੭. ਗਬ੍ਭਿਨਿਵਗ੍ਗਵਣ੍ਣਨਾ

੧. ਪਠਮਾਦਿਸਿਕ੍ਖਾਪਦਵਣ੍ਣਨਾ

੧੦੬੭. ‘‘ਗਬ੍ਭਿਨਿ’’ਨ੍ਤਿ ਦਸ੍ਸਨਾਦੀਹਿਪਿ ਗਬ੍ਭਸਮ੍ਭਵਤੋ ਵੁਤ੍ਤਂ. ਪਦਭਾਜਨੇਪਿ ਪਵਾਰਿਤਭਾਵੋ ਨ ਦਿਸ੍ਸਤਿ.

੧੦੭੪. ਧਾਤਿ ਵਾਤਿ ਏਤ੍ਥ ਦਾਰਕਂ ਸਾਮਿਕਾਨਂ ਦਤ੍ਵਾ ਆਹਟੇ ਵਡ੍ਢੇਤਿ, ਤਥਾ ਮਾਤਾਪੀਤਿ ਕੇਚਿ.

੧੦੮੦. ‘‘ਸਿਕ੍ਖਮਾਨ’’ਨ੍ਤਿ ਪਾਠਂ ਦੀਪਵਾਸਿਨੋ ਰੋਚੇਨ੍ਤਿ ਕਿਰਿਯਾਕਿਰਿਯਤ੍ਤਾ, ਜਮ੍ਬੁਦੀਪਵਾਸਿਨੋ ‘‘ਸਿਕ੍ਖਮਾਨਾ’’ਤਿ. ਤਸ੍ਸਤ੍ਥੋ ਸਿਕ੍ਖਾਧਮ੍ਮਮਾਨਨਤੋ ਸਿਕ੍ਖਮਾਨਾਤਿ. ਇਧ ਕਿਰਿਯਾ ਨ ਹੋਤਿ, ਸਞ੍ਞਾਵ ਅਧਿਪ੍ਪੇਤਾ. ਨ ਏਤਾਸੁ ਅਸਿਕ੍ਖਿਤਾ ਉਪਸਮ੍ਪਾਦੇਤਬ੍ਬਾ ਉਪਜ੍ਝਾਯਿਨੀਆਦੀਨਂ ਆਪਤ੍ਤਿਭਾਵਾ. ‘‘ਤਸ੍ਸਾ ਉਪਸਮ੍ਪਦਾ ਹੋਤਿ ਏਵਾ’’ਤਿ ਵਦਨ੍ਤਿ.

੧੦੮੨. ਧਮ੍ਮਕਮ੍ਮੇਤਿ ਉਪਸਮ੍ਪਦਕਮ੍ਮਂ ਅਧਿਪ੍ਪੇਤਂ.

੧੧੧੨. ਵੁਟ੍ਠਾਪਿਤਨ੍ਤਿ ਸਾਮਣੇਰਿਭੂਮਿਤੋ ਯਾਯ ਥੇਰਿਯਾ ਉਪਸਮ੍ਪਦਾਪੇਕ੍ਖਾ ਵੁਟ੍ਠਪਿਤਾ, ਸਾ ਥੇਰੀ ਵੁਟ੍ਠਾਪਿਤਾ ਨਾਮ, ਤੇਨੇਵ ਪੁਨ ਵਿਸੇਸਨਤ੍ਥਂ ‘‘ਪਵਤ੍ਤਿਨਿ’’ਨ੍ਤਿ ਆਹ.

ਪਠਮਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਗਬ੍ਭਿਨਿਵਗ੍ਗਵਣ੍ਣਨਾ ਨਿਟ੍ਠਿਤਾ.