੮. ਚੀਵਰਕ੍ਖਨ੍ਧਕਵਣ੍ਣਨਾ

ਜੀਵਕਵਤ੍ਥੁਕਥਾਵਣ੍ਣਨਾ

੩੨੬. ਰਾਜਗਹਕੋਤਿ ਰਾਜਗਹਵਾਸੀ.

੩੨੮. ਅਮੋਹਜਾਤਿਕਤ੍ਤਾ ਨ ਚਿਰਸ੍ਸੇਵ ਵਿਞ੍ਞੁਤਂ ਪਾਪੁਣਿ. ਅਹਂ ਤੇ ਪਿਤਾ, ਕੇਨਟ੍ਠੇਨ? ਯਸ੍ਮਾ ਤ੍ਵਂ ਮਯਾ ਪੋਸਾਪਿਤੋ.

੩੨੯. ‘‘ਸਕ੍ਕੇ ਵਿਸ੍ਸਟ੍ਠਮਤ੍ਤੇ’’ਤਿ ਪਾਠੋ, ਅਟ੍ਠਮਸਿਕ੍ਖਾਪਦੇ ਵਿਸ੍ਸਟ੍ਠਮਤ੍ਤੋਵ.

ਪਜ੍ਜੋਤਰਾਜਵਤ੍ਥੁਕਥਾਵਣ੍ਣਨਾ

੩੩੪. ਭੁਞ੍ਜਿਤੁਂ ਨਿਸਿਨ੍ਨਸ੍ਸਾਤਿ ਏਤ੍ਥ ‘‘ਧਮ੍ਮਪਦੇ ‘ਬਹਿਨਗਰੇ ਦਿਸ੍ਵਾ’ਤਿ ਵੁਤ੍ਤਂ, ਤਸ੍ਮਾ ਦ੍ਵੀਸੁ ਦਿਵਸੇਸੁ ਦਿਨ੍ਨਂ ਤੇਨ ਤੇਸੁ ਏਕੇਕਂ ਗਹੇਤ੍ਵਾ ਦ੍ਵੀਸੁ ਅਟ੍ਠਕਥਾਸੁ ਵੁਤ੍ਤਨ੍ਤਿ ਯੁਜ੍ਜਤੀ’’ਤਿ ਵਦਨ੍ਤਿ.

ਸਮਤ੍ਤਿਂਸਵਿਰੇਚਨਕਥਾਵਣ੍ਣਨਾ

੩੩੬. ਕਬਲ਼ੇ ਕਬਲ਼ੇਤਿ ਏਤ੍ਥ ਕਿਞ੍ਚਾਪਿ ਗੁਲ਼ਾਦੀਸੁ ਪਕ੍ਖਿਤ੍ਤਂ, ਤਂ ਪਨ ਭਗਵਾਵ ਪਰਿਭੁਞ੍ਜਿ, ਤਸ੍ਮਾ ਨਤ੍ਥਿ ਦੋਸੋ.

ਵਰਯਾਚਨਕਥਾਵਣ੍ਣਨਾ

੩੩੭. ਮਹਾਪਿਟ੍ਠਿਯਕੋਜਵਂ ਨਾਮ ਅਤਿਰੇਕਚਤੁਰਙ੍ਗੁਲਪੁਪ੍ਫਂ ਕਿਰ.

ਕਮ੍ਬਲਾਨੁਜਾਨਨਾਦਿਕਥਾਵਣ੍ਣਨਾ

੩੪੦. ਉਪਚਾਰੇਤਿ ਸੁਸਾਨਸ੍ਸ ਉਪਚਾਰੇ. ਬਹਿਪਿ ਵਟ੍ਟਤੀਤਿ ਏਕੇ. ਕਤਿਕਕਰਣਂ ਦਸ੍ਸੇਤ੍ਵਾ ‘‘ਮਯ੍ਹਂ ਸਨ੍ਤਕਂ ਤਵ ਚ ਮਮ ਚ ਹੋਤੂਤਿ ਵਤ੍ਵਾ ਇਤਰੇਨ ਚ ਤਥਾਵੁਤ੍ਤੇ ਵਟ੍ਟਤੀ’’ਤਿ ਸਮਾਨਪਰਿਕ੍ਖਾਰਵਿਧਿਂ ਵਦਨ੍ਤਿ.

੩੪੨. ‘‘ਖਣ੍ਡਸੀਮਾਯਪਿ ਸਮ੍ਮਨ੍ਨਿਤੁਂ ਵਟ੍ਟਤੀਤਿ ਵੁਤ੍ਤਤ੍ਤਾ ਸੇਸਕਮ੍ਮਾਨਿਪਿ ਤਤ੍ਥ ਨਿਸੀਦਿਤ੍ਵਾ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤਂ. ‘‘ਏਵਂ ਸਨ੍ਤੇ ਚੋਰਿਕਾਯ ਕਤਸਦਿਸਂ ਹੋਤਿ, ਤਸ੍ਮਾ ਨ ਵਟ੍ਟਤੀ’’ਤਿ ਦੀਪਵਾਸਿਨੋ ਵਦਨ੍ਤਿ ਕਿਰ. ‘‘ਚੋਰਿਕਾਯ ਗਹਿਤਤ੍ਤਾ ਨ ਪਾਪੁਣਾਤੀਤਿ ਸੇਨਾਸਨਕ੍ਖਨ੍ਧਕੇ ਆਗਤਸੁਤ੍ਤਞ੍ਚ ਸਾਧਕ’’ਨ੍ਤਿ ਵਦਨ੍ਤਿ, ਤਸ੍ਮਾ ਤੇਸਂ ਮਤੇਨ ਇਦਂ ਆਵੇਣਿਕਲਕ੍ਖਣਨ੍ਤਿ ਵੇਦਿਤਬ੍ਬਂ.

ਭਣ੍ਡਾਗਾਰਸਮ੍ਮੁਤਿਆਦਿਕਥਾਵਣ੍ਣਨਾ

੩੪੩. ‘‘ਇਦਂ ਪਨ ਭਣ੍ਡਾਗਾਰਨ੍ਤਿ ਆਵੇਣਿਕਲਕ੍ਖਣ’’ਨ੍ਤਿ ਵੁਤ੍ਤਂ.

