੪. ਭੋਜਨਵਗ੍ਗੋ

੧. ਆਵਸਥਪਿਣ੍ਡਸਿਕ੍ਖਾਪਦਵਣ੍ਣਨਾ

੨੦੩-੪. ਪੂਗਸ੍ਸਾਤਿ ਪੂਗੇਨ. ਕੁਕ੍ਕੁਚ੍ਚਾਯਨ੍ਤੋਤਿ ਨਿਸ੍ਸਰਣੇਨੇਤ੍ਥ ਭਵਿਤਬ੍ਬਂ, ਤਂ ਮਯਂ ਨ ਜਾਨਾਮਾਤਿ ਸਨ੍ਨਿਟ੍ਠਾਨਸ੍ਸ ਕਰਣਵਸੇਨ ‘‘ਕੁਕ੍ਕੁਚ੍ਚਾਯਨ੍ਤੋ’’ਤਿ ਵੁਚ੍ਚਤਿ. ਯਥਾ ਹਿ ਆਯਸ੍ਮਾ ਉਪਾਲਿ ਨਯਗ੍ਗਾਹੇਨ ‘‘ਅਨਾਪਤ੍ਤਿ ਆਵੁਸੋ ਸੁਪਿਨਨ੍ਤੇਨਾ’’ਤਿ (ਪਾਰਾ. ੭੮) ਆਹ, ਤਥਾ ਥੇਰੋਪਿ ‘‘ਅਨਾਪਤ੍ਤਿ ਗਿਲਾਨਸ੍ਸਾ’’ਤਿ ਕਸ੍ਮਾ ਨ ਪਰਿਚ੍ਛਿਨ੍ਦਤੀਤਿ? ਅਨਤ੍ਤਾਧਿਕਾਰਤ੍ਤਾ ਵਿਨਯਪਞ੍ਞਤ੍ਤਿਯਾ, ‘‘ਨਾਯਂ ਅਤ੍ਤਨੋ ਓਕਾਸੋ’’ਤਿ ਪਟਿਕ੍ਖਿਤ੍ਤਤ੍ਤਾ, ਸਿਕ੍ਖਾਪਦਸ੍ਸ ਅਪਰਿਪੁਣ੍ਣਤ੍ਤਾ. ਪਠਮਪਾਰਾਜਿਕਸਿਕ੍ਖਾਪਦੇ ਪਰਿਪੁਣ੍ਣਂ ਕਤ੍ਵਾ ਪਞ੍ਞਤ੍ਤੇਯੇਵ ਹਿ ਸੋ ਥੇਰੋ ‘‘ਅਨਾਪਤ੍ਤਿ ਸੁਪਿਨਨ੍ਤੇਨਾ’’ਤਿ ਆਹ ‘‘ਅਞ੍ਞਤ੍ਰ ਸੁਪਿਨਨ੍ਤਾ’’ਤਿ ਵੁਤ੍ਤਪਦਾਨੁਸਾਰੇਨਾਤਿ. ਯਸ੍ਮਾ ਓਦਿਸ੍ਸ ਅਯਾਵਦਤ੍ਥੇਵ ਦਾਯਕਾਨਂ ਪੀਲ਼ਾ ਨਤ੍ਥਿ, ਤਸ੍ਮਾ ‘‘ਅਨੋਦਿਸ੍ਸ ਯਾਵਦਤ੍ਥੋ’’ਤਿ ਵੁਤ੍ਤਂ.

੨੦੮. ‘‘ਅਨ੍ਤਰਾਮਗ੍ਗੇ ਏਕਦਿਵਸ’ਨ੍ਤਿ ਏਕਂਯੇਵ ਸਨ੍ਧਾਯ ਵੁਤ੍ਤ’’ਨ੍ਤਿ ਚ ‘‘ਏਸੇਵ ਨਯੋਤਿ ਵੁਤ੍ਤਨਯਮੇਵ ਦਸ੍ਸੇਤੁਂ ਗਨ੍ਤ੍ਵਾ ਪਚ੍ਚਾਗਚ੍ਛਨ੍ਤੋ ਹੀਤਿਆਦਿਮਾਹਾ’’ਤਿ ਚ ‘‘ਸੁਦ੍ਧਚਿਤ੍ਤੋ ਹੁਤ੍ਵਾ ਪਕਤਿਗਮਨੇਵ ਭੁਞ੍ਜਿਤੁਂ ਲਭਤੀ’’ਤਿ ਚ ‘‘ਅਗਿਲਾਨਸ੍ਸ ਗਿਲਾਨਸਞ੍ਞਿਨੋ ਕਾਯੇਨ ਸਮੁਟ੍ਠਾਤੀ’’ਤਿ ਚ ਲਿਖਿਤਂ.

ਆਵਸਥਪਿਣ੍ਡਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਗਣਭੋਜਨਸਿਕ੍ਖਾਪਦਵਣ੍ਣਨਾ

੨੦੯-੨੧੮. ਗੁਲ਼੍ਹਪਟਿਚ੍ਛਨ੍ਨੋਤਿ ਅਪਾਕਟੋਵ. ਏਕੋ ਪੁਤ੍ਤੇਨਾਤਿ ਏਕਸ੍ਸੇਕਂ ਭਤ੍ਤਂ ‘‘ਅਹਂ ਅਞ੍ਞੇਨ ਨਿਮਨ੍ਤਿਤੋ’’ਤਿ ਨ ਵੁਚ੍ਚਤਿ. ‘‘ਸਚੇ ਏਕਤੋ ਗਣ੍ਹਨ੍ਤਿ , ਗਣਭੋਜਨਂ ਹੋਤੀ’’ਤਿ (ਪਾਚਿ. ਅਟ੍ਠ. ੨੧੭-੨੧੮) ਵੁਤ੍ਤਤ੍ਤਾ ਚਤ੍ਤਾਰੋ ਉਪਾਸਕਾ ਚਤ੍ਤਾਰੋ ਭਿਕ੍ਖੂ ਵਿਸੁਂ ਵਿਸੁਂ ਨਿਮਨ੍ਤੇਤ੍ਵਾ ਹਤ੍ਥਪਾਸੇ ਠਿਤਾਨਂ ਚੇ ਦੇਨ੍ਤਿ, ਗਣਭੋਜਨਂ ਹੋਤਿ ਏਵਾਤਿ ਏਕੇ, ਤਂ ਨ ਯੁਤ੍ਤਂ ਵਿਯ. ‘‘ਵਿਞ੍ਞਤ੍ਤਿਤੋ ਪਸਵਨੇ ਗਣਸ੍ਸ ਏਕਤੋ ਗਹਣੇ ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ, ਵਿਸੁਂ ਗਹਣੇ ਪਣੀਤਭੋਜਨਸੂਪੋਦਨਵਿਞ੍ਞਤ੍ਤੀਹੀ’’ਤਿ ਲਿਖਿਤਂ. ‘‘ਵਿਞ੍ਞਤ੍ਤਿਤੋ ਪਸਵਨਂ ਅਟ੍ਠੁਪ੍ਪਤ੍ਤਿਵਸੇਨ ਅਟ੍ਠਕਥਾਯਂ ਅਨੁਞ੍ਞਾਤਂ. ਸੂਪੋਦਨਾਦਿਵਸੇਨ ਤਤ੍ਥ ਆਪਤ੍ਤਿ ਏਵਾ’’ਤਿ ਵੁਤ੍ਤਂ, ਤਂ ਨ ਯੁਤ੍ਤਂ. ਕਸ੍ਮਾ? ਪਰਿਵਾਰੇ (ਪਰਿ. ੧੬੮) ਏਵ ਦ੍ਵਿਨ੍ਨਂ ਆਕਾਰਾਨਂ ਆਗਤਤ੍ਤਾ, ਤਸ੍ਮਾ ਅਟ੍ਠਕਥਾਯਂ ‘‘ਅਨੁਞ੍ਞਾਤ’’ਨ੍ਤਿ ਦੁਵੁਤ੍ਤਂ. ਅਟ੍ਠੁਪ੍ਪਤ੍ਤਿਯਂਯੇਵ ਪਾਕਟਨ੍ਤਿ ‘‘ਪਦਭਾਜਨੇ ਨ ਵੁਤ੍ਤ’’ਨ੍ਤਿ ਵਤ੍ਤਬ੍ਬਂ. ਏਕਤੋ ਗਣ੍ਹਨ੍ਤੀਤਿ ਗਹਿਤਭਤ੍ਤਾਪਿ ਅਞ੍ਞੇ ਯਾਵ ਗਣ੍ਹਨ੍ਤਿ, ਤਾਵ ਚੇ ਤਿਟ੍ਠਨ੍ਤਿ, ਏਕਤੋ ਗਣ੍ਹਨ੍ਤਿਯੇਵ ਨਾਮ. ‘‘ਗਚ੍ਛਤਿ ਚੇ, ਅਨਾਪਤ੍ਤੀ’’ਤਿ ਵਦਨ੍ਤਿ.

ਏਤ੍ਥਾਹ – ‘‘ਪਟਿਗ੍ਗਹਣਮੇਵ ਹੇਤ੍ਥ ਪਮਾਣ’’ਨ੍ਤਿ ਵੁਤ੍ਤਂ, ਅਥ ਕਸ੍ਮਾ ਪਾਲ਼ਿਯਂ ‘‘ਗਣਭੋਜਨਂ ਨਾਮ ਯਤ੍ਥ ਚਤ੍ਤਾਰੋ…ਪੇ… ਭੁਞ੍ਜਨ੍ਤਿ, ਏਤਂ ਗਣਭੋਜਨਂ ਨਾਮਾ’’ਤਿ (ਪਾਚਿ. ੨੧੮) ਵੁਤ੍ਤਨ੍ਤਿ? ਵੁਚ੍ਚਤਿ – ਯਤ੍ਥਾਤਿ ਉਪਯੋਗਤ੍ਥੇ ਭੁਮ੍ਮਵਚਨਂ. ਚਤ੍ਤਾਰੋਤਿ ਗਣਸ੍ਸ ਹੇਟ੍ਠਿਮਪਰਿਚ੍ਛੇਦਨਿਦਸ੍ਸਨਂ. ਪਞ੍ਚਨ੍ਨਂ ਭੋਜਨਾਨਨ੍ਤਿ ਆਪਤ੍ਤਿਪ੍ਪਹੋਨਕਭੋਜਨਨਿਦਸ੍ਸਨਂ. ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤਾਤਿ ਅਕਪ੍ਪਿਯਨਿਮਨ੍ਤਨਨਿਦਸ੍ਸਨਂ. ਨਿਮਨ੍ਤਨਵਸੇਨੇਵ ਪਨ ਗਣਭੋਜਨਸ੍ਸ ਵੁਤ੍ਤਤ੍ਤਾ ‘‘ਨਿਮਨ੍ਤਿਤਾ ਭੁਞ੍ਜਨ੍ਤੀਤਿ ਵੁਤ੍ਤ’’ਨ੍ਤਿ ਵੁਤ੍ਤਂ. ‘‘ਅਞ੍ਞਤਰਂ ਭੋਜਨਂ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤੀ’’ਤਿ ਪਨ ਨ ਵੁਤ੍ਤਂ ਅਟ੍ਠੁਪ੍ਪਤ੍ਤਿਯਂਯੇਵ ਪਾਕਟਤ੍ਤਾ. ਯਂ ਭੁਞ੍ਜਨ੍ਤੀਤਿ ਏਵਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਭੁਞ੍ਜਨ੍ਤੀਤਿ ਪਟਿਗ੍ਗਾਹਕਨਿਯਮਵਚਨਂ. ਨ ਹਿ ਅਪ੍ਪਟਿਗ੍ਗਹਿਤਕਂ ਭਿਕ੍ਖੂ ਭੁਞ੍ਜਨ੍ਤਿ. ਇਦਂ ਵੁਤ੍ਤਂ ਹੋਤਿ ‘‘ਗਣਸ੍ਸ ਯਤੋ ਪਟਿਗ੍ਗਹਿਤਾਹਾਰਭੋਜਨਹੇਤੁ ਪਾਚਿਤ੍ਤਿਯ’’ਨ੍ਤਿ. ਆਗਨ੍ਤੁਕਪਟ੍ਟਂ ਮੋਘਸੁਤ੍ਤੇਨ ਸਿਬ੍ਬਿਤ੍ਵਾ ਠਪੇਨ੍ਤਿ, ਤਤ੍ਥ ਅਨੁਵਾਤੇ ਯਥਾ ਏਕਤਲਂ ਹੋਤਿ, ਤਥਾ ਹਤ੍ਥੇਹਿ ਘਟ੍ਟੇਤਿ. ਵਲੇਤੀਤਿ ਆਵਟ੍ਟੇਤਿ. ਪਰਿਵਤ੍ਤਨਨ੍ਤਿ ਸੁਤ੍ਤਂ ਗਣ੍ਹਨ੍ਤਾਨਂ ਸੁਖਗ੍ਗਹਣਤ੍ਥਂ ਸੁਤ੍ਤਪਰਿਵਤ੍ਤਨਂ ਕਰੋਤਿ, ਪਟ੍ਟਂ ਸਿਬ੍ਬਨ੍ਤਾਨਂ ਸੁਖਸਿਬ੍ਬਨਤ੍ਥਂ ਪਟ੍ਟਪਰਿਵਤ੍ਤਨਞ੍ਚ. ਨਵਚੀਵਰਕਾਰਕੋ ਇਧਾਧਿਪ੍ਪੇਤੋ, ਨ ਇਤਰੋਤਿ. ‘‘ਬਿਮ੍ਬਿਸਾਰਂ ਆਪੁਚ੍ਛਿਤ੍ਵਾ ਸਮ੍ਭਾਰੇ ਕਯਿਰਮਾਨੇਯੇਵ ਕਾਲਾ ਅਤਿਕ੍ਕਨ੍ਤਾ, ਪਚ੍ਛਾ ਗਣਭੋਜਨਸਿਕ੍ਖਾਪਦੇ ਪਞ੍ਞਤ੍ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪੁਚ੍ਛੀ’’ਤਿ ਵਦਨ੍ਤਿ, ਅਞ੍ਞਥਾ ਅਟ੍ਠਕਥਾਯ ਵਿਰੁਜ੍ਝਨਤੋ.

