੯. ਰਤਨਵਗ੍ਗੋ

੧. ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ

੪੯੪-੭. ਯਥਾ ਭਗਵਨ੍ਤਂ ਪਯਿਰੁਪਾਸਤਿ, ਏਵਮਾਕਾਰੇਨ ਨਾਰਹਤਾਯਂ ਪੁਰਿਸੋ ਪਾਪੋ ਹੋਤੁਂ, ਨ ਹੋਤਿ ਪਾਪੋਤਿ ਅਤ੍ਥੋ, ਕਾਰਣਤ੍ਥਂ ਵਾ. ਤਨ੍ਤਿ ਨਿਪਾਤਮਤ੍ਤਂ, ਯਤੋਤਿ ਵਾ ਅਤ੍ਥੋ. ਹਤ੍ਥਿਸਮ੍ਮਦ੍ਦਨ੍ਤਿ ਸਙ੍ਘਾਟਸਮ੍ਮਦ੍ਦੋ, ਅਕ੍ਕਮਨਂ ਚੁਣ੍ਣਤਾਤਿ ਅਤ੍ਥੋ.

੪੯੮. ਰਤਨਂ ਨਾਮ ਅਗ੍ਗਮਹੇਸੀ, ਤਥਾਪਿ ਇਧ ਅਞ੍ਞਾਪਿ ਦੇਵਿਗੋਤ੍ਤਾ ਨ ਰਕ੍ਖਤਿ, ਅਨਾਪਤ੍ਤਿਵਾਰੇ ‘‘ਨ ਮਹੇਸੀ ਹੋਤੀ’’ਤਿ ਵਚਨਾਭਾਵਤੋ. ਸਚੇ ਖਤ੍ਤਿਯੋਵ ਹੋਤਿ, ਨਾਭਿਸਿਤ੍ਤੋ. ਅਭਿਸਿਤ੍ਤੋਯੇਵ ਹੋਤਿ, ਨ ਖਤ੍ਤਿਯੋ ਰਕ੍ਖਤੀਤਿ ਆਚਰਿਯੋ. ਅਨਾਪਤ੍ਤਿਵਾਰੇ ਮਾਤਿਕਾਟ੍ਠਕਥਾਯਂ ਅਙ੍ਗਭਾਵੇਨ ਚ ਵੁਤ੍ਤਤ੍ਤਾ ਅਭਿਸਿਤ੍ਤਭਾਵੋਵਪਮਾਣਂ. ਸੇਸਂ ਉਕ੍ਕਟ੍ਠਪਰਿਚ੍ਛੇਦੋਤਿ ਏਕੇ.

੫੦੦-੫੦੧. ‘‘ਨ ਸਯਨਿਘਰੇ ਸਯਨਿਘਰਸਞ੍ਞੀ’’ਤਿ ਤਿਕਚ੍ਛੇਦੋਪਿ ਏਤ੍ਥ ਲਬ੍ਭਤਿ. ਨ ਸਯਨਿਘਰਂ ਨਾਮ ਅਪਰਿਕ੍ਖਿਤ੍ਤਰੁਕ੍ਖਮੂਲਾਦਿ.

ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਰਤਨਸਿਕ੍ਖਾਪਦਵਣ੍ਣਨਾ

੫੦੪. ‘‘ਅਧਿਵਾਸੇਨ੍ਤੁ ਗਹਪਤਿਨੋ ਭਤ੍ਤ’’ਨ੍ਤਿ ਚ ‘‘ਮੇ ਗਹਪਤਿਨੋ’’ਤਿ ਚ ਅਤ੍ਥਿ.

੫੦੬. ਕੁਰੁਨ੍ਦਿਵਚਨੇਨ ਘਰੇਪਿ ਯਦਿ ਭਿਕ੍ਖੂ ਆਸਙ੍ਕਨ੍ਤਿ, ਤਤ੍ਥ ਠਤ੍ਵਾ ਆਚਿਕ੍ਖਿਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਪਤਿਰੂਪਾਤਿ ‘‘ਰਤਨਸਮ੍ਮਤੇ ਪਂਸੁਕੂਲਗ੍ਗਹਣਂ ਵਾ ਰਤਨੇ ਨਿਰੁਸ੍ਸੁਕ੍ਕਗਮਨਂ ਵਾ’’ਤਿ ਲਿਖਿਤਂ. ‘‘ਤਾਵਕਾਲਿਕਵਸੇਨਪਿ ਅਨਾਮਾਸਂ ਪਟਿਗ੍ਗਣ੍ਹਿਤੁਂ ਨ ਲਭਤੀ’’ਤਿ ਵਦਨ੍ਤਿ. ਸਮਾਦਪੇਤ੍ਵਾਤਿ ਯਾਚਿਤ੍ਵਾ ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਜਾ. ੧.੭.੫੯) ਵੁਤ੍ਤਨਯੇਨ.

ਰਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ

੫੧੧-੨. ਅਹਿਨਾ ਡਟ੍ਠਵਤ੍ਥੁਮ੍ਹਿ ਸੋ ਭਿਕ੍ਖੁ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਗਤੋ, ਤਸ੍ਸ ਕੁਕ੍ਕੁਚ੍ਚਂ ਉਦਪਾਦਿ. ਅਦਿਨ੍ਨਾਦਾਨੇ ਵੁਤ੍ਤਨਯੇਨਾਤਿ ਗਾਮੋ ਗਾਮੂਪਚਾਰੋਤਿ ਇਦਂ ਸਨ੍ਧਾਯ ਵੁਤ੍ਤਂ.

ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਸੂਚਿਘਰਸਿਕ੍ਖਾਪਦਵਣ੍ਣਨਾ

੫੧੭. ਤਨ੍ਤਿ ਭੇਦਨਕਂ. ਅਸ੍ਸਾਤਿ ਪਾਚਿਤ੍ਤਿਯਸ੍ਸ ਪਠਮਂ ਭੇਦਨਕਂ ਕਤ੍ਵਾ ਪਚ੍ਛਾ ਦੇਸੇਤਬ੍ਬਤ੍ਤਾ. ਏਸ ਨਯੋ ਇਤਰੇਸੁਪਿ.

੫੨੦. ਵਾਸਿਜਟੇਤਿ ਵਾਸਿਦਣ੍ਡਕੇ.

ਸੂਚਿਘਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਮਞ੍ਚਸਿਕ੍ਖਾਪਦਵਣ੍ਣਨਾ

੫੨੧-੨. ‘‘ਉਚ੍ਚੇ ਮਞ੍ਚੇ’’ਤਿ ਚ ‘‘ਉਚ੍ਚਾ ਮਞ੍ਚੇ’’ਤਿ ਚ ਕਤ੍ਥਚਿ. ਆਯਤੋਤਿ ਵਿਤ੍ਥਤੋ. ਅਟ੍ਠਙ੍ਗੁਲਪਾਦਕਨ੍ਤਿ ਭਾਵਨਪੁਂਸਕਂ, ਅਟ੍ਠਙ੍ਗੁਲਪ੍ਪਮਾਣਂ ਪਾਦਕਂ ਵਾ.

ਮਞ੍ਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ

੫੨੮. ਪੋਟਕਿਤੂਲਨ੍ਤਿ ਯਂ ਕਿਞ੍ਚਿ ਤਿਣਤੂਲਂ. ਪਟਿਲਾਭੇਨ ਉਦ੍ਦਾਲੇਤ੍ਵਾ ਪਾਚਿਤ੍ਤਿਯਂ ਦੇਸੇਤਬ੍ਬਨ੍ਤਿ ਏਤ੍ਥ ਕਿਞ੍ਚਾਪਿ ਪਟਿਲਾਭਮਤ੍ਤੇਨੇਵ ਪਾਚਿਤ੍ਤਿਯਨ੍ਤਿ ਵਿਯ ਦਿਸ੍ਸਤਿ, ਪਰਿਭੋਗੇਯੇਵ ਪਨ ਆਪਤ੍ਤਿ ਦਟ੍ਠਬ੍ਬਾ, ‘‘ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵਚਨਂ ਏਤ੍ਥ ਸਾਧਕਂ.

ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਨਿਸੀਦਨਸਿਕ੍ਖਾਪਦਵਣ੍ਣਨਾ

੫੩੧. ਕਿਞ੍ਚਾਪਿ ਨਿਸੀਦਨਸ੍ਸ ਜਾਤਿ ਨ ਦਿਸ੍ਸਤਿ ਏਤ੍ਥ, ਤਥਾਪਿ ਚੀਵਰਕ੍ਖਨ੍ਧਕੇ ਅਨੁਞ੍ਞਾਤਤ੍ਤਾ, ‘‘ਨਵ ਚੀਵਰਾਨਿ ਅਧਿਟ੍ਠਾਤਬ੍ਬਾਨੀ’’ਤਿ ਏਤ੍ਥ ਚ ਪਰਿਯਾਪਨ੍ਨਤ੍ਤਾ ਚੀਵਰਜਾਤਿਯੇਵਸ੍ਸ ਜਾਤੀਤਿ ਵੇਦਿਤਬ੍ਬਾ. ‘‘ਸਨ੍ਥਤਸਦਿਸਂ ਸਨ੍ਥਰਿਤ੍ਵਾਤਿ ਸਦਸ’’ਨ੍ਤਿ ਪੁਬ੍ਬੇ ਵੁਤ੍ਤਨਿਸੀਦਨਸਨ੍ਥਤਤ੍ਤਾ ਉਪਮੇਤਿ. ਲਾਭੇ ਸਦਸਂ, ਅਲਾਭੇ ਅਦਸਮ੍ਪਿ ਵਟ੍ਟਤੀਤਿ ਏਕੇ, ਤਂ ਨ ਯੁਤ੍ਤਂ. ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਤਸ੍ਸ ਸਣ੍ਠਾਨਨਿਯਮਨਤੋ.

ਨਿਸੀਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਕਣ੍ਡੁਪਟਿਚ੍ਛਾਦਿਸਿਕ੍ਖਾਪਦਵਣ੍ਣਨਾ

੫੩੯. ਯਦਿ ਕਣ੍ਡੁਪਟਿਚ੍ਛਾਦਿ ਨਾਮ ਅਧੋਨਾਭਿ ਉਬ੍ਭਜਾਣੁਮਣ੍ਡਲਾ ਉਪ੍ਪਨ੍ਨਕਣ੍ਡੁਪੀਲ਼ਕਾਦਿਪਟਿਚ੍ਛਾਦਿਕਾ ਅਧਿਪ੍ਪੇਤਾ, ਤਸ੍ਸ ਸੁਗਤਸ੍ਸ ਸੁਗਤਵਿਦਤ੍ਥਿਯਾ ਦੀਘਸੋ ਚਤਸ੍ਸੋ ਵਿਦਤ੍ਥਿਯੋ ਤਿਰਿਯਂ ਦ੍ਵੇਤਿ ਇਦਮ੍ਪਿ ਅਤਿਮਹਨ੍ਤਂ ਪਮਾਣਂ ਦਿਸ੍ਸਤਿ. ਸਬ੍ਬੋ ਹਿ ਪੁਰਿਸੋ ਅਤ੍ਤਨੋ ਅਤ੍ਤਨੋ ਵਿਦਤ੍ਥਿਯਾ ਸਤ੍ਤਵਿਦਤ੍ਥਿਕੋ ਹੋਤਿ, ਸੁਗਤਸ੍ਸ ਚ ਏਕਾਵਿਦਤ੍ਥਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ ਹੋਨ੍ਤਿ, ਤਸ੍ਮਾ ਕਣ੍ਡੁਪਟਿਚ੍ਛਾਦਿ ਪਕਤਿਪੁਰਿਸਸ੍ਸ ਪਮਾਣਂ ਆਪਜ੍ਜਤਿ ਤਿਰਿਯਂ, ਦੀਘਸੋ ਪਨ ਦਿਗੁਣਂ ਆਪਜ੍ਜਤੀਤਿ. ਆਪਜ੍ਜਤੁ, ਉਕ੍ਕਟ੍ਠਪਰਿਚ੍ਛੇਦੋ ਤਸ੍ਸਾ, ਚੇ ਇਚ੍ਛਤਿ, ਸਬ੍ਬਮ੍ਪਿ ਸਰੀਰਂ ਪਟਿਚ੍ਛਾਦੇਸ੍ਸਤਿ, ਸਬ੍ਬਸਰੀਰਗਤਸਙ੍ਘਾਟਿ ਵਿਯ ਬਹੁਗੁਣਂ ਕਤ੍ਵਾ ਨਿਵਾਸੇਤੁਕਾਮੋ ਨਿਵਾਸੇਸ੍ਸਤੀਤਿ ਅਯਂ ਭਗਵਤੋ ਅਧਿਪ੍ਪਾਯੋ ਸਿਯਾ.

ਕਣ੍ਡੁਪਟਿਚ੍ਛਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ

੫੪੨. ਵਸ੍ਸਿਕਸਾਟਿਕਾਪਿ ਉਕ੍ਕਟ੍ਠਪਟਿਚ੍ਛੇਦਵਸੇਨ ਅਨੁਞ੍ਞਾਤਾ. ਵਸ੍ਸਕਾਲੇ ਕੇਚਿ ਸਙ੍ਘਾਟਿਪਰਿਭੋਗੇਨੇਵ ਪਰਿਭੁਞ੍ਜਿਸ੍ਸਨ੍ਤੀਤਿ ਅਯਂ ਭਗਵਤੋ ਅਧਿਪ੍ਪਾਯੋ ਸਿਯਾ. ਕਿਞ੍ਚਾਪਿ ਇਮਿਨਾ ਤਕ੍ਕੇਨ ਅਨੁਞ੍ਞਾਤਾ, ‘‘ਅਪ੍ਪਮਾਣਿਕਾਯੋ ਕਣ੍ਡੁਪਟਿਚ੍ਛਾਦਿਯੋ ਧਾਰੇਨ੍ਤਿ, ਵਸ੍ਸਿਕਸਾਟਿਕਾਯੋ ਧਾਰੇਨ੍ਤੀ’’ਤਿ ਇਮਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਤ੍ਤਾ ਪਨ ਅਞ੍ਞਥਾ ਪੁਣ੍ਣਪਰਿਚ੍ਛੇਦਤੋ ਅਧਿਕਪ੍ਪਮਾਣਾਯੋ ਤੇ ਭਿਕ੍ਖੂ ਧਾਰੇਸੁਨ੍ਤਿ ਕਤ੍ਵਾ ਏਤਪਰਮਤਾ ਤਾਸਂ ਅਨੁਞ੍ਞਾਤਾਤਿ ਵੇਦਿਤਬ੍ਬਾ. ਏਸੇਵ ਨਯੋ ਦਸਮੇਪਿ.

ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਨਨ੍ਦਤ੍ਥੇਰਸਿਕ੍ਖਾਪਦਵਣ੍ਣਨਾ

੫੫੧. ਤਤ੍ਥ ਭਿਸਿਂ ਵਾ ਬਿਬ੍ਬੋਹਨਂ ਵਾ ਕਰੋਤੀਤਿ ਦੀਘਸੋ ਬਹੂਨਂ ਭਿਕ੍ਖੂਨਂ ਸਾਧਾਰਣਤ੍ਥਂ ਕਰੋਤੀਤਿ ਯੁਜ੍ਜਤਿ.

ਨਨ੍ਦਤ੍ਥੇਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਰਤਨਵਗ੍ਗੋ ਨਵਮੋ.

ਪਾਚਿਤ੍ਤਿਯਕਣ੍ਡਵਣ੍ਣਨਾ ਨਿਟ੍ਠਿਤਾ.

੬. ਪਾਟਿਦੇਸਨੀਯਕਣ੍ਡੋ

੧. ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

੫੫੩-੫. ‘‘ਪਟਿਦੇਸੇਤਬ੍ਬਾਕਾਰਦਸ੍ਸਨ’’ਨ੍ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਪਾਲ਼ਿਯਂ ਆਗਤਵਸੇਨੇਵ ਆਪਤ੍ਤਿ ਦੇਸੇਤਬ੍ਬਾ, ਨ ਅਞ੍ਞਥਾ. ‘‘ਅਨ੍ਤਰਘਰੇ ਅਨ੍ਤਰਘਰਸਞ੍ਞੀ’’ਤਿਆਦਿਨਾ ਚ ‘‘ਖਾਦਨੀਯਭੋਜਨੀਯੇ ਅਖਾਦਨੀਯਅਭੋਜਨੀਯਸਞ੍ਞੀ’’ਤਿਆਦਿਨਾ ਚ ‘‘ਭਿਕ੍ਖੁਨਿਯਾ ਅਭਿਕ੍ਖੁਨਿਸਞ੍ਞੀ’’ਤਿਆਦਿਨਾ ਚ ਨਯੇਨ ਅਪਰੇਪਿ ਤਯੋ ਤਿਕਚ੍ਛੇਦਾ ਯੋਜੇਤ੍ਵਾ ਦਸ੍ਸੇਤਬ੍ਬਾ.

ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

੫੫੯. ‘‘ਨਿਮਨ੍ਤਿਤਾ ਭੁਞ੍ਜਨ੍ਤੀਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤਾ ਭੁਞ੍ਜਨ੍ਤੀ’’ਤਿ ਕਿਞ੍ਚਾਪਿ ਵੁਤ੍ਤਂ, ਅਥ ਖੋ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤਿਤਤਾ ਏਤ੍ਥ ਨ ਅਙ੍ਗਂ, ਮਾਤਿਕਾਟ੍ਠਕਥਾਯਂ ਵਾ ਇਧ ਵਾ ਅਨਾਪਤ੍ਤਿਵਾਰੇ ਲੇਸਾਭਾਵਤੋ, ਤਸ੍ਮਾ ‘‘ਨਿਮਨ੍ਤਿਤਾ’’ਤਿ ਪਦਸ੍ਸ ਅਤ੍ਥੋ ਪੁਬ੍ਬੇ ਆਚਿਣ੍ਣਵਸੇਨੇਵ ਵੁਤ੍ਤੋ. ਅਪਰੇਪਿ ਤਯੋ ਤਿਕਚ੍ਛੇਦਾ ਯੋਜੇਤ੍ਵਾ ਦਸ੍ਸੇਤਬ੍ਬਾ ਪਦਭਾਜਨੇ ਵੁਤ੍ਤਤ੍ਤਾਤਿ ਵੇਦਿਤਬ੍ਬਂ. ਯਥਾ ਤਥਾ ਹਿ ਭੁਞ੍ਜਨ੍ਤਾਨਂ ਤਾਦਿਸਂ ਭਿਕ੍ਖੁਨਿਂ ਅਵਾਰੇਨ੍ਤਾਨਂ ਪਾਟਿਦੇਸਨੀਯਮੇਵ. ‘‘ਏਸਾ ਵੋਸਾਸਤਿ ਨਾਮ, ਵੋਸਾਸਨ੍ਤੀ’’ਤਿ ਚ ਦੁਵਿਧੋ ਪਾਠੋ. ‘‘ਅਜ੍ਝੋਹਾਰੇ ਅਜ੍ਝੋਹਾਰੇ’’ਤਿ ਵਚਨੇਨ ਪੁਨ ‘‘ਗਾਰਯ੍ਹਂ ਆਵੁਸੋ ਧਮ੍ਮ’’ਨ੍ਤਿ ਏਕਵਚਨਂ ਵਿਰੁਦ੍ਧਨ੍ਤਿ. ਪਠਮਂ ਅਜ੍ਝੋਹਾਰੇਯੇਵ ਆਪਨ੍ਨਂ ਸਨ੍ਧਾਯ ਵੁਤ੍ਤਂ, ਤਥਾ ਅਞ੍ਞਤ੍ਰਾਪਿ ਆਗਚ੍ਛਤਿ ‘‘ਆਪਜ੍ਜਿਮ੍ਹਾ’’ਤਿ ਵਚਨਤੋ. ਏਕੇਨ ਬਹੂਨਮ੍ਪਿ ਵਟ੍ਟਤੀਤਿ ਕੇਚਿ, ਤਂ ਨ ਸੁਨ੍ਦਰਂ. ‘‘ਤੇਹਿ ਭਿਕ੍ਖੂਹੀ’’ਤਿਆਦਿਨਾ ਪਾਠੇ ਵੁਤ੍ਤਤ੍ਤਾਤਿ ਮਮ ਤਕ੍ਕੋ. ਏਕੇਨ ਸਹੇਵ ‘‘ਅਹਂ ਆਪਜ੍ਜਿ’’ਨ੍ਤਿਪਿ ਵਤ੍ਤਬ੍ਬਨ੍ਤਿ ਏਕੇਨ ਦ੍ਵੀਹਿ ਤੀਹਿ ਦੇਸੇਤਬ੍ਬਤੋ, ਸਬ੍ਬੇਹਿ ਏਵਂ ਵਤ੍ਤੁਂ ਵਟ੍ਟਤਿ. ‘‘ਆਪਜ੍ਜਿਮ੍ਹਾਤਿ ਸਹੇਵਾ’’ਤਿ ਵਦਨ੍ਤਿ. ਏਕੇਨ ਚੇ ਅਵਾਰਿਤੋ, ‘‘ਅਹਂ, ਆਵੁਸੋ, ਗਾਰਯ੍ਹਂ ਧਮ੍ਮਂ ਆਪਜ੍ਜਿ’’ਨ੍ਤਿਪਿ ਵਤ੍ਤਬ੍ਬਂ.

ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੬੨-੫੭੦. ਤਤਿਯਚਤੁਤ੍ਥਸਿਕ੍ਖਾਪਦਾਨਿ ਉਤ੍ਤਾਨਤ੍ਥਾਨਿਯੇਵ.

ਪਾਟਿਦੇਸਨੀਯਕਣ੍ਡਵਣ੍ਣਨਾ ਨਿਟ੍ਠਿਤਾ.

੭. ਸੇਖਿਯਕਣ੍ਡੋ

੧. ਪਰਿਮਣ੍ਡਲਵਗ੍ਗਵਣ੍ਣਨਾ

੫੭੬. ‘‘ਸਿਕ੍ਖਿਤਸਿਕ੍ਖੇਨਾਤਿ ਚਤੂਹਿ ਮਗ੍ਗੇਹੀ’’ਤਿ ਵੁਤ੍ਤਂ. ਯਸ੍ਮਾ ਅਟ੍ਠਙ੍ਗੁਲਮਤ੍ਤਂ ਓਤਾਰੇਤ੍ਵਾ ਨਿਵਤ੍ਥਮੇਵ ਨਿਸਿਨ੍ਨਸ੍ਸ ਚਤੁਰਙ੍ਗੁਲਮਤ੍ਤਂ ਹੋਤਿ, ਤਸ੍ਮਾ ਉਭੋਪੇਤੇ ਅਟ੍ਠਕਥਾਵਾਦਾ ਏਕਪਰਿਚ੍ਛੇਦਾ, ‘‘ਅਡ੍ਢਤੇਯ੍ਯਹਤ੍ਥ’’ਨ੍ਤਿ ਸੁਖੁਮਂ, ਏਕਪਤ੍ਤਂ ਵਾ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਯਥਾਠਾਨੇਨ ਤਿਟ੍ਠਤਿ. ਦੁਪਟ੍ਟਂ ਸਨ੍ਧਾਯ ‘‘ਦ੍ਵਿਹਤ੍ਥਪ੍ਪਮਾਣਮ੍ਪੀ’’ਤਿ ਵੁਤ੍ਤਨ੍ਤਿ ਉਪਤਿਸ੍ਸਤ੍ਥੇਰੋ. ਏਕਪਟ੍ਟਂ, ਦ੍ਵਿਪਟ੍ਟਂ ਵਾ ਹੇਟ੍ਠਿਮਪਰਿਚ੍ਛੇਦੇਨ ‘‘ਦ੍ਵਿਹਤ੍ਥਪ੍ਪਮਾਣ’’ਨ੍ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਵੁਤ੍ਤਞ੍ਹਿ ਨਿਸ੍ਸਗ੍ਗਿਯਅਟ੍ਠਕਥਾਯਂ ‘‘ਤਿਰਿਯਂ ਦ੍ਵਿਹਤ੍ਥੋਪਿ ਵਟ੍ਟਤੀ’’ਤਿ, ਤਞ੍ਚ ਖੋ ਅਲਾਭੇ ਏਵ ‘‘ਅਲਾਭੇ ਤਿਰਿਯਂ ਦ੍ਵਿਹਤ੍ਥਪ੍ਪਮਾਣਮ੍ਪਿ ਵਟ੍ਟਤੀ’’ਤਿ ਵੁਤ੍ਤਤ੍ਤਾ. ਇਦਂ ਸਬ੍ਬਂ ਅਧਿਟ੍ਠਾਨੁਪਗਂ ਸਨ੍ਧਾਯ ਵੁਤ੍ਤਂ. ਵਿਰੁਦ੍ਧਂ ਦਿਸ੍ਵਾ ਸਜ੍ਜੇਤਬ੍ਬਂ. ਨੋ ਚੇ ਸਜ੍ਜੇਤਿ, ਦੁਕ੍ਕਟਂ. ਸਚਿਤ੍ਤਕਂ ਪਣ੍ਣਤ੍ਤਿਵਿਜਾਨਨਚਿਤ੍ਤੇਨੇਵ ‘‘ਅਨਾਦਰਿਯਂ ਪਟਿਚ੍ਚਾ’’ਤਿ ਵੁਤ੍ਤਤ੍ਤਾ, ਨ ਵਤ੍ਥੁਵਿਜਾਨਨਚਿਤ੍ਤੇਨ ‘‘ਇਦਮੇਵਂ ਕਤ’’ਨ੍ਤਿ ਜਾਨਤੋਪਿ ਆਪਤ੍ਤਿਯਾ ਅਭਾਵਤੋ. ਫੁਸ੍ਸਦੇਵਤ੍ਥੇਰਵਾਦੋਪਿ ਏਕੇਨ ਪਰਿਯਾਯੇਨ ਯੁਜ੍ਜਤਿ. ਤਥਾ ਉਪਤਿਸ੍ਸਤ੍ਥੇਰਵਾਦੋਪਿ. ਪਞ੍ਞਤ੍ਤੇਪਿ ਸਿਕ੍ਖਾਪਦੇ ਅਪਞ੍ਞਤ੍ਤੇਪਿ ਯਂ ਪਕਤਿਯਾ ਵਜ੍ਜਂ, ਤਂ ਲੋਕਵਜ੍ਜਂ. ਇਦਂ ਪਨ ਪਞ੍ਞਤ੍ਤੇਯੇਵ ਵਜ੍ਜਂ, ਨਾਪਞ੍ਞਤ੍ਤੇ, ਤਸ੍ਮਾ ਇਤਰਲੋਕਵਜ੍ਜੇਨ ਅਸਦਿਸਤ੍ਤਾ ਨ ਲੋਕਵਜ੍ਜਂ. ਪਣ੍ਣਤ੍ਤਿਤੋ ਪਟ੍ਠਾਯ ਵਜ੍ਜਤੋ ਪਣ੍ਣਤ੍ਤਿਵਜ੍ਜਂ. ਅਨਾਦਰਿਯਚਿਤ੍ਤੇਨੇਵ ਆਪਜ੍ਜਿਤਬ੍ਬਤ੍ਤਾ ਸਚਿਤ੍ਤਕਂ, ਤਸ੍ਸ ਚਿਤ੍ਤਸ੍ਸ ਤਿਵੇਦਨਤ੍ਤਾ ਤਿਵੇਦਨਂ. ਯਸ੍ਮਾ ਅਨਾਦਰਿਯਚਿਤ੍ਤਤਾ ਨਾਮ ਕੇਵਲਂ ਅਕੁਸਲਮੇਵ, ਤਞ੍ਚ ਪਕਤਿਯਾ ਵਜ੍ਜਂ, ਤਸ੍ਮਾ ਇਦਂ ਲੋਕਵਜ੍ਜਂ. ਸਞ੍ਚਿਚ੍ਚ ਵੀਤਿਕ੍ਕਮਨਂ ਨਾਮ ਦੋਮਨਸ੍ਸਿਕਸ੍ਸੇਵ ਹੋਤੀਤਿ ਦੁਕ੍ਖਵੇਦਨਂ. ਗਣ੍ਠਿਪਦੇ ਪਨ ‘‘ਪਾਣਾਤਿਪਾਤਾਦਿ ਵਿਯ ਨਿਵਾਸਨਾਦਿਦੋਸੋ ਲੋਕਗਰਹਿਤੋ ਨ ਹੋਤੀਤਿ ਪਣ੍ਣਤ੍ਤਿਵਜ੍ਜਨ੍ਤਿ ਫੁਸ੍ਸਦੇਵਤ੍ਥੇਰੋ’’ਤਿ ਲਿਖਿਤਂ.

