੬. ਸੇਨਾਸਨਕ੍ਖਨ੍ਧਕਵਣ੍ਣਨਾ

ਵਿਹਾਰਾਨੁਜਾਨਨਕਥਾਵਣ੍ਣਨਾ

੨੯੪. ਨਿਲੀਯਨ੍ਤਿ ਭਿਕ੍ਖੂ ਏਤ੍ਥਾਤਿ ਵਿਹਾਰਾਦਯੋ ਲੇਣਾਨਿ ਨਾਮ. ਆਗਤ-ਵਚਨੇਨ ਤਸ੍ਸਾਗਤਸਙ੍ਘੋਵ ਸਾਮੀ, ਨ ਅਨਾਗਤੋਤਿ ਕੇਚਿ, ਤਂ ਨ ਯੁਜ੍ਜਤਿ ਸਮਾਨਲਾਭਕਤਿਕਾਯ ਸਿਦ੍ਧਤ੍ਤਾ.

੨੯੬-੭. ਦੀਪਿਨਙ੍ਗੁਟ੍ਠੇਨਾਤਿ ਏਤ੍ਥ ‘‘ਦੀਪਿਨਾ ਅਕਪ੍ਪਿਯਚਮ੍ਮਂ ਦਸ੍ਸੇਤੀ’’ਤਿ ਲਿਖਿਤਂ. ਥਮ੍ਭਕਵਾਤਪਾਨਂ ਨਾਮ ਤਿਰਿਯਂ ਦਾਰੂਨਿ ਅਦਤ੍ਵਾ ਉਜੁਕਂ ਠਿਤੇਹੇਵ ਦਾਰੂਹਿ ਕਤ੍ਤਬ੍ਬਂ. ਭਿਸੀਨਂ ਅਨੁਞ੍ਞਾਤਂ ਵਟ੍ਟਤੀਤਿ ਬਿਮ੍ਬੋਹਨੇ ਵਟ੍ਟਤੀਤਿ ਅਤ੍ਥੋ. ਤੂਲਪੂਰਿਤਂ ਭਿਸਿਂ ਅਪਸ੍ਸਯਿਤੁਂ ਨ ਵਟ੍ਟਤਿ ਉਣ੍ਣਾਦੀਨਂਯੇਵ ਅਨੁਞ੍ਞਾਤਤ੍ਤਾ. ਨਿਸੀਦਨਨਿਪਜ੍ਜਨਂ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਅਪਸ੍ਸਯਿਤੁਂ ਵਟ੍ਟਤੀਤਿ ਚੇ? ਅਕਪ੍ਪਿਯਨ੍ਤਿ ਨ ਵਟ੍ਟਤੀਤਿ ਕੇਚਿ. ਯਦਿ ਏਵਂ ਅਕਪ੍ਪਿਯਮਞ੍ਚਞ੍ਚ ਅਪਸ੍ਸਯਿਤੁਂ ਨ ਵਟ੍ਟੇਯ੍ਯ. ਯਸ੍ਮਾ ਵਟ੍ਟਤਿ, ਤਸ੍ਮਾ ਦੋਸੋ ਨਤ੍ਥਿ. ਅਪਿਚ ਗਿਲਾਨਸ੍ਸ ਬਿਮ੍ਬੋਹਨਂ ਨਿਪਜ੍ਜਿਤੁਮ੍ਪਿ ਅਨੁਞ੍ਞਾਤਂ, ਤਸ੍ਮਾ ਭਿਸਿਪਿ ਵਟ੍ਟਤਿ ਅਪਸ੍ਸਯਿਤੁਂ. ਆਚਰਿਯਾ ਚ ਅਨੁਜਾਨਨ੍ਤਿ, ਵਲ਼ਞ੍ਜੇਨ੍ਤਿ ਚਾਤਿ ਏਕੇ. ਸਿਮ੍ਬਲਿਤੂਲਸੁਤ੍ਤੇਨ ਸਿਬ੍ਬਿਤਂ ਚੀਵਰਂ ਵਟ੍ਟਤਿ. ਕਸ੍ਮਾ? ਕਪ੍ਪਾਸਸ੍ਸ ਅਨੁਲੋਮਤੋ. ‘‘ਅਕ੍ਕਫਲਸੁਤ੍ਤਮਯਮ੍ਪਿ ਅਕ੍ਕਵਾਕਮਯਮੇਵ ਪਟਿਕ੍ਖਿਤ੍ਤ’’ਨ੍ਤਿ ਤੇ ਏਵ ਵਦਨ੍ਤਿ.

੨੯੮. ਅਨਿਬਨ੍ਧਨੀਯੋ ਅਲਗ੍ਗੋ. ਪਟਿਬਾਹੇਤ੍ਵਾਤਿ ਮਟ੍ਠਂ ਕਤ੍ਵਾ. ‘‘ਸੇਤਵਣ੍ਣਾਦੀਨਂ ਯਥਾਸਙ੍ਖ੍ਯਂ ਇਕ੍ਕਾਸਾਦਯੋ ਬਨ੍ਧਨਤ੍ਥਂ ਵੁਤ੍ਤਾ’’ਤਿ ਲਿਖਿਤਂ.

੩੦੦. ਪਕੁਟ੍ਟਂ ਸਮਨ੍ਤਤੋ ਆਵਿਦ੍ਧਪਮੁਖਂ.

੩੦੩. ਸੁਧਾਲੇਪੋਤਿ ਸੁਧਾਮਤ੍ਤਿਕਾਲੇਪੋ.

੩੦੫. ਆਸਤ੍ਤਿ ਤਣ੍ਹਾ. ਸਨ੍ਤਿਂ ਅਦਰਂ.

੩੦੭. ਕੇਤੁਨ੍ਤਿ ਕਯੇਨ ਗਹੇਤੁਂ.

੩੦੮. ਚਿਤਾਤਿ ਇਟ੍ਠਕਾਯੋ ਕਬਲ਼ੇਨ ਨਿਦ੍ਧਮਨਵਸੇਨ ਛਿਨ੍ਦਿਤ੍ਵਾ ਕਤਾਤਿ ਅਤ੍ਥੋ.

