁ ਨਿਰੁਤ੍ਤਿਯੇਵ ਤਂਤਂਅਤ੍ਥਗ੍ਗਹਣਸ੍ਸ ਉਪਾਯਤਾਯ ਪਥੋਤਿ ਨਿਰੁਤ੍ਤਿਪਥੋ, ਤੇਨੇਵਾਹ ‘‘ਵੋਹਾਰਵਚਨਮਤ੍ਤੇ’’ਤਿ. ਯਥਾਕਮ੍ਮਂ ਗਤੋਤਿ ਤਤੋ ਪੇਤਤ੍ਤਭਾਵਤੋ ਮਤਭਾਵਂ ਦਸ੍ਸੇਤਿ. ਅਬ੍ਭੁਣ੍ਹੇਤਿ ਆਸਨ੍ਨਮਰਣਤਾਯ ਸਰੀਰਸ੍ਸ ਉਣ੍ਹਸਮਙ੍ਗਿਤਂ ਦਸ੍ਸੇਤਿ, ਤੇਨੇਵਾਹ ‘‘ਅਲ੍ਲਸਰੀਰੇ’’ਤਿ. ਕੁਣਪਭਾਵਂ ਉਪਗਤਮ੍ਪਿ ਭਿਨ੍ਨਮੇਵ ਅਲ੍ਲਭਾਵਤੋ ਭਿਨ੍ਨਤ੍ਤਾ. ਵਿਸਭਾਗਸਰੀਰੇਤਿ ਇਤ੍ਥਿਸਰੀਰੇ. ਸੀਸੇ ਵਾਤਿਆਦਿ ਅਧਕ੍ਖਕੇ ਉਬ੍ਭਜਾਣੁਮਣ੍ਡਲੇ ਪਦੇਸੇ ਚਿਤ੍ਤਵਿਕਾਰਪ੍ਪਤ੍ਤਿਂ ਸਨ੍ਧਾਯ ਵੁਤ੍ਤਂ, ਯਤ੍ਥ ਕਤ੍ਥਚਿ ਅਨਾਮਸਨ੍ਤੇਨ ਕਤਂ ਸੁਕਤਮੇਵ. ਮਤਸਰੀਰਮ੍ਪਿ ਹਿ ਯੇਨ ਕੇਨਚਿ ਆਕਾਰੇਨ ਸਞ੍ਚਿਚ੍ਚ ਫੁਸਨ੍ਤਸ੍ਸ ਅਨਾਮਾਸਦੁਕ੍ਕਟਮੇਵਾਤਿ ਵਦਨ੍ਤਿ, ਤਂ ਯੁਤ੍ਤਮੇਵ. ਨ ਹਿ ਅਪਾਰਾਜਿਕਵਤ੍ਥੁਕੇਪਿ ਚਿਤ੍ਤਾਦਿਇਤ੍ਥਿਰੂਪੇ ਭਵਨ੍ਤਂ ਦੁਕ੍ਕਟਂ ਪਾਰਾਜਿਕਵਤ੍ਥੁਭੂਤੇ ਮਤਿਤ੍ਥਿਸਰੀਰੇ ਨਿਵਤ੍ਤਤਿ.
ਕੁਸਸਙ੍ਕਾਮਨਵਤ੍ਥੁਕਥਾਵਣ੍ਣਨਾ
੧੩੮. ਬਲਸਾਤਿ ਬਲੇਨ. ਸਾਟਕੋ ਭਵਿਸ੍ਸਤਿ, ਗਣ੍ਹਿਸ੍ਸਾਮੀਤਿ ਅਨਾਗਤਵਚਨਂ ਪਸਿਬ੍ਬਕਗ੍ਗਹਣਤੋ ਪੁਰੇਤਰਂ ਸਮੁਪ੍ਪਨ੍ਨਪਰਿਕਪ੍ਪਦਸ੍ਸਨਵਸੇਨ ਵੁਤ੍ਤਂ. ਗਹਣਕ੍ਖਣੇ ਪਨ ‘‘ਸਾਟਕੋ ਚੇ, ਗਣ੍ਹਾਮੀ’’ਤਿ ਪਸਿਬ੍ਬਕਂ ਗਣ੍ਹਾਤੀਤਿ ਏਵਮੇਤ੍ਥ ਅਧਿਪ੍ਪਾਯੋ ਗਹੇਤਬ੍ਬੋ, ਨ ਪਨ ਬਹਿ ਨੀਹਰਿਤ੍ਵਾ ਸਾਟਕਭਾਵਂ ਞਤ੍ਵਾ ਗਹੇਸ੍ਸਾਮੀਤਿ, ਤੇਨਾਹ ‘‘ਉਦ੍ਧਾਰੇਯੇਵ ਪਾਰਾਜਿਕ’’ਨ੍ਤਿ. ਇਤਰਥਾ ‘‘ਇਦਾਨਿ ਨ ਗਣ੍ਹਾਮਿ, ਪਚ੍ਛਾ ਅਨ੍ਧਕਾਰੇ ਜਾਤੇ ਵਿਜਾਨਨਕਾਲੇ ਵਾ ਗਣ੍ਹਿਸ੍ਸਾਮਿ, ਇਦਾਨਿ ਓਲੋਕੇਨ੍ਤੋ ਵਿਯ ਹਤ੍ਥਗਤਂ ਕਰੋਮੀ’’ਤਿ ਗਣ੍ਹਨ੍ਤਸ੍ਸਾਪਿ ਗਹਣਕ੍ਖਣੇ ਅਵਹਾਰੋ ਭਵੇਯ੍ਯ, ਨ ਚ ਤਂ ਯੁਤ੍ਤਂ ਤਦਾ ਗਹਣੇ ਸਨ੍ਨਿਟ੍ਠਾਨਾਭਾਵਾ. ਸਨ੍ਨਿਟ੍ਠਾਪਕਚੇਤਨਾਯ ਏਵ ਹਿ ਪਾਣਾਤਿਪਾਤਾਦਿਅਕੁਸਲਂ ਵਿਯ. ਨ ਹਿ ‘‘ਪਚ੍ਛਾ ਵਧਿਸ੍ਸਾਮੀ’’ਤਿ ਪਾਣਂ ਗਣ੍ਹਨ੍ਤਸ੍ਸ ਤਦੇਵ ਤਸ੍ਮਿਂ ਮਤੇਪਿ ਪਾਣਾਤਿਪਾਤੋ ਹੋਤਿ ਵਧਕਚੇਤਨਾਯ ਪਯੋਗਸ੍ਸ ਅਕਤਤ੍ਤਾ, ਏਵਮਿਧਾਪਿ ਅਤ੍ਥਙ੍ਗਤੇ ਸੂਰਿਯੇ ਅਵਹਰਿਸ੍ਸਾਮੀਤਿਆਦਿਨਾ ਕਾਲਪਰਿਕਪ੍ਪਨਵਸੇਨ ਠਾਨਾ ਚਾਵਿਤੇਪਿ ਤਦਾਪਿ ਅਵਹਾਰੋ ਨ ਹੋਤਿ ਓਕਾਸਪਰਿਕਪ੍ਪੇ (ਪਾਰਾ. ਅਟ੍ਠ. ੧.੧੩੮) ਵਿਯ, ਤਸ੍ਮਿਂ ਪਨ ਯਥਾਪਰਿਕਪ੍ਪਿਤਟ੍ਠਾਨੇ ਕਾਲੇ ਆਗਤੇ ਭਣ੍ਡਂ ਭੂਮਿਯਂ ਅਨਿਕ੍ਖਿਪਿਤ੍ਵਾਪਿ ਥੇਯ੍ਯਚਿਤ੍ਤੇਨ ਗਚ੍ਛਤੋ ਪਦਵਾਰੇਨ ਅਵਹਾਰੋਤਿ ਖਾਯਤਿ. ਤਸ੍ਮਾ ਭਣ੍ਡਪਰਿਕਪ੍ਪੋ ਓਕਾਸਪਰਿਕਪ੍ਪੋ ਕਾਲਪਰਿਕਪ੍ਪੋਤਿ ਤਿਵਿਧੋਪਿ ਪਰਿਕਪ੍ਪੋ ਗਹੇਤਬ੍ਬੋ. ਅਟ੍ਠਕਥਾਯਂ ਪਨ ਓਕਾਸਪਰਿਕਪ੍ਪੇ ਸਮੋਧਾਨੇਤ੍ਵਾ ਕਾਲਪਰਿਕਪ੍ਪੋ ਵਿਸੁਂ ਨ ਵੁਤ੍ਤੋਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਪਦਵਾਰੇਨ ਕਾਰੇਤਬ੍ਬੋਤਿ ਭੂਮਿਯਂ ਅਨਿਕ੍ਖਿਪਿਤ੍ਵਾ ਵੀਮਂਸਿਤਤ੍ਤਾ ਵੁਤ੍ਤਂ. ਪਰਿਯੁਟ੍ਠਿਤੋਤਿ ਅਨੁਬਦ੍ਧੋ.
