੬. ਸੁਰਾਪਾਨਵਗ੍ਗੋ

੧. ਸੁਰਾਪਾਨਸਿਕ੍ਖਾਪਦਵਣ੍ਣਨਾ

ਆਯਸ੍ਮਤੋ ਯਂ ਮੁਨਿ ਸਾਗਤਸ੍ਸ,

ਮਹਿਦ੍ਧਿਕਤ੍ਤਸ੍ਸ ਨਿਦਸ੍ਸਨੇਨ;

ਪਾਨਸ੍ਸ ਦੋਸੋ ਤਸ੍ਸ ਦਸ੍ਸਨਤ੍ਥਂ,

ਪੁਬ੍ਬੇਵ ਸੋ ਭਦ੍ਦਵਤਿਂ ਪਯਾਤੋ.

ਤਸ੍ਮਾ ਪਸ੍ਸਂ ਨਾਗਮਪੋਥਯਿਤ੍ਵਾ,

ਵਿਨਿਸ੍ਸਟਂ ਸਾਗਤਂ ਇਦ੍ਧਿਯਾ ਚ;

ਨਤੋ ਸੁਰਾਪਾਨਨਿਸੇਧਨਤ੍ਥਂ,

ਕੋਸਮ੍ਬਿਮੇਵਜ੍ਝਗਮਾਤਿ ਞੇਯ੍ਯਂ.

੩੨੬-੮. ਪਸੁਪਾਲਕਾਤਿ ਅਜਪਾਲਕਾ. ਯੇਨ ਮਜ੍ਜਤਿ, ਤਸ੍ਸ ਬੀਜਤੋ ਪਟ੍ਠਾਯ. ਕੇਚਿ ‘‘ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵਾਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਵੁਤ੍ਤਤ੍ਤਾ ਵਤ੍ਥੁਂ ਜਾਨਿਤ੍ਵਾ ਪਿਵਤੋ ਅਕੁਸਲ’’ਨ੍ਤਿ ਵਦਨ੍ਤਿ. ਏਵਂ ਸਤਿ ‘‘ਅਕੁਸਲੇਨੇਵ ਪਾਤਬ੍ਬਤਾਯਾਤਿ ਨ ਵਤ੍ਤਬ੍ਬ’’ਨ੍ਤਿ ਵੁਤ੍ਤੇ ‘‘ਸਚਿਤ੍ਤਕਪਕ੍ਖਮੇਵ ਸਨ੍ਧਾਯਾ’’ਤਿ ਵਦਨ੍ਤਿ. ਏਵਂ ਸਤਿ ‘‘ਕੁਸਲਾਕੁਸਲਾਬ੍ਯਾਕਤਚਿਤ੍ਤਨ੍ਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤੇ ਤਮ੍ਪਿ ‘‘ਤਬ੍ਬਹੁਲਨਯੇਨ ਵੁਤ੍ਤ’’ਨ੍ਤਿ ਵਦਨ੍ਤਿ. ਕਙ੍ਖਾਵਿਤਰਣਿਯਮ੍ਪਿ ਅਵਿਸੇਸੇਤ੍ਵਾ ‘‘ਅਕੁਸਲਚਿਤ੍ਤ’’ਨ੍ਤਿ (ਕਙ੍ਖਾ. ਅਟ੍ਠ. ਸੁਰਾਪਾਨਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ, ਤਸ੍ਮਾ ‘‘ਤਂ ਅਕੁਸਲੇਨੇਵ ਪਿਵਤੀ’’ਤਿ ਵਦਨ੍ਤੀਤਿ.

ਸੁਰਾਪਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ

੩੩੦. ਅਙ੍ਗੁਲਿਪਤੋਦਕਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.

੩. ਹਸਧਮ੍ਮਸਿਕ੍ਖਾਪਦਵਣ੍ਣਨਾ

੩੩੬. ਤਤਿਯੇ ਕਥਂ ਤਿਵੇਦਨਂ? ਹਸਾਧਿਪ੍ਪਾਯੇਨੇਵ ‘‘ਪਰਸ੍ਸ ਦੁਕ੍ਖਂ ਉਪ੍ਪਾਦੇਸ੍ਸਾਮੀ’’ਤਿ ਉਦਕਂ ਖਿਪਨ੍ਤਸ੍ਸ ਦੁਕ੍ਖਵੇਦਨਂ. ਸੇਸਂ ਉਤ੍ਤਾਨਂ.

