੫. ਅਚੇਲਕਵਗ੍ਗੋ
੧. ਅਚੇਲਕਸਿਕ੍ਖਾਪਦਵਣ੍ਣਨਾ
੨੬੯. ਵਿਘਾਸਾਦਾਨਂ ਅਨ੍ਤਰਾ ਪੂਵਲਾਭੇਨ ਅਞ੍ਞਤਰਾ ਪਰਿਬ੍ਬਾਜਿਕਾ ਪਵਿਸਿਤ੍ਵਾ ਠਿਤਾ. ਦਾਪੇਤੀਤਿ ਅਨੁਪਸਮ੍ਪਨ੍ਨੇਨ.
ਅਚੇਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ
੨੭੬. ਵਿਜਹਨ੍ਤਸ੍ਸਾਤਿ ਅਨਾਦਰਤ੍ਥੇ ਸਾਮਿਵਚਨਂ. ਉਯ੍ਯੋਜਕਸ੍ਸ ਵਿਜਹਨ੍ਤਸ੍ਸ ਸਤੋ ਆਪਤ੍ਤਿ ਦੁਕ੍ਕਟਸ੍ਸਾਤਿਪਿ ਅਤ੍ਥੋ. ਇਧ ਅਨੁਪਸਮ੍ਪਨ੍ਨੋ ਨਾਮ ਸਾਮਣੇਰੋਵਾਧਿਪ੍ਪੇਤੋ.
ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਸਭੋਜਨਸਿਕ੍ਖਾਪਦਵਣ੍ਣਨਾ
੨੮੦. ਸਭੋਜਨੇਤਿ ਏਤ੍ਥ ਪਠਮਵਿਕਪ੍ਪੋ ‘‘ਇਤ੍ਥੀ ਚ ਪੁਰਿਸੋ ਚਾ’’ਤਿ ਇਮਿਨਾ ਤਤਿਯਪਦੇਨ ਯੁਜ੍ਜਤਿ, ਦੁਤਿਯਵਿਕਪ੍ਪੋ ਪਠਮੇਹਿ ਦ੍ਵੀਹਿ. ਕੁਲੇਤਿ ਘਰੇ. ਅਨੁਪਵਿਸਿਤ੍ਵਾ ਨਿਸੀਦਨਚਿਤ੍ਤੇਨ ਸਚਿਤ੍ਤਕਂ.
ਸਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਰਹੋਪਟਿਚ੍ਛਨ੍ਨਸਿਕ੍ਖਾਪਦਵਣ੍ਣਨਾ
੨੮੪. ਇਧ ਪਞ੍ਚਮਂ ਉਪਨਨ੍ਦਸ੍ਸ ਚਤੁਤ੍ਥਂ ਹੋਤਿ, ਤਸ੍ਮਾ ਭਿਕ੍ਖੁਨਿਵਗ੍ਗਸ੍ਸ ਦਸਮਟ੍ਠਕਥਾਯਂ ਉਪਰਿ ਉਪਨਨ੍ਦਸ੍ਸ ‘‘ਤਤਿਯਸਿਕ੍ਖਾਪਦੇਨਾ’’ਤਿ ਨ ਪਾਠੋ, ‘‘ਚਤੁਤ੍ਥੇਨਾ’’ਤਿ ਪਾਠੋਤਿ ਵੇਦਿਤਬ੍ਬੋ.
ਰਹੋਪਟਿਚ੍ਛਨ੍ਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ
੨੮੯. ਰਹੋਨਿਸਜ੍ਜਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੬. ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ
੨੯੪. ਸਭਤ੍ਤੋਤਿ ਨਿਮਨ੍ਤਨਭਤ੍ਤੋਤਿ ਪੋਰਾਣਾ.
ਪੁਰੇਭਤ੍ਤਞ੍ਚ ਪਿਣ੍ਡਾਯ, ਚਰਿਤ੍ਵਾ ਯਦਿ ਭੁਞ੍ਜਤਿ;
ਸਿਯਾ ਪਰਮ੍ਪਰਾਪਤ੍ਤਿ, ਪਚ੍ਛਾਭਤ੍ਤਂ ਨ ਸਾ ਸਿਯਾ.
ਪਚ੍ਛਾਭਤ੍ਤਞ੍ਚ ਗਮਿਕੋ, ਪੁਬ੍ਬਗੇਹਂ ਯਦਿ ਗਚ੍ਛੇ;
ਏਕੇ ਆਪਤ੍ਤਿਯੇਵਾਤਿ, ਅਨਾਪਤ੍ਤੀਤਿ ਏਕਚ੍ਚੇ.
ਕੁਲਨ੍ਤਰਸ੍ਸੋਕ੍ਕਮਨੇ, ਆਪਤ੍ਤਿਮਤਯੋ ਹਿ ਤੇ;
ਸਮਾਨਭਤ੍ਤਪਚ੍ਚਾਸਾ, ਇਤਿ ਆਹੁ ਇਧਾਪਰੇ.
ਮਤਾ ਗਣਿਕਭਤ੍ਤੇਨ, ਸਮੇਨ੍ਤਿ ਨਂ ਨਿਮਨ੍ਤਨੇ;
ਵਿਸ੍ਸਜ੍ਜਨਂ ਸਮਾਨਨ੍ਤਿ, ਏਕੇ ਸਮ੍ਮੁਖਤਾਪਰੇ.
