੧੧. ਏਕਾਦਸਮਾਦਿਸਿਕ੍ਖਾਪਦਵਣ੍ਣਨਾ

੧੨੧੪. ਉਪਚਾਰਂ ਸਨ੍ਧਾਯ ਕਥਿਤਨ੍ਤਿ ‘‘ਦ੍ਵਾਦਸਹਤ੍ਥਂ ਉਪਚਾਰੋ’’ਤਿ ਲਿਖਿਤਂ.

੧੨੨੧. ਸੁਤ੍ਤਨ੍ਤੇ ਓਕਾਸਂ ਕਾਰਾਪੇਤ੍ਵਾ ਵਿਨਯਂ ਵਾ ਅਭਿਧਮ੍ਮਂ ਵਾ ਪੁਚ੍ਛਤੀਤਿ ਏਤ੍ਥ ਚ ਤੀਣਿ ਪਿਟਕਾਨਿ ਅਤ੍ਤਨੋ ਅਤ੍ਤਨੋ ਨਾਮੇਨ ਵੁਤ੍ਤਾਨੀਤਿ ਕਤ੍ਵਾ ਅਭਿਧਮ੍ਮੋ ਬੁਦ੍ਧੇਨ ਭਾਸਿਤੋ ਏਵਾਤਿ ਦੀਪਿਤਂ ਹੋਤਿ.

੧੨੨੪-੫. ਥਨੋ ਚ ਉਦਰੋ ਚ ਥਨੁਦਰਾ. ‘‘ਸਂਕਚ੍ਚਿਕਾਯ ਪਮਾਣਂ ਤਿਰਿਯਂ ਦਿਯਡ੍ਢਹਤ੍ਥਾ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ. ‘‘ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾ’’ਤਿ ਬਹੂਸੁ ਪੋਤ੍ਥਕੇਸੁ, ਸਙ੍ਘਾਦਿਸੇਸਕਣ੍ਡੇ ਵਿਯ ‘‘ਉਪਚਾਰਂ ਅਤਿਕ੍ਕਮਨ੍ਤਿਯਾ’’ਤਿ ਪਾਠੋ ਅਪ੍ਪਕੇਸੁ, ਸੋਵ ਪਾਠੋ. ਅਟ੍ਠਕਥਾਯਂ ‘‘ਪਰਿਕ੍ਖੇਪਂ ਅਤਿਕ੍ਕਮਨ੍ਤਿਯਾਤਿ ਏਕੇਨ ਪਾਦੇਨ ਅਤਿਕ੍ਕਨ੍ਤੇ ਦੁਕ੍ਕਟਂ, ਦੁਤਿਯੇਨ ਪਾਚਿਤ੍ਤਿਯਂ. ਉਪਚਾਰੇਪਿ ਏਸੇਵ ਨਯੋ’’ਤਿ ਵਚਨਮ੍ਪਿ ‘‘ਉਪਚਾਰਂ ਅਤਿਕ੍ਕਮਨ੍ਤਿਯਾ’’ਤਿ ਪਾਠੋਤਿ ਦੀਪੇਤੀਤਿ ਨੋ ਤਕ੍ਕੋਤਿ ਆਚਰਿਯੋ.

ਏਕਾਦਸਮਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਛਤ੍ਤੁਪਾਹਨਵਗ੍ਗਵਣ੍ਣਨਾ ਨਿਟ੍ਠਿਤਾ.