ਪਰਿਕਪ੍ਪੋ ਦਿਸ੍ਸਤੀਤਿ ਗਹਣਕ੍ਖਣੇ ਪਰਿਕਪ੍ਪੋ ਦਿਸ੍ਸਤਿ, ਨ ਤਦਾ ਤੇਸਂ ਮਤੇਨ ਅਵਹਾਰੋਤਿ ਦਸ੍ਸੇਤਿ. ਦਿਸ੍ਵਾ ਹਟਤ੍ਤਾ ਪਰਿਕਪ੍ਪਾਵਹਾਰੋ ਨ ਦਿਸ੍ਸਤੀਤਿ ਪਚ੍ਛਾ ਪਨ ਬਹਿ ਵੀਮਂਸਿਤ੍ਵਾ ਸਾਟਕਭਾਵਂ ਞਤ੍ਵਾ ਤਤੋ ਪਚ੍ਛਾ ਥੇਯ੍ਯਚਿਤ੍ਤੇਨ ਹਟਤ੍ਤਾ ਪੁਬ੍ਬੇ ਕਤਸ੍ਸ ਪਰਿਕਪ੍ਪਸ੍ਸ ਅਵਹਾਰਾਨਙ੍ਗਤ੍ਤਾ ‘‘ਸੁਤ੍ਤ’’ਨ੍ਤਿ ਞਤ੍ਵਾ ਹਰਣੇ ਵਿਯ ਥੇਯ੍ਯਾਵਹਾਰੋ ਏਵ ਸਿਯਾ. ਤਸ੍ਮਾ ਪਰਿਕਪ੍ਪਾਵਹਾਰੋ ਨ ਦਿਸ੍ਸਤਿ. ਸਾਟਕੋ ਚੇ ਭਵਿਸ੍ਸਤੀਤਿਆਦਿਕਸ੍ਸ ਪਰਿਕਪ੍ਪਸ੍ਸ ਤਦਾ ਅਵਿਜ੍ਜਮਾਨਤ੍ਤਾ ਕੇਵਲਂ ਅਵਹਾਰੋ ਏਵ, ਨ ਪਰਿਕਪ੍ਪਾਵਹਾਰੋਤਿ ਅਧਿਪ੍ਪਾਯੋ, ਤੇਨ ਭਣ੍ਡਪਰਿਕਪ੍ਪਾਵਹਾਰਸ੍ਸ ‘‘ਸਾਟਕੋ ਚੇ ਭਵਿਸ੍ਸਤਿ, ਗਹੇਸ੍ਸਾਮੀ’’ਤਿ ਏਵਂ ਭਣ੍ਡਸਨ੍ਨਿਟ੍ਠਾਨਾਭਾਵਕ੍ਖਣੇਯੇਵ ਪਵਤ੍ਤਿਂ ਦਸ੍ਸੇਤਿ, ਤੇਨਾਹ ‘‘ਯਂ ਪਰਿਕਪ੍ਪਿਤਂ, ਤਂ ਅਦਿਟ੍ਠਂ ਪਰਿਕਪ੍ਪਿਤਭਾਵੇ ਠਿਤਂਯੇਵ ਉਦ੍ਧਰਨ੍ਤਸ੍ਸ ਅਵਹਾਰੋ’’ਤਿ. ਯਦਿ ਏਵਂ ਕਸ੍ਮਾ ਓਕਾਸਪਅਪ੍ਪਾਵਹਾਰੋ ਭਣ੍ਡਂ ਦਿਸ੍ਵਾ ਅਵਹਰਨ੍ਤਸ੍ਸ ਪਰਿਕਪ੍ਪਾਵਹਾਰੋ ਸਿਯਾਤਿ? ਨਾਯਂ ਦੋਸੋ ਅਭਣ੍ਡਵਿਸਯਤ੍ਤਾ ਤਸ੍ਸ ਪਰਿਕਪ੍ਪਸ੍ਸ, ਪੁਬ੍ਬੇਵ ਦਿਸ੍ਵਾ ਞਾਤਭਣ੍ਡਸ੍ਸੇਵ ਹਿ ਓਕਾਸਪਰਿਕਪ੍ਪੋ ਵੁਤ੍ਤੋ. ਤਂ ਮਞ੍ਞਮਾਨੋ ਤਂ ਅਵਹਰੀਤਿ ਇਦਂ ਸੁਤ੍ਤਂ ਕਿਞ੍ਚਾਪਿ ‘‘ਤਞ੍ਞੇਵੇਤ’’ਨ੍ਤਿ ਨਿਯਮੇਤ੍ਵਾ ਗਣ੍ਹਨ੍ਤਸ੍ਸ ਵਸੇਨ ਵੁਤ੍ਤਂ, ਤਥਾਪਿ ‘‘ਤਞ੍ਚੇ ਗਣ੍ਹਿਸ੍ਸਾਮੀ’’ਤਿ ਏਵਂ ਪਵਤ੍ਤੇ ਇਮਸ੍ਮਿਂ ਪਰਿਕਪ੍ਪੇਪਿ ‘‘ਗਣ੍ਹਿਸ੍ਸਾਮੀ’’ਤਿ ਗਹਣੇ ਨਿਯਮਸਬ੍ਭਾਵਾ ਅਵਹਾਰਤ੍ਥਸਾਧਕਂ ਹੋਤੀਤਿ ਉਦ੍ਧਟਂ, ਤੇਨੇਵ ‘‘ਸਮੇਤੀ’’ਤਿ ਵੁਤ੍ਤਂ.
ਕੇਚੀਤਿ ਮਹਾਅਟ੍ਠਕਥਾਯਮੇਵ ਏਕਚ੍ਚੇ ਆਚਰਿਯਾ. ਮਹਾਪਚ੍ਚਰਿਯਂ ਪਨਾਤਿਆਦਿਨਾਪਿ ਕੇਚਿਵਾਦੋ ਗਾਰਯ੍ਹੋ, ਮਹਾਅਟ੍ਠਕਥਾਵਾਦੋਵ ਯੁਤ੍ਤਤਰੋਤਿ ਦਸ੍ਸੇਤਿ.
ਅਲਙ੍ਕਾਰਭਣ੍ਡਨ੍ਤਿ ਅਙ੍ਗੁਲਿਮੁਦ੍ਦਿਕਾਦਿ. ਕੁਸਂ ਪਾਤੇਤ੍ਵਾਤਿ ਵਿਲੀਵਮਯਂ ਵਾ ਤਾਲਪਣ੍ਣਾਦਿਮਯਂ ਵਾ ਕਤਸਞ੍ਞਾਣਂ ਪਾਤੇਤ੍ਵਾ. ਪਰਕੋਟ੍ਠਾਸਤੋ ਕੁਸੇ ਉਦ੍ਧਟੇਪਿ ਨ ਤਾਵ ਕੁਸਸ੍ਸ ਪਰਿਵਤ੍ਤਨਂ ਜਾਤਨ੍ਤਿ ਵੁਤ੍ਤਂ ‘‘ਉਦ੍ਧਾਰੇ ਰਕ੍ਖਤੀ’’ਤਿ. ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਨ੍ਤਿ ਇਮਿਨਾ ਠਾਨਾਚਾਵਨਂ ਧੁਰਨਿਕ੍ਖੇਪਞ੍ਚ ਵਿਨਾ ਕੁਸਸਙ੍ਕਾਮਨਂ ਨਾਮ ਵਿਸੁਂ ਏਕੋਯਂ ਅਵਹਾਰੋਤਿ ਦਸ੍ਸੇਤਿ. ਸਬ੍ਬੇਪਿ ਹਿ ਅਵਹਾਰਾ ਸਾਹਤ੍ਥਿਕਾਣਤ੍ਤਿਕਾਧਿਪ੍ਪਾਯਯੋਗੇਹਿ ਨਿਪ੍ਫਾਦਿਯਮਾਨਾ ਅਤ੍ਥਤੋ ਠਾਨਾਚਾਵਨਧੁਰਨਿਕ੍ਖੇਪਕੁਸਸਙ੍ਕਾਮਨੇਸੁ ਤੀਸੁ ਸਮੋਸਰਨ੍ਤੀਤਿ ਦਟ੍ਠਬ੍ਬਂ. ਇਤਰੋ ਤਸ੍ਸ ਭਾਗਂ ਉਦ੍ਧਰਤਿ, ਉਦ੍ਧਾਰੇ ਪਾਰਾਜਿਕਨ੍ਤਿ ਪੁਰਿਮਸ੍ਸ ਅਤ੍ਤਨੋ ਕੋਟ੍ਠਾਸੇ ਆਲਯਸ੍ਸ ਅਵਿਗਤਤ੍ਤਾ ਵੁਤ੍ਤਂ, ਆਲਯੇ ਪਨ ਸਬ੍ਬਥਾ ਅਸਤਿ ਅਵਹਾਰੋ ਨ ਹੋਤਿ, ਤੇਨਾਹ ‘‘ਵਿਚਿਨਿਤਾਵਸੇਸਂ ਗਣ੍ਹਨ੍ਤਸ੍ਸਾਪਿ ਅਵਹਾਰੋ ਨਤ੍ਥੇਵਾ’’ਤਿ.
ਨਾਯਂ ਮਮਾਤਿ ਜਾਨਨ੍ਤੋਪੀਤਿ ਏਤ੍ਥ ਪਿ-ਸਦ੍ਦੇਨ ਤਤ੍ਥ ਵੇਮਤਿਕੋਪਿ ਹੁਤ੍ਵਾ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋਪਿ ਸਙ੍ਗਯ੍ਹਤਿ. ਸਿਵੇਯ੍ਯਕਨ੍ਤਿ ਸਿਵਿਰਟ੍ਠੇ ਜਾਤਂ.
੧੪੦-੧. ਕਪ੍ਪਿਯਂ ਕਾਰਾਪੇਤ੍ਵਾਤਿ ਪਚਾਪੇਤ੍ਵਾ. ਤਸ੍ਮਿਂ ਪਾਚਿਤ੍ਤਿਯਨ੍ਤਿ ਅਦਿਨ੍ਨਾਦਾਨਭਾਵੇਨ ਸਹਪਯੋਗਸ੍ਸਾਪਿ ਅਭਾਵਾ ਦੁਕ੍ਕਟਂ ਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਆਣਤ੍ਤੇਹੀਤਿ ਸਮ੍ਮਤੇਨ ਆਣਤ੍ਤੇਹਿ. ਆਣਤ੍ਤੇਨਾਤਿ ਸਾਮਿਕੇਹਿ ਆਣਤ੍ਤੇਨ. ਭਣ੍ਡਦੇਯ੍ਯਨ੍ਤਿ ਸਮ੍ਮਤਾਦੀਹਿ ਦਿਨ੍ਨਤ੍ਤਾ ਨ ਪਰਾਜਿਕਂ ਜਾਤਂ, ਅਸਨ੍ਤਂ ਪੁਗ੍ਗਲਂ ਵਤ੍ਵਾ ਗਹਿਤਤ੍ਤਾ ਪਨ ਭਣ੍ਡਦੇਯ੍ਯਂ ਵੁਤ੍ਤਂ. ਅਞ੍ਞੇਨ ਦਿਯ੍ਯਮਾਨਨ੍ਤਿ ਸਮ੍ਮਤਾਦੀਹਿ ਚਤੂਹਿ ਅਞ੍ਞੇਨ ਦਿਯ੍ਯਮਾਨਂ. ਗਣ੍ਹਨ੍ਤੋਤਿ ‘‘ਅਪਰਸ੍ਸ ਭਾਗਂ ਦੇਹੀ’’ਤਿ ਵਤ੍ਵਾ ਗਣ੍ਹਨ੍ਤੋ. ਅਪਰਸ੍ਸਾਤਿ ਅਸਨ੍ਤਂ ਪੁਗ੍ਗਲਂ ਅਦਸ੍ਸੇਤ੍ਵਾ ਪਨ ‘‘ਅਪਰਂ ਭਾਗਂ ਦੇਹੀ’’ਤਿ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਤੋ ਗਿਹਿਸਨ੍ਤਕੇ ਸਾਮਿਨਾ ਚ ‘‘ਇਮਸ੍ਸ ਦੇਹੀ’’ਤਿ ਏਵਂ ਆਣਤ੍ਤੇਨ ਚ ਦਿਨ੍ਨੇ ਭਣ੍ਡਦੇਯ੍ਯਮ੍ਪਿ ਨ ਹੋਤਿ, ਸਙ੍ਘਸਨ੍ਤਕੇ ਪਨ ਹੋਤੀਤਿ ਇਮਂ ਵਿਸੇਸਂ ਦਸ੍ਸੇਤੁਂ ਅਸਮ੍ਮਤੇਨ ਵਾ ਅਨਾਣਤ੍ਤੇਨ ਵਾਤਿਆਦਿ ਪੁਨ ਵੁਤ੍ਤਂ. ਇਤਰੇਹਿ ਦਿਯ੍ਯਮਾਨਨ੍ਤਿ ਸਮ੍ਮਤੇਨ ਆਣਤ੍ਤੇਨ ਵਾ ਦਿਯ੍ਯਮਾਨਂ. ਏਵਂ ਗਣ੍ਹਤੋਤਿ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਤ੍ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਤੋ. ਸਾਮਿਕੇਨ ਪਨਾਤਿ ਏਤ੍ਥ ਪਨ-ਸਦ੍ਦੋ ਵਿਸੇਸਤ੍ਥਜੋਤਕੋ, ਤੇਨ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਨ੍ਤੇ ਸਾਮਿਕੇਨ ਸਯਂ ਦੇਨ੍ਤੇ ਵਾ ਦਾਪੇਨ੍ਤੇ ਵਾ ਵਿਸੇਸੋ ਅਤ੍ਥੀਤਿ ਵੁਤ੍ਤਂ ਹੋਤਿ. ਸੁਦਿਨ੍ਨਨ੍ਤਿ ਭਣ੍ਡਦੇਯ੍ਯਂ ਨ ਹੋਤੀਤਿ ਅਧਿਪ੍ਪਾਯੋ. ਹੇਟ੍ਠਾ ਪਨ ਸਾਮਿਕੇਨ ਤੇਨ ਆਣਤ੍ਤੇਨ ਵਾ ਦਿਯ੍ਯਮਾਨਂ ਗਿਹਿਸਨ੍ਤਕਂ ‘‘ਅਪਰਸ੍ਸ ਭਾਗਂ ਦੇਹੀ’’ਤਿ ਵਤ੍ਵਾ ਗਣ੍ਹਤੋ ਅਪਰਸ੍ਸ ਅਭਾਵਤੋ ਸਾਮਿਸਨ੍ਤਕਮੇਵ ਹੋਤੀਤਿ ਭਣ੍ਡਦੇਯ੍ਯਂ ਜਾਤਂ, ਇਧ ਪਨ ਤੇਹਿਯੇਵ ਦਿਯ੍ਯਮਾਨਂ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਤ੍ਵਾ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਤੋ ‘‘ਦੇਹੀ’’ਤਿ ਵੁਤ੍ਤਤ੍ਤਾ ਅਞ੍ਞਾਤਕਵਿਞ੍ਞਤ੍ਤਿਮਤ੍ਤਂ ਠਪੇਤ੍ਵਾ ਭਣ੍ਡਦੇਯ੍ਯਂ ਨ ਹੋਤੀਤਿ ਸੁਦਿਨ੍ਨਮੇਵਾਤਿ ਵੁਤ੍ਤਂ. ਅਸ੍ਸਾਮਿਕੇਨ ਪਨ ਆਣਤ੍ਤੇਨ ਦਿਨ੍ਨਂ ਭਣ੍ਡਂ ਗਣ੍ਹਤੋ ਭਣ੍ਡਦੇਯ੍ਯਮੇਵਾਤਿ ਵਦਨ੍ਤਿ, ਪਤ੍ਤਚਤੁਕ੍ਕੇ ਵਿਯ ਅਵਹਾਰਤਾਵੇਤ੍ਥ ਯੁਤ੍ਤਾ, ਸਙ੍ਘਸਨ੍ਤਕੇ ਪਨ ‘‘ਦੇਹੀ’’ਤਿ ਵੁਤ੍ਤੇਪਿ ਸਾਮਿਕਸ੍ਸ ਕਸ੍ਸਚਿ ਅਭਾਵਾ ਸਮ੍ਮਤੇਨ ਦਿਨ੍ਨੇਪਿ ਭਣ੍ਡਦੇਯ੍ਯਂ ਵੁਤ੍ਤਨ੍ਤਿ ਗਹੇਤਬ੍ਬਂ.