ਇਦਂ ਸਞ੍ਞਾਵਿਮੋਕ੍ਖਞ੍ਚੇ, ਤਿਕਪਾਚਿਤ੍ਤਿਯਂ ਕਥਂ;

ਕੀਲ਼ਿਤਂਵ ਅਕੀਲ਼ਾਤਿ, ਮਿਚ੍ਛਾਗਾਹੇਨ ਤਂ ਸਿਯਾ.

ਏਤ੍ਤਾਵਤਾ ਕਥਂ ਕੀਲ਼ਾ, ਇਤਿ ਕੀਲ਼ਾਯਂ ਏਵਾਯਂ;

ਅਕੀਲ਼ਾਸਞ੍ਞੀ ਹੋਤੇਤ੍ਥ, ਵਿਨਯਤ੍ਥਂ ਸਮਾਦਯੇ.

ਏਕਨ੍ਤਾਕੁਸਲੋ ਯਸ੍ਮਾ, ਕੀਲ਼ਾਯਾਭਿਰਤਮਨੋ;

ਤਸ੍ਮਾ ਅਕੁਸਲਂ ਚਿਤ੍ਤਂ, ਏਕਮੇਵੇਤ੍ਥ ਲਬ੍ਭਤੀਤਿ.

ਹਸਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਅਨਾਦਰਿਯਸਿਕ੍ਖਾਪਦਵਣ੍ਣਨਾ

੩੪੪. ‘‘ਲੋਕਵਜ੍ਜਂ ਅਤਿਕ੍ਕਮਿਤ੍ਵਾ ‘ਇਦਂ ਅਮ੍ਹਾਕਂ ਆਚਰਿਯੁਗ੍ਗਹੋ’ਤਿ ਵਦਨ੍ਤਸ੍ਸ ਨ ਵਟ੍ਟਤੀ’’ਤਿ ਲਿਖਿਤਂ. ਯਂ ਸਂਕਿਲਿਟ੍ਠੇਨੇਵ ਚਿਤ੍ਤੇਨ ਆਪਜ੍ਜਤਿ, ਯਂ ਵਾ ਅਰਿਯਪੁਗ੍ਗਲੋ ਅਪਞ੍ਞਤ੍ਤੇ ਸਿਕ੍ਖਾਪਦੇ ਅਜ੍ਝਾਚਰਤਿ, ਇਦਂ ਲੋਕਵਜ੍ਜਨ੍ਤਿ ਸਬ੍ਬਤ੍ਥਿਕਵਾਦੀਆਦੀਨਿ ਆਚਰਿਯਕੁਲਾਨਿ. ਤਤ੍ਥ ਦੁਤਿਯਤਤਿਯਵਿਕਪ੍ਪੋ ਇਧ ਨ ਅਧਿਪ੍ਪੇਤੋ ਸੇਖਿਯਾਨਂ ਲੋਕਵਜ੍ਜਤ੍ਤਾ.

