੮. ਸਹਧਮ੍ਮਿਕਵਗ੍ਗੋ
੧. ਸਹਧਮ੍ਮਿਕਸਿਕ੍ਖਾਪਦਵਣ੍ਣਨਾ
੪੩੪. ਸਹਧਮ੍ਮਿਕਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੨. ਵਿਲੇਖਨਸਿਕ੍ਖਾਪਦਵਣ੍ਣਨਾ
੪੩੮. ਆਪਤ੍ਤਿਞ੍ਚ ਸਤਿਸਮ੍ਮੋਸਾਯਾਤਿ ਏਤ੍ਥ ਚ-ਸਦ੍ਦੋ ਕਤ੍ਤਬ੍ਬਞ੍ਚ ਨ ਕਰੋਤੀਤਿ ਦੀਪੇਤਿ, ਨ ਚਤ੍ਤਾਰਿ ਏਵਾਤਿ ਵੁਤ੍ਤਂ ਹੋਤਿ. ਰਟ੍ਠੇਕਦੇਸੋ ਜਨਪਦੋ. ਬੁਦ੍ਧਕਾਲੇ ਅਰਿਟ੍ਠਕਣ੍ਟਕਾ ਸਾਸਨਪਚ੍ਚਤ੍ਥਿਕਾ. ‘‘ਨਾਲਂ ਅਨ੍ਤਰਾਯਾਯਾ’’ਤਿ ਵਚਨੇਨ ਹਿ ਤੇ ਭਗਵਤੋ ਅਸਬ੍ਬਞ੍ਞੁਤਂ ਦੀਪੇਨ੍ਤਿ. ਪਰਿਨਿਬ੍ਬੁਤੇ ਭਗਵਤਿ ਦਸਵਤ੍ਥੁਦੀਪਕਾ ਵਜ੍ਜਿਪੁਤ੍ਤਕਾ. ਤੇ ਹਿ ਵਿਨਯਸਾਸਨਪਚ੍ਚਤ੍ਥਿਕਾ. ਪਰੂਪਹਾਰਾਦਿਵਾਦਾ ਪਨ ਸੁਤ੍ਤਨ੍ਤਾਭਿਧਮ੍ਮਪ੍ਪਚ੍ਚਤ੍ਥਿਕਾ. ਕੇ ਪਨ ਤੇ? ਏਕਚ੍ਚੇ ਮਹਾਸਙ੍ਘਿਕਾਦਯੋ, ਨ ਸਬ੍ਬੇਤਿ ਦੀਪਨਤ੍ਥਂ ‘‘ਪਰੂਪਹਾਰਾ…ਪੇ… ਵਾਦਾ’’ਤਿ ਵਿਸੇਸਨਵਚਨਮਾਹ. ਤਤ੍ਥ ਯੇ ਕੁਹਕਾ ਪਾਪਿਚ੍ਛਕਾ ਅਭੂਤਂ ਉਲ੍ਲਪਿਤ੍ਵਾ ਪਟਿਲਦ੍ਧਵਰਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਨਿਦ੍ਦਂ ਓਕ੍ਕਮਿਤ੍ਵਾ ਸੁਕ੍ਕਵਿਸ੍ਸਟ੍ਠਿਂ ਪਤ੍ਤਾ, ਅਞ੍ਞੇਹਿ ਤਂ ਦਿਸ੍ਵਾ ‘‘ਅਤ੍ਥਿ ਅਰਹਤੋ ਸੁਕ੍ਕਵਿਸ੍ਸਟ੍ਠੀ’’ਤਿ ਵੁਤ੍ਤੇ ‘‘ਮਾਰਕਾਯਿਕਾ ਉਪਸਂਹਰਨ੍ਤੀ’’ਤਿ ਵਤ੍ਵਾ ਜਨਂ ਵਞ੍ਚੇਨ੍ਤਿ. ਯੇ ਚ ਸਮ੍ਮਾਪਟਿਪਨ੍ਨਾ ਅਕੁਹਕਾ, ਤੇਪਿ ਤਂ ਵਚਨਂ ਸੁਤ੍ਵਾ ਕੇਚਿ ਤਂਦਿਟ੍ਠਿਕਾ ਹੋਨ੍ਤਿ ਅਧਿਮਾਨਿਨੋ ਚ. ਅਤ੍ਤਨੋ ਸੁਕ੍ਕਵਿਸ੍ਸਟ੍ਠਿਂ ਪਸ੍ਸਿਤ੍ਵਾਪਿ ਨਾਧਿਮੁਚ੍ਚਨ੍ਤਿ, ਅਨਧਿਗਤੇ ਅਧਿਕਤਸਞ੍ਞਿਨੋਵ ਹੋਨ੍ਤਿ. ਤਥਾ ਅਤ੍ਥਿ ਅਰਹਤੋ ਅਞ੍ਞਾਣਕਙ੍ਖਾਵਿਤਰਣਾ ਨਾਮਗੋਤ੍ਤਾਦੀਸੁ ਵਿਯ ਸਚ੍ਚੇਸੁ ਪਰਵਿਤਰਣਾ ਪਰੇਹਿ ਪਞ੍ਞਤ੍ਤਾ ਨਾਮਾਨੀਤਿ ਅਧਿਪ੍ਪਾਯੋ ਯਥਾਸਮ੍ਭਵਂ ਯੋਜੇਤਬ੍ਬੋ. ਤਤ੍ਥ ਵਿਨਯਧਰੋ ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਅਰਹਤੋ ਅਸੁਚਿ ਮੁਚ੍ਚੇਯ੍ਯ (ਕਥਾ. ੩੧੩; ਮਹਾਵ. ੩੫੩). ਦਿਟ੍ਠਧਮ੍ਮਾ…ਪੇ… ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ’’ਤਿਆਦੀਨਿ (ਮਹਾਵ. ੩੦) ਸੁਤ੍ਤਪਦਾਨਿ ਦਸ੍ਸੇਤ੍ਵਾ ਤੇ ਸਾਸਨਪਚ੍ਚਤ੍ਥਿਕੇਸੁ ਨਿਗ੍ਗਹਿਤਂ ਨਿਗ੍ਗਣ੍ਹਾਤੀਤਿ ਅਧਿਪ੍ਪਾਯੋ. ਇਤਰੇ ‘‘ਪਰਿਯਤ੍ਤਿ ਮੂਲ’’ਨ੍ਤਿ ਵਾਦਿਨੋ. ‘‘ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ’’ਤਿ ਨਿਦਾਨਵਸੇਨ ਵੁਤ੍ਤਂ. ਤਥਾਗਤਸ੍ਸ ਵਿਭਙ੍ਗਪਦਾਨਿ ਸਿਦ੍ਧਾਨਿ. ਸਿਦ੍ਧੇਯੇਵ ਕਿਂ ਇਮਸ੍ਸ ਅਙ੍ਗਾਨਿ? ਗਰਹਿਤੁਕਾਮਤਾ ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ ਸਿਕ੍ਖਾਪਦਵਿਵਣ੍ਣਨਞ੍ਚਾਤਿ.
ਵਿਲੇਖਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਮੋਹਨਸਿਕ੍ਖਾਪਦਵਣ੍ਣਨਾ
੪੪੪. ਮੋਹਨਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੪. ਪਹਾਰਸਿਕ੍ਖਾਪਦਵਣ੍ਣਨਾ
੪੫੨. ਰਤ੍ਤਚਿਤ੍ਤੋਤਿ ਕਾਯਸਂਸਗ੍ਗਰਾਗੇਨ. ਵਿਹੇਠੇਤੁਕਾਮਂ ਪਨ ਦਿਸ੍ਵਾ ‘‘ਸਚੇ ਅਹਂ ਇਮਂ ਮਾਰੇਮਿ, ਨਤ੍ਥਿ ਮੇ ਮੋਕ੍ਖੋ’’ਤਿ ਚਿਨ੍ਤੇਤ੍ਵਾ ਕੁਪਿਤੋ ਸਤ੍ਤਸਞ੍ਞਂ ਪੁਰੇਕ੍ਖਤ੍ਵਾ ਪਹਾਰਂ ਦੇਤਿ, ਤਸ੍ਸ ਯਥਾਵਤ੍ਥੁਕਮੇਵ.
ਪਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ
੪੫੬. ‘‘ਕਾਯਂ ਵਾ ਕਾਯਪਟਿਬਦ੍ਧਂ ਵਾ’’ਤਿ (ਪਾਚਿ. ੪੫੬) ਵਚਨਤੋ ਕਾਯਾਦੀਸੁ ਯਂ ਉਚ੍ਚਾਰੇਤਿ, ਤਂ ਤਲਂ ਨਾਮ. ਤਲਮੇਵ ਤਲਸਤ੍ਤਿਕਂ. ਪੋਥਨਸਮਤ੍ਥਟ੍ਠੇਨ ਸਤ੍ਤਿਕਨ੍ਤਿ ਏਕੇ. ਤਂ ‘‘ਉਪ੍ਪਲਪਤ੍ਤਮ੍ਪੀ’’ਤਿ ਇਮਿਨਾ ਨਿਯਮੇਤਿ. ਏਵਂ ਕੁਪਿਤਾ ਹਿ ਕੋਪਵਸੇਨ ਪੋਥਨਾਸਮਤ੍ਥਤਂ ਅਵਿਚਾਰੇਤ੍ਵਾ ਯਂ ਕਿਞ੍ਚਿ ਹਤ੍ਥਗਤਂ ਪਟਿਕ੍ਖਿਪਨ੍ਤਿ, ਸੁਖਸਮ੍ਫਸ੍ਸਮ੍ਪਿ ਹੋਤੁ, ਪਾਚਿਤ੍ਤਿਯਮੇਵ. ਯਸ੍ਮਾ ਪਹਰਿਤੁਕਾਮਤਾਯ ਪਹਟੇ ਪੁਰਿਮੇਨ ਪਾਚਿਤ੍ਤਿਯਂ. ਕੇਵਲਂ ਉਚ੍ਚਾਰੇਤੁਕਾਮਤਾਯ ਉਗ੍ਗਿਰਣਮਤ੍ਤੇ ਕਤੇ ਇਮਿਨਾ ਪਾਚਿਤ੍ਤਿਯਂ. ਇਮਿਨਾ ਪਨ ਵਿਰਜ੍ਝਿਤ੍ਵਾ ਪਹਾਰੋ ਦਿਨ੍ਨੋ, ਤਸ੍ਮਾ ਨ ਪਹਰਿਤੁਕਾਮਤਾਯ ਦਿਨ੍ਨਤ੍ਤਾ ਦੁਕ੍ਕਟਂ. ਕਿਮਿਦਂ ਦੁਕ੍ਕਟਂ ਪਹਾਰਪਚ੍ਚਯਾ, ਉਦਾਹੁ ਉਗ੍ਗਿਰਣਪਚ੍ਚਯਾਤਿ? ਪਹਾਰਪਚ੍ਚਯਾ ਏਵ ਦੁਕ੍ਕਟਂ. ਪੁਰਿਮਂ ਉਗ੍ਗਿਰਣਪਚ੍ਚਯਾ ਪਾਚਿਤ੍ਤਿਯਨ੍ਤਿ ਸਦੁਕ੍ਕਟਂ ਪਾਚਿਤ੍ਤਿਯਂ ਯੁਜ੍ਜਤਿ. ਪੁਰਿਮਞ੍ਹਿ ਉਗ੍ਗਿਰਣਂ, ਪਚ੍ਛਾ ਪਹਾਰੋ. ਨ ਚ ਪਚ੍ਛਿਮਪਹਾਰਂ ਨਿਸ੍ਸਾਯ ਪੁਰਿਮਂ ਉਗ੍ਗਿਰਣਂ ਅਨਾਪਤ੍ਤਿਵਤ੍ਥੁਕਂ ਭਵਿਤੁਮਰਹਤੀਤਿ ਨੋ ਤਕ੍ਕੋਤਿ ਆਚਰਿਯੋ. ‘‘ਤੇਨ ਪਹਾਰੇਨ ਹਤ੍ਥਾਦੀਸੁ ਯਂ ਕਿਞ੍ਚਿ ਭਿਜ੍ਜਤਿ, ਦੁਕ੍ਕਟਮੇਵਾ’’ਤਿ ਇਮਿਨਾਪਿ ਪਹਾਰਪਚ੍ਚਯਾ ਦੁਕ੍ਕਟਂ. ਉਗ੍ਗਿਰਣਂ ਯਥਾਵਤ੍ਥੁਕਮੇਵਾਤਿ ਸਿਦ੍ਧਂ, ਸੁਟ੍ਠੁ ਵੀਮਂਸਿਤਬ੍ਬਂ. ‘‘ਤਿਰਚ੍ਛਾਨਾਦੀਨਂ ਅਸੁਚਿਕਰਣਾਦੀਨਿ ਦਿਸ੍ਵਾ ਕੁਜ੍ਝਿਤ੍ਵਾਪਿ ਉਗ੍ਗਿਰਨ੍ਤਸ੍ਸ ਮੋਕ੍ਖਾਧਿਪ੍ਪਾਯੋ ਏਵਾ’’ਤਿ ਵਦਨ੍ਤਿ.
ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਅਮੂਲਕਸਿਕ੍ਖਾਪਦਵਣ੍ਣਨਾ
੪੬੨. ਉਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞੀ ਅਮੂਲਕੇਨ ਸਙ੍ਘਾਦਿਸੇਸੇਨਾਤਿ ਸੁਕ੍ਕਵਿਸ੍ਸਟ੍ਠਿਕਾਯਸਂਸਗ੍ਗਾਦਿਨਾ ਸਙ੍ਘਾਦਿਸੇਸਾਪਤ੍ਤਿਯਾ ਵਤ੍ਥੁਨਾਤਿ ਵੇਦਿਤਬ੍ਬਂ. ਨ ਹਿ ਅਨੁਪਸਮ੍ਪਨ੍ਨਸ੍ਸ ਸਙ੍ਘਾਦਿਸੇਸਾਪਤ੍ਤਿ ਨਾਮ ਅਤ੍ਥਿ.
ਅਮੂਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਸਞ੍ਚਿਚ੍ਚਸਿਕ੍ਖਾਪਦਵਣ੍ਣਨਾ
੪੬੮. ਊਨਵੀਸਤਿਵਸ੍ਸੋ ਮਞ੍ਞੇਤਿ ਏਤ੍ਥ ਸਯਂ ਸਞ੍ਞਾਯ ਤਥਾ ਅਮਞ੍ਞਨ੍ਤੋ ਕੁਕ੍ਕੁਚ੍ਚੁਪ੍ਪਾਦਨਤ੍ਥਂ ‘‘ਮਞ੍ਞੇ’’ਤਿ ਵਦਨ੍ਤੋ ਕਿਂ ਮੁਸਾਵਾਦੇਨ ਕਾਰੇਤਬ੍ਬੋਤਿ? ਨ ਸਿਯਾ ਅਙ੍ਗਸਮ੍ਪਤ੍ਤਿਯਾ, ਨ ਚ ਕੇਵਲਂ ‘‘ਮਞ੍ਞੇ’’ਤਿ ਇਮਿਨਾ ਨਿਯਮਤੋ ਅਙ੍ਗਸਮ੍ਪਤ੍ਤਿ ਹੋਤਿ. ਪਰਮਤ੍ਥਵਿਹਿਤਂ ਕਤ੍ਥਚਿ ਹੋਤਿ. ‘‘ਉਦਕਂ ਮਞ੍ਞੇ ਆਦਿਤ੍ਤ’’ਨ੍ਤਿਆਦਿਮ੍ਹਿ ਪਰੋ ਕੁਕ੍ਕੁਚ੍ਚਂ ਉਪ੍ਪਾਦੇਤੁ ਵਾ, ਮਾ ਵਾ, ਤਂ ਅਪ੍ਪਮਾਣਨ੍ਤਿ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਸਞ੍ਚਿਚ੍ਚਸਿਕ੍ਖਾਪਦਵਣ੍ਣਨਾ) ‘‘ਕੁਕ੍ਕੁਚ੍ਚੁਪ੍ਪਾਦਨ’’ਨ੍ਤਿ ਤਸ੍ਸ ਅਧਿਪ੍ਪਾਯਵਸੇਨ ਵੁਤ੍ਤਨ੍ਤਿ.
