੬. ਆਰਾਮਵਗ੍ਗਵਣ੍ਣਨਾ
੧੦੨੧. ਪਠਮਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੨. ਦੁਤਿਯਸਿਕ੍ਖਾਪਦਵਣ੍ਣਨਾ
੧੦੩੦. ਭਿਕ੍ਖੁਨੀ ਚੇ ਭਿਕ੍ਖੁਂ ਅਕ੍ਕੋਸਤਿ, ਇਮਿਨਾ ਸਿਕ੍ਖਾਪਦੇਨ ਪਾਚਿਤ੍ਤਿਯਂ. ਭਿਕ੍ਖੁਨਿਂ ਚੇ ਅਕ੍ਕੋਸਤਿ, ਓਮਸਵਾਦੇਨ ਆਪਜ੍ਜਤਿ. ਓਮਸਵਾਦੇ ਸਮ੍ਮੁਖਾਵ ਰੁਹਤਿ, ਇਧ ਪਨ ਪਰਮ੍ਮੁਖਾਪਿ.
ਤਤ੍ਰਾਯਂ ਵਿਚਾਰਣਾ – ਭਿਕ੍ਖੁਵਿਭਙ੍ਗੇ ਓਸਮਵਾਦਸਿਕ੍ਖਾਪਦੇ ਭਿਕ੍ਖੁਨੀ ਅਨੁਪਸਮ੍ਪਨ੍ਨਟ੍ਠਾਨੇ ਤਿਟ੍ਠਤੀਤਿ ਕਤ੍ਵਾ ਭਿਕ੍ਖੁਨਿਵਿਭਙ੍ਗੇਪਿ ਓਮਸਵਾਦਸਿਕ੍ਖਾਪਦੇ ਭਿਕ੍ਖੁ ਭਿਕ੍ਖੁਨਿਯਾ ਅਨੁਪਸਮ੍ਪਨ੍ਨਟ੍ਠਾਨੇ ਤਿਟ੍ਠਤੀਤਿ ਸਿਦ੍ਧਂ. ਇਧ ਚ ਅਨੁਪਸਮ੍ਪਨ੍ਨਸ੍ਸ ਅਕ੍ਕੋਸਨੇ ਦੁਕ੍ਕਟਂ ਵੁਤ੍ਤਂ, ਭਿਕ੍ਖੁਸ੍ਸ ਉਪਸਮ੍ਪਨ੍ਨਸ੍ਸ ਅਕ੍ਕੋਸਨੇ ਪਾਚਿਤ੍ਤਿਯਂ ਵੁਤ੍ਤਂ, ਤਸ੍ਮਾ ਇਮਾਨਿ ਦ੍ਵੇ ਸਿਕ੍ਖਾਪਦਾਨਿ ਭਿਕ੍ਖੁਮ੍ਹਿ ਸਂਸਨ੍ਦਿਯਮਾਨਾਨਿ ਅਞ੍ਞਮਞ੍ਞਂ ਨ ਸਮੇਨ੍ਤਿ. ਯਥਾ ਸਮੇਨ੍ਤਿ, ਤਥਾ ਜਾਨਿਤਬ੍ਬਂ. ਤਤ੍ਥ ਪੋਰਾਣਗਣ੍ਠਿਪਦੇ ਵੁਤ੍ਤਨਯੇਨ ਭਿਕ੍ਖੁਨੀਨਂ ਓਮਸਵਾਦਸਿਕ੍ਖਾਪਦੇ ਅਨੁਪਸਮ੍ਪਨ੍ਨੋਤਿ ਨ ਗਹੇਤਬ੍ਬੋ, ਇਦਮੇਤ੍ਥ ਯੁਤ੍ਤਂ. ਪਰਿਭਾਸੇਯ੍ਯਾਤਿ ਅਞ੍ਞਤ੍ਰ ਅਕ੍ਕੋਸਵਤ੍ਥੂਹਿ. ਤੇਸੁ ਹਿ ਅਞ੍ਞਤਰਸ੍ਮਿਂ ਸਤਿ ਓਮਸਵਾਦਪਾਚਿਤ੍ਤਿਯਮੇਵਾਤਿ ਏਕੇ, ਤਂ ਨ ਯੁਤ੍ਤਂ. ਓਮਸਵਾਦੇ ਪਾਲ਼ਿਮੁਤ੍ਤਕਅਕ੍ਕੋਸੇ ਹਿ ਦੁਕ੍ਕਟਂ ਹੋਤੀਤਿ. ਦੁਕ੍ਕਟੋਕਾਸੇ ਇਦਂ ਪਾਚਿਤ੍ਤਿਯਂ ਤੇਹਿ ਨਿਦ੍ਦਿਟ੍ਠਂ ਹੋਤਿ, ਤਸ੍ਮਾ ‘‘ਬਾਲਾ ਏਤਾ’’ਤਿ ਪਾਲ਼ਿਯਂ ਇਧ ਆਗਤਪਦਾਨਂਯੇਵ ਵਸੇਨ ਪਰਿਭਾਸਨਂ ਵੇਦਿਤਬ੍ਬਂ.
ਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦੩੩. ਤਤਿਯਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੪. ਚਤੁਤ੍ਥਸਿਕ੍ਖਾਪਦਵਣ੍ਣਨਾ
੧੦੩੮. ਨਿਮਨ੍ਤਿਤਾ ਵਾ ਪਵਾਰਿਤਾ ਵਾਤਿ ਏਤ੍ਥ ਪੋਰਾਣਗਣ੍ਠਿਪਦੇ ਤਾਵ ਏਵਂ ਵੁਤ੍ਤਂ ‘‘ਪਵਾਰਿਤਾਪਿ ਯਾਗੁਂ ਪਾਤੁਂ ਲਭਤਿ, ਭੋਜ੍ਜਯਾਗੁਂ ਨ ਲਭਤਿ. ਯਾਗੁ ਪਨੇਤ੍ਥ ਖਾਦਨੀਯਭੋਜਨੀਯਸਙ੍ਖ੍ਯਂ ਨ ਗਚ੍ਛਤਿ. ਨਿਮਨ੍ਤਿਤਾ ਭਿਕ੍ਖੁਨੀ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਤੁਕਾਮਾ ਸਾਮਿਕੇ ਅਪਲੋਕੇਤ੍ਵਾਵ ਭੁਞ੍ਜਿਤੁਂ ਲਭਤਿ. ਪਰਮ੍ਪਰਭੋਜਨਾਪਤ੍ਤਿ ਭਿਕ੍ਖੁਨੀਨਂ ਨਤ੍ਥਿ. ਨਿਮਨ੍ਤਿਤਾ ਤਂ ਭਤ੍ਤਂ ਭੁਞ੍ਜਿਤ੍ਵਾ ਵਾ ਅਭੁਞ੍ਜਿਤ੍ਵਾ ਵਾ ਪਵਾਰਿਤਾ ਕਪ੍ਪਿਯਂ ਕਾਰਾਪੇਤ੍ਵਾ ਭੁਞ੍ਜਿਤੁਂ ਨ ਲਭਤਿ, ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤਿਯਮਾਨਾ ਦ੍ਵੇ ਨਿਮਨ੍ਤਨਾਨਿ ਸਮ੍ਪਟਿਚ੍ਛਿਤੁਞ੍ਚ ਨ ਲਭਤੀ’’ਤਿ. ਤਤ੍ਥ ‘‘ਪਵਾਰਿਤਾਪਿ ਯਾਗੁਂ ਪਾਤੁਂ ਲਭਤੀ’’ਤਿ ਵੁਤ੍ਤਂ ਪਾਲ਼ਿਯਂ, ਅਟ੍ਠਕਥਾਯਞ੍ਚ ਅਨੁਞ੍ਞਾਤਤ੍ਤਾ. ‘‘ਨਿਮਨ੍ਤਿਤਾ ਅਪ੍ਪਵਾਰਿਤਾ ਯਾਗੁਂ ਪਿਵਤੀ’’ਤਿ ਹਿ ਪਾਲ਼ਿਯਂ ਵੁਤ੍ਤਂ. ਤਤ੍ਰਿਦਂ ਸਿਕ੍ਖਾਪਦਵਣ੍ਣਨਾਪੁਬ੍ਬਙ੍ਗਮਸਨ੍ਨਿਟ੍ਠਾਨਂ – ਨਿਮਨ੍ਤਿਤਾ ਵਾ ਪਵਾਰਿਤਾ ਵਾਤਿ ਏਤ੍ਥ ਵਾਸਦ੍ਦੇਨ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤਿਤਾ ਅਪ੍ਪਵਾਰਿਤਾ ਠਪੇਤ੍ਵਾ ਯਾਗੁਂ ਅਞ੍ਞਂ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦੇਯ੍ਯ ਵਾ ਭੁਞ੍ਜੇਯ੍ਯ ਵਾ, ਪਾਚਿਤ੍ਤਿਯਂ ਅਞ੍ਞਤ੍ਰ ਸਾਮਿਕਾਨਂ ਅਪਲੋਕਨਾ. ਪਰਮ੍ਪਰਭੋਜਨਾਭਾਵੇਨ ਭਿਕ੍ਖੁਨੀਨਂ ਕੋ ਗੁਣੋ ਜਾਤੋਤਿ? ਨ ਏਤਾਸਂ ਗੁਣਲਾਭੋ, ਕੇਵਲਂ ਪਾਕਟਤਰਂ ਜਾਤਂ. ਭਿਕ੍ਖੂਪਿ ਵਿਕਪ੍ਪੇਤ੍ਵਾ ਮਿਸ੍ਸੇਤ੍ਵਾਵ ਭੁਞ੍ਜਿਤੁਂ ਲਭਨ੍ਤਿ. ਸਮਯੇ ਯਥਾਸੁਖਂ ਲਭਨ੍ਤਿ. ਇਮਿਨਾ ਅਪਲੋਕਨੇਨ ਕਿਨ੍ਤਿ? ਪਵਾਰਿਤਾ ਵਾ ਅਨਿਮਨ੍ਤਿਤਾ ਵਾ ਨ ਕਿਞ੍ਚਿ ਕਪ੍ਪਿਯਂ ਕਾਰਾਪੇਤ੍ਵਾ ਗਿਲਾਨਾਤਿਰਿਤ੍ਤਮ੍ਪਿ ਲਭਨ੍ਤਿ, ਨਿਮਨ੍ਤਿਤਾ ਚ ਪਵਾਰਿਤਾ ਚ ਯਾਗੁਮ੍ਪਿ ਨ ਲਭਨ੍ਤਿ, ਅਪਲੋਕੇਤ੍ਵਾਪਿ ਨ ਲਭਨ੍ਤੀਤਿ.
ਚਤੁਤ੍ਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਆਰਾਮਵਗ੍ਗਵਣ੍ਣਨਾ ਨਿਟ੍ਠਿਤਾ.