੪. ਸਮਥਕ੍ਖਨ੍ਧਕਵਣ੍ਣਨਾ

ਸਮ੍ਮੁਖਾਵਿਨਯਕਥਾਵਣ੍ਣਨਾ

੧੮੬-੧੮੭. ਯਤ੍ਥ ਯਤ੍ਥ ਕਮ੍ਮਵਾਚਾਯ ‘‘ਅਯ’’ਨ੍ਤਿ ਵਾ ‘‘ਇਮੇ’’ਤਿ ਵਾ ਸਮ੍ਮੁਖਾਨਿਦ੍ਦੇਸਨਿਯਮੋ ਅਤ੍ਥਿ, ਸਬ੍ਬਂ ਤਂ ਕਮ੍ਮਂ ਸਮ੍ਮੁਖਾਕਰਣੀਯਮੇਵ, ਨ ਕੇਵਲਂ ਤਜ੍ਜਨੀਯਾਦਿਪਞ੍ਚਵਿਧਮੇਵ. ਪਞ੍ਚਵਿਧਸ੍ਸੇਵ ਪਨ ਉਦ੍ਧਰਿਤ੍ਵਾ ਦਸ੍ਸਨਂ ਕਮ੍ਮਕ੍ਖਨ੍ਧਕੇ ਤਾਵ ਤਸ੍ਸੇਵ ਪਾਲ਼ਿਆਰੁਲ਼੍ਹਤ੍ਤਾ, ਚਤੁਵੀਸਤਿਯਾ ਪਾਰਾਜਿਕੇਸੁ ਵਿਜ੍ਜਮਾਨੇਸੁ ਪਾਰਾਜਿਕਕਣ੍ਡੇ ਆਗਤਾਨਂਯੇਵ ਚਤੁਨ੍ਨਂ ਉਦ੍ਧਰਿਤ੍ਵਾ ਦਸ੍ਸਨਂ ਵਿਯਾਤਿ ਵੇਦਿਤਬ੍ਬਂ. ਤਤ੍ਥ ‘‘ਪੁਗ੍ਗਲਸ੍ਸ ਸਮ੍ਮੁਖਤਾ ਹਤ੍ਥਪਾਸੂਪਗਮਨਮੇਵਾ’’ਤਿ ਵੁਤ੍ਤਂ, ਤਂ ਕਾਰਣਂ ਸਮ੍ਮੁਖਾਕਰਣੀਯਸ੍ਸਪਿ ਸਮ੍ਮੁਖਾਨਿਦ੍ਦੇਸਨਿਯਮਾਭਾਵਤੋ. ਕਾਮਂ ਅਯਮਤ੍ਥੋ ਕਮ੍ਮਕ੍ਖਨ੍ਧਕੇਯੇਵ ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ…ਪੇ… ਅਸਮ੍ਮੁਖਾਕਤਂ ਹੋਤੀ’’ਤਿ (ਚੂਲ਼ਵ. ੪) ਵਚਨੇਨੇਵ ਸਿਦ੍ਧੋ, ਤਤ੍ਥ ਪਨ ਆਪਤ੍ਤਿ ਨ ਦਸ੍ਸਿਤਾ. ਇਧ ‘‘ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਤਤ੍ਥ ਭਵਿਤਬ੍ਬਾਪਤ੍ਤਿਦਸ੍ਸਨਤ੍ਥਂ ਇਦਂ ਆਰਦ੍ਧਨ੍ਤਿ ਵੇਦਿਤਬ੍ਬਂ. ‘‘ਸਮ੍ਮੁਖਾਵਿਨਯਪਤਿਰੂਪਕੇਨ ਵੂਪਸਨ੍ਤਮ੍ਪਿ ਸਮ੍ਮੁਖਾਵਿਨਯੇਨੇਵ ਵੂਪਸਨ੍ਤਗਣਨਂ ਗਚ੍ਛਤੀਤਿ ਦਸ੍ਸੇਤੁਂ ‘ਅਧਮ੍ਮਵਾਦੀ ਪੁਗ੍ਗਲੋ’ਤਿਆਦਿ ਆਰਦ੍ਧ’’ਨ੍ਤਿ ਵੁਤ੍ਤਂ, ਲਿਖਿਤਞ੍ਚ. ਏਵਂ ਵੂਪਸਨ੍ਤਂ ਸਮ੍ਮੁਖਾਵਿਨਯਪਤਿਰੂਪਕੇਨ ਵੂਪਸਨ੍ਤਂ ਨਾਮ ਹੋਤਿ, ਨ ਸਮ੍ਮੁਖਾਵਿਨਯੇਨ ਚ ਅਞ੍ਞੇਨ ਕੇਨਚੀਤਿ ਦਸ੍ਸੇਤੁਂ ਇਦਮਾਰਦ੍ਧਨ੍ਤਿ ਆਚਰਿਯੋ.

ਸਤਿਵਿਨਯਕਥਾਵਣ੍ਣਨਾ

੧੯੫. ਦਬ੍ਬਸ੍ਸ ਕਮ੍ਮਵਾਚਾਯ ‘‘ਸਙ੍ਘੋ ਇਮਂ ਆਯਸ੍ਮਨ੍ਤਂ ਦਬ੍ਬ’’ਨ੍ਤਿ ਸਮ੍ਮੁਖਾਨਿਦ੍ਦੇਸੋ ਨਤ੍ਥਿ, ਤਥਾਪਿ ‘‘ਪਠਮਂ ਦਬ੍ਬੋ ਯਾਚਿਤਬ੍ਬੋ’’ਤਿ ਵਚਨੇਨ ਸਮ੍ਮੁਖਾਕਰਣੀਯਤਾ ਤਸ੍ਸ ਸਿਦ੍ਧਾ. ਤਥਾ ਅਞ੍ਞਤ੍ਥਾਪਿ ਯਥਾਸਮ੍ਭਵਂ ਲੇਸੋ ਵੇਦਿਤਬ੍ਬੋ. ਸਤਿਵੇਪੁਲ੍ਲਪ੍ਪਤ੍ਤਸ੍ਸ ਦਾਤਬ੍ਬੋ ਵਿਨਯੋ ਸਤਿਵਿਨਯੋ.