੧੪੬-੯. ਆਹਰਾਪੇਨ੍ਤੇਸੁ ਭਣ੍ਡਦੇਯ੍ਯਨ੍ਤਿ ‘‘ਗਹਿਤੇ ਅਤ੍ਤਮਨੋ ਹੋਤੀ’’ਤਿ ਵਚਨਤੋ ਅਨਤ੍ਤਮਨਸ੍ਸ ਸਨ੍ਤਕਂ ਗਹਿਤਮ੍ਪਿ ਪੁਨ ਦਾਤਬ੍ਬਮੇਵਾਤਿ ਵੁਤ੍ਤਂ. ‘‘ਸਮ੍ਮੁਖੀਭੂਤੇਹਿ ਭਾਜੇਤਬ੍ਬ’’ਨ੍ਤਿ ਵਚਨਤੋ ਭਾਜਨੀਯਭਣ੍ਡਂ ਉਪਚਾਰਸੀਮਟ੍ਠਾਨਮੇਵ ਪਾਪੁਣਾਤੀਤਿ ਆਹ ‘‘ਅਨ੍ਤੋਉਪਚਾਰਸੀਮਾਯਂ ਠਿਤਸ੍ਸੇਵ ਗਹੇਤੁਂ ਵਟ੍ਟਤੀ’’ਤਿ. ਭਣ੍ਡਦੇਯ੍ਯਨ੍ਤਿ ਉਭਿਨ੍ਨਂ ਸਾਲਯਭਾਵੇਪਿ ਚੋਰਸ੍ਸ ਅਦਤ੍ਵਾ ਸਾਮਿਕਸ੍ਸੇਵ ਦਾਤਬ੍ਬਂ ਚੋਰੇਨਾਪਿ ਸਾਮਿਕਸ੍ਸੇਵ ਦਾਤਬ੍ਬਤੋ. ਏਸੇਵ ਨਯੋਤਿ ਪਂਸੁਕੂਲਸਞ੍ਞਾਯ ਗਹਿਤੇ ਭਣ੍ਡਦੇਯ੍ਯਂ, ਥੇਯ੍ਯਚਿਤ੍ਤੇਨ ਪਾਰਾਜਿਕਨ੍ਤਿ ਅਤ੍ਥੋ.
ਵੁਟ੍ਠਹਨ੍ਤੇਸੂਤਿ ਗਾਮਂ ਛਡ੍ਡੇਤ੍ਵਾ ਪਲਾਯਨ੍ਤੇਸੁ. ਅਵਿਸੇਸੇਨਾਤਿ ਸਉਸ੍ਸਾਹਤਾਦਿਵਿਸੇਸਂ ਅਪਰਾਮਸਿਤ੍ਵਾ ਸਾਮਞ੍ਞਤੋ. ਸਉਸ੍ਸਾਹਮਤ੍ਤਮੇਵ ਆਪਤ੍ਤਿਭਾਵਸ੍ਸ ਪਮਾਣਂ ਸਾਮਿਕਾਨਂ ਪਰਿਚ੍ਛਿਨ੍ਨਭਾਵਤੋ. ਤਤੋਤਿ ਗਣਸਨ੍ਤਕਾਦਿਤੋ. ਕੁਲਸਙ੍ਗਹਣਤ੍ਥਾਯ ਦੇਤੀਤਿ ਪਂਸੁਕੂਲਵਿਸ੍ਸਾਸਿਕਾਦਿਸਞ੍ਞਾਯ ਗਹੇਤ੍ਵਾ ਦੇਤਿ, ਤਦਾ ਕੁਲਸਙ੍ਗਹਪਚ੍ਚਯਾ ਚ ਦੁਕ੍ਕਟਂ ਭਣ੍ਡਦੇਯ੍ਯਞ੍ਚ, ਥੇਯ੍ਯਚਿਤ੍ਤੇ ਪਨ ਸਤਿ ਕੁਲਸਙ੍ਗਹਣਤ੍ਥਾਯ ਗਣ੍ਹਤੋਪਿ ਪਾਰਾਜਿਕਮੇਵ. ਊਨਪਞ੍ਚਮਾਸਕਾਦੀਸੁ ਕੁਲਦੂਸਕਦੁਕ੍ਕਟੇਨ ਸਦ੍ਧਿਂ ਥੁਲ੍ਲਚ੍ਚਯਦੁਕ੍ਕਟਾਨਿ. ਸੇਨਾਸਨਤ੍ਥਾਯ ਨਿਯਮਿਤਨ੍ਤਿ ਇਦਂ ਇਸ੍ਸਰਵਤਾਯ ਦਦਤੋ ਥੁਲ੍ਲਚ੍ਚਯਦਸ੍ਸਨਤ੍ਥਂ ਵੁਤ੍ਤਂ. ਇਤਰਪਚ੍ਚਯਤ੍ਥਾਯ ਦਿਨ੍ਨਮ੍ਪਿ ਅਥੇਯ੍ਯਚਿਤ੍ਤੇਨ ਇਸ੍ਸਰਵਤਾਯ ਕੁਲਸਙ੍ਗਹਣਤ੍ਥਾਯ ਵਾ ਞਾਤਕਾਦੀਨਂ ਵਾ ਦਦਤੋ ਦੁਕ੍ਕਟਂ ਭਣ੍ਡਦੇਯ੍ਯਞ੍ਚ ਹੋਤੇਵ. ਇਸ੍ਸਰਵਤਾਯਾਤਿ ‘‘ਮਯਿ ਦੇਨ੍ਤੇ ਕੋ ਨਿਵਾਰੇਸ੍ਸਤਿ, ਅਹਮੇਵੇਤ੍ਥ ਪਮਾਣ’’ਨ੍ਤਿ ਏਵਂ ਅਤ੍ਤਨੋ ਇਸ੍ਸਰਿਯਭਾਵੇਨ. ਥੁਲ੍ਲਚ੍ਚਯਨ੍ਤਿ ਕੁਲਸਙ੍ਗਹਣਤ੍ਥਾਯ ਵਾ ਅਞ੍ਞਥਾ ਵਾ ਕਾਰਣੇਨ ਦਦਤੋ ਸੇਨਾਸਨਤ੍ਥਾਯ ਨਿਯਮਿਤਸ੍ਸ ਗਰੁਭਣ੍ਡਤਾਯ ਥੁਲ੍ਲਚ੍ਚਯਂ ਭਣ੍ਡਦੇਯ੍ਯਞ੍ਚ. ਗੀਵਾਤਿ ਏਤ੍ਥ ਸੇਨਾਸਨਤ੍ਥਾਯ ਨਿਯਮਿਤੇ ਥੁਲ੍ਲਚ੍ਚਯੇਨ ਸਦ੍ਧਿਂ ਗੀਵਾ, ਇਤਰਸ੍ਮਿਂ ਦੁਕ੍ਕਟੇਨ ਸਦ੍ਧਿਨ੍ਤਿ ਵੇਦਿਤਬ੍ਬਂ. ਸੁਖਾਦਿਤਮੇਵਾਤਿ ਅਨ੍ਤੋਉਪਚਾਰਸੀਮਾਯਂ ਠਤ੍ਵਾ ਭਾਜੇਤ੍ਵਾ ਅਤ੍ਤਨੋ ਸਨ੍ਤਕਂ ਕਤ੍ਵਾ ਖਾਦਿਤਤ੍ਤਾ ਵੁਤ੍ਤਂ. ਸਙ੍ਘਿਕਞ੍ਹਿ ਵਿਹਾਰਪਟਿਬਦ੍ਧਂ ਵੇਭਙ੍ਗਿਯਂ ਬਹਿਉਪਚਾਰਸੀਮਟ੍ਠਂ ਭਣ੍ਡਂ ਅਨ੍ਤੋਉਪਚਾਰਟ੍ਠੇਹਿ ਭਿਕ੍ਖੂਹਿ ਏਵ ਭਾਜੇਤਬ੍ਬਂ, ਨ ਬਹਿ ਠਿਤੇਹਿ ਉਪਚਾਰਸੀਮਾਯ ਭਾਜੇਤਬ੍ਬਨ੍ਤਿ.