੩੧੦. ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਅਨ੍ਤੇਵਾਸਿਕਾਤਿ ਏਤ੍ਥ ਵੀਸਤਿਵਸ੍ਸਂ ਅਤਿਕ੍ਕਮਿਤ੍ਵਾ ਛਬ੍ਬਗ੍ਗਿਯਾ ਉਪ੍ਪਨ੍ਨਾ. ‘‘ਆਰਾਧਯਿਂਸੁ ਮੇ ਭਿਕ੍ਖੂ ਚਿਤ੍ਤ’’ਨ੍ਤਿ (ਮ. ਨਿ. ੧.੨੨੫) ਵੁਤ੍ਤਤ੍ਤਾ ਅਞ੍ਞਸ੍ਮਿਂ ਕਾਲੇ ਸਾਵਤ੍ਥਿਗਮਨੇ ਉਪ੍ਪਨ੍ਨਂ ਵਤ੍ਥੁਂ ਇਧ ਆਪਤ੍ਤਿਦਸ੍ਸਨਤ੍ਥਂ ਆਹਰਿਤ੍ਵਾ ਵੁਤ੍ਤਨ੍ਤਿ ਯੁਤ੍ਤਂ ਵਿਯ, ਵਿਚਾਰੇਤ੍ਵਾ ਗਹੇਤਬ੍ਬਂ. ਵੁਦ੍ਧਨ੍ਤਿ ਵੁਦ੍ਧਤਰਂ.

੩੧੩. ਸਨ੍ਥਰੇਤਿ ਤਿਣਸਨ੍ਥਰਾਦਯੋ.

ਸੇਨਾਸਨਗ੍ਗਾਹਕਥਾਵਣ੍ਣਨਾ

੩੧੮. ‘‘ਸੇਯ੍ਯਗ੍ਗੇਨਾਤਿ ਮਞ੍ਚਟ੍ਠਾਨਪਰਿਚ੍ਛੇਦੇਨ. ਵਿਹਾਰਗ੍ਗੇਨਾਤਿ ਓਵਰਕਗ੍ਗੇਨਾ’’ਤਿ ਲਿਖਿਤਂ. ਥਾਵਰਾਤਿ ਨਿਯਤਾ. ਪਚ੍ਚਯੇਨੇਵ ਹਿ ਤਨ੍ਤਿ ਤਸ੍ਮਿਂ ਸੇਨਾਸਨੇ ਮਹਾਥੇਰਾ ਤਸ੍ਸ ਪਚ੍ਚਯਸ੍ਸ ਕਾਰਣਾ ਅਞ੍ਞਤ੍ਥ ਅਗਨ੍ਤ੍ਵਾ ਵਸਨ੍ਤਾਯੇਵ ਨਂ ਪਟਿਜਗ੍ਗਿਸ੍ਸਨ੍ਤੀਤਿ ਅਤ੍ਥੋ. ਅਘਟ੍ਟਨਕਮ੍ਮਂ ਦਸ੍ਸੇਤੁਂ ‘‘ਨ ਤਤ੍ਥ ਮਨੁਸ੍ਸਾ’’ਤਿਆਦਿਮਾਹ. ‘‘ਵਿਤਕ੍ਕਂ ਛਿਨ੍ਦਿਤ੍ਵਾ ਸੁਦ੍ਧਚਿਤ੍ਤੇਨ ਗਮਨਵਤ੍ਤੇਨੇਵ ਗਨ੍ਤਬ੍ਬ’’ਨ੍ਤਿ ਪਾਠੋ. ਮੁਦ੍ਦਵੇਦਿਕਾ ਨਾਮ ਚੇਤਿਯਸ੍ਸ ਹਮ੍ਮਿਯਵੇਦਿਕਾ. ਪਟਿਕ੍ਕਮ੍ਮਾਤਿ ਅਪਸਕ੍ਕਿਤ੍ਵਾ. ਸਮਾਨਲਾਭਕਤਿਕਾ ਮੂਲਾਵਾਸੇ ਸਤਿ ਸਿਯਾ, ਮੂਲਾਵਾਸਵਿਨਾਸੇਨ ਕਤਿਕਾਪਿ ਵਿਨਸ੍ਸਤਿ. ਸਮਾਨਲਾਭ-ਵਚਨਂ ਸਤਿ ਦ੍ਵੀਸੁ, ਬਹੂਸੁ ਵਾ ਯੁਜ੍ਜਤਿ, ਤੇਨੇਵ ਏਕਸ੍ਮਿਂ ਅਵਸਿਟ੍ਠੇਤਿ ਨੋ ਮਤਿ. ਤਾਵਕਾਲਿਕਂ ਕਾਲੇਨ ਮੂਲਚ੍ਛੇਦਨਵਸੇਨ ਵਾ ਅਞ੍ਞੇਸਂ ਵਾ ਕਮ੍ਮਂ ਅਞ੍ਞਸ੍ਸ ਸਿਯਾ ਨਾਵਾਯਂ ਸਙ੍ਗਮੋਤਿ ਆਚਰਿਯੋ. ਪੁਗ੍ਗਲਵਸੇਨੇਵ ਕਾਤਬ੍ਬਨ੍ਤਿ ਅਪਲੋਕਨਕਾਲੇ ਸਙ੍ਘੋ ਵਸ੍ਸਂਵੁਤ੍ਥਭਿਕ੍ਖੂਨਂ ਪਾਟੇਕ੍ਕਂ ‘‘ਏਤ੍ਤਕਂ ਵਸ੍ਸਾਵਾਸਿਕਂ ਵਤ੍ਥਂ ਦੇਤਿ, ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਪੁਗ੍ਗਲਮੇਵ ਪਰਾਮਸਿਤ੍ਵਾ ਦਾਤਬ੍ਬਂ, ਨ ਸਙ੍ਘਵਸੇਨ ਕਾਤਬ੍ਬਂ. ਨ ਸਙ੍ਘੋ ਸਙ੍ਘਸ੍ਸ ਏਤ੍ਤਕਂ ਦੇਤੀਤਿ. ‘‘ਏਕਸ੍ਮਿਂ ਆਵਾਸੇ ਸਙ੍ਘਸ੍ਸ ਕਮ੍ਮਂ ਕਰੋਤੀ’ਤਿ ਵਚਨਤੋ ਸਙ੍ਘਵਸੇਨ ਕਾਤਬ੍ਬ’’ਨ੍ਤਿ ਲਿਖਿਤਂ. ਨ ਹਿ ਤਥਾ ਵੁਤ੍ਤੇ ਸਙ੍ਘਸ੍ਸ ਕਿਞ੍ਚਿ ਕਮ੍ਮਂ ਕਤਂ ਨਾਮ ਹੋਤਿ. ‘‘ਸਮ੍ਮਤਸੇਨਾਸਨਗ੍ਗਾਹਾਪਕਤੋ ਅਞ੍ਞੇਨ ਗਾਹਿਤੇਪਿ ਗਾਹੋ ਰੁਹਤਿ ਅਗ੍ਗਹਿਤੁਪਜ੍ਝਾਯਸ੍ਸ ਉਪਸਮ੍ਪਦਾ ਵਿਯਾ’’ਤਿ ਲਿਖਿਤਂ. ‘‘ਕਮ੍ਮਵਾਚਾਯਪਿ ਸਮ੍ਮੁਤਿ ਵਟ੍ਟਤੀ’’ਤਿ ਲਿਖਿਤਂ.