ਚੀਵਰਰਜਨਕਥਾਵਣ੍ਣਨਾ

੩੪੪. ਗੋਮਯੇ ਆਪਤ੍ਤਿ ਨਤ੍ਥਿ, ਵਿਰੂਪਤ੍ਤਾਵਾਰਿਤਂ. ‘‘ਕੁਙ੍ਕੁਮਪੁਪ੍ਫਂ ਨ ਵਟ੍ਟਤੀ’’ਤਿ ਵਦਨ੍ਤਿ. ‘‘ਅਲ੍ਲਿਕਾਯਾ’’ਤਿਪਿ ਪਾਠੋ ਅਤ੍ਥਿ.

ਨਿਸੀਦਨਾਦਿਅਨੁਜਾਨਨਕਥਾਵਣ੍ਣਨਾ

੩੫੩. ਅਟ੍ਠਾਨਮੇਤਨ੍ਤਿ ਏਤ੍ਥ ਰੂਪਕਣ੍ਡੇ ‘‘ਚਤੁਸਮੁਟ੍ਠਾਨਿਕ’’ਨ੍ਤਿ ਵੁਤ੍ਤਤ੍ਤਾ ਕਮ੍ਮਸਮੁਟ੍ਠਾਨਂ ਰਾਗਚਿਤ੍ਤਾਭਾਵਾ ਨ ਮੁਚ੍ਚਤੀਤਿ ਵਾ ਰਾਗਪਚ੍ਚਯੇ ਸਤਿ ਕਮ੍ਮਸਮੁਟ੍ਠਾਨਂ ਹੋਤੀਤਿ ਵਾ ਵਿਚਾਰੇਤ੍ਵਾ ਗਹੇਤਬ੍ਬਂ ਕਥਾਵਤ੍ਥੁਨਾ ਚ.

੩੬੨. ਅਗ੍ਗਲ਼ਗੁਤ੍ਤਿਯੇਵ ਪਮਾਣਨ੍ਤਿ ਇਮੇਹਿ ਚਤੂਹਿ ਨਿਕ੍ਖੇਪਕਾਰਣੇਹਿ ਠਪੇਨ੍ਤੇਨ ਅਗ੍ਗਲ਼ਗੁਤ੍ਤਿਵਿਹਾਰੇਯੇਵ ਠਪੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ.