੨੨੦. ‘‘ਦ੍ਵੇ ਤਯੋ ਏਕਤੋਤਿ ਯੇਪਿ ਅਕਪ੍ਪਿਯਨਿਮਨ੍ਤਨਂ ਸਾਦਿਯਿਤ੍ਵਾ’’ਤਿਆਦਿਵਚਨੇਨ ਅਕਪ੍ਪਿਯਨਿਮਨ੍ਤਨਪਚ੍ਚਯਾ ਏਵ ਅਨਾਪਤ੍ਤਿ, ਵਿਞ੍ਞਤ੍ਤਿਤੋ ਆਪਤ੍ਤਿਯੇਵਾਤਿ ਦੀਪੇਤਿ. ਅਨਿਮਨ੍ਤਿਤੋ ਚਤੁਤ੍ਥੋ ਯਸ੍ਸ ਤਦੇਤਂ ਅਨਿਮਨ੍ਤਿਤਚਤੁਤ੍ਥਂ. ਏਸ ਨਯੋ ਸਬ੍ਬਤ੍ਥ. ਪਵੇਸੇਤ੍ਵਾਤਿ ਨਿਸੀਦਾਪੇਤ੍ਵਾ. ਚੀਵਰਦਾਨਸਮਯਲਦ੍ਧਕਚਤੁਕ੍ਕਂ ਚੀਵਰਕਾਰਸਮਯਲਦ੍ਧਕਚਤੁਕ੍ਕਨ੍ਤਿ ਏਵਮਾਦੀਨਿ. ਤਾਨਿ ਚਾਤਿ ਯੇਹਿ ਭੋਜਨੇਹਿ ਵਿਸਙ੍ਕੇਤੋ ਨਤ੍ਥਿ, ਤਾਨਿ. ਮਹਾਥੇਰੇਤਿ ਉਪਸਮ੍ਪਨ੍ਨੇ. ਅਟ੍ਠਤ੍ਵਾਤਿ ਠਿਤੇਨ ਨਿਮਿਤ੍ਤਂ ਦਸ੍ਸਿਤਂ ਹੋਤਿ. ਤਤ੍ਥ ਤਤ੍ਥ ਗਨ੍ਤ੍ਵਾਤਿ ਰਥਿਕਾਦੀਸੁ ਭਿਕ੍ਖੁਸਮੀਪੇ ਗਨ੍ਤ੍ਵਾ. ਇਮਸ੍ਮਿਂ ਪਨ ਸਿਕ੍ਖਾਪਦੇ ਕਤ੍ਥਚਿ ਪੋਤ੍ਥਕੇ ‘‘ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਦਾਨਸਮਯੇ ਗਣਭੋਜਨਂ ਭੁਞ੍ਜਿਤੁਂ. ਏਵਞ੍ਚਿਦਂ ਭਗਵਤਾ ਭਿਕ੍ਖੂਨ’’ਨ੍ਤਿ ਪਾਠੋ ਦਿਸ੍ਸਤਿ. ਕਤ੍ਥਚਿ ‘‘ਭੁਞ੍ਜਿਤੁ’’ਨ੍ਤਿ ਵਤ੍ਵਾ ‘‘ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥਾ’’ਤਿ ਪਾਠੋ, ਅਯਂ ਸੋਭਨੋ.

ਗਣਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ

੨੨੧. ਅਧਿਟ੍ਠਿਤਾਤਿ ਨਿਚ੍ਚਪ੍ਪਵਤ੍ਤਾ. ਬਦਰਚੁਣ੍ਣਸਕ੍ਕਰਾਦੀਹਿ ਯੋਜਿਤਂ ਬਦਰਸਾਲ਼ਵਂ. ਕਿਰਕਮ੍ਮਕਾਰੇਨਾਤਿ ਕਿਰਸ੍ਸ ਕਮ੍ਮਕਾਰੇਨ.

੨੨੬. ‘‘ਵਿਕਪ੍ਪੇਤ੍ਵਾ ਗਣ੍ਹਾਹੀ’’ਤਿ ਏਤ੍ਥਾਹੁ ਪੋਰਾਣਤ੍ਥੇਰਾ ‘‘ਭਗਵਤੋ ਸਮ੍ਮੁਖਾ ਅਵਿਕਪ੍ਪੇਤ੍ਵਾ ਗੇਹਤੋ ਨਿਕ੍ਖਮਿਤ੍ਵਾ ਰਥਿਕਾਯ ਅਞ੍ਞਤਰਸ੍ਸ ਭਿਕ੍ਖੁਨੋ ਸਨ੍ਤਿਕੇ ਵਿਕਪ੍ਪੇਸਿ, ਵਿਕਪ੍ਪੇਨ੍ਤੇਨ ਪਨ ‘ਮਯ੍ਹਂ ਭਤ੍ਤਪਚ੍ਚਾਸਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’ਤਿ ਵਤ੍ਤਬ੍ਬਂ, ਇਤਰੇਨ ਵਤ੍ਤਬ੍ਬਂ ‘ਤਸ੍ਸ ਸਨ੍ਤਕਂ ਪਰਿਭੁਞ੍ਜ ਵਾ ਯਥਾਪਚ੍ਚਯਂ ਵਾ ਕਰੋਹੀ’’’ਤਿ. ਪਞ੍ਚਸੁਸਹਧਮ੍ਮਿਕੇਸੂਤਿ ਸਮ੍ਮੁਖਾ ਠਿਤਸ੍ਸ ਸਹਧਮ੍ਮਿਕਸ੍ਸ ਯਸ੍ਸ ਵਿਕਪ੍ਪੇਤੁਕਾਮੋ, ਤਂ ਸਹਧਮ੍ਮਿਕਂ ਅਦਿਸ੍ਵਾ ਗਹਟ੍ਠਸ੍ਸ ਵਾ ਸਨ੍ਤਿਕੇ, ਸਯਮੇਵ ਵਾ ‘‘ਪਞ੍ਚਸੁ ਸਹਧਮ੍ਮਿਕੇਸੁ ਇਤ੍ਥਨ੍ਨਾਮਸ੍ਸ ਵਿਕਪ੍ਪੇਮੀ’’ਤਿ ਵਤ੍ਵਾ ਭੁਞ੍ਜਿਤਬ੍ਬਨ੍ਤਿ ਏਕੇ, ਏਵਂ ਸਤਿ ਥੇਰੋ ਤਸ੍ਮਿਂਯੇਵ ਨਿਸਿਨ੍ਨੋਵ ਤਥਾ ਵਾਚਂ ਨਿਚ੍ਛਾਰੇਤ੍ਵਾ ਪਟਿਗ੍ਗਣ੍ਹਾਤੀਤਿ ਤਕ੍ਕੋ ਦਿਸ੍ਸਤਿ. ਮਹਾਪਚ੍ਚਰਿਯਾਦੀਸੁ ਪਨ ਪਰਮ੍ਮੁਖਾ ਵਿਕਪ੍ਪਨਾਵ ਵੁਤ੍ਤਾ, ਸਾ ‘‘ਤੇਨ ਹਾਨਨ੍ਦ, ਵਿਕਪ੍ਪੇਤ੍ਵਾ ਗਣ੍ਹਾਹੀ’’ਤਿ ਇਮਿਨਾ ਸਮੇਤਿ, ਤਥਾਪਿ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ) ‘‘ਤਸ੍ਮਾ ਯੋ ਭਿਕ੍ਖੁ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰਸ੍ਸ ‘ਮਯ੍ਹਂ ਭਤ੍ਤਪਚ੍ਚਾਸਂ ਤੁਯ੍ਹਂ ਦਮ੍ਮੀ’ਤਿ ਵਾ ‘ਵਿਕਪ੍ਪੇਮੀ’ਤਿ ਵਾ ਏਵਂ ਸਮ੍ਮੁਖਾ ਵਾ ‘ਇਤ੍ਥਨ੍ਨਾਮਸ੍ਸ ਦਮ੍ਮੀ’ਤਿ ਵਾ ‘ਵਿਕਪ੍ਪੇਮੀ’ਤਿ ਵਾ ਏਵਂ ਪਰਮ੍ਮੁਖਾ ਵਾ’’ਤਿ ਵਚਨਤੋ ਸਹਧਮ੍ਮਿਕਸ੍ਸ ਸਨ੍ਤਿਕੇ ਏਵ ਵਤ੍ਤਬ੍ਬਂ, ਨ ਸਯਮੇਵਾਤਿ ਦਿਸ੍ਸਤਿ. ਯਸ੍ਮਾ ਅਯਂ ਪਚ੍ਛਿਮਨਯੋ ਪੋਰਾਣਗਣ੍ਠਿਪਦੇਨਪਿ ਸਮੇਤਿ, ਤਸ੍ਮਾ ਇਧ ਮਾਤਿਕਾਟ੍ਠਕਥਾਨੁਸਾਰੇਨ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਕਿਞ੍ਚਾਪਿ ‘‘ਤੇ ਮਨੁਸ੍ਸਾ…ਪੇ… ਭੋਜਨਮਦਂਸੂ’’ਤਿ ਵਚਨਤੋ ਅਕਪ੍ਪਿਯਨਿਮਨ੍ਤਨਂ ਪਞ੍ਞਾਯਤਿ, ਤਥਾਪਿ ਥੇਰਸ੍ਸ ਕੁਕ੍ਕੁਚ੍ਚੁਪ੍ਪਤ੍ਤਿਕਾਰਣੇਨ ਭਤ੍ਤੇਨ ਸੋ ਨਿਮਨ੍ਤਿਤੋਤਿ ਵੇਦਿਤਬ੍ਬੋ. ਅਞ੍ਞਥਾ ਪਰਤੋ ‘‘ਦ੍ਵੇ ਤਯੋ ਨਿਮਨ੍ਤਨੇ ਏਕਤੋ ਭੁਞ੍ਜਤੀ’’ਤਿ ਵਚਨੇਨ, ਅਨਾਪਤ੍ਤਿਵਾਰੇਨ ਚ ਵਿਰੁਜ੍ਝਤਿ.