ਅਮੂਲ਼੍ਹਵਿਨਯਕਥਾਵਣ੍ਣਨਾ

੧੯੬-੭. ‘‘ਯਸ੍ਸ ਉਮ੍ਮਤ੍ਤਕਸ੍ਸ ਤਂਤਂਵੀਤਿਕ੍ਕਮਤੋ ਅਨਾਪਤ੍ਤਿ, ਤਾਦਿਸਸ੍ਸੇਵ ਅਮੂਲ਼੍ਹਵਿਨਯਂ ਦਾਤੁਂ ਵਟ੍ਟਤੀਤਿ ਅਮੂਲ਼੍ਹਸ੍ਸ ਕਤ੍ਤਬ੍ਬਵਿਨਯੋ ਅਮੂਲ਼੍ਹਵਿਨਯੋ’’ਤਿ ਲਿਖਿਤਂ, ਤਂ ਯੁਤ੍ਤਂ ‘‘ਸਙ੍ਘੋ ਗਗ੍ਗਸ੍ਸ ਭਿਕ੍ਖੁਨੋ ਅਮੂਲ਼੍ਹਸ੍ਸ ਅਮੂਲ਼੍ਹਵਿਨਯਂ ਦੇਤੀ’’ਤਿ ਵਚਨਤੋ. ‘‘ਤੀਣਿਮਾਨਿ, ਭਿਕ੍ਖਵੇ, ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨੀ’’ਤਿ ਇਮਸ੍ਸ ਵਿਭਙ੍ਗੇ ‘‘ਨ ਸਰਾਮੀ’’ਤਿ ਵਚਨਂ ਵੀਤਿਕ੍ਕਮਕਾਲਂ ਸਨ੍ਧਾਯ ਤਸ੍ਸ ਵਿਭਙ੍ਗਸ੍ਸ ਪਵਤ੍ਤਤ੍ਤਾ. ਅਮੂਲ਼੍ਹਵਿਨਯਦਾਨਕਾਲੇ ਪਨਸ੍ਸ ਅਮੂਲ਼੍ਹਤਾ ਵਿਨਿਚ੍ਛਿਤਬ੍ਬਾ.

ਪਟਿਞ੍ਞਾਤਕਰਣਕਥਾਵਣ੍ਣਨਾ

੨੦੦. ‘‘ਅਪ੍ਪਟਿਞ੍ਞਾਯ ਭਿਕ੍ਖੂਨਂ ਕਮ੍ਮਾਨਿ ਕਰੋਨ੍ਤੀ’’ਤਿ ਆਰਭਨ੍ਤਸ੍ਸ ਕਾਰਣਂ ਵੁਤ੍ਤਮੇਵ. ਪਟਿਞ੍ਞਾਤੇਨ ਕਰਣਂ ਪਟਿਞ੍ਞਾਤਕਰਣਂ.

ਤਸ੍ਸਪਾਪਿਯਸਿਕਾਕਥਾਵਣ੍ਣਨਾ

੨੦੭. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਤਸ੍ਸਪਾਪਿਯਸਿਕਾਕਮ੍ਮ’’ਨ੍ਤਿ ਆਰਭਿਤ੍ਵਾ ਪਞ੍ਚ ਅਙ੍ਗਾਨਿ ਦਸ੍ਸੇਤ੍ਵਾ ਪਾਲ਼ਿ ਗਤਾ, ‘‘ਸਾ ਪੇਯ੍ਯਾਲੇਨ ਸਙ੍ਖਿਪਿਤ੍ਵਾ ਗਤਾਤਿ ਞਾਤਬ੍ਬ’’ਨ੍ਤਿ ਲਿਖਿਤਂ. ਤਥਾ ਸੁਕ੍ਕਪਕ੍ਖੇਪਿ.