ਅਟ੍ਠਪਿ ਸੋਲ਼ਸਪਿ ਜਨੇਤਿ ਏਤ੍ਥ ਕਿਂ ਵਿਸੁਂ ਵਿਸੁਂ, ਉਦਾਹੁ ਏਕਤੋਤਿ? ਏਕਤੋਪਿ ਵਟ੍ਟਤਿ. ਨ ਹਿ ਤੇ ਤਥਾ ਸਮ੍ਮਤਾ ਸਙ੍ਘੇਨ ਕਮ੍ਮਕਤਾ ਨਾਮ ਹੋਨ੍ਤਿ, ਤੇਨੇਵ ਸਤ੍ਤਸਤਿਕਕ੍ਖਨ੍ਧਕੇ ਏਕਤੋ ਅਟ੍ਠ ਜਨਾ ਸਮ੍ਮਤਾਤਿ. ਤੇਸਂ ਸਮ੍ਮੁਤਿ ਕਮ੍ਮਵਾਚਾਯਪੀਤਿ ਞਤ੍ਤਿਦੁਤਿਯਕਮ੍ਮਵਾਚਾਯਪਿ. ਅਪਲੋਕਨਕਮ੍ਮਸ੍ਸ ਵਤ੍ਥੂਹਿ ਸਾ ਏਵ ਕਮ੍ਮਵਾਚਾ ਲਬ੍ਭਮਾਨਾ ਲਬ੍ਭਤਿ, ਤਸ੍ਸਾ ਚ ਵਤ੍ਥੂਹਿ ਅਪਲੋਕਨਕਮ੍ਮਮੇਵ ਲਬ੍ਭਮਾਨਂ ਲਬ੍ਭਤਿ, ਨ ਅਞ੍ਞਨ੍ਤਿ ਵੇਦਿਤਬ੍ਬਂ. ਇਮਂ ਨਯਂ ਮਿਚ੍ਛਾ ਗਣ੍ਹਨ੍ਤੋ ‘‘ਅਪਲੋਕਨਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਕਾਤੁਂ, ਞਤ੍ਤਿਦੁਤਿਯਕਮ੍ਮਞ੍ਚ ਅਪਲੋਕਨਕਮ੍ਮਂ ਕਾਤੁਂ ਵਟ੍ਟਤੀ’’ਤਿ ਗਣ੍ਹਾਤਿ, ਏਵਞ੍ਚ ਸਤਿ ਕਮ੍ਮਸਙ੍ਕਰਦੋਸੋ ਆਪਜ੍ਜਤਿ. ਮਗ੍ਗੋ ਪੋਕ੍ਖਰਣੀਤਿ ਏਤ੍ਥ ਮਗ੍ਗੋ ਨਾਮ ਮਗ੍ਗੇ ਕਤਦੀਘਸਾਲਾ, ਪੋਕ੍ਖਰਣੀਤਿ ਨਹਾਯਿਤੁਂ ਕਤਪੋਕ੍ਖਰਣੀ. ਏਤਾਨਿ ਹਿ ਅਸੇਨਾਸਨਾਨੀਤਿ ਏਤ੍ਥ ਭਤ੍ਤਸਾਲਾ ਨ ਆਗਤਾ, ਤਸ੍ਮਾ ਤਂ ਸੇਨਾਸਨਨ੍ਤਿ ਚੇ? ਸਾਪਿ ਏਤ੍ਥੇਵ ਪਵਿਟ੍ਠਾ ਵਾਸਤ੍ਥਾਯ ਅਕਤਤ੍ਤਾ. ਭੋਜਨਸਾਲਾ ਪਨ ਉਭਯਤ੍ਥ ਨਾਗਤਾ. ਕਿਞ੍ਚਾਪਿ ਨਾਗਤਾ, ਉਪਰਿ ‘‘ਭੋਜਨਸਾਲਾ ਪਨ ਸੇਨਾਸਨਮੇਵਾ’’ਤਿ (ਚੂਲ਼ਵ. ਅਟ੍ਠ. ੩੧੮) ਵੁਤ੍ਤਤ੍ਤਾ ਸੇਨਾਸਨਂ. ‘‘ਕਪ੍ਪਿਯਕੁਟਿ ਚ ਏਤ੍ਥ ਕਾਤਬ੍ਬਾ’’ਤਿ ਵਦਨ੍ਤਿ, ਤਂ ਨੇਤਿ ਏਕੇ. ਰੁਕ੍ਖਮੂਲਵੇਲ਼ੁਗੁਮ੍ਬਾ ਛਨ੍ਨਾ ਕਵਾਟਬਦ੍ਧਾਵ ਸੇਨਾਸਨਂ. ‘‘ਅਲਾਭਕੇਸੁ ਆਵਾਸੇਸੂਤਿ ਅਲਾਭਕੇਸੁ ਸੇਨਾਸਨੇਸੂ’’ਤਿ ਲਿਖਿਤਂ, ਤਂ ਯੁਤ੍ਤਂ. ਨ ਹਿ ਪਾਟੇਕ੍ਕਂ ਸੇਨਾਸਨਂ ਹੋਤਿ. ਤਂ ਸਞ੍ਞਾਪੇਤ੍ਵਾਤਿ ਏਤ੍ਥ ਪਞ੍ਞਤ੍ਤਿਂ ਅਗਚ੍ਛਨ੍ਤੇ ਬਲਕ੍ਕਾਰੇਨਪਿ ਵਟ੍ਟਤਿ. ਅਯਮ੍ਪੀਤਿ ਪਚ੍ਚਯੋਪਿ.

