੭. ਸਪ੍ਪਾਣਕਵਗ੍ਗੋ
੧. ਸਞ੍ਚਿਚ੍ਚਪਾਣਸਿਕ੍ਖਾਪਦਵਣ੍ਣਨਾ
੩੮੨. ਸਞ੍ਚਿਚ੍ਚਪਾਣਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੨. ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ
੩੮੭. ‘‘ਪਾਣੋ ਅਤ੍ਥੀ’’ਤਿ ਜਾਨਨ੍ਤੋਪਿ ‘‘ਮਰਿਸ੍ਸਨ੍ਤੀ’’ਤਿ ਅਵਿਚਾਰੇਤ੍ਵਾ ਪਿਵਤਿਚੇ, ਅਨਾਪਤ੍ਤਿ.
ਜਲੇ ਪਕ੍ਖਿਪਨਂ ਪੁਪ੍ਫਂ, ਜਲਪ੍ਪਵੇਸਨਂ ਇਦਂ;
ਏਵਂ ਉਭਿਨ੍ਨਂ ਨਾਨਤ੍ਤਂ, ਞੇਯ੍ਯਂ ਞਾਣਵਤਾ ਸਦਾਤਿ.
ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਉਕ੍ਕੋਟਨਸਿਕ੍ਖਾਪਦਵਣ੍ਣਨਾ
੩੯੨. ਤਤਿਯੇ ਦ੍ਵਾਦਸ ਉਕ੍ਕੋਟਾ ਵੇਦਿਤਬ੍ਬਾ. ਤਤ੍ਥ ਅਕਤਂ ਕਮ੍ਮਂ, ਦੁਕ੍ਕਟਂ ਕਮ੍ਮਂ, ਪੁਨ ਕਾਤਬ੍ਬਂ ਕਮ੍ਮਨ੍ਤਿ ਅਨੁਵਾਦਾਧਿਕਰਣੇ ਲਬ੍ਭਨ੍ਤਿ. ਅਨਿਹਟਂ, ਦੁਨ੍ਨਿਹਟਂ, ਨ ਪੁਨ ਹਰਿਤਬ੍ਬਨ੍ਤਿ ਵਿਵਾਦਾਧਿਕਰਣੇ ਲਬ੍ਭਨ੍ਤਿ, ਅਵਿਨਿਚ੍ਛਿਤਂ, ਦੁਵਿਨਿਚ੍ਛਿਤਂ, ਪੁਨ ਵਿਨਿਚ੍ਛਿਤਬ੍ਬਨ੍ਤਿ ਆਪਤ੍ਤਾਧਿਕਰਣੇ ਲਬ੍ਭਨ੍ਤਿ. ਅਵੂਪਸਨ੍ਤਂ, ਦੁਵੂਪਸਨ੍ਤਂ, ਪੁਨ ਵੂਪਸਮੇਤਬ੍ਬਨ੍ਤਿ ਕਿਚ੍ਚਾਧਿਕਰਣੇ ਲਬ੍ਭਨ੍ਤੀਤਿ ਅਟ੍ਠਕਥਾਨਯੋ, ਪਾਲ਼ਿਯਂ ਪਨੇਤ੍ਥ ਮੁਖਮਤ੍ਤਮੇਵ ਦਸ੍ਸਿਤਂ.