ਤਿਣਵਤ੍ਥਾਰਕਾਦਿਕਥਾਵਣ੍ਣਨਾ

੨੧੪. ‘‘ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬ’’ਨ੍ਤਿ ਛਨ੍ਦਦਾਨਸ੍ਸ ਪਟਿਕ੍ਖਿਤ੍ਤਤ੍ਤਾ ਪਵਾਰਣਕ੍ਖਨ੍ਧਕਟ੍ਠਕਥਾਯਞ੍ਚ ‘‘ਭਿਨ੍ਨਸ੍ਸ ਹਿ ਸਙ੍ਘਸ੍ਸ ਸਮਗ੍ਗਕਰਣਕਾਲੇ, ਤਿਣਵਤ੍ਥਾਰਕਸਮਥੇ, ਇਮਸ੍ਮਿਞ੍ਚ ਪਵਾਰਣਸਙ੍ਗਹੇਤਿ ਇਮੇਸੁ ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੪੧) ਵੁਤ੍ਤਤ੍ਤਾ ਇਧ ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾਤਿ ਇਦਂ ਵਿਰੁਜ੍ਝਤਿ ਵਿਯ ਖਾਯਤੀਤਿ ਚੇ? ਨ ਖਾਯਤਿ ਅਧਿਪ੍ਪਾਯਞ੍ਞੂਨਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਵਿਸੁਜ੍ਝਿਤੁਕਾਮੇਹਿ ਸਬ੍ਬੇਹੇਵ ਸਨ੍ਨਿਪਤਿਤਬ੍ਬਂ, ਅਸਨ੍ਨਿਪਤਿਤਸ੍ਸ ਨਤ੍ਥਿ ਸੁਦ੍ਧਿ ਛਨ੍ਦਦਾਯਕਸ੍ਸ. ਕੇਵਲਂ ਤਂ ਕਮ੍ਮਂ ਸਨ੍ਨਿਪਤਿਤਾਨਂ ਸਮ੍ਪਜ੍ਜਤਿ. ਅਟ੍ਠਕਥਾਯਂ ਵਿਸੁਜ੍ਝਿਤੁਕਾਮਾਨਂ ਛਨ੍ਦਂ ਦਾਤੁਂ ਨ ਵਟ੍ਟਤੀਤਿ ਅਧਿਪ੍ਪਾਯੋ. ਇਤਰਥਾ ਪਾਲ਼ਿਯਾ ਚ ਵਿਰੁਜ੍ਝਤਿ. ‘‘ਠਪੇਤ੍ਵਾ ਯੇ ਨ ਤਤ੍ਥ ਹੋਤੀ’’ਤਿ ਹਿ ਅਯਂ ਪਾਲ਼ਿ ਸਨ੍ਨਿਪਾਤਂ ਆਗਨ੍ਤ੍ਵਾ ਛਨ੍ਦਂ ਦਤ੍ਵਾ ਠਿਤਾਨਂ ਅਤ੍ਥਿਤਂ ਦੀਪੇਤਿ. ਨਿਸ੍ਸੀਮਗਤੇ ਸਨ੍ਧਾਯ ਵੁਤ੍ਤਂ ਸਿਯਾਤਿ ਚੇ? ਨਿਸ੍ਸੀਮਗਤੇ ਠਪੇਤ੍ਵਾ ਇਧ ਕਿਂ, ਤਸ੍ਮਾ ਯੋ ਸਾਮਗ੍ਗੀਉਪੋਸਥੇ ਛਨ੍ਦਂ ਦਤ੍ਵਾ ਤਿਟ੍ਠਤਿ ਚੇ, ਨਾਨਾਸਂਵਾਸਕਭੂਮਿਯਂਯੇਵ ਤਿਟ੍ਠਤਿ, ਤਸ੍ਸ ਛਨ੍ਦਦਾਯਕਸ੍ਸ ਪਵਾਰਣਸਙ੍ਗਹੋਪਿ ਨਤ੍ਥਿ. ਯੋ ਚ ਤਿਣਵਤ੍ਥਾਰਕਕਮ੍ਮੇ ਨਾਗਚ੍ਛਤਿ, ਸੋ ਤਾਹਿ ਆਪਤ੍ਤੀਹਿ ਨ ਸੁਜ੍ਝਤੀਤਿ ਵੇਦਿਤਬ੍ਬਂ. ਯਸ੍ਸ ਏਤਂ ਨ ਰੁਚ੍ਚਤਿ, ਤਸ੍ਸ ਪਰਿਵਾਰੇ ਵੁਤ੍ਤਪਰਿਸਤੋ ਕਮ੍ਮਵਿਪਤ੍ਤਿਲਕ੍ਖਣਂ ਵਿਰੁਜ੍ਝਤਿ, ਤਤ੍ਥ ਹਿ ਕੇਵਲਂ ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ ਸਚੇ, ਅਕਤਂ ਤਬ੍ਬਿਪਰੀਤੇਨ ਸਮ੍ਪਤ੍ਤਿਦੀਪਨਤੋਤਿ ਵੁਤ੍ਤਂ ਹੋਤਿ. ਤਥਾ ਪਤ੍ਤਕਲ੍ਲਲਕ੍ਖਣਮ੍ਪਿ ਵਿਰੁਜ੍ਝਤਿ. ਤੇਸੁ ਤੀਸੁ ਠਾਨੇਸੁ ਕਮ੍ਮਪ੍ਪਤ੍ਤਾਯੇਵ ਸਬ੍ਬੇ, ਨ ਤਤ੍ਥ ਛਨ੍ਦਾਰਹੋ ਅਤ੍ਥੀਤਿ ਚੇ? ਨ, ਚਤੁਵਗ੍ਗਾਦਿਕਰਣਵਿਭਾਜਨੇ ਅਵਿਸੇਸੇਤ੍ਵਾ ਛਨ੍ਦਾਰਹਸ੍ਸ ਆਗਤਤ੍ਤਾ, ਤਂ ਸਾਮਞ੍ਞਤੋ ਵੁਤ੍ਤਂ. ਇਦਞ੍ਚ ਆਵੇਣਿਕਲਕ੍ਖਣਂ, ਤੇਨੇਵ ਸਤਿਪਿ ਦਿਟ੍ਠਾਵਿਕਮ੍ਮੇ ਇਦਂ ਪਟਿਕੁਟ੍ਠਕਤਂ ਨ ਹੋਤੀਤਿ ਚੇ? ਨ, ਨਾਨਤ੍ਤਸਭਾਵਤੋ. ਇਧ ਹਿ ਯੇ ਪਨ ‘‘ਨ ਮੇਤਂ ਖਮਤੀ’ਤਿ ਅਞ੍ਞਮਞ੍ਞਂ ਦਿਟ੍ਠਾਵਿਕਮ੍ਮਂ ਕਰੋਨ੍ਤੀ’’ਤਿ (ਚੂਲ਼ਵ. ਅਟ੍ਠ. ੨੧੪) ਵਚਨਤੋ ਨ ਸਙ੍ਘਸ੍ਸ ਦਿਟ੍ਠਾਵਿਕਮ੍ਮਂ ਕਤਂ. ਤਸ੍ਮਿਂ ਸਤਿ ਪਟਿਕੁਟ੍ਠਕਤਮੇਵ ਹੋਤਿ. ਅਞ੍ਞਥਾ ਪੁਬ੍ਬਭਾਗਾ ਤਾ ਞਤ੍ਤਿਯੋ ਨਿਰਤ੍ਥਿਕਾ ਸਿਯੁਂ, ਨ ਚ ਪਰਿਵਾਰਟ੍ਠਕਥਾਯਂ ਛਨ੍ਦਾਰਹਾਧਿਕਾਰੇ ਨਯੋ ਦਿਨ੍ਨੋ. ਪਵਾਰਣਕ੍ਖਨ੍ਧਕਟ੍ਠਕਥਾਯਂ ‘‘ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੪੧) ਵੁਤ੍ਤਤ੍ਤਾ ਵਿਰੁਜ੍ਝਤੀਤਿ ਚੇ? ਨ, ਅਟ੍ਠਕਥਾਯ ਪਮਾਣਭਾਵੇ ਸਤਿ ‘‘ਇਧ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ’’ਤਿਆਦਿ ਵਚਨੇ ਸੁਦ੍ਧਿਕਾਮਤੋ ਏਵ ਗਹਿਤੇ ਸਬ੍ਬਂ ਨ ਵਿਰੁਜ੍ਝਤੀਤਿ ਏਕੇ. ‘‘ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ, ਤੇ ਆਪਤ੍ਤੀਹਿ ਨ ਵੁਟ੍ਠਹਨ੍ਤੀ’’ਤਿ ਇਦਂ ਨ ਵਤ੍ਤਬ੍ਬਂ. ਕਸ੍ਮਾ? ਹੇਟ੍ਠਾ ‘‘ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬ’’ਨ੍ਤਿ ਛਨ੍ਦਦਾਨਸ੍ਸ ਪਟਿਕ੍ਖੇਪਵਚਨਤੋ ਅਟ੍ਠਕਥਾਯਂ ‘‘ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤੀ’’ਤਿ ਵੁਤ੍ਤਤ੍ਤਾ, ਅਨ੍ਧਕਟ੍ਠਕਥਾਯਮ੍ਪਿ ਤਥੇਵ ਵੁਤ੍ਤਤ੍ਤਾ ਚਾਤਿ? ਨ, ਏਕਜ੍ਝਮੇਵ ਕਮ੍ਮੇ ਕਰੀਯਮਾਨੇ ਯੋ ਇਧ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਮ੍ਹਾਕਂ…ਪੇ… ਗਿਹਿਪਟਿਸਂਯੁਤ੍ਤ’’ਨ੍ਤਿ ਸਾਧਾਰਣਞਤ੍ਤਿਂ ਠਪੇਤ੍ਵਾ ਪੁਨ ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ’’ਤਿਆਦਿਨਾ ਅਸਾਧਾਰਣਞਤ੍ਤਿਯੋ ਠਪੇਤ੍ਵਾ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਮ੍ਹਾਕਂ…ਪੇ… ਏਵਮੇਤਂ ਧਾਰਯਾਮੀ’’ਤਿ ਏਕਤੋਪਕ੍ਖਿਕਾਨਂ ਸਨ੍ਧਿਯਾ ਕਤਾਯ ਤਦਨਨ੍ਤਰੇ ਕੇਨਚਿ ਕਰਣੀਯੇਨ ਛਨ੍ਦਂ ਦਤ੍ਵਾ ਗਚ੍ਛਤਿ, ਤਸ੍ਸ ਆਪਤ੍ਤੀਹਿ ਵੁਟ੍ਠਾਨਂ ਨਤ੍ਥਿ. ਅਪਰੇਸਮ੍ਪਿ ਏਕਤੋਪਕ੍ਖਿਕਾਨਂ ਅਬ੍ਭਨ੍ਤਰੇ ਠਿਤਤ੍ਤਾ ਵਿਭੂਤਤ੍ਤਾ ਕਰਣਸ੍ਸ ਅਯਮਤ੍ਥੋਵ ਵੁਤ੍ਤੋ. ਸਾਧਾਰਣਵਸੇਨ ਦੁਤਿਯਾਯ ਞਤ੍ਤਿਯਾ ਠਪਿਤਾਯ ਯੇ ਤਸ੍ਮਿਂ ਖਣੇ ਞਤ੍ਤਿਦੁਤਿਯਕਮ੍ਮਵਾਚਾਸੁ ਅਨਾਰਦ੍ਧਾਸੁ, ਅਪਰਿਯੋਸਿਤਾਸੁ ਵਾ ਛਨ੍ਦਂ ਦਤ੍ਵਾ ਗਚ੍ਛਨ੍ਤਿ, ਤੇਸਮ੍ਪਿ ਨ ਵੁਟ੍ਠਾਤਿ ਏਵ. ਯੇ ਨ ਤਤ੍ਥ ਹੋਨ੍ਤੀਤਿ ਪਦਸ੍ਸ ਚ ਯੇ ਵੁਤ੍ਤਪ੍ਪਕਾਰੇਨ ਨਯੇਨ ਤਤ੍ਥ ਨ ਹੋਨ੍ਤੀਤਿ ਅਤ੍ਥੋ ਗਹੇਤਬ੍ਬੋ. ਵੁਤ੍ਤਪ੍ਪਕਾਰਤ੍ਥਦੀਪਨਤ੍ਥਞ੍ਚ ਅਟ੍ਠਕਥਾਯਂ ‘‘ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ’’ਤਿ ਇਦਮੇਵ ਅਵਤ੍ਵਾ ‘‘ਯੇ ਪਨ ਤੇਹਿ ਵਾ ਸਦ੍ਧਿਂ ਆਪਤ੍ਤਿਂ ਆਪਜ੍ਜਿਤ੍ਵਾਪਿ ਤਤ੍ਥ ਅਨਾਗਤਾ, ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ’’ਤਿ ਵੁਤ੍ਤਂ, ਏਵਂ ਪੁਬ੍ਬੇਨਾਪਰਂ ਸਨ੍ਧੀਯਤਿ. ‘‘ਪਾਲ਼ਿਯਾ ਚ ਤਤ੍ਥ ਦਿਟ੍ਠਾਵਿਕਮ੍ਮੇਨ ਕਮ੍ਮਸ੍ਸ ਅਕੁਪ੍ਪਤਾ ਵੇਦਿਤਬ੍ਬਾ’’ਤਿ ਵੁਤ੍ਤਂ.