ਸਙ੍ਘਿਕਚੀਵਰੁਪ੍ਪਾਦਕਥਾਵਣ੍ਣਨਾ

੩੬੩. ਨੋ ਚੇ ਅਤ੍ਥਤਂ ਹੋਤਿ ‘‘ਏਕਂ ਚੀਵਰਮਾਸ’’ਨ੍ਤਿ ਨ ਵਤ੍ਤਬ੍ਬਂ. ਕਸ੍ਮਾ? ‘‘ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸੇਵ ਤਾਨਿ ਚੀਵਰਾਨਿ ਯਾਵ ਚੀਵਰਮਾਸਾ’’ਤਿ ਵਚਨਸ੍ਸ ਅਭਾਵਤੋ, ਤਸ੍ਮਾ ਅਨਤ੍ਥਤਕਥਿਨਸ੍ਸ ਅਨਨੁਞ੍ਞਾਤਨ੍ਤਿ ਚੇ? ਨ, ਹੇਟ੍ਠਾ ਅਨੁਞ੍ਞਾਤਤ੍ਤਾ, ਤਤੋ ਲੀਨਤ੍ਥਦੀਪਨਤ੍ਥਮਿਧ ਤਥਾ ਵੁਤ੍ਤਤ੍ਤਾ ਚ. ਹੇਟ੍ਠਾ ਹਿ ‘‘ਅਕਾਲਚੀਵਰਂ ਨਾਮ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰਂ ਨਾਮਾ’’ਤਿ (ਪਾਰਾ. ੫੦੦) ਵਚਨਤੋ ਅਨਤ੍ਥਤਕਥਿਨਾਨਂ ਏਕਚੀਵਰਮਾਸੇ ਉਪ੍ਪਨ੍ਨਂ, ਤੇਸਂਯੇਵ ਹੋਤੀਤਿ ਸਿਦ੍ਧਂ, ਤਸ੍ਮਾ ਇਧ ਤਂ ਅਵਤ੍ਵਾ ਏਕੋਪਿ ਤਯੋ ਗਣਪੂਰਕੇ ਲਭਿਤ੍ਵਾ ਕਥਿਨਂ ਅਤ੍ਥਰਿਤੁਂ ਲਭਤੀਤਿ ਇਮਂ ਲੀਨਤ੍ਥਂ ਪਕਾਸੇਤੁਂ ‘‘ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ ਵੁਤ੍ਤਂ. ਇਤਰਥਾ ਅਯਮਤ੍ਥੋ ਨ ਞਾਯਤਿ. ‘‘ਜਾਨਿਤਬ੍ਬੋ ਚ ਵਿਨਯਧਰੇਹੀਤਿ ਤਥਾ ਵੁਤ੍ਤੋਤਿ ਅਪਰੇ’’ਤਿ ਵੁਤ੍ਤਂ. ਅਤ੍ਥਤਂ ਹੋਤਿ, ਪਞ੍ਚ ਮਾਸੇ ਸਬ੍ਬਂ ਤਸ੍ਸੇਵ ਭਿਕ੍ਖੁਨੋ ਹੋਤੀਤਿ ਸਮ੍ਬਨ੍ਧੋ. ਅਚ੍ਚਨ੍ਤਸਂਯੋਗਵਸੇਨ ਉਪਯੋਗਵਚਨਂ. ‘‘ਇਧ ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਨਿਯਮਿਤਤ੍ਤਾ ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਏਤ੍ਥ ਚ ‘‘ਇਧਾ’’ਤਿ ਅਧਿਕਾਰਤ੍ਤਾ ਤਸ੍ਮਿਂ ਵੁਤ੍ਤੇ ਲਭਤਿ. ‘‘ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾਤਿ ਚੀਵਰਕਾਲਸ੍ਸਾਸਨ੍ਨਤ੍ਤਾ ਚ ਅਨਤ੍ਥਤਕਥਿਨਾਨਮ੍ਪਿ ਵੁਤ੍ਥਵਸ੍ਸਾਨਞ੍ਚ ਅਨੁਞ੍ਞਾਤਟ੍ਠਾਨਤ੍ਤਾ ਏਵ ਵੁਤ੍ਤ’’ਨ੍ਤਿ ਅਞ੍ਞਤਰਸ੍ਮਿਂ ਗਣ੍ਠਿਪਦੇ ਲਿਖਿਤਂ. ਕੇਚਿ ਪਨ ‘‘ਯਂ ਪਨ ਇਦਂ ‘ਇਧ ਵਸ੍ਸਂਵੁਤ੍ਥਸਙ੍ਘਸ੍ਸਾ’ਤਿਆਦਿਂ ਕਤ੍ਵਾ ਯਾਵ ‘ਅਨਾਗਤਵਸ੍ਸੇ’ਤਿ ਪਦਂ, ਤਾਵ ਪੁਚ੍ਛਿਤ੍ਵਾ ‘ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’ਤਿ ਇਦਂ ਪਰਤੋ ‘ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤੀ’ਤਿ ਇਮਸ੍ਸ ਪਰਿਯੋਸਾਨੇ ‘ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’ਤਿ ਲਿਖਿਤਬ੍ਬਂ. ਕਸ੍ਮਾਤਿ ਚੇ? ਪਰਤੋ ‘ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸਾ’ਤਿ ਵੁਤ੍ਤੇਨ ਨਿਬ੍ਬਿਸੇਸਤ੍ਤਾ, ਤਸ੍ਮਾ ਏਵ ਏਕਚ੍ਚੇਸੁ ਪਣ੍ਡਿਤਨ੍ਤਿ ਵਦਨ੍ਤੀ’’ਤਿ ਵਦਨ੍ਤਿ. ਇਧ ਪਨ ਇਧ-ਸਦ੍ਦੇਨ ਵਿਸੇਸਿਤਂ, ਤਤ੍ਥ ਨਤ੍ਥਿ, ਤਸ੍ਮਾ ਅਞ੍ਞਮਞ੍ਞਵਿਰੋਧੋ ਨਤ੍ਥੀਤਿ ਗਹੇਤਬ੍ਬਂ. ‘‘ਮਯ੍ਹਿਮਾਨਿ ਚੀਵਰਾਨਿ ਪਾਪੁਣਨ੍ਤੀ’’ਤਿ ਵਚਨਮੇਵਾਧਿਟ੍ਠਾਨਂ, ਇਦਮੇਤ੍ਥ ਉਕ੍ਕਟ੍ਠਵਸੇਨ ਵੁਤ੍ਤਂ. ‘‘ਮਯ੍ਹਿਮਾਨਿ ਚੀਵਰਾਨੀ’ਤਿ ਵੁਤ੍ਤੇਪਿ ਅਧਿਟ੍ਠਿਤਮੇਵ ਹੋਤੀ’’ਤਿ ਵੁਤ੍ਤਂ. ‘‘ਮਯ੍ਹਿਮਾਨੀ’ਤਿ ਵੁਤ੍ਤੇ ਤਸ੍ਸ ਚੀਵਰਾਨਿ ਨਾਮ ਨਤ੍ਥਿ, ਤਸ੍ਮਾ ‘ਚੀਵਰਾਨਿ ਪਾਪੁਣਨ੍ਤੀ’ਤਿ ਵਤ੍ਤਬ੍ਬਮੇਵਾ’’ਤਿ ਵਦਨ੍ਤਿ. ਦੁਗ੍ਗਹਿਤਾਨੀਤਿ ਸਙ੍ਘਿਕਾਨੇਵ ਹੋਨ੍ਤਿ. ‘‘ਗਹਿਤਮੇਵ ਨਾਮਾ’ਤਿ ਇਮਸ੍ਸ ਇਦਂ ਪਤ੍ਤਨ੍ਤਿ ਕਿਞ੍ਚਾਪਿ ਨ ਵਿਦਿਤਂ, ਤੇ ਪਨ ਭਾਗਾ ਤੇਸਂ ਅਤ੍ਥਤੋ ਪਤ੍ਤਾਯੇਵਾਤਿ ਅਧਿਪ੍ਪਾਯੋ’’ਤਿ ਲਿਖਿਤਂ. ‘‘ਏਕਸ੍ਮਿਂ ਅਪਤਿਤੇ ਪੁਨ ਆਗਤਾ ਲਭਨ੍ਤੀ’’ਤਿ ਵੁਤ੍ਤਂ.

ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾਵਣ੍ਣਨਾ

੩੬੪. ‘‘ਨ, ਭਿਕ੍ਖਵੇ, ਅਞ੍ਞਤ੍ਰ ਵਸ੍ਸਂਵੁਤ੍ਥੇਨਾ’’ਤਿ ਚੀਵਰਸਮਯਂ ਉਪਾਦਾਯ ਪਟਿਕ੍ਖੇਪੋ ਕਤੋ.ਏਕਸ੍ਮਿਂ ਵਿਹਾਰੇ ‘‘ਰਾਜਵਿਹਾਰੇ ਵਿਯ ਨਾਨਾਪਰਿਵੇਣੇਸੁ ਵਾ ਇਧ ਵਾ ਵੁਤ੍ਥਾ ਲਭਤੂ’’ਤਿ ਵਤ੍ਵਾ ਦਿਨ੍ਨਂ. ‘‘ਸਤ੍ਤਾਹਵਾਰੇਨ ਅਰੁਣਮੇਵ ਉਟ੍ਠਾਪੇਤੀਤਿ ਏਤਂ ਵਚਨਮਤ੍ਤਮੇਵ ਏਕਵਿਹਾਰੇ ਸਤ੍ਤਾਹਕਿਚ੍ਚਾਭਾਵਾ’’ਤਿ ਚ ਲਿਖਿਤਂ.