ਉਪਨਿਬਨ੍ਧਿਤ੍ਵਾਤਿ ਤਸ੍ਸ ਸਮੀਪੇ ਰੁਕ੍ਖਮੂਲਾਦੀਸੁ ਵਸਿਤ੍ਵਾ ਤਤ੍ਥ ਵਤ੍ਤਂ ਕਤ੍ਵਾਤਿ ਅਧਿਪ੍ਪਾਯੋ. ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਮ੍ਪਿ. ‘‘ਦਸਕਥਾਵਤ੍ਥੁਕਂ ਦਸਅਸੁਭਂ ਦਸਅਨੁਸ੍ਸਤਿ’’ਨ੍ਤਿ ਪਾਠੋ. ‘‘ਪਠਮਭਾਗਂ ਮੁਞ੍ਚਿਤ੍ਵਾਤਿ ਇਦਂ ਚੇ ਪਠਮਗਾਹਿਤਵਤ੍ਥੁਤੋ ਮਹਗ੍ਘਂ ਹੋਤੀ’’ਤਿ ਲਿਖਿਤਂ. ਛਿਨ੍ਨਵਸ੍ਸਾਨਂ ਵਸ੍ਸਾਵਾਸਿਕਂ ਨਾਮ ਪੁਬ੍ਬੇ ਗਹਿਤਵਸ੍ਸਾਵਾਸਿਕਾਨਂ ਪਚ੍ਛਾ ਛਿਨ੍ਨਵਸ੍ਸਾਨਂ. ਭਤਿਨਿਵਿਟ੍ਠਨ੍ਤਿ ਭਤਿਂ ਕਤ੍ਵਾ ਵਿਯ ਨਿਵਿਟ੍ਠਂ ਪਰਿਯਿਟ੍ਠਂ. ‘‘ਸਙ੍ਘਿਕਂ ਪਨ…ਪੇ… ਵਿਬ੍ਭਨ੍ਤੋਪਿ ਲਭਤੇਵਾ’’ਤਿ ਇਦਂ ਤਤ੍ਰੁਪ੍ਪਾਦਂ ਸਨ੍ਧਾਯ ਵੁਤ੍ਤਂ. ਇਮਿਨਾ ਅਪਲੋਕਨਮੇਵ ਪਮਾਣਂ, ਨ ਗਾਹਾਪਨਨ੍ਤਿ ਕੇਚਿ. ਵਿਨਯਧਰਾ ਪਨ ‘‘ਅਮ੍ਹਾਕਂ ਵਿਹਾਰੇ ਵਸ੍ਸਂ ਉਪਗਤਾਨਂ ਏਕੇਕਸ੍ਸ ਤਿਚੀਵਰਂ ਸਙ੍ਘੋ ਦਸ੍ਸਤੀ’ਤਿਆਦਿਨਾ ਅਪਲੋਕਿਤੇਪਿ ਅਭਾਜਿਤਂ ਵਿਬ੍ਭਨ੍ਤਕੋ ਨ ਲਭਤਿ. ‘ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤ’ਨ੍ਤਿ ਵੁਤ੍ਤਤ੍ਤਾ, ‘ਅਭਾਜਿਤੇ ਵਿਬ੍ਭਮਤੀ’ਤਿ ਏਵਂ ਪੁਬ੍ਬੇ ਵੁਤ੍ਤਤ੍ਤਾ ਚਾ’’ਤਿ ਵਦਨ੍ਤਿ. ‘‘ਪਚ੍ਚਯਵਸੇਨਾਤਿ ਗਹਪਤਿਕਂ ਵਾ ਅਞ੍ਞਂ ਵਾ ਵਸ੍ਸਾਵਾਸਿਕਂ ਪਚ੍ਚਯਵਸੇਨ ਗਾਹਿਤ’’ਨ੍ਤਿ ਲਿਖਿਤਂ. ‘‘ਏਕਮੇਵ ਵਤ੍ਥਂ ਦਾਤਬ੍ਬਨ੍ਤਿ ਤਤ੍ਥ ਨਿਸਿਨ੍ਨਾਨਂ ਏਕਮੇਕਂ ਵਤ੍ਥਂ ਪਾਪੁਣਾਤੀ’’ਤਿ ਲਿਖਿਤਂ. ਦੁਤਿਯੋ ਥੇਰਾਸਨੇਤਿ ਅਨੁਭਾਗੋ. ਪਠਮਭਾਗੋ ਅਞ੍ਞਥਾ ਥੇਰੇਨ ਗਹਿਤੋਤਿ ਜਾਨਿਤਬ੍ਬਂ.

ਉਪਨਨ੍ਦਵਤ੍ਥੁਕਥਾਵਣ੍ਣਨਾ

੩੨੦. ਤਿਵਸ੍ਸਨ੍ਤਰੇਨਾਤਿ ਤਿਣ੍ਣਂ ਵਸ੍ਸਾਨਂ ਅਨ੍ਤੋ ਠਿਤੇਨ. ਹਤ੍ਥਿਮ੍ਹਿ ਨਖੋ ਅਸ੍ਸਾਤਿ ਹਤ੍ਥਿਨਖੋ. ਪਾਸਾਦਸ੍ਸ ਨਖੋ ਨਾਮ ਹੇਟ੍ਠਿਮਪਰਿਚ੍ਛੇਦੋ. ਗਿਹਿਵਿਕਟਨੀਹਾਰੇਨਾਤਿ ਗਿਹੀਹਿ ਕਤਨੀਹਾਰੇਨੇਵ. ‘‘ਤੇਹਿ ਅਤ੍ਥਰਿਤ੍ਵਾ ਦਿਨ੍ਨਾਨੇਵ ਨਿਸੀਦਿਤੁਂ ਲਬ੍ਭਨ੍ਤਿ, ਨ ਭਿਕ੍ਖੁਨਾ ਸਯਂ ਅਤ੍ਥਰਿਤ੍ਵਾ ਵਿਸ੍ਸਜ੍ਜਿਤਬ੍ਬਂ ਸਙ੍ਘੇਨ ਅਤ੍ਥਰਾਪੇਤ੍ਵਾ ਵਾ’’ਤਿ ਲਿਖਿਤਂ.

