੫. ਚਿਤ੍ਤਾਗਾਰਵਗ੍ਗਵਣ੍ਣਨਾ

੧. ਪਠਮਸਿਕ੍ਖਾਪਦਵਣ੍ਣਨਾ

੯੭੮. ਕੀਲ਼ਨਉਪਵਨਂ ਨਾਮ ਕਞ੍ਚਿਨਗਰਸ੍ਸ ਨਗਰੁਪਵਨਂ ਵਿਯ ਦਟ੍ਠਬ੍ਬਂ. ਉਯ੍ਯਾਨਂ ਨਾਮ ਤਤ੍ਥੇਵ ਨਨ੍ਦਵਨਉਯ੍ਯਾਨਂ ਵਿਯ ਦਟ੍ਠਬ੍ਬਂ. ‘‘ਤਤ੍ਥੇਵ ਠਤ੍ਵਾ ਤਂ ਤਂ ਦਿਸਾਭਾਗਂ ਵਿਲੋਕੇਤ੍ਵਾ ਪਸ੍ਸਨ੍ਤਿਯਾ ਪਨ ਪਾਟੇਕ੍ਕਾ ਆਪਤ੍ਤਿਯੋ’’ਤਿ ਪਾਠੋ. ਏਵਂ ਵੁਤ੍ਤੇ ਯਂ ਪੁਬ੍ਬੇ ਵੁਤ੍ਤਂ ਪਦਂ ‘‘ਅਨੁਦ੍ਧਰਮਾਨਾ’’ਤਿ, ਤਂ ਏਕਸ੍ਮਿਂਯੇਵ ਦਿਸਾਭਾਗੇਤਿ ਸਿਦ੍ਧਨ੍ਤਿ ਏਕੇ. ਉਪਚਾਰੋ ਦ੍ਵੇ ਲੇਡ੍ਡੁਪਾਤੋਤਿ ਚ.

ਪਠਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਸਿਕ੍ਖਾਪਦਵਣ੍ਣਨਾ

੯੮੪. ‘‘ਆਹਰਿਮੇਹਿ ਵਾਲ਼ੇਹੀ’’ਤਿ ‘‘ਅਸਂਹਾਰਿਮੇਨਾ’’ਤਿ ਚ ਦੁਵਿਧੋ ਪਾਠੋ. ‘‘ਵਿਸੁਂ ਕਤ੍ਵਾ ਪਚ੍ਛਾ ਸਦ੍ਧਿਂ ਤੇਹਿ ਵਾਲ਼ੇਹੀ’’ਤਿ ਲਿਖਿਤਂ. ਯਥਾ ਤਥਾ ਵਾਲ਼ਰੂਪੇ ਉਟ੍ਠਪੇਤ੍ਵਾ ਕਤਪਾਦਂ ‘‘ਪਲ੍ਲਙ੍ਕ’’ਨ੍ਤਿ ਵੁਚ੍ਚਤਿ ਅਨਾਪਤ੍ਤਿਵਾਰੇ ‘‘ਅਸਂਹਾਰਿਮੇਹਿ ਵਾਲ਼ੇਹਿ ਕਤਂ ਪਰਿਭੁਞ੍ਜਤੀ’’ਤਿ ਵਚਨਾਭਾਵਤੋ.

ਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਸਿਕ੍ਖਾਪਦਵਣ੍ਣਨਾ

੯੮੮. ‘‘ਉਜ੍ਜਵੁਜ੍ਜਵੇਤਿ ਹਤ੍ਥਪ੍ਪਸਾਰਣੇ’’ਤਿ ਲਿਖਿਤਂ, ਤਂ ਨ ਯੁਤ੍ਤਂ ‘‘ਯਤ੍ਤਕਂ ਹਤ੍ਥੇਨ ਅਞ੍ਛਿਤਂ ਹੋਤਿ, ਤਸ੍ਮਿਂ ਤਕ੍ਕਮ੍ਹਿ ਵੇਠਿਤੇ ਏਕਾਪਤ੍ਤੀ’’ਤਿ ਵਚਨਤੋ.

ਤਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਸਿਕ੍ਖਾਪਦਵਣ੍ਣਨਾ

੯੯੩. ‘‘ਯਾਗੁਪਾਨੇਤਿ ਯਾਗੁਦਾਨੇ’’ਤਿ ਲਿਖਿਤਂ. ਪੋਰਾਣਗਣ੍ਠਿਪਦੇ ‘‘ਮਾਤਾਪਿਤੂਨਂ ਦਾਤੁਂ ਵਟ੍ਟਤੀ’’ਤਿ ਵੁਤ੍ਤਂ.

ਚਤੁਤ੍ਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯੯੪. ਪਞ੍ਚਮਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.

੬. ਛਟ੍ਠਸਿਕ੍ਖਾਪਦਵਣ੍ਣਨਾ

੧੦੦੧. ਛਟ੍ਠੇ ਭਿਕ੍ਖੁਵਿਭਙ੍ਗੇ ਅਚੇਲਕਸਿਕ੍ਖਾਪਦੇਨ ਏਕਪਰਿਚ੍ਛੇਦਂ. ਇਧ ਅਗਾਰਿਕੋ ਵਿਸੇਸੋ, ਤਸ੍ਮਾ ‘‘ਅਸਾਧਾਰਣ’’ਨ੍ਤਿ ਵਦਨ੍ਤਿ.

ਛਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦੦੩-੮. ਸਤ੍ਤਮਟ੍ਠਮੇਸੁ ਵਤ੍ਤਬ੍ਬਂ ਨਤ੍ਥਿ.

੯. ਨਵਮਸਿਕ੍ਖਾਪਦਵਣ੍ਣਨਾ

੧੦੧੫. ‘‘ਖੀਲਨਮਨ੍ਤਂ ਦਾਰੁਸਾਰਖੀਲਂ ਮਨ੍ਤੇਤ੍ਵਾ ਪਥਵਿਯਂ ਪਵੇਸੇਤ੍ਵਾ ਮਾਰਣਮਨ੍ਤਂ. ਨਾਗਮਣ੍ਡਲਂਨਾਮ ਨਾਗਰੋਧਮਨ੍ਤਂ, ਪਿਟ੍ਠਾਦੀਹਿ ਵਾ ਪਰਿਕ੍ਖੇਪਂ ਕਤ੍ਵਾ ਤਤ੍ਥ ਮਨੁਸ੍ਸੇ ਪਵੇਸੇਨ੍ਤਿ ਗੁਤ੍ਤਤ੍ਥਾਯਾ’’ਤਿ ਲਿਖਿਤਂ.

ਨਵਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦੧੭. ਦਸਮਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.

ਚਿਤ੍ਤਾਗਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.