੧੫੦. ‘‘ਵੁਤ੍ਤੋ ਵਜ੍ਜੇਮੀ’’ਤਿ ਵੁਤ੍ਤਭਿਕ੍ਖੁਸ੍ਮਿਂ ‘‘ਵੁਤ੍ਤੋ ਵਜ੍ਜੇਹੀ’’ਤਿ ਵੁਤ੍ਤਸ੍ਸ ਪਚ੍ਛਾ ਉਪ੍ਪਜ੍ਜਨਕਪਾਰਾਜਿਕਾਦਿਦੋਸਾਰੋਪਨਤੋ, ਗਹਟ੍ਠਾਨਂ ਵਾ ‘‘ਭਦਨ੍ਤਾ ਅਪਰਿਚ੍ਛੇਦਂ ਕਤ੍ਵਾ ਵਦਨ੍ਤੀ’’ਤਿ ਏਵਂ ਦੋਸਾਰੋਪਨਤੋ.
੧੫੩-੫. ਛਾਤਜ੍ਝਤ੍ਤਨ੍ਤਿ ਤੇਨ ਛਾਤੇਨ ਜਿਘਚ੍ਛਾਯ ਉਦਰਗ੍ਗਿਨਾ ਝਤ੍ਤਂ, ਦਡ੍ਢਂ ਪੀਲ਼ਿਤਨ੍ਤਿ ਅਤ੍ਥੋ. ਧਨੁਕਨ੍ਤਿ ਖੁਦ੍ਦਕਧਨੁਸਣ੍ਠਾਨਂ ਲਗ੍ਗਨਕਦਣ੍ਡਂ. ਮਦ੍ਦਨ੍ਤੋ ਗਚ੍ਛਤਿ, ਭਣ੍ਡਦੇਯ੍ਯਨ੍ਤਿ ਏਤ੍ਥ ਏਕਸੂਕਰਗ੍ਘਨਕਭਣ੍ਡਂ ਦਾਤਬ੍ਬਂ ਏਕਸ੍ਮਿਂ ਬਨ੍ਧੇ ਅਞ੍ਞੇਸਂ ਤਤ੍ਥ ਅਬਜ੍ਝਨਤੋ. ਅਦੂਹਲਨ੍ਤਿ ਯਨ੍ਤਪਾਸਾਣੋ, ਯੇਨ ਅਜ੍ਝੋਤ੍ਥਟਤ੍ਤਾ ਮਿਗਾ ਪਲਾਯਿਤੁਂ ਨ ਸਕ੍ਕੋਨ੍ਤਿ. ਪਚ੍ਛਾ ਗਚ੍ਛਤੀਤਿ ਤੇਨ ਕਤਪਯੋਗੇਨ ਅਗਨ੍ਤ੍ਵਾ ਪਚ੍ਛਾ ਸਯਮੇਵ ਗਚ੍ਛਤਿ, ਹੇਟ੍ਠਾ ਵੁਤ੍ਤੇਸੁਪਿ ਈਦਿਸੇਸੁ ਠਾਨੇਸੁ ਏਸੇਵ ਨਯੋ. ਰਕ੍ਖਂ ਯਾਚਿਤ੍ਵਾਤਿ ਰਾਜਪੁਰਿਸਾਨਂ ਸਨ੍ਤਿਕਂ ਗਨ੍ਤ੍ਵਾ ਅਨੁਦ੍ਦਿਸ੍ਸ ਰਕ੍ਖਂ ਯਾਚਿਤ੍ਵਾ. ਕੁਮੀਨਮੁਖਨ੍ਤਿ ਕੁਮੀਨਸ੍ਸ ਅਨ੍ਤੋ ਮਚ੍ਛਾਨਂ ਪਵਿਸਨਮੁਖਂ.