੫੭੭. ਵਿਹਾਰੇਪੀਤਿ ਬੁਦ੍ਧੁਪਟ੍ਠਾਨਾਦਿਕਾਲੇ, ਤਸ੍ਮਾ ‘‘ਪਾਰੁਪਿਤਬ੍ਬ’’ਨ੍ਤਿ ਉਤ੍ਤਰਾਸਙ੍ਗਕਿਚ੍ਚਵਸੇਨ ਵੁਤ੍ਤਂ. ਪਠਮਦੁਤਿਯਸਿਕ੍ਖਾਪਦੇਸੁ ਪਰਿਲ਼ਾਹਾਦਿਪਚ੍ਚਯਾ ਕਪ੍ਪਤਿ, ਨ ਅਨ੍ਤਰਘਰਪਟਿਸਂਯੁਤ੍ਤੇਸੁ.

੫੮੨. ‘‘ਏਕਸ੍ਮਿਂ ਪਨ ਠਾਨੇ ਠਤ੍ਵਾ’’ਤਿ ਏਤ੍ਥ ‘‘ਗਚ੍ਛਨ੍ਤੋਪਿ ਪਰਿਸ੍ਸਯਾਭਾਵਂ ਓਲੋਕੇਤੁਂ ਲਭਤਿਯੇਵ. ਤਥਾ ਗਾਮੇ ਪੂਜ’’ਨ੍ਤਿ ਲਿਖਿਤਂ, ਤਂ ਪਨ ‘‘ਏਕਸ੍ਮਿਂ ਠਾਨੇ ਠਤ੍ਵਾ’’ਤਿ ਵੁਤ੍ਤਤ੍ਤਾ ਤਾਦਿਸਂ ਅਨ੍ਤਰਾਯਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਪਰਿਮਣ੍ਡਲਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਉਜ੍ਜਗ੍ਘਿਕਵਗ੍ਗਵਣ੍ਣਨਾ

੫੮੬. ਹਸਨੀਯਸ੍ਮਿਨ੍ਤਿ ਹੇਤ੍ਵਤ੍ਥੇ ਭੁਮ੍ਮਂ, ਹਸਿਤਬ੍ਬਵਤ੍ਥੁਕਾਰਣਾਤਿ ਅਤ੍ਥੋ. ਅਨ੍ਤਰਘਰੇ ਉਚ੍ਚਾਸਦ੍ਦੇਨ ਅਨੁਮੋਦਨਾਦਿਂ ਕਰੋਨ੍ਤਸ੍ਸ ਅਨਾਪਤ੍ਤਿ ਕਿਰ. ਤਥਾ ਹਿ ਮਹਿਨ੍ਦਤ੍ਥੇਰੋਪਿ ਹਤ੍ਥਿਸਾਲਾਦੀਸੁ ਮਹਾਜਨਸ੍ਸ ਕਥੇਸਿ.