ਉਕ੍ਕੋਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਦੁਟ੍ਠੁਲ੍ਲਸਿਕ੍ਖਾਪਦਵਣ੍ਣਨਾ
੩੯੯. ‘‘ਪਾਰਾਜਿਕਾਨੀਤਿ ਅਤ੍ਥੁਦ੍ਧਾਰਵਸੇਨ ਦਸ੍ਸਿਤਾਨੀ’’ਤਿ ਕਥਂ ਵਿਞ੍ਞਾਯਤੀਤਿ ਚੇ? ਪਰਿਵਾਰਪਾਲ਼ਿਤੋ. ਵੁਤ੍ਤਞ੍ਹਿ ਤਤ੍ਥ ‘‘ਆਪਤ੍ਤਾਧਿਕਰਣਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ. ਆਪਤ੍ਤਾਧਿਕਰਣਪਚ੍ਚਯਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤਿ. ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ ਪਟਿਚ੍ਛਾਦੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਵੇਮਤਿਕਾ ਪਟਿਚ੍ਛਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਭਿਕ੍ਖੁ ਸਙ੍ਘਾਦਿਸੇਸਂ ਪਟਿਚ੍ਛਾਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਆਚਾਰਵਿਪਤ੍ਤਿਂ ਪਟਿਚ੍ਛਾਦੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਰਿ. ੨੯੦). ਪਾਰਾਜਿਕਂ ਪਟਿਚ੍ਛਾਦੇਨ੍ਤੋ ਭਿਕ੍ਖੁ ਅਨਾਪਤ੍ਤਿ, ਨੋ ਆਪਤ੍ਤਿਂ ਆਪਜ੍ਜਤਿ ਅਵੁਤ੍ਤਤ੍ਤਾਤਿ ਚੇ? ਨ, ਸਂਕਿਲਿਟ੍ਠੇਨ ਚਿਤ੍ਤੇਨ ਪਟਿਚ੍ਛਾਦਨੇ ਵਿਨਾ ਆਪਤ੍ਤਿਯਾ ਅਸਮ੍ਭਵਤੋ. ਦੁਕ੍ਕਟਵਾਰੇ ਵਤ੍ਤਬ੍ਬਾਪਿ ਪਾਰਾਜਿਕਾਪਤ੍ਤਿਯੋ ਪਠਮਂ ਅਤ੍ਥੁਦ੍ਧਾਰਵਸੇਨ ਸਙ੍ਘਾਦਿਸੇਸੇਹਿ ਸਹ ਵੁਤ੍ਤਤ੍ਤਾ ਨ ਸਕ੍ਕਾ ਪੁਨ ਵਤ੍ਤੁਨ੍ਤਿ ਨ ਵੁਤ੍ਤਾਤਿ ਵੇਦਿਤਬ੍ਬਾ.
ਯਾਵ ਕੋਟਿ ਨ ਛਿਜ੍ਜਤੀਤਿ ਚੇਤ੍ਥ ਯੋ ਅਨ੍ਤਮਸੋ ਪਟਿਚ੍ਛਾਦਨਤ੍ਥਂ ਅਞ੍ਞਸ੍ਸ ਆਰੋਚੇਤੁ ਵਾ, ਮਾ ਵਾ, ਪਟਿਚ੍ਛਾਦਨਚਿਤ੍ਤੇਨੇਵ ਆਪਤ੍ਤਿਂ ਆਪਨ੍ਨੋ. ਤਸ੍ਸ ਪੁਨ ਅਞ੍ਞਸ੍ਸ ਪਟਿਚ੍ਛਾਦਨਤ੍ਥਂ ਅਨਾਰੋਚਨੇਨੇਵ ਨ ਕੋਟਿ ਛਿਨ੍ਨਾ ਹੋਤਿ, ਕਿਂ ਪੁਨ ਪਟਿਨਿਵਤ੍ਤਿਤ੍ਵਾ ਵਚਨੇਨ ਪਯੋਜਨਨ੍ਤਿ ਨ ਅਨ੍ਤਿਮਸ੍ਸ ਅਨਾਰੋਚਨੇਨ ਛਿਨ੍ਨਾ ਹੋਤਿ, ਅਪ੍ਪਟਿਚ੍ਛਾਦਨੇਨ ਏਵ ਛਿਨ੍ਨਾ ਹੋਤਿ, ਤਤੋ ਅਪ੍ਪਟਿਚ੍ਛਾਦਨਤ੍ਥਂ ਅਪੁਬ੍ਬਸ੍ਸ ਆਰੋਚੇਤਬ੍ਬਂ, ਤਤੋ ਪਟ੍ਠਾਯ ਕੋਟਿ ਛਿਨ੍ਨਾ ਹੋਤਿ, ਤਦਭਾਵੋ ਪਟਿਨਿਵਤ੍ਤਿਤ੍ਵਾ ਅਪ੍ਪਟਿਚ੍ਛਾਦਨਤ੍ਥਂ ਆਰੋਚੇਤਬ੍ਬਂ, ਏਵਮ੍ਪਿ ਕੋਟਿ ਛਿਨ੍ਨਾ ਹੋਤੀਤਿ ਏਵਂ ਨੋ ਪਟਿਭਾਤੀਤਿ ਆਚਰਿਯੋ. ਤਤਿਯੇਨ ਦੁਤਿਯਸ੍ਸਾਤਿ ਏਤ੍ਥ ‘‘ਦੁਤਿਯੋ ਨਾਮ ਪਠਮੋ’’ਤਿ ਵਦਨ੍ਤਾਨਂ ‘‘ਵਤ੍ਥੁ ਪੁਗ੍ਗਲੋ ਨ ਵਤ੍ਤਬ੍ਬੋ’’ਤਿ ਵਾਰਿਤਤ੍ਤਾ ਨ ਸੁਨ੍ਦਰਂ. ਅਞ੍ਞਸ੍ਸ ਚਤੁਤ੍ਥਸ੍ਸ ਆਰੋਚਨੇਪਿ ਨ ਸੁਨ੍ਦਰਂ. ਕਸ੍ਮਾ? ਪੁਬ੍ਬੇਵ ਸੁਤ੍ਵਾ ਅਞ੍ਞਸ੍ਸ ਅਨਾਰੋਚਿਤਤ੍ਤਾ. ‘‘ਸੁਤੇਨ ਅਞ੍ਞਸ੍ਸ ਆਰੋਚੇਤਬ੍ਬਂ ਸਿਯਾ’’ਤਿ ਵਦਨ੍ਤਿ.
ਦੁਟ੍ਠੁਲ੍ਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ
੪੦੪. ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਬਹੁਧਾ. ਹਾਯਨਵਡ੍ਢਨਨ੍ਤਿ ਮਾਤੁਕੁਚ੍ਛਿਸ੍ਮਿਂ ਚੇ ਦ੍ਵਾਦਸਨ੍ਨਂ ਮਾਸਾਨਂ ਊਨਤਾਯ ਹਾਯਨਂ ਕਤਂ. ਪਸੂਤਸ੍ਸ ਵਡ੍ਢਨਂ ਕਾਤਬ੍ਬਂ. ਮਾਤੁਕੁਚ੍ਛਿਸ੍ਮਿਂ ਚੇ ਵਡ੍ਢਨਂ ਕਤਂ. ਪਸੂਤਸ੍ਸ ਹਾਯਨਂ ਕਾਤਬ੍ਬਂ. ਨਿਕ੍ਖਮਨੀਯਪੁਣ੍ਣਮਾਸੀ ਨਾਮ ਸਾਵਣਮਾਸਸ੍ਸ ਪੁਣ੍ਣਮਾਸੀ. ‘‘ਪਾਟਿਪਦਦਿਵਸੇਤਿ ਦੁਤਿਯੇ ਉਪਗਚ੍ਛਤਿ ਦਿਵਸੇ’’ਤਿ ਲਿਖਿਤਂ. ਸੋ ਹਿ ਪਸੂਤਦਿਵਸਤੋ ਪਟ੍ਠਾਯ ਪਰਿਪੁਣ੍ਣਵੀਸਤਿਵਸ੍ਸੋ ਹੋਤਿ. ਅਵਸੇਸਾਨਂ ਦ੍ਵਿਨ੍ਨਂ ਵਸ੍ਸਾਨਂ ਅਧਿਕਦਿਵਸਾਨਿ ਹੋਨ੍ਤੇਵ, ਤਸ੍ਮਾ ਨਿਕ੍ਕਙ੍ਖਾ ਹੁਤ੍ਵਾ ਉਪਸਮ੍ਪਾਦੇਨ੍ਤਿ. ਤਂ ਸਨ੍ਧਾਯਾਤਿ ਗਬ੍ਭਵਸ੍ਸਞ੍ਚ ਪਵਾਰੇਤ੍ਵਾ ਲਦ੍ਧਵਸ੍ਸਞ੍ਚ ਅਗਣੇਤ੍ਵਾ ਜਾਤਦਿਵਸਤੋ ਪਟ੍ਠਾਯ ਗਣੇਤ੍ਵਾ ਏਕੂਨਵੀਸਤਿਵਸ੍ਸਂ. ਏਕੂਨਵੀਸਤਿਵਸ੍ਸੋਤਿ ‘‘ਗਬ੍ਭਵਸ੍ਸਂ ਏਵ ਪਹਾਯਾ’’ਤਿ ਲਿਖਿਤਂ, ਤਂ ਦੁਲ੍ਲਿਖਿਤਂ.