ਅਧਿਕਰਣਕਥਾਵਣ੍ਣਨਾ

੨੨੦. ਚਿਤ੍ਤੁਪ੍ਪਾਦੋ ਵਿਵਾਦੋ. ਵਿਵਾਦਸਦ੍ਦੋਪਿ ਕਾਰਣੂਪਚਾਰੇਨ ਕੁਸਲਾਦਿਸਙ੍ਖ੍ਯਂ ਗਚ੍ਛਤਿ. ਤਂ ਸਨ੍ਧਾਯ ‘‘ਸਮਥੇਹਿ ਚ ਅਧਿਕਰਣੀਯਤਾਯ ਅਧਿਕਰਣ’’ਨ੍ਤਿ ਵੁਤ੍ਤਂ. ਅਥ ਵਾ ਵਿਵਾਦਹੇਤੁਭੂਤਸ੍ਸ ਚਿਤ੍ਤੁਪ੍ਪਾਦਸ੍ਸ ਵੂਪਸਮੇਨ ਸਮ੍ਭਵਸ੍ਸ ਸਦ੍ਦਸ੍ਸਪਿ ਵੂਪਸਮੋ ਹੋਤੀਤਿ ਚਿਤ੍ਤੁਪ੍ਪਾਦਸ੍ਸਪਿ ਸਮਥੇਹਿ ਅਧਿਕਰਣੀਯਤਾ ਪਰਿਯਾਯੋ ਸਮ੍ਭਵਤਿ. ‘‘ਕੁਸਲਚਿਤ੍ਤਾ ਵਿਵਦਨ੍ਤੀ’’ਤਿ ਵੁਤ੍ਤਵਿਵਾਦੇਪਿ ‘‘ਵਿਪਚ੍ਚਤਾਯ ਵੋਹਾਰੋ’’ਤਿ ਵੁਤ੍ਤਂ, ਨ ਵੁਤ੍ਤਵਚਨਹੇਤੁਵਸੇਨਾਤਿ ਵੇਦਿਤਬ੍ਬਂ.