ਅਵਿਸ੍ਸਜ੍ਜਿਯਵਤ੍ਥੁਕਥਾਵਣ੍ਣਨਾ

੩੨੧. ‘‘ਨ ਵਿਸ੍ਸਜ੍ਜੇਤਬ੍ਬਂ ਸਙ੍ਘੇਨ ਵਾ ਗਣੇਨ ਵਾ ਪੁਗ੍ਗਲੇਨ ਵਾ’’ਤਿ ਵਚਨਂ ‘‘ਯਂ ਅਗਰੁਭਣ੍ਡਂ ਵਿਸ੍ਸਜ੍ਜਿਯਂ ਵੇਭਙ੍ਗਿਯਂ ਸਙ੍ਘਿਕਂ, ਤਂ ਗਣੋ ਚੇ ਤਸ੍ਮਿਂ ਆਵਾਸੇ ਵਸਤਿ ਪੁਗ੍ਗਲੋਪਿ ਵਾ, ਗਣੇਨ ਵਾ ਪੁਗ੍ਗਲੇਨ ਵਾ ਵਿਸ੍ਸਜ੍ਜਿਤਂ ਸਙ੍ਘੇਨ ਵਿਸ੍ਸਜ੍ਜਿਤਸਦਿਸਮੇਵ ਹੋਤੀ’’ਤਿ ਅਟ੍ਠਕਥਾਯਂ ਵੁਤ੍ਤਵਚਨਂ ਸਾਧੇਤਿ, ਅਞ੍ਞਥਾ ਏਤ੍ਥ ਗਣਪੁਗ੍ਗਲਗ੍ਗਹਣਂ ਨਿਰਤ੍ਥਕਂ. ਅਰਞ੍ਜਰੋ ਉਦਕਚਾਟਿ, ਅਲਞ੍ਜਲੋ, ਬਹੁਉਦਕਗਣ੍ਹਨਕੋਤਿ ਅਤ੍ਥੋ. ‘‘ਵਟ੍ਟਚਾਟਿ ਵਿਯ ਹੁਤ੍ਵਾ ਥੋਕਂ ਦੀਘਮੁਖੋ ਮਜ੍ਝੇ ਪਰਿਚ੍ਛੇਦਂ ਦਸ੍ਸੇਤ੍ਵਾ ਕਤੋ’’ਤਿ ਲਿਖਿਤਂ. ਮਂਸਦਿਬ੍ਬਧਮ੍ਮਬੁਦ੍ਧਸਮਨ੍ਤਚਕ੍ਖੁਵਸੇਨ ਪਞ੍ਚ.

ਗਰੁਭਣ੍ਡੇਨ ਚ ਗਰੁਭਣ੍ਡਨ੍ਤਿ ਸਂਹਾਰਿਮਂ ਸਨ੍ਧਾਯ ਵੁਤ੍ਤਂ. ਪਤ੍ਤਚੀਵਰਂ ਨਿਕ੍ਖਿਪਿਤੁਨ੍ਤਿ ਅਟ੍ਟਕਚ੍ਛਨ੍ਨੇਨ ਕਤੇ ਮਞ੍ਚੇ. ਵਟ੍ਟਲੋਹਂ ਨਾਮ ਪੀਤਵਣ੍ਣਂ. ਪਾਰਿਹਾਰਿਯਂ ਨ ਵਟ੍ਟਤੀਤਿ ਆਗਨ੍ਤੁਕਸ੍ਸ ਅਦਤ੍ਵਾ ਪਰਿਚਾਰਿਕਹਤ੍ਥਤੋ ਅਤ੍ਤਨੋ ਨਾਮਂ ਲਿਖਾਪੇਤ੍ਵਾ ਗਹੇਤ੍ਵਾ ਯਥਾਸੁਖਂ ਪਰਿਹਰਿਤੁਂ ਨ ਵਟ੍ਟਤਿ. ‘‘ਗਿਹਿਵਿਕਟਨੀਹਾਰੇਨੇਵਾਤਿ ਯਾਵ ਅਤ੍ਤਨੋ ਕਮ੍ਮਨਿਬ੍ਬਤ੍ਤਿ, ਤਾਵ ਗਹੇਤ੍ਵਾ ਦੇਤੀ’’ਤਿ ਲਿਖਿਤਂ. ਸਿਖਰਂ ਨਾਮ ਯੇਨ ਪਰਿਬ੍ਭਮਨ੍ਤਾ ਛਿਨ੍ਦਨ੍ਤਿ. ਪਤ੍ਤਬਨ੍ਧਕੋ ਨਾਮ ਪਤ੍ਤਸ੍ਸ ਗਣ੍ਠਿਆਦਿਕਾਰਕੋ. ‘‘ਪਟਿਮਾਨਂ ਸੁਵਣ੍ਣਾਦਿਪਤ੍ਤਕਾਰਕੋ’’ਤਿਪਿ ਵਦਨ੍ਤਿ. ‘‘ਅਡ੍ਢਬਾਹੂਤਿ ਕਪ੍ਪਰਤੋ ਪਟ੍ਠਾਯ ਯਾਵ ਅਂਸਕੂਟ’’ਨ੍ਤਿ ਲਿਖਿਤਂ. ਇਤੋ ਪਟ੍ਠਾਯਾਤਿ ਇਮਂ ਪਾਲ਼ਿਂ ਆਦਿਂ ਕਤ੍ਵਾ. ਦਣ੍ਡਮੁਗ੍ਗਰੋ ਨਾਮ ਯੇਨ ਰਜਿਤਚੀਵਰਂ ਪੋਥੇਨ੍ਤਿ. ‘ਪਚ੍ਚਤ੍ਥਰਣਗਤਿਕ’ਨ੍ਤਿ ਵੁਤ੍ਤਤ੍ਤਾ, ‘‘ਤਮ੍ਪਿ ਗਰੁਭਣ੍ਡਮੇਵਾਤਿ ਵੁਤ੍ਤਤ੍ਤਾ ਚ ਅਪਿ-ਸਦ੍ਦੇਨ ਪਾਵਾਰਾਦਿਪਚ੍ਚਤ੍ਥਰਣਂ ਸਬ੍ਬਂ ਗਰੁਭਣ੍ਡਮੇਵਾ’’ਤਿ ਵਦਨ੍ਤਿ. ਏਤੇਨੇਵ ਸੁਤ੍ਤੇਨ ਅਞ੍ਞਥਾ ਅਤ੍ਥਂ ਵਤ੍ਵਾ ‘‘ਪਾਵਾਰਾਦਿਪਚ੍ਚਤ੍ਥਰਣਂ ਨ ਗਰੁਭਣ੍ਡਂ, ਭਾਜਨੀਯਮੇਵ, ਸੇਨਾਸਨਤ੍ਥਾਯ ਦਿਨ੍ਨਪਚ੍ਚਤ੍ਥਰਣਮੇਵ ਗਰੁਭਣ੍ਡ’’ਨ੍ਤਿ ਵਦਨ੍ਤਿ, ਉਪਪਰਿਕ੍ਖਿਤਬ੍ਬਂ. ਗਣ੍ਠਿਕਾਤਿ ਚੀਵਰਗਣ੍ਠਿਕਾ. ਭਞ੍ਚਕੋ ਨਾਮ ਸਰਕੋ.