ਨਿਗਮਨਵਣ੍ਣਨਾ

ਗਿਰਗ੍ਗਸਮਜ੍ਜਾਦੀਨਿ ‘‘ਅਚਿਤ੍ਤਕਾਨਿ ਲੋਕਵਜ੍ਜਾਨੀ’’ਤਿ ਵੁਤ੍ਤਤ੍ਤਾ ‘‘ਨਚ੍ਚ’’ਨ੍ਤਿ ਵਾ ‘‘ਗਨ੍ਧੋ’’ਤਿ ਵਾ ਅਜਾਨਿਤ੍ਵਾਪਿ ਦਸ੍ਸਨੇਨ, ਵਿਲਿਮ੍ਪਨੇਨ ਵਾ ਆਪਜ੍ਜਨਤੋ ਵਤ੍ਥੁਅਜਾਨਨਚਿਤ੍ਤੇਨ ਅਚਿਤ੍ਤਕਾਨਿ. ‘‘ਨਚ੍ਚ’’ਨ੍ਤਿ ਵਾ ‘‘ਗਨ੍ਧੋ’’ਤਿ ਵਾ ਜਾਨਿਤ੍ਵਾ ਪਸ੍ਸਨ੍ਤਿਯਾ, ਵਿਲਿਮ੍ਪਨ੍ਤਿਯਾ ਚ ਅਕੁਸਲਤ੍ਤਾ ਏਵ ਲੋਕਵਜ੍ਜਾਨਿ. ਚੋਰਿਵੁਟ੍ਠਾਪਨਾਦੀਨਿ ‘‘ਚੋਰੀ’’ਤਿਆਦਿਨਾ ਵਤ੍ਥੁਂ ਜਾਨਿਤ੍ਵਾ ਕਰਣੇ ਏਵ ਆਪਤ੍ਤਿਸਬ੍ਭਾਵਤੋ ਸਚਿਤ੍ਤਕਾਨਿ. ਉਪਸਮ੍ਪਦਾਦੀਨਂ ਏਕਨ੍ਤੇਨ ਅਕੁਸਲਚਿਤ੍ਤੇਨੇਵ ਅਕਤ੍ਤਬ੍ਬਤ੍ਤਾ ਪਣ੍ਣਤ੍ਤਿਵਜ੍ਜਾਨਿ. ‘‘ਇਧ ਸਚਿਤ੍ਤਕਾਚਿਤ੍ਤਕਤਾ ਪਣ੍ਣਤ੍ਤਿਜਾਨਨਾਜਾਨਨਤਾਯ ਅਗ੍ਗਹੇਤ੍ਵਾ ਵਤ੍ਥੁਜਾਨਨਾਜਾਨਨਤਾਯ ਗਹੇਤਬ੍ਬਾ’’ਤਿ ਲਿਖਿਤਂ. ਅਨੁਗਣ੍ਠਿਪਦੇ ਪਨ ‘‘ਗਿਰਗ੍ਗਸਮਜ੍ਜਾਦੀਨਿ ‘ਅਚਿਤ੍ਤਕਾਨਿ ਲੋਕਵਜ੍ਜਾਨੀ’ਤਿ ਵੁਤ੍ਤਤ੍ਤਾ ‘ਨਚ੍ਚ’ਨ੍ਤਿ ਵਾ ‘ਸਙ੍ਘਾਣੀ’ਤਿ ਵਾ ‘ਗਨ੍ਧੋ’ਤਿ ਵਾ ਤਸ੍ਸ ਨਾਮਵਸੇਨ ਅਜਾਨਿਤ੍ਵਾ ਮਾਯਾਕਾਰਸ੍ਸ ਮਾਯਾਨਿ ਸੀਸਟ੍ਠਿਆਦੀਨਿ ਪਟਿਸਙ੍ਖਾਯ ਪਸ੍ਸਨ੍ਤਿਯਾ, ਅਕ੍ਖਮਾਲਾਦਿਅਤ੍ਥਾਯ ਸਙ੍ਘਾਣਿਂ ਕਟਿਯਾ ਬਨ੍ਧਨ੍ਤਿਯਾ, ‘ਸੇਦਗਨ੍ਧਂ ਅਪਨੇਤ੍ਵਾ ਬੁਦ੍ਧਪੂਜਂ ਕਰਿਸ੍ਸਾਮੀ’ਤਿ ਉਪ੍ਪਨ੍ਨੇਨ ਚਿਤ੍ਤੇਨ ਗਨ੍ਧਂ ਵਿਲਿਮ੍ਪੇਤ੍ਵਾ ਨਹਾਯਨ੍ਤਿਯਾ ਚ ਆਪਤ੍ਤਿਸਬ੍ਭਾਵਤੋ ਨਾਮੇਨ ਸਦ੍ਧਿਂ ਨਾਮਵਸੇਨ ਵਾ ਵਤ੍ਥੁਸ੍ਸ ਅਜਾਨਨਚਿਤ੍ਤੇਨ ਅਚਿਤ੍ਤਕਾਨਿ ਨਾਮ. ਨ ਅਨ੍ਧਕਾਰੇ ‘ਕਟਿਸੁਤ੍ਤਮਿਦ’ਨ੍ਤਿ ਸਞ੍ਞਾਯ ਸਙ੍ਘਾਣਿਂ ਗਹੇਤ੍ਵਾ ਕਟਿਯਂ ਧਾਰਣਕਾਲੇ, ਮਤ੍ਤਿਕਾਸਞ੍ਞਾਯ ਚ ਗਨ੍ਧਂ ਗਹੇਤ੍ਵਾ ਵਿਲਿਮ੍ਪਨਕਾਲੇ ਆਪਤ੍ਤਿਸਬ੍ਭਾਵਤੋ ‘ਅਚਿਤ੍ਤਕਾਨੀ’ਤਿ ਵਤ੍ਤਬ੍ਬਾਨਿ. ਤਸ੍ਮਿਂ ਕਾਲੇ ਅਨਾਪਤ੍ਤਿ, ਤੇਨੇਵ ਸਙ੍ਘਾਣਿਯਾ ਅਸਙ੍ਘਾਣਿਸਞ੍ਞਾਵਾਰੇਪਿ ‘ਆਪਤ੍ਤਿ ਪਾਚਿਤ੍ਤਿਯਸ੍ਸਾ’ਤਿ ਪਾਲ਼ਿ ਨ ਵੁਤ੍ਤਾ. ਯਥਾ ‘ਖੇਤ੍ਤਆਬਾਧਪਚ੍ਚਯਾ, ਕਟਿਸੁਤ੍ਤਕਂ ਧਾਰੇਤੀ’ਤਿ ਵਚਨਤੋ ਵਿਨਾਪਿ ਅਕੁਸਲੇਨ ਸਙ੍ਘਾਣਿਆਦੀਨਿ ਸਕ੍ਕਾ ਧਾਰੇਤੁਨ੍ਤਿ ਸਿਦ੍ਧਂ, ਏਵਂ ਆਬਾਧਪਚ੍ਚਯਾ ਵਿਨਾਪਿ ਅਕੁਸਲੇਨ ਨ ਸਕ੍ਕਾ ਸੁਰਂ ਪਾਤੁਨ੍ਤਿ ਸਿਦ੍ਧਂ ‘ਅਨਾਪਤ੍ਤਿ ਆਬਾਧਪਚ੍ਚਯਾ ਮਜ੍ਜਂ ਪਿਵਤੀ’ਤਿ ਪਾਲ਼ਿਯਾ ਅਭਾਵਤੋ. ਅਕੁਸਲੇਨ ਵਿਨਾ ਮਧੁਪੁਣ੍ਣਮੁਟ੍ਠਿਯਂ ਪਕ੍ਖਿਤ੍ਤਮਜ੍ਜਸ੍ਸ ਅਜ੍ਝੋਹਰਣਕਾਲਾਦੀਸੁ ਸੁਰਾਪਾਨਾਪਤ੍ਤਿਂ ਆਪਜ੍ਜਤੀਤਿ ਚ ਸਿਦ੍ਧਂ ‘ਮਜ੍ਜੇ ਅਮਜ੍ਜਸਞ੍ਞੀ ਪਿਵਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’ਤਿ (ਪਾਚਿ. ੩੨੮) ਵੁਤ੍ਤਤ੍ਤਾ. ਕਿਂਬਹੁਨਾ, ਕਾਮਭੋਗਸਞ੍ਞਾਯ ਸਦ੍ਧਿਂ ‘ਸਙ੍ਘਾਣੀ’ਤਿ ਚ ‘ਗਨ੍ਧੋ’ਤਿ ਚ ਜਾਨਿਤ੍ਵਾ ਵਿਨਾ ਅਨਾਪਤ੍ਤਿਕਾਰਣੇਨ ਧਾਰੇਨ੍ਤਿਯਾ ਏਕਨ੍ਤਾਕੁਸਲਤ੍ਤਾ ਲੋਕਵਜ੍ਜਾਨਿ ਨਾਮ ਵੁਚ੍ਚਨ੍ਤਿ. ਇਮਿਨਾ ਉਪਾਯੇਨ ਸੇਸੇਸੁਪਿ ਨਯੋ ਨੇਤਬ੍ਬੋ. ਏਤ੍ਥ ਸੁਰਾਪਾਨਾਧਿਕਾਰੇ ਉਪਤਿਸ੍ਸਤ੍ਥੇਰਵਾਦੋ’’ਤਿ ਵੁਤ੍ਤਂ. ਅਸਂਕਚ੍ਚਿਕਸਿਕ੍ਖਾਪਦੇ ‘‘ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾਤਿ ਪਾਠੋ’’ਤਿ ਚ ‘‘ਪਣੀਤਭੋਜਨਵਿਞ੍ਞਤ੍ਤਿ, ਅਚੇਲਕਸਿਕ੍ਖਾਪਦਂ, ਨਿਮਨ੍ਤਿਤਸ੍ਸ ਚਾਰਿਤ੍ਤਾਪਜ੍ਜਨਂ, ਦੁਟ੍ਠੁਲ੍ਲਪ੍ਪਟਿਚ੍ਛਾਦਨਂ, ਊਨਵੀਸਤਿਵਸ੍ਸੁਪਸਮ੍ਪਦਂ, ਮਾਤੁਗਾਮੇਨ ਸਦ੍ਧਿਂ ਸਂਵਿਧਾਯ ਅਦ੍ਧਾਨਗਮਨਂ, ਰਾਜਨ੍ਤੇਪੁਰਪ੍ਪਵੇਸਨਂ, ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਵਿਕਾਲੇ ਗਾਮਪ੍ਪਵੇਸਨਂ, ਨਿਸੀਦਨਂ, ਵਸ੍ਸਿਕਸਾਟਿਕਨ੍ਤਿ ਪਾਠੋ’’ਤਿ ਚ ਵੁਤ੍ਤਂ.

ਨਿਗਮਨਵਣ੍ਣਨਾ ਨਿਟ੍ਠਿਤਾ.

ਪਾਚਿਤ੍ਤਿਯਕਣ੍ਡਵਣ੍ਣਨਾ ਨਿਟ੍ਠਿਤਾ.

ਉਭਤੋਵਿਭਙ੍ਗਟ੍ਠਕਥਾਵਣ੍ਣਨਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