੨੨੨. ‘‘ਆਪਤ੍ਤਿਞ੍ਹਿ ਆਪਜ੍ਜਨ੍ਤੋ ਕੁਸਲਚਿਤ੍ਤੋ ਵਾ’’ਤਿ ਵਚਨਤੋ ਕੁਸਲਮ੍ਪਿ ਸਿਯਾਤਿ ਚੇ? ਨ ਤਂ ਆਪਤ੍ਤਾਧਿਕਰਣਂ ਸਨ੍ਧਾਯ ਵੁਤ੍ਤਂ, ਯੋ ਆਪਤ੍ਤਿਂ ਆਪਜ੍ਜਤਿ, ਸੋ ਤੀਸੁ ਚਿਤ੍ਤੇਸੁ ਅਞ੍ਞਤਰਚਿਤ੍ਤਸਮਙ੍ਗੀ ਹੁਤ੍ਵਾ ਆਪਜ੍ਜਤੀਤਿ ਦਸ੍ਸਨਤ੍ਥਂ ‘‘ਯਂ ਕੁਸਲਚਿਤ੍ਤੋ ਆਪਜ੍ਜਤੀ’’ਤਿਆਦਿ ਵੁਤ੍ਤਂ. ਯੋ ‘‘ਪਞ੍ਞਤ੍ਤਿਮਤ੍ਤਂ ਆਪਤ੍ਤਾਧਿਕਰਣ’’ਨ੍ਤਿ ਵਦੇਯ੍ਯ, ਤਸ੍ਸ ਅਕੁਸਲਾਦਿਭਾਵੋਪਿ ਆਪਤ੍ਤਾਧਿਕਰਣਸ੍ਸ ਨ ਯੁਜ੍ਜਤੇਵ ਵਿਵਾਦਾਧਿਕਰਣਾਦੀਨਂ ਵਿਯਾਤਿ ਚੇ? ਨ, ‘‘ਨਤ੍ਥਾਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਇਮਿਨਾ ਵਿਰੋਧਸਮ੍ਭਵਤੋ. ਅਨੁਗਣ੍ਠਿਪਦੇ ਪਨ ‘‘ਆਪਤ੍ਤਾਧਿਕਰਣਂ ਨਾਮ ਤਥਾਪਵਤ੍ਤਮਾਨਅਕਉਸਲਚਿਤ੍ਤੁਪ੍ਪਾਦਰੂਪਕ੍ਖਨ੍ਧਾਨਮੇਤਂ ਅਧਿਵਚਨਂ. ਅਵਸਿਟ੍ਠੇਸੁ ਕੁਸਲਾਬ੍ਯਾਕਤਪਞ੍ਞਤ੍ਤੀਸੁ ‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’ਨ੍ਤਿ ਵਚਨਤੋ ਪਞ੍ਞਤ੍ਤਿਤਾਵ ਪਟਿਸਿਦ੍ਧਾ ਕੁਸਲਤ੍ਤਿਕੇ ਅਪਰਿਯਾਪਨ੍ਨਤ੍ਤਾ. ਕੁਸਲਪਟਿਸੇਧੇਨੇਵ ਤੇਨ ਸਮਾਨਗਤਿਕਤ੍ਤਾ ਕਿਰਿਯਾਬ੍ਯਾਕਤਾਨਮ੍ਪਿ ਪਟਿਸੇਧੋ ਵੇਦਿਤਬ੍ਬੋ, ਕਿਰਿਯਾਬ੍ਯਾਕਤਾਨਂ ਵਿਯ ਅਨੁਗਮਨਤੋ ਵਿਪਾਕਾਬ੍ਯਾਕਤਾਨਮ੍ਪਿ ਪਟਿਸੇਧੋ ਕਤੋਵ ਹੋਤਿ, ਤਥਾਪਿ ਅਬ੍ਯਾਕਤਸਾਮਞ੍ਞਤੋ ਰੂਪਕ੍ਖਨ੍ਧੇਨ ਸਦ੍ਧਿਂ ਵਿਪਾਕਕਿਰਿਯਾਬ੍ਯਾਕਤਾਨਮ੍ਪਿ ਅਧਿਵਚਨਨ੍ਤਿ ਵੇਦਿਤਬ੍ਬ’’ਨ੍ਤਿ ਵੁਤ੍ਤਂ. ਤਤ੍ਥ ‘‘ਕੁਸਲਚਿਤ੍ਤਂ ਅਙ੍ਗਂ ਹੋਤੀ’’ਤਿ ਵਿਨਯੇ ਅਪਕਤਞ੍ਞੁਨੋ ਸਨ੍ਧਾਯ ਵੁਤ੍ਤਂ ਅਪ੍ਪਹਰਿਤਕਰਣਾਦਿਕੇ ਸਤਿ. ਤਸ੍ਮਾਤਿ ਯਸ੍ਮਾ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਤ੍ਤੁਂ ਨ ਸਕ੍ਕਾ, ਤਸ੍ਮਾ ਕੁਸਲਚਿਤ੍ਤਂ ਅਙ੍ਗਂ ਨ ਹੋਤੀਤਿ ਅਤ੍ਥੋ. ਯਦਿ ਏਵਂ ਕਸ੍ਮਾ ‘‘ਤਿਚਿਤ੍ਤਂ ਤਿਵੇਦਨ’’ਨ੍ਤਿ ਵੁਚ੍ਚਤੀਤਿ ਚੇ? ਤਂ ਦਸ੍ਸੇਤੁਂ ‘‘ਨਯਿਦ’’ਨ੍ਤਿਆਦਿ ਆਰਦ੍ਧਨ੍ਤਿ ਏਕੇ. ਆਪਤ੍ਤਿਸਮੁਟ੍ਠਾਪਕਚਿਤ੍ਤਂ ਅਙ੍ਗਪ੍ਪਹੋਨਕਚਿਤ੍ਤਂ ਨਾਮ. ‘‘ਏਕਨ੍ਤਤੋਤਿ ਯੇਭੁਯ੍ਯੇਨਾਤਿ ਅਤ੍ਥੋ, ਇਤਰਥਾ ਵਿਰੁਜ੍ਝਤਿ. ਕਸ੍ਮਾ? ‘ਯਸ੍ਸਾ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤੀ’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਵੁਤ੍ਤਤ੍ਤਾ’’ਤਿ ਵਦਨ੍ਤਿ. ਤੇਨ ਕਿਂ? ਵਿਪਾਕੋ ਨਤ੍ਥਿ, ਕਸ੍ਮਾ? ਏਕਨ੍ਤਾਕੁਸਲਤ੍ਤਾ, ਤਸ੍ਮਾ ਕਥਾਵ ਤਤ੍ਥ ਨਤ੍ਥਿ. ਯਤ੍ਥ ਪਨ ਅਤ੍ਥਿ, ਤਂ ਦਸ੍ਸੇਨ੍ਤੋ ‘‘ਯਂ ਪਨ ਪਣ੍ਣਤ੍ਤਿਵਜ੍ਜ’’ਨ੍ਤਿਆਦਿਮਾਹ. ਅਸਞ੍ਚਿਚ੍ਚ ਪਨ ਕਿਞ੍ਚਿ ਅਜਾਨਨ੍ਤਸ੍ਸ…ਪੇ… ਅਬ੍ਯਾਕਤਂ ਹੋਤੀਤਿ ਭਿਕ੍ਖੁਮ੍ਹਿ ਕਮ੍ਮਟ੍ਠਾਨਗਤਚਿਤ੍ਤੇਨ ਨਿਪਨ੍ਨੇ, ਨਿਦ੍ਦਾਯਨ੍ਤੇ ਵਾ ਮਾਤੁਗਾਮੋ ਚੇ ਸੇਯ੍ਯਂ ਕਪ੍ਪੇਤਿ, ਤਸ੍ਸ ਭਿਕ੍ਖੁਨੋ ਵਿਜ੍ਜਮਾਨਮ੍ਪਿ ਕੁਸਲਚਿਤ੍ਤਂ ਆਪਤ੍ਤਿਯਾ ਅਙ੍ਗਂ ਨ ਹੋਤਿ, ਤਸ੍ਮਾ ਤਸ੍ਮਿਂ ਖਣੇ ਸੇਯ੍ਯਾਕਾਰੇਨ ਵਤ੍ਤਮਾਨਰੂਪਮੇਵ ਆਪਤ੍ਤਾਧਿਕਰਣਂ ਨਾਮ. ਭਵਙ੍ਗਚਿਤ੍ਤੇ ਵਿਜ੍ਜਮਾਨੇਪਿ ਏਸੇਵ ਨਯੋ. ਤਸ੍ਮਿਞ੍ਹਿ ਖਣੇ ਉਟ੍ਠਾਤਬ੍ਬੇ ਜਾਤੇ ਅਨੁਟ੍ਠਾਨਤੋ ਰੂਪਕ੍ਖਨ੍ਧੋਵ ਆਪਤ੍ਤਿ ਨਾਮ, ਨ ਵਿਪਾਕੇਨ ਸਦ੍ਧਿਂ. ਸਚੇ ਪਨ ਵਦੇਯ੍ਯ, ਤਸ੍ਸ ਏਵਂਵਾਦਿਨੋ ਅਚਿਤ੍ਤਕਾਨਂ ਕੁਸਲਚਿਤ੍ਤਂ ਆਪਜ੍ਜੇਯ੍ਯ. ਕਿਂ ਵੁਤ੍ਤਂ ਹੋਤਿ? ਏਲ਼ਕਲੋਮਂ ਗਹੇਤ੍ਵਾ ਕਮ੍ਮਟ੍ਠਾਨਮਨਸਿਕਾਰੇਨ ਤਿਯੋਜਨਂ ਅਤਿਕ੍ਕਮਨ੍ਤਸ੍ਸ, ਪਣ੍ਣਤ੍ਤਿਂ ਅਜਾਨਿਤ੍ਵਾ ਪਦਸੋ ਧਮ੍ਮਂ ਵਾਚੇਨ੍ਤਸ੍ਸ ਚ ਆਪਜ੍ਜਿਤਬ੍ਬਾਪਤ੍ਤਿਯਾ ਕੁਸਲਚਿਤ੍ਤਂ ਆਪਜ੍ਜੇਯ੍ਯਾਤਿ. ਆਪਜ੍ਜਤਿਯੇਵਾਤਿ ਚੇ? ਨਾਪਜ੍ਜਤਿ. ਕਸ੍ਮਾ? ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਚਨਤੋ.