ਨਵਕਮ੍ਮਦਾਨਕਥਾਵਣ੍ਣਨਾ

੩੨੩-੪. ਅਗ੍ਗਲ਼ਬਨ੍ਧਸੂਚਿਦ੍ਵਾਰਕਰਣਮਤ੍ਤੇਨਪਿ. ‘‘ਕਪੋਤਭਣ੍ਡਿਕਾ ਨਾਮ ਵਲ਼ਭਿਯਾ ਉਪਰਿ ਠਪੇਤਬ੍ਬਵਲਯਂ ਵਾ ਤਿਣਚ੍ਛਦਨਗੇਹਸ੍ਸ ਪਿਟ੍ਠਿਵਂਸਸ੍ਸ ਹੇਟ੍ਠਾ ਠਪੇਤਬ੍ਬਂ ਵਾ ਉਭਯਮਸ੍ਸ ਗਤਾ ਦਾਰੂ’’ਤਿ ਲਿਖਿਤਂ. ਕਾਰਨ੍ਤਰਾਤਿ ਤਦਾ ਪੁਨ ਪਵਿਸਟ੍ਠਂ ਪੁਬ੍ਬਪਯੋਜਿਤਾਨਾਨਂ ਵਚਨਪਾਤਸੇਨਾਸਨਵਾਸੋ. ਨ ਪਨ ਪਤਿਸਟ੍ਠਤੋਤਿ ਦਟ੍ਠਬ੍ਬਂ. ਸਬ੍ਬਤ੍ਥ ਵਿਨਟ੍ਠਵਾਸੋ ਨ ਚ ਪਟਿਸੇਧਕੋ ਹੋਤੀਤਿ ਦਟ੍ਠਬ੍ਬੋ. ਦ੍ਵਾਰਵਾਤਪਾਨਾਦੀਨਿ ਅਪਹਰਿਤ੍ਵਾ ਦਾਤੁਂ ਅਸਕ੍ਕੁਣੇਯ੍ਯਤੋ ‘‘ਪਟਿਦਾਤਬ੍ਬਾਨਿਯੇਵਾ’’ਤਿ ਵੁਤ੍ਤਂ. ਗੋਪਾਨਸਿਆਦਯੋ ਦੇਨ੍ਤਸ੍ਸ ਵਿਹਾਰੋ ਪਲੁਜ੍ਜਤੀਤਿ ‘‘ਮੂਲਂ ਵਾ ਦਾਤਬ੍ਬ’’ਨ੍ਤਿਆਦਿ ਵੁਤ੍ਤਨ੍ਤਿ ਏਕੇ. ‘‘ਨੇਵਾਸਿਕਾ ਪਕਤਿਯਾ ਅਨਤ੍ਥਤਾਯ ਭੂਮਿਯਾ ਠਪੇਨ੍ਤਿ ਚੇ, ਤੇਸਮ੍ਪਿ ਅਨਾਪਤ੍ਤਿਯੇਵਾ’’ਤਿ ਲਿਖਿਤਂ. ‘‘ਦ੍ਵਾਰਵਾਤਪਾਨਾਦਯੋ ਅਪਰਿਕਮ੍ਮਕਤਾਪਿ ਅਪਟਿਚ੍ਛਾਦੇਤ੍ਵਾ ਨ ਅਪਸ੍ਸਯਿਤਬ੍ਬਾ’’ਤਿ ਲਿਖਿਤਂ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾਵਣ੍ਣਨਾ