ਗਾਰਯ੍ਹੋ ਆਚਰਿਯੁਗ੍ਗਹੋਤਿ ਏਤ੍ਥ ‘‘ਯਸ੍ਮਾ ਉਚ੍ਛੁਰਸੋ ਸਤ੍ਤਾਹਕਾਲਿਕੋ, ਤਸ੍ਸ ਕਸਟੋ ਯਾਵਜੀਵਿਕੋ, ਦ੍ਵਿਨ੍ਨਂਯੇਵ ਸਮਵਾਯੋ ਉਚ੍ਛੁਯਟ੍ਠਿ, ਤਸ੍ਮਾ ਵਿਕਾਲੇ ਉਚ੍ਛੁਯਟ੍ਠਿਂ ਖਾਦਿਤੁਂ ਵਟ੍ਟਤਿ ਗੁਲ਼ਹਰੀਟਕਂ ਵਿਯਾ’ਤਿ ਏਵਮਾਦਿਕੋ ਸਮ੍ਪਤਿ ਨਿਬ੍ਬਤ੍ਤੋ ਗਾਰਯ੍ਹਾਚਰਿਯਵਾਦੋ ਨ ਗਹੇਤਬ੍ਬੋ’’ਤਿ ਚ, ਪਣ੍ਣਤ੍ਤਿਵਜ੍ਜੇ ਪਨ ਵਟ੍ਟਤੀਤਿ ‘‘ਨ ਪਤ੍ਤਹਤ੍ਥੇਨ ਕਵਾਟੋ ਪਣਾਮੇਤਬ੍ਬੋ’ਤਿ ਇਮਸ੍ਸ ‘ਯੇਨ ਹਤ੍ਥੇਨ ਪਤ੍ਤੋ ਗਹਿਤੋ, ਤੇਨ ਹਤ੍ਥੇਨ ਨ ਪਣਾਮੇਤਬ੍ਬੋ, ਇਤਰੇਨ ਪਣਾਮੇਤਬ੍ਬੋ’ਤਿ ਅਤ੍ਥਂ ਗਹੇਤ੍ਵਾ ਤਥਾ ਆਚਰਨ੍ਤੋ ਨ ਆਪਤ੍ਤਿਯਾ ਕਾਰੇਤਬ੍ਬੋ. ‘ਤਥਾ ਬੁਦ੍ਧਬੋਧਿਚੇਤਿਯਾਨਂ ਪੁਪ੍ਫਂ ਗਣ੍ਹਿਤੁਂ ਵਟ੍ਟਤੀਤਿ ਤਥਾ ਆਚਰਨ੍ਤੋ’’ਤਿ ਚ. ਤਥਾ ਆਚਰਤਿ ਅਭਯਗਿਰਿਵਾਸਿਕੋ. ਮਹਾਵਿਹਾਰਵਾਸਿਨੋ ਚੇ ਏਵਂ ਵਦਨ੍ਤਿ, ‘‘ਮਾ ਏਵਂ ਵਦਾ’’ਤਿ ਅਪਸਾਦੇਤਬ੍ਬੋ. ਤੇਨ ਵੁਤ੍ਤਂ ‘‘ਸੁਤ੍ਤਂ ਸੁਤ੍ਤਾਨੁਲੋਮਞ੍ਚ ਉਗ੍ਗਹਿਤਕਾਨਂਯੇਵਾ’’ਤਿਆਦਿ. ‘‘ਇਦਂ ਸਬ੍ਬਂ ਉਪਤਿਸ੍ਸਤ੍ਥੇਰੋ ਆਹਾ’’ਤਿ ਚ ਵੁਤ੍ਤਂ. ‘‘ਸੁਤ੍ਤਾਨੁਲੋਮਂ ਅਟ੍ਠਕਥਾ’’ਤਿ ਲਿਖਿਤਂ.

ਅਨਾਦਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਭਿਂਸਾਪਨਸਿਕ੍ਖਾਪਦਵਣ੍ਣਨਾ

੩੪੫. ਭਿਂਸਾਪਨਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.

੬. ਜੋਤਿਸਿਕ੍ਖਾਪਦਵਣ੍ਣਨਾ

੩੫੪. ‘‘ਵਿਸਿਬ੍ਬਨਾਪੇਕ੍ਖੋ’’ਤਿ ਵਚਨਤੋ ਯਸ੍ਸ ਅਪੇਕ੍ਖਾ ਨਤ੍ਥਿ, ਤਸ੍ਸ ਅਨਾਪਤ੍ਤਿ.

ਜੋਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਨਹਾਨਸਿਕ੍ਖਾਪਦਵਣ੍ਣਨਾ

੩੬੪. ਨਹਾਨਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.