੫੯੧. ਕੇਚਿ ਭਿਕ੍ਖੂ ‘‘ਪਰਿਕ੍ਖਾਰਟ੍ਠਪਨਮਤ੍ਤੇਨ ਵਾਸੂਪਗਤੋ ਹੋਤੀ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਮੇਵ. ਭਿਕ੍ਖੁਨਿਯੋ ਚੇ ਵਾਸੂਪਗਾ ਹੋਨ੍ਤਿ, ਭਿਕ੍ਖੁਨੁਪਸ੍ਸਯੋਵ ਕਪ੍ਪਿਯਭੂਮਿ. ‘‘ਯਤ੍ਥ ਭਿਕ੍ਖੁਨਿਯੋ ਏਕਰਤ੍ਤਮ੍ਪਿ ਵਸਨ੍ਤਿ, ਅਯਂ ਭਿਕ੍ਖੁਨੁਪਸ੍ਸਯੋ’’ਤਿ (ਪਾਚਿ. ੧੬੧) ਵਚਨਤੋ ਤਾਸਂ ਸਮੀਪਂ ਵਾ ਤਾਹਿ ਗਹਿਤਵਾਸਾਗਾਰਂ ਵਾ ‘‘ਗਚ੍ਛਾਮੀ’’ਤਿ ਗਚ੍ਛਤੋ ਯਥਾਸੁਖਂ ਗਨ੍ਤੁਂ ਵਟ੍ਟਤਿ. ਨ ਹਿ ਤਾਵਤਾ ਤਂ ਘਰਂ ਅਨ੍ਤਰਘਰਸਙ੍ਖ੍ਯਂ ਗਚ੍ਛਤੀਤਿ ਨੋ ਤਕ੍ਕੋਤਿ ਆਚਰਿਯੋ.

ਉਜ੍ਜਗ੍ਘਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.

੩. ਖਮ੍ਭਕਤਵਗ੍ਗਵਣ੍ਣਨਾ

੬੦੪. ਸੂਪੋ ਪਤ੍ਤਪ੍ਪਮਾਣਵਣ੍ਣਨਾਯਂ ਵੁਤ੍ਤਾਕਾਰੋ. ਓਲੋਣੀ ਵੁਚ੍ਚਤਿ ਕੁਧਿਤਂ, ਗੋਰਸਤੋ ਪੂਰਾ ਥੂਪਿਤੋਤਿ ਅਤ੍ਥੋ.

੬੦੫. ਹੇਟ੍ਠਾ ਓਰੋਹਤੀਤਿ ਏਤ੍ਥ ‘‘ਓਰੋਹਨਪ੍ਪਮਾਣੇ ਸਤਿ ਏਕਦੇਸੇ ਥੂਪੀਕਤੇਪਿ ਅਨਾਪਤ੍ਤੀ’’ਤਿ ਵਦਨ੍ਤਿ. ‘‘ਪਤ੍ਤਸ੍ਸ ਪਨ ਹੇਟ੍ਠਾ ਚ ਉਪਰਿ ਚ ਪਦੁਮਿਨਿਪਣ੍ਣਾਦੀਹਿ ਪਟਿਚ੍ਛਾਦੇਤ੍ਵਾ ਓਦਹਨ੍ਤਿਯਾ ਲਦ੍ਧਂ ਨਾਮ ਵਟ੍ਟਤੀ’’ਤਿ ਚ ਵਦਨ੍ਤਿ. ਏਤ੍ਥ ‘‘ਯਸ੍ਮਾ ‘ਸਮਤਿਤ੍ਤਿਕੋ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ’ਤਿ ਵਚਨਂ ਪਿਣ੍ਡਪਾਤੋ ਸਮਪੁਣ੍ਣੋ ਪਟਿਗ੍ਗਹੇਤਬ੍ਬੋਤਿ ਦੀਪੇਤਿ, ਤਸ੍ਮਾ ਅਤ੍ਤਨੋ ਹਤ੍ਥਗਤੇ ਪਤ੍ਤੇ ਪਿਣ੍ਡਪਾਤੋ ਦਿਯ੍ਯਮਾਨੋ ਥੂਪੀਕਤੋਪਿ ਚੇ ਹੋਤਿ, ਵਟ੍ਟਤੀਤਿ ਦੀਪੇਤਿ. ‘ਥੂਪੀਕਤਂ ਪਿਣ੍ਡਪਾਤਂ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ ਹਿ ਵਚਨਂ ਪਠਮਂ ਥੂਪੀਕਤਂ ਪਿਣ੍ਡਪਾਤਂ ਪਚ੍ਛਾ ਪਟਿਗ੍ਗਣ੍ਹਤੋ, ਆਪਤ੍ਤੀਤਿ ਦੀਪੇਤਿ. ਪਤ੍ਤੇਨ ਪਟਿਗ੍ਗਣ੍ਹਤੋ ਚੇਪਿ ਥੂਪੀਕਤਂ ਹੋਤਿ, ਵਟ੍ਟਤਿ ਅਥੂਪੀਕਤਸ੍ਸ ਪਟਿਗ੍ਗਹਿਤਤ੍ਤਾ. ਪਯੋਗੋ ਪਨ ਨਤ੍ਥਿ ਅਞ੍ਞਤ੍ਰ ਪੁਬ੍ਬਦੇਸਾ’’ਤਿ ਚ ‘‘ਸਮਤਿਤ੍ਤਿਕਨ੍ਤਿ ਵਾ ਭਾਵਨਪੁਂਸਕ’’ਨ੍ਤਿ ਚ ਵਦਨ੍ਤਿ, ਤਸ੍ਮਾ ਵਿਚਾਰੇਤ੍ਵਾ ਗਹੇਤਬ੍ਬਂ.

ਖਮ੍ਭਕਤਵਗ੍ਗਵਣ੍ਣਨਾ ਨਿਟ੍ਠਿਤਾ.