੨੨੯. ਏਤ੍ਥਾਯਂ ਵਿਚਾਰਣਾ – ‘‘ਅਞ੍ਞੋ ਮਨੁਸ੍ਸੋ ਪਤ੍ਤਂ ਗਣ੍ਹਾਤਿ, ਨ ਦਾਤਬ੍ਬ’’ਨ੍ਤਿ ਵਚਨਤੋ ਅਪਰਭਾਗੇ ਅਕਪ੍ਪਿਯਨਿਮਨ੍ਤਨੇਨ ਨਤ੍ਥਿ ਪਯੋਜਨਂ, ਪੁਬ੍ਬਭਾਗੇਯੇਵ ਅਕਪ੍ਪਿਯਨਿਮਨ੍ਤਨੇਨ ਪਯੋਜਨਨ੍ਤਿ ਸ੍ਵੇਪਿ ਭਨ੍ਤੇ ਆਗਚ੍ਛੇਯ੍ਯਾਥਾਤਿ ਏਤ੍ਥ ਕਤਰਂ ਅਕਪ੍ਪਿਯਨਿਮਨ੍ਤਨਂ, ਤਸ੍ਮਾ ਅਧਿਪ੍ਪਾਯੋ ਚੇਤ੍ਥ ਪਮਾਣਨ੍ਤਿ. ਨ, ‘‘ਪਿਣ੍ਡਾਯ ਚਰਿਤ੍ਵਾ ਲਦ੍ਧਭਤ੍ਤਂ ਭੁਞ੍ਜਤਿ, ਆਪਤ੍ਤੀ’’ਤਿ ਵਚਨਤੋਤਿ. ਤਤ੍ਥ ‘‘ਸ੍ਵੇਪਿ ਭਨ੍ਤੇ’’ਤਿ ਏਤ੍ਥ ਯਥਾ ਵਚਨਮਤ੍ਤਂ ਅਗ੍ਗਹੇਤ੍ਵਾ ਅਕਪ੍ਪਿਯਨਿਮਨ੍ਤਨਕ੍ਕਮੇਨ ਅਤ੍ਥੋ ਗਹਿਤੋ, ਤਥਾ ‘‘ਪਿਣ੍ਡਾਯ ਚਰਿਤ੍ਵਾ’’ਤਿ ਏਤ੍ਥਾਪਿ ਅਨ੍ਤਰਾ ਅਕਪ੍ਪਿਯਨਿਮਨ੍ਤਨੇਨ ਲਦ੍ਧਭਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਅਤ੍ਥੋ ਗਹੇਤਬ੍ਬੋ. ਪਿਣ੍ਡਾਯ ਹਿ ਚਰਨ੍ਤਂ ਦਿਸ੍ਵਾ ‘‘ਏਤ੍ਥ, ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ ਦਿਨ੍ਨਮ੍ਪਿ ਅਕਪ੍ਪਿਯਨਿਮਨ੍ਤਨੇਨ ਲਦ੍ਧਂ ਨਾਮ ਹੋਤਿ. ਵੋਹਾਰੇਨ ਪਨ ‘‘ਪਿਣ੍ਡਾਯ ਚਰਿਤ੍ਵਾ ਲਦ੍ਧਭਤ੍ਤ’’ਨ੍ਤਿ ਵੁਚ੍ਚਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ. ਅਞ੍ਞਥਾ ਮਾਤਿਕਾਟ੍ਠਕਥਾਯਂ ‘‘ਗਣਭੋਜਨੇ ਵੁਤ੍ਤਨਯੇਨੇਵ ਪਞ੍ਚਹਿ ਭੋਜਨੇਹਿ ਨਿਮਨ੍ਤਿਤਸ੍ਸ…ਪੇ… ਪਰਸ੍ਸ ਪਰਸ੍ਸ ਭੋਜਨੇ’’ਤਿ ਵੁਤ੍ਤਵਚਨਵਿਰੋਧੋ. ਇਦਞ੍ਹਿ ਵਚਨਂ ਯੇਨ ਪਠਮਂ ਨਿਮਨ੍ਤਿਤੋ, ਤਤੋ ਪਠਮਨਿਮਨ੍ਤਿਤਂ ਆਦਾਯ ਗਤੋ ਪਰਸ੍ਸ ਪਰਸ੍ਸ ਨਿਮਨ੍ਤਨਕਦਾਯਕਸ੍ਸ ਭੋਜਨੇਤਿ ਅਤ੍ਥਪਰਿਦੀਪਨਤੋ ਨਿਮਨ੍ਤਨਤੋ ਲਦ੍ਧਭਤ੍ਤਸ੍ਸ ਭੋਜਨੇਯੇਵ ਆਪਤ੍ਤੀਤਿ ਦੀਪੇਤਿ. ‘‘ਦ੍ਵੇ ਤਯੋ ਨਿਮਨ੍ਤਨੇ ਏਕਤੋ’’ਤਿ ਵਚਨੇਨਪਿ ਸਮੇਤਿ, ਅਞ੍ਞਥਾ ‘‘ਯੇਨ ਨਿਮਨ੍ਤਿਤੋ, ਤਸ੍ਸ ਭੋਜਨਤੋ ਪਰਸ੍ਸ ਭੋਜਨੇ’’ਤਿ ਏਤ੍ਤਕਂ ਵਤ੍ਤਬ੍ਬਂ ਸਿਯਾ, ਪਾਲ਼ਿਯਂ ਵਾ ‘‘ਨਿਮਨ੍ਤਨੇਨ ਏਕਤੋਭੁਞ੍ਜਤੀ’’ਤਿ ਏਤ੍ਤਕਂ ਵਤ੍ਤਬ੍ਬਂ ਸਿਯਾ. ਦੁਤਿਯਨਿਮਨ੍ਤਨਸ੍ਸ ਪਠਮਭੋਜਨੇ ਆਪਤ੍ਤਿਪ੍ਪਸਙ੍ਗਨਿਵਾਰਣਤ੍ਥਂ ‘‘ਯੇਨ ਯੇਨਾ’’ਤਿਆਦਿ ਵੁਤ੍ਤਂ. ਨਿਮਨ੍ਤਨਪਟਿਪਾਟਿਯਾ ਭੁਞ੍ਜਤੀਤਿ ਪਾਲ਼ੀਤਿ ਚੇ? ਨ, ‘‘ਅਨਾਪਤ੍ਤਿ ਨਿਚ੍ਚਭਤ੍ਤੇ’’ਤਿਆਦਿਪਾਲ਼ਿਵਿਰੋਧਤੋ.

ਗਣ੍ਠਿਪਦੇ ਪਨ ‘‘ਪਿਣ੍ਡਾਯ ਚਰਿਤ੍ਵਾ ਲਦ੍ਧਭਤ੍ਤਂ ਕਸ੍ਮਾ ਭੁਞ੍ਜਿਤੁਂ ਨ ਲਭਤੀਤਿ ਚੇ? ‘ਪਰਮ੍ਪਰਭੋਜਨਂ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤੋ, ਤਂ ਠਪੇਤ੍ਵਾ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਭੁਞ੍ਜਤਿ, ਏਤਂ ਪਰਮ੍ਪਰਭੋਜਨਂ ਨਾਮਾ’ਤਿ ਵੁਤ੍ਤਤ੍ਤਾ’’ਤਿ ਲਿਖਿਤਂ. ਯਦਿ ਏਵਂ ਨਿਚ੍ਚਭਤ੍ਤਾਦਿਕਮ੍ਪਿ ਨ ਵਟ੍ਟਤੀਤਿ ਆਪਜ੍ਜਤੀਤਿ ਨਿਚ੍ਚਭਤ੍ਤਾਦਿ ਓਦਿਸ੍ਸਕਨ੍ਤਿ ਚੇ? ਤਂ ਨ, ਤਦਞ੍ਞਸ੍ਸ ਅਤ੍ਤਨੋ ਧਨੇਨ ਨਿਪ੍ਫਨ੍ਨਸ੍ਸ, ਸਙ੍ਘਤੋ ਲਦ੍ਧਸ੍ਸ ਵਾ ਪਾਤੋ ਪਚਨਕਯਾਗੁ ਚੇ ਘਨਾ ਹੋਤਿ, ਤਸ੍ਸਾਪਿ, ਏਕਕੁਟਿਕਂ ਗਾਮਂ ਉਪਨਿਸ੍ਸਾਯ ਵਿਹਰਤੋ ਭਿਕ੍ਖਾਚਰਿਯਵਸੇਨ ਲਭਿਤਬ੍ਬਨਿਚ੍ਚਭਤ੍ਤਸ੍ਸ ਚ ਅਕਪ੍ਪਿਯਭਾਵਪ੍ਪਸਙ੍ਗਤੋ. ਤਤ੍ਥ ਭਿਕ੍ਖਾਚਰਿਯਵਸੇਨ ਲਦ੍ਧਂ ਨ ਕਪ੍ਪਤਿ ਨਿਮਨ੍ਤਨਕਾਨਂ ਅਪ੍ਪਸਾਦਾਵਹਨਤੋਤਿ ਚੇ? ਨ, ‘‘ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤੀ’’ਤਿ ਵਚਨਵਿਰੋਧਤੋ. ਖਾਦਨੀਯਮ੍ਪਿ ਹਿ ਪਰਸ੍ਸ ਖਾਦਿਤ੍ਵਾ ਭੁਤ੍ਤਤ੍ਤਾ ਨਿਮਨ੍ਤਨਭੋਜਨਂ ਅਭੁਞ੍ਜਨ੍ਤੋ ਅਪ੍ਪਸਾਦਂ ਕਰੋਤਿ ਏਵ, ਤਸ੍ਮਾ ਅਪ੍ਪਸਾਦਾਵਹਂ ਅਪ੍ਪਮਾਣਂ, ਤਸ੍ਮਾ ਨਿਚ੍ਚਭਤ੍ਤਾਦਿ ਓਦਿਸ੍ਸਕਂ ਨ ਸਮ੍ਭਵਤਿ. ਅਪਿਚ ਹੇਟ੍ਠਾ ਵੁਤ੍ਤਨਯੇਨ ਸਦ੍ਧਿਂ ਇਧ ਵੁਤ੍ਤਨਯੇਨ ਸਂਸਨ੍ਦਿਤ੍ਵਾ ਯਂ ਯਂ ਖਮਤਿ, ਤਂ ਤਂ ਗਹੇਤਬ੍ਬਨ੍ਤਿ ਸਬ੍ਬੋਪਿ ਕੇਸਞ੍ਚਿ ਆਚਰਿਯਾਨਂ ਵਿਨਿਚ੍ਛਯੋ. ਆਚਰਿਯਸ੍ਸ ਪਨ ਵਿਨਿਚ੍ਛਯੋ ਅਨ੍ਤੇ ਆਵਿ ਭਵਿਸ੍ਸਤਿ. ‘‘ਖੀਰਂ ਵਾ ਰਸਂ ਵਾ ਪਿਵਤੋ ਅਮਿਸ੍ਸਮ੍ਪੀਤਿ ਅਧਿਪ੍ਪਾਯੋ’’ਤਿ ਵੁਤ੍ਤਂ. ਗਣ੍ਠਿਪਦੇ ‘‘ਹੇਟ੍ਠਾ ਓਦਨੇਨਾਮਿਸ੍ਸੇਤ੍ਵਾ ਉਪਰਿ ਤਿਟ੍ਠਤੀ’’ਤਿ ਲਿਖਿਤਂ.

ਮਹਾਉਪਾਸਕੋਤਿ ਗੇਹਸਾਮਿਕੋ. ਮਹਾਅਟ੍ਠਕਥਾਯਂ ‘‘ਆਪਤ੍ਤੀ’’ਤਿ ਵਚਨੇਨ ਕੁਰੁਨ੍ਦਿਯਂ ‘‘ਵਟ੍ਟਤੀ’’ਤਿ ਵਚਨਂ ਵਿਰੁਦ੍ਧਂ ਵਿਯ ਦਿਸ੍ਸਤਿ. ‘‘ਦ੍ਵਿਨ੍ਨਮ੍ਪਿ ਅਧਿਪ੍ਪਾਯੋ ਮਹਾਪਚ੍ਚਰਿਯਂ ਵਿਚਾਰਿਤੋ’’ਤਿ ਲਿਖਿਤਂ. ‘‘ਚਾਰਿਤ੍ਤਤੋਤਿ ‘ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ’ਤਿ ਪਰਤੋ ਵਤ੍ਤਬ੍ਬਤੋ’’ਤਿ ਵੁਤ੍ਤਂ. ਵਚੀਕਮ੍ਮਂ ਅਵਿਕਪ੍ਪਨਂ. ਏਤ੍ਥ ‘‘ਮਹਾਉਪਾਸਕੋ ਭਿਕ੍ਖੂ ਨਿਮਨ੍ਤੇਤਿ…ਪੇ… ਪਚ੍ਛਾ ਲਦ੍ਧਂ ਭਤ੍ਤਂ ਭੁਞ੍ਜਨ੍ਤਸ੍ਸ ਆਪਤ੍ਤਿ. ਪਿਣ੍ਡਾਯ ਚਰਿਤ੍ਵਾ ਲਦ੍ਧਭਤ੍ਤਂ ਭੁਞ੍ਜਤਿ, ਆਪਤ੍ਤੀ’’ਤਿ ਅਟ੍ਠਕਥਾਯਂ ਵਚਨਤੋ, ‘‘ਕਾਲਸ੍ਸੇਵ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਮ੍ਹਾ’’ਤਿ ਪਾਲ਼ਿਤੋ, ਖਨ੍ਧਕੇ ‘‘ਨ ਚ, ਭਿਕ੍ਖਵੇ, ਅਞ੍ਞਤ੍ਰ ਨਿਮਨ੍ਤਨੇ ਅਞ੍ਞਸ੍ਸ ਭੋਜ੍ਜਯਾਗੁ ਪਰਿਭੁਞ੍ਜਿਤਬ੍ਬਾ, ਯੋ ਪਰਿਭੁਞ੍ਜੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ (ਮਹਾਵ. ੨੮੩) ਵਚਨਤੋ ਚ ਨਿਮਨ੍ਤੇਤ੍ਵਾ ਵਾ ਪਵੇਦੇਤੁ ਅਨਿਮਨ੍ਤੇਤ੍ਵਾ ਵਾ, ਪਠਮਗਹਿਤਨਿਮਨ੍ਤਨਸ੍ਸ ਭਿਕ੍ਖੁਨੋ ਪਠਮਨਿਮਨ੍ਤਨਭੋਜਨਤੋ ਅਞ੍ਞਂ ਯਂ ਕਿਞ੍ਚਿ ਪਰਸਨ੍ਤਕਂ ਭੋਜਨਂ ਪਰਮ੍ਪਰਭੋਜਨਾਪਤ੍ਤਿਂ ਕਰੋਤਿ. ਅਤ੍ਤਨੋ ਸਨ੍ਤਕਂ, ਸਙ੍ਘਗਣਤੋ ਲਦ੍ਧਂ ਵਾ ਅਗਹਟ੍ਠਸਨ੍ਤਕਂ ਵਟ੍ਟਤਿ, ਨਿਮਨ੍ਤਨਤੋ ਪਠਮਂ ਨਿਬਦ੍ਧਤ੍ਤਾ ਪਨ ਨਿਚ੍ਚਭਤ੍ਤਾਦਿ ਪਰਸਨ੍ਤਕਮ੍ਪਿ ਵਟ੍ਟਤਿ. ਖਨ੍ਧਕੇ ‘‘ਨ ਚ, ਭਿਕ੍ਖਵੇ…ਪੇ… ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ (ਮਹਾਵ. ੨੮੩) ਵਚਨਂ ਪਰਸਨ੍ਤਕਭੋਜਨਵੁਤ੍ਤਨਿਯਮਨਂ. ਤਤੋ ਹਤ੍ਥਕੋਵ ਨੋ ਤਕ੍ਕੋਤਿ ਆਚਰਿਯੋ.

ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਕਾਣਮਾਤਾਸਿਕ੍ਖਾਪਦਵਣ੍ਣਨਾ

੩੧-੩. ਪਟਿਯਾਲੋਕਨ੍ਤਿ ਪਚ੍ਛਿਮਂ ਦੇਸਂ. ਪੂਵਗਣਨਾਯਾਤਿ ਅਤਿਰਿਤ੍ਤਪੂਵਗਣਨਾਯਾਤਿ ਅਤ੍ਥੋ. ਸਚੇ ‘‘ਅਪਾਥੇਯ੍ਯਾਦਿਅਤ੍ਥਾਯ ਸਜ੍ਜਿਤ’’ਨ੍ਤਿ ਸਞ੍ਞਾਯ ਗਣ੍ਹਾਤਿ, ਅਚਿਤ੍ਤਕਤ੍ਤਾ ਸਿਕ੍ਖਾਪਦਸ੍ਸ ਆਪਤ੍ਤਿ ਏਵ. ਅਥ ਉਗ੍ਗਹਿਤਂ ਗਣ੍ਹਾਤਿ, ਨ ਮੁਚ੍ਚਤਿਯੇਵ. ਅਸਂਵਿਭਾਗੇ ਪਨ ਅਨਾਪਤ੍ਤਿ ਅਕਪ੍ਪਿਯਤ੍ਤਾ. ਅਚਿਤ੍ਤਕਤਾ ਪਞ੍ਞਤ੍ਤਿਜਾਨਨਾਭਾਵੇਨੇਵ, ਨ ਵਤ੍ਥੁਜਾਨਨਾਭਾਵੇਨਾਤਿ ਏਕੇ. ਨ, ਮਾਤਿਕਾਟ੍ਠਕਥਾਯਂ ‘‘ਪਾਥੇਯ੍ਯਾਦਿਅਤ੍ਥਾਯ ਸਜ੍ਜਿਤਭਾਵਜਾਨਨ’’ਨ੍ਤਿ ਅਙ੍ਗੇਸੁ ਅਵੁਤ੍ਤਤ੍ਤਾ. ਪੋਰਾਣਗਣ੍ਠਿਪਦੇ ਪਨੇਵਂ ਵੁਤ੍ਤਂ ‘‘ਏਕੇਨ ਵਾ ਅਨੇਕੇਹਿ ਵਾ ਦ੍ਵਤ੍ਤਿਪਤ੍ਤਪੂਰੇਸੁ ਗਹਿਤੇਸੁ ਤੇਸਂ ਅਨਾਰੋਚਨੇਨ ਵਾ ਸਯਂ ਵਾ ਜਾਨਿਤ੍ਵਾ ਯੋ ਅਞ੍ਞਂ ਗਣ੍ਹਾਤਿ, ਤਸ੍ਸ ਦੁਕ੍ਕਟਂ. ਏਕਤੋ ਤੀਸੁ, ਚਤੂਸੁ ਵਾ ਪਵਿਟ੍ਠੇਸੁ ਏਕੇਨ ਚੇ ਦ੍ਵੇਪਤ੍ਤਪੂਰਾ ਗਹਿਤਾ, ਦੁਤਿਯੇ ਦ੍ਵੇ ਗਣ੍ਹਨ੍ਤੇ ਪਠਮੋ ਚੇ ਨ ਨਿਵਾਰੇਤਿ, ਪਠਮਸ੍ਸ ਪਾਚਿਤ੍ਤਿਯਂ. ਨਿਵਾਰੇਤਿ ਚੇ, ਅਨਾਪਤ੍ਤਿ, ਦੁਤਿਯਸ੍ਸੇਵ ਦੁਕ੍ਕਟ’’ਨ੍ਤਿ. ਸਚੇ ਸਞ੍ਚਿਚ੍ਚ ਨ ਵਦਤਿ, ਪੋਰਾਣਗਣ੍ਠਿਪਦੇ ਵੁਤ੍ਤਨਯੇਨ ਪਾਚਿਤ੍ਤਿਯਂ, ਮਾਤਿਕਾਟ੍ਠਕਥਾਵਸੇਨ (ਕਙ੍ਖਾ. ਅਟ੍ਠ. ਕਾਣਮਾਤਾਸਿਕ੍ਖਾਪਦਵਣ੍ਣਨਾ) ਦੁਕ੍ਕਟਂ. ‘‘ਅਤਿਰੇਕਪਟਿਗ੍ਗਹਣ’’ਨ੍ਤਿ ਤਤ੍ਥ ਪਞ੍ਚਮਂ ਅਙ੍ਗਂ ਵੁਤ੍ਤਂ, ਤਸ੍ਮਾ ਅਪ੍ਪਟਿਗ੍ਗਹਿਤਤ੍ਤਾ ਨ ਪਾਚਿਤ੍ਤਿਯਂ, ਕਤ੍ਤਬ੍ਬਾਕਰਣਤੋ ਪਨ ਦੁਕ੍ਕਟਂ. ਅਞ੍ਞਥਾ ਕਿਰਿਯਾਕਿਰਿਯਂ ਇਦਂ ਆਪਜ੍ਜਤਿ, ਅਨਿਵਾਰਣਂ, ਅਨਾਰੋਚਨਂ ਵਾ ਛਟ੍ਠਙ੍ਗਂ ਵਤ੍ਤਬ੍ਬਂ ਸਿਯਾ. ਏਕਨਿਕਾਯਿਕਾਨਂ ਵਾਤਿ ਏਤ੍ਥ ‘‘ਆਸਨ੍ਨਵਿਹਾਰਭਿਕ੍ਖੂ, ਆਸਨ੍ਨਆਸਨਸਾਲਾਗਤਾ ਵਾ ਸਚੇ ਵਿਸਭਾਗੇਹਿ ਆਨੀਤਂ ਨ ਪਟਿਗ੍ਗਣ੍ਹਨ੍ਤਿ, ‘ਆਰਾਮਿਕਾਦੀਨਂਯੇਵ ਵਾ ਦਾਪੇਨ੍ਤੀ’ਤਿ ਜਾਨਾਤਿ, ਯਤ੍ਥ ਪਰਿਭੋਗਂ ਗਚ੍ਛਤਿ, ਤਤ੍ਥ ਦਾਤੁਂ ਵਟ੍ਟਤੀ’’ਤਿ ਵੁਤ੍ਤਂ. ‘‘ਦ੍ਵਤ੍ਤਿਪਤ੍ਤਪੂਰਾ’ਤਿ ਵਚਨਤੋ ਪਚ੍ਛਿਆਦੀਸੁ ਅਧਿਕਮ੍ਪਿ ਗਣ੍ਹਤੋ ਅਨਾਪਤ੍ਤੀ’’ਤਿ ਕੇਚਿ ਵਿਨਯਧਰਮਾਨਿਨੋ ਵਦਨ੍ਤਿ, ਤਂ ਤੇਸਂਯੇਵ ਨਿਸੀਦਤੁ, ਆਚਰਿਯਾ ਪਨ ‘‘ਪਚ੍ਛਿਆਦੀਸੁਪਿ ਉਕ੍ਕਟ੍ਠਪਤ੍ਤਸ੍ਸ ਪਮਾਣਵਸੇਨ ਦ੍ਵਤ੍ਤਿਪਤ੍ਤਪੂਰਾ ਗਹੇਤਬ੍ਬਾ. ਉਕ੍ਕਟ੍ਠਪਰਿਚ੍ਛੇਦਕਥਾ ਹੇਸਾ’’ਤਿ ਵਦਨ੍ਤਿ.

ਕਾਣਮਾਤਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਠਮਪਵਾਰਣਸਿਕ੍ਖਾਪਦਵਣ੍ਣਨਾ

੨੩੬. ਯਾਵਦਤ੍ਥਪਵਾਰਣਾਯ ਪਵਾਰਿਤਾ ਕਿਞ੍ਚਾਪਿ ‘‘ਪਵਾਰਿਤਾ’’ਇਚ੍ਚੇਵ ਅਧਿਪ੍ਪੇਤਾ ਅਟ੍ਠੁਪ੍ਪਤ੍ਤਿਯਾਵ, ਅਥ ਖੋ ਪਚ੍ਛਿਮਾਵ ਇਧਾਧਿਪ੍ਪੇਤਾ.

੨੩੭. ‘‘ਅਲਮੇਤਂ ਸਬ੍ਬ’’ਨ੍ਤਿ ਵੁਤ੍ਤਤ੍ਤਾ ਅਤਿਰਿਤ੍ਤਂ ਨਾਮ ਹੋਤਿ. ਭਿਕ੍ਖੁਸ੍ਸ ਇਦਮ੍ਪਿ ਤੇ ਅਧਿਕਂ, ਇਤੋ ਅਞ੍ਞਂ ਨ ਲਚ੍ਛਤੀਤਿ ਕਿਰ ਅਤ੍ਥੋ.

੨੩੮-੯. ‘‘ਅਸਨਂ ਪਞ੍ਞਾਯਤੀ’’ਤਿ ਏਤੇਨੇਵ ‘‘ਭੁਤ੍ਤਾਵੀ’’ਤਿ ਏਤਸ੍ਸ ਸਿਦ੍ਧਤ੍ਤਾ ਵਿਸੁਂ ਅਤ੍ਥਸਿਦ੍ਧਿ ਨਤ੍ਥਿ. ਯਦਿ ਅਤ੍ਥਿ, ਅਙ੍ਗਾਨਂ ਛਕ੍ਕਤ੍ਤਦਸ੍ਸਨਨ੍ਤਿ. ਵੁਤ੍ਤਮ੍ਪਿ ਚੇਤਨ੍ਤਿਆਦਿ ਪਵਾਰਣਙ੍ਗਾਨਂ ਪਞ੍ਚਕਤ੍ਤਦਸ੍ਸਨਂ. ਵਰਕੋਤਿ ਯੋ ਕੋਚਿ ਵਰਕੋ. ‘‘ਪਵਾਰਣਂ ਪਨ ਜਨੇਤਿਯੇਵਾਤਿ ਵਿਸੁਂ ਸਿਤ੍ਥਂ ਵੋਦਕਂ ਕਰੋਨ੍ਤਿ, ਪਵਾਰਣਂ ਨ ਜਨੇਤਿ. ਯਾਗੁਂ ਵਾ ਪਿਵਨ੍ਤੋ ਪਠਮਂ ਉਦਕਂ ਪਿਵਤਿ, ਵਟ੍ਟਤਿ. ਅਵਸਿਟ੍ਠਂ ਹੇਟ੍ਠਾਸਿਤ੍ਥਂ ਪਵਾਰਣਂ ਨ ਜਨੇਤੀ’’ਤਿ ਲਿਖਿਤਂ. ਉਪਤਿਸ੍ਸਤ੍ਥੇਰੋ ‘‘ਜਨੇਤਿਯੇਵਾ’’ਤਿ ਵਦਤਿ, ਤਂ ਨ ਇਚ੍ਛਨ੍ਤਿ ਆਚਰਿਯਾ. ਭਜ੍ਜਿਤਪਿਟ੍ਠਨ੍ਤਿ ਤਣ੍ਡੁਲਚੁਣ੍ਣਮੇਵ. ਭਜ੍ਜਿਤਸਤ੍ਤੁਯੋ ਪਿਣ੍ਡੇਤ੍ਵਾ ਕਤਮੋਦਕੋ ਸਤ੍ਤੁਮੋਦਕੋ.