੪੦੬. ਅਞ੍ਞਂ ਉਪਸਮ੍ਪਾਦੇਤੀਤਿ ਉਪਜ੍ਝਾਯੋ ਵਾ ਆਚਰਿਯੋ ਵਾ ਹੁਤ੍ਵਾ ਉਪਸਮ੍ਪਾਦੇਤਿ. ‘‘ਓਪਪਾਤਿਕਸ੍ਸ ਸੋਲ਼ਸਵਸ੍ਸੁਦ੍ਦੇਸਿਕਭਾਵਤੋ ਪੁਨ ਚਤ੍ਤਾਰੋ ਵਸ੍ਸੇ ਅਤਿਕ੍ਕਮਿਤ੍ਵਾ ਉਪਸਮ੍ਪਦਾ ਕਾਤਬ੍ਬਾ’’ਤਿ ਆਚਰਿਯਾ ਵਦਨ੍ਤੀਤਿ ਕੇਚਿ.
ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਥੇਯ੍ਯਸਤ੍ਥਸਿਕ੍ਖਾਪਦਵਣ੍ਣਨਾ
੪੦੯. ਥੇਯ੍ਯਸਤ੍ਥੋ ਚੇ ਸੁਦ੍ਧਮਾਤੁਗਾਮੋ ਦ੍ਵੇ ਆਪਤ੍ਤਿਯੋ. ਅਥ ਭਿਕ੍ਖੁਨਿਯੋ, ਸਮਯੋ ਰਕ੍ਖਤਿ. ਥੇਯ੍ਯਸਤ੍ਥਭਾਵਸ੍ਸ ਠਾਨਂ ਕਤ੍ਵਾ ਰਕ੍ਖਣੀਯਤ੍ਤਾ ਸਹਧਮ੍ਮਿਕਾਨਂ ਰਕ੍ਖਤਿਯੇਵਾਤਿ ਏਕੇ. ਥੇਯ੍ਯਭਾਵੇ ਨ ਸਹਧਮ੍ਮਿਕਤਾ, ਤਸ੍ਮਾ ਨ ਰਕ੍ਖਤਿ ਏਵਾਤਿ ਏਕੇ. ਅਪਾਰਾਜਿਕਥੇਯ੍ਯਭਾਵੇ ਸਤਿ ਸਹਧਮ੍ਮਿਕਭਾਵੋਤਿ ਚੇ? ਇਤਰਸ੍ਮਿਂ ਇਤਰਨ੍ਤਿ ਸਮਯੋ ਅਨਿਸ੍ਸਟੋ ਆਪਜ੍ਜਤਿ. ਭਿਕ੍ਖੁ ਥੇਯ੍ਯਸਤ੍ਥੋ ਚੇ, ਯਥਾਵਤ੍ਥੁਕਮੇਵ. ਥੇਯ੍ਯਸਤ੍ਥੇ ਥੇਯ੍ਯਸਤ੍ਥਸਞ੍ਞੀ ਸਦ੍ਧਿਂ ਸਂਵਿਧਾਯਾਤਿ ਚ. ‘‘ਸਦ੍ਧਿ’’ਨ੍ਤਿ ਪਦਂ ਕੇਸੁਚਿ ਨਤ੍ਥਿ, ਤਂ ਅਨਨੁਰੂਪਂ. ਤਥਾ ਦੁਤਿਯੇਪਿ.