ਮਤਸਨ੍ਤਕਕਥਾਵਣ੍ਣਨਾ

੩੬੯. ਭਿਕ੍ਖੁਸ੍ਸਾਤਿ ਭਿਕ੍ਖੁਸ੍ਮਿਂ ਕਾਲਂਕਤੇ. ਤਤ੍ਥ ‘‘ਪਤ੍ਤਚੀਵਰੇ’’ਤਿ ਪਧਾਨਪਰਿਕ੍ਖਾਰਦਸ੍ਸਨਮੁਖੇਨ ਸਬ੍ਬਪਰਿਕ੍ਖਾਰਨਿਦਸ੍ਸਨਨ੍ਤਿ ਵੇਦਿਤਬ੍ਬਂ. ਅਧਮ੍ਮੇਨ ਉਪ੍ਪਨ੍ਨਞ੍ਚੇਤਂ ਹੋਤਿ, ਸਙ੍ਘਸ੍ਸ ਕਪ੍ਪਿਯਮੇਵ ਮਤਤ੍ਤਾਤਿ ਏਕੇ. ਨੋਤਿ ਤਕ੍ਕੋ ਪਤ੍ਤਚਤੁਕ੍ਕੇ ਸਬ੍ਬਥਾ ਅਕਪ੍ਪਿਯਪਤ੍ਤਨਯਵਿਰੋਧਤੋ. ਅਧਮ੍ਮੇਨ ਉਪ੍ਪਨ੍ਨਸੇਨਾਸਨੇ ਚ ਵਸਤੋ ਅਨਾਪਤ੍ਤਿ. ਅਞ੍ਞਤਰਸ੍ਮਿਂ ਆਵਾਸੇ ਦ੍ਵੇ ਭਿਕ੍ਖੂ ਵਸਨ੍ਤਿ, ਤਤ੍ਥ ਚੇਕੋ ਕਾਲਂਕਤੋ, ਇਤਰੋ ਤਸ੍ਸ ਪਰਿਕ੍ਖਾਰਂ ਅਪਾਪੇਤ੍ਵਾ ਤਂ ਥੇਯ੍ਯਚਿਤ੍ਤੇਨ ਗਣ੍ਹਾਤਿ, ਸਙ੍ਘਸਨ੍ਤਕਂ ਗਹਿਤਂ ਹੋਤਿ, ਭਣ੍ਡਗ੍ਘੇਨ ਕਾਰੇਤਬ੍ਬੋ. ਅਨਾਵਾਸੇ ਗਣ੍ਹਾਤਿ, ਨ ਕਾਰੇਤਬ੍ਬੋ ਅਸ੍ਸਾਮਿਕਸ੍ਸ ਗਹਿਤਤ੍ਤਾ. ਮਰਣਸਮਯੇ ਵਤ੍ਤੁਂ ਅਸਹਨ੍ਤੋ ਚੇ ਚਿਤ੍ਤੇਨੇਵ ਦੇਤਿ, ਪੁਞ੍ਞਂ ਪਸਵਤਿ, ਸਙ੍ਘੋਵ ਤਸ੍ਸ ਸਾਮੀ. ਪਰੋ ਵਾ ਅਵਿਸ੍ਸਾਸਿਕੋ ਸਯਮੇਵ ਗਣ੍ਹਾਤਿ, ਗਹਣਂ ਨ ਰੁਹਤਿ, ਥੇਯ੍ਯਚਿਤ੍ਤੇਨ ਚੇ, ਭਣ੍ਡਗ੍ਘੇਨ ਕਾਰੇਤਬ੍ਬੋ. ਤਸ੍ਸ ਚ ਆਵਾਸਗਤਸ੍ਸ ਕੋ ਸਾਮੀ. ‘‘ਸਙ੍ਘੋ ਸਾਮੀ’’ਤਿ ਵਚਨਤੋ ਸਙ੍ਘੇਨ ਬਲਕ੍ਕਾਰੇਨ ਸੋ ਵਾਰੇਤਬ੍ਬੋਤਿ ਏਕੇ. ਜੀਵਮਾਨਕਾਲੇ ਗਹਿਤਤ੍ਤਾ ਨ ਸਙ੍ਘੋ ਸਾਮੀਤਿ ਏਕੇ. ਸਾਮਿਕੋ ਚੇ ਸਯਂ ਪਸ੍ਸਿਤ੍ਵਾ ਅਚ੍ਛਿਨ੍ਦਿਤੁਂ ਲਭਤਿ, ਸਙ੍ਘੋਪਿ ਲਭਤਿ ਸਾਮਿਠਾਨੇ ਠਿਤਤ੍ਤਾਤਿ ਇਤਰੇ, ਵਿਚਾਰੇਤ੍ਵਾ ਗਹੇਤਬ੍ਬਂ.