ਸਞ੍ਚਿਚ੍ਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਉਪਸ੍ਸੁਤਿਸਿਕ੍ਖਾਪਦਵਣ੍ਣਨਾ
੪੭੩. ਇਮੇਸਂ ਸੁਤ੍ਵਾਤਿ ਏਤ੍ਥ ‘‘ਵਚਨ’’ਨ੍ਤਿ ਪਾਠਸੇਸੋ. ਏਕਪਰਿਚ੍ਛੇਦਾਨੀਤਿ ਸਿਯਾ ਕਿਰਿਯਾ ਸਿਯਾ ਅਕਿਰਿਯਾਤਿ ਇਮਿਨਾ ਨਯੇਨ ਏਕਪਰਿਚ੍ਛੇਦਾਨਿ. ਏਤ੍ਥ ਕਿਞ੍ਚਾਪਿ ਅਞ੍ਞਵਾਦਕਪਚ੍ਚਯਾਪਤ੍ਤਿ ਕਿਰਿਯਾ ਚ ਵਿਹੇਸਕਪਚ੍ਚਯਾਪਤ੍ਤਿ ਅਕਿਰਿਯਾ ਚ, ਤਦੁਭਯਂ ਪਨ ਏਕਸਿਕ੍ਖਾਪਦਨ੍ਤਿ ਕਤ੍ਵਾ ਤਂ ਅਞ੍ਞਵਾਦਕਸਙ੍ਖਾਤਂ ਸਿਕ੍ਖਾਪਦਂ ਸਿਯਾ ਕਿਰਿਯਾ ਪਠਮਸ੍ਸ ਵਸੇਨ, ਸਿਯਾ ਅਕਿਰਿਯਾ ਦੁਤਿਯਸ੍ਸ ਵਸੇਨਾਤਿ ਏਵਮਤ੍ਥੋ ਦਟ੍ਠਬ੍ਬੋ.
ਉਪਸ੍ਸੁਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਕਮ੍ਮਪਟਿਬਾਹਨਸਿਕ੍ਖਾਪਦਵਣ੍ਣਨਾ
੪੭੪. ‘‘ਧਮ੍ਮਿਕਾਨਂ ਕਮ੍ਮਾਨ’’ਨ੍ਤਿ (ਪਾਚਿ. ੪੭੫) ਵਚਨਤੋ ਏਕਚ੍ਚੇ ਭਿਕ੍ਖੂ ਧਮ੍ਮਿਕਾਨਂ ਕਮ੍ਮਾਨਂ ‘‘ਛਨ੍ਦਂ ਦਮ੍ਮੀ’’ਤਿ ਛਨ੍ਦਂ ਦੇਨ੍ਤਿ, ਤਂ ਤੇਸਂ ਮਤਿਮਤ੍ਤਮੇਵ, ਨ ਪਟਿਪਤ੍ਤਿ. ਅਧਮ੍ਮਂ ਨਿਸ੍ਸਾਯ ਖਿਯ੍ਯਤਿ, ਤਂ ਵਾ ਉਕ੍ਕੋਟੇਤਿ, ਅਨਾਪਤ੍ਤਿ ਨੇਵ ਹੋਤੀਤਿ? ਨ, ਤਥਾ ਛਨ੍ਦਦਾਨਕਾਲੇ ਅਕਤ੍ਵਾ ਪਚ੍ਛਾ ਅਧਮ੍ਮਕਮ੍ਮਖਿਯ੍ਯਨਾਦਿਪਚ੍ਚਯਾ ਅਨਾਪਤ੍ਤਿਵਾਰੇ ਵੁਤ੍ਤਤ੍ਤਾ. ਅਧਮ੍ਮੇਨ ਵਾ ਵਗ੍ਗੇਨ ਵਾ ਨ ਕਮ੍ਮਾਰਹਸ੍ਸ ਵਾ ਕਮ੍ਮਕਰਣਪਚ੍ਚਯਾ ਆਪਤ੍ਤਿਮੋਕ੍ਖਕਰਣਤੋ ਅਵਿਸੇਸਮੇਵ ਤਥਾਵਚਨਨ੍ਤਿ ਚੇ? ਨ, ਛਨ੍ਦਦਾਨਕਾਲੇ ਅਧਮ੍ਮਕਮ੍ਮਕਰਣਾਨੁਮਤਿਯਾ ਅਭਾਵਤੋ, ਕਾਰਕਸ੍ਸੇਵ ਵਜ੍ਜਪ੍ਪਸਙ੍ਗਤੋ ਚ. ਗਣਸ੍ਸ ਦੁਕ੍ਕਟਨ੍ਤਿ ਚੇ? ਪਾਰਿਸੁਦ੍ਧਿਛਨ੍ਦਦਾਯਕਾਵ ਤੇ, ਨ ਗਣੋ ਅਕਮ੍ਮਪ੍ਪਤ੍ਤਤ੍ਤਾ, ਪਰਿਵਾਰੇਪਿ (ਪਰਿ. ੪੮੨ ਆਦਯੋ) ਕਮ੍ਮਵਗ੍ਗੇ ਕਮ੍ਮਪ੍ਪਤ੍ਤਛਨ੍ਦਦਾਯਕਾ ਵਿਸੁਂ ਵੁਤ੍ਤਾ. ਤਥਾਪਿ ਅਧਮ੍ਮਕਮ੍ਮਸ੍ਸ ਛਨ੍ਦੋ ਨ ਦਾਤਬ੍ਬੋ ਦੇਨ੍ਤੇ ਅਕਪ੍ਪਿਯਾਨੁਮਤਿਦੁਕ੍ਕਟਤੋ. ਤਤ੍ਥ ਹਿ ਯੋਜਨਦੁਕ੍ਕਟਤੋ ਨ ਮੁਚ੍ਚਨ੍ਤੀਤਿ ਨੋ ਤਕ੍ਕੋਤਿ ਆਚਰਿਯੋ.
ਕਮ੍ਮਪਟਿਬਾਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਛਨ੍ਦਂਅਦਤ੍ਵਾਗਮਨਸਿਕ੍ਖਾਪਦਵਣ੍ਣਨਾ
੪੮੧. ਸਨ੍ਨਿਪਾਤਂ ਅਨਾਗਨ੍ਤ੍ਵਾ ਚੇ ਛਨ੍ਦਂ ਨ ਦੇਤਿ, ਅਨਾਪਤ੍ਤੀਤਿ ਏਕੇ. ਦੁਕ੍ਕਟਨ੍ਤਿ ਏਕੇ ਧਮ੍ਮਕਮ੍ਮਨ੍ਤਰਾਯਕਰਣਾਧਿਪ੍ਪਾਯਤ੍ਤਾ. ਸਙ੍ਘਮਜ੍ਝੇ ਛਨ੍ਦਂ ਦਾਤੁਂ ਲਭਤੀਤਿ ਕੇਚਿ. ਦਿਨ੍ਨਛਨ੍ਦੇ ਸਙ੍ਘਮਜ੍ਝਂ ਪਵਿਸਿਤ੍ਵਾ ਪੁਨ ਗਤੇਪਿ ਛਨ੍ਦੋ ਨ ਪਟਿਪ੍ਪਸ੍ਸਮ੍ਭੇਯ੍ਯਾਤਿ ਚੇ? ਪਟਿਪ੍ਪਸ੍ਸਮ੍ਭਤਿ. ਕਸ੍ਮਾ? ‘‘ਅਹਤ੍ਥਪਾਸੋ ਛਨ੍ਦਾਰਹੋ’’ਤਿਆਦੀਹਿ ਵਿਰੁਜ੍ਝਨਤੋ. ਪਾਲ਼ਿਯਂ ਪਨ ਦਾਤੁਕਾਮਤਾਯ ਹਤ੍ਥਪਾਸਂ ਅਤਿਕ੍ਕਮਨ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਕੇਚਿ.