੮. ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ

੩੬੮. ਅਲਭੀਤਿ ਲਭੋ. ਯਥਾ ‘‘ਪਚਤੀਤਿ ਪਚੋ, ਪਥਤੀਤਿ ਪਥੋ’’ਤਿ ਵੁਚ੍ਚਤਿ, ਏਵਂ ‘‘ਲਭਤੀਤਿ ਲਭੋ’’ਤਿ ਕਸ੍ਮਾ ਨ ਵੁਤ੍ਤਂ? ਪਰਿਨਿਟ੍ਠਿਤਲਾਭਸ੍ਸੇਵ ਇਧਾਧਿਪ੍ਪੇਤਤ੍ਤਾ. ਮਗ੍ਗੇਤਿ ਸਿਬ੍ਬਿਨਿਮਗ੍ਗੇ. ਕਪ੍ਪਕਤੇਨ ਸਦ੍ਧਿਂ ਅਕਪ੍ਪਕਤਂ ਸਿਬ੍ਬੇਤਿ. ਯਾਵਤਾ ਅਧਿਟ੍ਠਾਨਂ ਨ ਵਿਜਹਤਿ, ਤਾਵਤਾ ਪੁਬ੍ਬਂ ਕਪ੍ਪਮੇਵ. ਕਪ੍ਪਂ ਨ ਵਿਜਹਤਿ ਚੇ, ਪੁਨ ਕਪ੍ਪਂ ਦਾਤਬ੍ਬਨ੍ਤਿ ਆਚਰਿਯਸ੍ਸ ਤਕ੍ਕੋ.

ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ

੩੭੪. ਪਰਿਭੋਗੋ ਏਤ੍ਥ ਕਾਯਕਮ੍ਮਂ. ਅਪਚ੍ਚੁਦ੍ਧਾਰਣਂ ਵਚੀਕਮ੍ਮਂ.

ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਚੀਵਰਾਪਨਿਧਾਨਸਿਕ੍ਖਾਪਦਵਣ੍ਣਨਾ

੩੭੯. ਦਸਮੇ ਯਸ੍ਮਾ ਨਿਸੀਦਨਸਨ੍ਥਤਂ ਚੀਵਰਨਿਸੀਦਨਮ੍ਪੀਤਿ ਉਭਯਮ੍ਪਿ ਸਦਸਮੇਵ, ਤਸ੍ਮਾ ਤਂ ਉਭਯਮ੍ਪਿ ਏਕਤੋ ਕਤ੍ਵਾ ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਆਹ. ਤਤ੍ਥਾਪਿ ਚੀਵਰਗ੍ਗਹਣੇਨ ਚੀਵਰਨਿਸੀਦਨਂ ਗਹਿਤਮੇਵਾਤਿ ਅਤ੍ਥਤੋ ਸਨ੍ਥਤਨਿਸੀਦਨਮੇਵ ਵੁਤ੍ਤਂ ਹੋਤਿ. ਯਦਿ ਏਵਂ ‘‘ਨਿਸੀਦਨਸਨ੍ਥਤਂ ਨਾਮ ਸਦਸਂ ਵੁਚ੍ਚਤੀ’’ਤਿ ਵਤ੍ਤਬ੍ਬਨ੍ਤਿ? ਨ, ਇਤਰਸ੍ਸ ਅਨਿਸੀਦਨਅਦਸਭਾਵਪ੍ਪਸਙ੍ਗਤੋ. ਏਤ੍ਥ ਨਿਸੀਦਨਸਨ੍ਥਤਸ੍ਸ ਪਾਚਿਤ੍ਤਿਯਵਤ੍ਥੁਤ੍ਤਾ ਇਤਰਮ੍ਪਿ ਪਾਚਿਤ੍ਤਿਯਵਤ੍ਥੁਮੇਵਾਤਿ ਵੇਦਿਤਬ੍ਬਂ ਤਜ੍ਜਾਤਿਕਤ੍ਤਾ. ਸਸ੍ਸਾਮਿਕੇ ਸੂਚਿਘਰੇ ਸੂਚਿਗਣਨਾਯ ਆਪਤ੍ਤਿਯੋਤਿ ਪੋਰਾਣਾ.

ਚੀਵਰਾਪਨਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਸੁਰਾਪਾਨਵਗ੍ਗੋ ਛਟ੍ਠੋ.