ਥੇਯ੍ਯਸਤ੍ਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਸਂਵਿਧਾਨਸਿਕ੍ਖਾਪਦਵਣ੍ਣਨਾ
੪੧੨. ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ’’ਤਿ ਚ ਪਾਠੋ ਅਤ੍ਥਿ, ਕੇਸੁਚਿ ਨਤ੍ਥਿ. ਨਤ੍ਥਿਭਾਵੋ ਸੁਨ੍ਦਰੋ ‘‘ਤੇਨ ਖੋ ਸਮਯੇਨਾ’’ਤਿ ਅਧਿਕਾਰਤ੍ਤਾਤਿ ਕੇਚਿ. ਇਧ ਏਕਤੋਉਪਸਮ੍ਪਨ੍ਨਾ, ਸਿਕ੍ਖਮਾਨਾ, ਸਾਮਣੇਰੀਤਿ ਇਮਾਪਿ ਤਿਸ੍ਸੋ ਸਙ੍ਗਹਂ ਗਚ੍ਛਨ੍ਤਿ. ਇਮਾਸਂ ਪਨ ਸਮਯੋ ਰਕ੍ਖਤਿ, ਅਯਮਿਮਾਸਂ, ਮਾਤੁਗਾਮਸ੍ਸ ਚ ਵਿਸੇਸੋ.
੪੧੪. ਅਪਿਚੇਤ੍ਥ ‘‘ਵਿਞ੍ਞੂ ਪਟਿਬਲਾ’’ਤਿ ਵਚਨਤੋ ਅਪ੍ਪਟਿਬਲਾ ਅਨਾਪਤ੍ਤਿਵਤ੍ਥੁਕਾਤਿ ਏਕੇ, ਤਂ ਨ ਯੁਤ੍ਤਂ ਦੁਕ੍ਕਟਵਤ੍ਥੁਕਤ੍ਤਾ. ‘‘ਭਿਕ੍ਖੁ ਸਂਵਿਦਹਤਿ, ਮਾਤੁਗਾਮੋ ਨ ਸਂਵਿਦਹਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਹਿ ਵੁਤ੍ਤਂ. ਤਥਾ ਹਿ ਉਪਪਰਿਕ੍ਖਿਤਬ੍ਬਂ.
ਸਂਵਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਅਰਿਟ੍ਠਸਿਕ੍ਖਾਪਦਵਣ੍ਣਨਾ
੪੧੭. ਗਹਟ੍ਠਸ੍ਸਾਪਿ ਭਿਕ੍ਖੁਨੀਦੂਸਕਕਮ੍ਮਂ ਮੋਕ੍ਖਨ੍ਤਰਾਯਿਕਮੇਵ, ਤਸ੍ਮਾ ਤਸ੍ਸ ਪਬ੍ਬਜ੍ਜਾਪਿ ਪਟਿਕ੍ਖਿਤ੍ਤਾ. ਵਿਪਾਕਨ੍ਤਰਾਯਿਕਾ ਅਹੇਤੁਕਤ੍ਤਾ. ਪੁਬ੍ਬੇ ਸਞ੍ਚਿਚ੍ਚ ਆਪਨ੍ਨਾ ਸਮ੍ਮੁਟ੍ਠਾ ਸੁਦ੍ਧਸਞ੍ਞਿਨੋ ਅਨ੍ਤਰਾਯਿਕਾ ਏਵ. ਸੇਸਾਤਿ ਜਾਤਿਕਾ. ਰਸੇਨਾਤਿ ਭਾਵੇਨ. ਅਧਿਕੁਟ੍ਟਨਟ੍ਠੇਨਾਤਿ ਅਧਿਕਰਣਂ ਕਤ੍ਵਾ ਕੁਟ੍ਟਨਟ੍ਠੇਨ ਛਿਨ੍ਦਨਟ੍ਠੇਨ. ਅਸਿਸੂਨੂਪਮਾ ਕੁਸਲਧਮ੍ਮਚ੍ਛੇਦਨਟ੍ਠੇਨ. ਸਤ੍ਤਿਸੂਲੂਪਮਾ ਚਿਤ੍ਤਵਿਤੁਦਨਟ੍ਠੇਨਾਤਿ ਪੋਰਾਣਾ. ਅਨਾਪਤ੍ਤਿਪਾਲ਼ਿਯਂ ‘‘ਆਦਿਕਮ੍ਮਿਕਸ੍ਸਾ’’ਤਿ ਮੁਖਾਰੁਲ਼੍ਹਵਸੇਨ ਲਿਖਿਤਂ.
ਅਰਿਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਵਣ੍ਣਨਾ
੪੨੫. ‘‘ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਟ੍ਠੇਨਾਤਿ ਇਮਿਨਾ ਲਦ੍ਧਿਨਾਨਾਸਂਵਾਸਕਤਂ ਦੀਪੇਤੀ’’ਤਿ ਵੁਤ੍ਤਂ. ਤਿਚਿਤ੍ਤਨ੍ਤਿ ਏਤ੍ਥ ਵਿਪਾਕਾਬ੍ਯਾਕਤਚਿਤ੍ਤੇਨ ਸਹਵਾਸੇਯ੍ਯਂ ਕਪ੍ਪੇਯ੍ਯਾਤਿ ਏਵਮਤ੍ਥੋ ਦਟ੍ਠਬ੍ਬੋ. ਅਞ੍ਞਥਾ ਸਚਿਤ੍ਤਕਤ੍ਤਾ ਸਿਕ੍ਖਾਪਦਸ੍ਸ ਕਿਰਿਯਾਬ੍ਯਾਕਤਂ ਸਨ੍ਧਾਯ ਨ ਯੁਜ੍ਜਤਿ.
ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਕਣ੍ਟਕਸਿਕ੍ਖਾਪਦਵਣ੍ਣਨਾ
੪੨੮. ਯਤ੍ਥ ਤੇ ਨ ਪਸ੍ਸਾਮਾਤਿ ਤੇਤਿ ਤਂ. ਅਥ ਵਾ ਤਵ ਰੂਪਾਦਿਂ ਨ ਪਸ੍ਸਾਮ. ਅਯਂ ਸਮਣੁਦ੍ਦੇਸੋ ਪਾਰਾਜਿਕੋ ਹੋਤਿ. ‘‘ਸਚੇ ਤਂ ਦਿਟ੍ਠਿਂ ਪਟਿਨਿਸ੍ਸਜ੍ਜਤਿ, ਸਙ੍ਘਸ੍ਸ ਆਰੋਚੇਤ੍ਵਾ ਸਙ੍ਘਾਨੁਮਤਿਯਾ ਪਬ੍ਬਾਜੇਤਬ੍ਬੋ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ, ਤਂ ਨ ਯੁਤ੍ਤਂ, ਦਣ੍ਡਕਮ੍ਮਨਾਸਨਾ ਹਿ ਇਧਾਧਿਪ੍ਪੇਤਾ. ਯਦਿ ਸੋ ਪਾਰਾਜਿਕੋ, ਲਿਙ੍ਗਨਾਸਨਾ ਨਾਮ ਸਿਯਾ. ਤੇ ਪਟਿਸੇਵਤੋ ਨਾਲਂ ਅਨ੍ਤਰਾਯਾਯਾਤਿ ਚ ਦਿਟ੍ਠਿ ਸਤ੍ਥਰਿ ਅਸਤ੍ਥਾਦਿਦਿਟ੍ਠਿ ਨ ਹੋਤਿ. ਸਚੇ ਸਾ ਯਸ੍ਸ ਉਪ੍ਪਜ੍ਜਤਿ, ਸੋ ਪਾਰਾਜਿਕੋ ਹੋਤਿ, ਤਸ੍ਮਿਮ੍ਪਿ ਏਵਮੇਵ ਪਟਿਪਜ੍ਜਿਤਬ੍ਬਂ ਸਂਵਰੇ ਅਤਿਟ੍ਠਨ੍ਤੋ ਲਿਙ੍ਗਨਾਸਨਾਯੇਵ ਨਾਸੇਤਬ੍ਬੋਤਿ ਆਚਰਿਯਸ੍ਸ ਤਕ੍ਕੋ.
ਕਣ੍ਟਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਸਮਤ੍ਤੋ ਵਣ੍ਣਨਾਕ੍ਕਮੇਨ ਸਪ੍ਪਾਣਕਵਗ੍ਗੋ ਸਤ੍ਤਮੋ.