੩. ਨਗ੍ਗਵਗ੍ਗਵਣ੍ਣਨਾ

੧-੨. ਪਠਮਦੁਤਿਯਸਿਕ੍ਖਾਪਦਵਣ੍ਣਨਾ

੮੮੩. ਨਗ੍ਗਵਗ੍ਗਸ੍ਸ ਪਠਮਦੁਤਿਯਾਨਿ ਉਤ੍ਤਾਨਾਨਿ. ਪਠਮੇ ਅਯਂ ਵਿਸੇਸੋ – ਭਿਕ੍ਖੁਸ੍ਸ ਤਥਾ ਨ੍ਹਾਯਨ੍ਤਸ੍ਸ ਦੁਕ੍ਕਟਂ ਅਞ੍ਞਤ੍ਰ ਜਨ੍ਤਾਘਰਉਦਕਪਟਿਚ੍ਛਾਦੀਹਿ. ਨ ਚ ਵਿਗਰਹਿ ਤਤ੍ਥ ਭਗਵਾ ਅਤ੍ਤਨਾਵ ਅਨਨੁਞ੍ਞਾਤਤ੍ਤਾ ਉਦਕਸਾਟਿਕਾਯਾਤਿ ਪੋਰਾਣਾ. ‘‘ਏਕਮੇਵ ਨਿਵਾਸੇਤ੍ਵਾ, ਪਾਰੁਪਿਤ੍ਵਾ ਚ ਨਹਾਯਿਤੁਂ ਨ ਵਟ੍ਟਤੀ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ.

ਪਠਮਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਸਿਕ੍ਖਾਪਦਵਣ੍ਣਨਾ

੮੯੪. ਤਤਿਯੇ ਅਨ੍ਤੋਚਤੂਹਪਞ੍ਚਾਹਂ ਧੁਰਂ ਨਿਕ੍ਖਿਪਨ੍ਤਿਯਾਪਿ ਆਪਤ੍ਤਿ ਏਵ. ਲਿਙ੍ਗਪਰਿਵਤ੍ਤੇ ਧੁਰਂ ਨਿਕ੍ਖਿਪਨ੍ਤਿਯਾ ਦੁਕ੍ਕਟਂ ਤਿਕਦੁਕ੍ਕਟਤ੍ਤਾ. ‘‘ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਦ੍ਧਿਨ੍ਤਿ ਏਤ੍ਥ ਚਤਸ੍ਸੋਪਿ ਸਮ੍ਬਹੁਲਾ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ.

ਤਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਸਿਕ੍ਖਾਪਦਵਣ੍ਣਨਾ

੮੯੮. ਚਤੁਤ੍ਥੇ ਸਙ੍ਘਾਟਿਚਾਰਨ੍ਤਿ ਏਤ੍ਥ ਸਙ੍ਘਾਟਿਆਦਿਵਸੇਨ ਅਧਿਟ੍ਠਿਤਾਨਂਯੇਵਾਯਂ ਵਿਧਿ, ਨੇਤਰਾਸਂ ਕਿਰ. ਤਤ੍ਥ ਤਿਚੀਵਰੇ ਏਵ ਵਿਪ੍ਪਵਾਸਪਚ੍ਚਯਾ ਨਿਸ੍ਸਗ੍ਗਿਯਂ. ਅਨ੍ਤੋਚੀਵਰਕਾਲੇਪਿ ਪਞ੍ਚਾਹਿਕਂ ਸਙ੍ਘਾਟਿਚਾਰਂ ਅਤਿਕ੍ਕਾਮੇਨ੍ਤਿਯਾ ਆਪਤ੍ਤਿਯੇਵ. ‘‘ਵਿਨਾ ਏਤੇਹਿ ਚੀਵਰੇਹਿ ਉਪਸਮ੍ਪਦਂ ਕਾਤੁਂ ਨ ਵਟ੍ਟਤੀ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ.

ਚਤੁਤ੍ਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਞ੍ਚਮਸਿਕ੍ਖਾਪਦਵਣ੍ਣਨਾ

੯੦੬. ਪਞ੍ਚਮਸ੍ਸ ਅਨਾਪਤ੍ਤਿਵਾਰੇ ਤਾਯ ਵਾ ਅਵਿਪ੍ਪਵਾਸਾਯਾਤਿ ਅਤ੍ਥਤੋ ਲਬ੍ਭਤਿ.

ਪਞ੍ਚਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯੦੭-੯੧੧. ਛਟ੍ਠਸਤ੍ਤਮਾਨਿ ਉਤ੍ਤਾਨਾਨਿ.

੮. ਅਟ੍ਠਮਸਿਕ੍ਖਾਪਦਵਣ੍ਣਨਾ

੯੧੬. ਸੋਕਜ੍ਝਾਯਿਕਾ ਨਾਮ ਕਿਰ ਮਾਯਾਕਾਰਾ. ਵਿਲੁਮ੍ਪਕਾ ਭਣ੍ਡਕਾਤਿ ਚ ਪੋਰਾਣਾ.

ਅਟ੍ਠਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਨਵਮਸਿਕ੍ਖਾਪਦਵਣ੍ਣਨਾ

੯੨੦. ‘‘ਕਥਞ੍ਹਿ ਨਾਮ ਅਤਿਕ੍ਕਾਮੇਸ੍ਸਤੀ’’ਤਿ ਵੁਤ੍ਤਤ੍ਤਾ ਥੁਲ੍ਲਨਨ੍ਦਾ ਚੀਵਰਕਾਲਸਮਯਂ ਆਗਮੇਥਾਤਿ ਅਤਿਕ੍ਕਮਾਪੇਸੀਤਿ ਸਿਦ੍ਧਂ ਹੋਤਿ.

ਨਵਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਦਸਮਸਿਕ੍ਖਾਪਦਵਣ੍ਣਨਾ

੯੨੭. ਦਸਮੇ ਏਕਕੁਲਂ ਏਤਦਵੋਚੁਨ੍ਤਿ ਏਤ੍ਥ ਕੁਲਂ ਨਾਮ ਤਸ੍ਮਿਂ ਮਨੁਸ੍ਸਾ, ਤਸ੍ਮਾ ਬਹੁਵਚਨਂ.

ਦਸਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਗ੍ਗਵਗ੍ਗਵਣ੍ਣਨਾ ਨਿਟ੍ਠਿਤਾ.