ਉਦ੍ਦੇਸਭਤ੍ਤਕਥਾਵਣ੍ਣਨਾ

੩੨੫. ਯਾ ਭਤ੍ਤੁਦ੍ਦੇਸਟ੍ਠਾਨਭੂਤਾਯ ਭੋਜਨਸਾਲਾਯ ਪਕਤਿਠਿਤਿਕਾ. ਦਿਨ੍ਨਂ ਪਨਾਤਿ ਯਥਾ ਸੋ ਦਾਯਕੋ ਦੇਤਿ, ਤਂ ਦਸ੍ਸੇਨ੍ਤੋ ‘‘ਸਙ੍ਘਤੋ ਭਨ੍ਤੇ’’ਤਿਆਦਿਮਾਹ. ਏਕਵਲ਼ਞ੍ਜਨ੍ਤਿ ਏਕਦ੍ਵਾਰੇਨ ਵਲ਼ਞ੍ਜਿਤਬ੍ਬਂ. ਤਿਚੀਵਰਪਰਿਵਾਰਨ੍ਤਿ ਏਤ੍ਥ ‘‘ਉਦਕਮਤ੍ਤਲਾਭੀ ਵਿਯ ਅਞ੍ਞੋਪਿ ਉਦ੍ਦੇਸਭਤ੍ਤਂ ਅਲਭਿਤ੍ਵਾ ਵਤ੍ਥਾਦਿਮਨੇਕਪ੍ਪਕਾਰਂ ਲਭਤਿ ਚੇ, ਤਸ੍ਸੇਵ ਤ’’ਨ੍ਤਿ ਲਿਖਿਤਂ. ‘‘ਉਦ੍ਦੇਸਪਤ੍ਤੇ ਦੇਥਾ’ਤਿ ਵਤ੍ਵਾ ਗਹੇਤ੍ਵਾ ਆਗਤਭਾਵੇਨ ਸਙ੍ਘਸ੍ਸ ਪਰਿਚ੍ਚਤ੍ਤਂ ਨ ਹੋਤਿਯੇਵ ਤਸ੍ਸੇਵ ਹਤ੍ਥੇ ਗਤਤ੍ਤਾ, ਤਸ੍ਮਾ ਤੇਹਿ ਵੁਤ੍ਤਕ੍ਕਮੇਨ ਸਬ੍ਬੇਹਿ ਭਾਜੇਤ੍ਵਾ ਭੁਞ੍ਜਿਤਬ੍ਬ’’ਨ੍ਤਿ ਵੁਤ੍ਤਂ. ਪਟਿਪਾਟਿਪਤ੍ਤਂ ਵਾ ਠਿਤਿਕਾਯ ਠਿਤਪਤ੍ਤਂ ਵਾ. ‘‘ਕੂਟਟ੍ਠਿਤਿਕਾ ਨਾਮ ਅਗ੍ਗਹੇਤਬ੍ਬਾਨਮ੍ਪਿ ਗਾਹਿਤਤ੍ਤਾ’’ਤਿ ਲਿਖਿਤਂ, ‘‘ਪਣੀਤਭਤ੍ਤਟ੍ਠਿਤਿਕਞ੍ਚ ਅਜਾਨਿਤ੍ਵਾ ਮਿਸ੍ਸੇਤ੍ਵਾ ਗਾਹਿਤੇਪਿ ਏਵਮੇਵ ਪਟਿਪਜ੍ਜਿਤਬ੍ਬ’’ਨ੍ਤਿ ਚ ਲਿਖਿਤਂ. ਤਞ੍ਚੇ ਥੇਯ੍ਯਾਯ ਹਰਨ੍ਤਿ ਪਤ੍ਤਹਾਰਕਾ, ਆਣਾਪਕਸ੍ਸ ਗੀਵਾ ਹੋਤਿ. ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾਤਿ ਏਤ੍ਥ ‘‘ਤਂਦਿਵਸਮੇਵ ਚੇ ਭਿਕ੍ਖਾ ਲਬ੍ਭਤਿ, ਅਪਰਦਿਵਸਤੋ ਪਟ੍ਠਾਯ ਨ ਲਬ੍ਭਤਿ ਕਿਰਾ’’ਤਿ ਲਿਖਿਤਂ. ਪਚ੍ਛਾ ‘‘ਸਬ੍ਬੋ ਸਙ੍ਘੋ ਪਰਿਭੁਞ੍ਜਤੂ’’ਤਿ ਅਵੁਤ੍ਤੇਪਿ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ‘‘ਏਤ੍ਤਕੇ ਭਿਕ੍ਖੂ ਸਙ੍ਘਤੋ ਉਦ੍ਦਿਸਿਤ੍ਵਾ ਦੇਥਾ’ਤਿ ਅਵਤ੍ਵਾ ‘ਏਤ੍ਤਕਾਨਂ ਭਿਕ੍ਖੂਨਂ ਭਤ੍ਤਂ ਗਣ੍ਹਥਾ’ਤਿ ਦਿਨ੍ਨਂ ਸਙ੍ਘਿਕਨਿਮਨ੍ਤਨਂ ਨਾਮਾ’’ਤਿ ਲਿਖਿਤਂ.

ਨਿਮਨ੍ਤਨਭਤ੍ਤਕਥਾਵਣ੍ਣਨਾ

ਪਟਿਪਾਟਿਯਾਤਿ ਯਥਾਲਦ੍ਧਪਟਿਪਾਟਿਯਾ. ਵਿਚ੍ਛਿਨ੍ਦਿਤ੍ਵਾਤਿ ਭਤ੍ਤਂ ਗਣ੍ਹਥਾਤਿ ਪਦਂ ਅਵਤ੍ਵਾ. ਆਲੋਪਸਙ੍ਖੇਪੇਨਾਤਿ ਅਯਂ ਨਯੋ ਨਿਮਨ੍ਤਨਾਯਮੇਵ, ਉਦ੍ਦੇਸਭਤ੍ਤੇ ਪਨ ਏਕਸ੍ਸ ਪਹੋਨਕਪ੍ਪਮਾਣੇ ਏਵ ਠਿਤਿਕਾ ਤਿਟ੍ਠਤਿ. ‘‘ਏਕਵਾਰਨ੍ਤਿ ਯਾਵ ਤਸ੍ਮਿਂ ਆਵਾਸੇ ਵਸਨ੍ਤਿ ਭਿਕ੍ਖੂ, ਸਬ੍ਬੇਵ ਲਭਨ੍ਤੀ’’ਤਿ ਲਿਖਿਤਂ.