ਮਤਕਸ੍ਸ ਹਿਰਞ੍ਞਾਦਿਅਕਪ੍ਪਿਯਭਣ੍ਡਂ ਹੋਤਿ. ਉਗ੍ਗਹਿਤਞ੍ਚੇਤਂ ਹੋਤਿ, ਉਗ੍ਗਹਿਤੇ ਵੁਤ੍ਤਨਯੇਨ ਪਟਿਪਜ੍ਜਿਤਬ੍ਬਂ. ਧਮ੍ਮੇਨ ਉਪ੍ਪਨ੍ਨਂ ਚੇ, ਕਪ੍ਪਿਯਕਾਰਕੋ ਆਚਿਕ੍ਖਿਤਬ੍ਬੋ. ਦਾਸੋ ਚੇ ਗਹਿਤੋ ਹੋਤਿ, ਨ ਸਙ੍ਘੋ ਸਾਮੀ, ਆਰਾਮਿਕੋ ਚੇ, ਸਙ੍ਘੋ ਸਾਮੀ. ਗਾਵੀਮਹਿਂਸੀਆਦਯੋ ਹੋਨ੍ਤਿ, ਆਵਾਸਗਤਾਨਂ ਸਙ੍ਘੋ ਸਾਮੀ, ਅਨਾਵਾਸਗਤਾਨਂ ਨ ਸਙ੍ਘੋ ਸਾਮੀ. ਸਙ੍ਘੋ ਚੇ ਆਵਾਸਂ ਆਨੇਤ੍ਵਾ ਅਤ੍ਤਨੋ ਸਨ੍ਤਕਂ ਕਤ੍ਵਾ ਪਚ੍ਛਾ ਸਮੀਪੇ ਬਹਿਸੀਮਾਯ ਠਪੇਤਿ, ਕਾਰਕਸਙ੍ਘੋ ਸਾਮੀ, ਤਥਾ ਆਰਾਮਿਕੇ. ਮਤਕਸ੍ਸ ਪਰਿਕ੍ਖਾਰੋ ਨਿਕ੍ਖੇਪਵਸੇਨ ਠਪਿਤੋ ਹੋਤਿ, ਏਸੋਵ ਸਾਮੀ. ਮਹਗ੍ਘੋ ਚੇ ਹੋਤਿ, ਸੇਸਸ੍ਸ ਸਙ੍ਘੋ ਸਾਮੀ. ‘‘ਕੇਨਚਿ ਗਿਲਾਨੁਪਟ੍ਠਾਕੇਨਾ’’ਤਿ ਵਤ੍ਤਬ੍ਬਕ੍ਕਮੋ ਏਤੇਨ ਦਸ੍ਸਿਤੋ. ਪੁਨ ਉਪਟ੍ਠਾਕਾਨਂ ਬਹੁਭਾਵੇ ਸਤਿ ਸਬ੍ਬੇਸਂ ਦਾਤਬ੍ਬਕਮ੍ਮਂ ਦਸ੍ਸੇਨ੍ਤੇਨ ਭਗਵਤਾ ਕਮ੍ਮਵਾਚਾਯਂ ‘‘ਗਿਲਾਨੁਪਟ੍ਠਾਕਾਨ’’ਨ੍ਤਿ ਵੁਤ੍ਤਂ. ਸਾਮਣੇਰਵਾਰੇ ‘‘ਚੀਵਰ’’ਨ੍ਤਿ ਪਾਠੋ. ‘‘ਇਮਂ ਤੁਯ੍ਹਂ ਦੇਮਿ ਦਦਾਮਿ ਦਜ੍ਜਾਮਿ ਓਣੋਜੇਮਿ ਪਰਿਚ੍ਚਜਾਮਿ ਵਿਸ੍ਸਜ੍ਜਾਮਿ ਨਿਸ੍ਸਜ੍ਜਾਮੀ’ਤਿ ਵਾ ‘ਇਤ੍ਥਨ੍ਨਾਮਸ੍ਸ ਦੇਮਿ…ਪੇ… ਨਿਸ੍ਸਜ੍ਜਾਮੀ’ਤਿ ਵਾ ਵਦਤਿ, ‘ਸਮ੍ਮੁਖਾ ਵਾ ਪਰਮ੍ਮੁਖਾ ਵਾ ਵੁਤ੍ਤੇ ਦਿਨ੍ਨਂਯੇਵ ਹੋਤੀ’ਤਿ ਦਾਨਲਕ੍ਖਣਸ੍ਸ ਚ ‘ਤੁਯ੍ਹਂ ਗਣ੍ਹਾਹੀ’ਤਿ ਵੁਤ੍ਤੇ ‘ਮਯ੍ਹਂ ਗਣ੍ਹਾਮੀ’ਤਿ ਵਦਤਿ, ‘ਸੁਦਿਨ੍ਨਂ ਸੁਗ੍ਗਹਿਤਞ੍ਚਾ’ਤਿ (ਪਾਰਾ. ਅਟ੍ਠ. ੨.੪੬੯) ਗਹਣਲਕ੍ਖਣਸ੍ਸ ਚ ਵੁਤ੍ਤਤ੍ਤਾ ‘ਮਮ ਸਨ੍ਤਕਂ ਤਵ ਚ ਮਮ ਚ ਹੋਤੂ’ਤਿ ਏਵਮਾਦਿਵਚਨੇਨ ਸਮਾਨਪਰਿਕ੍ਖਾਰਂ ਕਾਤੁਂ ਵਟ੍ਟਤੀਤਿ ਆਚਰਿਯਾ’’ਤਿ ਲਿਖਿਤਂ.

ਅਨੁਗਣ੍ਠਿਪਦੇ ਪਨ ਅਤੀਵ ਪਪਞ੍ਚਂ ਕਤ੍ਵਾ ਪੁਨ ‘‘ਇਦਮੇਤ੍ਥ ਆਚਰਿਯਾਨਂ ਸਨ੍ਨਿਟ੍ਠਾਨਂ – ਸਚੇਸਮ੍ਬਹੁਲਾ, ਦ੍ਵੇ ਵਾ ਸਮਾਨਪਰਿਕ੍ਖਾਰਂ ਕਤ੍ਤੁਕਾਮਾ ਹੋਨ੍ਤਿ, ਤੇ ਸਬ੍ਬੇ ਅਤ੍ਤਨੋ ਸਨ੍ਤਕਂ ਵਤ੍ਤਮਾਨਂ ਉਪ੍ਪਜ੍ਜਨਕੇਨ ਸਦ੍ਧਿਂ ਪੇਸਲਸ੍ਸ ਏਕਸ੍ਸ ਪਰਿਚ੍ਚਜਨ੍ਤਿ, ਸੋ ਪੁਨ ਤੇਸਮੇਵ ਪਰਿਚ੍ਚਜਤਿ, ਏਤ੍ਤਾਵਤਾ ਤੇ ਸਮਾਨਪਰਿਕ੍ਖਾਰਿਕਾ ਹੋਨ੍ਤੀਤਿ. ਇਦਂ ਸਮਾਨਪਰਿਕ੍ਖਾਰਲਕ੍ਖਣਂ ਪਾਲ਼ਿਆਦੀਸੁ ਵੁਤ੍ਤਲਕ੍ਖਣੇਯੇਵ ਪਤਨਤੋ ਅਚਲਪ੍ਪਤ੍ਤਂ ਹੋਤਿ, ਤਥਾਪਿ ਪੋਰਾਣਵਿਧਿਂ ਅਜ੍ਝੋਤ੍ਥਰਿਤ੍ਵਾ ਵਤ੍ਤਨਤੋ ਪਟਿਸੇਧੇਤਬ੍ਬੋ, ਆਚਰਿਯਾਨਂ ਮਤਾਨੁਸਾਰੇਨ ਕਾਤਬ੍ਬਂ ਕਾਤੁਕਾਮੇਨਾਤਿ ਅਪਰੇ’’ਤਿ ਵੁਤ੍ਤਂ, ‘‘ਵਸ੍ਸਂਵੁਤ੍ਥਸਾਮਣੇਰੋ ਪਞ੍ਚਸੁ ਸਿਕ੍ਖਾਪਦੇਸੁ ਏਕਂ ਅਤਿਕ੍ਕਮਿਤ੍ਵਾ ਪੁਨ ਗਹਿਤੋ ਲਾਭਂ ਨ ਲਭਤਿ, ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨੋ ਨਾਮ ਹੋਤੀ’’ਤਿ ਵਦਨ੍ਤਿ.

