ਸੇਦਮੋਚਨਗਾਥਾਵਣ੍ਣਨਾ

ਅਵਿਪ੍ਪਵਾਸਪਞ੍ਹਾਵਣ੍ਣਨਾ

੪੭੯. ਤਹਿਨ੍ਤਿ ਤਸ੍ਮਿਂ ਪੁਗ੍ਗਲੇ. ਅਕਪ੍ਪਿਯਸਮ੍ਭੋਗੋ ਨਾਮ ਮੇਥੁਨਧਮ੍ਮਾਦਿ. ‘‘ਵਰਸੇਨਾਸਨਰਕ੍ਖਣਤ੍ਥਾਯ ਵਿਸ੍ਸਜ੍ਜੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ ਗਰੁਭਣ੍ਡਵਿਨਿਚ੍ਛਯੇ ਵੁਤ੍ਤੋ. ਏਕਾਦਸਾਵਨ੍ਦਿਯੇ ਪਣ੍ਡਕਾਦਯੋ ਏਕਾਦਸ. ਉਪੇਤਿ ਸਪਰਿਸਂ. ਨ ਜੀਵਤਿ ਨਿਮ੍ਮਿਤਰੂਪਤ੍ਤਾ. ‘‘ਉਬ੍ਭਕ੍ਖਕੇਨ ਵਦਾਮੀ’’ਤਿ ਇਮਿਨਾ ਮੁਖੇ ਮੇਥੁਨਧਮ੍ਮਾਭਾਵਂ ਦੀਪੇਤਿ. ਅਧੋਨਾਭਿਵਿਵਜ੍ਜਨੇਨ ਵਚ੍ਚਮਗ੍ਗਪ੍ਪਸ੍ਸਾਵਮਗ੍ਗੇਸੁ. ਗਾਮਨ੍ਤਰਪਰਿਯਾਪਨ੍ਨਂ ਨਦਿਪਾਰਂ ਓਕ੍ਕਨ੍ਤਭਿਕ੍ਖੁਨਿਂ ਸਨ੍ਧਾਯਾਤਿ ਭਿਕ੍ਖੁਨਿਯਾ ਗਾਮਾਪਰਿਯਾਪਨ੍ਨਪਰਤੀਰੇ ਨਦਿਸਮੀਪਮੇਵ ਸਨ੍ਧਾਯ ਵੁਤ੍ਤਾ. ਤਤ੍ਥ ਪਰਤੀਰੇ ਗਾਮੂਪਚਾਰੋ ਏਕਲੇਡ੍ਡੁਪਾਤੋ ਨਦਿਪਰਿਯਨ੍ਤੇਨ ਪਰਿਚ੍ਛਿਨ੍ਨੋ, ਤਸ੍ਮਾ ਪਰਤੀਰੇ ਰਤਨਮਤ੍ਤਮ੍ਪਿ ਅਰਞ੍ਞਂ ਨ ਅਤ੍ਥਿ, ਤਞ੍ਚ ਤਿਣਾਦੀਹਿ ਪਟਿਚ੍ਛਨ੍ਨਤ੍ਤਾ ਦਸ੍ਸਨੂਪਚਾਰਵਿਰਹਿਤਂ ਕਰੋਤਿ. ਤਤ੍ਥ ਅਤ੍ਤਨੋ ਗਾਮੇ ਆਪਤ੍ਤਿ ਨਤ੍ਥਿ. ਪਰਤੀਰੇ ਪਨ ਏਕਲੇਡ੍ਡੁਪਾਤਸਙ੍ਖਾਤੇ ਗਾਮੂਪਚਾਰੇਯੇਵ ਪਦਂ ਠਪੇਤਿ. ਅਨ੍ਤਰੇ ਅਭਿਧਮ੍ਮਵਸੇਨ ਅਰਞ੍ਞਭੂਤਂ ਸਕਗਾਮਂ ਅਤਿਕ੍ਕਮਤਿ ਨਾਮ, ਤਸ੍ਮਾ ਗਣਮ੍ਹਾ ਓਹੀਯਨਾ ਚ ਹੋਤੀਤਿ ਞਾਤਬ੍ਬਂ. ਏਤ੍ਤਾਵਤਾਪਿ ਸਨ੍ਤੋਸਮਕਤ੍ਵਾ ਵਿਚਾਰੇਤ੍ਵਾ ਗਹੇਤਬ੍ਬਂ. ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾ ਪਞ੍ਚਸਤਾ ਮਹਾਪਜਾਪਤਿਪ੍ਪਮੁਖਾ. ਮਹਾਪਜਾਪਤਿਪਿ ਹਿ ਆਨਨ੍ਦਤ੍ਥੇਰੇਨ ਦਿਨ੍ਨਓਵਾਦਸ੍ਸ ਪਟਿਗ੍ਗਹਿਤਤ੍ਤਾ ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾ ਨਾਮ.