ਚਲਿਤੋ ਕਾਯੋ, ਪਵਤ੍ਤਾ ਵਾਚਾ, ਅਞ੍ਞਤਰਮੇਵ ਅਙ੍ਗਨ੍ਤਿ ਅਞ੍ਞਤਰਮੇਵ ਆਪਤ੍ਤੀਤਿ ਅਤ੍ਥੋ. ਕੇਵਲਂ ਪਞ੍ਞਤ੍ਤਿਯਾ ਅਕੁਸਲਾਦਿਭਾਵਾਸਮ੍ਭਵਤੋ ਆਪਤ੍ਤਿਤਾ ਨ ਯੁਜ੍ਜਤਿ. ਆਪਤ੍ਤਿਂ ਆਪਜ੍ਜਨ੍ਤੋ ਤੀਸੁ ਅਞ੍ਞਤਰਸਮਙ੍ਗੀ ਹੁਤ੍ਵਾ ਆਪਜ੍ਜਤੀਤਿ ਦਸ੍ਸਨਤ੍ਥਂ ‘‘ਯਂ ਕੁਸਲਚਿਤ੍ਤੋ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਪਥਵੀਖਣਨਾਦੀਸੁ ਕੁਸਲਚਿਤ੍ਤਕ੍ਖਣੇ ਵੀਤਿਕ੍ਕਮਵਸੇਨ ਪਵਤ੍ਤਰੂਪਸਮ੍ਭਵਤੋ ਕੁਸਲਚਿਤ੍ਤੋ ਵਾ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤਿ. ਤਥਾ ਅਬ੍ਯਾਕਤਚਿਤ੍ਤੋ ਵਾ ਅਬ੍ਯਾਕਤਰੂਪਸਙ੍ਖਾਤਂ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤਿ, ਪਾਣਾਤਿਪਾਤਾਦੀਸੁ ਅਕੁਸਲਚਿਤ੍ਤੋ ਵਾ ਅਕੁਸਲਾਪਤ੍ਤਿਂ ਆਪਜ੍ਜਤਿ, ਰੂਪਂ ਪਨੇਤ੍ਥ ਅਬ੍ਬੋਹਾਰਿਕਂ. ਸੁਪਿਨਪਸ੍ਸਨਕਾਲਾਦੀਸੁ ਪਾਣਾਤਿਪਾਤਾਦਿਂ ਕਰੋਨ੍ਤੋ ਸਹਸੇਯ੍ਯਾਦਿਵਸੇਨ ਆਪਜ੍ਜਿਤਬ੍ਬਾਪਤ੍ਤਿਂ ਆਪਜ੍ਜਨ੍ਤੋ ਅਕੁਸਲਚਿਤ੍ਤੋ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤੀਤਿ ਵੇਦਿਤਬ੍ਬੋ. ਇਦਂ ਵੁਚ੍ਚਤਿ ਆਪਤ੍ਤਾਧਿਕਰਣਂ ਅਕੁਸਲਨ੍ਤਿ ਅਕੁਸਲਚਿਤ੍ਤੁਪ੍ਪਾਦੋ. ਪੋਰਾਣਗਣ੍ਠਿਪਦੇਸੁ ਪਨ ‘‘ਪੁਥੁਜ੍ਜਨੋ ਕਲ੍ਯਾਣਪੁਥੁਜ੍ਜਨੋ ਸੇਕ੍ਖੋ ਅਰਹਾਤਿ ਚਤ੍ਤਾਰੋ ਪੁਗ੍ਗਲੇ ਦਸ੍ਸੇਤ੍ਵਾ ਤੇਸੁ ਅਰਹਤੋ ਆਪਤ੍ਤਾਧਿਕਰਣਂ ਅਬ੍ਯਾਕਤਮੇਵ, ਤਥਾ ਸੇਕ੍ਖਾਨਂ, ਤਥਾ ਕਲ੍ਯਾਣਪੁਥੁਜ੍ਜਨਸ੍ਸ ਅਸਞ੍ਚਿਚ੍ਚ ਵੀਤਿਕ੍ਕਮਕਾਲੇ ਅਬ੍ਯਾਕਤਮੇਵ. ਇਤਰਸ੍ਸ ਅਕੁਸਲਮ੍ਪਿ ਹੋਤਿ ਅਬ੍ਯਾਕਤਮ੍ਪਿ. ਯਸ੍ਮਾ ਚਸ੍ਸ ਸਞ੍ਚਿਚ੍ਚ ਵੀਤਿਕ੍ਕਮਕਾਲੇ ਅਕੁਸਲਮੇਵ ਹੋਤਿ, ਤਸ੍ਮਾ ਵੁਤ੍ਤਂ ‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’ਨ੍ਤਿ. ਸਬ੍ਬਤ੍ਥ ਅਬ੍ਯਾਕਤਂ ਨਾਮ ਤਸ੍ਸ ਵਿਪਾਕਾਭਾਵਮਤ੍ਤਂ ਸਨ੍ਧਾਯ ਏਵਂਨਾਮਕਂ ਜਾਤ’’ਨ੍ਤਿ ਲਿਖਿਤਂ, ਵਿਚਾਰੇਤ੍ਵਾ ਗਹੇਤਬ੍ਬਂ.

