੪. ਤੁਵਟ੍ਟਵਗ੍ਗਵਣ੍ਣਨਾ
੧. ਪਠਮਸਿਕ੍ਖਾਪਦਵਣ੍ਣਨਾ
੯੩੪-੫. ਏਕਾਯ ਨਿਪਨ੍ਨਾਯ ਅਪਰਾ ਨਿਪਜ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ‘‘ਉਭਿਨ੍ਨਮ੍ਪਿ ਪਠਮਨਿਪਨ੍ਨਾਯ ਅਨੁਟ੍ਠਾਪਨਾ’’ਤਿ ਵਤ੍ਵਾ ਏਤ੍ਥ ਕਿਰਿਯਾਕਿਰਿਯਨ੍ਤਿ ਏਕੇ, ਤਂ ਅਟ੍ਠਕਥਾਯ ਵਿਰੁਜ੍ਝਤਿ. ‘‘ਕਿਰਿਯ’’ਨ੍ਤਿ ਹਿ ਅਟ੍ਠਕਥਾਯਂ ਵੁਤ੍ਤਂ. ਅਥ ਕਸ੍ਸਾ ਆਪਤ੍ਤੀਤਿ? ਉਭਿਨ੍ਨਮ੍ਪਿ ਨਿਪਜ੍ਜਨਕਿਰਿਯਂ ਪਟਿਚ੍ਚ. ਇਮਸ੍ਸ ਅਨਾਪਤ੍ਤਿਵਾਰੇ ‘‘ਵਵਤ੍ਥਾਨਂ ਦਸ੍ਸੇਤ੍ਵਾ’’ਤਿ ਨਤ੍ਥਿ, ਤਸ੍ਮਾ ਵਵਤ੍ਥਾਨਂ ਕਤ੍ਵਾ ਨਿਪਜ੍ਜਿਤੁਂ ਨ ਵਟ੍ਟਤੀਤਿ ਏਕੇ. ਵਿਪੁਲਤਰੇ ਵਟ੍ਟਤੀਤਿ ਏਕੇ. ‘‘ਅਨ੍ਤਰਂ ਕਤ੍ਵਾ ਨਿਪਜ੍ਜਿਤੁਂ ਵਟ੍ਟਤੀ’’ਤਿ ਪੋਰਾਣਗਣ੍ਠਿਪਦੇ ਲਿਖਿਤਂ.
ਪਠਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਸਿਕ੍ਖਾਪਦਵਣ੍ਣਨਾ
੯੪੦. ਵਵਤ੍ਥਾਨਂ ਦਸ੍ਸੇਤ੍ਵਾਤਿ ਏਤ੍ਥ ਉਪਰਿ ਪਾਰੁਪਨਮ੍ਪਿ ਮਜ੍ਝੇ ਓਭੋਗਂ ਕਤ੍ਵਾ ਉਭਿਨ੍ਨਂ ਅਨ੍ਤਰੇ ਓਤਾਰੇਤਿ, ਵਟ੍ਟਤੀਤਿ ਏਕੇ. ਵਵਤ੍ਥਾਨਞ੍ਚ ਯਥਾ ਠਾਨੇ ਨ ਤਿਟ੍ਠਤਿ, ਤਥਾ ਅਤਿਕ੍ਕਮਿਤ੍ਵਾ ਤੁਵਟ੍ਟੇਨ੍ਤਿਯਾ ਆਪਤ੍ਤਿਯੇਵਾਤਿ. ‘‘ਕਿਰਿਯਾਕਿਰਿਯ’’ਨ੍ਤਿ ਚ ਪੋਰਾਣਗਣ੍ਠਿਪਦੇ ਵੁਤ੍ਤਂ.
ਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਤਤਿਯਸਿਕ੍ਖਾਪਦਵਣ੍ਣਨਾ
੯੪੧. ਅਤ੍ਤਨੋ ਸਜ੍ਝਾਯਨਟ੍ਠਾਨੇ ਚੇ ਵੁਡ੍ਢਤਰਾ ਆਗਚ੍ਛਤਿ, ਵਨ੍ਦਨਕਾਲੇ ਵਾ, ਆਪੁਚ੍ਛਨਕਿਚ੍ਚਂ ਨਤ੍ਥਿ. ਏਕਸ੍ਮਿਂ ਓਵਰਕੇ ਆਪੁਚ੍ਛਿਤਬ੍ਬਂ. ‘‘ਅਥ ਓਵਰਕੇ ਮਹਾਥੇਰੀ ਵਸਤਿ, ਸਮ੍ਮੁਖੇ ਇਤਰਾ, ਆਪੁਚ੍ਛਿਤਬ੍ਬਾ ਤਸ੍ਸਾ ਉਪਚਾਰਤ੍ਤਾ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ.
ਤਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯੪੬-੯੫੦. ਚਤੁਤ੍ਥਪਞ੍ਚਮਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੬. ਛਟ੍ਠਸਿਕ੍ਖਾਪਦਵਣ੍ਣਨਾ
੯੫੬. ਗਹਪਤਿ ਨਾਮ ਠਪੇਤ੍ਵਾ ਸਹਧਮ੍ਮਿਕੇ ਵੇਦਿਤਬ੍ਬੋ, ਤਸ੍ਮਾ ਭਿਕ੍ਖੁਨਾ ਵਾ ਸਾਮਣੇਰੇਨ ਵਾ ਅਨਨੁਲੋਮਿਕੇਨ ਸਂਸਗ੍ਗੇਨ ਸਂਸਟ੍ਠਾਪਿ ਨ ਸਮਨੁਭਾਸਿਤਬ੍ਬਾਤਿ ਸਮ੍ਭਵਤਿ ਏਵ.
ਛਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯੬੧-੫. ਸਤ੍ਤਮਅਟ੍ਠਮ ਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੯. ਨਵਮਸਿਕ੍ਖਾਪਦਵਣ੍ਣਨਾ
੯੬੯. ਏਕਿਨ੍ਦ੍ਰਿਯਨ੍ਤਿ ਕਾਯਿਨ੍ਦ੍ਰਿਯੇਨੇਵ ਏਕਿਨ੍ਦ੍ਰਿਯਂ, ਨਿਗਣ੍ਠਾਨਂ ਅਚੇਲਕਾਨਂ ਮਤਂ. ਕਾਪਿਲਾ ਪਨ ‘‘ਪਞ੍ਚਿਨ੍ਦ੍ਰਿਯਾ’’ਤਿ ਮਞ੍ਞਨ੍ਤਾ ਏਵਂ ਵਦਨ੍ਤਿ ‘‘ਸਚਕ੍ਖੁਕਤ੍ਤਾ ਅਲਾਬੁਮਾਲੁਵਾਦਯੋ ਯਤ੍ਥ ਆਲਮ੍ਬਨਂ, ਤਤ੍ਥ ਗਚ੍ਛਨ੍ਤਿ. ਸਸੋਤਕਤ੍ਤਾ ਕਦਲਿਯੋ ਮੇਘਗਜ੍ਜਿਤਂ ਸੁਤ੍ਵਾ ਗਬ੍ਭਂ ਗਣ੍ਹਨ੍ਤਿ. ਸਘਾਨਕਤ੍ਤਾ ਪਨਸਾਦਯੋ ਕੁਣਪਗਨ੍ਧੇਨ ਫਲਨ੍ਤਿ. ਸਜਿਵ੍ਹਕਤ੍ਤਾ ਉਦਕਂ ਪਿਵਨ੍ਤਿ ਯੇਨ, ਸਬ੍ਬੇਪਿ ‘ਪਾਦਪਾ’ਤਿ ਵੁਚ੍ਚਨ੍ਤਿ. ਸਕਾਯਪਸਾਦਤ੍ਤਾ ਇਤ੍ਥਿਸਮ੍ਫਸ੍ਸੇਨ ਅਸੋਕਰੁਕ੍ਖਾ ਪੁਪ੍ਫਨ੍ਤੀ’’ਤਿ. ਸਙ੍ਘਾਤਨ੍ਤਿ ਵਿਨਾਸਂ.
੯੭੦. ਇਧ ਚ ਵਸ੍ਸਚ੍ਛੇਦੇਨ ਦੁਕ੍ਕਟਂ. ਪਠਮਂ ਆਵਸਿਤ੍ਵਾ ਪਚ੍ਛਾ ਚਾਰਿਕਾ ਚਰਣਪਚ੍ਚਯਾ ਪਾਚਿਤ੍ਤਿਯਂ ਆਪਜ੍ਜਤੀਤਿ ਵੇਦਿਤਬ੍ਬਂ. ਅਥ ਵਸ੍ਸਂ ਅਵਸਿਤ੍ਵਾ ਚਰਤਿ, ਅਵਸ੍ਸੁਪਗਮਨਪਚ੍ਚਯਾ ਦੁਕ੍ਕਟਂ ਆਪਜ੍ਜਤਿ. ਪੋਰਾਣਗਣ੍ਠਿਪਦੇ ਪਨ ‘‘ਅਨ੍ਤੋਸਤ੍ਤਾਹੇ ਅਨ੍ਤੋਵਸ੍ਸੇ ਚਾਰਿਕਂ ਚਰਨ੍ਤਿਯਾ ਪਾਚਿਤ੍ਤਿਯਂ. ਸਤ੍ਤਾਹਕਰਣੀਯੇਨ ਪਨ ਵਟ੍ਟਤਿ, ਭਿਕ੍ਖੁਨੋ ਦੁਕ੍ਕਟਂ ਹੋਤੀ’’ਤਿ ਵੁਤ੍ਤਂ.
੯੭੨. ਕੇਨਚਿ ਉਬ੍ਬਾਲ਼੍ਹਾਤਿ ਵਸ੍ਸਚ੍ਛੇਦਕਾਰਣੇਨਾਤਿ ਨੋ ਤਕ੍ਕੋਤਿ ਆਚਰਿਯੋ. ਕਿਤ੍ਤਾਵਤਾ ਚਾਰਿਕਾ ਹੋਤੀਤਿ? ਇਦਂ ਨ ਸਬ੍ਬਤ੍ਥ ਵਿਚਾਰਿਤਂ. ਅਨਨ੍ਤਰਸਿਕ੍ਖਾਪਦੇ ‘‘ਅਨ੍ਤਮਸੋ ਛਪ੍ਪਞ੍ਚਯੋਜਨਾਨਿਪੀ’’ਤਿ ਵੁਤ੍ਤਤ੍ਤਾ ਸੋ ਚ ਮਞ੍ਞੇ ਹੇਟ੍ਠਿਮਪਰਿਚ੍ਛੇਦੋਤਿ.
ਨਵਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਦਸਮਸਿਕ੍ਖਾਪਦਵਣ੍ਣਨਾ
੯੭੩. ਦਸਮੇ ‘‘ਆਹੁਨ੍ਦਰਿਕਾ’’ਤਿ ਪਠਨ੍ਤਿ ਕਿਰ.
ਦਸਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਤੁਵਟ੍ਟਵਗ੍ਗਵਣ੍ਣਨਾ ਨਿਟ੍ਠਿਤਾ.