ਪਾਰਾਜਿਕਾਦਿਪਞ੍ਹਾਵਣ੍ਣਨਾ

੪੮੦. ‘‘ਦੁਸ੍ਸਕੁਟਿਂ ਸਨ੍ਧਾਯਾ’’ਤਿ ਸਹ ਦੁਸ੍ਸੇਨ ਵੀਤਿਕ੍ਕਮਨਸ੍ਸ ਸਕ੍ਕੁਣੇਯ੍ਯਤਾਯ ਵੁਤ੍ਤਂ. ਲਿਙ੍ਗਪਰਿਵਤ੍ਤੇ ਪਟਿਗ੍ਗਹਣਸ੍ਸ ਵਿਜਹਨਤੋ ਸਾਮਂ ਗਹੇਤ੍ਵਾ ਭੁਞ੍ਜਿਤੁਂ ਨ ਵਟ੍ਟਤਿ. ਕਾਕਊਹਦਨਂ ਵਾਤਿ ਕਾਕੇਨ ਊਹਦਨਂ ਵਾ. ‘‘ਤਯੋ ਪੁਰਿਸੇਪਿ ਉਪਗਨ੍ਤ੍ਵਾ’’ਤਿ ਪਾਠਸੇਸੋ.

ਪਾਚਿਤ੍ਤਿਯਾਦਿਪਞ੍ਹਾਵਣ੍ਣਨਾ

੪੮੧. ਮੇਥੁਨਧਮ੍ਮਪਚ੍ਚਯਾ ਨਾਮ ਕਾਯਸਂਸਗ੍ਗੋ. ਤਂਹੇਤੁ ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਭੂਤਂ ਕਾਯਸਂਸਗ੍ਗਂ ਵਾਯਾਮਨ੍ਤਿਯਾਤਿ ਅਟ੍ਠਵਤ੍ਥੁਪੂਰਣਂ ਸਨ੍ਧਾਯ. ਪਰਿਭੋਗਪ੍ਪਚ੍ਚਯਾਤਿ ਪਰਿਭੋਗਕਾਰਣਾ. ਤਸ੍ਮਾਤਿ ਯਸ੍ਮਾ ਪਰਿਭੋਗਪ੍ਪਚ੍ਚਯਾ ਆਪਜ੍ਜਤਿ, ਤਸ੍ਮਾ ਭੋਜਨਪਰਿਯੋਸਾਨੇ ਹੋਤੀਤਿ ਅਤ੍ਥੋ. ਪੋਰਾਣਪੋਤ੍ਥਕੇਸੁ ‘‘ਤਸ੍ਸਾ’’ਤਿ ਪਾਠੋ. ‘‘ਕਾਰਣਵਚਨਂ ਸੁਨ੍ਦਰਂ ਭੋਜਨਪਰਿਚ੍ਛੇਦਦਸ੍ਸਨਤੋ’’ਤਿ ਵਦਨ੍ਤਿ.

ਸੇਦਮੋਚਨਗਾਥਾਵਣ੍ਣਨਾ ਨਿਟ੍ਠਿਤਾ.