੨੨੪. ਵਿਵਾਦੋ ਵਿਵਾਦਾਧਿਕਰਣਨ੍ਤਿ ਯੋ ਕੋਚਿ ਵਿਵਾਦੋ, ਸੋ ਸਬ੍ਬੋ ਕਿਂ ਵਿਵਾਦਾਧਿਕਰਣਂ ਨਾਮ ਹੋਤੀਤਿ ਏਕਪੁਚ੍ਛਾ. ‘‘ਵਿਵਾਦੋ ਅਧਿਕਰਣਨ੍ਤਿ ਵਿਵਾਦਾਧਿਕਰਣਮੇਵ ਵਿਵਾਦੋ ਚ ਅਧਿਕਰਣਞ੍ਚਾਤਿ ਪੁਚ੍ਛਤਿ. ਤਦੁਭਯਂ ਵਿਵਾਦਾਧਿਕਰਣਮੇਵਾਤਿ ਪੁਚ੍ਛਤੀਤਿ ਵੁਤ੍ਤਂ ਹੋਤੀ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ. ਕੇਸੁਚਿ ਪੋਤ੍ਥਕੇਸੁ ਅਯਂ ਪੁਚ੍ਛਾ ਨਤ੍ਥਿ. ਯਦਿ ਏਵਂ ਇਮਾਯ ਨ ਭਵਿਤਬ੍ਬਂ ਵਿਵਾਦੋ ਵਿਵਾਦਾਧਿਕਰਣਂ, ਵਿਵਾਦਾਧਿਕਰਣਂ ਵਿਵਾਦੋ, ਵਿਵਾਦਾਧਿਕਰਣਂ ਵਿਵਾਦੋ ਚੇਵ ਅਧਿਕਰਣਞ੍ਚਾਤਿ ਪਞ੍ਚਪਞ੍ਹਾਹਿ ਭਵਿਤਬ੍ਬਂ ਸਿਯਾ. ਕੇਸੁਚਿ ਪੋਤ੍ਥਕੇਸੁ ਤਿਸ੍ਸੋ, ਕੇਸੁਚਿ ਚਤਸ੍ਸੋ, ਪਞ੍ਚ ਨਤ੍ਥਿ. ਤਤ੍ਥ ਦ੍ਵੇ ਵਿਭਤ੍ਤਾ. ਇਤਰਾਸੁ ਅਧਿਕਰਣਂ ਵਿਵਾਦੋਤਿ ਯਂ ਕਿਞ੍ਚਿ ਅਧਿਕਰਣਂ, ਵਿਵਾਦਸਙ੍ਖ੍ਯਮੇਵ ਗਚ੍ਛਤਿ, ਵਿਵਾਦੋ ਅਧਿਕਰਣਨ੍ਤਿ ਯੋ ਕੋਚਿ ਵਿਵਾਦੋ, ਸੋ ਸਬ੍ਬੋ ਅਧਿਕਰਣਸਙ੍ਖ੍ਯਂ ਗਚ੍ਛਤੀਤਿ ਪੁਚ੍ਛਤਿ. ਏਸ ਨਯੋ ਸਬ੍ਬਤ੍ਥ.

੨੨੮. ਸਮ੍ਮੁਖਾਵਿਨਯਸ੍ਮਿਨ੍ਤਿ ਸਮ੍ਮੁਖਾਵਿਨਯਭਾਵੇ.

੨੩੦. ‘‘ਅਨ੍ਤਰੇਨਾਤਿ ਕਾਰਣੇਨਾ’’ਤਿ ਲਿਖਿਤਂ.

੨੩੩. ਉਬ੍ਬਾਹਿਕਾਯ ਖਿਯ੍ਯਨਕੇ ਪਾਚਿਤ੍ਤਿ ਨ ਵੁਤ੍ਤਾ ਤਤ੍ਥ ਛਨ੍ਦਦਾਨਸ੍ਸ ਨਤ੍ਥਿਤਾਯ.

੨੩੬. ਤਸ੍ਸ ਖੋ ਏਤਨ੍ਤਿ ਏਸੋਤਿ ਅਤ੍ਥੋ ‘‘ਏਤਦਗ੍ਗ’’ਨ੍ਤਿ ਏਤ੍ਥ ਵਿਯ.

੨੩੮. ‘‘ਕਾ ਚ ਤਸ੍ਸ ਪਾਪਿਯਸਿਕਾ’’ਤਿ ਕਿਰ ਪਾਠੋ.

੨੪੨. ‘‘ਕਿਚ੍ਚਮੇਵ ਕਿਚ੍ਚਾਧਿਕਰਣ’’ਨ੍ਤਿ ਵਚਨਤੋ ਅਪਲੋਕਨਕਮ੍ਮਾਦੀਨਮੇਤਂ ਅਧਿਵਚਨਂ, ਤਂ ਵਿਵਾਦਾਧਿਕਰਣਾਦੀਨਿ ਵਿਯ ਸਮਥੇਹਿ ਸਮੇਤਬ੍ਬਂ ਨ ਹੋਤਿ, ਕਿਨ੍ਤੁ ਸਮ੍ਮੁਖਾਵਿਨਯੇਨ ਸਮ੍ਪਜ੍ਜਤੀਤਿ ਅਤ੍ਥੋ.

ਸਮਥਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.