ਸਲਾਕਭਤ੍ਤਕਥਾਵਣ੍ਣਨਾ

ਨ ਹਿ ਬਹਿਸੀਮਾਯ ਸਙ੍ਘਲਾਭੋਤਿ ਏਤ੍ਥ ‘‘ਉਦ੍ਦੇਸਭਤ੍ਤਾਦੀਸੁ ਬਹਿਸੀਮਾਯ ਠਿਤਸ੍ਸਪਿ ਚੇ ਉਪਾਸਕਾ ਦੇਨ੍ਤਿ, ਗਹੇਤੁਂ ਲਭਨ੍ਤਿ, ਅਤ੍ਤਨੋਪਿ ਪਾਪੇਤ੍ਵਾ ਗਹਣਂ ਅਨੁਞ੍ਞਾਤਂ, ਤਥਾ ਇਧ ਨ ਵਟ੍ਟਤੀ’’ਤਿ ਵੁਤ੍ਤਂ. ਨ ਪਾਪੁਣਨ੍ਤੀਤਿ ਉਦ੍ਦਿਸਿਤ੍ਵਾਪਿ. ਵਾਰਗਾਮਨ੍ਤਿ ਦੂਰਤ੍ਤਾ ਵਾਰੇਨ ਨਿਗ੍ਗਹੇਨ ਗਨ੍ਤਬ੍ਬਗਾਮੇ. ਫਾਤਿਕਮ੍ਮਮੇਵਾਤਿ ਅਤਿਰੇਕਲਾਭਾ ਚ ਭਵਨ੍ਤਿ. ਸਮ੍ਮੁਖੀਭੂਤਸ੍ਸਾਤਿ ਯੇਭੁਯ੍ਯੇਨ ਚੇ ਭਿਕ੍ਖੂ ਬਹਿਸੀਮਂ ਗਤਾ, ਸਮ੍ਮੁਖੀਭੂਤਸ੍ਸ ਪਾਪੇਤਬ੍ਬਂ. ਸਭਾਗਤ੍ਤਾ ਹਿ ਏਕੇਨ ਲਦ੍ਧਂ ਸਬ੍ਬੇਸਂ ਪਹੋਤਿ, ਤਸ੍ਮਿਮ੍ਪਿ ਅਸਤਿ ਅਤ੍ਤਨੋ ਪਾਪੇਤ੍ਵਾ ਦਾਤਬ੍ਬਂ. ‘‘ਲਦ੍ਧਾ ਵਾ ਅਲਦ੍ਧਾ ਵਾ’’ਤਿ ਵਚਨਸਿਲਿਟ੍ਠਵਸੇਨ ਵੁਤ੍ਤਂ. ਵਿਹਾਰੇ ਅਪਾਪਿਤਂ ਪਨ…ਪੇ… ਨ ਵਟ੍ਟਤੀਤਿ ਸਲਾਕਭਤ੍ਤਂ ਵਿਹਾਰੇ ਉਦ੍ਦਿਸਿਯਤਿ. ਤੇਨ ਪਨ ਦਿਨ੍ਨਸਲਾਕੇਨ. ਤਸ੍ਸਾਤਿ ਗਹੇਤ੍ਵਾ ਗਤਸ੍ਸ. ਸਲਾਕਾ ਗਹੇਤਬ੍ਬਾਤਿ ਯੁਤ੍ਤਂ ਵਿਯ. ਸਬ੍ਬਪੋਤ੍ਥਕੇਸੁ ‘‘ਗਾਹੇਤਬ੍ਬਾ’’ਤਿ ਪਾਠੋ, ਤਸ੍ਮਾ ਤੇਨਾਤਿ ਸਲਾਕਗ੍ਗਾਹਾਪਕੇਨਾਤਿ ਅਤ੍ਥੋ. ‘‘ਚੋਰਿਕਾਯ ਗਹਿਤਤ੍ਤਾ ਨ ਪਾਪੁਣਾਤੀ’’ਤਿ ਵਚਨਤੋ ‘‘ਕੁਟਿਸੋਧਨਂ ਵਟ੍ਟਤੀ’’ਤਿ ਚ ਦੀਪਵਾਸਿਨੋ ਵਦਨ੍ਤਿ ਕਿਰ. ਏਕਂ ਮਹਾਥੇਰਸ੍ਸਾਤਿ ਮਹਾਥੇਰੋ ਵਿਹਾਰਤੋ ਯੇਭੁਯ੍ਯੇਨ ਨ ਗਚ੍ਛਤਿ, ਇਤਰੇ ਕਦਾਚਿ ਗਚ੍ਛਤਿ, ਤਸ੍ਮਾ ਸਭਾਗਾ ਚੇ, ਅਤ੍ਤਨੋ ਪਾਪੇਤ੍ਵਾ ਪੁਨ ਇਤਰੇਸਂ ਦਿਯ੍ਯਤਿ. ਵਿਹਾਰੇ ਥੇਰਸ੍ਸ ਪਤ੍ਤਸਲਾਕਭਤ੍ਤਨ੍ਤਿ ਮਹਾਥੇਰੋ ਏਕਕੋਵ ਵਿਹਾਰੇ ਓਹੀਨੋ, ‘‘ਅਵਸ੍ਸਂ ਸਬ੍ਬਸਲਾਕਾ ਅਤ੍ਤਨੋ ਪਾਪੇਤ੍ਵਾ ਠਿਤੋ’’ਤਿ ਪਟਿਸ੍ਸਯਂ ਗਨ੍ਤ੍ਵਾ ਆਗਨ੍ਤੁਕਭਿਕ੍ਖੂਨਮ੍ਪਿ ਅਦਸ੍ਸਨਤੋ ਕੁਕ੍ਕੁਚ੍ਚਂ ਅਕਤ੍ਵਾ ਭੁਞ੍ਜਨ੍ਤਿ.

ਪਕ੍ਖਿਕਭਤ੍ਤਕਥਾਵਣ੍ਣਨਾ

ਉਪੋਸਥਦਿਵਸੇ ਆਪਤ੍ਤਿਦੇਸਨਂ ਸਨ੍ਧਾਯ ‘‘ਪਰਿਸੁਦ੍ਧਸੀਲਾਨ’’ਨ੍ਤਿ ਆਹ. ਲੇਖਂ ਕਤ੍ਵਾ ਨਿਬਦ੍ਧਾਪਿਤਂ. ‘‘ਆਗਨ੍ਤੁਕਭਤ੍ਤਮ੍ਪਿ ਗਮਿਕਭਤ੍ਤਮ੍ਪੀ’’ਤਿ ਆਗਨ੍ਤੁਕੋਵ ਹੁਤ੍ਵਾ ਗਚ੍ਛਨ੍ਤਂ ਸਨ੍ਧਾਯ ਵੁਤ੍ਤਂ. ਅਨਾਥਗਿਲਾਨੁਪਟ੍ਠਾਕੋਪਿ ਤੇਨ ਦਿਨ੍ਨਂ ਭੁਞ੍ਜਤਿ ਚੇ, ਤਸ੍ਸਪਿ ਪਾਪੇਤਬ੍ਬਮੇਵ. ਗੁਲ਼ਪਿਣ੍ਡਂ ਤਾਲਪਕ੍ਕਮਤ੍ਤਂ.

ਸੇਨਾਸਨਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.