੪. ਸਕ੍ਕਚ੍ਚਵਗ੍ਗਵਣ੍ਣਨਾ

੬੦੯. ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦੇ ‘‘ਸੂਪੋ ਨਾਮ ਦ੍ਵੇ ਸੂਪਾ’’ਤਿ ਨ ਵੁਤ੍ਤਂ ਸੂਪਗ੍ਗਹਣੇਨ ਪਣੀਤਭੋਜਨੇਹਿ ਅਵਸੇਸਾਨਂ ਸਬ੍ਬਭੋਜਨਾਨਂ ਸਙ੍ਗਣ੍ਹਨਤ੍ਥਂ. ਅਨਾਪਤ੍ਤਿਵਾਰੇ ਚਸ੍ਸ ‘‘ਞਾਤਕਾਨਂ ਪਵਾਰਿਤਾਨਂ ਅਞ੍ਞਸ੍ਸਤ੍ਥਾਯ ਅਤ੍ਤਨੋ ਧਨੇਨਾ’’ਤਿ ਇਦਂ ਅਧਿਕਂ. ਕਤ੍ਥਚਿ ਪੋਤ੍ਥਕੇ ‘‘ਅਨਾਪਤ੍ਤਿ ਅਸਞ੍ਚਿਚ੍ਚ ਅਸਤਿਯਾ ਅਜਾਨਨ੍ਤਸ੍ਸ ਗਿਲਾਨਸ੍ਸ ਆਪਦਾਸੂ’’ਤਿ ਏਤ੍ਤਕਮੇਵ ਵੁਤ੍ਤਂ, ਤਂ ਨ, ‘‘ਸਮਸੂਪਕਂ ਪਿਣ੍ਡਪਾਤਂ ਭੁਞ੍ਜਿਸ੍ਸਾਮੀ’’ਤਿ ਇਮਸ੍ਸ ਅਨਾਪਤ੍ਤਿਵਾਰੇ ‘‘ਅਞ੍ਞਸ੍ਸਤ੍ਥਾਯਾ’’ਤਿ ਕਤ੍ਥਚਿ ਲਿਖਿਤਂ, ਤਞ੍ਚ ਪਮਾਦਵਸੇਨ ਲਿਖਿਤਂ. ‘‘ਮੁਖੇ ਪਕ੍ਖਿਪਿਤ੍ਵਾ ਪੁਨ ਵਿਪ੍ਪਟਿਸਾਰੀ ਹੁਤ੍ਵਾ ਓਗਿਲਿਤੁਕਾਮਸ੍ਸਪਿ ਸਹਸਾ ਚੇ ਪਵਿਸਤਿ, ਏਤ੍ਥ ‘ਅਸਞ੍ਚਿਚ੍ਚਾ’ਤਿ ਵੁਚ੍ਚਤਿ. ਵਿਞ੍ਞਤ੍ਤਮ੍ਪਿ ਅਵਿਞ੍ਞਤ੍ਤਮ੍ਪਿ ਏਕਸ੍ਮਿਂ ਠਾਨੇ ਠਿਤਂ ਸਹਸਾ ਅਨੁਪਧਾਰੇਤ੍ਵਾ ਗਹੇਤ੍ਵਾ ਭੁਞ੍ਜਨ੍ਤੋ ‘ਅਸਤਿਯਾ’ਤਿ ਵੁਚ੍ਚਤੀ’’ਤਿ ਲਿਖਿਤਂ, ਅਨਾਪਤ੍ਤਿਵਾਰੇ ਏਕਚ੍ਚੇਸੁ ਪੋਤ੍ਥਕੇਸੁ ‘‘ਰਸਰਸੇਤਿ ਲਿਖਿਤਂ, ਤਂ ਗਹੇਤਬ੍ਬ’’ਨ੍ਤਿ ਵੁਤ੍ਤਂ.

ਸਕ੍ਕਚ੍ਚਵਗ੍ਗਵਣ੍ਣਨਾ ਨਿਟ੍ਠਿਤਾ.

੫. ਕਬਲ਼ਵਗ੍ਗਵਣ੍ਣਨਾ

੬੧੮. ‘‘ਸਬ੍ਬਂ ਹਤ੍ਥ’’ਨ੍ਤਿ ਵਚਨਤੋ ਏਕਦੇਸਂ ਮੁਖੇ ਪਕ੍ਖਿਪਨ੍ਤਸ੍ਸ ਅਨਾਪਤ੍ਤੀਤਿ ਏਕਚ੍ਚੇ. ‘‘ਸਬ੍ਬਨ੍ਤਿ ਵਚਨਤੋ ਏਕਦੇਸਮ੍ਪਿ ਨ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਯੁਤ੍ਤਂ ਅਨਾਪਤ੍ਤਿਵਾਰੇ ਅਵਿਸੇਸਿਤਤ੍ਤਾ.

੬੨੪. ਸਿਤ੍ਥਾਵਕਾਰਕੇ ‘‘ਕਚਵਰਂ ਛਡ੍ਡੇਨ੍ਤਂ ਸਿਤ੍ਥਂ ਛਡ੍ਡਿਯ੍ਯਤੀ’’ਤਿ ਚ ‘‘ਕਚਵਰਂ ਛਡ੍ਡੇਨ੍ਤੋ’’ਤਿ ਚ ਪਾਠੋ.

ਕਬਲ਼ਵਗ੍ਗਵਣ੍ਣਨਾ ਨਿਟ੍ਠਿਤਾ.

੬. ਸੁਰੁਸੁਰੁਵਗ੍ਗਵਣ੍ਣਨਾ

੬੨੭. ‘‘ਸੁਰੁਸੁਰੁ’’ਨ੍ਤਿ ਚ ‘‘ਸੁਰੋਸੁਰੋ’’ਤਿ ਚ ਪਾਠੋ. ਸੀਤੀਕਤੋਤਿ ਸੀਤਙ੍ਕੋ. ‘‘ਸਿਲਕਬੁਦ੍ਧੋਤਿ ਅਰਿਯਾਨਂ ਪਰਿਹਾਸਵਚਨਮੇਵੇਤ’’ਨ੍ਤਿ ਲਿਖਿਤਂ.

੬੩੧. ਪਟਿਕ੍ਕੂਲਵਸੇਨਾਤਿ ਏਤ੍ਥ ਯਦਿ ਪਟਿਕ੍ਕੂਲਵਸੇਨ ਪਟਿਕ੍ਖਿਤ੍ਤਂ, ‘‘ਸੇਯ੍ਯਥਾਪਿ ਕਾਮਭੋਗਿਨੋ’’ਤਿ ਨ ਵਤ੍ਤਬ੍ਬਂ. ਨ ਹਿ ਤੇ ਪਟਿਕ੍ਕੂਲਂ ਕਰੋਨ੍ਤੀਤਿ ਚੇ? ਨ, ਇਸ੍ਸਰਿਯਲਿਙ੍ਗਵਸੇਨ ਗਹਣਸਮ੍ਭਵਤੋ. ਤੇ ਹਿ ਅਨਾਦਰਾ ਹੋਨ੍ਤਿ. ਪਤ੍ਤਧੋਵਨਨ੍ਤਿ ਪਤ੍ਤਧੋਵਨੋਦਕਂ ਭੋਜਨਪਟਿਸਂਯੁਤ੍ਤਂ.

੬੩੪. ‘‘ਛਤ੍ਤਪਾਦੁਕਾਯ’’ਨ੍ਤਿ ਚ ‘‘ਛਤ੍ਤਪਾਦੇ’’ਤਿ ਚ ਪਾਠੋ.

੬੩੭. ਚਾਪੋਤਿ ਸਤ੍ਤਖਾਦਨਵਧੋ. ‘‘ਸੇਸਾ ਸਬ੍ਬਾ ਧਨੁਵਿਕਤਿ ਕੋਦਣ੍ਡੇ ਪਵਿਟ੍ਠਾ’’ਤਿ ਚ ਲਿਖਿਤਂ, ਪਟਿਮੁਕ੍ਕਨ੍ਤਿ ਪਵੇਸਿਤਂ, ਲਗ੍ਗਿਤਂ ਹੋਤੀਤਿ ਅਤ੍ਥੋ.

ਸੁਰੁਸੁਰੁਵਗ੍ਗਵਣ੍ਣਨਾ ਨਿਟ੍ਠਿਤਾ.

੭. ਪਾਦੁਕਵਗ੍ਗਵਣ੍ਣਨਾ

੬੪੦. ਸਯਂ ਯਾਨਗਤੋ ਹੁਤ੍ਵਾ, ਯਥਾ ਯਾਨਗਤਸ੍ਸ ਵੇ.

ਅਲਂ ਵਤ੍ਤੁਂ ਤਥਾ ਨਾਲਂ, ਸਛਤ੍ਤੋ ਛਤ੍ਤਪਾਣਿਨੋ.

ਯਥਾ ਏਤ੍ਥ, ਏਵਂ ਅਞ੍ਞਤ੍ਰਾਪਿ.

੬੪੭. ਛਪਕਵਤ੍ਥੁਸ੍ਮਿਂ ‘‘ਸਚਾਹਂ ਨ ਲਭਿਸ੍ਸਾਮੀ’’ਤਿ ਪਾਠੋ, ‘‘ਦਸ ਚੇ ਨ ਲਭਿਸ੍ਸਾਮੀ’’ਤਿ ਚ ਅਤ੍ਥਿ, ‘‘ਵਤ੍ਥੁਸ੍ਮਿਂ ਅਗਿਲਾਨਸ੍ਸਾ’’ਤਿ ਚ ਆਗਚ੍ਛਤਿ, ਤਂ ਨ ਸੁਨ੍ਦਰਂ, ਸਿਕ੍ਖਾਪਦੇਯੇਵ ਸੁਨ੍ਦਰਂ. ਥੋਮਿਤੋਤਿ ਅਹਮ੍ਪਿ ਜਾਨਾਮੀਤਿ ਸਮ੍ਬਨ੍ਧੋ. ਯਾ ਧਨਯਸਲਾਭਸਙ੍ਖਾਤਾ ਵੁਤ੍ਤਿ ਵਿਨਿਪਾਤੇਨ ਹੋਤਿ ਸਮ੍ਪਰਾਯੇ ਅਪਾਯੇਸੁ ਵਿਨਿਪਾਤਹੇਤੁ ਹੁਤ੍ਵਾ ਪਵਤ੍ਤਤਿ. ਅਥ ਵਾ ਵਿਨਿਪਾਤੇਨਾਤਿ ਹੇਤ੍ਵਤ੍ਥੇ ਕਰਣਵਚਨਂ, ਵਿਨਿਪਾਤਨਾਯ ਪਵਤ੍ਤਤੀਤਿ ਅਧਿਪ੍ਪਾਯੋ. ਅਧਮ੍ਮਚਰਣੇਨ ਅਧਮ੍ਮਚਰਣਾਯ. ‘‘ਅਸ੍ਮਾ ਕੁਮ੍ਭਿਮਿਵਾ’’ਤਿ ਚ ਪਠਨ੍ਤਿ.

ਪਾਦੁਕਵਗ੍ਗਵਣ੍ਣਨਾ ਨਿਟ੍ਠਿਤਾ.

ਪਕਿਣ੍ਣਕਵਣ੍ਣਨਾ

ਕਾਯਵਾਚਾਚਿਤ੍ਤਤੋ ਸਮੁਟ੍ਠਹਨ੍ਤੀਤਿ ਕਤ੍ਵਾ ‘‘ਸਮਨੁਭਾਸਨਸਮੁਟ੍ਠਾਨਾਨੀ’’ਤਿ ਵੁਤ੍ਤਾਨਿ. ਸਮਨੁਭਾਸਨਂ ਕਿਰਿਯਂ. ਇਮਾਨਿ ਕਿਰਿਯਾਨਿ. ਧਮ੍ਮਦੇਸਨਸਮੁਟ੍ਠਾਨਾਨਿ ਵਾਚਾਚਿਤ੍ਤਤੋਤਿ ਏਤ੍ਥ ਕਾਯਵਚੀਵਿਞ੍ਞਤ੍ਤਿਭਾਵਤੋ ਉਜ੍ਜਗ੍ਘਿਕਉਚ੍ਚਾਸਦ੍ਦਾਦੀਸੁ ਵਿਯ ‘‘ਕਾਯਵਾਚਾਚਿਤ੍ਤਤੋ’’ਤਿ ਵਤ੍ਤਬ੍ਬਾਨੀਤਿ ਚੇ? ਨ ਵਤ੍ਤਬ੍ਬਾਨਿ. ਨਿਸੀਦਨਗਮਨਾਹਾਰਪਕ੍ਖਿਪਨਾਦਿਕਾਯਵਿਞ੍ਞਤ੍ਤਿਯਾ ਸਬ੍ਭਾਵਾ ਤਤ੍ਥ ਯੁਤ੍ਤਂ, ਨ ਧਮ੍ਮਦੇਸਨੇ ਤਾਦਿਸਸ੍ਸਾਭਾਵਾ.

ਪਕਿਣ੍ਣਕਵਣ੍ਣਨਾ ਨਿਟ੍ਠਿਤਾ.

ਸੇਖਿਯਕਣ੍ਡਵਣ੍ਣਨਾ ਨਿਟ੍ਠਿਤਾ.

੮. ਸਤ੍ਤਾਧਿਕਰਣਸਮਥਵਣ੍ਣਨਾ

‘‘ਯੇਭੁਯ੍ਯਸਿਕਾ ਕਾਤਬ੍ਬਾ…ਪੇ… ਤਿਣਵਤ੍ਥਾਰਕੋ ਕਾਤਬ੍ਬੋ, ਸੋ ਪੁਗ੍ਗਲੋ’’ਤਿ ਚ ਲਿਖਿਤਂ.

ਸਤ੍ਤਾਧਿਕਰਣਸਮਥਵਣ੍ਣਨਾ ਨਿਟ੍ਠਿਤਾ.

ਭਿਕ੍ਖੁਵਿਭਙ੍ਗੋ ਨਿਟ੍ਠਿਤੋ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