ਵਸ੍ਸਂਵੁਤ੍ਥਾਨਂਅਨੁਪ੍ਪਨ੍ਨਚੀਵਰਕਥਾਵਣ੍ਣਨਾ

੩੭੫. ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਪਕ੍ਕਮਤੀਤਿ ਏਤ੍ਥ ‘‘ਸਙ੍ਘੇਨ ਤਤ੍ਰੁਪ੍ਪਾਦਤੋ ਏਕੇਕਸ੍ਸ ਭਿਕ੍ਖੁਨੋ ਏਤ੍ਤਕਂ ਵਸ੍ਸਾਵਾਸਿਕਂ ਦਾਤੁਂ ਸਙ੍ਘਸ੍ਸ ਰੁਚ੍ਚਤੀ’’ਤਿ ਸਾਵਿਤੇਪਿ ਵਿਬ੍ਭਮਤਿ, ਤਤੋ ਨ ਲਭਤਿ, ਪੁਨ ਪਬ੍ਬਜਿਤ੍ਵਾ ਉਪਸਮ੍ਪਜ੍ਜਿਤ੍ਵਾ ਚੀਵਰਭਾਜਨਂ ਸਮ੍ਭਾਵੇਨ੍ਤੋਪਿ ਨ ਲਭਤਿਯੇਵ ਪੁਬ੍ਬਪਕਤਿਤੋ ਭਟ੍ਠਤ੍ਤਾ. ਅਥ ਪਾਪਿਤੇ ਵਿਬ੍ਭਮਤਿ, ਲਭਤੀ’’ਤਿ ਚ ਵੁਤ੍ਤਂ.

ਸਙ੍ਘੇਭਿਨ੍ਨੇਚੀਵਰੁਪ੍ਪਾਦਕਥਾਵਣ੍ਣਨਾ

੩੭੬. ਪਰਸਮੁਦ੍ਦੇਤਿ ਜਮ੍ਬੁਦੀਪੇ.

ਅਟ੍ਠਚੀਵਰਮਾਤਿਕਾਕਥਾਵਣ੍ਣਨਾ

੩੭੯. ਯਸ੍ਮਾ ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਂ ਦੁਬ੍ਬਿਜਾਨਂ, ਤਸ੍ਮਾ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਧੁਵਸਨ੍ਨਿਪਾਤਟ੍ਠਾਨਮ੍ਪਿ ਪਰਿਯਨ੍ਤਗਤਮੇਵ ਗਹੇਤਬ੍ਬਂ. ‘‘ਮਹਾਪਚ੍ਚਰਿਯਂ ਪਨ ਭਿਕ੍ਖੂਸੁਪਿ…ਪੇ… ਪਾਪੁਣਾਤੀਤਿ ‘ਉਪਚਾਰਸੀਮਾਯ ਦੇਮਾ’ਤਿ ਏਵਂ ਦਿਨ੍ਨਮੇਵ ਸਨ੍ਧਾਯਾ’’ਤਿ ਲਿਖਿਤਂ. ‘‘ਸਮਾਨਸਂਵਾਸਕਸੀਮਾਯਾ’’ਤਿ ਵੁਤ੍ਤੇ ਖਣ੍ਡਸੀਮਾਦੀਸੁ ਠਿਤਾਨਂ ਨ ਪਾਪੁਣਾਤਿ ਤਾਸਂ ਵਿਸੁਂ ਸਮਾਨਸਂਵਾਸਕਸੀਮਤ੍ਤਾ. ਸਮਾਨਸਂਵਾਸਕਅਵਿਪ੍ਪਵਾਸਸੀਮਾਨਂ ਇਦਂ ਨਾਨਤ੍ਤਂ – ‘‘ਅਵਿਪ੍ਪਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ ਗਾਮਟ੍ਠਾਨਂ ਨ ਪਾਪੁਣਾਤਿ. ਕਸ੍ਮਾ? ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿ ਵੁਤ੍ਤਤ੍ਤਾ. ‘‘ਸਮਾਨਸਂਵਾਸਕਸੀਮਾਯਾ’’ਤਿ ਦਿਨ੍ਨਂ ਪਨ ਯਸ੍ਮਿਂ ਠਾਨੇ ਅਵਿਪ੍ਪਵਾਸਸੀਮਾ ਅਤ੍ਥਿ, ਤਤ੍ਥ ਠਿਤਾਨਂ, ਇਤਰਤ੍ਰ ਠਿਤਾਨਞ੍ਚ ਪਾਪੁਣਾਤਿ. ‘‘ਖਣ੍ਡਸੀਮਾਯਂ ਠਤ੍ਵਾ ‘ਸੀਮਟ੍ਠਕਸਙ੍ਘਸ੍ਸ ਦਮ੍ਮੀ’ਤਿ ਵੁਤ੍ਤੇ ਉਪਚਾਰਸੀਮਾਯ ਏਵ ਪਰਿਚ੍ਛਿਨ੍ਦਿਤ੍ਵਾ ਦਾਤਬ੍ਬ’’ਨ੍ਤਿ ਵੁਤ੍ਤਂ. ‘‘ਅਵਿਪ੍ਪਵਾਸਸੀਮਾਯ ਦੇਮਾ’’ਤਿ ਖਣ੍ਡਸੀਮਾਯਂ ਠਤ੍ਵਾ ਦਿਨ੍ਨੇ ਤਤ੍ਥੇਵ ਪਾਪੁਣਾਤੀਤਿ ਕੇਚਿ. ਯੋਜਨਸਤਮ੍ਪਿ ਪੂਰੇਤ੍ਵਾ ਨਿਸੀਦਨ੍ਤੀਤਿ ਏਤ੍ਥ ਵਿਹਾਰੂਪਚਾਰੇ ਹਤ੍ਥਪਾਸੇਨ, ਬਹਿਗਾਮਾਦੀਸੁ ਦ੍ਵਾਦਸਹਤ੍ਥੇਨ ਉਪਚਾਰੋਤਿ ਏਕੇ. ‘‘ਇਮਸ੍ਮਿਂ ਵਿਹਾਰੇ ਸਙ੍ਘਸ੍ਸਾ’’ਤਿ ਵੁਤ੍ਤੇ ਏਕਾਬਦ੍ਧਾ ਹੁਤ੍ਵਾਪਿ ਪਰਿਕ੍ਖੇਪਪਰਿਕ੍ਖੇਪਾਰਹਟ੍ਠਾਨਂ ਅਤਿਕ੍ਕਮਿਤ੍ਵਾ ਠਿਤਾਨਂ ਨ ਪਾਪੁਣਾਤੀਤਿ ਏਕੇ. ‘‘ਭਿਕ੍ਖੁਨਿਵਿਹਾਰਤੋ ਬਹਿ ਯਤ੍ਥ ਕਤ੍ਥਚਿ ਠਤ੍ਵਾ ‘ਸਙ੍ਘਸ੍ਸਾ’ਤਿ ਵੁਤ੍ਤੇ ਭਿਕ੍ਖੁਸਙ੍ਘੋਵ ਸਾਮੀ’’ਤਿ ਵਦਨ੍ਤਿ. ਏਕੋਪਿ ਗਨ੍ਤ੍ਵਾਤਿ ਏਤ੍ਥ ਸਬ੍ਬੇਸਂ ਵਾ ਪਾਪੇਤ੍ਵਾ ਗਨ੍ਤਬ੍ਬਂ, ਆਨੇਤ੍ਵਾ ਵਾ ਪਾਪੇਤਬ੍ਬਂ, ਇਤਰਥਾ ਗਤਸ੍ਸ ਨ ਪਾਪੁਣਾਤਿ. ਸਮਾਨਲਾਭਕਤਿਕਾ ਮੂਲਾਵਾਸੇ ਸਤਿ ਸਿਯਾ, ਮੂਲਾਵਾਸਵਿਨਾਸੇਨ ਕਤਿਕਾਪਿ ਵਿਨਸ੍ਸਤਿ. ਸਮਾਨਲਾਭਵਚਨਂ ਸਤਿ ਦ੍ਵੀਸੁ, ਬਹੂਸੁ ਵਾ ਯੁਜ੍ਜਤਿ. ਤੇਨੇਵ ਏਕਸ੍ਮਿਂ ਅਵਸਿਟ੍ਠੇ ਯੁਜ੍ਜਤੀਤਿ ਨੋ ਮਤਿ.