ਸਨ੍ਨਿਟ੍ਠਾਨਤ੍ਥਿਕੇਹੇਵ, ਵਿਚਾਰੇਤਬ੍ਬਭੇਦਤੋ;
ਵਿਞ੍ਞੂ ਚਾਰਿਤ੍ਤਮਿਚ੍ਚੇਵ, ਸਿਕ੍ਖਾਪਦਮਿਦਂ ਵਿਦੂਤਿ.
ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਮਹਾਨਾਮਸਿਕ੍ਖਾਪਦਵਣ੍ਣਨਾ
੩੧੦. ਕਾਲਨ੍ਤਿ ਸੋ. ਯਸ੍ਮਾ ਸਙ੍ਘਪਵਾਰਣਾਯਮੇਵਾਯਂ ਵਿਧਿ, ਤਸ੍ਮਾ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਵੁਤ੍ਤਂ. ‘‘ਇਮਿਨਾ ਹਿ ਤਯਾ ਪਵਾਰਿਤਮ੍ਹ, ਅਮ੍ਹਾਕਞ੍ਚ ਇਮਿਨਾ ਚ ਇਮਿਨਾ ਚ ਅਤ੍ਥੋ’’ਤਿ ਯਥਾਭੂਤਂ ਆਚਿਕ੍ਖਿਤ੍ਵਾ ਵਿਞ੍ਞਾਪੇਤੁਂ ਗਿਲਾਨੋਵ ਲਭਤਿ. ਯਂ ਪਨ ਵੁਤ੍ਤਂ ਪਣੀਤਭੋਜਨਸਿਕ੍ਖਾਪਦੇ ‘‘ਮਹਾਨਾਮਸਿਕ੍ਖਾਪਦੇਨ ਕਾਰੇਤਬ੍ਬੋ’’ਤਿ, ਤਂ ਸਙ੍ਘਵਸੇਨ ਪਵਾਰਿਤਂ, ਭੇਸਜ੍ਜਤ੍ਥਾਯ ਸਪ੍ਪਿਆਦਿਭੇਸਜ੍ਜਪਞ੍ਚਕਂ ਵਿਞ੍ਞਾਪੇਤਿ ਚੇ, ‘‘ਨ ਭੇਸਜ੍ਜੇਨ ਕਰਣੀਯੇਨ ਭੇਸਜ੍ਜਂ ਵਿਞ੍ਞਾਪੇਤੀ’ਤਿ ਵਚਨੇਨ ਪਾਚਿਤ੍ਤਿਯਨ੍ਤਿ ਅਤ੍ਥੋ’’ਤਿ (ਪਾਚਿ. ੩੦੯) ਲਿਖਿਤਂ.
ਮਹਾਨਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ
੩੧੧-੫. ਮਂ ਦਿਟ੍ਠੇਨਾਤਿ ਮਯਾ ਦਿਟ੍ਠੇਨ, ਮਮ ਦਸ੍ਸਨੇਨ ਵਾ. ਏਕਮ੍ਪਿ ਸਰਹਤ੍ਥਂ ਪੁਰਿਸਨ੍ਤਿ ਅਙ੍ਗਪਰਿਯਾਪਨ੍ਨਂ.
ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਸੇਨਾਵਾਸਸਿਕ੍ਖਾਪਦਵਣ੍ਣਨਾ
੩੧੯. ਨਵਮੇ ਸੇਨਾਪਰਿਕ੍ਖੇਪੇਨ ਵਾ ਪਰਿਕ੍ਖੇਪਾਰਹਟ੍ਠਾਨੇਨ ਵਾ ਸਞ੍ਚਰਣਟ੍ਠਾਨਪਰਿਯਨ੍ਤੇਨ ਵਾ ਪਰਿਚ੍ਛਿਨ੍ਦਿਤਬ੍ਬਾ.
ਸੇਨਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ
੩੨੪. ਦਸਮੇ ਏਕਮੇਕਂ ਦਸ੍ਸਨਾਯ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਯਤ੍ਥ ਠਿਤੋ ਪਸ੍ਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿਆਦਿ. ਅਟ੍ਠਮੇ ਪਨ ਏਕਮੇਕਂ ਦਸ੍ਸਨਾਯ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਯਤ੍ਥ ਠਿਤੋ ਪਸ੍ਸਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਪਾਲ਼ਿ. ਕਸ੍ਮਾ? ਅਙ੍ਗਪ੍ਪਮਾਣਾਭੇਦੇਪਿ ਅਨੀਕਵਿਸੇਸਤੋ. ਦਸਮੇ ਪਨ ਅਟ੍ਠਮਙ੍ਗਸ੍ਸ ਦਸ੍ਸਨੇਨ ਦੁਕ੍ਕਟਂ ਸਿਯਾਤਿ.
ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਸਮਤ੍ਤੋ ਵਣ੍ਣਨਾਕ੍ਕਮੇਨ ਅਚੇਲਕਵਗ੍ਗੋ ਪਞ੍ਚਮੋ.