੧੫੬. ਥੇਰਾਨਨ੍ਤਿ ਆਗਨ੍ਤੁਕਤ੍ਥੇਰਾਨਂ. ਤੇਸਮ੍ਪੀਤਿ ਆਵਾਸਿਕਭਿਕ੍ਖੂਨਮ੍ਪਿ. ਪਰਿਭੋਗਤ੍ਥਾਯਾਤਿ ਸਙ੍ਘਿਕੇ ਕਤ੍ਤਬ੍ਬਵਿਧਿਂ ਕਤ੍ਵਾ ਪਰਿਭੁਞ੍ਜਨਤ੍ਥਾਯ. ਗਹਣੇਤਿ ਪਾਠਸੇਸੋ ਦਟ੍ਠਬ੍ਬੋ. ਯਤ੍ਥਾਤਿ ਯਸ੍ਮਿਂ ਆਵਾਸੇ. ਅਞ੍ਞੇਸਨ੍ਤਿ ਅਞ੍ਞੇਸਂ ਆਗਨ੍ਤੁਕਾਨਂ. ਤੇਸੁਪਿ ਆਗਨ੍ਤੁਕਾ ਅਨਿਸ੍ਸਰਾਤਿ ਸੇਨਾਸਨੇ ਨਿਰਨ੍ਤਰਂ ਵਸਨ੍ਤਾਨਂ ਚੀਵਰਤ੍ਥਾਯ ਦਾਯਕੇਹਿ ਭਿਕ੍ਖੂਹਿ ਵਾ ਨਿਯਮੇਤ੍ਵਾ ਦਿਨ੍ਨਤ੍ਤਾ ਭਾਜੇਤ੍ਵਾ ਖਾਦਿਤੁਂ ਅਨਿਸ੍ਸਰਾ, ਆਗਨ੍ਤੁਕੇਹਿਪਿ ਇਚ੍ਛਨ੍ਤੇਹਿ ਤਸ੍ਮਿਂ ਵਿਹਾਰੇ ਵਸ੍ਸਾਨਾਦੀਸੁ ਪਵਿਸਿਤ੍ਵਾ ਚੀਵਰਤ੍ਥਾਯ ਗਹੇਤਬ੍ਬਂ. ਤੇਸਂ ਕਤਿਕਾਯ ਠਾਤਬ੍ਬਨ੍ਤਿ ਸਬ੍ਬਾਨਿ ਫਲਾਫਲਾਨਿ ਅਭਾਜੇਤ੍ਵਾ ‘‘ਏਤ੍ਤਕੇਸੁ ਰੁਕ੍ਖੇਸੁ ਫਲਾਨਿ ਭਾਜੇਤ੍ਵਾ ਪਰਿਭੁਞ੍ਜਿਸ੍ਸਾਮ, ਅਞ੍ਞੇਸੁ ਫਲਾਫਲੇਹਿ ਸੇਨਾਸਨਾਨਿ ਪਟਿਜਗ੍ਗਿਸ੍ਸਾਮਾ’’ਤਿ ਵਾ, ‘‘ਪਿਣ੍ਡਪਾਤਾਦਿਪਚ੍ਚਯਂ ਸਮ੍ਪਾਦੇਸ੍ਸਾਮਾ’’ਤਿ ਵਾ, ‘‘ਕਿਞ੍ਚਿਪਿ ਅਭਾਜੇਤ੍ਵਾ ਚਤੁਪਚ੍ਚਯਤ੍ਥਾਯੇਵ ਉਪਨੇਮਾ’’ਤਿ ਵਾ ਏਵਂ ਸਮ੍ਮਾ ਉਪਨੇਨ੍ਤਾਨਂ ਆਵਾਸਿਕਾਨਂ ਕਤਿਕਾਯ ਆਗਨ੍ਤੁਕੇਹਿ ਠਾਤਬ੍ਬਂ. ਮਹਾਅਟ੍ਠਕਥਾਯਂ ‘‘ਅਨਿਸ੍ਸਰਾ’’ਤਿ ਵਚਨੇਨ ਦੀਪਿਤੋ ਏਵ ਅਤ੍ਥੋ, ਮਹਾਪਚ੍ਚਰਿਯਂ ਚਤੁਨ੍ਨਂ ਪਚ੍ਚਯਾਨਨ੍ਤਿਆਦਿਨਾ ਵਿਤ੍ਥਾਰੇਤ੍ਵਾ ਦਸ੍ਸਿਤੋ. ਪਰਿਭੋਗਵਸੇਨੇਵਾਤਿ ਏਤ੍ਥ ਏਵ-ਸਦ੍ਦੋ ਅਟ੍ਠਾਨਪ੍ਪਯੁਤ੍ਤੋ, ਪਰਿਭੋਗਵਸੇਨ ਤਮੇਵ ਭਾਜੇਤ੍ਵਾਤਿ ਯੋਜੇਤਬ੍ਬਂ. ਏਤ੍ਥਾਤਿ ਏਤਸ੍ਮਿਂ ਵਿਹਾਰੇ, ਰਟ੍ਠੇ ਵਾ.
ਸੇਨਾਸਨਪਚ੍ਚਯਨ੍ਤਿ ਸੇਨਾਸਨਞ੍ਚ ਤਦਤ੍ਥਾਯ ਨਿਯਮੇਤ੍ਵਾ ਠਪਿਤਞ੍ਚ. ਏਕਂ ਵਾ ਦ੍ਵੇ ਵਾ ਵਰਸੇਨਾਸਨਾਨਿ ਠਪੇਤ੍ਵਾਤਿ ਵੁਤ੍ਤਮੇਵਤ੍ਥਂ ਪੁਨ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ ‘‘ਮੂਲਵਤ੍ਥੁਚ੍ਛੇਦਂ ਪਨ ਕਤ੍ਵਾ ਨ ਉਪਨੇਤਬ੍ਬ’’ਨ੍ਤਿ ਵੁਤ੍ਤਂ, ਸੇਨਾਸਨਸਙ੍ਖਾਤਵਤ੍ਥੁਨੋ ਮੂਲਚ੍ਛੇਦਂ ਕਤ੍ਵਾ ਸਬ੍ਬਾਨਿ ਸੇਨਾਸਨਾਨਿ ਨ ਵਿਸ੍ਸਜ੍ਜੇਤਬ੍ਬਾਨੀਤਿ ਅਤ੍ਥੋ. ਕੇਚਿ ਪਨੇਤ੍ਥ ‘‘ਏਕਂ ਵਾ ਦ੍ਵੇ ਵਾ ਵਰਸੇਨਾਸਨਾਨਿ ਠਪੇਤ੍ਵਾ ਲਾਮਕਤੋ ਪਟ੍ਠਾਯ ਵਿਸ੍ਸਜ੍ਜੇਨ੍ਤੇਹਿਪਿ ਸੇਨਾਸਨਭੂਮਿਯੋ ਨ ਵਿਸ੍ਸਜ੍ਜੇਤਬ੍ਬਾਤਿ ਅਯਮਤ੍ਥੋ ਵੁਤ੍ਤੋ’’ਤਿ ਵਦਨ੍ਤਿ, ਤਮ੍ਪਿ ਯੁਤ੍ਤਮੇਵ ਇਮਸ੍ਸਾਪਿ ਅਤ੍ਥਸ੍ਸ ਅਵਸ੍ਸਂ ਵਤ੍ਤਬ੍ਬਤੋ, ਇਤਰਥਾ ਕੇਚਿ ਸਹ ਵਤ੍ਥੁਨਾਪਿ ਵਿਸ੍ਸਜ੍ਜੇਤਬ੍ਬਂ ਮਞ੍ਞੇਯ੍ਯੁਂ.
ਪਣ੍ਣਂ ਆਰੋਪੇਤ੍ਵਾਤਿ ‘‘ਏਤ੍ਤਕੇ ਰੁਕ੍ਖੇ ਰਕ੍ਖਿਤ੍ਵਾ ਤਤੋ ਏਤ੍ਤਕਂ ਗਹੇਤਬ੍ਬ’’ਨ੍ਤਿ ਪਣ੍ਣਂ ਆਰੋਪੇਤ੍ਵਾ. ਨਿਮਿਤ੍ਤਸਞ੍ਞਂ ਕਤ੍ਵਾਤਿ ਸਙ੍ਕੇਤਂ ਕਤ੍ਵਾ. ਦਾਰਕਾਤਿ ਤੇਸਂ ਪੁਤ੍ਤਨਤ੍ਤਾਦਯੋ ਯੇ ਕੇਚਿ ਗੋਪੇਨ੍ਤਿ, ਤੇ ਸਬ੍ਬੇਪਿ ਇਧ ‘‘ਦਾਰਕਾ’’ਤਿ ਵੁਤ੍ਤਾ. ਤਤੋਤਿ ਯਥਾਵੁਤ੍ਤਦਾਰੁਸਮ੍ਭਾਰਤੋ. ਆਪੁਚ੍ਛਿਤ੍ਵਾਤਿ ਕਾਰਕਸਙ੍ਘਂ ਆਪੁਚ੍ਛਿਤ੍ਵਾ. ਤਂ ਸਬ੍ਬਮ੍ਪਿ ਆਹਰਿਤ੍ਵਾਤਿ ਅਨਾਪੁਚ੍ਛਿਤ੍ਵਾਪਿ ਤਾਵਕਾਲਿਕਂ ਆਹਰਿਤ੍ਵਾ. ਅਯਮੇਵ ਭਿਕ੍ਖੁ ਇਸ੍ਸਰੋਤਿਆਦਿਤੋ ਪਟ੍ਠਾਯ ਅਤ੍ਤਨੋ ਸਨ੍ਤਕੇਹਿ ਦਾਰੁਸਮ੍ਭਾਰਾਦੀਹਿ ਚ ਕਾਰਾਪਿਤਤ੍ਤਾ ਪਟਿਜਗ੍ਗਿਤਤ੍ਤਾ ਚ ਸਙ੍ਘਿਕਸੇਨਾਸਨੇ ਭਾਗਿਤਾਯ ਚ ਅਯਮੇਵ ਇਸ੍ਸਰੋ, ਨ ਚ ਸੋ ਤਤੋ ਵੁਟ੍ਠਾਪੇਤਬ੍ਬੋਤਿ ਵੁਤ੍ਤਂ ਹੋਤਿ. ਉਦਕਪੂਜਨ੍ਤਿ ਚੇਤਿਯਙ੍ਗਣੇ ਸਿਞ੍ਚਨਾਦਿਪੂਜਂ. ਵਤ੍ਤਸੀਸੇਨਾਤਿ ਕੇਵਲਂ ਸਦ੍ਧਾਯ, ਨ ਵੇਤਨਾਦਿਅਤ੍ਥਾਯ. ਸਵਤ੍ਥੁਕਨ੍ਤਿ ਸਹ ਭੂਮਿਯਾ. ਕੁਟ੍ਟਨ੍ਤਿ ਗੇਹਭਿਤ੍ਤਿਂ. ਪਾਕਾਰਨ੍ਤਿ ਪਰਿਕ੍ਖੇਪਪਾਕਾਰਂ. ਤਤੋਤਿ ਛਡ੍ਡਿਤਵਿਹਾਰਤੋ. ਤਤੋ ਆਹਰਿਤ੍ਵਾ ਸੇਨਾਸਨਂ ਕਤਂ ਹੋਤੀਤਿ ਸਾਮਨ੍ਤਗਾਮਵਾਸੀਹਿ ਭਿਕ੍ਖੂਹਿ ਛਡ੍ਡਿਤਵਿਹਾਰਤੋ ਦਾਰੁਸਮ੍ਭਾਰਾਦਿਂ ਆਹਰਿਤ੍ਵਾ ਸੇਨਾਸਨਂ ਕਤਂ ਹੋਤਿ.