‘‘ਤਾਵਕਾਲਿਕਕਾਲੇਨ, ਮੂਲਚ੍ਛੇਦਵਸੇਨ ਵਾ;

ਅਞ੍ਞੇਸਂ ਕਮ੍ਮਂ ਅਞ੍ਞਸ੍ਸ, ਸਿਯਾ ਨਾਵਾਸਸਙ੍ਗਮੋ’’ਤਿ. –

ਆਚਰਿਯੋ.

ਸਬ੍ਬਤ੍ਥ ਦਿਨ੍ਨਮੇਵਾਤਿ ‘‘ਸਮਾਨਭਾਗੋਵ ਹੋਤੀ’’ਤਿ ਵਦਨ੍ਤਿ. ‘‘ਏਕਮੇਕਂ ਅਮ੍ਹਾਕਂ ਪਾਪੁਣਾਤੀਤਿ ਚੇ ਵਦਤਿ, ਵਟ੍ਟਤੀ’’ਤਿ ਵਦਨ੍ਤਿ ਵਿਭਾਗਸ੍ਸ ਕਤਤ੍ਤਾ. ‘‘ਭਿਕ੍ਖੁਸਙ੍ਘਸ੍ਸ ਚੀਵਰੇ ਦਿਨ੍ਨੇ ਪਂਸੁਕੂਲਿਕਾਨਂ ਨ ਵਟ੍ਟਤੀ’’ਤਿ ਵਦਨ੍ਤਿ. ‘‘ਉਭਤੋਸਙ੍ਘਸ੍ਸਾ’’ਤਿ ਵੁਤ੍ਤੇ ‘‘ਭਿਕ੍ਖੁਸਙ੍ਘਸ੍ਸਾ’’ਤਿ ਅਵੁਤ੍ਤਤ੍ਤਾ ਭਿਕ੍ਖੁਨਿਸਙ੍ਘੇਨ ਮਿਸ੍ਸਿਤਤ੍ਤਾ, ਤਤ੍ਥ ਅਪਰਿਯਾਪਨ੍ਨਤ੍ਤਾ ਚ ਪੁਗ੍ਗਲੋ ਵਿਸੁਂ ਲਭਤਿ. ਏਵਂ ਸਨ੍ਤੇ ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨਿਸਙ੍ਘਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ‘‘ਉਭਤੋਸਙ੍ਘਸ੍ਸ ਦਿਨ੍ਨਮੇਵ ਹੋਤੀ’’ਤਿ ਇਮਿਨਾ ਵਿਰੁਜ੍ਝਤੀਤਿ ਚੇ? ਨ ਵਿਰੁਜ੍ਝਤਿ, ਤਂ ਦ੍ਵਿਨ੍ਨਂ ਸਙ੍ਘਾਨਂ ਦਿਨ੍ਨਭਾਵਮੇਵ ਦੀਪੇਤਿ, ਨ ਉਭਤੋਸਙ੍ਘਪਞ੍ਞਤ੍ਤਿਂ, ਤਸ੍ਮਾ ਏਵ ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨਿਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿ ਵਾਰੋ ਨ ਵੁਤ੍ਤੋ. ਅਥ ਵਾ ਅਟ੍ਠਕਥਾਵਚਨਮੇਵ ਪਮਾਣਂ, ਨ ਵਿਚਾਰਣਾਤਿ ਏਕੇ. ਯਸ੍ਮਾ ਏਕੋ ਅਦ੍ਧਾਨਾਦਿਯਕੋ ਵਿਯ ਦੁਵਿਧੋ ਨ ਹੋਤਿ, ਤਸ੍ਮਾ ਉਭਤੋਸਙ੍ਘਗ੍ਗਹਣੇਨ ਏਕੋ ਭਿਕ੍ਖੁ ਨ ਗਹਿਤੋਤਿ. ‘‘ਸਬ੍ਬਾਵਾਸਸ੍ਸ ਚ ਚੇਤਿਯਸ੍ਸ ਚ ਧਮ੍ਮਸ੍ਸ ਚਾ’ਤਿ ਵੁਤ੍ਤੇ ਸਬ੍ਬਵਿਹਾਰੇਸੁ ਚੇਤਿਯਧਮ੍ਮਾਨਂ ਏਕੇਕਸ੍ਸ ਭਿਕ੍ਖੁਨੋ ਭਾਗੋ ਦਾਤਬ੍ਬੋ’’ਤਿ ਵਦਨ੍ਤਿ. ‘‘ਭਿਕ੍ਖੁਸਙ੍ਘਸ੍ਸ ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਨ ਵਿਰੁਜ੍ਝਤੀਤਿ ਚੇ? ਨ, ਤਤ੍ਥ ‘‘ਭਿਕ੍ਖੁਸਙ੍ਘਸ੍ਸਾ’’ਤਿ ਵੁਤ੍ਤਤ੍ਤਾ, ਇਧ ਵਿਹਾਰੇਨ ਘਟਿਤਤ੍ਤਾ ਚ ਤਮ੍ਹਿ ਤਮ੍ਹਿ ਵਿਹਾਰੇ ਏਕਭਾਗਂ ਲਭਿਤਬ੍ਬਮੇਵਾਤਿ ਪਰਿਹਰਨ੍ਤਿ. ਅਤ੍ਤਨੋ ਪਾਪੇਤ੍ਵਾਤਿ ਵਿਕਾਲੇ ਅਪਰਿਭੋਗਤ੍ਤਾ ਸਕਲੋਪਿ ਵਟ੍ਟੇਯ੍ਯਾਤਿ ਚੇ? ‘‘ਭਿਕ੍ਖੁਸਙ੍ਘਸ੍ਸ ਹਰਾ’’ਤਿ ਵੁਤ੍ਤਤ੍ਤਾ, ਤੇਨ ‘‘ਹਰਾਮੀ’’ਤਿ ਗਹਿਤਤ੍ਤਾ ਚ ਨ ਵਟ੍ਟਤਿ. ਪਚ੍ਛਿਮਵਸ੍ਸਂਵੁਤ੍ਥਾਨਮ੍ਪੀਤਿ ਏਤ੍ਥ ਅਪਿ-ਸਦ੍ਦੋ ਅਵਧਾਰਣਤ੍ਥੋ, ਪਚ੍ਛਿਮਵਸ੍ਸਂਵੁਤ੍ਥਾਨਮੇਵਾਤਿ ਅਤ੍ਥੋ, ਇਤਰਥਾ ਸਮੁਚ੍ਚਯਤ੍ਥੇ ਗਹਿਤੇ ‘‘ਲਕ੍ਖਣਞ੍ਞੂ ਵਦਨ੍ਤੀ’’ਤਿ ਵਚਨਂ ਨਿਰਤ੍ਥਕਂ ਸਿਯਾ. ਕਸ੍ਮਾਤਿ ਆਰਭਿਤ੍ਵਾ ਪਪਞ੍ਚਂ ਕਰੋਨ੍ਤਿ. ਕਿਂ ਤੇਨ, ਪਰਤੋ ‘‘ਚੀਵਰਮਾਸਤੋ ਪਟ੍ਠਾਯ…ਪੇ… ਅਤੀਤਵਸ੍ਸਂਵੁਤ੍ਥਾਨਮੇਵ ਪਾਪੁਣਾਤੀ’’ਤਿ ਇਮਿਨਾ ਸਿਦ੍ਧਤ੍ਤਾ ਨ ਵਿਚਾਰਿਤਂ, ਤੇਨ ਵੁਤ੍ਤਂ ‘‘ਲਕ੍ਖਣਞ੍ਞੂ’’ਤਿ ਅਚਲਵਸੇਨ. ਸਚੇ ਪਨ ਬਹਿਉਪਚਾਰਸੀਮਾਯ ਠਿਤੋ…ਪੇ… ਸਮ੍ਪਤ੍ਤਾਨਂ ਸਬ੍ਬੇਸਂ ਪਾਪੁਣਾਤੀਤਿ ਯਤ੍ਥ ਕਤ੍ਥਚਿ ਵੁਤ੍ਥਵਸ੍ਸਾਨਨ੍ਤਿ ਅਧਿਪ੍ਪਾਯੋ ‘‘ਯਤ੍ਥ ਕਤ੍ਥਚਿ ਵੁਤ੍ਥਵਸ੍ਸਾਨਂ ਸਬ੍ਬੇਸਂ ਸਮ੍ਪਤ੍ਤਾਨਂ ਪਾਪੁਣਾਤੀ’’ਤਿ (ਕਙ੍ਖਾ. ਅਟ੍ਠ. ਅਕਾਲਚੀਵਰਸਿਕ੍ਖਾਪਦਵਣ੍ਣਨਾ) ਕਙ੍ਖਾਵਿਤਰਣਿਯਂ ਵੁਤ੍ਤਤ੍ਤਾ. ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਵੁਤ੍ਤੇ ਪਨ ਯਸ੍ਮਾ ਅਨਨ੍ਤਰਾਤੀਤਂ ਹੇਮਨ੍ਤਂ ਏਵ ਵੁਤ੍ਥਾ ਨਾਮ ਹੋਨ੍ਤਿ, ਨ ਵਸ੍ਸਂ, ਤਸ੍ਮਾ ‘‘ਮਾਤਿਕਾ ਆਰੋਪੇਤਬ੍ਬਾ’’ਤਿ ਵੁਤ੍ਤਂ. ਯੇ ਵਾ ਥੇਰੇਹਿ ਪੇਸਿਤਾ, ਤੇਸਂ ਪਾਪੁਣਾਤੀਤਿ ਕਿਰ ਅਤ੍ਥੋ.

ਚੀਵਰਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.