‘‘ਯਾਗੁਸਿਤ੍ਥਮਤ੍ਤਾਨੇਵ ਦ੍ਵੇ…ਪੇ… ਪਟਿਕ੍ਖਿਪਤਿ, ਨ ਪਵਾਰੇਤੀ’’ਤਿ ਵੁਤ੍ਤਤ੍ਤਾ ਪਰਚਙ੍ਕਮਚ੍ਛਾਦਯੋ ਪਕ੍ਖਿਪਿਤ੍ਵਾ ਪਕ੍ਕਯਾਗੁਂ ਪਿਵਨ੍ਤੋ ਸਚੇ ਅਞ੍ਞਂ ਤਾਦਿਸਂਯੇਵ ਪਟਿਕ੍ਖਿਪਤਿ, ਪਵਾਰਣਾ ਨ ਹੋਤੀਤਿ ਕਿਰ ਧਮ੍ਮਸਿਰਿਤ੍ਥੇਰੋ. ਸਚੇ ਅਞ੍ਞਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਸ੍ਮਾ? ਅਸਨਸਙ੍ਖਾਤਸ੍ਸ ਵਿਪ੍ਪਕਤਭੋਜਨਸ੍ਸਾਭਾਵਤੋ. ਭੋਜਨਸਾਲਾਯਂ ਭੁਞ੍ਜਨ੍ਤੋ ਚੇ, ਅਤ੍ਤਨੋ ਅਪਾਪੁਣਨਕੋਟ੍ਠਾਸਂ ਅਭਿਹਟਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਾਮਂ ਪਟਿਕ੍ਖਿਪਤਿ, ਪਤ੍ਤੇ ਪਨ ਆਰਾਮਿਕੋ ਆਕਿਰਤਿ, ਤਤੋ ਭੁਞ੍ਜਿਤੁਂ ਨ ਵਟ੍ਟਤਿ. ਇਦਞ੍ਹਿ ਬੁਦ੍ਧਪ੍ਪਟਿਕੁਟ੍ਠਅਨੇਸਨਾਯ ਉਪ੍ਪਨ੍ਨੇਯੇਵ ਸਙ੍ਗਹਂ ਗਚ੍ਛਤਿ. ਯਥਾ ਹਿ ਸਙ੍ਘਤੋ ਉਦ੍ਧਟਪਿਣ੍ਡਂ ਦੁਸ੍ਸੀਲੋ ਦੇਤਿ, ਤਂ ਪਟਿਕ੍ਖਿਪਤਿ, ਨ ਪਵਾਰੇਤਿ, ਏਵਂਸਮ੍ਪਦਮਿਦਂ. ‘‘ਵਿਸਭਾਗੋ ਲਜ੍ਜੀ ਚੇ ਦੇਤਿ, ਤਂ ਤੇਨ ਸਮ੍ਭੋਗਂ ਅਕਤ੍ਤੁਕਾਮਤਾਯ ਪਟਿਕ੍ਖਿਪਤਿ, ਪਵਾਰੇਤੀਤਿ ਅਪਰੇ’’ਤਿ ਵੁਤ੍ਤਂ. ਪਰਿਵੇਸਨਾਯਾਤਿ ਭਤ੍ਤਗ੍ਗੇ. ‘‘ਮਂਸੇਨ ਰਸਂ, ਮਂਸਞ੍ਚ ਰਸਞ੍ਚ ਮਂਸਰਸਨ੍ਤਿ ਆਪਜ੍ਜਨਤੋ ‘ਮਂਸਰਸ’ਨ੍ਤਿ ਵੁਤ੍ਤੇ ਪਟਿਕ੍ਖੇਪਤੋ ਹੋਤਿ, ਮਂਸਸ੍ਸ ਰਸਂ ਮਂਸਰਸਨ੍ਤਿ ਵਿਗ੍ਗਹੋ ਨਾਧਿਪ੍ਪੇਤੋ’’ਤਿ ਵੁਤ੍ਤਂ. ਮਂਸਕਰਮ੍ਬਕੋ ਨਾਮ…ਪੇ… ਵਟ੍ਟਤੀਤਿ ਸੁਦ੍ਧਯਾਗੁ ਏਵ ਹੋਤਿ. ਅਪ੍ਪਵਾਰਣਮਿਸ੍ਸਕਕਰਮ੍ਬਕੋਯੇਵ ਹੋਤਿ, ਤਸ੍ਮਾ ਨ ਪਵਾਰੇਤਿ, ਤੇਨ ਵੁਤ੍ਤਂ ਪਰਤੋ ‘‘ਇਦਞ੍ਚ ਕਰਮ੍ਬਕੇਨ ਨ ਸਮਾਨੇਤਬ੍ਬ’’ਨ੍ਤਿਆਦਿ, ਤਸ੍ਮਾ ‘‘ਤਂ ਅਭਿਹਰਿਤ੍ਵਾ ਕਞ੍ਜਿਯਂ ਗਣ੍ਹਥਾ’ਤਿ ਵਦਨ੍ਤਂ ਪਟਿਕ੍ਖਿਪਤਿ, ਪਵਾਰਣਾ ਨ ਹੋਤੀ’’ਤਿ ਚ ‘‘ਮਿਸ੍ਸਕਯਾਗੁਂ ਗਣ੍ਹਥਾ’ਤਿ ਅਵੁਤ੍ਤਤ੍ਤਾ ‘ਸਮ੍ਮਿਸ੍ਸਿਤਂ ਵਿਸੁਂ ਕਤ੍ਵਾ ਦੇਤੀ’ਤਿ ਵੁਤ੍ਤਤ੍ਤਾ’’ਤਿ ਚ ਵੁਤ੍ਤਂ, ਯਸ੍ਮਾ ਯਾਗੁਮਿਸ੍ਸਕਨ੍ਤਿ ਏਤ੍ਥ ਪਦਦ੍ਵਯੇ ਪਵਾਰਣਾਰਹਸ੍ਸ ਨਾਮਗ੍ਗਹਣਂ ਨਤ੍ਥਿ, ਤਸ੍ਮਾ ਤਤ੍ਰ ਚੇ ਯਾਗੁ ਬਹੁਤਰਾ ਵਾ ਹੋਤਿ ਸਮਸਮਾ ਵਾ, ਨ ਪਵਾਰੇਤਿ. ਕਸ੍ਮਾ? ਤਤ੍ਥ ਅਭਿਹਾਰਕਪਟਿਕ੍ਖੇਪਕਾਨਂ ਯਾਗੁਸਞ੍ਞਤ੍ਤਾ. ਯਾਗੁ ਚੇ ਮਨ੍ਦਾ, ਭਤ੍ਤਂ ਬਹੁਤਰਂ, ਪਵਾਰੇਤਿ. ਕਸ੍ਮਾ? ਤੇਸਂ ਉਭਿਨ੍ਨਮ੍ਪਿ ਤਤ੍ਥ ਭਿਨ੍ਨਸਞ੍ਞਤ੍ਤਾਤਿ ਤਕ੍ਕੋ ਆਚਰਿਯਸ੍ਸ. ਭਤ੍ਤਮਿਸ੍ਸਕੇ ਪਵਾਰਣਾਰਹਸ੍ਸ ਨਾਮਸ੍ਸ ਸਬ੍ਭਾਵਤੋ ਸਬ੍ਬਦਾ ਪਵਾਰੇਤਿ ਏਵ. ਮਿਸ੍ਸਕੇ ਪਨ ਵੁਤ੍ਤਨਯੇਨ ਕਾਰਣਂ ਵਤ੍ਤਬ੍ਬਂ. ਵਿਸੁਂ ਕਤ੍ਵਾ ਦੇਤੀਤਿ ਯਥਾ ਭਤ੍ਤਸਿਟ੍ਠਂ ਨ ਪਤਤਿ, ਤਥਾ ਗਾਲ਼੍ਹਂ ਹਤ੍ਥੇਨ ਪੀਲ਼ੇਤ੍ਵਾ ਪਰਿਸ੍ਸਾਵੇਤ੍ਵਾ ਦੇਤਿ.

ਅਕਪ੍ਪਿਯਕਤਨ੍ਤਿ ਏਤ੍ਥ ‘‘ਕਪ੍ਪਿਯਂ ਅਕਾਰਾਪਿਤੇਹਿ ਕਦਲਿਪ੍ਫਲਾਦੀਹਿ ਸਦ੍ਧਿਂ ਅਤਿਰਿਤ੍ਤਂ ਕਪ੍ਪਿਯਂ ਕਾਰਾਪੇਤ੍ਵਾਪਿ ਤਂ ਕਦਲਿਪ੍ਫਲਾਦਿਂ ਠਪੇਤ੍ਵਾ ਅਵਸੇਸਂ ਭੁਞ੍ਜਿਤੁਂ ਵਟ੍ਟਤਿ. ਅਮਿਸ੍ਸਕਰਸਤ੍ਤਾ ਪੁਨ ਤਾਨਿ ਕਪ੍ਪਿਯਂ ਕਾਰਾਪੇਤ੍ਵਾ ਅਞ੍ਞਸ੍ਮਿਂ ਭਾਜਨੇ ਠਪੇਤ੍ਵਾ ਅਤਿਰਿਤ੍ਤਂ ਕਾਰੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਕਸ੍ਮਾ? ਪੁਬ੍ਬੇ ਤੇਸੁ ਵਿਨਯਕਮ੍ਮਸ੍ਸ ਅਨਾਰੁਲ਼੍ਹਤ੍ਤਾ’’ਤਿ ਵਦਨ੍ਤਿ. ‘‘ਭੁਤ੍ਤਾਵਿਨਾ ਚ ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤ’’ਨ੍ਤਿ ਵਚਨਤੋ ਭੁਤ੍ਤਾਵਿਨਾ ਅਪ੍ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤ੍ਤਬ੍ਬਨ੍ਤਿ ਸਿਦ੍ਧਂ, ਤਸ੍ਮਾ ‘‘ਪਾਤੋਵ ਅਦ੍ਧਾਨਂ ਗਚ੍ਛਨ੍ਤੇਸੁ ਦ੍ਵੀਸੁ ਏਕੋ ਪਵਾਰਿਤੋ ਅਵੁਟ੍ਠਿਤੋ ਤਤ੍ਥ ਨਿਸੀਦਤਿ, ਸੋ ਇਤਰੇਨ ਪਿਣ੍ਡਾਯ ਚਰਿਤ੍ਵਾ ਲਦ੍ਧਂ ਭਿਕ੍ਖਂ ਅਤ੍ਤਨਾ ਅਭੁਤ੍ਵਾਪਿ ‘ਅਲਮੇਤਂ ਸਬ੍ਬ’ਨ੍ਤਿ ਕਾਤੁਂ ਲਭਤਿ ਏਵਾ’’ਤਿ ਵੁਤ੍ਤਂ, ਤਂ ਸੁਕ੍ਕਪਕ੍ਖੇ ‘‘ਭੁਤ੍ਤਾਵਿਨਾ ਕਤਂ ਹੋਤੀ’’ਤਿ ਇਮਿਨਾਵ ਸਿਦ੍ਧਂ, ਤਸ੍ਮਿਂ ਪਕ੍ਖੇ ਅਤ੍ਤਨੋ ਸਤ੍ਤਙ੍ਗਾਨਿ ਨ ਪੂਰੇਨ੍ਤਿ, ਕਣ੍ਹਪਕ੍ਖੇ ਪਟਿਭਾਗੇਨ ਸਤ੍ਤ ਵੁਤ੍ਤਾਨੀਤਿ ਵੇਦਿਤਬ੍ਬਂ. ਭੁਤ੍ਤਾਵਿਨਾ ਅਪ੍ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ, ਅਵੁਟ੍ਠਿਤੇਨ ਵਾ ਕਤਂ ਹੋਤਿ, ਵਟ੍ਟਤਿ. ‘‘ਪਵਾਰਿਤੇਨ ਆਸਨਾ ਅਵੁਟ੍ਠਿਤੇਨੇਵਾ’’ਤਿ ਇਮਂ ਪਨ ਅਤ੍ਥਵਿਕਪ੍ਪਂ ਦੀਪੇਤੁਂ ‘‘ਸਤ੍ਤਙ੍ਗਾਨਿ ਵੁਤ੍ਤਾਨੀ’’ਤਿਪਿ ਵਤ੍ਤੁਂ ਵਟ੍ਟਤਿ. ਸੋ ਪੁਨ ਕਾਤੁਂ ਨ ਲਭਤਿ ਪਠਮਂ ਕਤਸ੍ਸ ਪੁਨ ਤੇਨੇਵ ਕਤ੍ਤਬ੍ਬਪ੍ਪਸਙ੍ਗਤੋ. ਯਞ੍ਚ ਅਕਤਂ, ਤਂ ਕਤ੍ਤਬ੍ਬਨ੍ਤਿ ਹਿ ਵੁਤ੍ਤਂ. ਅਥ ਸੋਵ ਪਠਮੋ ਪੁਨ ਕਤ੍ਤੁਕਾਮੋ ਹੋਤਿ, ਅਞ੍ਞਸ੍ਮਿਂ ਭਾਜਨੇ ਪੁਬ੍ਬੇ ਅਕਤਂ ਕਾਤੁਂ ਲਭਤਿ. ਦੁਤਿਯੋ ਪਠਮਭਾਜਨੇਪਿ ਕਾਤੁਂ ਲਭਤਿ. ‘‘ਯੇਨ ਅਕਤਂ, ਤੇਨ ਕਾਤਬ੍ਬ’’ਨ੍ਤਿ ਹਿ ਵੁਤ੍ਤਂ. ਇਮਮੇਵਤ੍ਥਂ ਸਨ੍ਧਾਯ ‘‘ਯੇਨ ਯਂ ਪਠਮਂ ਕਪ੍ਪਿਯਂ ਕਤਂ, ਤਮੇਵ ਸੋ ਪੁਨ ਕਾਤੁਂ ਨ ਲਭਤਿ, ਅਞ੍ਞੇਨ ਕਾਤਬ੍ਬ’’ਨ੍ਤਿ ਲਿਖਿਤਂ. ਤਤ੍ਥ ਤਨ੍ਤਿ ਤਂ ਪਠਮਂ ਕਤਨ੍ਤਿ ਅਤ੍ਥੋ. ਪੇਸੇਤ੍ਵਾ ਕਾਰੇਤਬ੍ਬਨ੍ਤਿ ਏਤ੍ਥ ਅਨੁਪਸਮ੍ਪਨ੍ਨੋ ਚੇ ਗਤੋ, ਤਤ੍ਰਟ੍ਠੇਨ ਏਕੇਨ ਭਿਕ੍ਖੁਨਾ ਪਟਿਗ੍ਗਾਹੇਤ੍ਵਾ ਅਪਰੇਨ ਕਾਰੇਤਬ੍ਬਨ੍ਤਿ ਤਤ੍ਥ ਏਕੋਵ ਏਵਮੇਵ ਕਾਤੁਂ ਨ ਲਭਤੀਤਿ. ‘‘ਯਂ ਕਿਞ੍ਚਿ ਗਿਲਾਨਂ ਉਦ੍ਦਿਸ੍ਸਾ’ਤਿਆਦਿਵਚਨਤੋ ਵਿਹਾਰਾਦੀਸੁ ਗਿਲਾਨਸ੍ਸ ਪਾਪੁਣਨਕੋਟ੍ਠਾਸਮ੍ਪਿ ਗਿਲਾਨਾਤਿਰਿਤ੍ਤਂ ਨਾਮ, ਤਸ੍ਮਾ ਵਟ੍ਟਤੀ’’ਤਿ ਵਦਨ੍ਤਿ. ਆਹਾਰਤ੍ਥਾਯਾਤਿ ਵਿਕਾਲੇ ਏਵਾਤਿ ਏਕੇ.

੨੪੧. ਕਾਯਕਮ੍ਮਂ ਅਜ੍ਝੋਹਰਣਤੋ. ਵਚੀਕਮ੍ਮਂ ਵਾਚਾਯ ‘‘ਅਤਿਰਿਤ੍ਤਂ ਕਰੋਥ ਭਨ੍ਤੇ’’ਤਿ ਅਕਾਰਾਪਨੇਨਾਤਿ ਵੇਦਿਤਬ੍ਬਂ.

ਪਠਮਪਵਾਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਪਵਾਰਣਸਿਕ੍ਖਾਪਦਵਣ੍ਣਨਾ

੨੪੩. ਸਾਧਾਰਣਮੇਵਾਤਿ ਸਬ੍ਬਪਵਾਰਣਾਨਂ ਸਾਧਾਰਣਂ ‘‘ਯਾਵਤ੍ਤਕਂ ਇਚ੍ਛਸੀ’’ਤਿ ਇਦਂ.

ਦੁਤਿਯਪਵਾਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ

੨੪੭-੯. ਨਟਾਨਂ ਨਾਟਕਾਨਿ ਨਟਨਾਟਕਾਨਿ, ਸੀਤਾਹਰਣਾਦੀਨਿ. ਮੂਲਞ੍ਚ ਤਂ ਖਾਦਨੀਯਞ੍ਚਾਤਿ ਮੂਲਖਾਦਨੀਯਂ. ਏਸ ਨਯੋ ਸਬ੍ਬਤ੍ਥ. ਪਿਟ੍ਠਨ੍ਤਿ ਚੁਣ੍ਣਂ. ਖਾਰਕਮੂਲਨ੍ਤਿ ਯੂਪਸਮੂਲਂ. ਚਚ੍ਚੁਮੂਲਂ ਨੇਲ਼ਿਯਮੂਲਂ. ਤਮ੍ਬਕਂ ਵਚਂ. ਤਣ੍ਡੁਲੇਯ੍ਯਕਂ ਚੂਲ਼ਕੁਹੁ. ਵਤ੍ਥੁਲੇਯ੍ਯਕਂ ਮਹਾਕੁਹੁ. ਵਜਕਲਿ ਨਿਕੋਟ੍ਠਂ. ਜਜ੍ਝਰੀ ਹਿਰਤੋ.

ਕੋਟ੍ਠਂ ਜਰਟ੍ਠਂ ਵੁਚ੍ਚਤਿ. ਗਣ੍ਠਿ ਮੁਹੁਕੁਲਮੁਦੁ ਵਿਚਯਤ੍ਥ ਵਜਮੁਜੁ ਵਦੁਲ਼ਵਿ.

ਵਜ੍ਜਯੇਤਿਮੇ ਕਿਂਸੁਕਂ, ਹਲਿਦ੍ਦਿ. ਕਸੇਰੁਕੋ, ਕਟਿਬਲਵਨ੍ਤਿ ਤਸ੍ਸ ਨਾਮਂ. ਅਮ੍ਬਾਟਕਂ ਅਮੂਲਕਂ ਪਿਢਲ ਕਕ੍ਕੁਲ. ਮਸਾਲੁ ਕਿਨਲ਼. ਆਲੁਵ ਕਲ਼ਿ ਤਡ੍ਢਿਅਲ਼ਿ ਅਲਸ ਕਟਿਸ੍ਸਲ ਨਮੇਦਤਿ ਮੇਰ. ਸਿਗ੍ਗੁ ਸੀਰਿ ਕੋਲ਼ ਕਾਲਕਂ ਨੇਕਲ਼ਵਿ. ਖੀਰਵਲ੍ਲਿਕਨ੍ਦੋ ਤੁਮੂਰੋਰਿਯੋ ਹੋਤਿ. ਸਙ੍ਖਤੋ ਧੋਵਨਮੇਵ. ਅਯਂ ‘‘ਪਰਿਸਙ੍ਖਾਰੋ’’ਤਿ ਲਿਖਿਤਂ. ਖੀਰਕਾਕੋਲੀ ਕਿਰਿਕਵੇਲ਼ਿ. ਜੀਵਿਕਂ ਜੀਵਿਹਿ. ਉਸਭਕ ਉਮ੍ਮਸੁਵਿਯਿ.

ਹਿਨ੍ਤਾਲਂ ਕਿਤਿਲਿ. ਕੁਨ੍ਤਾਲ ਤੋਹੋ ਤਿਲਿਸਤਾ ਪਦਿਕਲ਼ਿਰੋ ਪਟਸੇਵਲਕਲ਼ਿ. ਕਰਮਨ੍ਦਕਂ ਕਰਮ੍ਬ ਦਣ੍ਡੋਕਿਰ ਉਦਕਜੋਤਿ ਕਣ੍ਡਕੋ. ‘‘ਸਿਙ੍ਘਤਕੋਤਿਪਿ ਵੁਚ੍ਚਤੀ’’ਤਿ ਲਿਖਿਤਂ. ਫਗ੍ਗਵ ਹਕਿਲ਼ਿ. ਨਤ੍ਤਮਾਲਨ੍ਤਿ ਕਰਞ੍ਜਿ.

ਸੇਲ੍ਲੁ ਲੋਹੋਲਿਯਂ. ਕਾਸਮਦ੍ਦਕ ਕੁਦੁਵਵਲਿ ਅਨਸਿਕਿਨ. ਉਮ੍ਮਾਦਿਯ ਮੇਲੇਲਿਦਿਯ. ਚੀਨਮੁਗ੍ਗੋ ਵੇਨਮੁਤ੍ਤਿ ਹੁਰਮੁਗ੍ਗ. ਰਾਜਮਾਸੋ ਮਾਹਵਿਲਿਤਿ. ਅਗ੍ਗਿਮਨ੍ਤੋ ਮੁਞ੍ਚਿ. ਸੁਨਿਪਣ੍ਣਕੋ ਤਿਪਿਲਵਨਿਨਾਲ਼ਿਕਾ ਤਿਲਕ. ਭੂਮਿਯਂ ਜਾਤਲੋਣੀਤਿ ਏਤ੍ਥ ਲੋਣੀਨਾਮਸ੍ਸ ਸਾਧਾਰਣਤ੍ਤਾ ‘‘ਭੂਮਿਯ’’ਨ੍ਤਿ ਵਿਸੇਸੇਤ੍ਵਾ ਵੁਤ੍ਤਂ. ਬ੍ਰਹ੍ਮੀਪਤ੍ਤਂ ਦੇਮੇਤੇਯੇ ਪਣਸਾ. ‘‘ਦੀਪਵਾਸਿਨੋ ਵਦਨ੍ਤੀ’’ਤਿ ਸਿਥਿਲਂ ਕਤ੍ਵਾ ਕਸ੍ਮਾ ਵੁਤ੍ਤਨ੍ਤਿ ਚੇ? ‘‘ਖਾਦਨੀਯਤ੍ਥਂ ਫਰਤੀਤਿ ਲਕ੍ਖਣੇਨ ਅਸਮਾਨਤ੍ਤਾ’’ਤਿ ਵੁਤ੍ਤਂ. ਪਦੇਲਿਵਿਨਿਤੇਕਿ. ਸੁਲਸਿਪਣ੍ਣਨ੍ਤਿ ਤਸਾਪਲਿਕਂ.

ਅਗਨ੍ਧਿਕਪੁਪ੍ਫਂ ਕਰਿਸ੍ਸਯੇਤਿ ਚੇਕਵਾਦਿਦਪੁਪ੍ਫਂ ਚੇਲੇਪਤਿਮਲਂ. ਜੀਵਨ੍ਤੀਪੁਪ੍ਫਂ ਜੀਵਿਤਨ੍ਦਿਗਮਲ. ਬਕੁਲ ਮੁਥੁਵਲ. ਕੁਯ੍ਯਕ ਪੁਨਪੁਨ੍ਨਾਮਪੁਨ੍ਨਰਾ, ਜਾਤਿਸੁਮਨ. ਨਵਮਾਲਿਕਾ ਚੇਹੇਮਲ.

ਤਿਨ੍ਤਿਣਿਕ ਕਚਿਨੀ ਵਿਲੇਯਿ. ਮਾਤੁਲੁਙ੍ਗ ਲਵਨੋ. ਪੁਸ੍ਸਫਲ ਸੁਪੁਲਿ. ਤਿਮ੍ਬਰੂਸਕ ਤਿਗਿਬ੍ਬੇਰੇਹਿਤਿ ਸੁਸਤੁਧੁਤ. ਤਿਪੁਸਵਾਤਿਙ੍ਗਣ ਧੁਤਤਿਕੇਣ ਪਟਿਯਿ. ਚੋਚ ਵਰਿਯਿਯੇਲਿ. ਮੋਚ ਅਤਿਰੇਲਿ. ਗੋਟ੍ਠਫਲਂ ਪੂਵਫਲਨ੍ਤਿ ਏਕੇ. ਕੋਟ੍ਠਸੇ ਕਿਰ ਅਚ੍ਛਿਵ.

ਅਸਮੁਸ੍ਸਿ ਬਿਮ੍ਬ ਇਤਿ ਕੇਚਿ. ਕਾਸ੍ਮਰੀਤਿ ਸੇਪਣ੍ਣਿ. ਅਤਿਤੇਮੇਤਿ ਕਰਿਯਮੇਤਿਸ੍ਸ. ਜਾਤਿਫਲਂ ਕਤਂਮੇਤਿ. ਕਟੁਕਫਲਂ ਤਿਰਿਰਕ.

ਤਰੁਣਫਲਂ ਕਿਰਿਉਪੁਲੁ. ਪੋਕ੍ਖਰਟ੍ਠਿ ਕਿਞ੍ਚਕ੍ਖਟ੍ਠਿ. ਸਿਦ੍ਧਤ੍ਥਕਂ ਸਾਸਪਂ ਸੇਤਵਣ੍ਣਂ. ਰਾਜਿਕਂ ਰਤ੍ਤਂ ਹੋਤਿ.

ਹਿਙ੍ਗੁਂ ਹਿਙ੍ਗੁਜਤੁਨ੍ਤਿ ਸਬ੍ਬਾਪਿ ਹਿਙ੍ਗੁਵਿਕਤਿਯੋ. ਏਤ੍ਥ ਹਿਙ੍ਗੁਜਤੁ ਨਾਮ ਪਤ੍ਤਸਾਖਾ ਪਚਿਤ੍ਵਾ ਕਾਤਬ੍ਬਾ. ਸਾਖਾ ਪਚਿਤ੍ਵਾ ਕਤਾ ਸਿਪਾਟਿਕਾ. ਅਞ੍ਞੇਹਿ ਮਿਸ੍ਸੇਤ੍ਵਾ ਕਤਾਤਿ ਕੇਚਿ. ਤਕਂ ਕਟ੍ਠਜਨ੍ਤਿ ਅਗ੍ਗਿਕੇਲ਼ਿਨਿ. ਨਿਕਿਤਿਸ੍ਸਾਕਾਲੇਸਯੋ. ਤਿਮੇਰ, ਤਕਪਤ੍ਤਿ ਪਸਾਖਾਪਤ੍ਤੇ ਪਚਿਤ੍ਵਾ ਕਾਤਬ੍ਬਾ. ‘‘ਤਕਪਣ੍ਣਿ ਸਾਵਤਿ ਏਵ ਕਾਤਬ੍ਬਾ’’ਤਿ ਲਿਖਿਤਂ.

ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ

੨੫੩. ਅਪਰਜ੍ਜੁ ਸਨ੍ਨਿਧਿ ਨਾਮ ਹੋਤੀਤਿ ਅਤ੍ਥੋ. ਅਜ੍ਜ ਪਟਿਗ੍ਗਹਿਤਨ੍ਤਿ ਨ ਕੇਵਲਂ ਪਟਿਗ੍ਗਹਿਤਮੇਵ, ਅਥ ਖੋ ਉਗ੍ਗਹਿਤਕਮ੍ਪਿ, ਤੇਨੇਵ ਅਟ੍ਠਕਥਾਯਂ ‘‘ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਵਂ ਸਨ੍ਨਿਧਿਕਤਂ ਯਂ ਕਿਞ੍ਚਿ ਯਾਵਕਾਲਿਕਂ ਵਾ ਯਾਮਕਾਲਿਕਂ ਵਾ ਅਜ੍ਝੋਹਰਿਤੁਕਾਮਤਾਯ ਗਣ੍ਹਨ੍ਤਸ੍ਸ ਪਟਿਗ੍ਗਹਣੇ ਤਾਵ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਂ. ਯਦਿ ਤਂ ਪਠਮਮੇਵ ਪਟਿਗ੍ਗਹਿਤਂ, ‘‘ਪਟਿਗ੍ਗਹਣੇ ਤਾਵਾ’’ਤਿ ਨ ਵਤ੍ਤਬ੍ਬਂ, ਤਸ੍ਮਾ ਵੇਦਿਤਬ੍ਬਮੇਤਂ ‘‘ਅਤ੍ਤਨੋ ਕਾਲੇ ਗਹਿਤਂ ਅਜ੍ਜ ਪਟਿਗ੍ਗਹਿਤ’ਨ੍ਤਿ ਵੁਤ੍ਤ’’ਨ੍ਤਿ.

ਏਤ੍ਥਾਹ – ਯਥਾ ਪਞ੍ਚ ਭੇਸਜ੍ਜਾਨਿ ਉਗ੍ਗਹਿਤਕਾਨਿ ਅਨਧਿਪ੍ਪੇਤਾਨਿ. ਸਤ੍ਤਾਹਾਤਿਕ੍ਕਮੇ ਅਨਾਪਤ੍ਤਿ ਅਨਜ੍ਝੋਹਰਣੀਯਤ੍ਤਾ, ਤਥਾ ਇਧਾਪਿ ਉਗ੍ਗਹਿਤਕਂ ਨਾਧਿਪ੍ਪੇਤਨ੍ਤਿ? ਏਤ੍ਥ ਵੁਚ੍ਚਤਿ – ਭੇਸਜ੍ਜਸਿਕ੍ਖਾਪਦੇ (ਪਾਰਾ. ੬੧੮ ਆਦਯੋ) ਉਗ੍ਗਹਿਤਕਂ ਨਾਧਿਪ੍ਪੇਤਨ੍ਤਿ ਯੁਤ੍ਤਂ ਅਤ੍ਤਨੋ ਕਾਲਾਤਿਕ੍ਕਮਨਮਤ੍ਤੇਨ ਤਤ੍ਥ ਆਪਤ੍ਤਿਪ੍ਪਸਙ੍ਗਤੋ. ਏਤ੍ਥ ਨ ਯੁਤ੍ਤਂ ਅਤ੍ਤਨੋ ਕਾਲਾਤਿਕ੍ਕਮਨਮਤ੍ਤੇਨ ਆਪਤ੍ਤਿਪ੍ਪਸਙ੍ਗਾਭਾਵਤੋ. ਅਜ੍ਝੋਹਰਣੇਨੇਵ ਹਿ ਏਤ੍ਥ ਆਪਤ੍ਤੀਤਿ ਅਧਿਪ੍ਪਾਯੋ, ਤਸ੍ਮਾ ਅਨੁਗਣ੍ਠਿਪਦਮਤੇਨ ਅਜ੍ਜ ਉਗ੍ਗਹੇਤ੍ਵਾ ਪੁਨਦਿਵਸੇ ਭੁਞ੍ਜਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ.

ਤਤ੍ਰਾਯਂ ਵਿਚਾਰਣਾ – ਅਤ੍ਤਨਾ ਭੁਞ੍ਜਿਤੁਕਾਮੋ ਅਜ੍ਜ ਉਗ੍ਗਹੇਤ੍ਵਾ ਪੁਨਦਿਵਸੇ ਭੁਞ੍ਜਤਿ, ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਸਾਮਣੇਰਾਦੀਨਂਯੇਵ ਅਤ੍ਥਾਯ ਉਗ੍ਗਹੇਤ੍ਵਾ ਗਹਿਤਂ ਪੁਨਦਿਵਸੇ ਪਟਿਗ੍ਗਹੇਤ੍ਵਾ ਭੁਞ੍ਜਨ੍ਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋਤਿ. ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥਾਯਮਧਿਪ੍ਪਾਯੋ – ਸਚੇ ਬੇਲਟ੍ਠਸੀਸੋ ਵਿਯ ਦੁਤਿਯਤਤਿਯਾਦਿਦਿਵਸਤ੍ਥਾਯ ਅਜ੍ਜ ਪਟਿਗ੍ਗਹੇਤ੍ਵਾ ਸਾਮਣੇਰਾਦੀਨਂ ਗੋਪਨਤ੍ਥਾਯ ਦੇਤਿ, ਤਸ੍ਸ ਪੁਨਦਿਵਸੇ ਅਜ੍ਝੋਹਰਣਤ੍ਥਂ ਪਟਿਗ੍ਗਹਣੇ ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਮ੍ਭਵਤਿ. ਸਯਮੇਵ ਸਚੇ ਤਂ ਗੋਪੇਤ੍ਵਾ ਠਪੇਤਿ, ਪੁਨਦਿਵਸੇ ਪਤਿਤਂ ਕਚਵਰਂ ਦਿਸ੍ਵਾ ਵਿਮਤਿਵਸੇਨ ਵਾ ਪਟਿਗ੍ਗਣ੍ਹਤੋ ਪਟਿਗ੍ਗਹਣਤੋਵ ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਮ੍ਭਵਤਿ. ਨੋ ਚੇ ਪਟਿਗ੍ਗਣ੍ਹਾਤਿ, ਤਂ ਦੁਕ੍ਕਟਂ ਨਤ੍ਥਿ. ‘‘ਇਦਞ੍ਹਿ ‘ਏਕਂ ਪਾਦਂ ਅਤਿਕ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’ਤਿਆਦਿ ਵਿਯਾ’’ਤਿ ਵੁਤ੍ਤਂ. ਯੋ ਪਨ ਏਕਪ੍ਪਹਾਰੇਨੇਵ ਦ੍ਵੇਪਿ ਪਾਦੇ ਅਤਿਕ੍ਕਾਮੇਤਿ, ਤਸ੍ਸ ਤਂ ਥੁਲ੍ਲਚ੍ਚਯਂ ਨਤ੍ਥਿ, ਏਵਂਸਮ੍ਪਦਮਿਦਨ੍ਤਿ ਵੇਦਿਤਬ੍ਬਂ. ਏਤ੍ਥ ਪਟਿਗ੍ਗਹਿਤਭਾਵਂ ਅਵਿਜਹਨ੍ਤਮੇਵ ਸਨ੍ਨਿਧਿਂ ਜਨੇਤੀਤਿ ਧਮ੍ਮਸਿਰਿਤ੍ਥੇਰੋ, ਤਂ ‘‘ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਪਾਲ਼ਿਯਾ ਵਿਰੁਜ੍ਝਤਿ. ਕਪਾਲੇਨ ਪੀਤੋ ਪਨ ਸ੍ਨੇਹੋ ਅਬ੍ਬੋਹਾਰਿਕੋ. ਕਿਞ੍ਚਾਪਿ ਉਣ੍ਹੇ ਓਤਾਪੇਨ੍ਤਸ੍ਸ ਪਗ੍ਘਰਤਿ, ਤਥਾਪਿ ‘‘ਭੇਸਜ੍ਜਸਿਕ੍ਖਾਪਦੇ ਵਿਯਾ’’ਤਿ ਵੁਤ੍ਤਂ. ਇਤਰਥਾ ਕਪਾਲੇਨ ਪੀਤਾ ਸਪ੍ਪਿਆਦਯੋਪਿ ਸਤ੍ਤਾਹਾਤਿਕ੍ਕਮੇ ਆਪਤ੍ਤਿਂ ਜਨੇਯ੍ਯੁਨ੍ਤਿ. ਸਯਂ ਪਟਿਗ੍ਗਹੇਤ੍ਵਾਤਿ ਇਧਾਪਿ ਪੁਬ੍ਬੇ ਵੁਤ੍ਤਵਿਧਿਯੇਵ. ਦੁਦ੍ਧੋਤਪਤ੍ਤਕਥਾਪਿ ਏਤੇਨ ਸਮੇਤਿ ਵਿਯ. ਆਹਾਰਤ੍ਥਾਯਾਤਿ ਕਾਲੇਪਿ ਲਬ੍ਭਤਿ. ਪਕਤਿਆਮਿਸੇਤਿ ਕਪ੍ਪਿਯਾਮਿਸੇ. ਸਾਮਿਸੇਨ ਮੁਖੇਨ ਅਜ੍ਝੋਹਰਤੋ ਦ੍ਵੇਤਿ ‘‘ਹਿਯ੍ਯੋ ਪਟਿਗ੍ਗਹਿਤਯਾਮਕਾਲਿਕਂ ਅਜ੍ਜ ਪੁਰੇਭਤ੍ਤਂ ਸਾਮਿਸੇਨ ਮੁਖੇਨ ਅਜ੍ਝੋਹਰਤੋ ਦ੍ਵੇ ਪਾਚਿਤ੍ਤਿਯਾਨੀ’’ਤਿ ਲਿਖਿਤਂ. ਅਜ੍ਜ ਪਟਿਗ੍ਗਹਿਤਂ ਯਾਵਕਾਲਿਕਮ੍ਪਿ ਹਿ ਯਾਮਾਤਿਕ੍ਕਨ੍ਤਪਾਨਕੇਨ ਸਂਸਟ੍ਠਂ ਸਨ੍ਨਿਧਿਂ ਕਰੋਤਿ. ਅਕਪ੍ਪਿਯਮਂਸੇਸੁ ਮਨੁਸ੍ਸਮਂਸੇ ਥੁਲ੍ਲਚ੍ਚਯਂ, ਸੇਸਮਂਸੇ ਦੁਕ੍ਕਟਞ੍ਚ ਵਡ੍ਢਤਿ.

੨੫੫. ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਆਹਾਰਤ੍ਥਾਯਾਤਿ ਕਾਲੇਪਿ ਦੁਕ੍ਕਟਮੇਵ ਸਨ੍ਨਿਧਿਂ ਅਨਾਪਜ੍ਜਨਤੋਤਿ ਕੇਚਿ. ਤਦਹੁ ਪਟਿਗ੍ਗਹਿਤਂ ਤਦਹੁ ਪੁਰੇਭਤ੍ਤਂ ਵਟ੍ਟਤੀਤਿ ਚੇ? ਨ, ਪਾਲ਼ਿਯਮ੍ਪਿ ਅਟ੍ਠਕਥਾਯਮ੍ਪਿ ਵਿਸੇਸਸ੍ਸ ਨਤ੍ਥਿਤਾਯ. ਭੇਸਜ੍ਜਸਿਕ੍ਖਾਪਦੇ ਪੁਰੇਭਤ੍ਤਂ ਯਥਾਸੁਖਂ ਪਰਿਭੁਞ੍ਜਨਂ ਵੁਤ੍ਤਨ੍ਤਿ ਚੇ? ਆਹਾਰੇ ਸਪ੍ਪਿਆਦਿ ਸਙ੍ਗਹਂ ਯਾਤਿ, ਤੇਨ ਤਗ੍ਗਤਿਕਵਸੇਨ ਵੁਤ੍ਤਂ, ਨ ਭੇਸਜ੍ਜਵਸੇਨ ਵੁਤ੍ਤਨ੍ਤਿ ਉਪਤਿਸ੍ਸੋ.

ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ

੨੫੯. ਅਕਪ੍ਪਿਯਸਪ੍ਪਿਨਾਤਿ ਯੇਸਂ ਮਂਸਂ ਨ ਕਪ੍ਪਤਿ, ਤੇਸਂ ਸਪ੍ਪਿਨਾ. ‘‘ਵਸਾਤੇਲਞ੍ਹਿ ਠਪੇਤ੍ਵਾ ਅਕਪ੍ਪਿਯਸਪ੍ਪਿ ਨਾਮ ਨਤ੍ਥੀ’’ਤਿ ਲਿਖਿਤਂ. ਵਿਸਙ੍ਕੇਤਨ੍ਤਿ ਏਤ੍ਥ ‘‘ਸੂਪੋਦਨਵਿਞ੍ਞਤ੍ਤਿਪਿ ਨ ਹੋਤੀ’’ਤਿ ਵੁਤ੍ਤਂ. ਕਾਯਿਕਾਨੀਤਿ ਕਾਯੇਨ ਆਪਜ੍ਜਿਤਬ੍ਬਾਨਿ.

੨੬੧. ਮਹਾਨਾਮਸਿਕ੍ਖਾਪਦੇਨ ਕਾਰੇਤਬ੍ਬੋਤਿ ਸਙ੍ਘਵਸੇਨ ਪਵਾਰਿਤੇ ਭੇਸਜ੍ਜਤ੍ਥਾਯ ਸਪ੍ਪਿਆਦਿਪਞ੍ਚਕਂ ਵਿਞ੍ਞਾਪੇਤਿ ਚੇ, ਤਤ੍ਥ ‘‘ਨ ਭੇਸਜ੍ਜੇਨ ਕਰਣੀਯੇਨ ਭੇਸਜ੍ਜ’’ਨ੍ਤਿ ਏਤ੍ਥ ਸਙ੍ਗਹਂ ਗਚ੍ਛਤਿ, ਤਸ੍ਮਾ ‘‘ਤੇਨ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ. ਪਾਲ਼ਿਮੁਤ੍ਤਕੇਸੁ ‘‘ਭਿਕ੍ਖੁਨੀਨਮ੍ਪਿ ਦੁਕ੍ਕਟ’’ਨ੍ਤਿ ਲਿਖਿਤਂ.

ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ

੨੬੪-੫. ਮੁਖਦ੍ਵਾਰਨ੍ਤਿ ਕਣ੍ਠਨਾਲ਼ਿ. ਉਚ੍ਚਾਰਣਮਤ੍ਤਨ੍ਤਿ ਉਕ੍ਖਿਪਿਤਬ੍ਬਮਤ੍ਤਕਂ. ਕਸਟਂ ਛਡ੍ਡੇਤ੍ਵਾਤਿ ਸਮੁਦਾਚਾਰਵਸੇਨ, ਅਛਡ੍ਡਿਤੇਪਿ ‘‘ਵਟ੍ਟਤੀ’’ਤਿ ਵੁਤ੍ਤਂ. ਹਤ੍ਥਪਾਸਾਤਿਕ੍ਕਮਨ੍ਤਿ ਦਾਯਕਸ੍ਸ. ਭਿਕ੍ਖੁਸ੍ਸ ਦੇਤੀਤਿ ਅਞ੍ਞਸ੍ਸ ਭਿਕ੍ਖੁਸ੍ਸ. ਕਞ੍ਜਿਕਨ੍ਤਿ ਯਂ ਕਿਞ੍ਚਿ ਦ੍ਰਵਂ. ਪਤ੍ਤੋ ਪਟਿਗ੍ਗਹੇਤਬ੍ਬੋਤਿ ਭੂਮਿਯਂ ਠਪਿਤੇ ਅਭਿਹਾਰਾਭਾਵਤੋ. ‘‘ਯਥਾ ਪਠਮਤਰਂ ਪਤਿਤਥੇਵੇ ਦੋਸੋ ਨਤ੍ਥਿ, ਤਥਾ ਆਕਿਰਿਤ੍ਵਾ ਅਪਨੇਨ੍ਤਾਨਂ ਪਤਿਤਥੇਵੇਪਿ ਅਭਿਹਟਤ੍ਤਾ ਨੇਵਤ੍ਥਿ ਦੋਸੋ’’ਤਿ ਲਿਖਿਤਂ. ਚਰੁਕੇਨਾਤਿ ਖੁਦ੍ਦਕਪਿਣ੍ਡੇਨ. ਜਾਗਰਨ੍ਤਸ੍ਸਪੀਤਿ ‘‘ਅਪਿ-ਸਦ੍ਦੇਨ ਸੁਤ੍ਤਸ੍ਸਪੀ’’ਤਿ ਲਿਖਿਤਂ. ਕੇਚੀਤਿ ਅਭਯਗਿਰਿਵਾਸਿਨੋ. ਤੇਹਿ ਕਾਯਸਂਸਗ੍ਗੇ ਕਾਯਪਟਿਬਦ੍ਧੇਨਾਪਿ ਤਪ੍ਪਟਿਬਦ੍ਧੇਨਾਪਿ ਥੁਲ੍ਲਚ੍ਚਯਾਪਤ੍ਤਿ ਦਸ੍ਸਿਤਾ ਏਵਾਤਿ ਅਤ੍ਥੋ. ਕਾਯਪਟਿਬਦ੍ਧਪਟਿਬਦ੍ਧੇਨਾਤਿ ਵਚਨਮਤ੍ਤਮੇਵੇਤਂ. ‘‘ਸਤ੍ਥਕੇਨਾਤਿ ਪਟਿਗ੍ਗਹਿਤਕੇਨਾ’’ਤਿ ਲਿਖਿਤਂ, ਤਂ ਦੁਲ੍ਲਿਖਿਤਂ ਸਤਿਪਿ ਮਲੇ ਪੁਨ ਪਟਿਗ੍ਗਹੇਤਬ੍ਬਕਿਚ੍ਚਾਭਾਵਤੋ. ਕੇਸਞ੍ਚਿ ਅਤ੍ਥਾਯਾਤਿ ਅਨੁਪਸਮ੍ਪਨ੍ਨਾਨਂ ਅਤ੍ਥਾਯ. ‘‘ਸਾਮਣੇਰਸ੍ਸ ਹਤ੍ਥਂ ਫੁਟ੍ਠਮਤ੍ਤਮੇਵ ਤਂ ਪਰਿਚ੍ਚਤ੍ਤ’’ਨ੍ਤਿ ਲਿਖਿਤਂ.

ਪਟਿਗ੍ਗਹਣੁਪਗਭਾਰਂ ਨਾਮ ਮਜ੍ਝਿਮਪੁਰਿਸੇਨ ਉਕ੍ਖਿਪਿਤਬ੍ਬਕਂ. ਮੂਲਪਟਿਗ੍ਗਹਣਮੇਵ ਵਟ੍ਟਤੀਤਿ ਏਤ੍ਥ ‘‘ਮਚ੍ਛਿਕਵਾਰਣਤ੍ਥਨ੍ਤਿ ਵੁਤ੍ਤਤ੍ਤਾ ‘ਅਭੁਞ੍ਜਨਤ੍ਥਾਯਾਪਿ ਪਟਿਗ੍ਗਹੇਤ੍ਵਾ ਗਹਿਤੇ ਵਟ੍ਟਤੀ’’’ਤਿ ਯੇ ਵਦਨ੍ਤਿ, ਤੇ ਵਤ੍ਤਬ੍ਬਾ ‘‘ਸੀਸਮਕ੍ਖਨਤੇਲਂ ਪਟਿਗ੍ਗਹੇਤ੍ਵਾ ‘ਇਦਂ ਸੀਸਮਕ੍ਖਨ’ਨ੍ਤਿ ਅਨਾਭੋਗੇਨੇਵ ਸਤ੍ਤਾਹਂ ਅਤਿਕ੍ਕਾਮੇਨ੍ਤਸ੍ਸ ਕਿਂ ਨਿਸ੍ਸਗ੍ਗਿਯਂ ਭਵੇਯ੍ਯਾ’’ਤਿਆਦਿ, ਸੁਤ੍ਤਾਧਿਪ੍ਪਾਯੋ ਪਨ ਏਵਂ ਗਹੇਤਬ੍ਬੋ ‘‘ਮਚ੍ਛਿਕਵਾਰਣਤ੍ਥਂ ਬੀਜਨ੍ਤਸ੍ਸ ਤਸ੍ਮਿਂ ਲਗ੍ਗਰਜਾਦਿਮ੍ਹਿ ਪਤ੍ਤੇ ਪਤਿਤੇ ਸੁਖਂ ਪਰਿਭੁਞ੍ਜਿਤੁਂ ਸਕ੍ਕਾ’ਤਿ ਸਞ੍ਞਾਯ ਪੁਬ੍ਬੇ ਪਟਿਗ੍ਗਹਿਤਬ੍ਬ’’ਨ੍ਤਿ ਵੁਤ੍ਤਂ. ਪਰਿਵਤ੍ਤਨਕਥਾਯਂ ‘‘ਅਮ੍ਹਾਕਂ ਤਣ੍ਡੁਲੇਸੁ ਖੀਣੇਸੁ ਏਤੇਹਿ ਅਮ੍ਹਾਕਂ ਹਤ੍ਥਗਤੇਹਿ ਸਾਮਣੇਰਸਨ੍ਤਕੇਹਿਪਿ ਸਕ੍ਕਾ ਪਤਿਟ੍ਠਪੇਤੁ’ਨ੍ਤਿ ਭਿਕ੍ਖੂਨਂ ਚਿਤ੍ਤੁਪ੍ਪਾਦੋ ਚੇ ਸਮ੍ਭਵਤਿ, ‘ਪਰਿਵਤ੍ਤਨਂ ਸਾਤ੍ਥਕ’ਨ੍ਤਿ ਉਪਤਿਸ੍ਸਤ੍ਥੇਰੋ’’ਤਿ ਵੁਤ੍ਤਂ. ਯਦਿ ਏਵਂ ਸੁਦ੍ਧਚਿਤ੍ਤਾਨਂ ਨਿਰਤ੍ਥਕਨ੍ਤਿ ਆਪਨ੍ਨਮੇਵ, ਤਥਾ ‘‘ਪਣ੍ਡਿਤੋ ਏਸ ਸਾਮਣੇਰੋ ਪਤ੍ਤਪਰਿਵਤ੍ਤਨਂ ਕਤ੍ਵਾ ਦਸ੍ਸਤਿ, ਮਯਮੇਵ ਚ ਇਮਸ੍ਸ ਵਿਸ੍ਸਾਸੇਨ ਵਾ ਯਾਚਿਤ੍ਵਾ ਵਾ ਭੁਞ੍ਜਿਸ੍ਸਾਮਾ’’ਤਿ ਚਿਤ੍ਤੇ ਸਤਿ ਭੁਞ੍ਜਿਤੁਂ ਨ ਵਟ੍ਟਤਿ ਕਤੇਪਿ ਪਰਿਵਤ੍ਤਨੇਤਿ ਚ ਆਪਨ੍ਨਂ, ਕਿਂ ਬਹੁਨਾ. ਨਿਰਪੇਕ੍ਖੇਹੇਵ ਗਣ੍ਹਿਤਬ੍ਬਂ, ਨ ਸਾਪੇਕ੍ਖੇਹੀਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ ਆਚਰਿਯੋ. ਅਯਮੇਵਤ੍ਥੋ ‘‘ਸਚੇ ਪਨ ਸਕ੍ਕੋਤਿ ਵਿਤਕ੍ਕਂ ਸੋਧੇਤੁਂ, ਤਤੋ ਲਦ੍ਧਂ ਖਾਦਿਤੁਮ੍ਪਿ ਵਟ੍ਟਤੀ’’ਤਿ ਵਚਨੇਨ ਸਿਦ੍ਧੋਵ. ਆਧਾਰਕੇ ਪਤ੍ਤੋ ਠਪਿਤੋ ਹੋਤਿ ਯਥਾਪਟਿਗ੍ਗਹਿਤਭਾਵੇ ਨਿਰਾਲਯੋ. ਸਮੁਦ੍ਦੋਦਕੇਨ ਅਪ੍ਪਟਿਗ੍ਗਹਿਤਕੇਨ. ਮੇਣ੍ਡਕਸ੍ਸ ਖੀਰਂ ਖੀਰਤ੍ਤਾਵ ਵਟ੍ਟਤਿ. ‘‘ਅਤ੍ਤਨੋ ਪਨ ਖੀਰਂ ਮੁਖੇਨੇਵ ਪਿਵਨ੍ਤਸ੍ਸ ਅਨਾਪਤ੍ਤੀਤਿ ਦਸ੍ਸੇਤੁਂ ਵੁਤ੍ਤ’’ਨ੍ਤਿ ਵੁਤ੍ਤਂ. ‘‘ਸਰੀਰਨਿਸ੍ਸਿਤਮਹਾਭੂਤਾਨਿ ਹਿ ਇਧਾਧਿਪ੍ਪੇਤਾਨੀ’’ਤਿ ਲਿਖਿਤਂ, ਤਦੁਭਯਮ੍ਪਿ ‘‘ਕਪ੍ਪਿਯਮਂਸਖੀਰਂ ਵਾ’’ਤਿਆਦਿਨਾ ਨਯੇਨ ਵਿਰੁਜ੍ਝਤਿ.

ਅਪਿਚ ‘‘ਅਪ੍ਪਟਿਗ੍ਗਹਿਤਭਾਜਨੇ ਅਞ੍ਞਭਿਕ੍ਖੁਸਨ੍ਤਕੇ ਅਤ੍ਤਨੋ ਪਿਣ੍ਡਪਾਤਂ ਪਕ੍ਖਿਪਤਿ, ‘ਤਂ ਥੋਕ’ਨ੍ਤਿ ਵਾ ਅਞ੍ਞੇਨ ਵਾ ਕਾਰਣੇਨ ਵਦਤਿ, ਤਂ ਸਬ੍ਬੇਸਂ ਨ ਕਪ੍ਪਤਿ. ਕਸ੍ਮਾ? ਵਿਨਯਦੁਕ੍ਕਟਤ੍ਤਾ. ਅਤ੍ਤਨਾ ਪਟਿਗ੍ਗਹੇਤ੍ਵਾ ਪਕ੍ਖਿਪਿਤਬ੍ਬਂ ਵਿਨਯਵਿਧਿਂ ਅਕਤ੍ਵਾ ਦੁਕ੍ਕਟਨ੍ਤਿ ਅਧਿਪ੍ਪਾਯੋ. ਏਵਂ ਤਾਦਿਸਂ ਕਿਮਤ੍ਥਂ ਨ ਭੁਞ੍ਜਤੀਤਿ? ਅਟ੍ਠਕਥਾਯਂ ‘ਉਗ੍ਗਹਿਤਕੋ ਹੋਤੀ’ਤਿ ਵੁਤ੍ਤਤ੍ਤਾ. ਏਵਞ੍ਹਿ ਤਤ੍ਥ ਵੁਤ੍ਤਂ ਭੂਮਿਯਂ ਵਾ ਭਾਜਨੇ ਵਾ ਫਲਂ ਵਾ ਯਂ ਕਿਞ੍ਚਿ ਆਮਿਸਂ ਵਾ ਯਾਵਜੀਵਿਕਮ੍ਪਿ ਅਪ੍ਪਟਿਗ੍ਗਹਿਤਕਂ ਅਜਾਨਨ੍ਤੋ ਆਮਸਤਿ, ਨ ਵਟ੍ਟਤਿ, ਉਗ੍ਗਹਿਤਕਂ ਹੋਤੀ’’ਤਿ ਅਨੁਗਣ੍ਠਿਪਦੇ ਵੁਤ੍ਤਂ, ਤਸ੍ਮਾ ਇਮਸ੍ਸ ਮਤੇਨ ਭਿਕ੍ਖੁ ਭਿਕ੍ਖੁਸ੍ਸ ਸਚੇ ਪਤ੍ਤੇ ਅਪ੍ਪਟਿਗ੍ਗਹਿਤੇ ਪਿਣ੍ਡਂ ਠਪੇਤਿ, ਤਂ ਅਕਪ੍ਪਿਯਂ ਉਗ੍ਗਹਿਤਕਨ੍ਤਿ ਸਿਦ੍ਧਂ. ਅਯਮੇਵਤ੍ਥੋ ‘‘ਸਚੇ ਅਤ੍ਤਨੋ ਵਾ ਭਿਕ੍ਖੂਨਂ ਵਾ ਯਾਗੁਪਚਨਕਭਾਜਨੇ…ਪੇ… ਨਿਰਾਮਿਸਂ ਕਤ੍ਵਾ ਪਰਿਭੁਞ੍ਜਿਤਬ੍ਬ’’ਨ੍ਤਿ ਵਚਨੇਨ ਸਂਸਨ੍ਦਿਤ੍ਵਾ ਕਥੇਤਬ੍ਬੋ. ‘‘ਕਪ੍ਪਿਯਮਂਸਖੀਰਂ ਵਾ’’ਤਿ ਪਸਙ੍ਗਵਸੇਨ ਵੁਤ੍ਤਂ. ਦਧਿ ਚੇ ਪਟਿਲਦ੍ਧਂ, ਤਞ੍ਚ ਅਧਿਪ੍ਪੇਤਨ੍ਤਿ ਕੇਚਿ.

ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਭੋਜਨਵਗ੍ਗੋ ਚਤੁਤ੍ਥੋ.