੧੫੭. ‘‘ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਤੀ’’ਤਿ ਵੁਤ੍ਤਮਤ੍ਥਂਯੇਵ ਪਾਕਟਂ ਕਾਤੁਂ ‘‘ਆਗਤਾਗਤਾਨਂ ਵੁਡ੍ਢਤਰਾਨਂ ਨ ਦੇਤੀ’’ਤਿ ਵੁਤ੍ਤਂ. ਚਤੁਭਾਗਉਦਕਸਮ੍ਭਿਨ੍ਨੇਤਿ ਚਤੁਤ੍ਥਭਾਗੇਨ ਸਮ੍ਭਿਨ੍ਨੇ. ਪਾਲ਼ਿਯਂ ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੫੭) ਸਾਮਿਕੇਹਿ ਥੁਲ੍ਲਨਨ੍ਦਂ ਉਦ੍ਦਿਸ੍ਸ ਏਤਿਸ੍ਸਾ ਹਤ੍ਥੇ ਦਿਨ੍ਨਤ੍ਤਾ, ਅਥੇਯ੍ਯਚਿਤ੍ਤੇਨ ਪਰਿਭੁਞ੍ਜਿਤਤ੍ਤਾ ਚ ਵੁਤ੍ਤਂ. ਥੇਯ੍ਯਚਿਤ੍ਤੇਨ ਪਰਿਭੁਤ੍ਤੇਪਿ ਚਸ੍ਸਾ ਭਣ੍ਡਦੇਯ੍ਯਮੇਵ ਉਪਨਿਕ੍ਖਿਤ੍ਤਭਣ੍ਡਟ੍ਠਾਨਿਯਤ੍ਤਾ. ਓਦਨਭਾਜਨੀਯਵਤ੍ਥੁਸ੍ਮਿਨ੍ਤਿ ‘‘ਅਪਰਸ੍ਸ ਭਾਗਂ ਦੇਹੀ’’ਤਿ ਆਗਤਵਤ੍ਥੁਸ੍ਮਿਂ (ਪਾਰਾ. ੧੪੧).
੧੫੯. ਤਸ੍ਸ ਕੁਲਸ੍ਸ ਅਨੁਕਮ੍ਪਾਯ ਪਸਾਦਾਨੁਰਕ੍ਖਣਤ੍ਥਾਯਾਤਿਆਦਿਨਾ ਕੁਲਸਙ੍ਗਹਤ੍ਥਂ ਨਾਕਾਸੀਤਿ ਦਸ੍ਸੇਤਿ. ‘‘ਯਾਵ ਦਾਰਕਾ ਪਾਸਾਦਂ ਆਰੋਹਨ੍ਤਿ, ਤਾਵ ਪਾਸਾਦੋ ਤੇਸਂ ਸਨ੍ਤਿਕੇ ਹੋਤੂ’’ਤਿ ਪੁਬ੍ਬੇ ਕਾਲਪਰਿਚ੍ਛੇਦਂ ਕਤ੍ਵਾ ਅਧਿਟ੍ਠਿਤਤ੍ਤਾ ਏਵ ਯਥਾਕਾਲਪਰਿਚ੍ਛੇਦਮੇਵ ਤਤ੍ਥ ਤਿਟ੍ਠਤਿ, ਤਤੋ ਪਰਂ ਪਾਸਾਦੋ ਸਯਮੇਵ ਯਥਾਠਾਨਂ ਗਚ੍ਛਤਿ, ਤਥਾਗਮਨਞ੍ਚ ਇਦ੍ਧਿਵਿਸ੍ਸਜ੍ਜਨੇਨ ਸਞ੍ਜਾਤਂ ਵਿਯ ਹੋਤੀਤਿ ਵੁਤ੍ਤਂ ‘‘ਥੇਰੋ ਇਦ੍ਧਿਂ ਪਟਿਸਂਹਰੀ’’ਤਿ. ਯਸ੍ਮਾ ਏਵਂ ਇਦ੍ਧਿਵਿਧਞਾਣੇਨ ਕਰੋਨ੍ਤਸ੍ਸ ਕਾਯਵਚੀਪਯੋਗਾ ਨ ਸਨ੍ਤਿ ਥੇਯ੍ਯਚਿਤ੍ਤਞ੍ਚ ਨਤ੍ਥਿ ਪਾਸਾਦਸ੍ਸੇਵ ਵਿਚਾਰਿਤਤ੍ਤਾ, ਤਸ੍ਮਾ ‘‘ਏਤ੍ਥ ਅਵਹਾਰੋ ਨਤ੍ਥੀ’’ਤਿ ਥੇਰੋ ਏਵਮਕਾਸੀਤਿ ਦਟ੍ਠਬ੍ਬਂ. ਅਥ ਵਾ ਦਾਰਕੇਸੁ ਅਨੁਕਮ੍ਪਾਯ ਆਨਯਨਤ੍ਥਮੇਵ ਪਾਸਾਦੇ ਉਪਨੀਤੇ ਪਾਸੇ ਬਦ੍ਧਸੂਕਰਾਦੀਨਂ ਆਮਿਸਂ ਦਸ੍ਸੇਤ੍ਵਾ ਠਾਨਾਚਾਵਨਂ ਵਿਯ ਕਰਮਰਾਨੀਤੇਸੁ ਦਾਰਕੇਸੁ ਪਾਸਾਦਂ ਆਰੁਲ਼੍ਹੇਸੁਪਿ ਪੁਨ ਪਟਿਸਂਹਰਣੇ ਚ ਇਧ ਅਵਹਾਰੋ ਨਤ੍ਥਿ ਕਾਰੁਞ੍ਞਾਧਿਪ੍ਪਾਯਤ੍ਤਾ, ਭਣ੍ਡਦੇਯ੍ਯਮ੍ਪਿ ਨ ਹੋਤਿ ਕਾਯਵਚੀਪਯੋਗਾਭਾਵਾ. ਕਾਯਵਚੀਪਯੋਗੇ ਸਤਿਯੇਵ ਹਿ ਆਪਤ੍ਤਿ ਭਣ੍ਡਦੇਯ੍ਯਂ ਵਾ ਹੋਤਿ, ਤੇਨੇਵ ਭਗਵਾ ‘‘ਅਨਾਪਤ੍ਤਿ, ਭਿਕ੍ਖਵੇ, ਅਥੇਯ੍ਯਚਿਤ੍ਤਸ੍ਸਾ’’ਤਿਆਦਿਂ ਅਵਤ੍ਵਾ ‘‘ਅਨਾਪਤ੍ਤਿ, ਭਿਕ੍ਖਵੇ, ਇਦ੍ਧਿਮਸ੍ਸ ਇਦ੍ਧਿਵਿਸਯੇ’’ਤਿ (ਪਾਰਾ. ੧੫੯) ਏਤ੍ਤਕਮੇਵ ਅਵੋਚ. ਇਦ੍ਧਿਵਿਸਯੇਤਿ ਚੇਤ੍ਥ ਪਰਭਣ੍ਡਾਦਾਯਕਕਾਯਵਚੀਪਯੋਗਾਸਮੁਟ੍ਠਾਪਕਸ੍ਸ ਕੇਵਲਂ ਮਨੋਦ੍ਵਾਰਿਕਸ੍ਸ ਅਥੇਯ੍ਯਚਿਤ੍ਤਭੂਤਸ੍ਸ ਇਦ੍ਧਿਚਿਤ੍ਤਸ੍ਸ ਵਿਸਯੇ ਆਪਤ੍ਤਿ ਨਾਮ ਨਤ੍ਥੀਤਿ ਅਧਿਪ੍ਪਾਯੋ ਗਹੇਤਬ੍ਬੋ. ਕਿਂ ਪਨ ਪਟਿਕ੍ਖਿਤ੍ਤਂ ਇਦ੍ਧਿਪਾਟਿਹਾਰਿਯਂ ਕਾਤੁਂ ਵਟ੍ਟਤੀਤਿ ਚੋਦਨਂ ਸਨ੍ਧਾਯਾਹ ‘‘ਈਦਿਸਾਯ ਅਧਿਟ੍ਠਾਨਿਦ੍ਧਿਯਾ ਅਨਾਪਤ੍ਤੀ’’ਤਿ. ‘‘ਅਨਾਪਤ੍ਤਿ, ਭਿਕ੍ਖਵੇ, ਇਦ੍ਧਿਮਸ੍ਸ ਇਦ੍ਧਿਵਿਸਯੇ’’ਤਿ ਹਿ ਇਮਿਨਾਯੇਵ ਸੁਤ੍ਤੇਨ ਅਧਿਟ੍ਠਾਨਿਦ੍ਧਿਯਾ ਅਪ੍ਪਟਿਕ੍ਖਿਤ੍ਤਭਾਵੋ ਸਿਜ੍ਝਤਿ. ਅਤ੍ਤਨੋ ਪਕਤਿਵਣ੍ਣਂ ਅਵਿਜਹਿਤ੍ਵਾ ਬਹਿਦ੍ਧਾ ਹਤ੍ਥਿਆਦਿਦਸ੍ਸਨਂ, ‘‘ਏਕੋਪਿ ਹੁਤ੍ਵਾ ਬਹੁਧਾ ਹੋਤੀ’’ਤਿ (ਦੀ. ਨਿ. ੧.੨੩੮, ੨੩੯; ਮ. ਨਿ. ੧.੧੪੭; ਪਟਿ. ਮ. ੧.੧੦੨) ਆਗਤਞ੍ਚ ਅਧਿਟ੍ਠਾਨਵਸੇਨ ਨਿਪ੍ਫਨ੍ਨਤ੍ਤਾ ਅਧਿਟ੍ਠਾਨਿਦ੍ਧਿ ਨਾਮ, ‘‘ਸੋ ਪਕਤਿਵਣ੍ਣਂ ਵਿਜਹਿਤ੍ਵਾ ਕੁਮਾਰਕਵਣ੍ਣਂ ਵਾ ਦਸ੍ਸੇਤਿ, ਨਾਗਵਣ੍ਣਂ…ਪੇ… ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤੀ’’ਤਿ (ਪਟਿ. ਮ. ੩.੧੩) ਏਵਂ ਆਗਤਾ ਇਦ੍ਧਿ ਪਕਤਿਵਣ੍ਣਵਿਜਹਨਵਿਕਾਰਵਸੇਨ ਪਵਤ੍ਤਤ੍ਤਾ ਵਿਕੁਬ੍ਬਨਿਦ੍ਧਿ ਨਾਮ. ਅਤ੍ਤਨੋ ਪਨ ਪਕਤਿਰੂਪਂ ਯਥਾਸਭਾਵੇਨ ਠਪੇਤ੍ਵਾਵ ਬਹਿ ਹਤ੍ਥਿਆਦਿਦਸ੍ਸਨਂ ਵਿਕੁਬ੍ਬਨਿਦ੍ਧਿ ਨਾਮ ਨ ਹੋਤਿ, ਅਤ੍ਤਨੋ ਰੂਪਮੇਵ ਹਤ੍ਥਿਆਦਿਰੂਪੇਨ ਨਿਮ੍ਮਾਨਂ ਵਿਕੁਬ੍ਬਨਿਦ੍ਧੀਤਿ ਵੇਦਿਤਬ੍ਬਂ.
ਪਰਾਜਿਤਕਿਲੇਸੇਨਾਤਿ ਵਿਜਿਤਕਿਲੇਸੇਨ, ਨਿਕ੍ਕਿਲੇਸੇਨਾਤਿ ਅਤ੍ਥੋ. ਇਧਾਤਿ ਇਮਸ੍ਮਿਂ ਸਾਸਨੇ, ਤੇਨ ਦੁਤਿਯਪਾਰਾਜਿਕਸਿਕ੍ਖਾਪਦੇਨ ਸਮਂ ਅਞ੍ਞਂ ਅਨੇਕਨਯਵੋਕਿਣ੍ਣਂ ਗਮ੍ਭੀਰਤ੍ਥਵਿਨਿਚ੍ਛਯਂ ਕਿਞ੍ਚਿ ਸਿਕ੍ਖਾਪਦਂ ਨ ਵਿਜ੍ਜਤੀਤਿ ਯੋਜਨਾ. ਤਤ੍ਥ ਅਤ੍ਥੋ ਨਾਮ ਪਾਲ਼ਿਅਤ੍ਥੋ, ਵਿਨਿਚ੍ਛਯੋ ਪਾਲ਼ਿਮੁਤ੍ਤਕਵਿਨਿਚ੍ਛਯੋ, ਤੇ ਗਮ੍ਭੀਰਾ ਯਸ੍ਮਿਂ, ਤਂ ਗਮ੍ਭੀਰਤ੍ਥਵਿਨਿਚ੍ਛਯਂ. ਵਤ੍ਥੁਮ੍ਹਿ ਓਤਿਣ੍ਣੇਤਿ ਚੋਦਨਾਵਸੇਨ ਵਾ ਅਤ੍ਤਨਾਵ ਅਤ੍ਤਨੋ ਵੀਤਿਕ੍ਕਮਾਰੋਚਨਵਸੇਨ ਵਾ ਸਙ੍ਘਮਜ੍ਝੇ ਅਦਿਨ੍ਨਾਦਾਨਵਤ੍ਥੁਸ੍ਮਿਂ ਓਤਿਣ੍ਣੇ. ਏਤ੍ਥਾਤਿ ਓਤਿਣ੍ਣਵਤ੍ਥੁਮ੍ਹਿ. ਵਿਨਿਚ੍ਛਯੋਤਿ ਆਪਤ੍ਤਾਨਾਪਤ੍ਤਿਨਿਯਮਨਂ. ਕਪ੍ਪਿਯੇਪਿ ਚ ਵਤ੍ਥੁਸ੍ਮਿਨ੍ਤਿ ਅਤ੍ਤਨਾ ਗਹੇਤੁਂ ਯੁਤ੍ਤੇ ਮਾਤਾਪਿਤਾਦੀਨਂ ਸਨ੍ਤਕੇਪਿ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ
ਦੁਤਿਯਪਾਰਾਜਿਕਵਣ੍ਣਨਾਨਯੋ ਨਿਟ੍ਠਿਤੋ.