ਛਨ੍ਦਂਅਦਤ੍ਵਾਗਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੧. ਦੁਬ੍ਬਲਸਿਕ੍ਖਾਪਦਵਣ੍ਣਨਾ
੪੮੪-੫. ਅਦਾਸੀਤਿ ਅਪਲੋਕੇਤ੍ਵਾ ਅਦਾਸਿ. ਭਿਕ੍ਖੂਤਿ ਏਤ੍ਥ ਤੇ ਛਬ੍ਬਗ੍ਗਿਯਾ ਅਤ੍ਤਾਨਂ ਪਰਿਵਜ੍ਜਯਿਤ੍ਵਾ ‘‘ਸਙ੍ਘੋ’’ਤਿ ਅਵਤ੍ਵਾ ‘‘ਭਿਕ੍ਖੂ’’ਤਿ ਆਹਂਸੁ. ਪਰਿਣਾਮੇਨ੍ਤੀਤਿ ਨੇਨ੍ਤਿ. ਤਤ੍ਥ ਲਾਭੋਤਿ ਪਦੁਦ੍ਧਾਰਕਰਣਂ ਇਧ ਅਨਧਿਪ੍ਪੇਤਸ੍ਸਪਿ ਯਸ੍ਸ ਕਸ੍ਸਚਿ ਅਤ੍ਥੁਦ੍ਧਾਰਵਸੇਨ ਲਾਭਦੀਪਨਤ੍ਥਂ. ਚੀਵਰਮੇਵ ਹਿ ਇਧਾਧਿਪ੍ਪੇਤਂ, ਤੇਨੇਵ ‘‘ਅਞ੍ਞਂ ਪਰਿਕ੍ਖਾਰਂ ਦਿਨ੍ਨਂ ਖੀਯਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਂ. ਦਿਨ੍ਨਨ੍ਤਿ ਚ ਪਰਿਕ੍ਖਾਰਨ੍ਤਿ ਚ ਭੁਮ੍ਮਤ੍ਥੇ ਉਪਯੋਗਵਚਨਂ.
ਦੁਬ੍ਬਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੨. ਪਰਿਣਾਮਨਸਿਕ੍ਖਾਪਦਵਣ੍ਣਨਾ
੪੯੧. ਞਾਤਕਮ੍ਪਿ ਪਰਸ੍ਸ ਦਾਤੁਕਾਮਂ ਅਞ੍ਞਸ੍ਸ ਦਾਪੇਤਿ, ਆਪਤ੍ਤਿ ਏਵ. ਸਬ੍ਬਤ੍ਥ ਆਪੁਚ੍ਛਿਤ੍ਵਾ ਦਾਤੁਕਾਮਂ ਯਥਾਸੁਖਂ ਵਿਚਾਰੇਤੁਂ ਲਭਤਿ.
ਪਰਿਣਾਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਸਮਤ੍ਤੋ ਵਣ੍ਣਨਾਕ੍ਕਮੇਨ ਸਹਧਮ੍ਮਿਕਵਗ੍ਗੋ ਅਟ੍ਠਮੋ.